CLOSE WINDOW

Gpb009.001
བོད་ཡིག

byang chub kyi sems rin chen 'khor lo zhes bya ba'i rgyud bzhugs so// rgya gar skad du/ bo d+hi satwa rat+na tsakra tan+t+ra nA ma/ bod skad du/ byang chub kyi sems rin chen 'khor lo zhes bya ba'i rgyud/ byang chub kyi sems ye shes rdzogs pa'i 'khor lo la phyag 'tshal lo// 'di skad bdag gis bshad pa'i dus gcig na/ 'og min gyi gnas/ sems nyid gdal ba chen po'i zhing khams na/ rang byung rdzogs pa'i bcom ldan 'das dgongs pa rang byung gi don la bzhugs so// yang de'i tshe sm-in pa chen po'i 'khor 'di lta ste/ rang bzhin gyis gnas pa dang/ rang bzhin la blta ba dang/ rang bzhin gyis rtogs pa chen po/rang bzhin rdzogs pa chen po'i don la mngon par dga' ba 'ba' zhig dag 'dus so// de nas rig pa'i rgyal pos sna tshogs bsam bral gyi ting 'dzin la snyoms par zhugs so// de'i tshe 'dus pa'i tshogs kyis thams cad rang byung du mthong bar gyur to// de nas bcom ldan 'das rig pa'i rgyal pos 'di skad ces gsungs so// rang byung dag pas ye sangs rgyas// chos dang chos nyid sna tshogs pa// rig pa nyid yin rnam par dag/ smin pa'i 'khor tshogs rang sems kyis// sna tshogs rang byung nyid du ltos// zhes gsungs so// de nas smin pa chen po'i nang nas/ sems dpa' rdo rje byung ste/ 'di skad ces gsol to// rig pa rnam dag bcom ldan 'das// sku gsung rdzogs pa'i ye shes che// mdzad pa phyogs bcu mu mtha' yas// thugs rje rang snang phyogs ris med// btang snyoms chen po kun tu bzang// rig pa mchog gi dkyil 'khor nas// rdzogs pa'i ye shes thabs chen gyis// gsal ba'i ye shes sgo phye nas// dpal gyi mgur nas gsung bsgrags pas// 'dus pa'i 'khor la gsal bar gsungs// zhes gsol to// de nas rig pa'i rgyal pos/ sems dpa' rdo rje la 'di skad ces bka' stsal to// ye shes rdzogs pa bde ba che// mtha' yas 'gro ba kun la ldan// rig pa dbyer med kun tu bzang// gang yang ma yin rig par gsal// rtsol ba'i sems bral mngon sangs rgyas// rgyu 'bras gnyis med 'gyur ba bral// rnam snang shes pa rang gnas pa// byed pa gnyis kyis mthong bar gyis// shes pa'i rnam grangs gang skyes kyang// rnam byang nyid las gzhan ma yin// bsam gyis mi khyab dus na shes// 'khor ba'i shes pa glo bur ba// rang bzhin ma yin rkyen gyis snang// brjod pa'i snyan pa nyid dang mtshungs// rnam par brtags pa'i sems nyid ni// gang ltar btags pa de bzhin mthong// du ma'i rigs kyi rtog pa dag/ sgo rnams kun tu rgyu ba ste// mi gcig skar khung du ma bzhin// don gyi rnam byang du ma yin// rig pa dbyer med dkyil 'khor 'dir// mtha' bral lta ba'i don ldan gyis// rang bzhag dgongs pas gnas par bya// rang byung thugs rje g.yo med kyis// 'gro don ma lus rdzogs par mdzad// sku gsum lhun grub 'bras bu ni// gzhan ma yin te de nyid rdzogs// rigs drug dbang po chig chod dam// sbyangs pa'i 'phro can gang yang rung// sems kyi rnam grangs gang sgo nas// spyi blugs dbang la gnas byas te// rna brgyud gdams ngag nod par bya// bgrod med lam la gnas byas la// sbyang med pa yi yon tan spel// rim med cig car 'jug pa yi// rang byung ye shes bla ma yis// rab tu che mchog chos kyi sku// btsal med rtag pa mngon sangs rgyas// 'gro ba rig pa gang dag 'ong// bsam bral nyid du 'dug par bya// shes pa rang lugs thal byung ba// dus gsum mi g.yo gnas gyur na// rgyal ba'i ye shes gsal mthar phyin// zhes gsungs so// byang chub kyi sems rin chen 'khor lo las/gleng gzhi'i le'u ste dang po'o//// de nas rig pa'i rgyal pos sems dpa' rdo rje la 'di skad ces bka' stsal to// sna tshogs 'khor ba'i rtog pa dang// rdzogs pa'i ye shes rang bzhin gcig/rdzogs pa'i ye shes rtogs pa nyid// rtogs pa gang yin ye shes nyid// tha dad yod pa ma yin te// ye shes rdzogs pa'i rang bzhin ni// kun spangs kun gyi dngos gzhi can// 'dzin pa du ma'i rtog pa 'di// byang chub sems su brjod pa yin// brjod med sems kyi rang bzhin la// ma brjod go bar mi 'gyur bas// brjod med don gyis mtshon par bya// kun bzang sems kyi rnam dag la// mtshon bya mtshon byed gang yang med// btsal med rang bzhin nyid kyis mtshon// tha mal snang ba'i shes pa dag/ bka' yi shes pas dran byas te// gtong 'dzin med pa'i ngang la bzhag/ yid la mi byed bya ba btang// blo yis ma dpyad rang bzhin gsal// 'dzin pa'i rgyu 'bras gang yang min// 'bras bu nyid kyis 'bras bu grub// re 'dod rtsol bas mtha' ru 'gyur// 'dzin med rang bzhin sman chen gyis// 'khor ba'i gcong rnying kun dang bral// rnam rtog ye shes 'od gsal nyid// rang gnas ye shes ye nas dag/ rin chen dag pa'i gling bzhin du// sems kyi ye shes ye nas dag/ rim med sems kyi rang bzhin la// bgrod pa'i lam gyis thob pa med// rnam grol 'bras bu rang byung nyid// bgrod med rnam grol rdzogs pa'i lam// 'dod dang rtsol med lhun gyis grub// ye shes nyi ma'i snying por shar// ma lus gzung 'dzin mi g.yo ba// rgyu dang 'bras bur rtog 'dzin cing// ye shes sgyu ma'i 'dzin pas bcings// sems nyid mkha' 'dra lta ba'i klong// ye shes yangs pa brdal ba che// blang dor gnyis med rtsol dang bral// byang chub sems kyi lta thag bcad// ting 'dzin zhi bas nyams su blangs// byang chub sems kyi lta ba ni// gang ltar ci yang ma yin pas// rang byung ye shes mtshan nyid gsal// mi bsam gyi nar bzhag pa'o// bsam gyis mi khyab ye shes mthong// rang byung rdzogs pa'i lta ba ni// mtha' gsum bral la ye sangs rgyas// rtsol bral dbu ma drang po'i lam// 'ching bral lta ba gza' gtad med// rin chen 'khor lo kun bzang 'dis// rang sems gnyis med rtogs par gyis// btang snyoms lta ba blang dor med// khyung chen mkha' la lding ba bzhin// spro bsdu gnyis med btang bzhag bral// rang bzhin gnas pas re dogs bral// spyod yul ma lus sems su shes// sna tshogs 'khor ba'i rang bzhin dang// ye nas rang bzhin gnyis su med// gnyis las gzhan sems grub pa med// rig pa ci yang ma yin pas// 'dod pa'i sems pa kun dang bral// shes pa mtha' bral stong pa nyid// ye shes 'od gsal rang gnas pa// yid la 'dzin med ye shes gsal// rol pa snang yang grub pa med// sgyu ma'i ye shes rtsal du 'phro// ma bcos sgyu ma lhun grub la// 'dzin pa'i sems dang ngos gzung med// ye shes rgyal ba rnam par dag/ 'dzin pa'i sems bral rig pa gsal// sems nyid nam mkha'i lta ba la// nam mkha' lta bur bsam du med// nam mkha' bsam du med pa bzhin// ye shes bsam du med pa'ang yin// cir yang mi dgongs rang bzhag pa// dus gsum rgyal ba'i lta ba yin// lta med rang gzhag blta ba ni// dus gsum gang yang ma yin te// 'gyur med dbyings kyi lta ba yin// 'dod pa'i bya ba gang yang min// ngo bo nyid la yangs dog med// sems nyid dri ma ka dag la// 'gyur med rin chen gser bzhin no// 'dzin pa'i rlung gis g.yos gyur kyang// rig pa'i ngo bo 'gyur ba med// rgya mtsho chen po'i snang ba bzhin// phyi nang mi mnga' ye shes gsal// mtha' dbus mi mnga' phyogs dang bral// ye shes sems nyid lta ba la// rgyu dang rkyen gyis rtsol ba med// rdo rje nyid 'dra 'jig pa med// nyi ma rin chen 'bar ba ltar// rang gsal rnam par rtog dang bral// 'khor ba nyid nas ye sangs rgyas// rang sems rig pa gang yang rung// bsam pa dang bral ye shes nyid// chos dang chos nyid gang yang min// mtha' bral ye shes rdzogs pa 'di// rtag pa ma yin mi rtag min// shes pa mi dgag 'dod pa min// bya byed mi rtsol rang bzhin dag/ dbu ma chen po drang po'i sems// phyogs kyi yul la 'jug pa med// sems nyid yul la gang 'jug na// 'dzin pa'i phyogs bcas 'dod pa nyid// dbu ma'i sems dang mi ldan par// bag chags 'dzin pa'i sems kyis dkrug/ bsam med rig pa brjod med 'di// tha snyad ming la mi gnas te// gdul bya dman pa'i sems dag la// tha snyad sgra yi 'khor los bstan// snang srid snang ba sna tshogs pa// sku gsung thugs las ma g.yos te// dran rtog ting 'dzin rig pa'i thugs// nam mkha' lta bur mi zad pa// bde chen rig pa sems kyi rgyan// rnam par rtog pa'i sgro 'dogs gcod// 'od gsal rig pa'i 'khor lo yin// lus can rnams kyi sgra rnams ni// sngags kyi gsung du grags pa yin// snang stong gnyis med rig pa'i gsung// kha dog dbyibs su gang snang ba// sku mchog rgyan gyi 'khor los zab// rdo rje lta bur dbyer med pa// sems kyi rang bzhin kun tu bzang// sku gsung rdzogs pa'i bde ba che// bsam med rang bzhag nyid kyis go// rig pa'i mchog ldan kun tu bzang// bka' yi 'khor lo 'bum phrag las// ting 'dzin mi rtog rang bzhin gsal// rang rig 'gyur med rdo rje'i lung// ye shes rdzogs pa'i lung gis ni// thams cad ye shes ngo bor gsal// zhen pa'i sgro skur ma lus pa// ye shes rig pa'i 'khor los gcod// dran gsal rig pa'i snang ba la// gang ldan gsal ba'i rig pa mthong// rang gnas ye shes 'od gsal ba// spyan drang ma yin ye gnas pa// ye shes kun tu 'pho 'gyur med// lhun grub rig pa btsal med pas// spro dang bsdu ba ngang gis zhi// rang byung khyad par lam chen yin// blang dor gnyis med rig pa'i ngang// ye shes dbu ma mtha' bral la// bgrod pa'i lam med ye sangs rgyas// rim pa kun bral chos nyid la// rang gsal 'od la gang gnas la// rim par ma yin cir mi dgongs// ye shes kun bzang lam chen la// blo yi stobs kyis gang 'jug pa// sbyor ldan kun gyi lam dang bral// btsal med rang byung bde chen ni// 'dod pa'i rtsol ba gang 'phags pa'i// rim 'jug rgyu 'bras ma lus stong// kun bzang rang rig 'od gsal la// 'dod pa'i sbyor ba gang 'jug na// phyogs bral rang byung don dang bral// rtsa ba rnam dag mkha' ltar khyab// rnam rtog 'dzin pa'i spyod yul min// bgrod med stong pa'i thig le ni// rnam pa dang med gsang ba'i sems// btags pa sna tshogs ngo bo la// mi g.yo rang bzhin dkyil 'khor nas// ye shes nyi ma kun mthong yang// shin tu sbyor ldan rnal 'byor la// btags pa'i snang ba mthong ba med// bsam gyis mi khyab gang dus na// 'od gsal ye shes don snang yang// gang mthong sna tshogs sems dang bral// rang byung dag pa'i dkyil 'khor la// rang gzhag rig pa kun rtogs kyang// sbyor 'dod sna tshogs mthong ba med// gsang ba'i 'khor lo rdzogs pa 'di// rgyu rkyen mthar 'gyur rang gnas pa// dri med snying po rang gsal bas// rgyu rkyen 'dod pa'i ngo bos stong// gang zhig rgyu 'bras ngo bo nyid// dper na ri bong rwa bzhin no// rgyu med rgyus bskyed de dang 'dra// rang gnas ye shes gdod nas grub// gang dag pa yi 'khor lo la// sbyor 'dod rgyus rtsol gang zhig na// mthun pa nyid na mi mthun pa// thug pa med de gang la 'thad// khyad med pad+ma'i rang bzhin dag/ 'du byed las kyi rdo rje 'chang// 'dul mdzad ting 'dzin 'bum phrag las// bsam bral ting 'dzin 'od gsal sems// thabs 'jug sgrub pa ma lus yin// mi g.yo thig le byang chub sems// yongs su ston pa'i ngo bo nyid// rang rig rig pa mchog gi sku// byang chub sems la ngo bo gcig/rig pa mchog gi bstan pa ni// brjod med kun la rang bzhin ston/ rnam dag rin chen lta bur gsungs// mi g.yo thig le nyid du gsal// yi ge tha dad kun dang bral// ma 'gags rang snang don du bshad// sna tshogs snang ba'i rang bzhin dag/ rang rig nges don nyid du bstan// rnam bshad rang byung bstan pa'i mchog/ rang rtsol bral ba'i rang bzhin gyis// de 'khor bsam pa ji bzhin bstan// bstan pa'i yan lag 'bum phrag yas// rang byung dag pa'i shugs kyis 'byung// 'dod rtsol blo la drang ba dang// thugs kyi dgongs pa nges pa'i don// gdul bya rab 'bring don du bshad// nges pa'i snying po gsang ba nyid// drang ba'i don min rang byung bshad// chos sku rang byung bstan pa'i mchog/ der 'dus 'khor dang bstan pa dag/ nyid las mi gzhan rang byung nyid// rig pa mchog gi sbyor ba la// so so ma yin brjod bya gcig/tha snyad du ma'ibarjod bya gang// kun bzang rig pa'i gsang don ston// brjod pa dman pa'i sku yis bstan// rang byung rig pa mchog gi sku// rang byung mchog gi sku gsum rdzogs// ma bcos rang bzhin snying po la// 'dod pa rnam pa gang yang med// bsgrub bya ma lus kun gyi bdag/ ye shes nyi ma sgrib med gsal// snang ba ma lus rang byung sems// rig mchog ldan pa bde gshegs bka'// rang byung tshad ma mngon sum gsal// 'khor ba'i rtog pa gcong rnying dag/ ye shes rang rig nyid du 'bar// spyi blugs tshangs pa'i thabs kyis gsal// gsang ba'i don myong 'od gsal lung// gzer chen man ngag theb pa'i sgras// rig pa'i brda 'jal tshig dang bral// mngon sum ye shes gsal ba yis// rjes su rang gzhan ye nas dpags// zhes gsungs so// byang chub kyi sems rin chen 'khor lo las/ 'khor ba ye shes su bstan pa'i le'u ste gnyis pa'o//// de nas rig pa'i rgyal pos sems dpa' rdo rje la bka' stsal pa/ rang byung rdzogs pa lta ba'i klong// mnyam nyid ye shes rig pa'i sems// snang ba ye shes rdzogs pa nyid// nam mkha' rdo rje lta ba'i mchog/ blta med rang byung sems la blta// rtsol med rig pa'i rnal 'byor yin// 'jug pa gnyis med rig pa'i klong// ye shes mkha' mnyam sgra don med// rang gsal yul la mi rtog pas// ye shes thig le nyi ma shar// snang med ma 'gags cir mi dgongs// snang ba rig pa'i thig ler bsdus// sdug bsngal bde ba'i ngang du gnas// re 'dod kun bral thob spang med// rang byung bde ba'i sems nyid la// snang ba nyid du grub pa med// bde chen rig pa mtsho ltar zab// ye shes rig pa mkha' ltar mnyam// dngos grub rin chen 'od ltar 'byung// zhes gsungs so// byang chub kyi sems rin chen 'khor lo las/ lta ba bstan pa'i le'u ste gsum pa'o//// de nas rig pa'i rgyal pos rang bzhin bstan pa'i don gsungs pa// rig pa'i sems nyid snang med la// ting 'dzin mi g.yo 'jug pa med// rtsol med rig pa bsam dang bral// ye shes rdzogs pa'i 'khor lo la// thig le bde chen bsam mi khyab// rol pa bde chen chu rlabs ltar// ye shes ji bzhin mi bskyod pa// ye nas yin phyir bya mi dgos// ye shes gsal ba'i phyag rgya yis// mtshan ma ye shes 'khor lo bskor// 'dzin pa'i rang bzhin kun dang bral// rang byung snying po g.yo med na// dbang bsgyur rgyal ba'i thugs dang mnyam// ting 'dzin rang bzhag mkha' dang mnyam// mi 'gyur ye shes mkha' ltar khyab// rtsol bral rig pa'i ye shes la// yengs pa med par rang bzhin bzhag/ dbang po'i ngo la snang ba la// mi rtog rang bzhin rig par gsal// ye shes kun bzang 'phro 'du med// gang la mi 'dzin rang byung sems// mtshan ma'i spyod pas 'gyur ba ni// brda sgo 'jug pa'i gdams ngag sbyin// ting 'dzin 'khor los sgro skur gcod// ye shes 'khor lo mtha' dbus med// rang rig 'khor lo gzung 'dzin bral// shes rig ye shes nyid du 'char// 'dzin pa'i rim 'jug theg khyad kyis// ngos bzung rtog dang dmigs 'byed pa// 'dod 'dzin ma lus de dag stong// rang rig stong nyid rnam mnyam pas// bde chen lhun grub rang rig gsal// ye shes rig pa'i 'khor lo la// gang yang yin no rnam kun bcas// ye shes rang gsal ma bsgribs gsal// rnam dag ye shes rang snang la// zhen pa'i rtog pas bzlog tu med// lhun grub 'bras bu btsal mi dgos// kun bzang 'bar ba'i ye shes la// gzung 'dzin gnyen po bstan mi dgos// thogs med rang byung phyogs dang bral// byang chub rang sems kho na bas// lam gyis ma bcos ye sangs rgyas// gang yang rnam pa cir rtog kyang// rag rig bde chen mngon sum gsal// 'dod pa'i skabs bral gang mthong tshor// rang bzhag ye shes rdzogs pa mthong// btsal med rang byung rdo rje'i bdag/ skye med rdo rje mi 'gyur 'chang// lhun grub rin chen 'bar ba'i 'od// dri med pad+ma rang byung bdag/btsal med lam gyi 'dzin dang bral// 'dzin med 'khor lo 'bar ba'i sku// dus gsum nyid du 'da' ba med// ces gsungs so// byang chub kyi sems rin chen 'khor lo las/ ting 'dzin ye shes su bstan pa'i le'u ste bzhi pa'o//// de nas rig pa'i rgyal pos yang sems nyid phun sum tshogs pa'i don gsal bar bya ba'i ched du 'di skad ces gsungs so// rang byung rnam dag ye shes sku// brjod med rig pa'i bstan pa bkram// rang snang rig pa smin pa'i 'khor// ye shes rdzogs pa'i rol pa bshad// rang byung 'od gsal gcig la rdzogs// rtsol byas dman pa'i 'dus 'khor la// blau dang mthun par bstan pa bsngags// zhes gsungasaso// de nas sems dpa' rdo rjes 'di skad ces zhus so// ye shes kun bzang ston pa'i thugs// dbyer med rang byung ngo bo nyid// bde chen lhun grub chos kyi dbyings// rnam rtog phyi nang ji snyed pa// rang byung gsal ba'i don la 'dus// rnam dag rdzogs pa de nyid kyang// dran bzhin log pa'i rmongs pas bcings// snang med rang byung bde chen la// sna tshogs dngos por rang sems 'khrul// bde 'byams dbyings las ma g.yos kyang// 'khrul rtog sdug bsngal sna tshogs myong// rnam dag mi g.yo thugs rjes shod// ces zhus so// de nas rig pa'i rgyal pos bka' stsal pa// ye shes rang byung chos kyi sku// kun bzang ye shes chos kyi sgo// bstan pa ma lus ji snyed pa// byar med rang byung sems su bshad// de nyid gang la de dag ste// gang la bshad pa shugs kyis go// snang dang srid pa'i chos rnams kun// rang byung sems las ma g.yos pas// rang rig rdzogs pa shugs kyis gsal// gang la gang gsal ngo bo bstan// shugs kyis brgyud nas de mthong ba// rang byung nyi ma'i 'od kyi mchog/ma bcos gsal ba'i 'khor lo la// 'dzin pa'i dr-i ma kun gyis dben// man shel 'od ltar rig pa 'char// bde chen rig pa'i 'khor lor bshad// brda don sgo yis rgyud don rtogs// rig pa'i gdeng ldan ye shes klong// gsang ba'i ye shes dgongs pa la// thugs rje rin chen 'od ltar 'phro// tshig gi don bral ye shes rdzogs pa che// brda sgo lam gyi zhen pa gang bzlaug kyang// brda' dang tha snyad rig pa'i snying por 'char// rang byung rtsa ba ma lus gcig tu rtogs// sbyor ldan lam gyis rtog pa ma lus 'dul// dngos grub rang byung dgos gces bsam mi khyab// sgron mes gsal bzhin yi ges don du bshad// brda bral stong nyid rang la bzlog par bya// de nyid bzhin te thams cad kun la yin// rang byung bde chen 'khor lo la// ye shes don du rang gsal zhing// 'dzin med rig pa'i mkha' la bzhag/ rgyu ba med pa'i ye shes bskyed// rang bzhin gsal don 'od la bzhugs// sku gsung gsal ba'i don ldan na// lhun rdzogs ye shes thig ler bshad// tha snyad sgra yi rnam pa kun// ye shes mtshon pas 'dres pa'i brda// don la brjod bral ye shes rdzogs// rig pa'i brda sgo don gsal ba// nges med sbyor ldan blo bzhin no// bde chen rig pa'i rgyal po la// 'od gsal rig pa'i 'khor lo bskor// yi ge med pa'i rang gsal la// ye shes srog gi phur pa thebs// zhes gsungs so// byang chub kyi sems rin chen 'khor lo las/ gtan la phab pa'i le'u ste lnga pa'o//// de nas rig pa'i rgyal pos/ rang rig pa'i phun sum tshogs pa 'di bka' stsal to// ye shes khyab bdag rig pa'i sku// rang byung rig pa ma 'gags gsal// brjod med sems kyi de kho na// rang byung ston pa thugs rje'i bdag/ 'gro drug sems can thams cad kyi// rang sems ston par ma shes na// rang byung mthong bar yongs mi 'gyur// des na ye shes rdzogs pa'i don// rang rig bde bar shes par gyis// rang byung rgyal po ston pa'i mchog/ ye shes ma 'gags cir yang gsal// rig pa klong gi 'khor du rdzogs// rang sems bde la kun rdzogs pas// bstan pa rgya mtsho rig pa'i klong// rnam dag rang sems skye med pas// 'gyur med 'khor lo rig pa'i gnas// ye shes rtsal med gnas kyi mchog/rang byung ston pa 'od gsal thugs// 'dzin pa med pa'i nyi ma shar// me shel 'od ltar byin rlabs 'khrigs// 'od gsal rig pa'i bstan pa sgrogs// rang byung rkyen bral gnas kyi mchog/rang byung bde chen ye shes rol pa'i sku// yi ge brda bral ye shes rig pa'i gsung// tshig gi lam chad ye shes sgron ma 'bar// len med 'dzin med bde mchog gsang ba'i lam// brda yi 'jug pas gsang ba'i don mi gsal// ming dang don med rang byung ye shes gsal// rig pa thig le gsal ba gsungs// brjod med ye shes 'khor lo bdag/ tha snyad kun bral brjod bya bdag/ bdag med rang byung ye shes nyid// rig pa'i 'khor lo dag la 'char// bde chen 'od 'bar thig le'i mtha'// rang byung gzer chen rang la 'debs// rang byung 'khor lo rang la gcod// rig pa'i phyag rgya 'gyur ba med// ces gsungs so// byang chub kyi sems rin chen 'khor lo las/ phun sum tshogs pa'i de kho na nyid bstan pa'i le'u ste drug pa'o//// de nas rig pa'i rgyal pos btsal ba med pa'i chos dang chos can mi dmigs pa 'di bka' stsal to// btsal med rang bzhin ye sangs rgyas// rnam dag rang byung snying po la// thams cad ye shes snying por gsal// ye shes 'khor lo snang ba med// ye shes rin chen rtsol dang bral// rang byung mi 'gyur kun du bzang// sems nyid byang chub rigs bdag la// lus ngag sems kyi rtsol med pas// ting 'dzin mi g.yo 'jug dang bral// rang byung 'khor lo rol par rol// ye shes spyod pa pad+ma ltar// spyod bzhin ma chags ye nas dag/ bsam dang bral ba'i chos nyid la// ye shes 'khor lo rang bzhin te// dus gsum g.yo ba med par gnas// rtog pa'i dngos po snang ba yang// rang byung rig pa'i 'khor los gcod// rig pa rgya mtsho mkha' ltar zab// mngon sum snang ba'i ye shes la// sangs rgyas sems can khyad med kyang// rang dbang sems la mi gnas na// sems nyid bde bar spyod mi nus// 'dzin med dag gi lcags bkrol yang// goms pa'i bag chags bcings dang 'dra// ye shes 'khor lo rab dbang na// ji ltar gnas kyang bya rtsol med// rig pa mtha' bral dkyil 'khor la// lus kyis rtsol med dkyil 'khor gsal// rang snang rig pa 'od gsal la// ngag gi rtsol med rig pa'i gsung// mi 'gyur kun bzang ye shes la// thugs kyi rtsol med bsam dang bral// snang ba gzugs kyi snang ba kun// mnyam nyid chos kyi sku ru thim// grag pa sgra yi snang ba kun// mtshon pa'i rang rtags gsung du thim// shes rig ma lus ji snyed pa// thugs kyi mtshon pa'i rang rtags te// ye shes rig pa'i thugs su thim// rig pa 'gyur med rdo rje ltar// dbyer med ye shes bya btsal bral// zhes gsungs so// de nas rdo rje sems dpas 'di skad zhus so// rnam dag ye shes dkyil 'khor na// 'gro drug ye nas sangs rgyas kyang// lam stobs drag pos bdag zhugs te// rang rkyen log pa'i shugs kyis dkrugs// rang bzhin rin chen nor bral bas// rigs drug gnas su 'khor bar 'khyams// dus 'dir thugs rje'i byin rlabs kyis// rdzogs pa'i sems la mos bskyed pa// de bas rtsol bral 'bras bu yod// rnam rtog g.yo ba ci 'gyu ba// rig pa'i don la gang gis bstan// nges pa'i gsang mdzod gang gis mthong// zhes gsungs so// de nas rig pa'i rgyal pos bka' stsal pa// ye shes rdzogs pa'i sems bskyed bzung// spros pa'i sems ldan don la spyod// rang gzhag rig pa ma yin par// brda sgo drag po'i rjes ma 'brang// bde chen gsang ba'i 'khor lo la// gnyis su med pa'i rang bzhin pas// chos can chos gnyis gang yang min// 'dod pa'i blo yis gang sbyar ba// dman pa'i sems la bstan par zad// bsam bral ye shes 'khor lo la// chos dang chos nyid gang 'dod pa// rang byung gsang ba'i sems ma shes// bde mchog 'khor lo'i don ma rnyed// mi 'gyur gsal ba'i sems dang bral// ye shes rin chen 'od kyang nub// 'khor ba'i lcags las thar ba med// sna tshogs 'khor lo'i rang bzhin la// rmongs pa'i blo yis blang dor med// gnyis med rang 'od gsal ba la// sgro dang skur bas rang sems spong// zhes gsungs so// byang chub kyi sems rin chen 'khor lo las/ rtsol ba med pa chos dang chos can ma grub par bstan pa'i le'u ste bdun pa'o//// de nas yang rig pa'i rgyal pos ye shes rig pa'i spyod pa 'di gsungs so// ye shes bde mchog kun tu bzang// rang byung nam mkha' rdo rje nyid// ci la spyod kyang chags pa med// sgo gsum bag yangs lhug pa nyid// snang med rang byung ye shes gsal// rang gzhag ye shes spyod pa la// blang dor gnyis med bde chen ngang// mkha' mnyam ye shes rang byung la// dus gsum 'da' ba med par gnas// rang 'bar ye shes dkyil 'khor nas// dngos grub rin chen 'od ltar 'byung// ye shes rgya mtsho mu mtha' med// 'od gsal rig pa'i gdeng ldan la// mtshon pa lam gyi rgyu dang bral// rang byung lung gi don mthong bas// lung chen tshad ma kun gyi bdag/ rig pa'i ye shes brjod bral bas// brjod pa'i lung la sems mi 'jug/sems nyid rig pa'i sgron ma ni// rin chen me shel ltar gsal bas// rin chen man ngag kun gyi bdag/ kun gsal me long mthong thob pas// rna brgyud sgra la rag ma las// chos nyid nam mkha' lta bu la// rang byung gsal ba'i nyi ma shar// bsam sbyor blo yi dri ma dag/ 'dod 'jug rim rtsol kun dang bral// bsam med rang bzhag spyod par gnas// sku gsum rig pa'i dkyil 'khor nas// thugs rje nyi ma'i zer shar nas// 'gro 'dul spyod pa ci bder spyod// thabs kyi rig pa rang shar nas// ye shes gsal bar 'gro don mdzad// ye shes rang byung 'dren skur shar// sna tshogs sprul skur rin chen spros// gang dag dman pa'i 'khor dag la// blo dang mthun pa'i bstan pa bkod// 'dod pa'i blo yis dpag med kyang// thig le gcig las 'das pa med// sbyor ldan blo yi theg pa rnams// ye shes thugs kyi skur byung nas// rang byung gcig la bstan par zad// rim 'jug blo yi theg pa rnams// 'dren pa'i sku yis drang don bstan// nges pa'i theg gcig snying po la// 'dod pa'i yan lag kun dang bral// bstan pa'i rnam pa ma lus kun// ye shes rig pa'i bka' la rdzogs// zhes gsungs so// byang chub kyi sems rin chen 'khor lo las/ spyod pa bstan pa'i le'u ste brgyad pa'o//// de nas rig pa'i rgyal pos/rang byung rdzogs pa'i dkyil 'khor 'di bka' stsal to// sems nyid rang byung dkyil 'khor la// ma bcos rig pa lhun grub ste// mtha' dbus med pa'i gzhal yas na// rang dbang ye shes rdzogs sangs rgyas// rang byung rig pa 'khor mtha' med// lhun grub pho brang chen po ni// spyan drangs ma yin ye sangs rgyas// rang byung gsal ba'i sngags ldan pa'i// lha yi snying po dbul mi dgos// bde chen gsal ba'i don ldan pas// ye shes gsang ba'i dkyil 'khor mnyes// rang byung gsang ba'i sems nyid kun gyi lha// dus gsum 'du 'bral med pa thugs dam mo// rnam dag rig pa ka dag la// nyes pa'i dri ma dang bral ba'i// ye shes dam tshig rnam par dag/ brjod med rig pa'i don mthong na// rang byung gsal ba'i dam tshig thob// rang bzhag sems las mi 'da' na// mi rtog dam tshig nyid yin pas// rang byung dam tshig rnam par dag/ mi rtog ye shes 'dzin bral la// bsod nams ye shes lhun gyis grub// rdo rje gsang ba'i dkyil 'khor ni// 'gyur med rang byung kun tu bzang// ye shes gsang ba'i dkyil 'khor ro// mtha' dbus med pa'i snying po la// spang len med pa'i sems kyis 'jug/ rang bzhin rnam dag dbye ba med// lhun grub rang bzhin ye sangs rgyas// rang rig 'od gsal rnam par dag/ye shes gang mtshon mtshan nyid mtshan// lhun grub rang rig kun tu bzang// ye shes rdzogs pa'i dkyil 'khor blta// gzung 'dzin dang bral dri ma med// ye shes sgyu ma kun tu bzang// rang byung sgyu ma ngos bzung med// rnam dag rang byung dkyil 'khor gsum// ma skyes lhun grub bya ba med// don la gang 'jug sbyor ldan rnams// yi ge brda med gnyis med gsal// sgyu ma bya bral rig pas rtogs// rang snang rig pa'i 'od la bzhugs// bsam med rang bzhag sa le ba// ci yang ma yin gyi na ba// rang gsal ye shes nyi ma'i 'od// kun bzang rgyal ba'i thugs dam mo// zhes gsungs so// de nas sems dpa' rdo rjes 'di skad ces zhus so// snang med rang snang bde chen la// brtags pa'i snang bas gnyis su mthong// rang bzhin rnam dag gser bzhin yang// thog med dus nas don ma mthong// dus 'dir sbyor 'jug gang dag ni// gsang ba'i don la mos pas 'jug/ gsal byed rin chen sgron ma gang// 'dzin pa'i dri ma gang gis dag/ bde chen gsang ba gang gis mnyes// zhes zhus so// de nas rig pa'i rgyal pos bka' stsal pa// bsam gyi mi khyab dus gang la// gang ldan rig pa'i lde mig gis// rin chen sems nyid khong du chud// snang ba'i snang ba ci 'gyur yang// yid la mi byed rang bzhag na// 'dzin pa'i dri ma rnam par dag/ces gsungs so// byang chub kyi sems rin chen 'khor lo las/ dkyil 'khor gsang ba'i le'u ste dgu pa'o//// de nas rig pa'i rgyal pos sems dpa' rdo rje la 'di skad ces bka' stsal to// sems nyid gsang ba sngags kyi lha// rang bzhin dag pas sbyang mi dgos// ldan pa de nyid tsam du zad// rang rig rdzogs pa'i ye shes la// ngo bor grub pa gang yang med// rtog pa'i mthu yis cir yang mthong// me long dag pa'i gzugs brnyan ltar// ye shes gsang ba'i gdams pa yis// rig pa'i ye shes kun tu bzang// yi ge med pa'i don du mthong// rang gsal rjes su rang bzhag na// ye shes rdzogs pa rjes su dpag/rang rig rdzogs pa nyid na gsal// ye gsal rig pa'i 'khor lo la// 'dod pa'i blau yis gang rtsol ba// rang 'dod theg pa'i khyad par ni// gsang ba'i don la ma lus stong// 'dod pa'i stobs kyis phongs nas rtsol// rang gsal 'khor lo'i don dang 'gal// 'dod rgyus gsal ba'i ye shes kyang// rtsol ba nyid las 'da' ba med// rdzogs pa'i ye shes bde chen ni// rang bzhin rig pa'i 'khor los dag/rnam dag rang byung 'od gsal la// glo bur sgrib pa ngang gis med// rang bzhin ma yin rkyen gyis snang// rangabazhin ngo bo gang dag ni// glo bur rkyen la rag las min// rang gsal rig pa'i rang bzhin dang// 'khor ba'i rtog pa'i rang bzhin gcig/ gang la spang bya ma yin te// gang gi rnam pa de gang bzhin// de bzhin 'gyur ba de nyid med// sems ni ji bzhin mnyam pa nyid// sangs rgyas thugs kyi rnal 'byor ro// yang dag lam la yi ge med// snying po nyid du bdag 'jug pas// thob pa med cing spang ba med// rig pa'i thugs la gsal bas gsang// byang chub sems kyi ye shes ni// rnam shes dmigs pa'i yul las 'das// rig pa 'od gsal gzung 'dzin med// byang chub snying por bzhugs pa'i tshe// ngo bo nyid ni dmigs su med// ye shes kun bzang rnam par dag/ 'bar ba'i ting 'dzin ngo mtshar che// rang gsal rig pa cir mi dgongs// bde gshegs 'khor lo ngo bo ni// mi 'joms pa yi rdo rje 'chang// kun byung rin chen lta bu'i 'od// skyon khyad ma grub 'od gsal nyid// bcos med dgongs pa ci yang min// gzhan na de la de bzhin pa// shes pa du ma gang ma nges/ de 'od nyid la de ltar 'gyur// rtsol 'jug gang dag de don la// mthar 'gyur de bzhin de la 'byung// des na gnas pa'i don yin na// bde ldan rig pa'i sangs rgyas la// rtog pa'i rnam pa kun med pas// gang zhig 'bras bu ji ltar 'dod// sbyor ldan don la yin pas na// de bzhin thams cad dag par 'gyur// zhes gsungs so// byang chub kyi sems rin chen 'khor lo las/rig pa rgyu rkyen gyis ma bskyed pa'i le'u ste bcu pa'o//// byang chub kyi sems rin chen 'khor lo zhes bya ba'i rgyud rdzogs so//// bar 'dir rdo rje sems dpa' nam mkha' che rgyas pa rnal 'byor pa'i rgyud 'dzud/

CLOSE WINDOW