CLOSE WINDOW

Gpb011.012
བོད་ཡིག

/// / rgya gar skad du/ ma hA kA ru NA ba liSh+tsa mAM sa rak+tA s+thi ma hA ba listan+t+ra/ bod skad du/ thugs rje chen po'i gtor ma dang/ sha khrag rus pa'i gtor rgyud chen po/ bcom ldan 'das dpal kun tu bzang po bla na med pa'i he ru ka la phyag 'tshal lo// 'di skad bdag gis shes nas bshad pa'i dus gcig na/ bcom ldan 'das dpal kun tu bzang po rang rig pa'i klong na bzhugs pa la/de nyid kyi khyad par las/ de nyid dang gnyis su med pa'i yum des 'di skad bskul lo// ak+sha ho/ dang po skye med chos rnams yum gyi ngang// ma byung ma skyes sems nyid skye ba med// skye ba med pa'i sems nyid dag pa las// 'khor ba ngan song ye nas med pa la// brtags pas 'khrul pa'i rdzas su snang ba kun// thugs rje chen pos sbyang ba'i dus la bab// ngo mtshar che ba'i lha la phyag 'tshal bstod// ces gleng bslangs pa dang/yab kyis yum la 'di skad ces bka' stsal to// ak+sha ho/ ma bcos yongs kyis dag pa'i zhing khams su// thams cad gnyis med rgyal ba'i sangs rgyas bzhugs// de tshe log rtog mtshan ma ming yang med// stong pa nyid las stong pa'i rang bzhin gnas// stong nyid brtags pas stong nyid rang bzhin bde// mi skye'i chos las chos rnams thams cad 'byung// chos nyid longs spyod rgyan du gcig par byos// zhes ched du brjod do// de nas sus kyang ma brjod pa'i rang sgra tsam nyid las/ hUM oM swA AM hA lnga las/ rnam par shes pa'i tshogs kyis bsdus pa thams cad rdo rje'i rigs kyi gtor mar gyur to// gzugs kyi phung pos bsdus pa thams cad de bzhin gshegs pa'i rigs kyi gtor mar gyur to// tshor bar snang ba thams cad rin po che rigs kyi gtor mar gyur to// 'du shes kyis bsdus pa thams cad pad+ma'i rigs kyi gtor mar gyur to// 'du byed kyis bsdus pa thams cad las kyi rigs kyi gtor mar gyur to// de yang gang zhe na/ rnam par shes pa'i tshogs brgyad de/ mig gi rnam par shes pa ni/ sdug cing mdzes pas gzugs sdug pa dang/mi sdug pa dang/ gnyis ka ma yin pa dang/ dkar ba dang/ dmar ba dang/ ser ba dang/ ljang ba la sogs te/ me tog sna tshogs pa'i gtor mar sprul te/ des kyang don bya ba dang/ mchod pa dang/ thugs dam bskul ba dang/ tshim pa dang dngos grub stsol ba la sogs pa'i rgyu dang rkyen du gyur te/ des kyang chos nyid la chos nyid rol pa dang/ gnyis su med pa dang/ gdod nas dag pa dang/ sangs rgyas shing gtor mar gyur to// de yang byams shing thugs rje che la yongs la khyab pas gtor mar gyur to// sna'i rnam par shes pa ni/ tshims par byed pas dri zhim pa dang/ mi zhim pa dang/ gnyis ka ma yin pa dang/ spos dang/ bdug pa dang/ sman gyi dri dang/ zhal zas kyi dri la sogs pa spos sna tshogs kyi gtor mar sprul te/ des kyang don bya ba dang/ mchod pa dang/ thugs dam bskul ba dang/ sgrib pa sbyong ba dang/ dngos grub stsol ba la sogs pa'i rgyu dang rkyen du gyur te/ des kyang chos nyid la chos nyid rol pa dang/ ye shes la ye shes rol pa dang/ gnyis su med pa dang/ gdod nas dag pa dang/ rdzas su snang ba ste/ thams cad du sangs rgyas shing gtor mar gyur to// des kyang byams shing thugs rje chen pos yongs la khyab pas gtor mar gyur to// lce'i rnam par shes pa ni/ myong bar byed pas ro bro ba dang/mi bro ba dang/ gnyis ka ma yin pa dang/ kha ba dang/ mngar ba dang/ skyur ba dang/ rtsub pa dang/ lan tshwa'i ro la sogs pa bshos sna tshogs kyi gtor mar sprul te/ des kyang don bya ba dang/ mchod pa dang/tshim pa dang/ thugs dam bskul ba dang/ sgrib pa sbyong ba dang/ dngos grub stsol ba la sogs pa'i rgyu dang rkyen du gyur te/ des kyang chos nyid la chos nyid rol pa dang/ ye shes la ye shes rol pa dang/ gnyis su med pa dang/ gdod nas dag pa dang/ rdzas su snang ba dang/ 'bras bu thob par byas te/ thams cad sangs rgyas shing gtor mar gyur to// des kyang byams shing thugs rje che la yongs la khyab pas gtor mar gyur to// lus kyi rnam par shes pa ni/ reg par byed pas/ 'jam pa dang/ rtsub pa dang/ gnyis ka ma yin pa dang/ lha dang mi'i gos la sogs pa sna tshogs kyi gtor mar sprul te/ des kyang don bya ba dang/mchod pa dang/ tshim pa dang/ thugs dam skul ba dang/ sgrib pa sbyong ba dang/ dngos grub stsol pa la sogs pa'i rgyu dang rkyen du gyur te/ des kyang don gong ma bzhin du gyur to// rna ba'i rnam par shes pa ni/thos par byed pas/ sgra snyan pa dang/ mi snyan pa dang/ gnyis ka ma yin pa dang/ ci ltar lha dang mi'i sgra dang/ rol mo dang/ 'byung ba chen po las gyur pa thams cad dang/ sgra sna tshogs kyi gtor mar sprul te/des kyang don gong ma bzhin du gyur to// kun gzhi rnam par shes pas las sogs par byed pas/ bag chags bzang po dang/ ngan pa dang/ gnyis ka ma yin pa dang/ rjes su rgyu ba dang/ dran pa dang/ rtsol ba dang/shes rab rno ba la sogs pa snang ba sna tshogs kyi gtor mar sprul te/ des kyang don bya ba la sogs pa gong ma bzhin no// nyon mongs pa can gyi yid kyi rnam par shes pa ni/ rjes su rgyu bar byed pas/ tshor ba dang/ snang ba dang/ thos pa dang/ gnas pa la sogs pa snang ba yongs su snang ba'i gtor mar sprul te/ des kyang don byas ba la sogs pa gong ma bzhin no// yid kyi rnam par shes pa ni/ gsal bar gcod pas/ lha dang mi'i gzugs la sogs pa dang/ tshig dang sgra'i don thams cad shes pa dang/ 'dzin pa dang/ mi brjed pa dang/ snod du gyur pa la sogs pa yongs su snang ba'i gtor mar sprul te/des kyang don du bya ba dang/ mchod pa dang/ tshim pa dang/ thugs dam bskul ba dang/ sgrib pa sbyong ba dang/ dngos grub stsol ba la sogs pa'i rgyu dang rkyen du gyur te/ des kyang don bya ba dang/ chos nyid la chos nyid rol pa dang/ ye shes la ye shes rol pa dang/ gnyis su med pa dang/ gdod nas dag pa dang/ rdzas su snang ba dang/ 'bras bu thob par byed ste/ thams cad yongs su rgyas shing gtor mar gyur te/ des kyang byams shing thugs rje chen po yongs la khyab pas gtor mar gyur to// de la gzugs kyis bsdus pa ni gang zhe na/ rgyu'i gzugs bzhi dang/ 'bras bu'i gzugs bcu gcig dang/ lha dang mi'i gzugs la sogs pa sna tshogs te/rgyu'i gzugs bzhi ni/ 'byung ba chen po bzhi nam mkha' spyir btang ba dang lnga ste/ nam mkha' ni shong yangs che ba dang/ steng 'og med par gdal ba dang/ mtha' dbus med par khyab pa dang/phyogs ris med par khyab pa dang/ thugs pa med par dpal gyi gtor mar gyur to// des kyang byams pa la sogs pa gong ma bzhin no// sa ni sa'i rang bzhin sra ba dang/ rgya che ba dang/ grangs mang ba dang/skye ba smin par byed pa dang/ kha dog gsal ba dang/ ri rab dang gling du ldan pa'i gtor mar gyur te/ des kyang don bya ba la sogs pa gong ma bzhin no// chu ni gsher ba dang/ rlan pa dang/ sdud par byed pa dang/gting zab pa dang/ 'bab pa dang/ rgya mtsho dang/ gting dpag yangs pa'i gtor mar gyur te/ des kyang don bya ba la sogs pa gong ma bzhin no// me ni dro ba dang/ tsha ba dang/ gsal ba dang/mched pa dang/ sreg pa dang/ dro zhing shar ba'i gtor mar gyur te/ des kyang don bya ba la sogs pa gong ma bzhin no// rlung ni bskyod pa dang/ yang ba dang/ 'degs pa dang/ bsil ba dang/ 'byed pa dang/khyab pa dang/ 'thor ba'i gtor mar gyur te/ des kyang don bya ba la sogs pa gong ma bzhin no// des bskyed pa'i 'bras bu'i gzugs ni/ yul lnga dbang po lnga dang/ rnam par rig pa ma yin pa la sogs pa thams cad gsal ba dang/snang ba dang/ ldan pa dang/ brtan pa dang/ dngos su snang ba'i gtor mar gyur te/ des kyang don bya ba la sogs pa gong ma bzhin no// tshor bas bsdus pa gang zhe na/ bde ba dang/ sdug bsngal ba dang/ gnyis ka ma yin pa ste/ de dag kyang rgyu 'bras khyad par gyi gtor mar gyur te/ des kyang don bya ba la sogs pa gong ma bzhin no// 'du shes kyis bsdus pa gang zhe na/ rgya che ba dang/chung ngu dang/ tshad med pa ste/ de dag kyang kun la khyab pa'i gtor mar gyur te/ des kyang don bya ba la sogs pa gong ma bzhin no// 'du byed kyis bsdus pa gang zhe na/ lnga bcu rtsa gcig ste/ de dag kyang khams gsum khyab pa'i gtor mar gyur to/des kyang don bya ba dang/ mchod pa dang/ tshim pa dang/ thugs dam skul ba dang/ sgrib pa sbyong ba dang/ dngos grub stsol ba la sogs pa'i rgyu dang rkyen du gyur te// des kyang chos nyid la chos nyid rol pa dang/ ye shes la ye shes rol pa dang/ gnyis su med pa dang/ gdod nas dag pa dang/ rdzas su snang ba dang/ 'bras bu thob par byed de/ thams cad du sangs rgyas shing gtor mar gyur to// de yang byams shing thugs rje che la/ yongs la khyab pa'i gtor ma'o// de nas chos nyid skye ba med pa'i klong ye nas gdal ba la/ rang rig ye shes rgyal po'i sku mngon du phyung bas gtor ma'o// rang rig pa'i rgyal po shar bas ma skyes pa'i yul gdal bas gtor ma'o// yab yum gnyis su med pas gleng bslangs pas/ rigs lnga'i sangs rgyas ma skyes rdzogs pa'i tshul du byung bas gtor ma'o// rdzas kyis kun la khyab pas gtor ma'o// mtha' la thug pa med pas gtor ma'o// dbyings las bri ba med pas gtor ma'o// de tsam na yod par 'dzin pa rdzas kyi gtor mar byung ste/ de yang 'di lnga ste/ gnas shing brtan pa'i dus na rtsa ba'i gtor ma ste/ rtsa ba'i bye brag rnam pa sna tshogs kyi gtor ma grangs kyis mi langs pa/ brjod kyis mi langs pa/ rtsa ba'i gtor ma sna tshogs pas stong gsum gyi stong chen po sangs rgyas kyi dgongs pa gang zhing rgyas par 'gyur ro/sgog pa dang sngo sman 'byung zhing skye ba'i dus na lo ma'i gtor ma ste/ rtsi shing nags tshal la sogs pa// myang ba'i gtor ma rnam pa sna tshogs pa yang/ de bzhin du gang zhing rgyas pa'i gtor mar gyur to// gsal zhing sdug pa'i dus na me tog gi gtor ma rnam pa sna tshogs pa/ pad+ma dang ut+pal la sogs pa blta ba'i gtor ma la sogs rnam pa sna tshogs pa yang de bzhin du gyur te/smin cing grub pa'i dus na 'bras bu'i gtor ma rnam pa sna tshogs pa sman dang/ gel pa dang/ 'bru la sogs pa bza' ba'i gtor ma rnam pa sna tshogs pa de yang de bzhin du gyur to// de tsam na med par 'dzin pa rnams la chos nyid kyi gtor ma rgya che ba/zab pa gting dpag dka' ba/ mtha' dbus med pa'i snying po can gyis yongs su khyab par gyur to// de tsam na lha'i skur snang bar 'dod pa la thams cad lha'i dkyil 'khor te/sems dpa' dang/ sems ma dang/ khro bo dang/ khro mo la sogs pa'i dpe byad du ldan pa'i gtor ma rnam pa sna tshogs pas gang bar gyur to// des kyang don bya ba la sogs pa gong ma bzhin no// de bzhin du ci ltar 'dod pa de bzhin du gtor mar snang bar gyur to// de nas nyid la nyid ched du gleng ngo// stong gsum stong gi 'jig rten na// rmad byung yon tan bsam mi khyab// ye shes dbyings kyi rol pa ni// dmigs pa med las dmigs par snang// zhes brjod do// de nas yum gyis ming tsam las sangs rgyas kyi sku mi phyed rdzogs pa'i tshul gyis 'byung ba 'di lta ste/ sras mchog rigs lnga'i sangs rgyas dang// sras bcas byang chub sems dpa' rnams// kun kyang lhag ma med mthong ste// gnas pa med pa'i tshul gyis 'khod// de nas snod kun tu bzang mo'i gtor mar gyur pa las/nam mkha' kun tu bzang mos yangs shing rgya che ba'i gtor mar byin gyis brlabs pa/ e mkha' klong rang bzhin mtha' dbus g.yo ba med// kun la khyab pas thugs rje 'byung ba'i yum// yangs dog med pa mkha' klong chen po ru// gdod nas dag pa'i gtor gzhong chen por gyur// e ba liM ta/ zhes bya ba'i sgra phyogs bcu thams cad du grags so// grags ma thag tu cis kyang mi 'gyur ba'i dbyings kyi gtor mar shar/de nas snod dam tshig sgrol ma yang zhing g.yo ba'i gtor mar byin gyis brlabs pa/ yaM ci ltar g.yo ba rlung gi rang bzhin la// sprul pa'i phrin las cir yang 'gyur// phrin las yum gyi mkha' klong dag pa ru// gdod nas dag pa'i gtor gzhong chen por gyur// yaM ba liM ta/ zhes bya ba'i sgra phyogs thams cad du grags so// grags ma thag tu cis kyang mi tshugs pa'i dbyings kyi gtor mar shar ro// de nas snod mA ma kir gyur pa las/chu mA ma ki brlan zhing sdud pa'i gtor mar byin gyis brlabs pa// mAM brlan zhing sdud pa chu yi rang bzhin la// che ba'i yon tan thugs rje cir yang 'byung// yon tan yum gyi mkha' klong dag pa ru// gdod nas dag pa'i gtor gzhong chen por gyur// mAM ba liM ta/ zhes bya ba'i sgra ma brjod par phyogs bcu thams cad du grags so// grags ma thag tu cis kyang mi brjod pa'i dbyings kyi gtor mar shar ro// de nas snod sangs rgyas spyan du gyur pa las/ sangs rgyas spyan sra zhing 'degs pa'i gtor mar byin gyis brlabs pa/ laM sra zhing 'degs pa sa yi rang bzhin la// thugs rje'i cho 'phrul sna tshogs cir yang ston// thugs rje yum gyi mkha' klong dag pa na// gdod nas dag pa'i gtor gzhong chen por gyur// laM ba liM ta/ zhes bya ba'i sgra ma brjod par phyogs bcu thams cad du grags so// grags ma thag tu cis kyang mi 'gyur ba'i dbyings kyi gtor mar shar ro// de nas snod gos dkar mor gyur pa las/ me gos dkar mos tsha zhing sreg pa'i gtor mar byin gyis brlabs pa/ raM tsha zhing sreg pa me yi rang bzhin la// yongs su snyoms pa'i thugs rje cir yang 'byung// gsung mchog yum gyi mkha' klong dag pa ru// gdod ma dag pa'i gtor gzhong chen por gyur// raM ba liM ta/ zhes bya ba'i sgra ma brjod par phyogs bcu thams cad drags so// grags ma thag tu cis kyang mi 'gyur ba'i dbyings kyi gtor mar shar ro// de nas snod b+h+rUM las rin po che'i gzhal yas khang du gyur pa las/ phyogs bcu'i sangs rgyas thams cad bzhugs pa'i gtor mar byin gyis brlabs pa/b+h+rUM gzhal yas phyogs bzhi mtha' dbus med pa yi// rig pa'i cho 'phrul sna tshogs cir yang ston// dus gsum rgyal ba bzhugs pa'i mkha' klong du// gdod nas dag pa'i gtor gzhong chen por gyur// b+h+rUM ba liM ta ba la/ zhes bya ba'i sgra ma brjod par phyogs thams cad du grags so// grags ma thag tu yangs dog med pa'i dbyings kyi gtor mar shar ro// de nas tsakrar gyur pa las/phyogs bcu'i sangs rgyas thams cad kyi dkyil 'khor gtor mar byin gyis brlabs pas/ rtsa 'khor lo rtsibs bzhi mu khyud dang bcas pa'i// gru chad bzhi dang bar khyams sgo bzhir ldan// sras dang 'khor bcas bzhugs pa'i mkha' klong du// gdod nas dag pa'i gtor gzhong chen por gyur// hUM ba liM ta tsakra/ ces bya ba'i sgra sus kyang ma brjod par phyogs bcu thams cad kun tu grags so// grags ma thag tu bar chad med pa dbyings kyi gtor mar shar ro// de ni thams cad bskyed cing 'byung ba'i gtor ma'o// de ni thams cad du gnas shing longs spyod pa'i gtor ma'o// de ni thams cad du mi gnas shing mthar phyin pa'i gtor ma'o// da ni snod kyi gtor gzhong du bcud kyi mgron gshegs pa 'di lta ste// yid byed pa po thams cad ni kun tu bzang po'i sku mtshan dang dpe byad du ldan pa dang/ chos bya ba mo thams cad ni kun tu bzang mo'i sku mtshan dang dpe byad du ldan pa dang/byung yang byung/ ma byung yang ma byung/ yod kyang yod/ med kyang med/ snang yang snang/ mi snang yang mi snang/ gsal yang gsal/ mi gsal yang mi gsal/grub kyang grub/ ma grub kyang ma grub/ yin kyang yin/ min kyang min/ spyan drangs kyang drangs/ ma drangs kyang ma drangs/ byon kyang byon/ ma byon kyang ma byon/ bzhugs kyang bzhugs/ mi bzhugs kyang mi bzhugs// de lta bu'i sku bgrang du yod kyang yod/ med kyang med pa'i gtor ma'i mgron du gyur to// de bzhin du rigs lnga dang/ yum lnga dang/ sems dpa' dang/ sems ma dang/ sgo ba dang/ sgo ma dang/ khro bo dang/khro mo dang/ don mdzad pa'i thub pa la sogs pa sku mtshan dang dpe byad du ldan pa byung yang byung/ ma byung yang ma byung ba gtor ma'i mgron du gyur to// de dag kun kyang sku mdog phyag mtshan la grangs su gzung du yang rung/mi gzung du yang rung/ de lta bu'i mgron rnams til 'bru mar gyis khyab pa bzhin du gang nas kyang khyab par 'khod do// de nas gtor ma'i mgron de dag la mchod cing bstod pa ni sus kyang bskyed pa med par sa gzhi de dag las/phyi pa ltar ni me tog rnam pa sna tshogs pa dang/ pad+ma dang/ ut+pal dang/ ban+d+hu dzi ba ka la sogs pa gong ma lta bu'i gtor gzhong las rang skyes so// de la rtog ge pa rnams da lta me tog gi dus so zhes 'dogs so// nang pa ltar me tog ge sar re re la me tog lha mo grangs brjod kyis mi langs pa'i yang brjod kyis mi langs par gyur nas/ rgyal ba'i dkyil 'khor de dag la mchod pa dang/don bya ba dang/ don byas pa la sogs pa gtor ma'i longs spyod rgyun mi 'chad par mdzad do// de la dmigs par 'dzin pa rnams kyis me tog gi lha mo zhes ming dang mtshan du btags so// gsang ba bla na med pa ltar na/ de yang gnyis su med de/ rol pa mdzad spyod tha mi dad dbyer med pa'i rol pa gtor mar longs spyod par gyur to// de bzhin du spos dang/ de bzhin du mar me dang/ de bzhin du byug pa dang/de bzhin du gzugs dang/ de bzhin du sgra dang/ de bzhin du dri dang/ de bzhin du ro dang/ de bzhin du reg dang/ de bzhin du chos la sogs pa phyi 'dus byas su snang ba ste/ rdzas kyi mchod pa rang rgyud la gnas so// nang 'dul ma byas te/ lha'i ting nge 'dzin la gnas pa'o// gsang ba gnyis su med pa ste/ rol pa chen po'i mdzad spyod du gnas pa'o// de lta bu'i gtor ma rdzogs pa la phyi nang snod bcud dang ldan no// rang gi rig pa la 'du 'bral med par gnas so// don la spyod pa chen po'i lhun la dus gsum dang/ snga phyi dang/ che chung dang/ mtho dman dang/ phyogs ris dang/ bde sdug med par thugs rje chen po'i gtor mar longs spyod du rol lo// de bzhin du ye nas sus kyang ma byas pas rang rgyud kyi gtor mar yod do// de ni sus kyang ma byas pas yod par yang med do// de ni rang rig pas med par yang 'byung ngo// de ni shes pas byung tsam na longs spyod do// de ni longs spyod tsam na bde ba'i ro rgyun mi 'chad pa bltar ro// de lta bu'i don sus thos pas gtor ma thams cad kyi 'byung khungs shes pa'o// de nas sangs rgyas thams cad kyi bdag po dang/ sangs rgyas thams cad kyis mgrin gcig tu 'di skad ces gleng ma bslangs par langs so// hUM rnal ma snod kyi gtor ma yin pa la// bcud kyi dkyil 'khor gsal ba snang ba'i sku// 'byor pa'i longs ni rang la rang bzhin 'char// 'du 'bral med pa'i mchod pa rgyan med kyis// rgyal ba sras dang bcas pa thams cad du// rnal 'byor gsang ba'i mchod pa rgyun med mdzad// ye nas yin pas nam yang 'bral ba med// gtor ma'i rang bzhin rgyal bas brjod mi langs// thams cad gnyis su med par longs spyod phyir// mnyam nyid rgyal ba'i thugs la gzung bar bya'o// zhes mgrin gcig tu ma gsungs par gleng bslang ngo// des blo tha mal pa ni/ rgyu bsod nams kyi tshogs dang/ 'bras bu ye shes kyi tshogs mthar phyin pa zer ro// de blo tha mal pa la phal cher rnams ni rig pa dang rtog pa ces zer te// de la blo tha mal pa chen po rnams ni/ ye nas de ltar dbyer med ces zer ro// gtor rgyud chen po las/ gleng gzhi'i le'u ste dang po'o//// de nas bcom ldan 'das dpal kun tu bzang po'i klong rum nas/rdo rje sems dpa' byung ngo// rdo rje sems dpa' kun tu bzang po'i mdun na bka' nod pa las/ kun tu bzang pos bka' stsal pa// ma rig ling tog bsal ba dang// ser sna sbyin par bya ba dang// snod chos nyid du bsgyur ba dang/ bcud lha'i zhal zas su bya ba dang/ 'khor ba rnam par dag pa'i klong du bslang ba'i slad du/ lus dang sems gtor ma'i rgyu dang rkyen du sprul cig/ces bka' bsgo ba dang/ de nas rdo rje sems dpas lus rdul snyed du sprul nas gtor ma'i rgyu 'byung ba 'di lta ste/ sa dang chu dang me dang rlung rdo rje sems dpa'i lus sprul pa/ 'di yar gtor ma'i rgyu yin no// 'dod khams gzugs khams gzugs med khams// de yang rdo rje sems dpa'i lus// skye bzhi 'gro drug khams lnga yang// de yang rdo rje sems dpa'i lus// gtor ma'i rgyu ru rab tu bshad// ri rab gling bzhi mtha' bskor ba// nyi zla gza' skar de bzhin no// de na skye ba'i rdzas rnams kyang// rdo rje sems dpa'i lus yin pas// ming gis med du mi rung ngo// mkhas pas de dag rdzas shes bya// gtor ma'i snod kyang rdo rje sems// gtor ma'i rgyu yang rdo rje sems// gtor ma'i mgron yang rdo rje sems// de nas rdo rje sems dpa'i lus gtor ma'i rgyu ru gyur te/ phyi snod kyi 'jig rten gleng bzhi gling phran dang bcas pa/ grangs bye ba ther 'bum du gtor ma'i snod du gyur to// 'dzam bu'i gling gtor snod kyi nang du/ gtor ma'i rgyu me tog rnam pa sna tshogs pa/ g.ya' ri dang/ gangs ri dang/ dma' ba dang/ nags dang/ 'dam dang/mtsho la sogs pa rnams la rdo rje sems dpa'i lus kha dog gsal ba rnam pa sna tshogs pa rang las rang skyes nas gtor ma'i rgyur mchod ma rag par gnas so// de lta bu'i gtor snod na/ 'bru rnam pa sna tshogs pa/shing dang rtsa dang zhing la sogs rnams la/ rang la rang skyes nas gtor ma'i rgyur mchod ma rag par smin to// de lta bu'i gtor snod na/ sman rnam pa sna tshogs pa/ rtsa ba dang shun lpags dang lo ma dang/'bras bu thang chu dang khu ba dang/ ra sA ya na sna tshogs pa rang la rang skyes nas gtor ma'i rgyur mchod ma rag par dri bro'o// de nas yang rdo rje sems dpa'i lus las rdo rje sems dpa'i gtor ma'i snod du gyur pa'i nang na/rin po che rnam pa sna tshogs pa ste/ gling dang bye mar brdal ba/ bzhu ba dang/ brdung ba dang/ skyes pa la sogs pa kha dog rnam pa sna tshogs par rang las rang skyes nas gtor ma'i rgyur mchod ma rag par gnas so// de lta bu'i gtor snod na// sgra rnam par sna tshogs pa rang rgyud kyis grags pa dang/ lha dang mis byas pa dang/ rtsol ba dang/ thabs las byung ba gzugs dang dbyibs su yod pa dang/med pa rnam pa sna tshogs par rang la rang skyes nas/ gtor ma'i rgyur mchod ma rag par grags so// de lta bu'i gtor snod kyi nang na/ chu bo dang/ chu bran dang/ sman chu dang/ mtsho dang/ char pa dang/ 'og chu dang/ bdud rtsi'i chu dang/ 'bab chu la sogs pa rang la rang skyes nas/ gtor ma'i rgyur mchod ma rag par gnas so// de lta bu'i gtor snod na/ nyi 'od dang/ zla 'od dang/ rin po che'i 'od dang/ 'od 'dom gang ba dang/'bru mar gyi me dang/ gtsub shing gi me dang/ 'byung ba'i me dang/ me tha mal pa la sogs pa rang la rang skyes nas/ gtor ma'i rgyur mchod ma rag par 'bar ro// de lta bu'i gtor snod na/ tsan+dan dang/ thang chu la sogs pa thams cad spos rnam pa sna tshogs pa rang la rang skyes nas/ gtor ma'i rgyur mchod ma rag par gnas so// de lta bu'i gtor snod na/ bshos rnam pa sna tshogs pa dang/ rang rgyud kyi gnas dang/bsod nams kyi spyod pa dang/ lha dang mi'i sbyor ba'i gtor ma'i rgyur mchod ma rag par grangs so// de lta bu'i gtor snod na/ lha'i na bza' dang/ rgyu las byung ba dang/ ma byung ba dang/ lha dang mis byas pa la sogs gtor ma'i rgyur mchod ma rag par g.yogs so// de la rtog ge pa'i tha mal pa la sogs pa rnams ni/ rdo rje sems dpa' zhes bya ba'i don dka' zhing mi rig nas/ phyi snod kyi 'jig rten na ci yang skye zhes 'dogs so// de ltar 'byung ba yang de nyid kyi don du 'byung ngo// de nas gtor gzhong dang gtor rdzas su snang ba'i gnas de na/ spyi mthun gyi las las/ skye 'gro bsam gyis mi khyab na yang/ rigs drug gcig tu thugs rje chen po'i gtor mas bzung ma rag par zhes so 'khod do// de la ni rtog ge rnams kyis sngon gyi bskal pa dang po zhes 'dogs so// de nas yang rdo rje sems dpa'i lus sangs rgyas kyi zhing rdul gcig gi steng na rdul snyed du sprul nas/de'i nang na yang thub pa'i skyes bu drug tu sprul te/ lha'i rigs su gtogs pa'i gnas na/ lha'i dbang po brgya byin lta bu gcig tu sprul te/ lha'i rigs su gtogs pa bsdus te/ rin po che'i gtor gzhong na/ lha'i zhal zas ro mchog brgya dang ldan pa gtor mar bshams nas/ lha ci snyed yod pa'i sangs rgyas de snyed cig spyan drangs nas/ de la mchod pa 'bul ba dang/don bya ba dang/ thugs dam bskul zhing sangs rgyas par byed do// mi'i gnas su dge sbyong go'u ta ma lta bur sprul nas/ mi'i rigs su gtogs pa rnams bsdus nas/ sa gzhi'i gtor gzhong du rin po che dang/sa dang rdo dang shing la sogs pa'i gtor gzhong na/ mi'i zhal zas sna tshogs pa gtor mar bshams nas/ mi ji snyed yod pa'i sangs rgyas spyan drangs nas/ yang gong ma bzhin du sangs rgyas par byed do// byol song gi gnas na seng ge rab brtan lta bu gcig tu sprul nas/ byol song gi rigs su gtogs pa rnams bsdus nas/ sa gzhi'i gtor gzhong du rtsa mchog sna tshogs kyi gtor mar bshams nas/byol song ci snyed pa'i sangs rgyas spyan drangs nas/ yang gong ma bzhin du sangs rgyas par byed do// yi dwags kyi gnas na kha 'bar lta bur sprul nas/ 'byung ba'i gtor gzhong du chags pa sel ba'i gtor mar bshams nas/yang gong ma bzhin du sangs rgyas par byed do// dmyal ba'i gnas su gshin rje chos kyi rgyal po lta bu gcig tu sprul nas/ rdo rje kha 'bar ma'i gtor gzhong du/ nyon mongs pa sel ba'i gtor mar bshams nas/dmyal ba ji snyed yod pa'i sangs rgyas de snyed spyan drangs nas/ de la mchod pa 'bul ba dang/ don bya ba dang/ thugs dam bskul zhing sangs rgyas par byed do// de la gang zag ma rtogs pa dag/nang bcud kyi sems can la ci yang byed do zhes rtog go/ de tsam na rdo rje sems dpa'i thugs rjes phyi snod kyi 'jig rten gtor gzhong du byung ba ni/ chos kyi dbyings skye ba med pa'i gzhal yas khang du byin gyis brlabs so// de las skyes pa'i rdzas gtor ma'i rang bzhin ni/ 'dod pa'i yon tan rnam pa lnga chos nyid dag pa'i longs spyod du byin gyis brlabs so// de na gnas pa'i nang bcud kyi 'gro ba sems can rnams lha'i dkyil 'khor du byin gyis brlabs so// de nas gnyis su med pa'i longs spyod bde ba chen po rgyun chad med par mdzad tsam na/ bya rgod phung po'i ri la sogs pa rnams ni/ gang zag phyin ci log tshogs rnams ston pa'i chos sgra sgrogs pa ni ci ltar yin cha yang med ces zer to// gtor rgyud chen po las/ rdo rje sems dpas lus gtor mar sprul pa'i le'u ste gnyis pa'o//// de nas rdo rje sems dpas gang zag phyin ci log thugs rjes gzung ba'i phyir/gtor ma byin gyis brlabs pa'i sngags dang phyag rgya'i ting nge 'dzin la snyoms par zhugs so// zhugs ma thag tu gtor gzhong byin gyis brlabs pa'i sngags dang phyag rgya 'di gsungs so// lag pa thal mo sbyar la snod la gtugs la/ oM rat+na bi shud+d+he kha ta li bi b+h+rUM zhes brjod pas/ phyi ltar gtor gzhong rin po che sna tshogs las grub pa'i gzhal yas khang/rgya khyon dpag tu med par dmigs la/ nang ltar chos nyid kyi dbyings mtha' dang dbus med pa'i pho brang du lhun gyis grub par dmigs la/ gsang ba ltar yum gyi mkha' klong rnam par dag pa'i b+ha ga yangs pa'i pho brang du dmigs la gtor gzhong byin gyis brlabs so// de nas yang gtor ma'i rdzas la bshos rnam pa sna tshogs par byin gyis rlabs pa'i sngags dang phyag rgya 'di gsungs so// lag pa thal mo de nyid las mdzub mo yid tsam bkug la/oM ke'u shi shud+d+ho yaM raM swA hA/ zhes brjod pas/ phyi ltar lha'i zhal zas ro mchog brgya dang ldan pa lhun nam mkha'i gtos su dmigs la/ nang ltar 'dod pa'i yon tan longs spyod lngar dmigs la/gsang ba ltar gnyis su med pa'i lha la lha thim par dmigs la zhal zas byin gyis brlabs so// de nas yang gtor ma'i rdzas 'bru dang me tog rnam pa sna tshogs pa byin gyis brlabs pa'i sngags dang phyag rgya 'di gsungs so// lag pa de nyid thal mo sbyar la/ oM sta ma la su ye swA hA/ phyi ltar 'bru dang me tog gis gang zhing rgyas par dmigs la/ nang ltar des gang khyab par 'bru dang me tog la sogs pa thogs pa'i lha mos gang zhing khyab par dmigs la/gsang ba ltar sdug cing mdzes pa'i lha mo rnams pho la thim/ pho rnams mo la thim pa gong ma bzhin dmigs pa ni/ 'bru dang me tog byin gyis brlabs pa'o// de nas btung ba rnam pa sna tshogs pa byin gyis rlabs pa'i sngags dang phyag rgya 'di gsungs so// thal mo de nyid las/ gung mo phyir bsgreng ba gcu thabs byas la/ oM A hA ra Na s+pha ra Na a mr-i ta g+ha yA swA hA/zhes brjod pas/ phyi ltar bdud rtsi'i chu rgyun rgya mtsho dang chu bor dmigs la/ nang ltar dri'i lha mo bsam gyis mi khyab par dmigs la skud pa dang 'byug par dmigs la/ gsang ba ltar lha rnams gnyis su med pa lhag pa'i byang chub sems dgyes pa'i ros bstar ba dmigs la/btung ba rnams byin gyis brlabs so// de nas gtor ma lha'i dkyil 'khor du byin gyis brlabs pa 'di gsungs so// lus ngag yid gsum pa'i phyag rgya 'di bcas la/ak+Sha/ tha Tha ta Ta da Da d+ha D+ha na Na/ ka kha ga g+ha/ pa pha ba b+ha/ tsa tsha dza dz+ha/ 'a ya ra la/ nga nya ma o/ sha Sha sa ha/ i I/ u U/ e A+e/ gzhan yang rtsa ba'i snying po brjod pas/phyi ltar bdag dang sems can thams cad kyi phung po dang/ khams dang skye mched gnas su dag par dmigs la/ nang ltar bud+d+ha bzhi bcu rtsa gnyis kyi phyag rgya'i dkyil 'khor du dmigs la/gsang ba ltar na thabs dang shes rab gnyis su med par rol par dmigs la/ gtor ma lha'i dkyil 'khor du byin gyis brlabs pa'o// de nas gtor ma nyung ngu mang por byin dbab pa dang/ chung ngu chen por bya ba'i sngags dang phyag rgya ni/lag pa rin po che'i snod du byas la/ oM a b+hi s+pha ra Na hi maM g+ha g+ha na khaM/ zhes brjod pas/ che ba ri rab mang ba rgya mtsho tsam du byin gyis brlabs so/ de nas gtor ma mang zhing che bar bdud rtsir byin gyis brlabs pa'i sngags dang phyag rgya ni/lag pa de nyid las chu rgyun gyi tshul du byas la/ oM sarba pany+tsa a mr-i ta hUM/ zhes brjod pas/ btung bas mi 'chi ba/ zos pas mi ltog pa/ myang bas sangs rgyas par byin gyis brlabs so// de nas gtor ma bdud rtsi ci ltar 'dod par byin gyis brlabs pa'i sngags dang phyag rgya ni/ lag pa de nyid las rin po che 'bar ba ltar byas la// oM saM b+ha ra ha ra ha na ya te ye na swA hA/zhes brjod pas// bdud rtsi so so'i yid la 'thad par byin gyis brlabs so/ de nas gtor ma yid la 'dod pa de so sor khyab par dbang bskur ba'i sngags dang phyag rgya ni/ lag pa dbang bskur gyi phyag rgya byas la/oM ma hA shA ra s+pha ra Na badzra hUM/ zhes brjod pas/ yongs la khyab pas mya ngan 'das par dbang bskur zhing byin gyis brlabs so// de nas nam mkha' sngags dang yig 'brus gang bar dmigs pa ni sngags kyi gtor ma'o// de nas nam mkha' la gar dang phyag rgyas gang bar dmigs pa ni gar dang phyag rgya'i gtor ma'o// de nas nam mkha' gos dang rgyan gyis gang bar dmigs pa ni/ gos dang rgyan gyi gtor ma'o// de bzhin du 'bru dang/ me tog dang/ bro gar 'du 'phro dang/ spos dang/ byug pa dang/ bza' ba dang/ btung ba dang/ spyad pa dang/ sgra dang/ skad dang/ tshig dang don la sogs pa de dag gi gtor ma gong ma bzhin no// de nas rdo rje sems dpas de lta bu'i gtor ma nyid du sprul// nyid kyis don mdzad pas/ rdo rje sems dpa' mngon par sangs rgyas nas/ kun tu bzang po dang mi gnyis par tha dad pa'i ngang du bzhugs so// gtor rgyud chen po las/ gtor ma byin gyis rlabs pa'i sngags dang phyag rgya'i le'u ste gsum pa'o//// de nas rdo rje sems dpa'i thugs rje'i byin rlabs des/ 'jig rten gyi khams de dag thams cad ni/kha cig rdo rje sems dpa' dmigs nas/ lus rdo rje slob dpon gyis bzung nas/ gtor gzhong la sogs pa 'byor pa che chung gis brdungs shing dbyibs dang rgyan mdzes par bshams nas/de'i nang du lha dang mi'i longs spyod sna tshogs pa 'byor pa che chung gis stsal te/ gong ma bzhin rtogs par byas nas/ sngags dang phyag rgyas byin gyis brlabs nas gtor mar phul bas/lus ngo bor sa thob pa sha stag kyang gnas so// phal pa kha cig ni de ltar mi spyod par gsang sngags tshig tsam la khungs phyung nas gzhan byed pa'i lad mo tsam la bltas nas gtor ma btang ste/ nges pa med pas tshi chad nas/phyogs ris gnyis su bcad cing dam tshig las 'gal te mi srun to// des kyang don chos nyid dang mthun par mi 'gyur ro// de ltar rdo rje sems dpar sangs rgyas na yang/ tshig gis sangs rgyas las don gyi sangs rgyas su ma gyur na/rdo rje sems dpa' de yang shin tu 'gyod pa drag po skyes nas kha bub tu 'gyel to// de nas bcom ldan 'das kun tu bzang pos/ rdo rje sems dpa' brgyal ba bslang ba'i phyir/'di skad ces bka' stsal to// sems dpa' chen po lus mtshan dang dpe byad du ldan nas/ 'chi ba med pa'i sku thob pa dang/ 'byor pa'i longs spyod thams cad gtor mar phul nas/ lha'i longs spyod dang 'bral ba med par ldan pa ni/sangs rgyas zhes mi bya'o// sangs rgyas zhes bya ba ni/ nyon mongs pa dug gsum la 'dod chags khrag gi rgya mtsho la zad pa med pa rgya mtsho tsam zhig yod do// zhe sdang rus la zad pa med pa ri rab tsam zhig yod do// gti mug sha la zad pa med pa ri rab spungs pa tsam zhig yod do// nyon mongs pa srog dang rtsa ba dang/ dbugs phyi nang du rgyu ba la zad pa med pa rlung tsam zhig yod de/'di dag rang gis rang sgrol shes pa/ rang gis rang bsgral nas dus gsum du 'phags pa'i tshogs la yang mchod pa 'bul zhing thugs dam bskang/ ma mo dang mkha' 'gro ji snyed yod pa la yang mchod pa dang/'gro ba yongs la yang bsngo bar bzod pa ni yang dag pa'i sangs rgyas su 'gro zhes bka' stsal pa las/ slar rdo rje sems dpa' rgyal ba langs pa las/ phyag g.yas pas 'jam dpal ka ta ra'i shing thogs nas/nyid kyis nyid bsgral te/ khog pa kha shag gis phyes nas/ b+h+rUM kha ta li bi hUM zhes brjod pas/ khog pa gtor ma'i gzhal yas khang du bsgyur nas/ kun tu bzang po ma skyes klong du der sal gyis gyur to// ma hA tsit+ta dzA raM hUM zhes brjod pas/ tsit+ta zur gsum pa gtor snod kyi nang du bcug nas ye shes dpal chen por der sangs rgyas so// badzra shak+ti b+han+d+ha hUM phaT/ zhes brjod pas/ nyid kyi b+han+da dum bu gsum du bcad nas b+han+da snod gsum gyis tsit+ta'i mtha' bskor bas/chos kyi sku skye ba med par lhag gis gyur to// de nas ba su ta'i rgyu phreng gi mtha' bskor bas thams cad du thig le chen po'i ngang du lhun gyis grub bo// de nas srog dang dbugs thams cad yum tshe 'dzin rgyal mo'i mkha' la bsgral lo// gu h+ya gsang ba'i klong thag na ye shes sems dpa'i skur gyur to// de nas rak+ta'i rgya mtsho sbrengs pas chos nyid ma skyes pa'i klong phyogs bcur gdal lo// keng rus kyi ri rab brtsigs nas gtor mar phul bas/ mnyam pa chen po'i klong phyogs bcur gdal lo// sha'i phung po spungs te gtor mar phul bas ma bcos pa'i sku la 'gyur ba med pa'i klong phyogs bcur gdal lo// de ltar gdal bas rdo rje sems dpa' rang byung gi ye shes chen por sangs gzod rgyas nas/ kun tu bzang po yab yum dang gnyis su med pa'i klong du gyur nas 'di skad ces chos nyid bden pa'i tshig gis bstod pa phul ba/hUM chos nyid ma bcos don nyid ma shes pas// ci ltar bsgoms pas sdug bsngal nyid du 'gyur// lta ba kun tu bzang la mthol bshags na// phung po gtor ma'i mchod pa bzhes su gsol// sems nyid gdod nas dag par ma shes pas// ci ltar brtsams pas sdug bsngal nyid du gyur// phrin las kun tu bzang la mthol bshags na// srog dbugs gtor ma'i mchod pa bzhes su gsol// thig le grwa zur med par ma shes pas// ci ltar bskyed pas sdug bsngal nyid du gyur// spyod pa kun tu bzang la mthol bshags na// rnam shes gtor ma'i mchod pa bzhes su gsol// rang byung btsal ba med par ma shes pas// ci ltar bsgrubs pas sdug bsngal nyid du gyur// dam tshig kun tu bzang la mthol bshags na// longs spyod gtor ma'i mchod pa bzhes su gsol// khog pa mi phang gtor mar brtsegs// sha ni mi phang gtor mar gtubs// rus ni mi phang gtor ma gtor// khrag ni mi phang a g+ha sbrengs// ma hA rak+ta trag sha a mr-i ta khA hi/ zhes brjod pas/ kun tu bzang po'i klong mi gnyis gcig par bzhugs so// de bzhin du rnam par snang mdzad dang/ rin chen 'byung ldan dang/ snang ba mtha' yas dang/ gdon mi za bar grub pa la sogs pa yang rdo rje sems dpa'i de bzhin du 'gyod pa skyes nas de bzhin du gtor ma phul te/bshags shing bstod nas gzod sangs rgyas te kun tu bzang po skye ba med pa'i klong mi gnyis gcig par bzhugs so// rigs kyi yum rnams kyang de bzhin du 'gyod pa skyes nas nyid la nyid bsgral nas/lus phul te mngon sangs rgyas so// bshags shing bstod nas kun tu bzang po skye ba med pa'i klong na mi gnyis gcig par bzhugs so// de nas byang chub sems dpa' dang sems ma dang/khro bo dang khro mo dang/ thub pa la sogs pa rnams kyang/ shin tu brgyal nas 'gyod pa skyes nas lus gtor mar phul nas/ nyid la nyid bsgral nas/ gzod nyid las mi gzhan pa'i sras su skyes so// de nas sangs rgyas kyang nyid la nyid bsgral nas dug gsum gtor mar phul bas sangs rgyas/ byang chubs sems dpa' la sogs pa rnams kyang nyid la nyid bsgral nas dug gsum gtor mar phul tsam na yang gang yang de lta bur bsgral zhing bsgrub pa med do// de nas sangs rgyas rnams ni ma chags mi g.yo ma skyes pa'i ngang la bzhugs pa de/ nyid la nyid bsgral zhing/ nyid kyi lus de nyid gtor mar phul nas sangs rgyas pa'i thabs mkhyen pa la/ de nas mnga' ba'i tshogs rnams kyis de nyid du rang bsgrel ba'i thabs ma shes nas/ byang chub sems dpa'i tshogs rnams kyis rdo rje sems dpa' la lus zhing gi rdul snyed du sprul nas/phyi nang gsang ba'i mchod pas mchod nas/ 'di skad ces gsol to// bcom ldan 'das rgyal ba rdo rje 'dzin pa/ sangs rgyas thams cad gtor mar sangs rgyas pa'i don thugs su chud nas/lus zhing gi rdul snyed du sprul nas gtor mar mdzad pas sangs rgyas pa la yang ngo mtshar che'o// de yang yang dag pa'i sangs rgyas su ma gyur nas/ shin tu bsgral nas nyid la nyid bsgral te dug gsum gtor ma chen por phul bas yang dag pa'i sangs rgyas su gyur pa ste/de bas kyang ngo mtshar che nas/ 'jig rten mnga' ba'i tshogs kyis/ de nyid rang bsgral ba'i thabs de ma 'tshal na/ bcom ldan 'das ma thugs rje che la thabs mkhas pas lung bstan du gsol lo// bde bar gshegs pas lung bstan du gsol/ de skad ces gsol pa dang/ rdo rje sems dpas bka' stsal pa/ rdo rje sems dpa' ngas kyang rang gis rang sgrol ba'i thabs de ma shes nas/bskal pa bye ba snyed du sangs ma rgyas te/ kun tu bzang po'i dgongs pa nyag gcig po 'dis/ rang la rang bsgral te gtor mar thul bas sangs rgyas pa yin te/de bas dma' ba'i tshogs kyis mi shes pa ni/ bdag nyid kyi don ma shes pa yin te/ bdag nyid kyi don shes par bya ba'i thabs ni 'di'o// skye med thams cad dug gsum bsgral gdod nas dag pas de dag skyon// tha snyad sgro btags nus pa'i lam// 'khrul ba'i lam btsal thob par dka'// lus sems bde ba'i don rtogs na// sangs rgyas byang chub thag mi ring// sems nyid nyag gcig don shes na// bsgral ba'i gtor mar rab tu bshad// bsgral tsam nyid nas bsgral med pa// dug gsum chos nyid gting phyin yin// des na ma gtor gang yang med// gtor tsam nyid nas gtor med pa// rang sems gdod nas yin shes te// des na ma gtor gang yang med// rtsa ba'i gtor mar ma rig na// de tshe sangs rgyas yang mi srid// 'khrul pa'i longs spyod rgyu 'bras las// de tshe phung po nyid mtshams sbyor// de ni grangs brjod bya ba 'das// des kyang yang dag sangs mi rgya// de rnyed gtor ma mi dgos te// 'chi ba med pa'i sangs rgyas la// rtogs pa'i klong du bdag bsgral nas// tshe mi chad par mngon sangs rgyas// kun bzang bde ba'i gnas su phyin// de tshe gtor ma'i snying por bshad// ces bka' stsal pas/ lha chen po rnams mgrin gcig tu// e ma a la la 'di lta bu'i gtor ma la/ 'byor ba dang longs spyod gtor mar 'bul ba lta ci smos kyi/srog lus dbugs kyang gtor mar 'bul lo// zhes mgrin gcig tu zer nas/ nyid la nyid bsgral te gtor ma phul lo// de nas klu rnams kyang ngo mtshar skyes nas/nyid la nyid bsgral te gtor mar phul lo// de nas gza' skar rnams kyis kyang// nyid la nyid bsgral te gtor mar phul lo// srin po rnams kyis kyang ngo mtshar skyes nas/ nyid la nyid bsgral te gtor mar phul lo// gnod sbyin rnams kyis kyang ngo mtshar skyes nas lus srog gtor mar phul lo// ma mo rnams kyis kyang ngo mtshar skyes nas lus srog gtor mar phul lo// mi rnams kyis kyang lus srog gtor mar phul lo// byol song rnams kyis kyang lus srog gtor mar phul lo// yi dwags rnams kyis kyang lus srog gtor mar phul lo// dmyal ba rnams kyis kyang lus srog gtor mar phul lo// phyogs skyong ba rnams kyis kyang lus srog gtor mar phul lo// der gzod gtor mas sangs ma rgyas pa gang yang med de/ kun tu bzang po bde ba chen po'i sangs rgyas su mi gnyis gcig par mtha' yas pa'i skye 'gro thams cad gyur to// gtor rgyud chen po las/ rtogs pas bdag bsgral ba'i le'u ste bzhi pa'o//// de nas rdo rje sems dpa' yab yum 'du 'bral med pa'i byang chub sems kyi gtor ma 'di rgyas par gtor ro// chos nyid kyi rgyan yab yum mtshan dang ldan pa'i mkha' klong gi gtor gzhong du/ byang chub sems kyi mu tig gtor mar sbyangs pas dus gsum 'phags pa'i tshogs thams cad spyan drangs nas/ dgyes pa chen po'i mchod sprin gtor mar phul bas/'phags pa thams cad dang mtha' yas pa'i sems can thams cad gnyis su med pa'i byang chub sems kyi dngos grub dang/ thabs dang shes rab 'du 'bral med pa'i dbang dam pa thob pa 'di lta ste/hUM e ma rang byung rol pa'i sku// sgros btags mtshan ma'i spyod pa rnams// gnyis med gtor ma'i longs spyod de// yongs la khyab par gsal spros pa'i// lha yi dkyil 'khor thams cad ni// ma lus 'dus pa'i thig le che// sangs rgyas byang chub las byung ba'i// sangs rgyas nyid kyi rgyu yin pas// thams cad sangs rgyas nyid kyis mdzad// ma lus yongs kyi re skong ni// rak+ta dang ni byang chub sems// de tshe gtor mar sbyar ba'i tshe// rgyal ba'i dkyil 'khor tshang bar 'byung// phung po khams dang skye mched kyang// dbyer med ngo bo nyid mnyam pas// thams cad rgyal ba'i gtor mar bshad// 'bar ba'i byin rlabs 'phro 'du las// zhi bar 'dod na gtum po zhi// rgyas par 'dod na zla nya bzhin// dbang ni khams gsum sgrol bar sbyor// drag pos ma rungs 'joms par byed// thim pa'i lhar ni rab sbyar nas// dbang po'i tshogs la dgyes par rol// oM su ra ti staM/ sa ma ya s+t+waM/ sa ma ya ho/ ma hA su kha hUM/ badzra pad+ma maN+Da la/ de nas rdo rje sems dpas 'khor rnams la gsang ba'i gtor ma bshad pa/rnam par snang mdzad la sogs pa gtor ma'i rgyu dang gsang ba bshad pas nyon cig/ de yum gyi chos kyi dbyings te/ gsang ba'i gtor ma thams cad 'byung ba'i rgyu'am gnas so// de'i gsang ba'i mkha' ni/gsang ba'i gtor snod dag pa'i gzhal yas khang gi rang bzhin no// gsang ba'i rdo rje ni yab rig pa'i ye shes te/ gtor ma de nyid kyi rgyu dang/ gtor ma de nyid kyi dbye ba dang/ byed pa po'i skyes bu dang/mgron yang yin/ byang chub sems kyi bdud rtsi'i chu rgyun mi chad par sbrengs par byed pas dngos grub thams cad kyi rgyu dang rkyen yang yin/ rnal 'byor pa'i mchod pa thams cad kyi rtsa ba yang yin pas/ sangs rgyas thams cad kyi dgyes pa 'jo ba'i chags pa chen po/ yi ge 'khor lo tshogs chen gyis zhes kyang de la bya ste/ sangs rgyas thams cad kyi pho brang ngo// 'di ltar rig cing rtog pa'i dus na/ skye shi'i las kyis mi 'khor zhing/sangs rgyas nyid kyi gsang ba'i gtor ma chen po'o// 'di ltar ma rig cing ma rtogs pa'i dus na/ gsang ba'i gtor ma bka' nub pas/ skye shi 'khrul pa'i sdug bsngal gyi las dang/ bag chags ngan pa la sogs pa brtas pa'i dbang gis/gzugs dngos por snang zhing 'khor ba rgyur gyur par byed do// de bas na sangs rgyas thams cad la yang gsang ba'i gtor ma 'di las gzhan mi mnga' ste/ dgongs spyod zab mo 'di thugs su chud na/ gsang ba'i gtor ma dus gsum 'du 'bral med de chos sku gsang ba'i gtor ma'o// de ni rigs bzhi'i sangs rgyas/ tshig chad dam/ dus nam zhig gi tshe na don ma rtogs pa'i bka' la rtog pa'i sbyor ba sha stag byed de/theg pa 'og ma'i spyod pa rnams kyis byas shing skur pa 'debs te/ chos gnyis su med pa ma yin te/ bka' ci snyed bshad kyang don ya char song bas so// gzung 'dzin byas pas chud zos pas/ rtsa ba bdud rtsi las gol nas mnar med par lhung ngo// gtor rgyud chen po las/ gsang ba'i gtor ma'i le'u ste lnga pa'o//// de nas rdo rje sems dpa' la sogs pa'i sangs rgyas thams cad kyis/ci mdzad pa'i phrin las gtor ma'i phrin las mdzad/ ci ltar sangs rgyas pa yang/ gtor ma'i sgo nas sangs rgyas/ ci ltar snang zhing srid pa yang/ gtor ma'i rang bzhin du byung na yang/dper na dmus long la kha dog ci bzhin pa dang 'dra ste/ gang la bstan pa de gang yin cha med pa dang 'dra bar/ sems can thams cad ci las byung ba rgyu gtor ma las byung/ mtha' yas pa'i sems can thams cad rten pa gtor ma la brten/mtha' yas pa'i sems can thams cad ci spyod pa gtor ma la spyod na/ rang rig pa'i rtsal ma shar bas/ ma rig pa'i smag ni dmus long bzhin 'thibs/gti mug gi mun pa'i smag rum la/ zhe sdang brtas pa'i brag bcer nas/ 'dod chags zhen pa'i bse rtsi dang 'dra bar chags pas/ snang srid gtor ma'i don ma shes pas/ 'gro ba rigs drug tu skyes/ de nyid mchod pa'i rgyan du ma rtogs pas/ lam rgyud lngar 'khor te/ 'di lta ste/ a nr-i su tri pre du/ snod kyi 'jig rten gtor gzhong la/ rdzas kyi mtshan ma gtor ma la/ bcud kyi 'jig rten gtor ma'i mgron du ma rtogs pas/zhe sdang gi me chen po 'bar ba la/ las kyi rlung dmar po'i nus pas/ snod kyi 'jig rten la gshig lngas spyo ba byas te/ gsad pa dang/ bcom zhing phrog pa dang/ mnan zhing gzir ba dang/ gnas nas dbyung ba dang/ bza' zhing bca' ba la sogs pas/ rgyu gtor ma ni sdig pa mi dge ba ru spyod// 'bras bu sangs rgyas ni dmyal khams bco brgyad du gol ba 'di lta ste/ rdo rje'i dmyal ba dang/ chad pa'i dmyal ba dang/nyams pa'i dmyal ba dang/ skur ba'i dmyal ba dang/ spangs pa'i dmyal ba dang/ 'gyod pa'i dmyal ba dang/ ma rig pa'i dmyal ba dang/ nyon mongs pa'i dmyal ba dang/ log pa'i dmyal ba dang/gzung ba dang 'dzin pa'i dmyal ba dang/ dog pa'i dmyal ba dang/ phra ba'i dmyal ba dang/ rmongs pa'i dmyal ba dang/ 'chal pa'i dmyal ba dang/ spyod pa'i dmyal ba dang/ ded pa'i dmyal ba dang/ 'bros pa'i dmyal ba dang/ rtag pa'i dmyal ba'o// de la rdo rje'i dmyal ba gang zhe na/ gtor ma'i don ma go bas/ 'og rdo rje'i gtan sa la/ steng rdo rje'i tho bas yud tsam yang mi 'gyangs par brdung zhing/ a tsha dang a na'i smreng yang skad 'ga' tsam yang mi thon pa sha stag myong bar gnas te/tshe'i tshad kyang med de/ lcags kyi ri rab chen po brgyad zhig la/ bya reg 'jam gyi pags pas reg nas nam ri rab brgyad po zad pa dang thar par 'gyur zhes smos na// de ni thon cing thar par mi 'gyur ba'i tha tshig go/ de ci las byung zhe na/ rtsa ba'i gtor ma'i don ma rtogs pas/ lus dang 'dod pa dang gyen du chags pas rdo rje slob dpon la sogs pa la mi rigs shing tshul ma lags pa bgyis pa'i dbang gis shin tu sdug bsngal zhing snying rje'o// de la chags pa'i dmyal la gang zhe na/ lus la snang ba med pa'i mes reg ma thag tu thar bar 'gyur zhing/slar langs pa dang reg pa med pa'i chus reg ma thag tu shing shun rlung gis bskyod pa ltar gas nas slar 'byor pa dang/ snang ba med pa'i mtshon gyis brgyab nas/ reg ma thag tu tshags ma bzhin du gyur nas/slar sos pa la sogs pa'i sdug bsngal bskal pa chen po grangs kyis mi langs par spyod cing gnas par 'gyur ro// de ci las byung zhe na/ rtsa ba'i gtor ma'i don ma rtogs pas/ 'dod pa dang longs spyod la chags pa'i dbang gis rang la phan par 'dod nas bsad pa dang/phrog pa dang/ bza' ba dang/ spyad pa dang/ ci bder 'tshal ba dang/ dge sdig gi 'bras bu 'grub pa med par thag bcad pas/rtsol ba'i don gang byed pa la kho thag chad pa'i dbang gis gnas der shin tu sdug bsngal zhing snying rje'o// de la nyams pa'i dmyal ba gang zhe na/ lus sked pa man chad lcags kyi sdig pa chen po'i khar bcug nas/shin tu nyon mongs pa'i zug gzer che ba rnam pa sna tshogs pas gang ba dang/ stod nas khro chu khol mas thal mar gyur pa'i bar du blugs shing/ shin tu sdug bsngal zhing smre sngags nyin mtshan re la yud tsam re 'byin par mi nus shing/shin tu nyon mongs par 'gyur ro// de lta bu'i gnas na nyon mongs shing sdug bsngal tshe tshad bskal pa stong phrag brgyad khri bzhi stong du spyod cing gnas par 'gyur ro// de ci las byung zhe na/thams cad gtor ma yin pa'i don ma rtogs pas gzhan gyi 'dod pa bral ba dang/ skye bo mtshan mar 'dzin pa bzung ba ni/ sdig par gyur pa'i dpon byas te/ gzhan gtor ma'i longs spyod dang/ rkyen dang ris su gtogs pa la phrag dog bza' ba dang/ brnab sems yid la 'dzin pa dang/ gsang sngags rnal 'byor gyi cha 'dzin na yang/ tshig tsam la khungs phyung nas gtor ma'i spyod pa dang phrin las kyi gnas su ma bskangs shing srin po'i za tshogs par gyur pa dang/rnal 'byor gyi tshogs su 'dzin pa na tshogs dang gtor ma'i phud nyams shing ma 'byor pa dang/ gsang sngags rkun 'bu dang/ rgyab nyan byed pa dang/dam pa'i chos 'dzin pa dang/ sngags la ya ga dang/ mtshang tshig 'dogs pa dang/ gsang sngags gsang ba'i rgyur zhugs nas ded dpon la sogs pa byas te/ gsang ba'i rgyu mngon du phyung zhing/ gzhan thabs dang zol gyis bslu ba dang/ sbyor sgrol gyi don gnas su ma stobs pas/ gsang sngags nang cig la gcig 'phyas shing skur pa 'debs pa na smad pa dang/ rtsod cing 'khrug pa bsham pa dang/ thabs dang che ngag dang/phra ma dang dbyen la sogs pas pha rol gyi mgo gnon pa la sogs pa'i las bgyis pa rnams gnas der skyes nas shin tu sdug bsngal snying rje'o// de la skur pa'i dmyal ba gang zhe na/shin tu mi bzad pa'i khang par bzhugs nas/ shin tu gtogs shig chod cig pa'i sgra rna bar grags shing yud tsam la lus dang yan lag yungs 'bru tsam bsam gyis mi khyab par gtubs nas/ de ma thag tu slar 'byor zhing de ma thag tu gtubs pa dang/lce'i dbang po zhing lhu gcig tsam du skyes nas/ lcags kyi glang dang rmod pa'i thong gshol gyis shin tu sring zer ba'i sgra grags shing/ na ba dang tsha ba'i sgra ni 'byin par mi nus/bar bar du mkhun pa tsam 'byin par nus te/ de lta bu'i gnas na shin tu sdug bsngal zhing spyod pa'i tshe tshad ni bskal pa stong phrag bdun khrir sbyang bar gnas par 'gyur ro/ de ci las byung zhe na/thams cad gtor ma yin pa ma rtogs pa'i dbang gis/ gzhan smad par 'dod pa'i phyir gang zag skye bo'i rigs su skyes pas ta na ga Na la sogs pa bya ra byas shing rtsa ba bcad nas 'phyas pa dang/ rna ba sems can yongs la zhe ba la mi 'bab pa'i tshig smra zhing/ming mkhan log par 'dogs pa dang/ gang zag dam pa'i chos kyi rjes su 'brang ba yin na yang/ gsang sngags la ya ga dang sgro skur 'debs shing/theg pa dman pa'i rigs 'dzin cing/ dam tshig gcig pa'i grogs po thabs kyis smad pa'i thabs 'phya zhing skur pa 'debs pa la sogs pa'i dbang gis de lta bu'i gnas su skyes te/ de la shin tu sdug bsngal snying rje'o// de la spangs pa'i dmyal ba gang zhe na/ stag dang dom la sogs pa 'jigs pa'i sems can rnams kyis ded nas/ lcags kyi dom dang sdig pa la sogs pa'i sems can rnams kyis bzung nas/ 'jigs pa'i mtshon cha sna tshogs rnon po thogs pa rnams kyis sha dang rus pa phral zhing btog go/ zad par phral yang las kyi dbang gis slar skye'o// des ni bskal pa re re la shin tu gdung ba'i mchi mas ngu zhing mgon skyabs zhes 'bod par byed do// de lta bu'i gnas na shin tu sdug bsngal zhing sbyang ba'i tshe tshad ni/ bskal pa stong phrag gsum khrir gnas shing sbyor bar 'gyur ro// de ci las byung zhe na/ thams cad gtor ma yin par ma rtogs pa'i dbang gis tshe phyi ma mi shes pas gang zag skye bo'i sa 'dzin pa dang/dkon mchog gsum la rgyab kyis phyogs pa dang/ bden pa'i tshig 'ga' tsam thos na yang mi nyan pa dang/ dge ba bcu'i phyogs spangs nas srog gcod pa la sogs pa mi dge ba bcu'i phyogs khrims phyung nas byed pa dang/gang zag dam pa'i chos kyi rjes su 'brang ba yin na yang khrims dang/ sdom pa dang/ dam tshig la sogs pa rnams mnos nas mi bsrung ba dang/sngags dang phyag rgya skad cig tsam yang mi bsrung ba dang/ gsang ba'i dkyil 'khor spangs nas yud tsam yang mi blta ba dang/ yi dam gyi lha spangs nas ma'i dod kyi yon tan tsam yang mi 'dzin pa dang/rdo rje slob dpon spangs nas pha'i dod kyi mchod pa tsam yang mi byed pa dang/ rdo rje mched lcam spangs nas brtse gdung 'dzom phrad mi 'dod pa rnams las kyi dbang gis gnas der skyes nas de na shin tu sdug bsngal zhing snying rje'o// de la 'gyod pa'i dmyal ba gang zhe na/ shin tu sngon las ci byas pa dran pa'i gnas dge sdig ci byas pa'i las don dang las kun rde'u dang khram du bkram zhing/de'i tshe 'di lta bu'i las byed pa khyod yin no// ces rgya gag zer zhing rkub nas tho bas brdungs shing mdung rtses brgyabs nas chu bo rab med la brgal bar byed do// chu bo rab med de'i nang du sdug bsngal rnam pa sna tshogs pas bzod pa'i blag med par gdungs nas rings shing drag par phab par phyin pa dang/sha kun bud nas rus pa khar thon no// thon pa dang de ma thag tu las kyi dbang gis sha sos par 'gyur ro// sha sos par gyur ma thag tu yang rang gi sngon las ci byas pa'i dbang gis rde'u dang khram thog nas/ yang gong ma ltar rgya gag zer zhing mdung gis brgyab pa dang/ tho bas brdungs nas skad cig tsam yang ma lon par phyir bzlog go/de nas yang pha rol du log pa de bzhin du sdug bsngal myangs nas slar log pa dang gong ma bzhin du byas nas te/ de lta bu'i gnas na shin tu sdug bsngal zhing sbyang ba'i tshe tshad ni/bskal pa stong phrag khrir gnas shing sbyang bar 'gyur ro// de ci bgyis pa'i dbang gi rnam par smin pa las 'gyur zhe na/ thams cad gtor ma'i don ma rtogs pas/ dge ba dang sdig pa'i don ngo ma shes shing/bdag nyid rtag tu re bas gang zag skye bo'i sar skyes pa ni/ dkon mchog gsum gyi dkor la 'bags pa dang/ ma nyes pa'i sems can bsad pa dang/ ma nyes pa'i sems can brdungs pa dang/ mchod pa tshol ba'i phyir ma nyes pa'i nor dang longs spyod phral ba dang/ ma nyes pa'i dug dang gnas nas dbyung ba la sogs pa'i las byed pa dang/ gang zag dam pa'i chos la zhugs pa yin na yang/ ma nyes pa'i skye bo la mthu bsnyen btang ba dang/rang dang 'gal ba sogs la mngon spyod phrin las kyi las byed pa dang/ grogs po nyes pa med pa'i chos la skur pa 'debs shing 'phya ba dang/ shin tu smad cing dmas par bshams pa dang/'khor dang slob ma yan chad phyogs gcig tu ris su bzung nas/ mtshang tshig smra zhing rtsod pa rnams kyi dbang gis gnas der skyes te/ shin tu sdug bsngal zhing snying rje'o// de la ma rig pa'i dmyal ba gang zhe na/shin tu gnag cing mun pa'i gnas na skyes bu'i lag pa brkyang bskum tsam yang mi mthong ba'i gnas na/ shin tu yar grang zhing lus dang yan lag shin tu gas shing/thams cad du 'khyags pa bzhin du gyur pa nas/ a chu bya ba'i sgra yang 'don mi nus par gnas so// de lta bu'i gnas na shin tu sdug bsngal ba'i tshe tshad ni/ bskal pa stong phrag stong du gnas shing sbyang bar 'gyur ro// de ci spyad pa'i las kyi rnam par smin pa las byung zhe na/ thams cad gtor mar snang ba'i don ma rtogs las/ gzhan gyi nyes pa ni so so skye bo'i sar skyes pa na/ sems can gsod pa'i las rgya tshe tshad ma dang/mda' dang/ ral gri dang/ spu gri dang/ dgra s+t+wa dang/ gzhan yang de'i thabs dang/ mang dag gzhan la byed du bcug pa dang/ spyad pa dang de bskul ba dang/ rang la phan pa med pa'i khar nyes pa bsgo ba dang/gzhan yang rang gis ci 'grub par byed cing/ rang gis ma 'grub na yang gzhan la slob cing sdig pa'i las cha sna tshogs pa bshams pa la sogs pa dang/ gang zag dam pa'i chos la spyod pa yin na yang khe dang grags pa tshol ba dang/tshul 'chos pa dang/ chos log par spyod de/ yang dag pa'i bka' bas log pa'i chos spyod pa la rjes su yid dbang ba 'bul ba dang/ chos 'dod pa rnams la log par 'chang ba dang/dam nyams pa'i 'byung po la srung ba'i cho ga byed pa dang/ theg pa chen po la dpyad 'dog pa dang/ bka' yang dag pa'i don mi nyan pa dang/ dpe rkun dang 'og brus byed pa dang/ dkyil 'khor gnyan po'i don bor nas bsnyen sngags la dga' ba la sogs pa'i las kyi dbang gis gnas der skyes nas/de la snying rje zhing sdug bsngal bar gnas so// de la nyon mongs pa'i dmyal ba gang zhe na/ shin tu tsha ba'i zangs khang chen po'i nang du bcug nas/phyi nas bskal pa'i me 'bar bas bsregs shing/ shin tu a tsha tsha zhes bya ba'i sgra bsam gyis mi khyab par 'don par byed do// de lta bu'i gnas na shin tu sdug bsngal ba'i tshe tshad ni/bskal pa stong phrag lnga brgyar gnas shing sbyang bar 'gyur ro// de ci ltar spyad pa'i las kyi rnam par smin pa gang las byung zhe na/ rtsa ba'i gtor ma 'di'i don ma rtogs pas/ nyon mongs kyi dbang gis ngo ma shes pas/so sor skye bor skyes pa na/ zhe sdang gis sems can kha mar bsad pa dang/ 'dod chags kyi sha khrag za ba dang/ gti mug rang khams ngo ma shes pa dang/ phrag dog rang khams gzhan phung bar bya ba dang/nga rgyal gyis gzhan du gnod du 'jug pas nyon mongs rang kham la sogs pa dang/ gang zag dam pa'i chos spyod pa yin na yang/ dug lnga dang nyon mongs pa thams cad sngags la khungs phyung nas bstan kyang chos nyid don dang ma mthun par gol te/'dod chags ma dag pas chog shes pa'i dus med pa dang/ gti mug ma dag pas don gyi steng du mi phebs pa dang/ zhe sdang ma dag pas rU tra rang rgyud byed pa dang/nga rgyal ma dag pas gzhan la khengs pa dang/ phrag dog ma dag pas gzhan smad pa rnams las kyi dbang gis gnas der skyes nas/ de na sdug bsngal zhing snying rje bar gnas so// de la log pa'i dmyal ba gang zhe na/shin tu grang zhing 'khyags pa la lto sbyar ba'i gnas su shin tu a chu zhes 'bod cing lus ut+pal ltar gas par 'gyur ro// de lta bu'i gnas na shin tu sdug bsngal zhing tshe tshad ni bskal pa stong phrag sum brgyar gnas shing sbyang bar 'gyur ro// de las kyi rnam par smin pa gang bskyed pa las byung zhe na/ rtsa ba'i gtor ma'i don ma rtogs pas/ 'phral gyi ldog 'gyur gyi don spyad pas/ so so skye bo'i sar skyes pa ni/g.yo dang sgyu dang zol dang zog dang yang dag pa dge ba'i las byed pa mthong na yang/ de la rjes su yi rang ba mi skye bar gang dag sdig pa'i las mthong na/ de la sems 'phang skye ba dang/ yang dag pa'i bka' bas phyin ci log bstan pa la dga' ba dang/ dkon mchog gsum gyi bka' la mi nyan pa la sogs pa dang/ gang zag dam pa'i chos spyod ci yin na yang/ dang po nyan thos kyi 'dul ba la zhugs nas/khas blangs nas log pa dang/ de bzhin du byang chub sems dpa'i sdom pa dang/ sngags kyi dam tshig mnos nas bsrung bar ma bcas te/ khas blangs pa las log ste skye bo las dman par spyod pa dang/yang dag pa'i gsang sngags rdo rje theg pa la zhugs nas/ de la log nas mtshan nyid kyi theg pa la zhugs te sngags la smod pa dang/ theg pa 'og ma pa'i chas bzung nas/ gong ma la smad pa rnams las kyi dbang gis der skyes nas/de na shin tu sdug bsngal zhing snying rje bar gnas so// de la gzung ba dang 'dzin pa'i dmyal ba gang zhe na/ rab tu grang ba'i gling chab rom chen por 'dug pa'i gnas na/ gdung ba'i smre sngags kyis a chu zhes 'bod cing/lus ut+pal ltar rab tu yang gas te 'di bas tsha ba'i sdug bsngal myong na ci ma rung zhes bos nas/ de nas yang yun cung zad tsam yang ma lon par dmyal ba'i zangs dkar chen por phyin te/tsha ba'i me chen bskyar te rab tu yang tshos par btsos nas/ yang a tsha tsha zhes gdung ba'i smre sngags bos nas/ de bzhin du las kyi dbang gis phar 'khor tshur 'khor byed par 'gyur ro// de lta bu'i gnas na shin tu sdug bsngal ba'i tshe tshad ni/bskal pa stong phrag brgyar gnas shing sbyang bar 'gyur ro// de las kyi rnam par smin pa gang spyad pa las 'byung zhe na/ rtsa ba'i gtor ma 'di'i don blo la ma shar bas/g.yel bags kyi skyon gyis so so skye bo'i sar skyes nas/ dgra ris su 'dzin pa dang/ de la mnar sems rung dang ldan par byed pa dang/ gnyen dang spun du bzung ba dang/ de la phyogs dang gal du skyob pa dang/mi mthun pa'i phyogs la dge ba spyod du mi ster ba dang/ mthun pa'i phyogs la legs pa'i lam las 'gog pa la sogs pa dang/ gang zag dam pa'i chos spyod pa yin na yang/ phyi gzung ba'i yul med pa la/gzung ba'i yul du bzung ba'i rtags su/ phyogs ris su smad cing gzhan gyi chos la smad pa dang/ nang 'dzin pa'i sems med pa la 'dzin pa'i sems su bzung ba'i rtags su/ nga'i bka' ltar yin pa las gzhan gyis ltar min no// zhes bdud kyi tshig tu smra ba dang/ de ltar gzung 'dzin gnyis su 'dzin pa'i dbang gis/ srin po mngon sum pa 'dra ba'i spyod pa byed pa rnams/ las kyi dbang gis der skyes nas/de na sdug bsngal zhing snying rje bar gnas so// de la dog pa'i dmyal ba gang zhe na/ rdo rje'i brag gis gtams pa'i nang du skyes nas/ lus ni rab tu 'phel zhing skye/ rdo rje'i brag la yangs pa'i skyed med pa'i gnas su skye ba dang/de las yang thar nas rdo rje'i brag gnyis kyi bar du lus cha char btang nas/ brag bye ba dang slar langs nas/ yar char gyis btang ba'i gnas na skye bar 'gyur ro// de na shin tu sdug bsngal ba'i tshe tshad ni/bskal pa stong phrag dgu bcur gnas shing sbyang bar 'gyur ro// de las kyi rnam par smin pa gang spyad pa las byung zhe na/ rtsa ba'i gtor ma ma 'byangs pas/ 'phral gyi ma rig pas bsgribs nas/so so skye bo'i sar skyes pa na/ sems can la brdungs shing rab tu btsog pa dang/ dud 'gro la mi theg par cher 'gel zhing bsnun pa dang/ gnas phyung zhing phrog pa dang/ de bzhin gshegs pa'i sku smad pa la sogs pa dang/gang zag dam pa zhig gi chos la spyod pa yin na yang/ lta ba zab mo la dpyas 'dogs shing/ rtog pa'i chos la dga' ba dang/ dngos grub kyi rgyu nyid skyon du mthong nas/ 'phya zhing skur pa la sogs pa rnams las kyi dbang gis gnas der skyes nas/de na sdug bsngal zhing snying rje bar gnas so// de la phra ba'i dmyal ba gang zhe na/ shin tu gdung ba'i gnas na/ bdag gi yid du 'ong ba'i skyes pa dang/bud med dang phrad par 'dod pa dang/ zhags pa gang tsam gyis bar chod par byas nas/ bzhin gcig la gcig mthong nas 'phrod par bsams pa na/ lus zhe sdang gi sbrul nag chen po res sgo nga'i sbubs zhugs pa bzhin 'khr-is nas/sbrul gyi gdug pas lus tsha zhing sdug bsngal nas/ gdung ba'i mchi mas ngu zhing rab tu sdug bsngal ba'i gnas su 'gyur ro// de lta bu'i gnas na shin tu sdug bsngal ba'i tshe tshad ni/bskal pa stong phrag bdun cur gnas shing sbyang bar 'gyur ro// de las kyi rnam par smin pa'i rgyu gang spyad pa las byung zhe na/ rtsa ba'i gtor ma'i don ma rtogs pas/ 'dod chags la zhen pa'i so so'i skye bo'i sar skyes pa na/ sems can rnams la 'dod chags rang ga mar spyad pa dang/ gzhan gyis srung ba'i bud med la sogs par g.yem pa dang/ sems can skyes pa'i rgyu byas nas/dus ma yin par bsad pa la sogs pa rnams dang/ gang zag dam pa'i chos spyod pa yin na yang/ dus khrims dang gnas khrims nyams pa dang/ gsang sngags kyi spyod pa dka' ba bsten pa tsam byas nas skye bo bzhin spyad pa dang/gsang sngags kyi spyod pa zab mo rnams skye bos mthong zhing spyad slar gyur pa rnams/ las kyi dbang gi gnas der skyes nas/ de na shin tu sdug bsngal zhing snying rje bar gnas so// de la rmongs pa'i dmyal ba gang zhe na/shin tu dmyal ba mi bzod pa'i gnas na/ mgo mjug tu thig brgyad btab nas/ gting bar brgyad du dras te las kyi dbang gis de ma thag tu 'byar zhing yang 'dra'o// de lta bu'i gnas na shin tu nyon mongs pa'i tshe tshad ni/bskal pa stong phrag drug cur gnas shing sbyang bar 'gyur ro// de las kyi rnam par smin pa gang spyad pa las byung zhe na/ rtsa ba'i gtor ma ma thos pas/ 'phral gyi nyon mongs pa'i las kyis bsgrib ste/gang zag so so'i skye bor skyes pa na/ sangs rgyas kyi zhal ni nyi zer tsam yang mi mthong ba dang/ chos nyid bden pa'i don tshig 'bru gcig tsam yang ma thos pa dang/ ngan pa'i las rnams blun po byol song bzhin du bgyis pa dang/gang zag dam pa'i chos la gnas pa zhig yin na yang/ chos nyid yid la mi 'jog pa dang/ 'dod pas g.yeng ba dang/ 'du 'dzi dang bus pa'i spyod pa la zhugs pa dang/longs spyod dang le lo'i khar 'dor ba dang/ gzhan la skur pa chen po btab pa dang/ sems can sgrol ba'i las la bab chol du byed pa dang/ dpyal gyi rtog pa chol phyir mo dang pra 'debs pa rnams las kyi dbang gis/gnas der skyes nas der shin tu sdug bsngal ba'i gnas so// de la 'khyal ba'i dmyal ba gang zhe na/ shin tu dus ma yin pa'i gnas na/ res 'tshod pa dang/ res 'khyags pa la lto sbyor ba dang/res 'ga' spu gris mgo gshogs pa'i gnas na shin tu nyon mongs pa'i tshe tshad ni/ bskal pa stong phrag lnga bcur gnas shing sbyang bar 'gyur ro// de las kyi rnam par smin pa gang spyad pa las byung zhe na/rtsa ba'i gtor ma'i don blo la ma shar bas/ gang zag skye bo'i las byed pa'i tshe sod dang/ chod dang gtogs shig pa'i tshig 'khyal pa smra ba dang/ gzhan de skad smra ba'i ngag nyan nas/ bsad bcad brdung ba la sogs pa'i las byas pa dang/gang zag chos spyod pa'i lam la gnas pa yin na yang/ gsang ba'i bka' zab mo snod ma yin pa snang dgu la dbang ma thob par 'chal bar smra ba dang/ tan gaN gyi phrin las gnas lam 'byangs shing mi nag yongs kyis smad par byas pa rnams las kyi dbang gis gnas der skyes nas/shin tu sdug bsngal zhing snying rje bar gnas so// de la spyod pa'i dmyal ba gang zhe na/shin tu grang ba'i dmyal bar 'khyags pa la lto 'byar ba'i gnas na/ lus pad+ma dang pad+ma chen po ltar gas te/ shin tu sdug bsngal ba'i tshe tshad ni/ bskal pa stong phrag gsum cur gnas shing sbyang bar 'gyur ro// de las kyi rnam par smin pa ci las byung zhe na/ rtsa ba'i gtor ma'i don thog tu ma phebs pas/ gang zag skye bo'i las byed pa la/ dus gsum pha ma spangs nas ma rung pa bsten pa dang/ dge ba spangs mi dge ba bsten pa dang/gang zag chos spyod pa zhig yin na yang/ theg pa chen po'i chos spangs shing/ theg pa 'og ma'i chos spyod pa dang/ lus dang man ngag la dpyas 'dogs shing/ snyan ngag dang sdeb sbyor dang/ glu dbyangs slob pa la dga' ba'i las kyis gnas der skyes nas/de na sdug bsngal zhing snying rje bar gnas so/ de la ded pa'i dmyal ba gang zhe na/ lcags kyi shal ma ri la yar 'dzegs tsa na/ gnyen 'dun dang brtse bas ngu skad kyis 'bod pa la sogs pas shin tu nyon mongs pa'i tshe tshad ni/bskal pa stong phrag nyi shur gnas shing sbyang bar 'gyur ro/ de las kyi rnam par smin pa gang spyad pa las byung zhe na/ rtsa ba'i gtor ma ma thos pas/gang zag skye bo'i las byed pa na/ ri dwags la sogs pa sems can mang po 'dod cing gsod pa dang/ gang zag dam pa'i chos byed pa na yang/ lus rab tu byung ba'i lus su bsgyur nas/ sems can mang po la mi theg par bskal nas brdungs pa/ 'thag pa 'ded pa dang gsod pa dang/ g.yo dang/ sgyu dang/ thabs dang/ bslu ba la sogs pa'i nyo tshong gi rnam par smin pas gnas der skyes nas/ shin tu sdug bsngal gyis snying rje bar gnas so// de la 'bros pa'i dmyal ba gang zhe na/ shin tu gsod la dga' ba'i gnas na/ gsh-in rje phag shan chen pos mgo nas bzung nas/ rked pa dang ske dang rkang pa dang gsum du btub nas/bsad de zos pa dang/ shi ma thag tu lus gcig tu blang ste sos pa la sogs pa yang shi yang sos kyis sdug bsngal ba'i tshe tshad ni/ bskal pa stong phrag bco lngar gnas shing sbyang bar 'gyur ro// de las kyi rnam par smin pa gang spyad pa las byung zhe na/ rtsa ba'i gtor ma ma thos pas/ bros pas thar bar re bas/ gang zag skye bor skyes pa na/ gtsug lag khang dang mchod rten gyi dkor brkus nas bros pa dang/gang zag chos kyi rjes su 'brangs pa yin na yang/ d+harma'i glegs bam brkus nas bros pa rnams/ las kyi dbang gis gnas der skyes nas/ shin tu sdug bsngal zhing snying rje bar gnas so// de la rtag pa'i dmyal ba gang zhe na/ shin tu khro bo'i gnas na/ lus la lcags kyi ser bas brdungs pa dang/ mtshon cha'i char pa sus kyang ma babs par rang babs nas/ lus la na tsha'i sdug bsngal gyis sgra 'byin no// de lta bu'i sdug bsngal gyi tshe tshad ni/ bskal pa stong phrag gsum du gnas shing sbyang bar 'gyur ro// de las kyi rnam par smin pa gang spyad pa la las byung zhe na/ gang zag skye bor skyes pa'i tshe/ zas dang nor la rtag tu re bas/chags shing brkam pa'i las byas pa dang/ gzhan gyi nor rang gis 'dod pa'i phyir srog dang phral ba la sogs pa dang/ gang zag chos kyi rjes su 'brangs pa yin na yang/ nga ni mthu che ba yin no// nga ni rtsal che ba yin no// zhes che ba'i ngag 'don cher byed cing/ bdag rtag pa dang gnas par 'dzin pa rnams/ las kyi dbang gis gnas der skyes nas/ shin tu sdug bsngal zhing snying rje bar gnas so// de lta bu'i dmyal ba'i grangs kyang dmyal ba 'od kyang bstan sar zad kyi/ rtsa ba'i gtor ma'i don 'di ma nyan pas/ bdag nyid kyi rung na grangs bsam gyis mi khyab par dmyal ba 'bum phrag snyed 'khod par yod do// gtor rgyud chen po las/ gtor ma'i don ma thos shing ma rtogs na/ sems can dmyal ba'i le'u ste drug pa'o//// de nas yang thams cad gtor ma yin pa'i don mi shes nas/ gang zag skye bor skyes na/gtor ma ma shes rdzas su bzung bas/ 'khrul pa'i dbang gis chags pa dang/ 'jungs pa dang/ brkam pa la sogs pa'i las spyad pa dang/ gang zag chos kyi phyogs su 'brangs pa yang/ snying rje chung ba dang/ser sna che ba dang/ gzhan la yod par mi dga' ba dang/ gzhan gyis yon tan lobs par mi dga' ba dang/ gzhan la 'khor rgyas 'degs par mi dga' ba rnams/ las kyi dbang gis sems can yi dwags kyi gnas su skyes te/phyi'i sgrib pa can dang/ nang gi sgrib pa can dang/ sgrib pa can gyi sgrib pa can la sogs pa'i gnas su/ bskal pa stong phrag brgyar sdug bsngal nyams su myong bar 'gyur ro// de yang thams cad gtor ma yin pa'i don mngon par ma shes pas/ gang zag skye bor skyes pa na/ zas thams cad gtor ma'i rdzas ma yin par/ so so gti mug gis rang rang gi 'tshal mar mthong/ gtor ma'i lha thams cad sems can rang gzugs so sor mthong ba dang/gang zag chos kyi rjes su 'brangs pa yin na yang/ gtor ma'i rgyud 'di ma rtogs par spyad pa'i thabs kyi gtor ma dang/ gtor ma'i rgyud 'di mi 'dzin pa dang/rgyud 'di mi mnyan pa dang/ rgyud 'di'i ming tsam yang cha med pa rnams/ byol song du skyes te/ zas ngan pa sna tshogs pa za ba dang/ las ngan pa sna tshogs pa byed pa dang/ bsad pa dang/ spyur ba dang/ bsha' ba dang/ gzhur ba dang/ spyad pa dang/ bkol ba dang/ brdung ba dang/ bda' ba la sogs pa shin tu sdug bsngal ba'i gnas na/ bskal pa lnga brgyar sdug bsngal nyams su myong bar 'gyur ro// de nas yang thams cad gtor mar gnas pa'i don ma rtogs nas/ gang zag skye bo'i sar skyes pa na/ yul dang gnas la phyogs ris su 'dzin pa dang/ rdzas dang g.yog 'khor la phyogs dang ris su 'dzin pa/gang zag chos spyod pa na yang/ chos la phyogs ris su 'dzin pa dang/ yang dag pa'i don mkhyen pa la phrag dog tu 'dzin pa rnams lha ma yin gyi gnas su skyes nas/ 'thab pa dang rtsod pa'i rgyur 'gyur ro// de nas yang gtor ma'i rdzas dang gtor ma'i snod dang/ gtor ma'i lha ngo ma shes pas gzhan du bsod nams kyi tshogs gsog pa ni/ lha zhes bya ba'i ris su bzung ste 'chi 'pho dang ltung ba'i sdug bsngal nyams su myong bar 'gyur ro// des na gnas kyang gtor ma la gnas/ spyod kyang gtor ma la spyod/ yin yang gtor ma'i lha yin pa'i don ma thos pa dang/ ma rig pa dang mi gnas nas rdzas la spyad du phangs pa ni/bkres shing skom pa'i gnas sul dang/ gyen mi 'dzeg pa dang mthur mi pheb pa dang/ gtor ma'i don ma rig pas/ 'on pa dang/ dig pa dang/ gtor ma'i gnas ma 'byongs pas/ na ba dang/ tsha ba dang/gtor ma'i 'bras bu ma shes pas/ rgas pa dang/ rgud pa dang/ gtor ma'i chos nyid ma shes pas/ skye ba dang/ 'chi ba dang/ gtor ma'i sgrib pa ma dag pas/ nad du mdze dang/ shu ba dang/ 'brum bu la sogs pa nad sna tshogs myong nas/bskal pa re rer sdug bsngal ba sna tshogs spyod pa'i rgyur 'gyur ro// gtor rgyud chen po las/ gtor ma'i rang bzhin ma shes pas/ 'gro ba sems can so sor skye ba'i le'u ste bdun pa'o//// de nas gzhi thams cad gtor ma'i snod yin par ma shes pas/ la las shal ma ri dang/ zangs kyi khang pa dang/ mtshon cha'i char la sogs pa dang/ dmyal ba'i spyod par mthong ngo// la las rnag khrag dang/tsher dong la sogs pa yi dwags kyi gnas su mthong ngo// la las gong yin par ngo ma shes so// la las tsher dong dang bya skyibs dang/ gyen dang mthur dang/ ngam grog la sogs pa'i gnas su mthong ngo// la las brgal zhing bsad pa'i gnas su mthong ngo// la las yid du 'ong ba'i gnas dang/ bsod nams che chung gi gnas su 'dug par mthong ngo// gtor ma'i mchod rdzas kyi longs spyod ngo ma shes pas/la las bde ba/ la las sdug bsngal du mthong ngo// las las sman la las dug tu mthong ngo// la las zas la las sman du mthong ngo// gtor ma'i lha ngo ma shes pas/ la la'i gshed ma la la la'i grogs mthong ngo// la la'i dgra la la las gnyen du byed pa dang/ la la'i gnyen la la las dgrar byed pa dang/ la la'i skyen la la las legs par byed pa dang/ la la'i skyon ma rungs pa la la las 'bras bur bsgrub pa la sogs pa/gnas dang longs spyod dang/ 'bras bu mi shes par don gnyis log par gol ba dang/ skyon nyid yon tan yin par ma rtogs pas log pa'i las kyis snang ngo// gtor rgyud chen po las/'bras bu log pa'i le'u ste brgyad pa'o//// de nas kha lo phyin ci logs su blta ba las/ 'dzin byed kyi zhags pas kyang ma 'chun nas/ gol ba'i lam du shor ba la/ thugs rje'i lcags kyus kyang ma zin/gti mug gi mun pa la ye shes kyi snang bas kyang ma gsal/ zhe sdang gi phrag chen la/ rdzu 'phrul gzong gis kyang ma chod/ 'dod chags ba mo la/ thugs rje'i nyi mas kyang ma zhu/ nga rgyal gyi ko khengs la/zhi ba'i til mar gyis kyang ma thul/ phrag dog gi rlung nag 'tshubs ma la/ mthu stobs kyi dpa' brtan gyis ma khebs nas/ shin tu gol to// shin tu sdug bsngal lo// shin tu nyon mongs so// shin tu gtor ma'i bka' nub par gyur to// de lta bu'i gnas na/ rdzas log pa dang/ chos blta ba la log pa dang/ chos nyid log pa dang/ 'bras bu log pa dang/ lam log pa sha stag mang bar 'gyur ro// gtor rgyud chen po las/nyon mongs pa mthu brtas kyi le'u ste dgu pa'o//// de nas rdo rje sems dpas stug pos brgyan pa'i zhing khams nas/ ye shes kyi spyan gyis gzigs te/ rtags bar 'di dpyad/ ngan song gi rgyur gyur te la las ni tsha grang gi sdug bsngal/spyod pa gcig mdzad pa las/ yid dang dbang pos bsdus pa thams cad/ chos nyid brtan pa ni rdzas su gol/ gtor ma'i rigs thams cad 'jigs pa'i lam du smin/gtor ma'i snod thams cad ngan song gi rgyur gyur te/ la la ni tsha grang gi sdug bsngal gyi dbyen sbyon zhing tsha ste sdug bsngal bar gzigs so// la la bkres shing skom par gzigs so// la la spyad cing bkol te sdug bsngal bar gzigs so// la la gsum dang brgyad kyis sdug bsngal bar gzigs so// la la 'thab pa dang rtsod pas sdug bsngal bar gnas par gzigs so// la la 'chi ba dang 'pho ba dang ltung ba'i sdug bsngal bar gzigs so// gzhan yang stong gsum gyi stong chen po'i 'jig rten gyi khams 'di dag na/ gtor ma'i las bor nas rtog pa'i las kyis/ la la ni snying rje bral te gcig gis gcig 'jigs pa dang/la la ni gcig gis gcig snying rje dang bral te ded pa dang/ la la ni snying rje dang bral te gcig gis gcig gsod pa dang/ la la snying rje dang bral te gcig gi gcig za ba dang/ la la gti mug rmongs pa'i dbang du byas nas/ yang dag pa'i sgo 'gog shing/ log pa'i lam du khrid pa dang/ la la 'dod chags zhen pa'i dbang du byas nas/ sems can bsad pa'i sha za zhing khrag 'thung ba dang/la la nga rgyal dregs pa'i dbang gis/ zhe sdang chen po'i lus blangs pa dang/ mgo gcig la lus mang por sprul nas 'khor ma mo dang mkha' 'gro dang/ sha za la sogs pas bskor nas rab tu dregs pa'i brtul zhugs kyis/sangs rgyas kyi bka' la rgyab kyis phyogs nas dmyal ba'i srin po'i spyod pa dang/ snang snang ni sgrol/ rnyed rnyed ni za/ phrad phrad ni sbyor zhing nga'i gong na su yang med do zhes 'du shes skye bar byed pa rnams gzigs pas/rdo rje sems dpa' shin tu sngangs shing shin tu yang brgyal te 'gyel to// nga la mgon med do// nga la skyabs med do// nga la dpung gnyen med do zhes dmod du bor nas brgyal lo// de ltar brgyal sangs pa dang rigs lnga'i sangs rgyas rnams kyang stug pos brgyan par 'dus so// rdo rje sems dpa' brgyal sangs pa dang/ rigs lnga'i sangs rgyas rnams drung na 'khod pa mthong nas/ rigs lnga'i sangs rgyas rnams la stong gsum gyi stong chen po thams cad gtor ma'i snod dang/ gtor ma'i rdzas dang/ gtor ma'i lha yin na log par go ba mthong ngam zhes bka' stsal pas/ rigs lnga'i sangs rgyas rnams kyis gsol pa/rdo rje sems dpa' chen po/ de de bzhin no// de de bzhin te/ 'di drag po'i gtor mas 'dul ba'i dus la babs so zhes gsol pas/ rdo rje sems dpa' gtor ma la kha lo phyin ci log tu snang ba rnams la/thugs rab tu khros sku rab tu tshigs nas/ kun tu bzang po he ru ka la sogs pa ye shes kyi he ru ka bzhi chos kyi sku las bzhengs su gsol/ stong gsum gyi stong chen po 'jig rten gyi khams su gzigs pa las/thams cad gtor ma'i rang bzhin du lhun gyis grub te bzhugs pa la/ de la gtor mar mi rtog mi 'dzin par phyin ci log tu rtog cing 'dzin pas/ rigs gcig pa'i sangs rgyas kyi gtor ma las/'gro ba mang po sdug bsngal tha dad par snang ba gzigs nas/ ye shes kyi he ru ka rnams sku rab tu khros/ thugs rab tu 'tshigs nas/ dbu dgu pa dang/ dbu nyi shu rtsa gcig pa dang/ dbu gsum pa dang/phyag drug pa dang/ phyag bco brgyad pa dang/ phyag bzhi bcu rtsa gnyis pa dang/ zhabs bzhi pa dang/ zhabs brgyad pa dang/ 'bar ba'i cha lugs su mthong nas zhal nas kyang/ oM shrI he ru ka ru lu ru lu hUM/g+huh+ya shrI he ru ka ru lu ru lu hUM/ rak+sha shrI he ru ka ru lu ru lu hUM/ bi shwa shrI he ru ka ru lu ru lu hUM/ zhes sgra brjod cing gnas so// de nas rdo rje sems dpas kun tu bzang mo'i b+ha ga yum gyi mkha' las phyogs bzhir 'bar ba'i gzugs bltas nas/hUM hUM zhes brda' zhig mdzad pas/ phyogs bcu'i rgyal ba yab yum sras dang bcas pa thams cad yum gyi mkha' la gnas gcig tu tshogs nas/ stong gsum gyi stong chen po 'jig rten gyi khams su gzigs pa dang/yang gong ma ltar gzigs pas/ khro zhing 'tshigs par gyur par stug pos brgyan pa'i zhing khams su bde bar gshegs pa thams cad gdan 'dzom bka' bgros nas/zhi ba dang byams pa'i ting nge 'dzin gyis thul ba mi 'dra bas/ drag po'i las kyis 'dul ba'i dus la bab par gzigs nas/ ri rab rtser dpal rta mgrin so la btang ste/ dpal rta mgrin gyis sa blungs len gyis bltas pas/phyin ci log gi mthu brtas pa/ la la nyon mongs pa'i gnas na kha lo phyin ci log gi dbang bgyis/ la la dregs pa chen po'i gzugs dang cha byad du sprul nas/ dus gsum gyi dbang gis sha khrag za zhing/nyon mongs pa'i las zhe sdang drag pos rU tra nyid du gyur nas/ lus che la yan lag rags pa'i 'phras kyang/ sha za dang/ mkha' 'gro dang/ ma mo dang/ dbang phyug mas bskor nas/ shin tu gdul dka' bar gzigs pas/ slar log pa dang/ bcom ldan 'das kyis hUM zhes bco brgyad kyi 'gyur bzhengs nas/ rigs lnga la sogs pa yab yum gnas bsgyur/ he ru ka yab yum bco brgyad du bsgyur nas/stong gsum gyi stong chen po thams cad he ru ka yab yum gyis lhag gis khengs nas/ gtar tshan rtsi sbur la reg pa bzhin du rU tra dang dregs pa can thams cad reg pa tsam gyis bsgral nas/ 'byung ba yum gyi gtor gzhong du/dur khrod 'bar ba'i gtor ma gcal bkram nas/ nyon mongs pa zad par mdzad pa'i sku thams cad gnyis su med pa'i/ chos nyid kyi longs spyod bde ba chen po'i ngang du mdzad de/ chos nyid b+han d+ha'i snod du 'dod chags zad par mdzad pa'i phyir/ rak+ta'i dung khrag 'khrug cing gsol/ gzhan yang chos nyid kyi longs spyod la las sha la rol/ la las rus la rol/ la las khrag la rol/ la las tsit+ta la rol/la las ba su ta la rol/ la las dbang po lnga la rol/ chos nyid kyi rgyan du byas/ nyon mongs pa dpa' rtags su khyer/ la las zhing gi gdan dpa' rtags su khyer/ la las zhing gi g.yang gzhi/la las thod pa'i 'phreng ba/ la las khrag gi thig le/ la las zhag gi zo ris/ la las thal ba'i mtshan ma rtags su khyer ro// la las nyon mongs pa'i phyag cha rang la bskor te/ ral gri dang/ dgra sta dang/thang gshol dang/ kha T+wAM ga la sogs pa yang dpa' rtags su khyer ro// la las nyon mongs pa las rgyal ba dpa' rtags su khyer te/ khyung gi gshog pa dang/ sbrul gyi chun po dang/ glang po che'i ko ba rlon pa dang/stag gi sham thabs la sogs pa dpa' rtags su khyer nas/ khams gsum thig le chen pos btab/ dmyal ba dong sprugs nas/ rgyal ba'i dkyil 'khor byin dbab pas/ nyon mongs pa rang rgyud du dag/dug bdud rtsir bsgyur/ rU tra rdzas kyi gtor mar longs spyod pas/ de ni bdud bcom bgegs bsad pa'i gtor ma'o// gtor rgyud chen po las/ bdud rU tra btul ba'i le'u ste bcu pa'o//// de nas 'bras bu bsgral kyang sa bon gyi rtsa ba ma chod/ rU tra bsgral kyang ngan song gi sdug bsngal ma chod de/ nyon mongs pa'i skye bo dang/ sngags log par spyod pa rang rgyud du gnas pas/ da ni khro mos 'dul ba'i dus la bab par gzigs nas/'khor nye ba'i sras brgyad gau rI khro mo brgyad du sprul/ sems ma brgyad ni phra men chen mo brgyad du bsgyur/ thub pa drug dang yid dang chos ni spor byed chen mo brgyad du bsgyur/rgyu'i byang chub sems dpa' bcu drug dang/ 'bras bu'i byang chub sems dpa' bcu drug ni/ mkha' 'gro sum cu rtsa gnyis su bsgyur/ sgo ba rang log tu bsgyur nas dkyil 'khor du 'khod pa dang/cho 'phrul phrin las mdzad pa dang/ chos bstan pa dang/ zhi bas mi 'dul ba yang drag po'i phrin las mdzad nas/ rigs nges pa'i sras dang thabs cig pa gnyis su med pa'i de rnams kyang/ gtor ma'i rang bzhin du bsgyur zhing phrin las mdzad do// de nas kha lo phyin ci log tu bltas pas 'phags pa'i zhal nyi zer tsam yang mi mthong ba/ bsod nams kyi skal pa chung ba rnams la/ thugs rje sprul pa'i 'khor lha chen po dang/klu chen po dang/ gza' chen po dang/ gnod sbyin chen po dang/ rgyu skar la sogs pa dang/ dbang phyug nyi shu rtsa brgyad dang/ pho nya sum brgya drug cu dang/ ging chen bco brgyad dang/ ma bdun sring bzhi la sprul nas/de yang las ngan pa'i 'phro gcod cing/ gtor ma'i phrin las mdzad do// de bas kyang dam tshig nyams par gyur pa rnams la ni/ yang sprul chen po mkha' 'gro 'bum sder sprul nas/ 'jig rten gyi khams thams cad du/yul dang/ gnas dang/ ri dang/ nags dang/ mtsho dang/ g.ya' ri dang/ gangs rgyud la 'khod nas/ des kyang gtor ma'i phrin las su 'bul bar mdzad nas/ las ngan pa'i dbang gis dregs par mdzad do// gtor rgyud chen po las/ drag po'i gtor ma'i le'u ste bcu gcig pa'o//// de nas rdo rje sems dpas/ 'byung ba lnga dang snod thams cad gtor ma'i snod/ dngos po thams cad gtor ma'i rdzas/rnam par shes pa dang/ phung pos bsdus pa thams cad gtor ma'i mgron/ dug gsum dang nyon mongs pa thams cad gtor ma'i rtsa ba/ bdud dang rU tra dang dregs pa thams cad gtor ma'i rgyu/rgyud drug lam gyis bsdus pa thams cad gtor ma'i longs spyod/ kha lo phyin ci log gi ngan song gi sdug bsngal thams cad gtor ma'i phrin las/ de nyid gtor mar rtogs pa thams cad dngos grub ste/'di ltar rig pa'i dkyil 'khor dang/ 'di ltar rtogs pa'i rnal 'byor pa/ phyis grangs kyis 'byung ba dang/ 'di lta bu'i rgyud mthar gnas pa'i de'i don mkhyen pas gtor rgyud 'di lta bu 'byung ba yin pas/rdo rje sems dpa'i thugs chab phog par 'gyur ro// gtor rgyud chen po las/ rdo rje sems dpas thugs chab phog pa'i le'u ste bcu gnyis pa'o//// de nas yang kun tu bzang po bla na med pa'i he ru ka'i sku las/gsungayig 'bru 'di dag byung ngo// hUM hUM hUM/ hUM hUM hUM hUM hUM hUM/ hUM hUM hUM hUM hUM hUM hUM hUM hUM/ ha ha ha ha ha ha ha ha/ he he he he he he he he/ phaT phaT phaT phaT phaT phaT phaT phaT/ phaT phaT phaT phaT/ b+h+yo b+h+yo b+h+yo b+h+yo b+h+yo b+h+yo b+h+yo/ b+h+yo b+h+yo b+h+yo b+h+yo b+h+yo b+h+yo b+h+yo/ b+h+yo b+h+yo b+h+yo b+h+yo b+h+yo b+h+yo b+h+yo/ b+h+yo b+h+yo b+h+yo b+h+yo b+h+yo b+h+yo b+h+yo/ ra ra ra/ li li li bcu drug/ dza dza dza sum brgya drug cu/ ma ma ma bdun/ mi mi mi bdun/ a ha a ha bcu drug/ru lu ru lu b+h+yo la sogs pa sku las thon nas/ ye shes lngar byin gyis brlabs pas/ 'jig rten gyi khams thams cad g.yos rab tu g.yos/ 'ur 'ur rab tu 'ur/ chem chem rab tu chem par gyur nas/thams cad mgrin gcig tu bde ba'i tshogs mnos/ dam bcas nas dkyil 'khor gyi gdan du bting ngo// de nas gsung yig 'bru'i dkyil 'khor la/ ye shes chen po'i khyad par nyid las mi gzhan pa'i 'khor dang/'gro ba 'dul ba'i 'khor dang/ thugs rje sprul pa'i 'khor la sogs pa thams cad ma skyes pa las skye ba'i cho 'phrul du mthong bas/ ji ltar snang ba thams cad tshig gis ma bsdus pa gang yang med pa la/tshig thams cad yi ges ma bsdus pa gang yang med pas/ 'o na yi ge'i rang bzhin ni/ sangs ma rgyas pa gang yang med pas/ ji ltar snang ba'i chos thams cad sangs ma rgyas pa gang yang med pas/ kun gzhi yul gyi rnam pa la snang ngo// gzugs dang phung pos bsdus pa thams cad kha dog dang dbyibs su mi snang ba gang yang med la/ kha dog dang dbyibs thams cad lha'i dkyil 'khor du sangs ma rgyas pa gang yang med pas/rnam par shes pa'i phung po thams cad sangs ma rgyas pa gang yang med par dbang po sems kyi rnam pa la snang ngo// de ltar yul dang dbang po thams cad dbyings dang ye shes gnyis su med pa las/thabs dang shes rab 'du 'bral med par lhun gyis grub ste/ sku gsung thugs phyag rgya'i 'khor du lhun gyis grub ste/ sangs ma rgyas pa gang yang med do// gtor rgyud chen po las/ gsung yig 'bru'i le'u ste bcu gsum pa'o//// de nas rdo rje sems dpas kun tu bzang po la phyi nang gsang ba'i mchod pas mchod nas/ drag po'i gtor ma byin gyis brlabs pa'i sngags dang phyag rgya bstan du gsol/bcom ldan 'das kyis bka' stsal pa/ rdo rje sems dpa' drag po'i gtor ma byin gyis brlabs pa'i sngags dang phyag rgya 'di yid la zung zhigalag pa sor mo bsnol la mdzub mo mthe bong la gtugs/ mthe bong gnyis phyir bsgrengs la/ oM badzra pad+ma b+han+da la/ ba ling ta bi shwa tsakra b+h+rUM/ zhes brjod pa 'di ni gtor ma'i snod byin gyis brlabs pa'i sngags dang phyag rgya'o// de nas yang lag pa khu tshur bcangs la/ mche ba'i phyag rgya bcas la/ oM ma hA smrig ta dzA la ba liM ta maN+Da la khA hi/ zhes brjod pa ni/ sha'i gtor mar byin gyis brlabs pa'i sngags dang phyag rgya'o// de nas yang lag pa thal mo sbyar ba las/ rak+ta sgrengs pa'i tshul byas la gtor ma lag tu gsal/ma hA rak+ta dz+wa la maN+Da la kha raM khA hi/ ba ling ta zhes pa khrag gi gtor ma sna tshogs par byin gyis rlabs pa'i sngags dang phyag rgya'o// de nas yang lag pa so so'i phreng ba bcas la/ma hA keM ni ri ti dz+wa la maN+Da la khA hi ba ling ta ces brjod pa ni/ rus pa'i gtor mar byin gyis brlabs pa'i sngags dang phyag rgya'o// de nas yang lag pa thal mo sbyar la snying gar gtugs/ de nas thod phreng gi phyag rgya bcas la lus bskor/de nas lag pa rin po che 'bar bzhin du byas la gtor ma'i rdzas la gtugs la/ A+oM ka pA la b+ha su ta ri la grod khrod de/ b+h+yo b+h+yo ru lu ru lu hUM/ ba ling ta maN+Da la hUM/zhes brjod pa ni/ rmad du byung ba'i gtor mar byin gyis brlabs pa'i sngags dang phyag rgya'o// de nas gtor ma'i rgyud lag pa'i mthe bong gis/ mthe'u chung lag mthil du bkug la/ sor mo gsum gshibs te bsgrengs la/oM shag ti dum bu ma hA dz+wa la b+ha ling ta maN+Dal khA ram khA hi zhes brjod pa ni/ gtor ma sbyong ba'i sngags dang phyag rgya'o// de nas yang lag pa thal mo mnyam par sbyar la/ A+oM AHhUM swA hA/ muM laM mAM pAM t+yaM/ su ra ti zhes brjod pas/ gtor ma'i gzugs lha dang lha mo'i dkyil 'khor gnyis su med pa'i bde ba chen por byin gyis brlabs pa'i sngags dang phyag rgya'o/ de nas yang lag pa gzugs kyi me long 'dzin pa dang/sgra'i pi waM thogs pa dang/ dri'i spos kyi phyag rgya dang/ ro'i snod kyi phyag rgya dang/ reg gi na bza'i phyag rgya dang/ chos kyi mnyam pa'i phyag rgya dang/ de byi mo ha ra ti la sogs pa brjod pa ni/ gtor ma 'dod pa'i longs spyod du byin gyis brlabs pa'i phyag rgya'o/ de nas lag pa g.yas pas dkrug pa'i tshul du byas la/ g.yon pas thugs kar snod 'dzin pa'i tshul du byas pa ni/ he ru ka spyi'i dam tshig gi phyag rgya'o// de nas lag pa g.yon pas dung chen po stob pa la/ g.yas pas dkrug pa'i tshul du byas pa ni/ yum rnams spyi'i phyag rgya'o// de nas lag pa g.yon pas 'dzin pa ltar byas la/ g.yas pas za ba ltar byas pa ni/ khro mo brgyad kyi spyi'i phyag rgya'o// de nas lag pa g.yon pas gnon pa ltar byas la/ g.yas pas rngam pa'i tshul gyis 'bru tshugs su blta ba ni/ phra men brgyad spyi'i phyag rgya'o// de nas lag pa g.yas 'thor thabs su byas pa la/g.yon pas 'degs pa ltar byas nas bstan pa'i tshul du gnas pa ni/ sgo ba bzhi spyi'i phyag rgya'o// de nas lag pa g.yas pas gnon pa ltar byas la/ g.yon pa 'degs pa ltar byas pa ni/spor byed ma brgyad spyi'i phyag rgya'o// de nas lag pa g.yas pa rang rtags kyi phyag rgya 'phyar ba ltar byas la/ g.yon pa khrag 'thung ba'i tshul du byas pa ni/ dbang phyug ma nyi shu rtsa brgyad spyi'i phyag rgya'o// de nas lag pa g.yon bsnol la kha sbub la/ mthe'u chung gnyis 'khyud la sor mo phyi ma brkyang la snod la gtugs la/ oM badzra A ral+li/ e A ral+li/ sa ma ya A ral+li/ zhes brjod pa ni/ mkha' 'gro sum cu rtsa gnyis kyi phyag rgya'o// de nas lag pa gnyis snying ga g.yas g.yon du bzung la/ mchong zhing rgyug pa'i tshul du byas la/ A+oM badzra ha la ha la b+ha na b+ha na aM ku sha dzaHzhes brjod pa ni/ pho nya sum brgya drug cu spyi'i sngags dang phyag rgya'o// de nas lag pa g.yas pa mi g.yo ba'i tshul du byas la/ g.yon pa snying 'byin pa'i tshul du byas la/ A+oM maM maM badzra ma b+h+yo/ ma ma dun ting b+h+yo/ zhes brjod pa ni/ ma mo spyi'i sngags dang phyag rgya'o// de nas lag pa g.yon pa phyar la/ sor mo gzhan bkug srin lag bsgrengs la/ oM ti pa a ga dad do la du na ti na ma b+h+yo/ zhes brjod pa ni/ srid bzhi spyi'i sngags dang phyag rgya'o// de nas lag pa g.yon pa lcags kyu 'dzin pa'i tshul du byas la/g.yas pa 'jam dpal thogs pa'i tshul du byas/ oM badzra karta ri sha hUM/ zhes brjod pa ni/ ging bco brgyad kyi sngags dang phyag rgya'o// gtor rgyud chen po las/gtor ma byin gyis brlabs pa'i sngags dang phyag rgya'i le'u ste bcu bzhi pa'o//// de nas kun tu bzang pos bka' stsal pa/ rdo rje sems dpa' gtor rgyud chen po 'di/ phrin las dar zhing rgyas pa la sogs pa 'gro ba la rgyas par ston cig ces bka' stsal to// dbang bskur nas gsang sngags kyi lung ston par khas len pa'o// de nas rdo rje sems dpa' phrin las kyi gtor ma 'di rim par phye ste bshad pa'o// de la stong gsum gyi stong chen po 'jig rten gyi khams na/ kha dog rnam pa lnga zhig yod do// gzugs lnga zhig yod do// sku rnam pa lnga zhig yod do// ye shes lnga zhig shar ro// de la kha dog dkar por snang ba thams cad zhi ba'i gtor ma'o// de bzhin du kha dog ser por snang ba rgyas pa'o// kha dog dmar po dbang/ kha dog mthing ga drag po/ kha dog ljang gu las kun grub pa'i phrin las so// gzugs zlum po zhi ba'i gzugs so// gru bzhi rgyas pa'o// zla gam dbang/ zur gsum drag po'o// dbyibs tha dad pa las kun grub pa'i gzugs so// de bas na snod bcud gtor ma'i rang bzhin du gcig kyang/las tha dad pa'i dbang gis/ gtor ma lngar snang ngo// brgyar yang snang ngo// stong du yang sprul to// de bas na de bzhin gtor ma de rtogs na/ gang ltar 'dod pa de bzhin snang/ las thabs dbang gis 'chos par zad// phrin las sna tshogs gtor ma yin// de bzhin gtor ma ma rtogs nas// 'di las de bzhin de mi 'byung/ gcig tu yang gnas shing bstan par dka'// de rtogs lhun gyis grub pa la// zhi ba'i blo yis gsal bar phye// ci ltar brtags pa de bzhin snang// gang zhig gzhan la phan par byed pa la// 'bar ba'i gtum po ma rungs kyang// zhi bar 'dod na zhi bar byed// 'dod pa'i 'byor pa thams cad kun// rgyas par 'dod na rgyas par byed// khams gsum ma lus thams cad kun// dbang du 'dod na dbang du byed// ma rungs las kyis mnar ba rnams// mngon spyod las kyis sgrol bar byed// gzhan gyi las rnams thams cad kun// ci ltar 'dod pa gang dgar bsgyur// gtor rgyud chen po las/ phrin las rnam pa bzhi'i le'u ste bco lnga pa'o//// de nas gtor ma chen po 'di rnal 'byor pa rnams la phan par bya bar 'dod na/rnal 'byor pa la nad bzhi brgya rtsa bzhi'i skabs tshol ba dang/ rims dang/ shu ba dang/ 'brum bu la sogs pas 'jigs pa na/ rtsa ba'i gtor ma 'di rtogs pa'i skyes bus/ gzhung 'di las 'byung ba bzhin thams cad gtor mar bsngos na/ gtor ma las 'od 'phros pas/ nad kyi dngos po thams cad zhi bar byas nas/ chos nyid bde ba'i ror byin gyis brlabs nas/ nad thams cad dang/mdze dang phol mig zhi bar 'gyur ro// gzhan yang rnal 'byor pa rnams la bgegs rigs stong phrag brgyad cu'i glags bltas nas/ dngos grub kyi bar chad byed pa dang/ dus ma yin par 'chi bar byed cing/log par 'dren par byed na rtsa ba'i gtor ma 'di ltar rtogs nas phrin las kyi 'di ltar gtor ma btang na/ thams cad zhi bar ma zad/ slar dngos grub kyi chad stongs dang/ 'byor pa'i longs spyod 'bul bar byed do// de bzhin du rnam pa gang la la zhig la/ tshe dang longs spyod dang/ 'byor pa'i longs spyod la sogs pa med na/ rtsa ba'i gtor ma rmad du byung ba'i gtor ma chen po 'di 'khor rgyal ba rgya mtsho sras dang bcas pa la sbyin pa dang/rgyal ba rgya mtsho la mchod pa phul nas/ tshe dang bsod nams dang/ 'byor pa'i longs spyod la sogs pa thams cad rang yid la ci ltar 'dod pa bzhin du 'phel zhing rgyas par byed do// sngon gyi las kyi rnam par smin pa yang zad par 'gyur ro// rnal 'byor pas khams gsum gyi ma mo mkha' 'gro la sogs pa dbang du bya bar 'dod na yang/ rtsa ba rmad du byung ba'i gtor ma 'di/rgyal ba rgya mtsho dang bcas pa rnams la dgyes par phul ba dang/ zungs su bzung zhing phrin las bcol na/ ci ltar dbang du bya bar 'dod pa thams cad bran snying nye ba bzhin du las byed pa dang/thams cad la ci dga' bar dbang bsgyur bar 'gyur ro// rnal 'byor pa gang la la zhig ma rungs pas 'tshe ba dang bstan pa 'jig pa dang/ yongs la gnod pa dang/ dam nyams pa dang/ sku dgrar gyur pa yod na yang/rtsa ba rmad du byung ba'i gtor ma 'di rtogs par byas la bde bar gshegs pa 'khor rgyal ba rgya mtsho dang bcas pa rnams la gtor ma'i don gyis mchod pa 'di'i gzhung las byung ba bzhin mchod cing phul na/gang bsgral ba lta ci smos kyis sangs rgyas nyid kyang sgrol bar 'gyur ro// tha na yang rtsa ba'i gtor ma 'di zungs su bzung nas/ gang la dmigs pa'i yul phyogs sam khang pa'i gnas sam/ grong ngam lus la gtor na yang 'chi bar 'gyur ro// gzhan yang las sna tshogs pa ste/ tshe bsring ba dang/ dpal bskyed pa dang/ gdon bkar ba dang/ gter stsal ba dang/ yid la ci 'dod pa rnams 'grub par 'gyur ro// mkha' dbyings rnam par dag pa'i klong du mi zad pa'i gter sbas na/ zad pa med pa'i dngos grub kyi gter du 'gyur ro// gzhan yang 'di'i yon tan brjod kyis mi langs so// gtor rgyud chen po la/phrin las gang bya ba'i phan yon gyi le'u ste bcu drug pa'o//// de nas bcom ldan 'das dpal rdo rje sems dpas/ lha ma srin dang 'jig rten gyi bsod nams las grub pa rnams la/ 'di lta bu'i sgra ma brjed par gsungs so// nor bas mtshan mar bzung ba ni// 'byor pa'i longs spyod thams cad la// chags pas bzung nas gang spyad pa// 'o dod 'bod pa myong bar 'gyur// ci phyir zhe na gtor ma yin// de la chags na gtor ma 'ching rgyur 'gyur// ma chags grol na tshogs gnyis rdzogs// sangs rgyas mchod pa'i rgyan yin pas// ma chags sems kyis mchod byed cing// chags pa med pas rkyen du phul// de tshe sangs rgyas thag mi ring// chu rnams thams cad rgya mtshor babs// de phyir rgya mtsho nyid kyi ngang// bdag gi longs spyod gtor ma ste// de bzhin gtor ma nyid kyi rgyu// dper na 'jig rten lo tog bzhin// snga ma smin pas mi chog ste// phyis kyang rgyun mar smin pa bzhin// de bzhin chags pa med gtor na// rgyu 'bras rim gyis de ltar smin// de min na raka 'gro zhes bshad// de skad bya ba'i sgra 'jig rten bsod nams las grub pa'i lha dang mi rnams kyis thos pas/'jig rten gyi lha ma srin la sogs pa rnams kyis rang rang gi 'byor pa ci yod pa gtor mar phul nas/ 'bras bu mi 'khor ba'i smon lam 'debs pa 'di lta ste/lha'i rgyal po bsod nams las grub pa rnams/ gzugs sdug pa'i longs spyod kyi rdzas rnam pa mang po dang/ de bzhin sgra snyan pa dang/ dri zhim po dang/ ro bro ba dang/ reg bya khyad par du 'jam pa la sogs pa'i 'dod pa'i longs spyod rnam pa sna tshogs pa/dang po yang bcom ldan 'das rdo rje sems dpa'i sprul pa gtor ma lags te/ bdag cag lha'i rgyal po rnams kyis ngo mtshar bas/ bdag cag rnams gtor ma'i longs spyod dang rkyen du 'bul bas/phyogs bcu dus gsum sangs rgyas thams cad kyi spyan lam du/ chos nyid ma skyes pa'i gtor ma/ sangs rgyas rnams kyis ci ltar longs spyod pa de bzhin du 'byung bar gyur cigade ltar phul ba'i byin rlabs kyis/bdag dang mtha' yas pa'i sems can thams cad khams gsum du mi 'khor zhing/ ngan song gsum du mi gol bar/ chos nyid gtor mar sangs rgyas par gyur cig/dus nam zhig tshe na/ bdag cag lha'i rgyal po dregs pa can gyi rigs dang/ tshe tshad nad 'byung srid na yang/ dregs par mi byed cing/ 'dod pa 'di dag la ma chags nas/ thams cad gtor mar phul zhing sangs rgyas par smon lam 'debs par gyur cig/gal te de bzhin bdag cag gi rigs dang/ rgyud rnams kyis ma bgyis na/ bdag cag bdud rU tra dang 'dra bar 'gyur nas/ rgyu 'bras gol bas ngan song gi sdug bsngal rim gyis brgyud nas/bdag cag gi gtso bo dpal chen pos mngon sum du snying phyung ste bsgral nas/ dur khrod chen po'i gzhal yas khang dang/ thugs rje chen po'i rdzas su spyod/ bdag cag 'khor dang rigs rnams kyang/rang dbang med par dbang du bsdus nas khro bo chen po'i gdan du dus thams cad du 'dings par gyur cig/ ma hA sa ma ya de ba gu h+ya ho/ lha chen po rnams kyi snying la dam tshig shog cig zer cing/dam bcas nas smon lam 'debs so// de lta bu'i byin rlabs kyis 'dod pa'i yon tan phyogs bcur snang bar 'gyur ro// de nas yang 'dod khams dang/ gzugs khams la sogs pa'i lha'i bu thams cad kyis/lha'i longs spyod 'bru rnam pa sna tshogs pa dang/ me tog rnam pa sna tshogs pa dang/ rol mo'i rgyu la sogs pa dang/ lha'i longs spyod rnam pa sna tshogs pa thogs te/ kun kyang mgrin gcig tu 'di skad ces zer to// ci ltar snang ba lha'i longs spyod rnam pa sna tshogs pa/ da lta bdag cag longs spyod 'di dag thams cad/ ye dang po'am/ thog ma nas bcom ldan 'das rdo rje 'dzin pa'i gtor ma lags pas/sngar de bzhin du bdag cag rnams kyis ma 'tshal ba mthol zhing bshags so// de lta bu'i don gyis bdag cag gi sbyor ba 'di dag phyogs bcu dus gsum gyi 'phags pa rnams la/ gtor ma'i rkyen du 'gyur ro// mtha' yas pa'i sems can thams cad la yongs su khyab par gyur cigade'i mthu dang byin rlabs kyis bdag cag rnams gtor ma'i rang bzhin du mngon par rdzogs par sangs rgyas par gyur cigabadag cag rnams kyi rigs dang rgyud kyang de bzhin du gtor mar gtong zhing/smon lam 'debs par gyur cigagal te bdag cag rnams kyis rigs dang rgyud kyis de ltar ma bgyis nas dam las log na lcags kyi pha bong 'gril ba bzhin du dam log ste/gnas 'phos nas gsod pa la mi 'dzem pa dang/ thabs kyis bslu ba la 'dzem pa'i gnas su skyes nas/ de las kyang ngan song gsum du skye bar gyur cigaces dam bca' zhing smon lam 'debs so// de lta bu'i byin rlabs kyis 'jig rten gyi khams yongs su khyab cing snang bar 'gyur ro// de nas lha ma yin rnams kyis kyang/ go cha dang mtshon cha dang sman dang/skye 'khrungs la sogs pa gtor mar phul nas gong ma de bzhin du smon lam 'debs shing dam bca'o// de nas yang gnod sbyin rnams kyis kyang/ rin po che rnam pa sna tshogs pa dang/ 'bru'i chang dang btsos pa'i chang dang/sbyar ba'i chang la sogs pa chang rnam pa sna tshogs pa dang/ gos dang rgyan rnam pa sna tshogs pa gtor ma'i rgyan du phul nas/ gong ma bzhin du dam bca' zhing smon lam 'debs so// de nas yang srin po rnams kyis kyang/sha dang khrag dang rkang dang/ tshil bu la sogs pa gtor mar phul zhing dam bcas shing smon lam 'debs so// de nas yang klu rnams kyis kyang/ snying po rnam pa sna tshogs pa dang/ zho dang 'o ma dang mar dang thud la sogs pa gtor ma'i rgyan du phul nas dam bca' zhing smon lam 'debs so// de nas yang dri za rnams kyis kyang/ spos dang dri rnam pa sna tshogs pa gtor ma'i rkyen du phul nas dam bca' zhing smon lam 'debs so// de nas yang gshin rje rnams kyis kyang/ 'bru mar dang thod khrag la sogs pa rnams/ gtor ma'i rkyen du phul nas dam bca' zhing smon lam 'debs so// de bzhin du mi'i rgyal po rnams kyis kyang/rgyal srid rin po che sna bdun la sogs pa gtor ma'i rkyen du phul nas gong ma bzhin no// de bzhin du ma mo rnams dang/ sha za rnams dang/ rig sngags grub pa rnams dang/bgegs kyi rigs rnams dang/ lto 'phye dang/ mi'am ci dang/ 'gro ba rigs so so tha dad pa rnams kyis kyang/ rang rang gi 'byor pa dang longs spyod ci yod pa gtor ma'i rdzas su phul nas/ dam bca' zhing smon lam 'debs so// thams cad gtor ma'i rang bzhin du sangs rgyas par byed do// de lta bu'i don gyis thams cad gtor ma la gnas shing/ gtor ma'i rang bzhin du longs spyod par gyur to// de nas yang bcom ldan 'das rdo rje sems dpas 'di skad ces bka' stsal to// gsang sngags rnal 'byor la gnas pas/ mthar phyin pa gsang ba'i gtor ma 'di dag gar spyod pa de nyid dam la gnas pa'i rnal 'byor la/ci bsgo ba bgyis shing dran bzhin nyan pa dang/ bstan pa bsrung zhing de la bskyab par byos/ srid pa gcig gi chu la mi 'thung gang yang med// 'jig ten 'di yi dam la mi gnas gang yang med// gang zhig bka' bzhin mi byed dam la mi gnas na// khyed rnams gsod cing dga' las la byos// zhes bka' stsal pas/ 'jig rten gyi dregs pa dang lha ma srin rnams kyis de bzhin du bgyi'o// zhes dal 'byor gnyis dam mnos nas phyi rabs kyi rnal 'byor pa dam la gnas pa rnams kyi sdongs grogs byed par 'gyur la/dam la mi gnas pa rnams kyi bdud du bab par 'gyur ro// gtor rgyud chen po las/ rnal 'byor pas longs spyod gtor mar phul ba dang/ smon lam 'debs nas dam bcas pa'i le'u ste bcu bdun pa'o//// de nas bcom ldan 'das dpal kun tu bzang pos/ shin tu 'da' dka' ba'i dam tshig gi le'u 'di gsungs so// sems dpa' chen po dam tshig ni chos thams cad kyi thog mar 'gro ba ste/ de ci'i phyir zhe na/ dper na sa gzhi la skye 'khrungs smin par byed pa dang 'dra bas/ dam tshig 'di la sangs rgyas dang/chos kyi dngos grub thams cad 'byung ba'i rgyu'o// de yang dam tshig rtsa ba gang zhe na/ rdo rje slob dpon dang/ mched dang lcam bral lo// de la rdo rje slob dpon ni/ bdag nyid la rgyud gdams ngag 'chad pa de nyid du ma zad kyis/gang la shes pa can dang/ bsgoms shing dam la gnas pa mtha' dag go/ de ci'i phyir zhe na/ thugs ye shes kyi dgongs spyod gcig tu lhan ner gnas pa'o// mched dang lcam dral yang bdag nyid dang 'dres shing gcig pa de gcig pur ma zad kyis/bka' dang dam la gnas pa'i rnal 'byor gyi don spyod pa mtha' dag go/ de ci'i phyir zhe na/ gsang sngags mnyam pa chen po'i don la gcig cing dbye bsring med pa'o// de dag la dman sems dang 'phya sems dang/ 'thab cing rtsod pa dang/ bka' bslu zhing 'gal bar byed pa lta ci smos kyis/ bre mos blun po yang smra bar bya ba ma yin pa'o// dam de thub cing dam la gnas na/ gzhan gyi 'bad tsol ci ma byas kyang/ de lta nyid nas sangs rgyas pa la gdon mi za'o// gal te dam de ma thub na/ rtsol bsgrub kyi bsgom ri rab tsam byas kyang mnar med par skye ba la gdon mi za'o// sems dpa' chen po de ni dus nam zhig gi tshe na/ sku'i dam tshig de dag mi bsrung bar rtsol bsgrub dang rnam par dkar ba'i phyogs dag spyod par byed cing/ gcig gi 'og tu gcig mi chud par rtsod pa sha stag 'byung ste/de ni byas pa chud zos shing ngal ba tshi chad bar 'gyur ro// dper na srog pa rtsa dang snying rtsa nad kyis gang ba la/ 'tsho byed kyi sman pa mkhas pas kyang mi 'chos pa dang 'dra'o// des ni sdug bsngal ba dang/ 'chi ba'i dus na 'gyod pa drag por 'gyur te/ 'bras bu smin pas phan pa med do// gsung gi dam tshig sngags dang phyag rgya dang ldan par bya ba ste/ rtogs pa klong du gyur pa rnams kyis ni/ngag gi gleng brjod dang/ lus kyis sgul skyod sngags dang phyag rgyar ldan par 'gyur la/ phal pas dang du blangs nas gtsor byas pas ldan par 'gyur la/ tha na yang dus dang grangs mang nyung tsam du yang ldan par bya'o// dam de las mi 'da' bar dang du len na/ bka' rgya che ba lta ci smos kyis/ gang yin pa'i tshig gcig bzlas pa rang gis sku gsung thugs kyi dngos grub thob par 'gyur ro// gal te dam de la mi gnas na/ bka' phyi nang gi don mtha' dag gi don 'chang na yang/ skye bo phal pa dang mtshungs so// sems dpa' chen po dus nam zhig gi tshe na/ gsung gi dam tshig 'di la mi brtson par khe dang grags pa la sogs pas/mdo sde'i rigs bzung nas sde dang grangs mang po yod zer nas/ theg pa chen po la dpyas 'dogs shing/ sngags dang phyag rgya spangs nas/ rnal 'byor tshogs kyi longs spyod bkug nas za ba dang/khrims la gnas par mi byed cing/ mtshang tshig smra ba sha stag 'byung ste/ de la bdag nyid bslus shing smyos nas log pa'i lam du song bas/ dper na sol ba'i mthus dkar gyis mi 'gyur ba dang 'dra'o// chos log pa dang ngag gi sgrib pas mnar med pa yin no// de ci'i phyir zhe na/ chos nyid la ris su sangs rgyas rnams kyis ma gsungs so// thugs kyi dam tshig ni gsang ba'i man ngag gzhan la mi spel ba ste/de la gsang sngags rnal 'byor gyi chos/ gar song song du bab bab dang chal chol du snod med pa la mi smra ba dang/ gsang sngags kyi spyod pa dam rdzas bdud rtsir gyur pa rnams/ rang bzhin gyis spyad legs par byas te/'khu 'phrigs dang spang blang du ma song bar sba ba dang/ gsang sngags kyi phrin las sbyor sgrol dang/ glu tshig la sogs pa rnams/ skye bo dang dma' ba'i ris phal pa kun gyis ma mthong ma thos shing/yid la ma 'phrigs par bya ste/ ya ga sgro skur med par bya ba dang/ gsang sngags kyi rdzas lag ca yang de dang 'dra ba la/ gang zag srin po dang gnod sbyin kyi spyod pa byed pa'i sar/ bsgrub pa byed pa'i gnas dang/dus dang grogs dang/ gzungs ma la sogs pa de bzhin du gsang ba dang/ snying po dang lha rgyud dang/ mngon rtogs la sogs pa rnams kyang de bzhin du gsang ba dang/ gsang sngags spyod pa 'di dag gsang bar 'os pa/gsang bar gnyer gtad pa yin pas/ gsang sngags kyi don spyad legs shing/ gzhan gyis ya ga dang 'phya zhing skur par ma gyur par spyad de/ dper na seng ge gangs la rtsal 'gyings pa ltar gnas pa ni/gsang sngags kyi dam tshig ma nyams pa yin te/ des ni phyag rgya chen po'i rig 'dzin gyi gnas su sangs rgyas par 'gyur ba yin no// sems dpa' chen po dus nam zhig gi tshe/thugs kyi dam tshig 'di la mi nyan par/ thams cad slob dpon byed par 'dod pas/ nang rgyud gsang sngags kyi rnal 'byor la btsud pas/ gsang sngags kyi spyod pa ci 'dra ba ni kun la bstan cing cha yod par byas/gnas su gcig mi dgongs pa'i slob dpon mang po 'byung ba dang/ gsang sngags kyi don zab mo kun kyang shes shing bzos pa rnams kyis kyang/ la la khe dang grags par 'dod pa'i chos grwa dang slob pa btsug ste/snod yin rung min rung snang rgu bsdus te grangs mang du bstan pas gcig gi bka' bzhin du gcig gis kyang mi byed bzhin du/ slob ma mang po 'dus te slob dpon byed pa dang/ la la zang zing dang 'dod pa la chags pa'i phyir gsang sngags zab mo'i don khur du khur ba dang/khal du bkal te rgyal khams su snod yin rung min rung 'don pa dang tshong du brje zhing bka' 'chal bar gtor ba'i slob dpon byed pa la sogs pa rnams ni/bzang ngan dang nga khyod med par kun yo nyams su 'gyur bas/ kun dmyal bar 'gro la/ de'i tshe gsang sngags kyi don spyod pa'i rnal 'byor pa rnams kyi bsam pa mi 'grub pa dang/ dam tshig gi bya ra ba rnams mi 'go ba'i shugs kyis/ sngags mthu byin chung bar 'gyur/ de'i skyon gyis sku la bsdo ba'i dgra dang/ bgegs 'byung zhing/ nad kyi rnam pa la sogs pa mi 'dod pa rnams kyang 'byung ba dang/sngags pa gcig gis gcig 'thab cing rtsod pa dang/ mthu byin chung bas skye bo'i mtshon cha'i las byed pa dang/ sems can phal pa yongs kyis don 'di 'dra na chos brdzun no zhes zer zhing 'phya zhing ya gar gyur pa dang/theg pa 'og ma mdo sde spyod pa rnams kyang/ gsang sngags la 'phyas gdags byang dogs na/ shin tu yang 'gal ba'i dpyas chen po 'dogs pa dang/ de'i ya ga dang rnam par smin pas/de'i tshe sngags dang mdo sde phye ma med par/ so so skye bo tshun chad ma lus par ser bslad nas dmyal bar bungs ce cher 'gro bar byed do// de'i phyir dam tshig 'da' bar dka' ba ste/ 'di skad ces gsungs so// dam tshig dam tshig ces bya ba// 'da' bar dka' bas dam tshig ste// sangs rgyas bka' las gsungs pa'i tshig/ 'di las 'da' bar gang byed pa/ lha yang 'das na brlag par 'gyur// sems can 'das na smos ci dgos// sku yi dam tshig ma g.yos pa'o// gsung gi dam tshig mi 'gyur pa'o// thugs kyi dam tshig ma yengs pa'o// yan lag dam tshig lnga lnga rnams// lhan ne bar yang yid la 'char// ma 'das 'phags pa'i spyod yul yin// de tshe 'das na mnar med brlab// gzhan yang dam tshig ces bya ba// gsang sngags don spyad rnal 'byor pas// lus ngag yid kyi sgo gsum nas// skye bos spyad par yang mi bya// de tshe spyad na nyams pa yin// bzlas brjod ting 'dzin la sogs pa// bar chod bgegs dang bya ra ma// sngags 'chang rnams kyis spyad mi bya// de dag bar chad byed pas na// de dag bsgrims la nyams mi bya// gang zhig nyams par byed pa dang// rang sems rtag par blta ba rnams// dam la log par byed pa yi// drung na su yang mi 'dug la// gzhan gyis mthong bar ma byas kyang// dam tshig dbang po snying la 'dug/de dang 'dra bar blta ba ni// grangs kyis mi la kun gyis mthong// de bzhin gzigs pa'i sems gyis la// ma 'da' dam la gnas par gyis// sa bcu mthar phyin sangs rgyas kyang// dam tshig 'da' bar mi byed na// rnal 'byor bsgrub pas ci ste 'da'// 'jigs pa'i skyabs ni dam tshig mchog/ dam tshig dbang phyug nyid kyang mi 'da' na// ma tshogs mkha' 'gro ci ste 'da'// lhas kyang lha la dbang mi za// mis kyang de bzhin dam mi 'da'// dam tshig ma nyams de bsrungs pa// sku gsung thugs kyi phyag rgya che// rnal 'byor kun tu bskyed pa'o// thams cad yongs kyi ma zhes bya'o// rgyal ba'i dkyil 'khor gsal bar brtsegs// gtor rgyud chen po las// dam tshig bsrung ba'i le'u ste bco brgyad pa'o//// de nas sems dpa' chen pos/ dam tshig 'di dag ma nyams te bsrungs pa'i phan yon ni// 'jig rten gyi khams 'dir tshe ring zhing/'byor pa'i longs spyod la sogs pa// yid la bsam pa bzhin 'grub pa dang// 'gro ba gzhan la yid las byung ba'i dran tshig bzlas kyang de la phan pa dang/ bsgo ba bzhin nyan pa dang/ dgra dang bgegs dang bar du gcod pa rnams kyang bdag nyid kyis ma bskul bar rdul phra mo tsam yang ma lus par 'gro ba dang/ ma tshogs mkha' 'gro la sogs sprin phung bzhin du gtibs nas/ bdag gar 'gro bar lus dang grib ma bzhin du 'grogs nas/ ci bsgo ba bran snying nye ba bzhin du nyan pa dang/ gzhan yang dam la gnas pa rnams kyis/ ci 'dod pa'i longs spyod spel bar byed pa dang/ 'jig rten phyi mar kun tu bzang po dang skal ba mnyam par 'gyur ro// dam tshig ma nyams par bsrungs na/ bka' tshig gcig bzlas ma shes kyang sangs rgya'o// gzhan yang dam tshig bsrung ba'i yon tan ni/ grangs 'dir brjod kyis mi langs te mtha' yas so// gtor rgyud chen po las/ dam tshig bsrung ba'i yon tan gyi le'u ste bcu dgu pa'o//// de nas dpal kun tu bzang pos/ yan lag gi dam tshig 'bum sde las/yan lag gi dam tshig brgya rtsa brgyad du bsdus te bka' stsal pa 'di lta ste/ dang po ting nge 'dzin gyi rtsal 'byongs par byas la/ cir snang ba thams cad bsgral la/ rgyal ba ma mo'i thugs dam bskul zhing/bde bar gshegs pa'i sras su byas nas/ bdag dang gcig pa'i dbang gis/ dam tshig las mi 'da' bar bya ba dang/ zhing bcur gyur pa skad cig tsam yang mi bzhag par bsgral la dam tshig las mi 'da' bar bya ba dang/mtshan nyid theg pas mi 'dul bas de yang bsgral la dam tshig las mi 'da' bar bya ba dang/ gzung 'dzin gyi mthu brtas pa'i rU tra rnam pa gsum po bsgral la dam tshig las mi 'da' bar bya ba dang/gsang sngags la gal du 'jug cing bka' nges pa'i don nub par byed pa bsgral la dam tshig las mi 'da' bar bya ba dang/ yul chos nyid du sbyor zhing thabs dang shes rab kyi dam tshig las mi 'da' bar bya ba dang/'byung ba chen po'i klong gang la sbyor zhing/ thabs dang shes rab kyis dam tshig las mi 'da' bar sbyor zhing/ pho rang bzhin med pa'i bar du sbyor zhing thabs dang shes rab kyi dam tshig las mi 'da' bar bya ba dang/mo rigs gzungs ma mtshan dang ldan par sbyor zhing thabs dang shes rab kyi dam tshig las mi 'da' bar bya ba dang/ ser sna can gyi nor ma byin par blangs la tshogs dang gtor ma'i mchod par phul la dam tshig las mi 'da' bar bya ba dang/bkra shis dag pa'i rdzas ma byin par blangs la/ dkyil 'khor chen por longs spyod ste dam tshig las mi 'da' bar bya ba dang/ nag po'i phyogs nas mi mo mtshan dang ldan pa ma byin par blangs pa la/byang chub sems kyi dngos grub blangs shing dam tshig las mi 'da' bar bya ba dang/ bka' nges pa'i don mi bslu ba sbas pa rnams ma byin par blangs la yid la bzhag cing dam las mi 'da' bar bya ba dang/rdo rje slob dpon dang mched dang lcam dral la gnod pa byed du 'ong ba la rdzun du smras la dam las mi 'da' bar bya ba dang/ dam tshig nyams shing dam med pa rnams la rdzun du smras la dam las mi 'da' bar bya ba dang/skye bo phal pas gsang sngags kyi spyod pa rlabs po che 'dri na rdzun du smras la dam tshig las mi 'da' bar bya ba dang/ lung med par nges pa'i bstan bcos rnams la rdzun du smras la dam tshig las mi 'da' bar bya ba dang/gti mug spang yang mi spang bar chos nyid du rtogs par byas la dam las mi 'da' bar bya ba dang/ gti mug de bzhin gshegs pa'i sku yin par byas la dam tshig las mi 'da' bar bya ba dang/gti mug stong pa nyid kyi ye shes yin par byas la dam tshig las mi 'da' bar bya ba dang/ gti mug spangs pas sangs rgyas su 'grub par dka' ba'i rtogs par byas la/dam tshig las mi 'da' bar bya ba dang/ zhe sdang spang yang mi spang bar zhe sdang chos nyid du rtogs par byas la/ dam tshig las mi 'da' bar bya ba dang/ zhe sdang de bzhin gshegs pa'i thugs yin pa'i don rtogs par byas la/dam tshig las mi 'da' bar bya ba dang/ zhe sdang me long lta bu'i ye shes yin pa'i don rtogs par byas la/ dam tshig las mi 'da' bar bya ba dang/ zhe sdang spangs na sangs rgyas su 'grub par dka' ba'i don rtogs par byas la/ dam tshig las mi 'da' bar bya ba dang/ 'dod chags spang yang mi spang bar 'dod chags chos nyid du rtogs par byas la/ dam tshig las mi 'da' bar bya ba dang/'dod chags de bzhin gshegs pa'i gsung yin pa'i don rtogs par byas la/ dam tshig las mi 'da' bar bya ba dang/ 'dod chags so sor rtogs pa'i don de rtogs par byas la/dam tshig las mi 'da' bar bya ba dang/ 'dod chags spangs na sangs rgyas su 'grub par dka' ba'i don de rtogs par byas la/ dam tshig las mi 'da' bar bya ba dang/ nga rgyal spang yang mi spang bar/ nga rgyal chos nyid du rtogs par byas la/ dam tshig las mi 'da' bar bya ba dang/ nga rgyal de bzhin gshegs pa'i yon tan yin pa'i don de rtogs par byas la/ dam tshig las mi 'da' bar bya ba dang/ nga rgyal mnyam pa nyid kyi ye shes yin pa'i don de rtogs par byas la/dam tshig las mi 'da' bar bya ba dang/ nga rgyal spangs na sangs rgyas su 'grub par dka' ba'i don de rtogs par byas la/ dam tshig las mi 'da' bar bya ba dang/phrag dog spang yang mi spang bar phrag dog chos nyid du rtogs par byas la/ dam tshig las mi 'da' bar bya ba dang/ phrag dog de bzhin gshegs pa'i phrin las yin pa'i don de rtogs par byas la/dam tshig las mi 'da' bar bya ba dang/ phrag dog bya ba nan tan gyi ye shes yin pa'i don de rtogs par byas la/ dam tshig las mi 'da' bar bya ba dang/ phrag dog spangs pas sangs rgyas su 'grub par dga' ba'i don de rtogs par byas la/dam tshig las mi 'da' bar bya ba dang/ dri chen dug bdud rtsir sgyur ba'i rtsa ba yin pa'i don de rtogs par byas la/ dam tshig las mi 'da' bar bya ba dang/ dri chen dang sbyar na dug sel ba'i bdud rtsi yin pa'i don de rtogs par byas la/ dam tshig las mi 'da' bar bya ba dang/ dri chen mkhris pa brgya rtsa brgyad dang sbyar na/ mdze nad sel ba'i bdud rtsi yin pa'i don de rtogs par byas la/dam tshig las mi 'da' bar bya ba dang/ dri chen bsten cing dang du blangs na/ rnam par snang mdzad kyi dngos grub 'thob pa'i don de rtogs par byas la/ dam tshig las mi 'da' bar bya ba dang/byang chub sems dug bdud rtsir sgyur ba'i rtsa ba yin pa'i don de rtogs par byas la/ dam tshig las mi 'da' bar bya ba dang/ byang chub sems dang shel ga bur du sbyar na rus pa sra zhing mkhregs la ring du 'gro ba'i don de rtogs par byas la/dam tshig las mi 'da' bar bya ba dang/ byang chub sems dang snying zho shar bsres na sems gsal zhing dbang po rno ba'i bdud rtsi yin pa'i don de rtogs par byas la/ dam tshig las mi 'da' bar bya ba dang/byang chub sems bsten cing dang du blangs na/ rdo rje sems dpa'i dngos grub 'thob par 'gyur ba'i don de rtogs par byas la/ dam tshig las mi 'da' bar bya ba dang/ mAng sa dug bdud rtsir sgyur ba'i rtsa ba yin pa'i don de rtogs par byas la/dam tshig las mi 'da' bar byas dang/ mAng sa zos pas mthu byin che bar 'byung ba'i don de rtogs par byas la/ dam tshig las mi 'da' bar bya ba dang/mAng sa spyod snag dang sbyar na rlung nad sel ba'i bdud rtsi yin pa'i don de rtogs par byas la/ dam tshig las mi 'da' bar bya ba dang/ mAng sa bsten cing dang du blangs na/ rin po che'i rigs kyi dngos grub thob par 'gyur ba'i bdud rtsi yin pa'i don de rtogs par byas la/dam tshig las mi 'da' bar bya ba dang/ pad+ma rak+ta dug bdud rtsir sgyur ba'i rtsa ba yin pa'i don de rtogs par byas la/ dam tshig las mi 'da' bar bya ba dang/pad+ma rak+ta mu 'dza' ra tu sbyar na glo'am cham pa'i nad sel cing/ mdog sdug pa'i bdud rtsi yin pa'i don de rtogs par byas la/ dam tshig las mi 'da' bar bya ba dang/ pad+ma rak+ta shing zi ra dang sbyar na mdangs dang ldan zhes bad mkhris sel ba'i bdud rtsi yin pa'i don de rtogs par byas la/dam tshig las mi 'da' bar bya ba dang/ pad+ma rak+ta bsten cing dang du blangs na snang ba mtha' yas kyi dngos grub thob par 'gyur ba'i bdud rtsi yin pa'i don rtogs par byas la/dam tshig las mi 'da' bar bya ba dang/ dri chu dug bdud rtsir sgyur ba'i rtsa ba yin pa'i don rtogs par byas la/ dam tshig las mi 'da' bar bya ba dang/ dri chu shing pu ri'i lo ma dang sbyar na/ lce bde zhing dbyangs snyan par 'gyur ba'i don de rtogs par byas la/ dam tshig las mi 'da' ba bya ba dang/ dri chu nI lo t+pal la dang sbyar na glo dang gag pa'i nad sel ba'i don rtogs par byas la/dam tshig las mi 'da' bar bya ba dang/ dri chu bsten cing dang du blangs na/ don yod grub pa'i dngos grub thob par 'gyur ba'i bdud rtsi yin pa'i don rtogs par byas la/dam tshig las mi 'da' bar bya ba dang/ bdag gi phung po lnga rgyal ba rigs lnga'i rang bzhin yin pa rtogs par byas la/ dam tshig las mi 'da' bar bya ba dang/ bdag gi 'byung ba lnga rigs kyi yum lnga'i rang bzhin yin par rtogs par byas la/dam tshig las mi 'da' bar bya ba dang/ bdag gi rnam par shes pa'i tshogs brgyad byang chub sems dpa' brgyad yin par rtogs par byas la/ dam tshig las mi 'da' bar bya ba dang/bdag gi yul bzhi dang dus bzhi sems ma brgyad kyi rang bzhin yin par don rtogs par byas la/ dam tshig las mi 'da' bar bya ba dang/ bdag gi phyin ci log bzhi khro bo bzhi yin pa'i don de rtogs par byas la/dam tshig las mi 'da' bar bya ba dang/ bdag gi chad par ma yin sogs mu bzhi khro mo bzhi'i rang bzhin yin pa'i don rtogs par byas la/ dam tshig las mi 'da' bar bya ba dang/bdag gi 'jig rten drug gi cha 'dzin pa drug thub pa drug gi rang bzhin yin pa'i don rtogs par byas la/ dam tshig las mi 'da' bar bya ba dang/ bdag gi yul phar snang ba thams cad chos bya ba mo kun tu bzang mo yin pa'i don rtogs par byas la/dam tshig las mi 'da' bar bya ba dang/ bdag gi dbang po tshur snang ba thams cad kun tu bzang po'i rang bzhin yin pa'i don de rtogs par byas la/ dam tshig las mi 'da' bar bya ba dang/ bdag gi khams dang skye mched dkyil 'khor lha'i rang bzhin yin pa'i don rtogs par byas la/ dam tshig las mi 'da' bar bya ba dang/ bdag gi rdzas dang yo byad tshogs dang gtor ma'i rang bzhin yin pa'i don rtogs par byas la/dam tshig las mi 'da' bar bya ba dang/ bdag gi yan lag chen po bdun ma mo bdun yin pa'i don rtogs par byas la/ dam tshig las mi 'da' bar bya ba dang/bdag gi yan lag bzhi sring mo bzhi yin pa'i don de rtogs par byas la/ dam tshig las mi 'da' bar bya ba dang/ bdag gi sgal tshigs nyi shu rtsa brgyad dbang phyug nyi shu rtsa brgyad kyi don de rtogs par byas la/dam tshig las mi 'da' bar bya ba dang/ bdag gi mtshan sum cu rtsa gnyis mkha' 'gro ma sum cu rtsa gnyis yin pa'i don de rtogs par byas la/ dam tshig las mi 'da' bar bya ba dang/bdag gi gur tshigs bco brgyad ging chen po bco brgyad kyi rang bzhin yin pa'i don de rtogs par byas la/ dam tshig las mi 'da' bar bya ba dang/ bdag gi nam tshong gi rtsib ma bzhi gsang ba'i yum bzhi'i rang bzhin yin pa'i don de rtogs par byas la/dam tshig las mi 'da' bar bya ba dang/ bdag gi rus 'go sum brgya drug cu pho nya sum brgya drug cu'i rang bzhin yin pa'i don de rtogs par byas la/dam tshig las mi 'da' bar bya ba dang/ bdag gi phyin ci log lnga sku lnga'i rang bzhin yin pa'i don rtogs par byas la/ dam tshig las mi 'da' bar bya ba dang/ bdag gi kha dog lnga ye shes lnga'i rang bzhin yin pa'i don de rtogs par byas la/dam tshig las mi 'da' bar bya ba dang/ bdag gi lam rgyud lnga dpa' bo 'bru lnga'i rang bzhin yin pa'i don de rtogs par byas la/ dam tshig las mi 'da' bar bya ba dang/bdag gi phyogs bzhi dbus dang lnga/ gzhal yas chos kyi dbyings yin pa'i don rtogs par byas la/ dam tshig las mi 'da' bar bya ba dang/ bsgral ba'i zhing bcu la ngag brlang por smras la/ dam tshig las mi 'da' bar bya ba dang/yang dag pa'i don la phyin ci log tu khrid pa la ngag brlang por smras la/ dam tshig las mi 'da' bar bya ba dang/ las log par byed pa rnams la ngag brlang por smras la/ dam tshig las mi 'da' bar bya ba dang/ma rtogs pa rnams la chos zab mo'i ngag brlang por smras la/ dam tshig las mi 'da' bar bya ba dang/ bdag gi sems sangs rgyas yin pa'i don rtogs nas 'grub par byas la/dam tshig las mi 'da' bar bya ba dang/ lus dang phung po rgyal ba rigs lngar grub par byas la/ dam tshig las mi 'da' bar bya ba dang/ gnam sa ri brag khams dang skye mched lha'i dkyil 'khor du grub par byas pas/dam tshig las mi 'da' bar bya ba dang/ phyi nang gnyis yul dang dbang po yid dang chos su tshig chad grub par byas la/ dam tshig las mi 'da' bar bya ba dang/ phyi nang snod bcud chos kyi skur grub par byas la/dam tshig las mi 'da' bar bya ba dang/ dam rdzas lnga dug bdud rtsir grub par byas la/ dam tshig las mi 'da' bar bya ba dang/ bsgral ba'i sems can rigs nges pa'i sras su grub par byas la/ dam tshig las mi 'da' bar bya ba dang/ sbyor ba'i yum shes rab kyi pha rol du phyin mar grub par byas la/ dam tshig las mi 'da' bar bya ba dang/ lha'i sku mdog dang phyag mtshan ting nge 'dzin gyis gsal bar byas la/dam tshig las mi 'da' bar bya ba dang/ mtha' yas pa'i sems can thams cad bu la ma byams pa bzhin bsams la thugs rjes zin par byas la/ dam tshig las mi 'da' bar bya ba dang/gsang sngags gsang ba'i rgyu khe dang grags pa spangs shing dam tshig las mi 'da' bar bya ba/ bzlas brjod dang 'phro 'du mngon du grub par byas la/ dam tshig las mi 'da' bar bya ba dang/ 'phags pa rnams la tshogs dang gtor ma rab kyis nyin mtshan rgyun chad pa med par mchod pa phul la/dam tshig las mi 'da' bar bya ba dang/ 'bring gis nyin lan re mchod par phul la/ dam tshig las mi 'da' bar bya ba dang/tha na yang lo dang zla bar ma 'das par mchod pa phul la/ dam tshig las mi 'da' bar bya ba dang/ lo zla la bskang la dam la mi 'da' bar bya ba dang/ nyams pa yod na sor bcug la dam tshig las mi 'da' bar bya ba dang le lo btang snyoms la sogs pa spangs la/dam tshig las mi 'da' bar bya ba dang/ 'phya bzhad dang gnyid dbang du mi btang bar dam tshig las mi 'da' bar bya ba dang/ bsgrub cing dang du blangs te dam tshig las mi 'da' bar bya ba dang/blta bas gnyis su med pa'i don rtogs par byas la/ dam tshig las mi 'da' bar bya ba dang/ spyod pas don dang mi 'gal zhing yongs kyis ma dpyad par byas la/dam tshig las mi 'da' bar bya ba dang/ brgya rtsa brgyad po 'di dag bsrungs na/ bdud rtsi yin no// ye shes yin no// sangs rgyas yin no// rdo rje sems dpa' yin no// kun tu bzang po yin no// dus gsum gyi sangs rgyas thams cad kyang/tshig chad/ dam tshig 'di bsrungs pas sangs rgyas pa las gzhan ma yin pas/ sangs rgyas thams cad kyis dam tshig la bsngags so// dam tshig 'di ma bsrungs na/ dug 'thungs pa dang 'dra ste/chos spyod gang shes kyang mnar med pa'i dmyal bar 'gro'o// gtor rgyud chen po las/ yan lag gi dam tshig brgya rtsa brgyad kyi le'u ste nyi shu pa'o//// rdo rje sems dpa' gzhan yang/dam tshig nyams par gyur pa'i mtshan ma 'di'o// rnal 'byor pa mi chos kyi blon po lta bu'i las byed pas/ thabs kyis gzhan smad pa dang/ 'thab cing rtsod pa dang/ phyogs 'chos pa'i las/ rlabs dang che 'dod pa ni dam tshig nyams par gyur pa'i mtshan ma'o// rnal 'byor pa gdeng ma zin par/ rigs rgyud kyi bu sdud cing/ yongs kyi 'debs pa'i dbang gis/ dza gad kyi dbang btsan par byas nas dregs pa'i khar btang nas/snying rje dang bral ba rnams ni dam tshig nyams pa'i mtshan ma'o// gsang sngags gsang ba'i bka' dar drags par kun spyod na yang/ dam tshig nyams par gyur ba'i mtshan ma'o// lta ba la phyogs ris su bltas na yang/dam tshig nyams pa'i mtshan ma'o// chos la bzang ngan du 'dzin pa yang dam tshig nyams pa'i mtshan ma'o// thugs rje la dbri bkol du byed na yang dam tshig nyams pa'i mtshan ma'o// rnal 'byor gyi chos la ris gnyis su 'dzin par byed na yang dam tshig nyams pa'i mtshan ma'o// mtshan nyid ngan pa rnams la rnal 'byor gyi chos bstan na yang/ dam tshig nyams pa'i mtshan ma'o// phongs shing nyam thag pa la spyod pa rtsing por spyad na yang/dam tshig nyams par gyur pa'i mtshan ma'o// gtor rgyud chen po las/ dam tshig nyams par gyur pa'i mtshan ma bstan pa'i le'u ste nyi shu rtsa gcig pa'o//// rdo rje sems dpa' gzhan yang dam tshig nyams pa'i spyod pa ni/ rgyu la 'bad pa med par 'bras bu la re che bar 'jog pa dang/ rang gi byas pa'i 'bras bu med par gzhan la dngos su re ba dang/ ma bsgoms par dngos grub thob tu re ba dang/ dam tshig ma bsrungs par mthu che bar 'dod pa dang/ bslabs shing rdo rje ma sbyangs par mkhas shing btsun par 'dod pa dang/ phyi nang gi dbang ma bskur bar slob dpon byed pa rnams ni/dam tshig nyams pa'i spyod pa yin no// mkhas pa la mi mkhas pa'i sgro 'dogs pa yang/ dam tshig nyams pa'i skyon dang spyod pa yin no// mi mkhas pa la mkhas pa'i che 'byin na yang/ dam tshig nyams pa'i spyod pa yin no// bka' mnos pa'i slob dpon khungs bsubs nas dad pa'i phyogs nas khungs 'byin par byed na yang/ dam tshig nyams pa'i spyod pa byed pa yin no// gzhan bka' ma nor bar spyod pa'i chos la min zhes smras nas/bka' min pa la legs par ston pa yang/ dam tshig nyams pa'i spyod pa yin no// sngon gyi rgyal ba'i bka' brgyud bsnubs te/ me la bsreg cing gang zag grub pa ma thob pas mi tshig tu legs par bstan pa dag la bstod cing dar bar byed na yang/dam tshig nyams pa'i spyod pa byed pa yin no// man ngag nges pa'i don gzhan mkhas pas mdzad par yid ches kyang/ sems can gyi lus su che chung bzung nas/de mi nyan par byed na yang/ dam tshig nyams par gyur pa'i spyod pa yin no// bka'i zhal chab gyur pa thob par gyur pa la/ don gyis mi nyan par thob kyis bros shing rang ngom par byed na yang/nyams par gyur pa'i spyod pa yin no// rnal 'byor gyi mchod cha la sogs pa gcig la gcig 'grol ba mnog cing/ gsang bar byed na yang/ nyams par gyur pa'i spyod pa yin no// snod mi blta bar 'khor dang sde mang por 'dod pas/gsang sngags kun la grags par byed pa yang/ nyams par gyur pa'i spyod pa yin no// tshig gi zur khyod dang nga ru 'byed par byed cing/ che ngag dag 'thon par byed pa yang/nyams par gyur pa'i spyod pa yin no// gzhan gyi yon tan ci yod pa ma grags shing subs par dga' la/ skyon ci yod pa brjod par byed na/ nyams par gyur pa'i spyod pa yin no// rang ni grub cing mtho bar 'dod la/gzhan ni dmas shing ma grub par 'dod na/ nyams par gyur pa'i spyod pa yin no// 'di ltar spyod pa legs su re ste ma legs so// 'di ltar spyod pa grub tu re ste mi 'grub bo// 'di ltar spyod pa mkhas su re ste mi mkhas so// 'di ltar spyod pa spyad zhing shes su re ste/ mi sbyang zhing glen no// de ci'i phyir zhe na/ chos nyid ma rtogs shing mi chos kyi sgrin du re bas/ ngan song gi tshogs sogs pa yin no// gzhan yang nyams pa'i spyod pa ni/ gnas nyams pa'i spyod pa grong gseb tu gsang sngags spyod pa dang/ mi nag gi sar spyod pa dang/ dam tshig nyams shing med pa dang 'dres par spyod pa dang/ gsang sngags kyi dam rdzas skye bo yongs kyis mthong zhing cha yod par byas pa yang/ nyams par gyur pa'i spyod pa yin no// gtor rgyud chen po las/ dam tshig nyams pa'i spyod pa bstan pa'i le'u ste nyer gnyis pa'o//// rdo rje sems dpa' gzhan yang dam tshig nyams pa'i rtags ni/ 'jig rten khams 'dir yang mdze dang shu ba dang/ 'brum bu la sogs pa nad ngan pa sna tshogs pa 'byung ba dang/ bgegs dang bsam sbyor ngan pa'i las la sogs pa'i bar chod 'byung ba dang/mu ge dang ya nga ba sna tshogs nyams su myong ba dang/ bu dang chung ma 'khor la sogs pa dang 'bral ba dang/ rgyal srid dang longs spyod la sogs pa 'byor pa rnams mi rtag par 'gyur ba dang/rgyal po dang blon po la sogs pa'i bka' chad pa dang/ na bas 'byung ba dang/ mi yang mnyes par 'dzug par 'byung na/ de dag rgyal ba dang/ lo phyug mi legs shing yid du mi 'ong ba sna tshogs pa dag byung na/nyams pa'i snga rtags yin pas/ gso zhing bskyar ba'i cho ga bya/ 'di dag nyams pa ma tshor bar byung na yang/ dus snga ma nyams pa yin pas bskang gso'i cho ga la sogs pas dag par bya'o// de dag bskang dang ngan song gi sdug bsngal nyams su mi myong ngo// gang dag nyams par gyur pa la/ rtags 'di dag mi 'byung bar slar legs pa dag 'byung bar byed na/ mnar med par skye bar 'gyur ro// mnar med pa las thams cad du thon par mi 'gyur ro// sdug bsngal gyi rgyun las ma gtogs pa/ bde ba skad cig tsam yang 'jug pa'i skabs med pas/ phyi ma'i bde ba 'di ru smin nas/phyi ma phan chad la bde ba spyod pa'i skabs med do// mnar med pa la shin tu nyon mongs shing 'khod do// gang dag nyams pa 'dir byung ba rnams ni/ 'bras bu 'dir smin pas phyi ma la mi 'gyur ba'i tha tshig go/gtor rgyud chen po las/ nyams pa'i snga rtags bstan pa'i le'u ste nyer gsum pa'o//// de nas kun tu bzang pos dam tshig nyams pa'i skyon bstan pa 'di ched du brjod do// sku'i dam tshig rdo rje slob dpon dang/mched dang lcam dral la mnar sems dang/ 'phya sems tsam du yang spyad par mi rung na/ gnod pa dngos su byed pa dang/ 'khu zhing ldog pa dang/ zang zing gi don la brkam pa dang/ 'thab cing rtsod pa lta ci smos te/ sku'i dam tshig nyams pas sol dum la ljon shing mi skye ba dang 'dra ste/ bskal pa gcig gi bar du sems can dmyal bar skye zhing/ gzhan dge ba'i rtsa ba ci byas kyang phan med pa dang/gsung gi dam tshig sngags dang ting nge 'dzin bar mi bcad do byas te khas blangs nas lo dang zla ba tsam la ma dod kyis yud tsam mi dran pas sa bon mes tshig pa dang 'dra ste/ bskal pa gnyis kyi bar du sems can dmyal bar skye zhing/gzhan gyi dge ba'i rtsa ba ci byas kyang phan med pa dang/ thugs kyi dam tshig gsang ba'i man ngag gzhan la mi spel lo byas nas/ dam nyams pa dang/ dam med pa dang/ chos log par 'dzin pa mtha' dag la 'chad cing ma kar gtong ba dang/bka' 'chal pa lta ci smos te thugs kyi dam tshig nyams na bskal pa gsum du mnar med par ltung zhing/ me tog sad kyis bsad pa dang 'dra ste/gzhan dge ba'i rtsa ba ci byas kyang phan pa med pa dang/ gsum ga nyams nas gzhi 'jig pa dang 'dra ste/ bskal pa dpag gis mi langs par dmyal bar skye'o// yan lag gi dam tshig nyams na shing tA la'i lo ma bcad pa dang 'dra ste/bskal pa chen por dmyal khams bco brgyad du sdug bsngal nyams su myong ba dang/ dam tshig kun nyams ni mi srid na/ nyams na gleng brjod las 'das so// de skad ces bka' stsal to// dam tshig tshig tu gsungs pa yang// ma nyams bsrungs na dam tshig yin// dam tshig bsrungs par dka' na yang// thar par bsnyeg pa shin tu nye// dam tshig nyams pa rab sla yang// dmyal ba'i spyod pa ya re cha// blun pos de ltar ma rig ste// 'khor ba'i sdug bsngal bzod blag med// de skad ces bka' stsal pa dang/ rigs lnga'i sangs rgyas la sogs pa ye shes chen po'i khyad par nyid las mi gzhan pa'i 'khor dang/'gro ba 'dul ba'i 'khor dang/ thugs rje sprul pa'i 'khor la sogs pa/ 'khor phun sum tshogs pa thams cad shin tu sngangs nas skrag cing 'dar te brgyal nas kha sbub tu 'gyel to// gtor rgyud chen po las/dam tshig nyams pa'i skyon bstan pa'i le'u ste nyer bzhi pa'o//// de nas rdo rje sems dpas de dag brgyal ba bsrung bar bya ba'i phyir na/ 'di skad ces bya ba'i glu dbyangs so// stong pa shin tu yod med rnal 'byor mthus// nam mkha' bzhin las dam tshig nye bar gnas// bde gshegs ma lus bzhugs pa bzhengs su gsol// rdo rje sems dpa' bskal bzang 'khor dang bcas// 'di dag nyid du rgyal bas glu blangs na// shin tu srid las ma lus 'das pa dang// shi bar gyur pa slar yang langs 'gyur na// yang dag srid la blta zhing smos ci dgos// zhes bya ba'i glu blangs pas/ de dag rgyal ba las slar langs so// de nas mgrin gcig tu bcom ldan 'das la 'di skad ces gsol to// e ma ho ngo mtshar rab 'byams kyi// sangs rgyas mdzad pa ngo mtshar bas// gser skyogs dngul skyogs zhom pa bzhin// thugs rje che ba'i lha khyod kyis// 'dren pa'i thugs rjes bzung nas kyang// las kyi dbang du mi btang bar// dus la bab pa'i phrin las kyis// dam tshig nyams pa bskang du gsol// de skad ces gsol pa dang/bcom ldan 'das kyis bka' stsal pa/ dam tshig 'di dag nyams pa sor chud pa'i thabs zhus pa ni/ legs so legs so// 'di dag skong ba'i thabs ma shes na// phal nyams pa sha stag 'byung bas// bskang ba'i cho ga bshad par bya ste/ sku'i dam tshig nyams na gnas su bskang ngo// gsung gi dam tshig nyams na bdud rtsi bde ba chen po la sogs pa bsgrub pa lan gsum gyis bskang ngo// thugs kyi dam tshig nyams na ting nge 'dzin las rung bas bskang ngo// yan lag gi dam tshig nyams na/ tshogs dang gtor ma brgya rtsa brgyad kyis bskang ngo// de dag las yid zungs su bzung bas bskang bar bya'o// gtor rgyud chen po las/dam tshig nyams pa bskang ba'i le'u ste nyi shu rtsa lnga'o//// de nas rdo rje sems dpa' la sogs pa sangs rgyas rnams la/ gtor rgyud chen po 'di dag bka' stsal pas/ thams cad kun tu bzang po'i gtor ma'i rang bzhin du sangs rgyas par gyur to// de nas kun tu bzang pos rnga sgra skye ba med pa 'di ched du brjod do// hUM ldi ri'i rnga chen 'di brdungs pas// khams gsum ma lus dbang du bsdus// ldi ri'i rnga chen 'di brdungs pas// bdud kyi klad pa tshal par gshogs// ldi ri'i rnga chen 'di brdungs pas// dgra bo'i mgo lus dum bur gtub// ldi ri'i rnga chen 'di brdungs pas// bgegs kyi tshogs rnams rdul du rlog/ldi ri'i rnga chen 'di brdungs pas// ma mo mkha' 'gro bran du khol// ldi ri'i rnga chen 'di brdungs pas// stong gsum chos sgra chen por sgrogs// lha rnams phrag dog che ba la// shes rab nges pa'i chos kyang ston// mi rnams mngon shes chung ba la// shes rab rno ba'i chos kyang bshad// byol song blun zhing gti mug par// shes rab gsal ba'i chos kyang bshad// yi dwags bkres skoms nyen pa la// shes rab mchog gi chos kyang ston// dmyal ba tsha grang nyen pa la// shes rab rtogs pa'i chos kyang ston// tsan+dan dkar po'i rnga shing la// ban glang dkar pos g.yogs byas pa// gnod pa'i dgra bgegs zhi ba'i rnga// smar mo dag gi rnga shing la// mi lpags g.yang gzhi'i g.yogs byas pa// tshe dang bsod nams rgyas pa'i rnga// seng lteng dmar po'i rnga shing la// stag lpags dmar pos g.yogs byas pa// thams cad dbang du sdud pa'i rnga// 'brug mo tsher ma'i rnga shing la// mi lpags g.yang gzhi'i g.yogs byas pa// gnod pa'i dgra bgegs bsgral ba'i rnga// rnga ni chos kyi dbyings kyi rnga/ rnga lding rig pa'i ye shes yin// rig pa'i ye shes dbyings la brdungs// dbyings dang ye shes byin brlabs las// chos kyi rnga sgra bsam yas kyis// stong gsum chos sgra chen pos gang// 'dul ba'i thabs su so sor ston// 'dul ba mdo sde chos mngon dang// rang rgyal mdo sde la sogs pa// gang ltar 'dul ba bzhin du ston// de tshe gnas nas rab mtshon nas// thams cad gtor mar gcig par byas// zhi ba la ni zlum po'i rnga// rgyas pa la ni gru bzhi ste// zla gam dbang gi rang bzhin la// zur gsum drag po 'joms pa yi// 'khor ba bka' nyan ci bgyis bran// yang bran yang sprul la sogs pa// rnga sgra drag pos las la btsud// ces ched du brjod pas/ma mo dang mkha' 'gro mas ci bsgo ba nyan cing/ khams gsum rnga sgra'i rang bzhin du sangs rgyas par gyur to// gtor rgyud chen po las/ phyag cha rnga'i le'u ste nyer drug pa'o//// de nas bcom ldan 'das kyis/ci ltar snang ba sangs rgyas pa'i don ched du brjod do// phyi nang snod bcud la sogs pa// sgro btags bus pas bzung ba rnams// phyin ci log tu rnams brtags kyang// grol bar thar pa'i lam du bstan// mya ngan 'das dang 'khor ba'i gnas// thams cad gcig pa'i rang bzhin du// dbyer med ngo bo nyid mnyam pas// byang chub nyid de ltung gnas med// thar pa'i lam ni log pa yin// log rtog gnyis med chos sku ste// log dang thar pa gnyis med par// mnyam du goms pa lam du bde// bya ba med pas thams cad byas// byed pa'i las kun de rtogs na// de las de rtogs de mi 'byung// de bzhin byar med ma btsal zhog/gang la gnas pas sangs rgyas yin// de tshe spangs na don med pas// ma spangs nam mkha'i ngang du gnas// sgyu ma tsam las ltos// chos rnams gcig gi ngo bo la// tshig brjod mang pos yongs su bslad// don du 'tshams par ma gyur na// bu gcig ma smra bde bar gnas// yongs la khyab cing dog pa med// kun dang ma 'gal don dang mthun// rang sems sangs rgyas ye rtogs na// ci brjod sangs rgyas gsung yin pas// blo ldan bu gcig ci yod smros// 'tshams par gyur pa lung las gsungs// gtor rgyud chen po las// lta ba chos nyid kyi le'u ste nyer bdun pa'o//// de nas bcom ldan 'das kyis/rdo rje sems dpa' la sogs pa la/ dbang bskur ba'i don 'di ched du brjod do// rgyu dang 'bras bu la sogs pa// zhal nas gsungs pa thams cad dang// gsang ba gsang chen gang mchog rnams// rna dbang yid la nyan par byos// oM d+harma tsakra hUM/ e ma ho/ slob ma blo ldan bus/ rgyal ba rnams kyis gang gsungs pa// bla ma'i tshig las ma nor bar// snod dang ldan pa rnams la ston// oM d+harma tsakra phaT/sngags dang phyag rgya la sogs pa// ma yengs rtse gcig ting 'dzin gyis// grangs tshad rtags rnams mngon gyur par// rnal 'byor gsang bar bsgrub par gyis// oM AHhUM sarba e shud+d+he hUM phaT/ rdo rje rgyal po sku gsum 'chang// dbyer med ting 'dzin mi g.yo ba// thams cad kun gyis 'dren pa po// ma lus rnal 'byor 'dren par gyis// oM badzra g+ha ru sa ma ti hUM/ de nas las rnams kun rdzogs pas// sngags dang phyag rgya la sogs pa// las kyi bye brag mang po dag/ phrin las rnam bzhi gang byos shig/ oM karma sid+d+hi hUM/ zhal nas gsungs pa'i chos kun la// de tshe bdag nyid dang 'dra bas// dang po thob pa'i dbang bskur bas// bdag dang 'dra bar las byos shig/ A+oM badzra ra tse sa te hUM/ de nas dbang dang grub pa rnams// brtan zhing chags par 'dod pa des// rgyal srid longs spyod sna tshogs dang// bu dang chung ma 'brel ba'i grogs// ci yod lus dang srog gis mthud// bla ma la ni ma lus par// gsog 'jog med par dbul bar bya// de ni dpag gis mi langs te// dbang bskur gnang ba de bzhin du// yid la ci dgar dbang gyur te// mkha' la 'gro na bya bzhin no// 'phags pa'i sku dang tha mi dad// rgyal ba nyid kyang ci bzhin du// yid la bsam pas dbang bskur nas// gzhan gyis las rnams smos ci dgos// gang zhig dbang rnams ma thob par// gang zhig sngags la spyod byed pa// sa bon me yis tshig pa bzhin// 'bras bu med cing brlag par 'gyur// gtor rgyud chen po las/ dbang gi le'u ste nyer brgyad pa'o//// de nas bcom ldan 'das kyis spyod pa chen po 'di ched du brjod do// gtor ni thabs kyi rang bzhin la// ma ni shes rab rang bzhin te// thabs dang shes rab gnyis su spyod// gtor ni thabs kyi 'phro 'du yin// ma ni shes rab bstan pa'i sa// thabs dang shes rab gnyis su spyod// gtor ni thabs kyi ye shes te// ma ni shes rab brten pa'i sa// gtor ni thabs kyi ye shes te// ma ni dbyings kyi shes rab pas// thabs dang shes rab gnyis su spyod// gtor ni yab kyi byang chub sems// ma ni yum gyi byang chub sems// thabs dang shes rab gnyis su spyod// gtor ma thabs dang shes rab kyis// thams cad spyad pas sangs rgyas rgyu// 'di ni spyod pa'i rgyal po'o// gtor rgyud chen po las/ spyod pa'i le'u ste nyer dgu pa'o//// de nas ye shes rgyal pos bsgral ba'i zhing bcu 'di thugs rjes bzung ba 'di ched du brjod do// e ma ho/ gtor ma'i zhing khams 'di dag na// ma rungs zhing bcu 'byung srid ste// dmigs ni 'khrul 'khor yongs su blta// kun la gnod cing chom rkun byed// dkon mchog gsum gyi lam bkag nas// ngan song gsum gyi sa bon 'debs// bdag dang slob dpon mched kyi dgra/ nyams dang dam las log pa dang// 'khu dang bar gcod byed pa dang// mtshams med lnga dang gsod la brtson// ye nas ngan pa'i ngang tshul can// de dag bsgral bar bya ba'i phyir// pho nya phyag brnyan la sogs rnams// mngon sum 'dra bar sprul nas kyang// de tshe khug par bsams nas kyang// raM yaM khaM gis bsreg sbyangs nas// rigs drug skye bo'i snying po la// yi ge dpa' bo 'bru lnga yis// cho ga rnam gsum 'phro 'du las// ngan song 'khor ba'i sgo bkag ste// lha yi dkyil 'khor gsal bar byed// ye shes lnga yi phyag rgya yis// rnam shes hUM du bsdus nas kyang// a dang yang gi 'phro 'du las// phaT kyi byin rlabs drag po yis// 'og min bla med gnas mchog tu// sbyong ba'i lhums su 'phangs nas kyang// rgyal ba'i sras su skyes nas kyang// 'khor bar mi ltung sgo bkag nas// thar pa'i gnas la dgod par bya// phung po gtor ma'i rdzas su spyad// mkha' 'gro la sogs gzan du bor// kun gyis zos par bsams nas kyang// rtags ma phyin par mi gtang ngo// tha na lan bdun byas pas kyang// sgrol bar 'gyur te the tshom med// de tshe g.yel na don med do// gtor rgyud chen po las// thugs rjes gzhan bsgral ba'i le'u ste sum cu pa'o//// de nas ye shes rgyal pos/gnyis su med par sbyor ba 'di ched du brjod do// gtor ma la sogs gsang sngags kyi// yum gyi mtshan nyid bstan pa ni// mtshan ldan tshul rgyud shes pa dang/ rigs dang kha dog dbyibs la sogs// shes rab mtshan mchog tshang ba rnams// rgyal rigs rje'u rigs bram ze'i rigs// dmangs rigs gdol pa la sogs pa// gang dag yum mchog rnyed pa de// g.yon phyogs gnas la tshul bzhin du// mkha' gsang rnam gnyis byin brlabs nas// byang chub sems kyi 'phro 'du las// bsnyen pa dang ni nye bsnyen po// sgrub pa dang ni sgrub chen pos// mkha' dbyings sangs rgyas dkyil 'khor la// gnyis med bde ba'i dgyes pas bstim// de tshe mchod pa rgyun med 'bul// dngos grub la sogs gang 'dod la// byang chub sems la bsgrub cing blang// 'di ni gnyis med sbyor ba'i mchog/ gtor rgyud chen po las/sbyor ba'i le'u ste so gcig pa'o//// de nas ye shes rgyal pos/ bsgrub pa chen po 'di ched du brjod do// gtor ma la sogs gang bsgrubs kyang// dang po phun sum tshogs pa'i gnas// yid 'ong gzhan dang mthun pa ru// dkyil 'khor lha yi bzhugs gnas bzhin// bris te bsgoms sam gang yang rung// goms pa yid kyis gsal byed nas// sman dang gtor ma la sogs pa// bdud rtsi'i lung dang gtor ma'i lung// de bzhin rtogs shing de brlabs pas// dkyil 'khor gnyis po rim bzhin no// spyan drang mchod 'bul tshogs drangs nas// bsgom sbyangs yi ge 'bru brgyad bzlas// rtags dang mtshan ma ma byung bar// rgyun mi 'chad par bsnyen cing bsgrub// rab kyis nyin zhag gcig gis 'grub// 'bring gis lo dang zla bas 'grub// tha mas lo zla tshun chod kyis// 'grub gyur 'di la the tshom med// thams cad dkyil 'khor mthong ba dang// lha mo'i gzugs dang sgra snyan dang// mkha' 'gro la sogs ma tshogs kyis// mngon sum gtor ma len par byed// gzhan yang mtshan ma sna tshogs ston// de dag mthong dang 'grub pa'i tshe// myur bar dngos grub mchog tu blangs// de tshe g.yel na don med pas// bgegs dang bar chod byed la sogs// drag po'i gtor mas bzlog par bya// gtor rgyud chen po las/ gtor ma bsgrub pa'i le'u ste so gnyis pa'o//// de nas ye shes rgyal pos/ rnal 'byor pa yongs la phan gdags pa'i phyir/ mtshan ma tshogs kyi gtor ma 'di ched du brjod do// tshogs dang gtor ma la sogs pa// rnal 'byor mchog gi longs spyod ste// ma nyams thabs kyis de spyod pa// gsang sngags che ba'i rgyal po yin zhes bya// tshogs la yang rnam pa gsum ste// skal ldan mi'i tshogs dang/ dga' ldan lha'i tshogs dang/ 'byor ldan longs spyod kyi tshogs so// de la skal ldan mi'i tshogs ni// lta spyod mthun par sdeb pa'o// dga' ldan lha'i tshogs ni/ lta ba dang dam tshig dang ting nge 'dzin du ldan pa'o// 'byor ldan longs spyod kyi tshogs ni/ rkyen dang longs spyod rdzogs dang yo byad du ldan pa'o// de la 'byor pa che chung dang// rtsol 'phang mtho dman gyi rgyu sbyar/ rtog pa che chung dang/ dgongs pa che chung gis rkyen sbyar/ las 'phro bzang ngan dang/ go rim che chung gi mchod pa phul nas/dam la gnas pa dang tshul du shis pas longs spyod cing thugs dam bskang/ snod dang ldan zhing bsgom sran che bas dngos grub blang/ klong du gyur cing don dang ldan pas longs spyod de/'gro ba yongs la phan pa dang/ las la gzud pa'i phyir/ pham phab lhag ma gcig tu bsdus te/ yongs la khyab pas gtor ma ni/ gtor rgyud chen po las/ gtor ma'i le'u ste so gsum pa'o//// de nas tshogs kyi longs spyod dag/ 'jig rten khams na yod pa kun// lha yi longs spyod rkyen yin pas// 'byor pas bshams la dbul bar bya'o// de la dang po tshogs drangs pa ni/ rol mo dang rgyud kyis sna drangs/gri gsur dang spos kyi ngad sbyar/ me tog dang gzugs kyis rgyan bkram nas/ dang po tshogs drangs pa 'di skad do// hUM gzhal yas rin chen dam pa 'dir// bka' dang mthun pa'i rdzas mchog bkram// gzhung las byung ba'i dkyil 'khor bkod// rgyud las byung ba'i gtor ma bzhag/ lung las byung ba'i sman stsal te// bde gshegs dkyil 'khor spyan drangs te// byon bzhugs bdag cag mchod 'bul na// dmigs pa bzhin du bzhes su gsol// bskul ba bzhin du thugs dam bskangs// bstabs pa bzhin du zhal du gsol// bcol ba bzhin du phrin las mdzod// zhu ba bzhin du dngos grub stsol// zhes brjod la 'byor tshogs kyis mchod pa drangs la/ khro bo bcu'i sngags kyis mtshams bcad nas/ dang por rdo rje dbyings kyi lha la mchod par bya ste/ de la dang po mchod pa rnam pa bzhi las/ dang po phyi'i mchod pa'i tshogs las/hUM badzra lA s+ye sa ma yA stam du gyur/ de las lha mo lA s+ye ma 'od zer khu tshur 'gyings pa'i mchod par gyur nas/ shar phyogs rdo rje'i rigs kyi lha la lha thim pa'i tshogs kyis mchod par gyur to// de yang mchod pa'i tshogs las/ traM mA le sa ma ya hor gyur nas/ de las lha mo rin chen phreng gi mchod pa gyur nas/ lho phyogs rin chen rigs kyi lha la lha thim pa'i tshogs kyis mchod par gyur to/ de nas yang mchod pa'i tshogs las/ hrIHgI ti ra go nya haM du gyur nas/ de las lha mo pi waM rgyud kyi mchod par gyur nas/ nub phyogs pad+ma rigs kyi lha la lha thim pa'i mchod par gyur to// de nas yang mchod pa'i tshogs las/aM nir ti rA ga yA mir gyur nas/ de las lha mo gar gyi mchod par gyur nas/ byang phyogs las kyi rigs kyi lha la lha thim pa'i tshul gyis mchod par gyur to// de nas nang gi mchod pa ni/ tshogs kyi mchod pa las/dzaHd+hu pe pra we sha/ hUM puSh+pe A we sha/ baM dI paM su gi rI/ ho g+han+de tsit+ta las gong ma bzhin du lha mo bzhi'i skur gyur nas/ mtshams bzhir tshogs kyis mchod par gyur to/ de nas gsang ba'i mchod pa ni/tshogs kyi mchod pa las/ ang ku sha dzaH/ pA sha hUM/ s+pho Ta baM/ g+han+de hor gyur nas/ de las tshad med pa'i lha mo bzhir gyur nas/ sgo bzhir tshogs kyis mchod par gyur to// de nas rab tu gsang ba'i mchod pa ni/tshogs kyi mchod pa las/ mo ha rA ti la sogs pa drug tu gyur/ de las lha mo drug gi skur gyur nas/ dkyil 'khor gyi mgo mjug tu tshogs kyis mchod par gyur to// de las gzhan yang mchod pa'i lha mo ci 'byor pas mchod do// de nas 'bar ba'i dkyil 'khor la tshogs kyis mchod pa ni/ bsgral ba'i zhing bcu bkug par byas la/ tshogs kyi rten la bstim/ de 'gugs pa'i pho nya btang ba 'di skad do// hUM bskal pa me ltar 'bar ba'i dkyil 'khor nas// rngams pa'i khro bor skur sprul te// drag shul las kyi pho nya'i tshul// gtum chen rab 'bar khro bo bcu la sogs// rnam par rgyal dang dbyug sngon can// gshin rje gshed dang mi g.yo mgon// rta mgrin dpal dang 'dod pa'i rgyal// bdud rtsi 'khyil dang stobs po che// khams gsum rnam rgyal hUM ka ra// pho nya phyag brnyan nyi shu rnams// dam tshig nyams pa 'dir khug la// pho nya mang po nam mkha'i skar ltar khrom// 'gugs byed mang po bar snang sprin ltar gtibs// phyag brnyan mang po mkha' la char ltar phob// mgyogs byed mang po bar snang glog ltar 'khyug/ za byed mang pos spyang tshogs ltar du rol/gsod byed mang pos bya g+h+ra gzan ltar chum/ 'dzin byed mang pos chu srin kha ltar gyis// 'ching byed mang pos phyag rgya'i tshogs ltar sdoms/ gang la dmigs par bya ba'i rnam shes drongs/bsdams shing khug la tshogs la bstims// ang ku sha dza dza zhes brjod pas// 'gro ba rigs drug gi rang rang gi snying po drangs la/ tshogs la bstims la/ raM yaM khaM gis bsreg sbyangs tshul bzhin byas la/g.yas pa ya mAn+ta ka'i sku las/ mu las 'jam dpal gyi ral gri rnon por bsams nas/ bsgral ba'i tshig 'di skad brjod do// hUM g.yas pa ya mAn+ta ka ste// gsod pa'i las la shin tu brtson// 'jam dpal ral gri rnon po yis// mi shes sgrib pa'i dra ba gcod// 'jam dpal sngon po dpal gyi zhing// byams dang snying rje go bgos te// ral gri ut+pal sngon po'i so 'dra bas// ma rig pa yi sbubs bcom ste// 'khor ba'i dra ba rgyun bcad nas// dug kyang ye nas sman du mdzad// 'di ni zhe sdang rnam par dag/ bsad pa 'ba' zhig las su rung// snying rjes bsgral ba'i dam tshig yin// pra be sha ya phaT ces brjod pas/bsgral ba'i bsam rgyud tshul bzhin du byas la/ 'jam dpal gyis gtubs la/ dang po phung dang rnam par shes pa dang/ phung pos thugs dam bskang zhing dngos grub gsol ba 'di skad do// hUM khrag 'thung chen po'i dkyil 'khor nas// 'jigs byed khro bo'i tshul ston pa// dpal chen dgu dang yum chen dgu/ gnyis med sbyor ba'i byin rlabs las// kau ri'i tshogs dang phra men tshogs// sgo ma'i tshogs dang spor ma'i tshogs// mkha' 'gro dbang phyug pho nya'i tshogs// ma bdun sring bzhi ging chen tshogs// phung po dpal chen tshogs la 'bul// dpal chen thugs dam bskang gyur cig/ thugs dam bskangs nas dngos grub stsol// 'byung lnga yum chen tshogs la 'bul// rnam shes kau'u ri'i tshogs la 'bul// yul ni phra men tshogs la 'bul// yan lag sgo ma'i tshogs la 'bul// sgal tshigs dbang phyug tshogs la 'bul// rus pa mkha' 'gro'i tshogs la 'bul// khrag ni ma sring tshogs la 'bul// sha ni pho nya'i tshogs la 'bul// srog ni ging chen tshogs la 'bul// lhag ma 'khor du gtogs la 'bul// khyed kyi thugs dam bskangs gyur nas// phul ba'i dngos grub stsal du gsol// de nas phyis 'byung bar byed pa'i sku la brdo zhing bar du gcod pa'i dgra bgegs dag 'byung srid pas/ de dag kyang tshul de bzhin du bstab cing/'bul bar byas te 'di skad do// hUM dpal chen 'khor tshogs la sogs dang/ ci bgyi bka' nyan pho nya'i tshogs// bran dang yang bran g.yog dang yang g.yog dang/ sprul dang yang sprul lha tshogs rnams// zas su gtsang sme med par za// skom du kha mngar med par 'thung/ bang ni ri klung med par rgyug/ mAng sa za zhing bdud khyim 'joms// gsod la dga' zhing za la dga'// khrag la rngam zhing gsur la bsnam// sha la za zhing rus la rol// nyams pa len cing bsgrub la sogs// phyis 'byung dgra bgegs phung po 'di// ma bstabs bar du bzhes mi mkhyen// dpal la bstabs pas mtshan ma bzhes// yum la bstabs pas dngos po bzhes// sras la bstabs pas rnam shes gsol// 'khor la bstabs pas gzugs phung chom// dza dza dza yis dbang du sdud// kha kha khA his zhal du gsol// khA raM rak+ta/ khA raM trag shakhA raM smrig ta/zhes brjod la/ dgongs pa rnams bstabs so// de nas gnyis med longs spyod nas// sku gsung tshul du gnas pa yi// 'khor dang bran du byas pa'i phyir// zhal chab bam sogs gsal// sngon tshe nga las khas blangs shing/rdo rje'i dam mnos khas blangs yin/ rang bzhin gnas dang srid 'byung gnyis// go rim shes par 'di gyis la// sprul pa'i dkyil 'khor gsal bskyed nas// bran la sogs pa de bzhin du// gom pa bdun cu'i phyi rol du// spags la las bcol dmod pa gdab// las dang 'bras bu brtsams pa kun// bsam pa bzhin du 'grub par 'gyur// 'gro don tsam du gdab par bya// yang dag don la de dag med// de nas las bcol yongs la bsngo// phyogs bcu kun tu khyab par gtor// gtor ma cha gsum btang ba'i rigs// dang po mi bzad gter du sba// bar ma bsreg rdzas lugs su 'bul// tha ma stong gsum khyab par gtor// gtor rgyud chen po las/ tshogs kyi mchod pa'i le'u ste so bzhi pa'o//// de nas rdo rje sems dpas 'di skad ces gsol to// bcom ldan 'das yab kun tu bzang po mi mkhyen dgu mkhyen pa dang/yum kun tu bzang mos mi gzigs dgu gzigs pas/ tshogs dang gtor ma la sogs te/ ci ltar snang ba'i chos 'di dag thams cad dang po nas ci ltar lags/ 'khrul pa ci ltar lags/da lta chos thams cad ci ltar gnas/ 'khrul pa ci ltar gnas/ phyis chos thams cad ci ltar 'gyur/ 'khrul pas ci ltar 'gyur ba lung bstan du gsol// yab gcig lung bstan du gsol// bcom ldan 'das kyis bka' stsal pa/ sems dpa' chen po ci ltar snang ba'i chos thams cad/ sus kyang ma byas ma bcos ma skyes mi 'gag/ skye ba med pa yin la/ 'khrul pas rgyu 'bras dang/ chags 'dzin du snang ngo// da ltar chos thams cad mi dmigs mi g.yo ba'i rang bzhin la/ 'khrul pas nga dang gzhan du/ phyi dang nang du snang ngo// phyis chos thams cad mi 'pho mi 'gyur ba'i rang bzhin la/ 'khrul pas bzang ngan dang che chung dang phyogs ris skye zhing blta ba 'di lta ste/sangs rgyas dang sems can thams cad kun tu bzang po'i ngang nyid du gnas pa la/ su yang ma yin/ su yang mi gnas/ su yang mi gsung/ sus kyang mi bstan/'khrul pa la la ni ston pa kun tu bzang po sems nyid kyi klong na bzhugs pa/ a ti yo ga theg pa'i lung bstan du gsol zhes 'dzer to// 'khrul pa la la ni kun tu bzang mo'i mkha' la kun tu bzang po'i rdo rje zhugs pas/a nu yo ga'i theg pa lung bstan du gsol/ zhes 'dzer to// 'khrul pa la la btsun mo'i b+ha ga la/ ston pa rdo rje sems dpa' bzhugs pas/ ma hA yo ga'i theg pa lung bstan du gsol zhes zer ro// 'khrul pa la la rin po che dang rdo rje'i gnas na/ ston pa rnam par snang mdzad bzhugs pas/ yo ga'i theg pa lung bstan du gsol zhes 'dzer to// 'khrul pa la la ni ri rab kyi zom na/ rdo rje 'dzin pa bzhugs pas/kri ya'i theg pa lung bstan du gsol zhes 'dzer to// 'khrul pa la la ni bya rgod phung po'i ri la shAkya thub pa bzhugs pas/ mtshan nyid kyi theg pa lung bstan du gsol zhes 'dzer to// de bzhin du la las ni rigs lnga'i 'khor du mthong// la las ni rigs lnga dang byang chub sems dpa'i 'khor du mthong/ la las ni byang chub sems dpa' dang lha'i 'khor du mthong/ la las byang chub sems dpa' dang lha ma yin gyi 'khor du mthong/la las byang chub sems dpa' dang nyan thos kyi 'khor du mthong/ la las chos thos par mthong/ la las chos ma thos par mthong/ la las 'gro ba'i rigs tha dad par mthong/la las bde sdug gi don so sor snang bar mthong/ de ltar mthong yang de ltar ston cing de ltar 'byung ba ni gang yang med do// de ci'i phyir zhe na/ skye ba med pa la skye ba'i cho 'phrul du snang ba'o// gzhan yang la la ni nyan thos rnams kyis bsdus par mthong ngo// de la yang grangs bsam gyis mi khyab par mthong ngo// la las byang chub sems dpa' rnams kyis bsdus par mthong ngo// de yang ris bsam gyis mi khyab par mthong ngo// la la ni rigs lnga rnams kyis bsdus par mthong ngo// de la yang rigs bsam gyis mi khyab par mthong ngo// la la kun tu bzang po nyid kyis bsdus par mthong ngo// de la yang rigs bsam gyis mi khyab par mthong ngo// de ltar mthong yang ston pa med/ sdud pa med/ bsdus pa med/ mthong ba med/ ma mthong ba med/ de ci'i phyir zhe na/ skye ba med pa las cho 'phrul 'byung ba yang ma g.yos pa'o// gzhan yang la las bstan pa gong du byung bar mthong ngo// la las ye ma mthong ngo// la las bstan pa rab 'byung bar mthong ngo// la las ma mthong ngo// la las bstan pa phyis 'byung bar mthong ngo// la las ma mthong ngo// la las shog shog dkar po la snag tsha nag pos bris nas gtsug lag khang chen po na bzhugs shing spyod par mthong ngo// la las ma mthong ma thos so// la las grong khyer na glegs bam du bzhugs nas mchod cing bstod par mthong ngo// la las bstan pa phyis 'byung bar mthong ngo// la las ri rtse nas rin po ches bris nas mchod nas bsgom zhing spyod par mthong ngo// la las ma mthong ma bsgoms so// la las rgyal po'i khang steng nas bsgoms nas bsgrub cing spyod par mthong ngo// la las ma mthong ma bsgrubs so// la las ni dur khrod chen po nas go zhing spyod par mthong ngo// la las ma go ma mthong ngo// la las gser gyi glegs bam la rin po che bzhu bas bris nas/ ko Sha'i mdzod nas go nas rtogs shing spyod par mthong ngo// la las ma mthong ma rtogs so// de bzhin du la las rgyu 'bras su mthong ngo// la las bzang ngan du mthong ngo// la las phyi nang du mthong ngo// la las mtho dman du mthong ngo// la las rgyu 'bras la sogs pa gang du yang ma mthong ma rtogs so// de ltar mthong yang de gang du yang brtan cing phye ba med do// de ci'i phyir zhe na/ chos nyid la bzang ngan du ma gsungs so// gzhan yang la las gang zag 'phags pa'i khongs su gtogs pa rnams kyis bshad cing bstan par mthong ngo// la las gang zag 'phags pa'i zhal mthong ba rnams kyis bshad cing bstan par mthong ngo// la las gang zag 'phags pa'i dngos grub thob pa rnams kyis bshad cing bstan par mthong ngo// la las gang zag 'phags pa'i sprul pa rnams kyis bshad cing bstan par mthong ngo// la las 'phags pa dang gang zag tha mi dad pa rnams kyis bshad cing bstan par mthong ngo// la las 'phags pa dang gang zag gnyis kyis bshad cing bstan par mthong ngo// la las de gang yang ma mthong ma bshad do// de ltar mthong yang skye ba med pa'i don la che chung dang bzang ngan bstan pa gang yang med do// de ci'i phyir zhe na/ chos thams cad rang gi byang chub kyi sems su gcig pa las gang du yang bstan pa med do// sems dpa' chen po de bzhin du gcig pa la/ dper na nam mkha'i sprin bzhin du 'khrul pa rang gis gcig la gcig bsgrib par byed do// gcig la gcig gnod par byed do// gcig la gcig smod par byed do// de dag kyang 'di lta ste/ chos gcig la 'jig rten pa'i chos dang/ mya ngan las 'das pa gnyis su spyod par byed do// de gnyis ris su bzung bas mu stegs la sogs pa sangs rgyas kyi bka' la log par rgol ba sha stag 'byung bar byed do// de'i tshe sangs rgyas kyi bstan pa lnga brgya bdun du gnas pa las/ bstan pa dang po la mu stegs kyi dgras rgyu'i chos d+harma glegs bam thams cad/me dang chu la sogs pas med par byed cing/ bstan pa la dgra lan gsum dar bar byed do// de nas bstan pa 'di rgya gar yul du phog cig nub par byed do// de nas bram ze'i rigs dag gis/ skye bas thob pa dang/ rgyal khams gzhan dag las phal cher bsdus nas/ cung zad cig rgyas shing 'phel bar byed do// de tsam na gsang sngags 'bras bu'i chos glegs bam kun ni/me dang chu la sogs pas tshig cing rul bar ma gyur te/ sa'i gter dang rin po che'i sgrom na gnas par byed do// de la sngon gyi las kyis 'jug pa'i gsang sngags spyod par rab cig ni/ phyag rgya chen po'i rig 'dzin du sangs rgyas pa tshom bu brgya dang stong 'byung bar byed do// log pa'i chos kyang rgyu las mang du 'byung ste/ nad dang mu ge dang ma rungs pa dang/ dmyal bar skye ba yang sha stag 'byung bar byed do// lnga brgya gnyis pa la/ rgyu'i chos dar bar 'gyur te/ ring bsrel dang/ gtsug lag dang/ rten pa'i dge ba khams gcig kyang spyod par 'gyur ba dang/ rgya gar yul dang/ u rgyan dang/ kha che dang/ li'i yul dang/ bod kyi yul la sogs pa rnams su yang/ sngon gyi smon lam las rgyal po dad pa can shas kyang 'byung bar 'gyur la/ rgyal khams kyi skad mi mthun pa mtha' dag tu yang rgyu'i chos dar bar byed pa'i lo tsA ba yang sha stag tu 'byung bar 'gyur ro// de tsam na gsang sngags 'bras bu'i chos mtha' dag rgya gar yul gyi gnas gsum po dag na/ slob dpon ye shes sems dpa'i sprul pa dag gis/ gnas gsang ba na dar zhing spyod par byed de/blo rtsal dang ldan pa 'gas kyang 'phrigs shing rgyas par 'gyur ro// de'i tshe rgyal khams su 'khrug pa dang/ rigs nad dang/ mu stegs kyi rgol ba la sogs pa bdud kyi bar chad khams gcig 'byung bar 'gyur ro// de nas lnga brgya gsum pa la/ dpal chen po'i thugs kyi sprul pa zhig u rgyan gyi yul du 'byung nas/ des gsang sngags 'bras bu'i chos sngon gyi glegs bam du bzhugs pa dang/dbang mi bza' ba'i rgyud kyi rim pa mnos nas/ u rgyan dang za hor dang/ bal po dang li la sogs pa'i rgyal khams drug tu grags shing 'phel bar 'gyur te de'i tshe chos spyod pa rnams kyis mu stegs dang log pa'i phyogs log pa tshar gcod pa dang/'dud dang srin po thams cad gtor mas dam la 'dogs pa dang/ thams cad kyang rtsa ba'i gtor ma 'di dang du len cing tshom bu'i rigs bsam gyis mi khyab pa kun tshe lo bsam gyis mi khyab pa thub par 'gyur zhing// pho dang mo'i rigs lus ma bor bar phyag rgya chen po'i gnas su sangs rgyas par 'gyur ro// de'i tshe dus bzang zhing rgyal khams yongs su legs pa mtha' dag 'byung zhing nyes pa sna 'ga' tsam yang mi 'byung bar gnas par 'gyur ro// de las kyang bal po'i yul du zab cing rgyas par gyur te/ de dag kyang grub pa thob pa de bzhin no// de nas lnga brgya bzhi pa la/'dul ba'i shas phran tshegs dar bar 'gyur la/ mu stegs dang sangs rgyas kyi bka' gnyis lo nyis brgyar res bzung nas spyod par 'gyur ro// lo sum brgya la mu stegs dar nas sangs rgyas kyi bstan pa phyed shas nub par byas te/'jig rten gyi 'dre srin mang bar 'phel te/ rgya gar gyi yul na glegs bam gyi chos rnams rgya nag po'i yul rnams su 'gro zhing/ de'i rgyal khams thams cad mu stegs nag po'i las kyis/bod yul dang mon la sogs pa yul gyi ru mtshams rnams su 'phyo zhing 'khrug pa dang/ 'pho 'phyugs kyi las dang/ sdug bsngal lo brgyar gnas par 'gyur ro// de nas lo bzhi brgya la/ sa'i byang chub sems dpa' rnams kyis sprul pa las/ chos skyong ba'i rgyal po dang/ 'phags pa'i khongs su gtogs pa'i gang zag rdzu 'phrul ya ma zung dang ldan pas mu stegs rtag chad kyi lta ba sun phyung zhing btul lo// de'i tshe mu stegs bstan pa nub cing sangs rgyas kyi bstan pa 'phel ba yang byed do// de nas lo lnga brgya la dad pa can dang skal ldan mkhas pa'i lo tsA ba mang du byung nas/ sde snod kyi chos mang pos khyab cing rgyal khams mtha' dag tu dar zhing rgyas te/glegs bam la sogs pa la mchod cing bkur sti byed par 'gyur ro// yul bar ta ni nas u tro dang/ sing ga la dang bod kyi yul la sogs pa rnams su rgyas shing 'phel bar 'gyur ro// de nas lnga brgya lnga pa la/ dang po brgya la gtsug lag dang/ sman dpyad la sogs pa byang chub sems dpa' rnams kyis rgyas shing 'phel lo// brgya gnyis pa la rgyal khams yongs su khang khyim dang/sde dang ris dang/ khrims dang bca' gzhi 'phel lo// brgya gsum pa la/ che chung dang bzang ngan du 'phel te/ chos mdo sde dar te dge sdig dang chos la yid ches pa'i rgyal po dang/blon po grangs kyis byung nas dad pa dang bsnyen bkur gyis bsod nams dang tshogs skye ba sha stag gnas so// de tsam yan chad du gsang sngags gtor ma'i chos 'di pa la/ rgyal po chos nyid la mi phyogs pa dang/blon po phrag dog can gyis dbang bsgyur te/ gsang sngags kyi chos dbang yod pa dang/ thabs mkhas pa 'ga' tsam gsang nas spyod/ gzhan spyod du mi ster zhing/ gsang sngags sa dbyibs dang/ gtsug lag khang gi ka ba la sogs par sbas so// de'i dus su rgyal khams su mi bde ba dang/ snying rje med par gcig gis gcig gsod pa dang/ rje khol dang che chung gi rim pa med par gsod cing spyugs pa dang/ gnas nas 'don pa la sogs mi bde ba'i sdug bsngal sna tshogs pa myang zhing rgyal khams sil bur 'chad par 'gyur ro/ de nas brgya gsum pa la/ 'di'i brgya grangs gong 'og ma 'grig par dpyad/ lung rgyud sde gnyis su chad nas/rgyud kyi chos gdal ba chen por spyad/ thams cad yongs su dam la btsud de dar zhing rgyas par spyod nas/ lung bsubs pas ston pas mthu byin chung la 'bras bu'i chos la zhugs pas rgyal khams kun cung zad cig bde zhing/rtsa ba'i gtor ma 'di rtogs ma rtogs kun spyod par 'gyur/ rgyud nyid kyang ris gnyis su 'dzin cing/ gcig la gcig skur pa 'debs te/ dam nyams pas mthu byin med par/ ke 'u shang dang gsar bu'i chos sdebs pa mang por spyod par 'gyur ro// de nas brgya bzhi pa la/ mthu byin med pas ma rungs pa dag 'byung la/ rgyud dang mdo sder chad nas/ mdo sdes rgyud bsubs te/ sngon gyi zab cing rgya che ba'i bka' brgyud las/gzhan ni sangs rgyas kyis bka' min zhes sgro 'dogs par byed do// de'i mtha' khob pa'i rgyal po dag kyang/ rgyu'i chos dar che bar 'byin la/ 'bras bu'i chos nub par sgro 'dogs par byed do// de'i dus na 'khrug pa dang rims nad mang bar 'byung zhing/ mu ge yang skabs su 'byung zhing/ de rnams kyang dus ma yin par 'chi ltas ngan pa dag 'byung bar 'gyur ro// de nas lnga brgya pa la mdo sde nub nas 'dul ba shas 'byung ste/byang phyogs kyi rgyud du dar bar 'gyur ro// de tsam na gsang sngags 'bras bu'i chos ni/ gang zag gcig 'gas spyod par 'gyur te// de 'bras bu'i 'phang mi zhan pa thob par 'gyur ro// de tsam na rtsa ba'i gtor ma 'di la dus dang skabs dang/ gang rig 'dzin rnams kyis spyod cing/ lha ma srin las 'phro dang ldan pa sha stag dam la 'dogs shing gnyan zhing mthu byin dang ldan par spyod par 'gyur ro// de nas rgya bzhi pa la/ shrI na len+d+ra dang/ rdo rje gdan la sogs pa rgya gar dang/ kha che dang/ li dang/ u rgyan yul la sogs pa gnas khyad par can du/ gang zag khyad par can gyis bsgrub pa khyad par can gyis gsang sngags 'bras bu'i sgo nas grub pa thob pa sha stag 'byung ste/dngos grub thob pa dang/ 'phags pa'i zhal mngon du grub par mthong ba dang/ yid ches shing mthar phyin par 'gyur ro// de nas brgya lnga pa la/ paN+Di ta lnga brgya la sogs pa 'phags pa nyid du bzhugs pa rnams/ las 'phro dang ldan pa la zab cing rgyas par ston pa'i phyir/ bzhugs thabs dang sder 'khod nas/ dad pa dang mchod gnas kyi rten du gnas so// de nas lnga brgya drug pa la/ byang chub sems dpa'i rgyal po bco brgyad byung nas/ rgyal khams bco brgyad du gsang sngags 'bras bu'i chos dar bar 'gyur ro// de nas bod kyi rgyal po byang chub sems dpas dad pa dang thugs dam du bcas nas/bod kyi rgyal khams su gsang sngags 'bras bu'i chos dar zhing rgyas par 'gyur ro// de tsam na grub pa thob cing sangs rgyas pa rgyal khams mtha' dag tu 'byung bar 'gyur ro// sngar grub pa thob pa dang/ phyis grub pa thob pa rnams kyis/ g.ya' ri dang gangs rgyud kyi dregs pa can thams cad dam la btags nas gtor ma byin te/ gsang sngags 'bras bu'i chos spyod pa'i srung mar khas 'ches so// rgyal khams kun tu yong bde ba 'phel zhing nyes pa shas tsam yang mi 'byung ngo// de nas lnga brgya bdun pa'i tha ma la/ rgya dang bod la gsang sngags spyod pa'i paN+Di ta mkhas pa mang du 'byung ste/log pa'i chos dang mu stegs la sogs pa sun phyung ste/ gtan sangs rgyas kyi bstan pa la rgol ba'i skabs med par 'gyur ro// gsang sngags 'bras bu'i chos las kyang lung dang man ngag gi phyogs thams cad kyang rgyas shing 'phel bar byed do// de la grub pa thob pa dang/ mthu byin dang ldan par grangs kyis 'byung bar 'gyur ro// de la gnyis su yang gyur pa med do// de ci'i phyir zhe na/chos thams cad chos nyid 'dus ma byas kyi gtor ma las/ gzhan gang du yang 'gyur ba med do// gtor rgyud chen po las/ bstan pa dar nub kyi le'u ste so lnga pa'o//// de nas yang rdo rje sems dpas 'di skad ces gsol to// bcom ldan 'das chos thams cad gtor mar 'dus la/ gtor ma'i rang bzhin ma g.yos pa las/ de ltar snang 'gyur las/ snang zhing 'gyur tsam na/ gtor ma'i chos nyid las ma g.yos pa lags na/gtor ma'i chos nyi tshe'i bstan pa yul gang du 'byung/ dar ba dang/ nub pa dang/ legs nyes mchis ma mchis/ bde bar gshegs pas lung bstan du gsol// bcom ldan 'das kyis bka' stsal pa/gtor ma'i rang bzhin du ci ltar snang ba thams cad 'gyur ba med pa las/ logs su bstan pa ni dka' ba ste/ bshad cing bstan pa med na yang/ dper na nam mkha' la 'gyur ba med pa la/gza' skar dang tshes grangs dang lo zla dang dbyar dgun du brtsi zhing 'grang ba dang 'dra ste/ chos nyid ni dus gsum du 'gyur ba med pa yin la/ chos can ci ltar yang grangs dang rtags su snang ba ni 'di lta ste/chos thams cad ni ma skyes pa'i dbyings yin la/ de las chos kyi sgo yang bsam gyis mi khyab par snang yang/ thar pa chen po'i gnas su gcig cing dbye ba med pas chos thams cad 'bras bur 'dus so// 'bras bu'i chos kyang gtor mar 'dus so// de lta bas na thams cad du/ gtor ma'i rang bzhin du gnas pa las/ 'khrul pa tsam gyis mtshan mar snang ba ni/ gtor ma log par gol ba ni/ dus dang bskal pa dang bgrang ba sha stag 'byung ba 'di lta ste/dang po gtor ma'i rgyu la chags pa'i bskal pa dang/ srid par 'dogs pa mas chags pa bzhi dang ldan pas gcig go/ de nas gtor ma'i mgron gol ba las/khams gsum du srid de gnyis so// de nas gtor ma'i rdzas gol ba las/ gzugs dang kha dog dang dbyibs dang tha dad par snang ba ni/ bzhi dang bcu gnyis so// de nas gtor ma'i mgron gol ba las/skye 'gro dang snod gol ba las snod kyi 'jig rten/ rdzas gol ba las rtsi shing dang nags tshal la sogs par gnas pa la/ khams gsum srid gsum zhes 'dogs so// de ltar ston pa'i gtor ma'i tan tra 'di gang yin pa ni kun tu bzang po la/gang las spros pa kun tu bzang mo las spros pa 'di/ dang po rgya gar yul du dar bar 'gyur ro// de nas kyang sing ga la'i yul du dar bar 'gyur ba la/ lo lnga brgyar gnas so/de nas lo nyis brgya nas nub par 'gyur ro// de nas lo sum brgya la/ u rgyan yul du dar bar 'gyur ro// de nas lo brgya la/ rgya gar dang/ u rgyan dang/ sing ga la dang/ za hor yul dang/ bru sha'i yul dang/li la sogs pa'i rgyal khams drug tu grags par 'gyur te/ sku lus ma bor bar phyag rgya chen po'i rig 'dzin gyi gnas su sangs rgyas par 'gyur ro// de nas lo lnga brgya na gtor ma'i chos 'di nub nas/rgyu'i chos dar bar 'gyur ro// de nas lo brgya la rig pa can la sogs pa rnams kyis/ gsang sngags 'bras bus chos dang/ gtor rgyud rnams sngon gyi dpe rnying pa las dar bar 'gyur nas/ des kyang grub pa thob cing yid ches pa'i rtags dang ldan nas mthu dang rdzu 'phrul ldan pa mang po yang sangs rgyas shing 'phel bar 'gyur ro// de nas lo lnga brgya la bod kyi rgyal khams su dar bar 'gyur ro// de nas dam la gnas shing tshul du shis pa grangs kyis sangs rgyas shing 'tshengs par 'gyur ba yang mang ngo// dam la mi gnas shing ris 'dzin pa phung ba yang grangs kyis mang bar 'gyur ro// de ci'i phyir zhe na/bod phrag dog la gnas pa/ sangs rgyas kyi bstan pa dang/ log pa'i phyogs su yang ris 'dzin/ sangs rgyas kyi bstan pa yang rgyu 'bras gnyis su ris 'dzin/ 'bras bu'i chos kyang bzang ngan gnyis su ris 'dzin pa'i phyir ro/de nas lo lnga brgya la rgyu'i chos dar ba mang bar spyod/ 'bras bu'i chos ni nub par spyod pa nyung shas tsam gnas nas gnyis ka'i nang nas sangs rgyas kyi bka' bas gang zag gis bslad pa mang bar yod de/mi tshig mang bar dar bas/ byin dang 'bras bu chung bar 'gyur ro// de nas gsang sngags gtor ma 'di dag spyod pa nyung shas tsam zhig las/ brgya tha ma la bag tsam dar bar gyur nas/ de nas chos thams cad nub par gyur nas/bskal pa ris phra mo bdun tsam gyis nyes pa las/ skye bas thogs pa'i byang chub sems dpa' gcig gis rgyu 'bras kyi theg pa bstan nas/ de phyis ring zhig tu dus kyang phyir zhing bzang ste/sa thob pa dang/ grub pa thob pa mang bar 'byung zhing/ de la dar nub kyang mi 'byung bar rgyu 'bras kyi chos gang la dad pa res kyis lo stong phrag gsum du gnas par 'gyur ro// de nas thams cad gtor gzhong yang chos nyid du bsdus te srid pa zhig go/gtor ma'i rdzas skye 'khrungs kyang skye ba med par gsol te dengs so// gtor mgron yang rig pa gcig gi dkyil 'khor du 'dus te 'phros so// de yang gtor ma'i rang bzhin la ma rig ma rtogs pa la skye bo'i cho 'phrul gong ma ltar du snang ngo// yang dag pa'i chos nyid gtor ma 'di rig cing rtogs na/ de gang du yang grub cing bstan pa med la/ lhun gyis grub pa gtor ma rang bzhin med pa'i ye shes su gnas so// gtor rgyud chen po las/ gtor ma'i rim pa byung ba'i le'u ste so drug pa'o//// de nas rdo rje sems dpas thams cad gtor ma'i rang bzhin la/'khrul pas chags 'dzin du mthong ba la/ snying rje ba'i sems skyes nas/ 'pho 'gyur bral ba'i dbyings su 'bul ba'i gtor ma 'di skad ces gsungs so// hUM ma rig 'khrul pa'i rdzas su snang ba la// 'dzin chags byis pa'i spyod pas so sor snang// bag chags brtas pa'i dbang gis bcings pa rnams// 'bar byed chen po'i klong du gshegs su gsol// bcom ldan dpal chen che mchog he ru la/ rgyud drug las kyis bsdus pa'i gtor mar 'bul// 'khor ba'i sdug bsngal byang chub don mdzad nas// mi ldog don gyi mchod pa bzhes su gsol// bcom ldan dpal chen bud+d+ha he ru la/ log rtogs gzugs kyis bsdus pa'i gtor ma 'bul// mtshan ma rdzas kyi dngos po zhi mdzad nas// mi dmigs don gyi mchod pa bzhes su gsol// bcom ldan dpal chen badzra he ru la// rnam shes tshogs kyis bsdus pa'i gtor ma 'bul// nyon mongs zhen pa'i mtshan ma zhi mdzad nas/ mi rtog don gyi mchod pa bzhes su gsol// bcom ldan dpal chen rat+na he ru la// bde sdug gnyis med don gyi gtor ma 'bul// tshor sred len pa'i mtshan ma zhi nas kyang// mi spang don gyi mchod pa bzhes su gsol// bcom ldan dpal chen pad+ma he ru la// che chung tsam med bsdus pa'i gtor mar 'bul// 'dod chags zhen pa'i mtshan ma gzhi mdzad nas/mi 'gyur don gyi mchod pa bzhes su gsol// bcom ldan dpal chen karma he ru la// 'du byed rnam rtog bsdus pa'i gtor ma 'bul// dge sdig las kyi mtshan ma zhi mdzad nas// bcos med don gyi mchod pa bzhes su gsol// bcom ldan dpal chen rak+sha he ru la/ gzung 'dzin gnyis kyis bsdus pa'i gtor ma 'bul// chags sdang las kyi mtshan ma zhi mdzad nas// spros med don gyi mchod pa bzhes su gsol// bcom ldan dpal chen bi shwa he ru la// skyon yon gnyis kyis bsdus pa'i gtor ma 'bul// nyes legs las kyi mtshan ma zhi mdzad nas// g.yo med don gyi mchod pa bzhes su gsol// bcom ldan dpal chen gu h+ya he ru la// phyi nang gsang bas bsdus pa'i gtor ma 'bul// snod bcud las kyi mtshan ma zhi mdzad nas// 'gyur med don gyi mchod pa bzhes su gsol// khams gsum yum mchog d+hak+ki dgu rnams la// 'byung lnga snod bzhi'i bsdus pa'i gtor ma 'bul// yod med dngos po'i mtshan ma zhi mdzad nas// ma skyes dbyings kyi mchod pa bzhes su gsol// kau ri la sogs khro mo brgyad rnams la// rnam shes dbang pos bsdus pa'i gtor ma 'bul// mthong thos phyogs ris mtshan ma zhi mdzad nas/ skye 'gag med pa'i mchod pa bzhes su gsol// sid+ha la sogs phra men brgyad rnams la// dur khrod gnas brgyad bsdus pa'i gtor ma 'bul// phyi nang dur khrod mtshan ma zhi mdzad nas// spros pa med pa'i mchod pa bzhes su gsol// rnam rgyal la sogs khro bo bcu rnams la// bza' btung bgo bas bsdus pa'i gtor ma 'bul// chags sems las kyi mtshan ma zhi mdzad nas// spang med don gyi mchod pa bzhes su gsol// snyems ma la sogs khro mo bcu rnams la// snang srid dag pas bsdus pa'i gtor ma 'bul// skye 'gro las kyi mtshan ma zhi mdzad nas// rtog med don gyi mchod pa bzhes su gsol// mi srin la sogs nyi shu brgyad rnams la// mkha' dbyings b+ha gas bsdus pa'i gtor ma 'bul// ltung sems gol ba'i mtshan ma zhi mdzad nas// gnyis med don gyi mchod pa bzhes su gsol// dga' byed mkha' 'gro sum cu rtsa gnyis la// sha khrag rus pas bsdus pa'i gtor ma 'bul// dug gsum las kyi mtshan ma zhi mdzad nas// ma g.yos don gyi mchod pa bzhes su gsol// brtse gdung tshul bzhin ma bdun sring bzhi la// dam rdzas gnyis su bsdus pa'i gtor ma 'bul// skyon yon las kyi mtshan ma zhi mdzad nas// ma skyes don gyi mchod pa bzhes su gsol// pho nya sder mo sum brgya drug cu la// dur khrod phung pos bsdus pa'i gtor ma 'bul// skye shi'i las kyi mtshan ma zhi mdzad nas// ma bcos don gyi mchod pa bzhes su gsol// rdo rje ka tar rdo rje ging chen bco brgyad la// srog dbugs gnyis su bsdus pa'i gtor ma 'bul// 'pho 'gyur las kyi mtshan ma zhi mdzad nas// ma spangs don gyi mchod pa bzhes su gsol// zhes brjod pas log pa'i 'pho 'gyur ri rab tsam byang bar 'gyur ro// gtor rgyud chen po las/ gtor ma 'bul zhing bstab pa'i le'u ste so bdun pa'o//// de nas yang kun tu bzang pos 'di skad ces bka' stsal to// sems dpa' chen po phyogs bcu dus gsum gyi sangs rgyas kyi sku 'dzin cing zhal mthong ba zhes bya ba yang gzhan ma yin te gtor rgyud chen po 'di tshig dang yi ger bris nas/ gang 'chang ba dang/ gang zhig gis zhal mthong ba ni sangs rgyas thams cad zhal mthong zhing 'chang ba yin no// sems dpa' chen po de bzhin gshegs pa'i gsung rab mi 'chad par 'dzin cing bzlas pa yang gzhan ma yin te/ tan tra 'di klog cing 'don pa'o// sems dpa' chen po de bzhin gshegs pa'i thugs yang dag pa'i ye shes rtogs pa zhes bya ba yang/ gzhan ma yin te/ rgyud 'di yid la 'dzin cing gzungs su 'chang ba de de bzhin gshegs pa'i thugs yang dag par rtogs pa'o// sems dpa' chen po/ de bzhin gshegs pa'i yon tan zhes bya ba yang gzhan ma yin te/ rgyud 'di yid la 'dzin cing 'chang ba la de bzhin gshegs pa'i yon tan gang yang ma tshang ba med pa'o// sems dpa' chen po/ de bzhin gshegs pa'i phrin las zhes bya ba yang gzhan ma yin te/ rgyud 'di'i don mthar phyin pas de bzhin gshegs pa'i phrin las ma rdzogs pa med pa'o// sems dpa' chen po/ sngar 'dus pa'i de bzhin gshegs pa yang rgyud 'di'i don thugs su chud pas mngon par rdzogs par sangs rgyas la/ de bzhin du da ltar dang phyis 'byung ba rnams kyang de bzhin du sangs rgyas pas/rgyud 'di sangs rgyas kyi dgongs spyod de kho na nyid ces bya ste/ rgyud 'di shes shing 'dzin pa ta a cang yang ches te zhal tsam yang mthong ba dang ming tsam yang 'dzin pa yang ngan song las grol nas thar pa'i bde ba longs spyod rgyun mi 'chad par 'gyur ro// sems dpa' chen po/ rgyud 'di ni phan yon che yang che la chung yang chung ngo// de ci'i phyir zhe na/ rgyud 'di thos shing rtogs pa rnams ma btsal lhun gyis grub pa dang po nas rang rgyud du 'grub par 'gyur la/'di ma thos ma rtogs na khams gsum 'khor ba'i sdug bsngal las nams kyang thar bar mi 'gyur ro/ sems dpa' chen po/ rgyud 'di thugs rje che yang che la chung yang chung ngo// de ci'i phyir zhe na/ sngon gyi las 'phro dang ldan pas rgyud 'di'i zhal mthong zhing thos par 'gyur la/ las 'phro dang mi ldan pas rgyud 'di'i zhal mi mthong zhing skal ba dang mi ldan pa'i don no// sems dpa' chen po/ rgyud 'dis ni khyab kyang khyab la ma khyab kyang ma khyab bo// de ci'i phyir zhe na/ thams cad 'di las byung zhing 'dir 'dus pas khyab la/ de ltar khyab kyang de ltar shes shing rtogs par dka' bas ma khyab bo// sems dpa' chen po/ rgyud 'di ni yod kyang yod la med kyang med do// de ci'i phyir zhe na/ rtogs pa'i klong yod na go ba'i yul na yod la/ ma rigs pa dang sgro skur can na med do/sems dpa' chen po/ rgyud 'di gnas kyang gnas la/ mi gnas kyang mi gnas la/ de ci'i phyir zhe na/ dam tshig la gnas pa'i rgyal ba'i sras po la tshig dang yi ger bris te gnas la/ dam la mi gnas shing phyogs char byed pa la nam yang gnas par mi 'gyur ro// sems dpa' chen po/ rgyud 'di ni 'jig rten gyi khams su grags kyang grags la/ ma grags kyang ma grags so// de ci'i phyir zhe na/ chos thams cad kyi rtsa bar gyur pas grags la/ dper na seng+ge'i 'o ma dang 'dra bar kun gyis mi theg cing snod dang ldan pa gcig 'ga' la srid pa'i phyir ro// de lta bu'i don kyang rtsa ba'i gtor ma dkon zhing rin che ba ste/rin thang dpag tu med pa'i phan yon te/ rgyud 'di 'byung bar yang dkon la/ nub par yang mi 'gyur ba'i dpe'o// de skad ces bka' stsal pas/ rdo rje sems dpas rgyud 'dzin cing snod du 'gyur bar bya ba'i phyir/lha dang mi'i dkor dang longs spyod kun tu bzang po la phul lo// gtor rgyud chen po las/ rgyud kyi phan yon bstan pa'i le'u ste so brgyad pa'o//// de nas rdo rje sems dpas kun tu bzang po'i bka' de thos pas/shin tu 'gro ba rnams chags shing gol bar gzigs nas/ 'gro ba sems can snod dag par bya ba dang/ rgyud thos par bya ba dang/ man ngag gting phyin par bya ba dang/ lung nam du yang mi nub par bya ba dang/byas pa'i 'bras bu chud mi zos par 'grub nges par bya ba'i phyir/ 'gro ba yongs la 'di skad ces bya ba'i sgra bsgrags so// mi 'gyur dbyings su gang 'dod pa'i// rgyal ba'i sras po kun yin pas// rgyal bas ci ltar gsungs pa bzhin// bu mchog rnams kyis mnyan par gyis// 'khor ba med par bya ba'i phyir// pha ma spun dang ming sring dang/ bdag dang rgyal srid bu dang grogs// bla ma la ni bran du 'bul// de tshe bla ma ma bzhed na// ci ri ba yi rin gyis blu// rgyud chen thos par de gyur na// gzod cig 'khor ba mya ngan med// chags pa med par bya ba'i phyir// gser dngul la sogs rin chen lnga// spug la sogs pa'ang de bzhin du// glang po la sogs rta rnams dang// dar dang lhab lhub na bza' dang// zhal zas la sogs tshogs rnams kyis// bla ma mnyes par kun phul nas// zhu ba dag ni tshul bzhin bya// gsol btab gnang ba thob byas nas// gzod cig sangs rgyas sems can med// gnas pa med par bya ba dang// 'chi ba med par bya ba'i phyir// gnas dang yul dang zhing rnams dang// bran dang gnyen la sogs pa rnams// dad pas dmigs la dbul bar bya// gsol btab gnang ba thob byas na// lung chen gnas par de gyur nas// gzod cig 'khor ba mya ngan med// tha na de dag ma 'byor cing// gang yang yod par ma gyur na// lus dang srog mi 'phangs byas nas// brtson 'grus dka' ba'i grims phyung nas// g.yo sgyu med par rab tu 'bad// bka' stsal bsnyen bkur thugs zin na// de bzhin gshegs pa'i bka' brgyud dang// rgyud dang lung dang man ngag rnams// ci ltar 'dod pa bzhin du thos// gtor rgyud 'di yi zhal mthong zhing// theg pa chen po'i chos thos nas// mya ngan 'das pa'i don rtogs shing// kun tu bzang por gdon mi za'o// gang zhig de ltar mi byed cing// chags pa'i tshul gyis gtor mi shes// 'dzin pa'i sems kyis rtag par sems// gzhung dang mi mthun zol thabs kyis// rgyud lung man ngag ci smos kyis// bka' chos nyi zer tsam yang des mi mthong// de tshe ngan song gsum dang 'grogs// chags dang 'dzin pas der ma shes// yul 'khor la sogs 'di kun yang// gtong phod gang gnas dam pa yin// de tshe gtong yang mi 'bral 'grogs// der yang ma zad dpag mi langs/ gang zhig 'dzin chags gtang mi shes// de tshe bzung yang mi 'grogs te// bzung ba dbul pos gter stor nas// gar yang 'grogs med phan med 'gyod// ma rig bu gcig snying re rje// chos med than pas rngos sam tshig/ byang chub char gyis ma brlan na// rgyu 'bras gnyis ka tshig bskams nas// myu gu byang chub 'bras bu med// ngan song du skyes bzod blag med// gang zhig theg chen khrims thos pas// phangs med yon gyis sna 'dren cing// gzugs snang rtogs pa'i zhing rmos te// byang chub lam gyi sa bon btab// man ngag bdud rtsi'i char chen gyis// ye shes las kyi 'bras bu smin// rtsa ba'i gtor ma'i rang bzhin du// sangs ma rgyas pa gcig kyang med// mtha' yas gnas pa'i 'gro kun gyis// kun thos 'di rtogs grol bar shog/ces bya ba'i sgra bsgrags pas// ci ltar phyis 'byung thams cad kun// gtor ma'i snod du rung bar byin gyis brlabs so// de skad ces bya ba'i sgra mtha' yas pa'i sems can thams cad kyis thos pas/chags pa dang bral nas/ rgyud dang lung dang man ngag gi snod du rung ngo// gtor rgyud chen po las/ man ngag gi snod srod pa'i phyir// yon 'bul ba'i le'u ste so dgu'o//// de nas rnal 'byor pa rnams la phan gdags pa'i phyir/za ma'i gtor ma ched du brjod do// rnal 'byor lung dang ldan rnams kyis// sngags dang phyag rgyar ldan byas nas// mchod pa'i tshogs kyi khyad par las// dgongs pa'i za gtor gtang bar bya// de la rnal 'byor pa mtha' dag dus bzhi dag tu 'dod pa la longs spyod par byed do// de chos nyid du spyod par shes na yang gtor ma'o// rnal 'byor pa ni dus thams cad du chos la l ongs spyod do// de'i dgongs spyod kyang gtor rgyud chen po 'di ltar spyod na yang gtor ma'o// de'i phyir za ma thams cad ni tshogs la/ de bsngo ba dang ldan pa ni gtor ma'o// de ci'i phyir zhe na/ dper na shing mkhan thabs la mkhas pas shing thams cad 'phrul du byin gyis brlabs pa bzhin/thabs 'di ltar mkhas pas thams cad du gtor mar longs spyod cing/ gtor ma longs spyod pa las mngon par rdzogs par sangs rgyas par byin gyis rlobs pa'i mthu yod pa'o// de la dang po za ma'i gtor ma'i dgongs rgyud ni/ rnam pa bdun dang ldan par bya ba'am/ yang na lnga dang ldan par bya ba ste/ de yang gang zhe na/ dang po gtor ma'i dgos pa dang/theg pa chen por kun tshang ba'i dgos pa dang/ gnyis su med par tshogs kyi longs spyod bya ba dang/ lhag ma'i phrin las kyi mchod pas gnyis su med par bya ba dang/ dngos po dang mtshan ma mi gnas pa'i chos nyid stong pa'i ngang du gtor ma bya ba'o// de la dang po za ma'i gtor ma'i dgongs pa ni/ lag pa g.yas pa 'jam dpal gyi phyag rgya bcas la/ bdag la dgra bgegs yod na rtogs pa yod pas/dgra bgegs thams cad ting nge 'dzin gyis khugs par bsams la/ tshe dang gal phyi la dbyer med par bstims la/ srid pa'i drwa ba gcod pas mi gnas par bsgral la/ rgyal ba'i sras su rigs nges par dbang bskur la bzhag/de nas rnal 'byor pa'i longs spyod dang/ mchod pa'i yo byad las/ gtor ma bsngo bar bya ba ni/ hUM bcom ldan dpal chen po yab yum sras dang bcas pa dang// 'khor rgyal ba rgya mtsho dang bcas pa rnams/ rnam rtog zad par bya ba'i gtor ma bzhes su gsol// oM ba lin ta kha raM khA hi/ kha raM ta kI ni/ khA yo gi ni/ nga rta ba ga a la la ho zhes brjod la/ ci ltar snang ba thams cad gtor ma'i rang bzhin du 'phags pa rnams la mchod cing/rgyal ba rgya mtsho rnams la thugs dam gyi rgyud bskul nas/ gtor ma'i mchod pas dus rtag tu mchod pa rgyun mi chad par bsgom pa'o// de nas theg pa chen por kun tshang bar bsgom pa ni/ gzhung du ma dag las shes par bya'o// de nas gnyis su med par bgyi ste/ bdag mchod kun mnyes sangs rgyas thams cad 'grangs// zhes 'byung zhing bstan pas/don de lta bas na/ bdag mchod pa la sogs so// tshogs kyis bdag la thim pa ni// rgyal ba mnyes par bsam pa'o// rgyal ba mnyes pas ni/ bdag gi dngos grub thob par bsgom pa'o// bdag dngos grub thob pas thams cad sangs rgyas par tshogs dang gtor mar longs spyod pa'o// de nas lhag ma'i phrin las su bya ba ni/ dang por dngos po de las chos nyid du dbyings gcig cing/ rtogs pa'i gegs med par bya ba ni/ tshogs kyi lhag ma la spyi sdom ste/ oM badzra rat+na pad+ma karma bud+d+ha ba lin ta kha khA zhes brjod la/ gang yang mi gnas pa'i phrin las bcol lo// de nas dngos po dang mtshan mar mi gnas par bya ba ni/thams cad stong pa'i rang bzhin las ma gtogs pa/ rtogs pa dang mtshan ma gar yang mi gnas par tshogs kyi gtor mar longs spyod pas/ thams cad chos nyid dbyings kyi gtor mar sangs rgyas par bsgom pa'o// gtor rgyud chen po las/ za ma'i gtor ma'i le'u ste bzhi bcu pa'o//// de nas bcom ldan 'das rdo rje sems dpas/ kun tu bzang po la 'di skad ces gsol to// e ma ho/ bcom ldan 'das de lta bu'i gtor ma 'di// gtor zhing gang la gtang ba lags// gter gang du bzhag pa lags/ spyad cing btsal ba'i thabs ci lta bu lags/ yang bcom ldan 'das kyis lung bstan du gsol// bcom ldan 'das kyis bka' stsal pa/ rdo rje 'dzin pa chen po lung bstan pa 'di/ phyogs bcu'i sangs rgyas rnams kyis kyang bshad la/ ngas kyang bshad par bya'o// gtor ma 'di dag gtor zhing gtang bar bya ba ni/'byung ba chen po lnga la gtor zhing gtang bar bya'o// de ci'i phyir zhe na/ de ni gtor ma thams cad kyi rgyu yang yin la/ gtor ma'i mgron gyi bzhugs gnas kyang yin la/ gtor ma'i 'bras bu chos kyi dbyings rnam par dag pa'i klong yang yin pas/gtor ma nam mkha' la gtong ba ni/ nam mkha'i mthongs su nam mkha' la gtor ba'o// de ci'i phyir zhe na/ de ni chos nyid skye ba med pa'i dbyings kyis thams cad shes shing go 'byed pa'o// gtor ma sa la gtong ba ni/ gang na gnas pa'i sa phyogs bzhi dang mtshams brgyad du khyab par gtor ba'o// de ci'i phyir zhe na/ de ni che ba'i yon tan gyis thams cad bskyed cing smin par byed pa'o// gtor ma chu la gtang ba ni/ rgya mtsho chen po'i 'jing sleb pa'i chab chu dang gzhung la gtor ba'o// de ci'i phyir zhe na/ de ni thugs rje chen pos thams cad snums pa'o// gtor ma me la gtang ba ni/ tsu ta'i shing la sogs pa la 'bar ba'i me btang ste bsregs la gtor ba'o// de ci'i phyir zhe na/ de ni ting nge 'dzin gyi 'od zer rnam rtog bsreg pa'o// gtor ma rlung la gtang ba ni/rdo rje rlung gzhon pa'i ri gsum gyi rtse la btang ngo// de ci'i phyir zhe na/ de ni rnam par rtog pa'i dgra bgegs thams cad 'thor zhing g.yeng ba'o// gtor rgyud chen po las/ gtor ma btang ba'i le'u ste zhe gcig pa'o//// de nas gtor ma gter du sba ba ni/ gong du gtor ma 'di spyod par sa la dong chag gang bus la/ dang po chos kyi sku'i gtor ma la/ rin po che sna tshogs kyis gtor mar sbyar la gter du sba'o// de ci'i phyir zhe na/ de yang chos kyi sku mi 'gyur ba'i klong na bzhugs pa la/ yon tan gyi tshogs cir yang snang zhing 'byung ba'o// de la 'di skad ces brjod par bya'o// hUM kun tu bzang mo'i mkha' dbyings su// chos sku 'gyur ba med pa yis// rdo rje rigs kyi gter sbas pas// sgrub pa po la dngos grub stsol// sangs rgyas spyan gyi mkha' dbyings su// longs spyod rdzogs par rab snang ba'i// rin chen rigs kyi gter sbas pas// sgrub pa po la dngos grub stsol// ma ma ki yi mkha' dbyings su// gzugs sku gzha' tshon gsal ba yi// rin chen rigs kyi gter sbas pas/ sgrub pa po la dngos grub stsol// gos dkar mo yi mkha' dbyings su// mngon par gsal ba'i skur snang ba'i// pad+ma rigs kyi gter sbas pas// sgrub pa po la dngos grub stsol// dam tshig sgrol ma'i mkha' dbyings su// sprul pa'i sku dang rab ldan pa'i// las kyi rigs kyi gter sbas pas// sgrub pa po la dngos grub stsol/ zhes brjod pas/ zad pa med pa'i gter dam pa dang ldan par byin gyis brlab bo// gtor rgyud chen po las/ rin po che'i gtor ma sba ba'i le'u ste zhe gnyis pa'o//// de nas gtor ma rnam pa gsum po yang/ dang po tsit+ta spungs pa yang// rnam par shes pa dbang po dang/ gtor ma'o// bar pa phung po btubs pa yang/ nang rol gyi gtor ma'o// tha ma rdzas kyi lhag ma la/ dug gsum gyi gtor ma'o// gtor rgyud chen po las/ gtor ma rnam gsum gyi le'u ste zhe gsum pa'o//// de nas bcom ldan 'das dpal rdo rje sems dpas/ bcom ldan 'das dpal kun tu bzang po la/ 'di skad ces gsol to// kye ma bcom ldan 'das thugs rje chen po dang ldan pa/ thabs mkhas pa'i dbang phyug chen po/ kun la snyoms pa'i 'gro ba'i mgon po/thams cad la dbang bsgyur ba'i mthu rtsal dang ldan pa de la phyag 'tshal lo// zhes bya bas bstod do// de nas bcom ldan 'das kyis bka' stsal pa/ rdo rje sems dpa'/ sangs rgyas thams cad kyang rgyud 'di yin la/rgyud 'di yang sangs rgyas thams cad kyi mdzad spyod dam pa'i rang bzhin te/ rgyud 'di ni thams cad la grol zhing smon par ngas bstan pa ste/ thugs ye shes nyid rgyud 'di'i rang bzhin te/ 'di ni sangs rgyas 'jig rten du 'byung ba dang 'dra bar dkon pas/'di gang du gnas par sangs rgyas thams cad gnas pas/ rnal 'byor pa dam la gnas shing snod yod pa rnams la sems dpa' chen pos lung ston cig/rgyud 'di ni gang zhig 'dzin cing 'chang na yang/ de yang sangs rgyas dang 'dra ba yin pas/ de la ni 'khor rnams kyis kyang sangs rgyas dang 'dra bar blta'o// rgyud 'di ni rnal 'byor pa gang zhig gis/ 'chad cing ston nus na yang/ kun tu bzang po nyid dang 'dra bas/ 'khor ma lus pa rnams kyis kyang/ des ci bsgo ba mnyan par bya'o// de nas rdo rje sems dpas/ 'di skad ces gsol to// bcom ldan 'das rgyud 'dis ni/bde bar gshegs pa'i dgongs spyod thams cad ma lus par bstan te/ gang zhig 'di la mos pa dang/ 'di bsgoms shing sgrub pa la dga' ba rnams kyis 'di nyid kyi don rtogs nas sangs rgyas par gyur cig/gang zhig 'di la mi mos shing sgro skur 'debs pa rnams ni/ bskal pa dpag gis mi langs par/ 'di'i ming tsam yang mi thos shing/ mnar med pa'i dmyal ba chen por skye bar gyur cig rgyud 'di gang na gnas pa dang/dar zhing sgrogs pa'i sar/ bdag nyid chen po 'khor ma lus pa rnams kyis kyang/ gtsug gi nor bu bzhin du 'degs par gyur cigaces smod par bya'o// gtor rgyud chen po las/ dam bcas pa'i le'u ste zhe bzhi pa'o//// de skad ces bka' stsal pa dang/ rdo rje sems dpa' la sogs pa'i sangs rgyas thams cad kyang kun tu bzang po'i gtor ma'i rangabazhin du sangs rgyas par gyur to// gtor rgyud chen po rdzogs so//// mjug sdud man ngag blta ba mdor bsdus/ rgya gar gyi mkhan po pad+ma saM b+ha wa dang/ bi ma la mi tra dang/ lo tsA ba gnubs nam mkha'i snying pos bsgyur/ phyis bal po ba su d+ha ra dang/

CLOSE WINDOW