CLOSE WINDOW

Gpb018.002
བོད་ཡིག

rgya gar skad du sarba ta thA ga ta shAn+ta sa mA dza mU la ma hA tan+t+ra nA ma/ bod skad du/ de bzhin gshegs pa zhi ba thams cad 'dus pa rtsa ba'i rgyud chen po zhes bya ba/ bcom ldan 'das dpal rdo rje sems dpa' la phyag 'tshal lo// 'di skad bdag gis thos pa'i dus gcig na// bcom ldan 'das dpal kun tu bzang po ye shes rang byung gi rgyal po de nyid/ gsang ba ma bcos pa'i thig le chen po bsam gyis mi khyab pa'i ngang la mnal te bzhugs so// de nas dbyings kyi yum kun tu bzang mo de nyid/ rtsa ba byang chub sems kyi 'gro ba thams cad thugs rje'i chus brlan par mdzad de/ dpal kun tu bzang po la thugs rje'i rol pa tshad med pa zhes bya ba'i glus bskul to// de nas bcom ldan 'das dpal kun tu bzang po chos nyid mnyam pa nyid kyis ngang la mnal ba la// byams pa chen po'i thugs rjes sad par mdzad de/ yul sems can la rab tu dmigs pa dang lam la dmigs pa dang/kun tu dmigs pa med pa dang/ stong pa chen po las rab tu skyes pa'i rtsal ma 'gag pa las/ byang chub kyi sems skye ba med pa/ brjod pa thams cad las 'das pa chos kyi 'byung gnas su gyur pa'i yi ge a zhes bya ba'i rang bzhin du gyur nas// skye ba med pa las sgra 'di byung ngo// e ma ho/ chos nyid gdal ba'i klong// e ma ho snying rje rgyun chad med// e ma ho gsal ba'i yig 'brur shar// e ma ho yon tan dpag tu med// e yaM baM laM raM b+h+rUM/ 'di ltar snang ba'i chos rnams kun// ye nas ma bcos rdzogs sangs rgyas// snod bcud rnam rtog gis brtag pa// rgyal ba'i dkyil 'khor phyag rgya che// nam mkha' rlung chu sa dang me// gdod nas rnam dag yum lnga'i mkha'// ngo mtshar gzhal med sna tshogs dang// dag pa'i ye shes gzhal med khang// gdan khri 'od kyi snang ba rnams// zhi ba rol pa'i gdan mchog ste// dag pa chen po'i 'jig rten las// ma dag pa n-i yod ma yin// ma rig 'khrul pa'i bag chags las// ma dag pa yi khams su snang// yum lnga'i mkha' klong dag pa las// ye shes 'byung chen rnam lnga ste// ye shes lnga las gzhal yas 'od/ rtog pa can gyis shes par bya// zhes bya ba'i sgra phyung ba dang// snang grags kyi dngos po thams cad de bzhin gshegs pa'i skur ma bcos par lhun gyis grub par bstan pa'i phyir// 'di ltar snod du snang ba thams cad de bzhin gshegs pa'i zhing khams su byin gyis brlabs so// de yang 'byung ba rnam par dag pa nam mkha' yongs su dngas pa ni/ chos kyi dbyings rnam par dag pa/ chos kyi dbyings kyi dbang phyug ma'i mkha' klong/ ye shes chen po'i nam mkhar lhun gyis grub par bstan to// de bzhin du rlung gi dkyil 'khor n-i sgrol ma'i mkha' klong rnam par dag par bstan to// chu'i dkyil 'khor ni mA ma kI'-i mkha' klong rnam par dag pa'o// sa'i dkyil 'khor ni spyan ma'i mkha' klong rnam par dag pa'o// me'i dkyil 'khor ni gos dkar mo'i mkha' klong rnam par dag pa'o// 'di ltar nang gi gzhal med khang rnam par dag pa gdan dang bcas pa ni// yum thams cad kyi mkha' klong rnam par dag pa ye shes lnga'i rang bzhin 'dus pa ni/ lha'i gzhal yas 'jig rten pa'i yon tan las 'das pa ste/shar phyogs ni shel gyi rang bzhin las grub pa/ lho phyogs ni gser gyi rang bzhin las grub pa/ nub phyogs ni pad+ma rA ga'i rang bzhin las grub pa/ byang phyogs ni in+d+ra nI la'i rang bzhin las grub pa/dbus kyi cha ni rin po che sna tshogs kyi rang bzhin las grub pa'i ye shes kyi sa gzhi yongs su dag pa'o// de'i brtsigs par snang ba yang ye shes lnga'i rang bzhin// thams cad kyi rang bzhin mu tig dang/shel dang/ gser dang/ pad+ma rA ga dang// in+d+ra nI la'i 'od du 'phros// 'od zer gyi snang bas rab tu brtsigs pa'i gzhal yas khang/ rdo rje'i 'khor los spras pa/ gru chad glo 'bur du bcas pa/khyams dang sgo'i g.yas g.yon rdo rje'i ka bas brgyan pa/ rin po che snatshogs kyis rgyan gyis spras pa/ dril bu dang zar tshags dang/ rin po che pha gu'i brtsigs pa/ dar gyi lda ldis brgyan pa/ yid las byung ba'i mchod pa chen po dang rig pa'i lha mo rnams kyis mchod pa 'bul te/ rta babs kyi rgyan chen po bzhi dang bcas pa/ ye shes kyi rang bzhin las grub pa/ rdo rje'i thog phub pa/ zag pa med pa'i phib chen pos btibs shing yid bzhin gyi nor bu chen po'i tog 'bar ba dang bcas par byin gyis rlabs so// de nas 'jig rten pa'i gdan khri'i rtog pa dang bral ba'i phyir pho brang gi dbus su saM las seng ge'i gdan dang/shar du haM las glang po che'i gdan dang/ lhor g+haM las rta'i gdan dang/ nub tu maM las rma bya'i gdan dang/ byang du khaM las shang shang gi gdan dang/ de dag gi steng rnams dang/ phyogs dang mtshams kyi dkyil 'khor gyi snam bu dang grwa rnams su/skyon rnam par dag pa'i rtags su paM las pad+ma'i gdan dang/ nyon mongs pa'i mun pa sel ba'i rtags su nyi ma'i dkyil 'khor gyi gdan dang/ thugs rje chen pos rjes su bsil bar mdzad pa'i rtags su zla ba'i gdan rnams bkod cing sprul te byin gyis rlabs so// de nas dbyings kyi yum kun tu bzang mos 'di skad ces gsungs so// chos dbyings rnam dag ye nas rdzogs pa las// 'gro ba'i don phyir cho 'phrul skur bstan pa/ 'jig rten snod kyi rnam par rtog pa kun// ye nas dag pa'i gzhal med khang chen te// ma bcos lhun rdzogs lha rnams bzhugs pa'i gnas// rnam dag gdan dang bcas pa ngang gis gsal// che ba'i che mchog dpal chen kun tu bzang// gnyis med rol pa lha yi cho 'phrul ston// snang srid chos la skyon med gzhal yas nyid// rang byung chen po'i zhing khams dag pa 'dir// bcud kyi sems can mnyam nyid rdzogs pa'i sku// gzugs sku zhi ba'i rol pas gang bar mdzad/ ces gsungs so// zhi ba 'dus pa rtsa ba'i rgyud las/ snod kyi 'jig rten rnam par dag pa gzhal yas khang bstan pa'i le'u ste dang po'o//// de nas bcom ldan 'das dpal kun tu bzang po nyid kyis gzugs brnyan gyi rol pa rnam par dag pa ma 'gag pa zhes bya ba'i ting nge 'dzin la snyoms par bzhugs so// de nas de ma thag tu snying rje chen po skye ba med pa las byung ba'i yi ge a de nyid kyi dkyil 'khor gyi dbus su seng ge'i khri gdan dang bcas pa'i steng du babs par gyur to// de'i 'od zer gyi rnam pa las gzugs kyi sku dpag tu med pa spros te/'jig rten gyi khams grangs med par song nas/ 'gro ba thams cad dag pa'i sa la bkod ste/ de yang kha cig tu ni chos kyi skus 'gro ba'i don mdzad do/kha cig tu ni longs spyod rdzogs pa'i skus 'gro ba'i don mdzad do/ kha cig tu ni sprul pa'i skus 'gro ba'i don mdzad do// la la ni byang chub sems dpa'i skus 'gro ba'i don mdzad do// de bzhin du kha cig tu ni 'khor los bsgyur ba'i rgyal po dang/kha cig tu ni bram ze dang/ kha cig tu ni khyim bdag dang/ kha cig tu ni tshong dpon dang/ kha gcig tu ni dmag dpon dang/ kha cig tu ni skyes pa dang// bud med dang sdig to can dang/byol song la sogs pa'i gzugs kyi gshegs nas/ sems can kyi khams ma lus par zad par mdzad nas/ de bzhin gshegs pa rnams la sku gsung thugs la mnyes pa'i mchod pa 'phul te slar rang gi sa bon a la 'dus pas/rdo rje chen po rtse lnga pa'i bdag nyid du gyur te/ slar yang rdo rje de nyid las gzugs kyi sku'i 'od zer gyi rang bzhin can snga ma bzhin du spros zhing 'dus pa las/ bcom ldan 'das dpal kun tu bzang po rdo rje sems dpa'i rang bzhin/phyag g.yas kyis rdo rje rtse lnga pa thugs kar bzung ba/ g.yon pas dril bu dku la bsten pa/ mtshan bzang po sum cu rtsa gnyis dang/ dpe byad bzang po brgyad cus rab tu brgyan cing 'od 'dom gang ba dang bcas pa/phyogs skyong ba brgyad kyi gzhal yas khang gi phyi rol du dad cing lhags te bskor bas mdun gyis bltas pa/ ting nge 'dzin ye shes kyi bde ba de'i bdag nyid la dmigs pa dang ma bral ba/thugs rje byams pa'i stobs mnyen zhing lcugs pa/ gzhan yang sku'i cha lugs tshul mdzes pa dgu dang bcas par bzhugs par gyur to// de nas bcom ldan 'das dpal kun tu bzang pos rigs kyi phung po lnga yongs su dag pa zhes bya ba'i ting nge 'dzin la snyoms par bzhugs te// nyid kyi thugs ka'i dbus kyi mdun las hUM mthing ga 'od zer kha dog sna tshogs pa dang bcas pa phyung ste/hUM mthing ga de las bcom ldan 'das nyid kyi thugs ka nas hUM oM swA hrI hA zhes 'od zer kha dog sna tshogs dang bcas pa byung ste// hUM mthing nag las bcom ldan 'das/ sogs kyang byung/ rdo rje sems dpa' sku mdog mthing ga rdo rje dang dril bu 'dzin par gyur nas 'jig rten gyi khams thams cad du song nas mdzad pa'i phrin las/sems can gyi rnam par shes pa'i phung po dag par mdzad nas slar 'dus nas/ dpal kun tu bzang po'i mdun du rang nyid ji lta ba'i yum dang lhan cig tu seng ge'i khri la 'khod do// de nas dpal kun tu bzang po'i dbus gtsug tor nas/ oM dkar po las rnam par snang mdzad sku mdog dkar po 'khor lo dang dril bu 'dzin pa phyung nas 'jig rten gyi khams thams cad du song nas/sems can gyi gzugs kyi phung po'i rang bzhin dag par byas nas tshur byon te/ shar gyi 'khor lo'i rtsibs la glang po che'i khri la rang nyid ji lta ba'i lha mo dang lhan cig tu 'khod do// de bzhin du dbu'i g.yas phyogs nas swA las rin chen 'byung ldan sku mdog ser po rin po che dang dril bu 'dzin pa phyung ste 'jig rten gyi khams thams cad du song nas sems can gyi tshor ba'i phung po sbyangs nas/lho'i 'khor lo'i rtsibs la rta'i khri steng du rang gis lha mo dang 'khod par gyur to// ltag pa'i phyogs nas hrIHdmar po las snang ba mtha' yas sku mdog dmar po pad+ma dang dril bu bsnams pa 'jig rten gyi khams su song nas/sems can gyi 'du shes kyi phung po dag par mdzad de/ nub phyogs kyi 'khor lo'i rtsibs steng du rma bya'i khri la rang gis lha mo dang 'khod par gyur to// g.yon gyi phyogs nas hA ljang gu las don yod grub pa sku mdog ljang gu ral gri dang dril bu 'dzin pa 'jig rten gyi khams su song nas/ sems can gyi 'du byed kyi phung po dag par mdzad de tshur byon nas/byang du 'khor lo'i rtsibs la mkha' lding gi khri steng du rang nyid lta bu'i lha mo dang lhan cig tu 'khod par gyur to// de nas dbyings kyi yum kun tu bzang mos 'di skad ces gsungs so// kun bzang yangs pa thugs kyi dkyil 'khor du// ye shes rol pa sgyu ma'i skur bstan pa/ 'dod chags zhe sdang gti mug nga rgyal dang// phrag dog ma spangs rgyal ba'i skur snang ba// gzugs tshor 'du shes 'du byed rnam shes rnams// rang dag rang gzhi mnyam pa chen po las// thabs dang shes rab dbyer med lhun gyis rdzogs// rgyal ba rigs lnga yab yum gnyis su med// ces gsungs so// zhi ba 'dus pa rtsa ba'i rgyud las rigs lnga rtsa ba'i dkyil 'khor bkod pa'i le'u ste gnyis pa'o//// de nas bcom ldan 'das dpal kun tu bzang pos thugs rje ye shes chen po'i stobs kyi rnam par 'phrul pa yul dang yul de'i bdag po yongs su dag pa zhes bya ba'i ting nge 'dzin la snyoms par zhugs nas de ma thag tu/spyan dang/ ljags dang/ snyan dang/ shangs dang/ sku dang/ thugs kyi 'od kyi dkyil 'khor las/ byang chub sems dpa' sa'i snying po mdog dkar po rin po che'i myu gu 'dzin pa phyung ste/'jig rten gyi khams thams cad du song ste/ mig gi rnam par shes pa dag par sbyangs te/ tshur byon nas steng gi phyogs su 'khod do// de bzhin du nam mkha'i snying po mdog ser po ral gri bsnams pa/byams pa dmar ser klu shing gun d+d+he bsnams pa/ spyan ras gzigs dbang dmar po pad+ma 'dzin pa/ phyag na rdo rje ljang gu dril bu bsnams pa// kun bzang dkar po rin po che'i snye ma 'dzin pa/ sgrib pa rnam sel ser po po ti bsnams pa/ 'jam dpal gzhon nu dmar gser po ti ut+pal 'dzin pa rnams phyung ste/ phyogs bcu'i 'jig rten gyi khams thams cad du song nas/sems can gyi rna ba'i rnam par shes pa dang/ sna dang/ lce dang/ lus dang/ yid kyi rnam par shes pa dag par sbyangs te/ tshur 'dus nas shar dang/ lho dang/ nub dang/ byang gi phyogs dang/shar lho dang/ lho nub dang/ nub byang dang/ byang shar gyi phyogs mtshams dag tu zla ba dang pad+ma'i steng du rang rang gi yum/ lha mo la s+ye dkar mo rgya gram 'dzin pa dang/ mA le sngon mo rin po che'i phreng ba 'dzin pa dang/gIr ti dmar mo pi wang gi rgyud 'dren par byed ma dang/ nIr ti ljang gu gar bsgyur ma dang/ bdug pa ma dkar mo spos sprin 'phro ba dang/ mdzes ma ser mo me tog 'thor ba dang/ gsal byed dmar mo mar me 'dzin pa dang/dag byed ma ljang gu byug pa byed pa ste/ de dag dang lhan cig tu 'khod do// de nas dpal kun tu bzang pos bdud thams cad mthar byed pa zhes bya ba'i ting nge 'dzin la snyoms par bzhugs nas/de ma thag tu nyid kyi sku'i mdun dang rgyab dang g.yas g.yon gyi phyogs nas/ dzaHhUM baM hoH/ zhes bya ba'i yi ge 'od zer dang bcas pa phyung bas khro bo chen po rnam par rgyal ba dang/ gshin rje'i gshed ces bya ba dang/ rta mgrin dbang phyug ces bya ba dang/ bdud rtsi thal sbyor zhes bya ba rnams sku mdog dkar po dang/ mthing ga dang/ dmar po dang/ ljang gu dag/ phyag gis be con lcags kyu dang thod dbyug zhags pa dang/pad+ma lcags sgrog dang/ rgya gram dril bu 'dzin pa dag byung ste/ phyogs bcu'i 'jig rten gyi khams thams cad du song nas/ sems can gyi khams thams cad kyi nyon mongs pa dang/ phung po dang/ lha dang/ 'chi bdag bdud kyi tshogs thams cad bcom nas slar byung ba gzhal yas khang gi sgo bzhi/ shar gyi sgo dang/ lho dang/ nub dang/ byang gis phyogs su pad+ma'i steng dang zla ba'i steng du 'khod par gyur to// de nas bcom ldan 'das kyi 'gro ba rnams zhi ba chen pos rab tu 'dul ba rdo rje zhes bya ba'i ting nge 'dzin la mnyam par bzhag nas/ de ma thag tu sku'i steng 'og g-i gnas dang phyag dang/ zhabs kyis mthil dag nas/ sprul pa'i dge sbyong chen po drug byung nas spro bar mdzad pa ni/ dkar po pi wang 'dzin pa dang/ sngon po go cha 'dzin pa dang// ser po gsil byed 'dzin pa dang/ mthing ga po ti 'dzin pa dang/ dmar po rin po che'i sgrom 'dzin pa dang/ nag po me dang chu'i rnam pa 'dzin pa dag/ phyogs bcu'i 'jig rten gyi khams thams cad du song nas/ rigs drug tu snang ba'i 'gro ba rnams rang rang gi sdug bsngal gyi dngos po thams cad sbyangs nas/slar rang gi gnas su phyogs drug gi gdan la 'khod par gyur to// de nas yum kun tu bzang mos 'di skad ces gsungs so// mnyam nyid mi g.yo mkha' ltar dag pa'i thugs// bsam 'das gnyis med thig le chen po las// rol pa'i cho 'phrul 'gro la rab bstan pa// sgyu ma'i phyag rgya ci yang sa ler ston// mig dang rna ba sna dang de bzhin lce// yid chos gzugs sgra dri ro reg dang chos// dbang po tshogs brgyad dngos yul ma lus pa// ma spangs rang dag ye nas lhun rdzogs pa// rgyal tshab sras po byang chub sems dpa'i sku// bde gshegs gnyes mdzad mchod sprin lha mor bcas// yab yum thabs dang shes rab snyoms 'jug pas// dgyes mdzad chags pas ye shes gnyis su med// gshin rje bgegs dang dag pa'i pad+ma dang// shes rab chen pos mthar thug sar phyin pa/khro chen rgyal po ye shes sgo bzhir gsal// 'gugs 'dren 'ching bsdoms rab tu 'gyes par mdzad// lha dang lha min mi dang dud 'gro dang// yi dwags dmyal tshogs 'jig rten ma lus pa// nges don dbyings su ye nas sangs rgyas kyang// thub mchog sprul sku dge sbyong bla na med// ces gsungs so// de ltar dpal kun tu bzang pos/ zhi ba chen po'i rol pas gzugs dang sgra'i chos thams cad snod dang bcud ye nas rnam par dag pa/phyogs bcu kun tu rgya yongs su ma chad pa'i dkyil 'khor rten dang brten par bcas pa/ dag pa'i rang bzhin du byin gyis brlabs pa thams cad rtsol med lhun gyis grub pa'i rang bzhin du sangs rgyas so// zhi ba 'dus pa rtsa ba'i rgyud las/ dkyil 'khor gyi 'khor lo yongs su bkod pa'i le'u ste gsum pa'o//// de nas bcom ldan 'das dpal kun tu bzang pos// de bzhin gshegs pa thams cad kyi ye shes la 'jug pa rdul dang bral ba zhes bya ba'i ting nge 'dzin la snyoms par bzhugs te/ snyoms par bzhugs ma thag tu/ yum kun tu bzang mos glu'i dbyangs kyis bcom ldan 'das la 'di skad ces gsol to// bcom ldan de bzhin gshegs kun gyi// ye shes gsal ba dri med pa// byang chub sems ni rin po che/ bla na med pa bshad du gsol// zhes gsol pa dang/ bcom ldan 'das dpal kun tu bzang pos chos thams cad gnyis su med pa rdo rje zhes bya ba'i ting nge 'dzin la snyoms par bzhugs nas/ byang chub kyi sems 'di gsungs so// e ma sems ni lus kyi rtsa ba ste// lus kyang sems kyi snang ba'o// sems kyang tshig tu mtshon pa ste// tshig ni sems kyi ngo bo nyid// e ma kun tu bzang po nyid// sku gsung thugs kyi rdo rje can// zhes bka' stsal to// de nas bcom ldan 'das rdo rje mi bskyod pas byang chub kyi sems 'di gsungs so// e ma dngos po 'di dag ma skyes te// chos can med cing chos nyid med// nam mkha' bzhin du dmigs med pa'i// byang chub sems 'di bstan pa yin// zhes gsungs so// de nas bcom ldan 'das rnam par snang mdzad kyi byang chub kyi sems 'di gsungs so// e ma chos rnams skye ba med pa ste// yi ge med cing gnas med la// rtogs pa'i drwa ba rab spangs pa// bskyed par bya ba'i don mchog yin// zhes gsungs so// de nas bcom ldan 'das rin chen 'byung ldan gyis byang chub kyi sems 'di gsungs so// e ma dngos po de dag dngos med de// chos kyi mtshan nyid spang ba yin// bdag med chos las legs byung ba'i// byang chub sems ni bstan pa yin// zhes gsungs so// de nas bcom ldan 'das tshe dpag med kyis byang chub kyi sems 'di gsungs so// e ma dngos po skye ba med pa las// dngos po med cing bsgom du med// nam mkha' go 'phang thob nas su// de ltar dngos rnams rab tu brjod// ces gsungs so// de nas bcom ldan 'das don yod grub pas byang chub kyi sems 'di gsungs so// e ma chos rnams rang bzhin 'od gsal ba// gdod nas dag cing rnyog pa med// sems can med cing srog kyang med// sangs rgyas med cing byang chub med// ces gsungs so// de nas sa'i snying po la sogs pa'i byang chub sems dpa' rnams kyis byang chub kyi sems 'di gsungs so// e ma khams dang rigs dang rnam par shes// dbang po yul gyi snang ba kun// ma bsgribs snang ba med pas na// mya ngan 'das pa'i sa la phyin// zhes gsungs so// de nas rigs drug 'dul ba'i sprul pa drug gi byang chub sems 'di gsungs so// e ma g.yo zhing rtsod dang 'gyur ba dang// 'dod dang rmongs pa sdug bsngal spyod// 'di dag rang gis ngo bos stong// brtag na myong ba ci yang med// ces gsungs so// de nas khro bo chen po bzhis byang chub kyi sems 'di gsungs so// e ma 'jig tshogs mthar 'dzin blta// log 'dren bdud kyi ming btags kyang// yul gsum mtshan ma ma dmigs pas// gcad bya gcod byed yongs ma grub// ces gsungs so// zhi ba 'dus pa rtsa ba'i rgyud las/ byang chub sems mnyam pa nyid du rdul dang bral ba zhes bya ba'i le'u ste bzhi pa'o//// de nas dpal kun tu bzang pos nyid kyi rnam par 'phrul pa rgya chen po rab tu bstan pas/ phyogs bcu na bzhugs pa'i byang chub sems dpa' thams cad kyi thugs rgyud bskul te rab tu g.yo bar 'gyur nas de bzhin gshegs pa kun tu bzang po gang na ba der gshegs nas/dkyil 'khor chen po mthar bzhugs pas nam mkha'i khams til gyi gang bu sa bon gy-is gang ba bzhin du gnas par gyur to// de ltar gyur ma thag tu bcom ldan 'das nyid kyi thugs gnyis su med pa'i ye shes kyi rnam par 'phrul pa las/ spobs pa dang 'dzin pa'i bdag nyid can gyi lag na rdo rje can zhig phyung zhing mdun du 'khod do// de nas bcom ldan 'das dpal kun tu bzang pos 'khor gyi dkyil 'khor gyi lag na rdo rje la gzigs te zhal 'dzum par mdzad do// 'dzum pa de mdzad ma thag tu lag na rdo rjes de nyid stan las langs te/ rdo rje gsor zhing bcom ldan 'das la bskor ba lan gsum mdzad nas/ 'di skad ces gsol to// bcom ldan 'das ji ltar de bzhin gshegs pa rnams rgyu ma 'chis par 'dzum pa mi mdzad na/bcom ldan 'das kyi dgongs pa gang gi slad du gzigs pa dang 'dzum par mdzad// de skad ces gsol pa dang/ bcom ldan 'das dpal kun tu bzang pos thugs rje chen pos rjes su gzigs pa rdo rje zhes bya ba'i ting nge 'dzin la snyoms par bzhugs ste// 'khor rnams la 'di skad ces bka' bstsal to// nyon cig 'dus pa'i 'khor tshogs kun// rdo rje snying po la sogs pa'i// the tshom kun nas bsal ba'i phyir// de ni nges par rabs bshad bya// nga ni che ba'i rgyal po ste// 'chad pa po'ang nga nyid yin// chos dang srid dang zhi ba kun// thams cad nga yi rang bzhin yin// de bzhin bcings dang grol ba dang// don dam kun rdzob snang dang mnyam// gzugs dang sgra dang mthong dang thos// mtha' dang mtha' min dbus kyang nga// ye shes thig le nga yin te// dkyil 'khor 'khor lo'ang nga nyid do// ji ltar nga yi dkyil 'khor ni// sprul dang bsgom dang bri ba dang// rin chen rnams kyi brtsig la sogs// de nyid du ni 'jug pa dang// dam tshig tshul bzhin nod pa dang// ting 'dzin bsgrubs la brtson pa dang// bskyod pa'i brtul zhugs bla med pas// mchog dang thun mong phun tshogs kyi// dngos grub chen po sgrub pa dag/ tshe 'di nyid la rnyed pa yi// skye bo snod dang ldan pa'i rigs// phyi ma'i dus na 'byung 'gyur ba// de dag mthong nas rab dga' ste// rgod dang blta dang 'dzum pas bzung// nga ni snying rje'i rang bzhin pas// skal bar ldan la dngos grub ster// dad mos ldan la 'bebs par byed// brtson par spyod dang lhan cig gnas// 'dus pa'i tshogs rnams ma lus pa// blau yi the tshom bsal gyis nyon// zhes bka' stsal to/ de nas de bzhin gshegs pa de dag byang chub sems dpa' de dag thams cad dang/gzhan yang 'khor 'dus pa de dag thams cad chos kyi gsung bdud brtsi lta bu nyan par 'dod pa dang/ byang chub sems dpa' lag na rdo rjes bcom ldan 'das la 'di skad ces gsol to// dpal chen kun bzang rdo rje 'chang// rigs kun bdag po rigs kyi gtso// nyid kyi dkyil 'khor che ba'i mchog/ rgyu 'bras dbyer med lhun rdzogs pa// sprul dang bsam dang bri ba dang// rin chen rnams las brtsigs pa ru// gnasad kyi khyad par gang dag tu// 'jug pa'i gang zag 'di lta bus// ci 'dra ba yi tshul gyis 'jug/ rten pa bzhengs pa ji ltar mdzad// der ni ting 'dzin ci zhig gis// 'jug pa'i rim par ji ltar 'tshal// dam tshig sdom pa ci zhig sbyin// nus par ldan cing phan pa gang// de yi bsnyen bsgrub ci ltar bgyi// dmigs shing bskyed pa gang zhig lags// gsang sngags de yi bzla thabs gang// rdzogs dang rab rdzogs ji lta bu// de dang mthun pa'i spyod pa gang// de dag 'bras bu ji tsam zhig/ ma 'ongs skyes bu 'dul don du// kun tu bzang pos bka' stsol cig/ ces gsol pa dang/bcom ldan 'das kyis bka' stsal pa// nyon cig sems dpa' rdo rje 'dzin// sgrub pa po phan bya ba'i phyir// ji ltar khyed kyis spobs pa bzhin// rim pa'i tshul gyis bshad par bya// ma rtogs pa dang log par rtogs// phyogs rtogs yang dag nyid ma rtogs// 'dul bar dgongs dang gsang ba dang// rang bzhin gsang ba'i don nyid ni// sgras btags yin no ming tshogs la// brten pa'i tshig gis rab mtshon te/ khong nas gab sbas don 'byin thabs// shes rab mig ldan rnams kyis bzung// snod ldan ngang tshul bzang la bsten// lus dang longs spyod gtong la sbyin/ zhes bka' stsal to// zhi ba 'dus pa rtsa ba'i rgyud las/ don rjes su bzung ba rab tu sbyor ba'i le'u ste lnga pa'o//// de nas bcom ldan 'das dpal kun tu bzang pos ye shes snang ba rgyan gyi 'khor lo zhes bya ba'i ting nge 'dzin la snyoms par bzhugs nas/ 'khor 'dus pa rnams la 'di skad bka' stsal to// e ma chos kyi don byung ba// ma 'ongs skye bo nyon mongs can// zag pa'i mdud pas dkris pa yis// sems can sdug bsngal bzod dka' bas// gdungs pa'i 'gro ba kun 'dul phyir// rdo rje can gyi dkyil 'khor mchog/ ma bcos dbyings su rdzogs pas na// rdo rje dbyings su rab tu brjod// 'di don bye brag bsam yas pas// rang bzhin snang dang byin gyis brlabs// yid las byung dang 'du byed dang// myur ba'i 'du byed las rnams te// gsang mchog lhun grub 'og min du// rang bzhin dkyil 'khor ngang gis gsal// nam mkha'i dbyings kyis dkyil 'khor du// byin gyis brlabs te sprul par bya// dur khrod chen po rab 'jigs shing// ma mo mkha' 'gro'i tshogs gnas shing// ri dwags gcan gzan rgyu ba dang// mi ro gsar rnying yod pa'i sar// rnal 'byor brtul zhugs 'dzin pa'i gnas// kang ka dur bya 'dab chags lding// rig 'dzin mkha' 'gro 'du ba'i gnas// de ni ting 'dzin dkyil 'khor bsgom// gtsug lag khang dang mchod rten nam// dben khang gsar rnying gang yang rung// yid du 'ong ba'i sa phyogs der// bris pa'i dkyil 'khor bstan par bya// nags tshal chen po'i phyogs dag gam// ri phug chu 'gram gling sogs gsar// me tog snam bu rab rgyas shing// bya skad sna tshogs sgra sgrog de// yid 'ong dga' ba'i gnas yin pas// rdul tshon lnga yis dkyil 'khor brtsegs// der ni slob ma bzang dge bar// dad ldan shes rab gsal ba dang// g.yo sgyu spangs shing gtong dang ldan// rang bzhin ngang bzang brtul phod la// brtson 'grus ldan zhing brtul phod pa// rgyal sras tshul du bzhugs par bya// rang bzhin sprul pa ting 'dzin dang// ras bris rdul tshon de bzhin du// lhun grub rig 'dzin sa la gnas// rtog pa'i gdeng can dad sems ldan// rim pa bzhin du bzhug bya ste// de las gzhan du don mi 'gyur// 'dren byed bla ma'i mtshan nyid ni// ye shes lha yi rjes bzung dang// bskyed rim ting 'dzin dmigs pa gsal// las kyi cho ga rnams la mkhas// bsam pa che dang ldan pa yis// dkyil 'khor chen por slob ma rnams// rim pa ji bzhin gzhug par bya// yid 'ong gnas su phyin nas ni// rdul tshon dkyil 'khor bzhengs pa la// thog mar sa phyogs brtag par bya// snang dang snang bar ma gyur pa'i// mi dang mi min 'byung po'i tshogs// yul dang sa yi bdag rnams la// sa rin gzhal zhing bslang bar bya// oM na maHsarba ta thA ga te b+h+yo bi shwa mu khe b+h+yaHsarba tad khaM ut+ga te s+pha ra Na i maM ga ga na khaM swA hA// oM AHhUM sarba ni ri ti swA hA// ma hA ba liM ta khA hi khA hi// oM AHhUM sarba b+hU ta bu ga big+h+nAM ma hA ba liM ta kha kha khA' hi khA hi/me tog la sogs kyis mchod cing// gtor ma rgya chen byin brlabs nas// brtan ma 'byung po bgegs kyi tshogs// ma lus pa ni mnyes par bya/ bden pas byin rlabs bkra shis brjod// de rjes sa rnams dag byas te// shing sogs rdo sogs bsal bya ste// tshad ldan stegs bu rab tu bstar// snying nyid snying pos byin gyis brlabs// ba yi lnga dang bdud rtsi lnga// rab tu sbyar bas chag chag gdab// rdo rje'i srad bu'i thig gdab ste// dang po nam mkhar dgongs thig gdab// de nas sa thig rim pa bzhin// dgu dgu'i bdag nyid bco brgyad du// cha yi rnam pa legs par bgo/khyad par dkyil 'khor thig gdab pa// phyi dang nang du dbye bar bya// rgyas dang bsdus dang shin tu bsdus// rang gi rigs kyi thig gdab bo// de nas rin chen sna tshogs lnga// bsreg sbyangs bkrus pa'i snying po yis// dag par byas te so sor yang// rig gi sa bon bkod pa las// so so'i rigs su bskyed par bya// ye shes bkug ste gnyis med mchog/ bstod nas rab tu dgyes par bya// sngon po ser dmar ljang gu nyid// shar lho nub byang rigs yin te// dbus ni shel gyi snying po'o// dkar sngo ser dmar ljang gu nyid// brtsigs pa lnga la go rim bzhin// kun gyi phyir ni mthing ga'o// dra ba phyed dang pha gu dang// dar bu khad dang bar 'khyams rnams// legs pa nyid du bskor bar bya// ka ba brgyad dang 'khor lo bcas// pho brang 'khor lo de bzhin te// rta babs dang ni twa ra na// chos kyi 'khor lo gdugs dang bcas// phyi rol rdo rje me 'od 'bar// 'jig rten pa yi 'khor yug ni// kun nas rab tu bskor ba bri// sku gsung thugs kyi mtshan ma dgod// lda ldi za ra tshags kyis brgyan// mtshon cha phur pa rnams kyang dgod// phyogs mtshams kun tu ngas bshad pa'i// rgyan mdzes rig pa rnams kyis brgyan// bla ma'i man ngag thob pa yis// blo dang ldan par nye bar bstan// zhes bka' stsal to// zhi ba 'dus pa rtsa ba'i rgyud las/gzugs brnyan gyi dkyil 'khor rab tu bshad pa'i le'u ste drug pa'o//// de nas bcom ldan 'das kyis 'gro ba thugs rje'i 'od zer gyis yongs su 'dzin pa'i ting nge 'dzin la snyoms par bzhugs nas/'di skad ces bka' stsal to// nyon cig 'dus pa'i 'khor tshogs rnams// rdo rje dbyings ky-i dkyil 'khor du// rnam par dag pa'i rim pa yis// slob ma bzhag pa'i cho ga bshad// 'jug pa yi ni sngon rol du// rdzas dang bdag po slob ma rnams// tshul bzhin du ni sta gon bya// maN+Dal byi dor byas pa la// dris byug mdzes pa'i mtshan ma dgod// stong dang snying rje rgyu smos nas// phyi yi 'byung ba rim bzhin bskyed// gzhal yas khang pa rdzogs par bsgom// gdan steng dkyil 'khor bdag po bskyed// dbyings nas spyan drangs dbyer med bstim// mchod pa'i tshogs kyis mnyes par bya// bsnyen cing bstod dang gsol ba gdab// dkyil 'khor ba dang dkyil 'khor bdag/ gzhan yang phyogs bcur bzhugs pa yis// sangs rgyas byang chub sems dpa' rnams// bdag la dgongs par mdzad du gsol// khyed rnams la ni mchod pa dang// slob ma kun las phan gdags phyir// bdag ming 'di zhes bya ba yis// sang ni dkyil 'khor bri lags kyis// gnas 'dir sangs rgyas kun bshegs te// byin gyis rlob cing dbang bskur mdzod// de nas rin chen las byung ba'i// bum pa mdzes pa dag byas nas// rin chen sman 'bru snying po dri// shis pa'i rdzas bris chu yis dgang// lha yi grangs dang mnyam par dgod// so so'i yum dang lha bskyed de// gnyis med spyan drangs 'dzab bsnyen 'bul// de dag 'od zhu bdud brtsir bsgyur// rgya chen bum pa dgang bar bya// dkyil 'khor chen por 'jug 'dod pa'i// slob ma'i tshogs rnams mdun du bzhugs// pus btsugs thal mo sbyar ba yis// bla ma che la gsol ba gdab// dpa' bo thugs rje ches gzigs nas// dang po skyabs mgon sbyin bya zhing// de nas sems skyed sdom pa dpog/ de nas theg mchog gsang sngags su// gzhug phyir sems rgyud sbyang bar bya// dang por phyag bya mchod pa dbul// bshags shing rjes su yi rang zhing// 'bras bu'i theg pa'i skyabs gsum blang// de nyid las ni sems bskyed bya// dge ba 'bras bu'i theg par bsngo// rdo rje yol ba'i nang du drang// dag byed shing la 'bru gsum gyis// byin gyis brlabs te dor byas nas// mthong ltas phyogs kyi phrin las brtag/ nyes par gyur na cho ga bskyar// de nas srung skud rang gi tshad// lha mos sngags kyis byin rlabs te// pho mo g.yas g.yon dpung par bcing// de yis bar chad bgegs rnams 'joms// dag byed rtswa yi chun po ni// bdud rtsi dri yi sngags bzlas pa// mthong phyir sngas dang gdan du sbyin// gnod pa zlog phyir skyor chu blud// sgra bsgrag rgyal mtshan ba dan 'phyar// gangs ri la sogs bstod nas phyin// rten bzang mthong zhing sems ma zhum// spro dga' dang bcas bzang zhing dge/ gzhan yang lus bkrus rgyun dbab dang// gru gzings la sogs lam bzang 'gro// bzhon pa bzang dang bar snang 'gro// 'od chen mthong dang rin chen rnyed// lung ston che ba brjod pa ni// dge ba'i rtags su ngas lung bstan// de las bzlog pa'i rtags rnams kun// ngan par bshad de gang mthong yang// tshogs bsags dag pa'i don la'ang// bskyar zhing lta ba'i cho ga bya// de ltar rab tu brtags nas ni// bla ma dpal chen nyid la bshad// de steng dge'o zhes smra na// rmi lam la brten dngos grub blang// mi dge'i smra la sbyin bsreg bya// gsang sngags cho ga rnams kyis bzlog/'di ni sta gon cho ga ste// kun tu bzang po nga yis bshad// de ltar slob ma rgyud sbyangs nas// dkyil 'khor chen por gzhugs pa'i phyir// bsod nams tshogs ni sngon 'gro bas// ting 'dzin rim pa rdzogs byas la// rdul mtshon dkyil 'khor dmigs pas bskyed// ye shes sems dpa' spyan drangs shing// gnyis med bstim zhing mchod pas mchod// bstod de so so'i sngags bzlas nas// slob ma'i mig la brda byas te// mchod bstod gsol bas rgyud sbyangs nas// sems bskyed rigs kyi sdom pa bzung// dam tshig bsgrags shing bro bor la// ye shes sems dpa' snying la dbab// oM AHhUM a we sha ya a a/dkyil 'khor chen po'i sgo bzhi nas// phyag rgya dang ni mchod bstod bya// de nas me tog phreng ba dag/ dkyil 'khor gyis ni dbus dag tu// gtso bo'i spyi bor rab tu gtor// de nyid blangs te mgo la bcings// gdong g.yog brda phyed dkyil 'khor bstan// zhes bka' stsal to// zhi ba 'dus pa rtsa ba'i rgyud las/ rdo rje'i dbyings kyi dkyil 'khor chen por slob ma 'jug pa'i cho ga bshad pa'i le'u ste bdun pa'o//// bcom ldan 'das rdo rje dam tshig chen po'i sdom pa rab tu 'byung ba zhes bya ba'i ting nge 'dzin la snyoms par bzhugs nas/ 'di skad ces bka' stsal to// nyon cig 'dus pa'i 'khor tshogs rnams// dkyil 'khor 'dir ni gang bzhugs pas// srung zhing sdom par bya ba dag/ spyi dang khyad par lhag pa yi// rnam par dbye bas bzung bya ste// so sor thar dang byang chub sems// bya spyod rnal 'byor rgyud rnams las// bsrung bar bya ba gang gsungs pa// thun mongs spyi yi dam tshig yin/ khyad par bye brag bsrung bya ba// rtsa bar gyur pa bzhi dag dang// yan lag nyi shu rtsa lnga ste// ji ltar smon dang 'jug pa yi// byang chub sems gsum bsgom pa yis// rdo rje thugs kyi dam tshig go// rang nyid yi dam lha tshogs kyi// sngags dang phyag rgya rab 'dzin pa// dus kun tu ni rgyun mi gcod// rdo rje gsung gi dam tshig yin// rgyud bkrol dbang bskur de nyid bstan// bla ma nyid dang lhan cig 'grogs// lus ngag yid kyi bskur ba ni// rdo rje sku yi dam tshig go// gzhan yang sku gsung thugs rnams kyi// bye brag phye ba gsang ba'i snod// blta zab spyod pa bslab pa dang// ming gzungs rtogs pa grub pa'i rtags// dus rnams kun tu gsang bar bya// bsgrub gnas rdzas dus grogs rnams ni/ khyad par de nyid dus su gsang// gzhan yang slob dpon mched dang lcam// gsang ba sgrags dang gnas skabs dang// de ltar 'os pa shin tu gsang// gsang bar bya ba 'di rnams kyang// sku gsung thugs kyi dam tshig go/ sbyor sgrol ma byin len pa dang// rdzun dang ngag brlang brjod pa rnams// thabs mchog nges pas zin pa yis// gnas skabs gsal bar shes par bya// 'dod chags zhe sdang gti mug dang// nga rgyal phrag dog nyon mongs lnga// rang bzhin shes pas mi spangs te// rang rig ye shes nyid yin no// dri chen dri chu sha chen po// pad+ma byang chub sems kyi chu// bdud brtsi dam tshig rdzas chen lnga// rdo rje 'dzin pas dag par blangs// sangs rgyas rdo rje sems dpa' dang// rin chen 'byung ldan 'od dpag med// don yod pa dang rnam snang rdzas// ye shes lha yi rang bzhin te// sku gsung thugs dang yon tan dang// phrin las lnga ru rab tu bsgrub// sa dang chu dang me dang rlung// nam mkha'i khams gzugs tshor ba dang// 'du shes 'du byed tshor ba dang// mig sogs 'dzin dang de yul lnga// rgyal ba yab yum byang chub sems// mchod pa'i lha yi tshogs su bsgrub// gzhung don lhag pa'i dam tshig ni// rab tu lhag par bsrung bar bya// gcan gzan rgyal po'i khri mi bshig/ za ma tog tu dug mi blug/ rin chen lcugs phran mi bsreg cing// zhun khol lta bu mi btung ste// pad+ma'i ze'u 'bru kha mi gsed// bug rdol snod du bcud mi blug/ don dang mi ldan rdzas mi ster// shel sgong 'dam du bsnur mi bya// ma dag snod du dag pa min// yid bzhin nor bu mi bsreg ste// khyung chen gshog pa'i ya mi dbral// gnam lcags ur mo'i mtshon mi gdab// gcan gzan dgod pa'i lhag mi spyad// rdo rje'i brag chen mi zhig cing// ra ba dra ba'i mtshams mi dral// sgron ma rlung gis bsad pa min// ye shes chu rgyun gcad pa spangs// bka' rtags phyag rgya mi 'phyi zhing// rdo rje pha lam mkhar mi bzlog/ gtsug gi nor bu sma mi dbab// 'di dag bsrung bar bya ba ste// lhag par gces pa'i tshig yin no// 'di dag legs par bsdam 'gyur na// skye ba 'dir yang nad med cing// tshe dang longs spyod 'phel ba dang// gsang sngags nus pa myur 'grub cing// dgongs pa zab mo rtogs pa dang// gsang ba chen po'i snod du 'gyur// 'jig rten 'jig rten 'das pa yi// dngos grub ma lus 'grub pa ste// bdud las rgyal zhing mngon 'tshang rgya// de bas rab tu 'bad pas bsrung// 'di ni gces par gzung bar bya// gal te dam tshig las 'das na// 'jig rten 'dir yang tshe thung zhing// nad dang sdug bsngal mang ba dang// 'khor dang longs spyod dang 'bral zhing/ yid la 'dod pa mi 'grub ste// brtsam pa phyin ci log tu 'gyur// gal te tshe yi dus byas nas// mnar med la sogs 'jigs rung ba'i// dmyal ba bshad par de 'gyur zhing// bskal pa bsam yas sdug bsngal myong// de bas rnal 'byor chen po rnams// 'di la mi myong mi bsam ste// nyams par nges pa'i rtags med na// rdo rje dmyal ba zhes bya ba// ngan 'gro ma lus ches lhag pa'i// sdug bsngal tshad bshad mi lang zhing// thar zhes bya ba srid ma yin// de phyir dad brtson skyes bu yis// bzlog pa'i gnyen po myur du bsten// de yis yon tan kun ldan nas// rdo rje 'chang ba nyid du 'gyur// zhes bka' stsal to// zhi ba 'dus pa rtsa ba'i rgyud las/ dam tshig dang sdom pa rab tu 'byung ba'i le'u ste brgyad pa'o//// de nas bcom ldan 'das kyis 'gro ba thams cad rnam par rgyal ba yongs su smin par byed pa zhes bya ba'i ting nge 'dzin la snyoms par bzhugs nas/ 'di skad ces bka' stsal to// nyon cig gzhan yang rab bshad pa// phyag rgya che ldan rnal 'byor pas// bskyed dang rdzogs dang chen po yi// lam la 'jug par 'dod pa la// rim pa dbang bskur sbyin par gsungs// rang gi de nyid dbab byas shing// bsrung bya khas len nus pa la// phyi nang gsang ba rgyal thabs kyi// dbang bskur dam pa bstsal bya ba// phrin las 'dod pa'i phyogs de ru/ khri stan bzang po bshams pa la// rdo rje slob dpon de bzhugs te// dbang stegs bzang la slob ma'o// dang po phyi yi bum pa yi// rdzas kyi dbang bskur bya ba ni// kha rgyan mgul mching bzung thag dang// spos sman 'bru dang rin po che// snying po rnams kyi rdzas kyi dbang// bkra shis rdzas dang yo byad bdun// dbu rgyan snying po phyag rgya dang// sku gsung thugs ni rgyan gyi dbang// rdo rje dril bu me tog dang// phreng ba go cha yo byad do// gdan khri gdugs dang rgyal mtshan dang// nyan cing 'bri dang bshad pa dang// sgrub pa bdag po'i dbang yin te// bsgrub bya chu yi rnam pa gnyis// ngo bo lhar bsgom gsal ba ste// gtso chen rigs lnga yum dang bcas// sems pa brgyad dang sems ma brgyad// sprul pa drug dang khro bo rnams// nang du dag pa'i gnas sbyar nas// phung po'i dkyil 'khor rdzogs pa'i dbang// lha rgyud brda thabs byin rlabs kyis// 'di las mi 'da' ngo sprod pa// lam dang cho ga'i khyad par ro// 'dod pa'i yon tan longs spyod dang// mthong thos tshor myong reg pa dag/ de yi rang bzhin longs spyod shes// rang gi gnas su grol ba dang// rigs kyi ngo bo dam tshig rdzas// sha lnga dri gsum khu ba gnyis// rang grol spang blang med pa dang// byang chub sems dpa'i sdom pa che// spyod pa nus pa dbang yin no// dbang po lnga yi mngon shes dang// mtshan rtags ye shes lnga yi dngos// dngos su grub pa nang gi dbang// 'di dag dbang po yul dang bcas// dmigs pa rdzas kyi gzugs brnyan bstan// che ba'i yon tan bstod tshig sgra// rna bar brjod pa thos pa'o// ming tshig rtog pa sna dang lce// yid kyis smon cing bsam pa la// gnang zhing nges pa thob pa yis// dngos por 'dzin pa'i dri ma gsal// phan nus byed pa dbang zhes bya// nang du bstan pa nyid yin no// thabs dang shes rab dbang gi dngos// don dam kun rdzob 'khor ba dang// mya ngan 'das sogs ltos pa'i chos// so sor 'dzin pa de bsal la// gnyis med ye shes rtogs bya'i phyir// rdo rje lus kyi nus pa'i chos// tshe gcig sbyor ba ston pa de// blo chung shes rab dman pa dang// skal med don la gsang bas na// phyir brjod bud med sgyu ma'i lus// sum cu rtsa gnyis yon tan ldan// khyad par rlung gis bskyod pa'i gnas// gsum dang gsum nyid steng dang 'og/ rtsa bar gyur pa yan lag rnams// stong phrag bdun cu rtsa gnyis kyang// lha dang byed pa por gnas pa'i// bskyed dang rdzogs pa rab sbyor ba// rim gyis 'dzin pa'i sngon 'gro dang// dngos su grub dang snyoms 'jug gis// bde zhing gsal bas mi rtog pa// rnam par shes tshogs rang bzhin gyis// 'od gsal ngang du gnas pa de// mthong zhes brjod med yul dang bral// rang las gzhan du ma yin pa// ltos 'gro'i gtsug nas nor bu de// blangs te mchod cing longs spyod na// phun sum tshogs pa 'grub par 'gyur// de ltar bstan pas byang chub che// bla na med pa rdzogs pa'i dbang// rang rig thabs kyi rgyal po yin// shes rab skad cig sbyor ba yis// kun la khyad par bkur bya ste// e ma rang byung bcom ldan 'das// kun tu bzang po chos kyi dbyings// ma skyes rgyu las ma 'gags rkyen// byang chub snying po bde ba che// rang gis rig cing rang gis mthong// rtogs shing thob pa 'di kho na// gzhan na yod cing tshol ba med// ma bsgrubs de nyid sar rdzogs pa'o// de ni 'bras bu rdzogs pa'i dbang// 'di ru ma rdzogs gang yang med// the tshom som nyis 'grub pa min// skad cig ma yi yul yin no// ma 'ongs dus kyi skyes bu dag/ ma 'khrul myur du rdzogs pa'i lam// 'di la sbyor ba gang yin pa// tshe 'dir bzang po mchog 'grub byed// ces gsungs so// zhi ba 'dus pa rtsa ba'i rgyud las/ lam yongs su nye bar smin pa'i le'u ste dgu pa'o//// de nas bcom ldan 'das kyis lha'i phyag rgya chen po mngon par rol pa yid kyi 'dzin phur dbyung ba zhes bya ba'i ting nge 'dzin la snyoms pa zhugs nas/'di skad ces bka' stsal to// nyon cig 'dus pa'i tshogs rnams kun// 'jig rten rtog blos bskyil ba yi// ma rig mun pa bsal ba yis// tha mal lus ngag yid gsum po// rgyal ba'i sku gsung thugs nyid du// rab tu mngon par rtogs bya'i phyir// grol byed rim pa rab tu bshad// nga yis sngon byung sprul pa yi// rim pa chen po de bzung nas// dben pa'i gnas su mkhas pa yis// phyag rgya yo byad bsam sbyor bas// dul bar spyod pa'i zhi gnas dang// rang rig rnal 'byor rab spangs te// byed pa'i rgyu ni mthing nag hUM// 'phro 'du rten gzhi dag pa yis// mchod bshags yi rang gsol btab pas// dag pa'i snod du bya ba dgrol// bsrung bya stong nyid snying po las// 'bar ba'i sa gzhi rab tu dbyung// nga rgyal chen po rab bskyed de// bar du gcod pa ngang gis gdul// e ma sangs rgyas chos kun gsang// ma byung ma skyes rnam dag dbyings// chos bdag med pa'i stong pa las// ma 'gags pa yi thugs rje che// dmigs pa gnyis med gnyis kyi bsgom// de yi brdal ba byung ba ni// skye med sa bon spyi gtsug tu// gsal 'tsher ldan pa'i 'od zer gyis// gnas gsum nges par sbyangs byas nas// phung po gsal ba nyid du gyur// 'phro 'du las kyi sbyor ba yis// las kun mdzad pa'i cho 'phrul gyis// rtog pa'i rlung dang chu rnams kun// mi shigs pa dang bdud rtsi'i rgya// brtan byed yid bzhin 'byung ba ni// sgrol ma mA ma kI dang spyan// rang gi mkha' dbyings rnam par dag/ de bzhin drod dang gos dkar mo// kun bzang dbyings su khyab byed bsgom// e kro d+hI shwa ri ma d+ha la hUM/ e yaM karma e d+ha trA rA yaM/ baM ma ma kI baM/ laM bud+d+ha tsak+Shu maM/raM sa na dza na si ta ta raM/ rin chen lnga yi ri rab ni// b+h+rUM gyi spro bsdu las byung ba'o// b+h+rUM b+hi sha b+hi shud+d+he hUM/ gzhal yas khang pa gru bzhi pa// dbus nas 'khor lo rtsibs bzhi la// mu khyud gru chad khyams dang bcas// sgo bzhi rta babs rgyan gyis mdzes// oM sarba tsakra badzra hUM/ de dag tshig 'dis bskul bar bya// hUM mkha' mnyam klong chen thig le'i ngang// byar med lhun rdzogs nyid kyi dbyings// brjod med spros bral yum gyi mkha'// smra bsam yul las 'das pa'o// oM ma hA su kha hUM hUM/ mu med brdal ba'i dbyings nyid las// snang med rig pa'i ngang gis gsal// tshon gang 'od las thig ler bskyil// nam mkha' las ni nam mkha' bsgom// tsit+ta s+pha ra Na phaT/ saM ha ra Na hUM/ skye shi med pa'i sems nyid 'di// chos rnams kun gyi rtsa ba yin// sems nyid yi ge'i rang bzhin la// yi ge mchog tu bsgom par bya// a k+Sha ra tsit+ta s+pha ra Na phaT/saM ha ra Na hUM/ hUM rgyu yi ting 'dzin shes rab las// hUM de nyid byang chub sems su gyur// 'byung ba yum lnga'i dkyil 'khor dag/ byang chub sems las rim bzhin byung// e las nam mkha' mtha' dbus med// yaM las rlung gi dkyil 'khor te// baM las chu yi rba klong dkyil// suM las gser gyi sa gzhir chags// laM las rin chen ri rab ste// raM las me 'od rab tu 'bar// e a b+h+rUM// b+h+rUM las rin chen gzhal yas khang// nam mkha'i dbyings dang rab mnyam pa// tshul bzhin byin gyis rlabs pa yis// gzhal yas gsal bar gyur par bsgom// saM siM ha/ ha ha sti ka aM a ra ga/ maM ma ra da nyi// g+haM g+ha ru tsa/ ye shes 'bar ba'i gzhal yas su// seng ge glang chen rta bya khyung// ma ma sUr+ya/ a a tsan+d+ra/ paM pad+ma/ raM rat+na/ nyi zla pad+ma rin po che/ gtso dang 'khor la rim bzhin gsal// badzra tsit+ta mo ha ra te dza/ hrIHs+pha ra Na phaT/saM ha ra Na hUM/ khams gsum ye shes sgron ma las// rin chen mdzod ni thig les brgyan// rgyal ba'i sku mchog don dam bde// snying po nyi ma yid bzhin sku// a we sha ya a a/ pra be sha ya ho ho/ rdo rje pad+ma gdan byas nas// mkha' dbyings nyi ma'i 'od ltar shar// byang chub sems mchog mdzes par gsal// yig 'bru mtshan ma rim par bsgom// hUM badzra d+h+r-ika mUM d+hA tI shwa ri/ b+h+rUM b+hi sha b+hi shud+d+hA+e/ hUM tiSh+Tha badzra/ pad+ma ma d+ha la AM/sUr+ya ma d+ha la oM/ sa ma ya hoH/ sa ma ya s+t+waM/ ra ho haM rA ga yA mi/ dzaHhUM baM hoH/ hrIHphaT/ oM lAM/ swA mAM/ A~M bAM/ hA tAM/ k+Shi hUM/ trAM trAM/ hri hri/ dziM aMH/ mai dzaH/ th+l+hiM hUM/ hUM baM/ mUM hoH/ kri truM sruM praM k+ShaM ye/ hU~M hU~M hU~M hU~M/dzaHhUM baM hoH/ oM dzi na dz-ika lAM d+he Sha ra ti/ swA rat+na d+h+r-ika/ mAMHmo ha ri ti/ aM A ro l-ika/ pAM rA ga ra ti/ hA pradz+nyA d+h+r-ika/ tA~M badzra ra ti/ k+ShiM hi rA dza ya/ hU~M lA s+ye/ tra~M a gar+b+ha ya/ tra~M mA le/ hrIHpad+ma bA da ma/ hrIHgIrti/ dz+hiM ku ru pA Na/ aM nirti rA ga yA mi/ mi tri d+ha ra Ni/ dza d+hU pe/ th+l+hiM nis+sa raM b+hA ya/ hUM puSh+pe/ hUM swa rA dzA ya/ baM dI pa/ mUM shrI AM rA ga ya/ ho gan+d+he/ mu ne kreM/ mu ne hUM drUM/ mu ne sruM/ mu ne praM/ mu ne k+ShaM/ mu ne ye/ oM ya mAn+ta kr-ita/pra dz+nyAn+ta kr-ita/ pad+mAn+ta kr-ita/ big+h+nan+ta kr-ita hUM phaT/ badzra aM ku sha dzaH/ pA sha hUM/ s+pho Ta baM/ g+haN+De hoH/ hrI s+pha ra na phaT/ saM ha ra na hUM/ phyag rgya'i dkyil 'khor rdzogs pa dang// dbang bskur byin rlabs tshul bzhin bya// phung po khams dang skye mched kun// ye nas rgyal ba'i dkyil 'khor snang// badzra sa ma ya dzaHhUM/ dmigs med mkha' ltar dag pa'i sku// ye shes dbyings nas gshegs su gsol// rang snang dbyer med dkyil 'khor lha// bdag la dgyes nas thim par bzhugs// dbyings kun rnam par dag pa las// sprul pa'i sku la phyag 'tshal lo// phyag rgya rgyal ba'i tshul bzhugs te// mnyam pa'i ngang du rtogs gyur na// thams cad byang chub mchog gi rgya// phyag rgya'i sku las 'da' ba med// phyogs bcu'i rgyal ba ma lus la// gar dbyangs mchog dang dam tshig rdzas// nam mkha' mdzod kyi ting nge 'dzin// rdzas mchog mi las 'das pa'i lha// rgyal po chen po longs spyod mchog/ phyag rgya bzhi dang nyon mongs lnga// gnyis su med dang 'chi ba med// 'dod pa'i yon tan bdag gis med// bsam sbyor dmigs pa las byung ba'i// longs spyod 'byor tshogs ji snyed kun// ma lus mnyes par bya phyir dbul// snyan pa'i tshig dang mthun pa'i don// che ba'i yon tan mtshon pa'i rtags// snyan pa'i sgra dbyangs rnams kyis bstod// nges par gsal bar gyur pa dang// gsungs dbyangs ngag gi 'phro 'du bya// de las gzhan pa bya 'dod na// gzugs brnyan dang ni dbyings kyi bdag/ gtsang ma'i gzugs brnyan gnyis pa ltar// gnas su gshegs sam rim gyis bsdu// gal te bcu dang gnyis dang gcig/ bsdus dang shin tu bsdus pa las// bskyed pa'i rim pa de bzhin bya// zhes gsungs so// zhi ba 'dus pa rtsa ba'i rgyud las/ bskyed pa'i rim pa rab tu bsdus pa'i le'u ste bcu pa'o//// de nas bcom ldan 'das gsung gi 'khor lo ma 'gags pa rnam par rol pa'i ting nge 'dzin la snyoms par bzhugs nas/ 'di skad ces bka' stsal to// sems can don kun sgrub byed pa// sngags kyi rgyal po gsang ba che// rang bzhin gdod nas lhun grub pas// dag pa'i gsang sngags rab tu bshad// hUM badzra tsit+ta hUM hUM/ a badzra sa man+ta b+ha drwa a a// oM badzra bai ro tsa na dzi na dz-ika/ oM badzra d+h+rika badzra sa twa hUM/ oM rat+na d+h+rika rat+na sam+b+ha ba trAM/ oM A ro l-ika a mi ta b+hA hrIH/ oM pradz+nyA d+h+r-ika a mo g+ha sid+d+hi a/ oM mUM d+hA tI shwa ri hUM/ oM lAM dwe Sha ra ti hUM/ oM mAM mo ha ra ti hUM/oM bAM rA ga ra ti hUM/ oM tAM badzra ra ti hUM/ rtsa ba'i rigs kyi snying po'o// oM k+ShiM hi rA dza hr-i da ya swA hA/ oM trAM a gar+b+hA ya swA hA/ oM hrIHtsak+Shu pad+ma pA da ma swA hA/ oM dziM ku ru pA Na hrIHswA hA/ oM mai tri d+ha ra Ni swA hA/ oM th+l+hiM nis+sa raM b+hA ya swA hA/oM b+ha dra b+ha dra sa man+ta swA hA/ oM many+dzu shrI aM rA gA ya swA hA/ hUM lA s+ye sa ma ya s+t+waM/ trAM mA le sa ma ya hoH/ hrIHgI ti rA gou0f85haM/ a nirt-i rA ga yA mi/ dzaHd+hu pe pra be sha phaT/ hAM puSh+pe A be sha ya a a/baM dI su gi rI yang pa a lo ke ba su ki n-i swA hA/ ho gan+d+he tsit+ta hoH/ oM mu ne kriM swA hA/ oM mu ne trUM swA hA/ oM mu ne sruM swA hA/ oM mu ne praM swA hA/ oM mu ne k+ShaM swA hA/ oM mu ne ye swA hA/ oM bi dza ya hUM phaT/ oM ya mAn+ta kr-ita hUM phaT/ oM pad+mAn+ta kr-ita hUM phaT/oM big+h+nAM ta kr-ita hUM phaT/ oM badzra ma hA kro d+hi shwa ri dzaH/ oM rat+na kro d+hI shwa rI hUM/ oM pad+ma kro d+hi shwa rI baM/ oM karma kro d+hI shwa rI hoH/ e h+ye hi b+ha ga wan ma hA kA ru Ni ka ma hA bud+d+ha pany+tsa bo d+h-i sa twa ma hA kro d+ha mu ne sa ma ya s+t+waM/A gats+tsha ya dzaHhUM baM hoH/ pad+ma maN+Da la hUM/ a ti pu hoH/ pra tIts+tsha hoH/ oM AHhUMM su ra ta pi pa ka ma la ha ra Na pra tIts+tsha ba liM ta pU dza hUM kha kha hUM/ sa ma ya shud+haHsid+d+hi sid+d+hi hUM/ rdo rje dam tshig chen po yi// gsang sngags las kyi de bzhin nyid// ma lus las kyi dngos grub ste// yang dag rdzogs pa'i gsang tshig go/ bdag nyid dam tshig rab gsal ba'i// snying po tshon gang de yi dbus// gsal ba'i dkyil 'khor phra mo'i 'od// rdo rje'i yi ge shin tu 'phra// oM b+ho d+hi tsit+ta ma hA su kha dz+nyA na d+ha tu aH/ zhes pas bskor bar bsam la bzlas// de nyid ye shes 'od zer ni// nyi ma'i dkyil 'khor gsal ba bzhin// phyogs bcu nam mkha'i mtha' khyab spros// yul gsum sgrib pa ma lus byang// thams cad ye shes spyod yul te// rig pa 'dzin pa rnams kyi don// nyan thos zhi 'gog sa las bgrol// myur 'gro thabs kyi don la btsud// byang chub sems dpa' chen po rnams// shes bya bag la nyal ba yi// sgrib pa ma lus rdo rje yi// sa bcu ting nge 'dzin gyis sbyangs// 'phags pa'i thugs dam dbyings nas bskul// bde gshegs mkha' 'gro tshogs bcas kyis// rigs kyi gtso bdag nyid du dgongs// 'od zer bcas pa slar 'dus pas// gnas dbus sa bon mchog la thim// brten pa de nyid la khyab pas// gnas gsum de nyid dag par bsgom// phyi rol bzlas pa'i sbyor ba'o// yab yum gsal ba'i skur bsgoms te// mkha' gsang byin rlabs sbyor ba'i tshul// bzlas pas shes rab sems dbus nas// de nyid thabs kyi gnas de ru// mthing nag yi ge 'bru tshad spros// dngos po sbyangs te badzra'i gzugs// rtse lnga'i dbus su gsal ba'i dkyil// oM zhes bya ba dkar po bsgom// thabs kyi dbus nas shes rab gsang// mkha' la til 'bru tsam du spros// sngar bzhin mdzad pa'i 'od gsal las// chu skyes ngos bzhi'i dbus dag tu// skye med byi ru'i mdog 'dra bsgom// dgug bzhug bcing dang dgyes pas bskor// rdo rje can gyi pho brang nas// de yi lam nas shu kra byung// shes rab klong du rab 'phros pas// sems ma'i sbubs nas thabs dkyil thim// 'od zhu ngag gi lam du bzhugs// rtsa chen gnyis nas de la thim// dgyes pa'i dus gcig brten par bsgom// pad+ma'i khu ba dmar la dngas// rgyu ba stobs bcas bsgrub gnas zhugs// nyi shu brgyad kyi lam la brgyud// sku yi gsang ba'i lung nas phyung// mkha' nas 'od dmar 'bab pa las// rdo rje'i sbubs nas rlung dang bcas// steng du drangs pas bdag po gyur// nA sA g.yas nas g.yon tu thim// shes rab dbyings ma rab tu gyur// sgra dang bcas pa'i hUM gis drangs// chos ma byang chub sems ldan pas// rlung nas rgyud pa de la gsal// dkar dmar 'od 'dres bde ba che// rnam par rtog med lhun gyis grub// 'di ni nang la dmigs pa'o/ skad cig ting 'dzin gsal bsgom pa'i// lus ngag yid kyi 'jug pa dang// sku gsung thugs su shes pa yi// gnyis med gsang ba shes par spyod// rang gi ngang gis grub pa ni// gsang ba rab tu sbyor ba'o// 'di ni sangs rgyas thams cad kyi// gsung gi sgra dbyangs rdzogs pa ste// gsang sngags dgongs pa'i gting phyung nas// rnal 'byor ngag gi che ba'o// zhes bka' stsal to// zhi ba 'dus pa rtsa ba'i rgyud las/ gsang sngags kyi de kho na nyid kyi rab tu sbyor ba bstan pa'i le'u ste bcu gcig pa'o//// de nas bcom ldan 'das dpal kun tu bzang po sems rnam par dag pa'i rang bzhin gyi 'od gsal ba'i ting nge 'dzin la snyoms par bzhugs nas/'di skad ces bka' stsal to// kye ma 'dus pa'i tshogs rnams kun// gsang sngags rol pa'i dkyil 'khor 'dir// phrin las mdzad pa sna tshogs pa'i// las kyi bye brag gsungs pa yang// 'jig rten 'das pa'i dngos grub ste// mya ngan 'das pa rtogs mi 'gyur// de bas de nyid rtogs bya'i phyir// sangs rgyas kun gyi gsang chen lam// rdzogs dang rdzogs pa chen por bshad// 'khor 'das dus gsum phyogs bcu yi// rdzas dang dngos po rnam pa dag/ rnam shes 'byung ba phung po dang// yul dang skye mched bsam pa ste// 'di dag rdzogs pa'i rang bzhin pas// phung po lnga ni yab lngar rdzogs// 'byung ba lnga nyid yum lngar rdzogs// rnam shes tshogs brgyad sems dpa' brgyad// yul brgyad sems ma brgyad du rdzogs// mu bzhi'i sgo bzhir gnas pa ste// rtsa ba'i nyon mongs thub pa drug/ yid kyi byed pa kun tu bzang// chos su bya ba kun bzang mo// ye nas mnyam du gnas pa la// phyi nas brtsal zhing bsgrub tu med// sngar bzhin dbyings su gshegs pas na// de bzhin gshegs pa zhes bya ba// ngo bo nyid kyi bde bas na// bde bar gshegs te rdzogs sangs rgyas// ma spangs pa nyid spangs pa ste// ma thob pas na thob pa'i mchog/ gtong ba dang ni mthu dang blos// theg pa gcig gi mthar thug par// go cha sbyor ba mchog ldan pas// sems dpa' chen po'i rang bzhin no// de yang snang ba nges med pas// sgyu ma lta bu'i lus zhes bya// rang bzhin lam dang 'bras bu dang// sems nyid chos nyid de nyid kyi// ngo bo rtogs pa'i dri ma dang// las kyi rnyog ma bral ba dag/ 'od gsal snang bar gyur pa'o// dbyings dang ye shes thabs shes rab// snang stong srid dang zhi ba dang// de la gnas dang lhag par mthong// mnyam par bzhag cing rjes kyi thob// rtog pa dang ni snol ba'i chos// ma lus gnyis med sbyor ba yi// mnyam nyid zung du 'jug par 'gyur// dbyer med de la gnas pas na// rdzogs pa'i rnal 'byor zhes su brjod/ rten pa'i gzhi ni gzhal yas khang// longs spyod mchod pa'i tshogs chen po// pha ma bu dang bu mo ni// yab yum sras dang sras mo ste// phyi nang 'khor ni nye du dang// bran 'bangs mngag gzhug la sogs yin// dang po nyid nas rdzogs pas na// chen po'i rdzogs pa zhes bya ste// snang ba sna tshogs sprul pa'i sku// rtog pa longs spyod rab rdzogs te// mi rtog ye shes chos skur rdzogs// 'di la ma rdzogs zhes brjod pa'i// skal med de dag 'khor bar ltung// de bas rdzogs pa'i tshul shes pas// rnal 'byor sems dpa' chen po ni// gnas gsum sbyor ba ci 'dra yang// ngo bo nyid kyis sku gsum rdzogs// ting 'dzin dmigs pa'i gdeng thob pas// de dag myur du mngon dbyung phyir// rig pa'i spyod pa mngon dbyung bya// sngon bzhin spyad par bya ba ste// dang por spyod pa'i rnal 'byor gyis// phal pa'i 'jig rten mi mthun phyogs// rang la gnod pa gzhan la spang// phan pa'ang de bzhin bsgrub par bya// sangs rgyas rnams ni phan gnod bral// ma rung bkren dang 'khrug pa dang// dbang dang bag med log lta can// chags dang zhen pa yongs mi 'dor// de nyid mchog tu gyur la spang// 'phags pa snying rje'i gnas min te// lam gyi grogs su ga la 'gyur// rlom sems khe grags phan yon dang// phrag dog can dang dbang med 'gyod// bsam pa'i dri mas 'bags pa min// gnas dang snang ba gnod pa'i yul// rang bzhin bsgrub pa myong ba'i rgyan// bzod cing ma chags gdon dang bcas// dka' ba spyod nus spyod pa'i grogs// dus 'dir ma rung ma phan cing// 'khrul pa'i gnas ngan yul yin no// thabs dang rnam 'phrul ma dag blta/ stong pa snying rje can sbyor zhing// rlabs chen 'jug pa pha rol 'das// kun rdzob bden pa'i dag pa'o// dus gsum don yod bcas pa dang// phra mo'i rnal 'byor yongs su rdzogs// 'tsho ba bdud rtsi bzhin du spyad// dran dang shes pa bag yod bsten// dge dang sdig pa'i byed pa bgrang// bsngo bya gcig las gzhan du min// sgyu ma sgra brnyan rmi lam bzhin// bdag dang dngos po sems can dag/ dbye ba med cing yongs ma grub// gus shing ma 'dres ltos pa med// nyon mongs med par spyad pa ni// thun mong chos su spyod pa'o// dman pa'i bden 'bras mi smon cing// gcig pur gzhi la mi gnas pa// yul gsum dag par sbyor ba ste// ma lus dbye ba med pa'o/ khyad par 'di yi spyod pa ni// dkyil 'khor gsum dang mchod pa lnga// 'dod pa'i yon tan ma lus pa// rtsa ba yan lag bcas pa dag/ rang gi de nyid yongs shes pas// rdzogs par longs spyod de nyid do// brtul bzhugs sna tshogs gang 'dzin pa'i// skyes bu dam pa'i rjes su zhugs// phyi dang nang gi gsang gyur dang// rab tu gsang ba'i dus dag tu// rang gi spyod pa yongs mi 'dor// mkhan po slob dpon lha rnams dang// nyan thos rang rgyal sems dpa' dang// 'jig rten phal par bcas pa dag/rang dang lhan cig tha dad min// gang dang gang gis dmigs pa de// mchog gyur sngags kyi spyod pa'o// de las rdzogs pa'i 'bras bu ni// gdod nas dag pa'i zhing khams la// dag dang ma dag gnyis med phyir// bral dang thob pa mi dmigs kyang// ming tshig tsam gyi 'bras bu ni// ma 'ongs skyes bu drang ba dang// lam don bsgrub phyir rab tu gnang// rang bzhin ting nge 'dzin dang ni// ngo bo nyid dang spyod pa'i tshogs// ye nas rnam par dag pa la// 'bras bu zhes su bshad pa ste// bsgrub cing rtsol ba ga la yod// mtshan nyid mtshan gzhi spros dang bral// mtshan dang dpe byad gzugs sna tshogs// tha dad mthong ba 'bras bu ste// grub pa'i dngos po yod ma myong// nam mkha'i dbyings kyi dkyil 'khor du// 'og min gsang ba'i pho brang snang// zhing gi bkod pa sna tshogs dag/ med pa nyid kyis phyogs bcur khyab// lnga dang brgyad dang drug sogs ky-i// rnam par phye dang myong ba dang// sna tshogs rigs kyi 'khor lo'i tshogs// rtogs pa rang byung ngo bo'i lus// skye 'gag rtag chad 'gro dang 'ong// yod med mtha' las rab 'das shing// gdod nas gnas dang sgom pa yis// zhing dang tshom bu 'khor lo dang// thabs dang shes rab gcig nyid kyis// brtags shing snang ba tsam du 'gyur// mchog gyur dman dang bar ma'i sku// sna tshogs las kyang sna tshogs te// rigs dang mthun pa'i bdag zhen pas// ches lhag yul du gyur pa yin/ gnas skabs mthar thug dus dang thabs// thun mong khyad par yongs su 'byung// ma lus pa dang ma nor ba'i// rang dang gzhan gyi snang ba yi// yod dang med pa'i mtha' 'dzin pa// shes dang mi shes rtog pa sangs// de la sgrib byed kho na'i dngos// sdig to las kyi dri ma dag/ rtsa ba yan lag bcas pa yi// las kyi mtha' yis de mi mthong// bslab cing bsdom pa bsrung las rnams// dman pa'i las la cher lhag pa// nyon mongs pa las rang dga' ba// thar med gnas kyi sgrib pa'o// ting nge 'dzin dang sprul pa dang// sdug bsngal byed pa tha dad dang// shes bya yul dang yul can dang// mthong dang bsgom dang rtog pa yis// gnyen po rim gyis stobs gyur pa// de nyid kyis kyang mthong mi nus// kun rdzob don dam rang bzhin shes// bde ba dang ni sdug bsngal gyi// ngo bo mngon du rgyu las min// bag la nyal gyi rnam pa yang// blta ba'i chos kyi de mi mthong// gzugs brnyan mthong dang ma bsam dang// mnyam nyid rab tu rtogs pa dag/bya ba rjes bsgrub sku gsung thugs// phrin las sngon 'gro rjes su byed// dus gsum kun tu ma chags shing// theg pa med la bstan du med// ma bsgrubs pa yis lhun gyis bsgrubs// ma bltas pa yis mthong ba ste// ma lus mkhas pas thob pa'o// shes dang shes bya skad cig ma// g.yos pa med par ngang gis gnas// ma bsags ma thob dman pa spangs// ma brtags ma shes mthar thug ste// 'du bral med pa 'bras bu min// zhes bka' stsal to// zhi ba 'dus pa rtsa ba'i rgyud las/ sku gsung thugs yongs su rdzogs pa'i bya ba 'bras bu mthar phyin pa'i le'u ste bcu gnyis pa'o//// bcom ldan 'das kyis 'di skad ces bka' stsal nas/nyid kyi sku gsung thugs yum dang bcas pa'i byin gyis rlabs kyis rnam par 'phrul pa'i dkyil 'khor chen po'i 'khor lo yongs su rdzogs pa de dag dang/ dus gsum du bzhugs pa'i sangs rgyas thams cad kyi lag na rdo rje 'chang ba sras kyi thu bo chen po dang bcas pa rnams rab tu dgyes shing yid rang bas 'od zer gyi rnam pa dpag tu med par gyur nas/yang khams gsum pa'i dngos po ma lus par sbyangs nas bcom ldan 'das kyi sku la thim par gyur to/bcom ldan 'das dpal kun tu bzang po nyid ni yum dang gnyis su med par slar yang chos nyid zhi ba'i klong rnam par dag pa'i dbyings de nyid du mnal te bzhugs nas/phyi ma'i 'gro ba'i don bsam gyis mi khyab pa dag la rang bzhin gyis dgongs nas mi 'da' ba nyid du mdzad do// zhi ba 'dus pa rtsa ba'i rgyud ces bya ba/ rdo rje dbyings kyi dkyil 'khor chen po'i dgongs pa rdzogs so//// rgya gar gyi mkhan po slob dpon chen po pad+ma 'byung gnas dang/ bod kyi lo ts+tsha ba bai ro tsa na bdag gis bsgyur zhing gtan la phab pa'o// rgyal po'i bla dpe'o/

CLOSE WINDOW