CLOSE WINDOW

Gpb033.005
བོད་ཡིག

/// rgya gar skad du/ trai lo kya pra ti baM/ bod skad du/ khams gsum sgron ma/ chos nyid stong pa'i ngang la phyag 'tshal lo/ khams gsum sgron ma rkyen dang bral// ma rig mun sel blos ma reg/gzhan nas btsal bas rnyed mi 'gyur// thig le brdal ba'i rang byung bde// rig pa rang shar bcos su med// lhun grub btsal du gdod nas med// snying po'i snying po gnyis med mchog/ye nas tha snyad kun dang bral// ji bzhin gsal la rtog med don// don dam spros med yang dag dbyings// btsal du med pas sgom tshig 'das// ji bzhin klong du gyur pas na// rnam dag don la mkhas pa yin// gdod nas ma skyes gsal ba'i klong// don dam rtogs pas chos kyi sku// longs spyod bde chen rgyal po'i sku// ye shes rol pas sprul pa'i sku// thugs rje byang chub sems dpa'i lam// ma g.yos rtog med chos kyi lam// rang bzhin gnas pas bde ba'i rdzong/ khams gsum mun sel sgron ma'i mchog/ bde chen rang byung thugs rjer gsal/ khams gsum sgron ma rdzogs so// rgya gar skad du/ badzra sa tra sa ma ya/ khe ma hA de ha puSh+taMr ga ra tan tra/ bod skad du/ rdo rje sems dpa' nam mkha' che bram ze rgyas pa'i rgyud/ bcom ldan 'das dpal kun tu bzang po la phyag 'tshal lo// 'di skad bshad pa'i dus na/ 'og min gyi gnas/ chos nyid kyi mkha'/ dbyings nyid kyi klong/ sems nyid kyi gnas/ ye shes sgrib pa mi mnga' ba'i gzhal yas na nyid kyi rang bzhin dang/ nyid kyi ngo bo dang/nyid kyi thugs rjes sprul pa'i 'khor 'di lta ste/ rang bzhin gyi 'khor chos kyi sku zhes bya ba dang/ ngo bo nyid kyi 'khor longs spyod rdzogs pa'i sku zhes bya ba dang/ thugs rje chen po'i 'khor sprul pa'i sku zhes bya ba dang/rdo rje sems dpa' la sogs pa 'byed pa med pa'i 'khor rnams dang thabs cig tu bzhugs so// de nas bcom ldan 'das kun tu bzang pos thams cad bsdus nas thig le chen po gcig tu bzhugs so// de nas rdo rje sems dpa'i nyid kyi rang bzhin thig le chen po gcig tu bzhugs pa de las phyung na bcom ldan 'das kun tu bzang po la dga' ba'i sems kyis dang ba'i mdangs phyung nas 'khod do// de nas bcom ldan 'das kun tu bzang pos rdo rje sems dpa' la smras pa/ rdo rje sems dpa' e ma ho// dga' ba'i sems skyes e ma'o// dang ba'i mdangs phyung e ma'o// nga las byung ba e ma'o/ khyed 'dud dga' ba e ma'o// zhes gsungs pas/ rdo rje sems dpas zhus pa/ ston pa'i ston pa kun tu bzang po lags// ston pa nyid kyang thig le spros pa med// 'khor rnams kun kyang thig le spros pa med// bstan pa kun kyang thig le spros pa med// dus dang gnas kyang thig le spros pa med// thams cad kun kyang thig le spros med na// ston pa'i ston pas ci zhig ston par mdzad// 'khor du 'khor ba'i 'khor ni ci la 'khor// 'khor la ston pas ci zhig ston par mdzad// dus dang gnas ni gcig pa ci lta bu// zhes pa dang/ de nas kun tu bzang pos 'di skad ces gsungs so// ngas don la ma lus pa sgrar bshad kyis yid la byos shig/sems nyid kun tu bzang po nga nyid ni// ston pa dang ni bstan pa 'khor dus gnas// nga las byung bas ye nas thig le ste// nga yis rang bzhin thig ler bstan pa yin// thig le ye nas spros pa med pa'i don// snying po ma spros ye nas thig le yin// zhes gsungs so// rdo rje sems dpa' nam mkha' che bram ze rgyas pa'i rgyud las/ gleng gzhi'i le'u ste dang po'o//// de nas yang rdo rje sems dpas zhus pa/bcom ldan bde chen kun bzang po// nyid kyi rtsa ba bshad du gsol// zhes zhus pas/ kun tu bzang pos bka' stsal pa// nyon cig nga la 'dus pa'i 'khor// nga yi rang bzhin bstan pa ni// gnas ni chos nyid dbyings na gnas// gsal ni rig pa'i mkha' la gsal/ khyab ni snod bcud kun la khyab// byung ni snang srid kun tu byung// yin ni byang chub sems yin to// bstan ni theg pa dgu ru bstan// 'dus ni rdzogs pa chen por 'dus// bstan du mtshan ma'i dngos po med// mthong du med pa'i yul dang bral// shes su tshig gis brjod du med// rgyu las ma byung snying po 'di// yod ni gcig las med pa ste// spros ni sna tshogs khyab par spros// brtags pas ma mthong cir yang mthong// gang ltar bsgom yang 'gyur ba med// tha dad spros kyang thig le gcig/ kun bral nyag gcig ci ma yang// mthong byed sna tshogs kun gyis gzhi// dmigs su med par mtshon te bstan// de 'dod nges par rtogs 'dod na// de ni nam mkha' lta bur brtags// don ni chos nyid skye ba med// rtags ni sems nyid 'gag pa med// nam mkha' lta bu'i chos nyid la// nam mkha' lta bu'i dpe yis mtshon// dmigs su med pa'i chos nyid la// dmigs pa med par mtshon te bstan// tshig tu brjod pa med pa la// brjod du med pa'i tshig brjod do// dmigs med don gyi ngo bo bstan// don chen 'di yis rtogs par byed// 'di yis don chen ma rtogs na// don gyi sgra tshig ci bstan kyang// snying po'i don dang 'phrad mi 'gyur// zhes gsungs so// rdo rje sems dpa' nam mkha' che bram ze rgyas pa'i rgyud las/snying po rtsa ba bstan pa'i le'u ste gnyis pa'o//// de nas yang rdo rje sems dpas zhus pa/ bcom ldan bde chen kun bzang po// ston pa dang ni bstan pa dang// de bzhin 'khor tshogs bshad du gsol// zhes zhus pas/ kun tu bzang pos bka' stsal pa// nyon cig nga yi 'dus pa'i 'khor// ston pa yang ni rnam gsum ste// bstan pa yang ni rnam pa gsum// de 'dzin 'khor yang gsum du bstan// ston pa gsum ni 'di lta ste// chos kyi rang bzhin ston pa dang// chos kyi ngo bo ston pa dang// don gyi sgra tshig ston pa'o// rang bzhin ston pa'i ston pas ni// skye ba med pa'i byin brlabs las// ji ltar snang ba'i chos rnas kun// de bzhin nyid du ston par byed/ ngo bo ston pa'i ston pas ni// ji ltar snang ba'i chos rnams kun// stong pa nyid kyi skur byung nas// ngo bo de las med par ston// sgra tshig ston pa'i ston pas ni// chos rnams don gyi sgrar bsdus nas// ma rig mi shes sems can la// de don sgra tshig sdebs nas ston// bstan pa rnam pa gsum ni 'di lta ste// chos sku'i bstan pa de bzhin nyid du bstan// de bzhin nyid la rnam par dbye ru med// ji ltar snang ba'i chos rnams thams cad kun// sems kyi ngo bo yin pas de bzhin nyid// de la gang zhig 'chos shing sgom byed pa// de yis chos sku'i bstan pa rtog pa med// snang ba med pa'i chos nyid byang chub sems// ma nor de bzhin nyid du ma rtogs te// de la gang du 'chos shing sgom byed pa// de yis rang sems bcos med de ma rig/snang srid chos dang snang srid byang chub sems// sems kyis de bzhin nyid phyung de bzhin nyid// de bzhin nyid du ma rtogs so sor mthong// de bzhin nyid ni dbyings nas 'tshol byed pa// dus gsum rgyal bas btsal yang mi rnyed do// longs spyod rdzogs pa'i bstan pa longs spyod du// longs spyod lnga ni chos nyid longs spyod gcig/ sangs rgyas sems can kun gyi longs spyod du// longs spyod rdzogs pa'i sku las spyod du med// gzugs la sogs pa'i longs spyod lnga la ni// gcig la lnga lnga nyi shu rtsa lngar spyod// rtsa lnga'i longs spyod de ni sku lnga'i tshul// chos nyid don gyi ngo bo nyid du bshad// sprul sku'i bstan pa thugs rjes don mdzad de/khams gsum sems can bsam pa tha dad la// sku dang gsung dang thugs ni rnam gsum gyis// bsam pa thams cad sku gsung thugs rjes bzlog/ de 'dzin 'khor ni rnam pa gsum bstan te// shin tu rnal 'byor rtsol bsgrub 'das pa'i 'khor// sgor zhugs yid ches sangs rgyas sa la gnas// rig 'dzin sa dang dang po bcu par 'khor// ma 'thob nye reg sgom pa'i sa la gnas// sems bskyed mos pa spyod pa'i 'khor rnams ni// rgyu dge 'bras bu dug 'joms sa la gnas// de ni ston pa gsum gyi 'khor du rje sems dpa' nam mkha' che bram ze rgyas pa'i rgyud las/ ston pa dang ni bstan pa dang 'khor bstan pa'i le'u ste gsum pa'o//// rdo rje sems dpas yang zhus pa// bcom ldan bde gshegs kun bzang po// nyid kyi bya med bshad du gsol// zhes zhus pas/ kun tu bzang pos bka' stsal pa// nyon cig nga la 'dus pa'i 'khor// bya ba med pa'i don 'di ni// kun bzang nga yi rang bzhin te// nga yi rang bzhin 'gyur med la// bsgoms shing 'chos na bsgyur ba yin// ye nas lhun gyis grub pa la// bsgrub na nga la 'chos pa yin// nga ni ye nas byas zin pas// bya ba med pa'i chos nyid yin// chos nyid nga yi rang bzhin pas// rang bzhin de la bya ru med// bcos su med pa'i rang bzhin la// rdo rje sems dpa' khyod ma 'chos// rdo rje sems dpa' khyod 'chos na// kun tu bzang po 'chos pa yin// ji ltar snang ba'i chos rnams kun// kun kyang nga yi rang bzhin yin// mi gnas dmigs pa'i yul dang bral// spros med bsam med yul las 'das// de la spang 'gegs su byed pa// bskal par btsal yang rnyed par dka'// nga las btsal bas grub pa med// nga las sbyongs pas byang ba med// nga la ma lta yul med kyi// nga la ma bgrod lam med kyi// nga la ma spyod sgrib med kyi// nga la bgrod pas phyin pa med// bde chen chos sku sems su gcig pa'i phyir// snga phyir dus gsum med de khyad par med// rang byung ye shes yul la mi rtog pas// rig pa'i ye shes yul gyis btsal mi dgos// ma btsal ye nas lhun gyis grub pa'i phyir// rtsol ba'i phrin las ye nas bya mi dgos// ye nas byang chub sa la kun gnas pas// rig 'dzin sa dang sa bcu sbyang mi dgos// ye nas byas zin lta ba bsgom mi dgos// ye nas rnam dag dam tshig bsrung mi dgos// mi gnas mi rtog cir yang dgongs med pas// mi rtog mnyam pa'i yul la rang bzhin gnas// rdo rje sems dpa' nam mkha' che bram ze rgyas pa'i rgyud las bya ba med pa'i le'u ste bzhi pa'o//// rdo rje sems dpas yang zhus pa// bcom ldan bde chen kun bzang po/ thams cad byang chub sems kho nar sangs rgyas pa'i don bshad du gsol/kun tu bzang pos bka' stsal pa/ nyon cig nga la 'dus pa'i 'khor// chos kyi sku ni byang chub sems// byang chub sems las chos kyi sku// rdul tsam sus kyang bcos pa med// des na sems la sangs rgyas med// longs spyod rdzogs sku byang chub sems// byang chub sems la longs spyod sku// sems las byung ba'i gzugs rnams la// longs spyod rdzogs pas sku gzhan med// sprul pa'i sku ni byang chub sems// byang chub sems ni sprul pa'i las// 'gro ba'i don mdzad gzhan na med// dus gsum sangs rgyas thams cad kyang// byang chub sems las gzhan med de// snga rabs 'das pa'i sangs rgyas rnams// rang sems ma bcos sngar mthong rtogs// da ltar bzhugs pa'i sangs rgyas rnams// ma bcos pa yi rang bzhin te// ma bcos ji bzhin rtogs gyur nas// da ltar 'gro ba'i don yang mdzad// slad nas 'byon pa'i sangs rgyas rnams// rang byung sems nyid 'di la ni// snga bas 'chos pas lung ma bstan// da ltar ting 'dzin sems mi bcos// ma bcos lam du zhugs nas byon// ji ltar snang ba'i chos rnams la// byang chub sems su ma rtogs te// bcos shing bsgrub pas 'grub mi 'gyur// ma rtogs bcos pas 'grub pa yi// bskal pa du ma'i grangs bgrangs kyang// mi btsal bde ba dang mi phrad// sku gsum sems las ma bcos phyir// sku gsum ston pa'i kun bzang las// de bzhin 'chos par byed pa yi// ston pas bden tshul ci bstan kyang// nyid kyi rang bzhin ston pa yin// rdo rje sems dpa' nam mkha' che bram ze rgyas pa'i rgyud las byang sems bcos med kyi le'u ste lnga pa'o//// rdo rje sems dpas yang zhus pa// bcom ldan bde chen kun bzang pos// nyid kyi lta sgom bshad du gsol// kun tu bzang pos bka' stsal pa// nyon cig nga la 'dus pa'i 'khor// rdzogs chen lta ba sgom du med pa ni// kun tu bzang po'i sems kyi yon tan te// byang chub sems kyi che ba'i yon tan gyis/btsal zhing bsgrub pa'i dka' ba spyod mi dgos// rgyu rkyen med pas btsal ba'i las mi dgos// 'bras bu'i rang bzhin gzhan nas sgrub mi dgos// chos nyid rang bzhin sgom pas bya mi dgos// ma byas pas ni 'jig pa'i gnyen po med// gzhan la mi ltos bsgom nas 'tshol mi dgos// dam tshig bsrung ba'i sgom pa bya mi dgos// phrin las btsal ba'i sgom pa bya mi dgos// lam la mi bgrod sa la mi sbyong ste// rang las chos ni gzhan du tshol mi byed// da ni spyod yul kun las 'das pa'i phyir// tshig gis mi phebs dbang po'i spyod yul 'das// rang gi rang bzhin bsdus te thig ler gnas// ma spros gnyis med ye nas gcig tu bstan// rang byung ye shes mi rtog g.yos pa med// rgyu 'bras 'das pas rtsol dang sgrub mi byed// ma byung bas na dngos po sgaum mi byed// ma skyes pas na 'jig pa'i dogs pa med// bde chen brdal ba chen po'i klong dkyil na// mi snang bas na dmigs pa'i yul dang bral// chos nyid snang ba med pa'i rang bzhin la// mi rtog mnyam pa chen por ngang gis gnas// chos nyid spros pa med pa'i rang bzhin la// rig pas mi rtog ting 'dzin mi byed cing// gang zhig ngang la sgom pa byed pa des// sgom pa nyid kyi ngang dang phrad mi 'gyur// chos nyid mngon du phyung ba nga yin pas// sdug bsngal mi skye rnam par spang mi dgos// rang byung yin pas skye 'jig med pa'i phyir// ma rig rten 'brel dbang po dgag mi dgos// rang rgyud rnam dag chos nyid sbyang mi dgos// ye nas dag pas gtsang sbra bya mi dgos// ye nas lhun grub rtsol sgrub bya mi dgos// nga yi ngo bo kun gyis mthong bya'i phyir// nga yis mngon du phyung ba'i chos rnams ni// sna tshogs dbang po'i ngo la bstan pa yin// de la nga yi rang bzhin kun rtogs shig/de la nga yi rang bzhin ma mthong na// kun bzang nga yi rang bzhin bstan mi bya// rdzogs pa chen po'i don dang skal med pas// rgyu 'bras theg pa drang ba'i lung la gzung// rdo rje sems dpa' nam mkha' che bram ze rgyas pa'i rgyud las/lta ba sgom med kyi le'u ste drug pa'o//// rdo rje sems dpas yang zhus pas/ bcom ldan bde chen kun bzang po// nyid kyi dam tshig bshad du gsol// kun tu bzang pos bka' stsal pa// nyon cig nga la 'dus pa'i 'khor// ma skyes spros dang bral ba'i rang bzhin gyis// skye ba'i cho 'phrul sna tshogs yul phyung nas// yul med rang gi rang bzhin yin zhes bya// de la mi rtog rtog pa'i yul las 'das// yul la mi 'dzin spang dang len med pas// med pa phyal pa gcig tu lhun grub ste// bsrung bar bya ba'i tshul khrims kun dang bral// kun bzang nga la bsrung ba'i dam tshig med// rgyu rkyen med pas rtsol zhing bsgrub mi dgos// lhun gyis grub pas spyad pa'i las mi dgos// ye nas yin pas shes par bya mi dgos// rang byung yin pas rgyu dang rkyen mi dgos// bzang ngan med pas blang dor bya mi dgos// dngos po med pas med pa zhes su bshad// dngas[(]tsha dngos[)]su mi yong ye shes ma 'gags pas// de la phyal pa zhes su btags pa yin// sems su kun gcig gcig pur btags pa yin// ji ltar snang ba'i chos rnams thams cad kun// yid ches byang chub sems su rdzogs pa'i phyir// lhun gyis rdzogs pa zhes su nga yis bshad// chos nyid rang bzhin cir yang 'gyur med pas// btsal bar grub par nga yis lung ma bstan// bkres skom tsha grang blun lkugs chos nyid la// sku gsum 'khor dngangs 'gros pa'i cho ga drug/ rang byung yin pas btsal zhing bsgrub mi dgos// rgyu nyid rang byung ye shes yin pa'i phyir// las kyi rkyen gyis dbang du de mi 'gro// rang byung ye shes kun dang mtshungs med pas// rgyu rkyen las kyis rang byung de mi 'grub// nges pa gcig la bden pa rnam pa gnyis// bden pa gnyis kyis gtan la dbab tu med// ma nges the tshom can gyi lung de la// nges pa gcig tu bstan pa ga la yod// stong gsum rgyu 'bras lung la brten byas nas// rnal 'byor gang zag chos la rlom byed pa// de la bden gnyis tshad ma bzhi yang dgos// ngas byas chos la bden pa gnyis mi dgos// ngas byas chos la bden pa gnyis dgos su// ngas byas thams cad byang chub sems su byas// byang chub sems la don dam kun rdzob med// ces gsungs so// rdo rje sems dpa' nam mkha' che bram ze rgyas pa'i rgyud las dam tshig bsrung du med pa'i le'u ste bdun pa'o//// rdo rje sems dpas yang zhus pa// bcom ldan bde chen kun bzang po// nyid kyi phrin las bshad du gsol// kun tu bzang pos bka' stsal pa// nyon cig nga la 'dus pa'i 'khor// rdzogs chen rgyu 'bras ye nas 'das pa'i phyir// btsal zhing bsgrubs pas byar med grub pa med// don de rtogs pas las rnams mi byed de// las ma byas pas de bzhin nyid du gnas// de bzhin nyid la gang zhig su gnas pa// de yis ma nor ma bcos grub par 'gyur// de ni ma nor bzhin ni ma bcos yin// bzhin ni ma nor ngo bo nyid la bya// de bzhin nyid las sangs rgyas bcos med do// byang chub sems la skye ba med pa'i phyir// sems la ye nas rgyu med 'bras bu med// 'jig rten skye ba'i chos la dpe blangs nas// skye la 'jig pa 'byung ba sgro mi gdags// rang byung rgyu 'bras 'das pa ma brtags par// 'jig rten mtshan ma'i chos la tshod btsugs nas// rgyu la btsal nas 'bras bu 'byung zer ba// de ni rgyu 'bras theg pa drang lung yin// ye shes ye shes zhes su bstan pa ni// rang byung ye shes ma 'gags kun dang mtshungs// rgyu las ma byung mtshungs med ye shes te// thams cad skyes pas gzhan nas chos 'byung med// 'jig rten rgyu 'bras chos la tshod btsugs nas// btsal bas med par 'bras bu 'byung mi 'gyur// byang chub sems la rgyu rkyen yang mi skye// 'jig rten skye 'gag chos la tshod mi 'dzug/ byang chub sems ni rkyen gyis ma bskyed pas// 'jig rten rkyen bskyed chos la dpe mi len// sems kyi ting 'dzin bsgom pa ma byed cig/ ye shes yul la rtog par ma byed cig/ ngag gis 'dzab dang snying po bzla mi dgos// lag gis 'du byed phyag rgya bca' mi dgos// sems kyi 'du 'phro ting 'dzin las mi byed// ngang la gnas pas g.yo med lhun gyis grub// rang bzhin gnas pas sus kyang bcos su med// ma btsal ji bzhin ngang du ma bcos yin// bya ba med pa las kyi mchog tu bstan// che ba 'dod nas rtsol sgrub rtsol byed pa// sgom sgrub btsal bas che ba de mi 'grub// che ba rang byung ye shes ye nas che// bsgoms na sangs rgyas dgongs pa 'chos pa yin// sangs rgyas dgongs pa gang zhig 'chos byed pa// de yis sangs rgyas thams cad spangs pa yin// de yis rang gi byang chub sems spangs pas// rang gi rang bzhin bskal par phrad mi 'gyur// zhes gsungs so// rdo rje sems dpa' nam mkha' che bram ze rgyas pa'i rgyud las phrin las btsal du med pa'i le'u ste brgyad pa'o//// rdo rje sems dpas yang zhus pa// bcom ldan bde chen kun bzang po// sa yi rang bzhin bstan du gsol// kun tu bzang pos bka' stsal pa// nyon cig nga la 'dus pa'i 'khor// kun tu bzang po nga yi sa// kun gyi byang chub snying por gnas// byang chub sems kyi rang bzhin ni// chos kyi dbyings kyi pho brang ste// dus gsum sangs rgyas thams cad dang/ khams gsum sems can thams cad kun// klong chen sems kyi gnas de na// mi gnas pa ni gang yang med// kun gyi gnas dang sa yin te// 'du 'bral med par de na bzhugs// de la sbyang zhing bgrod mi dgos// de la sbyang zhing bgrod gyur na// rang sems de la 'chos pa ste// bcos pas rang sems 'byongs mi 'gyur// de ni spyi sa kun gyi gnas// nga las byung ba'i sku gsum gyis// rgyu 'bras 'das pa'i 'khor rnams la// sa mdo rnam pa gsum bstan te// bskyed pa'i sa dang spyod pa'i sa// bsgrub pa'i sa dang gsum bstan te// bskyed pa'i sa ru byang chub sems bskyed na// chos dbyings nam mkha' byang chub sems med cing// dge sdig las la drang ba dbang bskur bas// phyi yul chos nyid spangs pas ma spongs te// rang byung ye shes mi khegs bzhin du 'gags// rang byung ye shes yul la mi rtog bzhin// gzung dang 'dzin pa yod ces 'joms par byed// des na byang chub sems la skyes pa med// spyad pa'i sa ru byang chub bcu spyad pas// ji ltar snang ba'i chos rnams thams cad kun// byang chub sems las g.yos pa med pa ni// nam mkha' lta bu'i chos nyid snang bar zad// nam mkha' la ni g.yos pa rdul tsam med// de bzhin byang chub sems la g.yos pa med// bsgrub pa'i sa ru byang chub grub 'dod pa// kun tu 'od dang pad+ma can gyi sa// rdo rje 'dzin dang stug po bkod pa dang// 'khor lo tshogs chen rdo rje 'chang ba dang// rgyu 'bras kun bzang dbye ba med pa drug/byang chub bsgrub pa'i sa ru ming yang gtags// sems kyi rang bzhin rgyu rkyen bral ba'i phyir// bsgrubs pas grub pa'i 'bras bu ngas ma bstan// sems kyi rang bzhin drug ni 'di lta ste// rang byung ye shes ma 'gags pa yi rtags// dbang po sgo lnga kun tu gsal ba la// kun tu 'od kyi sa zhes btags pa yin// yul la mi rtog chags pa med pa la// ma chags pad+ma can du btags pa yin// skye 'jig med pa'i byang chub sems de la// rdo rje 'dzin pa zhes su nga yis btags// rang gi rang bzhin chos nyid dpag med la// rang byung ye shes mi rtog mnyam pa bkod// stug po bkod pa zhes su btags pa yin// byang chub sems kyi rang bzhin dkyil 'khor de// rang la gnas pa'i byang chub chos rnams la// yi ge 'khor lo tshogs chen sa ru btags// sku gsung thugs la skye dang 'jig med pas// rdo rje 'chang gi sa zhes bshad pa yin// byang chub sems la rgyu 'bras gnyis med de// sems las byung ba'i chos rnams thams cad la// bzang ngan blang dor ye nas med pa'i phyir// 'byed pa med pa'i sa zhes nga yis bshad// de na byang chub sems kyi chos dbyings ni// dus gsum sangs rgyas khams gsum sems can kun// de nas byung zhing de ru gnas pa'i phyir// chos dbyings byang chub sems ni kun spyan sa// sangs rgyas bsgrub pa'i sa zhes btags pa ste// byang chub sems kyi rang bzhin de las med// ces gsungs so// rdo rje sems dpa' nam mkha' che bram ze rgyas pa'i rgyud las sa sbyang du med pa bstan pa'i le'u ste dgu pa'o//// rdo rje sems dpas yang zhus pa// bcom ldan bde chen kun bzang po// nyid kyi lam chen bshad du gsol// kun tu bzang pos bka' stsal pa// nyon cig nga la 'dus pa'i 'khor// byang chub sems ni kun gyi lam chen te// gzhan na med de 'di na rang bzhin gnas// gnas dang yul dang sangs rgyas sa dang gsum// chos kyi dbyings dang chos nyid 'di na gnas// nam mkha'i khams dang gzhal yas 'di ni gnas// sangs rgyas dngos dang yul ni byang chub sems// gzhan du bgrod pa'i lam dang gnas med de// bgrod pas nam mkha'i lam la phyin pa med// rang sems spros bral chos kyi dbyings yin pas// spros bral de na sangs rgyas thams cad bzhugs// de bas lam la bgrod par ma byed cig/ rang sems ma bsgribs nam mkha'i rang bzhin gsal// de na dus gsum sangs rgyas thams cad bzhugs// de bas lam la bgrod par ma byed cig/ rang sems ma bcos chos nyid ji bzhin pa// de la dus gsum sangs rgyas lhun gyis grub// de bas lam la bgrod par ma byed cig/ sangs rgyas rang sems rtog dang bral ba yin// bgrod pas rang sems rtog bral der mi phyin// gal te ma rig lam la bgrod gyur na// phyin pa'i dus med rtogs pa'i sa med pas// bgrod pas sangs rgyas sa ru phyin pa med// sangs rgyas rang sems rtogs dang bral ba yin// lta ba bsgoms pas ting 'dzin yul dang bral// ting 'dzin de yis rtog bral mnyam dang bral// dam tshig bsrungs pas ma nyams 'dzin dang gnas// ma nyams 'dzin pas rtog med mnyam dang bral// phrin las btsal bas grub pa'i ting 'dzin byed// grub pa'i ting 'dzin mi rtog mnyam dang bral// sa la sbyangs pas gnas pa'i ting 'dzin byed// 'byongs pa'i ting 'dzin rtog med mnyam dang bral// chos nyid brtags pas gsal ba'i ting 'dzin byaid// ting 'dzin gsal bas rtog med mnyam dang bral// ye shes gsal bas rtogs pa'i ting 'dzin byed// gsal bar rtogs pa'i ting 'dzin mnyam dang bral// 'dod pa'i ting 'dzin ji ltar gsal ba des// 'dod pa med pa'i bde ba grub pa med// ting 'dzin mi byed bag chags mi gsog pas// rang byung ye shes las kyi dbang mi 'gyur// rang byung ye shes chos sku snying po de// btsal bas mi 'grub rang bzhin gnas pas 'grub// grub pas bya ba'i don rnams kun dang bral// don zhes bya ba ming tsam btags pa yin// sangs rgyas ming du 'dogs par byed pa ni// nges pa'i lung min drang ba'i lung du bstan// zhes gsungs so// rdo rje sems dpa' nam mkha' che bram ze rgyas pa'i rgyud las lam la bgrod du med pa'i le'u ste bcu pa'o//// rdo rje sems dpas yang zhus pa/ bcom ldan bde chen kun bzang pos// rang byung ye shes bshad du gsol// kun tu bzang pos bka' stsal pa// nyon cig nga la 'dus pa'i 'khor// 'khor gyi ston pa'i ye shes ni// yul la brtags pa'i ye shes te// gang su yul la rtog byed pa// de ni rig byed ye shes yin// rig par bya ba'i yul de ni// byang chub sems las byung ba'i phyir// de ni yul med byang chub sems// yul la rtog pa'i ye shes te// yul las byung bas rang byung min// yul med tsam na gsal mi byed// rang byung ye shes zhes bya ba// ye shes ye nas shes pa yin// rang byung ye shes ye nas shes// des na rang byung ye shes te// ye nas shes pas ye shes yin// ye shes zhes ni de la btags// ye shes rang las byung ba'i phyir// de la ting 'dzin sgom mi byed// ting 'dzin sgom par mi byed pas// ting 'dzin bag chags bsog mi 'gyur// bag chags med pa'i chos nyid de// dus gsum sangs rgyas dgongs par bshad// dus gsum sangs rgyas thams cad kyis// dgongs pa'i yul la mi rtog te// mnyam pa nyid du ye nas gnas// dus gsum sangs rgyas thams cad kyi// rang byung ye shes thugs de la// ye nas rtog pa med pa'i phyir// sangs rgyas dgongs pa mi mdzad de// rtog pa'i yul ni kun dang bral// rang byung ye shes sangs rgyas dgongs pa mdzad// rang byung ye shes yul la mi rtog pa// rnam rtog rtog pa'i bag chags gos mi 'gyur// las ni ting 'dzin brtags pa'i bag chags yin// mi rtog pa la bag chags yongs ma gsungs// mi rtog pa ni rang byung ye shes lnga// sems kyi rang bzhin dbang po sgo lngar bshad// rang byung ye shes de la 'gag pa med// byang chub sems kyi ngo bo kun snang la// rang byung ye shes mi 'gag so sor gsal// rang gi rkyen gyis snang ba der mi spang// ting 'dzin mi rtog bag chag bsog mi 'gyur// 'di ni dus gsum sangs rgyas dgongs pa ste// gang du mi rtog 'di la su gnas pa// sa la mi gnas 'gro ba'i don mi gnas// chos sku byang chub sems la 'di gnas te// dus gsum sangs rgyas kun gyi dgongs pa 'dus// rig pa'i nyams su mngon sum rtogs par gyis// rang byung ye shes yul la mnga' gsol ba// ye shes lnga yi yul lnga 'dod ma yin// yul 'dod la ni ye shes lnga la snang// yul de ye nas ye shes yin pa'i phyir// yul dang ye shes gnyis su ngas ma bstan// des na yul yang rang byung ye shes yin par bshad// rang byung ye shes ci yang med pa la// nga las byung ba'i 'khor gyi ston pa yin// yul la brten nas ye shes ming btags pa// rnam pa grangs kyi ye shes byung ba ni// rnam par btags pa'i ye shes gcig gis ni// yul gcig rang bzhin so sor snang ba la// yul can la ni yul gyi ming btags pa// des ni nges pa ma yin 'khrul pas btags// zhes gsungs so// rdo rje sems dpa' nam mkha' che bram ze rgyas pa'i rgyud las rang byung ye shes bstan pa'i le'u ste bcu gcig pa'o//// rdo rje sems dpas yang zhus pa// bcom ldan bde chen kun bzang po// bya med rdzogs pa 'dod med gang// kun tu bzang pos bka' stsal pa// nyon cig nga la 'dus pa'i 'khor// chos rnams thams cad grub 'dod na// 'dod pa'i sa ni ma bsgrubs shig/ 'dod par byed pa'i sems de ni// mi len thams cad spong ba yin// 'di ni rgyu 'bras 'das pa'i phyir// 'bras bu 'dod pa rgyu mi bsgrub// mi rtog rang bzhin gnas pas 'grub// 'dod pa'i ting 'dzin thams cad spongs// 'dod med thams cad len par byed// ting nge 'dzin las 'dod pa 'dzin// 'dod pa de ni yang dag min// yang dag gzung du yod ma yin// byas pa'i las ni thams cad kun// ma btsal lhun gyis grub pas bsgrub// ma btsal lhun gyis grub pa de// byas pas grub pa ma yin te// ma byas ye nas lhun gyis grub// 'dod pa thams cad kun spangs pas// grub par byed pa'i bgegs su che// 'dod pa'i ting 'dzin bag chags des// bag chags de ni sems 'dzin yin// 'dzin pas bde ba de spong byed// mi 'dzin bde ba kun len pa// ji bzhin pa yi rang bzhin no// mi gnas pa la dmigs pa med// mi rtog pa la ting 'dzin med// med pa don gyi snying po de// 'dod pa med par thob bar 'gyur// ji bzhin bcos pa med pa ste// sangs rgyas kun gyi dgongs pa gcig/ bde ba che las ma gtogs pa// 'dod dang 'dzin pa ga la yod// gang la 'dzin chags med pa des// ting nge 'dzin de 'dzin pa'i mchog/ kun 'dzin ye nas grub zin pas// gtang gzhag mi rtog grub pa'i rgyal// zhes gsungs so// rdo rje sems dpa' nam mkha' che bram ze rgyas pa'i rgyud las bya med lhun rdzogs kyi le'u ste bcu gnyis pa'o//// rdo rje sems dpas yang zhus pa/ bcom ldan bde chen kun bzang po// 'dod med ma g.yos rtsol med gang// kun tu bzang pos bka' stsal pa// nyon cig nga la 'dus pa'i 'khor// chos nyid 'gyur ba ye nas med// bsgyur bas g.yos pa rdul tsam med// bde dang sdug bsngal byang chub gcig/ sangs rgyas sems can sems su gcig/ snang srid snod bcud chos nyid gcig/bden rdzun gnyis kyang chos nyid mnyam// bde la chags na sdug bsngal yin// rang bzhin gnas pas kun kyang 'grub// kun gsal de la rtog med pas// de ni rang byung ye shes yin// ye shes bag chags mi bsog pas// las kyis gos par ga la 'gyur// sna tshogs bsgoms pas gcig mi gsal// gsal ba'i ting 'dzin gang byed pa// de la ting 'dzin yod ma yin// de bzhin nyid du gcig pa la// sangs rgyas sems can gnyis su phye// bde ba sdug bsngal gnyis phye nas// dge ba dang du blang bar bstan// sdig pa rgyab tu bor bar bstan// de ni nges pa'i don las 'gal// rang bzhin chos la g.yos pa med// sangs rgyas rang bzhin g.yos med par// dus gsum rgyal ba'i chos nyid yin// de la sangs rgyas gud na med// byang chub sems las ma gtogs pa'i// sangs rgyas sems can gnyis ka med// sems nyid mi rtog sangs rgyas yin// sangs rgyas kun la sems nyid bsngags// sems nyid ma g.yos rtsol dang bral// rtsol bral de la bcos su med// ces gsungs so// rdo rje sems dpa' nam mkha' che bram ze rgyas pa'i rgyud las ma g.yos rtsol bral gyi le'u ste bcu gsum pa'o//// rdo rje sems dpas yang zhus pa/ bcom ldan bde chen kun bzang po// nyid kyi rig pa ji ltar gsal// kun tu bzang pos bka' stsal pa// nyon cig nga la 'dus pa'i 'khor// rig pa bsam brjod med par gsal// mi rtog bsam med ngang du gsal// rig pa rtog 'dzin med par gsal// bsam pa ma zhugs drang por gsal// rig pa dmigs gtad med par gsal// mi rtog mnyam pa'i ngang du gsal// rig pa bya btsal med par gsal// mkha' dbyings bde chen klong du gsal// rig pa dran bag med par gsal// shes rig bsam brjod med par gsal// rig pa 'dzin rtog med par gsal// mi g.yo mnyam pa'i ngang du gsal// rig pa gang du'ang gzhag med gsal// spyod pa'i mtha' dang bral bar gsal// rig pa rang lugs chen por gsal// bya rtsol nyid las 'das par gsal// rig pa ma bkag drang por gsal// mi rtog mnyam pa'i ngang la gsal// rig pa 'dzin bag med par gsal// mi rtog spraus dang bral bar gsal// rig pa bsam dpyod med par gsal// shes pa cir yang ma g.yos gsal// rig pa blo gtad med par gsal// bsam pa gang du'ang ma zhugs la// rig pa ngos gzung med par gsal// rig pa rgya ma chad par gsal// rig pa phyogs su ma lhung gsal// rig pa yongs la 'brel par gsal// thams cad kun gyi gzhi mar gsal// zhes gsungs so// rdo rje sems dpa' nam mkha' che bram ze rgyas pa'i rgyud las rig pa rang gsal gyi le'u ste bcu bzhi pa'o//// rdo rje sesam dpas yang zhus pa// bcom ldan bde chen kun bzang po// mnyam par gzhag na ji ltar gzhag/ kun tu bzang pos bka' stsal pa// nyon cig nga la 'dus pa'i 'khor// kun bzang ma nges nam mkha' 'dra// ma rtag gsal ba'i ngang la gzhag/ sgo lnga ma bkag rang sar gzhag/ ma btsal rang lugs chen por gzhag/ mi g.yo mnyam pa'i ngang la gzhag/mi rtog spros dang bral bar gzhag/ gang du'ang ngos mi gzung bar gzhag/ snang ba mi dgag gang dgar bzhag/ rtog med gsal ba'i ngang la gzhag/ gnyis med mnyam pa'i ngang la gzhag/ lus ngag yid gsum glod de gzhag/de bzhin ma bcos rang sar gzhag/ ma chags zhen dang bral bar gzhag/ bsam pa gang du'ang ma zhugs gzhag/ shes pa bsam dpyod med par gzhag/ ces gsungs so// rdo rje sems dpa' nam mkha' che bram ze rgyas pa'i rgyud las mi rtog mnyam gzhag gi le'u ste bco lnga pa'o//// de nas kun tu bzang pos rdo rje sems dpa' la sogs pa'i 'khor rnams bsdu bar mdzad nas rgyud kyi don bshad pa'o// phyogs bcu dus gsum gyi de bzhin gshegs pa thams cad dang/ khams gsum gyi sems can thams cad kyi rtsa ba ni kun tu bzang po'i thugs rang byung gi ye shes so// thugs rang byung gi ye shes ni bram ze rgyas pa nyid do// rgyud 'di ni kun tu bzang po nyid do// rang gi byang chub kyi sems so// sangs rgyas thams cad kyi sku gsung thugs so// rgyud 'di 'dzin pa ni sangs rgyas nyid do// thams cad sangs rgyas pa'i phyir 'khor ba ka dag go/ 'di 'dzin pa ni kun tu bzang po'o// thams cad rang byung ye shes yin pa'i phyir ro// rin po che gser gling na rdo dang sa mi snang ba ltar 'khor ba ka dag ste rang byung ye shes nyid do// bram ze rgyas pa'i rgyud las rgyud yongs su gtad pa'i le'u ste bcu drug pa'o//// rdo rje sems dpa' nam mkha' che bram ze rgyas pa'i rgyud rdzogs so/

CLOSE WINDOW