CLOSE WINDOW

Gpb006.022
བོད་ཡིག

rgya gar skad du// hr-i da ya badzra rat+na sarba e ka ka tan+t+ra nA ma/ bod skad du/ snying po rdo rje rin po che thams cad gcig pa'i rgyud ces bya ba/ dpal rdo rje 'chang chen po chos sku ye shes nyag gcig la phyag 'tshal lo// chos sku rdo rje 'chang ba de// snying po rang byung nyag gcig gnas// snga phyi med pa snying po'i dus// rang byung rang shar rang snang 'khor// gcig po kun snang gnyis med chos// ye med nyag gcig rdo rje'i sku// nam mkha'i dbyings kyi nyi ma bzhin// 'og min rigs brgyad nyag gcig snang// de nas rdo rje sems dpa' sogs// mkha' 'gro rdo rje drag mo yis// rdo rje 'chang la bskor phyag 'tshal// spyan sngar 'dug ste thal mo sbyar// rdo rje 'chang la 'di skad gsol// kye kye ston pa rdo rje 'chang// snying po theg pa nyag gcig kyang// ris kyang rigs drug gzung 'dzin du mar 'khrul// thugs rje chen pos gzigs su gsol// 'og min rdo rje 'khor 'dus la// thams cad gcig pa'i rdo rje rgyud// gcig las du ma med par gsungs// zhes gsol pa dang// rdo rje 'chang gis bka' stsal pa// 'og min dbyings su 'dus pa yi// rdo rje rigs kyi mkha' 'gro khyod// rjes 'jug don du zhus pa legs// snying po nyag gcig rin po che// thams cad gcig pa nga yis bstan// chos can thams cad chos nyid gcig/ dbang dang dam tshig dkyil 'khor gcig/phrin las mchod pa rnal 'byor gcig/ sngags dang phyag rgya bsnyen bsgrub gcig/ rgyud dang lung dang man ngag gcig/ lta ba sgom pa spyod pa gcig/ 'bras bu sku gsung thugs kyang gcig/dge bcu rnam grangs du ma gcig/ ces gsungs so// snying po rin po che thams cad gcig pa'i rgyud las/ phun sum tshogs pa zhus pa lan sdom gyi le'u ste dang po'o//// de nas rdo rje drag mo yis// rdo rje 'chang la 'di skad gsol// kye kye ston pa rdo rje 'chang// de ltar snying po'i chos gcig kyang// bdag cag 'og min dkyil 'khor dang// mkha' 'gro'i tshogs la gsal bar zhu// zhes gsol pa// rdo rje 'chang gis bka' stsal pa// nyon cig dkyil 'khor rang byung dang// mkha' 'gro 'dus pa'i 'khor tshogs khyed// chos can chos nyid ro gcig phyir// don gyi snying po chos nyid gcig/ gcig po kun gyi rang bzhin yin// nor bu rin chen yon tan 'dra// du ma gang snang gcig yin no// rnam grangs brgya stong phrag brgyas sangs rgyas kyang kyang// chos nyid snying po'i dbang po ni// gcig po rang snang rang byung bas// gcig po nyid kyang gang na 'dug/ yul med pas ni ming bral yin// 'byung ba me chu sa rlung yang// nam mkha'i ngang du ye nas gcig/ sangs rgyas sems can chos nyid gcig/ bde gshegs snying pos 'gro kun khyab// sangs rgyas sems can gnyis su med// gnyis med gnyis su med par ston// zhes gsungs so// snying po rin po che thams cad gcig pa'i rgyud las/ chos can dang chos nyid gcig par bstan pa'i le'u ste gnyis pa'o//// de nas yang dag bshad bya ba// ye nas snying po rang byung bas// rang chas yod pas gzhi ma gcig/ rtogs pas rdo rje 'chang ba'i dbang// sku gsum rim par khyad par med// dbang gi chu bo lhun grub gcig/ 'gro drug khams gsum thams cad la// til la mar gyis khyab pa bzhin// bde gshegs snying po dbri bkol med// rang byung rang la bstan thob pas// ye nas ye shes rang dbang gcig/dbul mo ye nas gser stan can// rig pa can gyis bstan pas gser// ye nas rang dbang rang gis thob// skad cig ma la longs spyod bdag/ 'gro dag ye nas snying po bzhi// bla ma'i gdams pas rang chas bstan// rang byung rang dbang ye nas thob// dbang gi rgyal po ye shes gcig/ snying po rang byung chos bzhi ldan// 'gyus dran 'dzin chags dbang gi chu// snying po ye shes rang byung rtsal// phyi nang drang bcad gang 'gyu ba// dran pa'i ting nge 'dzin pa chad// 'dzin pa rtsol ba'i rgya thag grol// chags pa rang snang ye shes shar// rig pa rtsal gyi dbang gcig po// dbang gi ngo bo lhun gyis grub// nges tshig 'khor 'das gnyis kar dbang// dbye ba rang rang 'dod gzhung la// dpe ni rgyal bu 'khyams pa 'dra// snang ba sna tshogs gcig gi dbang// brjod sgra sna tshogs chos gcig dbang// dran rtog thams cad snying po gcig/bum pa thams cad shes rab dbang// gsang dbang tshig dbang rnam grangs rnams// rig pa rtsal gyi dbang du gcig/ ces gsungs so// snying po rdo rje rin po che thams cad gcig pa'i rgyud las/dbang gi le'u ste gsum pa'o//// de nas yang dag bshad bya ba// dam tshig snying po bstan pa ni// ye shes rang bzhin snying po bzhi// gang snang ming du btags pas kyang// snying po dbyings las 'das mi srid// snying po hUM gi rang bzhin gcig/ gdeng la yang ga yang sa med// dgongs la khu 'phrigs dgos pa med// spyod pa chags sdang gzigs snang med// re dogs bral ba'i snying po la// dam tshig 'du bsrung ye nas med// nyams pa med pas dam tshig gcig/ snying po chos sku yul med la// 'gyur bas gzigs snang 'das pa med// snying po 'gag med rang sgra la// 'gyu ba'i ming btags smras pa med// snying po 'gyur med chos nyid la// gnyen pos bcos shing bsgyur du med// sku gsung thugs dam bcas pa la// nyon mongs dug gsum 'tshig par nges// ye shes me lnga rang 'bar lnga// nyon mongs dug lnga 'tshig par nges// dam tshig nyi shu rtsa brgyad la// dug gsum dam na sku gsum 'tshig/ dug lnga dam na ye shes 'tshig/ de ltar gcig gis gcig 'tshig kyang// snying po 'gyur dang 'tshig pa med// ces gsungs so// rdo rje rin po che thams cad gcig pa'i rgyud las/ dam tshig gi le'u ste bzhi pa'o//// de nas yang dag bshad bya ba// nyon cig rdo rje rnal 'byor ma// snying po rang byung dkyil 'khor ni// dkyil 'khor bum pa gcig yin no// snying po brda yi dkyil 'khor dang// sems dpa'i ting 'dzin dkyil 'khor dang// rang bzhin snying po'i dkyil 'khor gsum// rang byung hUM gi dkyil 'khor gcig/phyi ltar mtshon pa'i dkyil 'khor ni// phyi nang dkyil 'khor gang bris kyang// sems dpa'i dkyil 'khor gsal 'debs yin// sems dang ting 'dzin gang bsgoms kyang// snying po 'od kyi gsal 'debs yin// snying po chos nyid rang byung hUM// dkar dang dmar dang mthing dang ljang// ser dang 'od gsal kun gyi gzhi// sku gsum sku lnga ye shes hUM// dkyil 'khor rnam gsum snying po gcig/ bum pa dkyil 'khor rtsa ba ste// brda dang bum pa mtshon pa'i chos// rtags kyi bum pa snying po rten// don gyi bum pa snying po hUM// dkyil 'khor bum pa'i snying po hUM// chos med bskyed dang rdzogs pa med// ye nas dkyil 'khor rang bzhin yin// snying po dkyil la 'gyur 'dod hUM// chos las ma byung rang byung hUM// dkyil 'khor chen po yangs pa yin// zhes gsungs so// snying po rdo rje rin po che thams cad gcig pa'i rgyud las/dkyil 'khor gyi le'u ste lnga pa'o//// de nas yang dag bshad bya ba// nyon cig rdo rje rnal 'byor ma// bsnyen pa'i dkyil 'khor sbrel ba ni// snying po rig pa chos min la// brda rtags sgra don bshad pa ni// snying po rang byung nye bar bsnyen// dad ldan lus srog gtong phod can// snying po nyid la bsnyen pa yin// lta sgom spyod pa dge ba bcu// snying po'i don la bsnyen pa yin// rtsa rlung thig le stong pa bde// snying po bsnyen pa'i bsnyen pa yin// 'gyu ba dran pas rang byung shes// dran pa 'dzin pas yengs pa med// chags pa nyams la 'phel 'grib med// nye bar bsnyen pa snying po gcig/ rang byung snying po chos nyid hUM// brda' bstan snang ba'i zhen pa log/ yul la snang med spros dang bral// rtags bstan tshogs drug rang sar grol// las rlung ngo sprad ye shes shes// sgra ru bstan pas ming med sgra// gang snang ming btags snying po'i dpe// chos nyid don dang rtag tu 'grogs// bsnyen pa'i bsnyen pa nye bar bsnyen// rang byung rang shar bsnyen pa gcig/ rang snang rang 'bar bsnyen pa gcig/ ngo bo nges tshig dbye ba des// bsnyen pa dag gi bsnyen gcig po// zhes gsungs so// snying po rdo rje rin po che thams cad gcig pa'i rgyud las/ bsnyen pa'i le'u ste drug pa'o//// de nas yang dag bshad bya ba// nyon cig rdo rje rnal 'byor ma// sgrub pa sgrub chen snying po gcig/snying po don gyi gzhi ma la// gtan la phebs pa bsgrub pa yin no// brda' bstan snang ba phebs pa yin/ rtags bstan rang lus gtan la phebs// sgra bstan thos pa gtan la phebs// de ltar snying po don du gcig/ rang byung ye shes bsgrub pa yin// chos nyid rang byung snying po hUM// brda rnams bstan pas snang ba rtogs// rang byung rang snang yul med stong// rtags su bstan pas gang zag rtogs// rnam shes chos kyi bdag las grol// sgra ru bstan pas tshig tshogs grol// thos pa'i grub mtha' ming med rtogs// sgrub pa chen po zhes bya yin// rtsol ba'i re dogs hUM gis chod// snying po chos min rang byung 'grub// bsgrub pa'i bsgrub pa chen po gcig/ ces gsungs so// snying po rdo rje rin po che thams cad gcig pa'i rgyud las/ bsnyen pa bsgrub pa'i le'u ste bdun pa'o//// de nas yang dag bshad bya ba// nyon cig rdo rje mkha' 'gro ma// dpa' bo gcig pa'i phrin las ni// dpa' bo gcig pas las kun byed// bya ba thams cad 'grub pa'i hUM// snying po las bzhi gcig gis byed// zhi rgyas dbang dang drag po rnams// snying po ma 'gags 'gyu bas byad// 'gyu ba rtsal gsum rang chas gcig/ 'gyu ba yid rtsa snying por chod// nyon mongs chags sdangazhi bar byed// nyon mongs dug lnga rang zhi bar// rig pa ye shes rgyas par byed// rang byung 'gyu ba dran pas thul// rang byung rig pa rang rtsal dbang// rang dbang thob pas thogs chags med// drag po mngon spyod bya ba grub// phrin las bzhi po snying por gcig/las kun snying po hUM gis byed// sangs rgyas kun gyi snying po che// chos sku dngos med rtsol bral hUM// rtogs pas 'khor ba thams cad zhi// zhi ba'i phrin las snying po gcig/ snying po 'od gsal longs spyod sku// yon tan ye shes sku lnga rgyas// rgyas pa'i phrin las snying po gcig/ rig pa rang rtsal sprul sku hUM// mdzad pa'i las kun snying po'i dbang// dbang gi phrin las snying po gcig/ snying po 'gag med thogs med hUM// 'byung ba rlung chen thogs chags med// yid snang tshig kun sbyor sgrol byed// drag po'i phrin las dpa' bo gcig/ 'gyus dran 'dzin chags zhi rgyas dbang// drag po zang thal dpa' bo gcig/bya ba'i las grub ye shes gcig/ zhes gsungs so// snying po rdo rje rin po che thams cad gcig pa'i rgyud las// phrin las kyi le'u ste brgyad pa'o//// de nas yang dag bshad bya ba// nyon cig rdo rje rnal 'byor ma// mchod pa snying po gcig po ni// 'dres shing dbyer med gnyis su med// snying po 'gro kun sangs rgyas la// til la mar bzhin dbye ru med/ gzhi gcig snying po'i mchod pa gcig/ gzhi dang rang gdangs gnyis su med// 'khrul pa las kyi mchod pa gcig/ snying po 'gyus dran 'dzin chags dang// 'khrul pa rang ldog mchod pa gcig/ rtsa rlung thig le rang byung hUM// gsal stong 'gag med mchod pa gcig/sku gsung thugs dang yon tan las// snying po ye shes mchod pa gcig/ bla ma yi dam mkha' 'gro hUM// snying po chos min bla na med// bla ma gu ru mchod pa gcig/ snying po yi dam sku lnga gsal// yi dam rang byung mchod pa gcig/snying po rang byung 'gyu ba grol// snying po mkha' la 'gyu ba grol// gnyis su med pas mchod pa gcig/ chos min snying po'i klong du gcig/ chos can chos nyid snying por gcig/'khor 'das kun rdzob don dam gcig/ 'di ni mchod pa chen po gcig/ ces gsungs so// snying po rdo rje rin po che thams cad gcig pa'i rgyud las// mchod pa'i le'u ste dgu pa'o//// de nas yang dag bshad bya ba// nyon cig rdo rje rnal 'byor ma// rnal 'byor snying po'i dpa' bo gcig/ bla med snying po chos min la// blo dngos rnal ma snying por 'byor// bla med rnal 'byor chos sku gcig/ snying po ye shes rnal ma la// rang byung longs sku rnal 'byor gcig/ 'gyu ba ye med rnal mar 'byor// 'gag med sprul sku rnal 'byor gcig/ snang ba tshig tshogs rnal mar 'byor// srog dang snying po'i rnal 'byor gcig/ rgyu las gnyis med 'bras bu gcig/snying po'i don la 'byor na 'byung// chos min chos kun rnal mar 'byor// snying po hUM gi rnal 'byor yin// gcig ni kun gyi rang bzhin te// du ma rang byung gdams ngag yin// du ma ro gcig ma rtogs na// rnal ma'i don la 'byor mi srid// ming gi rnal 'byor grangs med do// don gyi rnal 'byor shin tu dka'// chos min klong du chos can sbyor// don dam klong du kun rdzob sbyor// gcig med klong du du ma sbyor// ming med klong du tshig tshogs sbyor// sku med klong du snang gzugs sbyor// rgyu med rkyen med snying po rnal// 'khor 'das gnyis med ye shes 'byor// snying po rang byung rnal 'byor gcig/ces gsungs so// snying po rdo rje rin po che thams cad gcig pa'i rgyud las// rnal 'byor gyi le'u ste bcu pa'o//// de nas yang dag bshad bya ba// nyon cig rdo rje rnal 'byor ma// snying po chos min sngags gcig ni// mngon du gyur pas sngags don no// snying po rang chas rang 'byung gsang// sngags pa'i don de gsang bas na// gsang sngags zhes su nga 'chad do// snying po kun khyab rgya chad kyang rgyun chad med// 'das dang ma byon da ltar dang// 'gro drug 'khrul pa rigs gcig ste// rig sngags zhes su nga 'chad do// snying po 'khor 'das ma chad pa// dper na gser dang gzugs brnyan 'dra// bder gshegs snying pos 'gro kun khyab// gzungs sngags zhes su nga yi bshad// snying po don gyi sngags gcig yin// gsang sngags dag gi ngo bo ni// shes rab snying rje gnyis su med// rig sngags dag gi ngo bo ni// shes rab ye shes gnyis su med// gzungs sngags dag gi ngo bo ni// shes rab ting 'dzin gnyis su med// snying po don du sngags gsum gcig/ shes skyob phyir na sngags zhes bya// snying po rang byung sngags las ni// gzhi nas bag chags sel ba dang// ma rig rtog pa sel ba dang// 'phral byung nyon mongs sel bar gcig/ rang byung chen po sngags gcig yin// zhes gsungs so// snying po rdo rje rin po che thams cad gcig pa'i rgyud las// snying po don gyi sngags bstan pa'i le'u ste bcu gcig pa'o//// de nas yang dag bshad bya ba// nyon cig rdo rje drag mo khyod// snying po rin chen phyag rgya ni// snying po dus gsum 'gyur ba med// phyag rgya chen po'i ngo bo gcig/ snying po 'chos pas 'das pa med// phyag rgya chen po'i nges tshig gcig/ phyag rgya bzhi dang rtsa la hUM// chos dang bral ba'i snying po sku// chos sku phyag rgya chen po gcig/rang byung rang gdangs ye shes lnga// dam tshig longs sku'i phyag rgya gcig/ rang byung rang sprul 'gags pa med// sprul sku chos kyi phyag rgya gcig/ snying po rang byung rang 'gyu snang// sna tshogs las kun de yis byed// ma rig ye shes 'khor 'das las// snying po las kyi phyag rgya gcig/ snying po phyag rgya kun gyi gzhi// nam mkha'i bdag po sna tshogs ston// snying po'i dpe ni nam mkha' bzhin/ phyag rgya'i dpe ni rgyal po'i bka'// rgyas btab de las 'da' mi srid// gsang sngags snying po ye shes yin// des na 'gag med shes pa shes rab yin// snying po chos min 'gyur med kyang// thugs rje phyag rgya 'gag med gcig/'gyu ba rlung gi ye shes na// ma rig nyon mongs chags sdang phyag/ chos min rgya las ma 'das so// 'gyur ba rlung gi gti mug na// rang rig ye shes rang grol phyag/ snying po'i chos can rgya yi 'thums// de bas chos can chos nyid gcig/gcig la las su rung bar gyis// zhes gsungs so// snying po rdo rje rin po che thams cad gcig pa'i rgyud las/ phyag rgya'i le'u ste bcu gnyis pa'o//// de nas yang dag bshad bya ba// nyon cig rdo rje drag mo khyod// snying po don gyi gsang rgyud ni// don gyi rgyud dang tshig gi rgyud// snying po rang byung klong na gcig/ sangs rgyas kun gyi snying po che// bde bar gshegs pa'i thugs rgyud des// khams gsum snying po 'gro drug khyab// don gyi rgyud chen khyad par med// snying po rang byung gsung tshig bzhi/ rdo rje hUM ste hUM zhes sgrogs// sangs rgyas kun gyi gsung yangayin// sems can kun gyi skad du hU~M// tshig rgyud snying po khyad par med// sangs rgyas sems can 'brel pa hU~M// hU~M gi klong du chos kun rdzogs// rdzogs pa'i klong du kun ka tshang// snying po'i klong du chos kun 'khrungs// rang byung hU~M la phun sum tshogs// lta sgom spyod pa dbang la sogs// snying po rgyud kyi ldang tshad gcig/ chos sku longs sku sprul skur brgyud// rdo rje 'chang gsum brgyud ma chad// sangs rgyas sems can gnyis su med// gnyis med gnyis su med par ston// 'khor 'das gnyis po rgyun ma chad// rgyud chen snying po kun gzhir gcig/ ces gsungs so// snying po rdo rje rin po che thams cad gcig pa'i rgyud las// rgyud kyi le'u ste bcu gsum pa'o//// de nas yang dag bshad bya ba// nyon cig rdo rje drag mo khyod// spyi lung snying po rang byung bstan// bla med snying po spyi gzhi 'di// lung chen kun gyi lung du gcig/ lung ni zin sla bkyer bar bde// rang byung snying po spyi chos hUM// gang gi sgo nas 'jug spyod kyang// spyi chos 'di la brten te spyod// lung ni yid ches tshig yin te// tshig sgo thams cad hUM las byung// nges par smra ba rdzun gyi tshig/ gcig las thams cad smra ba hUM// smra bar mi byed rgyu med phyir// gang snang 'phrul pa yin pas chog/ ming med yul dang bral ba na// nyes zad lung du de zad do// don gyi lung dang tshig gi lung// don gyi lung ni snying po bzhi// mi 'gyur chos min gnyis med hUM// tshig gi lung la bsam mi khyab// drang don nges don mdo rgyud sogs// theg pa phyi nang ston pa'i bka'// zhal nas gsungs pa dam pa'i chos// rang byung snying po bkye ba bde// rang byung dpa' bo kun nas 'brel// zin par sla la bkyer bar bde// rgyal po'i bka' dang snod spyad lung// mtshon pa'i dpe ru shes par gyis// don mtshon yid ches lung zhes bya// bde gshegs dgongs pa thugs rje nas// 'gro drug sdug bsngal nyon mongs kun// las dang rnam smin cir snang yang// snying po don gcig 'gyur pa med// brgyal dang ra ro bag med kyang// snying po'i rang bzhin 'gyur ba med// dper na gser dang gzugs brnyan 'dra// snying po lung gcig gang yang yin// zhes gsungs so// snying po rin po che thams cad gcig pa'i rgyud las// lung gi le'u ste bcu bzhi pa'o//// de nas yang dag bshad bya ba// nyon cig rdo rje drag mo khyod// snying po don gyi man ngag 'di// lo rgyus rtsa ba tshig don dang// yo ga dgos ched lnga po gcig/ rdo rje 'chang ba dang po bar// rig 'dzin bla mas mdzub tshug bstan// lo rgyus yid ches snying po gcig/ rtsa ba snying po rang byung ba// chos can chos nyid 'khor 'das dang// phyi pa nang pa theg pa'i sgo// snying po gzhi las gyes mdo gcig/ tshig don snying po'i byin rlabs de// rdo rjai 'chang gsum bshad lugs la// mtshon byed tshig gi snying po bstan// rang byung snying po gdams ngag gcig/ yi ge don gyi snying po bstan// rang rang theg pa la shan dbye// snying po 'di ru chos nyid gcig/rtsa ba snying por rang byung gcig/ dgos ched snying po spyi gzhi 'di// 'gro drug theg pa kha 'thor nas// 'byung ba'i don du rang byung hUM// 'khrul pa bzlog pa snying po gcig/ don gyi chos nyid spyi gzhi 'di// khong nas gab sbas don 'byin pa// nyag gcig snying po bstan pa yin// rdo rje 'chang ba'i gsung gi mdzod// tshig gi don gyis don la sbyar// zhal nas gsung pa'i rgyud lung kun// ma nor khrigs su don la btab// gsal 'debs yi ge'i ris su bkod// tshig don gsal bar byed pa yin// tshegs chung don che snying po 'di// gang dang ci yang las rung bas// nges tshig gtan tshigs snying po hUM// bla ma slob bu ma bu 'dra// spyir na rgyud lung man ngag gsum// rje dang blon po 'bangs gsum 'dra// bla ma'i brgyud pa bar ma chad// de yi lung thob bka' bzhin bsgrub// bum pa'i chu bzhin man ngag thob// de la de bstan de yang thob// snying po don gyi man ngag gcig/ ces gsungs so// snying po rdo rje rin po che thams cad gcig pa'i rgyud las// man ngag gi le'u ste bco lnga pa'o//// de nas yang dag bshad bya ba// nyon cig rdo rje drag mo khyod// snying po don gyi lta ba ni// ci yang yin no gang yang rung// phyogs dang bral bas nam mkha' 'dra// snying po rang byung klong yangs pas// dgag sgrub med pa'i chos min yin// yul med ming med gcig kyang med// rang byung rang snang rtsol bsgrub med// gsal med stong med chos las 'das// snying po hUM gi lta ba yin// thig le nyag gcig snying po dang// gang snang grogs su lhongs bar bya// rin chen 'phrul gyi snying po bsgom// ma yengs gnad du hUM dang 'grogs// phyi rlung sdom la nang rlung zung// lus srog yan lag snying ga 'khal// dkar dmar rlung bsdam tshangs bug gtod// mkha' la 'bru tshugs btsan thabs gnad// rdo rje pad+ma rtsa kha nas// dkar dmar rtsa rab d+hU ti rtsi// bdud pa lnga ni sgo thebs lnga// phyed par phyi la 'dris par gyis// gyen dang thur dang thad ka gsum// lta stangs zhi khro sems dpa'i gnad// ma tshud gzhung dang thag pa ste// ya nga g.yang nga bcas pas tshud// 'gyus dran 'dzin chags yengs pa med// gang snang gar 'gyus lam slongs shing// gnyid dang ra ro g.yeng ba kun// khyad par med na bsgom pa gc-ig/ rang rang nyams myong nga rgyal gnod// dge sdig 'khrul chos lam du slongs// bar med 'phro med 'bral ba med// log rdug 'dod pa'i ro mi ldan// dgra sdang chags gnyen ngos mi 'dzin// skyes bu nad kyis gzir ba 'dra// bu shi ma yi sems las bzhin// yengs pa med na spyod pa gcig/ snying po rgyun chags spyod pa gcig/ ces gsungs so// snying po rdo rje rin po che thams cad gcig pa'i rgyud las// lta sgom spyod pa'i le'u ste bcu drug pa'o//// de nas yang dag bshad bya ba// nyon cig rdo rje drag mo khyod// snying po chos min grub mtha' gcig/ sku gsum chos sku'i ngang du gcig/'byung lnga nam mkha'i ngang du gcig/ sangs rgyas thams cad dgongs pa gcig/ dper na rgya mtshor chu bran 'dus pa 'dra// gdul bya'i don du skur bstan pa// rgya mtshor gza' skar shar ba 'dra// rdo rje 'chang gsum chos min sku// snying po chos min chos kyi sku// thams cad 'dus pa'i 'bras bu gcig/ yul snang yangs pa ye shes rgyas// rang rig ye shes chos kyi sku// dang po rdo rje 'chang du grags// rig pa chos min chos kyi sku// mdzad pa med pa'i byin rlabs ni// rtsol ba med pa sku nyid 'byung// thig le chos min longs spyod sku// so so'i rigs kyi 'bras bur snang// sku lnga ye shes sgyu ma lnga// 'od gsal rigs lnga mtshan rdzogs sku// rdo rje 'chang ba mtshan ma yin// don nyid gzigs kyang shes bya 'phrang// 'od zer dpag med yum dang sras// ma bskyed dkyil 'khor yongs rdzogs gcig/ sna tshogs chos min sprul pa'i sku// sku gsung thugs kyi 'bras bur snang// rang byung rang snang ye shes sku// sna tshogs sprul pas sna tshogs 'dul// rdo rje'achang ba tha ma ste// mdzad pa'i las rnams 'gro don byed// gang la cis 'dul sprul pa 'gyed// sna tshogs theg pa'i blo dang sbyor// snying po rang byung dpa' bo hUM// snying po til dang mar bzhin du// yongs su khyab pa'i sgra sgrogs te// rtsa rlung ye shes rang byung ston// snying po grub pa'i mtha' gcig yin// zhes gsungs so// snying po rdo rje rin po che thams cad gcig pa'i rgyud las// grub mtha'i le'u ste bcu bdun pa'o//// de nas yang dag bshad bya ba// nyon cig rdo rje drag mo khyod// snying po chos min sku gsum las// thugs rje ye shes rang byung bstan pa ni// dper na ston ka'i nyi ma sprin dang char// byin gyi rlabs kyis 'byung ba yin// lus dang yan lag nying lag bzhin// lus dang dbang po rnam shes 'dra// chos sku nam mkha' lus dang nyid// chos sku chos min rdo rje 'chang// g.yos pa med pa'i mya ngan 'das// mdzad pa med pa'i byin rlabs 'byung// longs sku 'od dang sprin dang yin// sprin 'dus 'od gsal yan lag lnga// thig le chos min rdo rje 'chang// sprul sku char dang zer dang nying lag 'dra// gang la gang mos ci la cis 'dul bzhin// mdzad pa'i phrin las 'gro don sna tshogs mdzad// theg pa sna tshogs rdo rje 'chang// lus ngag yid gsum dge bcur 'dzud// yi ge 'bri klog la sogs te// rgyu dang ye shes tshogs la bskul// dbang po rab 'bring tha ma la// rang rang blo dang sbyar te 'khrid// bla med snying po yang gsang 'di// de la gdung bzhin bsnyen bsgrub bzhi// dam tshig rnam gsum sku gsung sku// yan lag bcu gnyis gsang sngags don// phrin las rnam bzhi 'gro ba'i don// mchod pa'i bye brag phyi nang gsum// sgrub pa'i khyad par theg pa'i khyad// snying po rnam gsum bsdus rgyas dang// sku gsum grub mtha' 'bras bu dang// lnga ldan gsum tshan gcig ngo sprad// srog dang snying po'i mthar thug yin// sprul pa'i 'khor lo sna tshogs 'chang// sku gsum 'gro don mtha' la skyel// zhes gsungs so// snying po rdo rje rin po che thams cad gcig pa'i rgyud las/ thugs rje dge bcu rang gzhung gi le'u ste bco brgyad pa'o//// de nas rdo rje drag mo dang// mkha' 'gro'i tshogs dang sems dpa' bzhis// rdo rje 'chang la 'di skad gsol// kye kye ston pa rdo rje 'chang// 'og min 'dus pa'i 'khor rnams la// snying po dpa' bo gcig bsgrub dang// mkha' 'gro ma mor rgyud mtshan dang// bstan pa 'char dus gtad pa gsungs// rdo rje 'chang gis bka' stsal pa// nyon cig 'dus pa'i 'khor tshogs khyed// dpa' bo gcig bsgrub nga yis bstan// maN+Dal gcig dang bum pa gcig/ gtor ma gcig dang rak+ta gcig/ bdud rtsi gcig dang me mar gcig/ shes rab can gyis sgrub par gyis// bkra shis dben pa'i sa phyogs su// dang po bla ma mnyes byas la// maN+Dal khrag gis chag chag gdab// zlum po sgo bzhi pho brang gcig/ rang byung hUM bris tshon lngas bskor// rdo rje 'chang gi dkyil 'khor chags// bum pa mthing ga 'o ma dang// sman dang dri dang rin chen dang// snying po 'bru dang bcas pa gcig/ kha rgyan rtsa gcig lo ma yang// lnga sgril gzungs thag gcig btags te// gtsang ma'i ras kyis mgul bcings la// maN+Dal pho brang dbus su bzhag/mtshan ldan ya rabs thod pa ru// 'bru bshos sha chen gtor ma gcig/ khrag chen me tog mthing gas brgyan// dkyil 'khor de yi g.yas su bzhag/ bud med mtshan ldan thod pa ru// na chung rdol ba'i mngal khrag dang// skyes pa dar ma'i khrag dang ni// ce spyang khrag ni rab yin te// khrag sna rnyed tshad tha ma'o// maN+Dal de yi g.yon du bzhag/ thod pa rin chen bum pa ru// gsum bsil 'bru yi khu ba yi// bdud rtsi sman mchog stsal ba ni// sgrub po dag gi mdun stegs bzhag/ drag po lcags gyi kong bu ru// pho mo dar ma'i zhun blugs la// ro ras dri med sdong bu gzug/ stegs mthor bum pa'i rgyab tu bzhag/ tshogs dang mchod rdzas ldan pa bsgrub// thams cad 'dus pa kun gyi las// chos min snying po rang byung 'di// chos sku'i zhal gzigs longs skur gsal// sprul sku'i lung ston 'byung bar nges// dpa' bo gcig sgrub de ltar bsgrub// ces gsungs so// snying po rdo rje rin po che thams cad gcig pa'i rgyud las/ rang byung gcig bsgrub kyi le'u ste bcu dgu pa'o//// de nas yang dag bshad bya ba// nyon cig rdo rje drag mo khyod// pho bsgrub mo bsgrub sngags kyis dbye// sngags ni pho mo rang rang 'dzab// dpa' bo gcig 'dzab pho ltar bsgrub// mkha' 'gro'i glu lnga mo ltar bsgrub// phyi ltar dkyil 'khor brda' ru brtag/nang ltar rtsa rlung thig le'i chos// gsang ba 'gyu ba tshig des byed// rang byung lus kyi dkyil 'khor la// pho mo yab yum mtha' dag rdzogs// snying po'i 'gyu ba rang byung la// 'khor 'das ye shes nyon mongs 'byung// nyon cig mkha' 'gro ma mo khyed// nam mkha' stong pa'i klong yangs la// 'byung ba bzhi po 'gro bar byed// kun gyi gzhi ma nam mkha' yin// don gyi snying po 'di la sbyor// spyi gzhi lus kyi khog pa las// yan lag dbang po rnam shes 'gro// kun gyi gzhi ma rtsa dang rlung// snying po 'gag med rang la sbyor// spyi ti snying po'i mkha' klong la// gzhi rlung 'gyu ba 'gag med grogs// gar yang thogs med ma thogs grogs// yang dag la bzla mkha' 'gro yin// 'byung ba ma mo mkha' 'gro yin// sa chu me rlung ma bran 'dra// spyi gzhi mkha' la kun gzhi mo// 'byung ba lnga ni ma mo yin// lus ni ma la yan lag mo// dbang po nying lag ma bran 'dra// ri rab lus dang phyi nang rtsi// srid pa'i rgyal mo ma mo che// ma mo 'bum sde grangs med kyang// dman mo lnga bcu rtsa brgyad 'dus// de yang mkha' 'gro sum cu gnyis// de yang dbang phyug nyi shu brgyad// rje mo bcu bzhi yum chen drug/ mkha' 'gro sde bzhi srid rgyal mo// srid pa'i rgyal mo zhal mthong na// snang srid ma mo thams cad gzigs// phyi ltar ri rab gling bzhi mtshon// nang du rtsa rlung thig le'o// dman mo lnga bcu rtsa brgyad kyang// 'khor lo rtsa mdud rnam lnga la// rtsa 'dab brgyad brgyad steng 'og gnyis// mtha' gnyis med pas lnga bcu brgyad// lus kyi 'khor lo spyi bo mkha'// gyes pa'i rtsa 'dab sum cu gnyis// mkha' 'gro sum cu rtsa gnyis rlung// mkha' 'gro ma yi cha 'dzin no// sgal tshig nyi shu rtsa brgyad ni// pha rtsa thig le zhugs pa dbang// dbang phyug nyi shu rtsa brgyad tshogs 'khor te// ma dang b+h+yo yi tshul du gnas// mgrin pa longs spyod thabs shes bzhag/ bzhi bcu rtsa dang rtsa bran hUM// ye nas snying po kun skyed byed// rje mo bcu bzhi'i tshul du gnas// rnam shes tshogs drug rtsa ba'i tshul// mtshan nyid 'dzin pa hUM las ma// yab las yum ni dgyes byed 'dra// dbyings kyi yum drug tshul du gnas// snying nas rtsa bzhi yig 'bru bzhi// dngas ma 'od kyi gdangs su gnas// thig le hUM dang snying po ma// rlung bzhi 'od dang chas nas 'gro/ snying po rang byung hUM las srid// srid pa'i rgyal mo kun 'dul ma// spyi gzhi snying po hUM gi gzhi// sna tshogs chos rnams srid pa yin// zhes gsungs so// snying po rdo rje rin po che thams cad gcig pa'i rgyud las/mkha' 'gro ma'i le'u ste nyi shu pa'o//// de nas yang dag bshad bya ba// nyon cig rdo rje drag mo khyod// sde brgyad lha srin snying po'i rtsal// 'byung ba 'byung phran nam mkha'i klong// chos sku snying po kun gzhi la// longs sku rang byung 'gag med gdangs// sprul sku rang snang tshogs gnyis ston// thub drug srid pa'i bon chos sman// mo bzo lha srin drug tu sprul// gdul bya re res mngon rtags bstan// skul 'debs lha srin sde brgyad ni// gling bzhi ri rab rgya mtsho kun// phyi rten rang rang chos mthun rten// brda' ru phyi rabs rjes 'jug la// yang dag snying po yin phyir bstan// gdul bya phyi ltar dgye ba yin// lus dang rnam shes don snying dang// yan lag rtsa rlung nying lag la// nang rten rang rang chos mthun yod// rigs drug thub drug lus la gnas// spyi bo'i rtsa gyes nye dbang lha// sum cu rtsa gnyis brgya byin gtsug/ lha dang thub pa bsam pa ste// lus kyi ri rab steng dang mthun// mgrin pa rtsod pa'i sgo ldan nas// lha min thags bzang bcas pa yin// snying ni ri rab rtsa bzhi gling// nga rgyal dge sdig shAkya'i ming// lte ba srid pa'i rgya mtsho na// sna tshogs byol song seng ge brtan// gsang ba 'dod chags sgrib pa'i yul// yi dwags kha 'bar chos mthun yod// yan lag dbang po rnam shes la// zhe sdang rang sbyor rang sreg yul// 'dod yon chags sdang tsha grang dang// rang la rang gsod glang mgo srid// lha dang klu dang gshin rje klu// gza' dang rgyal po bdud dang btsan// srin po gnod sbyin ma mo rnams// ming du tha snyad don du hUM// spyi gzhi snying po rang byung ngo// mig dang rna ba sna dang lce// lus dang yid dang rnam shes dang// kun gzhi rnam shes tshogs brgyad ni// mtshan 'dzin rang gnas sde brgyad do// brten pa lus ni spyi gzhi la// don snying dang ni rtsa rlung khrag/ sde brgyad dngos por yod pa ste// mkhal ma glu yi mkhar yin te// chu rtsa rgya mtsho chen po gnas// mtsher pa bdud kyi gnas yin te// ltag pa'i bdud rtsa nag por 'brel// mchin pa btsan dang gshin rje'i mkhar// khrag mtsho sdog po rtsa dang 'brel// glo ba gnod sbyin ma mo'i mkhar// las rlung dbugs dang 'brel pa'i rtsa// snying ni gza' dang rgyal po'i mkhar// kun khyab rgyal po 'gyu ba'i rtsa// rgyal po dkar nag gnyis yin te// snying stod dkar mthing gnyis la gnas// snying rtsa gza' yi rlung rtsar 'brel// lha dang khyab 'jug klu dang ma// dbang du bsdu ba shin tu gces// lha ni dbang phyug chen po ste// 'gyu ba dbang phyug dbang du gyis// dran pas dbang du 'dus pa yin// gza' ni tshangs pa khyab 'jug ste// yid dang 'gyu bas khyab cing 'jug/ rang byung snying po ngo shes tshangs// tshangs pa'i bu ga 'byongs na 'char// klu rgyal nor bu rin chen ni// 'dod pa'i yon tan thams cad 'byung// snying po nor bu rin chen 'dra// rang byung 'od kyi ngo shes na// 'dod pa'i don 'grub rin po che// rdo rje pad+ma 'byongs na phan// gzhi ma snying po hUM yin pas// srid pa'i rgyal mo ma mo'i gtso// mkha' 'gro bzhi ni rtag tu 'khor// 'khor bzhi dbang du bsdu ba gces// chos nyid gzhi ma snying po mkha'// nam mkha'i klong bzhin 'gyu ba 'gro// nam mkha' shugs 'gro dran pa sogs// 'dzin pa gzung 'dzin ting 'dzin gnad// chags pa rang 'dod nyams myong gnad// dran pa yengs med spyod pa'i gnad// 'gyu ba rang byung lta stangs gnad// gnad bzhi shes pa lta sgom gzer// gzer bzhi thebs pas mkha' 'gro dbang// dbang bzhi thob pas 'phrang bzhi sol// 'phrang bzhi sol bas 'khor bzhi grol// 'khor bzhi grol bas bdud bzhi btul// bdud bzhi thul pas ye shes bzhi// ye shes rang byung chos kyi dbyings// srid pa'i rgyal mo'i zhal dngos gzigs// dbang phyug chen po dbang du 'dus// tshangs pa chen pos lung ston gnang// dga' bo 'jog po'i nor bu thob// rigs drug g.yang sa de ru chod// 'da' ka'i gcan 'phrang de ru bsgral// 'jigs pa'i bdud bzhi de ru choms// sde brgyad cho 'phrul de ru zad// srid pa'i bon la gyer sa med// dam pa'i chos la bshad sa med// 'tsho byed sman la bcos sa med// mthong byed mo la blta sa med// so nam bzo la bya sa med// sde brgyad 'dre yi gnod sa med// shes pa brgyad po rtogs pa 'chang// bdag rig gzhan rig thams cad rig/ 'byung ba snying po chos las grol// zhes gsungs so// snying po rdo rje rin po che thams cad gcig pa'i rgyud las/ sde brgyad rang grol gyi le'u ste nyer gcig pa'o//// de nas yang dag bshad bya ba// nyon cig rdo rje drag mo khyod// nga yi gdams pa'i chos rgyud 'di// 'byung ba'i rgyal po nam mkha' 'dra// rgya chad phyogs su lhung ba med// rgya mtsho chen po'i dpe dang 'dra// zab pas gting mtha' chod pa med// za 'og ber khyim rgya mtsho 'dra// gcig la ma 'dres kun ka gsal// sgyu ma mkhan gyi rtsed mo 'dra// med par sna tshogs ston par byed// nor bu rin chen 'chang ba 'dra// thams cad mi 'byung gang yang med// rin chen gser gyi gzugs dang 'dra// gzhi la 'gyur med sna tshogs gzugs// rin chen gser gling phyin pa 'dra// bor du rung ba gang yang med// 'phrul gyi me long g.ya' dag 'dra// yod dang med pa snga phyir gsal// ga pur tsan+dan dug nyid 'dra// mkhas na sman de ma rig dug/ brda' rtags sgra dang don bzhi yis// chos nyid shig thog mdzu gu 'dra// gcig par bstan pa'i gdams ngag ni// zangs kyi sbugs su chung cug 'dra// gshor gyi nang du rlung btsud 'dra// thigs pa bzhin du gcig steng gcig/ bya brgya thal mo gcig gis 'phur// rol brgya bshal ba gcig gis bsub// brgyad khri bzhi stong chos nyid gcig/ gcig tu bstan gyis legs par rtogs// gcig par bstan pa'i gsang rgyud 'di// chos can thams cad chos nyid gcig/ gcig po 'khor 'das snying po gcig/snying po khyab chen rgyud du zung// dpa' bo gcig pa rdo rje hUM// gcig pu 'gyur med thams cad 'joms// rdo rje gcig pa'i rgyud du zung// gcig ni sna tshogs kun gyi gzhi// snying po thams cad 'byung ba rin po che// rin chen rang byung rgyud du zung// 'jug sgo theg pa bsam 'das kyang// snying po chos min chos nyid gcig/ thams cad hUM la 'dus pas na// 'thor ba sdud pa'i rgyud du zung// sangs rgyas thams cad 'dus pa gcig/dgongs pa gcig pa'i rgyud du zung// de yi dgongs pa de la bstan// dgongs pa brgyud pa'i rgyud du zung// de yi lung blangs de dang ldan// lung blangs zab mo'i rgyud du zung// tshegs chung bar ni don gcig bstan// man ngag zab mo'i rgyud du zung// de la de bstan de yang thob// thob pa gcig pa'i rgyud du zung// gnas kyi dang po'i 'og min du// mkha' 'gro drag mo khyod kyi zhus// ma rgyud ma mo'i rgyud du zung// thams cad snying po'i ma las gcig/ thams cad gcig pa'i rgyud du zung// zhes gsungs so// snying po rdo rje rin po che thams cad gcig pa'i rgyud las/ dpe dang rgyud kyi mtshan don du bkrol ba'i le'u ste nyer gnyis pa'o//// de nas yang dag bshad bya ba// nyon cig mkha' 'gro'i ma tshogs khyed// byin gyis brlabs kyi rgyud 'di zung// phyi rabs rnal 'byor las can la// snying po don gyi tshig rgyud 'di// pha rol phyin drug snying por bstan// snying po'i don shes shes rab mchog/ shes rab pha rol phyin par smros// de yi don la g.yengs pa med// bsam gtan pha rol phyin par smros// rnal 'byor snying po'i tshul dang ldan// tshul khrims pha rol phyin par smos// de rtogs bde sdug gang yang bzod// bzod pa'i pha rol phyin par smros// snying po zab mo de sbyin pa// sbyin pa'i pha rol phyin par smros// don la gzhan don de longs brtson// brtson 'grus pha rol phyin par smros// pha rol phyin pa'i don bsdus pa// yi ge gcig pa'i mdo gsum bstan// de ltar 'di ni gcig pa'i skor// thams cad gcig pa'i don rgyud 'di// rdo rje drag mo khyod la gtad// khyod kyis mkha' yi rigs la gtod// rgyal po'i sras mo la rung gi// de la gtad pas nga yi tshang dang 'phrad// rdo rje 'chang ba tha ma des// las 'phro gcig pa'i mkha' 'gro gcig/ bod yul mun pa'i rgyal khams su// gtod du 'gro bar the tshom med// de nas rim par brgyud byas nas// lnga brgya dus kyi nye ba na// thos chung shes rab can dag ni// thos pa rdzogs par spyod par nges// gzhan dag sgro skur sgrib pa sogs// 'di shes dus kyi gsang la spyad par bya// zhes gsungs so// ston pa nyid mya ngan las 'das so// rdo rje drag mo dang/ rin chen drag mo dang/ pad+ma drag mo dang/las kyi drag mo dang/ b+hud+d+ha drag mo la sogs pa/ mkha' 'gro ma rnams rjes su yi rang nas mngon par bsdus te/ mngon par bstod pa/ ston pa'i ston pa rdo rje 'chang// snying po chos min chos kyi sku// byin rlabs 'gag med sku gnyis 'byung// rdo rje 'chang la phyag 'tshal bstod// ces bstod de/ mkha' 'gro ma'i rang skad la phyag mtshan lnga yis brgyan/ don dril te dril bu'i sgra yi mchod pa phul lo// kun tu mi spel bar mkha' 'gro ma'i rang glus mna' bskyal lo// rdo rje drag mo zhu sdud kyi bdag mo'i mna' med do yod do yin nam// snying po rdo rje rin po che thams cad gcig pa'i rgyud las/ yongs su rdzogs pa'i le'u ste nyer gsum pa'o//// rdzogs so//// i ti// rdo rje drag mos sras mo go ma de byi la gnang ngo// des pad+ma la'o// des rje 'bangs grogs gsum la'o////

CLOSE WINDOW