CLOSE WINDOW

Gpb027.018
བོད་ཡིག

rgya gar skad du/ gup+ta gam+b+hi ra kun+tA gra tan+t+ra/ bod skad du/ sbad pa gsang ba zab mo bdud rtsi'i rgyud/ bcom ldan 'das dpal kI la ya'i rgyal po la phyag 'tshal lo// 'di skad bdag gis thos pa'i dus gcig na/bcom ldan 'das dpal kI la ya'i rgyal po de/ karma he ru ka la sogs pa'i he ru ka rnams dang/ rdo rje snyems ma la sogs pa'i yum rnams dang/ de bzhin du khro bo dang khro mo dang thabs cig tu/ bsam gyis mi khyab pa'i khro bos bskor ba'i gnas/ phyi ltar du dur khrod 'jigs su rung ba dang/ nang ltar na rang bzhin gyi dur khrod dang/ gsang ba ltar na b+ha ga'i dbyings dang/ de na phra men pho mo dang/ sgo ma rnams dang/srung ma bcu gnyis dang/ 'khor thams cad kyi phyi'i dur khrod chen por nyid kyi thugs las sprul nas/ gdug pa can tshar gcod pa zhes bya ba'i ting nge 'dzin la snyoms par zhugs te thugs yang dag pa'i ye shes las dbu dang phyag bsam gyis mi khyab par gyur to// de nas rU tra nag po bsgral ba'i phrin las/ karma he ru ka la sogs pa bos te/ drag po ha ha dang ni hi hi'i sgra sgrogs pa/ gom pa'i stabs kyis sa gzhi gnon pa/de lta bu gcig tu gyur nas/ de'i tshe rU tra nag po rab tu 'dar/ sa gzhi ni rab tu g.yos/ he ru ka thams cad ni mdangs dang ldan/ de nas rigs kyi he ru ka rnams la bka' stsal pa/ rU tra zhes bya lta ba log/las kyis 'jig rten khams 'dir skyes// bdud rnams btul na bar chad nyung// med par byas na bstan pa gnyan// mtho ris 'phel dang dmyal khams stong// bsgral ba'i gnas ni dam pa bdun// srog don dka' dam las kyis nyams// 'dod pas nyams dang mtshan mas nyams// srog las nyams pa'i mtshan nyid ni// pha ma dang ni slob dpon gsod// 'di dag bsgral ba dam par bshad// don la nyams pa'i mtshan nyid ni// yang dag ma yin spyod pa mtho// 'di yang bsgral ba'i dmigs dam pa// bka' las nyams pa 'di lta bu// dam pa'i gsang ba 'chol bar spyod// dam tshig nges don ming gis kyang// sku gsung thugs kyi dam las 'das// de yang bsgral ba'i dmigs yin no// las kyi nyams pa'i mtshan nyid ni// 'chi bar shes kyang rnal 'byor 'tshe// dug tu shes kyang lto ru bza'// las kyis nyams te myur bar bsgral// 'dod pas nyams pa rku 'phrog sogs// mtshan mas nyams pa mtshan med spong// 'di bdun shin tu brtson byas la// drag po'i las 'di brtsam par bya// de bzhin gshegs pa thams cad kyi rang bzhin/sbas pa zab mo las/ gleng gzhi'i le'u ste dang po'o//// de nas dpal kI la ya'i bdag po de/ dbang bsgyur dam pa zhes bya ba'i ting nge 'dzin la snyoms par zhugs te/ karma he ru ka la sogs pa rnams la bka' stsal pa/phur pa bsgrub pa'i gnas de ni// ma mo'i gnas sam shing gcig drung// 'byung po mang po gang yod par// byas na las la phan 'dogs yod// bkra mi shis par byas gyur na// grib 'byin shugs kyis gting 'dzin 'grib// sa la g.yul ni bkye bar ni// bya bar shin tu bzang ba'o// zla ba mar gyi ngo dag la// mig dmar rgyu ba'i dus dag tu// sa la stegs bu che'am chung// brtsams te phrin las bzhi'i bro brdung// sta gon nyid kyang bya bar shis// de nas rdzas gsum tshogs par bya// 'tsho ba zas dang dug 'joms sman// nag po'i rigs kyi phur pa dag/ tshogs pa rdzas kyi rim pa'o// ma nyams gsar pa'i thig bkye la// rgya mdud dang po'i gzhal yas la// rigs lnga'i rgyal ba 'khor dang bcas// spyi dang rtse la yab yum gnyis// rgya mdud 'og ma'i gzhal yas la// steng 'og khro bo 'khor dang bcas// zur brgyad khro mo phra men ma// bcu gnyis srung ma zur gsum logs// sgo ma bzhi ni rtsibs mchan la// de ltar gru gsum yum nyid la// phur pa'i rdzas rnams dgod par bya// de yang 'khor lo rtsibs bcu la// stobs po che dang hUM kA ra// shar stod nub smad gnyis su dgod// gzhan rnams rim pa dgod par bya// byang chub sems kyi phur pa ni// phur pa kun gyi rgyu ru grags// phur pa phur pa zhes bya ba// phur pa thugs kyi phur pa mchog/ de bzhin gshegs pa thams cad kyi rang bzhin sbas pa zab mo las/ rdzas kyi rim pa bstan pa'i le'u stai gnyis pa'o//// de nas karma he ru ka la sogs pas kI la ya'i bdag po la gsol pa// dbang sdud phur pa ji ltar lags// mnan pa'i phur pa ji ltar lags// 'gugs pa'i phur pa ji ltar lags// gdab pa'i phur pa ji ltar lags// dpung dbral phur pa ji ltar lags// kI la ya yis bka' stsal pa// dgra bgegs dbang du sdud pa'i phyir// nag po'i rigs kyis bya bar shis// mnan pa'i phur pa skyer par bsngags// 'dren cing 'gugs par mchog phur bsngags// gdab pa'i phur par lcags phur te// dpung dang dbral bar bya phur bsngags// nag po'i rigs kyi shing dag la// sor bzhi pa'am sor brgyad la// mkhas pas legs par tshad dang ldan// skyer pa lo ma sa 'og gi/sor bzhi brkos pas bkra shis rdzas// mchog phur rje ngar gnyis la'o// gnam lcags sa lcags khro chu dang// mi rta mang po bsad pa dang// rang dang phal pa'i lcags sna lnga// bya rgod gshog pa'i dang ru'o// de ltar byas te yul la dgod// de bzhin gshegs pa thams cad kyi rang bzhin sbas pa zab mo las/ phur pa rdzas kyi rim pa bstan pa'i le'u ste gsum pa'o//// de nas kI la ya'i bdag po de/chos nyid rnam par dag pa'i ting nge 'dzin la snyoms par zhugs nas/ bka' stsal pa/ byang chub snying po zhes bya ba/ sems can kun la yod kyis kyang// mthong bar bya ba yod ma yin// byang chub sems ni phur pa'i rgyu// de ltar chos nyid don rtogs pa// rang bzhin med pa zhes bya'o// yaM raM khaM gyi 'bru gsum gyis// bsreg gtor sbyang ba gong ma'i tshig/ byang chub sems kyi rtsa dag las// byang chub sems ni gzung dbab bya// dang po gser gyi sgo mo las// byang chub sems ni rang dga' bab// sems de yongs su 'dus pa las// byang chub sems kyi ngo bo ru// mkhas pas hUM las khro bo bcu// zhi bas mi 'dul rnams la bya// rnam par shes pa khugs pa ni// mchog tu gces pas rab tu bsgrag/ byang chub sems kyi sprin dag las// phyogs bcu'i khro bo'i dkyil 'khor gsal// hUM zhes pa ni nyi shu las/ khro bo khro mo rnams kyang gsal// dzaHzhes pa ni nyi shu las// phra men rnams kyang de bzhin gsal// dzaHhUM baM hoHbzhi nyid las// sgo ma bzhi ni rab tu gsal// hUM zhes pa ni gsum nyid las// sku gsung thugs kyi sras mchog gsum// e baM ma yA bzhi nyid las// shwa na mu kha bzhi nyid gsal// dzaHdzaHbya ba bzhi nyid las// sa bdag bzhi ni gsal ba'i don// b+h+yo zhes pa ni bzhi las kyang// bdag nyid bzhi ru rab tu bsam// b+h+yo zhes nyi shu rtsa brgyad las// dbang phyug ma ni bsam byas la// dbus su zla gam sgo can la// bcom ldan bdud 'dul yab yum dgod// mi 'gyur brtan pa'i rdo rje dang// sku gsum ldan pa'i thod pa dang// dbus kyi gru gsum thod pas brgyan// rgyas 'debs ma yi steng nyid du// gru gsum lag ni sras mchog gsum/ khro bo 'khor lo rtsibs bcu la// mthing ga'i steng du dgod par bya// rtsibs mchan la ni phra men ma// gong ma bzhin du mthing ga la// bdag gi dkyil 'khor rgyas par bsam// de nas slob ma gzud par bya// de bzhin gshegs pa thams cad kyi rang bzhin sbas pa zab mo las/ rang gi dkyil 'khor gsal bar bstan pa'i le'u ste bzhi pa'o//// de nas bcom ldan 'das kI la ya'i bdag po de/ thams cad zil gyis gnon pa'i ting nge 'dzin la snyoms par zhugs nas/ karma he ru ka la sogs pa la bka' stsal pa/ de dag rnams ni rgyu yi don// da ni rab tu bshad bya la// rang gi gsal ba'i ting 'dzin ni// sbyor ba dang po rjes su sbyor// shin tu sbyor ba'i ting 'dzin dang// las kyi rgyal ba mchog dag dang// dkyil 'khor rgyal ba mchog dag go/ting 'dzin rim pa de rnams dang// rnal 'byor rim pa'i sgo dag dang// rnal 'byor dang ni rnal 'byor che// rjes su rnal 'byor shin rnal 'byor// de rlung stong pa'i 'phyo sa ni// kun bzhi'i rnam shes yin pa ste// langs kyang de la bstims yang kho// gzhan la bstim pa ma yin te// gnas pa de nyid kho na la'o// bstim pa rlung gi man ngag go/ de nas gnyis pa'i rlung de ni// phyi nang lus dang shes pa la// gnas pa rlung gi gnas yin te// g.yas g.yon ring po dal ba rnams// ting 'dzin de la bsgrib mi bsgrib// sems kyis sems la brtag pa na// phur pa byang chub sems su mthong// de yang rlung gi che bas te// gdab par bya ba yod ma yin// rlung zhes pas ni las kun byed// rnam shes de yi bzhon pa'i rta/ kha btsum lce yi dbus su ni// rlung gi 'khor lo tshon gang ba// tshom bu'am dung rgya'i tshul du bsam// de nas cha snyoms srang mda' 'dra// sems kyi skad cig rim pa brtag/ de gol rim pa lam gyi mchog/ rnam par thar pa'i lam yang ston// mi 'jigs pa yang de kho na// de bzhin gshegs pa thams cad kyi rang bzhin sbas pa zab mo las/rlung sgo bstan pa'i le'u ste lnga pa'o//// de nas 'khor gyis gsol pa/ kI la ya yi bdag po mchog/ rU tra dang 'dra bsgral dmigs la// ming dang gzugs la brten lags sam// chos nyid tsam du bsam lags sam// rang ga'i dngos po bsgral lags sam// 'on te thams cad rangabazhin bzhag/ kI la ya yis bka' stsal pa// nyon gcig 'jigs byed he ru ka/ ru tra dang 'dra bsgral dmigs de// kun tshogs sgo nas bsgral bar bya// dang po de ltar byas pa dang// nub gsum pa la 'jug par bya// ming rus lo dang zla ba dag khag chen gyi ni bris nas ni// ju co srub lo rkang rjes sa// yang na rdo phye dug la bya// de ltar ling+ga byas la ni// me ngos 'gru khung kha khyer sum brtseg can// nyi shu rtsa brgyad srin mo 'gros// yang na 'brub khung phyogs ngan sar// rang ga'i dngos po ma yin te// rnam shes ling+gar khug pa'o// de yang bdag nyid bzhi dang ldan// the tshom med dang yang dag gzhung// dam la gnas dang le lo spang// 'di rnams 'grub pa'i rgyu ru grags// yang na bya ba thams cad spang// rdzas tshogs dgra rnams med pa ru// shes rab rnam gsum ldan par bya// de nas phur pa'i rim pa ni// rdo rje gzhon nu khro bo bcu// bsgrub phur dngos grub nod pa'o// phra men srung ma'i phur pa ni// sangs rgyas rnams kyi pho nya yin// des kyang gdab bar bya ba min// sku gsung thugs las byung ba yi// sras mchog kI la ya gsum ni// gdab pa'i phur pa dam pa ste// gu gul tshil chen dag dang ni// go ro tsa na'i dud pas bdug/dbyings dang lhums su gzi byin bskyed// nag po dug gtor byas la ni// skyes kyang dang po las ngan dbang// 'jig kyang tha ma las kyis 'jig/ oM las bskyed pa hUM nyid ni// bskyed pa rkyen gyi sngags nyid do// da ni bzlas pa rgyun gyi sngags// rab tu ldan pa'i dkyil 'khor de// legs par goms shing 'dris pa dang// shin tu brjod la rab tu bzlas// 'di ni sbas pa zab mo yi// nges pa'i drag sngags bstan par bya// nyung dkar nyid la sngags byas la// snying ga lte ba gsang ba ru// nyi ma dros dang dmar thag chad// shin tu dag par bzlas pa bya// oM badzra kI li kI la ya/ mA ra ya che ge mo phaT phaT/ snying la sarba big+h+nAn baM hUM mA ra ya che ge mo phaT phaT/lte ba la dIp+ta tsakra tiSh+Tha mA ra ya che ge mo phaT phaT/ gsang ba la/ 'di ni sngags mchog rgyal po ste/ khro bo phra men kun gyi sngags// zhe sdang rdo rje bsam byas la// me dpung 'bar ba'i rang rtags can// me dpung e la sum cha nub// 'jigs su rung ba'i sras gsum gyi// sngags ni kI li kI la ya// a ko Ta ni bzla bar bya// de bzhin gshegs pa thams cad kyi rang bzhin sbas pa zab mo las/sras kI la ya bton pa'i le'u ste drug pa'o//// de nas kI la ya'i bdag po de rgyal po sbyin pa zhes bya ba'i ting nge 'dzin la snyoms par zhugs te/ bka' stsal pa/ sngags pa rgyan gyi chas kyi rtags// glang chen ko rlon zhing gi shun// thal chen zhag dang rak+tas brgyan// stag gi sham bur sbrul gyi chun// 'di dag 'jigs pa'i dpa' bo'i chas// rnam rgyal la sogs go rim bzhin// shar stod nub smad gnyis su ni// steng 'og khro bo snga ma bzhin// rtsibs mchan la ni phra men ma// shwa na la sogs re ma ti// ya byin lcags kyu shar du dgod// shwa na mu kha re ma ti// de byin zhags pa lho ru dgod// sr-i ga mu kha re ma dzu// bse phyin lcags sgrog nub tu ste// br-i ka mu kha re ma dzaH/ phag byin dril bu nub nyid du// de ltar srung ma bcu gnyis dang// sgo ma bzhi ni spel mar dgod// de nas sras mchog kI la ya// lag tu blang ste gdab par bya// de yang a ko Ta yis so// de nas gdab pa zin pa dang// dgra bgegs gang yin phyogs ngan du// ling+ga de ni bsregs par bya// de nas shin tu rnal 'byor bsam// de bzhin gshegs pa thams cad kyi rang bzhin sbas pa zab mo las/lus ngan bsgral ba'i le'u ste bdun pa'o//// de nas 'khor gyis yang gsol pa// kI la ya yi dbang dam pa// de ring khyod kyis rgyas par mdzod// ces gsol pas/ badzra kI la ya bdag po de/ dbyings rnam par dag pa'i ting nge 'dzin la snyoms par zhugs te// bka' stsal pa// nyon cig rigs kyi he ru ka/ sems can bsam pa'i dbang gis na// dbang mchog ces ni rab grags pa// phyi dang nang dang gsang ba dang// de la dbye ba gsum gsum dang// yang na nyi shu rtsa gcig dbang// bzhi bcu phur pa re re la// dbang ni bskur du yod pa de// de la dbang mchog bzhi ru bshad// bum pa'i dbang dang gsang ba'i dbang// shes rab ye shes bde chen dang// shin tu rnal 'byor bzhi pa'o// de ltar mkhas pas gang rtogs pa// byang chub sems kyi phur pa'o// 'khor gyis gsol pa/ de don rgyas par bka' stsal 'tshal// kI la ya yis bka' stsal pa// rang bzhin snang ba'i mi dag la// bsgrub na chags pa'i srung ma ni// bcu gnyis dag tu shes pa la// shwa na mu kha lcags spyang mo// shwa na mu kha lcags khyi mo// sr-i ga mu kha zangs wa mo// br-i ka mu kha zangs 'phar mo// sa bdag bzhi ni 'grub par nges// bdag nyid bzhi ni dpyid dbyar dang// ston dgun bzhi ni rgyal mo ste// bzhi tshan gsum po rtag tu ni// bsten cing ba lin sbyin par bya// de yis dngos grub myur ba'o// dbang mchog bzhi yi bskur bya ba// bum pa byed pa'i mkhan po des// rgya mdud nyid ni bum pa'o// phrin las rnam bzhi dbang dus su// dkar dang dmar dang nag dang ser// de ltar bu yi dbang nyid ni// phyi yi dbang du 'gro ba'o// 'khor lo rgyas 'debs gdung rgyud 'dzin// btsun mo de las khro bo bcu// bton pa nang gi dbang nyid do// yum nyid mkha' nas sras gsum po// b+ha gar dbang bskur gzi byin bskyed// de ni gsang ba'i dbang du 'gro// dbang mchog bka' stsal nyan pa la// phan dang nus pa gang 'dod sbyin// gal te dam tshig med pa la// byin na glang snar mtshon btags 'dra// byang chub sems kyi bsti gnas sa// lus la 'khor lo bcu yi bgo/ stod na lnga ste smad na lnga// 'di ltar khro bo bcu bkod pa// de bzhin dbang po lnga dag la// phra men zung re dgod pa dang// rkang lag bzhi la bcu drug po// rim pa bzhin du bzhi bzhi nas// de ni nang dbang dam pa'o// chos kyi dbyings kyi btsun mo yi// mkha' nas thams cad bton pa ni// gsang ba'i dbang du gzhag par bya// shin tu mi dmigs bzhi pa yin// de bzhin gshegs pa thams cad kyi rang bzhin sbas pa zab mo las/ dbang gi rim pa bstan pa'i le'u ste brgyad pa'o//// de nas 'khor la bos nas/ dbyings zab mo'i ting nge 'dzin la snyoms par zhugs te/ bka' stsal pa/ thams cad thams cad med mthong ba// dkyil 'khor khro tshul ma lus pa// ma mthong rmongs la bstan pa'o// yang dag don ni stong pa ste// mtshan ma'i bag chags spangs pa'o// sems la sems kyis bltas pas na// mthong ba med pa mthong ba'i mchog/ de ni nges don mchog yin no// bde bar gshegs pas de ma gzigs// de ni sla byer sla ba ste// dga' ba shin tu mthong bar bka'// de bzhin gshegs pa thams cad kyi rang bzhin sbas pa zab mo las/ shin tu rnal 'byor bstan pa'i le'u ste dgu pa'o//// sbas pa zab mo mdung rtse'i rgyud rdzogs so//// rgya gar gyi mkhan po dz+nyA na gar b+ha dang/ bod kyi ban de bai ro tsA nas bsgyur ba'o////

CLOSE WINDOW