CLOSE WINDOW

Gpb007.016
བོད་ཡིག

rgya gar skad du/ bod+hi tsit+ta badzra pra b+hA s+phar Na tan+t+ra pa Ta la nA ma/ bod skad du// byang chub kyi sems rdo rje 'od 'phro ba'i rgyud kyi rim pa zhes bya ba// bcom ldan 'das dpal gyi dpal smra bsam brjod pa las 'das la phyag 'tshal lo// 'di skad bdag gis thos pa'i dus kyi tshe// bcom ldan 'das dpal rdo rje sems dpa' nyid kun tu bzang po 'og min gyi gnas rig pa'i pho brang bsam gyis mi khyab pa'i dbyings// byin rlabs cho 'phrul rnam par 'phro ba zhes bya ba na byang chub sems dpa' rdo rje sems dpa' la sogs pa ril dang thabs cig go/ de'i tshe rdo rje sems dpas bcom ldan 'das dpal kun tu bzang po la 'di skad ces gsol to// dam tshig nyams par gyur pa la// gso ba'i thabs shig stsal du gsol// zhes zhus pas// bcom ldan 'das chos kyi rjes bka' stsal pa// sems dpa' chen po da nyon cig/shin tu rnal 'byor lha yi lha// rnal 'byor las kyang rnal 'byor mchog/ 'phags pa las kyang 'phags pas na// rdo rje rgyal ba kun gyi mes// rje btsan dam pa kun tu bzang// rdo rje 'chang rgyal 'jigs pa'i skyabs// nyams pa'i chad pa byung ba la// mgon btsun de las gzhan med do// dam tshig sems nyid yin pa ru// 'gro ba'i mgon pos yang dag gsungs// sems nyid dngos po med pa la// nyams pa'i chad pas ci zhig gcad// gang las nyams te ci zhig nyams// gang du nyams te ji ltar nyams// nyams par sems pa de nyid yin// ltung bar 'dzin pa de nyid yin// sems nyid dag pa'i chus bkrus na// dag par ma gyur gang yang med// stong nyid dben pa'i don rtogs na// bde dang sdug bsngal ming yang med// bde dang sdug bsngal sdug mi sdug/ bdag dang bdag med stong mi stong// de bzhin nyid du 'dzin pa yang// de nyid yin pas dngos po med// de la tha snyad ci btags kyang// thog tu phebs par ga la 'gyur// ma bcos rang bzhag rig pas mtshon// ji ltar nam mkha' zhig gyur na// de tshe chad pa 'byung bar 'gyur// chos nyid mthong bar gyur pa yang// ji ltar rang gi mdzub rtse la// rang gis rig pa'i dus byung na// de tshe chos nyid mthong bar 'gyur// zhes gsungs so// byang chub sems rje btsan dam pa rdo rje 'od 'phro ba'i rgyud las// nyams pa chad pa mi 'byung ba'i le'u ste dang po'o//// kye sems dpa' chen po// nyams pa zhes ni gang la bya// chad pa zhes ni ci la bya// nyams dang chad par 'dzin pa yang// de nyid yin te de mi 'byung// 'bras bu bsgrub dang grub pa ru// 'dod pa des kyang mi rnyed de// mdongs pas nam mkhar bsnyeg pa bzhin// byang chub sems kyi rang bzhin 'di// brtag dka' brjod du rdul tsam med// drug gi yul bzhin med pas na// so so skye bo'i blos ma reg/ byang chub gang yin sems ni gang// kun gzhi rang byung ye shes la// ngang gis spros med chen po la// che ba'i yon tan btsal du med// de nyid sems yin byang chub sems// ji ltar me yi rtse mo yis// rdzas kyi dngos po kun bsregs kyang// rang gi dngos po bsreg mi nus// de bzhin byang chub sems kyis kyang// kun shes rang rig ma shes te// gal te shes na shes pa'o// 'di la rtsol bsgrub byar yang med// dag dang ma dag gnyis med de// rang byung dag pa chen po la// med ces bya ba btags pa nyid// btags pa nyid la mi gnas na// byang chub sems lam gnas pa yin// gnas pa nyid na gnas med pas// gnas zhes tha snyad mi gdags so// dus gsum sangs rgyas sems las byung// sems la tha snyad yod ce'am// sems las kun 'byung thams cad sems// sems ni skye med de bzhin nyid// rang gsal thams cad sa le mkhyen// mkhyen pa nyid kyang sems yin par// sems dpa' chen po rig par gyis// byang chub sems rje btsan dam pa rdo rje 'od 'phro ba'i rgyud las// thams cad sems su bstan pa'i le'u ste gnyis pa'o//// kye sems dpa' chen po/ sems las 'khor ba thams cad byung// mya ngan 'das pa de bzhin te// byung ba yin te de nyid yin// yin zhes bya ba mtshon pa tsam// yang dag nyid la yin pa med// kun yin gang yang min pa'i phyir// ngas kyang yang dag rig pa bzhin// skal ldan rnams kyis shes par bya'o// rdo rje sems dpa' gzhan yang ni// nyon mongs pa nyid byang chub lam// phyin ci log nyid byang chub ste// yang dag pa nyid phyin ci log/ thams cad sems kyis byas pa yin// sems nyid rang la yod pas na// rang byung ye shes rang la yod// gal te rang la med na ni// de ni rang byung ye shes min// gzhan la btsal zhing bsgrub dgos pas// rgyu rkyen gnyis la rag lus pas// de la rang byung ye shes med// rgyu dang rkyen la rag ma lus// rang gsal nyag gcig dri ma med// rgyu rkyen ma bskyed rang byung ste// ma bsgribs gsal bas ye shes so// gdod nas snying po byang chub la// btsal ba'i bsam pas dbyings mi bskyod// 'dir bstan de la brten nas ni// snum pa'i thabs kyis brkyang pa'i phyir// 'tshams par mdzad pa'i skyes bu la// rig pa'i don 'di bstan par bya// gal te don 'di ma shes shing// byang chub sems kyi chu med na// rgyal ba rnams kyang skyes par 'gyur// gal te gzhan la rtsol ba ni// 'o ma 'dod pa'i btsun mo zhig/ rwa la 'jo ba'i btsun mo des// rwa las 'o ma rnyed mi 'gyur// 'di las kun byung 'di la son// 'di las ma byung gcig kyang med// byang chub sems rje btsan dam pa rdo rje 'od 'phrau ba'i rgyud las/ thams cad sems las byung bar bstan pa'i le'u ste gsum pa'o//// de nas rdo rje sems dpas gsol pa/kye bcom ldan 'das sems kyi ngo bo gang lags/ bcom ldan 'das kyis bka' stsal pa// sems dpa' chen po sems kyi rang gi ngo bo ni// ci yang min las cir yang snang// dpag med brjod bral bsam mi khyab// 'di zhes mtshon du med pa ni// sems kyi ngo bor de gsungs so// 'gro ba'i sdug bsngal snang ba yang// rang yin gzhan las de mi 'byung// bde dang thar dang longs spyod kyang// chos nyid dbyings las ma gtogs pa// rdul cha tsam yang med par gsungs// sku dang rgyan gyi 'khor lo yang// rang gi sems yin gzhan na med// sangs rgyas chos dang dge 'dun yang// rang yin de las gzhan na med// de phyir bkur ba'i yul yang med// bsrung med bsgrub med rtsol ba med/ kha dog dbyibs dang gnas ris med// bde dang sdug bsngal rgyu 'bras med// med pa ma yin kun bdag nyid// yod pa ma yin brjod du med// bdag med gzhan med 'chi 'pho med// med pa ma yin thams cad 'byung// 'byung ba ma yin de nyid yin// kun gcig ye shes khyab pa'i ngang// nam mkha'i chu yi ro mthun bzhin// dbye bsal med pa'i don du gcig/'di ni rang rig byang chub sems// 'di zhes bstan du med pa'o// ci yang med las cir yang snang// rang byung snying po mchog gi don// snang ba nyid na snang med pas// snang ba med pa'i tshul gyis snang// med ces bya ba 'dzin pa tsam// de nyid la yang gnas mi bya// gal te gnas na gol sa yin// gang zhig gol te ci zhig gol// gang du gol te ji ltar gol// gol bar snang ba de nyid yin// de nyid dngos po med pas na// de phyir de la gnas mi bya// gal te gnas na 'dzin pa yin// zhes gsungs pas rdo rje sems dpa' de nyid la gnas par gyur to// byang chub sems rje btsan dam pa rdo rje 'od 'phro ba'i rgyud las/sems kyi ngo bo bstan pa'i le'u ste bzhi pa'o//// kye sems dpa' chen po sems kyi yon tan ngas bshad kyis// sems dpa' khyod kyis mnyan par byos// sems kyi yon tan chen po ni// stong gsum rdul snyed sangs rgyas kyis// bskal pa bye bar brjod byas kyang// de la brjod par mi nus te// de ni ma bsgribs kun tu gsal// de ni kun gyi snying po nyid// sdug bsngal bye bas gdungs pas kyang// de la g.yos pa rdul tsam med// bde dang sdug bsngal thams cad kun// de yi longs spyod chen po ste// de yi dus na der mi 'dzin// ci yang mi dmigs chos kyi sku// cho 'phrul rang bzhin de la 'gyed// 'gyed pa ma yin de nyid yin// spros med bsdu med yi ge med// rtsis las 'das pas lhun grub sku// der gzhol der ni mchod pa'i sprin// klong du gnas pa'i sgrub thabs so// ngang gis mi ldog dngos grub pas// don du phyag rgya rdzogs pa yin// 'di yi don rtogs skyes bu ni// bkur ba med cing bzlas brjod med// mchod pa med cing bsgom pa med// bsrung ba med cing rtog pa med// spang med blang med byang chub sems// ched du bya med thams cad rdzogs// 'di ni rang byung rgyal po yin// sangs rgyas kun gyi bdag nyid yin// 'bras bu kun gyi bcud bsdus yin// rang bzhin gsal bas mun pa med// de ltar snang ba ma lus kun// 'di las byung zhing 'di la 'dus// skyon dang yon tan gnyis med de// blang med dor med 'pho 'gyur med// byas pa med par thams cad 'grub// phyin pa med par thams cad son// bstan pa med par kun la go/ 'di ni sems kyi yon tan zhes// bcom ldan kun tu bzang pos gsungs// byang chub sems rje btsan dam pa rdo rje 'od 'phro ba'i rgyud las// sems kyi yon tan bstan pa'i le'u ste lnga pa'o//// de nas rdo rje sems dpas// kye bcom ldan 'das 'di nyams su blang ba'i thabs bshad du gsol// ston pas bka' stsal pa// kye sems dpa' chen po nyams su blang du med pas na// blang du med pa'i tshul gyis blang// snang ba mi spang rtog pa med// rtog pa med la gnas mi bya// rnam par mi rtog sa le ba// sa le bar yang rtog pa med// ma brtogs ngo bo nyid kyi gzhi// rig pa ji bzhin klung du bzhugs// 'od gsal rtog bral rig pa'i klong// ji bzhin nyid du ye gsal khyab// bsam med dran med mi g.yo ba// yon tan chen po'i bsam gtan ni// bsam gtan nyid pas bsam du med// med pa nyid la mi gnas shing// rtog pa med las mi 'gog pa// 'di ni rtogs pa'i rgyal po zhes// rgyal ba rnams kyis yang dag bshad// mi bsam mi dpyad de bzhin nyid// chu la chu ltar shes par bya// mi gnas pa la gnas pa ni// 'di ni gnas pa chen po zhes// kun bzang sems dpas yang dag bshad// bshad du med pa'i don 'di ni// rgyal ba rnams kyis ma bshad de// rgyal bas phyis kyang gsung mi 'gyur// da ltar nyid kyang ma bshad do// byang chub sems rje btsan dam pa rdo rje 'od 'phro ba'i rgyud las// bsam med nyams su blang ba'i le'u ste drug pa'o//// de nas yang rdo rje sems dpas gsol pa/kye bcom ldan 'das/ byang chub kyi sems gang lags/ bka' stsal pa/ sems dpa' chen po nyon cig/ byang chub sems kyi mtshan nyid// kun yin gang yang ma yin no// 'byung chen bzhi dang lnga po yang// byang chub sems nyid yin par bshad// phyi dang nang dang phyogs dang ris// 'khor ba mya ngan 'das pa dang// rgyu dang 'bras bur snang ba dang// sangs rgyas sems can pho mo dang/ kha dog dbyings dang gnas dang rigs// rgyud dang ma ning mtshan nyid dang// mtshan mar ci snang ci 'dug pa// de nyid byang chub sems nyid de// gzhan nas 'ongs dang btsal ba med// de rnams yin pa'i ngo bo la// de rnams ril du ma nges pas// du ma yin par ma gsungs so// thams cad ma 'gags par snang bas// gcig kyang yin par ma bshad de// gcig dang du ma las grol ba// mtshan nyid gang du ma nges pa// de nyid byang chub chos kyi sku// thams cad ngo bo lhun gyis grub// btsal ba med par ye sangs rgyas// phyin pa med par kun la son// sdud pa med par thams cad 'dus// ma spangs sgrib pa kun dang bral// 'khor dang mya ngan 'das pa dang// sangs rgyas sems can 'gro ba drug/ byang chub lam du snang ba yang// de las de byung 'bum phrag yas// mtshon pa'i ngo bo kun 'dug kyang// mtshon du med de de nyid yin// yin zhes bya ba mtshon pa tsam// mtshon zhes tshig tu brjod pa yang// mtshon bya mtshon byed med pas na// mtshon pa med pa'i tshul gyis mtshon// de nyid mtshon pa chen po yin// de yin de don rig shes na// 'khor dang sdug bsngal 'khrul 'khor kun// byang chub sems nyid yin zhes bshad// byang chub sems rje btsan dam pa rdo rje 'od 'phro ba'i rgyud las// byang chub sems kyi rang bzhin gang yin bstan pa'i le'u ste bdun pa'o//// de nas bcom ldan dgyes pa ches// 'khor la tshig tu bka' stsal pa// kye sems dpa' chen po// gang zhig mnyam nyid rtogs pa la// skyon dang yon tan gnyis kas bsgrib// bde chags sdug bsngal spang 'dod pa// dmus long mkha' la mdud 'dor 'dra// don nyid ma bcos mnyam pa'i don// ma 'dres gsal bar ma rtogs na// stong gsum rgyal ba'i skus bkang yang// phan med ma bkang gnod mi 'gyur// byang chub nyon mongs gnyis med de// kun gzhi yangs pa'i ngang du gcig/ de phyir blang dang dor med de// de nyid ma grub rang snang phyir// bying dang rgod dang re dogs dang// gsal dang mi gsal 'byung 'jug klong// myong dang rtogs dang 'gogs 'chos dang// mtshan ma byung tshor mtha' yas pa// ye nas bsal med ngang gis zhi// brtag med ye nas chos sku nyid// ma spangs rol pas bdag nyid rgyan// bdag nyid ma mthong dmus long nyid// mi rnyed don la blang dor med// skyon nyid mnyam par don rtogs na// kun tu bzang zhes de la bya// ji ltar mkha' gsal stong nyid la// sprin dang khu rlangs 'ja' dang glog/skar dang nyi zla ma 'dres gsal// mkha' gsal ngo bor ye nas gcig/ rnal 'byor sems kyi mkha' klong la// rkyen med snang yang blang dor med// theg pa'i bye brag ma lus pa// ma 'dres yongs rdzogs spang blang bral// bsal med mi rtog kun mkhyen pa// ngo bo nyid ni dmigs su med// byang chub sems rje btsan dam pa rdo rje 'od 'phro ba'i rgyud las/ gegs bsal ba zhes bya ba'i le'u ste brgyad pa'o//// de nas de bzhin gshegs pa nyid// mi gsung mnyam gzhag chen po yi// ting nge 'dzin la snyoms par zhugs// rdo rje sems dpas bcom ldan 'das// mi gsung bzhag pa don gang zhig/bdag la ji ltar bka' stsal mdzod// kye sems dpa' chen po// kun snang dus gcig dgongs pas mkhyen// gang la ci yang ma spros te// snying po'i don las g.yo ba med// gsung med don 'di mi shes par// gang zhig thams cad mnyam rtog pa// de ni long ba'i tshogs yin zhes// bcom ldan de bzhin gshegs pas gsungs// gang yang ma 'dres ma bkag gsal// bsdus pas snying po byang chub nyid// de nyid rtog med blang dor bral// kun khyab ye brdal ma lus gzhi// ming tshig brda yis mtshon du med// mtshon med ye shes sku yi mchog/ yi ge med gsal go ba'i gsung// rtog med 'od gsal thugs kyi mchog/ ma btsal lhun grub ye nas gnas// 'di ni tshegs med don po che// don nyid ci yang ma yin pas// shes pa gang la'ang bsam du med// bsam med bsam gyis mi khyab par// de ltar bsam pa bsam chen yin// ka la ping ka ji lta bur// btsal med bsam pa kun grub phyir// ma btsal lhun gnas don gyi mchog/ byang chub sems rje btsan dam pa rdo rje 'od 'phro ba'i rgyud las// mnyam par bzhag pa'i le'u ste dgu pa'o//// kye sems dpa' chen po med pa dang ni phyal pa dang// gcig pu dang ni lhun gyis rdzogs// bdag la 'dus dang ris med dang// bdag snang bdag tu lhun grub pas// btsal med ye bsrungs dam tshig mchog/ye nas bsrungs pas bsrung du med// ma bsrungs thub pas dam tshig mchog/ thams cad bdag nyid chen po pas// gzhan la btsal ba ci yang med// rtog med bsam med gang mi 'gog/de ltar spyod lam spang len bral// mnyam nyid ngang las mi 'da' bar// rdzogs chen dam tshig gcig pur bshad// bya bsam med pas don grub la// lhun gyis grub pa'i dam tshig yin// bklag dang mnyan bsam bsgom pa dang// mchod dang dbyangs len sbyin gtong ba// ma chags rdzogs chen stobs med na// byas na thams cad 'ching ba'i rgyu// gang yang dang du ma blangs na// spyod pa bcos med chen po yin// nyid la nyid spyod nyid dbang bsgyur// rig pa'i rgyal po smra bsam 'das// gang gis su la'ang bstan du med// byang chub sems rje btsan dam pa rdo rje 'od 'phro ba'i rgyud las/ spyod lam bstan pa'i le'u ste bcu pa'o//// kye sems dpa' chen po// rang byung ye shes byang chub sems// bdag nyid chen po chos sku nyid// sgro skur gnyis zhi mnyam nyid don// dus kun rtag chen rdo rje'i sku// rang bzhin de nyid brtag mi nus// ye shes rgyun du gang la rung// tshig tu rtag rgyun gang brjod kyang// rig pa'i rgyal po nga nyid la// 'pho 'gyur rtag mi rtag dang bral// thun mong ye shes skye 'gag can// don byed nus pa ma yin phyir// blang dor med na don gyis bral// 'gag dang ma 'ongs da ltar nyid// brtag par mi nus de lta'i phyir// ngo bo ye rtag brjod 'das pas// sus kyang brtag par rung ma yin// 'das dang ma 'ongs da ltar dang// 'byung bar ma nges dus gcig la// skad cig ma 'dres gsal mkhyen pa// rtag phyir mkhyen par brjod pa yin// de ltar med kyang 'dzin rtog bral// de nyid dus gsum ye gnas la// mun khang sbrul dang 'khrul mi ltar// thog med dus nas gnas gyur kyang// ma spangs dag pas sangs rgyas pa// byar med don mdzad phrin las mchog/ byang chub sems rje btsan dam pa rdo rje 'od 'phro ba'i rgyud las/sku gsung thugs brtag pa chen po'i le'u ste bcu gcig pa'o//// de nas stong pa'i ngang las ma bsgrags par 'di skad grags par gyur to// e ma'o ye shes kun mkhyen gzigs pa po// kun 'byung re skong dpag bsam nor bu'i sku// rtog med kun mkhyen byar med phrin las mdzad// rnam dag byang chub sems la phyag 'tshal lo// e ma ma btsal lhun gyis grub pas bdag la 'dus// ngo bo bstan du med pas 'dus ma byas// tshig las 'dus pas snying po byang chub sems// smra bsam tshig las 'das la phyag 'tshal lo// e ma'o rtag med bdud bcom cho 'phrul bdag/ sku gsung thugs kyi mdzad pa cir yang ston// thams cad nyid la 'dus pas bdag nyid che// mdzad pa cir yang snang la phyag 'tshal lo// ho// zhes ma gsungs par grags so// a ho// de nas de bzhin gshegs pa yis// rdo rje 'dzin la bka' stsal pa// kye sgro skur bral ba don gyi bcud// don ston rtog med me long bzhin// spang blang med ston theg pa'i mchog/ thams cad mnga' mdzad rgyal po nyid// rtag tu rtog med thugs kyi dkyil// mi nub mi spros sa bcu pa// don ldan skrag med mchog sbyangs pas// mchog ldan theg chen yang rtsai'i don// dbang po'i dngas ma der bstim ste// 'khor lo rgyun du bskor bar byas// zhes gsungs te/ rdo rje 'dzin pa dang/ 'khor byang chub sems dpa' chen po grangs med pa dang/gzhal yas su bcas pa sku la 'dus te/ sku nyid kyang snying po byang chub la dmigs te mi snang bar gyur to// byang chub sems rje btsan dam pa rdo rje 'od 'phro ba'i rgyud las// bstod cing gtad pa'i le'u ste bcu gnyis pa'o//// rgyud kyi rgyal po mi nub pa'i rgyal mtshan rje btsan dam pa rdo rje 'od 'phro ba'i rgyud rdzogs so// shrI sing+ha dang/ bai ro tsa nas bsgyur ba'o////

CLOSE WINDOW