156b1 rgya gar skad du/ rat+ne pa de sha bi shwa tsakra tan+t+ra pash+tsi ma nA ma/ bod skad du/ rin po che gdams ngag sna tshogs 'khor lo'i rgyud phyi ma/ bcom ldan 'das rdo rje sems dpa' la phyag 'tshal lo// 'di skad
156b2 bdag gis sems dpa' rdo rje'i brda yongs su go ba'i dus gcig na// ston pa dga' rab rdo rje sprul pa'i skyes bu chen po de nyid skye 'gag med pa'i ting nge 'dzin la snyoms par zhugs so// de'i tshe lta ba rags
156b3 par rtogs pa'i 'khor du ma 'khod do// sprul pa'i bdag nyid 'jam dpal bshes gnyen dang/ rgyal po d+ha na ta dang// thu bo rA dza hasti dang/ gzhan yang mkhas pa nyi shu rtsa gcig la sogs pa bsam gyis mi khyab
156b4 pa'i 'khor dang/gzhan yang ye shes dang las las grub pa'i mkha' 'gro ma 'jig rten dang 'jig rten las 'das pa'i 'khor thams cad dang thabs cig tu bzhugs so// de nas yang 'jam dpal bshes
156b5 gnyen gyis 'di skad ces gsol to// kye sprul pa'i skyes chen dga' rab rdo rje nyid// mos gus dad pas 'dun shing rang sems rtogs// las dang skal par ldan pa'i 'khor rnams la// sdong chen brgyad kyi man
156b6 ngag don bkrol bshad// lhun grub lta ba'i gdeng ldan gdar sha bcad// rang sems ma bcos chos skur gtan la dbab// rig pa'i rtsal du chos rnams thams cad bsdus// rtsol bsgrub med pa'i ye shes
157a1 zang thal la// thug phrad ngang du chos sku dngos su bstan// ma btsal ma bsgrubs 'bras bu cog ge bzhag/ btsal bas mi rnyed dmigs gtad med pa'i don// nyid kyis bstan pas 'khor rnams
157a2 mngon par dga'// dbang po dman zhing shes rab zhan pa la// dbang po thad sor sbyar ba'i gdams ngag rnams// de nyid dgrol phyir gdams ngag rim pa rnams// nyid kyi dgongs pas mkhyen ltar bshad du
157a3 gsol// zhes zhus pas// de nas dga' rab rdo rjes bka' stsal pa// 'jam dpal bshes gnyen nyon cig/ dbang po rab dang 'bring gi don// mthar thug don du nga yis bstan// blo ngan shes rab zhan pa
157a4 la// phan gdags grol ba'i man ngag dang// ro snyoms zag bcas gdams ngag dang// de la brten 'byung zag med kyi// gdams ngag ci gsungs ngas bshad kyis// 'jam dpal bshes gnyen gzung bar
157a5 gyis// zhes gsungs nas/ ro snyoms bde ba dang thig le 'khyil pa zhes bya ba'i ting nge 'dzin la snyoms par zhugs so// gdams ngag sna tshogs 'khor lo'i rgyud phyi ma las// gleng gzhi zhu ba dang bcas pa'i le'u
157a6 ste dang po'o//// de nas dga' rab rdo rje zhes bya ba des/ 'jam dpal bshes gnyen la sogs pa'i 'khor rnams la brda' 'am byin gyis brlab kyi tshul gyis 'di skad ces bka' stsal to// gang dag blo
157b1 ngan shes chung gis// mtshan ma can la brten nas ni// mtshan med ye shes 'char ba yin// mtshan ma dag kyang lnga yin te// rlung dang kha sbyor bde ba dang// sku tshad yig 'bru'i mtshan ma dang// gang 'phrod spyod
157b2 yul mtha' dag yin// dang po rlung bsgom man ngag ni// rnam pa bdun du shes par bya// gzung dang bcing dang sbyang dang spang// g.yas g.yon spo dang d+hU tir gzhug/ mthar phyin dag dang rnam pa bdun// 'byung
157b3 dang 'jug dang gnas pa gsum// hU~M dang oM dang AHgsum ni// bsgom pa yang ni de ltar bya// rlung gi de nyid bdag nyid de// sngags kyi de nyid dag dang gsum// rtogs nas rang sems gzung bar bya// rlung la
157b4 sems 'dzin byed pa'i tshe// thun bzhir bcad la bsgom par bya// sna sgo dag gi bu gar ni// rlung ni phar 'gro tshur 'ong bar// de tsam gcig la gtad la bsgom// de la sems ni zin gyur na// kha dog gcig la
157b5 bslab pa ni// dkar po dar gyi skud pa tsam// snying ga ru ni byung nas kyang// phyi rol sor brgyad tsam gyi bar// de la sems ni zin gyur na// lte ba yi ni phyi rol gyi// sor ni bcu drug dag tu bsgom// kha dog lnga
157b6 la bslab pa yang// shin tu phra ba de bzhin bslab// khong pa khengs par bsgom pa yang// khong pa'i nang du 'jug tsam na// sbud pa khegs pa'i tshul du bsgom// rlung ni phar 'gro'i dus tsam na// sbud pa stong pa
158a1 bzhin du bsgom// rang sems gang la mi 'phro bar// rlung la chags par gyur pa na// rlung la sems ni zin pa'i rtags// rlung ni sbyang pa'i rim pa yang// kha dog phra tshad spangs nas kyang// phyi nang
158a2 'byung 'jug rnam gsum po// oM dang AHdang hUM gsum gyis// sgra spyi'i rnam pa dag la brten// 'byung 'jug byed pa rang shugs las// ma bcos pa ru bsgom pa yin// dang po thun bzhir bcad la bsgom// de
158a3 nas thun gyi khug par bskyed// mjug tu nyin mtshan bskyang la bsgom// de yang 'byongs pa'i rtags rnams ni// yang bzor che zhing lus po yang// ji tsam bkag kyang na tsha med// steng rlung 'og rlung 'drongs tsam
158a4 na// 'og rlung steng du 'drongs pa yin// phra ba yang ni rtsa bar 'drongs// rtsa ba'i rlung yang phra bar 'drongs// de ni rlung gi 'byongs rtags yin// rlung rnams bcings pa'i man ngag kyang// rnam gsum dag tu shes
158a5 par bya// bum pa che 'bring rnam gsum mo// tha ma rab kyi man ngag kyang// stan bde'i gzhi la 'dug nas kyang// lus bsrang skyil krung bcas nas kyang// ma yengs mig ni sna rtser gtad// dbugs ni nang du
158a6 bsdam byas nas// lag pa'i mthil gyis pus mo bskor// se gol re re brdab pa ni// brgya rtsa brgyad kyi bar du'o// bdun cu rtsa gnyis bum pa 'bring// sum cu rtsa gnyis drug kyang bum pa tha// bum pa can ni de
158b1 ltar bslab// btsan thabs dag gi man ngag ni// mgrin pa thig les bkag byas te// lus ni skyil mo krung bcas te// ol mdud og mas bkag nas ni// dbugs ni thub tshad bsdam par bya// yang na
158b2 g.yas su gcu bar bya// yang na an tong ltag pas mnan// yang na g.yon du gcu bar bya// sems kyis thub tshad dag tu bsdam// stong nyid bsgoms pas rlung nad ni// rang bzhin dag tu 'gro ba yin// des ni
158b3 bde ba 'bad med 'byung// rlung rnams sbar ba'i man ngag kyang// a long rlung gi yang dag gi dkyil 'khor yin// de ni yang 'byed yang 'dzum byas// 'dod chags me ni 'bar bar 'gyur// steng rlung mnan cing
158b4 'og rlung sbar// rtsa yi nang du song ba yis// byang sems zhu nas 'byongs par 'gyur// g.yas g.yon spo ba'i man ngag kyang// hastas nu ma gcud la bor// gang gis bor ba de ru 'pho// mod du 'ong bas man ngag
158b5 che// 'phos nas 'chi ba bslang ba ste// 'gags na yang ni rnam pa yin// d+hU tir gzhug pa'i man ngag kyang// skyil mo krung bcas lag pa bskor/ kha ni cung zad gdangs nas kyang// srog pa rtsa yi nang nas
158b6 kyang// a wa d+hU ti shes bya ba// shin tu phra ba pad snal 'dra// sgal tshigs la brten d+hUti'i nang// dkar ni lam gyis 'ong bar bsam// nang du 'jug par gyur pa yang// dbugs ni de la 'ong bar bsam// yud
159a1 tsam nang du 'then par bsam// gal te chud par gyur pa na// mi rtog ye shes skye bar 'gyur// rtsa yi g.yas dang g.yon shes pa// rnam par rtog pa'i lam yin no// a wa d+h+ru ti zhes bya ba// mi rtog
159a2 ye shes lam yang yin// de ni dbang du 'dus gyur tshad// rnam gsum dag tu shes bya ste// tha ma 'bring dang rab yin no// brtson dang yang dang mgyogs pa ni// tha ma dag gi tshad du shes// ci tsam bkag kyang
159a3 nad med dang// steng 'og spo dang gar 'dod 'drongs// dbang 'dus 'bring gi tshad du shes// g.yang lhung chus khyer 'byung ba'i dgras// tshe yi 'du byed mi nus pa// rab tu gyur ba'i rtags yin no// de ltar de
159a4 gsal shugs dag las// stong nyid goms shing ye shes gsal// ji gsal ji rig 'byung ba las// mi rtog ye shes shugs las 'char// zhes gsungs so// gdams ngag sna tshogs 'khor lo'i rgyud las/ rig
159a5 pa rlung la gtad pa'i le'u ste gnyis pa'o//// de nas sprul pa'i skyes bu dga' rab rdo rje des/ 'jam dpal bshes gnyen la sogs pa'i 'khor rnams la 'di skad ces bka' stsal to// dbang po dman
159a6 pa'i gang zag gis// cig car thod rgal ma go ste// rim gyis bde ba bsgom pa na// mi mo la brten 'od rig dang// mtshan dang ldan pa'i mi mo la// brten pa'i gdams ngag lnga yin te// tshogs dang gtad dang
159b1 bzung ba dang// rim gyis sems bzung spangs thabs so// tshogs la gnas zhes bya ba ni// zla ba phyed dam zla ba gcig/ lug gzhon sha dang chang zhim po// mi mang ran par bza' btung bya// nas zan sha dag
159b2 btsos pa dang// de byid lto stong dag la gtang// sha chen chu ser phog gcig gdon// ba dmar mo yi 'o mar btsos pa la// shing kun dag gi 'o ma la// tsha ba gsum dang ya ba li// chang dang sbyar te kha sbang
159b3 bya// de bzhin zos na byang sems rgyas// ra mo shag dang mu zi sogs// bcud len dag ni thams cad kyang// bde ba 'phel bar byed pa ste// dkar gsum zho dkrugs la sogs pa// shu kra rgyas pa'i thabs
159b4 mchog ste// bzung ba dbang ni gsum pa ste// bla mas lag par gtad pa ni// gtad pa shes rab ma der ni// tshig kyang rab tu brjod pa'o// bzung ba de yi lam yin no// rim gyis sems bzung man ngag
159b5 kyang// gnas ni dben sar phyin nas kyang// shin tu mdzes pa'i gzugs dag la// chags shing chags pa'i lta bas blta// des ni bde ba skye bar 'gyur// tshad du skyol na gzhan mi bya// skyed med bde ba zhan
159b6 gyur na// nu ma yan chad blta bar bya// des kyang zhan na pad+ma sogs// lus rnams thams cad blta bar bya// sems ni zin nas skyed med na// rta bong la sogs 'khrigs pa'i gtam// sgra la brten te sems ni
160a1 bzung// de la bde ba skyed med na// lus la dri bzang dag gis gdab// sems ni dri ma dag la gzung bar bya// mchog tu bde ba skyes gyur kyang// tshad du skyol bar ma gyur na// bde ba reg bya
160a2 nyid la bslab// bud med shes rab ma de yi// stod smad sked par 'khyud par bya// rked nas lag pas dam du 'khyud// sen mos rked skabs ngag tu gdab// de ltar byas pas bde ba skye// dbang po'i sgo nas mi
160a3 sprad par// sems ni de la gzung bar bya// de nas ro smad dag la bslab// rdo rje pad+mar reg reg bya// rim gyis de ltar byas pa yis// bde ba je 'phel je 'phel 'gyur// des kyang ma zin skyed med na// de
160a4 nas dbang po'i sgo sprad de// shes rab gsang ba rno ba dang/ rdo rje'i kha ni che ba dang// nang du snyoms 'jug 'ong ba ste// bug par gsang rtsa chung ba ni// bde ba rgyas na nyin mtshan 'ong// lag gsang rtsar ni ma
160a5 chud na// gan rkyal nyal te tshang ra ru// spod rkyang khru gang tsam bcug la// mkhal mar dar gyi pho long gzhug/ gsang mtshan tshil bus dkris pa ni// phyi gshag a long kha ru gzhug/ des ni phyi sgor rtsa dag 'ong/
160a6 kha sbol dag tu gyur pa na// pad+ma'i rtsa ba 'gul bar bya// 'phrang 'gyur rdo rje'i bum par gzhug/ nang du de ltar 'grogs la btang// rdo rje nang du song ba bzhin// phyi ma'i bshad ni phyi ru 'then// de nas bsgul
160b1 zhing bskyod pa ni// dal bus bya zhing spyod pa gzab// bde ba mi bzod bsgul bskyod bshol// bde ba chung na bsgul bskyod bya'o// de ltar byas par gyur pa na// bde ba la ni sems zin 'gyur// shin tu ring
160b2 ba'i gsang rtsa ni// rked pa brkyangs la sbyor bar bya// gsang rtsa zhan zhing zha gyur na// khyung lding dag gi sbyor ba bya// shes rab ma yi rting pa gnyis// skyes pa'i phrag gong gnyis la bkal// rdo rje bcug ste bskyod
160b3 par bya// rtsa ni brdungs pas bde ba skye// g.yas su zha na g.yon nas sbyor// mdun du zha na rgyab nas sbyor// rtsa nyid gal te ma rnyed kyang// steng rlung mnan cing 'og rlung bskul// sems bzung dal bus skyod par
160b4 byed// bde ba skyes nas bskyod pa bshol// chung na dum re dum re bskyed// bde ba tshad du skyol nas ni// bsgul ba de ni spang bar bya// 'o tsam gyis ni bde ba skye// 'o bya la sogs spang bar bya'o// dri yis tshangs
160b5 skyol 'khyud pa yang// bltas pa'i skyon sgra yang yang bya// blta ba yangs shing dran pa tsam// dran pa nyid kyis tshad skyol na// sgrog gi sgra yang yang byas te// bde ba sems la khel dus su// ci mthong thams cad bde
160b6 bar mthong// bde ba'i ye shes khel tsam na// rang byung ye shes rang rtogs 'char// zhes gsungs so// gdams ngag sna tshogs 'khor lo'i rgyud phyi ma las/ rig pa bde ba la gtod pa'i le'u ste gsum
161a1 pa'o//// de nas dga' rab rdo rjes 'jam dpal bshes gnyen la sogs pa'i 'khor rnams la bka' stsal pa/ dbang po dman pa'i gang zag gis// sku tshad dag la bslab bya ste// bdag gi mdun
161a2 gyi nam mkha' la// phar 'phen gang gis thad so ru// sems dpa' rdo rje tshon gang pa// rnam par snang mdzad dag kyang rung// mos pa'i gzugs sku gang yin pa// dkar ram ser ram dmar kyang rung/
161a3 kha dog gsal zhing 'tsher ba la// sku stod dar dkar prog zhu can// sku smad tshi gu'i sham thabs can// rdo rje dril bu'i phyag mtshan nam// rang gi phyag mtshan gang yin pa// gdan la bzhugs shing gsal bar
161a4 bsgom// yang na rang nyid de ltar bsgom// de gsal ma btang yun bsrings nas// shes pa gzir zhing gcun nas kyang// gsal bar dmigs shing nan tan bya// ma gsal thabs kyi man ngag drug/ gnas
161a5 skabs sbyar zhing gtang bar bya// de ltar sems ni zin gyur na// brtan par gyur pa'i drod dag ni// ji ltar bsgoms pas gsal gyur na// mtshan ma gzhan gyis rtog med na// mi rtog pa la gzhag par bya// yang
161a6 na gang yang rung ba yis// dkyil 'khor gtsau dang sprul tshogs dang// 'khor lo'i cha byad gang mos pa// gcig dang mang po gang mos la// dmigs shing bslab pa gong dang 'dra// yang na gzhung nas byung ba
161b1 yi// mtshan rtags sku tshad thams cad dang// dngos su snang dang mi snang ba'i// gang mos dag la bslab pa yin// zhes gsungs so// gdams ngag sna tshogs 'khor lo'i rgyud phyi ma las/ mtshan rtags sku tshad la
161b2 rig pa gtad pa'i le'u ste bzhi pa'o//// de nas ston pa dga' rab rdo rje yis/ 'jam dpal bshes gnyen la sogs pa'i 'khor rnams la 'di skad ces bka' stsal to// blo ngan shes rab chung ba
161b3 yis// yig 'bru dag la bslab bya ste// ka kha bzhi bcu rtsa gnyis la// gang 'phrod sngon du blta zhing bsgom// yang na rang gi snying ga ru// yi ge a gcig gsal bar bsgom// de la ma btang yun bsrings
161b4 pas// brtan par gyur pa'i drod tshad ni// phyi nang rnam rtog ma 'gyus par// yi ge dngos po gsal gyur na// mi rtog pa la gzhag par bya'o// yang na don gyi yi ge la// 'di ltar gsal zhing bsgom par bya'o// hUM
161b5 ni kha dog sngon po gcig/dbugs kyi sna la phyir 'byung bsam// de yang bde chen rnam par gsal// oM ni kha dog dkar po gcig/ nang du 'gro ba'i sna la bsgom// de yang bde ba'i rnam par gsal// yang na
161b6 'di ltar gsal bar bya// snying gar pad+ma 'dab bzhi yi// ze 'bru a dang bcas pa la// 'phro 'du bya zhing bde bar gsal// sems ni ma zin bar du gtad// zin nas mi rtog don la sbyar// yang na rang nyid gang
162a1 mos pa'i// sku gsung thugs kyi yig 'bru 'am// rgya gar rgya nag yi ge ru// bzhi bcu rtsa gnyis bye brag la// dngos su gsal dang yid la chags// mi gtang sems ni gtad gyur na// shugs las
162a2 rang byung ye shes 'char// zhes gsungs so// gdams ngag sna tshogs 'khor lo'i rgyud phyi ma las/ gsung yig 'bru la sems bzung ba'i le'u ste lnga pa'o//// de nas yang ston pa dga' rab rdo rje zhes bya ba
162a3 des// 'jam dpal bshes gnyen la sogs pa'i 'khor rnams la 'di skad ces bka' stsal to// blo ngan shes rab chung ba yis// lhun grub don la sbyor 'dod na// sems kyi skye ba nges med yin// bde dang sdug
162a4 bsngal btang snyoms dang// mi mthun phyogs dang dge sdig dang// phyogs mthun phyi nang spyod yul dang// dbang po lnga dang yul dus dang// skye mched yul du gang shar bar// brten nas ye shes 'char
162a5 du rung// mi dge bcu dang mtshams med lnga// dug lnga dug gsum rtog pa'i tshogs// dge dang mi dge'i spyod yul la// brten nas ye shes 'char du rung// 'dod yon lnga dang rgyan lnga dang// dge bcu pha rol
162a6 phyin bcu dang// tshad med bzhi dang phrin las bzhi// chos dang mthun pa'i spyod yul la// brten nas ye shes 'char du rung// skye bo phal pa'i spyod pa dang// mdor na mu stegs rtag chad dang// byis pa'i spyod
162b1 yul nges med dang// lus ngag yid gsum sgo gsum gyi// gang yang rung ba'i spyod yul la// gang 'phrod gang mos blo gtad nas// ma btang yun bsrings gsal bsgoms pas// brtan pa thob nas ye shes
162b2 'char// ting 'dzin ma gsal skyed med na// thun mong thabs kyi man ngag drug/ ci ltar 'byung bzhin bstan par bya// des ni rang byung ye shes 'char// zhes gsungs so// gdams ngag sna tshogs 'khor lo'i rgyud
162b3 phyi ma las/tshogs drug yul du gtod pa'i le'u ste drug pa'o//// de nas yang ston pa dga' rab rdo rje yis// 'jam dpal bshes gnyen la sogs pa'i 'khor rnams la 'di skad ces bka' stsal
162b4 to// mtshan ma bsgom pa'i rnal 'byor la// spyi skyon khyad par skyon dag dang// bying rgod rtsol dang mi rtsol dang// bying rmugs 'dzin chags ther zug dang// phyal ba dag gi skyon rnams dang// g.yeng ba rnam pa drug
162b5 rnams ni// rang bzhin nang dang mtshan ma dang// phyi rol yul la byed pa dang// gnas ngan len gyi g.yeng ba'o// bar du gcod pa'i rkyen rnams kyang// le lo bya ba mang ba dang// rgod dang g.yengs dang rmugs pa
162b6 dang// 'dod che gnyid dang re ba mang// dogs che the tshom za ba dang// nang du sdud dang phyir 'phro dang// spyod par dga' dang sems byung rkyen// ca cor dga' zhing yid 'khrug pa'o// ched du byas pa'i sgrib pa
163a1 ni// sems mi g.yo dang gsal snyam byed// bde ba snyam byed sdug bsngal snyam// skye dang gsal dang 'byin pa dang// ngar 'dzin gzhan lta khyad du gsod// rang gi lta bsgom bsnyems pa'o// de
163a2 rnams gnyen po'i rtsol bas gzhom// mtshan bcas mtshan med bsgom pa la// rab rib chod dang sku tshad 'gyur// cha lugs 'gyur dang dbyibs 'gyur dang// grangs 'gyur bzhugs tshul 'gyur ba dang/ kha dog
163a3 mi snang rim pa nub// ma rdzogs skyon dang dgu ru zhes// skyon rnams bcos te brtan bya ba// spyi skyon spang ba'i 'du byed brgyad// sgos skyon so so'i gnyen pos gzhom// thun mong man ngag rnam drug gis// skyon
163a4 rnams bcos te brtan par bya// zhes gsungs so// gdams ngag sna tshogs 'khor lo'i rgyud phyi ma las/ bsgom skyon ngos bzung zhing gzhom par bstan pa'i le'u ste bdun pa'o//// de nas yang ston pa
163a5 dga' rab rdo rje yis/'jam dpal bshes gnyen la sogs pa'i 'khor rnams la bka' stsal pa// mtshan ma la brten rnal 'byor pas// skyon bcos yun ring bsgom pa yang// de ltar gsal thob yun ring
163a6 brtan// bzlas brjod thun tshod dag tu dbye// nang du thun tshod dbugs la brtsi// phyi yi dbyug gus brtsi ba dang// grib ma grangs kyis brtsi ba dang// de la nyin zhag phrugs gcig la// thun tshod dag ni brgyad
163b1 du 'byung// bzhi bzhi dag tu mnyam pa ni// nyin mtshan ring thung mnyam pa'i dus// ring thung can gyi thun tshod ni// nyi ma ring na nyi ma la// thun tshod dag tu gzung bar bya// mtshan mo ring na mtshan mo la// thun
163b2 tshod dag ni mang bar brtsi// de la thun grangs dgos pa ni/ khams mi 'khrugs dang bsgom tshod zin// yid mi 'khrugs dang ting 'dzin bogs// zhag bdun dang ni lnga dang gsum// je ring je ring zla ba phyed// zla
163b3 bar gnas ni nus pa'o// ma bde bla ma'i drung du bslab// mdor na thun tshod cir bstan kyang// ma sun pa dang tshod zin dang// rtog pa ci yang mi rgyu dang// gsal ba mi g.yo skad cig ma// yid tsam je ring je
163b4 ring bsring// thun bzhi cha gsum cha phyed dang// thun ring dang ni nyin zhag dang// zla ba lo dang bskal pa dang// ma brtan bar du bsring bar bya'o// brtan nas rang byung ye shes 'char// zhes gsungs
163b5 so// gdams ngag sna tshogs 'khor lo'i rgyud phyi ma las/ bsgom pa'i thun tshod bzung ba'i le'u ste brgyad pa'o//// de nas yang ston pa dga' rab rdo rje yis/ 'jam dpal bshes gnyen la sogs pa'i
163b6 'khor rnams la 'di skad ces bka' stsal to// bsgom pa'i dam tshig khyad par ni// man ngag ston pa'i bla ma la// gdung ba bar mi chad pa dang// ting 'dzin mthun bsten mi mthun dor// 'gro 'chag 'dug
164a1 nyal spyod lam bzhir// ting 'dzin yal bar mi gtang dang// yid mi g.yo dang mthar dbyung dang// gang bsgom ting 'dzin gsal ba'o// de ltar rtogs goms ye shes 'char// zhes gsungs
164a2 so// gdams ngag sna tshogs 'khor lo'i rgyud phyi ma las// bsgom pa'i dam tshig gi le'u ste dgu pa'o//// de nas yang ston pa dga' rab rdo rje yis// 'jam dpal bshes gnyen la sogs pa'i 'khor
164a3 rnams la 'di skad ces bka' stsal to// don sbyor blo ni che ba yis// gdod nas gnyis med sku ru bsgom// lha bsgom mthun bskyar nus na dang// bdag gi lus nyid gang bsgom brtan// chu zla'am 'ja' tshon sgyu
164a4 mar gsal// de brtan bdag nyid la dpyad de// 'di dag dang por gang nas byung// da lta rang bzhin ji zhig yin// phyi ma cir 'gyur lo rgyus dpyod// dang po gang nas ma byung ste// chu 'khyags chab rom 'gyur
164a5 ba'am// gser dngul blugs skur byung ba ltar// bdag sems rnam shes tshogs brgyad kyang// ye shes lnga yi ngo bor snang// de lnga rang byung ye shes nyid// rang sems 'bras bu'i ngo bor snang// gzhan nas 'ong
164a6 med 'gro ba med// rig pa'i cho 'phrul cir yang shar// shar ba de nyid ye shes sku// sems nyid snang bas ther zug min// 'dus ma byas nyid 'dus byas snang// de ltar gnas pa'i rang bzhin yang// sems
164b1 kyis ci ltar bsam ltar shar// ci ltar snang yang rang snang bas// gzhan la gang yang med pa ste// gzhan nas 'ong dang gzhag pa med// ci bsgom 'ja' tshon tshul shes pas// gsal la rtog pa med par
164b2 bsgom// yang na chu zla'i tshul shes te// snang la rang bzhin med pa yin// don la yul med rig par snang// zhen cing snang ba'i rang bzhin med// yul dang bral bas zhen mi rung// sems la kha dog dbyibs
164b3 med de// sems la pho mo'i mtshan ma med// ci yang med pa ma yin te// rig rgyud nges par rtog pa med// med pa'ang min te kun tu snang// snang yang rang bzhin 'di 'dra med// ces gsungs so// gdams ngag
164b4 sna tshogs 'khor lo'i rgyud phyi ma las// don sbyor yid ches kyi le'u ste bcu pa'o//// de nas yang ston pa dga' rab rdo rje yis/ 'jam dpal bshes gnyen la sogs pa'i 'khor rnams la 'di skad ces
164b5 bka' stsal to// rtag par gcer bur phyung pa dang// rgya mtshor rkyal dang khrus byed cing// mes bsreg rlung gis g.yeng la sogs// mtshan ma sbyang ba'i snga ltas yin// skas dang ljon shing 'dzegs pa dang// mchod
164b6 rten 'dzegs sogs rmi ba ni// sa thob brtan pa'i snga ltas yin// khri dang 'khor lor 'dug pa dang// seng ge glang po la zhon dang// gzugs brnyan zhal 'dzum rol mo'i sgra// seng ge'i sgra thos lung bstan
165a1 rtags// mtshan ma can la slob dus su// rmi lam bzang po byung na yang// dga' dang brod kha mi bya'o// zhes gsungs so// gdams ngag sna tshogs 'khor lo'i rgyud phyi ma las/ zhi gnas rmi ltas kyi
165a2 le'u ste bcu gcig pa'o//// de nas yang ston pa dga' rab rdo rje yis/ 'jam dpal bshes gnyen la sogs pa'i 'khor rnams la 'di skad ces bka' stsal to// zhig nas sems snang 'dzin dus
165a3 su// goms shing brtan pa'i drod tshad ni// g.yo dang drod thob brtan pa dang// phyi dang nang dang gsang ba'i drod// rdul phran skar ma zla tshes dang// yi ge phyag mtshan sku la sogs// spyod yul gang par mthong ba
165a4 dang// me dang rlung dang kha dog lnga'i// skye mched dag tu mthong ba dang// dbugs ni rgyu ba mi tshor dang// spyod yul sgyu mar mthong ba dang// rgyud la snying rje chen po skye// spyod yul gang mthong ye shes
165a5 'char// rtags ni g.yo thob brtan pa rnams// rim pa dag gis 'byung na yang// 'od 'byung lha yi zhal 'dzum dang// g.yo 'gul 'od dang yang pa dang// khams la skye 'bri med pa dang// shig dang nad dgra mi
165a6 tshor dang// gnyid choms khams kyi zas dang bral// snying rje che dang chags pa chung// phyogs ris med dang dam tshig che// bla ma mched la gdung ba yang// kun la nye ring mi byed cing// 'bras bu dag la re ba
165b1 med// de la sogs pa mang du 'byung// dga' dang brod pa bskyed mi bya// nyams kyi phyag rgyas rang don sad// bla ma'i spyan sngar zhu ba bya// zhes gsungs so// gdams ngag sna tshogs 'khor lo'i rgyud phyi ma las/
165b2 g.yo thob rtags kyi le'u ste bcu gnyis pa'o//// de nas ston pa dga' rab rdo rje yis// 'jam dpal bshes gnyen la sogs pa'i 'khor rnams 'di skad ces bka' stsal to// bsgom pa brtan pa'i yon
165b3 tan gyis// sgrib pa 'byangs shing tshogs 'phel dang// bsgoms pas kun brtags zad pa dang// nyon mongs zad nas sgrib pa 'byangs// rig pa las su rung nas ni// mngon shes lnga dang cho
165b4 'phrul thob// mthar thug rang byung ye shes 'char// zhes gsungs so// gdams ngag sna tshogs 'khor lo'i rgyud phyi ma las// sems bzung bas zin pa'i yon tan bstan pa'i le'u ste bcu gsum
165b5 pa'o//// de nas ston pa dga' rab rdo rje yis/ 'jam dpal bshes gnyen la sogs pa'i 'khor rnams la 'di skad ces bka' stsal to// sems ma zin pa zin par bya ba dang// zin pa brtan nas
165b6 gdeng du gzhug pa dang// brtan thob 'phro ru gtong ba dang// rnam shes yul la ldog pa dang// zag pa med pa'i ro myong dang// thogs rdugs med par gnas pa'i phyir// rtsol ba med par klong du dbab// bdag
166a1 'dzin med pas nyams su blangs// 'gyur ba med par g.yon par bya// zhen chags med par khong mi 'khrugs// nyams blang med par yal bar mi 'dor ro// rang grol chen po'i mdud pa
166a2 bkrol// ye shes chen pos ngo ti sprad// ces gsungs so// gdams ngag sna tshogs 'khor lo'i rgyud phyi ma las sems zin pa'i gang zag rang byung ye shes la bslab pa'i le'u ste bcu bzhi pa'o//// de
166a3 nas ston pa dga' rab rdo rje des// 'jam dpal bshes gnyen la sogs pa'i 'khor rnams kyi dgongs pa thugs su chud nas/ lta bas thag bcad cing 'dzin pa'i mdud pa grol ba 'di bka' stsal to// rig pa
166a4 rtsal gyi rang bzhin gyis// snang srid rig pa'anyi rtsal du shar/ gab pa mngon phyung rang bzhin gyis// dran rtog rang shar chos skur shes// ye shes zang thal chen po yi// rnam 'phrul cir yang shar ba la// stong pas
166a5 rgyas gdab zhen chags med// chos sku rang gsal thug phrad kyis// ye nas grub par the tshom med// dbyer med rang byung rang gsal yin// lhun grub cog bzhag chen po yis// rang snang dbyer med rnam rtog
166a6 bral// 'di la bzung zhing rtog dpyod bral// blang dor dbye bsal ngang gis bral// rjes med don gyi rjes btsal bas// 'di la 'di zhes btsal du med// rang byung yin pas btsal du med// ye nas 'gyur med
166b1 rgyu rkyen bral// dmigs gtad med pa'i sems nyid kyis// gang la bza' zhing gtad du med// gza' gtad med pas phyogs med yin// rtod phur dag gis mtshon byas te// 'ching grol med pa'i don la
166b2 sbyor// sdong chen brgyad kyi 'khor lo yis// snang zhing srid pa'i chos rnams// ye nas lhun grub kun tu bzang// rang byung ye shes rang shar la// 'khor 'das rang bzhin dbyer med yin// snang ba thams cad
166b3 chos kyi sku// phyogs lhung med cing rgya chad bral// cir snang chos nyid lhun grub yin// 'dus ma byas pa'i nam mkha' 'dra// ci ltar snang zhing ci ltar 'dug/ rang sems nyid las g.yos pa med// rang byung ye
166b4 shes don shar na// gang la ched du bsgom mi dgos// ma bsgoms ngang gis ngo bor gsal// yengs dang ma yengs spang thob med// bral dang ma bral phyi nang med// bkag pas mi kheg spyod pa la// dge sdig la
166b5 sogs ci spyad kyang// bag chags rkyen gyis gos rgyu med// bya lam rjes med rnal 'byor mchog/ ched du ma byas rtsol med par// rang byung ye shes rang bzhin shar// gtad so gzung 'dzin rtsol med par// thug
166b6 phrad spyod pa ci spyad kyang// re dogs spang blang zhe 'dod bral// spyod pa byar med lhun grub pa// rtsol bsgrub zhen chags rang sar grol// ci byas skyon med 'gal rgyu bral// dmigs med zhen pa rang la
167a1 shar// dper na nam mkha' nyi 'od bzhin// 'bras bu nyid de rang la shar// khyung chen nam mkhar lding ba bzhin// rtsol ba med cing g.yang sa bral// re dang dogs med lhun gyis grub// mdor
167a2 na spyod yul gang shar ba// 'bras bu de nyid mngon sangs rgyas// byar med lhun grub 'bras bu'i mchog/ rig pa rang gsal thams cad mkhyen// dbyer med ngang du thams cad gsal// dus gsum bde
167a3 gshegs kun tu bzang// sku gsum snang ba'i sangs rgyas la// dgongs pa 'di las yongs mi mnga'// bsgom med bsgom par dmigs pa med// bsgom par bya ba yod ma yin// rang byung ye shes chen po
167a4 la// lhun grub rang du shar ba ni// rtsol ba med pa'i don mchog ste// 'di las bzlog ste ci zhig bsgom// bsam bya dmigs par bya ba med// rang byung ye shes rang gsal ni// don la sems gsal don gyi
167a5 mchog/sdong chen brgyad kyi 'khor lo yis// sgro skur bral brten zhen yul med// 'khor 'das sems su ro gcig phyir// rang sems ci ltar gsal rtogs na// 'bras bu sangs rgyas de nyid yin// 'bras bu
167a6 rang grol ngos bzung med// nyams myong ma bkag zhen pa med// snang ba chos nyid chen por gsal// sdug bsngal bde ba'i rol parashar// mi mthun mi spang gnyen po bral// bgrod med rtsol bral 'bras bu'i
167b1 mchog/ces gsungs so// gdams ngag sna tshogs 'khor lo'i rgyud phyi ma las/ la zlo'i mthar thug rang byung ye shes su grol ba'i le'u ste bco lnga pa'o//// de skad ces bka' stsal pas/ 'khor thams
167b2 cad dga' mgu yi rang ste/dga' rab rdo rje'i dgongs pa la mngon par 'dud do// dri ma med cing rang grol rgyud chen po// kun gyi thun mong ma yin rtogs dka' zab// ma 'ongs skal ldan rnams kyi don ched
167b3 du// rin chen gdams ngag sna tshogs 'khor lo'i rgyud// le'u bcu drug don gyi bcud phyung nas// 'jam dpal bshes gnyen nyid la gtad pa yin// zhes gsungs so// gdams ngag sna tshogs 'khor lo'i rgyud
167b4 phyi ma las/rjes su yi rang ba dang gtad pa'i le'u ste bcu drug pa'o//// sprul pa'i rgyud phyi ma rdzogs so// dz+nyA na shes rab rtogs pa'i nyi ma shar////


CLOSE WINDOW