CLOSE WINDOW

Gpb009.011
བོད་ཡིག

/ 'phags thugs 'gal dang 'phral du gnod sbyin mos// bar chad byed phyir blo yi zer la bskyod// la stod mkhas pa mgon po la// nyang stod lce nag bdud rtsis zhus//// rgya gar skad du/ swasti shrI bid+yA ko ki la/ bod skad du/ bkra shis pa'i dpal rig pa'i khu byug/ bcom ldan 'das dpal kun tu bzang po la phyag 'tshal lo// 'di skad bdag gis thos pa'i dus gcig na// dus gsum gyi de bzhin gshegs pa bcom ldan 'das thams cad kyi thugs// bcom ldan 'das chen po'i ye shes dang yang mi mnyam pa'i gsang sngags theg pa chen po'i yang theg pa chen po/ dus gsum gyi de bzhin gshegs pa thams cad kyi sku gsung thugs rdo rje ltar dbyer mi phyed pa'i bdag nyid/gzhi rtsa med pa'i snying po chos thams cad rgyu yod pa dang med pa'i tshig zad pa/ srid pa'i sa bon ma spangs par zad nas dag pa/ kha dog dang dbyibs dang mtshan ma med par rigs rgyud dang bral ba/gang gi gnas su ma gyur cing thams cad kyi gzhir gyur pa/ ming dang tshig gis rnam par dag cing/ rnam pa'i spyod pa thams cad dngas shing bden pa gnyis mgo mnyam du dril pa/ye shes snying po che ba thams cad kyi bla/ chos thams cad ni tshul bzhin gnas la/ chos thams cad tshul bzhin du mi gnas pa'i mchog/ gang bsam du med pa'i ngo bo nyid med pa la/mi sems par sems shing mdun med par ldan pa/ nang dang nang gi phyi rol med cing mi ldan pa med par tha dad pa/ rdo rje chen po dgyes par kun sdud cing 'dus nas 'grub pa/ bde ba chen po'i tshul mi brjod par thams cad thams cad dang gnyis su med par gyur pa/chos kyi sku ni 'du byed kyi chos ma yin pa/ mtshan ma tha dad pa gang yang ma yin pa/ chos thams cad kyi rang bzhin dang gzhir gyur pa'i phyir nam mkha' ji lta ba bzhin pas de ni rtag pa bzhin no bya'o// chos kyi de bzhin nyid dang/ ye shes kyi de bzhin nyid de gnyis kyi de bzhin nyid ni gcig pa'ang ma yin/ tha dad pa'ang ma yin pas/dbyibs dang kha dog las 'das pa'i chos kyi sku de ni ye shes rnam par dag pa dang/ spang bar bya ba gnyis kyi phyir/ lhan cig grub pa'i chos kyi sku ni/ rnam par dag pa phun sum tshogs pa zhes bya'o// dus gsum gyi de bzhin nyid kyi de bzhin nyid dang/chos thams cad kyi de bzhin nyid de bzhin nyid dngos po med par ro gcig pa'i phyir dang/ theg pa rmad du byung ba dang/ rin po che tshad med pa sel ba dag ste/ sangs rgyas thams cad la dgongs pa'o// dpa' bo rtag par dgongs pa yi// mtshan ma thams cad las 'das shing// mtshan mas ma gos bsgor med pas// rnam par mi rtog chos kyi sku// rtag pa'ang ma yin chad pa'ang min// da ni dbu ma'i lam po che// sku gsum lhun grub de bzhin las// sangs rgyas tshad med grangs med pa'i// rgyal dang mgon rnams mngon byung gyur// yang dag par rdzogs pa'i rdzogs par longs spyod pa'i sku/thugs rje chen po de ni/ rtag pa dang mi rtag pa gnyis 'dzin pa'i phyir na/ rtag pa dang mi rtag pa chen po zhes bya ste/ de ni sbyangs pas thob par bstan no// yang dag bstan te mngon par snang// sangs rgyas rnams dang dgongs pa mthun// gcig la gnyis la spyod phyir gcig/ de ni longs spyod mtshan dang ldan// smon lam ldan pa'i skal chen la// rgyu rkyen 'dus las gsal bar snang// sprul pa'i sku ni mdzad pa'i don la sprul par mdzad cing/khro ba dang 'dzum pa dang/ rgyan can dang/ rgyan med par 'phrul pa'i phyir sprul pa'i sku'o// mi rtag rtag pa sprul ldan zhing// sbyangs pa'i mchog gyur kun gsung 'gyur// mtshungs par spyod dang ston mang po// theg pa bzhi ni ston par 'gyur// rang bzhin ye shes ting nge 'dzin// dag pa sku gsum pi wang tshul// de gsum rnam par dag pa ni// de bzhin de bzhin de bzhin phyir// sangs rgyas rnam kun tha mi dad// de phyir sangs rgyas thams cad kyi// ye shes chen por rab gsal bas// yang dag dbyings la mnyam sbyar bas// chos rnams ngo bo nyid kyi zhing// mi skye mi 'gag mi dgongs phyir// de la rtag chad mthar mi chags// ye shes rig pas don rig pas// nyams su blang med rang rig nyid// ye shes rang rig 'di 'dra zhes// rdo rje sems dpas bstan du med// kun rdzob brjod yod ma rtogs pa// yang dag bden pa nyid du ni// 'khor ba mya ngan 'das pa'i chos// rang bzhin med pas ye nas zhi// gcig pas du ma med par gyur// gcig las mnyam nyid phyogs bral bas// de dag rang bzhin mi dmigs phyir// thams cad de bzhin nyid du bzhag/ rang byung rang zhi mnyam bzhag pas// mtshan ma'i 'gog par lhung mi srid// de ltar don la reg gyur na// ci la gnas shing gang la chags// gang zhig 'gag cing ci zhig blang// ma spangs lhun grub kun tu bzang// sku gsum ldan pas pho brang mchog/ lhun grub bya yi dbyibs 'dra la// rtsi shing nags tshal sna tshogs ldan// gcan zan ri dwags sems can rnams// thams cad tha dad bsam gyis mi khyab nas// rdo rje 'khor lo 'dzin sogs kyi// bla med gnas sogs las kyi mthong// rtogs nas rang skal ldan pas chos// so sor go ba bsam mi khyab/de nas dpal rdo rje sems dpas/ bcom ldan 'das kun tu bzang po la zhal shin tu 'dzum pas bltas nas// e ma ho rab tu gsang ba'i mchog/ gang las byung nas ci zhig byed// gang du 'gro ba su la 'tshal// yangs pa chen pos bshad du gsol// zhes ched du gleng ngo// de nas bcom ldan 'das chen po dpal kun tu bzang pos bka' stsal pa/ rnam dag pa dang mya ngan 'das// chos sku dngos yod rnam dag nyid// gzhan las ma byung rang la gnas// sna tshogs rang bzhin mi gnyis te// cha shas nyid du spros dang bral// theg pa sna tshogs yin par bshad// mchog gi dam pa snying po ni// lung gi dam pa byang chub sems// 'gro ba kun la rang bzhin gnas// de nas bcom ldan 'das dpal kun tu bzang pos ched du gleng pa// so so skye bos mi shes pas// shes pa gsum po ma spangs phyir// sku gsum las ni ring du 'gyur// sku gsum ye shes che rten 'byung// zin pas rtsol ba'i nad spangs te// lhun gyis gnas pas bzhag pa yin// de nas bcom ldan 'das dpal kun tu bzang pos/ rab tu gsang ba'i chos bsam par bya ba la rab tu gleng ba/bsam pa bsam par mi bya ste// mi bsam pa'ang mi bsam mo// gang la'ang rnam par mi sems pa// de ni de bzhin mnyam nyid do// rnam mi rtog tu kun 'dus phyir// tshor bar bsgoms na ci zhig gnas// ji bzhin pa zhes bstan pa nyid// rang gi rig pa tshangs pa yin// bkra shis pa'i rig pa khu byug las dngos po gleng gzhi'i le'u ste dang po'o//// de nas bcom ldan 'das dpal rdo rje sems dpas mchod pa rnam gnyis mchod de/phyag btsal te shin tu 'dzum pa dang bcas pa'i ngag gis/ bcom ldan 'das chen po bde bar gshegs pa chen po// mtha' dag dbus su blta ba ji ltar lags/phyi rol yul la ji ltar 'tshal/ rdo rje sems dpa' 'gro ba dang chos thams cad kyi rang bzhin pa dang/ rigs lnga ye shes lngar bstan pa ji ltar lags/ gsang sngags rig sngags zhes bya ba ni gang/ rdo rje theg pa chen po'i sgo nas 'jug pa dang/ mdo sde'i sgo nas 'jug pa gnyis sems mnyam par 'jog pa'i dus na tshul ji ltar 'jog/ de nas bcom ldan 'das dpal kun tu bzang pos bka' stsal pa/ mtha' spang dbus rtogs pa la shes yul dbye// 'gro ba'i yid du kun gcig rdo rje sems dpa'i ngang// ye shes dbyings gsal skye med thabs chen gyis// byin brlabs khyad 'phags rgyal ba rigs lngar snang// don dam gsang ba gsang sngags rgyal po che// rnam grol dag pa rig sngags bla med gsung// 'jug ldog mthar zad bla med lhun grub lam// stong smon mtshan 'dzin lam mchog bde ba sgrub// zhi dang gnas dang lhag mthong dag dang ni// kun gzhi rnam shes yod pa'i dngos nyid dang// 'jig rten blta ba rnam bzhi 'das pa'i blta// khams gsum las 'das nor bu rin po che// phung po lnga po mi g.yo byang chub lam// 'dod chags zhe sdang gti mug phrag dog rgyal// bde ba bde la gnas pa'i bde ba mchog/ rnal 'byor cig char 'jug pa'i lam 'di ni// 'jug par mi rung zhes ni skur 'debs pa// dbang po rtul po ma rabs tha mal pa// gnas ngan len pa'i bag chags sbyang rung ste// gnyis med don dam kun rdzob bden gnyis gcig/ gnyis su mi blta snying po byang chub nyid// zhi gnas lhag mthong stong pas brgyal bying la sogs bral// dben pa'i grong dang grong khyer ri sul dang// dgon pa dben pa'i nags gseb dur khrod rnams// brten par byed cing bdag bstod gzhan smod cing// brnyed dang bskur sti dag la gang chags pa// mkhas pa ma yin shin tu'ang dran pa nyams// chos lnga ldan pa'i byang chub thob par gsungs// skye ba dag la mos pa'i nyon mongs 'di// sems kyi tshul khrims nyams te zhig pa yin// de nas bcom ldan 'das dpal kun tu bzang po la/rdo rje sems dpas zhus pa/ bcom ldan 'das thugs rje chen po'i bdag nyid dang ldan pa/ the tshom gyi sgrib pa dag par bgyi ba'i slad du/ zhu ba'i spobs pa bgyid pa'o// gzugs brnyan rang bzhin ting 'dzin dkyil 'khor gsum// gcig gam 'on te tha dad bstan pa dang// lha yi dkyil 'khor nye bar bsgrub pa'i tshe// las gzhan phra mo brtsams pas bsgrib mi bsgrib// zhi khro'i dkyil 'khor so sor mchis ma mchis// lha gcig bsgoms pas gzhan dbang 'gyur ram ci// rnal 'byor mi rtog ting 'dzin gsal gyur na// ting 'dzin gzhan la snyoms par 'jug mi 'jug/sngags la 'jug pa'i rnal 'byor dbang phyug gis// mdo sde bsgoms nas gtan tshigs bcal na ko/ 'phags pa dag dang mi mnyam skyon ci lags// bsgom du med par gzhag tu rung mi rung// lung dang slob dpon mkhas pas sems bcos na// sngags kyi 'phro 'du med par don thob bam// dge ba gzhan gyi rnam smin phyi mar 'byung// sngags spyod tshe 'dir 'grub bam ci las 'gyur// nges pa'i dbang ma thob pa'i slob dpon gyis// gzhan la dbang bskur dbang thob phan mi phan// zhes zhus pas/ ched du gleng pa/ ting nge 'dzin gyi goms pa'i mthur ldan na// rang bzhin gzugs brnyan bye brag cung zad med// thams cad sku gsung thugs su 'od gsal na// stobs ldan gud na med pas bsgrib mi nus// chos sku ro gcig 'gro don byed mnyam ste// mos pa'i blo la so so nyid du gsal// ye shes dbyings su phyag rgya kun gcig phyir// bde gshegs gcig bsgom rgyal ba kun gyi ngang// ting 'dzin snying po mi rtog goms gyur na// ting 'dzin gzhan phra de la sbyar mi dgos// gcig car 'jug pa goms pa mngon gyur na// tshe 'dir 'grub pa gdon mi za bar rtogs// ma rig bdag tu bzung nas blta nyes pas// sangs rgyas sems can 'byed pa srid pa'i rtsa// don dam skye med dngos po med bden pas// bsgom du med par 'jog pa dam pa nyid// yang dag ma nor gdeng chen ldan pas gang// blo yi gting du shin tu ngoms byas nas// btsal mi dgos pa'i nor bu rin po che// dge sdig gnyis kyi 'bras bu so sor smin// theg dman gnyis ka'i rgyu la bzhugs yod phyir// zhe sdang la sogs ngan song rgyu nyid da lta dag pa'i phyir// tshe 'di'i 'bras bu thob pa de nyid mod// dus gsum rgyal ba'i gsang chen nges pa'i dbang// byin nam bstan nam mthong bar ma byas na// rdo rje rgyal po yon tan dbang med pas// nor bu rgyal sar bskos pa ji bzhin du// dbang bskur byas pas bdag gzhan brlag par 'gyur// bkra shis pa rig pa'i khu byug las/ mdor bsdus pa mdo sde'i dgongs pa dang zhus pa'i lan dang bcas pa'i le'u ste gnyis pa'o//// de nas bcom ldan 'das dpal kun tu bzang pos/ btsal ba med pa'i ting nge 'dzin la snyoms par zhugs nas/ ched du brjod pa 'di brjod do// rdo rje'i sems ni gsung bgrod sbyang ba ma lus de dbang bsgyur// rdo rje 'du 'bral med de bde ba la gnas rdo rje'i dbang// rdo rje de ni skye dang 'gag pa med de yangs shing zab// de phyir rdo rje zab mo yangs shing zab pa'i gting ni lta ba rdo rje yin// rdo rje nam mkha' lta bu de ni thams cad skyed pa'i rgyu ste gzhi ma yin pas che// de phyir rdo rje kun byung snying po ma btsal bzhag nas bsgom// sems kyi ngang nyid kha dog dngos med ji bzhin te// gang nas ma byon phyi rol nang rol gnyis ka min// shes rab tshogs kyi snying rje'i brlan dang ma bral thams cad slengs// log rtog mtshan ma'i 'du shes thams cad de las 'byung// sbyin pa la sogs pha rol phyin pa bcu yang rang bzhin rdzogs// lam 'dus rim pa sa dang 'jug lta thams cad 'grub pa yin// spang len med par chos 'di sgyu mar gnas pas na// lus ngag yid gsum yang dag pa nyid ye nas shes pa yin// sangs rgyas chos la gus shing rnyed 'dod dran pa shes rab min// gtong ba tshul khrims chos sems pa la byang chub ring ste gnam sa bzhin// thams cad kun tu bzang po'i ngang du gcig par shes par bya// mtha' yas rab tu mtha' yas pa yi sems can thams cad kun// rang byung rnam dag sku gsung thugs kyi dkyil 'khor du// sangs rgyas la sogs phyag rgya 'bar ba nyid du don 'di snang bas min// snang srid lhun gyis rdzogs par shes pas thabs kyi thabs// med pa'i rgyu las yod pa'i dngos por 'od gsal ba// gdod nas dag pa'i dkyil 'khor la sogs pa yi tshogs// snang yang dngos po med pa'i tshul yin na// de la ji ltar brtags kyang dngos po ci zhig yod// dpe dang tshad ma gtan tshigs rjes su dpag pa yis// ya mtshan rmad kyi chos 'di rtogs par nus pa ma yin te// rtag par kun rdzob rnam par snang mdzad sku// yid bzhin nor ltar dgos dgu 'byung ba'i gzhi// de bas gsang sngags bdag nyid chen po 'di// dngos grub byin rlabs gtams pa'i thabs shes can// bsam yas gting dpag dka' ba rgyal po 'dra// khams gsum las 'das byang chub rin po che// stor bas btsal kyang rnyed par ga la 'gyur// thig le chen po kun tu chub gnas pa'i// thabs dang shes rab rnam ldan ye shes snying po nyid// zla gsang thig le skye 'gag bdag tu rdzogs// skyes chen thugs la rtag tu gsal ba'i sku// thams cad ye sangs rgyas pa'i rdzogs chen 'di// ma bkag ci bder gnas pa'i thabs po che// mi bsgrib gsal bar gnas pas pad+ma can// gnyis med thig ler 'dus shing brjod las 'das/ bkra shis pa rig pa'i khu byug gi rgyud las/ thabs dang shes rab gnyis su med pa'i le'u ste gsum pa'o//// de nas bcom ldan 'das dpal kun tu bzang pos gsang ba khyad par du bstan pa ched du brjod de/ phung po lnga ni de bzhin gshegs pa'i rgyal ba'i tshe// dkar mthing ser po le brgan ljang gu'i mdog/gsal ba sra ba mnyen pa dro ba dang// gnyis med 'khril ba gzhon tshul chags par bzhugs// mthong thos bsnams dang myangs pa dag pa'i dbang// mthong bya mnyan bya bsnam bya myang bya rnams// mthong byed thos byed snom byed myong byed dang// 'das dang da ltar byung dang ma byon tshogs// gnyis med 'khril ba rgyal ba yab yum tshul// mthar byed reg dang reg byad reg shes dang// rtag chad bdag dang mtshan mar ma yin rnams// gdod nas dag pa'i yab yum dkyil 'khor rdzogs// yang dag bden pa'i 'bras bu kun rdzob rgya// 'jig rten pa dang 'jig rten 'das pa'i zhing// dkyil 'khor spyod yul dkyil 'khor gsum du 'dus// 'bras bu smin pa'i rgyu rkyen 'dus pa'i mthu// rdo rje sems dpa' klong chen lam gyi mchog/ gdod nas mi skye mi 'chi dgongs pa dag/kun tu khyab gdal ye shes chen po'i sbubs// snying rje'i rtsal chen brtser med kun sangs rgyas// bde chen bdag rnams mtshan ma rnam par spang// che ba'i yang che mtsho ltar zab pa'i phyir// ji bzhin mi bskyod bya med rnam par grol// rang byung ye shes 'byung ba 'byung ba'i mchog/ gzhan nas ma yin 'gro ba kun la gnas// thun mong bde ba byang chub rnyed dka' ba// zhing dang spyod yul yongs su 'phrul pa min// snang med nam mkha' lta bur rab 'byor bas// de la mi btsal de bzhin rnam par gzhag/ mchog gi mchog tu gyur pa'i theg pa'i mchog/ thig le gcig tu zlum kyang brjod du med// de nas bcom ldan 'das bde ba chen po'i snying po 'byin pa zhes bya ba'i ting nge 'dzin la snyoms par zhugs nas/rigs lnga sku dang gsung dang thugs rdo rje las bton to// bton nas ye shes chen po 'od 'bar ba'i sku lngar gyur to// de nas bcom ldan 'das bdag po mnyes par byed pa zhes bya ba'i ting nge 'dzin la snyoms par zhugs nas/ btsun mo'i tshogs 'di nyid kyi sku dang gsung dang thugs rdo rje las/ d+h+wA dwI shwa ri/ dwe Sha ra ti/ mo ha ra ti/rA ga ra ti/ badzra ra ti rnams phyung nas mnyes pa chen po'i btsun mo lngar gyur to// de nas bcom ldan 'das rnam par 'joms pa zhes bya ba'i ting nge 'dzin la snyoms par zhugs nas/ ta kr-id bzhi sku dang gsung dang thugs rdo rje las phyung ngo// de phyung ma thag tu sgo ba 'bar ba bzhir gyur te/ de nas bcom ldan 'das kyis/ de nyid mi snang bar bya ba'i phyir/ bla med ye nas khyab pas mi 'dzin gtor// thig le rtsal thag chad pas las rnams rdzogs// mi rtog mnyam las 'das pas bgegs rnams zhi// mnyam rdzogs brjod du med pa snying po'i gtso// mkha' ltar mi g.yo rang bzhin btab pa'i rgya// cis kyang khyod nyid ye shes gsal ba'i ngang// mi 'dor tshig bral lhun rdzogs mnyam ma nyid// dkyil 'khor chen por rang bzhin gnas pa'i rgya// thams cad ye nas dag pa'i lhag ma med// mi 'gyur snying por gyur pas drang po'i mchog/mtha' las mkha' bzhin gnas pas mi mnyam med// btsal ba med pas gzhan la ltos ma yin// lhun gnas bde chen mtshungs pa'i rgyal po 'di// ming tsam tshig tu 'di zhes btags nas ni// bstan du rdo rje sems dpa' ngas ma bstan// thabs dang shes rab rnam pa ldan byas nas// snying rje sgyu ma'i phyag rgya 'dzin 'dong gang// de la 'dzin pa yod phyir skyon yin te// snying po'i rang bzhin gcig tu ma nges pas// ji ltar 'dod pa dpung mi dgos par snang// snang stong phyag rgyar rtsol bas bde 'dod pa// bla med theg pa'i sgrib shing skyon can yin// yig 'brus bskyed pa'i phyag rgya bzhi ldan sku// cha lugs gsal bar chu zla bzhin snang ste// snang stong ngo bo nyid du bsgoms gyur kyang// bsgom pa nyid kyis spre'u'i spyod yul 'dra// dkyil 'khor chen po rnam gsum 'od 'bar bas// dbang po mngon du gsal bar gyur na yang// theg mchog 'di la reg pa yod ma yin// bkra shis pa rig pa'i khu byug gi rgyud las/ ma hA yo ga rdo rje theg pa chen po'i gol sa yin par bstan pa'i le'u ste bzhi pa'o//// de nas bcom ldan 'das dpal kun tu bzang pos// ched du brjod pa 'di ched du brjod do// tshogs sbyor bsgom pa mthong ba mthar phyin lam// tshad med bzhis ni kun kyang skye bar nus pa yin// sku gsung thugs las bral bas tshogs rdzogs che ba'i mchog/lam med pas na lam la mi btsal bde ba'i lhun// rgyu 'bras mi phyed 'dus pa'i rdo rje yin// ma skyes ye nas gnas pas 'jig pa med// gdod nas byang chub snying po'i rang bzhin la// btsal ba'i bsam pa yod pas don mi rnyed// kun tu khyab pas rtag pa byams pa'i sku// phyag rgya'i 'byung 'jug med kyang nyams pa med// 'gro ba'i sdug bsngal sems kyi 'byung 'jug yin// chos sku ye khyab kun khyab rnam par rol// bskyod med nam mkha'i dbyings ltar mnyam par gnas// khyad par cir yang mtshungs pa byams pa'i mchog/ de nas de bzhin gshegs pa thams cad la// bcom ldan 'das kyis bka' stsal pa// spang du med pa'i lam lnga po// de bzhin gshegs pa kun gyi thar pa'i mdzod// spyod par bya ba rnam thar lnga nyid kyang// de bzhin gshegs pa kun gyi sku yi gsos// 'dod yon rnam lnga de bzhin gshegs pa'i rgyan// sangs rgyas dang ni slob dpon phyag rgya sngags// lcam dral tshul du blta rnams yan lag bsam// 'di yang byang chub thob pa'i lam po che// ye shes kyi ni tshogs chen bsgom pa yin// lam gyi mchog ste nye lam nye rdzogs lam// bsod nas tshogs kyang mi sbyor mi rung min// ye shes dam pa thob pa'i tshogs kyang rung// bsam gtan rab tu gnas pa'i sangs rgyas nyid dang mtshungs// mang du thos pas byang chub la reg kyang// mi dmigs mi gnas tshad med stong pa nyid// pha rol phyin drug lam gyi gter du gsungs// gdod 'jug rim gyis sbyong ba don thob ldan// dge bcu spyad med chos nyid dbyings kyi rgyan// bkra shis pa rig pa'i khu byug gi rgyud las/ byang chub kyi lam mngon du bstan pa'i le'u ste lnga pa'o//// de nas bcom ldan 'das dpal kun tu bzang pos/nyid kyis nga rgyal bskyed pa'i phyir// ched du brjod pa 'di brjod do// e ma'o// ye nas rnam par rgyal ba'i ye shes dbyings las 'das// ye shes rnam par dag pas gcig pa'i phyir// grol ba'i las kyi mtshan nyid yod pa min// gcig dang du ma'i mtha' las 'das pa na// chos kyi dbyings kyi mi mnyam rnam par spang// gzugs kyi mtshan nyid gang yin sangs rgyas pa// thos bsam smon lam btab pas don mi rnyed// chos sku gcig pa'i dam pa ma mthong na// 'ja' tshon sgyu mar 'phags pa'i skur dpyad pas// bsod nams rdzogs pa'i sangs rgyas mthong ba min// mtshan nyid med pa'i chos nyid chen po 'di// chos kyi dbyings las sgyu ma'i mtshan nyid med// chos kyi dbyings las sgyu mar gang bsgrubs kyang// sgyu rtsal rgyal ba'i lam du yongs ma bsngags// mi gnas chos sku brjod med las 'das pa// dbu mar brjod du med de don dang bral// sgyu ma'i rang bzhin sbyang ba bral ba na// mkha' bzhin mtha' kun med de phyogs dang bral// zhi dang ma zhi med de chos rnams med// re dang dogs med mnyam pa'i rgyal po che// mtshan med dgongs pa dag pas bsgom mi dgos// byar med lam las 'das pa'i lam mi rtsal// rmad byung sku mchog nyid las skur mi bsgom// re dogs kun bral zhi bas rgyas btab pas// phyag rgya bzhi ni sku mchog nyid kyi nad// sku gsum rdzogs pa'i dkyil 'khor chen po ste// rang byung ye nas ldan pa'i chos kyi sku// 'gyur med lhun gyis rdzogs pas bsod nams sku// 'byung 'jug cir yang snang bas sprul pa'i sku// byed spyod kun rdzogs longs spyod rdzogasapa'i sku// btsal med snying po byang chub rdzogs pa'i sku// thams cad lhun gyi bdag nyid yin pas na// zin rtsol ngal bas byang chub mchog tshol ba// rnyed pa'i dus med srin las bal skyes tshul// rgyal bar rtag par bzhugs pa nga nyid pas// rtag tu bde 'gro thar pa'i lam 'dod na// grol ba'i lam chen nang la blta bar byos// grol ba'i lam zhugs drang por 'khor sa med// ma phyin 'gro sar phyin pa nye lam mchog/rtag tu rgyal nyid mchod na rgyal ba mnyes// sangs rgyas zhing sbyong mi dgos thams cad rgyas// khyab sku ye nas brdal ba kun gyi lam// ye shes sna tshogs rgyan bkram sbyin btang bas// 'khor lo'i bsgyur rgyal nor ltar mtsho thigs 'dra// ye shes chos dbyings brgyan pa'i sbyin pa ni// zad pa'i dus med nam mkha' chen po'i tshul// nor btang gling gcig byur bur btang gyur nas// rgyal la sogs pa kun la phul byas pa'ang// chu thigs ltar gyis blangs bzhin zad par 'gyur// khu byug dus bsrung gzhan gyis mi 'gyur ltar// dbang phyug mnga' brnyes gzhan la rag mi lus// khu byug gis ni gzhan gyi yid sdud ltar// kun rdzogs mchog gi sku yis thams cad sdud// sangs rgyas kun gyi bdag nyid mes chen po// zhing khams dag pa'i sangs rgyas kun gyi lha// dkyil 'khor chen po 'khor lo rdzogs pa'i sku// rgyal kun mchod par 'dod na bdag nyid mchod// dkon mchog gsum mchod 'du shes med pa bdag la gnas pa dbang lnga thob// rdo rje theg pa'i dam tshig mi 'dor ba// nyon mongs lnga po'i las kun spyod pa dang// sems can kun la snying brtse med pa dang// ma byin len dang mi tshangs spyod pa dang// phyag rgyar mi rtsol gzhan la mi rtsol ba// rtag par rgyal ba mi 'da'i dam tshig mchog/ rdo rje theg pa'i ting 'dzin bstan pa ni// de bzhin nyid kyi de bzhin dam pa nyid// nam mkha'i khams bzhin rang bzhin mnyam gnas pa// sems la dmigs pa'i bdag nyid med par bsam// lha yi phyag rgya gsal ba'i ting nge 'dzin// ngo bo nyid kyis dmigs su med pa yin// rdo rje theg pa'i spyod pa dag pa ni// dka' thub mi mnga' gtsang sbrar mi rtog cing// brtul zhugs gsum ldan sems can thams cad gsod// zas mchog bshang gci za zhing rnal 'byor don la brtson// nyon mongs lnga spyod byang chub chen po 'chang// mtshams med lnga spyod ye shes rol par rtogs// rdo rje theg pa'i lta ba'i ngo bo la blta ba// shes rab 'bar ba'i me chen 'od gsal bas// dbyings dang ye shes gnyis kyang me 'od bsregs// dkyil 'khor gsum du mi blta de bzhin nyid mi gdab// snang stong phyag rgyar mi 'dod mnyam nyid ting 'dzin 'das// gang la mi brten gang la'ang grub pa med// gdod nas mtha' dag de bzhin de bzhin nyid// de yi tshig 'das sangs rgyas ya sangs rgyas// rdo rje theg pa chen po'i 'bras bu bstan pa'o// ma btsal ma bsgrubs rang bzhin gnas pa'i sa// sa rdzogs pad+ma can dang kun tu 'od las 'das// 'bras bu lhun grub ye nas dag pa'i sa// rdo rje theg pa'i lta ba dang/ dam tshig dang/ spyod pa dang/ bsgom pa dang/ rang bzhin dang/ 'bras bu kun gcig yin par bstan// lta spyod ting 'dzin rgyu 'bras gcig gi ngang// gang la spyad kyang 'jug lta 'bras bu rdzogs// rdo rje theg pa'i 'bras bu thob nas yon tan ci 'byung ba bstan pa/ gab tshe'i nor ltar thams cad kun 'dus shing/nam mkha' bzhin du ma g.yos ngang gis 'char/ bkra shis pa rig pa'i khu byug gi rgyud las/ rdo rje theg pa'i nga rgyal bstan pa dang/ rdo rje theg pa'i dbye ba bstan pa'i le'u ste drug pa'o//// de nas bcom ldan 'das dpal rdo rje sems dpas/ rgyud kyi bdag po la bstod pa/ kye bcom ldan 'das/ bcom ldan 'das/ chen po'i chen po/ mchog tu gyur pas/ chen po khyod ni che ba'o// bzang po'i bzang po bdag med phyogs bral dam par gyur pa khyod ni lta ba'o// kun mkhyen kun gzigs kyi ye mkhyen rang rig nyid de sangs rgyas kun gyi thugs so// kun sdud kun rdzogs kun gyi 'bras bu khyod la mi 'bral rtag phyag 'tshal// sku yi sku ste sna tshogs 'dul ba yi sku// chos sku dpag med rtag phyag 'tshal// gsung gi gsung ste sna tshogs 'dus pa'i gsung// gsung mchog kun tu grags pa khyod la'ang rtag phyag 'tshal// thugs kyi thugs te sna tshogs 'dus pa'i de bzhin nyid de de la'ang rtag tu bdag phyag 'tshal// mi 'da' 'da' bar mi mdzad dam tshig rdo rje can gyi sku khyod la'ang rtag phyag 'tshal// kun byas dbang phyug kun gyi sna tshogs kun gyi dpal// mgon khyod la'ang rtag tu bdag phyag 'tshal// dkyil 'khor snying po dkyil 'khor ldan pa'i dkyil 'khor chen po khyod la mchod pa 'bul// khyod kyi rang bzhin sbubs kyis ma g.yogs gang yang med pas khyod ni byams pa'i mchog/yangs pa chen po khyod kyi sgo nas 'jug pa'i dpa' bo 'jug mkhan de la'ang rtag phyag 'tshal// snying po'i snying por blta ba'i lta snying can de la'ang gzhan phyag 'tshal// kye bcom ldan 'das/ bcom ldan 'das/ re mdzes dbang phyug khyod ni gzhar mi gtong bar 'dod// rdo rje mchog 'dzin bdag gis gzhan phyag 'tshal// de bzhin sems dpa' rnams kyang phyag 'tshal bar shog/yang dam khyod la phyag 'tshal ba ni bkra shis mchog bkra shis/ zhes rgyud kyi bdag po la bstod nas/ mchog tu lan gsum phyag 'tshal nas/ yang bstod pa/ rgyud kyi rgyal po che mchog la/gdong du thal mo zung sbyar nas phyag 'tshal te/ sems dpa' dag pas khyod la phyag 'tshal bstod// bstod pa'i rgyal po rab tu bstod pas bstod// de ltar bstod pas mchog khyod grags nas ni// sangs rgyas kun gyi bstod pa de ldan shog/ ces rgyud kyi rgyal po la bstod pas/ de nas bcom ldan 'das dpal kun tu bzang pos/ rdo rje 'dzin pa la rgyud gtad pa// kye rdo rje sems dpa' rdo rje 'chang chen po// rgyal ba kun gyi thugs te thugs kyi bdag/ rgyal bar bstod pa'i lha yi lha khyod la// thugs rje che ba'i thugs kyi gter chen mdzod// rdo rje theg pa theg pa'i blar gyur pa// bstan pa chen po rdo rje 'dzin la bstod// rdo rje 'dzin par khyod ni bsngags pa'i phyir// rgyud mchog rgyal po'i bstan pa gzung du gsol// skyes bu thabs la mkhas pa'i dpal ldan la// rgyal ba skye ba'i gsang mchog gtad do gtad// ces rdo rje 'dzin pa bos nas/ rgyud kyi rgyal po chen po gtad do// de nas rdo rje 'dzin pa chen pos pus mo g.yas pa'i lha nga sa la btsugs nas/ gdong du thal mo bzung nas/ kye bcom ldan 'das legs so legs so// bde bar gshegs pa legs so legs so// yongs su gtad pa'i rgyud gyi rgyal po 'di// chud ma zos par gsang bar gtad pas na// legs par gzung la brten par bya ba yis// rdo rje 'chang ba min na gsang bar bgyi ba'am/ rdo rje mchog 'dzin pa 'di su la gtad ces bcom ldan 'das chen po la zhus pas/ bcom ldan 'das kyis bcom ldan 'das rdo rje khyod bzhin 'dzin cing gsang ba'i rdo rjes 'gro don 'dod la/khyod la gtad pa ji bzhin du// de bzhin de bzhin gtad par bya// rdo rje 'dzin pa ma yin yang// skyes bu seng ge'i sems yod cing// rab tu gces dang yid 'thad pa'i// nor gyi dbyig tu gang 'gyur dang// rin chen nor bus gang bkang nas// rin chen nor bu'i theg pa 'di/ chad dam/ gang zhig rgyud 'di 'dzin par byed pa la// 'phral du nor dbyig mi ster na// de la seng ge'i sems med pas// de ni sgyu mkhan dmyal sogs mkhan// 'dis ni dngos grub nges mi thob// de la 'di yi dbang yang med// bdud kyis bslus pa'i mi de ni// kha gsags g.yo sgyus 'di bzung bas// rdo rje 'dzin min bdud kyi bu// 'di la 'dod pa'i bar chad nas// tshe 'di'i bsam pa kun yal te// 'di yi bag chags ci byas kyang// sgyu mkhan yi dwags gnas su skye// de phyir rgyud mchog 'di gtad na// nga yis khyod la gtad pa bzhin// rim gyis de bzhin gtad par bya'o// dus ngan smin par gyur pa'ang// 'phral du nor dbyig mi ster na// ma rabs de la 'di snod med// gtod dang 'dzin pa gnyis ka ni// rul myags tshig nas dmyal bar 'gro// bkra shis pa rig pa'i khu byug gi rgyud las/ rgyud kyi rgyal po la bstod pa dang/ rgyud gtad pa dang/ phyis ji ltar gtad par bstan pa'i le'u ste bdun pa'o//// bkra shis pa'i rgyud rdzogs so// rgya gar gyi mkhan po shrI sing+ha dang/ bod kyi lots+tsha ba bai ro tsa nas bsgyur ba'o////

CLOSE WINDOW