CLOSE WINDOW

Gpb009.010
བོད་ཡིག

/ rmad du byung ba rdzogs so// bar 'dir srog gi 'byung ba'i le'u bco lnga pa 'dzud/ rgya gar skad du/ bo d+hi tsit+ta Ash+tsap+Ya tan+t+ra/ bod skad du/ byang chub kyi sems rmad du byung ba'i rgyud/ bcom ldan 'das dpal kun tu bzang po la phyag 'tshal lo// 'di skad 'dag gis thos pa'i dus gcig na/ de bzhin gshegs pa dgra bcom pa yang dag par rdzogs pa'i sangs rgyas thams cad dbyer med pa'i bdag nyid/ gzugs can ma yin pa'i snying po/yon tan thams cad kyi 'byung gnas/ shes bya thams cad kyi rgyal po de bzhin nyid rnam par dag pa la longs spyod pa/ longs spyod pa'i mngon par byang chub pa'i sku dang/ sprul pa'i sku la sogs pa kun gyi rtsa ba ye shes rnam par dag pa thams cad kyi bdag nyid/gang yang gnyis su med pa/ yang dag par rdzogs pa'i kun tu bzang po'o// bcom ldan 'das thugs rje chen po'i byang chub sems dpa'i 'khor gyi dkyil 'khor ni/chos thams cad ting nge 'dzin la longs spyod chen po ma lus par myong bar mdzad pa'i longs spyod rnam par dag pa'i sku ste/ mtshan dang dpe byad thams cad dang ldan pa'o// mngon par byang chub pa'i sku ni/snying po las dkyil 'khor 'byin pa'i sku yin te/ 'dod khams kyi lha'i rgyal po dang/ gzugs khams kyi lha'i rgyal po'i dkyil 'khor na/ rdo rje dang nor bu la sogs pa'i dkyil 'khor 'byin pa'o// sprul pa'i sku ni thabs mkhas pas gnas thams cad du dmigs pa ji bzhin du rgyun mi chad par chos kyi 'khor lo bskor ba/ sangs rgyas dang sems can thams cad kyi spyod pa mnga' ba/ rtag dang mi rtag pa gnyis kyi gzhi 'am ngo bor gyur pas/mtshan dang dpe byad kyis brgyan pa/ sku yongs su rdzogs pa'i zhal gyis/ chos thams cad mos pa dang mthun par gsungs so// gsung par 'gyur ro// rnam par dag pa'i sku de ni/ de bzhin nyid kyi dkyil 'khor snying po byang chub na dus rtag tu gnyis su med do// rtag pa dang mi rtag pa'i rgyal po thugs rje chen po de ni gzhi tshad med pa'i ye shes kyi dkyil 'khor rang byung gi rgyan dang rol pa la sogs pa dkrigs par rang byung ba na gsal lo// byang chub pa chen po'i sku ni ri rab ri'i rtse mor rin po che'i khang pa na zla ba rgyas pa lta bu'i tshul du zhal rab tu rgyas so// thabs mkhas pa spyod pa thams cad kyi bdag nyid ni/ bya rgod phung po'i ri la ljags kyi pad+mar bkram nas/ khyim pa dang rab tu byung ba'i cha lugs su bzhugs so// de nas byang chub sems dpa' chen po rdo rje 'dzin pa dang/byang chub sems dpa' chen po pad+ma'i yu ba 'dzin pa dang/ byang chub sems dpa' chen po snying po rnam par grol ba dang/ byang chub sems dpa' chen po yul rnam par 'joms pa/ byang chub sems dpa' chen po 'jam dpal la sogs pas/snying po byang chub shin tu yid du 'ong ba'i gnas ga na bar/ gzugs sku ston pa'i gsung la mnga' brnyes pa bzhugs pa'i gnas de mthong zhing/ longs spyod pa'i sku zhal thal le bar gsal bar snang bas/ rdo rje thogs pa la sogs pas/ phyi'i mchod pa dang nang gi mchod pa la sogs pas mchod de/ g.yas phyogs nas lan gsum bskor ba byas nas/ phyag btsal te 'dus par bcom ldan 'das chen po'i thugs rje chen po'i snang ba'i gzugs mtha' yas pa mnga' ba de zhal 'dzum pa mdzad nas cang mi gsung bar bzhugs so// de nas byang chub sems dpa' rdo rje can la sogs pa/bcom ldan 'das kyi spyan sngar 'dug pa las langs te 'di skad ces gsol to// bcom ldan 'das dus gsum gshegs pa'i sangs rgyas bcom ldan 'das rnams kyi mkhyen pa/ sangs rgyas bcom ldan 'das rnams kyi spyod yul/thog pa thams cad dang thun mong ma lags pa/ yang dag pa rtogs ma thag thams cad mkhyen pa'i go 'phang 'thob par 'gyur ba'i don bshad du gsol/ de skad ces gsol ba btab pa dang/zhal shin tu yang 'dzum pa mdzad nas 'di skad ces gsungs so// sems dpa' chen po nyon cig/ yang dag pa ni don dam pa'i bden pa dang/ kun rdzob kyi bden pa gnyis dbyer med pa'o// rgyus bskyed nas 'bras bu 'byung ba med la/ 'bras bu la 'bras bu 'byung ba ni/ 'jig rten gyi sa bon gyi tshul du 'bras bu las sa bon gzhan du mi 'gyur bar 'byung ba'o// de bzhin du sangs rgyas bcom ldan 'das rnams kyi spyod yul ni yang dag pa 'bras bu la 'bras bu rdzogs par spyod pa'o// yang dag bden pa 'bras bu ste// 'bras bu las ni 'bras bu 'byung// de bzhin nyid la gnas bcas te// phyi nang snod bcud rnam par dag/byed spyod bya byed bde ba'i lhun// rmad byung byang chub sems 'di gnas// de yi yon tan bsam yas pas// don 'di bstan pa 'di yin no// de nas byang chub sems dpa' rdo rje can la sogs pas yang 'di skad ces gsol to// rang bzhin blta dang ting nge 'dzin// ye shes rmad byung dkyil 'khor nyid// bcom ldan snying po kun gyi gtso// thabs la mkhas pas bshad du gsol// de skad ces gsol pas/bcom ldan 'das kyis ngo mtshar ba'i spyan bgrad nas 'di skad ces bka' stsal to// rmad byung byang chub sems 'di ni// rdo rje sems dpa' nyid gsal zhing// rdo rje sems dpa' nyid la gzigs// 'di la pha rol phyin bcu rdzogs// sa bcu rim gyis bgrang ba'ang// mnyam nyid rig pa'i ye shes kyis// sa rnams mnyam nyid thig ler sbyor// chos sku ye nas mi dmigs phyir// rdo rje lta bu'i ting nge 'dzin// kun gyi snying po mi 'dra bas// dngos dang dngos min tshang tshing nyid// skad cig nyid la bsregs pa yi// rnam par mi rtog ting 'dzin rlung// de bzhin mnyam nyid dkyil 'khor 'di// sangs rgyas kun gyi nying sha can// sangs rgyas kun bas sngar sangs rgyas// rmad du byung ba'i sems 'di ni// sku dang gsung thugs dag pas na// kun gyi reg pa ma yin pas// khams gsum bltas kyang ma rig cing// nyan thos la sogs smos ci dgos// byang chub sems dpa' rnams kyis kyang// rmad byung 'di ni rig par dka'// gzhi rtsa med pa'i don gyi mchog/ cis kyang mtshon du med pas na// sangs rgyas kyis kyang rtogs par dka'// kun gyi rang bzhin zhi ba 'di// bsam zhing bla med lam mchog ste// ma byung mi skyes snying po 'di// mtshan ma nam mkha' dngos bral te// gdod nas byang chub byang chub kyang// grub pa med phyir dgongs mi 'gyur// stong gsum stong gi 'jig rten khams// mtha' yas mu med gdal ba yang// rmad byung byang chub dkyil 'khor yin// nye lam bde rdzogs bla na med pa'i lam// rtogs ma thag tu go 'phang chen po yang// blang dor med pa chos sku dpag med thob// byang chub kyi sems rmad du byung ba'i rgyud las/ gleng gzhi'i le'u ste dang po'o//// de nas bcom ldan 'das thabs la mkhas pa'i thugs rje chen po'i bdag nyid kyis/zab mo zab mo zhes bya ba'i ting nge 'dzin la snyoms par zhugs nas ched du brjod pa 'di brjod do// sangs rgyas sprul pa 'byung ba rnyed par dka'// yang dag rmad byung rtogs pa de yi char mi phod// dal ba 'byor ba rnyed par rab tu dka'// de bzhin sku gsung thugs kyi dkyil 'khor nyid// gsang ba rmad byung nyid kyis rab tu bsdus// chos kyi mtshan nyid ye nas rnam par dag/ bdag med ngo bo med pas rtogs par dka'// rnam par rtog pa'i mtshan nyid tha dad pa// byang chub sems nyid bskyed pa'i sems can ni// de dag shin tu rnyed par dka' ba ste// sems can sangs rgyas sems can ming med pas// sngon rol byung ba'i rmad byung byang chub sems// sems can sangs rgyas gang yin rtogs par dka'// byang chub chos ni rmad byung rnam mi rtog/ mya ngan 'das dang 'khor ba ye nas med// rmad byung byang chub sems kyi myu gu la// 'byung ba lnga yang 'bras bu'i tshul du byung// sems can rnams la snying rje che ba yis// sems can dag la rnyed par rab tu dka'// sems can gzhi rtsa med pa'i chos nyid 'di// skye dang 'jig bral byang chub sems nyid de// ye nas dag ste rgyu 'bras yongs kyis med// kun grol rang la rdzogs pa'i sku nyid ni// dug gsum dug lnga'i thig le chen por 'khyil// zhe sdang la sogs ming med pas// rmad byung la sogs chos kyi mchog/ khyab cing brdal ba rtogs par dka'// bar du gcod pa'i chos rnams kyi// sdig sogs bye brag bsam mi khyab// de bzhin rmad byung sems nyid kyis// dug lnga bsad dang 'khor ba bsad// sangs rgyas la sogs kun bsad pa'i// sdig pas mchog gi gos mi srid// gos su sdig med sdig kyang bsad// rmad byung byang chub sdig po che// sangs rgyas kun gyi nying sha can// dad pa'i stobs kyis bsod nams cher 'phags pas// don 'di yud tsam rtogs pa khyad par 'phags// so so ma yin mnyam pa'i snying po la// bsod nams dpag tu med pa kun rdzogs te// nga la nga med kun la rnam par rol// rmad byung byang chub sems 'di dngos po dag/ ye nas sangs rgyas sems can ming ma grags// cir yang 'phrul chen ston pa'i 'phrul po che// khams gsum kun rdzob khams gsum rin po che// chos 'di brtag par dka' phyir thams cad bdud kyi las// sku lnga lhun gyis rdzogs pa'i dkyil 'khor te// phra zhing zab mo kun gyi sa bon gyi// dus 'di sgyu ma yin pas gzhig nas de nyid la// brtags nas rang bzhin shes pa byang chub rmad// de phyir lus 'di brtags la rmad byung btsal bar byos// gcig gi rang bzhin shes na kun gyi rang bzhin shes// kun gyi rang bzhin rang bzhin nyid du gcig/ so so ma yin tha dad min te rmad byung yin// byang chub rmad byung de bzhin gshegs pa'i sku// 'od dpag med pa'i chos sku byang chub sems// che ba lnga yi snying po kha dog rdzogs// chos rnams thams cad rtag pa nyid kyi rol// chen po lnga yi sngon du rmad du byung// yang dag snying po 'du shes dag pa yi// lcags kyus bzung bas bstan du bzung bar rung// de rlabs de la brten pa'i de rnyed 'gyur// brtag par dka' la bstan par dka' phyir de ltar bstan// ye nas thar lam sgro skur zhi ba'i rmad po che// sangs rgyas kun gyi lta ba'i dngos po ste// dri med sa bcu rdzogs pa'i dod po che// 'khor ba'i 'khor lo bskor ba'i rtsibs dang ldan// nam mkha' lta bu thams cad 'byung ba'i gzhi'o// byang chub kyi sems rmad du byung ba'i rgyud las/ zab mo brtag par dka' ba'i le'u ste gnyis pa'o//// de nas bcom ldan 'das dpal kun tu bzang pos/ bde ba chen po'i ting nge 'dzin la snyoms par zhugs nas ched du brjod pa 'di brjod do// zhi ba bla med byang chub 'di la sgro skur med// tha snyad bral bas tshad mas gnod mi rung// ye nas zhi bas de bzhin nyid mi gnas// 'dzin dang rtog pa zhes bya ting nge 'dzin// kun rdzob rang bzhin gnas pas gdod nas bral// mtshon zhing bgrod du med pa'i dbyings las 'das// mnyam med mi mnyam med pas bde ba'i klung// bya byed nad dang bral bas chos kyi sku// der yang gnas med lhun rdzogs yangs pa'i sa// de la de bzhin kun 'byed ye grub 'bras// byang chub bsngo ba med pas byang chub nyid mi 'dod// ye nas rnam par dag pas mtshan mar bsgom dang bral// bya bral lta ba'i klung las ma nyams 'jug sgo med// thig le chen pos btab pa'i mchod pa'i klung// snying po tshig bral dam pa nyid las 'da' bya med// dkyil 'khor gsum gyi snying po nyid de bsngo dang bral// 'byung ba lnga yi rtsa ba nyid de mtshon du med// sangs rgyas thams cad 'byung ba'i rgyu de sa bon tshul// 'byung ba nyid nas mkha' las 'ja' byung tshul du dbyer yang med// 'gro rnams rgya mtsho chu bran kun 'dus dbyer med tshul du gcig/ thig le gcig tu bsdus pa'i zin chags nad dang bral// blang med dor ba med pas mya ngan 'das 'khor med// khams gsum ye sangs rgyas pas rigs med gcig gi ngang// yang dag nyid la yang dag nyid kyang rdzogs pas gti mug nyid// dmigs bya dmigs byed med pas blun pa'i sku// thig le bde chen sku ni thams cad sangs rgyas pas// sems can kun bsad thig le gcig tu zlum// chos sku gsal ba'i klung du kun gcig pas// mtshams med lnga spyad kun bzang yum la rol// sangs rgyas nyid las gzhan med kun sangs rgyas// de bzhin rgyas phyir dmigs spyod zos pa sangs rgyas nyid la rol// rmad byung byang chub nyid ni sangs rgyas zos pa'i lto// rigs gcig rigs brgya sku gsum sku lnga sogs// mkha' la nyi zla gza' skar tshul du ngang gis 'char// snying po'i snying po rdo rje snying la 'di yis sna tshogs brgyus// de phyir rmad byung 'di ni snying po'i mdo// ye nas dag pa'i klung du dbyer med kun bsdus pas// rmad byung byang chub sems kyi rgya mtsho yin// 'khor ba ming med mya ngan las 'das pas// rmad byung byang chub sems 'di yang dag rmad// byar med de bzhin nyid las ma nyams pas// rmad byung byang chub sems ni sa 'das pha rol phyin// kha dog dpe med nam mkha'i tshig 'das pas// rmad byung byang chub sems ni rang bzhin med// phyi dang nang med dus gcig rol mdzad pas// rmad byung byang chub sems ni kun shong lto bo che// kha dog dpe med nam mkha'i tshig 'das pas// rmad byung byang chub sems ni rang bzhin rang bzhin med// stong nyid de bzhin mi dmigs las 'das pas// dge sdig gnyis med byar med nyid kyi ngang// gcig kyang skad gcig dpag tu med pa'i bde ba'i mchog/rmad byung byang chub sems de lhun rdzogs pas// dpe med byang chub sems la kun brlan phyir// khams gsum ma lus gsod pa rgyal sras mchog/ rmad byung byang chub sems su kun gcig phyir// mchod pa'i sprin gyis bdag mchod rgyal ba mnyes// bden gnyis mi 'byed yang dag pas// sems can bsad pa kun bzang mkha' la rol// mthong dang thos las 'das pa'i 'das pa la// gzhan du mi 'jog de bzhin de gnas pas// rmad byung byang chub sems ni kun sbyor sku// de bzhin klung las rgyal dang sems can ma mthong phyir// sgrib gnyis bsal du med de lam la sbyangs mi dgos// rmad byung de bzhin ma bcos bde chen klung// yang dag yang dag nyid kyang ma mthong rmad byung ste// 'bras bu'i 'bras bu nyid de 'bras las 'das// de phyir bde ba chen po'i ting 'dzin zhes bya'o// byang chub kyi sems rmad du byung ba'i rgyud las/rmad du byung ba'i rang bzhin bde ba'i mchog yin pa'i le'u ste gsum pa'o//// de nas bcom ldan 'das dpal rdo rje sems dpa' rdo rje 'dzin pa chen pos/ bcom ldan 'das dpal kun tu bzang po la shin tu dgyes pa'i spyan gdangs nas ye shes chen po'i mchod pas dgyes par mchod nas/ bcom ldan 'das yangs pa chen po byang chub ces bgyi ba'i tshig don ni gang lags/khyod kyi byang chub ni gang lags/ khyod kyi byang chub gang las thob nas byang chub rnyed lags/ chos rnams gang las nges par rnyed par bgyis na/ ma rtogs pa rnams kyis ji ltar rtogs par 'gyur ba bka' stsal du gsol/de nas yangs pa chen pos zhus pa'i don thugs su chud nas/ byang chub chen po'i ting nge 'dzin la snyoms par zhugs nas brjod par bya ba brjod pa// rmad byung byang chub sems kyi mtshan nyid 'di// yi ge med pa'i don du grags pa'i phyir// ngo bo nyid med byang chub dang bral ba// lhun rdzogs rnam par dag pa'i byang chub mchog/ brjod du med pa'i yi ge tshig dang bral// rgyal bas mtshon du med de sngags kyi klung// mi mnyam mnyam las 'das pa mchog gi lam// mnyam nyid 'dod pa grol bar dka'// de nyid rmad byung sgrib pa'i skyon chen yin// mnyam nyid byang chub 'dod la byang chub bral// phung po skye mched khams bshig byang chub 'dod// byang chub yang dag de la ring ste byang chub nyams// sku gsung thugs bral de bzhin byang chub 'das// phung po rgyu sogs dpe bshig byang chub tu// gang 'dod pa de mtshan ma nyid la 'dzin// mtshan med zhi ba de ni snying po ste// chos sku ye shes stong pa'i mtshan 'das pa// 'das pa'i 'das pa nyid de rgyal po'i tshul// ye shes snying po mchog tu gyur pas tshad ma'i lung// dbyer med dam par gcig pas tshad kun ldan// de bzhin nyid de ye sangs rgyas pa yin// 'phags pa'i shes rab spyod pa'i shes rab can// gang la'ang chags pa med pa de bzhin du// rmad byung byang chub sems kyi rang bzhin 'di// brjod du med pas dmigs pa'i yul dang bral// bsams pas rnyed pa'i yul med bsgoms pas nad// ye sangs rgyas pa kun gyi rang bzhin yin// de phyir gang yang ma spangs byang chub snying po ste// gcig pu de bzhin lhun gyis grub pas na// de bzhin ting 'dzin chos dbyings la sogs pa// gang yang ma yin lhan cig mi gnas rdzogs// rmad byung byang chub sems 'di kun rtogs sku// 'phags pa'i shes rab spyod pa shes nas kyang// gzhan gyis mi bskyod 'jigs med de bzhin du// kun rdzob snying po rmad byung byang chub sems// nam mkha'i dpes kyangami bskyod 'khor bar yang// mi 'jigs dbyer med 'dres nas ye rgyas btab// dgras 'jigs pa de dpa' bos med gyis la// nyon mongs rnams kyi 'jigs pa sems pa min// de bzhin rmad byung byang chub sems nyid 'di// kun 'dus thig le rnam par dag pa'i sku// de bzhin dbyibs 'das ye sangs rgyas min na// rdzogs chen ma yin zin chags nad dang bral// byang chub sems kyi rang bzhin 'od gsal te// snying po'i snying po lta ba'i lam po che// rtsol ba'i nad med tshad mas gzhig mi rung// mngon sum la sogs 'jig rten tshad mas gzhig pa min// pha rol phyin rdzogs pas ni yongs rdzogs ltar// de bzhin rdzogs chen bya bral snying po 'di// kun gyi ngo bo'i rang bzhin de bzhin du// chos rnams ming med de bzhin nyid du rdzogs// 'dres shing dbyer med don dam kun rdzob dang// sangs rgyas sems can rang bzhin nyid du gcig/ med pa'i snying po nyid las yod pa'i snying po 'byung// snying po snying po nyid med snying po can/ thabs dang thabs mkhas sgo la chags pa med// sgro bral sgo zhes thabs la mkhas pa bzhin// rang bzhin kun rdzogs zhi ba'i rang bzhin nyid// sgo med phugs med thabs kyi rgyal po yin// ye sangs rgyas pas bgrod pa'i lam dang bral// thig le zlum pas yang dag nyid du gcig/ ma bsdus de bzhin nyid du bsdus pa thabs kyi mchog/bsam pa dag pas rab tu byung ba'i mchog/ bsam pa sgron khur ba ni rang byung min// de bzhin rmad byung bde chen chos nyid 'di// bsam dang bral zhing bsam pa las 'das pas// 'khor ba'i rtsa ba dregs pa'i rab mchog yin// zin rtsol nad dang ldan pa ma yin pas// yang dag yang dag rab kyi yang dag yin// 'du ba'i ting 'dzin 'du las 'das pas na// ting 'dzin rgyal po zhes su rab tu grags// nye lam bder rdzogs lam nad bral ba yin// 'di la 'jug lta mi dgos ye nas zhugs// bsrung dang dam tshig mi btsal stong las 'das// rdo rje sems dpa'i thugs kyi dkyil 'khor 'di// gnyis med sangs rgyas med pa'i che ba yin// nyon mongs lnga yi rang bzhin gyis kyang ni// byang chub yongs su tshol bar byed pa bzhin// rdzogs mchog rmad byung byang chub sems nyid 'di// rang bzhin nyid kyis rang bzhin nyid kyang tshol// btsal kyang rnyed pa'i dus med rang bzhin nyid// rang bzhin rang bzhin nyid las ma nyams pas// lta dang spyod pa ting 'dzin dgongs pa'i klung// de la mi dgongs dgongs pa dgongs pa'i nad// gang la blta ba med pa de la lta ba gnas// spyod med ting 'dzin med pa'ang de bzhin no// bsgom pa'i don ma rnyed pa'i drang srong rnams// bsgom chags nad dang bral ba dgongs pa'i klung// mi 'gyur zha nye'i gzod brdab bzhin du gnas// rmad byung byang chub sems kyi rang bzhin 'di// drang srong rgyal ba rnams kyi dgongs pa mchog/ dus gsum rdzogs sangs rgyas la 'di lhag med/ byang chub kyi sems rmad du byung ba'i rgyud las/lung gi dpes mtshon pa dang lta spyod ting nge 'dzin bstan pa'i le'u ste bzhi pa'o//// de nas rdo rje 'dzin pa chen pos/ bcom ldan 'das dpal kun tu bzang po la phyag btsal te/ shin tu 'dzum pa'i mdangs dang bcas pas spyan gdangs nas/bcom ldan 'das skye ba dang 'chi ba nyid ji lta bu lags/ chos rnam pa du bshad/ chos zhes bgyi ba ji ltar lags/ bka' stsal du gsol de skad ces gsol pa dang/ yangs pa chen po bcom ldan 'das kyis bka' stsal pa/ skye shi tha dad ma yin gzhung gcig ste// 'khor ba med par mya ngan yongs mi 'da'// mya ngan 'das dang 'khor ba tha mi dad// de bzhin skye shi gnyis ni ming nyid tha dad kyang// rang bzhin gcig las ming btags tha dad snang// de bzhin snying po sgo phug mi 'byed pa// theg pa rnam rtog grangs su tha dad kyang// rang bzhin nyid las ma nyams rang bzhin nyid// skye dang shi dang mya ngan 'das pa yang// ngo bo nyid du gcig pas 'khor ba nyid// mi spong mi g.yo bag la gnas med de// gnas med pa la gnas pa gnas med gnas// mi mtshungs rdo rje sems dpa'i thugs nyid ni// thams cad ye rgyas btab pas khams gsum 'ub// tshig gi mtha' las 'das pas cang ma mthong// skye ba zhes pa chos rnams 'byung ba'i gzhi// mya ngan 'das 'khor ldan pas med pa yin// mi spong gnas med gnas pa las kyang 'das// spyod las 'das pa'i ye shes rgyal pos 'phags// don dam kun rdzob mi 'byed don dam med// don dam 'dod pas dam pa'i don mi rnyed// don dam med pa de la don yang gnas// sgro dang skur zhing rdo rje sra ba'i mchog/ mi g.yo mi 'gyur blun po'i tshul du gnas// 'di la gnas pa'i rgyal po de bzhin gshegs// ma dang sring mo'i gzigs pa de bzhin dbyings// dbyings dang dbyings rol mnyam nyid lhun gnas pas// ma dang sring mor sbyor ba rol pa'i mchog/ dge dang sdig tu ma mthong ye rgyas pas// sdig pa sbyang pas dkyil 'khor dkyil 'khor ldan// sangs rgyas rnam pa bzhi yi chos bshad pas// thog med 'du shes mi bden tshor ba bral// sprul pas pha rol phyin drug gsung bar 'gyur// tshig tu bshad pas rmad byung don mi rnyed// yi ge'i mchog nyid yang dag gsal ba nyid// yi ges theg bzhir brtags pa rmad byung nyams// ston pas bshad pa don rtogs 'khrul pa'i lam// nad med pa na sman kyang mi dgos na// nad kyi don phyir sman dgos ji bzhin du// theg pa gzhan med pa na bla med 'di// bstan kyang mi dgos de bzhin gzhir gnas na// bla med theg kyang bla med dag la snang// kun tu bzang po yangs pa'i rgyal pos kyang// ma gsungs gsung du brjod du rdul tsam med// don 'di gang la snang ba rgyal ba'i rgyal// de nas rdo rje 'dzin pa the tshom shin tu chod nas yang gsol ba'i tshig btab pa/ rmad byung byang chub sems nyid ma mthong na// chos so cog pa chos kyi lam la gnas// byis pa'i lam bzhin 'bras bu 'grub par dka'// rgyal po'i rigs skyes pas ni rmad byung nyid blta'o// de nas bcom ldan 'das kun tu bzang pos/ nyid kyi brjod pa 'di brjod do// rmad byung bdag nyid sems can phyi mo'i chos// dus gsum sangs rgyas rnams kyi sems nyid ni// rmad byung byang chub sems kyi rang bzhin te// nam mkha' stong pa 'dra ste rten yang med// ming yang med pas sems la gnas pas na// sangs rgyas sangs rgyas zhes su rab tu grags// dka' thub dka' bas lus gdung phyag btsal klog/ 'chang dang 'dzin pas shes shing rnyed min te// rmad byung byang chub sems nyid rnyed pa ni// sems kyi rang bzhin ma nor gsal na go/ dka' thub la sogs byang chub chen po'i gegs// ngo bo nyid ni de bzhin gshegs pa'i tshul// ji ltar las spyod ci yang mi dgos na// de 'drar spyad du med pa thob par grags// rmad byung byang chub sems ni des kyi bskyed// rmad byung 'di ni bde gshegs las kyang 'das// rgyal bas mi gzigs dur khrod chen po'i klong// ye shes ting 'dzin rdzogs pa'i rmad po che// gzhan nas mi 'byed de bzhin nyid kyi sku// thams cad med pa'i sngon du ye sangs rgyas// dus gsum sangs rgyas kun gyi mes chen po// dmigs gnas bsgom du dngos po'i ngo bo dag/ phyag rgyar bskyed du rang bzhin ye nas zhi// bsnyen bkur bstod du rnam dag yon tan med// mi dmigs dag pa'i ngo bo thams cad 'ub// mkha' rgyu dag pas mnyam dang mi mnyam rnams// sku yi sku ste sangs rgyas kun gyi sku// 'dzin pa phra mo yod pa'i shes pa'ang de// de sgrib chen po snang du mi btub ltar// gzung 'dzin rtog pa phyag rgya'i skur bsgoms pas// thams cad sangs rgyas rmad byung ngo bor yang// chos sku ma lus bsdus pa mthong mi 'gyur// snang srid lhar bsgom pa nyid rmad byung skyon// rmad byung byang chub sems kyi sa bon las// phyi nang snod bcud 'bras bur rnam par smin// sa bon 'bras bur smin pa de yang ni// slar son gnas su dag pa'i gcig tshul ni// rgya mtsho che las chu phran kun 'byung ba// slar 'dus lan tsha'i chur ro kun gcig 'dra'o// byang chub kyi sems rmad du byung ba'i rgyud las/ dpe las 'das pa'i chos thams cad kyi de kho na nyid kyi le'u ste lnga pa'o//// de nas bcom ldan 'das dpal kun tu bzang pos/ nyid rmad du byung ba la gzigs nas brjod par bya ba brjod pa/ e ma ho byang chub sems dpa' chen pos kyang// chos gcig ma gzigs chos la zad mtha' med// longs spyod rdzogs dang sprul pa'i sku dang ni// mngon par byang chub skus kyang chos gcig pa'o// ma gzigs gzigs pa med pa rgyan dang ldan// mtshan dpes brgyan pa yang dag sangs rgyas yin// mtshan sku de nyid don gyi 'bras bur yang// su 'dod de la yang dag sangs rgyas ring// rmad byung byang chub dag pa yang sangs rgyas// kha dog dbyibs med mtshon pa las 'das te// gzhi med pa yi rtsa gzhi kun gyi mchog/ lo ma'i rtsa ba rtsa ba'i lo ma'ang yin// mkha' ltar mi 'dod de yang 'das pa nyid// rmad byung byang chub sems kyi chos gcig po// rnam par dag pa'i chos sku de nyid las// gzhan gyis reg cing myong ba ma yin phyir// sangs rgyas sras bcas mtshan ma'i mtshan dpes brgyan// mngon sum gnyis su de nyid su rnal ba// de la rmad byung 'di mi gnas te zin chags nad// snang stong ngo bo stong pa'ang 'di yi skyon// rgyal ba'i rgyal ba zhes bya brjod du med// dbyings dang ye shes gnyis kyi tshig kyang zad// mtha' dang dbus la mi gnas bde ba'i klung// khyab gdal byang chub mtha' ltar dpag tu med// 'di nyid skur 'dod sgro skur 'khor lo bskor// 'di la gza' gtad rtog pa'i 'du mtshon can// thog mar 'dod pa 'khrul pa 'jig rten pa// sku gsum sku gsung thugs las shin tu ring// de nyid rmad byung 'di yi sgrib shing yin// chos kyi snying por gyur pa 'bras bu'i chos// snod bcud byang chub khams gsum ye rgyas btab// phyag rgya'i 'byung 'jug nyid kyi lto bar bstim// sku yi bya byed rtsa nas bcad de btang// 'khor ba dong sprug sangs rgyas hub kyis rngubs// dge dang sdig par mi byed rnam par dag/ nga dang bdag med zhi ba chen po'i sku// rigs dang ye shes kun gyi dur khrod brdal// khams gsum srid gsum nyid kyi sku la rdzogs// bsod nams lhun rdzogs ngo bo rnam par dag/ rigs mchog nyid kyi sku la su gnas pa// sdig pa spyad pa don dam bde ba'i mchog/ sems can bsad pa nyid kyi sku la dag/dkyil 'khor gsal dang phyag rgya'i bdag nyid yin// rig sngags gsang sngags snying po dag pa'ang yin// dbang bskur ma thob rgyal bar gyur pa ste// lha klu mthu chen rnams kyang bsrung bar 'gyur// mi 'dud dbang med nyid kyi sku la 'dud// bsgom dang ting 'dzin 'bras bu grub pa'ang yin// dkyil 'khor kun gyi bdag po nyid kyang yin// gsang ba'i yum rnams 'di la yongs kyis 'khril// de bzhin gshegs pa kun gyi ngo bor gyur// sku gsum rdo rjer bstan pa'i dkyil 'khor yin// kun tu bzang po yab yum 'khril pa'i sku'o// 'di la su rnal ba la sangs rgyas rdzogs// rmad byung zhes su 'di la brjod pa yin// byang chub kyi sems rmad du byung ba'i rgyud las/ gsang ba zhal gyis bzhes pa'i le'u ste drug pa'o//// de nas dpal rdo rje sems dpas yang zhu ba chen po'i don zhu ba'i phyir/ thal mo gdangs su bzung nas/dgyes pa'i spyan gdangs nas/ bcom ldan 'das don dam pa'i sems ni gang lags/ de bzhin nyid ces bgyi ba dang khyad par ci mchis bka' stsal du gsol/ don de thugs su chud nas bcom ldan 'das chen pos bka' stsal pa/byang chub sems ni sems can kun gyi sems// ldang dang nyal g.yo med pa dam pa nyid// don dang sems la ming dang mtshan ma med// ming dang ming gi mtshan ma ming med pa// de ni yang dag ye shes de bzhin nyid ces bya// don dang sems can tha dad dbyer med gcig/ de nas bcom ldan 'das kyis brjod par bya ba'i don brjod pa// de bzhin gshegs pa'i ye shes mdzod chen po// mi bden mtshan ma'am tshig dang bshad bral ba// theg pa chen po'i rnam par rtog pa yis// theg pa chen po chos kyi 'jug lam nyid// chos lam dam pa mi 'dzin rnam par spyod// byang chub nyid kyang mi 'dod blta ba'i mchog/ sangs rgyas sems can mi mthong bde ba'i shul// ye bsrungs rnam par dag pa'am phyal pa dang// blang dor 'du 'bral med par spyod pa dang// blta ba'i yul med stong pa dam pa dang// de bzhin nyid du'ang ma mthong bsgom pa'i mchog/ rmad byung rdzogs chen ngo bo nyid du gsungs// ye shes rgyal po mkha' 'dra mtha' las 'das// drang srong de 'dzin pa la bsgom zhes bya// dmigs pas don la 'jug pas dgos pa gol// dmigs pas gza' gtad 'cha' ba gtan nas nyams// stong nyid de bzhin nyid blta lta ba lkugs// bde ba'i shul lam 'dod pa lam thag ring// bsrung dang mi bsrung gnyis kyi dam tshig nyams// spyad dang mi spyad 'dzin pas thar lam 'gags// blta dang mi bltar mthong ba'i dam pa brlag/ bsgom dang mi bsgom gnyis kyi rtog mtha' med// rmad byung 'di la 'di rnams spyir gyur pas// rmad byung mdzod chen ngo bo nyid las nyams// rmad byung byang chub sems kyi rang bzhin ni// chos lam mi 'dzin yod med mtha' las 'das// 'das pa nyid kyang ye shes nyid yin pas// 'das dang ma 'ongs kun las ye nas 'das// ston pa'i bstan pa 'di yi don mi rnyed// gzhan las rna ba'i thos su dngos po dag/ lce yi dbang pos brjod du tha snyad bral// ston pa'i gsungs pa chos lam 'khrul pa ste// ji ltar bshad kyang rmad byung don mi rnyed// zla ba tshes gcig mkha' la shar ba la// mdzub mos mtshon pas mthong tshul tsam du 'dzin// drang srong chen po rnams kyis don spyad pa// tshig tu brjod pas ngo bo nyid las nyams// yid la bsams pas chad pa'i mthar yang 'gro// med pa'i snying po las ni yod pa'i snying// de bzhin de bzhin de bzhin gyi nar bzhag/ rmad byung byang chub sku yi rang bzhin te// 'di lta'i don la sangs rgyas rtag tu bzhugs/ byang chub kyi sems rmad du byung ba'i rgyud las/ don dam pa'i sems kyi rang bzhin dang/ mdo sde'i mdzod dang/ theg pa chen po'i mdzod/ lta spyod dang gol sa gcad pa dang/nyid kyi rang bzhin bstan pa'i le'u ste bdun pa'o//// de nas bcom ldan 'das dpal kun tu bzang pos/ skyon gyis mi gos pa'i don gyis brjod par byas pa/ rmad byung byang chub sems la mnyam 'jog tshe// lus sems sangs rgyas yin par bya dgos shing// phyi rol don la mi rtog sangs rgyas nyid// mtshan dpes brgyan pa ma yin nam mkha'i tshul// de 'das dbang po'i spyod yul gang yang min// dbang po'i rnam shes de lta de bzhin du// dbang po'i rnam par shes pa de gsum po// yul dang mi 'byed de bzhin lhug par bzhag/ gsum po yul la yan pa mi ltung bar// gang yang min pa'i rang bzhin de tsam la// lus sems mi bcos klong der rang bzhin bzhag/ de 'dra'i klong la rmad byung nyid gnas pas// mtha' gnyis skyon gyis gos par yongs mi 'gyur// snga phyi'i rgyal ba sems can lus gnas tshe// 'chi ba'i dus tshe bag chags 'di ldan pas// de mthus sems can snying po rgyal bar 'gyur// rmad byung byang chub sems dang bdag ldan na// rigs drug nyan thos dag tu mi mthong bas// rigs drug nyan thos dag tu bsad pa med// sems can nyan thos dag tu sus mthong ba// de la skyon gos sdig kyang yod par gsungs// dper na rmi lam na ni mi bsad tshe// bsad pa'i tshe na sdig gis mi 'jigs la// rmad byung byang chub sems kyi don shes na// don de bdag la ldan par gyur pa'i tshe// rmi lam sad 'dra sdig pas gos mi 'gyur// rmad byung byang chub sems kyi mthur ldan na// ma dang sring mo bu mo la sogs rnams// rmad byung nyid las gzhan du mthong ba min// de 'dra sbyar ba dam la nyid la sbyar// ma sring bu mor mthong ba 'ching ba'i rgyu// dper na rmi lam na ni ma sring sbyar byas pas// sad pa'i tshe na lan gyis mi 'jigs so// yang dag don shes rmi lam sad 'dra ste// yul du skyon gyis gos par 'gyur mi srid// rmad byung byang chub sems kyi don ldan na// dkyil 'khor phyag rgya bzhi ldan mthong mi 'gyur// dkyil 'khor phyag rgya'i dkyil 'khor sus mthong ba// de la phyag rgya'i dkyil 'khor ldan pas na// rmad byung de la mtshungs par yongs ma gsungs// dper na rmi lam na ni de bzhin gshegs sku mthong// sad pas bdag tu snang las gzhan med de// de bzhin phyag rgya bsgom pa'i dkyil 'khor bas// mtshan ma nyid las byang chub gting ma rnyed// dkyil 'khor ma yin rmad byung byang chub la// dkyil 'khor mtshan ma'i skyon gyis gos mi 'gyur// rmad byung byang chub sems gang su ldan pa// dge rtsar mi spyod dge bar mthong mi 'gyur// dge rtsar mthong ba de la skyon yod 'gyur// dge rtsar ma mthong ba nyid byang chub mchog/ rmi lam na ni dgra dang 'grogs pa mthong// sad pa'i dus na de dang 'grogs mi 'gyur// dge rtsas 'jig rten 'di yi snyan ngag thog/ rmad byung byang chub sems kyis ma zin na// sdug bsngal skye gzhi 'bras bu rmi lam 'dra// sems can rnams la snying rje brtse med cing// mtshams med lnga spyod nye lnga mi tshangs spyod// 'dod yon lnga rol gzhan lnga slong mi byed// rtag tu bdag mchod gzhan du mi rigs pa// rmad byung byang chub theg chen dam tshig yin// dug lngas 'khor ba'i rgyun spyod byed pa yang// rmad byung byang chub nyid du yang dag gsungs// 'dod cing chags pa'ang rmad byung byang chub nga// gzhan la sdang ba'i zhe sdang rmad byung nga// de bzhin 'khor ba gti mug rmad byung byang chub nga// bdag yod gzhan med nga rgyal rmad byung nga// gzhan sdug theg pa gzhan la phrag dog nga// ji skad brjod pa'i don dam kun rdzob nga'o// yi dam mgyogs pas dus mtha' med spros kyang// rmad byung sku la gar yang phyin pa med// sangs rgyas kun gyi nor bu dri med thugs// rdo rje sems dpa' nyid kyi thugs la gnas// bskal pa 'bum gyi mes kyang bsreg tu med// srid pa gsum gyi chus kyang bkru ru med// 'di zhes bstan du bde gshegs rnams la med// srid pa 'byung ba'i sngon du sangs rgyas te// thams cad rmad byung byang chub sems nyid kyang// skyon dang sgro gzhi gdod nas rnam par dag/byang chub kyi sems rmad du byung ba'i rgyud las/ skyon gdod nas rnam par dag pa'i le'u ste brgyad pa'o//// de nas sems dpa' chen po rdo rje theg pa la sogs pas/ yangs pa chen po la bcom ldan 'das mtshan ma nyid gsal bar bzhag nas// mtshan ma rnam par grol ba'i thabs bka' stsal du gsol// zhes gsol pas/ don mnyes te brjod pa/ mtshan can mtshan dpes brgyan pa bsgom pa yi// yang dag bde ba'i dkyil 'khor snying po nyid// mthong ba nyid du de bzhin gshegs pas gsungs// rmad byung nyid kyi sku la blta 'dod pas// blo dman byang chub sems dpas bslab tu rung// mtshan ma mtshan ma med pa'i tshig las 'das// nyid kyis brjod par bya ba brjod pa med// 'grus dang gsang ba'i chos gnyis bsgom dgos te// gsang ba'i gsang mchog byang chub sems nyid 'di// rang byung dag pa'i dkyil 'khor rin po che// sprul pa'i 'byung 'jug nyi rdul tshul du 'khrug/ rang byung mchog gi phyag rgya rgya po che// blo dman byis pa rnams kyis bslab tu rung// 'bras bu gsang sngags bsgom pa'i tshig rnams las// rmad byung ye nas sangs rgyas bstan pa 'di// skye med sangs rgyas kun gyi mes chen po// bskal pa'i me bzhin gcig tu gnas pa las// chos rnams ma lus chos so cog pa rdzun// thams cad rdzun par shes na 'jigs dang bral// ngo bo nyid kyi chos rnams ma lus stong// gal te ngo bo nyid kyi chos spangs na// sbyin la sogs pas mtho ris skye srid kyang// mthar zad 'bras bu brlag pa nyid du 'gyur// ngo bo nyid kyis stong pa'i chos nyid la// mi chags mi gnas de nyid mya ngan 'das// rmad byung byang chub sems kyi rang bzhin ni// ngo bo nyid 'das lam rdzogs rnam par dag/ sangs rgyas mi 'dod sangs rgyas sa las 'das// sangs rgyas spros las dga' la phyag rgya gsum// chos rnams kun gyi rang bzhin gnyis su med// chos kyi rang bzhin gcig tu zad pa yin// rang bzhin gcig pa nyid kyang yod min te// rang bzhin nyid kyis gnas shing chags pa med// mtshan ma can gyi chos ni 'jig rten gyi// lam dang 'bras bu yin te zad yod phyir// bla na med pa'i 'bras bu thob mi 'gyur// rmad byung 'di ni chos kyi rang bzhin dang// gcig pa nyid kyang mi 'dod dbyings las 'das// sangs rgyas phyag rgya mi 'dod ye rgyas btab// khams gsum ye nas sangs rgyas chos skur zhi// mya ngan 'das pa 'das pa nyid kyang 'das// yon tan nyid kyi phung po rdo rje'i sku// ci yang 'du 'bral med pa'i brtson 'grus can// ngo bo nyid sku zag med rang bzhin bral// gzhal yas me 'od 'bar ba'i dkyil 'khor can// nyi ma 'bum gyi gzi ltar 'phro ba'i bdag/chos kyi lam la 'jug pa'i mi zhig gis// lus dang sems la bslab pa cher byas te// phyi rol sangs rgyas mi btsal rnyed mi 'gyur// sems can nyid ni kun tu bzang por gsungs// nang gi nang la de bzhin blta bar bya'o// byang chub kyi sems rmad du byung ba'i rgyud las/ mtshan ma med pa grub pa dang/ theg pa chen po la khyad par 'phags pa'i le'u ste dgu pa'o//// de nas bcom ldan 'das dpal kun tu bzang pos nyid la nyid brjod par byas pa/kun tu bzang po bde ba chen po'i sku// sku gsung thugs kyi dkyil 'khor chen por ni// 'khor ba chos kyi 'khor lo rab tu bskor// byang chub sems la sbyor ba ma yin par// 'khor ba'i 'khor lo bskor ba rdul yang med// yang dag ye sangs rgyas pa ma gtogs par// dmyal ba'i ming med ma rig pa'ang med// dus gsum bde bar gshegs pa thams cad dang// rigs drug 'jig rten 'byung ba lnga sogs rnams// byang chub sems kyi rin chen sgrom du blug/ dog 'tsher mi mnga' thigs pas snod bkang tshul// e ma re mdzes bdag nyid bstan pa'i chos// byang chub sems kyi chos gcig ma gtogs par// chos dang chos gzhan med pa ngo mtshar che// sems kyi rang bzhin gnas med yul med par// dus gsum sangs rgyas chags pa ngo mtshar che// rang rig byang chub sems las ma gtogs pa'i// kun bzang gzhan nas rnyed par mi 'gyur bas// sngon chad ma rig ma mthong ngo mtshar che// bden gnyis rgyu 'bras yongs kyi sa med pa// bslu ba'i rmi lam bzhin gyi kun rdzob spyod// don dam bden pa ma rtogs ngo mtshar che// 'ching byed dmyal rgyu dug lnga gzhan rtogs pas// byang chub chen po'i byang chub chen po ru// dug lnga rgyas par gyur pa ngo mtshar che// sdug bsngal sdig pa mi dge ci spyad kyang// rnam grol bla med sangs rgyas nyid yin pas// sad bzhin skyon gyis ma gos ngo mtshar che// dmyal rgyu mi dge sna tshogs spyad pa dang// mi gtsang zas zos bshang ba kun sbyar yang// kun tu bzang po'i spyod pa bdag nyid pas// rgyu yi 'bras bur mi smin ngo mtshar che// nyam nga mnar med dmyal ba'i gnas rnams kyang// kun tu bzang mo'i b+ha ga'i mkha' klong las// dmyal ba'i gnas med byang chub sems kyi lam// bde ldan bde la gnas pa ngo mtshar che// gnod sbyin srin po la sogs 'bum gyis kyang// bla med byang chub sems kyi rang bzhin la// bzung zhing 'joms dang thob par mi 'gyur gyi// ma bsdus rang bzhin bsdus pa ngo mtshar che// e ma rab tu gsang ba'i chos chen po// de bzhin gshegs pas gsungs pa gang yang med// thig le yongs kyi theg pa mi mnyam ste// gzhan dang thun mong ma yin ngo mtshar che// sngags kyi phreng ba lu gu rgyud tshul du// bskyed dang spro dang bsdu dang spyan drangs dang// mchod dang 'dod gsol don gyi phyir bzhag na// re smon thub chod rtsol bral las 'das pa'i// theg pa'i rgyal po rgyu 'bras ye dag pas// de bzhin de bzhin de la mnyam gnas pas// cho ga phreng bar gyur pa ngo mtshar che// ming gzugs mnyam bzhag ye nas sngags tshig go/ ma 'gags skye dang bral ba'i byang chub sems// ye shes dge ba yongs pa'i dkyil 'khor nyid// byang chub rgyu 'bras yongs kyi 'dod min pas// rmad byung byang chub bdag nyid chen po ni// dus gsum gshegs pa kun gyi bdag nyid dang// sems can rnams kyi sems yin no// ye nas ma skyes rgyu 'bras zag pa med// rang bzhin rnam par dag pa'i de ma'ang med// rdo rje sems dpa'i gdan chen gdan chen la// mtshan med mi 'gyur nam mkha' bzhin du rgyas// rdo rje sems dpa' nyid kyang nga yi rol// chos kyi mtshan nyid thams cad rnam par dag/ thugs kyi dkyil 'khor thugs kyi dkyil 'khor mchog/ sku yi sku ste kun la rol mdzad sku// nor bu bsam shing rin chen sgrom rnams las// longs spyod sna tshogs 'byung ba'i sa bon nyid// sgyu 'phrul mkhan bzhin thams cad 'phrul par mdzad// skye ba med las thams cad kun skyes shing// skyes pa nyid na cir yang 'gag pa med// rtag pa kun rol kun byas 'phrul po che// kun bzang bdag nyid sku la ngo mtshar che// e ma'o re mdzes theg mchog khyad par can// byar med bya bral bya byed chos dang bral// ji ltar gnas kyang rdzogs pa chen po'i ngang// sgyu dra'i dkyil 'khor lus dang mthun pa yin// dngos med ngo bo nyid kyi zhi ba las// sku lnga'i dkyil 'khor gsal ba ngo mtshar che// ye nas rnam par dag pa'i rang bzhin las// ye shes 'od du 'bar ba ngo mtshar che// bskal pa'i me bzhin thams cad bsreg pa la// thams cad ma lus 'dus pa ngo mtshar che// ral gri bzhin du thams cad gcod pa la// thams cad ma lus 'dul ba ngo mtshar che// 'khor lo 'khor ba bzhin du ci yang ma bskor bar// thams cad ma lus bsrung ba ngo mtshar che// thams cad ma lus kun bzang nyid kyi ngang// byang chub kyi sems rmad du byung ba'i rgyud las/ rgyud kyi bdag po nyid kyis rgyud bshad pa la ngoms pa'i le'u ste bcu pa'o//// de nas bcom ldan 'das rdo rje sems dpa' la sogs pa rnams kyis phyag btsal bstod pa// bslab bya thams cad rnam par 'jig mdzad pa// mgon po mchog 'dzin mi g.yo bde chen sku// ngo mtshar thabs chen ston pa'i dpa' bo la// dus gsum rtag par 'dud pa'i bzhin phyag 'tshal// che ba lnga rdzogs sangs rgyas snying po la// sangs rgyas ma lus thams cad 'dus par bgyi// blta ba mi spung sku la ngoms par blta// 'du 'bral med pa'i spyod pa lhag par 'dzin// 'di la mos pa'i sangs rgyas thams cad la// sku la bstod pa bzhin du phyag kyang 'tshal// byang chub sems dpa' 'di la su mos pa'i// sems can de la'ang rtag par bzhin phyag 'tshal// ngo mtshar rmad kyi cho 'phrul ston pa yi// khams gsum yongs sgrol seng ge'i rgyal po la// yang nas yang du 'dud cing phyag kyang 'tshal// mkha' ltar dgos pa sku las 'char ba'i sku// dpe med mkha' 'dra'i brdal ba chen po la// yang nas yang du 'dud cing phyag kyang 'tshal// rnam grol ye grol 'khor ba kun grol bas// grol ba'i rgyas po mi gtong 'dud par bgyi// dngas snyigs blang dor med pa gcig pu ba// rgyu 'bras mi 'byed rnam par dag pa'i chos// rnam thar lam dang mi mthun rnam grol chos// zab mo zab mo dam pa 'bras bu'i chos// 'di 'chang klog dang gus dang sems pa dang// dad mos kha gsags ma yin rnal ma la// 'dud cing 'dud cing bzhin phyag 'tshal bar bgyi// zhes rgyud dang rgyud kyi bdag po la bstod pas// rgyud kyi ston pa rdo rje sems dpa' nyid la gzigs te// spyan bgrad zhal gdangs nas/ rdo rje sems dpa' khyod las lhag med de// byang chub rnyed dka' de nyid khyod kyi sku// dus gsum sangs rgyas rnams kyis rtogs dka' ba'i// gnyis med rang bzhin gnas pa'i chos 'di la// 'di las sangs rgyas gzhan na yod ma yin// nga la rtsol ba'i don chen ye min pas// mi g.yo rang bzhin gnas pa'i sman chen 'dis// sangs rgyas sems can ma lus thams cad kyang// mthong ba tsam gyis rnam dag grol bya'i phyir// rmad byung byang chub sems ni gtad do gtad// thugs kyi thugs te ye shes nyi ma yi// 'khor lo nyid las 'od kyi zer bskyod pa// thugs kyi dkyil du bstim la 'khor lo bskor// snying po mtha' med rnam par dag pa'i rgyud// lce yi rtse mo las byung sgron ma 'bar ba dag/ ye shes dag pa'i sgrom du sba bar bya'o// byang chub kyi sems rmad du byung ba'i rgyud las/ rgyud kyi bdag po la bstod pa dang/ rgyud la bstod pa dang/ bdag pos rgyud gtad pa dang/ gdams ngag la bzla ba'i le'u ste bcu gcig pa'o//// rgyud kyi rgyal po chos thams cad kyi rmad du byung ba rdzogs so//// byang chub kyi sems rmad du byung ba bu gnyis ma nyid dang gsum bzhugs pa las/ zab mo po ti pu ri'i lha khang du bu gnyis lus so// slob dpon bud+d+ha gup+tas bsnam par bzhed nas/ lan gcig gzigs pas/ gnod sbyin kha rtsal gyis 'gram du thal lcag gcig brgyab nas brgyal bar gyur to// brgyal sangs ba dang/ srin po lta bu'i tshul du 'dug pas smras pa// gnas khang brgyal bar gyur pa 'di nyid kyi// rgyal po me 'od khyod kyi me khyer ro// gal te khyer na khyod nyid gsod par bya/ zhes smras pas bred cing dngangs nas/ ma ni gong du spyan gzhan zhig tu drangs/bu gnyis der lus so// gong du de nyid rnam par 'grel pa la// dgos 'dod gsal tshad don la 'char ba ni// ma bu gsum nas drangs te gtan la phab// phyi nas blo yi zer la bskyod nas bya bzod na/

CLOSE WINDOW