CLOSE WINDOW

Gpb031.005
བོད་ཡིག

rgya gar skad du/ man+t+ra asna ka ha dza tan+t+ra/ bod skad du/ man ngag brtsegs pa gri gug gi rgyud/ bcom ldan 'das rdo rje sems dpa' la phyag 'tshal lo// 'di skad bdag gis thos pa'i dus gcig na/ bcom ldan 'das 'khor gdon tshogs chen po dang/thabs cig tu lcang lo can gyi pho brang na bzhugs te/ de'i tshe de'i dus na lcang lo can gyi pho brang du gdon tshogs pa chen po dang bcas te/ dpal mgon po nag po des skye ba mang du brgyud de/de'i tshe bcom ldan 'das kyis 'khor rnam bzhi bskyong bar thugs dam du bzhes so// de'i tshe phyag na rdo rjes rdo rje sems dpa' la phyi rabs kyi don du rgyud 'di bshad du gsol// zhes zhus pas// des bshad par bya yis nyon cig/ le'u dang pos gleng gzhi bshad par bya/ le'u gnyis pas rgyud ji ltar 'byung ba bshad par bya/ le'u gsum pas mdos bsag pa'i thabs bshad par bya/ le'u bzhi pas lha bsgom pa'i thabs bstan/le'u lnga pas spyan drang ba bstan/ le'u drug pas mchod pa dbul ba bstan/ le'u bdun pas mdos btang ba/ le'u brgyad pas sbyin bsreg bya ba/ le'u dgu pas zor 'phang ba/ le'u bcu pas sngags bzlas pa bstan/le'u bcu gcig pas 'khor lo bri ba bstan/ le'u bcu gnyis pas gnan pa bya ba bstan/ le'u bcu gsum pas ser ba dbab pa bstan pa/ le'u bco lnga pas klu la gtad pa bstan pa/le'u bcu drug pas sre'u gso ba bstan pa/ le'u bcu bdun pas klus zin pa gso ba bstan/ le'u bco brgyad pas gzungs bton cing smon lam gdab pa bstan pa/ le'u bcu dgu pas 'khor gyis gtso bo la bstod pa/le'u nyi shu pas mgon po la bstod pa/ le'u nyer gcig pas brgyud pa'i rim pa bstan pa'o// ma hA kA la'i rgyud las/ gleng gzhi'i le'u ste dang po'o//// rgyud ji ltar byung ba bstan pa ni/ rin po che dpung rgyan gyi rgyud dang/ dpung rnam par bkod pa'i rgyud dang/ khro bo me 'bar gyi rgyud dang/ rdo rje rtso mo'i rgyud dang/ thod pa nag po'i rgyud/ char sprin nag po'i rgyud/ rin po che dpung bkod pa'i rgyud/ 'khor lo nag po'i rgyud/ gsang ba nag po'i rgyud kyang bshad do// ma hA kA la'i rgyud las/ rgyud ji ltar byung ba'i le'u ste gnyis pa'o//// de nas yang dag bshad bya ba// 'di dag sgrub pa'i rnal 'byor pas// mdun du lha rnams spyan drangs la// bdun po rnam dag byas nas ni// rang gis sdom pa dag kyang bzung// gzhung dang ldan pa'i gnas dag tu// rgyud las byung ba'i gsang sngags 'di// sum 'bum drug 'bum dgu 'bum bzlas// bzlas pa'i tshad du phyin pa dang// las 'di thams cad brtsam pas 'grub// rnal 'byor dam tshig nyams pa dang// gzhan gyi rig sngags byung ba dang// rig sngags phar la gtang 'dod na// gang dmigs gso bar 'dod pa des// 'bru sna bdun gyi ngar phye la// gzugs ni khru gang tshad du phyin// bcu gsum dag gi gzugs byas la// rbab kyang rnab zer skra la lung thang mig/ mgron bu'i so la zho sha'i snying// gang dmigs gso bar 'dod pa de'i// 'phang ba'i nor phogs mgul du gdab// gces pa'i gos phud lus la bskon// dar mtshon sna lnga'i rgya mtshan dang// bal tshon sna lnga'i rgyal mtshan dang// mi bo de la gzug par bya// lug nag khyi nag g.yag nag dang// bya nag shang shang rma bya dang// stag dang gzig dang glang po che// bcu gsum gzugs su byas pa rnams// rin chen sna lnga sder du dgram// btsod dang zhu mkhan rgya skyegs dang// 'brang rgyas phyed dkar phyed nag dang// 'khor gyi mkha' 'gro'i rdzas su bsags// dkar gsum mngar gsum sman sna tshogs// 'khor gyis chos skyong rdzas su bsags// gang dmigs bsad pa'i 'dod pa na// sbrul nag gi ni chun bskor dang// ral pa dmar nag dag tu bya// tsha ba gsum la gang dmigs bri// dpral bar rus la kha ru ming// spyi bo snying ga lte ba ru// spyi bo srog gi snying po dang// ha na badzra lte ba ru// gsal ba'i mar me btang nas ni// sngags kyi phreng bas bskor nas kyang// dur khrod dag du bsreg pa na// tshangs pa'i tshe dang ldan pa yang// myur ba nyid du 'chi bar 'gyur// ma hA kA la'i rgyud las/mdos btang ba'i le'u gsum pa'o//// de nas lha bsgom bshad par bya// tshad med stong pa'i rang bzhin la// yaM baM raM laM hUM la sogs// A li kA li'i 'phro 'du las// thig le hUM gyur rdo rje ste// rdo rje dang po'i mgon por bsgom// ston ka'i zla ba ltar dkar zhing// zhal gsum pa la phyag drug po// nag dang dmar dang dkar ba'i zhal// rdo rje 'khor lo pad+ma ni/ g.yas kyi phyag tu bsam bya zhing// dril bu rin chen ral gri ni// g.yon gyi phyag tu bsam bya bar// sku gsung thugs dang ldan par bsgom// dbu rgyan cod pan de bzhin te// mtshan dang dpe byad dang yang ldan// de yi mdun du bsam bya ba// sku gsung thugs las byung ba yi// hUM yig sngon po bsam par bya// hUM las mgon po nag po bskyed// mdog nag shin tu 'jigs mdzad pa// gsus khyim che la rkang lag thung// mgrin pa sbom la zhal mdog nag/mche ba gtsig pa smin mtshams gnyer// dbu skra kham nag gyen du brdzes// gri gug thod pa phyag na bsnams// sku la thod pa dag gis brgyan// de yi sprul pas 'jig rten gang// mkha' 'gro shugs 'gro'i tshogs dang bcas// 'byung po phyogs skyong tshogs bcas kyis// thams cad bskor nas 'dud par bskyed// ma hA kA la'i rgyud las/ lha bsgom pa'i le'u ste bzhi pa'o//// de nas spyan drang ba bshad par bya ste// hUM mgon po'i thugs dam bskang ba dang// gzhan gyi gnod pa bsal ba dang// bdag gi las bcol grub pa'i phyir// mgon po nag po spyan 'dren gyi// hUM bde chen 'du 'bral med pa'i klong dkyil nas// yang dag sku gcig gshegs su gsol// lha chen dpal 'bar spyan 'dren gyi// nag po chen po gshegs su gsol// oM dad pa dang ni dam tshig gis// tshur gshegs tshur spyon chos skyong mgon po'i tshogs// dri za me lha gshin rje dang// bden bral chu lha rlung lha dang// gnod sbyin dbang ldan la sogs pa// lha dang gshin rje chen po dang// srin po ro langs gsod byed dang// klu yi bu mo tshogs bcas dang// gnod sbyin 'byung po'i tshogs dang bcas// nyi zla sa bdag la sogs pas// so so rang rang gnas nas 'dir gshegs shig/ ma hA kA la'i rgyud las/ spyan drang ba'i le'u ste lnga pa'o//// de nas yang gtor ma bshad par bya'o// 'bras chen sha dang chang dang ni// me tog bdug pa byug pa dang// bdud rtsi lnga dang sha lnga dang// khur ba shing thog sna tshogs kyis// gtor ma sbyin pas mnyes par bya// ma hA kA la'i rgyud las/ gtor ma'i le'u ste drug pa'o//// de nas mdos kyi cho ga bshad par bya// hUM 'bru sna bdun las byas pa'i ngar gyi mi bo che// rbab zer skra la lung thang mig/mgron bu'i so la zho sha'i snying// gces pa'i nor phogs mgul du btags// phongs pa'i gos phud lus la bskon// dar tshon sna lnga'i rgyal mtshan btsugs// mchod rdzas mang po gral du bshams// mdos kyis bdag pos mdos bzhes shig/hUM bskal pa me ltar 'bar ba'i klong dkyil nas// shin tu mi bzad ma hA kA la'i sku// shin tu 'jigs pa'i sku mdog mthing nag la// 'jigs pa'i na bza' ber smug sku la gsol// thugs rje rtags kyi thod pas sku la brgyan// g.yas kyi phyag na gcod pa'i gri gug bsnams// g.yon pa thod pa khrag gis bkang ba 'dzin// dbu skra ral pa'i thor tshugs gcig tu 'khyil// gdug pa sbrul gyi chun pos dbu skra bcing// sku mdog mthing nag 'jigs par bstan pa ni// don dam dbyings las 'gyur ba med pa'i rtags// sku la dar nag 'jol ber gsol ba ni// thugs rje'i sprul pas 'gro don byed pa'i rtags// thod pa'i phreng bas sku la brgyan pa ni// thugs rje'i sprul pa sna tshogs 'byung ba'i rtags// dbu skra ral pa gcig tu 'khyil ba ni// thams cad chos kyi dbyings su gcig pa'i rtags// gdug pa sbrul kyi chun pos brgyan pa ni// nyon mongs dug lnga ma lus spangs pa'i rtags// g.yas na gcod byed gri gug bsnams pa ni// rnam rtog bag chags ma lus gcod pa'i rtags// g.yon na thod pa khrag gis bkang ba ni// rnam rtog nyon mongs thams cad zad pa'i rtags// hUM dpal ldan mgon po nag po ste// khyod kyi yon tan bsam mi khyab// seng+ga la yi dur khrod du// srin po gnas pa'i sa phyogs su// thugs rje'i shugs kyi sprul pa'i sku// gsod byed ma hA kA la ste// dar nag 'jol ber sku la gsol// gser ka rin chen sku la bcings// g.yas na tsan+dan bing chen bsnams// gsor zhing klad pa'i dkyil du brdeg/g.yon pa'i thod pa khrag gis bkang// 'byung po'i snying khrag dron mo 'thung// phyogs mtshams steng 'og la sogs pa// ma hA kA la'i tshogs su gtams// srin po dang ni srin mo rnams// 'byung po yi dwags ma lus kun// gsod dang gzir ba'i las rnams kun// ma mo thams cad 'dul byed pa'i// shin tu brjid pa'i sku byung ba'i// phyi yi dur khrod chen po ste// bsil ba'i tshal gyi gnas mchog na// mkha' 'gro ma la shugs 'gro ma// gsod byed ma mo'i tshogs kyis bskor// zhal gsum phyag drug brjid pa'i sku// mthing nag 'jigs pa'i rgyan gyis brgyan// dur khrod thod pa'i phreng ba dang// zhing lpags 'jol ber sku la gsol// sbrul nag ske rags sku la bcings// dbu skra gyen du 'khyil pas ni// steng gi lha rnams 'dar zhing dngangs// sbrul nag rgyan gyis brgyan pa ni// 'og gi klu rnams 'dar zhing dngangs// 'od zer phyogs bcur 'phros pas ni// lha dmag kun gyi dbugs 'byin cing// lha ma yin gyi g.yul rnams bzlog/ zhal gsum phyag drug bstan pa ni// mkha' 'gro ma mo 'dar zhing dngangs// zhing chen gdan la bzhugs pa ni// yi dwags tshogs rnams dbang du sdud// spyan rtsa gyen du bzlog pas ni// bar snang lha rnams dbang du sdud// shangs kyi sbug nas tshub ma 'phro// stong gsum 'jig rten 'dar zhing dngangs// ljags ni drag po'i glog bzhin 'gyu// stong gsum 'od kyis 'gengs par mdzad// mche ba zang yag brdar ba ni// log rtog kun gyi mtshan ma 'joms// spu gri so yis dgra snying 'gems// gri gug 'bar bas dgra srog gcod// thod rlon 'bar bas dgra khrag 'thung// tsan+dan bing chen phyar ba yis// dgra bo'i klad pa'i rgyas su brdeg/ khyod kyi thugs dam dus la bab// dkon mchog dbu 'phang smod byed dang// theg pa chen po sun 'byin pa// bstan pa 'jig pa'i dbyen byed dang// slob dpon smad par byed pa rnams// ma lus pa ni bsgral du gsol// hUM dpal ldan mgon po nag po ni// shar gyi phyogs kyi dur khrod na// dri za stong gi tshogs dang bcas// las su sangs rgyas bstan pa srung/ sha dang khrag ni za byed pa'i// gdug pa'i dgra bo srog gcod pa'i// khyod kyi thugs dam dus la bab// shar lho mtshams kyi dur khrod du// dpal ldan mgon po nag po ni// me lha stong gi tshogs dang bcas// las su sangs rgyas bstan pa srung// sha dang khrag ni za byed pa'i// gdug pa'i dgra bo'i srog gcod pa'i// khyod kyi thugs dam dus la bab// lho yi phyogs kyi dur khrod du// gshin rje stong gi tshogs dang bcas// las su sangs rgyas bstan pa srung// sha dang khrag ni za byed cing// gdug pa'i dgra bo'i srog gcod pa'i// khyod kyi thugs dam dus la bab// lho nub mtshams kyi dur khrod du// srin po stong gi tshogs dang bcas// las su sangs rgyas bstan pa srung// sha dang khrag ni za byed cing// gdug pa'i dgra bo'i srog gcod pa'i// khyod kyi thugs dam dus la bab// nub kyi phyogs kyi dur khrod du// klu yi rgyal po'i tshogs dang bcas// las su sangs rgyas bstan pa srung// sha dang khrag ni za byed cing// gdug pa dgra bo'i srog gcod pa'i// khyod kyi thugs dam dus la bab// nub byang mtshams kyi dur khrod du// rlung lha stong gi tshogs dang bcas// las su sangs rgyas bstan pa srung// sha dang khrag ni za byed cing// gdug pa dgra bo'i srog gcod pa'i// khyod kyi thugs dam dus la bab// byang gi phyogs kyi dur khrod du// gnod sbyin stong gi tshogs dang bcas// las su sangs rgyas bstan pa srung// sha dang khrag ni za byed cing// gdug pa dgra bo'i srog gcod pa'i// khyod kyi thugs dam dus la 'bab// byang shar mtshams kyi dur khrod du// 'byung po stong gi tshogs dang bcas// las su sangs rgyas bstan pa srung// sha dang khrag ni za byed cing// gdug pa dgra bo'i srog gcod pa'i// khyod kyi thugs dam dus la bab// dgon pa'i nags 'dabs dur khrod du// 'jigs byed ma mo'i tshogs dang bcas// dur khrod ma ma'i gtso bo mdzad// khyed kyi thugs dam dus la bab// sku ni mthing nag 'jigs pa la// ral pa bsigs pas 'jig rten khyab// ba sbu'i bu ga thams cad las// sdom dang sdig pa'i sprul pa 'gyed// phrag pa g.yas nas dbu byung ba// dbu ni lha chen 'joms pa'i dbu// dbu skra ral pa bsigs pa las// seng ldeng phur bu'i ser chen 'bebs// khyod kyi thugs dam dus la bab// phrag pa g.yon du dbu byung ba// dbu ni srin po 'joms pa'i dbu// dbu skra ral pa bsigs pa las// tsan+dan phur bu ser chen 'bebs// khyod kyi thugs dam dus la bab// thugs kyi dkyil nas dbu byung ba// dbu ni klu chen 'joms pa'i dbu// dbu skra ral pa bsigs pa las// chu srin bye ba'i sprul pa 'gyed// khyod kyi thugs dam dus la bab// lte ba'i dkyil nas dbu byung ba// dbu ni gnod sbyin 'joms pa'i dbu// dbu skra ral pa bsigs pa las// lcags kyi phur bu ser chen 'bebs// khyod kyi thugs dam dus la bab// dri za gshin rje me lha dang// bden bral chu lha rlung gi lha// gnod sbyin dbang ldan sa bdag bcas// lha yi tshogs dang klu yi tshogs// srin po la sogs gnod sbyin ma// klu yi bu mo'i tshogs dang bcas// gnod sbyin bu mo 'byung po'i tshogs// sha dang sha khrag la dga' ba dang// thams cad kun nas 'dir spyon cig/ mdos kyi bdag pos mdos bzhes shig/glud kyi bdag pos glud 'di long// mA hA kA la'i rgyud las/ mdos btang ba'i le'u ste bdun pa'o//// de nas sbyin sreg bshad par bya// gang dmigs ling+ga bcas pa de// lcags kyus snying drangs rlung gis btegs// rnam par shes pa de la bstim// rdo rje phur pa de la brdeg/ bsad nas de la sbyin bsreg bya// las dang 'tshams pa'i thab khung du// de dang mthun pa'i me lha bsam// de ltar mgon po bsam pa dang// tsha ba'i mar dang tsher ma can gyi shing// til nag dug chus sprus pa yis// sngags dang sbyar te bsregs byas na// tshangs pa'i tshe dang ldan pa yang// tsha ba'i nad kyis 'chi bar 'gyur// ma hA kA la'i rgyud las// sbyin bsreg gi le'u ste brgyad pa'o//// da ni zor 'phang ba bshad par bya ste// thod pa bya rog rjes can du// gang dmigs ling+ga gzhug par bya// khrag sna stong dang dug sna stong// thod pa'i nad du blug par bya// gzungs thag dag gis gdags byas nas// maN+Dal dbus su gzhug par bya// sngags pa bdud chas dag tu zhugs// ngan sngags drag po bzlas byas la// dgra bo'i grong la btab byas na// tshangs pa'-i tshe dang ldan pa yang// smyo 'bog nad kyis 'chi bar 'gyur// ma hA ka la'i rgyud las/ zor 'phang ba'i le'u ste dgu pa'o//// da ni sngags bshad par bya'o// dzaHhUM baM hoH/ e h+ye hi ma hA kA la ru ni/kA dza dza hUM/ oM ma hA kA la ha na ha na badzra swA hA/ oM ma hA kA la mA da rA dza hUM phaT/ oM badzra yak+sha de ba ma hA kA la kro d+ha hUM dz+ha dz+ha dz+ha/ ha na ha na/ ma hA kA la ya hUM phaT/da ha da ha/ ma hA kA la mA ra ya hUM phaT/ pa tsa pa tsa/ mA ka la mA ra ya hUM phaT/ b+han+d+ha b+han+d+ha/ ma hA kA la mA ra ya hUM phaT/ ts+tshin+da ts+tshin+da/ ma hA kA la mA ra ya hUM phaT/ b+hin+da b+hin+da/ ma hA kA la mA ra ya hUM phaT/oM ma hA kA la che ge mo mA ra ya sha thun mA ra ya hUM phaT/ oM ma hA kA la ru lu ru lu b+h+yo/ mA ra mA ra gr-ih+Na gr-ih+Na/ b+han+d+ha b+han+d+ha/ da ha da ha/ pa tsa pa tsa/ de na me ke na hUM phaT/ ma hA kA la'i rgyud las/ drag po sngags kyi le'u ste bcu pa'o//// de nas 'khor lo bshad par bya// dur khrod ras sam shog shog la// yang na rdo sngon dag la bri// gzar skar 'joms pa'i nyi ma la// dug dang ske tshes ming rus bri// 'khor lo khrag chen dag gis bri// gang dmigs dgra bo'i khang sa la// rtsibs ldan mu khyud gsum ldan bri// rtsibs brgyad dag la dgod pa ni// gnyis po lnga dang re tha gsum// gang ras dag la mi rus bri// mA ra sha thun tha ma bskor// mgrin par hUM la snying gar ming// 'doms su phaT rnams bri bar bya// sngags pa las su rung ba dang// lha khang dur khrod klu yi gnas// gnod sbyin gnas pa'i sar mnan na// tshangs pa'i tshe dang ldan pa yang// glo bur nad kyis myur du 'chi/ma hA kA ka'i rgyud las/ 'khor lo bri ba'i le'u ste bcu gcig pa'o//// de nas gnan pa bshad par bya// thod pa ma gas ma chag pa// ma hA kA la'i snying po bri// bzlas byas nyung dkar de ru blug/yang na klu sbrul dkar nag gnyis kyi gzugs// kha ru ming la rgyab tu rus// tshon skud sna lngas gril byas la// stag gi kha'am chu srin sna// dgra bo'i sgo khar mnan pas ni// sngags 'di bzlas pas 'chor mi srid/oM ma hA kA la blad hri sna ram shig sod/ le'ur shig sod/ sur le shig sod/ thuM ril shig sod/ phud la tsho shig sod/ zhung tri shig sod/ ma bu ru shig sod/ sbur la shig sod/ nA ga rA dza tsit+ta dz+wa la ya nan nan/ma hA kA la'i rgyud las/ mnan pa'i le'u ste bcu gnyis pa'o//// de nas ser ba dbab pa bshad par bya'o// khyi'am rabs chad thod pa ru// 'khor lo dpe'u chung ltar byas te// btsan dug nyung dkar gu gul yang// thod pa'i nang du blug par bya'o// zangs dang 'khor ba bud med mngal khrag gsum// sha zan spu rus sgro chu ser/ zhabs mar grol te thod par gzhug/ yul dang phu chu dgra ming rnams// 'khor lo dag la bri bar bya// klu'am yul lha gnas sar mnan// sngags 'di bzlas pas myur du 'bab// oM ma hA kA la gyi ling ni sad ne sa ra b+h+yo/ di rak+sha b+h+yo/ rak+sha dza la mi dza la/ sra krid sra krid de ser de ser// badzra tsa khrid phob phob/ ma hA kA la'i rgyud las/ ser ba dbab pa'i le'u ste bcu gsum pa'o//// de nas ser ba bsrung bar bshad par bya ste// seng ldeng phur bu bcu dag la// ha na ha na'i sngags bzlas la// 'ong ba'i mtha' ma bskor bar bya'o// rang nyid mgon po nag po yis// nyung dkar khrag skam nag po la// sngags 'di bzlas shing stong thun dag tu bzlog/ oM tsaN+Da ma hA kA la badzra daM gre ni hUM hUM hUM/phaT phaT phaT/ nA dza ya nA sha ya/ s+t+waM b+ha ya s+t+waM b+ha ya oM phaT/ ma hA kA la'i rgyud las/ ser ba bsrung ba'i le'u ste bcu bzhi pa'o//// de nas klu la gtad pa bshad par bya'o// thod pa ma mkhal ma bral ba// tsha ba gsum la gzugs byas la// ming la rus su bcas pa yang// thod pa de yi nang du gzhug/ dmangs rigs klu la sngags 'di bzlas// oM ma hA kA la nag gi la yag yaM/ nA ga pa ru sna tsa li/sarba ni sarba ni rbad/ nA ga ku ru nA ling tsit+ta badzra mA ra ya dza dza/ ma hA kA la'i rgyud las// klu la gtad pa'i le'u ste bco lnga pa'o//// de nas sri'u gso ba bshad par bya ste// rin chen lnga yi spu gu la// gsang ba'i sngags kyi 'khor lo gzhug/ gang bsrung ming gang spel te bri// gu gul gla rtsi shu dag kyang// 'khor lo de yi nang du gzhug/ tshon rtsi lnga yi tshon dang ni// rdzas sna lnga yi thang chus byug/mgon po nag pos byin brlabs te// gang bsrung mgul du btags na ni// des ni gcod pa thams cad bsrung// tshe thag phur bus bsrung ba ni// bal tshon sna lnga'i skud pa'am// yang na nag po rang la bya// seng ldeng phur bu bdun dag la// gsang ba'i sngags kyis btab nas ni// gang bsrung lus la btags pa na// des ni klu yi gnod pa srung// gang bsrung ma brtas bar du ni// sba lcags dkar po tshigs gsum mo// bya rgod sgro bsgron mda' dag la// bal tshon sna lnga gdags par bya'o// mtshal dang spos kyi dud pa btang// sngags pas mgon por byin brlabs nas// gang bsrung sngas su btsugs nas ni// de ni gtan gyi bsrung ba yin// ma hA kA la'i rgyud las/ sri'u gso ba'i le'u ste bcu drug pa'o//// de nas klu yis zin pa gso ba bstan te// phya tshang ku ba'i nang du ni// klu yi nor brgyad blugs nas ni// sngags pas byin brlabs cher byas te// gang 'dod gnas su bcug pas ni// de ni gnod par mi 'gyur ro// drag pos 'dul ba'i cho ga ni// seng ldeng phur bu sor brgyad la// gu gul tsha ba'i mar gyis byugs// gang gnod gnas su btab pas ni// klu yi gnas khang 'joms par byed// 'di ni nag po klu yi gzir sngags yin// oM ma hA kA la nA ga zhung thun/ dz+wa la dz+wa la/ ts+tshin+d+ha ts+tshin+d+ha/ b+han+d+ha b+han+d+ha hUM phaT/ nA ga sa ra ya nA ga dung dung dza dza/ma hA kA la'i rgyud las/ klus zin pa gso ba'i le'u ste bcu bdun pa'o//// de nas yang gzungs 'don cing smon lam gdab par bshad par bya'o// tshe rabs sngon nas rgyal bas dbang bskur nas// tshe rabs brgyud nas bstan pa srung bar mdzad// mgon po thugs rje can la phyag 'tshal lo// na mo yo gi nI/ na mo ta gi ni/ tad+ya thA/ hi li hi li/ ki ti tsi ti/ ni ti ye swA hA/ tshe rabs sngon nas da lta yan chad du// rgyal ba'i bstan pa srung bar zhal bzhes pa'i// de ring dus 'dir bstan pa rgyas par mdzod// ma hA kA la'i rgyud las/ gzungs 'don cing smon lam gdab pa'i le'u ste bco brgyad pa'o//// de nas 'khor lha ma srin rnams kyis bcom ldan 'das phyag na rdo rje dang// rdo rje sems dpa' la bstod pa/ hUM rdo rje sems dpa' sems dpa' che// rdo rje ye shes chen po'i mchog/phyag na rdo rje mthu stobs bdag/ gsang ba'i bdag po rdo rje can// ya mtshan rmad byung khyod la phyag 'tshal bstod// gri gug gi rgyud las/ 'khor gyis gtso bo la bstod pa'i le'u ste bcu dgu pa'o//// de nas yang 'khor gyis gtso bo la bstod pa/ bskal pa me ltar 'bar ba yi// dur khrod chen po'i klong dkyil nas// gdug par gyur pa thams cad kun// 'dul byed mgon po nag po ste// sku ni mthing nag chen po la// dpa' bo stag gi slag pa can// bdud kyi ber nag sku la gsol// thal ba'i mtshan mas lus byugs pa// g.yas nag gcod pa'i gri gug bsnams// g.yon pa b+han+d+ha'i khrag chen gsol// zhal nas khrag dang zhag kyang 'dzag/ mche ba zla ba chos pa'i tshul// spyan gsum sdang mig glog ltar 'gyu// ral pa kham nag gyen du 'khyil// khro gnyer bsdus pa'i gzi brjid can// b+han+d+ha'i phreng bas do shal byas// gsus khyims che zhing gsus pa 'phyang// mi thud khro gnyer drag po yis// mchu dang so la khrag kyang 'dzag/ mi ro skra yi skud pas dkris// bam chen steng na btsan dkyil gnas// phyag rgya chen po'i bdag nyid can// dam pa'i gtsug lag srung ma ste// keng rus brtsegs pa'i steng na bzhugs// las su sangs rgyas bstan pa bsrung// zas su sha dang khrag la za// dur khrod gnod sbyin kun gyi gtso bo mdzad// nag po 'jigs byed sku la phyag 'tshal lo// dpa' bo 'khor lo'i bdag la phyag 'tshal lo// lha dmag dbugs 'byin khyed la phyag 'tshal lo// lha dang klu la sogs pa yis// dpal ldan mgon po nag po la// dam pa'i bstod pas bstod nas ni// so sor rang rang gnas su dengs// mgon po nag pos 'khor gyi lha srin sde brgyad la bka' stsal pa/ oM dri za me lha gshin rje dang// bden bral chu lha rlung gi lha// gnod sbyin dbang ldan sa bdag sogs// lha yi tshogs dang klu yi tshogs// srin po ro langs gsod byed ma// klu yi bu mo'i tshogs bcas dang// gnod sbyin bdud mo 'byung po'i tshogs// sha dang khrag la dga' ba rnams// thams cad kun nas 'dir gshegs shig/ 'byung po'i sha ni bza' bar zhim// 'byung po'i khrag ni btung bar zhim// 'byung po'i bus pa zhim pa ste// gdug pa thams cad 'dul ba'i phyir// zo zhig 'thungs shig myur du sgrol// mgon po man ngag gri gug brtsegs pa'i rgyud las/ 'khor gyis gtso bo la bstod pa'i le'u ste nyi shu pa'o//// gsang ba'i bdag po'i rgyud 'di 'jig rten gyi khams su grags par ston cig/rgyud 'di rnal 'byor pa rnams kyi srog yin no/ rgyud 'di ni yul d+ha na ko sha'i gling mkha' 'gro ma mang po tshogs pa'i gnas su bab par gyur cing/ phyag na rdo rje ri rab ri'i rtse mo na 'khor lha srin sde brgyad la bshad pa'o// de nas gyad kyi sku mchog chen pos ma hA bo d+hI'i mchod rten gyi rtsar ma bdun la bshad/ de nas lha'i gtso bo rnams kyis rdo rje gdan du bdud brgyad la bshad do// de nas rgya gar gyi yul gser mig bya mchu can du sbas so// de nas rgya gar gyi slon dpon grub pa can rnams kyis rnyed de/ rim gyis brgyud pa lags so// mgon po nag po man ngag brtsegs pa'i rgyud las// brgyud pa'i le'u ste nyi shu gcig pa'o//// sngon gyi las dang smon lam da lta'i skal bar ldan// skyes mchog de lta bu dang rgyud 'di 'phrad par shog/ man ngag gri gug brtsegs pa'i rgyud rdzogs so//// bla ma dam pa mi bskyod rdo rje la gnang ba'o// rje btsun shAn+ti b+ha dras zhus pa las/ dge slong tshul khrims rgyal bas bsgyur ba'o////

CLOSE WINDOW