CLOSE WINDOW

Gpb017.010
བོད་ཡིག

/// u rgyan gsang ba brda'i skad du/ bod skad du/ bla ma'i gsang rgyud bka'i bang mdzod ces bya ba/byin rlabs thams cad 'dus pa'i bcom ldan 'das bla ma sku gsum gyi bdag nyid dpal he ru ka bde ba chen po la phyag 'tshal lo// kun 'dus rig pa chos kyi sku// yongs khyab gsal ba longs spyod rdzogs// sprul bsgyur ston mdzad sprul pa'i sku// yang dag nges don rdzogs pa'i dpal// rang snang rnam dag ye grol ba// bskyar gzhi bral ba'i sems nyid de// sangs rgyas ma yin sems can min// bcing grol kun la 'das pa ste// gtan la phab nas yang dag rtogs// gud du ma yin rang rtsal rdzogs// bdag lus rtsa yi ri bo la// bskyod pa rlung gis rab g.yos shing// khod snyoms ye shes thig le 'phro// rang bab gshis las ma g.yos ngang// nyam nga med pa'i ting 'dzin gyis// dam tshig ye shes gnyis mnyam bsre// smin par byed dang grol byed dang// bde stong yang dag skad cig rdzogs// 'khrul pa gzhi la yongs rdzogs pas// ye shes bla ma'i sa chen nyid// rtsol med skad cig nyid la gnon// de skad nga yi rang rig la// sprul pa'i 'khor la yang dang yang// sgrib pa med pa'i tshig gis bshad// rgyas pa'i don dang bsdus pa'i don// rnam par rab tu 'phros rnams la// 'di kun rang byung gzhi tshig go/ bla ma'i gsang rgyud bka'i bang mdzod las/ gleng gzhi'i le'u ste dang po'o//// 'dir bdag sprul pa'i 'khor rnams la// byin rlabs yongs su 'dus pa yi// dbang don yang dag bshad kyis nyon// dbang gis smin par ma byas na// grol bar byed pa'i zab lam chad// cho ga'i rgyal pos dbang bskur te// 'di ltar smin grol sa la gnas// de phyir dbang 'di sus bskur ba// mtshan nyid kun ldan bla mas bskur// rang rig rtogs pa'i gding la gnas// zhen pa'i ro la mngon ma chags// gzhan don thugs rje'i rtsal dang ldan// bskyed rdzogs brtan pa thob pas bskur// de bzhin gang la bskur ba'i yul// gsang sngags brda yi snod rung ba// blo yangs dad brtson dam tshig gnas// bla mas ji ltar bka' stsal pa// lus ngag yid rtsol ldan pas bsgrub// 'jig rten chos la yid mi 'jug/ gtong phod che zhing mched la brtsi// yid gnyis the tshom bral la bskur// nya stong tshes brgyad gza' skar bzang// phyi nang mthu rkyen 'dzom pa'i dus// bla ma dang ni slob ma gnyis// gcig yul gcig la 'dres dus der// smin byed dbang gi dus mchog go/ sa gtsang rab dben mkha' 'gro 'du// yid 'ong byin chags 'tshe dogs bral// lha 'dre mi gsum yongs kyis bsngags// mthun rkyen 'dzom pa'i gnas mchog tu// rtsal dang ldan pa'i bla ma yis// dkyil 'khor gsum la gnas pa'i ngang// legs par sa yi cho ga brtsam// 'byung po 'dul zhing byin chen dbab// de nas dkyil 'khor las la brtson// gtor mchod la sogs phyi nang dang// gsang ba'i rdzas dang dbang bskur rdzas// go rim ma log legs par bsham// thog mar dge ba sngon 'gro'i las// rnal 'byor lus dang ngag yid gsum// rang ngos bzung bas gtan la phab// gsang sngags spyod pa nges 'byung spyad// de nas bdag bskyed mdun bskyed la// dam tshig ye shes bsre bsnan zhing// bzlas pa'i rkang grangs rdzogs par 'bad// mchod pa sman rag gtor sogs 'bul// bar du dge ba'i dngos gzhi ni// bdag nyid 'jug pa'i dbang blang zhing// slob ma sta gon la gnas pas// dkyil 'khor 'jug pa'i cho ga 'bad// de nas bum par bcud dbab pa// spro bsdu'i dmigs pa ma yengs bya// lus ngag yid bde bsam gtan pas// rtags dang mtshan ma gtan la phab// dang po bum pa sbyin byas te// rig pa'i dbang lngas sgrib pa sbyang// lus nyid lha ru smin byas nas// rnam grol 'bras bu ye shes dbab// de nas gsang ba'i dkyil 'khor bstan// gsang mtshan rdo rje'i ming nas 'jug/ mtshan nyid ldan pa'i pho mo ni// bdun las mi mang don mthun gtad// gsang dbang mchog ni bskur ba ste// yab yum rdo rje pad+ma las// legs 'byung dngos grub mchog don ni// lce yi dbang pos blang bar bya// rdo rje 'bar ba'i dam tshig ni// bka' la mi 'da' thub par bsrung// ngag gi dbang po smin byas nas// longs spyod ye shes mchog la reg/ gsum pa shes rab ye shes kyi// bde stong smin byed dbang bskur bas// thabs dang shes rab sbyor ba yi// bcud kyi snying po don gyi mchog/ skal par ldan pa'i skyes bu gang// dga' ba bzhi yi ye shes kyis// bde stong zag med ting 'dzin 'phel// lam snang 'bras bu skad cig rdzogs// nyon mongs rnam grol snang ba yis// mngon sum rang rtsal dkyil 'khor rdzogs// sku dang gsung dang thugs dang yang// yon tan phrin las rtsal chen gyis// rtsa ba yan lag bcas pa yi// dam tshig nyid la gnas par bya// 'di don mchog gi sa la reg/bzhi pa snang srid gzhi bzhengs kyi// don dbang tshig gis brda sprod pas// lus ngag yid gsum gtan la dbab// 'khor 'das chos rnams ma lus pa// rang snang dkyil 'khor rang la rdzogs// spros bral chen po de bzhin gshegs// rgyal tshab dam par dbang bskur bas// gzhi rdzogs sems kyi dkyil 'khor la// byas dang byung ba med pa dang// snang dang mi snang med pa dang// thams cad gdal khyab lhun 'byam mo// de ltar sku gsum ye shes lnga// gzhi bral lhan cig snang ba ste// skal bar ldan pa'i lus ngag yid// rab tu smin cing ye shes pheb// bla ma lhar bcas dgyes pa yi// mchod gsol me tog maN+Dal 'bul// rin chen dbang gi mtha' rten du// 'khor lo rdo rje rin chen dang// pad+ma rgya gram la sogs sbyin// rang gzhan smin pa'i las la brtson// rdo rje rgyal por mnga' dbang bskur// grangs 'das bka' yi chos kyi sgo// de ltar smin par byas nas phyai// 'di kun gsang ba'i de don te// dam tshig chen po'i don la spyod// rang srog mig gi 'bras bu ltar// rab tu gces pas dam par bsrung// 'di ltar rgyal ba'i gdung rgyud 'dzin// skad cig rig 'dzin sa la reg/ tha mar dge ba rjes mchog ni// rdzogs pa'i ye shes rang snang ba// ye shes lha gshegs dam tshig bsdu// spros bral chen po'i ngang nyid nas// rdo rje'i glu blangs bde nyams skyong// dga' ston gtang rag rim gro 'bad// rdo rje slob dpon dgyes mchod bskang// dal bsdu dge ba'i shis pa brjod// yang dag snying po dbyings su bsngo// bla ma'i gsang rgyud bka'i bang mdzod las/smin byed dbang bskur bar bstan pa'i le'u ste gnyis pa'o//// bla med yang dag ston pa yis// nyid kyis sprul pa'i 'khor rnams la// lus ngag yid gsum grol byed pa'i// bskyed rim lha yi gnad gsungs pa// nyon cig snang can rig pa'i 'khor// snang ba 'khrid pa'i sna thag tu// 'khor ba ru log byed pa'i thabs// ye shes lha la rig pa gtad// lhun grub rang gsal 'od kyi sku// snang stong sgyu ma'i rang gzugs can// longs spyod rdzogs dang sprul pa'i sku// chos sku rol pa'i rtsal las snang// shar lho nub byang steng 'og phyogs// de bzhin mtshams la sogs pa dang// 'das dang ma 'ongs da ltar dang// dus gsum dus med dus kyi dbyings// phyi rol 'byung ba 'dus pa'i mkhar// rnam par snang ba'i gzugs brnyan rnams// rang snang rnam dag gzhal yas khang// sems can skye 'gror gyur pa yang// 'byung ba'i dngas ma 'dus pa yis// phung po la ni gzugs can dang// las kyi dbang btsan dkar nag chos// gzugs med yid kyi lus la sogs// bag chags rang snang bcas pa ste// dag pa rtsal gyi ye shes lha// ma dag sna tshogs las spyod pa'i// 'gro ba drug sogs yul can bzung// 'dzin pa'i rtod phur ma zhig bar// bag chags sna tshogs 'khrul pa'i lus// yid kyi dbang po'i spyod yul la// nang du 'byung ba'i rang rtsal las// bdag lus sgyu ma'i grong mkhar du// rnam par snang ba'i gdos pa can// rnam pa du ma'i gzugs su chags// rtsa dang rlung dang khams dang yang// rnam par rgyu dang mi rgyu ba// 'das dang ma 'ongs da ltar gyi// las 'bras byas byung byed pa'i mthus// dkar dang nag dang 'chol par yang// las kyi 'phro 'du byed pa ste// rang snang rnam par dag shes na// ye shes lha yi gzhal yas su// ngo bo stong pa chos kyi sku// rang bzhin rang gsal longs spyod rdzogs// thugs rje'i rtsal snang 'phro 'du ba// rang byung sprul pa'i skur grol bas// 'khrul snang rang dag lha yi sku// dkar ser dmar ljang la sogs pa// sku mdog sna tshogs 'od dang bcas// zer gyis 'gro ba 'dul ba'o// yongs khyab chen po'i lhar grub ste// de ltar ma rtogs 'khrul pa'i blo// gzung 'dzin rang snang 'khrul phyir brgyud// de dag 'khrul 'khor bshig bya'i phyir// dang po de bzhin nyid kyi ngang// kun tu snang ba'i ting 'dzin las// rgyu yi yi ge rnam par spros// de las bdag nyid dam tshig pa// mos bskyed sku mdog phyag mtshan bcas// che dang chung dang rang mtshams par// yid kyis rnam par sprul zhing bskyed// gdod nas dag pa ye shes sems// bkug bstim rnam par rol pas spyad// 'phro dang 'du ba'i rang bzhin gyis// gtad gzhag med par rnam par gnas// yang dag lha tshogs de bzhin gshegs// rim dang skad cig dran rdzogs su// tha ma rab kyi blo yis gsal// rang sngags mtshan bcas snying po dang// mtshan ma med pa'i rang sngags kyis// gnad la dbab pa'i mchu sbyor dang// 'byin 'jug gnas pa'i 'gro 'ong gis// rang snang gtso 'khor btson du bzung// dbyer med gcig tu gtan la dbab// nus pa'i rtsal chen sbar bar bya// gnam sa ri rab g.yo bar bya// rgya mtsho hub kyis gdab pa dang// nyi zla cha lang lta bur brdab// 'byung ba'i dkyil 'khor thams cad kyang// phyi nang gsang ba'i rim gyis dkrug/ phyi nang snang srid dbang du byas// 'jig rten 'das dang ma 'das pa'i// lha rnams rang dbang bran du bya// bdag dbang kho yis ma yin zhing// kho nyid bdag gi dbang du ste// cho 'phrul gar gyis gtan la phab// de ltar bskyed pa'i ye shes kyi// rang snang gnad la phab nas kyang// 'khrid pa'i sna thag la brten nas// 'khrul pa'i g.yul ngo rim gyis bzlog/ bag chags ri bo thabs kyis bsgyel// phrin las dmigs su ngang gis bsgyur// sna tshogs las la dbang byed pa// bdag nyid lha yi shugs ldan pas// gang yang thogs pa med 'grub 'gyur// gang la gang 'dul thabs ldan pas// de la der ston las la sbyar// rang gzhan rnam dag zhing la spyod// e ma 'di ni gsang chen gyi// gsang ba'i yang gsang rmad po che// gdul bya mos blo'i yul du snang// bla ma'i gsang rgyud bka'i bang mdzod las/ grol lam bskyed rim gyi le'u ste gsum pa'o//// yang ni ston mchog rgyal po yis// rang byung sprul pa'i 'khor rnams la// grol byed rdzogs rim 'di gsungs pa// nyon cig rang byung rang rtsal 'khor// snang zhing srid dang de las gzhan// dngos dang dngos min gnyis snang chos// gzugs dang ming gi mtha' can kun// la 'das chen po'i dbyings su thim// 'di kun blta ba'i rgyal po yin// gdod nas dag pa'i gding chen bca'// bcos bslad med par gtan la dbab// bcing grol med pa'i gnas lugs la// bcos bslad med par rang gzhag nas// g.yo 'gul med par gtan la phab// blang dor med pa'i ngang nyid la// rang bab lhug par bzhag pa yis// yengs 'khrul rkyen dang bral ba'i don// khor yug bar mtshams med par 'char// snang srid rol pa rang grol thob// 'di kun bsgom pa'i rgyal po yin// rang rtsal rig pa'i cho 'phrul kun// rang shar rang la grol ba'i gnad// g.yo 'gul 'pho 'gyur med par gzhag/ rang lugs bab la rtsal chen 'bar// bzang dang ngan dang dkar nag chos// gang yang blang dang dor med par// rang snang rang grol chen por bzhag/mnyam pa nyid las mnyam snang ba// byed pa med las thams cad byas// gang yang dgag dang bsgrub med par// bab la spyod pa'i rnam 'gyur can// 'di kun spyod pa'i rgyal po yin// kun gsal kun tu snang ba'i chos// bcos bslad med par rang gshis su// 'gyur ba med par ngang du phyam// lus ngag yid la rnam rol ba// sku gsum bslab pa nyid la gnas// phra mo'i las kun rnam par snang// rang byung gzhi las g.yos med par// lam gyi rtsal chen rab rdzogs par// phyi nang 'khrul pa'i blo zad de// rang byung bcud du rab smin pas// 'bras bu rtsol med gzhi la phebs// 'di kun 'bras bu'i rgyal po yin// re dogs med pa'i rtsal chen gyis// mtha' bral dbyings la kun spyod skyong// bya ba byas shing byed pa byas// bya rtsol snang ba'i chos la 'das// snang srid 'khor 'das ma lus pa// skad cig rang byung dbyings su rdzogs// de las snang stong ye shes kyi// rtsal chen 'bar ba sna tshogs kyi// nyid las rang byung snang ba ste// 'khor dang 'das pa'i spyi mes yin// de las rnam par rol pa yis// gzhi snang ye shes g.yos ma g.yos// byad dang me long rten 'brel yin// rgyu dang rkyen las ma g.yos pa'o// g.yo ba med las g.yos pa dang// med las nga yir 'dzin snang ba// lugs 'byung dang ni lugs bzlog ste// mdung khyim bar snang 'ja' ris bzhin// cho 'phrul rnam par de 'phrul pas// la la 'khor lo'i rtsibs la bskyon// ma rig la sogs 'thibs pos non// la la ye shes rang rtsal rdzogs// mkhyen dang brtse ba'i bdag nyid can// la la gzhi las g.yos med par// bzang dang ngan sogs rtsal ma 'phros// bag la nyal du gnas pa'o// de dang de yi gnas dpyad de// skye 'bri la sogs yang dag shes// dgongs dang yang dag dgongs pa dang// gnyen dang ldem dang drang po dang// dgongs pa'i cho 'phrul yang dag las// 'du dang 'phro ba'i chos rnams kyi// gtang gzhag med la de bzhin spyod// bla ma'i gsang rgyud bka'i bang mdzod las/grol lam rdzogs rim gyi le'u ste bzhi pa'o//// yang gsang zung 'jug ston pa yis// zung du 'jug pa'i chos rnams kun// zung du 'jug pa'i 'khor rnams la// zung du 'jug phyir yang dag bstan// 'khor dang 'das pa'i chos rnams kun// spyi dang bye brag khyad par yang// zung du 'jug pa chen po ste// snang ba ma 'gags bskyed pa dang// stong pa mtha' bral rdzogs pa yang// gnyis med chen por zung du 'jug/ma byas rang byung chos rnams dang// rtsol byas byung ba'i chos rnams kyang// 'gag med zung du 'jug pa'o// rgyu las byung ba'i chos rnams dang// rkyen gyis bsgyur ba'i chos rnams kyang// gnyis med zung du 'jug pa ste// mdor na gnyis dang gnyis chos kun// gnyis med spros bral zung 'jug chos// de phyir bde dang stong pa'i chos// zag med klong du zung chud pas// thabs kyi dpa' bo stobs ldan dang// shes rab dpa' mo stobs bral ba// lhan cig gnas pa'i cho 'phrul gyis// snang stong ye shes nyid snang ba// 'khrul 'khor ba yi rnam 'phrul gyis// 'khor 'das yongs grub ye rdzogs dpal// rnal 'byor rgyal po rnams kyis blta/ khyim gyi dkyil 'khor chen po la// yid bzhin nor mchog rab snang ba// rgyu byed bdag po'i cho 'phrul dang// 'gro dang 'ong dang gnas pa'i stobs// nyi ma zla ba sgra gcan 'dzin// gling bu'i sgra las drangs nas ni// steng dang 'og tu rnam par bcing// 'phro ba dgag cing gnas pa spyod// rnam par rgyu dang rgyu ba ni// dgag dang mi dgag blang dor med// de dag yid kyi skyes bus bsad// nyi ma dag tu yang dag ldan// zla ba dag tu yang dag snang// zla ba dbyings su bskyod de bcing// nyi ma 'og tu gnas pa spar// 'bar dang 'dzag pa'i cho 'phrul kun// srog gi gnas su yang dag sba// kun lam rtsal gyi 'phro ba ni// bskyed pa'i cha dang yang dag ldan// 'du bar byed pa rdzogs pa'i don// mnyam gnas zung du 'jug pa ste// gzhi las 'phags shing lam du gnas// 'bras bu dbyings su phyin pa yi// zil zer bas kyang pa char gyi rgyun 'babs pas// dbang dang dbang yul yongs la khyab// dbang la khyab pas rnam par gsal// dbang yul la khyab cho 'phrul snang// de kun sgyu ma'i zhing khams te// dag pa gsum gyi rtsal 'phar bas// ma dag cho 'phrul thabs kyis gnon// rang las shar ba'i rang rtsal gyis// rang byung chen po'i dkyil 'khor bkra// rgyu las byung ba'i dngos po ni// ye shes rol pa'i rtsal chen 'bar// 'od kyis snang mun ma lus pa// bsal nas rnam par rab tu bkra// mtha' yas gdal ba'i rtsal las kyang// glang chen stobs la seng+ge'i rtsal// nya ltar 'phyo dang glog ltar 'khyug/ gnam lcags thog chen 'bar ba'i shugs// lo brgyad byis pa'i ngang tshul can// phyi nang gsang ba'i de nyid shes// srid pa tha ma'i lus gyur pas// thun mong mthong snang sna tshogs snang/ khyad par ye shes mig can la// rnam par bkra ba'i gzugs snang ba// mtshan dang dpe byad yang dag ldan// sku gsum nyid las ma g.yos pas// zung 'jug rtsal du shar ba'o// g.yo dang 'gul dang ldeg pa dang// 'od kyi dra bas khengs pa dang// lha dang mi dang lha ma yin// dri zar bcas pa thams cad kyang// dga' zhing mgu nas mngon par bstod// bla ma'i gsang rgyud bka'i bang mdzod las/ grol lam bskyed rdzogs zung 'jug gi rim pa'i le'u ste lnga pa'o//// rdo rje'i sku la pad+ma'i ljags// rnam grol de bzhin yang dag thugs// rtsol med rang byung bcom ldan 'das// thogs med rgyal po 'od mi 'gyur// smin grol zab mo'i chos rnams ni// snang ba'i 'khor la char du phab// phyir mi ldog pa'i 'bras bu smin// rtsal chen lam gyi lo 'dab rgyas// dpag chen bzhin du mkha' la spyod// e ma ngo mtshar rmad byung ba// sku gsung thugs la mngon par bstod// bla ma'i gsang rgyud bka'i bang mdzod las/ rjes su yi rang zhing mngon par bstod pa'i le'u ste drug pa'o//// byin rlabs rang byung du bstan pa bla ma'i gsang rgyud bka'i bang mdzod ces bya ba rdzogs so//// sa ma ya/ rgya rgya rgya/ sbas rgya/ gtad rgya/ gter rgya/ kha tham/ d+ha thim/ rgya rgya rgya/ o rgyan gsung sras sprul sku sangs rgyas gling pas snga dkar dung gi sgo mo nas bton pa shu b+haM//// u rgyan gsang ba brda'i skad du/

CLOSE WINDOW