CLOSE WINDOW

Gpb009.016
བོད་ཡིག

rgya gar skad du// tsit+ta tan+t+ra rat+na ku TA laM kA ra nA ma// bod skad du/ thugs kyi rgyud rin po che spungs pa'i rgyan zhes bya ba/ ye shes kyi sku bde ba chen po na bzhugs pa/ bya rtsol mi mnga' ba/ gsang ba mchog gi dkyil 'khor dang 'du 'bral med par bzhugs pa// sangs rgyas kyi zhing yongs su dag pa na/ ye shes kyi snang ba mi 'gag par 'od gsal ba/ thugs rin po che'i klong na 'du 'bral med pa/ stong pa chen po ye shes kyi snying por gnas pa la phyag 'tshal lo// 'di skad bdag gis thos pa'i dus gcig na// bcom ldan 'das 'og min gyi gnas snying po byang chub na bzhugs pa'i skus/ rdo rje sems dpa' la gzigs nas/ chos kyi sku bde ba chen po lnga bzhugs te// de'i tshe dus gsum gyi bde bar gshegs pa rnams dang gnyis su med par bzhugs nas/ kye kye rdo rje 'dus pa'i ye shes sku// tshig gcig mtshon pas don chen srungs// rnam par dag pa'i lam chen po// sangs rgyas nyid kyis yongs ma gsungs// bgrod med lam la rab gnas pa// ye shes sku gcig dri ma med// ma bskyed gsang ba'i dkyil 'khor rdzogs// rnam dag lam la rab tu gnas// mgon po shes rab pha rol phyin// shes rab mtshon cha rnon po yis// snying rje med par thams cad sgrol// gzung 'dzin gnyis med ye shes sku// mya ngan 'das med 'khor ba med// mgon po dri med ye shes sku// sangs rgyas kun gyi gcen chen po// thugs kyi sgron las don bstan pa// 'jig rten khams ni rdzogs sangs rgyas// rdo rje sems dpa' bdag nyid kyang// rdo rje'i gdan la yang dag brten// kye rdo rje 'dzin pa nyon cig/ chos kyi sku bde ba chen po'i don 'di ni// kun gyis rig pa ma yin te// lha la sogs te 'gro ba rnams// byang chub sems dpa' mi rig ste// chos pa rnams kyi don mi rnyed// sangs rgyas lam la mi gnas te// lam la bgrod pa rtsol ba'i nad// sangs rgyas nyid la 'bras bu med// 'bras bu grub par 'dod pa yi// byang chub sems dpas don mi rnyed// de phyir mgon po dri med ngas// thugs kyi dkyil 'khor rang byung ba// ye shes lhun rdzogs me long bzhin// nga ni dus gsum rtag par bzhugs// sangs rgyas kun gyi ye shes sku// dri med rang byung 'od gsal ba// dus gsum gcig ste rtag par bzhugs// rang las 'byung ba'i ye shes lnga// gsang ba'i dkyil 'khor thugs kyi mchog/ mtshan nyid me chu sa rlung lnga// rang las byung ba'i chos nyid de// las la ma rmongs thabs kyi zhing// byed pa po nyid rdo rje ste// skye 'gag med pa'i ye shes 'di// rang bzhin nam mkhar 'od gsal ba// gzhi las byung ba'i ye shes te// dang po rgyu med dbyings las shar// tha ma rkyen med bde ba'i ngang// 'byung ba sa chu me rlung kyang// bdag nyid chen po'i de bzhin nyid// 'gro ba'i rgyud drug snang ba yang// dag pa'i ye shes rgyu yi ngang// phyi nang snod bcud ma lus kun// dang po rgyu med dbyings las byung// tha ma rgyu med dbyings su thim// kye rdo rje 'dzin pa nyon cig/ nyon mongs lnga dang mtshams med lnga// lam gyi dgra ste lam gyi mchog/ nga ni sangs rgyas kun gyi sku// nga ni sems can kun gyi dur// nga ni nad rnams kun gyi sman// shel ltar dri med ye shes sku// gzhi la dngos med nam mkha' 'dra// 'gag med ye shes 'od kyi sku// chu zla lta bur rang bzhin med// rang byung ye shes 'gag med gsung// brag cha lta bur rang bzhin med// mi 'gyur rdo rje lta bu'i thugs// nyi ma lta bur sgrib pa med// ces pa rin po che spungs pa'i rgyan zhes bya ba/ thugs kyi rgyud dam pa las/ gzhi'i 'dug tshul bstan pa'i le'u ste dang po'o//// de nas bcom ldan 'das rdo rje 'chang chen po/ chos nyid mnyam pa'i ting nge 'dzin las bzhengs nas/ thugs mi gnas pa'i klong nas/ gsang ba'i dkyil 'khor chen po zhal phye nas/ nyid las mi gzhan pa'i 'khor rnams la bka' stsal pa/kye 'dus pa'i tshogs rnams nga la nyon// nga med gzhan med ngo bo nyid kyi sku// ye shes dkyil 'khor ngang byung la// gdod nas ma byas rang byung ba// bla med lhan rdzogs sku lnga'i bdag/smra bsam brjod med mya ngan 'das// mi gnas shes rab pha rol phyin// rang byung ye shes lngar snang ba// 'du 'bral med pa'i sku lnga 'grub// rigs kyi gtso bo lngar snang ba// mtshan bzang dpe byad tshul shes ldan// mar me gcig las gnyis snang bzhin// bdag med shes rab pha rol phyin// rgyan dang cha lugs tshul shes pa// skye med rnam dag gdan stengs su// 'khril ba'i tshul du bstan par gnas// rang byung grub pa'i sku lngar shar// skye ba med las skye snang tshul// skyes pa nyid nas 'du 'bral med// gcig pur snang ba'i sku lnga'o// rdo rje 'chang gis bka' stsal pa// nga ni rnam dag sku yi mchog/ye shes lus can dri ma med// nga ni rnam dag gsung gi mchog/ smra bsam yul las 'das pa yin// nga ni rnam dag thugs kyi mchog/ rtog pa'i mtha' las 'das pa yin// stong pa'i ye shes rtsal snang ba// sangs rgyas sku lnga'i bdag nyid can/ sku lnga'i yon tan mthar phyin pa// shes rab pha rol phyin pa'i gsung// gsung med gsung gi dkyil 'khor nas// chos med chos kyi don brjod pa// mgon pos bdag la bshad du gsol// zhes bka' stsal to// de nas sku lnga ngo bo nyid kyi sku dang drug/ ye shes lnga mi gnas pa'i ye shes chen po dang drug/ yul lnga bdag tu med pa'i klong dang drug gis smras pa/ kye kye bcom ldan rdo rje 'chang// nga byed pa po nyid rang bzhin gyis rnam par dag nas/ sangs rgyas pas 'dus byas kyi chos ye gdod ma nas med do// nga'i shes pa rnam par dag pa yin pas/ nga'i chos thams cad rnam par mi rtog pa yin no// de nas rang rang gi rigs kyi 'khor rnams dang lhan cig tu 'khod nas// thal mo mnyam par sbyar te gsol pa/ ngo bo nyid kyis smras pa/ e ma ho// bde gshegs bcom ldan 'das// sangs rgyas kun yi ye shes sku// rtogs par dka' ba'i snying po'i don// rab tu mi rtog gnas med pa'o// zhes gsungs so// de nas bcom ldan 'das rdo rje mi bskyod pas/ e ma ho gzung 'dzin rnam spangs pa// tshig dang yi ge'i spyod yul min// chos bdag med pa'i mnyam pa nyid// rang rig gdod nas ma skyes pa'o// de nas bcom ldan 'das rin chen sems dpas// e ma ho mnyam nyid rig pa'i klong// ming du btags pa'i chos rnams kun// mnyam pa nyid las gzhan med do// de nas bcom ldan 'das pad+ma sems dpas/ e ma ho/ chos su snang ba thams cad kun// rang gi ngo bo brjod du med// de nyid rang rig ye shes ni// mkhas pa rtogs pas bsgom par 'gyur/ de nas bcom ldan 'das las kyi sems dpas// e ma ho/ chos kun rang rig ye shes te// nges pa med do dngos rtog bral// de nyid dag pa'i rang bzhin pas// mkhas pas ci dgar bsgoms kyang 'grub// ces gsungs so// de nas bcom ldan 'das rnam par snang mdzad sems dpas/ e ma ho chos kun stong pa'i bdag/ rang gi ngo bo brjod du med// brjod med de nyid snang ba yis// chos rnams kun la khyab par gnas// zhes gsungs so// de nas yum kun tu bzang mos// e ma ho chos nyid bde ba'i klong// rang bzhin rnam par dag pas nam mkha'i ngo bo nyid// de nas yum sangs rgyas spyan gyis/ e ma ho mi bskyod byang chub sems// dus gsum 'pho 'gyur med pas ye shes dag pa'i zhing// de nas yum mA ma kIs/ e ma ho yon tan dpag med sku'o// 'du 'bral med par gnas pas snod bcud snums par byed/de nas yum gos dkar mos/ e ma ho thugs rje 'od dpag med// thams cad smin par byed pa'i rang bzhin ye shes 'od kyi me/ de nas yum dam tshig gi sgrol mas/e ma ho thugs rje'i shugs kyis sgrol/ ma bskyod rlabs kyis gcod pas gar yang thogs med sgrol/ de nas yum bdag tu med pa'i klong gis/ e ma ho// mi gnas ye shes dngos rtogs mtha' dang bral// sku dang ye shes rol pa mdzad spyod kun// gdod nas rang bzhin med de dngos rtog mtha' dang bral// zhes gsungs so// de nas ye shes lngas smras pa// rig pa 'gag pa med pas me long ye shes yin// de la 'pho 'gyur med pas mnyam pa nyid// de nyid rgya ma chad pas sor rtog ye shes yin// ma btsal lhun gyis grub pas bya ba grub pa yin// skye med dbyings las ye shes rang byung bas// chos kyi dbyings kyi ye shes gdod nas dag/ye shes rgyal po tshig las 'das pa ste// mi gnas tshig las 'das pa'i ye shes yin// zhes gsungs so// de nas bcom ldan 'das rdo rje 'chang// dga' zhing mgu nas yi rang ste// legs so legs so rigs kyi bu// sems can kun gyi don gyi phyir// khyed kyis smras pa de legs so// tshig don rab tu gsal ba yis// sgyu ma lta bu'i ye shes la// sgyu ma lta bu'i tshig brjod pas// dngos po mi g.yo brtan par bzhugs// de bzhin gshegs pa'i sku lnga yang// ye shes lnga ru mngon sangs rgyas// ye shes lnga yi ngo bo yang// mi gnas ye shes chen por rdzogs// ma bskyed rang byung dbyings su rdzogs// rdzogs pa'i yang rdzogs a ti la// mtho dman bzang ngan che chung yangs dog med de rdzogs// rang bzhin rnam par dag pa'i sku mnga' bas// rang byung btsal med sku lnga lhun gyis rdzogs// nam mkha'i rang bzhin mtha' dang dbus med pas// phyi nang snod bcud nam mkha'i ngang du rdzogs// rang byung bde chen ye brdal khyad par gnas// mnyam dang mi mnyam skye med klong du rdzogs// rdzogs pa'i don la btsal du ye nas rang bzhin med// ces gsungs so// thugs kyi rgyud dam pa las/ thugs rje 'byung ba'i tshul bstan pa'i le'u ste gnyis pa'o//// de nas bcom ldan 'das rdo rje 'chang// rang gi ngo bo brjod du med// mi gnas mya ngan 'das pa po// rtogs pa'i klong du sus dris pa// ye shes dri ma med pa yin// lung du bstan pa bde gnas pa// gol sgrib gdar sha chod pa yin// chos la blo ni mi gnas na// rtag chad tshig las 'das pa yin// ye shes sgyu mar snang ba'i sangs rgyas dang// log rtog sgyu mar snang ba'i sems can gnyis// sgyu ma yin phyir rang bzhin rnam par dag/ ma byung ma skyes 'od kyi dkyil 'khor la// bkod pa lha yi dkyil 'khor rtsol mi dgos// rang bzhin rnam par dag pa'i chos sku la// khrus dang gtsang sbra me tog byug mi dgos// mkha' la nyi ma'i snying po brdal ba la// 'od dang snang ba kun tu btsal mi dgos// shes rab rig pa gzhi las shar ba la// rna bas mnyan cing tshig phyir 'brangs mi dgos// nor bu rin chen rang la yod bzhin du// gzhan la brten nas btsal bas chos nyid don mi rnyed// rnyog pa med pa'i chos sku la// bkrus pas mi 'dag nam mkha' 'dra// skye dang bral ba'i snying po la// byang chub 'bras bu yongs kyis med// rdo rje sems dpa' byang chub ni// rang gi rig pa chen pos mkhyen// rang rig du mar mi snang bas// so sor bstan kyang gcig gi ngang// bde gshegs sku rnams du mar snang// ye shes lnga yi bdag nyid snang// nyi ma'i snying po ji bzhin no// kye rdo rje 'dzin pa chen po// snang la mi gnas pa rnams ni// ye shes kyi sku dri ma med pa'o// bkod pa med par mngon par snang ba ni// de bzhin gshegs pa'i sku dri ma med pa chu zla lta bur snang ba'o// ma bkod pa mtha' dang dbus med/phyogs dang ris med/ mtho dman dang yangs dog med par snang ba ni/ sangs rgyas kyi zhing yongs su dag pa'o// 'dod pa'i mtha' thams cad dang bral ba ni// ting nge 'dzin rtse gcig pa'i zas so// ye shes kyi sku dri ma med pa dang sangs rgyas kyi zhing yongs su dag pa gnyis dus gsum du 'du 'bral med par bzhugs pa ni/grogs khyad par can no// tshig dang yi ge'i don la mi gnas par gzhi'i 'dug tshul shes bya gtan la phebs nas/dgongs pa'i la dor// don klong du 'dril// re dogs kyi 'phrang bcad// bdag nyid chen po de kho na nyid do// zhes thugs kyi rgyud dam pa las// rtogs pa rgyud la bzhag pa'i le'u ste gsum pa'o//// de nas bcom ldan 'das rdo rje 'chang chen po// chos nyid gsal ba'i ting nge 'dzin las bzhengs nas/ sku mi gnas pa'i klong chen por bstims te/ kye 'dus pa'i tshogs rnams nga la nyon// nga ni ye nas nam mkha' 'dra// nam mkha'i rang bzhin dngos po med// sgrib g.yogs rab tu mi gnas pa'o// nga ni ye nas rgya mtsho 'dra// srid pa'i g.yo 'gul ye nas med// nga ni ye nas ri bo 'dra// dus gsum 'pho 'gyur med par gnas// nga ni nyi ma'i snying po 'dra// sku gsum 'bras bu lhun gyis grub// nga ni ye nas seng ge 'dra// rtsal gsum lus la rdzogs pa yin// nga ni bya rgyal khyung chen 'dra// lta ba spyi rgya rlabs kyis gcod// kye rdo rje 'dzin pa nyon cig/ khyed ni da rung 'khor ba'i rgyu'o// sa la gnas pa'i byang chub sems dpa' rnams dang/ lha rnams la sogs pa lta ci smos/ ci ste rtogs pa'i don lam du 'khyer ba'i phyir ro// nga rig pa chos kyi skur rang byung gi ye shes chen po rtogs pa mngon du gyur pa/ bya btsal thams cad dang bral ba// lung las 'das pa/ zab cing cha phra bas gzhan gyis brtags par dka' ba/phra zhing zag pa med pa/ sa bon dang bral ba/ rdul med pa rdul dang bral ba/ dri ma med pa dang ma 'dres par gnas pa/ rang rig pa'i ye shes la bdag med pas/ bya ba thams cad dang bral ba'o// smra bsam tshig las 'das pas rdo rje sems dpa'i thugs// gsal la rang bzhin med pas gzung 'dzin gnyis dang bral// skye 'gag mtha' las 'das pas chos nyid bde chen po// ji bzhin lhun gyis rdzogs pas kun la khyab par gnas// snying po rang la rdzogs pas bsgom pa'i blong ngo bral// snang bar bya med chos nyid bde chen klong// yon tan lhun rdzogs ye nas rnam par dag/ kha dog dbyibs med smra bsam 'das pa'i dbyings// skyon rnams kun bral bsgom du med pa'i mchog/ ma bcos chos sku kun gzhi'i byang chub sems// thugs kyi rang bzhin mtshon pa las 'das pas// shes par bya phyir rna bas mnyan du med// dbyings nas shar bas lces kyang brjod du med// rang byung chen po tshig gi mtha' dang bral// rtog med mnyam nyid chos kyi sku// mdzes pa kun tu bzang po'i sku// bzung bas mi zin chu zla'i sku// zab mo a yi klong nas 'byung// brjod las 'das pa zab mo a yi klong// a yi rang bzhin spros pa'i mtha' dang bral// rtog med mnyam nyid chos skur dag pa la// ngo mtshar rmad byung rig pa'i skur snang ste// ma g.yos dbyings nyid yin pas klong nas 'phyo// ji ltar snang yang ma bcos snying po'i sku// zab mo a yi klong chen 'di// btsal bas rnyed pa'i gnas med de// drug gi chos bzhin yul 'dod na// long bas nam mkha' 'dzin pa bzhin// gong nas gong du sa 'phar lam// bya bral chos dang mthun pa min// bgrod du med do chos sku byang chub sems// bgrod par 'dod na ye shes mtha' la ring// bsod nams las grub gling bzhi rgyal po dang// rnam dpyod dus la ltos pa'i mu stegs rnams// ma bcos chos nyid byang chub lam 'gags pas// chos nyid byang chub don dang bral bas gol// kye rdo rje 'dzin pa nyon cig/ nga byang chub kyi snying po la gnas pa'i tshe/byang chub kyi chos la byang chub tu bsgrub tu mi gnas so// de bzhin gshegs pa rnams kyi ye shes la// sems can gyi chos med de mi gnas so// a ti yo ga rdzogs pa chen po bya btsal las 'das pa la/bzang ngan dang che chung med de mi gnas so// lung las 'das pa'i chos/ sems las 'das pa'i sangs rgyas// kun gzhi las 'das pa'i chos// ma bsgoms par sangs rgyas pa'i blta ba/chos spyod bcu dang mtshams med pa lnga'i spyod pa la khyad par med pa// ma mnyan par bshad shes pa'i rgyud// 'di ni sangs rgyas kyi rgyud// gsang ba man ngag yang dag par shes par bya'o// zhes thugs kyi rgyud dam pa las/ bya btsal thams cad las 'das par bstan pa'i le'u ste bzhi pa'o//// de nas bcom ldan rdo rje 'chang// sangs rgyas chos la mi gnas te// sems can rnams ni blta ba yin// mtshon pa'i byang chub chos yin kyang// rdzogs pa'i blta ba chos ma yin// thog ma'i mgon po dri med kyang// chos la brten pa ma yin te// ma bskyod dbyings nas rang 'byung ba'o// de phyir chos kyis sangs mi rgya// chos ni tshig phyir 'brengs shing tshig la dga'// rang byung ye shes nyid ni tshig gi mtha' dang bral// rig pa'i ye shes chos la brten ma yin// de phyir yang dag don la tshig med yi ge med// dper na byis pa zla ba mtshon pa bzhin// sems can rnams la yang dag tshig dang yi ges mtshon// sems can rnams ni thog ma chos la rab brten la// chos de khong du chud nas chos la mi gnas na// lung bstan de ni thog ma'i sangs rgyas nyid dang mtshungs// chos de khong du chud nas chos la yang dag gnas 'gyur na// byis pa'i rtsed mo 'dra ste slar la 'jig/ de phyir bsam gtan mnyam bzhag byed cing ye shes lha la mchod byed pa// byis pa so so skye bo rnams kyis sgom chen yin zer ba// de ni long bas long ba khrid nas g.yang sar brul nas 'chi// gang zhig rgyud pa'i blo gnas na// srog bcad tshe dang shing bcad don la khyad par med de stong pa'i mu la gnas/ci ste chu la ral gris btab dang mtshungs// stong pa'i chos la stong pa'i ye shes rang rol pa// nam mkha'i mdung bskor 'dra ste yangs dog med// gzugs kyi phung po 'byung ba sa rdo snang// rang rig rgyal po nam mkha'i mtha' dang mnyam// rnam rtog gzung 'dzin bag chags ci bsags kyang// byang chub sems la rang bzhin yongs kyis med// dper na nam mkha'i cho 'phrul sna tshogs cir snang yang// nam mkha'i rang bzhin gdod nas rnam par dag/ kye rdo rje 'dzin pa nyon cig/ bka' lung gi phyi mo las kyang// ye shes rgyal po tshig las 'das pa de// smra ba'i khyu mchog gzhan gi dring mi 'jog/rang rig rgyal po tshig las 'das rtogs na// phyi nang snod bcud bdag nyid chen por ldog/ sangs rgyas kun gyi thugs kyi mchog/ sangs rgyas nyid kyi thugs la gnas// sems can kun gyi byang chub sems// mgon po dri med shes rab kyis// rnam par dag pa'i zhing khams su// dus gsum gcig ste mnyam par gnas// rdo rje 'chang gi ye shes ni// bde gshegs rnams kyi thugs la gnas// sems can rnams la de bzhin no// yi ge'i ngo la mi snang yang// mtshon pa'i yi ges don la snang// don gyi yi ge dam pa de// shes rab can gyis ar snang ba// a yi rang bzhin khong nas 'byung// khong nas 'byung ba skye ba med// skye med yi ger mtshon pa de// mgon po dri med nga yi sku// nga med nga ni stong pa yin// 'phags pa rnams kyis nga mi gzigs// bdud dang mu stegs nga mi snang// nga la rang bzhin med pas na// bdud bzhi rnam par grol ba yin// nga ni mi 'gyur rdo rje'i sku// zag pa med pa'i ye shes yin// kye rdo rje 'dzin pa nyon cig/ nga dri ma med pa ye shes kyi sku la/ dge ba dang sdig pa gnyis med do// dper na nam mkha' la nam mkha' gnas pa'i tshul lo// nga gdod ma nas snying po byang chub tu gnas pa la/ 'bras bu thob dang ma thob gnyis su med do// nga stong pa chen po'i ye shes kyi snying po can du gnas pa la/bde ba dang sdug bsngal gnyis med do// rang rig pa'i ye shes chos nyid skye ba'i ngang nas dus gsum du 'du 'bral med par bzhugs pa la/ gnas dben pa dang mi dben pa gnyis med do// kye rdo rje 'dzin pa 'khor ba'i rgya mtsho mtha' ring bar/nyon mongs sems can grol mi nus// thugs rje chen po'i shugs phyung nas// bsad pa 'ba' zhig las su rung// khams gsum sems can bsad pa na// sangs rgyas 'byung ba'i lam chen yin// sku gsung thugs kyi rdo rje'i bdag/ sems can rnams kyi thar pa'i lam// de bzhin gshegs pa'i thugs rje yis// ngan song zhing du yang dag bsgral// sangs rgyas 'byung ba'i byang chub sems// ma skyes pa yi rtsal la gnas/ kye rdo rje 'dzin pa/ 'jig rten khams ni rdzogs sangs rgyas// gang zhig thob pa bla na med// snying po byang chub sems la bzhugs// zhes gsungs te// rang rig pa'i ye shes kyis ma rig pa bsad nas/ma rig pa gar bros rig pa'i ngang la bros// ye shes lngas dug lnga bsad nas// dug lnga gar bros/ ye shes rang la bros/ skye ba'i rgyun bcad 'khor ba'i lam dang bral/ rgyun bcad lam bral sku ni mya ngan 'das// rang byung ye shes nyid kyang tshig gi mtha' dang bral// kun gzhi'i rnam shes sku la mi 'khor zhing// mya ngan 'das pa'i byang sems de kho na// kye rdo rje 'dzin pa nga la nyon// nga ni sangs rgyas kun gyi sku// ye shes sku gcig dri ma med// nga ni sangs rgyas kun gyi gsung// 'gag pa med pas ye shes gsung// nga ni sangs rgyas kun gyi thugs// mi 'gyur rdo rje lta bu'i thugs// 'gro ba rigs drug nga yi lus// mgon po dri med ye shes ngas// ma byung ba yi chos nyid las// snod kyi 'jig rten nga las byung// bcud kyi 'jig rten nga las byung// nga med pa yi sngon rol na// snod bcud mi gnas nga yi ngang// nga ni rang byung ye shes te// yul ni rnam par dag pa'o// ma byung dri ma med pa'i ye shes la// 'dod chags bya ba'i ming yang med// 'dod chags med pa'i sngon rol na// yi dwags 'khor ba'i rgyun yang bcad// nga rgyal mnyam nyid chen po yin// mi yi 'khor ba'i rgyun yang bcad// khong khro rang byung ye shes yin// lha min 'khor ba'i rgyun yang bcad// phrag dog bya ba grub pa'i ye shes yin// lha yi 'khor ba'i rgyun yang bcad// klu dang ma mo gshin rje dang// bdud dang gnod sbyin srin po dang// mi ma yin pa'i tshogs rnams kyis// nga la glags ni mi tshol te// dang po rang gi ngang las byung// tha ma rang gi ngang du thim// dkon mchog gsum la skyabs mi 'tshol// ngan song gsum la nyam mi nga// ye shes mnyam pa nyid kyi sku// mi gnas pa'i ye shes chen po klong du khod snyom// rang byung gi ye shes chen po tshig gi mtha' dang bral bar la bzla'// rgyu 'bras kyi chos thams cad rdzogs pa chen po'i klong du bstims so// zhes ston pa rdo rje sems dpas bstan/ zhu ba po dga' rab rdo rjes zhus te/ sdud pa po 'jam dpal nyid kyis bsdus nas byang chub shing drung du sbas nas/rdo rje sems dpa'i rgyas btab bo// thugs kyi rgyud chen po rin chen sbungs pa'i rgyan zhes bya ba/ rnyog pa med pa'i rgyud du gsungs nas/ chos spyod bcu dang mtshams med lnga// rtogs pa'i blo la rang bzhin mnyam// zhes chos la gnas na sangs rgyas kyi las kyi sgrib par 'gyur bar bstan pa'i le'u ste lnga pa'o//// rdzogs so// shrI sing+ha dang bai ro'i 'gyur////

CLOSE WINDOW