CLOSE WINDOW

Gpb008.014
བོད་ཡིག

rgya gar skad du/ bo d+hi tsit+ta ma hA san+ti dz+nyA na sap+tA ka ra tan+t+ra/ bod skad du/ byang chub kyi sems rdzogs pa chen po ye shes bdun 'byung ba'i rgyud/ dpal ye shes rdzaugs pa chen po la phyag 'tshal lo// 'di skad bshad pa'i dus gcig na/ bcom ldan 'das rang bzhin ye shes rdzogs pa chen po/ gsang ba'i 'od gsal ba bde ba'i ngang nyid/ lhun gyis grub pa'i bdag nyid/ ma lus pa gcig gi rang bzhin thig le chen po nyid/'og min gyi gnas/ chos kyi dbyings mtha' dang dbus med pa'i de bzhin nyid/ rig pa 'pho med pa'i gzhal yas khang/ cir yang gsal ba'i rgyan gyis bklubs pa na/ bcom ldan 'das rang bzhin rdzogs pa chen po de/rang bzhin gyi 'khor dang/ rang bzhin la lta ba'i 'khor dang/ rang bzhin nyid la gnas pa'i 'khor dang/ rang bzhin mngon du gsal bar gyur pa'i 'khor dang thabs cig go// de'i tshe na brgya byin lha'i dbang pos/ gdul bya'i don shes nas/ phyogs bcu'i rgyal ba la 'di skad ces bskul to// dus gsum rgyal ba thams cad kyi// thun mong bya ba mthar bton nas// gang la nye bar mdzes pa yi// dam pa'i gsang ba gsung du gsol// rtsol bral rig pa'i khyad par la// gnyis pa'i don de mi gnas te// de nyid snang ba'i byin rlabs las// ji ltar 'dod pa so sor gsal// zhes bskul to// de nas phyogs bcu'i rgyal ba thams cad kyis/ de bzhin gshegs pa rdo rje sems dpa' la mgrin gcig tu 'di skad bskul lo// rang gsal rig pa mchog gi sku// rtsol bral bstan pa thugs la rdzogs// 'dod 'byung 'bar ba'i nor bu ltar// gdod nas kun rdzogs bdag tu gsal// rig pa lhun rdzogs dbyings la bzhugs// bdag gzhan mi mnga' phyogs ris bral// nam mkha' mi 'gyur rtag par blta// rang gsal lhun grub rig pa khyaud// gang la rkyen gyis bskul ba ltar// thugs rjes sems dpar bstan du gsol// zhus so// de nas rdo rje sems dpa' la bskul bas/ lha'i dbang po'i ngol gsang ba'i bdag por snang bar gyur to// de nas lha'i dbang pos 'di skad ces gsol to// rgyal ba kun gyi gsang ba'i thugs// kun 'dus byang chub sems kyi ngang// rang gsal nyag gcig dri med pa// bde chen khyed kyi sku mchog gis// brjod bral gsang ba'i chos nyid 'di// tshig dang yi ge kun bral yang// de nyid brjod pas go bya'i phyir// ye shes gsal bar gsung du gsol// zhes zhus so// de nas phyag na rdo rje de nyid rang gi ye shes gsal ba zhes bya ba la snyoms par zhugs te/rang nyid lta bu'i 'khor rnam par bkod pa las/ rnam par langs nas 'di skad ces bskul to// rang byung rig pa'i 'od 'bar bas// kun gsal nyams myong bral ba 'di// brjod med rig pa'i don go nas// rtsol bral don la dgod du gsol// zhes zhus so// de nas skyes bu dam pa des/ 'di skad ces bka' stsal to// rang byung rig pa mchog gi don// rang rig 'od gsal gsang ba'i nyams// 'dzin pa'i dri ma kun gyis dben// brdzod bral rig pa dbyings la bzhugs// 'bar ba'i 'od kyi rnam pa ltar// kun tu gsal zhing nyid du gnas// rang gsal rig pa chos dbyings la// cho 'phrul bdag rdzogs gnyis pa med// rna brgyud dag gi sgra tshig gis// 'phrul gyi me long ji bzhin du// gzhan mi btsal te rang la rdzogs// ci yang ma yin cir mi dgongs// bsal med mi g.yo mchog gi lung// ji bzhin nyid la ji bzhin gsal// rkyen bral brda phrad don gyi lung// brdzaud med gsang ba'i nyams kyis so// rang byung mchog gi snying po la// yengs pa med pa'i sems kyis gnas// rang gsal dmigs bral cir mi dgongs// shes med gsal ba mar me ltar// yin no gang du'ang sems pa med// 'gyur med chos kyi g.yung drung la// ci dgar bzhag pas g.yo med lung// yul med bsam bral sgro skur can// ting 'dzin rig pa'i 'khor lo yin// bag chags 'dzin pa rnam par gcod// nam mkha' gsal ba'i mar me ltar// gsal la dmigs pa rnam par bcad// 'byung 'jug med pa'i thig le yis// gsang ba rig pa'i 'khor lo gang// ma rig gsal ba'i me long gis// khyab pas nam mkha' rjes su blta// rang byung rig pa rang gsal skyes// rgyu rkyen bral ba'i dbyings la rdzogs// bsam pa spangs te dbyings la gnas// mi 'byung mi 'jug gnyis med ngang// spyad med de ltar rang bzhin gzhag/ btsal bral chu yi rang bzhin ltar// ma bskyed der bzhag don gyis gsal// de nyid nges pa'i don 'di ni// bsam gyis mi khyab dus nas shes// mi tshol 'od kyi snying po ltar// 'du 'bral med par ye nas rdzogs// de kho na nyid yul med la// gnyis med rig pa gcig tu 'bar// gti mug sgo nas bde ba rgyas// kun 'joms re ba'i snying po 'dra// mtha' bral mngon par mtho ba la// mtshan bral mi tshud gcig las med// des na rang bzhag dgongs patas gnas// kun la bsal te gcig la son// 'gyur med sems kyi dgongs pa'o// ye shes bdun 'byung gi rgyud las/ gleng gzhi gsang ba'i le'u ste dang po'o//// kye sems dpa' chen po/ rang bzhin thams cad nyams kyis ni// bsdus te thig le gcig tu gsal// rang gsal 'gyur med ye shes kyis// ji bzhin klong du gsal bar gnas// 'khor ba rang gsal nyid du bde// nam mkha' khyab pa'i 'od dang ldan// gsal ba nam mkha'i snying po ltar// khyab pa kun gyi rjes su song// snang ba nam mkha'i mtha' ltar yangs// 'phrul gyi me long gsal ba'i 'od// phyogs ris med par kun la 'char// rgya mtsho gsal bas yid brtags pas// khyab par gsal bas dbyings la bsdu// ma bcos rang byung snying po la// sgro skur dag pa'i dbyings la 'das// bsam pa med pa'i 'du shes can// rgyu ba'i yu ba rnam par bcad// kun snang 'od gsal nyag gcig po// ci yang yin no gang yang rung// ma bkag yon tan de ltar gsal// rang rig yul med chos kyi dbyings// rang gsal ye shes kun tu bzang// rang byung rkyen bral 'jig pa med// ye shes snang ba rnam par dag/rdzogs pa'i ye shes klong du thim// mkhyen bral gti mug chen po la// shes dang mi shes yongs kyis med// rang gsal lung la kun rdzogs pas// gnyis pa'i chos dang gdod nas bral// rang bzhin 'du 'bral med pa nyid// thig le gcig tu kun rdzogs so// gsang ba'i me long thabs kyis shes// kun 'byung ye shes phung po la// gsang ba'i thabs kyis rtogs gyur na// btsal bral 'od ltar khyab par 'byung// kun la phyogs ris med par snang// phrad dang ma phrad nus pa las// de ltar de lta nyid du snang// phrad dang thob pa med pa yis// mi snang mi gsal rang bzhin gsang// sngon 'gro'i shes rab sbyangs pa yis// lus dang srog la mi dpyad de// rna brgyud thob phyir dbul bar bya// ye shes rang gsal thabs rdzogs pas// ma brjod rig pa'i thabs kyis go// rang bzhag rig pa'i thabs kyis 'di gnyis med pa 'dra go// rang bzhag rig pa'i shugs kyis go// rang bzhag rig pa shugs kyis gsal// 'gyur med gsang ba'i don la bzhugs// kun 'dus rig pa gsal ba'i nyams// brjod par mi rtog nyams kyis gsal// gsang ba'i me long gsal rdzogs pas// brjod bral bla ma'i thabs kyis shes// gsal ba'i mar me dbyings la khyab// rig pa'i 'od gsal mchog gi thugs// gtad med yul la dus gcig rdzogs// gsal ba mi mngon dus gcig mchog/ nges pa dus tshod de kho na// gsal med 'du shes bral ba med// rig pa'i klong la kun tu bzhugs// gang yang ma yin 'od gsal yin// mi 'brangs mi spyod yul dang bral// brda phrad rig pa shugs kyis go// yang na nam mkha'i sa la'o// yang na chu bo'i rgyun la'o// yang na gsal ba nyid la'o// yang na mtshan ma'i sgra la'o// yang na de nyid gang min par// rang bzhin rig pa gzhag pas ni// chu la chu ltar gsal bar gnas// mi shes pa nyid ma yin pas// 'byed pa med pa'i ye shes 'grub// rang gi nyams myong kun bral bas// brjod bral bstan pa rgya mtsho'i mdzod// sgra bral rig pa thugs la rdzogs// gsal la bsam du med pas na// dmigs med rig pa rang gsal lung// thams cad rig pas mngon par shes// bsam du med pas 'dzin dang bral// sa le dmigs bral gcig gi ngang// mi spyad mi 'dzin bsam du med// mtha' yi 'du shes rgyu ba med// bsam pas bsgribs pas don mi shes// gang du'ang mi bsam mi spyad de// rang gzhag rig pa nyid kyis gsal// nyams myong bsam rtog yul zhes bral// rang byung nyid la nyid mi 'byung// rjes mi 'brang zhing yul mi tshol// mi 'phro mi sdud mi bcos te// mtha' dbus de bzhin nyid mi 'tshol// de bzhin nyid du rang bzhin gnas// kun kyang rang gsal thig le nyid// spro bsdu med pa'i dbyings la 'du// 'das dang ma 'das chos kun kyang// rtsol bral 'od la rtag tu bzhugs// chu yi gnyer ma ji bzhin te// rig pa 'od gsal dbyings la thug/rang la spro zhing dbyings la 'du// nyi ma gsal ba'i snying po ltar// gsal la ma 'dres lhun gyis rdzaugs// kun kyang shi len na len 'dra// gang yang ma yin gcig tu gnas// ma yin kun kyang rig pa ste// rig pa min la ma rig min// ri bo mes bsregs kun tshig ltar// rtogs pa'i rig pa rang gsal ba// 'dzin pa mi gnas rang gsal bar// spang ba med pa mnyam du gnas// gcig po ye shes rdzogs lung la// don bral mnyam pa'i sems kyis blta// de nyid rig pa 'od 'bar lung// brjed med gsal ba'i don yin no// ye shes bdun 'byung gi rgyud las/ ye shes snang ba'i le'u ste gnyis pa'o//// kye sems dpa' chen po/ rang gsal ye shes mnyam nyid la// sgra tshig brjod pa'i rig pa yis// rdzogs pa'i ye shes mngon gyur na// ye shes 'od gsal nyid du nges/ ma bslad rkyen bral nyag gcig pa// rim pa ma yin dus gcig gsal// rtsol bral rig pa cir mi dgongs// cir snang rang gsal nyid kyi dbyings// ma btsal ma sbyangs ye nas grub// rig pa ma btsal mngon sum dbyings// smon du med pa rang la rdzogs// dus med rang rig gsal ba'i lung// bskyod med chos dbyings dam pa nyid// kun kyang rig pa nyams su skyes// 'byung 'jug mi gnas cir mi dgongs// ma bslad ma bcos ye nas 'byung// brgya byin nor bu ci bzhin du// ma btsal gdod nas lhun gyis grub// rig pa ye shes 'od gsal du// mnyam dang mi mnyam chos mi gnas// mtha' dang dbus med ye shes klong// phyi dang nang med chos kyi dbyings// ma skyes pa dang mi gnas pas// ma chags pa dang lhun gyis grub// gdod nas dag pa chen po la// sbyang zhing bgrod pa ga la yod// dus gsum rgyal ba'i snying po ni// rig pa'i ye shes rang gsal yin// zab mo gsang ba'i nges don la// phyogs dang phyogs min chos mi gnas// rig pa rang gsal ye shes nyid// sbyang pa ma yin gdod nas grub// gnyen pos ma btsal de bzhin nyid// ma bcos mi gnas rang bzhag pas// ji bzhin rang byung gnas pas gsal// snang srid 'khor dang 'das pa kun// rang byung rig par rang gsal bas// sgro dang skur pa'i chos mi gnas// btsal med ye shes gsal ba ni// khyab par gsal ba'i dmigs dang bral// 'du 'bral med par ye nas 'byung// dmigs bsam mi spyad rang byung nyid// rang gsal rdzogs pa nyag gcig po// du ma'i chos kun rdzogs pa'i ngang// che chung med par ye nas mnyam// rang byung dbyings las ma g.yos par// kun la snyoms pa'i thugs rje 'char// ci yang yin no gang yang rung// bsal med rig pa'i ngang la bzhugs// brjod bral mi gnas tshig dang bral// de rtogs sgra yi 'khor lo yis// rig pa'i ye shes 'od du 'bar// gsal 'dzin mtha' yi thag pa bcad// rang gsal brda yis gsal bar byed// sbyang med shes rab rnam gsum gyis// rig pa bde mchog gsal bar shes// gang zhig de yi rjes 'brangs na// rig pa rang gsal don mi mthong// ye shes gsang ba'i don las gol// bde mchog gsang ba'i lam dang bral// mtshan ma 'khor ba'i lam du brgyud// rang byung gsal ba'i lam ma shes// rang bzhag rig pa'i rgyud tshig gis// ji bzhin ma bcos ngo bo la// brjod bral rang bzhag dgongs pa yin// rang byung dbyings las gsal bar byed// ma bcos gsang ba'i dgongs pa la// bcos ma'i rnal 'byor log pa'i lam// mtshan bral bcos med snying po la// 'dzin pa'i rnam rtog log pa'i lung// gang dag rang 'dod phyogs cha yis// 'dzin pa so sor mthong ba yis// phyogs bral ye shes chen po la// btsal zhing spyad pas don mi mthong// cir snang gcig gi ngo bo la// yengs pa med pas kun tu gsal// nyams myong brjod bral bsal 'dzin med// 'di la phyogs ris gdod nas med// rang bzhag rig pa shugs kyis go// ma brjod brda yis gsal bar shes// dus gcig ye shes rang gsal bas// gnyis 'dzin phra rags kun gyis dben// 'dzin med mkha' la nyi shar ltar// gsal la stong pa 'du shes med// gang yang mi gsal 'byed med lung// mi bsam rig pa cir mi dgongs// rang bzhag dgongs pa bsam mi khyab// yul bral shes pa 'dzin rtsol med// ma yengs bsam med brjod bral lung// rang gi nyams kyis gsal bar shes// dbus mtha' med pa'i rig pa la// mi 'jug bsam pa'i sems kyis gnas// gang du'ang mi bzhag rten bral bas// gzhag tu med pa'i don 'di la// de bzhin nyid la goms pa yis// dus gsum ma bcos dgongs pas gzhag/ rdo rje sems dpa'i dgongs pa'i don// ma bcos rig pas gsal bar shes// tshig min don du mnyam sbyar nas// gang ltar bltas pas de ltar bzhag/ 'di ni rig pa'i nyams su brjod// gdod nas ma bcos lhun grub la// mtshan ma'i brda yis mnyam sbyar nas// yengs med rang gsal bde chen la// ye nas de ltar gnas bzhin bya// bde ba de yi don go na// btsal med 'di ni rang la shar// rgyal ba'i dgongs pa dbyings la gtugs// spyod lam gang ltar bde ba bzhin// rang rig gsal la mnyam par bsgom// ma spangs ma btsal shugs kyis gsal// bum pa'i rlan ltar de bzhin na// ma btsal rig pas 'grub par 'gyur// btsal na 'dzam chu rdo gzugs ltar// 'od gsal 'khor ba'i khams su 'gyur// mi bsam mi dpyad dgongs pa'i klong// yengs med mtshan ma'i sgro skur bcas// gcig gis kun gyi rang bzhin gsal// dang po de nyid rang nyams rdzogs// ma bcos nyams myong ting 'dzin te// 'khor ba rang gsal snying por grub// thams cad gsal ba'i maN+Dal// gsal la 'dzin med rang bzhag blo// ma bcos mnyam par gnas par bya/ ye shes bdun 'byung gi rgyud las/rang bzhag rig pa'i ye shes mnyam par rtogs pa'i le'u ste gsum pa'o//// kye sems dpa' chen po// ye shes goms dang rtags nyid dang// tshul dang blo yi tshul nyid de// rang bzhag thug phrad mnyam nyid de// rang byung rang gi nyams la shes// rang gsal ma yin gzhan las min// gnyis kas ma yin khyad par gsal// rang rig yul med dus gcig gsal// yin dang ma yin phyogs med klong// kun gsal rig pa'i sgo phye nas// yengs med ma bcos don la zhugs// snying rje bsam med phyogs su brdal// yul med ma bcos de bzhin nyid// ma bsams mi gnas khyad par 'gro// ye nas rig pa'i klong du zhugs// brjod bral gsang ba'i gter la spyod// gsang ba'i rig pa lung gi tshul// 'di dang gzhan zhes 'dzin sems bral// blo yi rig pas cir mi dgongs// gnyis med rang gsal ye shes la// dran bsam rig pas ci brtags kyang// bya bral rig pa cir mi 'dzin// bsam pa'i blau yis cir mi spyad// rang bzhin 'khor lo rim par bskor// 'jug med 'jug bral dgongs pas gnas// bsam gyis mi khyab chos kyi dbyings// mtshon pa lam gyi rgyud dang bral// gsal bar shes te rgyu ba bral// cir yang mi 'dzin de bzhin nyid// gdod nas lhun gyis grub pa'i ngang// rang byung 'od gsal gcig la rdzogs// mi gnas rig pa'i dkyil 'khor la// ma bsal ma bsgrubs gdod nas gsal// 'byung 'jug med pa'i ye shes kyis// yengs med dbyings la thabs kyis 'jug/ 'khor ba ye nas sangs rgyas pas// 'od gsal dag pa nyid du gsal// ma bsgribs kun la khyab pa'i 'od// thams cad gsal bar rang bzhin 'char// 'di la sbyang bgrod yul dang bral// 'di la bsam dpyod mtha' dang bral// 'di la rtsol bsgrub mtha' dang bral// 'di la dgag bsgrub kun las 'das// kun gyi snying po rang byung la// rig pa gsal bar nyams myong la// kun kyang rang gsal mnyam par mkhyen// yul med rang gsal gcig gi lung// du ma gcig tu gsal bar shes// kun kyang lhun grub snying po nyid// du mar 'dzin pa'i chos mi gnas// mi bsam mi dpyad rang bzhin gzhag/ nam mkha'i rdo rje rnal 'byor pas// snang srid thig ler mnyam sbyor zhing// nam mkha' 'od gsal mnyam par mkhyen// chags pa mi mnga' zhen pa dag/ mi 'phrau rang gsal gnas pa dang// 'khor ba lhun grub snying por gsal// ma bcos gsang ba'i sgo phye nas// dam pa lung dang rigs pa 'phrad// rgyal thabs rig pa gdeng gis 'phags// snying rje phyogs ris med par 'char// ting 'dzin rig pa klong du son// ma chags dag pa'i spyod pa yis// kun bzang mdzad pa'i nges pa can// khams gsum sku gsung thugs gsal bas// sku gsum zhing du rig pas sbyor// ye shes rol pa rang 'char bas// phyogs ris med pa kun las 'byung// rdzogs pa'i 'od gsal mnyam sbyor bas// thugs rje'i dkyil 'khor rang bzhin 'char// byin rlabs ye shes 'od 'chang bas// ma lus snying po nyid du mthong// gdod nas ma bcos 'od gsal bas// ma yengs gsal ba'i gdeng gis bzhag/dpal ldan nam mkha' rgyal ba'i sku// ma bcos nyi ma'i snying po ltar// drod rtags cho 'phrul rang bzhin thob// dmigs med lhun grub rol pa ni// mdzad pa'i gar thabs sna tshogs pa// rig pa gsal bar thabs kyis shes// nyams myong mi sel bsam pa spangs// sku gsung rang bzhin dus gcig rdzogs// snying po rang bzhin khyab pa ni// gcig gis kun gyi rnam pa 'dzin// bsam gyis mi khyab dus gcig 'brel// tshul ni gang du'ang mi spyod pa// yengs pa med pa'i rang bzhin gyis// bsam gyis mi khyab dbyings la gsal// bdag min gzhan min gang yang min// ma bcos chu la chu bzhag ltar// rang bzhag rig pas gsal bar shes// sgra bral rig pa'i ye shes kyis// ma btsal gyin 'dar bshad pa go// ma bcos gsang ba'i rnal 'byor pas// ma brjod rdzogs pa'i shugs kyis go// mi spro mi bsdu gsal bar gnas// tshig bral bstan pa rgya mtsho'i mdzod// dbyings las dbyings gsal sgrib pa med// ma bcos rdzogs pa'i rnal 'byor la// 'di yin 'di min phyogs ris med// blo yi rang bzhin ma skyes pa// rig pa'i rang bzhin bsam dang bral// phyi dang nang med bde ba'i klong// gsal la dmigs 'jug mi gnas pa// zag med mkhyen pa nyid kyi ngang// ma yengs ma btsal sems kyi gnas// 'di ni rang rig sems kyi lung// brjod bral rig pa nyams kyis gsal// drug thug kyang 'phrad dran rig med par gsal// ye shes bdun 'byung gi rgyud las/ ye shes rang gsal gyi le'u ste bzhi pa'o//// kye sems dpa' chen po/gang gi rang bzhin gsal ba la// log pa'i phyogs kyis bsgrib pa de// rang gsal brda don phrad pa yis// btsal bral rig pa 'char bar 'gyur// kun 'byung snying po byang chub ni// rnam par mi rtog rgya chen zab// dmigs bral rig pa'i klong du 'das// drug gi chos dbyings bzhin yang yul med pa// rang byung snying po gcig la rdzogs// ye shes mkha' mnyam sgra don med// gsang ba'i ye shes rig pa'i lung// sgro skur med pa nyid du bstan// phyogs med ye shes khyad par gsal// kun 'byung sgra brjod bral ba la/ thig le spros bral mkha' ltar dag/ rang byung dag gi snying po la// gang ltar brtags pa phyin ci log/ zhen drug log pa'i rtsol brgyad kyis// ma bcos gsang ba'i dgongs pa bslad// 'dzin sems log pa'i lcags kyis bcings// mtshan ma 'khor ba'i 'dam du bzung// zhen chags log pa'i mdud pas bcings// phyogs bral phyogs su bslab pas 'khor// log pa'i ri bos mngon du bkag/ spros bral 'bar ba'i ye shes la// mtha' yi zhen pa mi gnas kyang// don la log pa'i byis pa yis// rnam rtog 'khor ba'i khams su brtags// dung la ser por 'dzin pa ltar// dngos la gnas pa ma yin kyang// log par mngon par zhen pa'i mthus// rang snang ma bcos zhen par brtags// yod med mthong ba 'khrul pa'i lam// de nyid mthong bas grol bar 'gyur// spang 'geg 'khrul pa ngal ba'i lam// ma bcos rtogs pas gol bar 'gyur// gzung 'dzin lta ba gnyis kyi chos// gnyis 'dzin bral bas grol bar 'gyur// gnyis kyis gcig pa'i nyes med lam// gcig tu rtog pas grol ba'i lam// spong len mthong ba che chung la// gsang ba'i nges bstan gcig gis grol// bsnyen bsgrub dag pas dag pa bsgrub// ye nas zin pas gzod sgrub rtsol// btsal med rtog pas grol bar 'gyur// rgyu 'bras 'dzin pa gnyis kyi lam// gnyis med rig pa 'grub par 'gyur// brda don phrad pa'i rim pa yis// rig pa gsal ba'i don rtogs na// mi rtog rnam grol bde bar gshegs// gsal la nyams myong gang yang min// 'du shes kun bral dbyings nyid du// rig pa mkha' ltar gnas par bya// tshad ma mngon sum chen po la// rjes dpag shes pa phyin ci log/ mngon 'byung rang gsal rig pa la// rjes 'jug mtshan ma cir mi dgongs// gnyis med gsal bar rtogs pa la// mi bsam mi spyad gnas na grol// ji ltar gnas pas bzhag par bde// rang bzhag rig pa chen po la// yengs pa med pas yang sangs rgyas// ye shes gsal bar gnas pa yis// che mchog bla na med pa'i sa// nges rtogs lung gis de ma thag/ rang byung byin rlabs ngo mtshar che// gsang ba'i me long thabs kyi tshul// 'du shes bral bas rab tu bde// ye shes bdun 'byung gi rgyud las/ ye shes gsang ba'i le'u ste lnga pa'o//// kye sems dpa' chen po/ rang byung rig pa mchog nyon cig/rdo rje gsang ba rang byung ba// rgyu med rkyen bral chos kyi sku// rig pa'i 'khor lo bsam mi khyab// gsang ba'i 'khor lo rtogs par dka'// ye shes 'khor lo gsang ba'i ngang// ting 'dzin gsal ba'i mar me la// bsam pa'i 'dzin pa kun dang bral// kun la gnas kyang bsam dang bral// mkha' gsal mnyam pa rig pa'i dkyil// snang 'byung rig pa 'bum phrag yas// gsal la dmigs pa med pas na// bsam med dran med mi g.yo ba// rnam par mi rtog mchog gi lung// spyod lam rnam bzhi mi gnas pas// mi ldog ye shes ngo bor gsal// snang ba rnam rtog cir mi blta// dran 'byung rtog pa'i rjes mi 'brang// ma bsgul ma rnyogs chu bzhin du// ma bsal bzhag pas sgrib pa 'byung// mi rtog mkha' ltar gsal ba la// ye shes nyi ma phyogs brdal bas// ji bzhin rang bzhin rnam par dag/ rgya mtsho g.yo med ji bzhin du// rnam rtog mi g.yo cir mi dgongs// rang byung gsal ba nam mkha' che// ma lus gsang ba nyid la 'dus// gsang ba kun 'dus rig pa'i gter// mkha' khyab rig pa'i sems nyid ni// khyab par gsal la 'dzin pa med// rang byung rig pa rang shar ba// khyab par gsal la dngos po med// rang rig gsal ba'i ye shes kyis// ma bsgribs gsal ba nyid du mkhyen// rtog med 'od gsal sems kyi dbyings// gsang ba rang byung rig pa'i klong// rdzogs chen thig le ji bzhin la// mnyam par dgongs med rig pas gzhag/ byung tshor g.yo 'gog ji snyed pa// gsal med rig pa nyid kyi gsal// rdzogs chen ma bcos dgongs pa la// gang ltar bcos pa log pa'i lam// ma bcos rig pa mnyam sbyar na// sgro bral rig pa'i 'khor lo las// thugs rje rig pa'i byin rlabs ni// ma btsal nyi ma'i 'od ltar 'byung// gsal ba mtha' dbus med pa la// rig pa mnyam pa'i sems kyis blta// gtang 'dzin med pa'i rig pa yis// rang byung lhug par gzhag par bya// rang byung rig pa cir mi dgongs// rang gsal 'khor lo rgyun mi gcad// ye shes bdun 'byung gi rgyud las/ ye shes 'khor lo'i le'u ste drug pa'o//// kye sems dpa' chen po/ rang bzhag rig pa'i dgongs pa ni// ji bzhin mngon du gsal byas nas// rin chen 'bar ba'i 'od gsal bas// sems kyi dkyil 'khor 'bar bar byed// 'dzin bral rig pa'i chos dbyings la// bsam med 'gyur med mkha' ltar gnas// bsam gyis mi khyab chos kyi dbyings// gang dag byis pa'i 'du shes kyis// rang byung rig pa'i ye shes la// bsam bral rig pa'i mtshan nyid de// bstan pa don gyis go bar zad// dngos grub rin chen 'od ltar 'byung// zag med phra bkod mkha' dkyil la// nyi zla gza' skar bkram pa ltar// ma 'dres rig pa dbyings la gsal// de nyid mi gnas rang bzhin ni// kun 'byung rin chen phyogs med shar// 'phel 'grib rtog pa mi gnas pas// nyi ma'i 'od ltar lhun grub pa// kun la ji ltar 'dod par 'char// mkha' ltar khyab la gsal ba che// mi rtog dbyings kyi ngang la gsal// 'od dang 'od can ji bzhin du// ma btsal lhun gyis grub pa'o// ma yengs yal bzhag dgongs pa'o// bsam med rig pa'i gdeng gis zhi// sbyangs pa ma yin gdod nas dag/ ma bgrod bla ma'i sa mchog ni// dus gcig gnas pas bgrod du med// phyag rgya mi 'ching sngags mi zlos// tshogs dang mchod pa mi byed de// kha dog bri dang mchod pa yang// ma byas dngos grub mchog tu gyur// ji srid rtsol ba'i rnam grangs dga'// de srid log pa'i grong khyer te// ma btsal ma sbyangs gdod nas dag/ snying po rig pa'i phyag rgya can// gsang ba 'od gsal klong la 'jug/ brjod bral sgra yi dkyil 'khor la// nyan bral rig pa'i tshul gyis gsal// gsal ba nyid na mi dmigs pas// rtog bral nam mkha' dbyings kyi klong// 'di zhes bya zhing dmigs pa med// ji ltar gnas pa de bzhin gnas// rang bzhag rig pa yengs med klong// phyogs med ye shes khyab par gsal// gnyis med nam mkha'i dbyings ltar gsal// ye shes bdun 'byung gi rgyud las/ ye shes grub pa'i le'u ste bdun pa'o//// de nas gsang ba'i bdag pos/ 'khor bsam gyis mi khyab pa dang bcas pas/rdo rje sems dpa' la 'di skad ces gsol to// kye ma bcom ldan 'das/ rang gsal lhun gyis grub pas rtsol ba kun dang bral// bsam med dpyad 'dzin bral bas dgongs pa dam pa mchog/ ci yang mi bsam bsam pa rtogs pa'i rgyun// dgongs pa rang byung lhun grub khyod phyag 'tshal// bltar med spyad med mthong mang ye nas de bzhin nyid// lnga pa'i rgyal por phyag 'tshal gnyis med khyod la 'dud// mthong bar mi rig brda tshig kun dang bral// ma byas ma bsgrubs ma btsal lhun gyis grub pa'i ngang// rang gsal ma bcos rig pa gang yang min// thig le 'phro 'du ma yin bdag nyid lhun gyis grub// phyogs bral lhun grub 'od gsal rig pa rang byung dbyings// rtsol 'jig mi gnas gsal ba'i mar me 'dra// bstan pa'i rgyal po yang gsang rig pa'i gter la 'dud// de nas gsang ba'i yang gter 'di// rin chen gsal ba'i glegs bam 'di// ston pa rdo rje sems dpa' yis// gsal ba'i rig pa rgyas btab nas// mkha' dkyil sbas pa lha dbang gi// spyis blang yang dag dbang thob nas// sprul pa nyid la rab tu bshad// de nas rdo rje'i gdan stengs su// yang sprul thugs kyi sras rnams la// rgyal thabs spyi blugs dbang bskur nas// ma bgrod rtog pa'i 'jig las bsgral// rnam grol sa la bde bar gshegs// de bzhin 'od gsal rnal 'byor la// shes rab dag pas mnyam sbyor na// rdzogs chen lhun grub sa la sbyor// gang zhig dad pas 'dzin klog la// bsod nams brjod par mi nus te// skal ba dman pa'i yul min la// srog dang bral ba'i kha bzhin bya// rgyal tshab nges pa gcig la gtad// sbas pa thugs kyi nyi ma 'di// yang gsang rig pa'i gter du gzhag/ gnas kyang sgrom du nges par sba// ye shes bdun gyi rgyud las/rjes su yi rang ba'i le'u ste brgyad pa'o//// ye shes bdun 'byung ba'i rgyud sems kyi me long chen po rdzogs so// 'di mtshams rna brgyud zam pa 'dzud////

CLOSE WINDOW