CLOSE WINDOW

Gpb026.005
བོད་ཡིག

rgya gar skad du/ karma ku ru rat+na tan+t+ra nA ma/ bod skad du/ phrin las phun sum tshogs pa'i rgyud ces bya ba/ dpal he ru ka la phyag 'tshal lo// 'di skad bdag gis thos pa'i dus gcig na/bcom ldan 'das sku gsung thugs kyi bdag po dgyes pa chen po'i snying po de/ de bzhin gshegs pa thams cad kyi snying por gyur nas yum gyi b+ha ga la rtag tu bzhugs so// de nas mngon par byang chub pa'i byin rlab kyis/longs spyod par mdzad pa'i dpal rnam par snang mdzad chen po zhi ba'i tshul dang ldan pa'i gzugs bzang po zhal gsum phyag drug pa/ rnam par thar pa gsum gyi mdog mnga' ba so so'i lag cha la sogs pa'i phyag cha dang/dpe byad 'dzin pa de/ 'og min gyi gnas gzhi dang/ snying po me tog kar ti kas brgyan pa/ ye shes kyi rang bzhin rin po che sna lnga las grub pa tshad med pa'i gzhal yas khang de dbyings dang kha dog dang ldan pa/gru bzhi dang/ sgo bzhir ldan pa/ gru chad dang bcas pa/ rta babs dang thems skas dang bcas pa/ ka ba brgyad dang gdung bcu drug gis rnam par spras pa/ rin po che'i rgyan gyis bklubs pa/ sna tshogs pa'i gzugs la sogs pa na nyid las mi gzhan pa'i 'khor rnams dang/ thabs cig tu bzhugs pa ni/ 'di ltar bzhugs te/ bcom ldan 'das de bzhin gshegs pa rnam par snang mdzad dang/rdo rje sems dpa' dang/ rin chen mchog dang/ tshe dpag med dang/ don yod grub pa dang/ btsun mo rnams dang bcas pa dang/ gzhan yang 'khor gyi lha mo du mas bskor ba 'di lta ste/sgeg mo dang/ phreng ba ma dang/ dbyangs len ma dang/ gar sgyur ma dang/ bdug spos ma dang/ me tog ma dang/ mar me ma dang/ dri chab ma dang/ lcags kyu ma dang/ zhags pa ma dang/ lcog sgrog ma dang/ dril bu ma rnams dang/ gnyis su med par bzhugs so// de nas bcom ldan 'das dges pa chen po dga' ba'i mchog de longs spyo rdzogs pa'i skur bzhugs nas/ 'od kyi bye brag gis stong gsum gyi stong chen po snang bar byas so// de nas stong gi dkyil 'khor gyi nang du gzigs nas thad kar bltas sam gsal bar byas nas/ mnyam pa chen po las mi snang bar gyur to// e ma ho// thugs rjes ma bzung sems can gcig kyang med// de yi stobs kyis byams pa ngo ma shes// kun la brtse bas dga' ba mchog tu gyur// thams cad skyob pas btang snyoms chen por bzhengs// de nas de bzhin gshegs pa dga' ba'i mchog de/ de bzhin gshegs pa thams cad kyi zhal gsum par kun gyis gzigs so// de nas de bzhin gshegs pa rnam par snang mdzad la sogs pa dang/ d+hU pe la sogs pa phyi'i mchod pa dang/ sgeg mo la sogs pa nang gi mchod pa dang/me tog kar ti ka la sogs pa gsang ba'i mchod pas mchod de pus mo g.yas pa'i lha nga sa la btsugs nas/ 'di skad ces gsol to// spyan ras dri med kun gyis gzigs// rab dgyes rgyal po khyod nyid la// sku gsung thugs kyi gsang ba rnams// dang po gang gi sgo nas zhugs// khyed kyis dga' ba skyed par gsol// zhes brjod pas/ nyid kyis nyid la gzigs nas/ chos thams cad dbugs 'byin pa'i ting nge 'dzin la snyoms par zhugs so/tshad med snying rje bskyed pa dang// byang chub sems la dga' ba ni// sngon du 'gro ba'i mchog yin te// sgrub pa pos ni nan tan bya// gang gis stong nyid mi shes pas// stong pa nyid kyang 'di ltar bya// stong pa nyid kyi ye shes ni// stong pa nyid kyi don gyis kyang// yi ge'i ming tshogs sgra la grags// oM ma hA shun+yA tA dz+nyA na badzra swa b+hA wa At+ma kou0f85haM/ ye nyid stong pa'i rang bzhin las// dngos med stong pa'i chos rnams ni// bdag dang chos dang rnam rig dang// gzung 'dzin spangs pa'i stong pa'o// stong pa nyid kyi ye shes ni// ye shes rnams kyi rtse mo ste// shes pas mthong ba'i yul med do// gang gis mthong ba ye shes skye// zhes gsungs so// de nas de bzhin gshegs pa dgra bcom pa yang dag par rdzogs pa'i sangs rgyas bcom ldan 'das des rnal 'byor gyi tshul 'di lta bu gsungs so// ye nas chos nyid rang bzhin la// snying rjes thams cad khyab par bsgom// chos rnams kun gyi snying po 'di// don gyi rtsa ba yin par gsungs// rnam kun mkhyen pa'i ye shes dang// kun la khyab pa'i snying rje ni// thun mong theg pa'i rang bzhin no// drang ba'i don gyis sangs rgyas kyi// byams dang dga' dang btang snyoms sogs// rnal 'byor pa yis bsam par bya// gzhan gyi don la dmigs pa dang// chos rnams la ni dmigs pa dang// mi dmigs pa la dmigs pa ni// tshad med bzhi po bsgom pa'o// stong nyid nam mkha' dper bsgom las// rgyu yi sa bon hUM du gsal// de las gnas bsrung ba ni rab tu brtsam// rten dang brten pa'i dkyil 'khor las// dkyil 'khor yang dag don las skyes// de ru yi ge b+h+rUM bsam mo// yaM raM baM laM traM b+h+rUM hUM/ de nas yang dag dpa' bo de// sku gsung thugs dang mnyam sbyor ba'i// ting nge 'dzin la snyoms par zhugs// bdag nyid dbus kyi gtso bos ni// rang gis rang la byin gyis brlabs// byin gyis brlabs ma thag tu yang// zhal gsum phyag ni drug par gyur// ma hA yo ga'i tshul gyis su// rnal 'byor ma ni dga' bya ste// 'dod chags chen po ting nge 'dzin// snyoms zhugs 'khor ni sku la bsdus// de nas dkyil 'khor gdon pa'i sngags// nyid kyis nyid la gdon pa ni 'di'o// oM A hUM/sku gsung thugs kyi dkyil 'khor rnams// btsun mo yum gyi b+ha ga la// rim pa bzhin du bkod de gnas// sku gsum thugs kyi dam tshig rnams// ldan par byas nas gdon par bya// de nas thugs rje'i bdag po yis// dkyil 'khor rnams kyi gtso bor gyur// dkyil 'khor 'khor lo'i lte ba dang// rtsibs dang rtsibs mchan gru chad dang// gru bzhi sgo bzhi rim par bsam// de yang rnam par snang mdzad dang// rdo rje sems dpa' rin chen dpal// 'od dpag med dang don grub pa// yum rnams lha mo sgo ma rnams// dkar po mthing ga dmar dang ser// ljang gu'i mdog tu snang ba dang// rang rang lag cha 'khor lo dang// rdo rje rin chen pad+ma ral gri rnams// phyag mtshan g.yas kyi dang por 'dzin// g.yon pas rang dang 'dra ba'i rig ma rnam 'khyud pa// chos kyi phyag rgyas dbang bskur ba// rgyan thams cad kyis brgyan pa/ so so'i mdog dang lag cha yis brgyan pa'i dkyil 'khor rdzogs pa'o// de bzhin gshegs pa thams cad kyi sku gsung thugs 'dus pa rdo rje phrin las phun sum tshogs pa'i rgyud las gleng gzhi'i le'u ste dang po'o//// de nas bcom ldan 'das de bzhin gshegs pa thams cad kyi dga' ba'i snying po de/ dpa' bo chen po'i ting nge 'dzin la snyoms par zhugs nas/ mtshams kyi dkyil 'khor 'di lta bu gsungs so// ye nas dngos med dngos po'i tshogs// dngos por byung bas dngos po'i gnas// ngo bo nyid kyis stong pa la// dngos por btags kyang dngos med pa'o// chos rnams kun gyi rang bzhin la// rgyu yi ngo bor gsal ba las// gnas bsrung ba ni rnam par bsam// gnyis pa yis ni rnam brgyan las// bcu bzhi pa yi sprin steng du// bco lnga'i gdan dang thig ler bcas// de las 'khor lo'i rtsibs bcu pa// rim pa cung zad 'khor ba las// nyi ma'i dkyil 'khor ma nor bsam// de steng pad+ma lha chen dang// thabs kyi dbus su bsam bya ba/ khro bo zhe sdang gnas las skyes// zhal gsum phyag ni drug pa'o// g.yas pa dkar la g.yon pa dmar// rtsa ba'i zhal ni bung ba mtshungs// phyag gnyis hUM gi rgya bcings te// dang po rdo rje dril bu 'dzin// lhag ma zhi ba'i tshul du bya// sems dpa' gsum gyi sbyor ba yis// bgegs rnams kun gyi snying ga nas// 'dzin pa'i khro bo'i rgyal po ni// thugs ka dag nas byung ba ste/ khro bo'i rgyal po gnod mdzes ni// spyan sngar sras kyi tshul du bzhugs// hUM bzhi las kyi phyag rgya ni// g.yas pa rdo rje tho ba ste// g.yon pa bcing ba'i zhags pa'o// oM sum b+ha ni sum b+ha hUM/ gr-i h+Na gr-i h+Na hUM/ gr-i h+NA pa ya gr-i h+NA pa ya hUM/ A na ya ho/ b+ha ga bAn bid+yA rA dza hUM phaT/ bgegs rnams kun ni rab bkug ste// dkyil 'khor rnams kyi gdan du bya// a ko Ta ya mung+gar hUM/ tho ba lcags kyu 'khrigs pa yis// rdo rje phur pa'i khro bo ni// sku stod bdud rtsi 'khyil ba ste// dbyar gyi sprin phung lta bu la// bskal pa'i me bzhin rab tu 'bar// in+d+ra nI la'i mdog 'dra la// rdo rje phur bu phyag na bsnams// smad ni gsal shing lta bu la// 'od zer rnam par 'phro bar bsam// rdo rje phur bu nges btab nas// 'gegs lus shin tu mi g.yo'o// oM na maHsa man+ta kA ya wAk+ka tsit+ta badzrA NAM g+ha g+ha g+hA ta ya g+hA ta ya sarba duSh+tAM hUM phaT/ kI li kI la ya sarba pA baM phaT/ hUM hUM badzra kI la ya/ badzra d+ha ro A dz+nyA pa ya ti/ sarba big+h+nAn kA ya wAka badzrA NAM kI la ya hUM phaT/sems dpa' phra mo'i rang bzhin gyi// snying ga'i chu skyes nyi gzugs gsal// hUM yig rnam par phyung nas ni// khro bo bcu yi gzugs su gyur// bskyed dang bzlas pa las kyi sngags// thun mong gcig tu bsgrags pa'o// oM badzra kro ta hUM kA ra hUM/ gardza gardza hUM phaT/ oM badzra kro d+ha bi dza ya hUM/ ha na ha na hUM phaT/ oM badzra kro d+ha nI la daN+Da hUM/ da ha da ha hUM phaT/ oM badzra kro d+ha ya mAn+ta ka hUM/ pa tsa pa tsa hUM phaT/ oM badzra kro d+ha Ar+ya a tsa la hUM/ b+han+d+ha d+han+d+ha hUM phaT/ oM badza kro d+ha ha ya grI ba hUM/ hu lu hu lu hUM phaT/ oM badzra kro d+ha a pA ra dzi ta hUM/ tiSh+Tha tiSh+Tha hUM phaT/ oM badzra kro d+ha a mr-i ta kuN+Da li hUM/ ts+tshin+d+ha ts+tshin+d+ha hUM phaT/ oM badzra kro d+ha trai lo kya bi dza ya hUM/ bin+d+ha bin+d+ha hUM phaT/ oM badzra kro ta ma hA ba la hUM/ s+pho Ta s+pho Ta hUM phaT/ gsal bar brtas pa'i ting 'dzin gyis// mi g.yo lta bur 'khor ba yi// me stag mang po 'phro ba can// phyogs bcu rnams su 'khor bar 'gyur// de ni de ma thag tu gang// rdo rje phur bur byin brlabs nas// phyogs bcu rnams su rnam par bsam// de nas rgyu yi sa bon las// las dang mthun pa'i 'od zer 'phros// 'od las sprul pa'i khro bo ni// yan lag byin gyis brlabs byas te// ta na ga Na zab mo'i sbyor sgrol gyis// rang rang rigs la sogs pa yi// rang rang lag cha ldan 'phros te// de ni spros ma thag tu yang// bar gcod bgegs rnams gzhom pa dang// gnas bsrung ba ni yang dag go// rdo rje'i rigs la sogs pa yi// gur dang sa gzhi ra bar bsam// rten gyi dkyil 'khor yang dag par// steng du me yi dkyil 'khor dang// chu yis rnam par g.yogs par bsgom// las kyi phyag rgya de yis ni// he sdang gti mug 'dod chags dang// nga rgyal phrag dog mchod pa'o// sku gsung thugs kyi byin rlabs las// yon tan phrin las rnams kyis brgyan// bgegs rnams rnam par tshig par gyur// me dpung rgyal po'i byin rlabs kyis// myos shing 'gyel bub 'bros par 'gyur// ba mo'i mdog dang mtshungs pa la// rdo rje la sogs gur lngar gsal// gur dang sa gzhi bla re dang// rgyal mtshan ba dan rtsig par bcas// dka' dang bka' yi mtshams rnams ni// thun mong dbang chen mtshams rnams dang// thun mong ma yin bka' yi mtshams// rten dang brten pa'i dkyil 'khor ni// yi ge hUM las bskyed par bya// de las a rnams spro zhing bsdu// rlung gi dkyil 'khor ba dan 'phyar// de bzhin rgyu dang 'bras bu gnyis// gcig la gcig brten rgyu 'bras tshul// de yi steng du yi ge oM// rdo rje gnyis dang yang dag ldan// de yi steng du yi ge raM// dbyibs dang kha dog rdo rjes mtshan// de yi steng na yi ge aM// dbyibs dang rdo rje gnyis dang ldan// de yi steng na yi ge baM// ba mo'i mdog la bum pas brgyan// de yi steng na yi ge hUM// rdo rje gnyis dang yang dag ldan// de yi steng na yi ge suM/ kha dog dbyibs can gru bzhir gnas// de yi steng du yi ge yaM// rdo rje gnyis dang yang dag ldan// de yi steng du yi ge laM// de las byung ba'i yon tan ni// rin chen gru bzhi phreng bas brgyan// gzhal gyis mi lang gzhal yas ni// yon tan kun gyis brgyan pa'o// de bzhin gshegs pa thams cad kyi sku gsung thugs 'dus pa/ karma ku ru'i rgyud las gzhi'i dkyil 'khor bstan pa'i le'u ste gnyis pa'o//// de nas bcom ldan 'das de bzhin gshegs pa'i sku dga' ba chen po de/ bya sgrom chen po'i ting nge 'dzin la snyoms par zhugs nas/ bya byed sdig pa'i 'khor lo 'di bshad do// ma 'ongs pa'i rnal 'byor pa rnams la ngas bshad par bya'o// yang dag par bsgrub par bya ste/ yang dag par sbyin pa'i sdig pa dang/ yang dag par shes rab kyi sdig pa dang/ yang dag par bsam gtan gyi sdig pa dang/ yang dag par bzod pa'i sdig pa dang/ yang dag par brtson 'grus kyi sdig pa dang/ yang dag par snying rje'i sdig pa dang/ yang dag par stobs kyi sdig pa dang/ yang dag par spyod pa'i sdig pa dang/ yang dag par lta ba'i sdig pa dang/ yang dag par ting nge 'dzin gyi sdig pa dang/ yang dag par drod kyi sdig pa dang/ yang dag par bzang po'i sdig pa dang/ yang dag par sman pa'i sdig pa dang/ yang dag par tshul khrims kyi sdig pa dang/ yang dag par sbyor ba'i sdig pa dang/ yang dag par sgrol ba'i sdig pa dang/ yang dag par thabs kyi sdig pa dang/ yang dag par shes rab kyi sdig pa dang/ yang dag par mthong ba'i sdig pa dang/ yang dag pa'i sdig pa ma yin pa'i sdig pa thams cad ni/ shes bzhin ma yin pa'i sdig pa ste yang dag par spang bar bya'o// zhes gsungs so// de bzhin gshegs pa'i sangs rgyas bcom ldan 'das de/ thams cad mkhyen pa'i ye shes mnga' ba de thob par bya ba'i don to/ de bzhin gshegs pa thams cad kyi sku gsung thugs 'dus pa/ karma ku ru'i rgyud las/ de bzhin ma yin pa'i sdig pa'i 'khor lor bshad pa'i le'u ste gsum pa'o//// de nas yang de bzhin gshegs pa dgra bcom pa yang dag par rdzogs pa'i sangs rgyas bcom ldan 'das/ thams cad mkhyen pa'i ye shes dang ldan pa dga' ba'i mchog des/ dpal gdeng chen po'i ting nge 'dzin la snyoms par zhugs nas 'di gsungs so/ yang dag par 'di gsungs so// dpal chen po sbyin pa'i gdeng dang dpal chen po brtson 'grus kyi gdeng dang/dpal chen po bsam gtan gyi gdeng dang/ dpal chen po shes rab kyi gdeng dang/ dpal chen po bzod pa'i gdeng dang/ dpal chen po tshul khris kyi gdeng dang/ dpal chen po snying rje'i gdeng dang/ dpal chen po stobs kyi gdeng dang/ dpal chen po ting nge 'dzin gyi gdeng dang/ dpal chen po spyod pa'i gdeng dang/ dpal chen po lta ba'i gdeng dang/ dpal chen po drod kyi gdeng dang/ dpal chen po mthong ba'i gdeng dang/ dpal chen po yongs su mya ngan las 'das pa'i gdeng so// zhes gsungs nas mnyam par bzhag go/ de bzhin gshegs pa thams cad kyi gdeng rnal 'byor la gdams pa ste/ de bzhin gshegs pa thams cad kyi sku gsung thugs karma ku ru las/ rnal 'byor chen po'i gdeng gi le'u ste bzhi pa'o//// de nas yang bcom ldan 'das de bzhin bshegs pa dga' ba'i mchog de gzhi dang rang bzhin rnam par dag pa zhes bya ba'i ting nge 'dzin la snyoms par zhugs nas 'di gsungs so// de ltar na 'di lta ste/ byang chub snying po can rnams kyis// phung po khams dang skye mched rnams// sa zin a 'thas ma yin te// rten 'brel tsam du rang bzhin ni// dngos su rtag pa ma yin pa// rtag na chos sku bde ba che// yang dag par ni rnam thar gsum// rnal 'byor 'jug pa'i sgo rnams kyi// stong pa'i sgo rnams shes par bya'o// de ltar shes pa'i sgo rnams kyis// rten cing 'brel bar shes par bya// de nyid shes pa ma yin te// tha dad ma yin don gcig min// 'gag pa med pas skye med pa// rtag pa ma yin chad pa min// 'ong ba med pas 'gro ba med// de bas rgyu yi rang bzhin ni// ngo bo nyid kyis ma grub pas// rgyu 'bras gnyis las mya ngan 'das// yod pa ma yin med pa min// bdag las skye ba med pas nus// gzhan las skye ba ga la yod// de ltar dngos po dngos med pas// bsgom par bya ba yod ma yin// de nyid rnam par thar pa'o// de nyid kyi ni rang bzhin ni// rgyu las 'bras bus rgyas ma btab// ngo bo nyid kyis ma skyes pas// stong pa nyid kyi rnam thar ro// rgyu dang rkyen gyis ma bskyed pas// 'bras bu rang nyid mi skye bas// smon par bya ba'i nges 'brel te// smin par bya ba'i rnam thar ro// de nyid zil gyis gnon pa ni/ oM ma hA shu n+ya tA dz+nyA na badzra swa b+hA ba At+ma kou0f85haM/ yang dag don du bsgom pa ni/ don dam pa yi sems bskyed la// 'gro ba'i don gyis sangs rgyas bskyed// de nas kun rdzob bden pa de// kun rdzob bar yang sems bskyed de// byams dang snying rje la sogs bya// stong pa nyid kyi ye shes ni// 'gro ba rnams kyis don mi mthong// de la tshad med bzhi po bstan// de ni theg pa'i rang bzhin te// theg pa'i nang nas chen por grags// 'brel par byed pa gang bsgrub pa// shes rab snying rje ldan pa'o// dug gsum lnga yi rang bzhin gyis// gang rnams sdug bsngal nyen pa la// 'dod pa'i don gyi snying rje 'byung// sgrub par 'dod pa byams pa ste// kun gyi don byed byams pa yin// dga' ba rab tu dga' ba ste// don dam 'dun pa'i 'dod pa'o// chags dang zhe sdang rnam bral ba// don dam par ni sems nyid do// de bas don dam btang snyoms so// de bzhin gshegs pa thams cad kyi sku gsung thugs 'dus pa karma ku ru'i rgyud las/ nges par 'brel pa'i rnam par thar pa dang/ de nyid spros pa'i mtha' dang/ tshad med pa bstan pa'i le'u ste lnga pa'o//// de nas bcom ldan 'das kyis rten dang rten can gyi sngags 'di thugs las phyung ngo/ e yaM ra suM raM kaM/ bruM bi shwa bi shud+d+he/ oM laM/ hUM mUM/ swA maM/ AM pyaM/ ha tAM/ dzaHhUM baM hoH/ oM dzi na dzika laM twe sha ra sti/ hUM badzra d+h+r-ig mUM d+hA twI shwa rI/ swA rat+na d+h+r-ika maM ho ha ra ti/ AM A ro lika pyaM rA ga rA ti/ ha pra dz+nyA d+h+r-ig tAM badzra ra ti/ badzra aM ku sha dzaH/ badzra pA sha hUM/ badzra s+pho Ta baM/ badzra g+haN+De ho:/ phyogs bcur bzhugs pa'i rgyal ba rnams// rang byung gdod nas dag pa yi// phyogs cha med pa'i gzhal yas nas// thugs rje'i 'od zer rab spros nas// 'od zer char pa phab pa bzhin// mdun nas thad kar dmigs pa las// tha dad ma yin gnyis med bstim// e h+ye hi b+ha ga wAn/ ma hA ka ru Ni ka dr-i sha ho/ sa ma ya stam/ dzaHhUM baM hoH/ badzra puSh+pe pu swA hA/ e a ra li ho dza dza dzaH/ oM badzra sa ma ya oM/ AM badzra sa ma ya aM/ hUM badzra sa ma ya hUM/ swA badzra sa ma ya swA/ hA badzra sa ma ya hA/ oM badzra puSh+pe pu aHhUM/ dzaHhUM baM hoH/ kha raM swA hA/ de nas sku gsung thugs kyi dngos grub gsol ba 'di gsungs so// sku gsung thugs kyi dkyil 'khor rnams// mi bzad rgyan gyi 'khor lo dang// sku gsung thugs su dbang bskur nas// dngos grub rab mchog blang bar bya// oM badzra sa ma ya s+t+wam/ oM badzra sa ma ya hUM/ oM badzra sa ma ya phaT/ de nas dngos grub rab blangs nas// bdag dang gzugs brnyan dbyer med phyir// tha dad ma yin gnyis su med// de ltar ye shes phebs pa dang// nyid la nyid spyod nyid la rol// bdag gis bdag la mchod pas ni// sangs rgyas thams cad mchod pa yin// de phyir dngos grub gsol bar bya'o// oM badzra A be sha a aM a/ de ltar gnyis su med pa dang// nyid kyis nyid la spyod pa dang// nyid la nyid kyis rol pa dang// nyid la nyid kyis bstod pa dang// nyid la nyid kyis dbang bskur nas// de yis theg pa chen po mthong// gzhan du bstan par bya ba min// 'gro ba rnams kyi sems bskyed la// phyi dang nang dang gsang ba dang// mthar thug mngon pa'i dbang rnams bskur// rnam par dben don mi shes na// spyod pa'i las rnams brtag par bya// de ltar spyod pa mthar phyin nas// gsang ba'i don la 'jug par bya// shes rab ma yi mtshan brtag pa// rgyal rigs rje rigs bram ze'i rigs// gdol ba mo yang mi dor te// bcu gnyis bco lnga nyi shu gnyis// yang na rtsa lnga dag la bya// byang chub sems phebs bla ma ste// rtsa dang rlung gi las shes na// dga' ba bzhi yang brten par bya// sa dang chu dang me dang rlung// drod la phebs dang byang chub sems// gnas bzhi dag tu zin par bya// de nas phra mo'i thig le dang// nA da'i rtags dag byung ba na// byang chub sems kyi blta bar bya// de ltar rtags dag byung ba na// smig sgyu srin bu me khyer dang// du ba lta bu mthong bar bya// de bzhin gshegs pa thams cad kyi sku gsung thugs rdo rje karma ku ru'i rgyud las/snying po sngags dang spyod pa dang gsang ba'i le'u ste drug pa'o//// de nas bcom ldan 'das gsang ba'i bdag po dgyes pa chen po de bzhin rnam par zlog pa zhes bya ba'i ting nge 'dzin la snyoms par zhugs nas/zhi ba las khro bo'i ngang tshul du bzhengs nas/ sku 'bar ba las drag po'i chas kyis kun tu brgyan nas/ ha ha dang hUM hUM dang/ b+h+yo dang ru lu la sogs pa'i sgras stong gsum gyi stong chen po'i 'jig rten gyi khams kun thugs ka'i 'od zer gyis bkang nas/'gro ba'i don byas slar 'dus pa las/ 'dus ma thag tu 'khor gyi gtso bo khro bo dang khro mo la sogs pa rigs kyi lha mo du ma dang/stag dang/ khyi dang/ spyang ki dang/ wa dang/ ce spyang dang/ de la sogs te ye shes las grub pa'i dur bya sna tshogs pa dang/ gzhan yang ye shes kyi ma mo chen mo khro mo mi pham ma dang/ral pa gcig ma dang/ 'phel byed ma la sogs pa'i khro mo rnams dang/ lhan cig tu 'khod de bzhugs pa las/ ston pa dpal kI la yas 'khor rnams la ya mtshan skyed pa dang/ 'dul ba'i don du 'di skad ces bka' stsal to// e ma ho// e ma ho ngo mtshar chos/ skye ba med las thams cad skyes// skyes bu 'dul ba'i chos yin te// zhi khror ston pa ngo mtshar che// ngo mtshar rmad du byung ba'i rgyud// stong pa chen po'i byang chub sems// gzugs rnams nyid kyi rgyud du grags/ zhes bka' stsal pas/ 'khor rnams ya mtshan skyes nas 'di skad ces bka' stsal to// ston pa sangs rgyas bcom ldan 'das// gang zhig me yis tshig pa la// me yis gso ba ya mtshan che// gang zhig chu yis 'gag pa la// chu rnams dag gis dbyung bar bya// de yi byin rlabs ya mtshan che// de ltar stong pa chen po la// stong pa'i bya byed ya mtshan che// zhi bas mi 'dul gdug pa la// khro bos 'dul ba ya mtshan che// zhes gsol pa dang/ gleng bslang pa dang/ gleng slong ba las/ ya mtshan rmad du byung ba'i chos du mas ma 'ongs pa thams cad yid ches pa dang/'dul bar byed dang de dag gang dang gang lam du 'khyer ba dang/ chos thams cad rang bzhin gyis ye nas sangs rgyas pa la/ kun rdzob tu gang ltar 'dul ba'i chos la ji ltar ngo mtshar rmad du byung ba ltar/ ya mtshan rmad du byung nas/ ston pa dang 'khor rnams tha mi dad pa'i gzhung gis 'dul ba'i don du bstan pa'o// de bzhin gshegs pa thams cad kyi sku gsung thugs mi zad pa'i rgyud/ karma ku ru las drag po gleng gzhi'i le'u ste bdun pa'o//// de nas de bzhin gshegs pa dgyes pa chen po de bzhin rnam par zlog pa zhes bya ba'i ting nge 'dzin la snyoms par zhugs nas/ dkyil 'khor gyi mtshams sbyor ba 'di gsungs so// zhi ba shin tu zhi ba las// khro bo'i ngang tshul bzung ba dang// dkyil 'khor gnyis kyi mtshams sbyar dang// gang gis mi 'dul gang gis 'dul// shin tu khro zhing gtum pa la// zhi bas phan par mi 'gyur te// shes rab thabs su sbyor ba yis// khro bor de bzhin gshegs kun mdzad// zhes gsungs nas/ drag po'i dkyil 'khor la mnyam par gzhag go/ de nas dgyes pa chen po de/ dpal kI la ya'i rgyal po zhal gsum phyag drug pa/zhabs bzhi pa rgyan thams cad kyis brgyan pa zhig tu gyur nas/ dbyings dang ye shes gnyis su med pa 'di ched du brjod do/ khrag 'thung thugs su gnas pa ni// ye shes rtse mo mchog yin te// hUM gsum las ni bzlas pa'i phyir// rtse mo med pa'i las su bstan// zhes ched du brjod do// de nas dpal kI la ya'i rgyal po des/ phrin las phun sum tshogs pa'i gzhi 'di gsungs so// de ni gzugs dang byin rlabs dang// bzlas brjod dang ni phrin las dang// dus dang gnas dang bdag nyid do// phun sum tshogs pa bdun po yis// btab na ci 'dod sbyin no zhes// dam tshig bdag pos rab gsungs te// rang gi bka' las rang mi 'da'// 'das na lha yang rlag pa'i phyir// zhes gsungs so// de nas bcom ldan 'das karma he ru kas/ 'di skad ces gsol to// bcom ldan 'das de ni rgyal po'i tshig yin te/rje'u yi tshig gcig bka' stsol dang/ sdom dang yan lag bcas pa ni// gser mig g.yu yis spras pa 'dra// zhes gsol pa dang/ de nas bcom ldan 'das kyis bka' stsal pa// nyon cig karma he ru ka/snga ma smras pa rgyal po na// lhug pa rje'u yi tshig yin te/ zhes gsungs nas/ brtag pa'i rgyal po phyi ma 'di gsungs so// 'di lta ste/ de phun sum tshogs pa bdun yod de/ de la bdag nyid phun sum tshogs pa dang/dus phun sum tshogs pa dang/ gnas phun sum tshogs pa dang/ gzugs phun sum tshogs pa dang// byin rlabs phun sum tshogs pa dang/ bzlas brjod phun sum tshogs pa dang/ phrin las phun sum tshogs pa'o// zhes gsungs so// de nas yang karma he ru kas dpal kI la ya'i rgyal po la 'di skad ces gsol to// bcom ldan 'das rje'u dang rgyal po'i bka' stsal pa/ dmangs kyi tshig gcig bka' stsol dang/ zhes gsol to// bcom ldan 'das dpal kI la ya yi rgyal pos bka' stsal pa/ nyon cig karma he ru ka/ rje'u yi tshig ni de 'dra na// dmangs kyi tshig rnams bdag gis bshad/ zhes gsol nas/ bshad pa'i rgyal po 'di bshad do// bdag nyid phun sum tshogs pa ni/ byang chub la gzhol zhing mang du thos pa dang/ las la mkhas pa dang/ lha nye bar gyur ba dang/ mi phyed pa'i dad pa thob pa dang/ drag cing ldog pa med pa'i sems dang ldan pa dang/phrag dog dang 'bras bu gzhan la re ba mi 'jog pa dang/ dam tshig ma nyams pa 'di rnams ni/ bdag nyid phun sum tshogs pa 'di gsungs so/ sku gsung thugs mi zad pa karma ku ru'i rgyud las/sdom dang yan lag tu bcas pa'i gzhi phun sum tshogs pa'i le'u ste brgyad pa'o//// de nas yang bcom ldan 'das kyis/ dus phun sum tshogs pa 'di bshad do// tshes bcu bdun man chad mar gyi ngo dang/nyin mtshan gyi gung dang/ bsnyen pa tshang ba dang/ rtags byung ba dang la sogs te/ 'di ni dus phun sum tshogs pa'o// zhes gsungs so// de nas yang phun sum tshogs pa 'di bshad do// gnas phun sum tshogs pa ni/ gnas chen po dang/ shing rkang gcig pa dang/ gnod par nges pa ste/ 'di ni gnas phun sum tshogs pa'i zhes bshad do// de nas yang gzugs phun sum tshogs pa bshad do// de la gzugs phun sum tshogs pa ni/ thugs kyi phyag rgya'i dbyibs la bya ste/ phur pa ni skabs 'dir lcags sam/ lcags sna lnga'am/ seng ldeng la sogs tsher ma can gyi shing la sor brgyad dam/ sor bcu gnyis par byas la/ mgo mjug ma nor bar byas la/ rtsa ba'i ngos la mgo bya/ mgo sor gcig la rgya mdud/ sked sor gcig la rgya mdud/ stod zur brgyad/ smad zur gsum pa/ ri rab ltar brjid par 'dug pa ni/gzugs phun sum tshogs pa zhes bshad do// de nas yang byin rlabs phun sum tshogs pa 'di bshad do// byin rlabs phun sum tshogs pa zhes bya ba ni/ thog ma nyid du sku gsum du byin gyis brlab par bya ste/dang po kho nar stong pa nyid du bsgom ste/ chos skur byin gyis brlab pa dang/ de'i 'og tu rgya mdud gzhal yas khang du dmigs te/ phyogs bzhi dbus dang lngar hUM sgril ma lnga gzhag ste/ dbus su he ru ka/shar du khams gsum rnam par rgyal ba/ lhor gshin rje'i gshed/ nub tu rta mgrin/ byang du stobs po che/ 'di rnams so so'i snying po dran pa tsam gyis bskul te/ gzugs dang gnyis su med par 'khod pa dang/'khor rgyas par dmigs te phyi nang gi mchod pa ci 'byor pa phul te/ dam tshig rjes su bskul nas/ gnyis su med pa'i rgyan rdzogs pa ni longs spyod rdzogs pa'i skur byin gyis brlabs pa'o// de la sras phur pa khro bor bskyed pa ni/lte ba yan chad mthing nag la/ dbu skra kham pa zur gsum gyi thabs su 'greng ba/ brang gis 'gro ba chen po dang/ thod rlon gyis bcings shing bzhad pa/ spyan gsum sdang mig tu bgrad pa/spyan g.yon pa phur bu la gzigs pa/ mche ba gtsigs pa rab tu rngam pa/ dur khrod kyi me dpung gi nang na/ lte ba man chad lcags kyi phur pa zur gsum pa/ e'i nang du sum cha tsam nub pa/phyag bzhi pa ste/ g.yas kyi gong na sta re kha yar bstan te stag pas rdeg par byed pa/ 'og ma na rdo rje ri rab kyis gnon pa'i thabs su 'dzin pa/ g.yon dang po na rdo rje kha T+wAM 'khrol zhing bdud kyi khams gsum 'jigs pa/'og ma na phur pa zur gsum pa 'debs pa'i thabs su gzas shing ngan song gsum 'jig pa/ stobs dang mthu dang dpung la sogs pa khro bo thams cad 'dul pa las lhag par che ba gcig 'og tu phyung ba ste/rtag pa chen por bzhugs par bsam pa 'di ni/ sprul pa'i skur byin gyis brlabs pa'o// de bzhin gshegs pa thams cad kyi sku gsung thugs mi zad pa karma ku ru'i rgyud las/ dus dang gnas dang rdzas la brten nas mngon par sangs rgyas pa'i le'u ste dgu pa'o//// de nas yang dpal kI la ya'i rgyal pos/ byin gyis brlab pa 'di gsungs so/ de la rigs lngar byin gyi brlab par bya ste/'bru lngas gnas lngar byin gyis brlab pa'o// de nas yang sku gsung thugs su byin gyis brlab par bya ste/ spyi bo'i gtsug tu A+oM/ sked par hrIH/ rtse mor phaT bsam mo// de nas yang dpal kI la ya'i rgyal pos 'di skad bshad do// de'i 'og tu thugs ye shes rtse gcig par byin gyis brlab par bya ste/ zur gsum du phaT gsum/ ngos gsum du hUM gsum gzhag pa'o// de nas yang sku gsung thugs kyi brtags pa dang/rigs kyi khro bo'i byin gyis brlab pa 'di bshad do// de nas yang sku brtag pa dang/ rigs so so'i khro bo rnams kyis byin gyis brlab cing dbang bskur bar bya ste/ khro bo'i dkyil 'khor de dag nyid/ phyogs bcur 'phros nas slar 'dus pa ste/ hUM hUM dang phaT phaT kyi sgra 'byin cing de nyid sku la bstims te/ dbang dang byin rlabs thams cad kyis tshim par bya'o// de nas yang 'di bshad par bya ste/ de nas 'gro ba'i don la gshegs na/phyogs bcu'i de bzhin gshegs pa thams cad kyis stong grogs mdzad par gnang ngo// sngon zhal gyis bzhes pa lags pas de'i stong grogs mdzad cing/ de'i sku la 'jug pa dang/ bdag nyid dang bdag nyid chen po nyid du dbang bskur zhing/byin gyis brlab pa'i phyir/ lag mthil g.yas par ma las nyi ma'i dkyil 'khor du gyur pa'i steng du hUM/ g.yon pa'i lag mthil du a las zla ba'i dkyil 'khor du gyur pa'i steng du a bsam la gung mo la oM/mthe bong la hUM/ mdzub mo la trAM/ srin lag la hrIH/ mthe'u chung la hA/ 'di rnams zla ba'i dkyil 'khor gyi steng du bzhag ste/ su ra ta s+t+waM zhes brjod la thal mo mnyam par sbyar/badzra any+dza li hUM zhes brjod nas sor mo cung zad bsnol badzra b+han+d+ha hUM/ zhes brjod nas/ sor mo rgyab tu bsnol la bsdam mo// sa ma ya s+t+waM/ zhes brjod la/ phur pa blangs te 'chang ba'i bar du bcug nas/lag pa'i rting pa phye nas/ mthe bong srin lag dang mthe'u chung gi bar du phur pa bcug la/ mthe bong gis cung zad bsgul zhing dril lo// oM badzra A be sha a a zhes brjod pas phyogs bcu dus gsum gyi bde bar gshegs pa yab yum sras dang bcas pa thams cad/zhe sdang rjes su dran pa'i sku yungs 'bru tsam bar mtshams med par phur pa la bsdu zhing bstim mo// de nas yang kI la ya'i rgyal po des/bshad pa'i rgyal po 'di nyid bshad do// sku gsung thugs kyi bdag po chen po nyid du rdzogs par byin gyis brlab cing dbang bskur bar bya ste/ sor mo rgyab tu bsnol la/ gung mo gnyis gzhib pa'i bar du phur pa bzung nas/oM badzra sa twa rA dza hUM zhes bzlas/ de nas sor mo rnams sug sug por byas la/ lag pa'i rting pas phur pa bzung la/ oM tri b+hur b+hu ba phaT/ ces brjod/ de nas sor mo rnams rgyab tu bsnol te/mthe bong gzhib pa'i bar du phur pa bcug la/ ha na ha na dIp+ta tsakra hUM phaT/ ces brjod nas dril te/ bdag nyid chen po thams cad gnyis su med par sbyor ba mdzad pa'i gzi byin thams cad phur pa'i sku la zhugs pas stong khams thams cad gang bar me stag 'phro zhing dmigs pa thams cad nges par 'grub pa'i byin rlab dang/dbang chen po dang ldan par gyur te/ mdun gyi nam mkha' e'i gdan la bzhugs su gsol nas/yungs kar gyi rgyal pos brdeg cing/ gu gul sbyar mas bdug la/ phyi nang gi mchod pa ci 'byor pa thams cad dbul bar bya'o// de nas yid la brnag pa'i phrin las bcol te/ 'di ni byin rlab phun sum tshogs pa'o// zhes yang dag par bshad do/ de bzhin gshegs pa thams cad kyi sku gsung thugs mi zad pa/ karma ku ru'i rgyud las/ rdzogs pa'i sangs rgyas kyis phur pa nyid la dbang bskur ba dang byin gyis brlabs kyis 'gro ba'i don la thogs chags med par byed pa'i le'u ste bcu pa'o//// de nas yang karma he ru kas/ bcom ldan 'das kI la ya'i rgyal po la 'di skad ces gsol to// kye rdzogs pa'i sangs rgyas kyi sangs 'phral la rgyas pa ma yin te/ye nyid nas ni rdzogs sangs rgyas// dmangs rigs bzlas brjod ji ltar lags// zhes gsol to// bcom ldan 'das kyis bka' stsal pa// bzlas brjod phun sum tshogs pa ni// bdag nyid las kyi lhar bsgoms la// snying gar nyi ma'i dkyil 'khor du/ hUM mthing nag gcig bzhag nas/ oM badzra kI li kI la ya/ che ge mo zhig mA ra ya phaT/cesabarjod pas/ phur pa'i khro bo ci 'dra ba gcig byung bar gyur te/ phyogs bcu thams cad du sems can gyi don byas nas phur pa la bstim mo// 'di 'dra ba 'bum mam/ bdun 'bum bye ba'am/ sa ya yan chad bzlas pa bya ste/bsnyen pa gtang ba 'dod na/ phur pa nyid snying ga'i hUM la bsdus te/ 'di ni bzlas brjod phun sum tshogs pa'o// zhes bshad do// de nas yang karma he ru kas kI la ya la 'di skad ces gsol to// bcom ldan 'das mgon po chen po khyod// phrin las gang lags bshad du gsol// bdag gzhan las gnyis bshad du gsol// sngon gyi las dang gzhung gi las// dgug dang bcing dang dgrol ba rnams// ji ltar lags pa bshad du gsol// bcom ldan 'das kyis bka' stsal pa// phrin las phun sum tshogs pa ni// thog ma nyid du brtag pa'i sa rnyed nas/ bgegs bskrad pa dang mtshams bcad pa la sogs pa bya ste/skad cig ma'i ting 'dzin gyis khro bo'i sdang mig dang/ mtshon cha'i char dang/ rdo rje gnod sbyin la sogs pas bgegs bskrad la/ phur pa bcu khro bo bcur byin gyis brlabs te/ phyogs bcur btab nas ci tsam 'dod pa bsrung bar mtshams bcad do// dang po rigs lnga'i lha mnyes par byas te/ de nas las kyi lha mnyes par byas la/ de nas ting nge 'dzin gong nas 'byung ba dang/ bsnyen pa rnams tshang nas/gnas chen por dkyil 'khor gru gsum pa/ rtse mo lho phyogs su bstan te/ zhing chen gyi thal ba dang/ ske rtse dang/ lan tshwa dang/ zhing chen gyi rak+ta dang/ srum ma'i lo ma dang/ khre dang/ ju tshe'i phub ma dang/ grog mkhar gyi sa dang/ bong bu'i bdud rtsi las sprus te/ zhing chen thal ba ma rnyed na/ til nag po la gzhi blangs te/ gzugs byas kyang rung/ ri mo bris te mdog smug nag tu byas te/ la sogs pa la zhing gi rak+tas hUM che mo mA ra ya phaT/ces bris nas snying gar blan te/ dkyil 'khor gyi steng du gan rkyal du bzhag nas/ mgo lho phyogs su bstan te/ gdon de nyid dgug pa ni/ mngag gzhug gam khro bo sum b+ha ni'i sbyong ba yang rung/gsang ba'i thugs ka'am rang gi snying gar zla ba'i dkyil 'khor la dza dzaH/ 'di 'dra ba dmar po gcig bzhag la dzaHhUM baM hoH/ badzra aM ku sha dzaH che ge mo zhig hUM dza zhes brjod nas/ mngag gzhug lha mo lcags kyu can grangs med pa brgyud mar byung nas/bgegs kyi snying ga nas bzung ste der 'ong ba dang/ dzaHhUM baM hoH/ badzra che ge mo pra be sha hUM/ zhes ci ran brjod nas/ gzugs sam ri mo la phab ste dzaHhUM baM hoH/zhes brjod nas lcags kyu dang/ zhags pa dang/ lcags sgrog gi phyag rgyas bcings pa dang/ bsdams pa dang/ de'i sems 'khrug par byas nas/ e'i nang du rtsi mo'i 'og tu song bar bsam la/de nas phur pa blangs te/ las kyi lha'i snying po dang bcas pas drag tu cung zad cig bskul la/ thal mo sbyar thabs kyis gsor te/ rdo rje sder mo'i sngags bzlas la/ ting 'dzin gsal bar ma gyur gyi bar du dril nas/ting nge 'dzin khugs pa dang/ gnod byed kyi steng du rtse mo nas gang tsam gyis ma reg par gzas la/ khro bo'i sked pa nas lag pa g.yon pas bzung te/ rdo rje tho ba'am s+t+wa re yi stag pas brdeg cing/rdo rje sder mo'i sngags lan gsum mam lan bdun nam/ nyi shu rtsa gcig tu bzlas shing btab ste/ seng lding gi phur pa sor brgyad pa gcig snying gar gdab/ gcig dpral bar gdab/ bzhi dpung mgo gnyis dang/brla'i nang rol gnyis su gdab/ lte ba'i khung du yang gdab bo// rdo rje sder mo'i sngags ni/ na maHsa man+ta kA ya wA' ga tsit+ta badzrA NAn/ oM g+ha g+ha g+hA ta ya che ge mo phaT/ sarba duSh+tAM kI li kI la sarba pA paM phaT/hUM hUM hUM badzra kI la ya badzra d+ha ro a dz+nyA pA ya ti kA ya wA' ka tsit+ta badzra kI li kI la ya hUM phaT/ ces drag tu brjod do// phur pa de dag bab zin nas/ de'i steng du las kyi lha'i phyag rgya dang/ sngags kyis mnan te/lag pa gnyis sor mo bsnol te/ mthe bong dang mthe'u chung gnyis ngos sbyar te brkyang la gzhan ma ni rgyab drang por bsrang/ de'i sngags la/ oM karma badzra kro d+ha hUM phaT swA hA/ lan nyi shu rtsa gcig bzlas te g.yas phyogs nas bskor la/kI la ya'i mgo la lan gsum tu gtug go/ de nas yang phur pa slar mi dbyung zhing/ sus kyang ma phyin par slar mi dbyung zhing/ lhag par yang mi phyin par lhag par yang zung cing thal phyin par bsam mo// de nas dam tshig gi phyag rgya bstan par byas te/ sor mo rnams rgyab tu bsnol te bcangs la gung mo gnyis gzhib la/ rtse mo bsgrengs la rnon par byas te phur pa'i slad du mnan/ phur pa'i lha dang bgegs che ge mo khyod dam tshig las ma 'da' zhig bar bsgo zhing/ sngags 'di lan bdun bzlas so// oM badzra sa twa sa ma ya hUM phaT/ ces brjod do// 'di ni sems ma dam tshig rdo rje'i sngags dang phyag rgya ste/bsgo ba thams cad nyan par bsam/ de nas sor mo rnams nang du bsnol te/ mthe bong mthe'u chung gnyis ngos sbyar la bsgreng/ khu tshur mi bcang bar sor mo rnams phyir bskyed de/ phur pa'i steng du mnan cing sngags 'di brjod do// oM badzra kro d+ha ha na ha na da ha da ha/ pa tsa pa tsa/ ban+d+ha ban+d+ha/ ts+tshin+d+ha ts+tshin+d+ha/ hUM hUM phaT phaT/ ces nyi shu rtsa gcig bzlas so// stobs po che'i sngags dang phyag rgya ste/ gong du bka' nyan pa bdag gi dbang du gyur nas/ci bsgo ba thams cad bdag gi bran bzhin las byed par 'gyur ro// de nas yungs kar rgyal pos brdeg/ gu gul sbyar ma bdug la bzhag/ de nas lag pa gnyis rgyab sbyar/mthe'u chung gcig la gcig mkhyud/ mdzub mo gnyis kha bgram g.yas g.yon du bzung ste/ yid tsam dgu bar byas/ lhag ma rnams nang du bcangs la/ mdzub mo gnyis mche bar bsams te/ rkang pa g.yon pas dgra bgegs kyi snying gar mnan la/ sngags 'di lan bdun bzlas so// oM badzra yak+Sha kro d+ha kha kha ha ha hUM hUM hUM phaT phaT/ ces brjod do// de nas rdo rje be con gyi sngags dang phyag rgya ste/ lag pa sor mo lu gu rgyud du bsnol la/mthe bong g.yas pa g.yon gyi steng du bzhag la/ mdzub mo gnyis ngos sbyar te sbreng nas/ sdang mig bgrad cing brdeg pa sngags 'di lan bdun nam/ nyi shu rtsa gcig gam/ brgya rtsa brgyad bzlas so// oM badzra kro d+ha ma hA ba la ha na da ha pa tsa bi d+h+wa na sa ma ya dza ti lam po da ra uts+tshuSh+ma kro d+ha hUM phaT/ ces brjod do/ de nas yungs kar gyi rgyal pos brdeg cing gu gul gyis bdug la bzhag go/las 'di shin tu brtan cing grub par mdzod cig par bsam mo// cung zad byin chung ba 'dra na/ rdo rje brjid gnon gyi bsam gtan gyis mnan par bya ste/ khro bo rnams kyi spyi bor bsdus pa'i steng du hUM mthing nag la rdo rje ljang gu rgya gram me lce'i phreng bas bskor ba rgya gam gyi steng du yi ge su ser po gser btso ma'i kha dog 'dra ba cig bsam la/oM badzra su me ru hUM hUM sa ma ya s+t+waM/ zhes brjod pas/ gser gyi ri rab dpag tshad bye ba gru bzhi pa zhig tu gyur pa'i steng du/bcom ldan 'das don yod grub pa/ sku mdog ljang gu dbu gsum phyag drug pa/ g.yas kyi dang po na 'khor lo 'bar ba phyar te bsnams pa/ g.yon gyi dang po rdo rje rgya gram thugs kar brten pa/'khor dpag tu med pa dang bcas pas pho brang btab pas/ khro bo rnams kyang shin tu gzir zhing mi g.yo ba dang/ las ma grub na bskal pa'i bar yang mnan par bsam mo// phrin las kyang de bzhin du bcol te bzhag go/ yo byad thams cad kyang nag por bsham/ gtor ma nag po cha gcig bsham/ dam tshig can 'khor dang bcas pa dang/ 'jig rten pa thams cad la bsngo zhing las la bcol/drag po'i gtor ma cha gcig/ gdon de nyid bkug la zar gzhug go/ phrin las 'di'i dus su phra men ma dang/ gnod sbyin mo dang/ srin mo rnams kyang spyan drangs shing gtor ma dbul/ las bcol te/sngags kyi rgyal po 'di brjod par bya'o// dzaHhUM baM hoH/ e h+ye hi b+ha ga bAn/ b+hi d+hi ya kro d+ha dza b+h+yo ru lu ru lu hUM/ zhes lan gsum brjod pas spyan drangs so// oM pra ti dza hUM/ zhes brjod pas gtor ma 'bul lo// oM sa ma ya a mr-ita ar+g+haM pra tIts+tsha hUM swA hA/ zhes bzlas te/ a mr-i ta phul nas ci 'dod pa'i las bcol lo// 'di ni phrin las phun sum tshogs pa zhes bshad pa'i rgyal pos yang dag par bshad do// de bzhin gshegs pa thams cad kyi sku gsung thugs mi zad pa'i rgyud/ karma ku ru las rten dang brten can du gyur pa'i phrin las 'jig rten 'di nas pha rol tu sgrol ba'i las kyi rgyal po'i le'u ste bcu gcig pa'o//// de nas yang bcom ldan 'das dpal kI la ya'i rgyal po la/ karma he ru kas gsol pa/ e ma ho sangs rgyas bcom ldan 'das// ma mthong rmongs la bstan pa'i phyir// gzugs brnyan dkyil 'khor bstan pa dang// las kyi sham bu hom khung rnams// dpa' bos yang dag bshad du gsol// zhes gsol to// dpa' bo nyid kyis bka' stsal pa/ nyon cig rigs kyi he ru ka/ rje'u dmangs dang rgyal po'i tshul// yang ni bdag gis bshad par bya// zhi ba'i gnas dang drag po'i gnas// snga ma nyid las brtag par bya// de lta bu yi gnas rnyed nas// sngon gyi las rnams rab brtags nas// maN+Dal 'dom gang mda' gang ngam// che chung tshad ni ma nges te// dpangs su khru gang brtsig par bya// cha mnyam chag chag go ma ye// bdud rtsi dag gis rab bya ste// bcu gnyis rtsa bco lnga yang lnga rtsa gnyis te// bu mos legs par bkal ba yi// thig skud ma nyams gsang ba yis// dkyil 'khor cha ni bsnyam par bya// zur bzhi tshangs thig btab nas ni// snam bu brgyad du bgo bar bya// dbus su 'khor lo rtsibs bzhi pa// lte ba mu khyud dag gis bskor// de yi phyi rim snam bu la// srung ma rnams kyi khyams dag bya// de yi phyi rim snam bu la// sgo ma bzhi yi rang bzhin te// de yi phyi rim snam bu la// de bzhin lcags ri btang bar bya// lte ba dag ni nag po te// de la gru gsum gru gsum bya// 'khor lo bzhi ni ser po ste// de yi gong ras nag por bya// bar khyams dmar la sgo khyams ser// gru chad ljang gu lcags ri nag/ de bzhin tshon gyis bkye ba la// dbus su karma yab yum ste// shar nas brtsams te khro bo bzhi// rim pa bzhin du dgod par bya// de yi phyi rim snam bu la// srung ma rnams ni spel mar dgod// sgo la sgo ma bzhi rnams te// lcags ri la ni dbang phyug ma// don gyis sangs rgyas yin mod kyang// bran gyi tshul du mu ran bzhugs// dbus kyi gtso bo'i mdun nyid du// sras mchog bdun po de bzhin gzhag/ de ltar don gyi lha bkod nas// mchod pa rnams kyang de bzhin gzhag/ de nas mchod pa'i las bya ba// rgyal po rgyal po de bzhin te// rgyal thebs karma ging gis bya// de nas las rnams mtha' ru bskyal// de bzhin gshegs pa thams cad kyi sku gsung thugs mi zad pa karma ku ru'i rgyud las/dkyil 'khor gyi bca' gzhi dang lha bkod pa'i le'u ste bcu gnyis pa'o//// de nas yang karma he ru kas/ bcom ldan 'das la 'di skad ces gsol to// kye kye sangs rgyas bcom ldan 'das// drag po las kyi sham bu ste// me yi cho ga bshad du gsol// zhes gsol to// bcom ldan 'das kyis bka' stsal pa// dkyil 'khor dbus nas shar lho'i mtshams// me yi dkyil 'khor gru gang bya// de la kha khyer gsum dang ldan// zabs dang rgyar yang mnyam pa la// hom khung sor ni bzhi par bya// dang po la yang thod pa gsum// bar ma dag la mtshon cha lnga// tha ma rtsang dmar dag gis bskor// yang na dkyil 'khor chen po dang// 'brel pa nyid du bya ba yi// dkyil 'khor rnam gsum rdzogs pa dang// gang la dmigs pa'i ling+ga la// dgug gzhug las rnams tshang bar bya// gcad dang gtub dang gdab pa rnams// rdo rje sder la sogs pas bya// de nas me lha spyan yang drang// dad pa dang ni dam tshig gis// tshur gshegs tshur gshegs 'byung ba che// me lha drang srong bram ze mchog/sum cu rtsa lnga'i lnga tshigs ni// lnga pa me lha zhes kyang bya// rab tu spun la sku mdog ser// mgrin pa ring la gsung yang snyan// thugs rje'i dbang gis spyan drangs te// 'bar ba'i nang du bzhugs nas ni// sreg blug zhal zas bzhes su gsol// khyod la phrin las bcol ba ni// hom khung ma nyams dam pa 'dir// drongs shig drongs shig me drongs shig/ spor cig spor cig me spor cig/ zur phud can gyis me gsos la/kha 'bar ma yis me bus shig/ bram ze bu mo lnga brgya yang// khyod kyi g.yog dang bran du khol// thugs dam rgyud bskul bcol ba'i phrin las mdzod// dzaHhUM baM hoH// na mo badzra pa Ni b+h+ya/ nag mo ag+ne ye/kI li kI la ya/ dan ta la si/ ma hA A gats+tsha hUM/ b+han+d+ha swA hA/ de nas bzhugs su gsol/ dzaHhUM baM hoH/ e h+ye hi ma hA shud+d+he de ba r-i Shi/ ha da sa da na ti ma hA hi da ha ut+ma hA raM sa ma/ san ti si ti b+ha ga/ oM ag+ne ye ha bya ka bya/ma hA na ya swA hA/ de nas yang rigs pa'i rgyal pos 'di gsungs so// yang dag bden pa'i snying po 'di/ dzaHhU~M baM hoH/ oM badzra ag+ne raM/ zhes brgya rtsa brgyad bzlas so// de nas sbar ba'i rig pa 'di gsungs so// tsi ri shag raM/ hi pa ra shag raM// yaM raM yaM raM yaM raM/ zhes lan bdun brjod de/ de nas yang rig pa 'di gsungs so// ma kyin raM by-i raM/ he la te shu raM/ the khyer se na raM/ ma raM ma raM zhes bya'o// de nas yang 'di gsungs so// he la byi laM/ la byi laM/ rat+na rmi byi laM/ zhes gsungs so// de nas bsreg rdzas dbul bar bya// ling+ga ming rus dang bcas par// til nag dug sna sha sna rnams// drag po'i sngags ni mthar brjod do// lha rnams dga' mgu rang ba'i phyir// mchod pa phul nas rgyal thabs bya// de bzhin gshegs pa thams cad kyi sku gsung thugs mi zad pa karma ku ru'i rgyud las/ me'i las bstan pa'i le'u ste bcu gsum pa'o//// de nas bcom ldan 'das kyis rig pa'i rgyal po 'di gsungs so// hU~M hU~M hU~M hU~M hU~M hU~M hU~M hU~M hU~M hU~M/ dzaHhU~M baM hoH/ hU~M hU~M hU~M hU~M hU~M hU~M hU~M hU~M hU~M hU~M/ de nas yang 'di gsungs so// oM karma shrI he ru ka/ kI li kI la ya ma hA tsaN+Da/ sarba duSh+tAM/ da ka ha na/ da ha pa tsa hU~M phaT/ sarba a mo g+ha sid+d+hi kro d+hI shwa rI hU~M phaT/ oM badzra trai lo kya bi dza ya badzra kro d+ha hU~M phaT/ kro d+hI shwa rI hU~M/ oM badzra kro d+ha ya mAn+ta ka hU~M phaT/oM kro d+hI shwa rI hU~M/ oM badzra kro d+ha ha ya grI ba hU~M phaT/ kro d+hI shwa rI hU~M/ oM ma hA ba la badzra kro d+ha hU~M phaT/ kro d+hI shwa rI hU~M/ zhes yang dag par thugs las phyung ngo/ de nas yang 'di gsungs so// phyag rgya bzhi dang ldan pa yi// yab yum sku ni gsal bar bskyed// oM dang AHdang hU~M rnams kyi// 'phro 'du las kyi phyag rgya yis// gnas bzhi dag tu rgya yis gdab// bsnyen pa dang ni nye bsnyen dang// sgrub pa dang ni sgrub pa che// de ltar dkyil 'khor rdzogs pa dang// rang bzhin dkyil 'khor spyan yang drangs// dzaHhU~M baM hoH/ e h+ye hi b+ha ga wAn bin+d+ha ya ar+g+haM pra tIts+tsha hU~M/ ru lu ru lu/ a ra li hriM hriM/ de nas mnyes dang mgu ba'i phyir/yang 'di gsungs so// oM badzra puSh+peA hU~M/ na maHshrI he ru ka hU~M/ d+hU pe d+hU A hU~M/ A lo ke hrI A hU~M/ g+han+d+he a hU~M/ nai wid+ya A hU~M/ na maHshrI he ru ka hU~M/ zhes phyi'i mchod pa gsungs so// de nas gsang ba'i mchod pa 'khor lor 'bul ba 'di gsungs so// oM ma hA shrI he ru ka sa ma ya a mr-i ta ar+g+haM pra tIts+tsha ho// karma shrI he ru ka karma kro d+hI shwa rI kha raM kha hI/ zhes gsungs so// de nas bstod pa'i rgyal po 'dis bstod do// hU~M khams gsum thugs rjes 'dren pa'i yak+sha he ru ka/ srid gsum sdangs par byad pa'i yak+sha he ru ka/ sa gsum zil gyis gnon pa'i yak+sha he ru ka/ 'gro ba mthar phyin sku gsung thugs mnga' ba// sku yi chos kyis gdug byad zil gyis gnon// gsung gi nga ros bdud dgra rlag par byed// thugs kyi 'od zer bkye bas las dang nyon mongs 'joms// yon tan rdzogs pa'i sku gsung thugs la phyag 'tshal bstod// de nas yang sras mchog la bstod pa'i rgyal po 'dis bstod do// rigs lnga rgyal ba khrag 'thung mang po'i tshogs// sku gsung thugs kyi sras mchog kI la ya// chos sku mi 'gyur sku mdog mthing nag la// zhe sdang bdud 'dul kham nag gyen du 'khyil// 'khor ba mi spang thod rlon phreng bas bcings// gdug pa'i klu 'dul sbrul gyis rab tu brgyan// spyan gsum bgrad pas 'khor ba zhe la gnon// mche ba gtsigs pa'i skye shi rtsa ba gcod// rdzu 'phrul phyag bzhi g.yas kyi gong ma na// ye shes s+t+wa res khams gsum rdul du rlog/ g.yas 'og rgya gram 'khor ba zil gyis gnon// g.yon gyi dang pos kha T+wAM bdud khams 'dul// g.yon 'og phur pas ngan song gnas gsum 'jig/ bskal pa'i me dpung 'bar ba'i klong dkyil na// lte ba man chad sku smad ni// ut+pal sngon po'i mdog 'dra ba// chos nyid rig pa'i ye shes rtse gcig po// shes rab yum gyi mkha' yi pho brang nas// stobs dang mthu dpung khro bo 'bum pas lhag/ chos sku longs spyod rtag par sku sprul pa// ye shes kI la ya la phyag 'tshal bstod// de nas yang 'di gsungs so// las kyi rigs mchog bdud bzhi 'dul ba'i gtso// bdud kyi rigs rnams rdul du rlog mdzad cing// bla med byang chub gnas su 'dren mdzad pa// karma he ru ka la phyag 'tshal bstod// ces gsungs so// de bzhin gshegs pa thams cad kyi sku gsung thugs mi zad pa karma ku ru'i rgyud las/ rig pa'i rgyal po dang bstod pa'i le'u ste bcu bzhi pa'o//// de nas yang bcom ldan 'das kyis 'khor rnams la/bdag dang khyed du bcas pas rgyud 'di nyid kyis 'gro ba'i don byos shig/ ces gsungs nas mi snang bar gyur to// de nas 'khor rnams kyis rgyud 'chad pa'i skyes bu la bstod pa/ hUM khro la khros pa'i rgyal po yis// khro bo nye bar zhi mdzad pa/ khro zhi che la phyag 'tshal te// zhi bas mi 'dul khro bor ston/ khro bos 'dul la phyag 'tshal lo// zhes mgrin gcig dbyangs gcig par bstod nas mi snang bar gyur to// karma ku ru'i rgyud las/ yongs su gtad pa'i le'u ste bco lnga pa'o//// rgya gar gyi mkhan po bi ma la mi tra dang/ lots+tsha ba A tsar+ya gnyags dz+nyA nas gtan la phab pa las/ rma rin chen mchog gis skad gsar bcad kyis gtugs pa'o/

CLOSE WINDOW