CLOSE WINDOW

Gpb032.007
བོད་ཡིག

/ bkra shis des kyang skye dgu rnams la zhi byed shog/// sarba mang+ga laM// dge'o// dge'o// dge'o//// ma tshang ba kha bskong ba'i rigs rnams so/ / rgya gar skad du/ san d+hi ma hA sa pa shi ka gar+b+hA ma su kha tsakra tan+t+ra nA ma/bod skad du/ rdzogs pa chen po rmad byung don gyi snying po/ rang byung bde ba'i 'khor lo'i rgyud ces bya ba/ bcom ldan 'das dpal rang byung rig pa'i rgyal po ye shes kyi sku dang ldan pa de la phyag 'tshal lo// 'di skad gsungs pa'i dus gcig na// ngo bo nyid rtogs kun bzang de// bde gshegs 'og min gnas mchog tu// rigs lnga rgyal ba la sogs pa// rang shar chos sku byin rlabs bshad// de tshe sems dpas don rig nas// gtsang ris lha yi gnas chen du// brtse dgongs dus la bab gyur nas// rig 'dzin sems dpa'i 'khor rnams la// nges don rang gi ngo bos bshad// de nas shAka thub sprul pa yis// 'dzam gling bde ldan gnas dag tu// dad ldan dus kyi de song na// gsang bdag sprul pa'i dad nyan la// sdeb sbyor legs pa'i tshig tu gsungs// da yang ston pa'i 'khor rnams nyon// skad cig yud tsam thang gcig la// gdul bya'i 'khor la tha dad kyang// dus gsum gcig ste khyad med phyir// rim par dbyer med ngo bos gcig/ de skad gsungs pa'i don go nas// skal ldan 'dus pa rnasam kyis kyang// gus nyan dad pas rtse gcig tu// dad cing mos pa'i yid kyis 'khod// de nas rdo rje sems dpa' yis// 'dus pa'i 'khor la phan gdags phyir// kun rig sems kyi rgyal po la// bden pa yid kyis de skad gsol// nges don bshad dus gang la bab// snod kyi rim pa gang la bstan// tshig dang yi ges ji ltar mtshon// kun rig rgyal pos bshad du gsol// de skad zhus pa'i don gsan nas// 'dus pa'i 'khor la bka' stsal pa// legs so dad ldan 'khor rnams nyon// de don ngas bshad yid kyis zung// dus kyi tha ma lnga brgya na// mna' za khrims 'chal dam nyams 'byung// mtshon dang mu ge tshe thung dus// rdzogs chen snying po dus der bshad// da yang rdo rje sems dpa' nyon// de yang dus kyi de sang na// sangs rgyas bstan pa 'jig pa'i tshe// 'dzam gling bod kyi byang phyogs su// rgyud dang tan+t+ra mang po 'byung// lung dang sems kyi chos dar te// sde snod chos kun nub 'gyur zhing// de tshe skal ldan 'ga' 'ga' la// bstan pa tsam gyis rtogs pa yi// 'bras bu sangs rgyas dus 'dir 'byung// da yang 'dus pa'i 'khor rnams nyon// dad ldan slob ma brtse gdung can// mngags pa'i las la gus par byed// yid 'thad rdzas la phangs med dbul// mi spel gnyer thub rnams la bshad// de dang mi ldan snod ngan ni// gyong la khengs pa'i nga rgyal can// ser sna che la gtong phod chung// man ngag sred chen kun la spel// phyi thag chung zhing bla ma smod// zas la ngan la nor dad che// chos la rang bzo rig pa 'jug/ rang rgyud ma dul gzhan la ston// rnam smin mi blta grags pa sgrub// phyi nang med par phyar kha gtong// de dag snod ngan mi rnams la// yang dag nges don 'di bstan na// mkha' 'gro rnams kyis srog bcad nas// phyi mar mnar med dmyal bar ltung// de phyir ma brtags chos mi bshad// da yang rdo rje sems dpa' nyon// tshig dang yi ges don mtshon te// man ngag snying pos khog phub nas// don dang mi 'gal sa bcad la// tshig nyung don chen rdzogs par bshad// de ltar mi shes gang zag gis// don med tshig gis gong 'og dkrug/ rtsal bshad tho chos gzhung nyams byed// mtshams med sdig pa'i char mi phod// rdzogs pa chen po rmad byung don gyi snying po// rang byung bde ba'i 'khor lo'i rgyud las/ don gyi gleng gzhi bstan pa'i le'u ste dang po'o//// de nas kun rig ston pa des// nges don rtsa ba 'di gsungs so// ngo bo gzhi yi gnas lugs dang// lta sgom spyod pa 'bras bu'i don// rtogs pa'i yon tan da lta'i dus// mngon du grub pa ngas bshad nyon// yul med ngo bo rang byung sku// 'khor 'das ma rig gdod nas byung// de don kun la ye nas gnas// 'dus ma byas kyi nam mkha' 'dra// da yang 'dus pa'i snying po nyon// dper na khyung chen lding ba bzhin// nges pa'i lta ba gdeng ldan pas// 'khor 'das dngos po cir snang yang// gzung 'dzin zhen rtog gzhi la med// ma ki ta yis gang thebs bzhin// lta ba ngo bo nyid rtogs pas// ci dran ma bsgoms chos nyid gsal// bzhag blang med pa rgyud du gnas// bi shwa karmas byas legs bzhin// rnal 'byor spyod lam thams cad du// ye shes rtsa ba don gyis zin// nyes pa'i skyon gyis gos med pa// yid bzhin nor bu'i yon tan bzhin// rang sems chos skur don rtogs pas// mi yi lus la sangs rgyas thugs// gdul bya gzugs sku shugs las 'byung// da yang rdo rje sems dpa' nyon// de dag ngo bo gcig gcig la// tshig gis mtshon pa tha dad kyang// yul med rang gsal nyid du 'dus// rdzogs pa chen po rmad byung don gyi snying po rang byung bde ba 'khor lo'i rgyud las/nges don rtsa ba gcig par bstan pa'i le'u ste gnyis pa'o//// de nas rdo rje sems dpa' yis// 'dus pa'i 'khor la phan don du// yid kyis dran pas 'di skad gsol// snang med ngo bo gnas lugs gang// gzhi la 'pho 'gyur ji ltar med// sems can kun la ji ltar yod// kun rig rgyal pos bshad du gsol// de skad zhus pa'i don gsan nas// 'dus pa'i 'khor la bka' stsal pa// snang med ngo bo gnas lugs ni// dus gsum med pa'i sngon rol na// 'das pa bas kyang rang byung snga// rgyu rkyen med pa'i sngon rol du// 'bras bu rang byung snying po byung// 'byung ba chen po'i sngon rol du// nga dang nam mkha' dus mnyam phyir// sangs rgyas thams cad nga nyid yin// bstan pa med pa'i sngon rol du// sangs rgyas pas kyang rang sems snga// theg pa med pa'i sngon rol du// lta ba'i chos su rang sems byung// skye 'chi med pa'i sngon rol du// myang 'das pas kyang rang sems snga// chos nyid med pa'i sngon rol du// stong pa nyid las rang sems snga// bde gshegs med pa'i sngon rol du// sems can las kyang chos sku snga// mtshon tshig med pa'i sngon rol du// tha snyad pas kyang don 'di snga// nga ni rgyu med 'bras bu ste// rang byung rgyu med snying po yin// de phyir mi skye don mi bgag/skye 'chi med pa rdo rje 'chang// nga ni nam mkha'i rang bzhin te// bag chags ma brtags sa chu med// gzugs med ye shes ngo bo la// rlung med me ni ci la 'byung// de phyir ngo bo nyid kyi sku// da yang rdo rje sems dpa' nyon// rang byung ngo bo nyid la ni// rgyu med ma skyes yang dag yod// sgro skur bral ba'i rig pa la// 'phel 'grib med pas rgyun du gnas// yang dag byang chub snying po la// thogs pa med cing spang ba med// 'khor 'das gnyis kyis 'dzin pa de// tha snyad yin te don du med// chos sku mtshan nyid rnam par dag/ bdag med chos la skye 'chi med// ngo bo nyid la bsgom mi dgos// mar me rang gi mtshan nyid 'dra// yod med yul gyi mtha' las 'das// de don rang bzhin 'od gsal bas// gdod nas dag pas nam mkha' 'dra// rdzogs pa chen po rmad byung don gyi snying po rang byung bde ba'i 'khor lo'i rgyud las/snang med don gyi gnas lugs bstan pa'i le'u ste gsum pa'o//// rdo rje sems dpa' yang nyon cig/ rang rig rtsa ba chos sku la// yon tan lhag ma med par rdzogs// rang byung sangs rgyas ye shes sku// ma skyes yongs su grub pa'i lha// chos rnams kun gyi 'byung gnas te// ngo bo dmigs med brjod las 'das// yang dag lta ba mthar phyin pas// pha rol phyin pa ye nas gnas// sangs rgyas kun gyi sangs rgyas la// 'gro ba yongs kyi kha lo bsgyur// bskyed pa med pa'i 'bras bu la// byas pa med pa'i cho 'phrul 'byung// thams cad rang byung nga yi rtsal// da yang rdo rje sems dpa' nyon// don la 'gyur med lta ba'i gzhi// yul la mi ltos rang byung sku// ye nas nam mkha'i mtha' dang mnyam// gzhi las 'gyur med byang chub sems// skyon gyis ma gos dran pa la// 'pho 'gyur med par brdal ba'i sku// mi skye mi 'gag rang rig klong// bsgom pas mi rnyed 'gyur med phyir// 'bras med da lta nga yi thugs// bskal par 'khyams kyang skye 'chi med// de rtogs rig pa kun gyi gzhi// ma bsgoms ye shes mthar phyin pa// re ba med phyir lung mi srid// gdod nas 'gyur med ye shes sku// rdzogs pa chen po rmad byung don gyi snying po rang byung bde ba'i 'khor lo'i rgyud las/ gzhi las 'pho 'gyur med pa'i le'u ste bzhi pa'o//// da yang rdo rje sems dpa' nyon// rang byung ngo bo nyid kyi sku// sems can kun gyi lus nang na// rang rig rgyal po ye shes de// rang gi sems la ye nas gnas// da yang 'dus pa'i snying po nyon// yang dag nges pa'i chos sku ni// dngos por ma grub yul las 'das// rig pa rgyun chags de nyid ni// 'gro drug kun gyi sems la gnas// skye med ye shes rang byung ste// ched du ma byas rang gsal ba// de nyid rang rig tsam las ni// bcos su med pas nam mkha' 'dra// sems can kun gzhi bzhi cha la// rang byung chos sku yod med kyang// lung med rkyen gyis rang rig bsgribs// de phyir ye yod rtogs par bya// da yang rdo rje sems dpa' nyon// sems can lus kyi tshor ba la// rang rig ye shes rgyun mi 'chad// 'du 'bral med pas ye nas gnas// de phyir nyon mongs sbubs nang na// kun bzang ye shes sems la gnas// nges don lung bstan don rtogs nas// de don gzhan nas bsgrub mi dgos// sems can byang chub su 'dod pa// kun gzhi'i gseb nas don tshol la// de yi ngang la gnas par gyis// de don rgyal ba'i dgongs pa yin// bde gshegs rnams kyi snying po yang// sems can lus la yod mod kyang// shes pa ma mthong tsam du bas// de mthong nges pa'i gdams ngag la// shes pa rtag tu 'bral ba med// da yang 'dus pa'i snying po nyon// ma rig 'khrul pa yod bzhin du// 'bras bu sangs rgyas thugs la gnas// de phyir gzhan nas 'byung ba med// thogs ma ma yin dus 'dir rang// de yang rang rig ye shes ni// til la mar gyis khyab pa bzhin// 'gro drug kun la rang rig khyab// skye 'gag med par rgyun du gnas// dper na sa gting nam mkha' bzhin// 'gro 'ong med par chos sku gnas// de don ma rtogs blos bslad nas// 'khor bar 'khyams pas nyams pa med// rang rgyud rig pa'i ye shes ni// sprin med mkha' la nyi shar bzhin// 'dus ma byas pa'i klong dkyil na// rang rig ye shes chos sku bzhugs// rin chen ga 'ur 'od thim ltar// lus kyi nang na chos sku yod// lus zhig dran pa lugs su 'jug/ de bzhin 'khor ba'i rgyud kha 'khor// don rtags rang rig gnas su che// rig pa rang byung ngo bo de// sems can kun gyi yid la gnas// de phyir 'khor 'das kun gyi gzhi// rdzogs pa chen po rmad byung don gyi snying po rang byung bde ba'i 'khor lo'i rgyud las/ sems can kun la gnas lugs bstan pa'i le'u ste lnga pa'o//// de nas rdo rje sems dpa' yis// kun rig rje la yang gsol pa// don gyi gnas lugs rtogs thabs gang// kun rig rgyal pos bshad du gsol// zhus pa'i don gsan bka' stsal pa// de don ngas bshad yid kyis nyon// nges pa'i bla ma lung ldan la// dad pa brtson 'grus dam tshig gis// bkur sti rim gro gus byas nas// man ngag snying po snang bar 'gyur// da yang 'dus pa'i snying po nyon// dper na bram ze glang chen bzhin// rgyal po'i bka' yi btsan phul gyis// brid bsdigs g.yo sgyus nor 'dod pa// srog snying med pas phan mi thogs// de bzhin nges pa'i lung ldan gyis// gdams ngag chos sku ma bstan na// thabs dang g.yo sgyu sna tshogs kyis// bka' rkun skyon gyis chos btsal yang// rang sems mi rtogs ngan song lhung// da yang 'dus pa'i snying po nyon// phrag dog med par bzang sems kyis// srog snying rgyal po la byin la// bram ze gser glang 'dra gnyis byung// gnyis ka mnga' thang ci bsam 'grub// de bzhin bla ma lung ldan la// yid 'thad dbul zhing ci gsung nyan// shes rab rno la gsang thub pa// man ngag snying po gnang ba'i phyir// slob mas rang sems rtogs par nges// de phyir bla ma bkur bar gces// nges don gnang ba'i thabs su bshad// rdzogs pa chen po rmad byung don gyi snying po rang byung bde ba'i 'khor lo'i rgyud las/nges don rtogs par bya thabs bstan pa'i le'u ste drug pa'o//// 'dus pa'i 'khor gyis yang gsol pa// nges pa'i don gyi gdams ngag gi/ ma rig mun sel lta ba dang// 'khor 'das mtha' yi ma rig dang// ye shes lhun grub lta ba gang// mnyam pa'i rgyal pos bshad du gsol// de skad zhus pa'i don gsan nas// yang dag 'khor la bka' stsal pa// rang byung snying po gnas lugs 'di// nyi ma shar bas mun pa sangs// nges lung bstan pas ma rig brlag/ thig le chos sku brdal khyab ste// rig pa rang shar bcos pa med// de don lhun grub ye nas gsal// rang byung snying po rang gsal thugs// ye nas tha snyad kun dang bral// ji bzhin gsal la don rtog med// don dam spros bral lta ba'i mchog/ rtsol med spyod pa yul las 'das// yang dag klong gyur don la mkhas// de nyid don la sus sbyor bar// tshogs brgyad shes pa'i yul las 'das// mngon du gyur pas thugs la bkra// kun gyis rtogs dka' byang chub bde// mi g.yo mi rtog chos sku lam// rang rig bde ba ye shes klong// gcig tu rtogs pa'i thig le gsal// lta ba dbus dang mtha' med pas// spang len ma btsal lhun gyis grub// skye med klong du rig pa 'phyo// rten med chags pa'i yul dang bral// sgom med lta ba'i ngang gis gsal// mtshon pa'i tshig gis bkri dang bral// skye med gdeng chub 'du 'bral med// snang med rig pa dngos po bral// yang dag thugs la spro bsdu med// ma spros lhun grub rig pa shar// kun khyab don 'dus mtha' ma rig/ ye shes sku mchog chos sku brdal// da yang rdo rje sems dpa' nyon// 'gro drug sems can rang byung sku// 'di ltar snang ba ma lus kun// gdod nas med pa'i don rtogs pas// ye shes gcig gi ngang du 'dus// lus ngag yid kyi bya ba rnams// byas nas 'ching ba'i las yin pas// gzhi la med ces btsal mi dgos// ma bsgoms 'du 'bral med par blta// rdzogs pa chen po rmad byung don gyi snying po rang byung bde ba'i 'khor lo'i rgyud las/ma rig mun pa sel ba'i le'u ste bdun pa'o//// da yang 'dus pa'i snying po nyon// sangs rgyas sems can 'byung ba kun// blo bur byung phyir gnas lugs min// de phyir 'jig rten chos la dpe mi lang// 'khor 'das gzhi ma don ma reg/ da yang 'dus pa'i 'khor rnams nyon// pha med ma med nags kyi bye'u// nam mkha'i mthongs su 'thon pa ltar// blo bur 'khor 'das gnyis par na// chos sku rtogs pas ma rig sangs// gdod ma'i rang byung 'di nyid ni// lta ba rtogs pas chog pa'i phyir// 'khor 'das gnyis po gdod nas med// yul dang ma bral ngo bo nyid// don rtogs pa yi don la gnas// ye rdzogs chos sku'i snying po yin// re dogs mtha' kun rnam par zhi// tshig tu mtshon med ye nas bden// gcig dang du ma mtha' yi chos// de phyir 'khor 'das gnyis las 'das// 'di zhes ma bsgrags lta ba'i chos// da yang 'dus pa'i snying po nyon// dngos po med phyir rtog pa bral// kun la khyab pas chad pa bral// dbus mtha' bral bas rang byung sku// chos sku nam mkha' lta bu la// brjod med lta ba dran pa'i gzungs// de don phyin ci ma log par// ye shes lam la gnas par bya// rang rig nges pa'i lta ba la// yangs pa med par yid la blta// de yang yul can ma yin te// rang la rang blta shin tu gsal// de goms mthar phyin ye shes thugs// chos nyid spros bral 'gyur ba med// rang byung ye shes gnyug mar gnas// de nyid mi 'bral lta ba'i mchog/da yang 'khor gyi snying po nyon// 'khor 'das gnyis kyi chos nyid la// ji srid bag chags yod pa'i bar// 'di ltar snang ba'i chos rnams so// ji srid bag chags dag na ni// snang ba'i yul rnams gdod nas med// thag sbrul mtho yor ji bzhin no// rdzogs pa chen po rmad byung don gyi snying po rang byung bde ba'i 'khor lo'i rgyud las/ mtha' ma reg pa bstan pa'i le'u ste brgyad pa'o//// de nas 'dus pa'i 'khor rnams la// kun rig rgyal pos bka' stsal pa// rang sems chos sku'i lta ba ni// kun la khyab pa'i rig pa yin// 'dus ma byas pa'i don rtogs pas// mtha' bral rig pa gcig yin no// da yang rdo rje sems dpa' nyon// kun gyi mnyam nyid rgyal ba'i thugs// ma lus sems can thams cad la// chos sku khyab pa brdal ba'i sku// mtha' dbus med pa'i nam mkha' 'dra// rig pa ma bslad gnyug mar gnas// dmigs 'dzin med par rang gis gsal// dngos po med pa shes rab yod// nam mkha' nyi ma'i 'od shar 'dra// 'dus ma byas kyi ye shes kyis// rten 'chang med pa nyon mongs sel// 'byung ba lnga la rag ma lus// mi 'gyur 'joms pas rdo rje 'dra// bla mas don bstan rnal 'byor pas// the tshom med par rang sems rtogs// thams cad gcig la rdzogs pa ste// ma rig long ba'i mig 'byed 'dra// ye shes rig pa de nyid ni// yod med dbus dang mtha' med pas// sang nge sal le mthong 'gyur med// ka shi ras kyis rin chen 'dra// da yang rdo rjai sems dpa' nyon// ma bcos lta ba'i rang bzhin la// yul med chos sku rang byung de// re dogs rdul tsam med pa'i phyir// lhun grub ye shes chen po yin// rdzogs pa chen po rmad byung don gyi snying po rang byung bde ba'i 'khor lo'i rgyud las/ ye shes lhun gyis grub pa'i lta ba bstan pa'i le'u ste dgu pa'o//// rdo rje sems dpas yang zhus pa// ma bsgoms ting 'dzin ji ltar gsal// 'bras bu rgyun gyi spyod pa gang// re dogs med pa'i 'bras bu'am// kun rig ston pas bshad du gsol// de skad zhus pa'i don gsan nas// 'dus pa'i 'khor la bka' stsal pa// ma bsgoms 'bras med ting 'dzin ni// rnam smin lus kyi rten bcas pa'i// tha mal kun gzhi bzhi cha la// lung ldan rkyen gyi gdams ngag gis// rang sems chos skur ngo sprad pas// dmigs 'dzin med par rang gis gsal// gnyug mar gnas la 'phel 'grib med// yul sems gnyis la dpyod dang bral// mtha' dbus mi dmigs dran las 'das// ye nas dag phyir bya ba med// btsal du med pas sems las 'das// kun la khyab pas btsal mi dgos// 'gag pa med pas rig pa stong// ma byas phyir na 'jig pa med// rig pa gsal bas rang ngo shes// ji bzhin pa la ma skyes pa// ma bcos rkyen gyis mi 'gyur ba// rtag chad ma yin bsdus pa med// so so ma yin 'dres pa med// dngos med sems kyi ting 'dzin gsal// gtang gzhag med pas chos sku la// bying rgod mi 'byung rgyun du gnas// ye shes don la 'char nub med// da yang 'dus pa'i snying po nyon// rang rig ye shes 'di nyid la// bsgom du med phyir yengs pa med// gzung du med la zhe la gsal// rang yid ches la khar mi thon// snang srid gsal la zhen pa med// rang gi bya ra dngos med grol// dran pa mi brlag 'gro 'ong med// dran pa'i rig pa ci byung yang// de nyid dus na ngos gzung med// da yang 'dus pa'i snying po nyon// yid kyi yul du ma bsgoms te// lta ba'i don dang 'bral med phyir// de tsam nyid na 'byung 'jug med// rdzogs pa chen po rmad byung don gyi snying po rang byung bde ba'i 'khor lo'i rgyud las/ye shes kyi sgom pa ngos gzung ba'i le'u ste bcu pa'o//// rdo rje sems dpa' yang nyon cig/ ngos zin don la gnas thabs ni// mar mes mun bsal snang ba bzhin// skad cig tsam gyi ting 'dzin gyis// bag chags brlag pas ma rig sangs// don nyid ye shes dran pa yis// nyon mongs las kyis gos pa med// de bas rang sems dran pa ni// sgyu ma sangs nas 'khrul ba bzhin// mtshan ma'i rtog bral don shes pas// spros bral ye shes snying por gnas// da yang 'dus pa'i snying po nyon// 'khor 'das gzhi shes rang byung ste// bsgom dang mi bsgom sgro skur bral// de nyid nyams su blang thabs ni// thigs pas snod chen khengs pa bzhin// ngo bo nyid kyi chos sku yang// sems nyid rig pa gsal thebs na// gol sa mi 'byung sangs rgyas 'grub// dper na bud med sbrum ma ni// skye ba'i dus su zas bsten bzhin// lung ldan man ngag yod pa'i mis// rkyen gyi rtog pa ci byung yang// don de nges don zla dran pas// ma bsgoms don dang 'bral ba med// dgos pa'i nyam chung brten pa bzhin// bla ma mkhas don ldan pa la// rtag tu bsnyen cing gus byas na// 'bras bu chos sku myur du 'grub// da yang rdo rje sems dpa' nyon// nges pa'i don gyi gdeng nyams kyang// bsgom du med phyir yengs pa med// dus bzhi rkyen gyi bar du ni// 'khor 'das yul gyis ma bslad phyir// ye yin don la brjod med bya// rgyal po mi 'gro 'khor sdud bzhin// chos nyid ma bsgoms sku gsum 'byung// che ba'i yon tan lhun gyis grub// dper na sgyu ma mkhas pa yis// sprul pa'i srog ni gcod tsam na// srog med sgyu ma yin zhes ltar// rang rig lta ba'i don gnas pas// dug lnga spyod tshe rang rig 'char// ngo bo nyid la 'grib med shes// de tshe nyon mongs ci spyad kyang// skyon gyis ma gos rang byung gsal// de nyid mi brjod rtogs pa'i phyir// ched du byas pa bsgom mi dgos// da yang 'dus pa'i 'khor rnams nyon// rang sems rtogs pa'i bsgom pa la// cig char bsdus te 'char na yang// sgom pa'i thun la ring thung med// nam 'grub snyam pa'i khar ma lus// rdzogs pa chen po rmad byung don gyi snying po rang byung bde ba'i 'khor lo'i rgyud las/ 'bral med rgyun gyi ting 'dzin bstan pa'i le'u ste bcu gcig pa'o//// de nas kun rig rgyal po yis// 'bral med rig spyod bka' stsal pa// rang byung ye shes nam mkha' che// ma 'dus yongs rdzogs chos kyi sku// da yang rdo rje sems dpa' nyon// mi skye mi 'gag rgyun du spyod// bsam 'das don gsal yid la gnas// gsang sngags ngo bo nyid kyi sku// sangs rgyas sems can gnyis kyis gsang// rang sangs rgyas dam pa'i spyod pa 'di// sangs rgyas kun gyi nges pa'i don// yang dag byang chub sems la ni// mi dmigs par yang dpyad du med// mi gnas par yang bsam du med// de phyir bya bral nam mkha' 'dra// da yang 'dus pa'i snying po nyon// ma bcos rang byung de bzhin nyid// dpyad du med pa'i chos nyid la// ma bsgoms dmigs su med pa ste// ting nge 'dzin zhes btags pa yin// mi rtog par yang mi sems la// kun la khyab pa'i ye shes la// kun shong bya med spyod pa'i mchog/ 'dus pa'i 'khor rnams da nyon cig/ rang sems ngo bo nyid rtogs phyir// yul 'di sems su mi sdud pas// dpyad pa'i yul yang med par 'gyur// gang gis gang la bsam zhing dpyad// dper na nam mkha' stong pa la// dmigs par mi byed sdud mi byed// de bzhin sems kyis sems bsgom du// ngo bo 'di 'dra dmigs su med// skyon yon cir yang ma dpyad na// gol sa sgrib par ci la 'gyur// spyod pa'i mchog tu de nyid gsungs// da yang rdo rje sems dpa' nyon// rgyun du mi 'bral rang rig 'di// nyams myong med par rang gsal ba// de nyid nyams kyi dam pa'i mchog/ mi 'dzin mi spyod rang gsal tsam// 'bral med rgyun gyi spyod par bshad// gal te mtshan ma rgyu na yang// de dran dgag sgrub med shes na// sangs rgyas lta sgom ngo bo gcig/rnal 'byor spyod pa thams cad du// don dam spyod pa yin pa'i phyir// ma dran gnyid dang nyon mongs la// rang gar song tshe de nyid la// ngo bo nyid dran gnod mi nus// da lta nyid du ye shes phyir// ched du ma byas spyad du med// rdzogs pa chen po rmad byung don gyi snying po rang byung bde ba'i 'khor lo'i rgyud las/ 'bral med rgyun gyi spyod pa bstan pa'i le'u ste bcu gnyis pa'o//// 'dus pa'i 'khor la dug lnga ni// rang grol ston pas bka' stsal pa// rang sems don rtogs spyod mi spang// 'dod chags zhe sdang gti mug dang// nga rgyal phrag dog 'khor ba de// nges pa'i gdeng ldan rnal 'byor pa// rgyu mthun bag chags mi gsog pas// pho mo dus gsum sbyar gyur kyang// bslab pa'i tshul khrims nyams pa med// bag chags gsog na yi dwags gnas su skye// mtho ris thar pa dag la rten mi 'cha'// rang sems snying po rtogs pa yis// 'chi med srog la gcad du med// zhe sdang mnar sems rig pa'i don// dmyal ba'i sdug bsngal ya mi nga// rang rig ye shes don ldan pas// ma rig sna tshogs don du shes// ye nas chos nyid brdal ba la// ma rig sgrib pa sbyang du med// don rtogs nga rgyal ye shes la// yid ches chos sku rang byung thugs// 'gran zla 'jig rten gsum na med// de nyid nga rgyal ngo bo nyid// phrag dog gol sgrib skyon med pas// de phyir ma spangs rang sar dag/ lta ba ngan la phrag dog gsal// de phyir phrag dog gsang ba'i sku// da yang 'dus pa'i snying po nyon// sems can log rtog tshan po ches// gzhan gyi rkyen gyis mi ldog phyir// dug lnga rang la brten te bzlog/ mthun par bstan pas nges par bzlog/ da yang 'dus pa'i snying po nyon// bzlog tu mi 'dod gang zag ni// sdig can mu stegs mthong ba'i tshe// shes spyod mtshang rnams 'bru ba'i phyir// bdag nyid gzhan du byol bar bya// gal te spang ba'i thabs med na// ngag gi smra tshig mi bsgo bar// snying rje chen po'i sems bskyed la// log non gdams ngag dran byas la// bzod pa'i yul du shes par bya// rdzogs pa chen po rmad byung don gyi snying po rang byung bde ba'i 'khor lo'i rgyud las/ dug lnga rang grol du bstan pa'i le'u ste bcu gsum pa'o//// da yang 'dus pa'i snying po nyon// 'bras bu rim 'byung ngas bshad kyis// legs par byung la yid kyis nyon// gnas pa'i ting 'dzin don ldan pas// ye shes bag chags cha mnyam phyir// gsal la mi rtog dus mnyam pas// 'dod khams lhar ni skye dbang yod// de tshe 'phos na chos nyid mthong// mi g.yo ba yi ting 'dzin gyis// rnam rtog de nyid zil non pas// gtsang ma ris kyi lhar skyes nas// de nyid dus na mngon sangs rgyas// mnyam nyid ldan pa'i rnal 'byor gyis// lus bral skad cig de nyid la// 'bras bu sangs rgyas chos kyi sku// dpe med ye shes kun bzang thugs// da yang 'khor gyi snying po nyon// mnyam pa'i don la ye gnas pas// 'bras bu rig pa da lta nyid// de don ma brjod ye dran phyir// gzugs khams gnas su ci la ltung// nyams myong ci la ma zhen cing// stong par mi 'dzin don gsal bas// rang rig ye shes mthu brtas phyis// gzugs med khams su ci la ltung// rang sems rtog pa mngon gyur pas// re dang dogs pa'i blo bral bzhin// gang yang 'dzin med thugs la gsal// nyan thos sa ru ltung mi 'gyur// dang po lta bas bdag med phyir// mtshan ma'i yul la ma zhen phyir// yul nyid sems su sdud pa med// 'dod khams gnas su ltung mi 'gyur// da yang 'dus pa'i snying po nyon// nam mkha' nyi shar mun pa med// de bzhin rang rig chos sku la// ma rig med pa ye shes 'char// sangs rgyas thugs la 'char nub med// de phyir 'bras bu sangs rgyas mchog/ rdzogs pa chen po rmad byung don gyi snying po rang byung bde ba'i 'khor lo'i rgyud las/'bras bu ltung ba med par bstan pa'i le'u ste bcu bzhi pa'o//// de nas 'dus pa'i 'khor rnams la// kun rig rgyal pos bka' stsal pa// thugs kyi gdeng chud skal ba la// mi nub yongs kyi gter du ni// dus gsum rgyal ba'i chos kyi sku// rang byung thugs su gsal ba'i don// mnyam nyid 'gro don byed pa'i lam// tshad ma rang gi dbang phyug gis// rjes 'tshob thugs kyi sras mchog la// skye 'gag 'khor ba spang len med// bdag 'dzin bral ba rgyal ba'i thugs// da yang 'dus pa'i snying po nyon// 'du 'bral 'chi med ye shes lus// rig pa phyogs med byang chub 'char// so so ma yin ye nas gcig/de phyir yon tan bstan pa dka'// byang chub ngang du thams cad 'dus// mtha' mnyam dbang phyug chen po'i thugs// ye shes sangs rgyas kun dang mnyam// sde snod chos rnams thugs la rdzogs// 'jig rten khams na 'gran zla med// zhe 'dod rigs lnga ma bsgrubs kyang// rang gi sems la sangs rgyas rdzogs// de nyid 'bras bu dam par gsungs// da yang 'dus pa'i 'khor rnams nyon// sngon tshe rnam gzigs bstan pa la// bram ze dpal ldan bya ba'i bu// rang sems rtogs pa'i don med pas// gzhan nas 'bras bu zhe 'dod kyis// rigs lnga'i sangs rgyas nam 'grub ces// yid la bsams shing lha bsgoms pas// 'bras bu med cing 'khor bar skyes// de phyir re dogs med par bya// da yang rdo rje sems dpa' nyon// re med don 'di dran byas na// chos nyid sangs rgyas sa la gnas// dogs med don las ma g.yos na// sgrib pa sbyang ba'i thabs mi dgos// da yang blo gros dam pa nyon// ngo bo nyid kyi chos sku la// gang yang ma bkag nam mkha' bzhin// 'khor 'das zhen med 'bras bu yin// de nyid rang sems snying por bshad// 'gro drug sems can thams cad la// chos sku rang chas yod rtogs na// sgom zhing sgrub pa'i nad dang bral// ye shes ngo bo da lta'i sems// re dogs med shes 'bras bu'i mchog/ dus gsum rang sems 'gyur med don// med la mi zad rang byung thugs// sangs rgyas zhes ni de la bya// rdzogs pa chen po rmad byung don gyi snying po rang byung bde ba'i 'khor lo'i rgyud las/ re dogs med pa'i 'bras bu bstan pa'i le'u ste bco lnga pa'o//// kun rig rgyal pos yang gsungs pa// snang med lta ba'i rig pa yis// ma btsal 'gyur med chos kyi sku// bag chags med pas yul dang bral// da lta nyid du rang byung sku// dngos med nam mkha'i mtha' dang mnyam// shes rig gsal ba'i khyad par 'phags// de las 'gran zla gang yang med// rtogs pa'i yon tan brjod mi lang// da yang rdo rje sems dpa' nyon// rang sems rig pa rang byung de// yengs med don shar rang byung drug/ spyi mthun nyi ma stong pas gsal// de nyid rtogs pas bsgom mi dgos// ye shes rig pa gsal ba des// ma rig mun pa gdod nas med// bag chags nyon mongs gtan nas brlag/ dgongs pa sangs rgyas kun dang mnyam// da yang 'dus pa'i snying po nyon// dper na rgya mtsho rlabs su 'byung// de bzhin don rtogs spyod pa yang// 'bral med rig pa ye shes rgyun mi 'chad// don 'di rtogs pa spyod pa'i tshe// tshogs bsags sgrib pa sa bcu pas// skad cig 'di 'dra khyad par 'phags// lus ngag rtsol med rig spyod bde// da yang 'khor gyi snying po nyon// rang drin 'bras bu rang la che// gzugs dang bral bas skye 'chi med// rang las byung bas ye shes sku// yul med rig pa mngon sangs rgyas// 'di rtogs 'bras bu lhun grub de// bsam pa tsam gyis kun 'grub ste// 'ching bu rin chen khyad par bstan// skye ba mi len mngon sangs rgyas// da yang rdo rje sems dpa' nyon// de rtogs mi zad rin chen gter// de yi 'bras bu yon tan ni// gzugs med rig pa ye shes sku// tha mal rang sems nga yi thugs// stong rig dran pa nga yi gsungs// rig pa'i yon tan gang gis 'grub// ye nas phrin las rang byung bas// rig pa spros bral chos skur rdzogs// da yang 'dus pa'i 'khor rnams nyon// 'gyur med lhun gyis grub pa'i gzhi// chos nyid bde chen klong yangs lam// skye 'chi med pa'i 'bras bu smin// de dag gcig phyir rgyal ba'i thugs// gser gling sa rdo med pa bzhin// sems can dus na sangs rgyas la// yon tan mtshan dang dpe byad dang// ye shes sku la kun kyang thugs// de ltar tha ma lus sems kyis// sems las ma lus sangs rgyas rnyed// rgyu las ma byung 'bras bu rtogs// lung las ma brten chos rnams shes// theg dgu'i chos rnams gcig las med// dug lnga mya ngan 'das pa dag/ thugs kyi klong rdol chos kyi sku// 'khor ba'i nang gi lus yod kyang// pad+ma dang ni 'dam bzhin du// nyon mongs las kyis gos pa med// de phyir sangs rgyas kun dang mnyam// rdzogs pa chen po rmad byung don gyi snying po rang byung bde ba'i 'khor lo'i rgyud las/ che ba'i yon tan bstan pa'i le'u ste bcu drug pa'o//// de nas rdo rje sems dpa' yis// 'khor gyi the tshom bsal ba'i phyir// bden pa'i yid kyis 'di skad gsol// rang byung ye shes ngo bo la// gzhal bya mi dmigs don ci lags// snang ba mtshan ma 'di nyid kyi// gtan tshigs ma grub gsungs pa ci// don de gang gis rtogs pa'i thabs// blta med gsungs pa ci yi phyir// gol sa ltung med bstan pa'i phyir// mthun dpe gang gis gang la mtshon// mnyam pa'i rgyal pos bshad du gsol// de skad zhus pa'i don gsan nas// 'dus pa'i 'khor la bka' stsal pa// dwangs gnyis la sogs chos rnams kun// bya ba med par rang shar cing// yul med ngo bo rang gnas phyir// ye nas ma bsgribs rang gsal ba// gang yang gzhan du mi dmigs na// gzhi la mi 'gyur ngo bor son// sems can med pas gzhal bya bral// da yang rdo rje sems dpa' nyon// snang med chos skur gsal ba la// ji snyed pa yi rnam grangs kun// dgag sgrub bya ba med pa'i phyir// rang gi sa na ye gnas pas// gzhan ma dag tu mi bsgrub pas// phyogs gnyis bral bas byang chub sems// mtha' bzhi tha snyad bral ba la// 'jal byed gtan tshigs ci zhig dgos// 'dus pa'i rdo rje snying po nyon// mtshon pa'i tha snyad mi brjod de// chos rnams ma lus thams cad kun// log pa'i rjes su 'brang ba'i phyir// yul med thig le rang shar bas// ji bzhin ma nor snying po yis// nges par gzhan du lta las grol// da yang rdo rje sems dpa' nyon// kun bzang brdal khyab rang bzhin la// thog mtha' chod phyir gol med pas// de nyid ye shes rang shar bas// gol sa nyid dang chos nyid dag/ ye shes ngang du 'gyur ba'i phyir// dmigs zhen med pas gol med gsungs// da yang 'khor gyi snying po nyon// dpe ni gang gi mi nub cing// nam mkha' nyi ma rang gsal bzhin// rang byung ngo bo ye shes bde gsal bas// snang ba phan med gnod med phyir// phyogs kyi tha snyad bshad kyi dgos// rdo rje sems dpas yang gsol pa// ma bsgoms don dang 'bral med pa'i// de don rtogs thabs gang gis bgyi// ma bsgoms klungs su 'gyur ba yi// rang gi tha snyad gang la gdags// de don bsgom du med pa'i phyir// mtshan ma byung na bcos mi dgos// lta ba rang shar chen po la// ma bsgoms goms par cis mi 'gyur// de skad zhus pas bka' stsal pa// snying po rang gi stobs dang ni// man ngag dgongs pa thugs brtol nas// shes rgyud rtogs pa'i bla ma yi// ji bzhin nyid du shar ba la// snang med chos[(]tsha sku[)]nyid mtshon pas// mtshan ma'i dngos por mi 'byung phyir// sman dang sman pa'i thabs bzhin du// sems min mi 'dod ci zhig ltar// da yang 'dus pa'i snying po nyon// thig le chos sku khyab pa'i phyir// ji bzhin nyid du rang shar bas// gang yang dam par mi lta bas// thams cad ji bzhin rang sar grol// de phyir mtha' la mi gnas pas// gtang gzhag med pa'i ting nge 'dzin// ma bsgoms klungs su 'gyur bar dgos// da yang 'dus pa'i snying po nyon// bsgom du med pa'i chos nyid la// rnam rtog mtshan ma ci byung yang// dmigs nas gsal ba bsgrub mi bya// dper na nam mkha' 'di nyid la// sprin dang khu rlangs la sogs pa'i// 'jig rten zhig nas med pa ltar// ji bzhin nyid du dang dran pas// dus mnyam gsal bas yang dag ste// de la gnyen pos bcos su med// tha snyad rang gsal bcos par bshad// da yang 'dus pa'i snying po nyon// yul med thig le rang shar bas// yang dag don la mi 'jug pa'i// ngo bo nyid du gyur pas na// don du gnyer ba gang yang med// snga phyi gzhan du g.yos med phyir// ched du bsgom du med pa ste// dmigs pa gtad pa'i don dang bral// don mi gnyer la dgra med 'dra// de yang 'dus pas yang gsol pa// gtang gzhag med pa'i sgom pa la// mi mthun mi 'byung gsungs pa ci// rnal 'byor pa de ma yengs na// byar med 'gog med gsungs pa ci// de nyid 'ching bar mi 'gyur ba'i// phyogs bral bstan pa ji ltar lags// kun rig ston pas bshad du gsol// kun rig ston pas bka' stsal pa// dus gsum rnam pa thams cad du// skye 'chi med par ye 'char ba// snang med zhen rtog thams cad kyang// gang yang chos skur gsal ba las// gtang gzhag rtsol sems ci la 'byung// gzhan du mi 'gyur klungs gnas pas// mi mthun mtshan ma gang yang med// da yang rdo rje sems dpa' nyon// dbyings dang mtshan ma thams cad kun// gzhi la ma grub don shes phyir// rang gsal yul la rtog pa med// dag dang ma dag thams cad kun// gang yang dgag sgrub med pa'i phyir// bzhag dang longs par yengs med don// 'byung 'jug med pas bsgoms mi dgos// rtsol ba med phyir spyod pa'i mchog/ da yang 'dus pa'i snying po nyon// bdag gzhan ka nas ma grub phyir// bya byed ma lus thams cad kun// 'gro drug las dang bde gshegs mdzad// ci spyod chos skur ye gnas pas// gang yang mtshan nyid dbyer med de// byed pa nyid na grol bar nges// blang dang dor ba ngang gis med// de yis 'ching bar ga la 'gyur// rdzogs pa chen po rmad byung don gyi snying po rang byung bde ba'i 'khor lo'i rgyud las/rdo rje sems dpa' thugs rtog bsal ba'i le'u ste bcu bdun pa'o//// rdo rje sems dpas yang gsol pa// ting 'dzin nyams dang ldan pa la// lta sgom spyod pa nyams kyi bdud// mnyam pa'i rgyal pos bshad du gsol// de skad zhus pa'i don gsan nas// 'dus pa'i 'khor la bka' stsal pa// mnyam bzhag rjes thob bar do la// snang ba 'od dang grag pa sgra// 'jigs pa'i gzugs dang bslu ba brdzun// lta bar shes na dam pa'i lam// da yang 'dus pa'i snying po nyon// rnal 'byor dam pas mnyam bzhag tshe// mtshan mo mun nag sprin rum nas// nam langs nyi shar shin tu gsal/ khams gsum sems can dge sdig las// gang yang ma lus snga phyi shes// de tshe snying rje'i bdud zhugs te// sems can snying rje'i gdung ba skye// ting 'dzin btang nas gzhan don rtsom// de phyir bdud kyi dbang 'gyur ltung// da yang rdo rje sems dpa' nyon// nam mkha' stong la dgra byung nas// bde gshegs chos rnams sna tshogs ston// zhing khams rgyan gyis brgyan pa dang// yid du 'ong ba'i sgra thos 'gyur// ting 'dzin btang nas glu gar byed// ngam zhing ngo mtshar dga' sems skye// de la zhen 'gyur nyams dang bral// dga' brod bdud kyis rang bslus ltung// nga yang 'dus pa'i snying po nyon// sgom nyams rmi lam gang yang rung// 'jigs pa'i gzugs sogs mi dge bas// ngang la gnas pa sdig 'gyur bas// ting 'dzin bor nas mya ngan 'dud// mi dga' sdug bsngal nyam thag 'byung// de tshe las la yi mug ste// lceb dang gcig pu phag tu 'gro// gzugs kyi bdud kyi dbang 'gyur ltung// de yang rdo rje sems dpa' nyon// nyams dang rmi lam dag tu 'ang// yid du 'ong ba'i gzugs bstan te// dus gsum nyes legs thams cad ston// gzhan la smras pas bden par byung// nga'o snyam pa'i bdud bzhugs te// ting 'dzin btang nas grong kha yan// bar du phyed bden phyed mi bden// tha mar smras pa thams cad rdzun// bslu ba rdzun gyis rang bslu ltung// da yang 'dus pa'i snying po nyon// lta ba'i bdud ni de dag dang// yul 'di gol sar ma shes phyir// snang ba gzugs sogs zhen pa ste// yul sems zhug la ci spyod bdud// rdzogs pa chen po rmad byung don gyi snying po rang byung bde ba'i 'khor lo'i rgyud las/ rnal 'byor lta ba'i bdud bstan pa'i le'u ste bco brgyad pa'o//// da yang rdo rje sems dpa' nyon// sgo lnga bying ba gsal ba'i bdud// dran med rmugs pa bde ba'i bdud// rkyen gyi rgod pa mi rtog bdud// 'phro ba mi g.yo bdud rnams 'byung// da yang 'dus pa'i snying po nyon// ting 'dzin myur du grub 'dod nas// yun ring bsgoms pas tshad ma zin// myos pa byang ba'i bdud zhugs te// ma rig dbang gis gnyid du song// gsal ba bor nas bying ba sol// de nyid rtsol bas ting 'dzin nyams// ma btsal rmi lam bzang ngan byung// de phyir bying ba'i bdud kyis bslus// de yang 'dus pa'i snying po nyon// rang rig chos skur ma zin pas// ma rig dbang gis ye shes bsgribs// dran pa med pa'i bdud zhugs te// ngang sgom rmugs pas bde ba nyams// rang rig med pas zhi gnas bying// lhag mthong med pas don dang bral// bsgoms pas don med bdud kyis bslus// de phyir lung ldan gdams ngag gces// da yang 'khor gyi sems dpa' nyon// gcig pur mi gnas 'dus pa dga'// gzhan gyi rkyen byas bdud zhugs te// ting 'dzin btang nas yin min gyi// yul la shes pa sna tshogs zhen// mi rtog med pas nyon mongs 'byung// spang sdud zhen pas rang rgyud byed// de phyir g.yeng ba'i bdud kyis bslus// da yang 'khor gyi snying po nyon// yang yang goms pa ma byas pas// 'phro ba rkun bu'i bdud zhugs te// gang yang rung ba'i tshig re tsam// yid la byed pas mi g.yo bral// nan tan chung bas nyams med phyir// long can rgyun du yang yang ldang// nges pa'i gdeng dang mi ldan pas// 'phro ba'i bdud kyis bslus phyir ltung// de yang 'khor kun legs par nyon// sgom pa'i bdud ni de dag dang// gdams ngag med pa rnams la 'byung// lung ldan rnams la gnod mi tshugs// ma rtogs ci bsgom bdud du 'gyur// rdzogs pa chen po rmad byung don gyi snying po rang byung bde ba'i 'khor lo'i rgyud las/sgom nyams kyi bdud bstan pa'i le'u ste bcu dgu pa'o//// da yang rdo rje sems dpa' nyon// bya ba 'du 'dzi'i longs spyod bdud// nyams dga' zhen pa gnas kyi bdud// bslabs pa'i yon tan zhen pa gnas kyi bdud// sems 'khrugs 'khor ngan bdud rnams 'byung// da yang 'dus pa'i snying po nyon// dgon par gnas na dad ldan sdud// longs spyod 'du 'dzi'i bdud zhugs te// ting 'dzin bzhag nas gzhan sems 'dzin// de tshe don bral nor zas 'dod// klog 'don mtshan ma'i chos la brtson// sgom pa'i don por g.yeng bas bslus// 'jig rten pa la kha len byed// 'du 'dzi bdud kyi rang bslus phung// da yang rdo rje sems dpa' nyon// rang 'thad pa yi gnas pa ni// bkra shis 'dre mod lha gnyen yod// rang bstod zhen pa'i bdud zhugs te// ting 'dzin tang nas nyams dga' brtsig/srung mas gzhan du 'gro dbang med// zer zhing bdag rtogs don dang bral// rang sems gzhan pas bdud du langs// gnas kyi bdud kyis rang bslus ltung// da yang 'dus pa'i 'khor rnams nyon// rnal 'byor mkhas pas bsgom 'dod la// g.yeng ba'i bdud ni khong zhugs te// gzhan gyis bstod pas ting 'dzin btang// chos 'chad sman dang bzo rnams byed// 'dod pa'i rdzas la zhen pa skyes// gzhan don byang chub yin zer nas// bya ba'i g.yeng ba ched du byed// don dang bral bas rang bslus ltung// da yang rdo rje sems dpa' nyon// rnal 'byor 'khor ngan gdung drags pas// sems 'khrugs bdud ni khong zhugs te// 'khor ngan chog shes med par 'dod// drin du mi tshor phyar kha btang// de tshe dad log mi rnams 'phya// sgro skur 'debs la zhe sdang 'byung// 'khor ngan bdud kyis rang bslus ltung// da yang 'dus pa'i snying po nyon// spyod pa'i bdud ni de dag dang// 'jig rten chos brgyad zhen las 'byung// de phyir g.yeng ba'i don du gnyer// 'khor ba dang blang rang bslus phung// rdzogs pa chen po rmad byung don gyi snying po rang byung bde ba'i 'khor lo'i rgyud las/ spyod pa'i bdud bstan pa'i le'u ste nyi shu pa'o//// da yang 'dus pa'i 'khor rnams nyon// 'jig rten mkha' 'gro lung bstan bdud// nyams su myong ba zhen pa'i bdud// zhe 'dod tshul 'chos bdud dang ni// sgom chags bde ba bogs 'don bdud// gdeng med skur bdebs zhe sdang bdud// nga rgyal sgro 'dogs bdud rnams 'byung// da yang 'dus pa'i 'khor rnams nyon// rnal 'byor lta ba mnyam bzhag tshe// lha mo'i lus su mngon phyung tshe// phugs su ma 'dug 'gro don gyis// gzhan don byed pa'i yon tan brjod// de tshe mkha' 'gro'i bdud zhugs te// ting 'dzin btang nas gzhan don brtson// chos su mi btags ci yang byed// don dang bral phyir bdud bslus 'gyur// da yang 'dus pa'i snying po nyon// rnal 'byor don ldan bsgom pa la// zab cing cha phra nyams myong ba// lta ba'i don chen ma zin pas// zhi gnas zhen pa'i bdud zhugs te// rkyen ma thub cing 'phel 'grib yod// bag la nyal ba'i ma rig pas// ma rig ye shes ma shes phyir// lta med zhen pas bdud bslus phung// da yang 'dus pa'i 'khor rnams nyon// don med bsgom pa'i gang zag kun// gdeng med tshul 'chos gsog can te/ kha 'jam gting 'khral bdud zhugs te// gzhan dag brid phyir dge la brtson// man ngag med phyir gsang ba skad// rang nyid bslus pa'i bdud zhugs ltung// phyi mar yi dwags lte 'phyor skye// da yang 'khor gyi snying po nyon// lta ba thabs kyi rnal 'byor pas// dbang gsum pa yi bde ba la// dga' ba bzhi la zhen pa yis// 'dod chags srid pa'i bdud zhugs te// byi bshug pho mo kun bsags nas// 'dod chags spyad pas ting 'dzin 'phel// de phyir dbang la brten dgos zer// chags pa'i bdud zhugs rang bslus ltung// da yang rdo rje sems dpa' nyon// nges pa'i don ldan rnal 'byor pas// mnyam du re nas 'gran pa'i phyir// smad sems zhe sdang bdud zhugs te// rang nyams zhen pas gzhan dag la// gdams ngag can la skur pa 'debs// rnal 'byor pa la gnod mi tshugs// de phyir rang nyams rang nyid ltung// phyi mar tsha ba'i dmyal bar skye// da yang 'dus pa'i snying po nyon// nges pa'i don ldan rnal 'byor gyis// nges don yang dag bka' la ni// gang zag smad phyir sgro btags te// mi tshig yin zer phyar ka gtong// nga rgyal bdud ni khong zhugs te// bka' rkun d+harma 'og 'bru byed// zhe la 'dod phyir ches chung byed// de phyir bdud bslus dmyal bar ltung// da yang 'dus pa'i snying po nyon// bdud kyi spyod yul bco brgyad kyang// so sor snang ba ma yin te// lha yi bu bdud gcig pu yin// de phyir lta ba dman pa'i bdud// rdzogs pa chen po rmad byung don gyi snying po rang byung bde ba'i 'khor lo'i rgyud las// nyams kyi bdud bstan pa'i le'u ste nyer gcig pa'o//// rdo rje sems dpas yang zhus pa// lta sgom spyod pa nyams kyi bdud// de dag zil gyis ji ltar mnan// kun rig rgyal pos bshad du gsol// zhus pas don gsan bka' stsal pa// phyi nang chos kun rang byung sku// bdud nyid rtogs na chos nyid rang// de phyir lung ldan pa la zhus// rang sems rtogs na bdud med do// da yang rdo rje sems dpa' nyon// ma nor don la bsgoms pa'i tshe// snang ba 'od kyi bdud byung na// chos sku kha dog bral ba'i phyir// gsal la mi rtog zil gyis mnan// grag pa dgra yi bdud byung na// chos nyid sgra dang bral ba'i phy-ir// rjes su 'bral med rang bzhin ni// lta ba'i rig pas zil gyis mnan// 'jigs pa gzugs kyi bdud zhugs na// gzhi la snang ba med pa'i phyir// ltos med rtogs pa'i shes rab kyis// gzugs can mtshan ma zil gyis mnan// bslu ba rdzun gyi bdud byung na// chos nyid tshig las 'das pa'i phyir// bden par 'dzin pa'i skyon bral bas// bden par 'dzin med zil gyis mnan// da yang rdo rje sems dpa' nyon// bying ba gsal ba'i bdud byung na// nyid gsum gcig pa'i man ngag gis// gti mug chos skur rang thim pas// ye nas lta ba zil gyis mnan// rmugs pa bde ba'i bdud byung na// 'phel 'grib med pa'i don shes phyir// rang byung bde ba'i lta ba la// mnyam nyid rig pas zil gyis mnan// rgod pa mi rtog bdud byung na// snang ba bag chags brtas pa la// rang rig bag chags med pa'i phyir// spang sdud zhen med zil gyis mnan// 'phro ba mi g.yo'i bdud byung na// ye nas mi g.yo'i rang byung la// goms pa'i dbang gis ting 'dzin gsal// mi brjed gzungs kyis zil gyis mnan// da yang 'dus pa'i snying po nyon// lta sgom bdud ni de dag dang// rang byung chos sku'i don rtogs pas// gang byung zil gnon rang brlag pas// 'bras bu ye shes lhun gyis grub// rdzogs pa chen po rmad byung don gyi snying po rang byung bde ba'i 'khor lo'i rgyud las/ lta sgom gyi bdud zil gyis mnan pa'i le'u ste nyer gnyis pa'o//// da yang rdo rje sems dpa' nyon// de yi ngang la gnas pa'i tshe// 'du 'dzi longs spyod bdud byung na// ting 'dzin dgra ru shes pa'i phyir// 'dod chung chog shes zil gyis mnan// zhen pa gnas kyi bdud byung na// yul la nges med ma chags pas// lta ba rang rig yul med phyir// zhen pa med pa'i zil gyis mnan// yon tan g.yeng ba'i bdud byung na/ bdag don ma 'grub bar du yang// mi dbang mi gtang don dran pas// gzhan don mi bya zil gyis mnan// 'khor ngan sems 'khrugs bdud byung na// mthar thug 'brel ba med pa'i phyir// gnas skabs 'brel pa ting 'dzin dgra// gdung sems bskyungs la zil gyis mnan// da yang 'dus pa'i snying po nyon// zil gyis mnan thabs de dag kyang// spang len dgag sgrub med par dgos// nges don spyod pa gcig gi ngang// de phyir 'bras bu lhun gyis grub// rdzogs pa chen po rmad byung don gyi snying po rang byung bde ba'i 'khor lo'i rgyud las// spyod pa'i bdud zil gyis mnan pa'i le'u ste nyer gsum pa'o//// da yang 'dus pa'i snying po nyon// mkha' 'gros lung bstan bdud byung na// rang rig 'gyur med rtogs pa la// gzhan du ston na bslu bar shes// re dogs med par zil gyis mnan// nyams myong zhen pa'i bdud byung na// snga phyi med pa chos sku ni// ting 'dzin rkyen gyis mi 'gyur phyir// zhen med lta bas zil gyis mnan// zhen 'dod tshul 'chos bdud byung na// gang yang ma bcos don dran pas// rang byung nges sku gdeng ldan phyir// rtogs pa drang po'i zil gyis mnan// bde ba bogs 'dod bdud byung na// rang byung ye shes rten med phyir// dbang la mi ltos 'phel 'grib med// rgyu rkyen 'byung 'dod zil gyis mnan// gdeng med skur 'debs bdud byung na// nges don sgro skur bral ba'i phyir// lung ldan can la gnod mi nus// lta spyod khams kyis zil gyis mnan// nga rgyal sgro 'dogs bdud byung na// rang byung don la sgro 'dogs bral// de don nges pa'i gdams ngag 'di// snod ngan spangs la zil gyis gnan// da yang 'dus pa'i 'khor rnams nyon// de dag nyams kyi bdud rnams kyang// rtogs na rnal 'byor dam pa'i lam// de phyir sgom pa brjod mi bya// de don sangs rgyas dgongs pa yin// rdzogs pa chen po rmad byung don gyi snying po rang byung bde ba'i 'khor lo'i rgyud las/ nyams kyi bdud zil gyis mnan pa'i le'u ste nyer bzhi pa'o//// rdo rje sems dpas yang gsol ba// rang sems rtogs pas zil mnan pa'i// 'bras bu thob dus sangs rgyas nam// kun rig ston pas bshad du gsol// zhus pa'i don gsan bka' stsal pa// rnal 'byor rtogs pa'i gdeng ldan pas// tshe yi tha ma 'chi kha'i dus// sa chu me rlung rim thim ste// dbugs brtsegs thum thum byed pa'i tshe// 'di yi snang ba nub ka dang// phyi ma'i snang ba 'char ka ru// rnam shes snang ba skyes ba'i tshe// du ba smig rgyu lta bur mthong// 'byung ba dngos med zhig pa snyam// de tshe snang ba 'di nub nas// rang snang mched pas srin bu me// bag tsam gsal ba'i don mthong ste// snang ba thob pa'i dus su ni// mar me'i rtse ltar brtag par dka'// de yang ye shes brtan pa'i dus// nam mthongs nyi ma shar ba ltar// rang rig chos sku wal gyis gsal// yul med rig pa rang byung thugs// sa zin nges pa'i ye shes te// sngar goms dbang gis sgyur med de// dper na khab len lcags sdud bzhin// rang rig chos sku ngos zin pas// sangs rgyas yon tan thams cad 'dus// de yang rang rig ye shes ni// sang nge sal le yer re gsal// de phyir rang byung ye shes sku// phyis ni bar dor lus mi len// yul la mi 'jug chags pa med// mngal du mi 'jug skye shi chod// sangs rgyas zhes ni de la bya// de yang 'dus pa'i snying po nyon// gza' skar gzugs brnyan rgya mtsho bzhin// dus gcig bye ba phrag brgya ru// 'gro don gzugs sku rnam gnyis 'byung// ci rigs pa yi chos rnams ston// rang gi ngo bo chos kyi sku// dpe ni sprin med nam mkha' 'dra// rtags ni sangs rgyas chos sku mkhyen// de yi yon tan brjod mi lang/ rdzogs pa chen po rmad byung don gyi snying po rang byung bde ba'i 'khor lo'i rgyud las/ sangs rgyas dus bstan pa'i le'u ste nyer lnga pa'o//// rdo rje sems dpas yang gsol pa// ma rtogs 'khor bar 'khyams pa yi// de yi ltung sgo gang du ltung// kun rig rgyal pos bshad du gsol// de skad zhus pa'i don gsan nas// 'dus pa'i 'khor la bka' stsal pa// rgyud lung man ngag chos rnams kun// snang zhing ru bzlog byas pa dang// sgro skur gnyis su zhen pa'i phyir// byas la don med sdug bsngal 'byung// da yang rdo rje sems dpa' nyon// dper na bya sgro rlung khyer bzhin// nges med bzhi la blo gtad pas// ma rtogs rtsol sgrub ci spyad kyang// mi grol dug lnga rgyas par 'gyur// dmus long byang thang 'khor ba bzhin// nges don ma rtogs 'ching sgom dang// shes rab mig med bag chags rtags// gol sa ma chod nor ba'i lam// dper na 'dab chags gshog chag ltar// lta spyod gcig tu ma shes pas// res 'jig blang dor blos byas phyir// ma rtogs chos spyod las rnams 'khrul// da yang rdo rje sems dpa' nyon// ma rtogs dbyig gi thun tshe yis// mdo sdai kha ton bton gyur kyang// bdag bstod gzhan la smod pa yis// ngan song sgo ru nges par ltung// gzhan gyis bsam sbyor bzang po la// bar chod byed pa bdud yin te// ma rtogs ser sna byed pa ni// bdud kyi sgor ltung 'khor bar 'khyams// gzhan gyi chos la phrag dog pas// yon tan mang du ldan gyur kyang// rang sems snying po ma rtogs phyir// gnod sbyin sgor ltung 'khor bar 'khyams// mnyam nyid ma rtogs rang rgyud du// chags sdang pho tshod pa yi las// dug lnga rang dgar spyad nyes pas// srin po'i sgor ltung rtag tu 'khor// rang dbang ting 'dzin ma thob par// 'khor dang ris su bcad bsams pas// bdag nyid che 'dod 'khor sdud pas// sho khams brtsan chen rtag tu 'khor// ji bzhin ma nor ma rtogs pas// lta log gzhan gyis slob dpon byed// rang nyid ma shes gzhan sgrol ba// rU tra'i sgor ltung rtag tu 'khor// tshig gi phrin las ci mkhas kyang// ma rtogs dngos por 'dzin pa yis// rang rgyud dam rdzas mngon zhen phyir// bgegs dang bya rog sgor ltung 'khor// thabs lam dbang la khungs phyung nas// 'dod chags rang dgar rtag spyad pas// lta bas ma zin bde la zhen// lha chen sgor ltung 'khor bar 'khyams// ma rtogs pa dang bdag 'dzin pas// gsang sngags lta spyod yin zer nas// sems can srog la brtse med spyod// mu stegs rtag chad sgor ltung 'khyams// da yang 'dus pa'i snying po nyon// ma rtogs dbang gis spyod rtsings pa// lus ngag can gyi lam pa'i phyir// las ngan dgu po gang spyad kyang// dmyal bar nges 'gro gtan du 'khyams// rdzogs pa chen po'i rmad byung don gyi snying po rang byung bde ba'i 'khor lo'i rgyud las/ma rtogs ltung ba'i sgor bstan pa'i le'u ste nyer drug pa'o//// de nas 'dus pa'i 'khor rnams la// kun rig rgyal pos bka' stsal pa// theg pa'i rgyal po lhun rdzogs 'di// dad ldan 'khor rnams khyed kyis kyang// rgyud 'di yid la bcang bar gyis// da yang rdo rje sems dpa' nyon// snod dang mi ldan skal ngan ni// tshul 'chos byed cing bla ma smod// nor phangs chos 'dod thabs kyis 'bru// de lta'i snod ngan gang zag rnams// ye shes lta ba rgyud chen 'di// nam yang bstan par ma gsungs so// da yang rdo rje sems dpa' nyon// gzhung bzhin ma byas nges don chos// nor 'dod phyir du 'di bstan na// sangs rgyas bka' chad 'byung ba'i phyir// mkha' 'gro chos skyong dgrar langs nas// srin pos srog gcod mnar med ltung// da yang 'dus pa'i snying po nyon// bstan pa 'jig pa'i dus 'di na// rdzogs pa chen po'i bstan pa 'byung// snod ldan rnams la bstan pa las// dad med kun gyi spyod yul min// kun kyang nges pa de ltar zhog/ lan cig dus kyi de sang na// gsang sngags rnal 'byor khas 'ches te// nges don nyams su len pa dkon// don med chos spyod mi dgos zer// bsod nams 'dod phyir chos 'chad 'byung// da yang 'dus pa'i snying po nyon// gang zhig rnal 'byor las can chos// gzhung 'di don las mi 'da' bar// dka' dgu bsngos nas 'di tshol ba// de tshe don du rgyud 'di ni// sbas skyibs mi bya lhug par bstan// da yang rdo rje sems dpa' nyon// snod ldan ma 'phrad dus nye na// chos skyong yod pa'i lha khang ngam// lha 'dre yod pa'i brag dkyil du// smon lam btab la sbas la bzhag/ rdzogs pa chen po rmad byung don gyi snying po rang byung bde ba'i 'khor lo'i rgyud las/rgyud gtad pa'i le'u ste nyer bdun pa'o//// rdzogs pa chen po rmad byung don gyi snying po rang byung bde ba'i 'khor lo'i rgyud gser gyi dril shing can zhes bya ba rdzogs so//// rgya gar gyi mkhan po bi ma la mi tra dang/ bod kyi lo tsA ba gnyags dz+nyA na ku mA ras bsgyur cing zhus te gtan la phab pa'o//// nyang ting 'dzin bzang po la bshad/ des gter du man ngag dang bcas pa bcug/mgon po nag po dang rdo rje legs pa dang/ rdo rje rgyan gcig ma la gtad/ dbu ru bzang phug mo'i brag la sbas/ 'brom ye shes snying pos bton nas/ sras dbang phyug rgya mtsho la bshad/

CLOSE WINDOW