CLOSE WINDOW

Gpb007.011
བོད་ཡིག

dz+nyA na gu h+ya dI pa rat+no pa de sha tan+t+ra nA ma/ bod skad du/ ye shes gsang ba'i sgron ma rin po che man ngag gi rgyud ces bya ba/ bcom ldan 'das rdo rje sems dpa' la phyag 'tshal lo// 'di skad bdag gis thos pa'i dus gcig na/de bzhin gshegs pa thams cad kyi sku gsung thugs ye shes kyi snying po bcom ldan 'das rdo rje 'chang gsang ba mchog gi bdag po des/ mkha' spyod 'og min gyi gnas chos kyi dbyings kyi pho brang mkha' klong yangs pa'i gnas mchog na/gtang gzhag med pa'i ting nge 'dzin la snyoms par zhugs pa'i dus na// de'i tshe 'khor sangs rgyas dang/ lha dang mi dang/ lha ma yin dang/ sha za dang/srin po dang/ gnod sbyin la sogs pa rnams kyi nang nas/ rdo rje sems dpas pus mo g.yas pa'i lha nga sa la btsugs nas/ dngas pa'i sems gyis bcom ldan 'das kyi drung du/ lus btud de 'di skad ces gsol to// kye ho bcom ldan rdo rje 'chang// gsang ba'i bdag po mthu stobs can// chos nyid byang chub sems kyi don// bdag cag rnams la bshad du gsol// zhes gsol to// rdo rje 'chang gsang ba'i bdag po des gsungs pa/kye sems dpa' chen po nyon cig chos nyid don gyi rnal ma de// ma bcos ma bslad rang byung ba// tshig dang yi ge brjod las 'das// yid la ma byas mtshon dang bral// brda' 'am thabs gyis bstan pa las// ngag tu brjod pa'i chos nyid min// don dam de la brjod med kyang// bla ma'i thabs kyis ma mtshon na// gnas lugs de ni rtogs mi 'gyur// chos rnams thams cad brda' yis bstan// brda' la goms pa'i rnal 'byor pas// brda' yi don la skyol bar nus// ye shes gsang ba sgron ma rin po che man ngag gi rgyud las/ gling gzhi'i le'u ste dang po'o//// de nas yang sems dpa' rdo rjes 'di skad ces gsol to// kye ho gsang ba'i bdag po lags// chos nyid mtshon pas rtogs 'dod pa'i// slob dpon slob ma'i mtshan nyid ni// gsang ba'i bdag pos bshad du gsol// zhes gsol to// gsang ba'i bdag pos bka' stsal pa// kye sems dpa' chen po nyon cig/ slob dpon slob ma'i snod bcud de// legs par bshad kyis yid la zung// dka' ba mang spyad skyo ngal chung// rgyud la mkhas shing man ngag che// thugs rje che la 'dod pa chung// brgyud pa ldan la mtshon pa mkhas// dbang rnams thob la ting 'dzin gsal// de rnams ldan pa'i bla ma la// bcud dang ldan par ngas bshad do// bla ma la gus gtong phod che// dad pa ldan la brtson 'grus che// bla ma mi gsang shes rab ldan// sems bzang go cha mthug pa dang// rgyud 'jam zhe sdang chung ba dang// 'jig rten 'brel pa'i skyob chen min// bla ma 'khor ba'i gnyen gcig po// skye shi la sogs sdug bsngal gyis// mthong nas de las sgrol 'dod pa// de rnams ldan pa'i slob ma ni// snod dang ldan par shes par gyis// ye shes gsang ba sgron ma rin po che man ngag gi rgyud las/slob dpon slob ma'i mtshan nyid bstan pa'i le'u ste gnyis pa'o//// de nas yang sems dpa' rdo rjes 'di skad ces gsol to// kye ho gsang ba'i bdag po lags// snod ldan smin par bya ba'i phyir// dbang gi rim pa bshad du gsol// zhes gsol to// gsang ba'i bdag pos gsungs pa// kye sems dpa' chen po nyon cig/ gsang sngags rgyud la mos 'dod na// smin par bya phyir dbang bskur bas// lha dbang lus la bskur ba ni// zag bcas lha yi dbang bskur na// thun mong dngos grub phra mo 'byung// 'jig rten chos la dbang bsgyur bas// rang lus lha ru phyag rgya shes// skye med rig pa'i dbang bskur na// rang lus ma skyes dngos gzhi med// sems kyi dkyil 'khor 'od gsal bas// rdul tshon rdzas la rag ma las// dbang thob byin brlabs rtags rnams 'byung// rang sems mthong bas ting 'dzin gsal// byin brlab dgug gzhug bya mi dgos// thabs dang shes rab zung du 'brel// bde chen chos skur shes pas na// mtshan ma'i blo yang rang sar grol// gzung 'dzin thag pa de ru chad// rig pa stong gsal dbyer med la// gab pa mngon du phyung bas ni// rang byung ye shes ngo bo nyid// rig pa 'dzin med gtan la pheb// rig ma la sogs btsal mi dgos// bdag dang bdag gir 'dzin pa zad// 'dzin med sems la bcos bslad med// ye shes gsang ba sgron ma rin po che man ngag gi rgyud las/ rig pa rtsal gyi dbang bskur ba'i le'u ste gsum pa'o//// de nas yang sems dpa' chen po rdo rjes 'di skad ces gsol to// kye ho gsang ba'i bdag po lags// rang byung rig pa'i dbang bskur nas// bsgom pa'i rim pa bshad du gsol// zhes gsol to// gsang ba'i bdag pos bka' stsal pa// kye sems dpa' chen po nyon cig/ nges pa'i don la mos pa yi// rnal 'byor pa yi don ched du// sems kyi gzhag thabs 'di ltar lags// dpe don rtags dang ting 'dzin nyams// gzhag thabs btsa' thabs bcos pa'i thabs// rnam pa brgyad du rig par bya// yon tan rnam pa gsum du bstan// dpe yis mtshon pa 'di ltar lags// bram ze gtsang mas khrus gsol te// rgyal srid kun la dbang bsgyur bzhin// ma las sems can thams cad la// byang chub gnyis med rang bzhin gnas// de don rtogs par bya ba ni// dmigs pa dag la brtan byas nas// mi dmigs pa ni rab tu skye// mi dmigs pa la goms byas nas// dmigs med ngo bo nyid du grub// ma zin zin phyir snang bzhi bsgom// zin pa brtan phyir goms par bya// 'dzin med rang gsal rten mi 'cha'// zang thal rig pa rjen par bzhag/ brtan pa bogs dbyung la bzla bas// rang sems dag pa chos sku yin// rang byung ye shes mtha' las 'das// zhi gnas lhag mthong zung du 'brel// rig pa yul gyis mi gnod pa// dper na dngul chu 'pho ba 'dra// rtags ni lus ngag yid gsum la// lus ni 'dar zhing sprug pa dang// 'phags dang rgyug pa'i las rnams byed// ngag ni rgod cing ngu ba dang/ kha nas sgra skad sna tshogs 'don// sems ni 'dzin med btang dka' bas// phyi nang shes pa mi 'gyur zhing// dper na spyin phor mdzub btsugs bzhin// ting 'dzin goms par bya ba ni// rgyud dang snod dang de bzhin nyid// nyams ni ming du mi thogs par// shes pa khong nas dag pa 'byung// sngar ma thos pa'i chos skad 'byung// de don rtog med yul la ma zhen na// 'dzin med sems dang ma bral bas// spyod lam rnam bzhi gang byed kyang// sems kyi rtsi yis zin pas na// 'di ni gzhag thabs dam pa ste// dgongs pa bud+d+ha'i thugs dang mnyam// de don rgyud la btsa' ba ni// rtsis gdab 'dzin pa'i rtog pa med// dper na thi bya tshang 'jug bzhin// ma yengs lam du khyer dgos pas// dper na dmu rgod rta 'dul bzhin// ma yengs par ni gzhag par bya// de las sems ni 'phro 'gyur na// dper na nam mkha'i sprin bzhin du// 'byung yang gzhi la gnod med ltar// rtog pas mi 'grib bcos mi dgos// gsal la mi rtog kye ma ho// mi bskyod rgya mtsho'i gting dang 'dra// byang chub sems kyi rig pa 'di// gnyug mar gnas pa chos kyi sku// snga phyi rjes 'brang 'khrul pa'i lam// shes pa mi 'gyur bkrir mi btub// shes pa bying bar gyur pa'i tshe// 'phro 'du'i thabs kyis zhi bar 'gyur// shes pa rgod par gyur pa'i tshe// 'gyu ba dal bus bda' ba ni// rjes nas bcug pas rang sar ldog/ dper na rkun po tshor ma thag/ ma bskrad rang bzhin dengs pa bzhin// sems kyi rang bzhin chos nyid la// rang bzhin gsal bar ngang gis zhog/ de ltar rtogs pa'i rnal 'byor nyams// shing bal lta bu'i lus 'byung la// dbugs ni phyi nang 'gyu mi tshor// chos nyid bde gsal chen po'i nyams// yon tan 'char lugs 'di ltar lags// mtha' dbus med pas nam mkha' 'dra// 'jig bral med pas rdo rje 'dra// chags zhen med pas bung ba 'dra// rang byung ye shes ngo bo yin// ye shes gsang ba sgron ma rin po che man ngag gi rgyud las// sems kyi gzhag thabs bstan pa'i le'u ste bzhi pa'o//// de nas yang sems dpa' rdo rjes zhus pa// kye ho gsang ba'i bdag po lags// skyon mi mnga' la yon tan rdzogs// bdud dang chos su dbye ba'i phyir// bdud kyi ngos bzung bstan du gsol// gsang ba'i bdag pos bka' stsal pa// kye sems dpa' chen po nyon cig/ bdud dang chos su dbye ba la// rnam pa bco brgyad 'dir bshad do// gzugs ni phung po'i bdud du gnas// bu sogs lha yi bdud du sprul// de la 'dzin pa nyon mongs bdud// 'khrul pa'i sem ni 'chi bdag bdud// dgos pa'i nor yang bdud yin pas// gnod sbyin lha yang de dang 'dra// stong pa phyal chad lta ba'i bdud// had po bogs med bsgoms pa'i bdud// rtog med rang ga spyod pa'i bdud// thug med 'dod pa 'bras bu'i bdud// phra mos chog shes thos pa'i bdud// rtsa rlung 'khrug pa rlung gi bdud// grub mtha' log pa chos kyi bdud// mi thub dam bca' sdom pa'i bdud// 'du 'dzi longs spyod g.yeng ba'i bdud// las ngan 'brel ba grogs kyi bdud// the tshom skyes na nyams kyi bdud// thabs kyis ma zin shes rab bdud// bar chad bgegs rnams sems shes pas// bdud kyi gegs sel nyams la phan// ye shes gsang ba sgron ma rin po che man ngag gi rgyud las/ bdud kyi ngos bzung bstan pa'i le'u ste lnga pa'o//// de nas yang rdo rje sems dpas zhus pa// kye ho gsang ba'i bdag po lags// bdud kyi 'jigs pa sel ba'i phyir// 'jigs med skyabs shig bstan du gsol// rdo rje 'chang gis bka' stsal pa// kye sems dpa' chen po nyon cig/rang sems ma rtogs bdud du shar// yod par ngo shes skyabs yin pas// nges mtshon ngo sprod 'di ltar bya// snang ba shes su shes par gyis// sems kyi rang bzhin stong pa yin// stong pa 'dzin med bsam du med// bsam med mtha' bral chos sku yin// zin pa rtsol ba'i nad dang bral// lhun gyis gnas par rtogs pa na// de dang ma bral rnal 'byor rgyan// gzhan btsal 'jigs pa'i skyabs mi rnyed// rang byung ye shes kha drag skyel ma 'dra// rang sems chos kyi skur rtogs pas// 'jigs pa yi ni nad dang bral// ye shes gsang ba sgron ma rin po che man ngag gi rgyud las/ bdud kyi 'jigs pa bsal ba'i le'u ste drug pa'o//// de nas yang sems dpa' rdo rjes zhus pa// kye gsang ba'i bdag po lags// ma rig pa yi ling thog sel ba la// nges don bdud rtsi lta bu'i sman/ khyed kyis bdag la gsung du gsol// gsang ba'i bdag pos bka' stsal pa// kye kye sems dpa' chen po nyon cig/ rgyud kyi rjes su mos pa la// dang por dbang bskur legs bya ste// de nas yang dag bshad par bya// ji bzhin pa yi chos nyid la// ma yengs gsal bar bsgom par bya// sems rtog med cing ye shes gsal// gnas lugs ngang las ma g.yos pas// dper na gser gling phyin pa 'dra// dgongs pa rdo rje 'chang dang mnyam// de nyid gsal la ma zhen na// yang dag don la gnas pa yin// chags sdang gti mug dbang gis ni// rgod cing bying ba byung ba'i tshe// phyi nang gsang ba gsum po la// sems gtad de ni zhi bar 'gyur/ khams bde thun ni ring par bya// mi bde thun bzhir bsgom par bya// de nas blta bas thag bcad de// mtha' gnyis dmigs pa'i yul las grol// dmigs pa med pa byang chub sems// gzung 'dzin med pa'i ye shes la// chos kun byang chub sems su gcig/ sems ni nam mkha'i mtshan nyid ltar// mtshan ma med par ro gcig bas// skye med rnam grol bdud rtsi'i zas// dngos por blta ba'i dug 'joms pa// byang chub sems kyi lam chen 'di// dngos po stong pa nyid las grol// gdags su med pa'i sems nyid la// mtshan mar btags na blo yin pas// chos nyid blo las 'das pa yin// blo yi blo gros ngo mtshar che// de ni blo gros dam pa'i rgyu// de phyir yod med gnyis med zhen// yang dag byang chub sems nyid la// yod par sgro mi 'dogs pa dang// med par skur pa mi 'debs pas// rtag dang chad pa'i mtha' las 'das// 'byung bzhi rgyu ba'i rtsi dmigs can mig kyang// rlung sems rang khar ma yan na// phyi nang 'gyu ba med pa bzhin// mi snang bzhin du 'gyu bar zad// dper na nam mkha'i sprin bzhin du// sprin tshogs nam yang gnod mi nus// de bzhin byang chub sems nyid la// rtog pas 'grib par yongs mi nus// rang sems dag pa chos nyid la// ma btsal lhun kyis grub pa ste// gang ltar bsgoms kyang thig le'i ngang// dper na til gyi mar me bzhin// phyi nang gsal ba'i rig pa'i mdangs// rang sems rtogs pas sangs rgyas pa// 'og ma'i lam lnga sa mi bgrod// gsang sngags thabs lam skad cig gis// sgrib pa'i phung po bsal bar byed// dga' bde sdug bsngal byung tshe na// btang snyoms chen po'i ngang bzhag pas// nges don bdud rtsi'i sman chen 'dis// nyon mongs nad rnams zhi bar mdzad// ye shes gsang ba sgron ma rin po che man ngag gi rgyud las/ma rig pa'i nad rnams bsal ba'i le'u ste bdun pa'o//// de nas yang sems dpa' rdo rjes zhus pa// kye ho gsang ba'i bdag po lags// rnam par rtog pa gcod pa'i phyir// spu gri lta bu'i gdams ngag cig/bdag cag rnams la gsung du gsol// gsang ba'i bdag po kun tu bzang pos bka' stsal pa/ kye sems dpa' chen po nyon cig/ rnam dag kun grol lam chen 'di// rgyud kyi rjes su mos pa la// rang sems bud+d+har cer bstan pa// dngos grub tshe 'dir thogs med 'thob// ma btsal lhun gyis grub pa'o// de ltar ma shes sems can rnams// rang re'i blo yis bcings pa la// thabs ni du ma gsung 'gyur kyang// yang dag gdams ngag rgyal po 'di// bka' brgyud spu gri lta bu ste// gang zag gsum las 'ga' yi don// 'byung ba sems la gnas par bya// gang la mi ltos man ngag rgyud// zung du 'jug pa'i ye shes ni// rang lugs bzhin du shes par bya// rgyu dang rkyen la rag ma lus// thug phrad shugs kyi lhug pa'o// sku gsum 'bras bu rang chas pa// ye shes rang chas zang ka ma// 'di ni rang la byin gyis brlabs// rnam shes 'du ba'i gnas dag tu// bag phab lus sems glod par bya// brtags pa blo yi zhen pa log/ mi gnas pa yi mnyam pa nyid// dge ba 'phel ba'i gnas dag tu// phra rags yul la blo mi gzung// rang sems thabs kyis mthong bya ste// dngos por lta ba'i yul las 'das// yang dag shes rab mig phye nas// rang sems dri med rjen pa mthong// thang la phebs pa'i ting 'dzin yin// de ltar khong du chud pa na// skyes bu phun sum tshogs pa yin// mthong ba'i chos la blo mi gzhag/ stong ba la yang de bzhin no// sems nyid drang por bzung du med// nges par ngang la zhen na 'chings// 'di la chags pa 'ga' yod na// rang gis bcings pa'i srin bu bzhin// 'bras bu med par brlag par 'gyur// de bas sangs rgyas thob 'dod pas// rang gi sems kyi rtsad bcad de// bsam med ye shes sna rtse yin// des na chos kun rtsa ba 'di// sems nyid yin par shes par bya// ye shes gsang ba sgron ma rin po che man ngag gi rgyud las/ spu gri lta bu'i le'u ste brgyad pa'o//// de nas sems dpa' rdo rjes 'di skad ces gsol to// kye ho gsang ba'i bdag po lags// 'gro ba'i skyabs mdzad thugs rje can// bdag cag rmongs par gyur pa la// ye shes ngos gzung bshad du gsol// gsang ba'i bdag pos yang gsungs pa// kye sems dpa' chen po nyon cig/ de nyid ngos gzung spyi blugs dang// tshogs drug lhug dang thug phrad dang// gnas pa'i thabs dang lnga ru bshad// dang po ye shes ngos gzung ni// sman pa mkhas pa lta bu ste// de yis nad dang nad pa'i nyams// rtsa dang chu yi sgo nas rtog/ nad ngos zin na ming 'dogs bzhin// de bzhin bde bar gshegs pa'i rgyud// bla ma mkhas pa'i gdams ngag dang// rang gi nyams kyi bye brag gis// tshad ma gsum la brten nas ni// ye shes mkha' ltar khyab pa la// ngo yis zin na bde dang 'phrad// ye shes spyi blugs dgongs pa ni// 'phrul gyi me long sum phrug ltar// de bzhin gnas lugs rtogs pa'i ming// 'di dang phyi ma gnyis su med// de bzhin don la gnas pa'o// tshogs drug lhug pa'i man ngag ni// skyes bu nad kyis gzir ba la// ma sring ngo tsha'i rtog med bzhin// de bzhin sems nyid rtogs pa'i mi// bdag gzhan 'dzin pa'i rtog pa med// rtog med lam du khyer dgongs pa'o// ye shes thug phrad gdams ngag ni// dper na dar ya'i sman bzhin du// reg pas nad rnams zhi bar byed// de bzhin ye shes bdud rts-is zin// sems can lus la bud+d+ha'i thugs// sems gnas pa yi man ngag ni// rus sbal 'khar gzhong bzhag pa bzhin// yan lag 'khrums pas bzung mod ltar// de bzhin rnal 'byor rnam rtog chud// rnal 'byor sems la dbang bsgyur bas// 'khrul pa'i shes pas 'khrul mi nus// ye shes gsang ba sgron ma rin po che man ngag gi rgyud las/ ye shes ngos gzung ba'i le'u ste dgu pa'o//// de nas yang sems dpa' rdo rjes zhus pa/ kye ho gsang ba'i bdag po lags// rang byung ye shes ngo bo nyid// rang la 'char lugs ji ltar lags// bdag cag rnams la bstan du gsol// gsang ba'i bdag pos yang gsungs pa// kye sems dpa' chen po nyon cig/ rang byung ye shes ngo bo de// 'char ba'i thabs ni 'di lta ste// rang sems gnyug mar gnas pa ni// bla ma'i man ngag thabs kyis ni// gnas pa'i don shes ye shes pas// de las 'das pa'i gong ma bcad// bla na yod pa chen po yin// de ltar ma shes blo chung bas// dang por dben par lus bsdad nas// bya rgod mkha' la 'phur ba bzhin// dmigs gtad bcas la rig pa gtad// rlung sems gcig tu 'dus byas te// bla mas gsungs pa ji bzhin du// rtsol ba drag pos thun du gzhag/ mda' mkhan smyug ma srong ba bzhin// dmigs pa'i rtsol ba drag tu bsgrim// thun tshad rab 'bring gsum du bcad/ khams bde thun la rtsol sgrub bskyed// zhen na rtsol ba klod la bzhag/ nyams kyi 'char lugs rnam pa gsum// thod rgal cig char rim gyis dang// bye brag mang po shes par bya// zin pa'i rtags ni phyi ru 'byung// lus 'dar yan lag sprug pa dang// mkha' la 'phur zhing rgyug pa dang// bkrag dang ldan pas 'byung ba snyoms// brtan zhing 'gul du mi btub dang// gzung ba sla la gtang ba dka'// shes pa de dang 'grogs 'dod na/ khams dang mthun pa'i spyod lam bya// thun chen goms pa'i rnal 'byor bya// slob ma'i ting 'dzin zhan gyur na// bar du bsgrims la tha mar klod// dang por klod la tha mar bsgrim// ting 'dzin rab tu gyur pa na// ma bcos so ma lhug par bzhag/ rab 'dzin spyin phor mdzub btsugs 'dra// 'bring 'dzin 'dag par rdo brgyab 'dra// tha ma rtsol ba drag na gnas// sgra yi tsher mas mi gnod pas// ting 'dzin nyin mtshan bsre bar nus// brtan pa yongs su rdzogs byed pa// lus sems khong klong gnyug ma'i ngang// byang sems bde ba che dang phrad// mkha' ltar mtha' dbus sems la med// lus ni yod du mi tshor ba// shing bal 'dab ma ltar yang ba// dbugs ni phyi nang 'gyu mi tshor// sems ni mkha' ltar phyogs ris med// ye shes khong 'char bde chen 'bar// ye shes gsang ba sgron ma rin po che man ngag gi rgyud las/ rang byung gi ye shes gtan la dbab pa'i le'u ste bcu pa'o//// de nas yang sems dpa' rdo rjes yang zhus pa// kye gsang ba'i bdag po lags// byang chub sems ni gzung dka' bas// sems kyi gzhag thabs bshad du gsol// gsang ba'i bdag pos bka' stsal pa// kye sems dpa' chen po nyon cig/gzhag thabs btsa' thabs bcos thabs tshad// drod rtags skye tshul 'bras bu bstan// gzhag thabs rnam pa gsum yin la// mkha' la khyung lding gzhag pa dang// thi bya tshang du 'jug pa dang// byang ba btang ba'i skyes bu bzhin// mkha' la khyung lding bzhag pa ni// gshog pa thad bcang lding ba dang// rtsol bsgrub med par lding ba dang// 'og ma mthong bar lding ba dang// yon tan rdzogs pas lding ba dang// nang du gshog ru rgyas pa ltar// rnal 'byor mi rtog bsgom pa'i tshe// shes par thang bcad mnyam par gzhag/ rtsol bsgrub med par mnyam par gzhag/ 'og ma'i don mthong mnyam par gzhag/ yon tan yar la rdzogs par gzhag/rnal 'byor lus la sangs rgyas rdzogs// thi bya tshang du 'jug pa ltar// de bzhin the tshom med par gzhag/ bya ba btang ba'i skyes bu ltar// ji ltar gnas pa sdug bsngal med// btsa' thabs rnam pa gsum du bstan// dmu rgod rta ltar btsa' ba dang// rin chen gter ltar btsa' ba dang// ra dza'i btsun mo ltar btsa' ba'o// dmu rgod btul ba ma yengs ltar// de bzhin bsgom pa'i sems ma yengs// rtogs pa'i don la gnas par gyis// rin chen gter ltar btsa' ba ni// them yig gzhan la ma shor bar// gzhan gyi chom rkun mi tshugs shing// de bzhin rnal 'byor bsgom pa'i tshe// gdams ngag rtsi yis zin pa ni// rnam par rtog pas mi tshugs so// btsun mo lta bur btsa' ba ni// rgyal po mnga' dang btsun mo la// gzhan gyi gnod pas mi tshugs bzhin// de bzhin gdams ngag ldan pa'i mis// chos rnams sems su shes pa la// dngos po dug gis tshugs mi srid// bcos thabs rnam pa gsum du bstan// mkha' la sprin ltar bcos pa dang// khang stong rkun ma lta bu dang// dug la sngags kyis btab pa ltar// tshad la rnam pa gsum du bstan// gsal ba'i tshad ni mar me ltar// mi g.yo'i tshad ni rgya mtsho ltar// yang zhing 'jam pa shing bal ltar// drod rtags rnam pa gsum du brtan// phyi rtags lus po yod mi tshor// nang rtags dbugs ni 'gyu mi tshor// gsang rtags dngos po'i zhen pa chod// skye tshul rnam pa gsum yin te// rnam par rtog las ye shes skye// stong pa nyid las snying rje skye// zhi gnas bsgoms na lhag mthong skye// 'bras bu sku dang gsum yang ye shes 'char// ye shes gsang ba sgron ma rin po che man ngag gi rgyud las/ byang chub kyi sems gtan la dbab pa'i le'u ste bcu gcig pa'o//// de nas yang sems dpa' rdo rjes 'di skad ces gsol to// kye ho gsang ba'i bdag po lags// lta bsgom spyod pa ci ltar lags// 'dus pa'i 'khor la bstan du gsol// gsang ba'i bdag pos bka' stsal pa// kye sems dpa' chen po nyon cig/dang po lta bas thag bcad la// bar du bsgom pas nyams su blang// tha ma spyod pa la dor la// dang po lta bas thag bcad ni// rag pa rgyun chags thog mtha' med// sems nyid rgyu rkyen gnyis las 'das// mtshan ma'i rnam rtog skyon dang bral// blo dang ldan pa'i rgya bskyed de// mtha' las 'das dang lhun gyis grub// rgya che khyab gdal nyid du gnas// mtha' dang dbus su mi rtog na// lta ba'i gol sar ltung mi 'gyur// yin pa gsum gyis thag bcad pa// sku gsung thugs la yid ches skye// rin po che yi gser gling du// phyin pas thams cad gser du snang// 'khor 'das bzang ngan med par shes// ce spyang e na ya yi mig bzhin du// gnyis su med par thag chod do// bsgom pas nyams su blang ba ni// 'das pa'i shes pa rjes mi gcod// ma 'ongs shes pa sngon mi bsu// da lta'i shes pa ma bslad pa// dngos po'i rjes su ma 'brangs na// gnyug ma'i sems ni yin par nges// dbang po sgo lnga'i rjes 'brangs nas// sems can phal pa'i yul la chags// bung ba bcud la chags pa ltar// mi rtog pa la zhugs pa'i tshe// tshor bas ci yang mi tshor ba// chos can bor nas chos nyid pa// grangs can spyi yi bsgom par 'gyur// snang tshod nyams su myang bas na// rgyu 'bras khyad gsod chad par 'gyur// spang zhing 'geg par byed pa ni// nyan thos 'gog pa'i mi rtog par// thams cad ma lus chor bas na// yul dang yul chen gnyis su rtog/ ci yang yid la ma byas na// rjes su mi 'brangs mi rtog pas// grol bar 'dod pa lam gyi mchog/ci yang ma skyes ma bcos pa// shes pa so ma nyid du 'dod// de bzhin gshegs pa'i dgongs pa yin// tha ma spyod pas la dor ni// nya mo chu las mi 'da' bzhin// dkar po'i chos dang bral thabs med// dngos po'i chos la zhen na 'khor// yang na ri dwags sgra nyan ltar// yang na glang po mtsho phrad ltar// nam mkha'i mdung bskor 'dra ba'o// gang la thogs pa med pa ni// ral gri so mang 'dra ba ste// gdong du ci byung thams cad gcod// ye shes gsang ba sgron ma rin po che man ngag gi rgyud las/ lta sgom spyod pa ma 'dres rdzogs pa'i le'u ste bcu gnyis pa'o//// de nas yang sems dpa' rdo rjes 'di skad ces gsol to// kye ho gsang ba'i bdag po lags// thams cad mkhyen pa'i gsang sgo nas// kun gzhi ma skyes stong pa la// phyi nang chos rnams ji ltar rdzogs// mos pa'i 'khor la bstan du gsol// gsang ba'i bdag pos bka' stsal pa// kye sems dpa' chen po nyon cig/ kun gzhi skye med ma bcos stong pa nyid// de rtogs rnal 'byor gang gis mi gnod pa// skyes bu goms pas gar rgyugs lhung med ltar// skye med rtogs shing 'dris pa'i rnal 'byor pas// gang ltar spyad kyang mi nyams thig le ngang// ched du mi spang ngang la bzhag pas 'bral// ma spangs lhun grub byang chub chen por spyod// kun gzhi ma bcos brdal ba chen po nyid// chos kun ma 'dres byang chub sems su gcig/ kun gzhi ma bcos ngang la gang spyod pa// chos rnams kun la mi spyod mi rtog na// spyod med gnas lugs rtogs pa'i spyod pa yin// chos nyid spyod pa'i rtags ni ji ltar lags// gang la zhen pa med pas chags pa chung// ma nor don la kun gzhi 'gyur med gsal// rtags chen de yod gzhan gyi khar mi lhung// mngon shes stobs dang rdzu 'phrul lung ston 'byung// de la rlom sems med par nga rgyal ri bo smad// de yis spang len mi byed mnyam pa nyid du gsal// thig le gcig tu rtogs pas tha dad 'dzin pa bral// gzhan nas ma btsal rang la yod pa ngo mtshar che// rang bzhin med par shes pas 'bras bu 'byin mi nus// ma nor pa yi thabs kyis zin pas na// nyon mongs lnga dang dug lnga'i rtsa ba bral// dper na rnga ma'i snying po gzung dang mtshungs// skyes bu de la bya btsal med pa ste// pa na sa yi 'bras bu smin pa ltar// smin par bya ba'i rtsol ba mi byed dang// byed pa'i rtsol ba de ni smin pa'i gegs su 'gyur// kun gzhi mnyam pa'i ngang la gnas pa ni// 'khor ba'i chos kun mi spang de la rdzogs// 'phags pa'i bden bzhi'i lam yang de la rdzogs// rang rgyal rten 'brel lam yang de la rdzogs// byang sems smon 'jug lam yang de la rdzogs// byang chub sum cu rtsa bdun de la rdzogs// bcu yis bgrod pa'i sa yang de la rdzogs// dkyil 'khor rim pa'i dbang yang de la rdzogs// lha dang bzlas pa phrin las phyag rgya de la rdzogs// 'phags pa mnyes byed mchod pa de la rdzogs// sdom pa gsum gyi bsrung bya de la rdzogs// gnong zhing 'gyod pa'i bshags pa de la rdzogs// legs pa'i bsngo ba smon lam de la rdzogs// rgyal ba'i sku gsum thob ka thus ka yin nam de la rdzogs// kun gzhi ma bcos thig le nyag gcig la// yon tan rdzogs pas zhing sa gshin pa 'dra// thig ni mi 'gyur rang sems skye med yin// le ni gdal ba mnyam pa nyid du gsal// bsdu ba'i don ni gcig pas gcig ces bya// mnyam pa'i tshul gyis gol sgrib ji ltar spongs// mi lta mi bsgom mi spyad dbyer med na// 'og ma'i lta spyod gnas su gol mi 'gyur// gang yang mi 'gro 'dug pa'i mi dang mtshungs// mnyam pa'i tshul gyis bdud rnams ji ltar 'dul// mnyam pa'i gdeng la yid ches ma bral na// bdud kyi bar chod sprul pa ci byung yang// thams cad sems su shes pas klan ka mi tshugs shing/ khyim bdag dpa' bos bsrungs pa'i bud med 'dra// gza' gtad med pa'i lta ba'i mtha' dang bral/ 'dzin pa med pas bsgoms pa ngang la gsal// blang dor med pas spyod pa gang la bzang ngan med// 'bras bu spangs thob med pas sku dang ye shes gsal// de ltar rtogs pa'i rnal 'byor pa la 'chi ba med// ye shes gsang ba sgron ma rin po che man ngag gi rgyud las/ yon tan yar ldan gyi le'u ste bcu gsum pa'o//// de nas yang sems dpa' rdo rjes zhus pa/ kye ho gsang ba'i bdag po lags/ khyod ni 'gro ba'i lam ston pa// mkha' spyod gnas su 'gro ba'i phyir// 'phags pa'i lam gcig bstan du gsol// gsang ba'i bdag pos bka' stsal pa// kye sems dpa' chen po nyon cig/ mkha' spyod gnas su 'ong 'dod na// dang po thos pa'i shes rab kyis// phyi nang chos la sgro 'dogs chod// bar du bsam pa'i shes rab kyi// de don rgyud la goms par bya// tha ma bsgom pa'i shes rab kyis/ bdag tu 'dzin pa'i nyon mongs gzhom// tshogs lam bla ma tshad ldan la// mnyes pa gsum gyi mchod pa 'bul/sbyor lam bla ma'i gdams ngag gis// gzhi nas lhag mthong gzung du 'phel// mthong lam spyan lnga dag pa yis// rang sems skye med mthong bar bya// bsgom lam ting 'dzin rnam gsum gyis// gnyug ma'i yid la goms par bya// mthar phyin nyes pa gnyis zad pas// chos rnams zad sar bskyal bar bya// nga ni thabs kyi sa mkhan te// thar lam 'chol ba lam 'dir shog/ mjal dang thos dang rtogs dang goms// chos dang mdo dang mdzod dang 'jigs// thabs kyis de yis ngang la 'jog/ ye shes gsang ba sgron ma rin po che man ngag gi rgyud las// 'phags lam bstan pa'i le'u ste bcu bzhi pa'o//// de nas yang sems dpa' rdo rjes 'di skad ces gsol to// kye ho myong yang gsang ba'i bdag po lags/ khyod ni ye shes spyan dang ldan// bdag cag mos pa'i 'khor rnams la// rgyud kyi yon tan bstan du gsol// gsang ba'i bdag pos bka' stsal pa// kye sems dpa' chen po nyon cig/ rgyud rnams kun gyi bcud bsdus pa// ye shes gsang ba'i rgyud la 'dus// ci ste sgron mas don mthong ba// yon tan 'byung bas rin chen yin// yon tan bsam gyis mi khyab pas// ming tsam brjod pas stobs dang ldan// dag par byed cing skyon sel bas// dngos grub nges par 'byung ba'o// bdud kyi dpung rnams 'joms par byed// sha khrag lus las grol 'gyur na// 'dod khams zhen pa med par 'char// srid pa'i gnas su mi 'jug pas// ye shes lus la the tshom med// mun pa sel byed sgron ma'i rgyud// de thos mya ngan rnams gsum bral// rgyud ni rgyun chags zhes bya ste// 'khor ba yang ni rgyud du 'dod// 'brel dang ma tshang med pa dang// dgos pa tshang bas rgyud ces bya// ye shes gsang ba sgron ma rin po che man ngag gi rgyud las// rgyud kyi yon tan bstan pa'i le'u ste bco lnga pa'o//// de nas yang sems dpa' rdo rjes 'di skad ces gsol to// kye ho gsang ba'i bdag po lags// dus gsum mkhyen pa'i rdo rje 'chang// 'khor rnams rmongs par gyur pa la// rgyud kyi gtad rgya gsung du gsol// zhes gsol to// rdo rje 'chang gis bka' stsal pa// kye sems dpa' chen po nyon cig/ 'khor gyi nang nas gdams pa ste/khyod ni nus pa'i stobs dang ldan// nyid las mi gzhan 'khor yin pas// man ngag rgyab brten sgron ma'i rgyud// thugs la 'chong la gces par gyis// lan cig snyigs ma lnga'i dus na// nyi zla bzhin du dar zhing rgyas// byang chub srog dang brdol ba'i dad pa dang// chos nyid gtan la phebs pa'i shes rab dang// slob dpon mgo ltar khur ba'i mos pa dang// rgyud la shin tu mos pa'i skal ldan la// mi thub gsum gyi dus su khyod kyi de la ston// mos dang nyan dang kha ton klog/ chad dang bsgom par bya ba'i mi// bar gcod med par skye shi gnyis las grol// ye shes gsang ba sgron ma rin po che man ngag gi rgyud las/rgyud kyi gtad rgya bstan pa'i le'u ste bcu drug pa'o//// ye shes gsang ba sgron ma rin po che man ngag gi rgyud ces bya ba rdzogs so//// paN+Di ta shrI sid+ha dang zhus chen gyi lo tsA ba bai ro tsa nas man ngag gi rgyud gtan la phab pa'o////

CLOSE WINDOW