CLOSE WINDOW

Gpb030.009
བོད་ཡིག

/ 'phags pa rdo rje nag mo dbang phyug ma'i sngags rgyud las/ bstod cing rjes su yi rang ba'i le'u ste bco lnga pa'o//// rdzogs so//// ! rdo rje nag mo dbang phyug ma'i rgyud phyi ma/de nas byang chub sems dpa' sems dpa' chen po lag na rdo rjes mngon rdzogs rgyal po la 'di skad ces gsol to// sangs rgyas kun gyi thugs kyi mchog/ he ru ka te dgyes phyag mdzad// dam tshig chen po sems can don// rdzogs par mdzad la mgos phyag 'tshal// stong nyid ngang la ma bzhugs par// bde chen mnal nas ci ste bzhugs// phyi rabs rnal 'byor don ched du// the tshom chen po zhu bar 'tshal// de nas he ru ka'i chos nyid la mnal ba de las bzhengs te phyag na rdo rje zhes bos nas/ the tshom thams cad khyod kyis dris shig ngas bshad par bya'o zhes gsungs pa dang/ phyag na rdo rjes 'di skad ces smras so// kye kye thugs kyi bdag po mchog/ dbang phyug chen mo'i rgyud kyi don// mdor na tshul ni ji ltar bsgrub// bsdus pa'i dkyil 'khor gang zhig lags// dam rdzas gang dang gang gis bgyi// mchod pa'i tshul ni ji ltar mchod// srog snying yang dag gang zhig lags// grub pa'i mtshan ma ji ltar dbyung// thun rnams bsdu na ji ltar bsdu// gsad pa'i las ni gang gis bya// gsad pa'i dus su mtshan ma gang// chu 'khyags las la ji ltar bsgrub// ming po gshin rje nag po yi// sgrub thabs kyang ni bshad par mdzod// bu gcig bdud kyi sgrubs thabs kyang// thugs rje chen po bshad par 'tshal/khyod ni gnod sbyin zhes bya ba// de yang dpal bos bshad du gsol// de la dpa' bos bka' stsal pa// dbang phyug nag mo'i dkyil 'khor ni// sgrub pa'i dkyil 'khor bsdus pa ni// phyi dang nang dang gsang ba gsum// phyi ni rgya ru mda' tshad la// dpangs su khru phyed ldan byas te// ba yi sna lngas byi dor byas// gru gsum zla gam sgo bzhir ldan// tshon rtsi bzang pos byug pa ni// gru gsum mthing nag zla gam dmar// gru chad ljang gu sgo bzhi rigs// shin tu mdzes shing spras pa bri// nang gi 'khor lo bri ba ni// dur khrod lta bu'i gnas dag tu// maN+Dal 'dom gang nyams dga' ba// de phyir gzhan yas brtsigs par bya// dbus su gru gsum mtho do la// ras rus phra mos brtsigs par bya// dpangs ni chag gang tshad du'o// dpal thar gnyis kyis gdung gi tshul// rtsib mas gdung gis spra lag dgod// sha chen khrag gi thog phub bya// steng du thing ril rkang gcig la// nal bu'i tsit+ta rgyal mtshan tshul// thod mkhar de yi phyi rim du// lcags phye sa nag bsres pa yis// ri yi tshul du lan bdun bskor// de ni ma bdun gnas pa yin// nang du kham sa sha chen la// dre'u rta rkang rgyus srab mthur can// rna ba ba ni dri bu 'phyang// de lta bu yi gzugs gcig la// steng du zhon pa'i ma mo ni// lcags phye sa las bya ba ste// mgo gcig lag gnyis khro tshul can// ral gri mdung thung g.yas dang g.yon// ko rlon stod la re sde smad// sbrul gyi ske rag bcings pa ste/ kha nas khrag gi zar bu 'dzag/ rkang pa sgrog tu bcug par bya// de yi mdun du gzugs bya ba// mtshan mo nag mo rig pa'i gzugs// mgo gcig lag gnyis gri gug g.yas// b+han+d+ha g.yon khyair gcer bu'i gzugs// skra ni grol ba'i gzugs su bya// de nas thugs kyi sprul pa ste// gzas pa'i snying la gzung bar byed// de nas tshon rtsi bzang po yis// bong bu gwa la ma mo sngo// mtshan mo nag mo sngo bkrar bri// g.yog mo gnyis kyi rang bzhin ldan// thod pa'i mkhar gyi sgo dag ni// lho ru btod la ma mo gnyis// thod pa'i mkhar du gzhug par bya// lho ru kha bltas bdag kyang rung// lcags ri bdun la ma mo bdun// bya nag bdun gyi gzugs su bya// de ni gang gi dkyil 'khor ro// da ni gang gi dkyil 'khor ni// mi khom skya mo'i nang du yang// gong gi ma mo'i gzugs brnyan ni// shin tu gsang ste gzhug par bya// mi khog de yi mgo bo ni// byang shar rkang pa lho nub tu'o// yan lag lnga dang ling+ga dang// snying ga bdun po dag tu'o// bya nag bdun gyi gzugs kyang bzhag/ dkyil 'khor mdor bsdus bstan pa ste// 'di las lhag pa'i dkyil 'khor ni// sngar ma bshad cing da mi gzung// dpa' bo chen pos bka' stsal to// rdo rje nag mo dbang phyug ma'i rgyud las/ gsang ba'i dkyil 'khor gyi le'u ste dang po'o//// de nas dam rdzas bstan pa ni// phyi nang gsang ba gsum du bstan// phyi yi dkyil 'khor dam rdzas ni// dbus su seng ge dkar mo'i snying// 'bras bu sna tshogs gtor ma la// spyan gzigs dag gis brgyan pa gzhag/ lha mchog yab yum dag la mchod// sha dang khrag dang nal bu dang// shing lo thal chen snying chen dang// byang chub sems kyi dam rdzas ni// thod par bstsal la zla gam gzhag/ lha rdzas la sogs gzhung dag dang// mchin mkhris la sogs rnam pa kun// thod pa re rer bstsal la bzhag/ ma mo re la gtor ma re// rgyun du rgyu ba'i dus su btang// zhing chen gdung dang rgyu phreng dang// sha chen lang ling la sogs pa// phyi yi mchod pa'i rdzas su gzhag/ nang gi dam rdzas bstan pa ni// thod mkhar phyogs bzhir nal ro bzhi// rtsang la gdags te 'phyang du gzhug/ nal bu'i lus po mgo mjug tu// til mar dag gis byug par bya// spyi bor mi mgo re re gzhag/ dpral bar mthe bong re re gzhag/ snying gar rma bya'i mdongs re gzug/sked par dar gyi ske rags bcings// lag tu g.yab dar re re ste// de la ma mo 'bar bar nges// gtor ma sha dang khrag la bya// ma mo gnyis kyi mdun du drangs// sngags kyis btab la len du gzhug/su zhig dngos grub 'dod pa yis// nal ro bzhi la nan tan bskyed// bya nag bdun gyi mdun dag tu// sha khrag gtor ma b+han+d+ha re// sngags kyis btab la lan du gzhug/ mtshan mo nag mo'i gtor ma la// gzas pa'i ming rus bcug la byin// the tshom med par las byed do// gsang ba'i dam rdzas bstan pa ni// mi khog skya ma'i mdun dag du// skyes pa shin tu legs pa yi// ro ni rma med bcal byas la// gsal shing bzang por btsugs pa la// dar nag btags la 'phyang du gzhug/ de yi lus kyang mgo 'jug tu// til mar smug tsi byug par bya// mgo ni thor cog zur phud can// de la rgyan gyis mdzes par bya// rje ngar lte ba'i bar dag tu// dar gyi sham thabs legs par brgyan// rkang gcig brkyang ste yid bskul tshul// ma la ldem zhing bsgyings pa'i tshul du bzhag/ lag tu mdzes pa'i me long bskur// ma la stegs pa'i tshul du bsam// de lta bu yi dam rdzas de// ma mo bos la sbyin par bya// de nas the tshom med pa ru// rnal 'byor ma la gang 'dod ster// rdzas mchod dam pa yin par bshad// gzhan yang dmar gyi gtor ma dang// zhal zas sna tshogs mdun du drangs// rgyud phyi ma las rdzas kyi le'u ste gnyis pa'o//// de nas mchod tshul bshad bya ba/ dang po skye ba med pa dang// gnyis pa snying rje'i bdag nyid dang// gsum pa rang sems hUM du snang// 'byung ba rlung ste nam mkha'i steng// gru gsum e dang gzhu 'dra yaM/ chu ni baM las zlum por bskyed// su las gser gyi sa gzhir snang// keM las rus pa'i ri rab steng// b+h+rUM las gzhal yas khang du snang// gru bzhi sgo bzhi yang dag ldan// gru gsum zla gam gru chad dang// sna tshogs rgyan gyis brgyan par bsgom// dbus su gdan khri nyi zla dang// ma hI chen po gsal bar bya// zla gam gsum la ma mo re// de la cho ga'i yan lag gis// rang nyid sangs rgyas lus su snang// dbu gsum phyag drug zhabs bzhi'am// yang na mchog gi he ru ka/ dbu dgu phyag ni bco brgyad tshul// cho ga mkhas pas yab yum gsal// ro gsum steng du ma mo gsum// gar thabs byed cing gnas pa ste// nag mo chen mo bong zhon ma// ral gri 'debs shing mdung thung 'phen// rgyu ma'i dril bu 'gram par 'phyang// ko rlon stod la re lde smad// rma bya'i sgro chun spyi bor btsugs// lte ba'i phyogs nas nyi shar ma// dpral ba'i ngos nas zla ba 'char// rna ba g.yas pa'i khung bu na// seng ge mtshan ma thogs med mchongs// g.yas na sbrul nag lce gnyis 'dzin/ kha nas khrag gi zar bu 'dzag/ ro gcig steng na 'dug pa ni// phung bar byed pa'i ma mo ste// gcer bu gar thabs khrag 'thung ma// lag na rde'u nag g.yas g.yon 'grems// mtshan mo dag la rgyu bar byed// ro gcig steng na 'dug pa ni// gsod par byed pa'i ma mo ste// dur khrod ro ras hrul po las// dbul mo tshul gyis cha lugs 'dzin// mthing nag mig dmar mdung thung can// thod khrag kha ru 'thung bar byed// nyin mo rgyu shing mtshan mo nyal// mtshan mo nag mo bsgom pa ni// bong zhon ma yi mdun dag na// bka' nyan gsung sdod ma mo gcig/ lus ni rig cing thal ba'i mdog/mig gi gting nas khrag mig blta// lag na gri gug thod pa thogs// gang zhig gzas pa'i snying rtsa la// gri gug gcod cing thod par blugs/ thod khrag khengs pa kha la 'thung// nyin mo nyal nas mtshan mo rgyug/lus la gos med skra g.yeng ma// de lta bu gcig bdag nyid bsgom// thod pa'i mkhar gyi phyi rol na// lcags ri bdun la ma mo bdun// bya nag bdun du sprul nas ni// 'phur zhing lding zhing chags tshul ston// rnal 'byor chen mo de ltar bsam// de nas grub pa'i ma mo de// rang nyid hUM gi lcags kyu yis// drangs nas mchod pa'i tshogs 'bul te// ba liM sna la dbul bar bya// ma hA ba liM khA hi zhes pa sngags dang bcas la sbyin par bya/che ge mo zhig mA ra ya/ gsang sngags de yi sgra yang brjod// de nas khrag gi ar+g+haM dbul// ma hA rak+ta pU tsa ho// de nas dbang po'i me tog dbul// ma hA puSh+pe pU tsa ho// de nas tshil chen spos me 'bul// ma hA d+hU pe pU tsa ho// bdag nyid dri chen de la dbul// ma hA gan+d+he pU tsa ho// de nas tshil chen mar me dbul// ma hA dI pa pU tsa ho// de nas dri chu'i mchod pas mchod// ma hA gan+d+he pU tsa ho// de nas mthun pa'i rdzas chen bstab// de nas gtor ma gtong ba ni// nyi ma'i zer la mi mo rgyu// bco lnga zla ba'i zer dag la// mtshan mo nag mo rgyu bar byed// gsod par byed pa'i ma mo ni// nam gyi gung la rgyu bar byed// phung bar byed pa'i ma mo ni// nyi ma'i gung la rgyu bar byed// dus bzhi dag tu gtor ma sbyin/ rgyud phyi ma las las kyi khog dbub pa'i le'u ste gsum pa'o//// de nas sngags kyi tshul bshad pa// ma mo chen mo'i srog snying ni// thuM ling snying rtsa 'du 'du ba// mtshan mo'i srog snying ni// shin tu zab pas sngar ma bstan// bshad kyi gsang ba'i bdag po nyon// A+oM nr-i ka pa li hUM phaT/ gsang ba'i bdag pos gsang bar gyis// tsa pa li ni bco lnga pa// phung byed ma mo bod pa yin/ kha mun tra pa zhes pa ni// gsod pa'i ma mo'i snying po yin// dang po rnal 'byor de yis ni// dmod mo byed na bcu bdun te/ kham bu byed na nyi mtshan mdar// sgo nga byed na tsa pa la// phag thod byed na kha mun tra/ khrag sor byed na snying khrag sha/ mda' zor byed na sku gsung thugs// sngags sgrub tsa pa la yin te// thod pa dgu ni kha mun tra// de rnams las la sbyar ba shis// thun ling ka pA la gnyis te// shin tu gsang ste bzlas pa rgyun// thun ling nyin la ka ling mtshan// rtag tu bzla zhing gtor ma gtong// rgyud phyi ma las rgyun du drang ba'i snying po'i le'u ste bzhi pa'o//// de nas grub pa'i mtshan ma bsten// ma mo nag mo'i mtshan ma ni// thum thum skabs su bya nag mo// thod pa'i mkhar la 'bab pa mthong// mtshan mo nag mo grub pa ni// bsam gtan byed pa'i yid lam du// yi dwags 'dre gzugs mthong bar 'gyur// phung byed ma mo'i mtshan ma ni// tshul bu shug rgyangs ston par byed// gsod byed ma mo'i mtshan ma ni// ser ba khu 'phang chen por byed// rgyud phyi ma las mtshan ma'i le'u ste lnga pa'o//// thun rnams thams cad bsdu ba bstan// thun gyi phyi nang gsang ba gsum// phyi yi thun rnams sngar bstan pa// sgo nga kham bu la sogs yin// nang gi thun zhes bya ba ni// thod mkhar chen po'i mdun dag tu// mu su ri yi thod pa'i nang/ khrag gsum dag dang dug gis bkang// gru gsum brus la gting du gzhug/ g.yam pa sngo nag dag la ni// mtshan mo nag mo'i gzugs bris la// thod pa'i kha ni gcad par bya// de la rnal 'byor zhe sdang can// drod ma phebs kyi bar du bzlas// nag mo dgu bskor sngags kyis gdags// mtshan mo nag mo'i snying po dang// shin tu gsang ba'i dmod mo dang// sdebs nas nag mo dgu bskor te// 'gro ba rigs drug bdud du 'bab// 'dzam gling mi la gnyen du che// chu tshod brgyad cu rdzogs pa dang// thun ni kha gsum bgos byas la// gcig ni bzas pa'i gzugs la brdeg/ gcig ni thur gyi gta' ru gzhug/ de nas thun gcig yul phyogs 'phang// nag mo bdun bskor thun gyis ni// bdun gsum lon pa'i 'chi bar byed// gsang ba'i thun zhes bya ba ni// mi khom skya mo'i mdun dag tu// skyer ma mi ring lag pa ru// g.yas su me long g.yon du thun/ khar nag thun la btags nas ni// mtshan mo nag mo'i lag tu gtad// 'bur khung nag mo'i sngags kyis btab// 'bur khung nag po zhes bya ba/ kham bu dgu yi sngags dang ni// thang sngags dmod pa sbrags pa yin// bcu drug dag nas dbu btsugs pas// nyi shu dgu la mi ro yi// lag gi b+han+d+ha khol bar byed// 'bur khung nag mo drag tu 'phang// the tshom med par dpa' bos bshad// rgyud phyi ma las drag po'i thun thams cad kyi snying po zhes bya ba'i le'u ste drug pa'o//// de nas gsad pa'i las bshad pa// 'chi bar 'gyur ba'i sbyor ba ni// rnam pa gsum du bshad par bya// thun gyi las rnams rdzogs pa dang// bsam gtan dag gis gsad pa ni// mtshan mo nag mo'i ting 'dzin ni// rnal 'byor gyis sam zhe sdang bskyed// rdzu 'phrul stobs kyis 'phrul nas ni// gzas pa po yi drung phyin nas// gri gug dag gis khog pa breg/ srog rtsa bcad nas b+han+d+ha bkang// rang nyid kyis ni 'thungs pas gang// bkrag dang gzi mdangs ldan par bsam// ri bdun dag la gnas pa yi// bya nag bdun gyis sha rnams zos// snying rje med pa'i lha tshogs kyis// lhag ma med par zad par byas// lan grangs brgya ru de ltar bsgom// rgyun sngags gsad pa'i sngags dang bcas// gtor ma nar mar gtang bar bya// rgyud phyi ma las gsad pa'i man ngag bsdus pa'i le'u ste bdun pa'o//// 'chi ba'i mtshan ma bshad bya ba/rnal 'byor mthu chen 'phan pa'i tshe// thod pa sbub na 'chi ba yin// mchi ma byung na 'chi ba yin// srog chags gsad na 'chi ba yin/ khrag chen khol na 'chi ba yin// shing chen gcod na 'chi ba yin// rdo chen 'byin na 'chi ba yin// rgyud phyi ma las ltas kyi le'u ste brgyad pa'o//// de nas ming po'i sgrub pa thams cad ni// gshin rje nag po zhes bya ba// lam rgyud lnga la dbang yang byed// gi'u ti shan bya ba yin// gshin rje sngon po zhes bya ba// lcags mkhar bcu drug la dbang byed// chos kyi rgyal po bya ba yin// gshin rje 'jigs pa zhes bya ba// sha khrag dbugs la dbang byed pa// nar hi sad zhes bya ba yin// gshin rje chen po glang mgo can// byol song rgyal po zhes bya ba// gshin rje rgyal po zhes bya ba/ ma mo'i ming po yin pa ste// drag po'i dkyil 'khor bri bar bya// gru gsum gcig la gru chad bzhi// mthing nag tshon gyis dgang bar bya// tha mar me ri dmar po ste// de la 'chi bdag bzhi bkod pas// mi thod skyags tse bzhi dag la// 'chi bdag zhal bzhi tshon gyis bri// rang rang snying pos mtshan te dgod// bam chen dag gi sha khrag gis// gtor ma chen po dbul bya zhing// snying po 'di dag bzlas par bya// ya ma rA tsa 'ge'u te shan/ d+harma rA tsa ya ma na ra seng ta ya/ pre te mu kha'i ti ya sa ma ya dzaHdzaH de nas rtags chen 'byung 'gyur te// ma ring gcer bu rgyug par byed// mon pa bla rkun nag por ston// btsun pa rlung nag 'tshubs ma 'byung// rgyal po chen po'i tshul du ston// de nas gsod par byed 'dod na/ kham sa la ni gshin rje'i gzugs// gnag cing mtho ba'i mi gzugs bzhi// lag na dbyugs pa zhags pa dang// lcags kyu kha brag thogs par bya// de nas byin brlabs gshin rjer dmigs// gtor ma mnga' dbul bya// de nas 'khor lo bri ba ni// gru gsum gcig la gru gsum bzhi// dbus su gzas pa'i ming dang gzugs// gsum la sngags dgod dang po la// nyi ma bzhi ru lha bzhi bsgom// 'khor lo sgo zhing rkang pa'i 'og/gsang sngags 'di dag bzlas par bya// ya ma rA tsa 'ge'u te'u shan// che ge mo mA ra ya rbad// d+harma rA tsa ya ma rA tsa che ge mo ma ra ya rbad/ ma ra hing ha ya ma ra tsa che ge mo mA ra ya rbad/ pre te mu khi tri ya ma rA tsa che ge mo mA ra ya rbad/thal chen nyung dkar skye tshes brab// thon nas gzugs dang 'khor lo mnan// zla drug rdzogs nas 'chi bar 'gyur/ rgyud phyi ma las gshin rje ming po'i le'u ste dgu pa'o//// bdud chen po yi sgrub thabs ni// dkyil 'khor mda' tshad gru bzhi la// dbus su zlum po phyi rol du// gru gsum chen po bcu dag bya// rdo rje ra ba sgo bzhi yang// kun nas logs pad kri bar bya// dbus su bde gshegs chen po ste// gru gsum chen po bcu po la// bdud ni lcam dral bcu po dgod// ming po bdud chen bcu po ni// yang rje nag po zhes pa dang// 'bar ba yam chung zhes pa dang// nag po bdud rje zhes pa dang// srog bdud nag po zhes pa dang// bla bdud yor po zhes pa dang// srog bdud dmar gyi stag re dang// srin mo smin mo 'bar ba dang// ser po 'bar ma zhes pa dang// dkar mo 'bar ba zhes pa dang// dmar mo 'bar ba zhes pa dang// blon po sha 'dren skya bo gnyis/ khol po 'dzin po sngon po gnyis// sgo bzhi dag la dgod par bya// de nas mthun pa'i dam rdzas ni// ming po drug po dag la ni// mi snying rta snying spre'u snying dang/ khyi nag lug nag bya nag snying// gtor ma byas te dbul bar bya// de rnams snying rje byas nas ni// gser skyems bshos bu nag po'i gzugs// zla ba nya chen shar ba la// ming nas 'bod cing sbyin par bya// sring mo 'bar ma bzhi po la// spyan gzigs sna tshogs tshogs pa yis// gong ma bzhin du mchod par bya/ khol mo blon po bzhi po la// snyug ma dag la rten bcas la// gtor ma gser skyems dag gis mchod// de nas bzlas pa bya ba ni// a bdud pra ma ya kha ru hUM/ da ru hUM/ ru trag hUM/ hUM du ra na hUM/ shar ka hUM/ d+h+rig sho hUM/ de ni bzlas pa tsam gyis ni// glog dmar ral gri tsam ni 'ong// grub pa'i mtshon ma byung ba dang// dgra rnams gsod par 'dod pa na// gzas pa po yi ming bris la// sod cig chod cig sgra yis ni// drag tu brdung zhing phye mar gtad// gser skyems nang du phye ma blugs// zla ba nya chen shar ba la// ming sring bcu po mchod chas bod// gser skyems gtor zhing bstab par bya// thogs pa med par 'chi bar 'gyur/ rgyud phyi ma las bu bdud sgrub pa'i le'u ste bcu pa'o//// de nas gnod sbyin bsgrub bya ba// gnod sbyin lcags kyi mkhar ba can// bdud dang ma mo'i pha yin te// dur khrod ras la gnod sbyin gzugs// nag mo chen mo zhal gcig pa// skra ni gyen du 'bar ba la// lus la dre'u nag pags pa gsol// lag na lcags kyi 'khar ba thogs// de nas gnod sbyin bkugs nas ni// gnod sbyin rten la bstim par bya// lha chen tshal bu'i sha khrag gis// rtag tu gtor ma mdun du drang// bshos bu rtse nag gser skyems kyis// tshes brgyad nam phyed dag la mchod// de nas srog snying bzlas pa ni// oM badzra yak+sha pre te na b+ha ra du pa/ tiSh+Na hUM phaT dza/ bzlas pas khrag chen ral pa'i sgra// 'byung ste de nas gsad 'dod pas// gzas pa po yi gzugs bris la// ting nge 'dzin gyis 'od zer gyis// bkug ste rten la bstim par bya// gsang sngags rting la ta tha ya// btags pas thal ba bzhin du btags// gnod sbyin bos la gtor ma gtang// gser skyems gzugs bsres brgyad la gtor// 'o dod bos la sod cig brjod// zla ba phyed na 'chi bar 'gyur// rgyud phyi ma las gnod sbyin lcags kyi 'khar ba can gyi le'u ste bcu gcig pa'o//// byang chub sems dpa' phyag na rdo rje/ nga yis sems can kun gyi don gyi phyir/ 'di lta bu zhe sdang thams cad kyi gnyen por bshad pa ni/ kun la bshad par mi bya ste// khyod kyis sbos shig/ sangs rgyas kyi dam pa'i chos gzhung bzhin du byed pa rnams ni/ chos byed du mi ster zhing/ bstan pa 'jig na cha rkyen du bshad pa las ma rtogs par thams cad du byas na ljon shing rtsa ba bcad pa dang 'dra ste/byang chub kyi 'bras bu nam yang mi thob cing las kyang 'grub par mi 'gyur ro// de skad ces bka' stsal pa dang/ phyag na rdo rje dang bcas pa'i 'khor thams cad rjes su yi rangs nas mngon par bstod do/

CLOSE WINDOW