CLOSE WINDOW

Gpb009.009
བོད་ཡིག

rgya gar skad du/ bo d+hi tsit+tAd+b+hu ta/ bod skad du/ byang chub kyi sems rmad du byung ba/ bcom ldan 'das dpal gyi dpal rdo rje sems dpa' la phyag 'tshal lo// rmad byung byang chub sems 'di gnas// de yi gzhal yas yon tan gyi// don 'di bstan pa 'di yin no// dus gsum bzhugs pa'i sangs rgyas dang// rdo rje 'chang ba'i rnal 'byor dang// dbang chen phrag 'thung ma mo'i tshogs// gzhan yang rnam pa mang po yi// lha dang lha min rlung lha dang// gnod sbyin srin po 'byung po'i tshogs// gshin rje klu dang lha rnams sogs// dbang med dad pas 'dus pa dang// lha yi tshogs kyi gang ba yi// gzhal med khang mdzes de dag gi/me dang 'dra ba'i 'od gsal de// nyi ma zla ba'i gdan dang 'od// zhing rnams gdan chen gsal ba dang// rin chen las byas shin tu snang// skal ldan pa yi sangs rgyas yin// rab sdang gnod byed rnams kyang spang// 'di la gnod byed gang yin pa// 'byung po grul bum srin po dang// yi dwags srul po de dag gis// rmad byung 'di ni mi thos te// rmad byung byang chub yon tan 'di// 'jig rten mgon pos bshad pa yin// 'di las gang zhig 'gal byed pa// 'jig pa thams cad de la 'ong// sngags 'chang rnams kyis spang bar 'gyur// rmad byung byang chub sems 'di ni// dpal chen pad+ma he ru ka'i// sgrub pa gsang ba thugs kyi mchog/chos kyi gtam la 'jigs med phyir// las kyis gos par mi 'gyur ba'i// dpal chen 'khor tshogs mang po dang// sangs rgyas rnal 'byor mang po dang// 'jigs med rdo rje sems dpa' dang// skal ldan rnams kyi don du gsungs// gzhan gyi don du ma gsungs so// byang chub kyi sems rmad du byung ba las// chos kyi gleng gzhi'i le'u ste dang po'o//// 'di nas le'u nyer gsum yan gong glegs bam ca pa'i nang gi rmad byung le'u zhe gnyis pa dang gcig pas dpe rnams la ma bris 'dug// le'u 'dis sku blta bas mi ngoms pa'i yon tan thams cad sku la rdzogs par bstan te/ de nas sa bcu la gnas pa zhes bya ba'i ting nge 'dzin la zhugs nas/yang 'di gsungs so// pha rol phyin bcu lhun rdzogs pa'i// byang chub sems ni rmad du byung// rmad byung byang chub sems 'di ni// chos thams cad kyi pha rol tu phyin pa yin no// chos thams cad kyi mdzod yin no// zad mi shes pa'i mdzod yin no// bla na med pa'i byang chub tu mngon par rdzogs par sangs rgyas pa yin no// shes rab kyi pha rol tu phyin pa 'di las de bzhin gshegs pa yang dag par rdzogs pa'i sangs rgyas kyang 'di yin no// chos thams cad kyi chos nyid ni ngo mtshar che'o// lam dang 'bras bu'i khyad par ni/ byang chub sems dpa' ni thams cad mkhyen pa thob ste mkhyen to// sangs rgyas thams cad mkhyen pa'i sangs rgyas thob pa'i ye shes so// sku'i lus la kun 'byung ba'i chos la longs spyod do// sems las kun 'byung ba'i chos la longs spyod do// ngag las kun 'byung ba'i chos la longs spyod do// chos kun 'byung ba'i chos la longs spyod do// yul ba ra NA sI'i gos bzhin du/ so sor 'gog pa med par thugs su chud do// byang chub sems kyi gsang ba'i man ngag bstan te nges don du bka' stsal to// rdo rje sems dpar yi dam lha med pas// rnal 'byor dbang phyug gzhan la bstan mi dgos// byang chub rnyed dka' de nyid rgyal ba'i sku// dus gsum sangs rgyas rnams kyis rtogs par dka'// rang rig chen po dbyings 'di nyid las byung// sangs rgyas gzhan na yod pa ma yin no// byang chub kyi sems rmad du byung ba las/ yon tan thams cad sku la rdzogs pa'i le'u ste nyi shu bzhi pa'o//// le'u 'dis bsrung ba'i dam tshig bstan te/ byang chub sems rmad du byung ba'i dam tshig brgyad ni/ ye nas ma skyes pa dang/ ye nas ma byung ba dang/ ye nas mi gnas pa dang// ye nas stong pa dang/ye nas med pa dang/ phyal pa dang/ gcig pu dang/ lhun gyis gnas pa dang brgyad do// de la ma skyes pas mi 'chi'o// gdod nas ma byung bas mi 'gro'o// mi gnas pas mya ngan las 'das pa'o// gzung 'dzin dang bral bas ye nas stong pa'o// med pas dam tshig go/ gcig bsrungs pas kun thub par bsrung ba'o// phyal bas dam tshig la phyogs med de bgrang ba las 'das pa'o// stong spyi phud yin pas gong na gzhan med pas// gcig pu a ti yo ga'i dam tshig/ rtag pa g.yung drung gnas pas mi 'gyur te// lhun gyis gnas pa'o// rmad du byung ba'i dam tshig nyi shu rtsa lngar yang spyod/ bsrung ba med pa sku gsung thugs su chud de/thugs la mi mkhyen pa med cing thams cad thugs su chud pas/ bsrung du med pa dang/ bsrung ba thams cad ma rdzogs pa med pas bsrung du med pa dang/ sku la thams cad lhun gyis rdzogs shing gzhan gyi longs spyod la thogs pa med pas bsrung du med pa'o// de phyir bsrung du med pa'i sku gsung thugs// mkhyen pa med cing thams cad chub// thams cad bsrung ba med pa dang// bsrung ba thams cad rdzogs byed pas/bsrung du med pa dang/ sku lnga lhun gyis rdzogs shing bsrung du med pa'o// sa ni mi mnyam pa dang mnyam pa'i lhag pa'i ye shes dang/ che ba'i yon tan rdzogs pa'i chos kun thugs su chud pas/khams gsum las rnam par rgyal ba'i byang chub kyi sems rmad du byung ba 'di nyid yin no// gsang ba chen po 'bum sde las/ rdo rje sems dpa'i rig pa bstan pa dang/ gsang ba thams cad kyi yang gsang ba'i chos byang chub kyi sems rmad du byung ba las/bsrung du med pa'i dam tshig gi le'u ste nyi shu lnga pa'o//// le'u 'dis byang chub sems rmad du byung ba'i don/ skyon thams cad dang nyams pa bskang ba'i don bstan te/rdo rje sems dpas ston pa la zhus pa/ chos chen po rmad du byung ba'i thugs rje ji lta bu/ kun rig chos kyi rje ston pas bka' stsal pa// stong ri gnam lcags thog chen gyi// skyon gyi gangs ri rtse nas bcom// bdud rtsi'i rgya mtsho bzhu nas bskyil// ting 'dzin 'bum phrag yangs pas ni// 'dis ni mnyam pa med pa'o// yang rdo rje sems dpas ston pa la zhus pa/ thugs gsang ba'i rgyud nyid las gsungs pa/ri rab sum brgya phrag dgu yi// bskal pa zhing gi rdul snyed kun/ tshig chad/ zhes zhus pas/ ston pa kun rig chos kyi rje bud+d+has bka' stsal pa/ stong gsum gyi stong chen po'i 'jig rten gyi khams kun dang rmad du byung ba'i don gcig ste/ri rab sum brgya phrag dgu yang// rmad byung byang chub sems 'di nyid// bsgom pa'i rdo rjes phye mar brlag/ ces gsungs so// de'i phyir byang chub sems rmad du byung ba 'di ni stong spyi phud ces bya/gsung ni ye shes mkha' la rol zhes bya/ thugs ni nam mkha'i spang po la/ rdo rje'i gzong gis 'dra zhes bya'o// de yang rmad du byung ba'i sku ni/ snying po byang chub na bzhugs pa'i sku zhes bya'o// rmad du byung ba'i gsung ni/ snying po byang chub na bzhugs pa las/ dgongs pa nges par 'grel pa zhes bya'o// rmad du byung ba'i thugs ni yid bzhin mi zad pa blo gros kyi thugs ni ye shes thugs kyi thugs te thugs kyi mchog ces bka' stsal to// de yang thugs gsang ba nyid kyi rgyud las/ nam mkha'i sku ni rmad du byung// nam mkha'i gsung ni lam ston pas// nam mkha'i thugs ni chos kyi mchog/rmad byung nam mkha'i gnas kyi mchog/ ces 'byung ste/ de ltar nam mkha'i sku gsung thugs bshad nas/ sa'i sku gsung thugs bshad pa ni// sa'i sku ni ri rab sum bcu phrag dgu yin la/ bskal pa zhing gi rdul snyed 'byung ba de kun/rmad du byung ba'i sa ni stong gsum gyi stong chen po'i 'jig rten yang/ ri rab sum cu phrag drug la ri rab 'bum yod do// de'i bskal pa'i zhing gi rdul snyed gcig gi tshad la ni/ byang chub kyi sems rmad du byung ba'i tshad dpag tu med pa ni/ ri rab dang gling rnams dang sa gzhi dang snang ba'i srid pa rnams kyi nang na/ snang ba srid pa'i skye 'gro rnams dang/ de kun zos kyang da rung ngas ma zos zhes de lta bu la bya'o// byang chub kyi sems rmad du byung ba las/ skyon dang nyams pa bskang ba'i le'u ste nyi shu drug pa'o//// le'u 'di las 'od kyi khyad par gyi le'u bstan te/ byang chub sems rmad du byung ba'i sku las me'i 'od du 'bar te/'dod chags 'od du 'bar/ zhe sdang 'od du 'bar/ nga rgyal 'od du 'bar/ phrag dog 'od du 'bar/ gti mug 'od du 'bar/ de bzhin du phung po nyid sku lnga ste/ 'od du 'bar ba de yang/ byang chub kyi sems rmad du byung ba'i sku lnga ste/ bdag nyid la 'od 'bar ba'o// de bzhin du rnam par shes pa lnga las kyang 'od du 'bar te/ mig rna ba sna lce sems 'od du 'bar ba'o// de bzhin du phyi'i yul lnga las kyang 'od du 'bar ba'o// sa chu me rlung nam mkha' la kun la yang 'od du 'bar ba'o// 'od de kun pas rmad du byung ba'i byang chub sems rang gi rig pa'i rgyal po'i 'od las byung ba'i 'od chen po'i ye shes kyi 'od ches gsal bas/'jig rten gyi khams kun kyang/ nga'i rig pa'i 'od las byung zhing gsal ba zhes bya'o// de'i 'khor ba'i mun nag 'od kyis zil gyis gnon pas/ ye nas mya ngan las 'das pas/sangs rgyas zhes bya'o// 'od 'di dag rmad du byung ba'i 'od do// skye dang rga dang rgud dang 'chi ba'i sdug bsngal las/ rmad byung byang chub sems ni bde chen no// sman mchog nad med bde 'tsho ba// dus gsum 'jig rten gsum las 'das// mya ngan 'das zhes de la bya'o// yang snying po byang chub na bzhugs pa'i skus// rdo rje sems dpa' la gzigs nas/ chos rmad du byung ba byang chub sems rmad du byung ba zhes bya ba 'di dag ston cing bzhugs pa'i tshe/gnyis su med pa'i sa lcang lo can gyi pho brang bde ba chen po'i zhing khams na/ 'phags pa nyan thos dang/ rang sangs rgyas dang/ theg pa chen po'i mdo la sogs pa rnams rtsol ba dang bcas pa'i sdug bsngal gyi rgya mtsho na/sa nas sar bgrod cing sbyor ba rtsol ba ming yang med de mi brjod do// theg pa chen po gsang sngags bla na med pa'i don ston cing/ rigs lnga'i sangs rgyas dang dus gsum gyi bde bar gshegs pa 'di dag thams cad dang/ dgongs pa chos nyid kyi theg par gsal zhing dag pa'i phyir/ byang chub sems dpa' dang sems ma gnyis su med pa'i sbyor bas/rtsol ba dang bcas pa'i sdug bsngal de dag gi rgya mtsho rtsol du med pa'i don gyis bsam te/ ye shes kyi snang ba chen po yang dag par rang nyid las shar bar ston pa ni rtsa ba'i don dang sbyar ro// de la tshig gi don la yang rnam pa gsum ste/tshig nyung la don che bar bstan pa dang/ 'bras bu sku gsung thugs su bstan pa dang/ sdeb sbyor legs par bstan pa'o// de la tshig gi don la yang/ byang chub sems rmad du byung ba 'di ni/bcom ldan 'das dpal kun tu bzang po thugs kyi dgongs pa bde ba'i dbyings nas/ dus gsum gyi bde bar gshegs pa rnams kyi don du/ thugs kyi dkyil nas/ ljags kyi dbang po brkyang ste bshad pa ni tshig gi don no// 'bras bu sku gsung thugs su bstan pa ni// ye nas yod cing rtag par bzhugs// 'gyur ba med par bsod nams sku// bsam gyis mi khyab sprul pa'i sku/ lhun gyis rdzogs pa'i sku/ bya btsal med pas snying po byang chub na bzhugs pa'i sku/ sna tshogs 'byung bas ye shes mchog nyid sku/ zhes 'byung ba la sogs pa sngags che ba'i yon tan khyad par du 'byung ste spags pas/bde gshegs chos dbyings sku/ chos kyi sku de las ye shes kyi 'od byung ste/ 'di ltar 'od kyang stong gsum gyi stong chen po chos kyi dbyings kyi sku dang ye shes kyi 'od kyis/ 'jig rten gyi khams ma lus pa kun la khyab ste stong pa chen por shar ba'o// rmad du byung ba'i sangs rgyas kyi 'od ni bsam gyis mi khyab pa'o// de ni ye shes kyi 'od de/ des byang chub kyi sems rmad du byung ba mthong bar byed pas rmad du byung ba'i 'od ces bya'o// bcom ldan 'das rdo rje sems dpas yang kun rig chos kyi rje la zhus pa/ chos kyi sku dang ye shes las 'od byung ba ji lta bu lags/ zhes zhus pa dang/ bud+d+has gsungs pa/ ji lta ji ltar phyogs bcu'i 'jig rten gyi khams rdul phra mo dag tu byas nas/chos kyi skur ston pa rmad du byung ba byang chub kyi sems chos kyi sku ye shes kyi 'od ni de tsam mo// de bzhin ye shes kyi 'od kyang bsam gyis mi khyab/ srid gsum nam mkha'i khams bas 'od phung gsal// bskal pa'i zhing rnams rab 'byams ji tsam gyis// sems can kun la thugs rje'i 'od de tsam// bskyod dang mi bskyod g.yo dang mi g.yo ba'i// blo dang rig pa'i 'od kyang rmad du byung ngo// zhes bka' stsal to// de snyed sangs rgyas kyi 'od 'byung ba ni mi che'o// rang rig pa'i ye shes kyi 'od ni shin tu gsal lo// de'i phyir nam mkha' dang nyi zla'i 'od 'dra ba ma yin pas/ 'od 'di kun dang thun mong min zhes bka' stsal to// byang chub kyi sems rmad du byung ba las/ 'od kyi khyad par gyi le'u ste nyi shu bdun pa'o//// le'u 'di las 'khor ba'i lam lnga ston te/ de nas yang rdo rje sems dpas zhus pa/'khor ba'i lam lnga gang lags/ ston pa kun rig chos kyi rjes bka' stsal pa// 'dod chags kyis ni blang bar bya// zhe sdang gis ni gsad par bya// phrag dog gis ni dbye bar bya// nga rgyal gyis ni brdeg par bya// gti mug chos su lam bstan to// 'dod chags zhe sdang gti mug dang// nga rgyal phrag dog 'di rnams kun// ma rig dug gsum rtsa ba ste// rig na byang chub lam yin no// rin chen dpal dang chags med grub// rdo rje de bzhin gshegs par snang// 'khor ba'i lam lngar bstan pa ste/ byang chub kyi sems rmad du byung ba las/ 'khor ba'i lam lnga ston pa'i le'u ste nyi shu brgyad pa'o//// le'u 'di las 'khor ba'i lam lnga nyid/ rigs lnga yab yum lnga'i dbyings su bstan pa ste/ yang rdo rje sems dpas tshig le'u gong ma de brnan te zhus pa las/ kun rig chos kyi rje ston pas bka' stsal pa// ma byin len pa sa yin te// mi tshangs spyod pa chu yin no// rdzun du smra ba rlung yin te// gsod par byed pa me yin no// thams cad nam mkha'i dbyings su bstan// zhes bka' stsal to// byang chub kyi sems rmad du byung ba las/ lam lnga nyid rigs lnga yab yum gyi dbyings su bstan pa'i le'u ste nyi shu dgu pa'o//// le'u 'dis 'khor ba'i rgyu 'bras nyid ye nas dag pa'i rgyu ma chags pa'i zhing du gnas par lung bstan pa ste/dug gsum rtsa ba bcad pas khams gsum 'khor ba'i rgyu 'bras med/ srog med gsod par byed pa he ru ka/ chags med 'dzin dang 'khor bas 'chi med dur khrod chen po brgyad/mi 'jug mi 'byung yul med dbang po stong// phyi nang sgo phug med pas rgya che nang pa nyid// sku gsung thugs dang bral bas che ba'i mchog/ sngags dang phyag rgyar bral bas nyams pa med// che ba'i chen por rdzogs pas rmad du byung/zhes bud+d+ha kun rig chos kyi rjes bka' stsal to// byang chub kyi sems rmad du byung ba las/ 'khor ba'i rgyu 'bras nyid dag pa'i le'u ste sum cu pa'o//// le'u 'dis 'khor ba dang mya ngan las 'das pa'i chos thams cad rnam par dag pa'i dbyings su bstan pa ste/ston pa sangs rgyas bcom ldan 'das bde ba chen pos/ 'khor ba dang mya ngan las 'das pa'i chos thams cad rnam par dag pa'i dbyings su gnas par gzigs nas/gnyis su med pa'i don rtogs te thugs su chud nas/ 'gro ba dang chos nyid/ 'khor ba dang mya ngan las 'das pa gnyis su med pa'i don rtogs nas/ la bzlas te mi g.yo ba'i tshul du bzhugs pa las/byang chub kyi sems rmad du byung ba'i don dbus mtha' med par bstan pa'o// byang chub kyi sems rmad du byung ba las/ 'khor ba dang mya ngan las 'das pa'i chos thams cad rnam par dag pa'i le'u ste sum cu gcig pa'o//// le'u 'dis ye gnas chen po'i rang bzhin du gnas par bstan te/ de yang chos nyid byang chub chen por rang bzhin du gnas pa dang/ dbyings dang ye shes 'du 'bral med par gnas pa las/cho ga thabs kyi don ni a ti yo gar 'dus par ston la/ a ti yo ga'i don ni byang chub sems rmad du byung bar 'dus par ston to// byang chub kyi sems rmad du byung ba las/ chos nyid rang bzhin du gnas pa'i le'u ste sum cu gnyis pa'o//// le'u 'dis chos thams cad ye nas sangs rgyas dang mya ngan las 'das pa'i dbyings na/ mi g.yo ba'i rgyal por bstan te/ ye nas sangs rgyas te mya ngan las 'das pa'i dbyings nas/mi dmigs pa'i rgyal po la/ bla 'og dang phyogs cha med par bzhugs kyang/ ye shes kyi thugs rje chen pos/ sprul pa rnam pa sna tshogs cir yang mdzad par ston pa ni thams cad dag pa'i zhing du sbyor zhing/thams cad dag pa'i dbyings su ston cing bzhugs so// de nyid kyang khams gsum las 'das shing/ mi 'pho mi 'gyur mi 'khor mi gnas pa'i rin po che kun tu bzang po'i ngang la gnas so// byang chub kyi sems rmad du byung ba las// ye nas mi g.yo ba'i le'u ste sum cu gsum pa'o//// le'u 'dis bde ba chen po'i dbyings kyi klong nas/ sku 'od dang gsung gi zer las ji ltar 'byung ba bstan te/byang chub kyi sems bde ba chen po'i klong nas/ sku'i 'od dang gsung gi zer las/ kun rig chos kyi rgyal pos/ yum 'dod pa'i dbang mo la gnyis su med par gnas shing/ snang srid thams cad thugs rje'i ngang du gyur te/yang 'khor ba'i chos dang srid pa kun yang dag pa'i byang chub tu bstan to// byang chub kyi sems rmad du byung ba las/ sku'i 'od dang gsung gi zer las ji ltar 'byung ba'i le'u ste sum cu bzhi pa'o//// le'u 'dis chos thams cad mya ngan las 'das par bstan te/ de yang byang chub kyi sems mya ngan las 'das pa la yang don gsum ste/ ye nas sangs rgyas pa'i dbyings nas/mi dmigs pa'i rgyal po rtog pa mi mnga' bar thugs ye shes su gyur par bzhugs pa dang/ srid pa gsum dus gcig tu gsal bar mkhyen pa'i ye shes ma 'gags pa dang/ zhing dag par mkhyen pa dang/thams cad kyi snod dang bcud du gyur pa ste/ de ltar kun gyi snying por gyur pas/ sku dang ye shes kyi chos nyid do// byang chub kyi sems rmad du byung ba las/ chos thams cad mya ngan las 'das pa'i le'u ste sum cu lnga pa'o//// le'u 'dis byang chub kyi sems rmad du byung ba'i dgos ched bstan te/ byang chub kyi sems rmad du byung ba 'di mgo mjug tu dgos pa'i don rnam pa brgyad kyis bstan te/ 'bras bu sku gsung thugs lhun gyis grub pas bstan to// de yang gang zhe na/ byang chub sems kyi rang bzhin bstan pa dang/ byang chub kyi sems khyab gdal chen por bstan pa dang/ byang chub sems kyi nges tshig bstan pa dang/byang chub sems kyi rgyu 'bras kyi don bstan pa dang/ byang chub kyi sems mya ngan las 'das pa chen por bstan pa dang/ byang chub kyi sems stong pa chen po'i ye shes mi 'gyur ba'i bdag nyid du bstan pa dang/byang chub kyi sems bde ba chen po'i ye shes ni ye nas sangs rgyas te rtag pa g.yung drung du bstan pa dang/ byang chub kyi sems mthar thug pa med par bstan pa dang brgyad do// de la yang dbye na/ byang chub sems kyi rang bzhin bstan pa la don gnyis te/snang zhing srid pa'i chos thams cad ye nas ma bcos par sangs rgyas par bstan pa dang/ de ltar rig cing rtogs na/ 'bras bu gzhan nas btsal du med par bstan pa'o// byang chub sems kyi nges tshig bstan pa la yang don rnam pa gsum ste/ lung nges pa dang man ngag gsang ba 'di spros pa med pa'i byang chub sems su bstan pa dang/ gzung 'dzin gyi yul dang bral bar bstan pa dang/byang chub sems las ma gtogs pa'i chos 'jig rten nas btsal du mi rnyed par bstan pa'o// byang chub sems kyi rgyu 'bras kyi don bstan pa la'ang bzhi ste/ thams cad 'byung ba'i rgyu yum kun tu bzang mo'i dbyings klong yangs pa'i thig ler/'bras bu byang chub kyi sems kun tu bzang mor bshad par bstan pa dang/ rtogs pa'i ye shes kyi rig pa rang las 'char bar bstan pa dang/ chos skye 'gag med pa'i ngang las kyang/thugs rje thabs mkhas pa'i bye brag sna tshogs su bstan pa dang/ phung po khams dang skye mched lha'i sku phyag rgya chen por bsgoms pas/ dus gsum du 'dus ma byas pa'i snying po ye shes kyi rig pa tsit+ta'i dkyil du 'char bar bstan pa'o// byang chub sems kyi mthar thug pa med pa la yang don lnga ste/ thabs dang shes rab tu bsgoms pas/ rigs lnga sangs rgyas kyi sku mdog dang bzhugs tshul bstan pa'o// dbyings dang ye shes su gsal bas/ sku'i dngos po dang bral bas rags pa'i ting nge 'dzin spangs pas/ thams cad 'od kyi dkyil 'khor du bstan pa dang/ shes pa dang shes bya rtogs pas sangs rgyas kyi dgongs pa ma 'dres par don thugs su chud par bstan pa dang/nam mkha' lta bur kun la khyab cing/ re dogs dang 'khor ba'i chos med par bstan pa dang/ rang gi rig pa'i byang chub kyi sems rtogs pa'i 'bras bu dus gsum mi 'gyur bar bstan pa'o// byang chub kyi sems khyab gdal chen po la yang don drug ste/ gsang ba mchog gi dkyil 'khor gyi don rtogs pas na ra ha pa'i dbyings bgrod par bstan pa dang/'du 'bral med pa'i don bya rtsol las 'das par bstan pa dang/ lung gi sha thang phyi nas man ngag gi thog tu 'bebs par bstan pa dang/ dam tshig gi sdom pa la gnas shing sku gsung thugs kyi 'bras bu thob par bstan pa dang/rgyal ba thams cad kyi gter byang chub kyi sems rmad du byung ba yin par bstan pa dang/ rgyu 'bras kyi chos thams cad ji ltar bstan kyang sems nyid ma skyes pa las skye ba'i cho 'phrul 'byung bar bstan pa'o// byang chub kyi sems mya ngan las 'das par bstan pa la yang don rnam pa gsum ste/ ye nas sangs rgyas te mya ngan las 'das pa'i dbyings na mi dmigs pa'i rgyal po'i phyogs cha med par bzhugs kyang/thugs rje chen po'i sprul pa cir yang mdzad par bstan pa dang/ thams cad dag pa'i zhing du sgrol zhing yum gyi lhums su sbyor bas khams gsum las 'das pa chen por bstan pa dang/mi 'pho mi 'gyur mi 'khor mi gnas pas sems rin po che kun tu bzang po'i ngang las g.yos pa med par bstan pa'o// byang chub kyi sems stong pa chen por la bzla ba la don rnam pa gnyis te/ bde ba chen po'i klong na sku'i 'od la bzhugs shing gsung gi zer la rol pa bstan pa dang/ kun rig chos kyi rgyal po yum 'dod pa'i dbang mo dang gnyis su med par bstan pa'o// byang chub kyi sems ye nas sangs rgyas rtag pa g.yung drung du bstan pa la yang don rnam pa bdun te/zhing bcu yang sangs rgyas kyi sar bstan pa dang/ snang srid thams cad thugs rje chen po'i ngang du bstan pa dang/ 'khor ba'i chos thams cad byang chub sems su bstan pa dang/theg pa mtha' dag gi yang rtse a ti yo gar bstan pa dang/ rgyu dang 'bras bu'i chos thams cad byang chub sems su bstan pa dang/ tshig dang yi ge'i spyod yul las 'das par bstan pa dang/sbyor sgrol dang skye shi'i rtsa ba bcad nas/ kun tu bsdus pa'i thig le rtag chad kyi mtha' las 'das par bstan pa'o// byang chub kyi sems rmad du byung ba las/ dgos ched kyi le'u ste sum bcu drug pa'o//// le'u 'dis byang chub sems rmad du byung ba'i nges tshig bstan te/ de yang byang ba ni/ sgrib pa dang bag chags ye nas byang ba ste/ shel sgong lag mthil du bzhag pa bzhin du khams gsum dang dus gsum dang srid pa gsum dus gcig tu mkhyen pa'i ye shes ma 'gags pas/blo dang zhing dag la gsal la don nges pa yin no// chub pa ni til la mar gyis khyab pa dang 'dra bar/ thams cad kyi bcud du gyur te/lhun gyis gnas pa'i chos nyid kun gyi snying po/ sku dang ye shes kyi 'byung gnas su gyur pas chub la/ sems ni rtogs pa'i ye shes su gyur pas/ kun gzhi gsang ba'i dbyings na ma bslad pa'i don/ rtsol du med pa'i nor bu rin po che rang bzhin dang kha dog tu 'od gsal ba ni/ sems skye ba med pa yin la/ bde ba ni sku gsum cig car rdzogs te chos kyi dbyings su dag pas ni/ dgyes pa chen por bzhugs pas bde ba yin la/chen po ni gnyen po gang gis kyang bcos su med pas/ nam mkha' ltar rgyu la ma ltos ye nas dag/ rkyen dang ma bral ye nas gnas/ rdzas dang mtshan ma la rag lus te/ gong na la bzlar med pas chen po yin no// thugs la yang don gsum ste/ kun la 'jug pa dang yid kyi mtshan nyid dang/ rig pa'i ye shes so// sku la yang gsum ste/ klong yangs pa'i mkha' dang/ kun bde ba'i sku dang/ byang chub sems rdo rje'o// gsung la yang gsum ste/ nges pa'i tshig dang/ brjod par bya ba dang/ thams cad du spros pa'o// byang chub sems rmad du byung ba 'dis/ khams gsum dbang du sdud de/ tha mas nad kyi srog 'dzin pa'i phyir kun tu bzang mo'i mkha' b+ha ga rgya mtsho'i dbyings su thim la/sku gsung thugs lhun gyis grub ste/ bya rtsol las 'das nas/ rig pa'i rgyal po rang dbang du gyur te/ ye shes kyi snang ba chen po rang la 'char ba'i phyir/kun tu bzang mo'i mkha' bde ba chen po'i klong du bsdus so// de gnyis su med pa las/ sems rin po che skye ba med pa'i don phyin ci ma log pa tshig dang yi ge'i mtshan ma las 'das te/rang bzhin dang kha dog cir yang ston cing 'gyur ba med pa'i dbyings bde ba chen po'i klong yangs pa na/ rtag pa chen po g.yung drung gi sku bzhugs so// byang chub kyi sems rmad du byung ba las/ byang chub sems kyi nges tshig bstan pa'i le'u ste sum cu bdun pa'o//// le'u 'di las byang chub sems rmad du byung ba'i yon tan bsten te/ byang chub sems bsgom pa'i don bstan pa/ gzhung nas/ khams gsum rin chen rnyed pa'i mi zhes 'byung ba ni/dper na/ byang chub sems rmad du byung ba'i don rtogs pa ni/ mchong dang mching bu'i nor bu rin che ba yang/ bai DUr+ya lug shig tsam gyi 'od kyis/ ri de ri la dang nor bu'i ri de kun bai DUr+yar mngon no// de dang 'dra ba byang chub sems stong spyi phud ye shes mkha' la rol pa 'di ni rmad du byung ba ste/ khams gsum rin po cher mthong yang srid pa gsum yang rin po cher gyur pa la bya'o// de bzhin du yid bzhin gyi nor bu rin po che la ni ci yang 'byung ba lta bu'o// zhes 'byung ste/ byang chub sems rmad du byung ba las/ yon tan du bsgom pa'i le'u ste sum cu brgyad pa'o//// le'u 'di las byang chub sems rmad du byung ba'i snod kyi skyon bstan te/de yang gzhung las/ theg pa dman la zhugs pa dang// ngang gis blo 'phang dma' ba dang// thos pa nyung zhing blo sbam dang// bslad pa'i tshig gis 'chal pa dang// spobs zhen dad pa chung ba dang// pho theg che la rang phyogs can// bcad kyang dogs med ser snas bcings// de la rmad byung don mi bshad// bshad kyang blo rgyud ma grol bas// bla med theg rgyal rdzogs pa'i lung// a ti yo ga'i don mi bstan/ byang chub kyi sems rmad du byung ba las/ snod kyi skyon bstan pa'i le'u ste sum cu dgu pa'o//// da ni le'u 'dis slob ma snod bzang po la lob par bya ba'i gtan tshigs dbul las thun mong ma yin pa'i brgyad kyis bstan te/de yang gzhung las/ glang pos theg tshad khal bskur na// dud 'gro phal dang stobs mi mnyam// rtsal shugs 'di yang thun mong min// gangs kyi seng ge'i gdangs phyung na// sder chags phal dang gdangs mi mnyam// gdangs skad 'di yang thun mong min// rgya mtsho chen po'i rlabs mthong na// chu phran phal dang rlabs mi mnyam// rba rlabs de yang thun mong min// ri rgyal lhun po'i rtser phyin na// ri bran phal dang 'phang mi mnyam// rtse rgyal 'di yang thun mong min// mtha' gsal nyi zla 'di mthong na// gza' skar phal dang 'od mi mnyam// 'od gsal 'di yang thun mong min// khyung chen nam 'phang gcod mthong na// 'dab chags phal dang shugs mi mnyam// rtsal shugs 'di yang thun mong min// rdo rje theg pa'i gting mthong na// theg gzhan phal dang gting mi mnyam// gting dpag 'di yang thun mong min// shes rgyud sbyangs pa'i mkhas pa dang// thos pa chung ba'i blo sbram gnyis// 'gro ba'i don la don mi mnyam// don mchog 'di yang thun mong min/

CLOSE WINDOW