CLOSE WINDOW

Gpb009.008
བོད་ཡིག

rgya gar skad du/ ma hA san+ti d+harma tA bo d+hi tsit+ta rat+na byU ha bi b+he da tan+t+ra nA ma/ bod skad du/ rdzogs pa chen po chos nyid byang chub kyi sems/ rin chen bkod pa rnam par dbye ba'i rgyud ces bya ba/ dpal kun tu bzang po la phyag 'tshal lo// 'di skad bdag gis thos pa'i dus gcig gi tshe na/ byin rlabs las/ bcom ldan kun tu bzang po nyid// dus kun snang ba ma 'gags shing// rang bzhin ye shes kun spyod mdzad// chos rnams kun gyis rnam brgyan de// kun tu sku yi dkyil 'khor dang// gsung thugs yon tan phrin las tshogs// rang gi dkyil 'khor rnams brjod cing// sangs rgyas kun gyis bstod byed pa'o// mi gnyis shes rab 'brel ba'i gzung// rigs kyi dkyil 'khor kun yul sbyor// thugs rje che dang thabs chen po// yon tan ma 'gags kun gsal zhing// phyag rgya'i dkyil 'khor ji bzhin par// phyag rgya bstan pa'i ting nge 'dzin// 'og min gnas mchog rnam dag mkha'// ye shes rnam par 'phrul pa'i gnas// rang bzhin chos rnams 'gags med cing// thams cad rgyan gyis rnam par spras// zhing khams chen po mtha' yas par// stong gsum rnam par bkod pa kun// thugs rje byang chub sems kyis mdzes// rang gzhan chos kun rnam dag pa'o// de tshe phyogs bcu'i bde gshegs rnams// bde gshegs byin rlabs snang ba'i mthus// rdul snyed kun nas 'dus pa dang// til gyi gang bu ji bzhin pa// de dag rang las mi gzhan cing// kun tu sprul par rnam par brgyan// rigs kyi zhing khams bsam yas kyis// phyag rgya thabs dang shes rab gnas// de tshe byang chub sems dpa'i tshogs// sa chen kun nas 'dus pa dag/ rmad byung chos kyi tshul bzhin du// rang rig mdzad pas rnam par 'khor// rang rig ston pas gtsor byas rnams// dkyil 'khor gsang ba'i tshul byung bas// don mthun theg pa sna tshogs kyis// rang gi phrin las la gnas pa'o// phyogs bcu'i de bzhin gshegs pa rnams// byang chub sems dpa'i tshogs kun gyis// rang rig ston pa mnyes mdzad cing// zhing khams bkod pa rnam par sbyor// de tshe byin rlabs snang ba'i tshogs// thams cad chos kyi de bzhin nyid// don kun snang ba ma 'gags pas// ngo mtshar phyag rgya nyi shu lnga// cho 'phrul rmad du byung ba'i tshogs// theg pa kun las spags pa yi// ngo bo nyid kyi sangs rgyas dag/ phyogs dus kun na gsal bar snang// rang gi ye shes gnas kyis 'jug/ ston pa kun gyis bstan par mdzad// so so'i rtog tshogs the tshom rnams// kun nas langs te gsol btab cing// mi shes dra ba'i mtha' 'di rnams// shes rab mtshon gyis gcad par 'dod// sangs rgyas kun yi ngo bo nyid// kun nas ma 'gags rnam 'phrul zhing// de rnams rtogs pas de ltar mdzad// de dag rang bzhin gnas la sbyor// de nas sangs rgyas thams cad dang// byang chub sems tshogs dga' ba'i mthus// rgyud chen gsang ba sngon byung bar// rtog pa'i the tshom mi shigs pa// nges pa'i don gyis gsal ba'i phyir// ston pa mchog la gsol gdab cing// yang dag ye shes rnam par gnas// bcom ldan bdag cag sangs rgyas tshogs// mi gnyis ye shes 'bral ba med// thugs kyi dkyil 'khor rnam gsal ba// phyogs dus sgrib med snang ba'i mthus// rang bzhin chos rnams gsal bar snang// thabs mkhas byang chub sems dpa' rnams// theg mchog bla na med gzhung 'dir// thugs rje ye shes rnam dag pa// thams cad kun dgongs gzigs mdzad de// snang ba'i skabs dbye mdzod cig lags// zhes gsol ba yang dag par btab po// rdzogs pa chen po chos nyid byang chub kyi sems rin chen bkod pa rnam par dbye ba'i rgyud las/ bstan pa ji ltar snang zhing sbyor ba'i sgo bstan pa'i le'u ste dang po'o//// de nas yang dag rgya chen po'i// mtha' yas don kun rab ston pa'i// thog ma tha ma rnam dag pas// gnyis med ye shes chen po nyid// de dag chos kun rang byung ba// byang chub sems kyi snying po can// 'di ltar bstan pa'i tshogs rnams kun// ma 'gag rang gi yul bzhin snang// de nyid sangs rgyas thams cad kyi// thig le chen po'i gnas nyid do// de dag sangs rgyas thams cad kyis// don mthun bstan par 'jug pa'i phyir// phyi nang kun tu bzang mo'i chos// rgya chen sku gsum bdag nyid bdag/ rang gi tshul gyis ston par mdzad// e ma ho thams cad las byung ba'i// tshul 'di ngo mtshar rmad kyi chos// de bzhin gshegs pa'i chos nyid do// 'gro ba kun gyi ngo bo nyid// de dag theg pa ji ltar byung// rgyu dang 'bras bu'i tshul rnams kun// thig le chen por bsdu mdzad pa'i// rnam grangs rnam pa du yis bstan// de bzhin skabs kyi don rnams dang// bye brag rig pa ji ltar 'byung// che ba'i rnam grangs gang zhig gis// don rnams gnyis med rdzogs par gnas// rgyud dang lung dang man ngag rnams// tshig don 'brel pa ji lta bu// rnal 'byor rnam pa gsum dag gis// don gyi spyi khog ji ltar gzhag/ che ba rnam lngas mtshams sbyar ba'i// skabs kyi 'brel pa tha dad gzhi// kun bzang ye nas rdzogs pa'i sku// de nyid gsum gyi don snang ba// phyag rgya'i tshogs rnams ma 'dres shing// gol sgrib kun gyi mtha' bsal ba// dmigs bya ngo bo rnam grangs chos// man ngag kun gyi chos rnams dag/ ngang dngas rang bzhin bdag nyid che// bsgom spyod bsgrub pa'i mtha' g.yengs shing// dper bcas don kun 'tshams par bstan// de dag tha snyad tshogs 'dus pas// rang gi yul kun sna tshogs don// thabs dang shes rab 'brel pa'i zhing// 'di dag theg par kun snang zhing// thams cad chos kyi tshul 'jug pa// ngo bo nyid kyis rnam dag pas// sangs rgyas kun gyi yul nyid ni// don kun bstan par grol bar byed// 'di ltar theg pa bsam yas pas// phyag rgya'i dkyil 'khor sna tshogs 'jug/don mthun bstan pas grol byed cing// ye shes cher gnas sna tshogs pa'o// de ltar chos rnams thams cad kyi// rang bzhin ma bcos lhun gyis grub// tha dad gzhan rdzas spyod bkag pa// don 'di bstan pas snying po'i tshul// lung chen brgyad kyis bstan 'gyur zhing// de dag tshul rnams sgrub byed pa// khyad par spags pa'i man ngag bcus// thabs ldan 'jug pa'i tshul shes pas// phun sum tshogs pa kun rdzogs shing// de dag yan lag rnam rgyas pa'o// thog mar bstan pa'i don nyid kyis// tshul rnams ji ltar bsdu bar byed// snod bcud rang bzhin sangs rgyas nyid// log rtog spang ba med pa las// thabs kyi khyad par sna tshogs kyis// ye shes rang las shar ba'i tshul// ma nor cho 'phrul kun gyi sku// de bzhin nges par 'jug pa'i thabs// rtsol bcas grol ba'i thabs yin te// de dag ngo bo rnam dag pas// kun tu thob pa med pa dang// de bzhin brjod pa med pa'i tshul// sdug bsngal chos nyid longs spyod rgyan// las kyis ma grub ye shes stobs// btsal du med pa'i snying po nyid// bsam gtan phyogs 'dzin rnam bcas pa// bsgom skyon kun tu tha dad pas// de dag tshul gyis sna tshogs nyid// ma byung skye 'gag yul las 'das// bsam gtan mtshan mas gol 'gyur zhing// re dang dogs pa'i mthar gnas pa'o// chos rnams thams cad gnyis med don// de yang 'thad pa dpe dang bcas// dus gsum byang chub chen po'i lam// 'od lnga chos nyid dbyings kyi rgyan// rtogs pa'i rang bzhin kun shes pa// sgrib med gzod nas rnam par dag/ re dogs chags pa kun bral zhing// thams cad yon tan snying po'i sku// gnyis med rtogs par dka' ba'i don// thabs dang shes rab ngang tshul bzang// 'khor gnas byang chub sems kyi grong// de dag rang gi chos nyid de// bla ma'i man ngag rnam bral bas// yang dag sangs rgyas rnyed mi 'gyur// kun tu sa rnams spyod byed cing// kun tu lam mchog bgrod pa med// gdams ngag legs pa'i rin chen gzhi// de las ngo mtshar 'bras bu 'byung// de nyid lam kun sgom byed cing// tshul bzhin gnas pas rnam par grol// phyi nang gsang ba'i theg pa dag/ gol sgrib rang gi ngang gis sel// de las rnam kun mtshon pa'i phyogs// 'dzin pa'i dbang gis kun nas snang// skyon dang yon tan gnyis med pa// spang bya blang ba'i mtha' rnams bral// theg pa gzhan las spags pa yi// dus gsum mnyam pa'i rang bzhin las// chos kun gdod nas dag par gnas// de dag che ba'i che ba nyid// bsti gnas tsam gyi mtshan nyid du// so so'i mtshan ma rtags dang bcas// yang dag rtsol ba las 'das pa'i// don kun dpe las 'das pa'i chos// nges pa'i lung kun tshul 'jug pa'i// theg pa sna tshogs yul dang bral// de dag yul chen gol ba'i gnas// gzung 'dzin rnam par dag pa'i gzhi// tha snyad ming du gnas mi 'gyur// mnyam nyid rig pa'i ngo bo yis// don kun gsal bar ston byed cing// rig 'dzin tha dad las kun dag/ gnyis med ye shes ngo bo nyid// de ltar cho 'phrul kun snang bas// rang byung ye shes 'char byed cing// yon tan 'char ba'i gtan tshigs kyis// reg na rtsol bsgrub skyon chen te// mtshan ma'i dkyil 'khor kun nas 'jug/ khro bo rtags rnams goms pa'i mthus// der snang rang gi ye shes bral// 'bad rtsol 'khrul pas kun brtags pa'i// 'bras bu de dag zag bcas chos// spyod pa 'jug sgo tha dad pas// dman pas gong ma skye mi 'gyur// blo mchog yang dag sbyangs pa'i tshul// phrin las kun gyi rtsol bral zhing// yang dag don kun mnyam pa nyid// theg pa'i yul 'dis gsal bar byed// rgyu rkyen la ltos 'khrul pa nyid// rang byung ye shes gzhan na med// mtshon pa'i dpe yis brjod med cing// phyag rgya'i dkyil 'khor sna tshogs gsal// 'bras bu rang las snang ba dag/ des na ye nas gnas pa'i chos// sems can byang chub sems nyid la// kun tu bgrod pas grol ba nyid// rtogs pa'i spyod yul mtha' 'das pa// phyogs mnyam lhun gyis grub pa'i dngos// byang chub sems kyi dkyil 'khor nyid// dmigs dka' dpe don las 'das shing// de yi che bas kun tu khyab// lhun gyis grub pa'i tshogs rnams kun// dus gsum mnyam pa'i ngang sbyor bas// mchod pa'i gnas kun yongs rgyas te// gnyis med rnam par bkod pa'i mthus// de dag dkyil 'khor mnyes par 'gyur// lam kun rdzogs pa'i bdud rtsi la// lhag par byin rlabs bsdo dang bral// rnam bzhi lhun gyis grub pa ni// dngos grub gnas kun mnyam rdzogs pa'i// sbyor sgrol lhun gyis grub pa yi// gar stabs dga' ba kun gyi gzhi// gtor ma sngags bzlas la sogs pas// lhag pa'i don kun gzung ba med// bdag tu bzung bas mi grol zhing// rtsol bas sgrub pa'i gnas mchog 'di// zhes rgya cher bstan to// rdzogs pa chen po chos nyid byang chub kyi sems rin chen bkod pa rnam par dbye ba'i rgyud las/bstan pa bsdus pa dri lan bstan pa'i le'u ste gnyis pa'o//// de nas sangs rgyas thams cad kyi// rang bzhin gnyis med kun tu bzang// thams cad chos kyi de bzhin nyid// thams cad don kun gsal bar mdzad// de dag chos rnams thams cad kyi// rang bzhin byang chub sems kyi rgyan// dmigs med snying po mtha' 'das pa// gsang ba'i rgyud chen bstan pa'i sgo// rdo rje sems dpa' nam mkha' che// kun bzang yangs pa chos kyi dbyings// rnam dag lam chen kun sgrol phyir// mi skye mi 'gag cir mi dgongs// byams pas don nyid rnam sbyang phyir// snying rje chen po cir mi mdzad// che ba'i che ba zab mo yi// yon tan cir yang bsngags pa med// don rnams ji bzhin mi bskyed de// bya ba med par grol bas grol// rang byung ye shes btsal med pas// grol nas grol ba'i lam yang ston// 'byung ba chen po bcom ldan 'das// 'gro ba kun la rang bzhin gnas// phyin ci log tu rnam brtags kyang// grol ba rang byung gzhan las min// che ba'i ye shes rnyed dka' ba// shes rab thabs la brten pas 'grub// ming tsam gzhan la brten 'dra yang// mngon sum bde ba rang las 'byung// cho 'phrul chen po dka' ba min// yon tan kun gyis stobs kyi rnams// ji bzhin rtogs pa'i phra ba las// de ma thag tu 'byung bar 'gyur// snang ba med pa'i chos nyid ni// ma btsal bzhag pas bsgom pa yin// de dang der ni rnam btsal na// de las de bzhin de mi 'byung// mchog tu gsang ba'i chos 'di ni// rna dbang gzhan nas thos mi 'gyur// de bzhin lce yi dbang pos kyang// de la brjod du rdul tsam med// 'gro ba sdug bsngal byang chub sems// kun tu chub pas rnam par rol// de la bskyod pa med bzhin du// nam mkha'i mtha' ltar rnam par gnas// khyad par cir yang mtshungs pa la// las so zhes ni rnam par brtags// cis te las kyi dbang btsan na// rang byung ye shes yod ma yin// rgyu nyid rdo rje rkyen dang bral// ma skyes pas na 'jig pa med// gdod nas snying po byang chub la// btsal ba'i bsam pas dbyings mi bskyod// yon tan chen pos bsam gtan na// bsam gtan nyid las bsam du med// ma bsams ma sbyangs chos bzhin du// rnam rtog nyid las ye shes skye// phra ba'i sgo mor ming btags nas// sems kyis dben pa'i lam 'tshol zhing// dgon pa'i rgyud du dben 'dzin pas// brtags na rnam par rtog 'gyur bsgom// rgyu dang 'bras bur ming btags shing// dge sdig gnyis ka rnam par sel// 'jig rten 'di las byung ngo zhes// blang dor brod pa mchog tu bskyed// chags dang ma chags tshig gi lam// dbu ma bzhin te brag cha 'dra// bde dang sdug bsngal rgyu mthun zhes// 'gro ba'i mgon po sems dpas gsungs// 'dod chags zhe sdang gti mug kyang// byangu chub sems dpa'i lam las byung// kun spyod yon tan rnam lnga yang// chos nyid dbyings kyi rgyan du che// nam mkha' rtog pa skye med cing// rtog pa de nyid nam mkha' 'dra// mi chags nam mkha'i sngo ba la// rang don chen po'i nam mkha' 'byung// rtog med mnyam nyid chos kyi sku// bzung bas mi zin chu zla 'dra// kun tu bzang po'i rol pa yis// A li kA li zab tu bstan// de bzhin a dang mdzes pa'i ta// sa dang yan lag spros pa bzhin// 'jig rten yongs kyi spyod yul la// sangs rgyas gsung gi zab mo 'byung// e ma ho sangs rgyas spyod yul 'di// btsal bas rnyed pa'i gnas med do// drug gi chos bzhin yul med pas// ldongs pas nam mkhar bsnyags pa bzhin// gong nas gong du tshangs pa'i lam// bya bral chos dang mthun par spyod// ci ste lam la bgrod gyur na// nam mkha' bzhin du thug pa med// de ltar de bzhin de yi phyir// de la de bsten de yang thob// de ni snying po de bas na// de las de byung ngo mtshar che// sngon gyi de dang da ltar de// de bzhin de yi gnas su che// de ltar de yi lam 'dra bar// de ni de yi rang bzhin no// de dang 'dra ba yongs kyi lam// zla ba las byung rten dang bcas// kun gyi mnyam nyid yin pa la// phyogs su bltas pas grub pa med// da ltar bde dang phyi ma'i bde// mngon sum pa dang rgyab nas byung// de yang rnam pa'i skyon yin pas// de la brten par mi bya'o// dus gsum gcig ste tha dad med// sngon med phyis med gdod nas 'byung// chos kun khyab pas gcig pa'i phyir// che ba'i chen po rang bzhin gnas// srid pa gsum na sbyong ba yang// ming tsam sgyu mar snang ba ste// 'khor lo bsgyur ba'i gnas chen yang// sgyu mas sbyong ba'i bsti gnas yin// rnal 'byor dus la ltos pa rnams// dus de 'byung bar mi 'gyur te// ma bral smon pa med pas na// stong pa'i mtshan nyid gsungs pa bzhin// gcig ste rnam pa yongs kyis med// rnal 'byor nam mkha'i bya lam gnas// ma byung ma skyes snying po la// sgros btags chos kun ga la yod// phyi nang gnyis ka phyi nyid nas// zab mo cha shas rtog yul med// srid pa ming du lob pa'i stobs// de bas ting 'dzin snyam dang bral// de la tha tshig phyi dang nang// rang bzhin phung po khams bzhin gnas// dus gsum 'di dang mi 'bral ba'i// tha tshig ming du btags pa med// mi g.yo ba ni sku yi rgya// mi bskyod pa ni ye shes te// mi lan pas na bdag med cing// mi 'dor tshig bral mnyam nyid do// gang dang gang gis gang dag tu// kun grol kun sbyor bdag las byung// 'di las skyes pa bud med ces// mnyam pa'i rgyal pos yongs ma gsungs// 'di la brtul zhugs drag shul gyis// gnas su bya ba ming med de// a dang par ni rnam ldan na// sgyu ma'i bde ba 'byung ba 'dod// rang bzhin gcig tu ma nges pas// ji ltar bltas pa der snang de// snang 'dod rtsol sems bde ba las// de ni de sgrib skyon chen yin// byang chub yan lag kun gyi sgo// cha lugs bsgoms pas chu zla 'dra// ma goms ma chags 'byung 'gyur yang// bsgoms pas byis pa'i spyod yul bzhin// dkyil 'khor khro gnyer cha lugs kyi// khro bdag chen po'i lus bzung bas// yi ge mngon du gyur na yang// zha ba de nyid mthong ba min// nyon mongs pa yi dbang gis na// tA la'i mgo bo bcad pa dang// sa bon me yis bsregs pa bzhin// de yi dbang du mi 'gyur ston// rnam grangs brgya stong phrag yas pa// gang ltar skyes kyang mi rtog skyes// mtshan ma med pa'i dbang gis na// bsti gnas de las 'byung mi 'gyur// gling bral 'di la gnas pa yi// rnal 'byor de ni skal ba bzang// bdag dang gzhan du mi 'byed pas// sgyu ma lhun grub yul la rol// lhag ma med par yongs su rdzogs// 'gyur ba ma yin drang por gnas// nam mkha' bzhin du mtha' bral zhing// gzhan la ltos 'gyur chos ma yin// lhun gyis gnas pa'i bde chen de// mtshungs pa med pa'i ye shes kyis// rang gi mthu yis rig pa las// chos ni gzhan las 'byung mi 'gyur// sla zhing dka' la sla phyir dka'// mngon sum mi gnas kun tu khyab// ming tsam 'di zhes bstan par ni// rdo rje sems dpas mtshon du med// ngo mtshar rmad byung rol pa ni// bya bral nam mkha' ji bzhin de// cir yang mi dmigs gti mug las// de ma thag tu rang las byung// 'di ni thams cad mtshungs pa'i lam// 'gro ba kun la rang bzhin gnas// byis pa 'khrul pas bslad pa'i phyir// sman nyid sman pas 'tshol ba bzhin// go ba'i yul na bde ba che// de nyid rnam dag 'jig rten yin// de las phyogs kyi 'od 'dus pas// phyogs bzhi mtshams dang steng 'og grub// ma nges 'ja' tshon kha dog las// rigs kyi khyad par mngon par snang// de bzhin g.yo 'gul mi g.yo ba// 'byung ba lnga las gtso chen yin// 'das dang ma byon da ltar gyi// tha snyad ming la mi gnas te// skye 'gags med par rab brtags shing// 'di nyid dus gsum chen por sbyor// mnyam pas rim par bkod pa med// gcig pas phyogs su bsdo dang bral// tshogs kyi rgyan rnams bkram pa yang// rang bzhin gnas pas 'dril pa med// lhun gyis grub pas mi bsdo ste// gdod nas dag pa'i bdud rtsi yin// skye mched bcu gnyis khyad par du// lhag pa'i bsam pas bzung ba med// yid kyi bsam pas yon bdag ste// bltas pas stobs rnams bkram pa'o// mthong bar 'gyur bas dngos grub las// de ni mnyam bzhag rdzogs par 'gyur// yul tsam bzung ba'i sbyor ba yis// dga' bar 'gyur yang dam tshig de// thabs kyi gar stabs bskyod pa yis// gnyis med sbyor ba phul ba yin// mi gzung gtong bas gtor ma ste// bya ba med pas las rnams rdzogs// mi rtogs ye shes gegs bsal nas// mi bzung mnyam bzhag sngags tshig gis// bla ma mchod dang gtong ba dang// de bzhin bsod nams thams cad kyang// ma chags mi g.yo'i stobs med na// byas na 'ching ba chen por 'gyur// de bas de lung de nyid la// de las de sbyar sgrib par 'gyur// de ltar de la de rtogs na// de la de nyid 'grub pa med/ ces rgya cher gsungs so// rdzogs pa chen po chos nyid byang chub kyi sems/ rin chen bkod pa rnam par dbye ba'i rgyud las/ de kho na nyid bstan pa'i le'u ste gsum pa'o//// de nas rigs bzhi'i sangs rgyas kun// rang rig bde gshegs sras dang bcas// thams cad chos kyi gnas 'jug pa'i// nges pa'i don chen dgongs par mdzad// 'di ltar sku dang gsung thugs kyi// theg pa'i mtha' rnams sdud byed pa// don kun gsang ba ston pa'i rgyud// bde gshegs kun gyis nges par bshad// rang gi ye shes dam pa'i gnas// de dag theg pa'i tshul gyis te// gnyis med don kun las grol ba'i// tshul 'di nges par 'byung ba'i don// e ma ho sangs rgyas kun tu bzang// rigs kyi dkyil 'khor ma lus pa'i// bstan pa'i don kun snang mdzad phyir// byin rlabs ngo bo ji ltar bsdu// de dag 'brel pa'i tshul byung bas// thams cad sgo nas snang byed cing// ma 'dres kun nas 'jug pa'i don// thugs rjes rol pa ston par mdzod// rnam par 'byed pa'i chos rnams kyis// gnas pa rang bzhin lhun gyis grub// mi g.yo bsam gtan ting 'dzin mchog/rtsol bral chags med spyod yul nyid// bkod pa'i rgyan gyi 'bras bu las// rol pa cho 'phrul byin rlabs snang// bgrod byed gnas pa'i lam nyid las// yang dag don gyi thig ler gsal// lung rnams kun gyi rtsa ba'i don// gnas skabs dbye bas rnam pa brgyad// ngo bo nyid kyis kun khyab cing// bzhugs gnas tshad med yangs pa'i mchog/ de bzhin phrin las tshad med pas// dgongs pa tshad med gsal bar mdzad// kun nas byams pa tshad med cing// rgya chen snying rje tshad med mchog/ zab cing phra ba brtags dka' zhig// btang snyoms kun gyi yul las 'das// rtag pa chen po 'gyur med pa// kun nas bcing zhing grol ba med// rim gyis sa la sbyong byed cing// de dag lam la bgrod med tshul// khyad par gsang ba'i brda don gyis// kun tu bzang po rang bzhin nyid// man ngag rnam bcu gsal byed pa'i// don kun theg pa las 'das pa'o// spyi dang khyad par chos kyi bdag/ ston pa'i yon tan rnam sprul zhing// de dag ye shes dkyil 'khor gyis// thams cad kun nas sgrib med don// 'og min gnas mchog chos kyi dbyings// yon tan snang ba kun gyi gzhi// theg pa'i khyad par rnam spags pa'o// ma 'dres phrin las rgya chen po// nyid las gzhan du mi 'byed pa'i// zhing khams kun tu rnam bkod pa// sangs rgyas ye shes dkyil 'khor nyid// rigs kun rnam par mthun pa'i tshogs// rang gi gnas kun longs spyod kyis// thabs dang shes rab mnyam sbyor ba'o// de la rgya chen don rnams kun// thabs ldan gdod nas rnam dag pa'i// byin rlabs kun tu bzang po dngos// rang rig mthu las kun ston pa'o// shes rab ye shes rtse gcig pa'o// ting 'dzin bstan pa'i tshul sdud cing// ma 'dres las kun ston mdzad pas// sras kyi dam par rab tu bsngags// de dag mnyam nyid chos kyi dbyings// phyogs rnams kun nas lhun grub cing// dus kun dus ni 'gyur med pas// ye nas gnas pa'i ngo bo nyid// rnal 'byor chen po'i don kun gyis// thabs ldan gsang ba ston par byed// de dag gzhi dang bya ba'i lam// 'bras bu'i tshul du rnam par gnas// chos rnams kun gyi de bzhin nyid// shes shing rig pa'i byin rlabs kyis// rang gi don kun rnam rdzogs pas// thams cad snang ba'i gzhir gyur pa'o// de dag phyag rgya chen po'i mthu// rang gi mtshan nyid ma 'dres par// mtha' 'das chos kun gtan la 'bebs// rnal 'byor chen po sgrub po'i lam// de bzhin nyid kyi don nyid kyis// de nyid 'bras bu gsal 'gyur zhing// sku dang ye shes chen po dag/ don mthun rnam pa'i rgyud kyis snang// thams cad cir yang mi gnas pas// chos dbyings sangs rgyas che ba nyid// mtha' bral mtha' ma ma spangs pas// mngon pa'i sangs rgyas rnam par dag/ mtshan ma'i yul kun las 'das shing// yin pa'i sangs rgyas 'gyur med pas// rgyu rkyen 'bras bur mi phyed pas// bdag nyid chen po'i sangs rgyas sku// bgrod pa'i lam dang 'bras bu'i sa// gnas med sangs rgyas med pa'i tshul// theg pa kun las rnam grol ba// rang bzhin don gyi rnam spags pas// che ba rnam pa lnga nyid de// chos rnams kun gyi bdag nyid do// chos nyid rang bzhin kun gsal zhing// ma bcos mtshan ma'i mtha' dang bral// ma 'gags yon tan kun tu snang// don kun 'byung ba rgyu yi don// phyi nang med par 'od gsal zhing// ma 'dres kun tu rdzogs par byed// ma bcos mtshan ma rnam dag pas// rang bzhin yul kun spros pas dben// thams cad dag pa'i sangs rgyas sku// dkyil 'khor rigs kyi cha lugs rdzogs// ye nas lhun gyis grub pa'i chos// phyag rgya gsang ba'i ye shes nyid// rten dang brten pa tha dad gzhi// snang ba'i tshul gyis gnyis med par// thig le chen por mnyam rdzogs pas// shes dang shes 'byung gtan la 'bebs// de dag ye shes kun khyab pa'i// tshul gyis gnas skabs don ston pa'o// chos nyid kun nas spros bral zhing// rang bzhin kun tu bzang mo'i mkha'// dngos med byang chub sems kyi dbyings// rgyan gyi cho 'phrul rnam bkod pa// kun tu bzang po'i rol pa ste// don kun gsal bar bstan pa'i sgos// dkyil 'khor kun tu sna tshogs pa'o// tha dad min la tha dad pa'i// nang dang phyi rol yul 'das pas// byang chub sems kyi dngos gzhi ste// nang du 'jug pa'i mtshan nyid can// de dag gnyis med ye shes che// thabs dang shes rab 'brel pa'i dngos// ma 'dres pa yi tshul dag gis// thams cad rab tu gsal bar byed// chos nyid kun tu ston byed skabs// rang bzhin gnas pa'i ngo bo nyid// de dag rang gi che bas gnas// kun tu rtsol ba dang bral zhing// tha snyad brjod pa'i tshig las 'das// 'gro rnams las kyis mi 'khol zhing// btsal sems yul nyid dang bral bas// gnyis su med pa'i skyon bral zhing// ye shes rang las byung bar byed// gzungs kyi sbyor thabs ji bzhin du// yongs su rdzogs pa'i chos ston cing// chags bcas yul las 'das pa yi// gdod nas che ba'i snying po nyid// smon lam yul kun gnas med pa// de dag nges par lung bstan mdzad// kun tu mnyam pas spros dang bral// dngos grub chen po'i bde yong zhing// rtsol dang bral ba'i don spyod pa// chos nyid don la 'gyur ba med// rgyu dang rkyen las ma grub pa'i// 'gro ba yongs la sangs rgyas gnas// phyogs bcur tshogs rnams 'bul byed cing// bde nyid rgyan kun lhun gyis grub// ye nas gnas pa'i sangs rgyas de// phrin las rgya mtsho'i skabs byed cing// bdag cag gtor mar 'ching bar 'gyur// lung tsam 'brel ba ming gi brda// gnas skabs chos kun gtan la 'bebs// de dag don kun ji bzhin pa'i// phyag rgya'i gnas kyis rnam grol zhing// de yi mthar bcas dmigs dang bral// theg pa kun tu mngon zhen pa'i// rang gi grub mthas yul kun 'dzin// de dag phyi nang gsang ba'i tshul// tha snyad tshig gis gang la 'jug/ gnyis bral gnyis su rtogs byed pa'i// kun nas bgrod pa'i thabs kun gyis// rang bzhin yul kun gsal bar byed// nga dang bdag nyid rang bzhin che// kun nas zag pa med pa'i sgo// phyag rgya'i dkyil 'khor ji bzhin par// ma 'dres gsal ba'i dkyil 'khor nyid// de bzhin lha gnas bsgom pa'i chos// rnam gsum tshul gyis snyoms 'jug pas// byang chub sems kyi rang bzhin te// 'di dag byed pa med pa'i lung// dus kun rang bzhin la gnas pa'i// bsnyen bsgrub gsang ba la spyod cing// tha dad chos kyi stobs rgyas pas// de dag rtog pa'i mtha' yis nyams// don rnams phyogs su grub byed pa'i// phyag rgya'i dkyil 'khor rdzogs pa che// mgon po mi gnyis gnas la skye// rab tu 'jug pa gtso bo'i stobs// rnam dag lam kun mthar phyin pas// de dag gdod nas ma skyes pa'o// bya bral yul kun rdzogs pa nyid// don kun phyag rgya 'di nyid do// mtshon med kun nas 'jug pa'i rgyu// de dag rab tu grub pa'i dngos// snod bcud rang bzhin rnam dag pa'i// thugs rje chen po'i don rnams kun// de dag rab tu grub pa'i dngos// snod bcud rang bzhin rnam dag pa'i// 'byung chen sangs rgyas dkyil 'khor la// bcom ldan dga' mchog snyoms 'jug pas// rang rtags phyag rgya'i tshogs gsal 'gyur// 'di dag grogs gnas kun khyab cing// chos kun ngo bor lhun grub gnas// rnam rtog spang blang med pa yi// tha dad mtshan ma kun bral ba'i// yul dus kun nas brtags pa'i tshogs// rang byung ye shes gnas nas skyes// bde bar gshegs pa'i snying po nyid// bcom ldan 'das kyis don mdzad pa'o// de dag don kun ji bzhin pas// dbyings dang ye shes 'brel pa'i rgya// che ba'i ye shes mtha' 'das pa// thabs kyi khyad par kun gyi tshul// rnyed dka' rang gi gnas las byung// thabs dang shes rab snyoms 'jug pa'i// don grub gsal bar bstan pa'i sgo// de dag tha snyad yul kun de// phyag rgya'i gnas kyis brgyan par 'gyur// ye shes chen por rang gnas pa'i// ming tshogs gzhan la brten pa dag/sngags kyi cha yis sbyor byed pas// rang bzhin bde chen cha bral 'gyur// mngon sum snang ba kun tu sa// de dag tshul gyis rnam grol zhing// mi gnyis ye shes stobs rdzogs pas// thabs kyi yan lag rnam par don// ma nor cho 'phrul de bzhin nyid// don kun mngon par bstan pa'i tshogs// dbang po'i yul rdzogs gnyis med pa'i// byang chub sems 'di kun tu gnas// kun nas sku dang gsung thugs kyi// cho 'phrul byin rlabs ma 'dres pa// de dag theg pa'i mtha' rnams kyang// yon tan stobs kyis rdzogs par 'gyur// ji bzhin rang gi sems gnas kyang// sangs rgyas snying po gzhi 'gyur zhing// de dag ma 'gags rgya mtsho'i chos// de las de byung de nyid pas// sangs rgyas theg pa bsam 'das shing// don kun gsang ba rmad du byung// ji srid rtog pa'i rgyun 'brang ba// de mtha' bdud kyi gnas chen de// kun tu rtsol bas 'jog pa yi// chos kun 'ching ba chen po'i gnas// de dag rnam par rtsol byed pas// de yi rgyu mthun rkyen mi 'gyur// rang bzhin ngang gis ma bcos pa'i// mchog tu bsngags pa'i bde ba che// kun tu gsang ba ston pa'i rgyud// chos rnams rang bzhin snang bas gnas// de yi byin rlabs mthu ldan pas// brda' tshig yul kun 'gag med cing// phyag rgya'i gsang ba kun ston pa// gdag pa'i sgra las 'das pa'o// bsam bral ngo bo rtogs dga' ba// de dag phyag rgya chen po'i sku// don kun ye shes rnam par spyod// tha snyad gang gis gang la 'jug/ de dag brjod pa'i rtogs pa dag/ gnas kun dngos por mtshon byed pa// rab tu grol ba'i don rdzogs pa'o// rnal 'byor chen po ye shes nyid// bye brag rnam par dbye ba'i dngos// sdug bsngal chos nyid longs spyod rgyan// 'gro ba'i gnas kun rnam par dag/ byang chub sems dpa'i dkyil 'khor ro// phyogs bcur dag pa lhun grub cing// kun tu rdzogs pa rol ba'i chos// phyogs bcur bskyod pa med pa'i tshul// nam mkha' bzhin du kun khyab gnas// 'di dag rang gi chos rnams las// dus kun mi 'gyur brtan gnas shing// de dag yul bcas rnam grol ba'i// chos nyid yul can snying po'i don// phyogs dus kun tu ma 'gags pa'o// las kyi dbang gis sna tshogs pa'i// bya ba chen pos gzhan rgyud sel// gnyis med kun tu mtshungs pa'i chos// khyad par yul kun ston byed pa// de dag thams cad mtha' 'dis ni// las kun rgyud rnams dag par byed// gang zhig der bcas chos 'dzin pa'i// de nas kun tu smin gyur zhing// de dag ma spangs grol ba'i dbyings// de nyid ye shes gnas las skyes// las kyi tha snyad kun 'jug pa'i// snying po rang byung ye shes nyid// mi mthun stobs kyis rgyas min te// don kun gsal ba bsgrib par byed// kun nas phyag rgya chen po'i tshul// btsal sems yul bral rdzogs pa nyid// ngang gis ma skyes kun snang bas// rgyu rkyen las kun rnam par dag/ nam mkha'i yul kun skye med cing// rgyu rkyen rdo rje lta bu las// pha rol phyin pa gang dag gis// skye dang 'jig pa'i gnas dag pas// gzugs sogs chos rnams kun snang bas// de dag tshad med brtag pa'i gzhi// rang bzhin yul gyis rnam dag pa// byang chub snying po gsang chen nyid// tha dad ming tshogs kun snang bas// de dag shes pa mtha' dang bral// rang byung gnas kyi stobs nyid kyis// rab tu che ba'i tshogs rdzogs shing// phyi nang yul kun rnam spyod pa'i// gdod nas dag pa'i ye shes sku// byang chub sems kyi rang bzhin las// bya btsal rtogs par ga la 'gyur// de dag mthar 'dzin bsam gtan yul// ma bsams sbyangs pa'i mthar gnas shing// gnyis med 'dul ba'i phyag rgya yis// don kun snying po ston par byed// yul dang yul can brtag pa'i gzhi// der snang de nyid de dag pas// ma lus don kun rnam brtags pa// phyogs su 'dzin pa'i cha yis nyams// ji bzhin chos kyi gnas gnas shing// ji bzhin don kun spyod byed pa// de dag dran rtog yul dang bral// yul kun phyag rgya ston par byed// mtha' yi rtog pa kun 'byung zhing// rang gi chos kyi gnas rgyas pa// de dag 'dren pa'i yan lag tu// rab tu brtags pas 'jog par byed// thams cad chos kyi de bzhin nyid// de dag phyi nang kun nas snang// ma 'dres theg pa'i tshul bzhin du// gnyis med dag pa'i don nyid yin// rgyu rkyen yan lag bcu gnyis kyis// cha shas rtog tshogs rnam sbyong ba// de dag 'dren pa'i yan lag tu// don kun brtags pas rnal 'byor spyod// bsam grol phyag rgya chos kyi dbyings// rab tu sbyangs pa'i ye shes kyis// ji bzhin don kun gsal byed pas// mi rtog ye shes chen po'i sku// chos nyid phra ba'i yul rnams dag/ gnyis med thig le chen por sbyor// mi mthun gnyen po'i yul kun gyis// rab tu brtags pa'i don bskyed pas// der bcas mtha' rnams 'ching ba'i rgyu// dben pa chen po 'dzin pa po// de dag don kun brtags pa'i rgyu// de las sa dang lam gyi tshogs// tshul mthun spyod pas grol byed cing// tshogs gnyis rdzogs pas mthar phyin 'gyur// kun tu rgyu las 'bras bu'i tshogs// las kun bskyed pas rnam rgyas te// tha snyad ming bcas btags pa'i gzhi// de dag rnam grol 'bras bu'i tshul// byang chub chen po'i chos rdzogs pas// sku dang ye shes mthar phyin cing// de dag btags pa'i gnas spyod pa// rang bzhin chos kun tha snyad nyid// ji ltar nam mkha' sna tshogs chos// yul kun mtha' yas rnam par brtags// dben pa'i gnas su rtog 'dzin cing// brtags pas chos kun gzhan du snang// de dag cha shas gnyis med pa'i// dge sdig kun gyi rgyud sel cing// 'jig rten 'das dang 'jig rten pa'i// las kun dmigs pas 'gegs byed pa'i// de dag mtha' las 'das pa'i chos// don kun 'bras bu mngon du gnyer// kun nas yul gyi tshogs rgyas pas// phung po khams dang skye mched rgyud// kun tu brtags pas chags 'gyur zhing// de yi mthar gnas rnam spyod pas// de dag kun na gnas pa'i shugs// 'gog pa chen po yul spongs shing// chos kun gnas dang gnas min spyod// sangs rgyas theg pa'i mtha' bzhin du// rab tu spyad pas grol bar 'gyur// mtshan ma'i gnas kun 'gog med cing// mtshan med phyag rgya sngon du gnyer// mtha' rnams kun tu 'ching med pa'i// don kun phyag rgyas bstan pa'i sgo// de dag gi ni yul 'das shing// tha snyad ming la mi gnas pa'i// bde dang sdug bsngal btags pa'i chos// thams cad ye shes 'phrul pa'i dngos// rgyu mthun rgyu las 'byung 'gyur zhing// gnas mi bsgrib pas sangs pa'o// rtsa ba rang gi las kun stobs// de dang rgyun gyis der 'byung zhing// kun tu zhen chags chos kyi rgyun// 'dod pa'i dbang gis yul kun rgyas// tha dad gnas min rnam grol pa'i// 'dod chags chen po'i rang bzhin nyid// kun nas sku dang gsung thugs kyi// ngo bo yul kun mtha' 'das pas// zhe sdang gti mug chen po dang// byang chub sems kyis rnam dag pa'o// de las 'dod chags la sogs rgyun// kun nas snang ba skyod byed cing// de dag bde ba ye shes che// ma bcos rgyun gyi yul gnas pa'o// de bzhin nyon mongs chags zhen dang// las kun rang gi mtshan nyid kyis// rgyu med rkyen bral 'bras bu'i chos// rang bzhin nyid kyis snang ba'o// de ltar khams gsum kun spyod pa// zhen rtog las la sogs pa rnams// bde chen nyid las gzhan ma yin// tha dad brtags pas kun 'dzin cing// de dag tshul bral bde ba nyid// gzugs sgra dri ro reg bya'i chos// yul kun de nyid lha yi tshogs// thabs dang shes rab mnyam sbyor zhing// ma 'dres rol pas longs spyod de// bde chen gnas kyi dkyil 'khor nyid// don mthun gsang bas kun tu rgyas// de ltar 'khor dang mya ngan 'das// chos nyid dbyings kyi rgyan snang bas// dkyil 'khor rdzogs pa'i phrin las kyis// dus kun yul bcas mnyam sbyor ba'o// ji ltar snang ba sna tshogs gzhi// de dag theg pa'i tshul nyid de// rtog pa'i mtha' rnams 'gags gyur na// theg pa'i spros tshig kun dang bral// nam mkha'i tshul gyis gzhan nas 'jug/de dag kha dog dbyibs las 'das// don 'di bstan pa'i tshul gyis ni// mi rtog kun nas btang snyoms che// mtha' las 'das pa'i shes rab kyis// ye shes chen po'i mtha' rgyas 'gyur// chags dang chags bral yul dang ro// de dag dmigs pa'i rtog las 'das// mi gnas kun tu snyoms mdzad pas// don kun bstan pa'i 'byung gnas nyid// de dag zag med kun gsal bas// thams cad chos rnams rnam par 'byed/ ces gsungs so// rdzogs pa chen po chos nyid byang chub kyi sems rin chen bkod pa rnam par dbye ba'i rgyud las/ chos thams cad kyi yul las 'das pa'i le'u ste bzhi pa'o//// de nas bde bar gshegs pa thams cad kyis/ rang bzhin kun tu bzang po nyid// gnyis med ye shes snyoms 'jug cing// phyogs dus bstan pas 'phel bar mdzad// kun nas gnyis med rtogs dka' ba'i// don kun mtshan nyid yul las 'das// rang byung byang chub sems kyi gzhi// sangs rgyas bstan pas mtshon byed pa// de dag theg pa'i tshul 'di yis// gnas kun rgyas par gsal bar byed// rang gi ye shes ji lta bar// rang gi stobs kyis kun spyod cing// de dag sgrib med ma 'gags pas// phyag rgya'i yul kun gtan la 'bebs// mnyam nyid chos sku chen po las// thams cad yon tan mdzod rgyas pas// phyi dang nang med kun tu snang// ye shes gsang ba'i rdzogs pa'o// mtshon bya dpe las 'das pa'i don// kun tu bzang po'i rol pa nyid// de dag phyogs bcur ma 'gags pa'i// rang bzhin sgrib med dkyil 'khor rnams// sku gsum 'brel pa'i bdag nyid de// thabs dang shes rab rmad byung ba'o// de ltar 'khor ba mya ngan 'das// chos kun gnas kyi rgyun 'jug cing// don kun gsang ba ston byed pa'i// man ngag snying po tshogs pa'o// thabs dang shes rab mnyam par sbyor// byang chub sems kyi rgyud nyid kyis// de ltar chos kun gnas mdzes shing// rtag dang rnam par grol ba'o// chos nyid ngo bo la spyod pas// spros tshig mtshan ma mtha' yas kun// bde bar gshegs pa'i yul bzhin 'jug/ 'jig rten mtha' rnams kun khyab pa// zab mo'i gnas chen 'di nyid kyis// thams cad don kun sdud byed cing// sangs rgyas bstan pa'i yul la 'jug/ gsang sngags ming tshogs rnam spros pas// mi 'gog rnam par spyod pa yi// bstan pa rgya mtsho sdud byed cing// de dag 'dren pa'i don bzhin snang// kun nas chos kun ma 'gags chos// ming tshogs yul dang bral ba yi// zab mo sngags kyi rgyud lam kun// thabs dang shes rab ji bzhin nyid// rang bzhin nyid ni rnam par dag/ yang dag ye shes gnas 'jug pa'i// man ngag dam pa'i stobs kyis ni// rang gi don nyid gsal byed cing// yang dag snga ma'i gnas rdzogs pa// ngo mtshar rmad kyi yul ston pa'i// de dag de kun rnam gsal bas// tha snyad chos las kun rtog cing// mya ngan gnas kyis 'gog par byed// gang nas ma byung gang rnyed pa// de dag dus gsum mnyam pa'i dbyings// tha snyad gnas kyi yul 'jug pas// bstan pa rgya mtsho'i chos rdzogs pa'o/ gang gis byang chub gang las skyes// de dag gnas bcas dmigs pa'i sgo// rgyu med rkyen gyis mi 'thad phyir// 'byung 'jug 'gags pa bstsal ba'o// dam pa'i yul kun nor bu'i 'od// dpe 'das dpe yis bsgrub med pa// dag pa 'jig rten khams 'byed cing// rnam par grol ba kun gyi gzhi// kun nas btsal zhing bsgrub pa'i blos// de dag de bzhin mthong mi 'gyur// ma 'gags ye shes mi gsal bas// thams cad bstan pa'i chos rgyas 'byung// rang bzhin don las gzhan 'jug pa'o// de dag rnyed pa'i tshul bral zhing// ming tsam sangs rgyas gnas 'jug ste// gzugs tshogs chos rnams mngon par byed// de dag yul kun gzhan na med// ma 'gags dus rgyun 'od gsal zhing// byang chub sems kyi gzugs brnyan gyis// phyi nang khyad par sna tshogs chos// 'di ltar ldongs pa'i tshul rnams kyis// don kun log pa'i gnas su 'jug/thams cad mtha' rnams gsal byed pa'i// 'dren pa rnam par 'phags pa'i tshogs// sa bcu'i ye shes gnas sbyor zhing// rgyu gnas 'bras bu kun mkhyen pas// thams cad shes rab mi gnyis pa'i// ston kun gsang ba ston par 'gyur// mi mthun gnyen po tshul dag gis// der bcas mtha' rnams 'gag med cing// mthun pa'i 'bras bu kun tu rgyas// gong nas gong du sbyor 'dod pas// tshangs pa'i gnas sogs phyed 'dzin cing// rnal 'byor thabs mkhas spyod pa'i chos// der bcas mi gnas ting nge 'dzin// gang gis gang zhig mngon 'dod pa// de dag bstan pa'i tshul kun kyis// gzhan pa'i las kyi 'bras bsgrub cing// bya min spyod pa'i rtsol bcas pas// de las phyi rol chos kun snang// rang bzhin ye shes gnas kyi mchog/ de dag ye nas rdzogs pa yi// chos nyid snying po sa dang bral// lam kun bgrod pa med par rdzogs// nam mkha'i mtha' dbyings bsam 'das shing// kha dog dbyibs sogs dngos med pa// byang chub sems kyi dngos nyid kyis// yon tan med don mngon du 'byin// de dag sangs rgyas bstan pa'i sgo// sprul pa'i gnas rnams kun rdzogs pa'i// byin rlabs phrin las 'brel pa'i tshul// ji srid gnas kun bgrod byed pa'i// lam rnams rtog pa'i mtha' yas te// de dag snying po gsang ba'i gnas// bgrod med mnyam pas rdzogs par 'gyur// de ltar de bzhin nyid snang bas// de dag de yi kun spyod de// yul kun gnas kyi dmigs bral nas// zab mo'i cha nas spyod yul med// de nyid byang chub sems kyi rgyan// ma byung ma skyes 'gag med pa'i// chos rnam de las gzhan rnams su// dus kyis 'pho ba 'gyur med cing// nyon mongs tshogs kun ye shes nyid// de ni snying po gsang chen mchog/ phyi nang dus kun bde gshegs kyi// sa dang lam bral kun dmigs pas// thabs dang shes rab phyag rgya'i tshul// dus gsum gcig par 'gyur med zhing// ngo mtshar dkyil 'khor chen po nyid// sngon gyi de dang dus gzhan gyis// tha snyad mi rtog rgya chen po// 'od dag zab mo'i gnas dag tu// 'dren pa grol ba'i mthu mtshungs pa'o// de bzhin dbyings kyi 'od gsal gnas// dag pa'i ye shes sgra gnas 'jug/ me long nyi ma'i 'od snang bar// thams cad chos kyi ston par 'gyur// phyi nang gnyis tshogs gnas skabs kyi// rab tu zhen pas mngon rtogs chos// sku gsung thugs kyi dkyil 'khor las// byin rlabs snang ba 'gag med cing// dus kun rnam par zhen pa'i blos// de nyid chos kyi tshul bral bcas// kun gyis mnyam nyid gcig pa la// phyogs kyi cha nas mngon brtags pas// mi mthun gnas kun 'gyur med pa// rkyen dag glo bur mthus brtags pa'o// gdams ngag dam pa'i bdud rtsi nyid// gang byung rang gi gnas su rgyas// de dag sangs rgyas kun gyi mdzod// theg pa'i tshul 'dis mtshon par byed// ming tshig dgra la ma brten par// rang gi ye shes nyams med cing// theg pa mtha' dag mngon gsal ba// ma 'dres yongs su rdzogs pa nyid// kun nas zab cing rgya che ba'i// byang chub sems kyi rnam grangs kyis// thugs rje chen po nyid gsal 'gyur// da lta'i bde bas bde bsgrub pa// de bzhin dus kun mnyam pa'i ngang// las kyi stobs kun rdzogs pa'i mthus// de dag sngon 'dzin phyag rgya nyid// 'di ltar rgyu dang rkyen bcas pa'i// 'bras bu nye ba'i don bsgrubs pas// de dag gnas skabs dmigs pas 'chings// de nyid phyag rgya'i grogs gnyis te// 'di dang phyi ma ched 'dzin pas// rnam pa'i mtha' bcas skyon chen nyid// kun nas zhen cing lhag pa'i blos// de dag 'bras bu de bzhin nyid// theg pa kun las rnam grol ba'i// don mchog gsang ba'i rgyud chen te// dus gsum gcig pa'i rang bzhin du// sangs rgyas kun gyis gnas mdzad cing// phyag rgya gsang chen gnas rdzogs pa// sku gsung gnyis su med pa'i dngos// 'di ltar kun nas ma 'gags pa'o// rnal 'byor chen po'i rang bzhin la// khyad par bsgrub pa'i gnas med cing// don mthun rang gi stobs kyis rdzogs// 'dod pa'i mtha' bral lhun grub cing// de dag gnas kyi cha rgyas pa// tha dad med las kun tu snang// rgyu 'bras gnyis med theg pa yi// 'gro ba rnams kyi las kun gyis// bder bcas gnas kun spyod byed cing// thabs kyi bya ba kun 'phrul pas// srid gsum ye nas rnam par dag/ rang bzhin sbyor bar 'dod pa'i blos// mi 'gyur med pa'i chos spyod cing// tha snyad gsang tshig lhur len pas// snang ba'i spyod pa tshad med pa'o// 'di ltar khams rnams dag pa'o// sangs rgyas dkyil 'khor kun rdzogs pas// thugs rje snang ba rgya chen po// byin rlabs yul kun bstan pa yin// gdod nas rnam dag byang chub sems// dus gsum khyad par gsal ba yi// chos rnams rang bzhin snang ba'i mthus// byin rlabs gzugs sku la sogs pa'o// 'di ltar rtsol bas mngon 'dzin cing// dmigs pa'i nad chen sdug bsngal gyis// de las de dag gzhan du spyod// bltas pa'i don kun 'ching ba nyid// rnal 'byor dus la mngon brjod cing// phyogs bcas rnam pa'i mtha' bsgrub gang// rang bzhin ye shes gnas bral te// ji bzhin nyid kyi don la spyod// de dag 'dzin pas 'byung ba'i sgo// rab tu 'khrul pas 'gag 'gyur te// nam mkha'i chos kyis gzhan bsgrub bzhin// nges pa'i lung kun gtsor byed pa// de dag phyag rgya'i gnas 'jug pas// nam mkha'i bya lam ji lta bar// don gyi snying po ma g.yos pa'o// theg pa'i mtha' rnams brtags pa yis// sgro skur rtog pa'i gnas 'jug cing// yang dag don gyi snying po nyid// gzhan pa'i gnas kun 'gyur mi srid// kun tu yul dang bral ba yi// phyi nang yul rnams ye shes de// zab mo cha shas ji bzhin du// gtan tshigs rtogs yul gnas bcas la// de dag rang bzhin ngo bos stong// gdod nas rnam dag dngos med pa'o// thams cad ming tsam mtshon byed pa'i// tha snyad log pa'i stobs rgyas pas// ting 'dzin mnyam pa'i yul kun dang// rab tu zung 'jug sgrub byed pa'o// phyogs rnams kun nas chos mthun pa'o// dbang bskur byin rlabs gsang sngags dang// phyag rgya ye shes gsang ba nyid// de dag goms pa'i mthu mtshungs pas// gsang ba'i sku gsung thugs mchog grub// yul dang yul can ltos pa'i gzhi// tha snyad ming las don kun gyi// de dang der ni rnam brtags pas// de dag kun 'byung zag pa med// phyi rol de bzhin nang de bzhin// de dag gnyis med ye shes nyid// phung po khams dang skye mched dang// tha snyad kun tu brtags pas stong// gcig dang du ma'i rang bzhin du// thams cad mkhyen pas kun gsal mdzad// mi shes 'khrul pa gcod byed cing// bde chen rang bzhin kun gyi gnas// kun tu 'di dag mnyam rdzogs pa'i// sku gsung ye shes chen por sbyor// mnyam nyid ye shes khyab byed pa'i// khyab bya'i rdzas rnams dkyil 'khor dang// mi shigs gsang ba'i sngags brjod pas// sgra yi brjod pa'i rgyun bzhin 'jug/ mi g.yo bas ni snang ba yi// rnam 'phrul dkyil 'khor rgyan gyis mdzes// phyag rgya'i 'khor tshogs mnyam sbyor zhing// kun tu bskyed med ye shes kyis// zab mo sngags rnams brjod par 'gyur// snying po dam pa ye shes de// kun nas len cing 'dzin bral bas// mtha' bzhi las grol dbu ma nyid// gang dang gang du lta byed cing// spyod pas yul kun longs spyod rgyan// mi shigs thig le mnyam rdzogs pa'i// sa gsum rab tu gnon mdzad cing// phyag rgya chen po che ba nyid// tha snyad gang gis ston byed pa'i// 'bras bu'i dkyil 'khor mngon rdzogs pa'i// de dag kun nas brtags pa'i yul// ming tshogs sgra yis mtshon byed pa'i// 'bras bu mnyam rdzogs ji bzhin du// gang dag gang gnas mngon zhen cing// gang gis gang la mnyam sbyor ba// yul kun rnam par sbyor byed pa'i// de dag gang du mi gnas pa'o// kun nas las kyis 'khor ba yi// chos kyi tha snyad tha dad kun// ma skyes mi g.yo mnyam pa'i rgyan// rab tu brtags pa'i spyod bral chos// cho 'phrul chen po rnam 'char zhing// rang bzhin mi gnyis rtogs pa'i mthus// de dag gnas rnams sangs rgyas zhing// rten gyi dkyil 'khor kun spyod pa'o// brtul zhugs phyag rgya'i bsam gtan dang// drag shul gnas kun phrin las kyis// kun nas mngon par sgrub byed pa'i// gnas su bya ba'i ming med cing// byang chub 'khor ba mya ngan 'das// sgyu ma bde chen lhun gyis grub// de dag yon tan ma 'gags pa'i// gtan tshigs tshad mas kun brgyan cing// tha dad rnam rtog yul dag pa'i// sgyu ma chen po'i dkyil 'khor rdzogs// rang bzhin gcig tu ma nges pas// khams gsum sa las grol byed pa'i// don mthun theg pa bsam yas pa// de dag bya ba'i sgo rnams kyis// 'bras bu'i phyag rgya gsal mdzad cing// nyon mongs sgrib tshogs spangs pa'i mthus// theg chen ye shes sgrib med pa'i// snod 'di rnam par gsal bar 'gyur// sangs rgyas kun gyi bstan pa'i sgo// rdzogs chen byang chub sems kyi mchog/ de dag kun nas ston byed cing// ji ltar dmigs pa'i rtags snang 'di// rang bzhin mnyam nyid gnas la ste// byin gyis rlabs kyis kun ston pa'o// kun 'byung re rtsol sgrib chen gyis// nyon mongs gnas kun bskyed byed cing// phung po khams dang bcas tshogs brgyad// de dag kun nas chags pa'i yul// mi gnyis don kun rtogs pa yi// bya ba chen po'i mthu rdzogs pas// snang 'dod rtsol chen kun 'dzin pas// don kun gnyis med theg pa'i mtshan// de dag rang bzhin rnam snang zhing// mi rtog lhun grub bde chen nyid// 'di ltar kun nas brtags pa yi// sgrib pa'i skyon chen goms pa'i mthus// yul kun mtshan mar skyed byed cing// de dag gnas kyis rmongs par 'gyur// byang chub yan lag brgyad dang bcas// mtshan bzang dpe byad kun rdzogs shing// thams cad gnas kun rdzogs longs spyod// rgyan dang cha lugs sna tshogs pas// dkyil 'khor gsang ba'i lha rnams kun// mi gnyis longs spyod bde rdzogs shing// sprul bcas 'jig rten rnam par dag/thabs dang shes rab rdzogs pa yi// yang dag sbyor bas kun 'jug cing// de dag cha lugs rnam mtha' yas// zhing khams chen por kun sbyor zhing// phyag rgya gsang chen rigs kyi bdag/ ye shes byin brlabs che gnas lags// kun tu bzang po che gnas mdzad// de dag ji bzhin don kun gyis// rang bzhin rdzogs chen bstan par byed// kun nas mngon par zhen pa'i shugs// bsgom chags yul gyis 'ching 'gyur zhing// ji snyed chos rnams rang bzhin las// rtags pa'i gzugs brnyan skye bar 'gyur// zhes gsungs so// rdzogs pa chen po chos nyid byang chub kyi sems rin chen bkod pa rnam par dbye ba'i rgyud las/mtha' thams cad rnam par dag pa'i le'u ste lnga pa'o//// rdzogs pa chen po chos nyid byang chub kyi sems rin chen bkod pa rnam par dbye ba'i rgyud ces bya ba rdzogs so// rgya gar gyi mkhan po shI len+d+ra mi tra dang/bod kyi lots+tsha ba 'dzing gsal 'bar gyis bsgyur cing zhus te gtan la phab pa'o////

CLOSE WINDOW