CLOSE WINDOW

Gpb007.004
བོད་ཡིག

rgya gar skad du// badzra gu h+ya ma hA kA ya rat+na hi ra N+yA u0f85b+hA ma hA pradz+nyA sU tra/ bod skad du/ rdo rje gsang ba chen po'i sku rin po che dbyig gi sgron ma shes rab chen po'i mdo/ rang byung rig pa'i rgyal po la phyag 'tshal lo// 'das pa'i dus ma byon pa'i sngon rol du/ sems nyid kun tu bzang po ye shes kyi snang ba la bzhugs pa'i dus na/ kun gzhi gsang ba dag pa'i dbyings nas rang shes rig gi rgyal po rdo rje kun tu bzang pos/nyid la nyid kyis bka' stsal pa/ byams pa chen po thugs kyi gter lnga sbas/ las kyi dbang po lnga lung bstan to// man ngag gi mjug rdo rje sems dpa' nyid kyis bsdus te lag na rdo rje la gtad do// rdo rje sems dpas sangs rgyas kyi skad rang 'gyur du bshad pa/ seng ge 'khyil pa'i dgongs pa 'di la/ thabs khyad par can gsum gyis bsgrub par bstan te/ phyi mtshan ma la brten nas bsgrub pa dang/ nang ye shes kyi dkyil 'khor la brten nas bsgrub pa dang/ gsang ba byang chub sems dngos su bsgrub pa'o// phyi mtshan ma la brten pa la gnyis te/ bag chags kyi sgyu lus ye shes kyi lus la 'jug pa dang/ lam 'bras bu dang bcas pa la 'jug pa la bsgrub pa dang/ sgyu lus ye shes kyi lus la 'jug pa la/ ngo sprod gzhi nas chos nyid bar do'i lus da lta dngos su bstan yang/ de nyid la goms par bya ste/ lam dang 'bras bu dang bcas pa bsgom par bya ste/lam dngos su byed pa ni/ dpe'i ye shes las shes par bya'o// lam la gnas pa ni/ yengs pa med pa'i gdeng gis zin te dus thams cad pa'o// lam mngon du gyur pa ni/rig pa gcer bur phyung ba'i man ngag las shes par bya'o// lam kyi 'bras bu mthar phyin pa ni/ sku gsum ye shes bzhi ldan gyi dgongs pa mthar phyin nas bag chags kyi lus la nyam nga ba med pa'o// nang ye shes kyi dkyil 'khor la brten te bsgrub pa ni/ gong ma'i rtsal 'byongs nas/ thugs rang byung gi dkyil 'khor ye shes kyi sgo phye ste/ 'od kyi lus kyi nad med pa'i nang na/ rang snang rtogs pa'i 'khor lo/rang rang gi tshom bu dang bcas pa la/ rig pa mar me'i 'od gsal te/ sa le sang nge lhag ge lhan ne/ thog ma nas gnas pa/ ma byas par rang byung ba/ ma bcos mdzes sdug rgyan dang ldan pa de sgrub pa ni gangs la nyi ma shar ba lta bu tshig gsum gyis 'grub ste/dam tshig gi sngags dang phyag rgya rang yid la dran pa tsam gyis 'grub par 'gyur ro// de la 'byongs na gsang ba byang chub sems dngos su grub pa ni/thog lta bu'i man ngag gis thog ma'i rang sa bzung/ gzer lta bu'i man ngag gi tshig dang yi ge'i don mtha' bskyal/ khyung lta bu'i man ngag gis rtsol ba'i mtha' glod la bzhag/ skar mda' lta bu'i gdams ngag gis skad cig ma gsum la grol ba mthar phyin par bya'o// sangs rgyas rdo rje 'chang chen pos/ mkha' 'gro ma lnga'i lung bsdus nas lag na rdo rje la gtad do// mjug dga' rab rdo rjes bsdus nas/'jam dpal bshes gnyen la gtad de mgul khug ma'o/ byang chub sems kyi snying po seng ge 'khyil ba'i sgrub thabs 'di la/ nges pa'i bsgrub lugs kyi rtags rnam pa bzhi 'byung ba'i dus su bdud rnam pa bzhi 'jug ste/phyi mtshan ma la brten te bsgrub pa zhes 'byung ba de/ bag chags kyi sgyu lus la 'jug pa'i dus su/ shes pa dpangs mthon gyi nyams skyes/ 'ja' tshon gyi gdan bting/ nyi zla'i rta zhon/ phyogs snang ba dag pa'i yul snang ste/shes bya de'i dus su phung po'i bdud 'jug ste/ ye shes kyi lus la bar du gcod pa'i bdud zhes bya ste/ de'i dus su bdag tu rtog pa'i nga rgyal/ 'phags pa nam mkha' mdzod ces bya ba 'byung ngo// de nyid bdag nyid chen por shes par bya ste/ rtags kyi ye shes tshon gang ba dang don gyi ye shes tshon gang ba zhes 'byung ste// de la mar me mdzad chen po'i rgyas thob cig/ de mtshon par byed pa lam rnam pa bzhi la gnas pa'i dus su/shes pa khol bu'i nyams skye/ smug zil lta bu dang/ ra ro lta bu dang lus yod du mi tshor ba dang/ lus yang ba dang/ phyi nang gi srin bu mi 'byung ba dang/ ma zos par tshims pa dang/gang la yang nyam nga ba med pa dang/ gzhan snying rje'i gnas su mthong ba dang/ ri dang khang khyim gyis mi khegs par shes pa zang thal dang/ snang ba phyogs cha tsam dag pa dang/ 'gro drug gi gnas dang gnas skabs kyi mthong ba dag 'byung ba ste// de'i dus su nyon mongs pa'i bdud 'jug ste/ de ni bdag sangs rgya'o snyam du shes pa'i shes pa 'byung ste/ gzhan la 'di 'dra ba'i gtam smra zhing/ de la dga' bar byed pa ni/chos kyi mtha' la zhen pas nyon mongs pa'i bdud ces bya'o// de'i dus su ma chags pa'i gnas sku gsum bzhi ldan gyis rgyas thob cig/ nang lha'i dkyil 'khor la brten nas bsgrub pa'i dus su/thugs rnam dag gi klong na rang byung ye shes kyi dkyil 'khor gsal ba dang/ lung ston pa dang/ yi ge'i tshogs dang/ snang ba med pa'i gtam thos pa dang/ rin po che'i mchod rten la 'dzegs pa dang/ bdud rtsi'i zas la longs spyod pa dang/ rten med kyi nam mkha' la stegs bcas te/ bar snang lam du bde ba dang/ lha dang slob dpon dang mkha' 'gro mas nam mkhar brgyud mar mchod pa'i phyag rgya'i tshogs mang pos bdag la dbang bskur ba dang/lung ston pa dang/ de'i tshe bdag la shes rab khyad par can skyes te/ nyams dga' zhing shes rab kyi mtha' grol ba dang/ chos thams cad gang yang mthun la chos kyis mi grol bar mthong ba dang/gzhan de la sogs pa'i snang ba dmyal pa'i sdug bsngal nyams su myong du yod pa dang/ yi dwags dang byol song gi skye gnas ston pa dang/ bdud kyi cha byad mang pos bdag la skyi bung ba byed pa 'byung ste/de'i dus su lha'i bu'i bdud 'jug ste/ de rnams la blang dor dang nyam nga ba med par gangs la nyi ma shar ba lta bu gsal ba gsum gyi rgyas thob cig/ gsang ba byang chub sems dngos su grub pa'i dus su/me long g.ya' dag gi dgongs pa ma bsgrib pa yongs su gsal ba'ang/ nam mkha'i mthongs nas snang gsal gyi nyi ma shar ba lta bu/ chos nyid dag pa'i klong nas ye shes rang snang gi dgongs pa/gzigs snang gi mtha' las 'das pa'i nyams skye ste/ de'i dus su 'chi bdag gi bdud 'jug ste/ rgyu rkyen med par ye shes kyi sku/ skye 'chi'i mtha' las grol ba/ skar mda' lta bu'i rgyas thob cig/gang la de byung de la dgongs pa ste// de la de med de yi spyod yul min/ ces de nyid gsungs// byang chub sems seng ge 'khyil pa'i dgongs pas/ bdud bzhi la ye shes bzhi'i rgyas gdab bo// de nas bcom ldan 'das thugs rje chen po dang ldan pa des/ ma byon par mkhyen nas/ thugs rje'i sprul pa// ye shes kyi rnal 'byor ma bzhi/ ljags kyi 'od zer las spros te/ rdo rje thugs kyi bu mo zhes kyang bya/nyid kyi sku las skyes pas/ nyid las mi gzhan pa'i 'khor rdo rje rnal 'byor ma bzhi zhes kyang bya/ 'khor ba zhe nas gnon cing sdug bsngal rtsad nas gcod pas/ srid pa sgrol byed kyi khro mo bzhi zhes bya'o// 'das pa'i dus ma byon pa'i sngon rol/ 'og min gyi gnas lcang lo can gyi pho brang du/ ye shes rnam dag gi dbyings nas/ nyid kyi zhal bzang po bstan nas/ dur khrod chen po bzhir mi 'gyur ba'i gzer chen po zhig btab nas/badzra sa hU li ka ra bzhi bzhag nas yod kyis/ lag na rdo rje khyod der song zhig dur khrod chen po bsil ba'i tshal na/ mkha' 'gro ma ro za shAn+ti thod pa'i phreng ba can bya bas/ gzer lta bu'i gdams ngag bstan to// dur khrod chen po me ri 'bar ba zhes bya ba nas/ mkha' 'gro ma rdo rje khro gdong ma bya bas/ thogs pa med pa thog lta bu'i man ngag bstan te/ dur khrod chen po so sha'i gling zhes bya ba nas/ga ru Da nam mkha' lding dang/ shing gi lha mo 'chang ma gnyis yid kyis bshos pa'i bu mo mkha' 'gro ma nam mkha'i bu mo rdo rje rlung gi gshog pa can zhes bya bas/ gangs la nyi ma shar ba lta bu'i gdams ngag ston to// dur khrod chen po shin tu ru lu b+ha ra ha ti bya ba nas/ mkha' 'gro ma gtsug gi rgyan gcig bya bas/ phyir mi ldog pa skar mda' lta bu'i gdams ngag ston to// badzra gu h+ya dz+nyA na ma hA rat+na b+ha ye swA hA/ rdo rje gsang ba chen po'i sku/rin chen dbyig gi sgron ma'i man ngag/ rang byung rig pa'i rgyal po la phyag 'tshal lo// bcom ldan 'das rdo rje 'chang gis/ lag na rdo rje la lung bstan pa/ rgya nag po'i yul tig shing nag po'i nags tshal na/hA shang ma hA yan gyi gnas/ rang byung gi brag phug kha byang du bltas pa na/ 'chi bdag gshin rje rdo la 'bur du bskos pa/ gzugs gru bzhi pa'i zhabs g.yon brkyang pa'i 'og na/thog ma'i sangs rgyas 'od mi 'gyur ba yod kyis/ lag na rdo rje gnas de na/ mkha' 'gro ma pur+Na nye bar zhi ba zhes bya ba/ gcer bu'i lus la e le'i thal bas byugs nas/ ce spyang gi g.yang gzhi phrag la bkal ba der song la/bcom lan 'das snang ba mtha' yas kyi thugs kyi me long 'di ston par zhus shig/ ces lung bstan pas/ de nas lag na rdo rjes bcom ldan 'das la bskor ba byas te phyin pas/ de bzhin du 'dug ste bltas pa dang/mthing gi shog bu sor bzhi pa zhig la/ rin po che'i yi ge rang nan du bris nas/ ya mtshan rmad du byung ba'i 'od 'phro zhing 'dug ste/ nyid kyis gzigs pa dang/ chos thams cad kyi de bzhin nyid bya btsal las 'das pa'o// 'dab chags kyi rgyal po khyung lta bu'i gdams pa bstan to// badzra dz+nyA na la ma hA/ bcom ldan 'das mnyam pa'i rgya???l po la phyag 'tshal lo/ 'di skad bdag gis thos pa'i dus gcig na/byang chub sems dpa' phyag na rdo rje thugs rje dang rdzu 'phrul du ldan pa legs par yid la zung zhig/ thog ma med pa'i gnas sngon byung ba'i dus su hA shang 'bar ne'i nags tshal du/ bdag rdo rje rnal 'byor ma nyid kyi thugs rje rang byung gi nyi ma shar nas/ nga nyid ye shes snang ba'i dus na/ chos kyi dbyings kyi pho brang na rig pa las tha mi dad pa/ rang byung gi sku lnga snang ba rang bzhin med par rang gsal ba/mnan na nem zhes byed pa/ gdaus pa'i spyod yul min pa/ bteg na 'phar zhes byed pa/ gsal ba zang thal yin pa/ ngam grog dang g.yang sa med pa/ tsher ma dang/ rno zug med pa/ gcong rong dang bya skyibs med pa/shes pa nyams bde ba la phyogs su ma lhung ba/ bul ba'i yul bde ba nyams su myong ba'o// nang rig pa chos kyi sku/ 'gag pa med par lhug pa'i shes rab khong nas shar bas/ lhan cig skyes pa'i ye shes rin po che'i 'od 'bar ba'i nang na bkod pa med pa phyag rgya'i dkyil 'khor/rang re'i yon tan gyi sku ma 'dres par so sor gsal ba bdag med pa'i bdag nyid chen po/ zhi ba chos kyi sku mnyam la ma 'dres par bzhugs so// de kho na nyid ma byas pa'i chos zhes bya ba'i babs kyis grub pa ye shes rang snang dang bcas pa ni/ sangs rgyas thams cad kyi mkhyen pa lags so// zhes rdo rje can la smras so// sa bcu pa'i byang chub sems dpa' khyod/ tshig nyung la don che ba/ bslab na go dka' ba/ 'di ni rang byung gi bcom ldan 'das/ rtse la bsgrub kyi mtha' las 'das pa/ 'dab chags kyi rgyal po khyung lta bu ste/las kyi mtha' gang la yang mi gnas so// de'i phyir rtogs pa'i don thugs su ma chud par rnam par dag pa'i sa non na/ mkha' 'gro ma pur+Ne nye bar zhi bas dpal phyag na rdo rje'i mgo bo khos/ zhes don mtha' la bskyal ba'o// rang rig pa'i ye shes kyi rtsal las rdo rje 'chang gi sku bstan pa/ chos nyid ma bcos pa'i ngang nas/ rdo rje mkha' 'gro ma phyung ste/ de gnyis su med pa las/ ye shes kyi mkha' 'gro ma bzhi byung ste/rgyu rgyu ru gnas pa/ rgyu 'bras bur smin pa/ 'bras bu rgyu la shar ba/ rgyu nyid ye shes su grol ba'o// rin po che dbyig gi sgron ma'i man ngag bya btsal med pa 'dab chags kyi rgyal po khyung lta bu'i man ngag gi dgongs pa mthar phyin pa/lag na rdo rje 'chang gis lung bstan pa'o// badzra tsit+ta ma hA/ bcom ldan 'das rdo rje 'dzin pa la na mo/ rdo rje can nyon cig/ dur khrod chen po bsil ba'i tshal du song la thod pa'i phreng ba can la/so na pha le g+ha tsha sra shig/ rdo rje gdan gyi shar phyogs na rang byung gi mchod rten khru brgyad pa'i 'og na/ srin po rak+sha dz+wa la'i thod pa'i nang du/ rdzogs pa chen po gzer lta bu'i man ngag yod kyis/de mkha' 'gro ma la/ byang chub sems dpa' 'phags pa gtsug tor dri ma med pa'i phyag rgya ston la zhus shig/ de nas rin po che gsang ba'i sbubs gsum na/ bkod pa med par phyag rgya'i dkyil 'khor lnga rang byung du gsal bas/mi bsgom pa'i bsgom pa chen po rdzogs so// gsang sngags chen po yi ge lnga pa'i 'khor lo/ mi bsrung ba'i bsrung ba chen po dang ldan pas/ de kho na nyid kyi bsnyen pa rdzogs so// snying po byang chub mchog gi thig le yan lag med pa'i rdo rje la/ bca' ru med pa'i dam tshig gi phyag rgya rdzogs so// dam tshig sa ma ya bkod pa'i rgyal po// bsrung ba med pa'i dam tshig la// ma bsrungs pa med pa rdzogs so// rdzogs ldan chen po ye nas lhun gyi grub pa bstan pa'i chos med pas/ bskyod pa'i mtha' dang bral bar bstan pa rdzogs so// lag na rdo rje la rdzogs ldan chen po gzer lta bu'i lung bstan pa'o// badzra a ti dz+nyA na ma hA/ rdo rje 'dzin pa la na mo// gsang ba'i mgon po bla na med// ye shes dbyings nas rang byung ba'i// thog dang 'dra ba'i man ngag 'di// bya khra gzan la bcum pa bzhin// the tshom med par yid la chongs/badzra pA Ni me ri 'bar ba'i dur khrod na/ mkha' 'gro ma rdo rje'i mchu can zhes bya ba yod kyis/ der song la shing 'dzam bu br-ik+Sha'i drung na// gser gyi rus sbal gyi 'og na bstan pa thams cad kyi snying po thog lta bu'i man ngag yod kyis/der mkha' 'gro ma la rig pa'i me tog phul la zhus shig/ lag na rdo rje nub phyogs kyi zhing khams na snang ba mtha' yas kyi zhing khams bsam gyis mi khyab pa yod kyis/der khyod seng ge'i 'gros stangs kyis song la/ glang po che'i lta stangs kyis ltos shig/ de na mngon par dga' ba'i tshal/ byang chub mtha' yas kyi brag phug seng ge'i sgra sgrogs pa zhes bya ba na/ 'phags pa nam mkha'i mdzod ces bya ba shin tu skyi bung ba zhig yod kyis// de la ma 'jigs shig/ de 'das pa'i pha rol na/ sangs rgyas mar me mdzad rgyan 'od kyi phung po snang ba zhes bya ba yod kyis/ de'i tshe de'i dus na mngon par rdzogs par sangs rgya bar 'gyur ro// badzra pA Ni la rdo rje 'chang gis gdams ngag thog babs su bstan pa'i lung bstan pa'o// badzra satwa kha he badzra/ rdo rje 'dzin pa la phyag 'tshal lo// badzra pA Ni dur khrod chen po so so'i gling na/ mkha' 'gro ma nam mkha'i bu mo rdo rje lung gi gshog pa can bya ba yod kyis/ de la thugs kyi phyag rgya ston la/ rang byung gi me tog phul la zhus shig/ rgya'i bang so nag po'i byang phyogs pha bong dregs pa can gyi 'og na/lcags kyi sdig pa mgo dgu pa zhig gi 'og na/ byang chub snying po nyi ma shar ba lta bu'i gdams ngag tshig gsum yod kyis/ de zhus shig/ badzra pA Ni bya btsal med par ye shes kyi 'od gsal ba/dgongs pa nyi ma shar ba lta bu'i man ngag gis/ 'jig rten pa'i mun pa dag par byed pas/ yul dag la chos kyi dbyings pho brang me long g.ya' dag pa ltar gsal ba/ rang rig pa'i chos kyi sku sangs rgyas lnga'i bdag nyid du gsal ba/shes rab mar me rlung gis ma bskyod pa ltar gsal ba/ bar na ye shes kyi sku bde ba chen po nam mkha'i 'ja' tshon ltar ma 'dres la yongs su rdzogs par gsal ba'o// gsang ba gsum dang ldan gyur na// sangs rgyas nyid kyi dgongs pa yin/ dgongs pa mthar phyin pa'i lung bstan pa'o// badzra tsit+ta pra tiSh+Tha dz+nyA na AHhUM/ bcom ldan 'das rdo rje 'dzin pa la phyag 'tshal lo// badzra pA Ni/ dur khrod chen po shin tu ru lu ba ra ha sti bya ba na/ mkha' 'gro ma gtsug gi rgyan gcig bya ba yod kyis/ der song la pha la phra pa ra da du pra shig/ yul ma ga d+hA'i shar phyogs na/ rin po che sna lnga'i pha bong 'og na/ bstan pa thams cad kyi snying po gsang ba nam mkha'i rgyan zhes bya ba yod kyis/ mkha' 'gro ma la bskor ba lan gsum gyis la/ ljags kyi pad+mo yi ge lnga pa'i 'khor lo ston la zhus shig/de nas ye shes kyi rtsal skar mda' nam mkha' la byung ba lta bu'i man ngag gis/ skad cig ma gsum la sbubs gsum gcod par byed pa/ byed pa po med par mthong ba pos mthong nas shes pa pos shes so// khyod nub phyogs su phyin pa'i tshe/ bgrod pa med par skye med nam mkha'i klong nas/ bkod pa med par ye shes kyi gzhal med khang du/ 'gyur med rdo rje'i gdan la rang snang rtogs pa'i 'khor dang lhan cig tu 'khod de/yul chos kyi dbyings kyi pho brang khyab gdal 'ub chub chen por 'dus te/ don gyi dgongs pa nyag gcig la 'du 'bral med par bzhugs so// de na sangs rgyas shing sangs rgyas mya ngan las 'da' bar bstan to// zhes lung bstan nas/ bcom ldan 'das dang thabs cig tu bzhugs so// sangs rgyas thams cad kyi dgongs pa gsang ba nam mkha'i rgyan zhes bya ba/ lag na rdo rje la rdo rje sems dpas lung bstan pa'o// de la zhu ba po dga' rab rdo rjes zhus te/ sdud pa po rdo rje chos kyis bsdus nas// rin po che'i za ma tog tshon gang gi nang du sbas nas// mgul khug du bcug nas/ nyid kyi thugs dam rtse gcig par mdzad do// rgyud lung man ngag grangs mang yang// bstan pa'i snying po yi ge lnga// thugs kyi gter du bcangs pa yin// gcig las gnyis su ma spel cig/ ces bka' bsdigs so na ra kan// 'jam dpal rdo rje ye shes ngas// shrI sid+ha khyod la gtad// phyag rgya brda' yi dbyings su sbas// rdo rje 'chang gis rgya yis btab// mkha' 'gro lnga yis mdud pa bkrol// 'jam dpal rdo rje chos kyi mgul khug ma// snod du mi sba rang gi lus la bcangs// yid la dran pa tsam gyis 'bras bu mngon sangs rgyas// chu srin pir gyi gre ba bzhin srid pa 'khrugs kyang khar mi dbyung/ bya btsal med pa gsang ba rin po che dbyig gi sgron ma/skad 'gyur bzhi pa rdzogs so// gru gu smon lam seng ge nas brgyud pa/ jo sras sbas kyi thugs dam mo// khong la mgo ban nor bus zhus so// bar 'dir spyi phud lta ba klong chen yangs pa le'u lnga bcu rtsa gsum pa ma byung/

CLOSE WINDOW