CLOSE WINDOW

Gpb034.022
བོད་ཡིག

/ rdo rje sems dpas gsungs pa'o// rdzogs so//// rgya gar gyi mkhan po shrI sing ha dang// bod kyi lo tsa ba bai ro tsa nas bsgyur ba'o// a haM/ rgya rgya rgya/ rgya rgya rgya/ shu b+haM//// rgya gar skad du/bo d+hi tsit+ta a lang ka ra a man ta b+ha ba nA ma/ bod skad du/ byang chub kyi sems kyi rgya mtsho klong dgu'i rgyud ces bya ba// bcom ldan 'das rtsol bral dad la phyag 'tshal lo// 'di skad bshad pa'i dus gcig na/de bzhin gshegs pa rang byung gsal ba'i sangs rgyas// thams cad rang rig gsal ba'i ngo bo// ye shes 'od gsal bde ba chen por rdzogs pa nyid/ rig pa mtha' dbus med pa'i gzhal yas khang/ rang rig gsal ba'i dkyil 'khor ye shes chen po'i klong gi gnas na/ rang bzhin gyi 'khor dang/ rang bzhin lta ba dang/ rang bzhin rtogs pa dang/ dus gsum gyi sangs rgyas ril rig pa'i klong du thabs cig pa'i tshul du bzhugs so// de nas bcom ldan 'das de bzhin gshegs pa rdo rje sems dpa' la/ phyag na rdo rjes thams cad kyi rang bzhin 'di skad ces gsol to// tshogs chen byang chub sems nyid ni// bstan pa thams cad kun 'dus pa// rig pa bstan pa kun gyi klong// bya bral rdzogs lung bshad du gsol// zhes zhus so// de nas bcom ldan 'das ye shes klong gi ting nge 'dzin la snyoms par zhugs te// thams cad ye shes chen po'i klong du gcig par gyur te bka' stsal ba// byang chub sems kyi rang bzhin ni// rang byung rig pa mchog gi klong// gsang ba rang byung snying por rdzogs// 'od gsal rig pa kun la khyab// rang bzhin ngo bos zhi ba'i phyir// mtshan ma dag pa'i chos nyid ni// ma bcos gsang ba thugs kyi klong// gsang ba rang byung snying por rdzogs// 'od gsal rig pa kun la khyab// rang bzhin ngo bos zhi ba'i phyir// mtshan ma dag pa'i chos nyid ni// ma bcos gsang ba thugs kyi klong// rig pa'i dbyings las gzhan min pas// tshig dang yi ge kun las 'das// 'byung 'jug med pa'i rig pa la// gnyis pa mi gnas gcig mos kyang// brjod pa sgra yi tshul gyis bstan// zhes gsungs so// de nas yang sems dpa' rdo rje des 'di skad ces zhus so// rang byung rig pa'i dbyings kyi klong// thams cad gsal ba'i snying po ltar// rkyen bral yon tan mthar phyin yang// rgyal po'i phrug gu 'khyams ba ltar// spyi yi rang mtshan ma rtogs pas// rang rtags log pa'i lta ba yis// gnyis med don la gnyis par gzung// brjod bral don la brjod pas nor// dmigs med don la dmigs 'dzin byas// phyogs bral don la phyogs su bltas/ khams gsum 'khor ba'i ngo bor smin// 'on kyang rin chen gling bzhin du// gnyis pa'i tshul de mi gnas na// skal ldan rnams kyi don slad du// klong chen bstan pa bshad du gsol// zhes zhus so// de nas yang de bzhin gshegs pa rdo rje sems dpas bka' stsal pa// sel med gsang ba rgya mtsho'i klong// dbyer med ye 'byam rmad du grags// thams cad sangs rgyas mthar phyin pas// rang byung byang chub sems kyi lung// sgrib med 'od gsal snying po ltar// rgyu rkyen bral ba'i dbyings la rdzogs// dung la ser por 'dzin pa ltar// rang rtog log pa'i 'du shes kyis// brtags kyang dngos la mi gnas ltar// gdod nas rang byung snying po mchog/ sbyangs bsags med par lhun gyis grub// sangs rgyas sems can gcig pa'i lung// sems nyid rig pa'i klong gi don// gsang ba'i yang gsang rig pa'i nyams// brjod bral bshad pa kun las 'das// mtha' dbus bsam pa kun dang bral// ye shes snying po gsang ba'i dbyings// thams cad rang byung klong rdzogs pas// bya ba'i mtshan ma kun las grol// snying po mi phyed yul las bral// byams pas nam mkha'i mtha' ltar brdal// dga' ba rang byung gsal ba'i nyams// btang snyoms 'dzin bral yengs pa med// klong chen bya bral rdzogs lung la// gdod nas rgyu 'bras mthar phyin pas// btsal med lhun gyis grub par gnas// sems nyid ye shes gsang ba ni// phyogs 'dzin zhen pa'i yul min pas// skal ldan rdzogs pa'i rnal 'byor pas// spong 'gegs med pa'i tshul gyis gnas// klong chen gsang ba'i thig le ni// thams cad yin pas dgag sgrub med// rang byung yin pas rgyu rkyen bral// lhun gyis grub pas btsal du med// gdod nas dag pas sbyang du med// gnyis med ye shes gsal ba la// phyogs 'dzin 'khrul 'khor log pa'i lam// skal ldan rgyal sras dam pa nyid// ma bsgrod dus gcig rdzogs bya'i phyir// gsang ba'i rig pa klong dgu'i rgyud// dus mtha'i skad cig tsam la gsungs// zhes gsungs so// rin chen klong dgu'i rgyud las// gleng gzhi gsang ba'i le'u ste dang po'o//// de nas sems dpa' rdo rjes// bcom ldan 'das rdo rje sems dpa' la 'di skad ces zhus so// dus gsum sangs rgyas thams cad kyi// rang bzhin gsang ba klong gi bdag/ rin chen 'bar ba lhun grub ltar// 'phel 'grib med pa'i rang bzhin khyod// rin chen sems kyi rang bzhin gang// rgya mtsho klong gi yon tan ltar// phyogs ris mi mnga' gcig gi ngang// skal ldan gsal ba'i don du gsungs// zhes zhus so// de nas de bzhin gshegs pas bka' stsal pa/rin chen rgya mtsho gsang ba'i rgyud// gsang ba sems kyi rang bzhin te// kun gyi snying po gsang ba'i don// rin chen klong dgu thugs la rdzogs// gsang ba'i lam dgu nyi mar 'char// 'bras bu rin chen phung po ltar// btsal sgrub med par rang la 'char// yon tan rol pa bsam mi khyab// dngos gcig chos tshul bsam pas phye// don du ye shes rdzogs par gnas// 'od gsal rig pa'i me long la// rol pa'i gzugs brnyan 'char ba ltar// ma bcos gsang ba'i me long ni/ khyab par gsal la rang bzhin med// rang byung gsal ba'i me long ni// rang gsal rig pa'i dbyings la gsal// mtshan ma thabs kyi me long ni// rang la rdzogs pa'i gnyen po med// 'du 'bral med pa'i me long ni// gnyis med 'dres pas gcig tu gsal// snang srid 'phrul gyi me long ni// ma 'dres rig pa'i don du rdzogs// rang bzhag rig pa'i me long ni// gang yin ba de de ltar yin// kun 'dus rdzogs pa'i me long gis// brgyad po sems la gsal bar rdzogs// dgu bskor rig pa dbyings la sdud// thams cad sems nyid rdzogs pa la// gnyis med rig par don du gsal// mkha' ltar gsal ba'i rang bzhin la// snying po rang gsal don du mthong// snang srid rgyal ba'i spyod pa la// rang byung klong du ye shar bas// rang byung klong gi spyod pa ni// rang byung rig pa'i ngang na spyod// byang chub sems kyi dkyil 'khor la// 'khor lo mtshan ma'i ming bral ba// sku gsum lhun grub sems nyid klong// rang byung gsang ba'i dkyil 'khor ro// rang byung rang gsal gdod nas rdzogs// ma btsal rig pa lhun rdzogs pas// gnyis pa med par ye rdzogs pas// rang dbang sems nyid rdzogs pa'i lung// thams cad sems las gzhan med do// phyogs ris med pa'i ye shes nyid// rang gsal sems nyid gcig pur 'dus// 'da' med ma bcos lhun grub po// bya bral rig pa lhun rdzogs la// gnyis med dus gcig lhun rdzogs pas// las mthar phyon pa'i sems nyid la// bya bral rdzogs pa'i 'phrin las nyid// btsal bral 'od kyi snying po ltar// ye shes dus gcig khyab par gsal// gsang ba'i ye shes ma bcos sems// ma bcos ye shes gsang ba'i klong// mtha' bral bgrod med sems nyid la// yon tan lhun rdzogs bgraud med de// rang byung gsang ba dbyings kyi lam// 'byung 'jug bral ba'i bgrod med sa// rdzogs chen lhun grub sems nyid la// 'bad rtsol med par kun 'char bas// 'bras bu nyid las 'bras bu 'byung// rin chen lhun grub lta bur gsal// zab mo gsang ba'i rang bzhin ni// kun 'byung gcig 'dus rgya mtsho'i klong// rang byung rol pa bsam mi khyab// thams cad 'dus pa'i snying po yin// yon tan lhun grub phyogs ris med// mkha' gsal 'od kyi rang bzhin ltar// rang bzhin byin rlabs mchog tu shar// thams cad rang byung snying po bas// 'du 'bral med par gcig la rdzogs// yon tan dus na phyogs rigs med// lhun grub dus na gcig tu gsal// brjod med rig pa'i snying po la// rig pa'i cho 'phrul yongs kyis 'byung// sel med ye shes gsal ba'i klong// nam mkha' gsal ba'i klong yangs ltar// 'byung 'jug med pas sgro skur bral// yangs pas dgag sgrub kun bral rgyan// mtha' dbus med pa'i de bzhin nyid/ khyab pas kun la snyoms par gnas// rgyu rkyen bral bas skye 'jig med// ma spangs dang du cir ma blangs// kun gyi 'byung gnas sems nyid ni// rang byung dgongs pa rgya mtsho'i klong// rgyal ba'i dgongs pa'i phugs yin no// mkha' mnyam rig pa'i klong 'di la// sangs rgyas sems can gnyis med pas// gnyis med rig pa'i klong zhes bya// 'khor dang mya ngan 'das med pas// byang chub snying po nyid kyi klong// bde dang sdug bsngal dbyer med pas// bde chen gsang ba'i klong zhes bya// 'dod 'byung btsal bral lhun grub pas// rin chen rig pa dbyings kyi klong// yon tan nam mkha'i mtha' ltar 'byung// man ngag klong gi rang bzhin ni// gang yang mi mkhyen rang gsal mkhyen// snying po mtha' dbus las 'das pas// sgra tshad brjod pa'i yul las 'das// dmigs pa'i don du mi 'gyur bas// bsam dpyad mtshon pa'i yul dang bral// kun gsal rig pa gcig la rdzogs// 'do gsal lhun grub chen po la// zhen pa'i rtags pa gdod nas med// kun gsal ye shes gsang ba'o// phyogs med ye shes lhun grub ni// btsal ba ma yin bsgrubs pa min// dmigs pas ma yin bsam pa min// rang gsal ma yin gzhan pa min// rang byung rig pa cir mi dgongs// chos nyid ma bcos gsang ba'i mchog/ 'khor ba ye sangs rgyas pas na// mya ngan 'das la re ba med// sku gsum brtags pas mtshan ma pas// sangs rgyas rnam rtog 'khrul pa'i lam// thams cad byang chub sems su gsal// sems nyid ma bcos klong gi don// ma bsgribs gsal la rang bzhin 'char// 'gro drug ye shes snying po bas// byang chub sems kyi klong du bdal// cir snang sems nyid rdzogs pa'i klong// yin pas gnyis pa rnam par bcad// ma btsal ma bsgrubs rang bzhin gnas// ma bcos mkha' ltar dag pa'o// rin chen klong dgu'i rgyud las/ rang bzhin klong gi le'u ste gnyis pa'o//// de nas yang sems dpa' rdo rje dam pa des/ de bzhin gshegs pa rdo rje sems dpa' la 'di skad ces gsol to// dus gsum sangs rgyas thams cad kyi// ye shes byang chub sems su gsal// rang byung dag pa'i snying po la// klong dgu'i bstan pa ji ltar 'char// zhes zhus so// de nas de bzhin gshegs pas bka' stsal pa/ rang byung rig pa nyag gcig la// yon tan cha dgur gzhi la rdzogs// de nyid gsal bar mtshon pa'i lung// bstan pa klong dgu thugs las shar// rig pa byang chub sems kyi klong// 'phro 'du rig pa dbyings la gsal// bstan pa rgya mtsho sems kyi lung// nges pa gcig tu gsal ba yin// rin chen klong gi rang bzhin ni// ma bcos sems kyi rang bzhin yin// de nyid mtshon pa thabs kyi sgo// ma bcos thabs kyi klong dgu nyid// brjod bral rtogs pa bya phyir bstan// ma bcos gsang ba'i klong dgu la// lam gyi klong dgus mnyam sbyar nas// 'bras bu lhun rdzogs gcig tu snang// lta ba gza' bral rig pa'i klong// mtha' dbus bral ba'i dkyil 'khor nyid// ye shes rang gsal 'gag med klong// blang dor med pa kun tu bzang// bsam bral ma yengs dgongs pa'i klong// bskur thob med par rdzogs pa'i dbang// ma bgrod mthar phyin gsang ba'i lam// ma bcos bsrung bral dam tshig klong// rang snang lhun grub 'bras bu'o// rang byung klong gi don rtogs pas// kun kyang byang chub sems su gsal// rang byung mchog gi snying po la// chos kun 'dus pas lus pa med// gsang ba'i dkyil 'khor grangs med pa// 'dus pa'i thabs la bstan pa yin// gcig 'dus rdzogs pa'i rang bzhin la// tha dad rtags pa kun gyis stong// gcig po kun gyi snying po nyid// ma zin pa yi chos rnams med// rdzogs pa'i ye shes ma bcos pa// rang gsal snying po don du mthong// gcig ste rnam pa mi gnas pas// dag pa'i ye shes gti mug pas// rang byung gsang ba'i snying po la// rnam par dbye ba'i chos mi gnas// bsam bral rig pa'i dkyil 'khor la// ma bcos rig pa'i stobs kyis gsal// ma bcos rang byung rol pa la// rnam rtog mtha' yi zhen pa med// rang gsal dri med dag pa la// mtha' yi sgrib pa kun dang bral// bya bsam gnyen po kun bral ba// 'dzin bral snying po rang byung yin// ye shes gsal ba'i rang bzhin ni// gnyis med sems las gzhan pa med// rang byung mtha' gsal thig ler dag/ mtha' dbus med pa'i de bzhin nyid// bcos pa ma yin rang bzhin gsal// sbyangs pa ma yin gdod nas dag/ kun 'dus rdzogs pa'i sems nyid klong// gdod nas spros med snying por gnas// rang gsal sgrib med chos kyi dbyings// gnyis pa med do ye sangs rgyas// ma bcos gsang ba'i rang bzhin 'di// phyogs bral mkha' ltar khyab par bdal// tshig dang yi ge las 'das pas// mtshon bral chos dbyings gsang ba la// ji ltar brtags pa phyin ci log/ rang gsal snying po dag pa la// gzhan byung rgyu rkyen nor ba'i lam// kun gyi mnyam nyid gsang ba la// sgro skur phyogs bltas mthong ba med// gsang ba rgyu 'bras dag pa la// de dag mtshan ma 'khor ba'i lam// phyogs 'dzin zhen pa'i sgra tshig gis// zhen pa'i ngag sogs gtan tshigs kyis// byis pas mtha' bral lta ba ltar// de dag rig pa'i gtan tshigs min// gnyis med gsang ba'i rang bzhin la// zhen pa'i tha snyad brjod du med// gsang ba'i yang gsang dgongs pa ni// bya bral rig pa brdzogs lung la// rang thad blo yis yul ma yin// rgyud dag rig pas mi mthong zhing// rang byung rdzogs pa mchog gis shes// 'di ltar gsang ba'i rang bzhin 'di// lung dang man ngag nyams kyis ni// brjod bral gsang ba'i don yin kyang// brjod pa'am gsang ba'i tshul gyis bshad// rang rig gsang ba'i nyams kyis go/ rdo rje gsang ba'i lung gis shes// nges pa'i rig pa the tsom bral// gsang ba'i me long rang gsal la// bcos med rang bzhag tshul gyis blta// rang gsal rdzogs pa'i lta ba ni// ci yang yin no gang yang rung// sems nyid gsang bar lhun gyis rdzogs// ma bcos rig pa lhun rdzogs la// ma spyad rang gzhag dgongs pas gzhag/ rang byung rdzogs pa'i lta ba la// mtshan ma'i gza' gtad kun dang bral// yul med rig pa rang gsal la// 'dzin dang zhen pa kun gyis stong// rang byung dag pa'i dbyings la gsal// 'byung 'jug yul dang dbang pos stong// gsang ba'i rang byung shes pa nyid// rang byung rig pa mchog gis shes// gsang ba'i thig le nyi ma shar// rang gsang snying po don la dgongs// rig pa 'od 'bar mchog la gnas// gsang ba rig pa gter la goms// rdo rje gsang ba lung gis shes// rdo rje snying po byang chub lung// rig pa'i don la de ma thag/ ma btsal rig pa'i ye shes nyid// rgyu rkyen bral bas rang bzhin gsal// rtogs te rang byung gsal ba shes// dmigs gsal bral ba'i dbyings la 'jug/ gsang ba rang rig lung gis rtogs// gnyis med rig pa gcig tu 'bar// rgyu ba rig pa'i mngon sum lung// dran rtog ma yin snying por rdzogs// rang byung rig pa'i thig ler 'brel// rtsa bral snying por de ma thag/ byang chub mchog gi snying por 'byung// rang byung rig pa ma yin pa// gang yang mi gnas dran rtog spangs// bsam bral rig pa'i sgra tshig gis// brjod bral chos kyi dbyings nyid bshad// ci yang rung ba'i mtshan nyid ni// rang gi rang bzhin gsal bar shes// ji ltar gnas pa'i rnal 'byor pas// mtshan ma'i brda bral mngon sum rig/ rgyu mtshan rnam rtog kun dang bral// mi gnas khyab pa'i rang bzhin ni// gdod nas rnam grol rdzogs pa la// ma btsal lhun gyis grub par gnas// rang byung gsang ba'i me long la// phyogs med gsal ba'i gzugs brnyan 'char// ma bsgribs rig pa 'od gsal la// rang bzhag snying por rang bzhin rtogs// rang byung gsang ba'i snying po la// gsal bar shes shing goms par rtogs// rang rig mchog gi slob dpon gyis// ma bslabs mkhyen pa dus gcig rdzogs// mkha' gsal rig pa'i rjes mi 'brang// bsam spyod dgongs pa kun gyi lung// rgyal ba'i dgongs pa ye shes nyid// 'byung 'jug spangs pa'i tshul gyis ni// rang byung gsang ba'i tshul gyis gsal// rang byung rig pa rang shar ba// ye shes snang ba'i mtshan nyid ni// rang byung klong gi dgongs pa yin// gsal ba rang byung rdzogs pa la// gnyis med rig pa'i thig ler gsal// spros pa'i mtshan ma kun gyis gsal// rtsol ba'i rnam grangs gang snang yang// rang byung sems las gzhan ma yin ces gsungs so// rin chen klong dgu'i rgyud las// lta ba'i klong gi le'u ste gsum pa'o//// de nas sems dpa' rdo rje des/ de bzhin gshegs pa rdo rje sems dpa' la 'di skad ces gsol to// dus gsum sangs rgyas thams cad kyi// gsang ba'i 'khor lo bsam mi khyab// sku gsung thugs kyi rang bzhin ni// bdag la gsal bar gsung du gsol// zhes zhus so// de nas de bzhin gshegs pas bka' stsal pa/ dus gsum rgyal ba thams cad kyi// dkyil 'khor gsal ba'i rang bzhin ni// nam mkha' bzhin du khyab par bdal// rang byung rdzogs pa'i dkyil 'khor du// ma rdzogs pa yi chos mi gnas// snying po 'od 'bar thig le la// sku gsung thugs kyi dkyil 'khor rdzogs// kun 'byung rig pa'i dkyil 'khor la// mtha' dbus zhen pa'i brtags pa med// rang rig gsang ba mchog gi nyams// brjod bral rig pa'i don la rdzogs// rang byung mchog gi snying po ni// 'du shes bral la rig pas gnas// chos rnams kun gyi ngo bor shar// rang byung rdzogs pa'i dkyil 'khor du// ma rdzogs pa yi chos mi gnas// snying po 'od 'bar thig le la// sku gsung thugs kyi dkyil 'khor rdzogs// kun 'byung rig pa'i dkyil 'khor la// mtha' dbus zhen pa'i rtags pa med// rang rig gsang ba mchog gi nyams// brjod bral rig pa'i don la rdzogs// rang byung mchog gi snying po ni// 'du shes bral la rig pas gnas// chos rnams kun gyi ngo bo shar// mtshan ma rig pas mtshon du med// ma skyes rig pa'i dkyil 'khor la// mtha' dbus bral ba'i rtsol ba med// sku gsung rig pa'i 'khor lo can// bsam sbyor blo yis rjes su dpags// ma 'phros nyi zla'i dkyil 'khor ltar// rang byung rig pa mchog tu gsal// ma bskyed dkyil 'khor ye nas rdzogs// 'jug pa gsang par mnyam sbyor ba// 'du 'bral med pa'i dbyings la gsal// rang byung gsang ba'i dgongs pas gnas// spyan drangs ma yin ye nas gnas// rang byung g.yo med dkyil 'khor las// thugs rje'i byin rlabs 'od ltar 'phro// thugs rje'i byin rlabs 'gro 'ong med// 'gro lnga ma bsgral ye shes klong// ye shes klong rdzogs dkyil 'khor ni// thig le klong rdzogs brdal ba yi// snying po rang byung thig le bas// thig le nyid la thig le rdzogs// bsam bral rig pa'i dkyil 'khor la// rang bzhag ma bcos dgongs pas gnas// skal ldan rig pas khyad par du// dgongs pa klong brdal thugs su gsal// cir snang sems su lhun rdzogs pas// rang rig gsang ba'i dkyil 'khor yin// de dag goms rtags mtshan nyid ni// ma btsal klungs su zhugs pas rtogs// rang rig gsang ba'i nyams myong yang// rjes 'dzin rnam rtog kun dang bral// rang gsal blo la ye gnas pa// 'jug dang 'byung ba'i rtsol ba med// mnyam nyid gsang ba'i dkyil 'khor ni// rdo rje gsang ba'i dus kyis shes// rkyen bral rig pa rang gsal la// dwangs ma yin pas rnyog ma med// rang bzhin ched du byas pa dang// btang snyoms bral ba'i dngas ma ni// mkha' gsal dri med ji bzhin te/khyad par nyams myong gsal 'dzin med// gzhon nu'i bde ba'i nyams myong ltar/ khyab par gsal la dmigs dang bral// rang byung brjod bral gsang ba'i nyams// brjod pas ma yin goms pas shes// dper na myong ba'i rang bzhin ltar// tshig tu ma yin don la rdzogs// btang bzhag bral ba'i rig pa ni// bsam bral rig pa'i dkyil 'khor yin// de bzhin nyid dbyings gsang ba yis// bde mchog ye shes dkyil 'khor bas// mtha' dbus che chung yongs kyi med// bskyed bral gsang ba'i dkyil 'khor la// ye nas sku gsum lhun gyis rdzogs// nam mkha' mi 'gyur rtag pa ltar// bde mchog rtag chen mchog gi sku// gsang ba ngos gzung mi mnga' yang// bsam dbang 'dul thabs mtshon dgos pas// thun mong khyad par sna tshogs pas// ye shes ngos gzung man ngag bshad// gsang sngags rdo rje thabs kyi lung// ye shes gsang ba mtshon pa'i thabs// ma yin de dag yod ma yin// phyogs med rang gsal dkyil 'khor la// yengs ba med pa'i sems kyis 'jug/ rang byung rig pa'i lta ba ni// mtha' bral dbu ma drang po'i lam// mtshan bral dbyings nyid gsang ba la// rang rtags log pa'i bsam pa yis// bskyed bsgrub dkyil 'khor log pa'i chos// phyogs 'dzin log pa'i rtsol ba yis// gang ltar brtags pa log pa'i lam// 'dod pa'i dngos po gang mthong tshor// 'od gsal dkyil 'khor nyid du shes// kun 'byung mtha' dbus kun bral la// blo yi 'jug tshul cir ma brtags// rdo rje nam mkha' gsang ba'i sems// rang rig 'od gsal rnam par dag/ chos rnams kun gyi rang bzhin du// rang byung rig pa'i rgyal po shar// chos dbyings 'gyur med dbyings kyi lung// dngos bsam ji bzhin bzhag pas rtogs// rnam rtog dkyil 'khor grangs med pas// 'thun 'jug ngo la de ltar gsal// rang gsal rig par shugs kyis gcig/ chos kun gsang ba'i rang bzhin pas// kun gyis mthong thos yul dang bral// gnyis med rig pa cig la thim// gsal 'gyur mi dmigs don gyis shes// ma yengs bsam bral rig pa'i klong// mi bsam mi bshad chos kyi dbyings// shes rig ye shes nyid du 'char// dran pa kun spangs ye shes nyid// mi 'byed blo nyid gsang ba'i sems// chos can ma yin chos nyid min// ci yang ma yin 'od gsal yin// mtha' yi 'du shes kun bral te// ting 'dzin rig pa gsal ba'i nyams// gsal la 'byung 'jug med pa ni// de bzhin nyid kyi rnal 'byor ro// rin chen gsang ba'i dkyil 'khor 'di// kun la khyab pa'i tshul gyis gnas// zhes gsungs so// rin chen klong dgu gsang ba'i rgyud las/dkyil 'khor chen po'i klong gi le'u ste bzhi pa'o//// de nas sems dpa' rdo rje la// de bzhin gshegs pa rdo rje sems dpas ye shes sgrib pa med pa'i klong 'di gsungs so// ye shes gsang ba'i rang bzhin ni// ma rig ye shes gnyis med gcig/ rang gsal rig pa'i thugs su gcig/ gnyis med sems kyi ye shes la// grangs dang rnam pa bgrang du med// bgrang na mtha' yas brjod mi lang// gdod nas rang byung ye shes pas// rgyu dang rkyen las rag ma las// rang rig nyid pas gzhan dang bral// rang gsal nyid pas yul dang bral// ye nas shes pas ye shes yin// rang gsal rig pa'i ngo bo la// gnyis dang tha dad mi gnas te// rnam par brtags pa'i dbang gis na// ji ltar brtags pa bzhin du mthong// ye nas dmigs 'dzin zhes pa'i phyir// gang dang gang du ci byung ba// de yi rnam grangs nyid yin pas// de las gzhan pa rnam par bcad// ma skyes 'khor lo mnyam du gsal// rang gsal rig pa ma yin pa// mtshan ma dmigs pa kun dang bral// phyogs ris med pa'i ye brdal bas// mtshan bral dbu ma'i lam po che// dpe ni nam mkha' lta bu ste// mtha' dang dbus med de bzhin nyid// ma btsal rang byung rgyal po la// shes dang mi shes kun dang bral// lhun grub ye shes phyogs ris med// mnyam nyid ye shes che chung med// me long gsal la rtog pa med// so sor rtog pa ma 'dres pa// bya ba grub pa mthar phyin pa// mkhyen pa'i ye shes nyag gcig la// yon tan cha re grangs su bstan// snang srid snod bcud rang bzhin ni// byang chub sems su mngon sangs rgyas// kun gyi rang bzhin bdag yin pas// thams cad byang chub sems su gsal// mi rtog brda 'jal gsang ba'i thugs// ldan pa de nyid tsam du zad// rdzogs pa'i ye shes dus gcig go/ ye gsal rig pa phyogs med gsal// 'dzin bral rig pa dbyings la bzhugs// snang srid chos rnams mi shes pas// snang ba ma bcos rang bzhin yin// de dag ma yin thams cad yin// phyogs bral gsal ba'i ye shes yin// bsam zhing mi spyad legs pa yin// 'dzin chags med par rang snang ba// rol pa nyid du shes par bya// ye shes rgyu ba'i dus nyid dang// rnam rtog rgyu ba'i dus nyid dang// btang snyoms dus dang rang bzhin dus// nges par brtags te shes par bya// de dag legs par shes pa las// gsang ba'i ye shes rang bzhin 'char// dgongs pa gsang ba rang byung ba// rdo rje rig pa'i klong la gsal// rdo rje nyi ma phyogs med gsal// brda sprad dus dang phrad pa'i dus// phral dang klung zhugs du nyid kyis// gang la de ltar mtshan pa yi// spyod pa legs par spyad par bya// sgom dang goms dang btang snyoms kyis// rang nyams gsang ba'i rig pa sbyar// de dag goms zin mngon gyur pas// lhun grub gsum du rdzogs pa yin// byang chub sems kyi ngo bo ni// bsam pa 'dul ba'i khyad par du// ye shes grangs su mthun par bstan// kun kyang rang byung gsang ba'i dbyings// rang byung rol pa dus gcig gsal// rim pa ma yin gdod nas rdzogs// nyi ma shar ba'i 'od dang mtshungs// grangs med gsang ba'i ye shes ni// mtha' dbus grangs kyi chos dang bral// gsang ba khu byug klong dgu'i rgyud// dus gcig bstan pa nyid kyi lung// sgro skur bral ba'i bstan pa rdzogs// rang rig gsal ba rig pa'i nyams// rig pa 'pho 'gyur med pa'i gter// kun 'dus snying po mchog gi lung// ma brjod go bar rig pa'i gsung// bstan pa'i me long thugs la gsal// rang byung gsang ba'i brda don ma sprad na// bde chen rang gsal don dang shin tu 'gal// chos sku ma bcos snying po ni// ye shes gsang ba 'du 'bral med par brjod// rang rig gsang ba lhun grub pas// mtho dman che chung yongs kyi med// rang rig bdag gzhan mi gnas pas// 'dzin bral ye shes kun bdag nyid// nam mkha' lta bu'i chos nyid ni// snang srid byang chub sems su gcig/ zhen brtags 'jig rten chos dang bral// 'gyur med rang byung ye shes la// bden brdzun mi mnga' dbyings nyid gcig/ gang snang mi gnas dbyings nyid lung// chos sems gnyis med ye shes gsal// kun mkhyen rig pa mnyam du shes// 'dzin bral rig pa 'od gsal bas// stong chen 'od gsal ye shes yin// ji ltar snang grags chos kun ni// gnyis med gdod nas dag pa la// ye shes mos pa ma 'dres gsal// spros bral rang byung rig pa las// rol ba'i 'khor lo yongs kyi 'byung// 'od 'bar ye shes rmad po che// rang gsal rig pa'i don du mthong// ma 'dres rang gsal ye shes so// snying po spros bral thig le drug/ mi 'gyur snying po don du gnas// ma bcos rang gsal kun tu bzang// gnyis med rang rig dmigs yul grol// ma 'gags mi bsam cir mi dgongs// zhes gsungs so// rin chen klong dgu'i rgyud las/ ye shes sgrib pa med pa'i le'u ste lnga pa'o//// de nas sems dpa' rdo rje des// de bzhin gshegs pa rdo rje sems dpa' la 'di skad ces gsol ba btab bo// dus gsum sangs rgyas thams cad kyi// blang dor med pa'i rang bzhin dag/rnam rtog spong len mi mnga' ba// 'dus pa'i tshogs la gsal bar gsungs// zhes zhus so// de nas de bzhin gshegs pas spyod ba blang dor med pa'i klong 'di gsungs so// sgo gsum rdo rje ma bcos pa// nam mkha' rdo rje gsang ba lung// 'gro 'dul thabs kyi spyod pa yis// ma nges de lta nyid du blta// lus kyi rdo rje ma bcos pa// ched du spyad pa gang mi byed// phyag dang bskor ba'i las mi byed// phyag rgyas bcing ba'i las mi bya'o// gang ltar bzhag pa de ltar bde// ma bcings grol ba gsang ba'i lus// ma bcos yal ba nyid du bde// thogs med gsang ba'i spyod pa ni// ma bcos gsang ba'i ngang la spyod// rang byung lus kyi spyod pa la// yengs ba med pas ma bcos spyod// zhen pa'i ngag sogs gang yang med// bzlas dang kha ton la sogs ba// bcos ma yin phyir de nyid min// zhen pa'i ngag brtags dag rtogs na// kun kyang bzlas pa'i ngo bor gnas// zin dang ma zin sgra kun ni// rang byung gsang ba'i gsung du gnas// rang byung gsang ba'i mtshan nyid ni// rdo rje sgra tshig rnam par spangs// ma bcos gsang ba gsung gi spyod par bshad// bsam bral spyod pa'i 'du shes spangs// tha dad spyod pa'i shes pa ni// ye shes khyab brdal kun tu bzang// ma bcos gsang ba'i sems kyis gnas// rgya mtsho chen po'i rang bzhin ltar// 'du 'phro dbyings gcig ngo mtshar che// gsang ba'i thig le ma bcos sems// rang gsal nyams myong gcig tu zad// rang rig gsal ba bde ba'i nyams// ma btsal rang gzhag rig pas rnyed// ma btsal lhun grub spyod pa yis// thams cad ma bcos gsang ba yis// 'du 'phro bde gnas chos kyi dbyings// ma lus thig le chen po nyid// ye shes 'od gsal spyod pa la// zhen pa'i rtog pa rnam par bcad// rnam rtog rgyu ba'i yu ba bcad// ma bcos nam mkha' rdo rje la// sgo gsum spyod med snying por spyod// rang bzhin thabs mkhas spyod pa ni// gang yang dgag sgrub kun dang bral// dran rtog rgyu ba'i bsam pa mtha' yas pa// rtsol bral rnam par blta bar bya// rang byung klong la ye gnas pas// dgongs pa de dag nyid du bzhag/ ma bcos lhun grub spyod pa la// spyod ba'i spyod pa phyin ci log/ ma btsal rig pa lhun grub la// rtsol ba'i spyod pa log pa'i chos// bsam gyis mi khyab spyod pa la// rang bzhin mnyam pa'i sems kyis lta// ji ltar gnas pa'i sems nyid la// yengs pa med do thams cad yin// 'gro 'dul mdzad pa'i khyad par gyis// ji ltar 'dul ba de ltar bstan// rang rig dbyings las ma g.yos kyang// 'gro 'dul thugs rje'i dkyil 'khor ston// thams cad rang byung thabs kyi lam// bkag med thabs mkhas g.yo med kyis// 'gro drug thugs rjes sa la sbyor// grol thar gsang ba sems kyi dbyings// 'gro drug rang thad spyod pa yang// thabs mkhas ye shes spyod pa yin// thabs ldan rig pa'i gdeng ldan na// dge sdig khyad par mi gnas pas// 'dul thabs de lta nyid du bshad// thabs la mkhas pa'i spyod pa yin// gsang sbyor rig pa'i don med na// chags sdang zhen pa'i las mi byed// gsang ba thabs mkhas spyod pa yis// rdzogs chen thugs kyi rna brgyud 'di// gu lang gung gi gser gzo ru// legs par brtags pa'i tshul gyis bstan// thams cad rang rig yul med pas// rang la rang gi bye brag bstan// 'od gsal thugs la gnyis med kyang// rnam rtog brtags pa 'dul dbang gis// thugs rje'i byin rlabs 'ong ltar 'phro// kun kyang rang gsal dbyings la thug/ su zhig thugs kyi rang bzhin las// 'dul ba'i sku gsung grangs med pa// 'dul ba'i thabs la bstan pa yin// rang gsang byang chub sems kyi long// rtogs pa'i blo la gnyis su med// rin chen rtogs pa'i gdeng med par// rnam rtog rtsol bas ci btsal yang// rang gsal rig pa'i 'od nub pas// don med log pa'i lam du ltung// rin chen gsang ba'i sems nyid ni// gang ltar brtags pa bzhin du mthong// de dag thams cad ma bcos pas// btang bzhag mi gnas mnyam par mthong// thogs med thabs mkhas rnal 'byor bas// rtsol med gsang ba'i don goms nas// rnam grol sa la 'gro bar 'gyur// skal ldan rdzogs pa'i rnal 'byor pas// rim pa med par dus gcig smin// rnam grol nges pa'i gdeng med par// spyod pa chags sdang mngon 'chil ba// ngan 'gro'i gnas su 'khyams par 'gyur// zhes gsungs so// rin chen klong dgu'i rgyud las/spyod pa gsang ba klong gi le'u ste drug pa'o//// de nas sems dpa' rdo rjes// de bzhin gshegs pa rdo rje sems dpa' la 'di skad ces gsol to// dus gsum sangs rgyas thams cad kyi// rang gzhag rig pa dgongs ba'i klong// ma yengs dran gsal rig pa'i thugs// 'dus pa'i tshogs la bshad du gsol// zhes zhus pa las/ de nas de bzhin gshegs pa rdo rje sems dpas rang bzhag dgongs pa'i klong 'di gsungs so// dus gsum rgyal ba thugs kyi thugs// ma bcos thig le yengs ba med// gsang ba mi g.yo rnam par dag/ ji bzhin rang bzhin rig pa las// de ma thag tu gsal bar 'char// rna brgyud thugs brtol bdud rtsi yis// rig pa mngon sum gsal bar bstan// mi 'byed rang rig mchog gi lung// gsal la mi g.yo mchog gis shes// 'byung 'jug mi gnas dbyings la gsal// rang gsal ji bzhin rnal 'byor la// mtshan ma'i sgro skur kun dang bral// tshig dang yi ge las 'das shing// snying po 'byed pa gang yang med// 'dzin pa'i rnam rtog gang yang min// mi gnas gsal bar goms pa yis// shar bas 'od gsal chen po yin// gdod nas lhun grub phyogs med la// bcos pas rnam rtog 'khor ba'i lam// btsal med mi g.yo bde mchog 'di// ma btsal rang bzhin gzhag pas go/sems nyid drag dal gang sgo nas// de ltar mthun pa'i thabs kyis bstan// thug phrad shes pas 'du 'bral med// gsang ba'i rig pa nyams myong med// ji ltar chu la chu bzhin no// gsang ba lam gyi dpe bzhi ltar// goms pas lhun grub ngo mtshar 'byung// ma btsal nyi ma'i 'od bzhin 'char// zhes gsungs pa las// sems dpa' rdo rjes zhus pa// gsang ba rang byung rig pa'i nyams// brjod bral rig pa'i chos dbyings la// ma yengs rig pa rang gzhag pas// dus gcig rig pa 'od 'bar la// ye shes gsang ba ji ltar blta// rang byung rig pa ji ltar mthong// zhes zhus so// de nas bcom ldan 'das kyis bka' stsal pa/ma lus dgongs pa gsang ba'i nyams// mtha' dbus med pa'i snying po 'di// ma btsal gsang ba nyams kyis shes// ye shes rdzogs par gsal ldan pas// shes pa g.yo ba kun dang bral// btsal bral ye sangs rgyas pa ni// shes pa rnam grangs gang skyes pa// de dag gsang bar mnyam par gsal// rnam byang shes pa rang gnas pa// ye nas ma btsal grub pa yin// yul gyi khyad par ci snang la// rang bzhag rig par gnas par bya// mi g.yo gsang ba'i nyams ldan pas// don kun lhun gyis grub par byed// rig pa gnas pa lhun rdzogs la// bcos med brtags pas mngon sangs rgyas// mi spro mi bsdu btang bzhag bral// dmigs bral bsam pa'i 'du shes med// lhun grub zhen pa'i chos med pas// de nyid tsam yang bral ba yin// thams cad rang rig gsang ba'i lung// ye shes mtshan ma rnam par dag/rgyal ba'i dgongs pa ma bcos pa// mkhyen pa thams cad bcig tu gsal// dus gsum gcig ste khyad par med// ye shes brtags bral chen po la// rtog dang mi rtog ci zhig nad// zhen pa'i rtag pa ma lus pa// rdo rje rang rig lung gis gcod// gzer chen rang byung gsang ba'i don// thams cad phebs pas g.yo ba med// dgongs pa rang byung gsang ba'i thugs// 'di dag rang rig ye shes te// bsam bral dgongs pa nyid la gnas// ma bcos sems nyid gsang ba ni// gsang ba rig pa mnyam du skyes// 'od gsal rig pa mchog tu dag/ dri med rang bzhag gsang ba'i don// tshig tu ma yin don la rdzogs// 'di ni rang bzhin mchog gi nyams// rnam rtog ma yin mi rtog min// mi g.yo rnam dag kun tu bzang// brjod bral mnyam pa'i don la sbyor// nyams myong rig pas gsal bar shes// shes 'jug ye shes bsam mi khyab// rna brgyud thugs kyi lung byin pas// snying po rang byung bla na med// ma bcos gsang ba thugs nyid ni// kun dang mthun pa nyid du 'byung// de ltar rig pa gdod nas dag/ma bcos rig pa cig car 'byung// ye nas rig pa bsam bral lung// 'dzin pa'i dri ma kun dang bral// chos nyid gsang ba'i don nyid ni// mtshan ma kun bral gsang ba'i nyams// 'di dag rig pa'i ye shes so// dgongs pa'i rang byung don 'di la// sgra dang rjes dpags gtan tshigs kyis// mi rtog zab mo rang gsal 'di// bla ma'i zhal las blang bar bya// de ltar gang rung thob nas ni// de yi don la goms par bya// nges pa'i don la de ma thag/ yid ches rang byung rig pa skye// mtshan ma brdal bral don gyi lung// de kho na nyid gsang bar bshad// rang gsal klong la ye gnas pas// gzhan la mi rtsol rang bzhin dag/sems nyid klong la gnas bcas pas// rig pa'i thig le 'od du 'bar// gsang ba'i thig le gcig gi ngang// mi g.yo rang la gnas par bya// zhes gsungs so// rin chen klong dgu'i rgyud las// dgongs pa gsang ba'i klong gi le'u ste bdun pa'o//// de nas rdo rje sems dpa' des// de bzhin gshegs pa rdo rje sems dpa' la 'di skad ces zhus so// dus gsum sangs rgyas thams cad kyi// rang byung ye shes chen po la// rgyal thabs rig pa dbang gi klong// 'dus pa'i tshogs la bshad du gsol// zhes zhus so// de nas de bzhin gshegs pas bka' stsal pa// dus gsum sangs rgyas thams cad kyi// rang byung gsang ba rgya mtsho'i klong// rang byung rig pa mu mtha' med/ khyab par gsal la dngos po med// rgyal thabs gsang ba dbang gi klong// ma bskur rig pa rang bzhin gsal// gdod nas rang byung rig pa'i dbang// bskur thob mi gnas ye nas 'phags// gsang bar rang byung rig pa'i lung// dus mtha' gsal ba'i ngang bzhin la// ye nas khyab pas bskur thob bral// zhes gsungs so// de nas sems dpa' rdo rjes slar zhus pa/dus gsum rgyal ba thams cad kyi// rdo rje dbang gi rang bzhin la// bskur thob khyad par mi gnas na// grol zhing thar pa med pa dang// yang na 'khor ba stong pa dang// 'dul thabs med par mi 'gyur ram// zhes zhus so// de nas de bzhin gshegs pas bka' stsal pa/ brda don sprad pa'i khyad par gyis// thig le chen po'i dbang bskur la// 'gyur ba med pa'i man ngag sbyin// mi 'gyur brtan pa'i dbang bskur la// spyod lam rig pa'i man ngag spyin// sgra tshig rig pa'i dbang bskur la// ye shes ngos 'dzin man ngag sbyin// sku gsum lhun grub dbang bskur la// lhun grub gsum gyi man ngag sbyin// gnyis med 'brel ba'i dbang bskur la// phyag rgya chen po'i man ngag sbyin// rdo rje lung gi dbang bskur la// rgyal tshab gtad pa'i man ngag sbyin// rin chen gter kha phye nas kyang// rdo rje gsang ba'i bcud kyi sgo// man ngag bcud 'dzin bla ma yis// nga dang dad pa dam tshig can// bsnyen bkur dul ba snying rje can// lus dang srog la mi blta zhing// zang zing mi chags 'brel mi don mi byed// grags pa'i chos brgyad rnams spangs dam pa'i sras// gsang ba mi 'phel thugs rigs gsang ba'i snod// gsang ba mi 'phel rig pa'i gter du bzhag/ dngos la khyad par mi gnas na// gang zag bsam pa'i dbang gis na// brda don dgrol ba'i man ngag ces// ma bcos rig pa'i thugs sras la// brda don dgrol ba'i dbang bskur nas// gter khyim gsal byed rkyen bzhin du// rig pa 'dzin pa'i sa la bzhag/ces gsungs so// de nas sems dpa' rdo rjes zhus// rgyal thabs gsang ba'i khyad par gyis// snod ldan rig pa'i rgyal sras la// pra krid sems kyi dbang bskur na// yon tan 'bras bu ji ltar 'char// zhes zhus so// de nas de bzhin gshegs pa rdo rje sems dpas bka' stsal pa/ rgyal thabs gsang ba'i khyad par gyis// skal ldan rnal 'byor chen po la// phra krid sems kyi ngo bstan la// gnyis med ye shes drod tshad bstan// dus tshod gsal ba'i ngos gzung la// rnyog pa bsal ba'i thabs chen bstan// dang por sprad nas bstan pa'i rim// 'phel ba'i rim pa rjes su bstan// dngos la 'phel 'grib mi gnas kyang// gang zag blo la bstan mi bstan// nus pa gnas phyir bstan pa yin// dka' thub mi bya bde bar spyad// ma bcos rgyal thabs gsang ba'i dbang// rig pa sprad pas rdzogs pa yin// rang byung gsang ba'i bstan pa 'di// rnam pa kun tu rang bzhin gnas// gnyis med ye shes rang byung lung// rgyu rkyen bral ba'i rig pas rtogs// cis kyang mi shigs snying po can// rdo rje 'od gsal rnam par dag/ 'byung 'jug mtshan ma'i rjes mi 'breng// rang gsal rig pa lhun gyis rdzogs// rang rig gnyug ma rnam par dag/ brjod dang brjod bya'i du shes med// ma bsgoms rig pa gsal bar 'byung// drod dang rtags la mi rten te// mngon sum ye shes chen po la// sred dang zhen pa'i chos med pas// thams cad 'od gsal bde chen po/ zhen rtags chos kun mi gnas pas// ye shes klong chen gsang ba'i lung// srid gsum thig ler rdzogs pa'i phyir// ye shes phyag rgya 'da' ba med// ye nas rtsol bral lhun grub la// grub bsgrub khyad par kun dang bral// thams cad chos skur rdzogs pas na// gzugs sku ma bsgoms rang bzhin tshang// rig pa gcig la kun rdzogs pas// bdag gzhan dbye bsring kun dang bral// rang gsal klong las ma nyams pas// rnam bzhi gang spyad bde ba'i klong// chos kyi sku yang tha dad pas// mtshan 'dzin rtags pa rnam par grol// skal ldan gang dang gang dag gis// gang dang gang la mngon brtags pas// dus der tshang dbang mchog yin par// rgyal ba kun gyis mthun par gsungs// rin chen klong dgu thugs kyi mdzod// bstan pa kun gyi rtsa bar bshad// rin chen klong dgu'i rgyud las/ rgyal thabs tshangs pa dbang gi le'u ste brgyad pa'o//// de nas yang sems dpa' rdo rje dam pa des/ de bzhin gshegs pa rdo rje sems dpa' la 'di skad ces zhus so// dus gsum rgyal ba thams cad la// lam med rim med cig char 'jug/ dam pa rnams kyis rtogs pa bzhin// skal ldan rnams la bstan du gsol// zhes zhus so// de bzhin gshegs pa rdo rje sems dpas bka' stsal ba// de bzhin gshegs pa kun gyi gsang// rdzogs chen gsang ba'i rang bzhin la// 'jug pa'i lam ni gnyis yod do// tshig gi lam dang don gyi lam mo// tshig lam rkyen dang mi ldan par// don lam rin chen don mi rtogs// yi ge tshig dang sgra don gyis// de dag nges par mtshon pa yis// gter dang sgron ma ji bzhin du// de dag nyid kyis mngon sangs rgyas// skal ldan 'dus pa chen po'i tshogs// rang byung gsang ba nyid kyi nyams// shes rab nyam myong chen po de// bar ched med par nyams myong bas// de nyid 'jug pa'i lam yin no// don lam gsang ba rig pa'i gter// tshig don ma lus 'dzin pa'i gnas// tshig med rig pas mnyam par rtogs// skal ldan sgra la brten pa yis// brjod pas brjod med gsal bar rtogs// pra krid thabs kyi khyad par gyis// shes rab chen po'i thob pa yis// rtags pa'i bum pa rnam bcag na// ye shes snang ba mched par 'gyur// 'byung 'jug med pa'i don lam 'di// gang ltar gsal ba de lam yin// rnam par rtog pa kun gyis stong// lam lnga sbyor ba 'phrul ba'i nad// ye nas dag pas sbyang du med// lhun gyis grub pas btsal du med// rang la rdzogs pas bdag gzhan med// sa bcu bgrod pa rtogs ba'i grangs// bgrang med nam mkha'i ngo bo la// mthar 'dzin grangs kyi ci rtsol ba// nam mkha'i mtha' la spyod pa 'dra// ma bgrod ma sbyongs yul ma tshol// sgo gsum ma bcos yal bar gnas// dam pa'i 'du shes nyer zhi ba// sgro 'dogs skur 'debs rnam par gcod// dmigs 'dzin rtsol ba kun gyis stong// bsam pa ma yin mi bsam yin// gnyis kar 'dzin pa'i sems bral bas// brtags pa'i 'du shes kun gyis dben// shes yul brtags pa kun bral ba// nam mkha' dri med shin tu gsal// brtag tu med cing spyad du med// bsam med brjod pa kun las 'das// 'jug dang mi 'jug gnyis bral bas// rig pa'i ye shes chen po la// ma bcos ngang la lhun gyis rdzogs// ma bcos gsang ba dbyings kyi lam// 'byung 'jug med pa'i tshul gyis shes// rtse sprad ma sprod dbyings la 'dus// rtsis las 'das pa'i byang chub sku// 'du 'phro mi mnga' dbyings la gsal// 'byung 'jug rig pa'i rjes mi 'breng// gza' bral yul dang dbang pos stong// ma bcings ma grol ji bzhin gnas// phyogs 'dzin rtsol ba'i lam brgyud kyis// rang rig bde chen don dang 'gal// rtsol ba'i chu bo rab 'bogs pas// btsal med lhun grub don mi mthong// ci yang yin no gang yang rung// dgag sgrub med par rang gsal zhing// rang bzhin ma bcos zhi ba yin// lus ngag sems kyi bya btsal med// 'di nas rang byung rig pa'i lam// don la sbyor zhing tshig tu min// zhes gsungs so// rin chen klong dgu'i rgyud las// bgrod du med pa sa dang lam gyis klong gi le'u ste dgu pa'o//// de nas yang sems dpa' rdo rje dam pa des// de bzhin gshegs pa rdo rje sems dpa' la 'di skad ces gsol to// dus gsum rgyal ba thams cad ky-is// sku gsung thugs kyi dam tshig dang// bsrung dang mi bsrung gnyis med pa'i// rig pa'i dam tshig legs par bsrungs// zhes zhus so// de nas yang de bzhin gshegs pa nyid kyis bsrung bral rig pa'i dam tshig gi don gsungs ba// dus gsum sangs rgyas thams cad kyi// sku gsung thugs su bdag gnas pas// 'da' ba med pa'i dam tshig gsum// rang bzhag yid kyis legs par zung// dran pa rkyen gyis ma shor te// de nyid tshod du lhugs par zhog/ma bcos gsang ba'i dam tshig gsum// nam mkha' rgyas pa'i mtha' bzhin du// thob dang ma thob med par gnas// bsrung bral rig pa'i dam tshig la// bsrung ba'i shes pa phyin ci log/ de nas khyab pa'i dam tshig la// da bzod rtsom pa log pa'i lam// nam mkha' sa dang chu dang rlung// rang rang don las mi 'da' bzhin// snang grags chos rnams ma lus pa// bde chen ngang las 'da' mi srid// bde chen gsang ba dam pa ste// de las 'das na 'tshig par 'gyur// gang zhig gnas pa tsam gyis ni// dri ma ngan pa tshig pa yin// sa ma ya yis gang bsgrubs pa// rgyal po bka' brtags ji bzhin du// rang byung gsang ba'i don rtogs pas// kun kyang de las 'da' mi 'gyur// ma bcos lhun grub dam pa yis// bcos pa'i spyod la rnam par bcad// zhin rtags 'dzin pa'i chos dag pas// lhun grub rang rig chen po nyid// 'dus pa'i rgyu rkyen rnam dag pas// 'od gsal ye shes skye 'gag med// brjod bral rig pa'i dam tshig la// lhag pa'i dam tshig rnam bzhi po// ma btsal lhun gyis grub par gnas// ma byung ma skyes ji bzhin nyid// rgyu 'bras bral ba'i dam tshig go/ mtha' bral nam mkha'i dam tshig la// mtha' dbus rnam rtog gang 'jug pa// de bzhin nyid kyi dam las 'das// bde chen gsang ba'i lam dang bral// gzung 'dzin chags pa'i gzeb kyis bcings// rgyud drug 'khor ba'i lam dang 'brel// rang byung ye shes don las gol// bsam 'das brjod med chos kyi dbyings// ji bzhin rang bzhin rnam par dag/rig pa ma bcos rlung du 'jug/ brgya phrag bsam gyis mi khyab pa// snying po gcig ste rdzogs pa'i lung// rang gsal rig pa rjes su 'jug/ theg pa'i snying po rdzogs pa'i lung// rgyud dang bya bral rdzogs pa dang// mkha' khyab rig pa sems lung gis// bsam gyis mi khyab dus gcig mkhyen// rgyal ba kun gyi thug rig pa// rgyal ba kun gyi thugs kyi mchog/ sems can kun gyi sems chen po// gdod nas dag pas dri ma med// kun la snang zhing ther zug min// rang snang chos nyid dam tshig la// ci yang min la cir yang 'byung// bsam spyod mtshan 'dzin rtog las 'das// ye shes rdzogs lung rnam par dag/rig pa'i thugs te thugs kyi mchog/ ma bcos ji bzhin nyid la gnas// chos kun ma bcos rgyud 'changs ba// gsang ba'i gsang ba rig pa'i nyams// 'da' bar dka' ste rig pa'i gnas// theg pa'i snying po gcig la 'dus// 'da' dka' rig pa'i dam tshig la// kun tu khyab par gnas par bya'o// zhes gsungs so// rin chen klong dgu'i rgyud las// bsrung med dam tshig klong gi le'u ste bcu pa'o//// de nas yang sems dpa' rdo rje de nyid kyis/ de bzhin gshegs pa rdo rje sems dpa' la 'di skad ces zhus so// dus gsum ma btsal lhun grub pas// ma bsags gdod nas rdzogs pa yis// byang chub sems kyi rang bzhin las// lhun grub 'bras bu ji ltar 'char// zhes zhus so// de nas de bzhin gshegs pa dgyes pa chen pos gsungs pa// tak+sha ka yi snying po bzhin// ma bsags gdod nas rdzogs pa'i phyir// ji ltar nyi ma'i 'od zer bzhin// kun la ji ltar mthun pa 'byung// sa dang chu dang me dang rlung// 'dod lnga kun tu sbyor ba yang// sangs rgyas thugs rje rol pa shar// thugs rje nam mkha'i mtha' ltar bdal// gang dang gang dag de dag la// thugs rje chen po mi snang na// skyob pa'i thugs rje yal lam ci// sems can khyad par ci zhig yod// dngos la thugs rje'i yul med pas// skye dang mi skye mi gnas kyang// phyogs ris du shes mi mnga' bas// bsam pa'i khyad par so sor snang// dmyal ba yi dwags byol song dang// lha dang lha min srin po mi// bde sdug khyad par cir snang ba// de dag thugs rje chen po yin// nad dang mu ge mtshon nyid dang// me chu rlung dang nam mkha' stongs// de dag rim pa cir bstan pa// thugs rje rmad byung rol pa yin// ji lta ji ltar de dag tu// 'dul ba'i thabs su bstan pa yin// rgyal ba gang dang gang dag gis// 'dul ba'i thabs su gang bstan pa// phyogs mthong log pa'i 'du shes kyis// sdang sems gnod sbyor nyid du mthong// gnod sbyor phan pa'i gzi brjid kyis// grol ba'i lam la dgod par bya// thugs rje chen pos ma khyab na// las dang thugs rje 'brel ba med// de dag med par gyur na ni// grol thar med pa'i skyon du 'gyur// lhun grub rin chen phung po la// rtsol bral rig par mnyam sbyar zhing// nges par brda don phrad pa yis// 'bras bu rin chen lhun gyis rdzogs// rtsol ba ma yin lhun gyis grub// spyan drangs ma yin ye nas gnas// sbyangs ba ma yin gdod nas dag/rim pa ma yin dus gcig rdzogs// phyogs ris ma yin khyab par bdal// mdzad pa phyogs med dus gcig grub// gdod nas 'bras bur lhun grub la// mthong dang ma mthong khyad par gyis// sangs rgyas sems can gnyis su byung// dngos po nyid la gcig tu mnyam// sku dang dpe byad 'od 'bar ba// 'dul ba'i ngo la bstan pa yang// drang don 'jig rten sangs rgyas te// 'dul dbang dngos po gnas pa min// rang byung rig pa 'od 'bar ba// kun kyang de nyid mtshungs par ldan// de nyid chos sku chen por bshad// rang la bstan cing rang la 'grel// rang byung gsang ba rang la 'chad// rang byung 'khor lo rang la bskor// gzhan du bya ba'i yul med pas// de bzhin nyid la rtag tu bzhugs// ston pa yid bzhin nor bu bzhin// las dang rkyen las mi snang bas// de yi sku gsung rdo rje ni// byin rlabs bsam gyis mi khyab 'dod// gang dang gang snang de dang de// mthun 'jug 'tsham pa'i thabs su bstan// de nyid rgyal ba'i thugs su 'dus// rang byung lhun rdzogs snying po ni// ji ltar snang ba de ltar yin// zhes gsungs so// rin chen klong dgu'i rgyud las/'bras bu rin po che lhun gyis grub pa'i klong gi le'u ste bcu gcig pa'o//// de nas sems dpa' rdo rjes 'di skad ces zhus so// dus gsum rgyal pa'i thug kyi mdzod// gsang ba klong dgu'i bstan pa 'di// gang zag gang gis bstan pa bzung// mgon po dpa' bos bshad du gsol// zhes zhus pa las// de bzhin gshegs pas 'di skad ces gsungs so// dus gsum rgyal ba thams cad kyi// gsang mdzod rig pa'i klong dgu 'di// gsungs gi bdud rtsi kun gyi bcud// theg pa'i yang rtse don gyi mchog/ phyogs kun gsal 'brel nges pa'i mdo// rin chen snying po 'phrul gyi sgo// skal ldan rab kyi don du bstan// gzhan gyi don du ma gsungs so// rin chen gter gyi snying po 'di// theg pa'am bstan pa ma lus pa// klong dgu'i nang du ma 'dus med// de nyid byang chub sems nyid klong// thabs chen rig pa'i sgron ma 'di// dad dang dam tshig snying rje che// bla ma la gus brtson 'grus can// bskal par sbyangs pa'i shes rab can// skye ba bdun pa'i gang zag de// skal ldan mchog gi rnal 'byor pa// rgyal tshab nges pa gcig la gtad// chos la dad pa chung ba dang// dam tshig phyal bar gtong ba dang// snying rjes sems can mi skyob dang// theg pa'i rigs su ma nges dang// brtson 'grus myur ba'i stobs med cing// 'jig rten grags pa gtsor bzhag nas// rdo rje bla ma mi bkur dang// shes rab 'byed pa med pa dang// zang zing gus par mi 'bul ba'i// 'jig rten 'chal pa gang dag la// gsang ba'i gter 'di gang gtod pa// mkha' 'gro 'dus nas zos pa dang// rdo rje khab tu ltung bar 'gyur// gang yang gsum la mi bstan cing// rgyal tshab nges pa gcig la gtad// ces gsungs so// rin chen klong dgu'i rgyud las/ rgyud gzung zhing gtad pa'i le'u ste bcu gnyis pa'o//// slob dpon chen po shrI sing ha dang/ dge slong bai ro tsa nas bsgyur ba'o// rdzogs pa chen po rin chen klong dgu'i rgyud gsang ba rdzogs so//// rgyud 'di'i snod mdo byang bdun par ltos shig///

CLOSE WINDOW