CLOSE WINDOW

Gpb007.012
བོད་ཡིག

rgya gar skad du// rat+na tsakra nA ma tan tra// bod skad du// rin po che 'khor lo zhes bya ba'i rgyud// gsang bdag che la phyag 'tshal lo// bstan pa ston pa 'khor gnas dus// ngo mtshar chen po'i tshig lnga yis// sems dpa' rdo rje la sogs la// gsang bdag chen pos bka' stsal pa// sangs rgyas sems can gzhi gcig kyang// phyi nang snod bcud gnyis su bzung// ye shes 'khrul pa gnyis su snang// mun pa'i nang 'khyams don mi gsal// gcig la 'char sgo gnyis su byung// gcig gis drug gi 'bras bu myong// ming ma thogs las shugs kyis 'khrul// rin chen 'khor ba'i gnas su 'khyams// snang dang mi snang gzugs su 'khrul// zhes gsungs pa dang// sems dpa' rdo rjes slar gsol pa// sangs rgyas sems can gzhi gcig la// gnyis snang shes pa'i mtshan nyid rnams// gcig pa lags sam tha dad lags// zhes gsol ba dang// gsang bdag chen pos lan gsungs pa// ming ma thogs kyi spyi sa nas// snang ba dag dang ma dag gnyis// mtshan nyid gnyis su snang mod kyang// ming ma thogs su spyi sa gcig/gcig med gnyis kyang yin ma yin// dper na ga bur sman dug bzhin// dug min sman kyang kho na min// sman dug ga bur spyi sa gcig/ rkyen dang gang 'phrad sman dug go/ ming ma thogs kyi spyi sa na// 'char sgo rnam pa gnyis su byung// ma rig 'khrul pa'i 'char sgo dang// rig pa ye shes 'char sgo gnyis// spyi sa de las byung ba yin// 'khrul pa bzang ngan khyad par las// rtogs dang ma rtogs gnyis su snang// gsang bdag ye sangs rgyas pa yin// rtogs nas sangs rgyas chos kyi sku// bsgoms nas sangs rgyas longs spyod sku// mnyan nas sangs rgyas sprul pa'i sku// sku gsum zhing khams dag tu snang// ma rtogs 'khrul pa'i shes pa de// kun gzhi 'od kyi khang bu na// ma rig pa yi 'khrul pa ni// dran pa phra mo'i yid byung bas// yid kyi dran pas tshol khro byas// bde snyam mi bde snyam byung bas// bde snyam nyams su myong ba yis// 'bral mi phod pa'i chags sems skyes// mi bde snyam pa'i sems byung bas// mi bde yid kyi tshol khro byas// nga'o snyam pa'i dran pa skyes// bde sdug sems la yun ring bas// gsal snyam mi gsal snyam gnyis 'byung// gsal ma gsal la yid rtog skyes// 'od gzugs rigs gzugs gnyis su byung// rig pa stong pa'i snying po can// kun 'byung rin po che yi gter// 'dod dgu'i longs spyod zad mtha' med// thams cad 'bras bu 'char ba'i gzhi// gsang bdag chen po ngas bshad kyis// sems dpa' rdo rje legs par nyon// ces gsungs so// rin po che 'khor lo'i rgyud las/ gleng gzhi'i le'u ste dang po'o//// de skad gsol pa'i tshig rjes su// gsang bdag chen po'i rang bzhin las// sems dpa' rdo rjes slar gsol pa// kun gzhi spyi sa gcig pa la// 'char sgo gnyis su byung ba de// byas pa lags sam byung ba lags// byas na 'dus byas dngos yin pas// bsgrubs pa rnams kyang don med 'gyur// byung ba'i mtshan nyid yin pa na// bdag las byung ngam gzhan las byung// zhes gsol pas// gsang bdag chen pos lan btab pa// ga bur dag gi rang bzhin la// sman dug ming du ma btags kyang// sman dug gnyis su snang ba ltar// kun gzhi spyi sa gcig pa las// 'char sgo gnyis su shugs kyis 'byung// sngon la gang skyes ldog bcas so// ma rig 'khrul pa'i 'char sgo nas// rig pa'i 'char sgo ma shar bar// kun gzhi 'od kyi gzugs su snang// 'od la 'dod pa'i sems skyes pas// 'dod khams lha ru shugs kyis 'khrul// 'od la yang dag ngos su bzung// gzugs khams lha ru shugs kyis 'khrul// 'od kyi rang bzhin ma shes shing// ci yang min pa'i yid skyes pas// gzugs med khams su shugs kyis 'khrul// 'od la rig pa'i rtsal skyes pas// rtsal la gdeng rnyed rtog pa shar// rig la yun ring gnas pas thob// 'od la chags shing zhe sdang byung// dmyal ba'i gnas su shugs kyis 'khrul// 'od la chags shing 'bral mi phod// yi dwags gnas su shugs kyis 'khrul// yang dag ma shes don mi gsal// byol song dag tu shugs kyis 'khrul// 'od gzugs bzang ngan phrag dog skyes// mi rnam dag tu shugs kyis 'khrul// nga las med pa'i sems skyes pas// lha min dag tu shugs kyis 'khrul// rtsa ba ma rig gnyis yin pas// snang dang mi snang gnod byed pas// 'dre kun dag gis dpe yis bstan// gzhi ni kun gzhi'i rnam shes yin// chags las zhe sdang lus su 'khrul// 'dod las 'dod chags sha ru 'khrul// gti mug sha yi gzugs su byung// bden rdzun rnam pa sna tshogs byung// lhan cig skyes pa'i ma rig las// kun brtags ma rig rtog pa byung// yid gnyis phyi nang gnyis su bzung// yul la 'jug cing sgrib rnams gsog/ 'byung 'jug phyi nang dag tu blta// zhes gsungs so// rin po che 'khor lo rgyud las/'khrul tshul bstan pa'i le'u ste gnyis pa'o//// de skad gsol ba'i tshig rjes la// sems dpa' rdo rjes yang gsol pa// gzhi dang 'khrul pa'i mtshan nyid de// 'dra ba'i dpe ni ci yis mtshon// gzhi dang 'khrul pa'i khyad par ci// 'khrul gzhi rtsad nas ji ltar gcad// de skad gsal ba'i tshig gsan nas// gsang bdag chen pos lan btab pa// gzhi ni kun gzhi'i rnam par shes// 'khrul pa kun tu 'tshol ba'i yid// gzhi ni ye nas yod pa ste// 'khrul pa yid rtog glo bur pa// gzhi ni rig pa rgyu yin te// 'khrul pa rnam rtog dum bur snang// smig thag tho gzhi de las su// chu sprul mir 'khrul dpe yis mtshon// bcos bslad 'phel 'grib rgyu rkyen bral// 'pho 'gyur bya btsal 'gyur ba med// dngos med ma bcos lhun gyis grub// glo bur chos la rag las min// ma bcos ma bslad ma btsal don// 'dzin bcas blo las khyad par grol// kun gzhi'i rnam shes ma rig gzhi// lhan cig gnas pa'i ma rig de// yid kyi rnam par shes pa'i gzhi// 'gyu ba'i yid kyi shes pa de// nyon mongs can gyi yid kyi gzhi// nyon mongs 'gyu ba'i shes pa de// sgo lnga rnam par shes pa'i gzhi// phyi lta nang lta yid gnyis de// 'khrul pa gzhi la med par bcad// ces gsungs so// rin po che 'khor lo'i rgyud las// 'khrul gzhi rtsad nas bcad pa'i le'u ste gsum pa'o//// de nas gsol pa'i tshig rjes la// sems dpa' rdo rjes yang gsol pa// 'khrul pa bsal zhing ldog pa'i thabs/ khyad par chos ni yod dam med// de skad gsol pa'i tshig gsan nas// gsang bdag chen pos lan btab pa// 'khrul pa bsal na thad dkar bsal// 'khrul pa ldog na rgyu nas ldog/ sgo lnga yul la gsal dus su// snang ba'i mtshan nyid shes pas ldog/ nyon mongs rnam lngar gsal ba'i tshe// blo bur 'khrul par shes pas ldog/ yid kyis nang du bltas pa'i tshe// blo yi 'dzin par shes pas ldog/ bden pa'i chos la the tshom za// mi bden chos la yang dag 'dzin// bden rdzun shes pa skyes pa'i tshe// ma rig 'khrul par shes pas ldog/ ci yang mi shes mi gsal tshe// gdams pa rgyud la thebs pas ldog/ snang yang mi 'gegs mi bsgrub na// phyi yi 'khrul pa sol ba yin// gsal yang yul la mi 'jug na// rten gyi 'khrul pa sol ba yin// nang du bdag 'dzin mi skye na// 'phrang gi 'khrul pa sol ba yin// phyi nang shes pas ma bzung na// blo yi 'khrul pa sol ba yin// yang dag don la gdeng rnyed cing// 'dzin dang the tshom ma skyes na// ma rig 'khrul pa sol ba yin// rig pa stong pa'i snying po can// snying po ngo yis zin pa'i tshe// rtsol bsgrub 'khrul ba sol ba yin// rgyud kyi bya ba thong ba'i tshe// zhen chags 'khrul pa sol ba yin// gnyen po klong du gyur pa'i tshe// rkyen gyi 'khrul pa sol ba yin// ye shes klong du gyur pa'i tshe// ma rtogs 'khrul pa sol ba yin// ye shes rgyun chad med pa'i tshe// dum bu'i 'khrul pa sol ba yin// rtogs pa rang dang mi 'bral tshe// 'khrul pa thams cad ma spangs sol// zhes gsungs so// rin po che 'khor lo'i rgyud las// 'khrul ba bsal thabs kyi le'u ste bzhi pa'o//// de skad gsol ba'i tshig rjes la// sems dpa' rdo rjes yang gsol pa// 'khrul pa sel nas blta ba'i don// nyams su blang du yod dam med// de skad gsol pa'i tshig gsan nas// gsang bdag chen pos lan btab pa// 'khrul pa log nas ye shes 'char// 'khor ba'i shes pa ma sol na// rang gi ye shes ngos mi zin// snyam byed blo dang ma bral na// nges shes rgyud la 'char mi btub// des na 'khrul pa ldog thabs gces// gzhi rtsa med pa'i ye shes ni// rang bzhin dag pa'i lta ba yin// bya bral 'dzin pa med pa ni// ma bslad so ma'i lta ba yin// 'khrul pas mi sgrib ye shes ni// rtogs pa gdeng gi lta ba yin// ma phye ma bkol mi gnas na// yin min med pa'i lta ba yin// spros pa'i chos rnams shugs grol na// phyogs bral chen po'i blta ba yin// rkyen rtog kha ru mi 'gro na// blta ba gdeng du skyol pa yin// gong 'og khyad par ma mthong na// thig le nyag gcig lta ba yin// bzang ngan blang dor mi skye na// 'khrul rtog thams cad nub pa yin// snyam byed shes pa mi skye na// blo yi chos las grol ba yin// sems la khu 'phrig mi za na// go rtogs nang nas shar ba yin// snang ba yul gyis mi gnod na// phyi yi sgro 'dogs chod pa yin// bden pa'i don la yid ches na// nang gi sgro 'dogs chod pa yin// sdug bsngal shes pa mi 'byung na// blta ba gnad la phebs pa yin// dge sdig shes pa mi skye na// bde chen gnad kyis zin pa yin// 'gyur ldog shes pa mi skye na// rig pa gnad la phebs pa yin// 'khrul pa'i shes pa mi skye na// gdeng gi gnad la phebs pa yin// rgyu rkyen chos la mi re na// rang byung gnad la phebs pa yin// rig pa'i rtsal rnams rdzogs pa na// stobs kyi gnad la phebs pa yin// stong pa phyal par ma song na// rig pa gnad la phebs pa yin// rig pa gzung 'dzin mi skye na// stong pa gnad la phebs pa yin// rig stong tha dad mi skye na// gnyis med gnad la phebs pa yin// gsal 'grib shes pa mi skye na// ye shes gnad la phebs pa yin// zhes gsungs so// rin po che'i 'khor lo'i rgyud las// 'khrul pa las ldog pa'i lta ba bstan pa'i le'u ste lnga pa'o//// de skad gsol ba'i tshig rjes la// sems dpa' rdo rjes yang gsol pa// lta ba rtogs nas bsgom pa'i don// nyams su blang du yod dam med// de skad gsol pa'i tshig gsan nas// gsang bdag chen pos lan btab pa// lta sgom bkol ba med pa la// lta bzhin gnas pa bsgom pa yin// sgom bzhin 'char ba blta ba yin// blta rtogs bying ba'i skyon las grol// bsgom gnas rgod pa'i skyon las grol// bying rgod skyon las grol bas na// mi bsgom sgom pa'i rang bzhin can// mi gnas gnas pa bsgom pa yin// ma btsal rang so'i bsgom pa yin// mi lhod mi bsgom mi rtsol ba'o// ma bsgoms don gyi snying po can// chu bo rgyun tu 'bab pa bzhin// chad cing 'brel pa'i skabs dang bral// lta bsgom cha snyoms bkol ba med// spro bsdu bcos bslad gsal 'grib med// ma bcos don gyi snying po can// rtsol bsgrub 'gyur ba'i gnas ma yin// ma bkol bsgom pa'i dngos yin te// ji bzhin ma bcos rang bzhin gnas// log rgyun grol nas don rgyun can// bsam gtan rang gnas don rgyun ldan// gzhan la mi ltos rang bzhin gnas// ting 'dzin rgyun du gnas pa'i mchog/ting 'dzin nyams su blang ba'i chos// de nyid rnam pa thams cad du// ting 'dzin 'byung 'jug med par gnas// log rgyun 'gags na de rgyun gsal// nad gso dug rnams 'joms pa ni// de nyid mthu dang ldan pa yin// dus gsum sangs rgyas thams cad kyis// ting 'dzin 'di la gtsor gnas pas// kun nas gang du mi 'bral zhing// med nas grol ba ga la yod// phyi dang nang gi 'khrul pa rnams// grol ba nyid ni yin zin pas// de dang mi 'bral don ldan no// 'khrul pa'i zhen pa las grol te// de nyid nges rnyed gzhan na med// mi dmigs bsam gtan bsgom par bya// rang la gnas pa'i ye shes ni// rtog ge'i spyod yul ma yin te// phra zhing zhib la brtag tu med// zug rngu'i nad rnams 'joms mdzad pa// ting 'dzin sman gyi rgyal po yin// zhes gsungs so// rin po che'i 'khor lo'i rgyud las/bsgom pa bstan pa'i le'u ste drug pa'o//// de skad gsol pa'i tshig rjes la// sems dpa' rdo rjes yang gsol pa// lta bsgom bkol ba med pa la// gol sgrib gdar sha ji ltar bcad// de skad gsol ba'i tshig gsan nas// gsang bdag chen pos lan btab pa// gang rtogs dus nas don gsal na// gol sgrib 'khrul pa'i chos med pas// rig nas rkyen gyis ga la tshugs// de skad gsungs pa'i tshig rjes la// sems dpa' rdo rjes yang gsol pa// rtogs na gol sgrib med yod kyang// de ma rtogs kyi gang zag la// gol sa sgrib pa ji ltar 'byung// de skad gsol pa'i tshig gsan nas// gsang bdag chen pos lan btab pa// de ma rtogs kyi gang zag la// gol sa sgrib pa gnyis su bstan// 'gro sgo nor ba'i gol sa yin// gnas don ma rtogs sgrib pa yin// sgo lngar 'khyams pas 'khrul pa yin// gong mas 'og tu 'gro sgo nor// gol sa zhes su ngas bshad do// sgrib gnyis bya yi mig bzhin du// ma bsgribs ngag tu ngas bshad do// yas gol mas bsgribs theg pa rnams// rdzogs chen man ngag tshig gcig gis// gong 'og gol sgrib gdar sha gcad// 'phrang gsum nang du skungs btsud la// rdzong gsum nang du gtsigs la dbab// rgyal po btson du bzung ba dang// blon po bskyar la gdon pa dang// dgra yi bu rnams gsad pa dang// dgra gnyen chom la phebs pa yin// ldog bcas gnyis kyis 'khrul byung na// 'khor 'das gol sgrib gdar sha gcad// ces gsungs so// rin po che'i 'khor lo'i rgyud las/gol sgrib gdar sha gcad pa'i le'u ste bdun pa'o//// de skad gsungs pa'i tshig rjes la// sems dpa' rdo rje la sogs pa// gsang bdag chen pos rang bzhin gyis// gol sgrib gdar sha chod pa yi// nyams blangs spyod pa 'di gsungs so// rig pa'i snying po nyams blangs na// sangs rgyas dgongs pa 'gyur ldog med// man ngag gdeng don nyams blangs na// 'khor ba'i 'khrul par 'gyur mi srid// rtse gcig ting 'dzin nyams blangs na// las dang bag chags bsgrib mi srid// rang byung ye shes nyams blangs na// rgyu rkyen chos la blo mi skye// lus ngag yid gsum ci spyad kyang// bde chen spyod la 'gyur ldog med// de rtogs nyams su blangs na ni// gzung 'dzin zhen pa ldog par 'gyur// rig pa phyogs ris med pa'i phyir// gang ltar spyad kyang zhen mi 'byung// blun po dman pa'i spyod yul min// lus ngag sems kyi spyod pa rnams// dman pa'i sems la bstan pa yin// dngos po'i yid ches ma bskyed par// lta ba'i tshig la blo gtod pa// kun tu bzang por khas blangs kyang// gol sa 'khrul pa nyid du 'gyur// kun tu bzang por yongs mnyam yang// rtogs ma rtogs la yongs mi mnyam// bkol med don du ma spyad na// mun pa'i skye mched dag tu bstan// ngo bo nyid kyi rnal 'byor pa// gang ltar gnas kyang grol bar 'gyur// mtshan ma'i 'khrul pa las grol te// de nyid nges rnyed gzhan na med// nyams blangs nges par grol bar 'gyur// mi spang nyams su blangs pa'i don// 'gro 'dug dus rnams thams cad du// 'du 'bral med par rang bzhin gnas// byung ba'i chos ni dgag mi bya// med pa'i chos ni bsgrub mi bya// spangs pas spang bar mi 'gyur te// bsgrubs pas 'grub par ga la 'gyur// rgyu 'bras gzhan las ma byung bas// rgyu 'bras med pa'i ye shes yin// 'khrul rgyun chad nas don rgyun ldan// gang du gnas kyang mi 'bral cing// rtogs nas 'bral ba ga la yod// phyi dang nang gi 'khrul pa rnams// ched du ma spangs grol bar 'gyur// dgos pa'i don rnams 'byung ba yi// yid bzhin rin po che yi rgyud// de nyid mkhas las 'byung ba yin// log par brtag pa ga la yin// zhes gsungs so// rin po che 'khor lo'i rgyud las// nyams su blangs pa'i spyod pa'i le'u ste brgyad pa'o// rin po che 'khor lo'i rgyud rdzogs so//// gdams pa'i rgya dang ldan par gyis// gdams pa'i rgya dang mi ldan na// srid pa yi ni mtsho 'khrugs so/

CLOSE WINDOW