257b2 /// rgya gar skad du/ kI la ya d+ha sha dwa ya tan+t+ra ma hA yA na/ bod skad du/ phur bu bcu gnyis 'byung ba'i rgyud chen po bstan pa'o// bcom ldan 'das 'jigs byed
257b3 chen po la phyag 'tshal lo// 'di skad bdag gis thos pa'i dus gcig na// bcom ldan 'das khro bo 'jigs byed kyi rgyal po// badzra kI la ya drag po mthing nag 'bar ba'i gnas na bzhugs nas// gdug pa can thams
257b4 cad 'dul ba/dregs pa can thams cad tshar bcad pa'i phyir/ rab tu drag po mi g.yo ba'i ting nge 'dzin la snyoms par zhugs nas/ nyid kyis byin rlab las// karma he ru ka zhes brjod pas// khro bo karma
257b5 he ru ka/sku ljang nag shin tu mi bzad pa bton nas// bcom ldan 'das badzra kI ka la ya la 'di skad ces gsol to// kye kye bcom ldan 'das/ chos thams cad zhi ba'i ting nge 'dzin gyis mi 'dul na/ thugs rje
257b6 gang gis 'dul ba'i dus la bab par shes pa lags/gang gis 'dul ba'i dus la bab par gzigs pa lags// khro bo chen pos lung bstan du gsol// bde bar gshegs pa lung bstan du gsol// thabs
258a1 mkhas pa'i bdag nyid can/de'i dus la bab pa lags so// phrin las kyi mnga' bdag ces gsol pa dang/ dpal badzrakI la ya sa e h+ye ho sha hUM zhes brjod pas/ nam mkha'i gtos kyi phyogs ris
258a2 med pa// chos nyid bde ba'i ro bdal ba bskyed do// yaM karma rak+sha hUM zhes brjod pas/ rdo rje rlung nag 'tshubs mas dbang du bsdus shing byin gyis brlab nas rgyas btab pas/ phrin las thogs pa med pa'i don
258a3 mdzad/ma hA rak+ta dz+wa la maN+Da la zhes brjod pas/ khrag gi rgya mtsho gting dpag med pas/ sdug bsngal dbang du bsdus nas/ 'bras bu gcig gi rang bzhin du shar bar mdzad/ keng ni ri dz+wa la maN+Dal zhes brjod
258a4 pas 'khor ba gnas su dag pa dang/cho 'phrul mngon par 'du mdzad pa'i phyir/ keng rus gyi ri rab tu gyur/ b+han d+ha dz+nyA na tsakra dz+wa la maN+Dal zhes brjod pas/ b+han d+ha'i gzhal yas khang gru gsum mthing nag rab tu
258a5 'bar ba gcig tu gyur/de nas khro bo karma he ru kas/ bcom ldan 'das la 'di skad ces gsol to// e ma ho/ bcom ldan 'das thugs rje dpyang thag chad cing ngan song 'khor bar skyes nges pa la/ 'di ltar rdzu
258a6 'phrul bstan pa ngo mtshar che'o// 'di lta bu'i ngo mtshar bstan pa ngo mtshar che'o// 'di'i rjes su sgrub pa'i rnal 'byor pas// gnas ni gang dang gang du bstan/ dmigs pa ni gang dang gang la bgyi/ rnal 'byor rgyu dang
258b1 ldan par bya// phur pa'i rgyu ni gang dang gang lags/ phur pa bsgom pa ci ltar sgom/ byin gyis brlab pa ci ltar rlab/ brdeg pa'i dus tshod gang la bab pa lags/ dam tshig gang du bstan pa lags/ lta ba ci la
258b2 dmigs pa lags/yo byad dang rdzas gang 'tshal/ rtags du nas 'byung/ 'di brtsam pa'i dgos ched dang/ yon tan ci thob/ bcom ldan 'das kyis bshad cing lung bstan du gsol/ kI la ya yis bka' stsal
258b3 pa// nyon cig karma he ru ka/ phur pa bsgrub pa'i gnas rnams ni// yang dag don du bshad par bya// dang por gzhung dang ldan byas nas// dur khrod gnas dang shing gcig drung// rgya gram lam du bya ba dang// 'byung
258b4 po mang po gang yod sar// drag po'i las 'di bya bar gyis// las la phan 'dogs yod pa dang// grims 'byin shugs kyis ting 'dzin legs// de la thabs dang rtags med na// bdag gi gzugs phung rlag pa
258b5 dang// tshe dang srog gi bar chad 'ong// nags tshal chen po'i nang na ba// der ni legs bar dpyad pa yis// klu yi mig dang 'byung po'i srang// sa yi bgegs dang ma rungs pa// tsha sgo dmyal ba'i rgyu med par// las
258b6 kyi bya ba gzhung brtsams nas// bkra shis don gyi gnas yin pas// sgrub yun ring na bkra shis so// me tog gling dang rin chen ri// dpag bsam shing dang skad snyan bya// 'bru sna tshogs dang gnam sa
259a1 legs// dbyibs legs lung pa ran par ni// bkra shis gzhung bsrang yun ring bas// gnas kyi dam pa yin zhes bshad// drag po'i las su bya ba la// dang por phur pa sgrub pa'i gnas// nags ri
259a2 tsher ma can gyi shing// gcan gzan gdug pa sna tshogs yod// gnam ni gri 'dra ral gri'i shul// sa ni gru gsum me dpung 'bar// logs la dur khrod gling yod pa// mkhas pas brtags te btsal byas na// de ni
259a3 phur pa'i sgrub gnas yin// tsher ma can gyi shing dag dang// dug shing gdug pa yod pa dang// brag la ra rod mang ba dang// grog po mang po gting zabs dang// stag gi so 'dra sbrul gyi lce// sdig pa'i rA 'dra chu srin
259a4 kha// ban glang snang 'thab brag chu'i bar// rkang gcig shing dang ma rungs pa// sngon chad lha mi phung sa dag/ g.yul bkye ba dang mtshon 'thab dang// bsad bcad pa dang ma rungs dus// srin po bsgral ba'i bcas
259a5 gzhi dang// srog chags bsgral ba'i khrag rjes dang// g.yul ngo bgos pa'i sa mkhar rnying// mang por bsad cing phung ba'i sa/ brag ni srin mo ngus pa 'dra// ri ni thal phung bsnyil ba 'dra// lung pa me yis bsregs
259a6 'dra ba// shing rtsi rkang thang bros 'dra ba// sgang de'u mi ro sbas 'dra ba// 'di ni brdeg cing bsgral gnas yin// sems la chos nyid mi gsal zhing// nyams dang ting 'dzin g.yel bas ni// gnas 'di dag tu yongs
259b1 mi bya// nam phugs rnal 'byor dag la 'gyod// de bas gzhung dang mthun pa yi// bkra shis pa yi gnas dag tu// yun rings bsrings na gnas rtol med// dam tshig ma nyams nges thub dang// ting 'dzin brtan
259b2 pa'i blo chen gyis// gnas ni de dang de dag tu// cho ga'i las ni brtsams byas na// nges par grub na gdon rngol med// de ltar bu yi sa rnyed na// dang por byin brlabs mtshams bcad nas// ma rungs yod na gtor
259b3 ma sbyin// de bas zhag grangs 'di tsam mam// drag po'i las 'di ma 'grub par// gnas 'dir rnal 'byor bdag gnas pas// gtor ma byin pa 'di long ba// ma 'grub bar du gzhan du dengs// de skad byas la
259b4 gtor ma sbyin// bsgo ba'i tshig rnams bsgo bar bya// de nas dkyil 'khor gzhung bzhin brtsigs// dam rdzas chag chag gzhung bzhin gdab// kha dog tshon rnams dgye byas nas// dbus su drag po gru gsum
259b5 bri// mtha' ma mtshon gyi 'khor lo la// khro bo rnams kyang rim bzhin dgod// de bzhin brgyad dang brgyad du bstan// bzhi po dag tu gang bstan dang// nyi shu rtsa brgyad la sogs pa// mkhas pas gzhung bzhin dgod
259b6 par bya// gzhan yang phur pa'i rdzas dgod pa// 'og nas 'byung bas shes par bya// de phyi mtshan dang ldan pa dang// zhag grangs tshang ba'i sgrub rdzas bzhi// yo byad tshogs par mchog tu bya// gnas rnams 'di dag
260a1 yon tan ni// myur ba 'grub dang shugs 'byin dang/ ngan pa'i las kyis ngan pa 'grub// don la the tshom med par ni// ngan pa'i gnas su 'grub par bshad// bkra shis bzang po'i gnas su
260a2 ni// yun ring bsring na phung 'tshengs med// don la des kyang 'grub par bshad// bzang ngan gnas kyi cha dbye ba// bdag gi rtogs pa'i tshad dang sbyar// rtogs pa chung na bzang po bdam// ting 'dzin zab na ngan pa
260a3 bdam// myur bar thogs pa med par ni// gang la dmigs pa 'grub ces bshad// 'di ni phur pa gnas bstan pa'i le'u dang po'o//// bsgral ba'i dmigs rnams bstan pa ni// kun la bya ba gzhung la
260a4 med// nyams par gyur pa bdun yod de// srog las nyams dang dam las nyams// bka' las nyams dang don las nyams// las kyi nyams dang mtshan mas nyams// 'dod pa 'gyur bas nyams pa ni// 'di la
260a5 nyams pa zhes bya ste// de dag so so'i mtshan nyid ni// srog las nyams pa'i mtshan nyid ni// pha dang ma dang mkhan po gsod// slob ma gsod dang nang dme can// 'di ni nam yang lhung bas na// bsgral ba'i dmigs
260a6 ni 'di yin no// dam las nyams pa'i mtshan nyid ni// rdo rje slob dpon bka' bslu dang// ngan sems 'phya sems byed pa dang// sngags dang phyag rgya rgyun gcod dang// gsang ba'i man ngag gzhan la spel// 'di ni
260b1 nyams pa chen po ste// 'di ni bsgral ba'i dmigs gcig yin// bka' las nyams pa'i mtshan nyid ni// dam la btags na rku mtshang 'bru// sgrub la sbran na ya ga 'dogs// man ngag bstan na skur
260b2 pa 'debs// bden par bstan na log par khrid// don rtags bstan na gol bar 'dzin// 'di ni nyams pa'i dam pa ste// 'di la bsgral ba lhur yang brtsam// 'di dag bsgral ba'i phrin las ni// gzhung kun las
260b3 ni gsal bar 'byung// don las nyams pa'i mtshan nyid ni// bya ru mi rung sna tshogs byed// rdzas dang lag cha mngon du 'dzin// tan gan sbyor sgrol dngos por spyod// lta ba'i ting 'dzin rgyab tu bor// spyod pa dpa'
260b4 brlangs dang du len// khro gtum nga rgyal rang gar gtong// don gyi mnangag log par go/ pha rol log par 'dren pa'i chos// phyin ci log gi don la mkhas// bka' gzhung bor la rdzob pa che// log par spyod pa
260b5 mtha' dag yod// 'di ni rU tra dngos yin te// mngon spyod bsgral kyang mi skyon no// las kyis nyams pa'i mtshan nyid ni// bdag dang skye gnas mi gcig par// bsgral ba'i las kyi glor 'ongs nas// sngon chad
260b6 mkhan 'khon yongs med par// glags la bab par dran nas kyang// zhi ba drang pos mi nyan par// nyes med gzhan la 'dzugs pa dang// dpung pa snyogs la klan ka tshol// kha lce rgod cing bzhin mdog
261a1 bzlog/brgal sa med cing bdag la rgol// phrog mi dgos par dag la phrog/ bdag gis nyes par ma dran zhing// bdag gis brgal bar ma bsams kyang// las kyis bdag la gnad 'dzugs
261a2 shing// bdag la mthu dang rtsal 'ded pa// las kyis nyams pa 'di yin no// gzhan yang las kyis nyams pa ni// gal mi che bar klan ka tshol// phan rgyu med par bdag la 'tshe// 'ong rgyu med par bsgrubs sar
261a3 'ong// las kyi nyams pa'i rtags yin pas// 'di ni nam yang bsgral dgos pas// las kyi 'khor bas sdig med bshad// mtshan mas nyams pa'i mtshan nyid ni// chos la phyogs char bzung bas nyams// lta ba
261a4 sgos khur bcas pas nyams// dam can yongs la thugs dkrug cing// rang bzhin med pa'i chos bshad kyang// mtshan ma can gyi chos bzung nas// lha srin bran du ngas 'khol lo// mthu 'gran byed pa su zhig
261a5 yod// nga yi nyams su dpal chen byung// nga ni khro bo'i rgyal po yin// gzhan la khro zhing 'tshe la sogs// 'di ni mtshan mas nyams pa ste// bsgral ba byas kyang dam mi nyams// 'dod par gyur pas nyams pa ni// de
261a6 yi mtshan nyid bshad bya ba// nyan pa go rtogs gsal med par// la lar mthu chen btsan 'dod pas// las kyi don du mtshan ma spyod// sdig pa'i phyag rgyar mi mgo thogs// ral pa bsig cing so gtsigs
261b1 byed// dmar gyi gtor ma glo la thogs// zhing gi pags pa phrag la bkal// sgro ba nag po sha dang tshil// snod bkang khur zhing log chos spyod// spyod pa'i don kun gzhung bor nas// bya ba mi 'tsham sna tshogs
261b2 byed// ngo dang gdong pa khrag gis byugs// tshul 'gal dam 'dral sna tshogs byed// tho cor spyod cing dam mi bsrung// spyod pa brlang pos bka' gzhung smad// sangs rgyas kun gyi zhabs 'dren byas// rnal 'byor
261b3 sngags pa'i rkang nas drangs// dpal chen 'bar ba thugs khral bskyed// ma mo mkha' 'gro gzan tshogs bkram// rnal 'byor yongs la dme tshogs byas// gzhan yang mtshan nyid gang yin pa// 'dod pas nyams
261b4 pa'i mtshan nyid ni// 'dod chags nor gyis bslus pa dang// she bar shes kyang 'dod pas brgyal// phung bar shes kyang sngags 'chang 'joms// dug tu snang yang lto ru za// gnyan pa yin kyang thabs kyis
261b5 smod// btsun pa yin kyang ngams par shom// thob tu 'dod na gsang sngags rku// bza' ru yod na rnal 'byor za// zas su sgrub pa'i longs spyod rku// nor du gzhung spyod rnal 'byor 'joms// 'di dag 'dod pas
261b6 nyams pa ste// 'di dag bsgral na rnal 'byor btsun// btul zhing tshar bcad bstan pa gnyan// med cing stongs na bar chad nyung// 'di dag bsgral bar ma byas na// mtho ris 'gribs la dmyal khams
262a1 'phel// rnal 'byor dam can sgyid lugs nas// theg pa chen po'i chos sgo 'gag/ 'di dag bsgral bar byas na ni// rnal 'byor bsgrub la bar chad med// theg pa chen po'i mthu ngar bas// legs
262a2 pa'i yon tan brjod las 'das// thabs kyi tha ma'i tha ma ni// ting nge 'dzin gyi rtsal chung na// 'di dag bsgral bar byas na ni// dmyal ba'i gnas su yun thung 'gyur// 'di ni bsgral ba dmigs bstan le'u gnyis
262a3 pa'o//// rnal 'byor gang dag gis bya ba// 'di dag nyid du bshad pa ste// dang po shes rab rnam gsum gyis// gtan tshigs don la yid ches nas// de nas nges par dbang thob ste// snying rje'i sems dang
262a4 ldan pa yis// khams gsum 'khor ba gzung bar bya// don 'di dag dang mi ldan zhing// nges pa'i lung rnams ma thob dang// mkhas la sgro skur 'dogs pa dang// gsang sngags theg chen skur
262a5 'debs dang// rang shes spyad tshig tshul gnas dang// dam tshig nyams par gyur pa dang// don med phyal bar gtong ba rnams// 'di ni rnal 'byor ma yin te// log pa'i lam du shes par bya// de yis spyad kyang
262a6 yong mi grub// slar la rang sems rlag pa dang// 'bras bu mnar med dmyal bar skye// 'di dag rtsom pa'i rnal 'byor pas// rigs kyi rnal 'byor gral du smos// theg pa bsam yas sems la gsal// blta ba
262b1 phyogs med gdeng du 'jog/bsgom pa ma yengs gser phur 'debs// dam tshig nyan thos khrims bzhin bsrung// rgyu dang sgrub thabs mtha' dag 'chang// phyogs su 'jig rten mkhas pa brten// rdzas dang lag cha
262b2 rtags su 'chang// don dang man ngag gzhung du bsgrub// tshul ldan ngang tshul bzang la shis// sbyor sgrol mchod pa rgyun chad med// phung po lha dang gnyis med mchod// sems ni chos nyid ngang la gnas// rnal 'byor
262b3 rtags ldan dam pa des// las su bya ba kun rdzogs nas// 'dzab bzlas grangs med rgyun 'don pas// sngags dang phyag rgya mthu phyin che// las dang bya ba gdon mi za// nges par brtsams pas dgos pa
262b4 'grub// dmar gyi gtor ma gzhung bsrang zhing// cib gyi bka' nyan 'khol mkhas pas// dgar zhing dgug pa bya bar shis// drag shul thabs kyi pho nya ni// rdzu 'phrul shugs las thabs kyis 'gyed// rnam rtog
262b5 mtshan ma las kyis 'grub// de dag byas na chud mi za// shes pa'i nang na dam pa ni// rgyud la blo zhen sgrub la zhugs// yi dam lha la rtags gnas na// de la bar chad yongs mi 'byung// gal te 'byung bar gyur na
262b6 yang// de la reg pa tsam gyis 'grub// gzhan gyi las 'di brtsam pa yi// rnal 'byor pa ni gang yin na// phrin las bye brag phyed pa dang// rnam rtog mtshan ma spangs pa dang// gtsang sme med par spyod pa dang// blang
263a1 dor med par sgrub pa yis// gang la dmigs pa 'grub par byed// phun sum tshogs pa gsum ldan zhing// dus tshod grangs su bstan pa shes// nya dang shi ka tshes brgyad la// drag po'i las la rab
263a2 brtson pas// las su bya ba de byas te// ma mo mkha' 'gro bka' nyan tshogs// de yis bkol na bran bzhin nyan// de yis bkol na bu bzhin sgrub// de yis bya ba chud ma zos// tshe dang longs spyod 'byor pa
263a3 dang// legs pa kun rdzogs dngos grub ster// de yis yid la bsams pa bzhin// ci 'dod rang la 'byung bar 'gyur// gzhan yang 'jig rten bsam pa dag/ phan pa dang ni gnod pa gnyis// gzhan la phan cing
263a4 sgrub 'dod na// sad dang ser ba bcad pa dang// char chu dus su phebs pa dang// mi nad phyugs nad chad la sogs// de yi gtan tshigs 'di la gnas// gzhan la gnod pa'i rgyu btsal na// dbyar ston gnyis la
263a5 gnod bya ba// sad dang ser gtong gtan tshigs dang// shwa dang chu dang thog bting ba// dbyar dgun mi nad rims gtong ba// bu tsha rabs chad tshe thung ba// de yi gtan tshig 'di na yod// de ltar gtan tshigs sus
263a6 shes pa// rnal 'byor don dang ldan pa ste// 'di ni brtsam par bya bar gsungs// rnal 'byor ci ldan brtsam pa'i le'u gsum pa'o//// kI la ya yi rgyud rnams ni// gang dang gang la bya ba dang// don dang
263b1 gtan tshigs 'dir zhib ste// mchog tu bsngags pa 'di las 'byung// lcags sam zangs sam gang rnyed pa// drag po'i lcags kyi phur pa la// gri lcags mde'u rnying rtags phyin dang// gnam lcags thog gi lcags
263b2 dag dang// gcod dang rno dang sra la sogs// lcags sna lnga po dag las ni// khro rgyal gnas pa'i rgya mdud dang// gzhal yas khang gi rtags su bya// logs brgyad khro mo brgyad po la// bar gyi rgya mdud brtseg pa
263b3 la// thabs dang shes rab dbyer med do// gzhal yas khang rang brtseg mar gnas// rtse mo zur gsum 'joms pa'i tshul// drag po rkyen gyis yang dag bshad// dbang la zangs kyi phur pa dang// rgyas pa gser
263b4 la sogs pa dang// zhi ba tsan+dan dkar po dag/ rtse mo dbyibs ni so sor 'bar// bya ba'i tshad rnams mthun par bshad// gzhan yang tsher ma can gyi shing// rab tu mi srun gnas dag nas// gang dag skyed pa
263b5 gang yin dang// dug dang gcan gzan gdug pa dang// rab tu gtum pa'i gnas dag nas// skyes pa'i shing mchog tsher ma can// skyer pa dang ni sing lding dang// gang dag skyer lding mdzo mo shing// rtsa ba'i
263b6 logs su rgya mdud bya// rtse mo'i logs su zur gsum bya// dbyibs dang kha dog gong dang mthun// gzhan yang gdug pa'i tsher ma can// gong ma de dag ma 'byor na// gang rnyed pa la bya bar bshad// gzhung dang
264a1 mthun pa rnyed na legs// de dag gang yang ma rnyed na// ting nge 'dzin gyis dkyil 'khor lha// yid la dran zhing gsal bsgom nas// sngags dang bya ba ma nor na// des kyang bya bar gzhung las
264a2 bshad// de dag ring thung tshad bstan pa// sor bzhi pa dang sor brgyad pa// bcu gnyis dag tu bshad pa ste// de las thung bar ma gsungs shing// de las ring bar yang ma bstan// sor bzhi 'byung ba bzhi yi
264a3 tshad// sor brgyad rnam shes brgyad kyi tshad// bcu gnyis skye mched bcu gnyis te// rtags dang sbyar te de rnams bstan// rtags phyin pa yi lcags rnams kyis// de yi yon tan bshad pa ni// dper na nags kyi
264a4 sdong po la// sngon chad bcad pa'i s+t+wa re dag/ de dag yod par gyur na ni// chod mi chod kyi the tshom med// de dag sngon chad ma bcad pas// chod dam mi chod yongs ma nges// de bzhin rgyu yang de dang 'dra// mdor
264a5 na rnal 'byor rtsal mchog gces// re zhig de yang skyon med de// yon tan yod par 'di las bstan// nag po'i shing gi dug can las// phur pa byas pa'i phan yon ni// nag po gzhan gyis mi tshugs la// dug
264a6 gis pha rol gsod par byed// tsher ma can gyi shing rnams ni// skyer pas tshe dang longs spyod 'phel// mdzo mos dbang du bya ba 'grub// gzhan yang kha dog rigs su sbyar// mdor na bde gshegs sa bon
264b1 gyis// byin gyis brlab pa gces bar bshad// de bas kyang ni dam tshig gtso// rnal byor rnams la dam par bsngags// dang por gzhung las bstan pa bzhin// de dag ma nor bsham par bya// tshogs pas the
264b2 tshom med ces bya// bshams pas bya ba chud mi zos// kun gyi rgyu ni byang chub sems// byang chub sems ni bsngags pa ste// rgyu ni rgyal por rang shar ba'o// gzhan yang phur pa'i rgyu bstan pa// zangs lcags
264b3 'khar ba gang yod par// de yang dod cing legs par bya// ma dod pa yi skyon rnams ni// gang dgar byas na tshul las nyams// stam col byas na bka' las 'gal// rnyed btsan byas na byin rlab chung// yod
264b4 btsan byas na sgom mi bde// ngan dgur bshams na rtog par 'gyur// legs par byas na yi rang zhing// tshogs par bsags na gzhung dang mthun// dad par byas na dang ba skye// bka' bzhin byas na byin
264b5 rlabs yod// mdor na rtogs pa gtso bo yin// rtogs pa'i don la mthar phyin na// rnam rtog las 'di yongs mi dgos// ma rtogs pa la 'di dgos pas// log pa'i phyogs rnams 'dul slad du// 'di la rgyu
264b6 bsham 'byung ba yin// mi rtog pa la rtog mi dgos// rnam par rtog la khro 'dul bzang// nyon mongs pa la gnyen po 'jebs// rtog pa bsal bar bsham pa gces// gzhan la tshugs na grangs mang
265a1 zlos// rtags phyin 'dod na yun du bsring// don la rub na ma yengs kyis// rings par 'dod na brtson 'grus skyed// don 'di yid la bzhag nas kyang// sngags pas de la nan tan skyed// 'di
265a2 ni phur pa'i rgyu bstan pa'i le'u ste bzhi pa'o//// phur pa ji ltar bsgom pa yi// don 'di yang dag bstan pa ni// nges pa nyid du bshad bya ste// byin gyis brlab pas thabs la ni// nges par rnam pa lnga
265a3 yod de// gnyis su med par byin brlab dang// khro bo chen por byin brlab dang// shin tu brjid che byin brlab dang// phur pa rdzas su byin brlab dang// mthu dpung che bar byin brlab pa'o// oM badzra kI li kI la
265a4 ya kI la ya/hUM hUM ha he phaT/ dzaHb+h+yo ru lu mA ra ya phaT/ de la lag pa gting sbyar nas// sor bcu'i bar du phur pa bcug/ bcu yis byin brlab tshul bzhin bya// hUM hUM kI la ya sarba bi nA ya ka sarba ta thA ga ta ha hi
265a5 khA hi hUM phaT// de nas byin gyis brlab par bya// lcags sam shing ngam gang yin pa// khyi khrag ra khrag gis byugs la// dug dang ma rungs pas kyang byug/ hUM dang dzaH dang phaT la sogs// spro bsdu tshul bzhin byas
265a6 nas kyang// byin brlab bsam rgyud nges pa bzhag/ yang na byin brlab nges pa ni// dbu yi rgya mdud chos kyi sku// bar gyi rgya mdud longs spyod rdzogs// rtse mo sprul pa'i sku yin te// khro rgyal dpal chen yab yum
265b1 dang// 'khor gyi dkyil 'khor gsal bkod dang// pho nya yang sprul la sogs pa// ci bgyi la sogs rim bzhin spro// 'bar 'thung sngags kyi rgyal po yis// nges par legs pa'i phur pa la// yang dag brtan
265b2 pas byin gyis brlabs// rnal 'byor sngags kyi blo ldan pas// dam pa'i don du gzhung bsrang nas// drag pos bzlas la yid rtsom bya// nges par snying po 'bru bkod de// cho ga gsum gyi sbyor ba yis// tsa na ka
265b3 tsam dgod par bya// rim pas 'phro ba mang po yis// stong gsum 'jig rten phur pas brlab// mtha' yas sems can la sogs pa// bsgral ba'i dngos po gang yin pa// raM yaM khaM gis bsregs sbyangs
265b4 nas// rnam shes snying gi dkyil 'khor du// byang chub sems kyi rtse gtad de// dkar nag mtshams su brgyab nas kyang// dge sdig las kyi gshag phye ste// rnam par rtog pa'i sdig sbyangs nas// maN+Dal 'od kyi
265b5 'dul sbyong gis// dug gsum rim par bcom nas kyang// ha ta kha yis brngam pa byas// gser zhun bzhin du sems gnas pa// 'phro ba'i dgongs pas btegs nus kyang// gnyis med yum gyi mkha' la
265b6 bstim// nges par rim gyis sras byas la// oM AHhUM gis byin brlabs te// sku gsung thugs su gsal byas nas// phyir yang ngan song sgo gsum bcad// rnam rtog bsgral ba'i zhing bcur brlags// bsgral ba
266a1 dbyings dang ye shes te// don du thabs dang shes rab la// chos kyi sku yi byin rlabs kyis// rnam par dag pa'i ngang du bsgom// 'di niphur pa bsgom pa'i le'u lnga pa'o//// byin gyis
266a2 brlab pa bstan pa ni// rgya mdud rtsa ba'i logs su ni// chos kyi sku yi khro bor brlab// logs brgyad khro mo brgyad yin te// bar kyi rgya mdud longs spyod rdzogs// rtse mo sprul pa'i skur brlab ste// don du mnga'
266a3 gsol 'di skad do// hUM bzhi gsal 'phro hUM las bzhi tshogs brgyad// dbu la rgya mdud bstan pas khro rgyal bcu// rtsibs la logs brgyad pa bstan pas khro mo brgyad// rtse mo zur gsum bstan pas sku
266a4 gsung thugs// khong stong byang chub sems kyi thig le las// khro rgyal 'das pa'i sras mchog kI la ya// yon tan rdzogs pa'i sku la phyag 'tshal lo// ma g.yos chos mchog sku gsung thugs kyi bdag/ sdug bsngal
266a5 log par 'khyams pa'i sems can rnams/thugs rjes bye brag dbyings su sgrol mdzad pa// thabs kyis bsgral ba'i skal dang mi ldan yang/ shugs kyi bsgral ba'i phrin las mdzad du gsol// oM badzra g+ha g+ha g+hA ta
266a6 ya// sarba pA paM kI la ya d+ha ro/ A dz+nyA pA ya ti// kA ya wAka tsit+ta hUM hUM phaT phaT// byin rlabs mtshams bcad drag po yis// dbang bsdus yongs su spang bar bya// thabs la mkhas pa'i byin rlabs kyis// yongs
266b1 kyis bsdu zhing gzir ba dang// thabs kyi dbang du bya ba'i phyir// 'bar ba'i thugs rjes mtshams bcad do// 'di ni phur bu byin rlabs le'u drug pa'o//// brdeg pa'i dus tshod bstan pa ni// gnam
266b2 stong dang ni tshes brgyad la// bco lnga nyi shu gnyis la bya// mig dmar phur bu gza' rnams kun// brdeg pa'i dus la 'bab par shes// dang po dkyil 'khor gzhung btsugs te// bsnyen bsgrub cho ga tshang byas
266b3 nas// 'dzab grang bsnyen pa 'bum du gdon// bzlas brjod nyin mtshan bar mi gcad// rtags dang mtshan ma phyin pa dang// brdeg pa'i dus la bab par shes// nam gyi gung dang nyi ma dros// de la brdeg pa'i
266b4 rab tu shis// dur khrod chen po gang na bar// bsgral ba la sogs tshul bzhin bya// rgya gram lam gyi gang na bar// brdeg pa la sogs tshul bzhin bya// 'di dag brdeg pa'i dus tshod kyang// srod la zhugs
266b5 pas tho rangs kha// 'di dag brdeg par yong mi bya// 'di dag brdeg par bya ba ni// yun ni lo dang zla tsam ni// grangs ni bye ba 'bum du bzlas// mchod pa dus drug rgyun mi gcod// cho ga bzlas brjod tshang
266b6 byas nas// dbang po mngon par khug na rab// tha na mig rnon la sogs pas// der ni nges par 'ong ba yin// bya ba la sogs mtshan ma la// brdeg pa'i dus tshod yin par ni// rnal 'byor pas ni shes par
267a1 bya// gzhan yang brdeg pa'i dus tshod ni// dang por bsgrub pa khas blangs pa// ma thon bar du dus tshod min// tshang nas brdeg pa'i dus tshod ni// bla dgug pa yi pho nya la// 'di dag btang nas
267a2 brdeg bya ste// hUM// dpal gyi pho nya las mkhan mo// dmar dkar yangamo dung gi mche ba can// mkha' la 'byung ba'i mdzod bskyil ma// lag na sems can srog gcod ma// zhal ni sems can yongs su
267a3 gsol// bskal pa'i thog thog char bar 'bebs// bskal pa brgyad kyi pha rol na// dam nyams dgra bo'i bla 'dren ma// dgra bo'i bla la nan ma chung// nag mo lcags kyi lan tshar can// khyung gi kha thogs
267a4 g.yas pa na// b+han+d+ha gri thogs gsod la rngams// tshangs pa bskyil ba'i cha lugs can// mi sdug mgo la gcer bu'i lus// bskal pa brgyad nas bla tshol tshol// dpag tshad brgyad nas srog 'gugs
267a5 'gugs// dgra bo'i bla dang srog la ya// dmar mo chen mo me 'gro ma// gdug pa 'dul ba gang ba las// gsod la rngams pa las la btson// mche gtsigs g.yang gzhi gos su gyon// rab tu mi srun bla
267a6 'gugs pa// dam nyams dgra la sa ma ya// ljang nag bsgyings pa'i thod gdengs can// ser mo ral can 'bum gyis bskor// sngon nas dgra bo'i bla 'gugs ma// gang la bya ba grub par byos// nam mkha'i lha
267b1 mo phur pa'i lha// lag brgya gzugs kyi phur pa 'dril// spyan brgya khrag gis mchi ma 'dzag/ zhal brgya gdug pa'i sngags zor zlo// tshems kyis skye shi rtsad kyang chod// phur pa'i las mkhan chen mo la// rab tu mi
267b2 srun las la brtson// gang la bya ba grub par byos// gzhan yang pho nya grangs med kun// de dag las la gtang bar bya// de dag mngon par khugs pa dang// ting 'dzin rab 'bring gsum du bya/ rab kyis mngon
267b3 du khug par bya// 'bring gis lang+gi 'gul bar byas// tha mas nyams dang rtags tsam 'ong// gzod cig brdeg pa'i dus tshod yin// de rnams med par dus tshod min// cho ga tshang bar gyur na ni// brdeg pa'i
267b4 dus tshod yin par ni// dus la bab par shes par bya/ 'di ni brdeg pa'i dus tshod le'u bdun pa'o//// dam tshig gang yin bstan pa ni// gzhi ni dam tshig gtso bo ste// dam tshig ma nyams gzhung tshugs
267b5 na// 'di dag 'grub par 'gyur bar bshad// nyams pa 'gyur pas mi 'grub ste// slar la rang nyid rlag par 'gyur// sku yi dam tshig 'da' dka' ba'i/ gsung gi dam tshig bar mi gcad// thugs kyi dam tshig
267b6 gsang thub pas// las ni brtsams nas 'grub ces ni// dpa' bo khro bos yang dag bshad// dam tshig dag pa 'di yis ni// rgyal ba mnyes te dngos grub thob// bka' bzhin spyod la gzhung bzhin
268a1 bsgrub// nges pa'i dam tshig dam pa yin// nges pa'i dam tshig bstan par ni// yang dag rgyal pos yang dag gsungs// 'di ni dam tshig bstan pa'i le'u brgyad pa'o//// lta ba ci la
268a2 dmigs pa ni// yang dag nyid du bstan bya ste// lta ba'i rgyal po nges pa'i dbyings/ gzod nas ma skyes sems kyi dbyings// rnam par dag pa yum gyi tshul// ma skyes mi 'gag thabs kyi sku// rigs pa'i rgyal po
268a3 rang byung bas// thams cad ma lus dbang du sdud// thabs kyi rgyal por bdag gnas pas// 'gro kun bla na med par sgrol// chos kyi rtsa ba sems yin pas// brtag pa'i don du rang sems bzang// rang gi
268a4 sems kyi don rtogs shing// mnyam pa'i rgyal po klong gyur na// zhal nas gsungs pa thams cad dang// tshig tu brjod pa bsnyen pa la// thugs la dgongs pa ting 'dzin te// phyag gis bsgyur ba phyag rgya
268a5 ste// phur pa'i phyag rgya lnga ru bshad// phur pa dam tshig phyag rgya ni// lag pa gnyis kyi rting sbyar nas// gung mo rtse sprad drag tu gzir// de ni phur bu'i dam tshig rgya// chang bas sor brgyad rim pas bzung// gung
268a6 mo rtse mo man chad la// phug pa brdeg pa'i phyag rgya yin// lag pa gnyis ni thal sbyar nas// gung mo rtse sprad mthe'u chung brgyad// srin lag 'dzub mo rgyab bsnol te// mthe bong gshibs te rab tu dril// 'di ni
268b1 phur pa dril ba'i rgya// lag pa gnyis kyi rting sprad nas// sor bcu khro bcur byin rlabs te// sras mchog dkyil du gzhag nas ni// byin gyis brlab pa byas na ni// phur pa byin gyis brlabs pa'i rgya// mtheb
268b2 mdzub gnyis kyi bar du ni// phur pa bcug la yar 'phangs pas// babs pas brdeg pa'i gzugs la bskul// 'di ni phur pa bskul ba'i rgya'o// don du phyag rgya la sogs pa// yang dag rtogs na kun yang
268b3 rgya// ma rtogs mtshan mas rtog pa'i zhing/ rtog pa'i rgyu nyid chos nyid la/ 'khor ba'i rgyu nyid byang chub ste// bsad pa 'ba' zhig las su rung// rnam rtog sems can kun bsad na// dam pa'i bde gshegs kun
268b4 mnyes te// nges par legs pa'i dgongs pa 'phel// sangs rgyas bka' las de ltar 'byung// dam pa sems kyi rang bzhin pa'o// lta ba 'di la dmigs pas bya/ 'di ni lta ba dmigs pa'i le'u dgu
268b5 pa'o//// yo byad rdzas rnams bstan pa ni// sbyang dug la sogs dug rnams kyi// drag pos bsgral phyir bsad par 'byung// khyad par la sogs gtor ma ni// mkha' 'gro skul phyir dgod par
268b6 'byung// zangs lcags mchog tu tsher ma can/ drag pos gdul phyir gong bzhin bsham// rkang rjes sa dang dri ma rnams// nges par yod na bzang bar bstan// gzhan yang phur pa'i rdzas rnams kun// gong nas
269a1 'byung ba de shes bya// 'di ni yo byad rdzas kyi le'u bcu pa'o//// rtags kyi zhags grangs bstan pa ni// khyad par bsnyen pa gzhung btsugs te/ bka' yi sgrub pa tshul bzhin du// gzhung las
269a2 'byung ba de byas na// rab kyis zla ba gcig gis 'grub// rtags ni zhag bdun nyid kyis 'grub// 'bring pos lo gcig byas na 'grub// rtags ni zla ba phyed na phyin// tha mas lo gsum tshun chad kyis// 'grub
269a3 par 'gyur te gdon mi za// rtags ni lo dus dag na 'gyur// yan lag bskums pa'i nad la sogs// rtags rnams kun ni tshul bzhin 'byung// 'di ni phur pa rtags bstan pa'i le'u bcu gcig
269a4 pa'o//// 'di brtsams dgos ched yon tan ni// sems can gang zag phal pa dag/ ras chod byed pa'i tshul las nyams// bka' 'gal byed cing dkyil 'khor 'dral// ma nyes 'joms shing skur pa
269a5 'debs// de la 'di brtsams dgos ched yod// don 'di ma nor gang spyod pa// kI la ya yi yon tan ni// tshe ring nad kyang med pa dang// dpal dang 'byor pa 'phel ba dang// gdon dang 'byung po thul ba
269a6 dang// lha srin mthu chen kun 'khol dang// dregs pa dbang phyug bka' nyan dang/ ci bgyi la sogs bran bzhin 'khor// 'jig rten 'dir yang kun bsam 'grub// gzhan yang yon tan brjod mi
269b1 lang// 'jig rten pha rol dag tu yang// bsgral ba dag kyang mtho ris thob// bdag kyang byang chub gnyis su med// bsam pa 'byor pa'i shes rab lags// chos kyi sku dang dbyer med na// ngan song gsum po
269b2 sgo bkag nas// thar pa bde ba'i gnas kyang 'dren// sdig can bsad na las ngan bcad// dam nyams bsgral na bka' gzhung brtan// phyogs spyod yin nam log bsgral na dkyil 'khor brtan// sku dgra
269b3 bsgral na bar chad chung// de nas yon tan thob pa yin// des na legs pa kun 'phel te// 'bras bu nges par chud mi za// bla med go 'phang thabs kyang che// khro bo'i rgyal po thabs mkhas pas// bsgral bas
269b4 las rnams byang bar 'gyur// dpa' bo chen pos yang dag bshad// 'di dag yon tan bstan pa ni// rig 'dzin rnam gsum 'di las 'grub// dpal ldan dad pa'i 'byor pas 'grub// legs pa'i las rnams
269b5 kun rdzogs te// gzhan yang 'dod pa'i yon tan rnams// yid la dmigs pa bzhin du 'grub// 'di ni brtsams pa'i dgos ched dang/ yon tan ci 'thob bstan pa'i le'u bcu gnyis pa'o//// de skad
269b6 ces bcom ldan 'das dpal ki la yas bka' bstsal nas/de nas karma he ru kas// phyi nang gsang ba'i mchod pas mchod nas/ nyid kyi sku la mi snang ba'i tshul gyis thim par gyur to/ phur pa bcu gnyis 'byung
ba'i rgyud chen po gsum tsam 'gyur ba rdzogs so/

CLOSE WINDOW