CLOSE WINDOW

Gpb007.013
བོད་ཡིག

/ de phyir gdams pa'i rgya rnams gces//// rgya gar skad du/ dz+nyA na gu h+ya nA ma tan+t+ra// bod skad du/ ye shes gsang ba zhes bya ba'i rgyud/ ye shes gsang ba thugs kyi rang bzhin la phyag 'tshal lo// 'di skad bdag gis bshad pa'i dus gcig na/ ye shes gsang ba'i gnas chos nyid kyi mkha'/ mtha' dbus med pa'i gzhal yas khang na bcom ldan 'das rdzogs pa chen po bzhugs te/rang bzhin gyi 'khor dang// rang bzhin la lta ba'i 'khor dang/ rang bzhin rtogs pa'i 'khor 'di lta ste// sa dang/ chu dang/ me dang/ rlung dang/ nam mkha' dang/ snang ba thams cad dang/ yongs su rnal 'byor zhes bya ba dang/rnal 'byor ba chen po zhes bya ba dang/ sems dpa'i rnal 'byor zhes bya ba dang/ shin tu rnal 'byor zhes bya ba dang/ 'das pa'i sangs rgyas dang/ ma 'ongs pa'i sangs rgyas dang// da ltar byung ba'i sangs rgyas rnams/ 'byed pa mi mnga' ba'i thugs rjes thabs cig tu bzhugs so// de nas lha'i dbang pos phyogs bcu'i sangs rgyas thams cad la 'di skad ces bskul to// gsung gi mnga' bdag thams cad kyis// rtsol ba'i theg pa mthar bton nas// rtsol med theg pa mi gsung ba// thugs rje chen po yal lam ci// skal ldan gdul bya mchis pas na// lhun grub theg pa gsung du gsol// zhes zhus pa dang// de nas phyogs bcu'i sangs rgyas thams cad mgrin gcig tu// rdo rje sems dpa' la 'di skad ces bka' stsal to// dus gsum sangs rgyas thams cad kyi// thugs rje'i rang bzhin khyod yin pas// sangs rgyas kun gyi mdzad pa shar// gsung gi mnga' bdag thams cad kyi// ye shes rang bzhin khyod yin pas// thams cad byang chub sems su gsal// bde gshegs ma lus thams cad kyi// sku yi ngo bo dang ldan pas// rmad byung rol pa'i sku ru shar// gsung gi mnga' bdag thams cad kyi// gsung gi bdag nyid rig pa'i gsung// rmad byung rol pa'i gsung du shar// tshig gcig don kun rdzogs pa'i bdag/rin chen 'phrul gyi snying po'i sgo// skal ldan rnams la bstan du gsol// rin chen 'phrul gyi thabs ldan pas// gang 'dod mthun pa'i sgo de nas// rtsol med dbyings dang 'phrad par gyis// byang chub sems kyi dngos po la// brjod pa'i tha snyad kun bral yang// ma rtogs blo la tshig sgo nas// gsung gi sgron mas gsal par gyis// zhes gsungs so// de nas rdo rje sems dpas phyag na rdo rje thugs ka nas phyung nas// rin po che rang 'bar gyi 'khor lo lag tu gtad nas// 'di skad ces gsungs so// gnyis med ye shes gsang ba'i don// byar med mi rtsol ye sangs rgyas// dbu ma chen po drang po'i lam// 'dus pa'i tshogs la bstan par gyis// zhes gsungs so// de nas sems dpa' rdo rjes// rdo rje sems dpa' la 'di skad ces gsol to// rdo rje sem dpa' nam mkha' che// tshig gi spyod yul ma yin pas// bdag gis bgro ba shin tu dka'// ma rtogs pa la tshig sgo nas// mtshon nas rtogs par bya ba'i phyir// ci rig par ni rnam par dgrol// zhes zhus pa dang// de nas ses dpa' rdo rjes/ shar phyogs rdo rje/rnam par gnon pa'i zhing khams na/ de bzhin gshegs pa rdo rje gsang ba zhes bya ba/ mi phyed pa'i 'khor dang bcas pa la 'di skad ces gsol to// sems nyid rdo rje lta bu la/ skye 'gag 'byung ba ji ltar lags// zhes gsol pa dang// de nas de bzhin gshegs pa dgra bcom pa yang dag par rdzogs pa'i sangs rgyas rdo rje gsang bas bka' stsal pa/ sems nyid mi 'gyur rdo rje la/ skye 'gag yod pa ma yin te// rnam rtog blo la skye 'gag byung// zhes gsungs so// de nas lho phyogs kyi 'jig rten gyi khams rin po che snang ba zhes bya ba na/ de bzhin gshegs pa rin chen zhabs zhes bya ba/ rang 'bar snang ba'i khri la bzhugs te// nyid kyi 'khor la gsang sngags kyi de kho na nyid ston cing bzhugs pa la/ sems dpa' rdo rjes 'di skad ces gsol to// byang chub sems kyi rang bzhin la// rgyu rkyen rtsol bas ma bsgrubs par// yon tan 'bras bu ji ltar 'char// zhes gsol pa dang/ de nas de bzhin gshegs pa rin chen zhabs kyis bka' stsal pa/ tak+Sha ka yi rgyan bzhin du// rgyu 'bras mthar phyin gzhi nas rdzogs// thams cad rang byung snying po'i mchog/ gsang ba'i thabs kyis rtogs gyur na// nyi ma'i 'od ltar 'bras bu 'char// zhes gsungs so// de nas nub phyogs na pad+ma brtsegs pa'i zhing khams na/ bcom ldan 'das pad+ma'i 'od ces bya ba/dri ma med pa'i pad+ma'i gdan la bzhugs te/ nyid kyi 'khor la gsang sngags kyi de kho na nyid ston cing bzhugs pa la/ sems dpa' rdo rjes 'di skad ces gsol to// sems nyid pad+ma ltar dag par// gzung 'dzin dri ma ji ltar byung// zhes gsol pa dang/ bcom ldan 'das pad+ma'i 'od kyis bka' stsal pa/ pad+ma 'dam na gnas bzhin du// 'dam gyi skyon gyis gos pa med// byang chub sems kyi ngo bo ni// 'khor ba'i rtog par mi 'gyur te// rnam rtog blo la 'khor ba byung// zhes gsungs so// de nas byang phyogs rnam dag grub pa zhes bya ba'i 'jig rten na/ de bzhin gshegs pa grub par snang ba zhes bya ba// rang bzhin snang ba zhes bya ba'i gdan la bzhugs te/ nyid kyi 'khor la chos sngags kyi de kho na nyid ston cing bzhugs pa la/ sems dpa' rdo rjes 'di skad ces gsol to// btsal med sems kyi rang bzhin la/'gro don mdzad pa ji ltar 'byung// zhes gsol pa dang/ de bzhin gshegs pa grub par snang bas bka' stsal pa// rang byung ye shes rtogs gyur na/ mdzad pa'i byin rlabs rang las 'char/ zhes gsungs so// de nas de bzhin gshegs pa rnam par snang mdzad kyis bka' stsal pa/ 'dus pa'i 'khor tshogs khyed rnams kyis// rgyal ba kun gyis thugs kyi bcud// ye shes gsang ba rtogs par gyis// zhes gsungs pa dang// de nas sems dpa' rdo rje stan las langs te/ de bzhin gshegs pa rnam par snang mdzad la zhus pa/ khyod ni gsung gi seng ge ste// ye shes gsang ba ma rtogs na// bi ma par yi 'bras bu 'dra// smin kyang 'bras bu mi 'byung bas// ye shes gsang ba rtogs par gyis// thugs rje'i mnga' bdag khyod kyis bstan// de dag bdag gis ma rig pas// ye shes gsang ba bstan du gsol// zhes zhus pa dang/de nas de bzhin gshegs pa rnam par snang mdzad kyis bka' stsal pa/ sems dpa' rdo rje da nyon cig/ ye shes gsang ba'i rang bzhin ni// sangs rgyas sems can gnyis su med// nam mkha' bzhin du kun tu khyab// ma rig ye shes tha dad med// ma rtogs rtogs pa lam du gcig/ ye shes gsang ba'i mtshan nyid ni// ma rig 'od gsal rnam par dag/ rnam rtog ye shes nyid du gnas// gzhi bzhag rang lugs rin chen mdzod// ma byung ma btsal gdod nas gnas// ye shes gsang ba'i rnam pa ni// sna tshogs snang la ngos gzung med// mi dmigs sgyu ma lhun grub ni// rtag gsal na blta ba yin// zhes gsungs so// ye shes gsang ba'i rgyud las/ gleng gzhi'i le'u ste dang po'o//// de nas de bzhin gshegs pa rnam par snang mdzad la// sems dpa' rdo rjes 'di skad ces gsol to// gang dag ji ltar gang rnams la// thabs nyid gang gis rnam par dbye// zhes zhus pa dang// de bzhin gshegs pa rnam par snang mdzad kyis bka' stsal pa// byang chub sems kyi rang bzhin ni// snang srid snod bcud kun la khyab// chos rnams kun gyi ngo bor shar// sangs rgyas sku gsung ye shes thugs// sems can lus ngag yid la khyab// thams cad dbyer med byang chub sems// de ltar dag pa'i don rig na// thams cad sku gsung thugs yin no// rang byung lnga ru snang ba la// rang byung nyid du ma rig pas// zhen pa lnga ru phyin ci log/ 'bras bu khams gsum sems can byung// dpe ni nam mkha' lta bu ste// mtha' dang dbus med gdod nas dag/rgyu yis ma bsgrubs ye nas grub// rkyen gyis mi shigs 'gyur ba med// phyi nang med par ye gsal khyab// 'byung chen bzhi po thams cad kun// nam mkha'i ngang du 'dus pa bzhin// snang ba'i chos rnams ma lus kun// rang bzhin med de gdod nas dag/ 'khor ba'i nyon mongs chags sdang kun// ma btsal rang byung rgyal por shar// ces kyang mtshon 'das byang chub sems// mi 'gyur lhun rdzogs bde chen sku// yangs so che'o bde chen sku// gdod nas dag go chos kyi sku// bsam du med do bsgom dang bral// mi bsam rang bzhin lhug par bzhag/ mi bsdu mi spro gyi nar bzhag/ ma lus 'dus pa snying po'i don// rgyu yis ma bskyed rkyen dang bral// bden bzhi rtogs pa'i rgyu dang bral// gdod nas yod pas tshogs ma gsog/ ye nas dag pas sgrib mi sbyang// dag pa gsum la rag ma lus// rgyu yi yan lag sgrub mi byed// ye nas sangs rgyas lhun gyis grub// gnyis med sems kyi rang bzhin la// nges med dag gis sgrub mi byed// rigs bzhi 'dod pa'i rtsol ba bral// mtshon med sems kyi ngo bo la// shes rab thabs kyis mtshon du med// rgyu 'bras bral ba'i rig pa la// dbyings dang ye shes rgyu 'bras med// 'byung ba lnga la rag ma lus// sku gsung thugs la rten mi bca'// rig pa'i blo yis ma dpyad na// rang bzhin thog tu phebs par 'gyur// gdod nas ma bcos shin tu dge/ bsam dang bral bas de bzhin zhog/ sems kyis rig pa rtogs gyur na// sems kyi rtogs pa bsam mi khyab// rgyud 'grel tshig gis ma bkrol bar// gtan tshigs rigs pas 'byin par nus// thos pa bsam pa bsgom pa gsum// rtogs pa zla skar nyi ma bzhin// byang chub sems kyi ngo bo ni// dman pa'i sems kyi mi rtogs te// gtan tshigs gsum gyis shes par bya// rang gis rig pa gsal ba ste// rang bzhin rig pa cir yang snang// bdag nyid snang stong tha dad med// bsgrub bya dag gi rang bzhin ni// 'khrul pa byang chub sems su shes// bdag nyid chen po'i gtan tshigs kyis// thams cad byang chub sems su shes// gang ltar gnas kyang chos nyid do// dbyings dang ye shes gtan tshigs ni// dbyings ni dag pa'i rgyu yin te// ye shes 'bras bu nyid du gsal// gcig tu 'dus pas gzung 'dzin med// rang bzhin dpe dang don dang ni// gtan tshigs bzhi ru shes par bya// zhes gsungs so// ye shes gsang ba'i rgyud las// byang chub sems kyi le'u ste gnyis pa'o//// de nas sems dpa' rdo rjes/ de bzhin gshegs pa rnam par snang mdzad la 'di skad ces zhus so// khyod ni smra ba'i seng ge ste// rtsol bral bstan pa thugs la rdzogs// byams mgon thugs rje chen po yis// skal ldan 'dus pa'i tshogs chen la// byang chub sems kyi rang bzhin ni// gang la gsang ba bstan du gsol// zhes gsol pa dang// de bzhin gshegs pa rnam par snang mdzad kyis bka' stsal pa// ston pa gsum dang rim pa brgyad// phyin ci log gsum 'gro drug la// ye shes gsang ba nyid du bstan// snang ba ma bcos chos kyi sku// rig pa ma spangs longs spyod rdzogs// thugs rje sprul pa'i sku ru shar// chos sku nam mkha'i khams kun khyab// zhing khams snang srid thams cad yin// dus gsum sangs rgyas thams cad dang/ khams gsum sems can thams cad ni// chos sku ma bcos 'khor du 'dus// rig pa gsum gyi bstan pa sgrogs// gsang sngags gter gyi mdzod 'dzin cing// mi rtog brda' mjal go zhing rtogs// spros med byang chub sems su shar// de la 'du zhing 'phel ba'i phyir// thams cad de yi 'khor du bshad// chos sku dag la 'gyur med pas// ma bcos rang bzhin dag pa yin// chos sku rang bzhin spros med pas// ye shes sku la spros med gsal// des na byin gyis rlabs kyis bshad// longs spyod rang rig nyid yin te// gzugs su snang ba rnam pa yin// 'dod pa'i bden pa thams cad dang// rgyud kun ma lus thun mong gis// bde ba ngos 'dzin rang rig kyang// rig pa nyid na gdod nas rdzogs// bsam gtan bzhi yi bde ba yang// khams gsum lha yi longs spyod de// sems kyi bde ba rang bzhin tshang// skye mched mu bzhi'i ting 'dzin de// rang byung byang chub sems la rdzogs// gnyis 'dzin ldan pa'i bde ba dang// gnyis rdzogs ldan pa'i mthar phyin kyang// ma bsgrubs bde ba rang bzhin rdzogs// dag pa gsum dang gnyis su blta// brgyud pa'i byin rlabs bde ba yang// sems nyid rtogs pa nyid la gnas// gsal bya'i rim pas don mdzad cing// 'dod pa'i stobs kyis nye bar bsgrub// bgrod pa'i rim gyis thob par 'gyur// bde ba thabs dang shes rab kyang// rang rig kun mkhyen nyid la rdzogs// dbyings dang ye shes lta ba dang// ting 'dzin shes rab rtsal che yang// rgyu ni dbyings su rdzogs pa ste// 'bras bu ye shes dkyil 'khor bde// rgyu 'bras gnyis med sems la rdzogs// des na longs spyod rdzogs pa yin// mi gnas sems kyi rang bzhin ni// ma bcos chos skur bzhugs tsam na// gnas ni yang dag 'og min te// 'khor ni byang chub sems kyi 'khor// spros med byin rlabs phyogs bcur gsal// bstan pa phyi nang gsang ba gsum// rang byung ye shes cha mthun pas// ma bcos rang byung rtag pa yin// chos sku rang byung spros med pas// chos kyi sku yi bstan pa bshad// sangs rgyas sems can thams cad dang// snang srid snod bcud ma lus pa// chos nyid ngang las ma g.yos pas// sems nyid chos sku'i zhing khams yin// longs spyod sku yi zhing khams ni// 'dod pa'i longs spyod thams cad de// spyod kyang ma chags longs spyod yin// bzod ldan sa thob 'khor de la// dgongs pas sku dang ye shes bshad// ting 'dzin rig pa'i gdeng gis go/ mtshan ma'i sku gsung mi mnga' bar// bstan pa phyi pa'i gsang sngags gsum// snang ba cha mthun yod pas na// longs spyod rdzogs pa'i bstan par bshad// gnas ni rig pa'i 'og min te// rig pa sa bcu thob rnams la// rang gi ngo bor gsal bar ston// longs spyod rdzogs sku'i mdzad pa ni// rang 'dod 'bras bu'i mthar thug kyang// ma bcos pa la ma reg pas// longs spyod rdzogs sku'i mdzad par shar// gdul bya dman pa'i 'khor de la// rgyal thabs spyi blugs dbang skur nas// thob med byang chub sems dang phrad// ma bgrod rtog pa'i 'jim lam bsgral// bde ba phrag brgya'i don thob nas// zhing khams thams cad bde bar spyod// rgyal thabs spyi blugs ma thob par// rang sa thob kyang mthar ma phyin// des na lung bstan bla ma yis// rgyal sras skal ldan slob ma la// pra khrid sems kyi don bstan pas// sems nyid rin chen gnyis med la// bskur ba'i cha gnyis mi rtog kyang// brda don sprad pa'i man ngag sbyin// thugs rje'i rang bzhin sprul par shar// sna tshogs gdul bya'i bsam pa bzhin// lam gnyis thob kyang 'gro drug 'khyams// bstan pa sde snod gsum du bstan// zhing khams stong gsum 'jig rten khams// thugs rje'i gnas la nges pa med// ma bcos rang byung ye shes ni// rang byung ye shes lngar snang la// phyin ci log gi bsam pa yis// ye shes nyid du ma rtogs te// yang dag zhen pa lnga ru mthong// zhen pa lnga yi 'bras bu ni/ khams gsum sems can nyid du shar// ngo bo sems la 'gyur ba med// 'dod chags las kyi nam smin gyis// lha yi gnas su skyes nas kyang// ltung ba'i sdug bsngal yang dag myong// 'dod chags dngos la ma grub pas// 'dod chags ye shes nyid du dag/ byang chub sems la bskyod pa med// nga rgyal las kyi rnam smin gyis// lha min gnas su skyes nas kyang// 'thab rtsod sdug bsngal dngos myong yang// nga rgyal ngo bo shes pa na// nga rgyal ma spangs gnas su dag/ de bas nga rgyal mi gnas stong// phrag dog las kyi rnam smin gyis// mi yi gnas su skye 'gyur nas// sdug bsngal sna tshogs myong 'gyur yang// phrag dog chos kyi dbyings yin pas// phrag dog ma spangs gnas su dag/ des na byang chub dbyings mi bskyod// ser sna'i las kyi rnam smin gyis// yi dwags bkres skom gnas su skye// bkres skom sdug bsngal myong 'gyur yang// ser sna ma bcos byang chub sems// sems nyid rang bzhin stong pa'i phyir// des na dbyings la 'gyur ba med// gti mug las kyi rnam smin gyis// dud 'gro'i gnas su blun lkugs myong// rig pa phra mo'i chos shes kyang// gti mug ma bcos byang chub sems// yul yang de ltar rig pas na// gti mug ma spangs gnas su dag/zhe sdang las kyi rnams smin gyis// dmyal ba'i gnas su sdug bsngal myong// zhe sdang ye shes nyid du shes// thams cad de ltar shes pas na// ci yang min par chos rnams shes// thams cad mkhyen pa'i spyan gyi mchog/snying po'i don gyi chos rnams gsal// bstan pa rgyu 'bras theg pa gsum// 'dul mdzad ston pa drug snang ste// lha yi dbang po rdo rje 'dzin// lha min ston pa srid thub 'dzin// mi yi thub pa thub dbang po// dud 'gro'i ston pa gsal byed 'bar// yi dwags ston pa stobs kyi bdag/ bsil byed 'bar ba thugs rje'i bdag/ gdul bya 'gro ba drug yod pas// ye shes rnam pa drug tu shar// gang zag blo la 'tshams phyogs su// gang dang mthun pa'i sgo nas ston// zhes gsungs so// ye shes gsang ba'i rgyud las/ sku gsum bstan pa'i le'u ste gsum pa'o//// de nas sems dpa' rdo rjes/de bzhin gshes pa rnam par snang mdzad la 'di skad ces gsol to/ khyab bdag ma bcos lhun grub sku// rtsol med gnas pas mngon sangs rgyas// phyogs ris mi mnga' nyi ma ltar// ye shes 'od zer phyogs bcur brdal// snying rjes don mdzad lhun gyis grub// phyogs ris mi mnga' sku mchog gis// rim pa brgyad la gsang ba'i don// 'dus pa'i tshogs la bstan du gsol// zhes gsol pa dang// de nas de bzhin gshegs pa rnam par snang mdzad kyis bka' stsal pa/ gsum la ngos bzung mi mnga' ste// brgyad kyis rang 'dod gnyis kyis log/ gcig gis ma rig khas mi len// drug gi lnga yi 'bras bu myong// des na ye shes gsang ba yin// chos sku gdod nas dag pa la// brtags pa'i gzung 'dzin ngang gis med// des na chos nyid gsang ba yin// longs spyod rig pa dag pa la// phyi nang med par sems nyid gsang// chos can ma yin chos nyid min// ci yang ma yin gyi nar zhog/ 'khrul pa sna tshogs cir ston kyang// zhen pa'i bsam pa ma gtogs pa// yang dag dngos por grub pa med// dper na thag pa sbrul mthong yang// thag pa'i mtshan nyid sbrul ma yin// snang ba brtags par zhen mod kyang// ma bcos snang ba brtags pa min// rol pa lhun grub sgyu ma de// rtsol med sgyu ma bde mchog bde// mi 'gyur rdo rje btsan po yin// ma bcos lhun grub chen po la// nges pa med pas gsang bar bshad// gang zhig gnyis mthong ba yis ni// gzugs med phra rab rdul du mthong// sems la rdul med phyin ci log/ bdag med nges bzung chos nyid gsang// gang zhig cha mthun nang nas ni// bco lnga bcu drug zer chos la gcig ma rtogs// rten 'brel chos la nges brtags pas// rgyu med chos kyi don ma mthong// gnyis med sku yi ngo bo la// bden gnyis lta bar rnam phye ste// don dam stong pa'i dngos po med// rig bzhi'i gtan tshigs dag gis tshol// don gyi ngo bo rtogs nas ni// zhi gnas gang zag 'dod pas bsgom// lhag mthong 'phel ba'i skabs su 'dod// lam gnyis sbyor ba'i rim pa ste// don mthong rags pa'i rtogs pa spangs// phra ba'i rim pa bcu yi bar// shin tu phra ba'i sgrib pa la// mthar thug sa yi sbyor bas gcod// rang 'dod rtogs pa'i mthar thug yin// des na bsti gnas drang pa yis// bgrod med bgrod pas ye shes gsang// btsal med bca' bas grub pa med// bdag dang mi mthun log pa bzhin// des na 'dus pa'i 'khor tshogs khyed// btsal med chos la btsal mi bya// bgrod med chos la rang bzhin zhog/ rgyal rtags phyi pas mthong ba ni// mtho 'jam dma' rtsub rigs gsum 'dod// dag pa gsum gyi sgor zhugs nas// dam tshig ye shes rje 'bangs lta// rtogs pas rdo rje 'dzin pa'i sa// nges par mthong yang gces ma'i sa// ma thob rang skyon me long tshul// rim mam cig char rim gyis 'jug/ rgyal thabs spyi blugs tshangs pa'i dbang// skad cig nyid kyis rdzogs sangs rgyas// ma rtogs dus gnas thams cad du// de nyid tshod dang ldan pa yin// gzhi nas 'bras bu yin pa'i don// dam tshig ye shes grogs po'o// mtshan ma'i dngos po chu zla'i tshul// mthong ba'i dgongs pa'i ngo bo dang// de nyid mtshan ma med bsgoms pas// stong nyid la sogs ye shes 'grub// gcig la'ang sku lnga 'byung ba ste// lnga dang de gnyis de bzhin no// de nyid grangs mthun sprul pa ste// de yi rgyud la'ang byin brlabs te// de las sprul pa bsam mi khyab// skal ldan rnams kyi sems la snang// yo ga rang 'dod bsam pa yis// mthar thug 'bras bu yin 'dod kyang// de yang rtsol ba'i 'bras bu yin// ma bcos ji bzhin ma rtogs pas// rang snang ma bcos yul byas nas// 'jug pa'i rim pa snga ma bzhin// brda' don sprad pas rgyal gral bzhag/ bya ba'i spyod pa dag gis gnas// byin brlabs rgyud pa'i lta bar 'dod// rtsol bas 'jug dang gnyis kas len// yo ga'i spyod la gang gnas pa// 'bras bu lam du 'jug pa ste// rang 'dod rtogs pa'i sa yin yang// ma bcos tha ma'i sa ma rtogs// smin kyang 'bras bu mi 'byung ste// bi ma par yi 'bras bu bzhin// bskyed pa ma hA yo ga ni// gzhi nas 'bras bu de bzhin te// tha mal gtsang sme'i lam du 'dod// gzhi nas 'bras bu yin pa'i don// bskyed pa'i rim pa brtsam pa dang// rdzogs pa'i rim pas 'grub pa yin// lam gnyis grol dang thabs gnyis te// re re'ang bskyed dang rdzogs pa ste// grol ba'i lam la bzhi yin no// thams lam nang dad gsang ba gnyis// gnyis bzhi brgyad du ldan pa ste// bcu gnyis dag tu shes par bya// lta spyod dkyil 'khor dbang dam dang// sgrub pa phrin las las rim ni// phyi dang nang dang gsang ba ste// rang bzhin gnas dang rtsol bas 'jug/rgyud kyi dngos po gsum du bstan// dang po bskyed pa'i ting 'dzin bsgom// bskyed pa'i rdzogs dang rdzogs pa'i bskyed// skabs dang sbyar bas de bzhin bsgom// dngos grub rgya mtsho lta bu ni// grol ba'i dkyil 'khor yongs rdzogs pas// de ma thag tu lhun gyis grub// nang gi lam la gang 'jug pa// bskyed pas dkyil 'khor lnga la 'jug/ de nyid rdzogs pas de nyid bde// gsang ba'i pho brang rtsa mdud gsum// gru gsum dkyil 'khor nyams dga' ba'i// byang chub sems kyi dkyil 'khor yin// sprul pa drug cu de dang ldan// dbus su a yi rang bzhin te// phyi rim bzhi dang brgyad du ldan// chos kyi 'khor lo dag la brgyad// de dkyil dngas ma gsum dag ste// lnga dbus thig le byang chub sems// chos nyid gsum dang ye shes gcig/ rang rgyud dag tu shes par bya// de nyid ci 'drar sems pa na// chos nyid rtsa la 'od ser te// de dbyibs zlum po dngul zo bzhin// sa bon suM tri snying po A+oMH/ de dag gsum gyi kha dog ni// za 'og gur phub lta bur gnas// ye shes rtsa la 'od mthing ga/ thag par shel sgong brgyus pa 'dra// sa bon snying po a nr-i hUM// rang rgyud 'od dmar zla gam 'dra// tshul ni dpe yis shes par bya// sa bon snying po pre du AH/ ma rtogs sa bon a la sogs// rtogs pas ye shes sku gsung thugs// gnyis su med pas bsreg pa yin// bye brag bzhi ru gnas pa ni// rnam shes brgyad kyi rten ma ste// rgyu ba bzhi ru shes par bya// snyigs ma gsum la gnyis su rgyu// rnam shes drug gi tshul dang mthun// gang gis gang byed de bzhin no// de yi ngang la rtags gnas na// bde ba'i rtag rnams 'byung bar 'gyur// g.yo zhing 'bar na rtsol ba klod// nam zhig de ltar gsal 'gyur na// snying po gsum dang sa bon drug/ye shes rang bzhin 'od du 'bar// thig le rang bzhin med par thim// rgyu ba rigs kyi pha la gnas// dbugs sogs rang bzhin med gyur nas// rtsa dbugs nam mkha' ltar nang la// ye shes khyab gdal kun tu bzang// chos dbyings gsal ba'i go skabs 'byed// gsang ba'i shes rab yum gyi dbyings// gnyis dang drug cu'i dkyil na bzhugs// shes rab thabs la snyoms par 'jug/ thams cad rgyas btab dkyil 'khor yin// lnga yi rang bzhin nyid du blta// 'phro dang 'bar ba steng 'og tu// steng gi snying po bskul byas pas// bde ba chen po'i mchod pa yin// de nyid thig le mnyam sbyor bas// drug dang bcu yi dkyil du ste// dgyes pa chen po'i ro yis ni// bde ba chen por stobs par byed// shes bya byung tshad bsod nams kyis// yul rnams sgyu mar rang snang ba// rol mo'i bde ba mtha' dag gis// bde ba chen po phrin las 'phro// sum cu rtsa gnyis dkyil 'khor na// thig le de dang mnyam pa'i dbyings// kun gyi dngos yin kun gyi gtso// bcu dang bzhi ni mngon rdzogs pa// gsum dang gnyis su mang dag gnas// kun gyi dngos por bdag nyid gnas// gsang ba'i lam la gang gnas pa// mtshon byed rig ma'i bde ba yis// lhan cig skyes pa'i dga' ba rtogs// bde ba gsal la mi rtog pa// rdo rje 'dzin pa'i sa yin kyang// de yis don rnams mi 'thob ste// rgyal dang de yi cha bzhin no// shes pa dbang sogs glo bur bas// rang gnas ye shes mi rtog ste// 'dzin pas rang rig mi rtogs bzhin// dngos 'dzin zhen pa'i rang rig gis// lhun grub rang rig don mi mthong// rang sa thob nas ma bcos pa// snga ma bzhin te 'jug pa'ang 'dra// mthar phyin a nu yo ga la// rang bzhin dbyings dang ye shes la// 'khrul pa 'khor dang rang rgyud pa// bder gshegs chos dbyings ma bcos gsal// rang bzhin snang ba bzhir gnas pa// bde gshegs snang ba 'bras bu yin// 'khor gyi snang ba lam pa ste// lam la phyi nang gsang ba gsum// cig car rim pa'ang de bzhin no// rim par 'jug pa'i tshul gyis ni// bskyed par brtan par gyur nas ni// rdzogs pa'i don la 'jug par bya// mos pas nang yang de bzhin no// gsang ba'i don la dran pas bsgom// 'bras bu dbyings dang ye shes la// rang 'dod 'bras bu thob 'dod kyang// mthar thug 'bras bu de ma yin// e ma'o ye nas gsang ba'i sa// rtsol ba'i lam gyis thob ma yin// 'gro drug zhen pa'i drang thad dang// mu stegs rang bsam log pa dang// brgyad kyis rang 'dod dbyings la bltas// phyi nang med la spro bsdu byas// ngo bo med la dmigs 'dzin byas// rang byung nyid la rgyu yis btsal// ma bcos ci yang ma yin la// cir yang 'dzin pa'i bsam pas brtags// bgrod med 'bras bu lhun grub la/ lam brgyad bgrod pas bgrod med bslad// des na ma bcos dngos po la// log rtog 'dzin pa'i blo yis ni// ji ltar dpyad kyang ma yin pas// ma dpyad rang bzhin bzhag pas go/ dpyad med sems la dpyad pas na// ma yin log ste gzhan lta bzhin// zhes gsungs so// ye shes gsang ba'i rgyud las// gang la gsang ba bstan pa'i le'u ste bzhi pa'o//// de nas sems dpa' rdo rjes// de bzhin gshegs pa rnam par snang mdzad la/ 'di skad ces gsol to// thugs rje'i bdag pos gang gsungs pa// 'dus pa'i tshogs kyis rtogs pa ni// sems kyi rang bzhin ye gnas la// zhen drug log gsum rtsol brgyad kyis// de nyid rang bzhin gsang bar gsungs// gsum la ngo bzung med pas gsang// thams cad kun la gsang bas na// de nyid gang gis shes par 'gyur// gsung gi mnga' bdag khyod kyis kyang// kun la gsang ba ji ltar rtogs// zhes gsol ba dang// de nas de bzhin gshegs pa rnam par snang mdzad kyis bka' stsal pa// theg chen sems kyi rang bzhin ni// sgra dang tha snyad kun 'das kyang// snod ldan rtogs par 'dod pa y-is// gtan tshigs tshad ma gsum gyis ni// de rgyu rtogs pa'i thabs su bshad// bya bral rdzogs lung rig pa'i nyams// gron tsheg chung ba'i man ngag gsum// ye shes rtogs pa'i rig pa'i mchog/ thabs chen rgyud dang bya bral rdzogs// mkha' khyab byang chub sems lung gis// snang srid sems su gtan la 'bebs// ye shes gsang ba'i ngo bo ston// bdag nyid gsang ba'i dkyil 'khor ston// lung gsum snang bas ston pa'i bka'// yin pas nga yi bka' dang mthun// rig pas nyams su len pa na// yid ches rig pa'i gtan tshigs so// rnam gsum lung gi ngo bo ni// sems nyid rig pa'i chos yin no// thams cad sems su 'dus pas na// sems ma yin pa'i chos mi snang// ji ltar snang ba'i chos rnams ni// sems la snang phyir sems yin te// sems nyid rig pa ma yin na// de nyid ji ltar snang bar 'gyur// tha dad mthong bar brtags pa ste// bag chags log pas 'khrul tsam na// med kyang log par snang ba ste// dung la ser po mthong ba bzhin// dung nyid ser po ma yin te// ji ltar de la ser por mthong// des na ser po'ang yin 'dod nas// dung la ser po yod pa na// ma 'khrul shes pas cis mi mthong// zhen rtog 'dzin pa'i dbang gis na// brtags pas sna tshogs dag tu mthong// dang po mtshan ma'i rang rig ste// gnyis pa med pas rang rig yin// gnyis pas gnyis ka med pa ste// mtshan gzhi med pa'i mtshan nyid ni// mi srid me med tsha ba bzhin// gsum la zhen pa'i rang rig ste// rang rig bde ba'i don la zhen// zhen pas ma bcos don mi mthong// gzhi sa ma bcos rang rig ni// ngos bzung med pas gang yang min// ye shes rol pa rang snang la// bla ma'i zhal las shes par bya// rol pa ye shes rang snang dang// rtog pa'i zhen pa sna tshogs pa// bye brag ma shes gti mug blo// byang chub sems kyi lung gis ni// thams cad sems su gtan la 'bebs// des na byang chub sems kyi lung// ma bcos sems kyi rang bzhin la// byang chub sems kyi rang rig ni// byang chub snying por de ma thag/ rig pa'i tshad ma nyid kyis shes// rig pa'i tshad ma ma skyes na// sgra yis tshad ma ci bstan kyang// sgra yi don dang de 'phrad nas// sgra don rjes su rtogs mi 'gyur// spyi la rtog pa de gnas kyang// rang gi mtshan nyid de ma yin// rig pa'i tshad mas don mthong na// de nyid rig pa'i don ldan pas// lung sogs tshad ma rnams mi dgos// de ltar de ni rang bzhin no// slob tshul rim pa ma yin te// ma bgrod cig char 'jug pa yis// de bzhin gzhi las ma g.yos pas// mthar phyin gzhi las g.yos pa med// rdzogs pa'i sems kyi rang bzhin no// brda' don phrad pas mthar phyin kyang// 'dzin pa drug la zhen pa yis// rtog pa sems su shes pa la// blo yi bye brag bsam mi khyab// shes pa skye ba gsum yin pas// mthong ba sna tshogs rig pa'i nyams// dang po gnas pa'i ting nge 'dzin// chu drag 'bab pa'i dpe yis bstan// myur dang dal bas 'bab chu 'dra// gnyis pa la ni mi g.yo ba// rgya mtsho'i gting bzhin mi g.yo'o// gsum pa bzhi pa 'bras bu'i nyams// mnyam nyid ye shes lhun gyis grub// snang ba rnam rtog cir mi blta// dran pa kun spangs ye shes nyid// zin pas rtsol ba'i nad spangs te// lhun gyis gnas par bzhag pa yin// rin chen brgyud pa shes pa'ang// slob dpon slob ma'i bye brag dang// sngon du 'gro dang tshad ldan pa// bstan pa'i don la bzhag tshul lo// de yi yon tan dbye ba dang// phrin las dam tshig don bzhin no// rgyud dang mdo sde thugs la rdzogs// bka' gzhung rig pa'i don la mkhas// dman pa'i blo spangs khyad par kun mkhyen pa// rig pa'i shes rab ting 'dzin nyid la gnas// rdzas dang 'brel ngor mi gtong chu srin sder mo bzhin// thugs rje phyogs ris mi mdzad kun la snyoms// dman pa'i sangs rgyas re thag las pa'i sa// slob dpon rnam pa gnyis su bstan// brda' don phrad pa'i slob dpon ni// rang rgyud ma bcos rnam dag pas// don dang 'brel ba'i sgra tshig gis// ye shes rig pa'i ngo bo ston// skye ba med pa'i brda don sprad// de ltar ma yin brda' don bral// ma nor nges pa'i slob dpon gyis// tha dad ma yin slob ma la// sgra dang mtshan ma mi mnga' bar// ji bzhin rig pa'i ngo bo bstan// mi rtog brda don go zhing rtogs// bde gshegs kun gyi ngo bo la// sems can kun gyi dngos gzhi yin// de yi stobs kyis de gsal zhing// de nyid ngang la de gnas na// don rnams rig pa'i phyag rgya can// mi g.yo rnam dag sman chen gyis// gcong rnying ye shes nyid du sbar// 'khor ba rnam par dag pa ste// thams cad mkhyen pa'i ye shes kyis// dug chen sman du btul ba ltar// 'khor ba ye shes nyid du gsal// snying po don gyi de nyid ni// gang ltar ci yang ma yin pas// thams cad mkhyen pa'i dgongs pa la// bden par gzigs pa mi mnga' la// de bzhin rdzun par gzigs pa'ang min// thams cad gang yang ma mkhyen pas// snying po don gyi ngo bo mkhyen// ma bcos thugs kyi phrin las can// cis kyang bcos med cis mi g.yo// gdod nas dag pa'i chos nyid la// dran pa rkyen gyis de bzhin gnas// lhun grub sems la rtsol ba med// rang byung ye shes rgyu rkyen med// mi gnas thugs la phyi nang med// stong pa'i ye shes dngos po med// me long lta bu'i ye shes ni// shes bya kun la mngon phyogs med// mnyam nyid ye shes che chung med// so sor rtogs pas ma 'dres gsal// bya ba nan tan thugs rje'i dngos// rang byung ye shes nyag gcig la// yon tan cha nas du mar grags// rang rig nyid la yul med pas// yul gyis bskyed pa'i ye shes min// rang byung nyid la rgyu med pas// rgyu yis bskyed pa'i ye shes min// lhun grub nyid la rtsol med pas// rtsol bas bskyed pa'i ye shes min// nam mkha' lta bu'i ye shes la// phyogs ris med par ye gdal ba// lhun gyis grub pa'i phrin las yin// rnam dag dbyings la gnas bzhin du// yongs la snyoms pa'i thugs rje 'byung// 'gro ba gang gi ngo dag tu// gang la 'tshams pa'i thugs rje 'byung// skal ldan gdul bya gnas pa na// thugs rje gdul bya bzhin du 'byung// gdul bya gang yang mi gnas na// thugs rje'i mdzad pa gang la 'char// gang gis skal ldan gdul bya la// thugs rje gzhan zhig 'dod pa ni// rang nyid thugs rjer ma rtogs te// gzung 'dzin 'khrul ba'i blo yis brtags// thugs rje gzhan la 'char na ni// sdug bsngal drag po'i 'khor ba la// skyob pa'i thugs rje yal lam ci// nam zhig rang rgyud dag tsam na// thugs rje gzhan gyis ci zhig bya// rtog pa phra rags gdul bya la// ye nas rig pa'i thugs rje 'char// 'gro 'dul thugs rje'i phrin las so// dam tshig yid bzhin rin po che// rgya mtsho'i pha rol sgrol ba'i gru// ma bcos rig pa'i chos nyid la// mi 'gyur ye shes gsal bar gnas// rtsol bral rig pa'i dam tshig go/ dam tshig mi ldan rdo rje ni// bka' rgyud don la mkhas gsal yang// sbrel ma g.yang du 'dril ba bzhin// bdag gzhan rdo rje'i khab tu 'gro/des na dam tshig gzhung ldan ni// 'jig rten grags ngor chos mi gtong// 'brel ba rdzas kyi ched ma yin// bdag gzhan gnod pa'i las mi byed// kun la snyoms pa'i thugs kyis gnas// 'jig rten 'brel ba'i ched mi byed// ma bcos dbyings la mi 'gyur brtan// ye shes gdeng gis ma zin par// chags sdang zhen pa'i las mi byed// sems nyid ye shes rnam dag la// gnang bkag chos yod ma yin yang// zhen pas ye shes ma rtogs par// lhag pa'i spyod pa gtso cher 'dzin// de nyid don ldan legs pa che// slob ma'i bye brag gnyis ldan pa// brda don sprad pa'i slob ma ni// snod ldan dam tshig gces su 'dzin// sems nyid dag pas gdeng byas nas// dam tshig mi srung tha mal sems// rang rgyud ngan pas dregs pa dang// thos pa chung ba'i blo sbram dang// man ngag bcud chen 'dzag pa dang// ye nas glo 'phang dma' ba dang// 'jig rten bya ba'i rgyu bsgrub rang// mu cor smra zhing mkhas 'dod dang// bla ma srog tu mi 'dzin dang// man ngag bsgrub byar mi sems la// rdzogs chen rna brgyud bstan byas na// 'dam shod gling gi dur khrod du// mkha' 'gro rna nyan 'du ba bzhin// 'chi ba'i dus kyi sngon rol du// sha khrag mngon du za bar byed// gzhung du mi ldan slob ma ni// grib bzhin 'khor yang spang bar bya// lus srog thal yang khar dbyung min// 'du 'bral byung yang las kyis byung// yon tan de ldan slob ma ni// stong gsum btsal yang gcig kyang dkon// mang yang gsum las 'da' mi bya// man ngag rgyal thebs cig la bstan// bskal pa grangs med sngon rol nas// rdzogs chen don la sbyangs sbyangs pa// ye shes gsang ba'i snod du bsngags// sgo nga'i nang du khyung phrug ltar// 'khor ba nyid du ye sangs rgyas// sgong chag mkha' la 'phur ba bzhin// rtogs pas ma bcos bla ma'i sa// rgya mtsho'i bcud bsdus bdud rtsi bzhin// bka' yi bcud bsdus rdzogs chen 'di// snod ldan ngang tshul bzang la bstan// dbang dang snod brtags cho ga dang// gsol ba gdab dang gnang ba sbyin// sngon du 'gro ba'i rim pa'o// bde gshegs ma lus gsang ba'i thugs// srid pa gsum la gdod nas gnas// gang gis de ni rtogs gyur na// dbang rnams kun gyi mchog yin te// srid pa gsum na ye dbang bskur// rang dbang dam pas snod du byas// gzhi nas dbang thob bskur mi dgos// rtogs thabs pra khrid thabs kyis shes// bcos ma'i sbyor ba'am rnal ma nyid// gang mos mthun pa'i sgo nas bstan// thabs sbyor bcos ma'i sgo nas ni// 'phrul gyi me long bzhin du bstan// rtogs 'dod ldan yang rnal ma'i don du bya// don rtogs bcos ma'i sbyor ba yang// tshig don khyad par bstan pa ste// dgos don gong ma'i don la 'jug/ brjod don thams cad sems su bstan// rnal ma ma bcos gzhi nyid bzhin// lhun grub gsum gyi don la 'jug/rim par 'jug pa bzhi yis so// bya ba med pa'i dkyil 'khor gsum// gdod nas rtsol med lhun gyis grub// ye shes nyi ma'i snying por shar// rang gsal mun pa ye nas dag/ ma lus thig le chen po nyid// mi g.yo rnam rtog yul 'das la// rgyu dang 'bras bur rtog 'dzin cing// mi shes sgyu ma'i blo yis bcings// rang snang ma bcos nyi ma dag/ ma btsal nyid bzhin snang bas na// snying po'i sems la gol sa med// thams cad gsal ba'i snying por 'bar// log rtog blo yi dbang gis ni// snang srid 'khor ba'i kha brgyud kyang// ye shes dbyings las g.yos pa med// sangs rgyas rnams kyi ye shes ni// bdag tu rtog pa nyid las byung// rtog pa'i blo la mtshan mar snang// mi rtog ye shes grol ba'i thugs// ye shes mi rtog me long gsal// mkha' la 'ja' tshon bzhin du snang// rang byung ye shes ngo bo la// rol pa'i khyad par snang ba ni// snang la ngos bzung yod ma yin// chu yi zla ba lta bur snang// gang snang ye shes rol pa la// gang yang ma yin ji bzhin pa// rang snang ma bcos de bzhin nyid// dngos nyid mi g.yo bde chen ngang// btsal zhing g.yo ba ci yang med// dbyings dang ye shes tha snyad de// de nyid ma yin zhen pa'i gnas// rmad byung gzhal yas spros bral na// 'bar ba'i ye shes bde gshegs gsung// thug phrad nyid du bzhag pa ste// bla ma'i zhal las shes par bya// spyod pa'i sgo nas sna tshogs pa// lung ldan bla mas shes par bya// 'phrul tshig sgra yis shes par brtag/ gang la gang zhig de yin na// de nyid ye shes rig pa 'char// ma yin de nyid log pa na// rig dang mi mthun rang bzhin log/ rlung dang mkhris pa'i chos bzhin no// spyod pas chags sdang bye brag shes// de yi drag dal gnyug ma'i don// de nas rdo rje slob ma yis// rig don 'dod pa'i gsol ba gdab// gnang na de nyid rgyal tshab bya// rtsol bral zin dang ma bzung bar// gsang ba'i 'khor lo ye shes gter// gsang sngags gter gyi mdzod 'dzin cing// rig pa'i bstan pa sgrogs pa'i bdag/gzhi cha'i rig pa rang gsal te// dus gsum bde gshegs snying po yin// gsum ldan 'khor ba'i rang bzhin no// dus tshod bla ma'i zhal las shes// gzhan du'ang de bzhin kho na yin// shes rab gsang ba'i dkyil 'khor ni// gu rum sbas pa dag yin kyang// gsal byed sgron ma de yis mthong// ye gsal chen po phyogs med la// phyi nang med par kun la gsal// 'khor ba rags pa'i cha yis ni// de nyid phra ba'i don mi mthong// bden don mthong bas bcings pa grol// rdzogs pa ye shes de nyid go/ nyams blangs goms pas mtha' thug ste// ji ltar bsam pas bzung ba'i blo// ma lus par ni zad gyur na// mi rtog ye shes gsal mthar phyin// 'gyur med sems kyi g.yung drung la// ye shes rang gsal gyi nar bzhag/ dran pa rkyen gyis ma shor te// de nyid tshod du lhug par zhog/ ma nor sems kyi slob dpon la// lung don dran pas thag bcad cing// bsam med dran med mi g.yo ba// mi dpyad legs pa'i don mi bzung// bsdu bar ma yin spro bar min// mi rtog gsal ba ma bcings pa// brtul ma yin te 'jam pa'i ngang// rig pa de nyid tsam la gnas// sems nyid rang bzhin lhug pa'o// glang chen lta bu'i sems la ni// ma bcos rang lugs nyid du bde// btsal ba glang chen myos 'drar 'gyur// nam mkha'i ngo bo ma bcos ltar// sems nyid rang bzhin ma bcos bde/ khyung chen mkha' la lding ba bzhin// mi btsal rang bzhin gyi na bde// thams cad btang bas 'dzin pa med// bya ba med phyir rtogs pa'i ngang// sems nyid bsgrim par mi bya zhing// lus dang ngag kyang btsal mi bya// shes pa mi bsdu yan du khyer// snang ba mi dgag zhen mi bya// mtshan ma'i spros pas 'chel ba yis// sna tshogs rtogs pa'i sems byung na// lus sems klong la gzer chen gdab// shin tu dran pas g.yo ba na// stong nyid bde ba'i man ngag sbyin// ye shes gsang ba'i dgongs pa la// gang yang ma yin de ltar yin// zhes gsungs so// ye shes gsang ba'i rgyud las/ gang gis gsang ba'i le'u lnga pa'o//// de nas sems dpa' rdo rjes/ de bzhin gshegs pa rnam par snang mdzad la// 'di skad ces gsol to// rin chen 'khor lo gsang ba'i thugs// 'phrul tshig rig pa'i sgron ma yis// gu rum sbas pa'i don gsal na// de nyid gang gis gsal bar bgyi// zhes gsol pa dang// de nas de bzhin gshegs pa rnam par snang mdzad kyis bka' stsal pa// sems dpa' chen po tshur nyon cig/ man ngag rin chen gsang ba ni// bka' rgyud ma lus mtha' dag gis// brjod bya'i snying po de nyid las// ming tshig rnam grangs sdud pa'i bdag/kun brjod gsung gi 'khor lo can// dus mtha'i skad cig nyid la ni// klong dgu bam po nyi khri nyid// rin chen gsal ba'i ched du gsungs// de nyid dgu ldan sems kyi gzhi// rin chen lam gyis nyams su blangs// ma bsgrubs 'bras bu lhun gyis grub// lta ba'i sems la blang dor med// mtha' dbus med pa'i snying po len// ye shes ma 'gags gsal bar snang// gnang bkag med pa spyod pa'i rgyan// mi bsam mi yengs dgongs pa'i klong// rgyal thabs spyi blugs tshangs pa'i dbang// bgrod med mthar phyin sems kyi lam// bcos med dam tshig gdod nas dag/ rang snang 'bras bu lhun grub klong// sems nyid ma bcos rnal ma'i gzhi// don dang nges tshig dpe yis bstan// gzhi don lhun grub rnam gsum la// rnam pa rang bzhin mtshan nyid rnams// bde ba chen po lhun grub pa// dus gsum bde gshegs ye shes dang// 'gro drug sems kyis ma bcos pa// tha dad ma yin rang bzhin gcig/ rnam pa lhun grub sgyu ma ni// rol pa bzung ba ngos bzung med// rang gi mtshan nyid lhun grub la// gzung 'dzin btags pa gang gis med// de nyid de yi rang bzhin no// ma lus don gyi snying po gzhi// mi shes rtog pa'i rang bzhin te// rtog tsam nyid na mi rtog pa// thams cad rol pas 'khor ba'ang yin// 'dzin rtog med pas sangs rgyas yin// 'ching ba bral ba blta ba yin// rang 'bar gsal ba'i snying po 'bar// ma lus 'dus pa'i lus po che// gcig ni kun gyi rang bzhin te// lhag ma med par yongs su rdzogs// rig pa'i 'khor lo 'bum phrag las// gzhi mtshon dpe yi rang bzhin ni// mun pa chu dang nyi mas bstan// sems nyid rig pa ka dag la// zhen pas brtags pas snang med pas// smag gi mun rum lta bur bshad// dngos med rig pa rang snang la// ye shes rol pa mi 'gag pas// chu yi gnyer ma lta bur bshad// ma bcos sems kyi mtshan nyid la// rtsol bas bkag pa ma yin yang// gdod nas dag pa dri med pas// nyi ma shar ba lta bur bshad// tha dad rtag par 'dzin pa rnams// rol pa'i snang ba bkag pas chad// mtha' bral dbu ma'i don 'dzin pas// mtha' gsum gsal ba'i dgos pa'o// rang snang lhun grub ye gnas la// bgrod pa'i lam gyis btsal mi dgos// mtha' med nam mkha' lta bu la// bgrod pas phyin par ga la 'gyur// sems la bgrod pas phyin 'dod na// mkha' la tshad kyis 'jal ba 'dra// lam bstan pa dang lam gyi dpe// nges pa'i don ldan de nyid yin// don gyi lam dang tshig gi lam// don gyi thug phrad gsum yin la// de yi brda phrad tshig gi lam// ye shes bgrod med rdzogs pa'i lam// rnam grol 'bras bu kun gyi rgyu// ye shes gsang ba'i don rtogs na// mi g.yo sems kyi dkyil 'khor na// theg pa kun gyi 'bras bu 'char// des na kun grol dgongs pa'i thugs// lam la rim med cig car 'jug/rnam rtog phra rags rim gyis shes// tshig lam rkyen gyis ma mtshon par// ma bcos sems kyi don mi shes// tshig gis lam gyi don la sbyor// gsang don mthong bas bde ba'i sa// 'dzin pa rags pa'i rtog pa dag/rang byung ye shes nyid du gsal// mi rtsol bde ba'i sems la gnas// mi 'gyur spros bral chos nyid la// 'dzin bral btang snyoms rnal 'byor gyis// skyon nyid byang chub sems su mthong// gnyis med 'od gsal chen po la// skyon spang yon tan blang du med// bsam pa ma lus sems su shes// mthar phyin byang chub sems kyi lam// mar me'am pad+ma 'bab chu sogs// tshig dang skabs kyis don la sbyor// lus dang ngag gi rtsol ba dang// ting 'dzin sems kyi rim med par// thams cad sgrol ba'i rdzogs pa'i lam// reg pa'i gnas su rtogs pas phyin// des na mthar phyin 'bras bu'i lam// ye nas yod med rnam dag lam// skyon yon rnam dag kun tu bzang// dbyer med thams cad mtshungs pa'i lam// byang chub sems la rgyu med pas// rgyu yis bsgrub pa'i 'bras bu min// dang po ye shes rgyu med pas// rang gsal nyag gcig dri ma med// rtsol med nam mkha' bzhin du gnas// sangs rgyas sems can kun la khyab// de nyid rtogs pas 'bras bu'i sa// 'das pa ma 'ongs da ltar yang// rtogs pa snga phyi'i khyad par las// dus gsum gcig ste khyad par med// ma bcos thugs kyi rig pa las// sngon med phyis med nyag gcig gsal// rang byung 'od gsal gdod nas yod// rgyu med 'bras bu byang chub sems// 'bras bu kun gyi bdag nyid yin// chos sku 'bras bu rang gsal la// rin chen 'bar ba lhun grub ltar// thugs rje'i byin rlabs 'dod dgu 'char// skal ldan rang rkyen nyi ma bzhin// sems can dus na skabs kyis mthun// lhun grub dus na phyogs ris med// 'od gsal rig pa'i dkyil 'khor na// rang snang 'bras bu rgya mtshor 'khyil// gsal bar 'bras bu bdag gzhan med// bdag gzhan 'bras bur snang ba la// dngos dang bsam pa skabs kyis shes// gsal bar rig pa'i byin rlabs ni// chos nyid rig pa'i gzhi la rdzogs// snying po don gyi gzhi rtogs nas// rang bzhin tshogs rdzogs sgrib pa med// gnyis kyis mi bsgrub spang pa med// spang med thig le nyid kyi dbyings// mtshon med sems kyi 'bras bu ni// rig ma'i bde bas mtshon du med// 'od gsal rgyu 'bras gnyis med la// rgyu 'bras gnyis su rtog pa min// gsal bar rdzogs pa'i 'bras bu ni// 'byung ba lnga la rag ma las// sku gsung thugs la rten mi 'cha'// zhes gsungs so// ye shes gsang ba'i rgyud las/ rin chen gsal bar byed pa'i le'u ste drug pa'o//// de nas sems dpa' rdo rjes// de bzhin gshegs pa rnam par snang mdzad la 'di skad ces gsol to// 'od gsal thugs rje lhun grub khyod// rol pa'i mdzad pa 'bum phrag yas// 'od gsal dbyings la bzhugs bzhin du// thugs rje'i mdzad pa phyogs bcur brdal// 'gro ba'i bsam pa re ba skong// yid bzhin nor bu lta bur shar/ khyod ni snang gsal sgron ma ste// ma rig mun pa dang bar byed// sman chen bdud rtsi byams mgon gyis// rdzogs chen sems kyi rang bzhin la// bkag med spyod pa ji ltar bgyi// zhes gsol to// de nas de bzhin gshes pa rnam par snang mdzad kyis bka' stsal pa/ sngags kyi spyod pa spyod pa'i mchog/ sems kyi 'phro 'du'i las mi byed// rang gsal klong la ye gnas pas// nam mkha' rdo rje ma bcos sems// sgo gsum rdo rje ma bal bar// lus kyis phyag rgya'i las mi byed// tha mal lus spyod de bzhin no// ngag gi snying po bzlas brjod med// ma bcos gsung gi spyod pa las// zhen pa'i nga rtsol gang yang min// sems kyi 'phro 'du'i las mi byed// rang gsal klong la ye gnas pas// dran bsam rgyu ba gang yang min// spros bral nam mkha' lta bu la// rang gsal ye shes ma bcos par// rtsol med rang bzhag lhug pa'o// gang du bsam bzhag 'od gsal mkha'// dus gsum dran pa rkyen gyis bzung// tha snyad mtshan ma g.yo 'gyur na// nam mkha'i rdo rje spyod pa la// 'od gsal lhag pa'i sems kyis gnas// rnam rtog dran pa g.yos tsam na// rin chen 'phrul gyi snying po'i sgo// dran pa'i rkyen gyis gzung bar bya// lus ngag gtso ru 'jog byed na// de yang spyod nyid spyod ma yin// spyod med rig pa'i spyod pa la// rtsol med 'bras bu lhun gyis grub// bcos med sems kyi rang bzhin la// bcos pa'i spyod pa phyin ci log/ dngos bral rig pa bdag med la// btags pa'i bdag 'dzin log pa bzhin// 'od gsal rig pa lhun grub la// rtsol ba'i skyod pas sems mi mthong// bsam gyis mi khyab 'od gsal sems// 'gyur med dbyings las ma g.yos kyang// rang snang lhun grub byin rlabs las// skal ldan bsam pa ji bzhin du// 'gro 'dul thabs kyi spyod pa mdzad// rang sems pad+ma bzhin dag nas// gzhan dag ji ltar mos bzhin mdzad// g.yem par 'dod la g.yem pa nyid// rang sems gang 'thad sgo dang bstun// zhe sdang mnar sems nga rgyal nyid// thabs nyid gsang ba'i lam du bstan// nyan thos la sogs 'jug pa'i sgo/ gang mos mthun pa'i thabs kyis bstan// gsang don rtogs na gang yang rung// rang byung ye shes nyag gcig la// gsang ba'i dkyil 'khor grangs med pa// mthun 'jug thabs su bstan pa yin// ci yang yin no gang yang rung// su zhig thugs kyi dkyil 'khor du// gter dang ldan no khyad par che// ma bkag sems rtogs khyad par las// sgrib par gyur pa gang zhig yod// ma bkag ci bder rtogs par spyod// snang gsal rig pa'i gdeng ldan na// gdul bya mos pa'i ngo dag tu// sna tshogs spyod pa rgya mtsho spyod// gang yang ma bkag kun tu bzang// mthar phyin dus gsum sangs rgyas kyis// dug lnga rtogs pa'i spyod pa yis// bya btsal kun bral lhun gyis grub// dus gsum sangs rgyas gang la yang// spyod pa de las yongs mi mnga'// rnam dag sems kyi spyod rtogs na// rtsol ba'i spyod pa log pa'i chos// lhag pa'i spyod pa 'od gsal thugs// gang la sems nyid lhag spyod kyang// lhag pa'i spyod pa mos pa 'jug/ skal ldan lhag pa'i don zin kyang// che la dmigs pa'i cha snyoms pas// gong 'og dmigs pa'i sems dang bral// rang bzhin nam mkha' rdo rje dang// mthun 'jug 'gro 'dul thabs kyis spyod// ces gsungs so// ye shes gsang ba'i rgyud las/ bya ba dang bral ba'i spyod pa bstan pa'i le'u ste bdun pa'o//// de nas sems dpa' rdo rjes/ de bzhin gshegs pa rnam par snang mdzad la 'di skad ces gsol to// gsang 'dzin thugs rje'i mnga' bdag khyod// rol pa'i 'khor lo gsung gi bdag/sku yi 'khor lo mkha' ltar khyab// snying po'i don ldan kun mkhyen thugs// sngags kyi bdag nyid skyob pa la// 'dus pa'i 'khor tshogs mos pa yis// dam tshig gsang ba'i don zhu ba// gsang ba'i dam tshig bshad du gsol// zhes gsol pa dang// de bzhin gshegs pa rnam par snang mdzad kyis bka' stsal pa/ lhun grub ye shes gsang ba la// bsgrub cing bcas pa'i dam tshig med// rig pa gsal ba'i dam tshig ni// rin chen 'bar ba sgrol ba'i sku// rdo rje nyi ma lta bur gnas// lhun grub phyogs ris med min pas// sdom dang tshul khrims phyogs mtshams dang// phyi nang gsang ba'i dam tshig yin// ma bcos gsang ba'i dam tshig ni// med pa phyal pa gcig pu dang// lhun gyis grub pa'i dam tshig go/ rang rig gdod nas lhun grub la// gzung 'dzin mtshan ma'i chos med pas// brjod du med pa'i sems nyid kyis// bsrung du med pas ngang du bsdam// de yang bsrung du med na bde// gnyis med sems kyi dam tshig la// 'da' med srog gi gnas gyur na// ma bcos rgyal ba'i dam tshig yin// nam mkha' lta bur gsal khyab la// mtha' dang dbus med ma bcos pas// 'di yin 'di min phyogs dang bral// phyogs bral skyes bu chen po nges// phyogs gcig spang zhing phyogs gcig bsgrub tu med// gtad med 'dzin bral chen po la// phyogs mtshams nges pa'i chos ma yin// bde gshegs sems can thams cad la// ma bcos sems kyi rig pa gcig/ rgyu yis ma bskyed ye nas byung// rkyen gyis ma sbyangs gdod nas dag/rang bzhin 'od gsal rig pa la// ma lus dgongs pa thams cad 'dus// dus gsum sangs rgyas thams cad la// rang bzhag dgongs pa gcig las med// rang snang mi 'gyur chos nyid la// rang bzhag rig pa mi gda' na// sems nyid gcig pu dam tshig ste// dus gsum sangs rgyas thams cad la// dam tshig 'di las yongs mi mnga'// rnam dag rang bzhin 'od gsal la// lus dang ngag gi bya rtsol med// ting 'dzin sems kyis rim btsal med// 'di ni tshig dang bral ba ste// gyi na lhun grub dam tshig yin// lhun grub dam tshig rtsol bral la// btsal ba'i dam tshig ye nas med// sel med rin chen gling bzhin du// rnam dag ye shes rang byung la// skyon gyi rang bzhin ngang gis dag/ gzhi rtsa med pa'i sems nyid la/ btags ba'i 'dzin pa rnam par dag/ lhun grub 'od gsal dag pa la// rnam rtog brtag pa'i sems grub na// mu stegs sangs rgyas ci la rtsod// sangs rgyas sems can ci la gdags// rtogs pa dngos la grub pa na// rin chen 'phrul gyi lde mig gis// tha mal zhen pa ci ltar bzlog/ lhun grub dam tshig bya btsal med// lhun grub rin chen snying po ltar// gcig rdzogs rang gsal dag par rdzogs// kun rdzogs rang byung sems su rdzogs// thams cad lhun grub rnam par rdzogs// des na lhun grub rdzogs pa che// zhes gsungs so// ye shes gsang ba'i rgyud las// rdzogs pa chen po'i dam tshig bstan pa'i le'u ste brgyad pa'o//// de nas sems dpa' rdo rjes// de bzhin gshegs pa rnam par snang mdzad la 'di skad ces gsol to// bdag cag 'dus pa'i 'khor tshogs rnams// thog med dus nas rin chen bral// gsal med khams gsum 'khor bar 'khyams// dus 'dir thugs rje'i byin rlabs kyis// kun mkhyen khyed kyi 'khor du 'dus// rtog pa sems su shes pa'i sa// kun mkhyen khyod kyis gsung du gsol// zhes gsol pa dang// de bzhin gshegs pa rnam par snang mdzad kyis bka' stsal pa/rol pa'i sgra la sems gtod cig/ rang byung ye shes sems kyi sa// brjod pa'i tha snyad kun bral yang// dman pa'i blo yis rtogs bya'i phyir// rig pa gsung gi sgo nas bstan// ma bcos rang snang bla ma'i sa// sbyangs pas ma yin ye nas grub// rang byung rnam dag kun bzang sa// dbyer med che mchog chos kyi sku// rgyud dang mdo sde bla med sa// kun tu 'od dang rdo rje 'dzin// ma chags pad+ma stug po bkod// tshegs chen yi ge 'khor lo dang// kun tu dbye ba med pa'i sa// sa drug sems la bgrangs pa yang// ma bcos rdzogs pa chen po'i sa// rtogs pa'i yon tan drug tu bstan// ma bcos sa la sbyang pa med// 'od gsal lhun grub chen po la/sa yi rim pa gang yang med// rang byung rig pa rtogs gyur na// nor bu rin chen lhun grub ltar// thams cad sems las byung ba'i phyir// rang snang byang chub sems kyi sa// 'gyur med sems kyi ngo bo ni// rtog pa ma yin mi rtog min// gang la'ang gnas pa ma yin pa// gnas med 'dzin bral rig pa'i gnas// ma spangs kun bral 'od gsal gnas// mi gnas gnas pa'i chos nyid la// skal ldan dang po 'jug pa na// mthar phyin sa la khyad par med// dag pa thugs rje'i rang bzhin te// rtogs pa'ang rang bzhin sems su gcig/ 'dzin pa'i blo yis g.yos gyur kyang// rang byung 'od gsal 'gyur ba med// 'gyur med ngang la ngang bzhag ste// ma spyad sems kyi gyi nar gnas// dbang po yul la gang snang ba// ye shes 'od du kun la gsal// bkrag gsal gzugs kyi dkyil 'khor la// 'od gsal rang byung ngo mtshar che// brjod bral sgra yi dkyil 'khor la// snang ba'i ye shes rang bzhin gsal// rang bzhin sna tshogs dri med la// ye shes gsal bar rang byung sems// mu kha ro yi dkyil 'khor la// lce yi ye shes ngo mtshar che// gsal ba rag bya'i rang bzhin la// shes rab lus kyi rang bzhin gnas// kun 'das chos kyi dkyil 'khor la// ye shes thugs kyi rig pa gsal// rang bzhin bde chen dkyil 'khor drug/ gnyis med rdo rje 'gyur med las// ye shes mi 'bral 'dzin pa'i sa// 'dzin pa'i yul la ma chags shing// kun mkhyen dri ma dang bral bas// ma chags pad+ma can gyi sa// rang nyid gsal ba kun 'dus pas// tshogs chen dkyil 'khor yi ge'i sa// mi phyed sems la stug po bkod// byang chub sems kyi rang bzhin la// dbyings dang ye shes dbyer med pas// kun bzang dbye ba med pa'i sa// ma spangs sems nyid sa dag la// sa rnams ma lus thams cad 'dus// sbyangs pa'i sa rnams thams cad ni// sbyang med sa la sbyangs pas na// bsam pas bzhag ste rang bzhin log/ mthar thug ma yin rang 'dod sa// des na ma bcos rdzogs pa'i sa// rang byung lhun rdzogs khyad par sa// sa yi khyad par cir bstan kyang// ma bcos rdzogs pa'i sa la 'dus// zhes gsungs so// ye shes gsang ba'i rgyud las/ sa bstan pa'i le'u ste dgu pa'o//// de nas sems dpa' rdo rjes// de bzhin gsheg pa rnam par snang mdzad la 'di skad ces gsol to// thugs rje'i mnga' bdag skyob pa'i lha// bsam gyis mi khyab chen po yis// gsang ba'i theg pa gsungs pa 'di// ma 'ongs dus na ji ltar 'byung// zhes gsol pa dang// de bzhin gshegs pa rnam par snang mdzad kyis bka' stsal pa// rtsol bral gsang ba'i theg pa 'di// lha gnas gsum du grags 'gyur nas// yang sprul gang zag thugs sras kyis// 'dzam gling dbus su rgyas par byed// rgyal sras gsang ba'i snod ldan la// rna brgyud rig pa sngags kyi don// 'phrul tshig rig pa'i sgo nas ston// gsang 'dzin rig pa'i snod ldan rnams// ma bcos gsal ba'i don go nas// rnam grol 'bras bu 'thob par 'gyur// de nas gsang ba dam pa 'di// mtha' 'khob yul du rgyas par 'gyur// der yang gsang ba dam pa 'dis// skal ldan gdul bya'i ngo gang du// rig pa'i sgron ma byed par 'gyur// de nas thugs rje'i skal med pas// gsang ba dam pa nub par 'gyur// gsang ba'i theg pa dam pa 'di// gzhan gyis nub par mi 'gyur te// dri med bdud rtsi rtogs dka' la// rna brgyud 'phrul tshig mi ldan pas// sgra bzhin spyad nas smra ba dag/ lta spyod leg pa'i nga rgyal can// ma bcos rang snang rol pa dang// rnam rtog zhen pa'i brtags pa dag/bye brag ma phyed rmongs pa dag/ rdo la gser du 'dzin pa ltar// 'od gsal lhun grub rang snang dang// brtags pa'i zhen pa bsres nas smra// ma bcos rig pa gdeng med par// rang ltar ya rabs mtho 'dod nas// bab col 'dod lnga spyod pas log/ de yi dus kyi gang zag rnams// sbrel ma g.yang du lhung ba bzhin// rdo rje'i khab tu ltung 'gyur nas// byang chub sems kyi rigs dang bral// mgyogs 'gro so mtshams 'das dang 'dra// de nas lho phyogs rgyud du rgyas// skal ldan grol ba'ang 'byung bar 'gyur// de nas 'dzam gling dbus su nub// sprul pa tha ma'i bstan pa la// ma 'ongs dus na 'byung bar 'gyur// de yang rang bzhin rigs can dag/ rdzogs chen 'bras bu'i sgor zhugs nas// rnam grol 'bras bu 'thob par 'gyur// bsgom dang spyod pa'i tshul ma nor// mnyam pa'i don la mnyam bzhag na// de ma thag tu rig pa 'char// gsang ba'i don ldan gang zag bzhi// de yi dus na 'byung bar 'gyur// bstan pa bcud kyi mdzod 'dzin cing// gsang sngags ma lus sgrogs pa'i bdag/dgongs spyod zab mo'i don dang ldan// 'dzin pa log pa'i gang zag gis// gsang ba'i theg pa bsnub par 'gyur// 'das pa'i dus na theg pa 'di// skal ldan mngon rdzogs rgyal po yis// thugs kyi sras bdun rnams la bstan// de dag rig pa mthar phyin nas// de bzhin rtsol bral chos la bkod// rdo rje 'dzin pa'i sde dpon gyis// sems nyid rig pa'i theg pa bsnub bsgrubs min nam// zhes gsungs so// ye shes gsang ba'i rgyud las/ lung bstan pa'i le'u ste bcu pa'o//// de nas de bzhin gshegs pa rnam par snang mdzad kyis sems dpa' rdo rje la 'di skad ces bka' stsal to// byang chub sems 'di kun tu bzang// ma lus 'dus pa'i snying po mchog/ theg pa mkha' 'dra blta ba'i klong// rgya mtsho yangs pa bde ba che// kun 'dus ye shes dag pa'i 'od// phyogs mtshams kun tu gsal bar 'phro// ye shes me long thams cad gsal// ma bcos gzugs brnyan snang bas na// ye shes me long dag tu bshad// rang rig ye shes 'od gsal la// mtho dman rlom sems che chung med// bdag gzhan gnyis med rang rig la// 'dzin pa kun bral 'od gsal dag/ dbyer med nam mkha' lta bur khyab// snang srid byang chub sems su mnyam// mnyam pa rang gsal phyogs bcur brdal// 'od gsal rig pa mnyam par bshad// bcos med dbyings kyi rang bzhin la// 'dzin rtog zhen pa'i chos med pas// mi 'gyur ye shes rang byung la// bden par mi 'dzin brdzun pa'ang min// 'dzin med rig pa gnyis bral la// gang yang mi snang kun tu bzang// chos nyid sems la dngos med gsal// stong pa kun mkhyen ye shes thugs// dngos med kun ldan stong chen po// 'dzin med rig pa 'od gsal bas// stong nyid ye shes dag tu bshad// ji ltar snang ba'i chos rnams kun// gnyis med rig pa ka dag la// ye shes rol pa ma 'dres gsal// kun bzang chos nyid spros med la// rol pa'i 'khor lo bsam mi khyab// 'du zhing 'phro ba rgya mtsho bzhin// 'bar ba'i ye shes rmad po che// rang gsal rig pa kun mkhyen thugs// mnyam la ma 'dres kun tu bzang// ma 'dres gsal ba'i ye shes so// mi 'da' phyag rgya chen po las// rang byung mdzad pa cir yang 'gyur// lhun grub mdzad pa phyogs ris med// kun gyi snying po rang byung la// thugs rje lhun grub shar 'gyur nas// gdul bya'i bya ba kun mdzad gsal// des na bya ba nan tan no// rang gsal ye nas ma bcos pa// don de shes pas ye shes yin// chos nyid ka dag 'od gsal sems// don de shes pas ye shes yin// ma bkag rang rig rgyu med gsal// rang byung ye shes 'gyur med sems// 'od gsal bsam gyis mi khyab pa/ kun bzang rol pa mtha' dbus med// mi rtsol mtha' bral dbu ma'i sems// mtshon 'das rang bzhin zhen rtog med// gnyis med rang rig yul dang bral// rang rig ye shes thig le drug/blta spyod dgongs pa'i rang bzhin no// ma 'phros zla ba'i dkyil 'khor ltar// mi g.yo sems nyid ma 'phros pa// thig le spros bral ye sangs rgyas// byang chub sems kyi khyad par che// mngon par sangs rgyas che ba la// ye shes thig le kun tu bzang// rnam gsum thig le kun bzang nyid// chos nyid dbyings su sangs rgyas che// kun bzang thig le byang chub sems// thams cad yin pa'i che ba nyid// rtsol bral lhun grub thig le nyid// bdag nyid chen po'i sangs rgyas yin// mtha' bral 'od gsal chen po ni// sangs rgyas med pa'i che bar bshad// mi 'gyur brdal khyab spros pa bral// ces kyang mi bskyod sems nyid che// 'du 'bral gnyis med rdo rje nyid// phyi nang med pa'i gsal khyab la// phyi nang gsang ba'i sgo phugs med// yul dang dbang po gdod nas dag/ mtshan ma gzhil ba'i sku med pa'i// rdo rje sems dpa' mi 'gyur che// ye shes mkha' gsal kun tu bzang// bsam med mkha' gsang ye sangs rgyas// cir yang mi dgongs chos nyid dang// mi 'da' phyag rgyar 'gyur med sems// mi rtsol mtha' bral dbu ma'i lam// mkha' ltar khyab pa'i bde chen po// rgyu 'bras gnyis med ye nas rdzogs// zhes gsungs so// ye shes gsang ba'i rgyud las/ ye shes bstan pa'i le'u ste bcu gcig pa'o//// de nas sems dpa' rdo rjes// de bzhin gshegs pa rnam par snang mdzad la 'di skad ces gsol to// kun tu bzang po ye shes thugs// bde chen gsung gi 'khor lo'i bdag/ byar med ye shes rol pa'i sku// dbyer med rdo rje mchog gyur la// 'dus pa'i 'khor tshogs mos pas 'dud// rtsol bral ye shes gsang ba'i rgyud// chos nyid gsang ba'i ched du gsungs// bdag cag 'dus pa'i 'khor tshogs kyis// mtshan gyi rnam grangs ji ltar gzung// zhes gsol pa dang// de nas de bzhin gshegs pa rnam par snang mdzad kyis bka' stsal pa// gsang rgyud theg pa'i snying po 'di// nyon mongs zhen pa'i 'brel thag chod// chos rnams gsal ba'i ye shes sgron// kun tu bzang po'i ye shes thugs// bde chen mdzes pa'i ye shes rgyan// gsal ba'i ye shes gsang ba'i rgyud// 'di la mtha' dbus med pas na// nam mkha'i mtha' dang mnyam pa'i rgyud// kun 'dus mnyam pa chen po yis// gsang ba kun 'dus rig pa'i gter// rang byung 'od gsal chen po la// zhen pa'i brtags pa gdod nas med// ma bcos rang snang rtogs pas na// nyon mongs zhen pa'i 'phreng thag gcod// thams cad sems su 'dus pas na// sems nyid rang gsal ye shes sgron// mi 'gyur lhun grub rang byung 'di// ji ltar gnas kyang kun tu bzang// zhen cing 'khrul pa cir gyur kyang// rang gsal ye shes kun tu bzang// rig pa bsam bral rgyal ba'i thugs// phyogs med btang snyoms chen po la// rtsol ba'i sdug bsngal bral bas bde// bde chen mtshan nyid kun las 'das// kun gyi 'byung gnas lhun grub che// rang gsal ye shes dkyil 'khor ni// sku dang gsung thugs mdzes pa'i rgyan// rang gnas ye shes bde chen nyid// rnal 'byor dgyes pa'i rgyan zhes bya// bsam med nam mkha'i mtha' ltar bral// byang chub sems la mtha' dbus med// mi 'gyur nam mkha' rtag pa ltar// sems nyid ye gsal g.yung drung ngo// thams cad byang chub sems su 'dus// thams cad kun 'dus lhun gyis rdzogs// snang srid 'khor ba'i ngo bo la// gnyis med rgyal ba'i dgongs pa dag/ 'od gsal btang snyoms chen por mnyam// bstan pa bcud 'dus gsang ba'i thabs// gsang mdzod rig pa thugs kyi gter// bstan pa spyi 'grel gsang rgyud 'di// gu lang lung gi gser zo ru// seng ge'i 'o ma blugs pa bzhin// snying gi dkyil du btsa' bar gyis// srog dang bral ba'i kha bzhin sdoms// bstan pa'i yang snying snying ltar zung// gnas ni brag dang chu la sbos// zhes gsungs so// ye shes gsang ba'i rgyud las/ mtshan gyi rnam grangs bstan pa'i le'u ste bcu gnyis pa'o//// ye shes gsang ba zhes bya ba'i rgyud rdzogs so// shrI sid+ha dang bai ros bsgyur////

CLOSE WINDOW