CLOSE WINDOW

Gpb009.003
བོད་ཡིག

phyis skad gsar bcad kyis kyang bcos so//// rgya gar skad du/ rat+na tsakra kU Ta tan+t+ra nA ma/ bod skad du/ rin po che 'khor lo brtsegs pa'i rgyud ces bya ba/bcom ldan 'das bde chen brdal ba'i pho brang rig pa zang thal gyi gzhal yas khang na bzhugs pa'i sku bde ba chen pos nyid la nyid kyi gzigs nas snang ba zag pa dang bral ba zhes bya ba'i ting nge 'dzin la snyoms par zhugs te/zhugs ma thag tu rang snang dag pa'i bde bar gshegs pa rnams dang stong gsum mi mjed kyi 'jig rten gyi khams mtha' yas mu med pa ma lus pa dang/ bdag nyid rang snang gi 'khor thams cad dbyer med de/bdag nyid kyi mtshan nyid las byung zhing de dag thams cad rang nyid yin pa dang/ rang gi cho 'phrul las byung ba'i 'khor rol pa'i mtshan nyid don thugs su chud pa'i tshul de yang rang gi chos nyid du shes par bya ba'i phyir rang gi ngo bo la gzigs te/gsang ba ye shes kyi mthongs bsal te/ ma rig pa'i lcibs phyung nas rig pa'i ye shes kyi bde ba chen po'i don la gsal bar phyung ste/ 'khor ba dang mya ngan las 'das pa'i don ci ltar yin pa dang/ snod bcud 'dzin pa'i don ji lta ba yin pa mtshan nyid tha dad kyang rang gi rgyan du snang bar byas nas/ rang gi ngo bo dang rang bzhin dang/ rang gi spyod yul 'jig rten gyi khams mtha' yas mu med pa thams cad rang gi mtshan nyid dbyer mi phyed pa'i lhun gyis grub pa'i chos nyid yin pa dang/de nyid kyi shar lugs las bde bar gshegs pa'i sku dang ye shes kyi snang ba rnam par dag pa 'byung ba dang/de nyid ci ltar yang sprul zhing sku gsung thugs ye shes lnga'i rang bzhin cir yang ston cing/ chos nyid don la g.yo ba med par gyur pa dang/ ma nges pa'i 'ja' tshon ltar cir yang gsal bde ba'i dus na yang byang chub sems rig pa dbyer med rang gi ngo bor 'dug te gzhan du ma mthong ba'o// de nas nyid kyi rang bzhin las ngo bo nyid kyis 'di skad ces gsol to// lhun gyis grub gzhi ye shes don// rang snang gzhir shes ye sangs rgyas// mtshan nyid so sor ston par mdzad// nyid kyi thugs te ye sangs rgyas// gang gis sangs rgyas ma rig pa// rang gi sems nyid rang gis bsgrib// sgrib g.yog mthong na sgrib pa dag/ bdag gis sngon chad sgrib g.yogs mthong// mthong med mthong las 'das dang bral// rig pa 'gyur med ye sangs rgyas// yang dag nyid du nga yis mthong// de ma thag tu bde don rtogs// rtog pas rin chen nyid las 'dus// thugs kyi gter mdzod gteng du bklubs// rnal 'byor chen po gang dag gis// rtogs par nus pa byung gyur na// thugs kyi nyi zer spro zhing bsdu// kun gyis rang rig rtogs gyur nas// kun kyang gcig ste lhun grub ste// snyad nyid na'ang gzhan ma grub// ma grub don de rtogs par dka'// kun gyi spyod yul ma yin te// kun bzang dgongs pa gting mtha' med// rig pa'i rdo rje bshig par dka'// thams cad mkhyen pa'i ye shes ni// dmigs gtad med cing mnyam pa'i ngang// de nas g.yo bar ma gyur na// kun bzang dgongs pa de kho na'o// bde ba chen po zag pa med// ma spangs rang grol don gyi gter// gang yang spang du med na bde// spang blang med pa'i don rtogs na/ rig pa 'gyur med rgyas btab nas// rgya las mi 'da' g.yo med na// mtshan nyid tha dad don du gcig/byang chub sems kyi mtshan nyid ni// sems can kun gyi mtshan nyid de// ye nas 'dzin pa'i dri ma dag/ bde chen klong du ye nas grol// zag pa med cing rang bzhin stong// bde chen spros bral zag med la// dag pa'i sems med ma dag med// 'di 'dra med cing rtog pa med// zhing khams dag kyang yod ma yin// med tsam nyid nas sna tshogs 'byung// mtshan nyid mi 'gyur g.yo ba med// gnyis min gnyis ni tha snyad bral// mi gnyis pa nyid gnyis med spyan// lhun grub ma 'gags kun tu gsal// e ma ho bde ba chen po'i rang bzhin ni// yang dag par ni kun bzang gi// sku gsung thugs las g.yo ba med// sems can gyi lus ngag yid gsum/ khyad rdul tsam yang med cing 'dra// rang snang mtshan nyid tha dad 'dug pa'o// 'dug tsam nyid nas rang gi cho 'phrul te// cho 'phrul chen por rang shar bas// mtha' la mi gnas pa zhes bya'o// mtha' thams cad rab tu 'dus pa zhes bya'o// 'du 'phro sems su shar ba'o// mtha' yas gcig tu snang ba 'o// gcig tu kun tu shar ba'o// gzhi 'dzin pa yi rig pa'o// bkag pas mi kheg pa yi ye shes la// bslad pas mi bslad pa yi chos sku'o// thams cad mkhyen pa'i sprul sku la// mnyam pa chen po'i 'bras bu'o// dngos po mtshan ma med pa'i chos nyid la// dmigs gtad gang la'ang bcar med pa'o// bstan med lung bral chos nyid ni// rang bzhin ma bcos pa yi 'du 'phro ste// rang las byung ba'i cho 'phrul mi 'gag pa// bden rdzun shar ba'i snang ba dang// thams cad bden rdzun med pa yi// byang sems kun tu bzang po'o// nyag gcig gi chos nyid do// zhes nyid la nyid kyis gsungs pa'o// rin po che 'khor lo brtsegs pa'i rgyud las/ gleng gzhi grub tshul dang bcas pa'i le'u ste dang po'o//// de nas yang nyid kyi rang bzhin bde ba chen po'i don la nyid kyis zhus par/ e ma ho gang 'dod pa dang bcas pa la ni/ mtha' rang gis ma bsgribs shing ma grub pa'i don ci ltar yin zhe na/bdag mtha' med pa'i chos nyid la// g.yo ba med par gang gnas pa// ma skyes pa yi chos nyid yin// dngos po sgyu ma ltar shes na// dngos med don nyid rang sar gol// kun tu bzang po'i dgongs pa ni// mtshan ma gang yang bri thob med// sems kyi rang bzhin nam mkha' 'dra// thams cad 'byung bzhi rin po che// dngos su mi snang phyogs dang bral// phyogs bral don la phyogs su byung// ma skyes pa yi chos nyid la// phyogs kyi tha snyad gang la 'dogs// rten dang bral phyir gdags gzhi med// nam mkha'i snang ba gting phyin na// gser gyi re thag rtod phur grol// 'byung ba rlung chen mkha' la dngas// 'od gsal chen po zung du 'jug/rgya chen 'od gsal yang pa bde// dngos po'i mtshan nyid rnam par dag/ sgyu ma'i gzugs su rmi lam nyid// rtog pa med la ban bun tsam// de nyid mi rtog dgongs pa ste// rang gsal shes pa'i chos sku ni// rang gsal yin phyir rtsol byed bral// snang ba kha yid khog stong la// rnam shes bun ne ling nger bzhag/ gang la bzhag pa rang na bde// bde bar shes na mi bde med// shes shing rtsol na sdug bsngal yin// zhes gsungs so// rin po che 'khor lo brtsegs pa'i rgyud las/ nyid kyi dgongs pa rnam par dag pa'i le'u ste gnyis pa'o//// de nas yang nyid kyi rang bzhin gyis nyid kyi ngo bo la rang bzhin gyis che ba'i don bstan pa'i phyir/e ma ho ngo bo nyid bde chen po/ 'byung ba nam mkha'i snang ba la ye shes kyi 'od chen po shar zhing rtsi shing nags tshal du 'khrungs pa dang/ skye 'gro gzugs su snang ba thams cad rang bzhin kun tu bzang po'i rtsal du rang shar ba yin te 'dus kyang rang rig pa kho na'i tshul du 'dus so// snang ba rgya yan la sems kyi me long rang gsal yang sems nyid rin po che'i sgron ma rang gsal bas rang la ngo bo nyid kyi rgyur rdzogs shing ye shes kyi snang bar lhag ge 'dug pa'o// sems nyid rin po che lta bu'i don rtogs na me long gsal ba la byi dor byas te g.ya' dag pa'i rang bzhin du snang ba ltar rang bzhin gyis rnam par dag pa la snang ba kun mkhyen du rang shar bas thams cad mkhyen pa'i ye shes kho na'o// 'khor 'das thams cad kyi rang bzhin chos nyid kun tu bzang po yis khrog brlag med cing dbyings stor bas 'khor 'das kyi stor sar mi 'gyur ba'i dbyings zhes bya'o// stor tsam nyid na yang sangs rgyas kyi zhing dang sems can gyi lus ngag yid gsum sku gsung thugs dang bcas par de nas byung ba mi zad pa'i mdzod chen po zhes de la bya'o// chos nyid thal byung dkyil 'khor du mngon du byung ba'i rig pa ma btsal bar shar te thams cad mkhyen pa'i sprul par rol zhing mdzad pa thams cad mi 'gog cing sku gsung thugs kyi rol pa ji tsam du shar ba nyid ni lus ngag yid gsum gyi spyod pa las ma g.yos pa'o// sangs rgyas sems can gnyis su brjod kyang bdag nyid chos sku nyag gcig la dbyer med do// de nyid kun tu shes pa rang gsal lo// mi gsal ba gcig byung na yang mi gsal bar brtags pa nyid kyang rang gsal lo// ngo bo nyid bde ba chen por rang gsal nyid du rang gnas pas/ ma gsal ngo bo gang yang med// 'od zer nyi chen 'bar ba ltar// rig pa'i 'od zer kun tu khyab// de nyid byang chub sems chen po// don ldan rnal 'byor chen po bas// ngo bo nyid la yang mi gnas te// thams cad thams cad dbyer med sems// sems kyi mtha' la sems mi gnas// zhes gsungs so// rin po che 'khor lo brtsegs pa'i rgyud las/ rang bzhin gyi le'u ste gsum pa'o//// nyid kyi rang bzhin gyis khyad par chen po gsungs pa/e ma ho ngo bo bde ba chen po snang dang mi snang chos rnams thams cad rang gsal nyid du mngon byung bas/ 'khrul rtog gi gting phyin te kun brtags kyi 'khrul pa ye nas med do// de phyir ma nor ba'i chos nyid ni/rang gsal gang la yang ma ltos pa nyid yin no// de nyid thams cad du rang sprul pas sprul pa'i sku zhes kyang bya la/ rang la rang snang dag par longs spyod pas longs spyod rdzogs pa'i sku'o// de'i dus su snang gzhi gang du yang 'gog pa med pas mi g.yo ba chos kyi sku'o// 'gyur med kyi shes pa la snying po med pa ni/ rtog mtha' dang bral ba ste rang byung gi ye shes so// rnam par shes pa rlung la rgyu ba'i dus na rlung 'pho ba med pa ni/rgyun mi 'chad pa'i bsam gtan no// 'byung ba med pa'i sngon rol du rang byung gi gdangs shar ba ni/ gsang ba 'gag med kyi nam mkha' la/ kho na rig pa ma 'gags par shar ba'o// chags sdang gang la yang ma chags pa'i dus nyid na dug lnga ye shes kyi lam du byung ba ni/ da lta nyid du chags sdang rgyud la rang chas su snang ba yin no// 'khor 'das gang du yang mi snang ba'i dus nyid na yang chos nyid gzhir grub pas// chos sku rang chas su gsal ba'o// gsal ba'i ngang la bstan nus na// 'khor ba'i gting nas bzlog pa ste// de nyid byang ba dang bcas shing// rlung 'ba' zhig gis bskyed pa ni// 'khor bar 'gro ba'i 'dre ma lha ste/ rlung 'byung ldog gis 'khor ba'i lam 'dren cing ye shes kyi me gsod pa'o// de phyir btang snyoms mi bsgrim/ byung tshor glod la bzhag go// rin po che 'khor lo brtsegs pa'i rgyud las/rang bzhin khyad par gyi le'u ste bzhi pa'o//// de nas yang nyid kyi rang bzhin gyis ngo bo bde ba chen po la bka' stsal pa/ gzhi 'dzin cing rtsal 'char ba'i byang chub sems ni/'khor 'das gang yang rgya ma chad la gang gis kyang gtan la phebs pa dka' ste/ de ci'i phyir zhe na/ dngos por ma grub cing sna tshogs su 'byung bas rgyu rkyen dang bral te snying po med pa'o// de yang ni rang gi rig pa'o// sngon rol du rig pa'i ye shes su mkhyen zin te// don ma rig pa'i gnas skabs tsam gyis kyang bar ma chad de/ rig pa thod rgal du sangs rgyas zin pa'o// dug rnam pa lngar snang yang ma 'khrul pa'i yang khong du ye shes kyi rang bzhin du gsal bas dug lnga ma spangs par rang dag zin pa'o// da lta 'khrul pa ltar snang ba yang ngo shes shing rtogs pas grol ba yang sngar gyi rang sa'o// snang ba dang mi snang ba'i chos thams cad kyang rig pa'i klong chen por phebs na/mnyam pa nyid rang rig pa'i klong lam chen po las ma byung ba'i chos ni gang yang med pa la/ sems kyi snang tshul bsam gyis mi khyab pa yang/ rig pa nyid kyi rtsal las byung zhing gzhan med de/ bde bar gshegs pa'i rigs thams cad dang/ rigs lngar gyur pa'i sangs rgyas dang/ yab yum sras dang bcas pa'i 'khor phun sum tshogs pa yang/ rang gi rig pa'i rtsal dang de ru byung ba las gzhan med do// rgyu rkyen nus pa'i mthu ru snang ba nyid kyang/ byang chub sems kyi cho 'phrul yin te/ snang ba thams cad rang gi rig pa byang chub kyi sems/ yul sems dbyer med par thams cad mnyam pa nyid kyi rang bzhin du gyur pa/rig pa rang gi ngo bo brjod pa dang bral ba'i mthus gsang ba rnam gsum gyi dkyil 'khor du gyur pa thams cad mi 'gal bar rang las byung ba/ ye shes kyi snang ba dang/yul gyi snang gzhi dang/ mngon par shes pa'i rdzu 'phrul nam mkha' ri brag g.yang sa gang la yang thogs pa med par 'gro ba dang/ sprul pa sna tshogs ji ltar 'tshams pa bzhin du sprul nus pa dang/gsung dbyangs yan lag drug cu'i sgo nas bstan pa rgya mtsho sgrogs pa dang/ khams mang zhing rgya che ba'i stong gsum thams cad kyang phyogs med rig pa'i ye shes rang shar ba'o// snang zhing srid pas bsdus pa'i chos thams cad rig pa rang byung gi ye shes kyi mthu las gyur pa'o// rig pa 'gyur med kyi shes pa rlung gi rtas bskyod cing snang ba ni/ gang du yang 'char te ci srid 'khor ba'i chos dang mya ngan las 'das pa'i zhing du yang 'char du rung ba ni rtsal nyid do// rig pa nyid chos thams cad la dbye bsal med pa ni/ yongs su rdzogs pa'i chos nyid do// rang bzhin gcig las ma g.yos par rang snang cir yang 'gyur ba ni sangs rgyas nyid kyi sprul pa'o// rig pa nyid cir yang 'char ba mi 'gag pa la skye ba med pa'i rgyas theg pa ni mi skye ba lam 'gags pa'o// sna tshogs su snang yang rig pa'i cho 'phrul las byang chub sems ni gzhan du skye ba'i sa med do// snang ba thams cad ye sangs rgyas pa yang rig pa rang gi stobs kyis shar ba'o// lhun gyis grub pa'i chos nyid la ni/ snang rtags gang du yang ma phye bar gsal la dbyer med pa'o// chos nyid bde ba chen po bsam rtog dang bral bar cir yang snang ba ni/ rig pa byang chub kyi sems gzung du med pa'i chos nyid do// de nyid bde ba chen po'i don du nyams su myong zhing gsang ba bla na med par grub pa ni ye sangs rgyas pa zhes bya'o// rin po che 'khor lo brtsegs pa'i rgyud las/ khyad par chen po'i le'u ste lnga pa'o//// de nas yang nyid kyi rang bzhin gyis don gsang bar gsungs pa/ e ma ho// ngo bo bde ba chen po rdzogs pa chen po'i rnal 'byor pas ni rtsol ba thams cad ma spangs rang sar dag cing don thams cad rang la 'dus par shes par bya'o// gzhan gang du yang sems bskyed cing 'jug par byed pa ni nyid las gzhan du ring par shes par bya'o// rgyud kyi dam pa ni sems kyi dngos po gzhi rig pa rang la brten nas don thams cad sdud pa'o// dngos grub thams cad kyang rig pa rang gi bslab las byung ba'o// sangs rgyas thams cad bskyed cing bgegs dang rtog pa thams cad rang gis rang gzhom pa'o// mchog dang mchog ma yin pa'i 'dod pa thams cad nor bu rin po che rang rig pa las 'phel ba'o// yon tan ma lus pa'i tshogs thams cad gsang ba mchog gi rang bzhin no// 'jig rten dang 'jig rten las 'das pa'i bdag nyid ni chos thams cad mi phyed pa'i rang bzhin can no// rig pa byang chub kyi sems ni sngon gyi rgyal ba kun gyis myes chen po yang yin/da lta nyid kyi sku gsung thugs kyi bdag nyid kyang yin te mi zad pa'i 'khor lo thams cad rang la bskor ba'o// de nyid kyang rang snang gzhan du mi gnas pa ni snang ba rgya yan chen po zhes bya ste yang dag par rdzogs pa'i sangs rgyas rnams kyi thugs rig pa'i ga'u nas 'od gsal chags pa med par rang snang zhing chags pa med par 'dug pa'o// dran pa dang rig pa cir gsal thams cad ma bkod bzhin rig pa rgya yan pa'o// rig pa lhun gyis grub pa'i chos nyid la ni gang du bsams shing brtags pa las 'das pa'o// de yang nyid kyi spyod yul ni/ de nyid mu stegs nas gsang chen man chad du rang shar ba'o// gsang ba chen po sgra skad du ji snyed par sgrogs pa yang gsang ba chen po'i lam yin te gang du yang rang las gzhan du thos su med pa nyid do// rang gi rig pa gsang ba nyid chos kyi skur ngo snyoms pa ni kun gyis ma rig pa'o// sems nyid kun la khyab cing chos sku rang gsal ba nam mkha' dang nyi ma lta bu'o// lhun gyis grub pa'i chos nyid la rang byung ye shes kyi sku lngar rdzogs pa ni/rig pa nyid kyi snang gzhi mi 'gog pa'o// snang srid 'byung lngar shar ba yang rang byung ye shes chen po'i yon tan no// 'byung ba thams cad kyi snying po'am bcud du gyur pa ni sems nyid dag pa chen po'i dgongs pa nyid do// snying po de nyid shin tu btsal dka' ba'i don yin te gzhan las mi rnyed pa'o// gang zhig dang du blang zhes kyang 'byung ste rang nyid yin pas so// skye gnas rnam pa bzhi'i yul dang rgyud lnga'i 'khor ba'i sems can thams cad kyang 'dzin pa rang gi rlung log pa la snang ba'o// 'dzin pa'i dri ma nyid dri ma nyid kyis kar dag pa'o// 'jig rten gyi khams yang dag par rdzogs pa'i sangs rgyas 'das pa dang ma byung ba dang/da lta bzhugs pa thams cad rig pa'i rtsal las ma byung ba'i chos skad cig tsam yang med pas/ rig pa gcig pur 'dus pa ni nyi ma'i zer bzhin no// de nyid kyang chos kyi sku bde ba chen po'i ngang las 'da' bar mi byed cing thabs kyi cho 'phrul cir yang ston pa'o// stong pa nyid na yang gcig la kun 'dus pa'o// dgongs pa rang bzhin gyi klong nas mi bskyod pa'i rlabs rang gsal ba'i ting nge 'dzin nyid do// rin po che 'khor lo brtsegs pa'i rgyud las/ don gsang bar bstan pa'i le'u ste drug pa'o//// de nas yang nyid kyi rang bzhin gyis gsang ba skyon dang bral ba'i don gsungs pa/ e ma ho// ngo bo bde ba chen po dug lnga la spyod pa'i gang zag la ni bcas bcos gang yang byar med de/ 'dam gyi mun khung na pad+ma'i me tog rang 'bar ba la ni bzo yis bcos su med pa'o// gsal byed kyi nyi ma shar ba las 'ja' tshon gyi 'od bkra ba la ni sus kyang bsal du med pa'o// dug lnga'i snying po la ye shes kyi mar me gsal ba ni nga rang nyid kyis kyang bsal du med pa'o// lhun gyis grub pa'i chos nyid mi 'dod pa'i 'dod chags chen po rang shar nas rtog pa'i mtshan ma zhes stong pa'o// mtshan rtog dbyer med par chos nyid kyi klong na nyal ba ni mi 'byed pa'i gti mug chen po de'o// de las gzhan gyi spros pa bcad pa ni gzhan na med pa'i nga rgyal te/rang las gzhan du rtog pa'i blun pos blta ba la phrag dog pa ni gang gis kyang spang du med pa'o// dug lnga lam du khyer ba ni/ 'bras bu chig chod kyi sa pa ste ye shes chen po'i rang bzhin du khyab gdal ba'o// ye shes chen po'i klong ni thams cad kyi 'byung gnas sam 'byung gzhi ste rgyu rkyen 'bras bu gang yang ma 'gags pa'i sa'o// thar pa'i lam ni thams cad nas thams cad du 'byung gzhi ma 'gags pa thams cad la bya'o// e ma ho bde ba chen po sangs rgyas dang byang chub sems dpa' thams cad kyi 'byung gzhi ni rig pa mi 'gag pa ste// dus der byang chub kyi sems skyes so cog ji srid 'khor ba'i chos su snang ba yang de nyid do// phung po dang skye mched rnam par dag pa'i byang chub sems dpa' dang/ nam mkha' dang mkha' dag pa'i rgyal ba thams cad kyang rig pa rang gi mthong snang rnam par shar ba'o// sa dang lam tha dad par bgrang ba ni blo chung ba'i gang zag ste nam mkha' la stegs tshol ba dang 'dra'o// rkyen 'gyur las kyi dbang gis so sor snang ba ni nam mkha'i zla ba dang 'dra'o// yan lag gang yang med par sna tshogs su 'gro ba ni rlung yid kyi shugs can no// rtogs pa'i blo dang ldan pa ni sangs rgyas nyid ky-i dgongs pa'o// 'dod pa'i longs spyod thams cad kyang rang gi rgyan du shar nas rang la rang rol pa'o// chags pa dang bral ba'i bde ba ni/ yid mi dmigs pa'i yid la gnas pa ni shes rab dam pa'o// sems brtags par dka' zhing cha phra la zag pa med pa ni bde ba chen po'o// rang gi sems dri ma dang bral zhing ka dag gi ye shes la ni kun mkhyen gyi sangs rgyas dang sems can gyi thugs sems la dbyer med do// 'di las ma byung ba'i sangs rgyas dang sems can gang yang med do// e ma ho ngo bo bde ba chen po yang dag par rdzogs pa'i sangs rgyas ni 'di bzhin shes par bya ste snang ba mi dmigs pa'i lus kun tu sprul pa ste sku rang la bzhugs shing gsung smra brjod med pa'i zer la rol cing thugs mi 'gyur bde ba'i dbyings ni rgya khyon med par nam mkha' dang 'dra ba'i sku gsung thugs so// de ci lta bar rang bzhin shes pa kha yan nam mkha' dang mnyam par rang bzhag na de kho na nyid nyams su myong ba yin no// ris su ma phye bar bzhag na yang de kho na'o// don dang ldan pa'i rnal 'byor la ni gang gis kyang mi 'gog pa'o// rang snang gi gdangs nam mkha' la shar ba ni g.yo ba dang yid kyi rang bzhin no// 'byung ba lnga so sor ma 'dres pa ni/dngas ma chen po lnga'i rang bzhin te/ ye shes lnga'i rang bzhin no// yang dag par rdzogs pa'i sangs rgyas kyi mi gnas pa'i sku'i 'od kyis kun la khyab pa ni nam mkha'i dngos su gsal ba ni de kho na'o// rang gi sems nyid ci ltar snang ba ni nam mkha' kho na bzhin no// nam mkha'i cho 'phrul la ci ltar shar ba yang/ sems nyid mi 'gag pa'i cho 'phrul dbyer mi phyed pa'o// bar snang yangs pa'i rang bzhin yang sems nyid gang du yang go phyed pa'o// gsung smra brjod dang bral ba'i rang bzhin las mtshan ma mi 'gag pa'i ye shes rol pa'o// bar snang la 'ja' tshon gyi ri mo so sor gsal ba yang sku dang ye shes mi 'gag pa'i rnam 'phrul shar ba'o// bde bar gshegs pa'i sku gsung thugs kyi rang bzhin ni sems can gyi lus ngag yid gsum nyid la yin de nyid ni mkha' dang go mnyam par 'dug pa'o// yang dag par rdzogs pa'i sangs rgyas kyi sku ni rang gi shes rig yul du 'byor ba las byung ba'o// 'byung ba dang 'byung ba las bskyed pa'i sku gsung thugs rnam par dag pa thams cad dang rgyud lnga 'khor zhing sems can thams cad kyang shes rig yul du snang ba las byung ba'o// stong gsum mi mjed ma lus pa thams cad kyang sku gsung thugs kyi rang bzhin cir yang ston cing 'jig rten dang 'jig rten las 'das pa'i chos thams cad la mnga' mdzad cing nyid la nyid kyis longs spyod rtag tu mdzad pa'o// mdzad tsam nyid na yang pad+ma'i me tog bzhin no// rin po che 'khor lo brtsegs pa'i rgyud las/ gsang ba skyon dang bral ba'i le'u ste bdun pa'o//// de nas yang nyid kyi nyid rang bzhin gyis nyid kyi ngo bo las rig pa'i ye shes kyi don bstan pa/ e ma ho ngo bo bde ba chen po rang rig pa'i ye shes rang la shar ba la ni 'dzin pa'i rlung log pa zhes bya ste/gzung 'dzin dag pa'i sku gsung thugs zhes kyang bya ste/ yang dag par rdzogs pa'i sangs rgyas kyi thugs mi rtog pa'i ye shes kyi shes pa rang gsal de kho na'o// rnam par grol ba'i phung po la skye ba med pa'i chos nyid kyi ye shes so// gzung 'dzin rnam par dag pa'i chos nyid do// de la rig pa rlung gi snying po can rlung kun tu 'phyo ba'i yid can no// 'khor ba kun 'dus kyi bdag nyid yod pa dang snod bcud kun gyi bdag nyid du gyur pa'o// de nyid snying po rang sa zin pa ni/ rig pa khong stong ste gar yang 'jug pa'i rgyu med de lhun gyis grub pa'i rig pa zhes bya'o// kun gzhi stong pas ye shes su gnas gyur pa zhes bya'o// snying po med pa'i ye shes la chos sku rang gsal zhes bya'o// med pa'i ngang la sku dang ye shes sna tshogs cir yang 'byung bas kun tu khyab pa zhes bya'o// e ma ho bde ba chen po dus gsum gyi bde bar gshegs pa thams cad dang skye 'gro gzugs su snang ba thams cad ni shes pa chos sku rang gsal ba las ma byung ba gcig kyang med de/de phyir rig pa'i ye shes su ma gyur pa gang yang med pa ni kun tu bzang po'i dgongs pa me klong chen po zhes bya'o// kun tu snang bar mdzad pas/ rnam par snang mdzad ces bya'o// rnam par snang mdzad kyi ye shes chen po ni cir yang sprul zhing gang du yang 'gyur pas kun tu 'gyur ba'i rig pa'o// ye shes lnga las gyur pa'i chos nyid la sku 'gag pa med par rol pa la rang bzhin 'gyur ba med pa ni/ rtag pa chen por bzhugs pa'i chos nyid do// dbyings mi 'gyur ba la thugs rje'i rol pa ni cir yang snang ba'o// snang tsam na yang de'i rang bzhin nges pa med pa'o// rol pa chen po'i chos nyid la mdzad pa ni cir snang yang sku'i cho 'phrul du ston la ma nges pa'i cho 'phrul cir yang ston no// rol pa chen po'i cho 'phrul gyi sku cir yang snang ba la longs spyod cing rtag par bzhugs pa ni spyod yul thams cad du rang shar ba'o// 'jig rten pas bsdus pa'i chos thams cad de bzhin gshegs pa'i dgongs spyod rgya che ba'i zhing ngo// sems las ma byung ba'i chos ni rdul tsam yang med do// sku gsung thugs kyi snying po rig pa byang chub kyi sems so// sems cir yang snang ba'o// snang ba nyid na 'gog pa med pa'o// sems cir yang bstan pa'o// bstan tsam nyid na ther zug pa gang yang med pa'o// sems zad mi shes par bstan pa'o// bstan tsam nyid na zad pa'i rgyu med pa'o// theg pa'i rim par bgrang ba'o// de'i don bstan pa yang rim pa bzhin du bstan pa'o// rig pa nam mkha' la zad mi shes par rol pa'i cho 'phrul ni rig pa rlung la rgyu ba'i cho 'phrul lo// don du gang du yang phyin pa med cing gang du yang song ba med de 'das pa'i yul du ltung ba'i sa ni rig ma rig ngo bo gcig la rkyen gnyis so// rkyen gyur las kyang thugs rje'i dbang gis yul dang yul can sogs kyi rkyen gyis mi phye yang rig pa'i ye shes la las dang las las byung ba rang yang med de rgyu rkyenalas las ma byung ba'i shes pa chos sku rang gsal du gdod nas gnas pa'o// de las yengs pa'am brjed pa'i tshul gyis ni 'khor bar 'khyams pa yin pa la dran pa'am rig pa'i ngo shes pa'i tshul gyis ni mya ngan las 'das pa'o// de yang gsal byed kyi rlung dang sgrib byed kyi rlung rgyu ba phra mo las 'gyur byed kyi rlung dang shes byed kyi rlung rgyu ba sbom por byung ste/ de las zhi byed kyi rlung dang rtsub bsnol gyi rlung cha rags par byung bas 'khor 'das gyi dmigs phye ste rkyen ni rig ma rig kho na'o// rig pa'i ye shes ji lta ba thams cad mkhyen pa dang ji snyed pa kun mkhyen pa ni mya ngan las 'das pa'i ye shes so// lhan cig skyes pa dang kun tu brtags pa'i ma rig pa ni dug lnga 'khor ba'i rkyen gyi rgyu'o// rkyen gyis rkyen byas 'bras bu sdug bsngal du byung ba ni/ shing rta'i 'phang lo'am/ zo chu'i khyud mo ltar 'khor ba'o// e ma ho bde ba chen po des na 'khor 'das ni ngo bo gcig la rkyen gnyis kho na'o// rang bzhin gcig la snang ba gnyis kho na'o// mtshan nyid gcig la yul gnyis kho na'o// gcig tu shes na ye shes de kho na'o// byung sa shes na phu thag chod pa kho na'o// phu thag chod na 'gro sa med pa'o// 'gro sa med na g.yang sa bral ba'o// g.yang sa med na 'pho 'gyur med pa'o// de ltar shes na rtag chad bral ba'o// bral bar shes na ma bral med pa'o// ma bral ba nyid na bral ba med pa'o// bral dang ma bral kun tu khyad med pa'o// e ma ho bde ba chen po mi gnas pa'i chos nyid la/ gnyis su 'dzin pa'i sgros mi gdags// 'du 'bral med pa'i ye shes la// mkhyen dang mi mkhyen bsnyad mi 'dug/ rang byung ye shes rig pa la// 'khor 'das gnyis su brtags pas nor// rang sems ngo bo nyid kyi dbyings// gzung du med pas chu zla 'dra// snang la zhen rtog med pas bde// sdug bsngal bde ba chen po la// rkyen gyi khyad par nyid du 'gyur// zhes gsungs so// rin po che 'khor lo brtsegs pa'i rgyud las/ rig pa ye shes kyi le'u ste brgyad pa'o//// de nas yang nyid kyi rang bzhin gyis nyid kyi ngo bo la gdams pa'i don bstan pa/ e ma ho bde ba chen po chos thams cad rig pa'i rtsal las ma byung ba ni gang yang med de nam mkha' la nyi ma shar ba dang 'dra stai 'dir gsal 'dir mi gsal med pa'o// de bzhin du lung dang man ngag blta bsgom rnam pa gnyis kyi thag bcad nas thams cad du byang chub kyi sems bde brdal ba'i don du khyab gdal ba'o// chos thams cad dbyings mi 'gyur ba'i klong na gab pa de man ngag dang dgongs pa rnam par dag pas rang lugs chen po'i don mngon du phyung ba ni/ 'khor los sgyur ba'i rgyal po dmus long mig phye ba bzhin te/sems can gyi shes pa nyid ma bslad pa'i chos nyid du rtogs pa 'char ba'o// rig pa gang la yang ma chags par rang byung ye shes su thol byung ba ni ngo bo gzhi la rig pa nyid cir yang mi gnas pa la/lam can gyi chos gang la chags pa med de glang po che smyon pa btags na 'phraus shing btang na 'dug pa dang 'dra ste/ rig pa byang chub kyi sems bsdus na 'gro/ yan par btang na rang ldog pa ste rang byung rang shar mi 'gag pa'o// rig pa cir snang yang gang yang mi spang thug phrad pa ni/ rig pa'i gzhi rang sar grol ba la rkyen thams cad skul mar shes na me 'bar ba la shing bsnan pa lta bu'o// ngo shes pa'i mi dang 'phrad pas the tshom mi za ba bzhin du dran pa dang rig pa ci 'gyus pa thams cad ye shes zang thal chos nyid thug phrad dgag bsgrub med pa'i rig pa la btang gzhag med par cog gis gzhag pa ni/gzhi gang la'ang ma zhen rang gsal bar snang ba la de ched du byed pa'i rtsol ba ma zhugs te/ rgya mtsho dngas pa'i nang na snang srid gsal ba dang 'dra ste dran pa dang rig pa ma bkod bzhin du cir yang gsal ba la ming 'di zhes gdags su med pa'o// rig pa nam mkha'i bya lam dang 'dra ba la btsal bas rjes med pa ni/ btsal bar bya ba'i yul rang gi sems nyid yin la rtsol bar byed pa'i sgo sems nyid gzhan la brten pa ltar byas nas/btsal bas rjes med pa ni khyi rkun gyis khang stong btsal nas bza' rgyu cang mi rnyed pa bzhin rang gi sems shes pa kha nang du ldog nas btsal bas cir yang ma mthong la ming gar yang ma thogs te gdags gzhi dang bral ba'o// rag pa dngos mtshon dang bral la gang du yang dmigs pa rjes med pa ni dmigs pa'i yul mtshan bcas dang mtshan med la ni dmigs par byed pa'i thabs shes pa gtad pas dran pa'i rjes med pa ni gang yang rung ba la dgag gzhi dang bral ba mig 'bru tshugs su ta re bltas pas thog mar mthong la tha mar mi gsal ba ste/mig nad can gyi rgyang mig lta bu ste dmigs gtad gang yang med pa'o// sems nyid 'di kho na ci ltar yang bsgyur du btub pa ni/ rtod phur du gzung bar bya ba'i rten dmigs bcas la 'dzin par byed pa'i thabs shes pa gtad pas mi 'phro ba ni khyi sar gdung la btags pas 'gro mi shes pa bzhin/mtshan bcas dang mtshan med la sems bzung bas gang du yang mi 'gyu ba ste shes pa btson du bzung bas thig le 'khyil ba'i don la ro snyoms pa'o// e ma ho ngo bo bde ba chen po la gdeng lnga don thog gcig tu dril ba ni/ rig pa'i rtsal gyis ni cir snang sems nyid rang snang bar gdeng gis zin pa dang thug phrad kyis ni snang srid grag tshad thams cad chos nyid du rang shar ba'i gdeng gis zin pa dang/gab pa mngon du phyung bas ni chos sku rang shar ba'i gdeng gis zin pa dang ye shes zang thal gyi rig pa ni shar yang ngos bzung med par gdeng gis zin pa dang/lhun grub cog bzhag gis ni ngos bzung rang sar grol bar gdeng gis zin pa ste/ don kun tu bzang po'i dgongs pa chos sku rang gsal gyi 'bras bur rang grol ba'o// e ma ho ngo bo bde ba chen po tshol ba rjes med kyis gang du yang ma rnyed pa dngos po med pa'i gdeng ngo// dmigs pa rjes med kyis gang du yang ma dran pa 'dzin pa dang bral ba'i gdeng ste/ rtod phur gyis gang yang rung ba la zin pa ni/ nyams myong yid ches pa'i gdeng yin te gdeng gsum dbyer med pa ni kun tu bzang po'i dgongs pa ste/gdeng lnga don gyi thog las gang du yang ma g.yos pa'o// dgos ched dmigs pa sbyor so dang/ yid ches dang/ thag chod dang/la bzla dang/ shan 'byed rang grol don la sbyor ba ni 'khor lo gting gi gnad la brdeg pa'o// rin po che 'khor lo brtsegs pa'i rgyud las/ gdams pa'i le'u ste dgu pa'o//// de nas nyid kyi rang bzhin gyis nyid kyi ngo bo la sems nyid ye shes su 'char ba'i don bstan pa/snang zhing srid pa'i chos su shar ba kun thams cad rang gi ye shes kyi 'byung 'jug la 'dus so// 'byung ba ni snang srid la 'jug pa ni thams cad sems kyi rang bzhin no// sems kyi stobs las sangs rgyas kyi zhing du ma bskyed nus so// sku mi zad pa rgyan gyi 'khor lo dang/ gsung mi zad pa rgyan gyi 'khor lo dang/ thugs mi zad pa rgyan gyi 'khor lo'i mdzod chen po'i rig pa la zad mi shes so// rig pa ni nor bu brtsegs pa'i khang bzangs nas nges pa'i don dang/ don ma yin pa thams cad ma btsal bar byung ba'o// kun la khyab pas nam mkha' lta bu ris med pa las dngos po thams cad sgyu ma'i gzugs brnyan bzhin gsal la nges pa med pa'o// phyi nang med pa'i gzhal yas khang kun tu yangs shing rgya che ba ni/ ye shes rang snang gi yul snang ba dag pa'i zhing rdul snyed sangs rgyas kyi gzugs brnyan du byung ba yang rang snang dag pa'i sku'i dkyil 'khor ro// 'dod yon ris med du shar ba ma spangs pa ni gsang sngags thabs kyis zin pas nye lam du 'dug pa'o// ma dag pa'i skyon dang bcas pa'i dman pa thams cad kyang rang gi lam la dgongs te dor bar mi bya'o// blang dor med pa nyid chos rnams kyi nang nas mchog dang phul du byung ba'o// byang chub sems kyi rang bzhin ni yongs su rgya che ba'o// nam mkha' bzhin du tshad gzung du med do// dbyibs brtags pas mi rtogs so// kha dog gsal bar mi mthong ste// don dpag pas mi dpog go// thams cad kyi dngos gzhi yin pas mtshon brjod kyis 'di kho nar brjod par mi nus te brjod pa thams cad rang la rang smras pa'o// smra brjod med pa nyid las mtshon tshul gyi sgo mi 'gag pa ni thams cad kyi dngos po'o// sangs rgyas thams cad kyi mthar thug ye shes kyang byang chub kyi sems kyi gsang ba dam pa'o// thugs cir yang sprul pa'i cho 'phrul gyis ngo bo nyid la chos kyi 'khoralo bskor ba'o// 'khrul par snang ba yang g.yengs pa'i tshul gyis 'khor la 'khor ba nyid kyang chos nyid la 'khor zhing ye shes la gnas pa'o// yang dag par rdzogs pa'i sangs rgyas kyi sku gsung thugs kyang sems kyi cho 'phrul du rang shar ba las ma rtogs pa'i las dang nyon mongs pa rang rgyud pa'i ming yang gdod nas med do// sems can skye 'gul ci 'khrungs yang sangs rgyas nyid kyi sras yin pas sems can bya ba'i ming gi gdags gzhi yin no// thams cad chos kyi sku dang rang byung ye shes 'ba' zhig la ma dag pa'i sgo btsal du gang nas kyang mi rnyed pa'o// zag pa med pa'i bde ba chen po'i ro yang kun la sems nyid du yod pa'o// myang ba dang ma myangs pa'i khyad par kyang sems nyid rang rig gis phye ba'o// 'khor ba dang sdug bsngal yin par shes pas mi len mi spang ba'o// de nyid bkrus pas kyang mi 'dag la spangs kyang mi spong ste nam mkha' nyid do// rtse gcig sangs rgyas kyis phun sum tshogs pa yang dbye ba med pa'i sa 'di nyid do// sems nyid kyi cha lugs ni cir yang ston cing cha lugs thams cad pa ste sna tshogs nor bu rin po che lta bu'o// sems can thams cad kyi sems nyid kho na sangs rgyas kyi thugs dang dbyer med do// de nyid gnas gang du'ang gnas pa la chags gang du'ang ma chags pa'o// dbyibs dang kha dog gang du yang mi gnas shing cir yang ston pa ni nor bu chu dngas dngos lta bu ste/rin po che nyid ltar snang yang rin po che kho na ste// sems nyid gang du shar yang gcig po kho na kun 'char ba'o// e ma ho bde ba chen po/ shar nub med pa'i nyi ma la// rang byung ye shes 'od du 'bar// rang 'od rang la bsgrib ste mchi'o// dag par ltos shig bde ba che// mthong ba med na rnam par grol// mthong rgyu byung na ya mtshan che// mthong med mthong na mthong ba yin// bgrod dang bral phyir gang yang min// zhes gsungs so// rin po che 'khor lo brtsegs pa'i rgyud las/ sems nyid ye shes su shar bar bstan pa'i le'u ste bcu pa'o//// de nas yang nyid kyi rang bzhin gyis nyid kyi ngo bo la snang ba mi 'gog pa'i don bstan pa/e ma ho ngo bo bde ba chen po chos thams cad yang dag par rdzogs pa'i sangs rgyas kun tu bzang po'i thugs las byung zhing thugs kyi sgron ma rin po che'i byung khungs so// thugs ye shes kyi rang bzhin mi zad pa'i mdzod do// stong gsum gyi stong 'jig rten gyi khams mtha' yas mu med pa zad mtha'i yul dang bral ba'o// stong gsum mi mjed kyi khams thams cad stongs pa'i dus med pa yang kun tu bzang po'i sems nyid 'pho 'gyur dang bral ba'o// rin po che tsit+ta brtsegs pa'i ga'u nas phyi nang snod bcud kyi chos thams cad dngas ma chen po'i rang bzhin du gsal ba'o// de nyid kyi rang bzhin ni kun la gsal bar 'byung ba ni/ mngon sum du gsal ba 'di ga'o// yang dag par rdzogs pa'i sangs rgyas kyi sku dang gsung dang thugs nyid la ma gtogs par srid pa gsum gyi chos gzhan ni med do// 'gro ba rnams kyi don so sor ci lta bar gsal bar go ba ni/ de bzhin gshegs pa rnams kyi ye shes so// gsung mi zad pa las snang ba ni sgra skad ci ltar yang grags pa dang tshig dang tshig min mang po rnams la gsung mi zad pa'i yan lag gis khyab cing gsung du ma gyur pa dang dbyangs ma yin pa gcig kyang med do// sna tshogs su gsal yang gnyis su med pa'i ye shes gcig kho na'o// gcig pu rang kho na las mi g.yo bar gsal ba ni mi dmigs pa'i bsam gtan no// sems nyid mi g.yo ba ni g.yo ba'i yul med pas so// yul med la yul snang du snang ba ni/ byang chub kyi sems spyod yul dang bral ba'o// ris med pa'o// khyab gdal ba'o// gzung 'dzin dang bral ba'o// rnam rtog dang kun brtags kyis ma bslad pa'i chos nyid ni sems nyid dag pa'o// rtog pa'i mtshan ma thams cad spangs shing ma 'dres pa la kun tu dbyer med par sa ler gsal ba ni dgongs pa yangs dog med pa'i klung ngo// gzugs la sogs pa sna tshogs su snang ba thams cad ni sems nyid mi 'gag pa'i ye shes shar ba ste rang byung ye shes la ni sna tshogs su shar yang dbri bsnan med pa'o// ye shes gzugs can ma yin pa ni dngos po ngo bo nyid kyis stong pas rgyu rkyen med pa'o// ngo bo nyid 'di zhes bya ba'i mtha' las 'das pas gang gi ngo bor yang ma grub pa ste/yang dag par rdzogs pa'i sangs rgyas nyag gcig gi sku ru gnas pas bcos su med pa mtha' thams cad dang bral ba kun la khyab cing ye nas brdal ba mtshon cing brjod las 'das pa 'dzin rtog rnam pa gnyis dang bral zhing ngo bo nyid kyis rnam par dag pa'i don gyi mchog go// rin po che 'khor lo brtsegs pa'i rgyud las/ snang ba mi 'gog pa'i le'u ste bcu gcig pa'o//// de nas nyid kyi rang bzhin gyis nyid kyi ngo bo la thig le'i don man ngag gcod pa'i don bstan pa// gzhi gcig thig le chen po la// mthong snang bsam gyis mi khyab kyang/ log par mthong ba dang/ phyogs su mthong ba dang/ ma rtogs pa dang/ yang dag pa'i snang ba'o// lhun gyis grub pa dang phyogs gcig pa rnams ni phyogs chas 'dod pa'i blo tsam mo// gzhi'i ngo bo don bdag nyid lhun gyis grub pa nges pa med cing gnyis su med cing rang grol ba ni don gtan la phabs pa'o// gzhi lam 'bras bu sems gnas pa/ g.yo bar smon pa/ 'jug par smon pa/ byang chub sems kyi don la sbyor ba'o// ma skyes pa dang/ mi 'gag pa dang/mi mnyam pa dang/ rang grol ba ni rang bzhin dang/ rol pa dang/ mtshan nyid kyis dngos su grol ba'o// gol bar bya ba'i gzhi dang/ gol ba rang gi rkyen gyis dang/ 'dod pa gong 'og tu sun 'byin pa dang/rang byung ye shes su la bzla ba ni don gyi gzer gdab pa'o// snang zhing srid pas bsdus pa'i chos thams cad ni/ sangs rgyas kyi ngo bo nyid de de bzhin nyid kyi snying po yin no// snang zhing srid pas bsdus pa phyi nang gnyis su med pa thams cad la gdod ma nas sangs rgyas nyid du shes pa na gol ma gol gnyis su med de g.yang sa chos nyid du grol ba'o// chos nyid rgyu rkyen las ma byung ba'i don ni skye shi dang bral lo// de nyid la rtsol sems dang rnam par rtog pa'i mtshan mas ni gang du yang bslad du med pa'o// 'khor ba dang mya ngan las 'das pa'i chos thams cad sems nyid rang byung gi ye shes la ci lta bar rdzogs pa ni sems nyid 'khor 'das gnyis la che ba'i don yin no// chos thams cad thig le byang chub kyi sems la sdud pa ni/ sems nyid kyi ngo bos kun la khyab par gnas pa'o// khyab bzhin tu gzhan du spros pa gang yang med pa'o// rang gi byang chub kyi sems ma bcos pa'i rang bzhin ni don gyi rnal 'byor chen po zhes bya'o// sems kyi rtsol bsgrub las 'das pa ni/ gnad du skyel ba'i rig pa zhes bya'o// 'gags dang ma 'gags la rag las pa las kun gyi spyod yul ma yin no// rig pa phyi nang med par 'od gsal ba ni/ kun gzhi 'phrul gyi me long zhes bya'o// sems nyid gang gi mtha' la yang gnas pa med cing 'gyur ba med pa ni rang byung gi ye shes mi bskyod pa'i dbyings chen po zhes bya'o// bgrod cing lam la btsal kyang rang bzhin gyi don las gong du yang 'da' ba med pa bde ba chen por shes na gol sa dang sgrib par mi 'gyur ro// kye ngo bo nyid kyis stong pa chen po rol pa skye ba'i cho 'phrul sna tshogs su snang ba bde tsam na gab pa mngon du phyung ba'i ye shes zang thal du thug phrad pa'o// de nyid chos thams cad sems nyid du ma 'gags pa la ma zhen na snang ba rang sar bzhag pa'o// yang dag par rdzogs pa'i sangs rgyas sngon 'das pa thams cad kyi gshegs shul kyang byang chub kyi sems rang gi ye shes so// da ltar bzhugs pa'i sangs rgyas dang/'gro ba rigs drug gi sems can thams cad kyang chos sku rang gsal gyi dbyings nas longs spyod la/ ma byon pa'i rgyal ba dang 'gro ba thams cad kyi lam du yang rig pa'i rlung sgo chen po nyid bde ba'o// zhes gsungs so// rin po che 'khor lo brtsegs pa'i rgyud las/ thig le'i don man ngag gis gcod pa'i le'u ste bcu gnyis pa'o//// de nas nyid kyi rang bzhin gyis ngo bo nyid las dbyer mi phyed pa'i 'khor la rgyud gtad pa 'di gsungs so// e ma ho 'dus pa'i tshogs chen po rang rang gi rang bzhin bstan pa'i rgyud chen po 'di zung zhig/ byang chub kyi sems 'khor lo brtsegs pa 'di nyid du snang srid 'khor 'das kyis bsdus pa'i chos thams cad dang// ston pa'i rang bzhin kun tu bzang po dang/ ngo bo rdo rje sems dpa' las/ bstan pa chos nyid byang chub sems su bstan pa yin pa'i phyir 'khor du gtogs pa rnams kyis nga'i bstan pa'i rgyud 'di ni ma btang bar zung zhig/chos thams cad kyi snying po yin no// bstan pa thams cad kyi rgyal po yin no// gsung rab thams cad kyi nying khu yin no// snang srid 'khor 'das kyi chos thams cad kyi dam pa rin po che sems nyid nor bu'i rtogs pa la 'dus so// zhes gsungs pas 'khor thams cad rjes su yi rang ste mgu bar gyur to// rin po che 'khor lo brtsegs pa'i rgyud las/rgyud gtad pa dang rjes su yi rang ba'i le'u ste bcu gsum pa'o//// rin po che 'khor lo brtsegs pa'i rgyud ces bya ba/ thun mong ma yin pa'i rgyud chen po rdzogs so/

CLOSE WINDOW