CLOSE WINDOW

Gpb006.017
བོད་ཡིག

rgya gar skad du/ Ar+ya many+dzu shrI b+hA Sha tan+t+ra rat+na mA lA nA ma/ bod skad du/ 'phags pa 'jam dpal gyi bshad rgyud rin po che'i phreng ba zhes bya ba// 'phags pa 'jam dpal ye shes sems dpa' la phyag 'tshal lo// 'khor ba'i sems can thams cad kun// ma rig pas ni rgyu byas nas// las dang nyon mongs rkyen dbang gis// sdug bsngal rgya mtshor chud pa rnams// sdug bsngal mtsho las bton pa ni// byang chub bde la bkod pa'i phyir// gsang dbang lag na rdo rje yis// 'jam dpal don gyi mtshan brjod pa'i// rgyud kyi snying po lhun rdzogs 'di// rdzogs pa'i sangs rgyas bcom ldan 'das// thub pa'i dbang po nyid la zhus// de don phyin ci ma log par// rjes 'jug rnams kyis rtogs bya'i phyir// gsal byed sgron ma lta bu zhus// e ma chos rnams kun staun cing// zab cing rgya che'i don ston pa// 'jam dpal don gyi mtshan brjod pa'i// rgyud kyi snying po lhun rdzogs 'di// mar me 'chi ka'i 'od bzhin du// bstan pa 'jig ka'i dus dag tu// rgyal ba'i thugs rje'i byin rlabs kyis// 'dzam bu gling gi dbus su dar// skal ldan rnams kyi sgron me byed// las dang nyon mongs gnyen po byed// dang po'i 'og min chos dbyings su// gsang sngags glu 'di rang sgrar bshad// sangs rgyas rdo rje 'chang chen gyis// sangs rgyas dpag med rnams la gsungs// de nas lha gnas gsum du grags// sprul sku 'khor lo bsgyur rgyal gyis// lha rnams dang ni drang srong dang// rig 'dzin tshogs la bshad pa yin// tha ma 'dzam gling dbus su grags// bya rgod phung po'i ri yi 'gram// bya rkang ri yi rtse dag la// sangs rgyas bcom ldan shAka thub kyis// lag na rdo rje khro bo'i rgyal/ khro tshogs lnga brgya dang bcas la// zab cing rgya che'i mtshan don bshad// gsang ba'i bdag po nyid kyis bsdus// 'phags pa 'jam dpal gyi bshad rgyud rin po che'i phreng ba las// byung tshul bstan pa'i le'u ste dang po'o//// de nas gsang dbang lag na rdo rje yis// ston pa la ni dri ba dris// 'jam dpal don gyi mtshan brjod pa'i// rgyud kyi snying po lhun rdzogs 'di// bshad pa'i tshul ni ji ltar bshad// rgyud kyi don ni ji lta bu// rgyud kyi mtshan nyid ji ltar lags// le'u'i skabs rnams du zhig mchis// le'u drug ye shes 'chang ba yi// rim gyis go rim ma mthun gang// rgyas bsdus rim pa du zhig gsungs// sgrub thabs lha ni du zhig mchis// zab mo rdzogs pa'i rim pa yi// gdams ngag gnad ni ji ltar lags// tshig gi bka' tshoms ji ltar bshad// dri ba rnam pa bcu yi don// bcom ldan 'das kyis bshad du gsol// de skad zhus pa'i tshig don rnams// 'khor gyi rtog pa bsal ba'i phyir// bcom ldan 'das kyis bka' stsal mdzod// 'phags pa 'jam dpal gyi bshad rgyud rin po che'i phreng ba las// 'khor gyis zhus pa'i le'u ste gnyis pa'o//// de nas bcom ldan shAkya thub// rdzogs pa'i sangs rgyas rkang gnyis mchog// 'khor la zhal gzigs 'dzum pa mdzad// ljags brkyangs nas ni tshig gsungs pa// 'jam dpal don mtshan brjod pa yi// rgyud kyi snying po lhun rdzogs 'di// bshad tshul rnam pa bzhi yin te// chos rnams zab cing rgya che ba'i// bdag nyid du ni sangs rgyas dang// 'gro bas de ma rtogs tshul dang// thugs rje bskyed tshul nyid dang ni// de las dam chos gsung tshul lo// dam chos gsung tshul rnam bzhi ste// rgyas par gsung dang 'bring bsdus 'jug/ de las rgyas par gsungs pa ni// dug gsum nyon mongs cha mnyam pa'i// gnyen po brgyad khri bzhi stong ngo// theg pa sna tshogs thabs tshul gyis// 'gro ba'i don la ston pa'o// 'bring ni rnam la bcu gnyis te// mdo dang dbyangs dang lung du bstan// tshig bcad ched brjod gleng gzhi'i sde// rtogs brjod de byung skyes pa'i rabs// rgyas dang rmad byung gtan la phab// yan lag bcu gnyis srid rtsa bton// bsdus pa sde snod gsum dag ste// mdo sde 'dul ba chos mngon no// de yang rnam pa bzhi yin te// gang gsung gang du gang gi phyir// tshul ni ji ltar bsdus pa'o// gang ni bcu dang gnyis bshad pa'o// gang du sde snod gsum du'o// gang phyir rim pa gsum yin te// gnyen po'i don phyir gsum nyid dang// bslab gsum rgyud la skye phyir gsum// chos dang chos phyir bsdu ba gsum// bsdu tshul la ni rnam gnyis te// don dang tshig gi sgo nas so// don la rnam pa gsum bshad de// bsgom pa gtsor ston mdo yi sde// bsrung sdom gtsor ston 'dul ba yin// lta ba gtsor ston mngon pa yin// tshig bsdu rnam pa gsum yin te// theg pa che chung thun mong gsum// mdo sogs rim lnga mdo yi ste// de rjes rnam bzhi 'dul ba ste// tha ma gsum ni mngon pa'o// de ni theg pa chung ngu yin// rgyas dang rmad byung mdo yi sde// mdo sogs rgyu ni 'dul ba la// gtan la phab pa mngon pa ste// de ni theg pa chen po'i gzhung// dang po lnga ni mdo yi ste// de rjes drug ni 'dul ba yin// tha ma mngon pa thun mong gzhung// theg pa mchog gsum ston pa po// gang zag blo yi rim pa gnyis// theg chen thun mong ma yin pa'i// dbang du byas te bshad pa la// mtshan nyid rgyu yi theg pa dang// 'bras bu rdo rje theg pa'o// theg pa gsum gyi nges 'byung la// theg pa gcig gi 'bras bur gnas// de la yang ni lnga yin te// sku gsung thugs dang yon tan las// 'di ni 'jam dpal sku yi rgyud// zab dang rgya che'i lam dang 'bras/khyad par bshad lugs bzhi yis bshad// thun mong bcu gnyis lugs kyis bshad// ston pa gnas 'khor dus la sogs// phun tshogs lnga yis gzhi bzung la// bshad tshul bdun gyis gnas skabs sbyar/khyung chen nam mkhar lding ba ltar// rgyud kyi spyi khog phub te bshad// stag gi mchongs stabs lta bu yis// rgyud kyi gzhung tshogs sa rnams bcad// ngang mo gzhib pa'i 'gros lta bus// gong 'og tshig gi 'brel par sbyar// che 'gran rtsod pa lta bu yis// brgal ba lan gyis bsnyad par bya// drang dka' dbang po lta bu yi// lung gis gang zag yid ches bya// bya glag gzan 'jum lta bu yis// gdams ngag gnad phyung skal ldan dang// ru sbal nur 'gros lta bu yis// yi ge'i 'bru 'joms tshig mtha' bskyal// 'phags pa 'jam dpal gyi bshad rgyud rin po che'i phreng ba las// bshad thabs kyi yan lag bstan pa'i le'u ste gsum pa'o//// lag na rdo rje khyod nyon cig/ gsang ba'i rgyud kyi don bstan pa// ngo bo nges tshig dbye ba'o// ldang tshad mthun dpe dgos 'brel lo// dbye ba rnam bzhir shes bya ste// tshig don sgo nas dbye ba dang// gzhi lam 'bras bur dbye ba dang// rtsa ba dang ni yan lag dang// lta spyod sgo nas dbye ba'o// ngo bo dbye las shes par bya// nges pa'i tshig ni drug yin te// phun sum tshogs lngas 'chad phyir dang/'brel dang ma tshad med phyir dang// 'khrugs pa'i phyir dang rag lus phyir// gsang sngags bslab pa ston phyir ro// ldang tshad dag ni bzhi yin te// gleng gzhi dang ni gleng bslang dang// yongs su shes bya dngos po bcu// mjug tu yongs su gtad dang bzhi// de la dngos po rnam bcu ni// lta ba dkyil 'khor dbang dam dang// bsgrub pa phrin las sngags phyag rgya// ting 'dzin mchod dang rnam bcu yis// gsang sngags rgyud kyi dbye ba bstan// lta ba'i don la rnam bcu ste/ ngo bo mtshan nyid nges tshig dbye// mthun dpe rtogs thabs phan yon dang// rtogs pa'i rtags dang rtogs pa'i tshad// ma rtogs nyes dmigs sgrub byed do// skye 'gag med dang mtshan nyid gzhi// chos kyi dbyings la lta phyir dang// ming tsam snang phyir gzhir bzhengs dbye// mthun dpe rnam pa bdun du sbyar// nyi ma rdo rje rin po che// nam mkha' rgya mtsho pad+ma gser// lung dang gdams ngag rtogs pa'i thabs// rdzogs sangs rgyas dang sgrib las grol// chags sdang kun bral phyogs zhen med// 'khor ba mi spang lung dang rigs// shes rab chen pos skad cig la// chos kun khong du chud pa po// dkyil 'khor don la rnam gnyis te// zab pa chos nyid dkyil 'khor dang// rgya cher rtags kyi dkyil 'khor ro// chos nyid don gyi dkyil 'khor ni// dkyil 'khor chen po yangs pa yin// skye med chos de sna tshogs don// ci yang min las cir yang 'char// dkyil 'khor chen po mchog chen po// rgya chen rtags la dgu yin te// gzhi dang ngo bo nges tshig dang// dbye ba snang lugs sgom thabs dang// tshad dang phan yon nyes dmigs so// gzhi ni sa gzhi phung po sems// phyi nang gsang bar shes par bya// rgyal ba'i pho brang 'khor dang bcas// rig pa chos nyid snying po la// rigs bzhi lha dang lha mo'i 'khor// dkyil 'khor zhes ni de phyir brjod// dbye ba gzugs brnyan dkyil 'khor dang// ting 'dzin rang bzhin dkyil 'khor gsum// goms dang ma goms bye brag gis// dngos dang ting 'dzin yul du snang// yang na dbang po rab 'bring gsum// chos sku longs sku sprul sku'o// bsgom pa rim mam cig car ro// rdul tshon 'dom gang gru bzhi la// ting 'dzin lcogs tshad tshad yin no// bris pas rtogs pa bskyed byed cing// bsgom pas tha mal zhen pa bzlog/ 'khor ba mi grol nyes pa'i skyon// dbang la rnam gnyis der shes bya// zab don gyi ni dbang mchog dang// rgya che rtags kyi dbang nyid do// zab pa don gyi dbang nyid do// rig pa'i rtsal dbang thob pa ste// chos nyid rtogs pa'i dbang ces bya// ye shes dbang bskur cod pan can// rgya cher rtags kyi dbang bskur la// rnam pa bcu bzhir shes bya ste// rgyu dang ngo bo nges tshig dang// dbye ba rnam grangs bskur tshig dang// thob rkyen las dang dbang bskur thabs// dus dag dang ni 'dzin byed rten// dpe dang phan yon nyes dmigs so// rgyu ni sa bon sa bon bcas// go 'phang gzhan gyi rgyud la dgod// gsang sngags kyi ni bslab pa dang// yon tan dag la dbang phyir dbang// dbye ba rnam pa bzhi yin te// bum pa'i dbang dang gsang ba'i dbang// shes rab ye shes dbang nyid dang// dbang bzhi par ni bstan pa ni// bum pa'i dbang la bcu gsum ste// dang por bzhag pa'i 'thad pa dang// dbang bskur snod du rung mi rung// skye rgyu sa bon de rnams rtags// ma thob rtags dang bskur ba'i dus// snod ngan sbyang dang nges tshig dbye// dbang skur slob dpon mtshan nyid dang// dkyil 'khor dbang gi bye brag go/ bum pa dang por bzhag pa yang// bum pa bzang po che ba'i mchog/ bum pas dri ma 'khrud byed cing// snod du rung bar byed phyir ro// dbang bskur snod du rung ba ni// gsang sngags la mos ngang rgyud bzang// bla ma la gus dam tshig ldan// de la dbang rnams rim bzhin sbyin// snod du mi rung gang zag ni// dad chung dam med rgyal po dang// rang gi bu dang chung ma la// dbang ni bskur bar mi bya'o// bum dbang skye ba'i rgyu gsum ste// rgyu yi chos kyis mi ngoms shing// 'bras bu'i chos la mos pa skye// bla ma la gus dam la gnas// thar pa thob 'dod skyes mchog des// bum pa'i dbang thob dang po yin// sa de thob pa'i rtags dag kyang// rang sems lhar gsal dam tshig ldan// byams dang snying rje rab tu 'phel// slob dpon spyir len nyon mongs chung// dbang nyid ma thob rtags dag kyang// gsang ba'i man ngag 'chal bar sgrog/ rnyed pa 'dod phyir ci yang byed// rdo rje slob dpon la smod byed// slob ma dad ldan dbang la mos// dgos pa'i rdzas tshogs bskur ba'i dus// snod ngan byung na sbyang ba'i thabs// slob dpon gyis ni sbyin bsreg dang// tsha tsha la sogs mdo yang gdon// slob mas sgrib pa rgyun gcod gdon// phyi bshags nang bshags ci nus bya// bum pa'i dbang gi nges tshig kyang// dbu rgyan la sogs rdzas rnams kun// gcig pa'i phyir dang 'dus phyir dang// spros med mtshon phyir bum pa smos// dbye ba phyi nang gsang ba gsum// rang shar brda yi bum pa phyi// rang lus rtags kyi bum pa nang// gsang ba chos kyi bum pa'o// dbang bskur slob dpon mtshan nyid ni// lta ba ma nor gdong ldan zhing// ting 'dzin lha gsal rgyud la mkhas// las dang bya ba'i thabs la mkhas// grub pa brnyes pas dbang bskur bya// 'di la dkyil 'khor du zhe na// bsdus dang 'bring dang shin tu rgyas// bsdus pa ye shes sems dpa'o// 'jam dpal ye shes sems dpa' yi// ming ni yang dag brjod pa'i mchog/ 'br-ing ni rigs lnga 'khor dang bcas// phyag rgya bzhi bcu tham pa'o// sangs rgyas sku lnga'i bdag nyid can// rgyal ba rigs lnga yab yum dang// sems dpa' sems ma sgo ba dang// nyan thos 'jig rten gtso bo dang// dkyil 'khor rgyal po 'di ru 'dus// de la dbang gi bye brag ni// dkyil 'khor gang blang bskur thabs gang// sgrib pa gang dag gdams ngag gang// lta ba spyod pa dam tshig dang// 'bras bu dag dang brgyad yin no// dkyil 'khor rdul tshon nyid las blangs// bskur gnas slob ma'i spyi bor bskur// sgrib pa las kyi sgrib pa dang// gdams ngag skyed rim gdams ngag ston// lta ba sngags kyi nyan thos rtogs// spyod pa dam rdzas lnga la spyod// dam tshig rtsa ba gcig nyid dang// yan lag dang ni bcas pa'o// 'bras bu mi dang lha gnas su// 'khor los bsgyur ba'i rgyal po thob// gsang ba'i dbang la brgyad yin te// rgyu dang gang zag dgos ched dang/ thob pa'i rtags dang ma thob rtags// srid pa'i 'dod chags spangs ma spangs// nges pa'i tshig dang bye brag go/ dka' thub sdom pas mi gdung zhing// gsang ba'i don mos skye ba'i rgyu// gang zag snod du mi rung ba// dge slong bram ze rgad po dang// dad med dam med 'dir ma yin// dgos ched mos dang gsang thub dang// gsang ba sngags kyi byin rlabs 'byung// gsang mchog rgyal po 'di thob na// gang zag rnams la mi brten cing// rgyud rnams gtsor len bsgrub la gus// dgon pa la dga' bzlas brjod grims// theg pa dman yang gtong par byed// 'di ni gsang mchog thob pa'i rtags// dman pa'i sbyor ba dang du len// gsang ba'i don la skur pa 'debs// gsang ba'i gsang mtshan sgrogs shing gshe// 'di ni gsang dbang ma thob rtags// gsang ba'i dbang mchog 'di thob pas// pad ltar srid pa'i 'dod chags spang// dngos grub 'byung ba'i gsang dbang de// kun la gsang phyir gsang zhes bya// gsang dbang bye brag dgu yin te// dkyil 'khor bskur gnas dag pa'i tshul// gdams dang sa dang blta ba dang// spyod pa dam tshig 'bras bu'o// dkyil 'khor yab yum mkha' las blang// bskur gnas slob ma'i lce la blang// sgrib pa ngag gi sgrib pa dag/ gdams ngag rang byung ye shes ston// skal pa sa brgyad non dang mtshungs// blta ba theg pa sems tsam rtogs// spyod pa sbyor sgrol la sogs pa// gsang ba'i mdzad spyod rnams la spyod// dam tshig nyi shu rtsa brgyad bsrung// 'bras bu tshe dbang rig 'dzin 'thob// gsang sngags don kun bskyed pa'o// shes rab ye shes dbang mchog la// rnam pa bcu gcig shes bya ste// rgyu dang snod du mi rung tshad// snod du rung ba'i tshad dang rten// de la chos ni du ldan dang/ zung du 'brel dang thob rtags dang// ma thob rtags dang bskyar chog dang// nges pa'i tshig dang bye brag go/ theg chen mchog la rab mos shing// bum dang gsang ba rnam gnyis thob// thabs dang shes rab zung du 'brel// de ni thob par byed pa'i rgyu// shes rab ye shes ngo bo ni// kun gyi thun mong ma yin pas// smod dang 'phya dang yal bar dor// snod du mi rung bstan mi bya// bcud mchog seng ge'i 'o ma ni// snod mchog rin chen gser snod blug/ mchog la mos shing dbang gnyis bgrod// shes rab ldan zhing dam tshig ldan// 'di ni snod du rung ba'i tshad// rten ni rang byung ye shes la// sgron mun bsal ba ji bzhin no// lus dang ngag la brten pa'i dbang// bgrod pas rnam gnyis mi rtag 'gyur// shes rab la ni chos bzhi ste// ngo bo nyid dang gsang don rtogs// ma bsgribs pa dang rnam bzhi yin// ye shes la yang rnam bzhi ste// byed pa med par rang byung dang// ye don nges par shes pa dang// rkyen gyis mi 'gyur shes bya gsal// gang gis rang byung rtogs gyur na// thabs dang shes rab zung du 'brel// snang ba mi 'gog thabs yin no// zhen chags med pa shes rab yin// gang gis gsang chen rtogs pa'i rtags// 'khor ba'i chos la zhen pa log/ mnyam pa'i rjes su gzhol ba'o// snying rje byang sems rab tu 'phel// dbang mchog ma thob rtags dag kyang// dbul po phyug por khas 'che 'dra// nor 'dod phyir na ngan las byed// theg pa chen por khas 'ches kyang// tha snyad 'dod phyir mi phyir 'brang// dbang ma thob ste bskur 'dod na// dad ldan tshul shes ngan song sbyong// tshul dang ldan par byin brlabs te// yang dang yang du snyoms 'jug gsal// bla ma dpe ru nam mkha' gsal// lung dang man ngag rig pas skyor// shes pa rab yin ye shes yin// de phyir shes rab ye shes so// bye brag la ni rnam pa brgyad// dkyil 'khor bskur gnas 'dag tshul dang// gdams ngag blta spyod dam tshig dang// 'bras bu bstan pa nyid dang brgyad// dkyil 'khor bla ma'i zhal las blang// gnas ni slob ma'i sems la bskur// sgrib pa sems kyi sgrib pa dag/ gdams ngag ye shes ngos bzung ston// blta ba gnyis med ye shes rtogs// spyod pa rang shugs dgag bsgrub med// dam tshig mnyam pa chen po bsrung// 'bras bu sku gsum ye shes lnga// shes rab ye shes me po che// bcu drug phyed phyed thig le can// yan lag med pa'i rtsis las 'das// dbang bzhi pa ni de dag la// rgyas 'debs pa yi man ngag ste/ gnyis med gnyis su med par ston// yang dag mtha' la rnam par gnas// rang rig 'gag med 'dus ma byas// bde chen rang bzhin dngos med ston// ma skyes gsal ba ye shes sku// de yi gnas la goms par bya// dbang bskur ba dang rab tu gnas// go 'phang bsgom dang ring du sbyin// byin brlab ces bya rnam grangs so// de la dbang 'di bskur tshul dang// slob ma'i snod dang mos sbyar la// ting nge 'dzin ni rdul tshon la// brten te rim mam cig car bskur// dbang thob rkyen la rnam bzhi ste// bla mas dbang thob nus ldan dang// slob ma dad ldan yod pa la// bla ma mnyes par byas pa dang// dbang gi cho ga legs pa'o// dbang gi las ni slob ma yi// dri ma dag par byed pa'o// bskur thabs rnam pa bzhi yin te// phyi ltar rdzas la brten nas bskur// nang gi rdzas gzungs brtan te bskur// gsang ba ting nge 'dzin la bskur// mthar thug gdams ngag brten te bskur// dus ni sdig pa las log pa// gsang sngags chos la mos dus so// dbang rnams 'dzin pa'i rten dag ni// dam tshig yin te nyams na yal// dpe ni gyang dang ri mo ltar// dbang rnams bskur ba'i phan yon ni// gsang sngags snod du rung ba dang// dus 'di tshun chad rgyal ba'i sras// dbang ma bskur pa'i nyes dmigs ni// nyan pa la sogs brtsam pa rnams// 'bras bu med cing brlag par 'gyur// dam tshig don la rnam gnyis te// zab mo don gyi mtshan nyid dang// rgya che bsrung ba'i dam tshig go/ zab pa don gyi dam tshig ni// rang sems mnyam pa chen po rtogs// dam tshig kun gyi mchog tu gsungs// de yi ngang las mi 'da' bar// blo dang ldan pas gnas par bya/ rgya che bsrung ba'i dam tshig la// don ni bco lngar shes par bya// rgyu dang ngo bo nges tshig dang// dbye ba dpe dang rnam grangs dang// las dang che ba bsrung thabs dang// nyams rgyu nyams rtags spyod pa dang// bskang thabs phan yon nyes dmigs so// rgyu ni rtsa ba byang chub sems// ngo bo bsrung bar bya ba rnams// sems pa rgyun ma chad pa'o// nges tshig dam pas gsung rnams la// 'da' bar bya ba ma yin la// 'das na tshig phyir dam tshig go/ dbye ba gsum ste spyi dang ni// khyad par lhag pa'i dam tshig go/ khyad par la ni rtsa ba dang// yan lag dag tu shes par bya// dpe ni so mkhar lta bu'o// dam tshig sdom pa tha tshig ste// yal gam zhes bya rnam grangs so// las ni sdig pa spong byed cing// legs pa'i yon tan 'dzin par byed// dam tshig dag gi che ba ni// bla med dam tshig 'di nyid du// bsrung bya kun 'dus rnam par dag/ bsrung thabs g.yo sgyu med pa yis// dran dang shes bzhin bya ras bsrung// 'khor ba'i chos la chags sdang che// chos la sgro skur phyogs 'dzin rags// dad brtson shes rab snying rje chung// gnyid dga' chang dang rang 'dod che// gsang mi thub pa nyams pa'i rgyu// 'khor dang longs spyod mi rtag dang// mdze sogs nad mang tshe tshad thung// ma nyes dgra lha mkha' 'gro'i chad// brtsam pa'i las la 'bras bu med// yid du mi 'ong sna tshogs 'byung// 'di rnams dam tshig nyams pa'i rtags// dam tshig nyams pa'i spyod pa ni// rgyu la ma 'bad 'bras bu la// re ba nyams pa'i spyod pa yin// ma sbyangs mkhas par 'dod pa dang// lta ba phyogs ris nyon mongs rags// slob dpon khyad gsod sgro skur che// dam tshig nyams pa'i bskang thabs ni// yan lag dam tshig nyams gyur na// phyi bshags nang bshags 'bad de bya// rtsa ba'i dam tshig nyams gyur na// bla ma la ni 'bul ba bskyar// sku la rgyal ba'i gzugs sku bya// gsung la mdo 'don bzlas brjod bya// thugs la mtshan bcas mtshan med bsgom// mchog tu lha bsgom don la 'bad// dam tshig bsrungs pa'i phan yon ni// mchog dang thun mong dngos grub bo// nyams pa'i nyes dmigs rnam gnyis te// 'di dang phyi mar sdug bsngal 'grub// dam tshig chen po de nyid mkhyen// khyab bdag tshig chen de nyid mkhyen// gal te gsang sngags bsgrub 'dod na// dam tshig la ni gnas par bya// dam tshig dag dang mi ldan na// phyi nang sde snod kun mkhas kyang// 'dab gshog med pa'i bya bzhin te// dmyal ba'i gnas su the tshom med// bsgrub pa'i don la gnyis yin te// zab pa don gyi bsgrub pa dang// rgya che ba yi bsgrub pa'o// gnyis med don la bsgrub pa ni// zab pa don gyi bsgrub pa yin// rgya chen bstan pa bcu gcig ste// rgyu dang ngo bo nges tshig dang// dbye dang bsgrub tshul rnam grangs dang// cha rkyen gang zag dmigs pa dang// phan yon dang ni nyes dmigs so// rgyu ni rang la gnas pa yi// byang chub sems kyi yon tan bsgrub// ngo bo dngos grub gnyis 'grub par// byed pa'i thabs kyi rim pa'o// nges pa'i tshig ni thabs 'di yis// dgos don bsgrub phyir bsgrub pa'o// dbye ba la ni rnam bzhi ste// bsnyen pa dang ni nye bsnyen dang// sgrub pa dang ni sgrub chen po// sgrub pa'i tshul la rnam gnyis te// shes rab sgo nas cig car du// 'jug pa'i tshul gyis bsgrub pa dang// thabs kyi sgo nas rim pa yis// 'jug pa'i tshul du bsgrub pa'o// sgrub pa'i tshul gyis bsgrub pa dang// bsgrub pa nyams su len pa dang// tshul bzhin spyod dang lam la gnas// rnal 'byor brtson zhes rnam grangs so// de la sgrub pa'i cha rkyen ni// gnas dang grogs dang 'khor yo byad// phun sum tshogs pas rten pa'o// sgrub pa rten gyi gang zag ni// dad brtson dam tshig ldan pa dang// shes rab rnying rje che ba dang/ dbang thob man ngag can gyis bsgrub// dmigs pa mchog dang thun mong ngo// phan yon 'dod pa'i don rnams kun// ji lta bar ni 'grub pa'o// ma bsgrubs nyes dmigs bstan pa ni// 'khor ba'i 'khor lor 'khyams pa'o// phrin las la ni rnam gnyis te// zab pa don gyi phrin las dang// rgya che don gyi phrin las so// zab pa don gyi phrin las ni// mnyam nyid rtogs pa'i dang nas ni// las bzhi phrin las kun kyang 'grub// rgya che rtags kyi phrin las la// don ni bcu gcig shes bya ste// rgyu dang ngo bo nges tshig dang// dbye ba ming gi rnam grangs dus// yul dang rtsom pa'i gang zag tshul// phan yon ma brtsams nyes dmigs so// rgyu ni tshad med rnam bzhi po// shes rab dang ni bcas pa'o// ngo bo bdag nyid chen po yi// thugs rjes 'gro ba phan 'dogs pa'o// nges tshig bya bar 'os pa'o// mdzad spyod bya phyir phrin las so// dbye ba bzhi la sogs pa yis// phrin las dang ni mdzad spyod dang// bya ba zhes bya rnams grangs so// dus ni 'dul ba la sogs pa// skabs la bab pa'i dus nyid do// phrin las brtsam yul bstan pa ni// spyir ni sems can thams cad la// khyad par gnod sdig dbul phongs dang// log lta can dang dregs pa can// nad dang gdon gyis nyen pa'o// bsnyen pa rdzogs shing nus par ldan// mos pa'i gang zag yin par gsungs// phrin las brtsam tshul rnam gnyis te// nang dang phyi ru shes par bya'o// nang ni shes rab ting 'dzin dang// bzlas pa dag la brten pa'o// phyi ni sbyin bsreg phur bu dang// thun dang gtor ma dkyil 'khor dang// mnan gtad spyod la sogs pa bstan// phrin las brtsam pa'i phan yon ni// bdag gzhan don ni 'grub pa'o// las ma brtsams pa'i nyes dmigs ni// bdag gzhan bar chod don mi 'grub// byed pa sems can kun don byed// sngags la rnam pa gnyis yin te// zab pa'i sngags dang rgya che'i sngags// zab pa'i sngags ni gnyis med do// gsang ba sngags zhes bshad pa yin// rgya che'i sngags la don bcu ste// sngags kyi don la bcu yis bstan// rgyu dang dbye ba ngo bo dang// nges tshig bzla thabs byed pa'i las// rtags dang mtshan nyid phan yon dang// sngags dang mi ldan nyes dmigs so// rgyu ni byang chub sems nyid de// skye 'gag med pa'i bdag nyid do// dbye ba la ni rnam gnyis te/ don nyid ye shes sgo nas dang// rtags nyid bzlas pa'i sgo nas so// don gyi sgo nas dbye ba gsum// gsang sngags rig sngags gzungs sngags so// bzla thabs dbye na bzhi yin te// rgyu ni ma nor rtsa ba'i sngags// bskyed pa rkyen dang bzlas pa las// skul ba'i phrin las sngags dang bzhi// de la sngags kyi ngo bo ni// chos nyid ma nor ji bzhin gnas// thabs dang shes rab bdag nyid can// de ni gsang sngags ngo bo yin// de don phyin ci ma log rtogs// de ni rig sngags ngo bo'o// rtogs pa'i don la ma yengs nas// de ni gzungs sngags ngo bo yin// bzla ba sngags kyi ngo bo ni// gsang ste ngag tu brjod ba'o// nges tshig man tra zhes pa'i sgra// shes pa skyob phyir sngags zhes bya'o// bzla ba'i thabs la rnam gnyis te// don gyi sngags kyi bzla thabs ni// rtogs shing lha bsgom yid la gsal// rtags kyi sngags la yang ni gnyis// rdo rje zhi ba'i zlas pa dang// rdo rje khro bo'i bzla thabs so// zhi ba shin tu mer chags bzlas// khro bo drag cing dar chags bzlas// de la yang ni rnam gsum ste// bsnyen pa chu bo'i gzhung ltar 'dren// bsgrub pa phu chu 'brub pa ltar// las sbyor nam mkha'i thog 'bab ltar// sngags kyi byed pa'i las bshad pa/ gsang sngags bzlas pas 'khrul rtog sel// rig sngags kyis ni ma rig sel// gzungs sngags kyis ni dran nyams sel// bzlas pa'i sngags kyis 'jig rten dang// 'jig rten 'das pa'i srog bskul te// dngos grub myur du 'byung bar byed// sngags kyi rtags ni rnam gsum ste// gsang sngags rtags ni lha pho dang/ rig sngags rtags ni lha mo dang// gzungs sngags yab yum zung du 'brel// mtshan nyid bstan pa rnam bzhi ste// shes rab dang ni snying rje nyid// gsang sngags dag gi mtshan nyid yin// shes rab dang ni ye shes nyid// rig sngags kyi ni mtshan nyid de// shes rab dang ni dran pa nyid// gzungs sngags kyi ni mtshan nyid yin// bzlas pa sngags kyi mtshan nyid ni// brjod pa sgra yi bdag nyid do// dngos grub gnyis po 'grub pa ni// de ni sngags kyi phan yon no// sngags dang mi ldan nyes dmigs ni// 'dod pa'i don rnams mi 'grub bo// sngags mchog sngags bdag rig sngags rgyal// gsang sngags rgyal po don chen byed// phyag rgya'i don la rnam gnyis te// zab mo'i don dang rgya cher bshad// sna tshogs snang ba'i chos rnams la// skye ba med pa'i rgya yis btab// de ni don zab phyag rgya'o// rgya cher bshad pa don brgyad de// ngo bo nges tshig dbye ba dang// mtshan nyid dpe dang phyag rgya'i rgyu// phan yon ma ldan nyes dmigs so// ngo bo bdag nyid chen po'o// mtshan ma'i gzugs su gyur pa'o// sems kyis sprul pa'i mchod rdzas so// mtshan med pa yi bdag nyid do// nges tshig mu dra zhes pa'i sgra// mtshon par byed dang mdzad pa sgrub// bcings grol byed dang rgyas 'debs phyir// phyag rgya zhes ni bshad pa yin// dbye na bsdus dang rgyas pa dang// bsdus pa la ni gnyis yin te// mtshan mar bcas pa'i phyag rgya dang// mtshan ma med pa'i phyag rgya'o// rgyas par dbye ba rnam bzhi ste// phyag rgya che dang dam tshig rgya// chos dang las kyi phyag rgya'o// phyag rgya'i mtshan nyid bshad bya ba// mtshan bcas phyag rgya'i mtshan nyid ni// rang rang don las mi 'da' dang// bdag nyid chen po'i rtags su ston// mtshan med phyag rgya'i mtshan nyid ni// cir yang ma grub ngo bo nyid// phyag rgya chen po'i mtshan nyid ni// yongs su rdzogs pa stong bdag med// dam tshig thugs mtshan mtshan ma'o// chos ni chos kyi mtshan ma'o// las ni 'gro don mtshan nyid do// dpe ni rnam pa bzhir bshad de// mtshon dpe me dang du ba'o// mdzad pa blon po'i pho nya'o// bcing grol gar mkhan phu dud do// rgyas 'debs rgyal po'i bka' rtags so// rgyu ni byang chub sems nyid dang// rdo rje thal mo nyid yin no// phan yon bdag dang gzhan don 'grub// phyag rgya mi ldan nyes dmigs ni// bdag gzhan don min ngan song 'khyams// phyag rgya bzhi yi don ston pa// phyag rgya 'di ni bla na med// ting 'dzin bstan pa bcu gnyis te// rgyu dang ngo bo nges tshig dang// dbye ba bsgom thabs bsgom pa'i dpe// mi mthun phyogs dang skyon bcos thabs// drod tshad rtags dang phan yon dang// nyes dmigs bstan par shes par bya// rgyu ni rig pa byang chub sems// ngo bo gang dmigs don dag la// bsam pa rtse gcig gnas bya'o// nges tshig dran pas zin phyir ro// dbye ba gnyis su shes bya ste// zab mo mtshan med ting 'dzin dang// rgya chen mtshan bcas ting 'dzin no// sgom thabs rim dang cig car ro// dpe na rgya mtsho ri dbang dang// 'ja' tshon ri mo lta bu'o// mi mthun phyogs ni bying rgod gnyis// bcos thabs gseng dang rgod zhi la// drod tshad phyi nang gsang ba'o// rtags kyang rmi lam 'byung ba dang// dngos su 'byung ba gnyis yin te// chags sdang chung zhing mdon shes 'char// de sogs rtags ni rim gyis 'byung// ting 'dzin bsgoms pa'i phan yon ni// mtshan ma can gyis mtho ris dang// tshe la dbang ba'i rig 'dzin dang// phyag rgya chen po'i rig 'dzin thob// zab mo mtshan med dgongs pa yis// kun bzang dbyer med sa chen non// ting 'dzin med pa'i nyes dmigs ni// 'khor ba ngan song las mi grol// ting 'dzin lus can lus kyi mchog/ ting 'dzin 'di ni mchog tu bsngags// mchod pa'i bye brag rnam gnyis te// zab pa don gyi mchod pa dang// thun mong spyi bshad mtshan nyid che// zab mo gnyis med ngang gnas pa// rgyal ba ngang gis mnyes pa'i phyir// mchod pa zhes ni bshad pa yin// rgya chen dbye ba don bcu ste// ngo bo nges tshig dbye ba dang// dbul pa'i thabs dang gang zag las// rdzas dang yul dang dgos ched dang// ma phul nyes dmigs bstan pa'o// de la mchod pa'i ngo bo ni// 'phags pa mnyes par byed pa yi// lus ngag yid gsum rdzas dang bcas// dmigs pa las kyi bdag nyid do// nges tshig 'phags pa mnyes byed phyir// mchod pa zhes su bshad pa yin// dbye ba rnam pa gsum yin no// rnam lnga phyi la dam rdzas nang// sbyor sgrol gsang bar shes par bya// rgyas par dbye ba brgya shes bya// dbul thabs mos pa'i tshul dang ni// sgyu ma lta bu'i blo yis dbul// dbul ba'i rten gyi gang zag ni// dad pa gsum ldan lhag sems can// las kyi tshogs gsog sgrib pa sbyong// dge ba las kyi mngon 'gro ba'o// rdzas ni yon chab sogs bdun dang// bdud rtsi lnga la sogs pa dag/ drang srong che dgu mchod cing brjod// mchod pa'i yul ni 'jig rten dang// 'jig rten 'das pa'i dkon mchog gsum// mchod pa phul ba'i dgos pa dag/ dngos grub rnam gnyis 'byung ba'o// mchod pa lnga ni ma phul ba'i// nyes dmigs 'dod don 'grub mi 'gyur// mchod 'os bstod 'os phyag gi gnas// drang srong che dgus mchod cing brjod// 'phags pa 'jam dpal gyi bshad rgyud rin po che'i phreng ba las// gsang bcu rgyud kyi lus bstan pa'i le'u ste bzhi pa'o//// bcom ldan 'das kyis bka' stsal pa// lag na rdo rje khyod nyon cig/ slad du rgyud kyi mtshan smos pa// dbang po rab kyi don 'gyur phyir// 'phags pa'i don dang 'jam dpal don// mtshan gyi don dang brjod thabs don// rnam pa bzhi yis bshad pa yin// 'phags pa'i don la rnam gsum ste// byed pa'i tshig bzhi dbye sgo bzhi// thabs kyi khyad par rnam bzhi 'phags// de la byed pa'i tshig bzhi ni// gang 'phags gang las gang gis 'phags// gang dang 'dra bar 'phags pa'o// dbye sgo rnam pa bzhi dag ni// brjod bya rjod byed sgrub pa lam// mthar thug 'bras bus 'phags pa'o// thabs kyi khyad par bzhi dag ni// 'jam dpal don gyi mtshan brjod pa'i// rgyud kyi rgyal po lhun rdzogs ni// thabs mang pa dang mkhas pa dang// de bzhin slad dang myur ba yis// sngags kyi bstan pa khyad par 'phags// de yang rgyud rgyal lhun rdzogs 'di// thabs mang ba yi rgyud yin pas// ji ltar bsgrubs kyang 'bras bu 'byung// theg pa sna tshogs thabs tshul gyis// 'gro ba'i don la rtogs pa po// thabs mkhas pa yi rgyud yin pas// ma yeng ye shes rgyun du 'char// mkhas pa chen po 'dod chags che// sems can thams cad dga' bar byed// thabs sla ba yi rgyud yin pas// bka' thub sdom pas gzir mi dgos// shes rab chen pos skad cig la// chos kun khong du chud pa'o// thabs myur ba yi rgyud yin pas// bskal pa du mar bgrod mi dgos// skad cig gcig gis rdzos sangs rgyas// 'jam dpal don la rnam drug ste// rang bzhin rgyu dang bsgom pa lam// mthar thug 'bras bu rnam pa dang// gdul bya las dag snang ba yang// grub mtha' so so la grags dpal/ de la mtshan gyi don bshad pa// zag bcas zag med la sogs pa// 'khor 'das thams cad 'jam dpal mtshan// ci'i phyir 'thad pa drug yin te// khyab pa'i phyir dang sprul pa'i phyir// rang bzhin phyir dang mkhyen pa'i phyir// gsang ba'i phyir dang mnga' brnyes phyir// chos kun 'jam dpal mtshan du 'dod// mtshan gyi brjod thabs rnam gnyis te// zab pa'i don dang rgya che'i tshig/ zab pa'i don gyi brjod lugs ni// gnyis med ngang la 'jog pa'o// tshig la yang ni rnam gsum ste/ gnyis med tshul dang gnyis sngags tshul// yon tan gsum dang rnam pa gsum// 'phags pa 'jam dpal gyi bshad rgyud rin po che'i phreng ba las// rgyud kyi mtshan bstan pa'i le'u ste lnga pa'o//// bcom ldan 'das kyis bka' stsal pa// lag na rdo rje khyod nyon cig/ 'jam dpal don gyi mtshan brjod pa'i// gsang ba rgyud kyi snying po 'di// le'u'i grangs ni bcu gcig ste// zhus dang slar gsung rigs la gzigs// sgyu 'phrul dra ba'i man ngag rim pa dang// ye shes drug dang rnam pa bcu// 'dud rnams kyis ni bstod pa dang// phan yon sngags dang rjes yi rang// rnam pa bcu bzhir bshad pa yin// de nas dpal ldan zhes pa nas// spyan sngar yan chad zhus pa'i le'u// de nas bcom ldan zhes pa nas// legs zhes gsol pa lan gyi le'u// de nas bcom ldan zhes pa nas// gtsug tor cher gzigs gzigs pa'i le'u// tshig gi bdag po zhes pa nas// yang dag sgyu 'phrul mngon byang le'u// 'di ltar sangs rgyas zhes pa nas// theg pa chen po'i tshul gyis mchog/ rtsa ba byang chub sems kyi le'u// sangs rgyas rnam par snang zhes nas// zhags pa yan chad chos dbyings le'u// rdo rje 'jigs byed ces pa nas// sgra dang ldan pa me long lta bu// yang dag bdag med ces pa nas// ye shes me lce kun rtogs le'u// 'dod pa'i don grub ces pa nas// rin chen gtsug tor mnyam nyid le'u// sangs rgyas rtogs bya ces pa nas// dpal dang ldan mchog bya grub le'u// mchog sbyin rdo rje zhes pa nas// ye shes sku nyid bstod pa'i le'u// lag na rdo rje zhes pa nas// chos kyi rgyal po phan yon le'u// A+oM sarba d+harma zhes pa nas// dz+nyA na gar+b+ha sngags kyi le'u// de nas dpal ldan zhes pa nas// kun bshad yan chad rjes su yi rang le'u// de yang bsdu na rnam pa gsum ste// dmigs par bya ba'i yul dang ni// nyams su blangs pa'i thabs dag dang/ nyams su blangs pa'i 'bras bu'o// dmigs pa'i yul la rnam gsum ste// sdud pa'i 'khor la dmigs pa dang// ston pa nyid la dmigs pa dang// rigs drug 'bras bu la dmigs pa'o// nyams su blangs thabs le'u dgu// nyams su blangs pa'i 'bras bu la// rnam pa gnyis su shes bya ste// bsgrub dang bshad pa'i 'bras bu'o// bsgrub pa'i 'bras bu phan yon le'u// bshad pa'i 'bras bu rjes yi rang ba'i le'u'o// 'phags pa 'jam dpal gyi bshad rgyud rin po che'i phreng ba las// le'u'i skabs phye ba'i le'u ste drug pa'o//// bcom ldan 'das kyis bka' stsal pa// gsang ba'i bdag po yang nyon cig/ ye shes drug gi le'u bstan pa ni// de yi 'thad pa bshad bya ba// 'khor 'das lam dang 'bras bu'i chos// kun gyi rtsa bar gyur pa'i phyir// rtsa ba byang chub sems kyi le'u bshad// gti mug chos dbyings ye shes te// rab tu phye ba'i rnam grangs kun// gti mug gnyen po yin pa'i phyir// chos dbyings ye shes le'u bshad// zhe sdang me long ye shes te// rtogs pas nyon mongs ma lus 'joms/'joms phyir drag po'i sgra yis bshad// 'dod chags kun rtogs ye shes te// spyi dang rang gi mtshan nyid rnams// mkhyen tshad gtso cher bshad pa'i phyir// so sor rtogs pa'i le'u bshad// nga rgyal mnyam nyid ye shes te// rin chen yon tan rigs yin pas// yon tan che ba gtsor ston phyir// mnyam nyid ye shes le'u bshad// phrag dog bya grub ye shes te// sems can kun gyi don byed pas// mdzad pa rgya cher ston pa'i phyir// bya grub ye shes le'u bshad// 'phags pa 'jam dpal gyi bshad rgyud rin po che'i phreng ba las// le'u drug gi ye shes kyi 'thad pa bstan pa'i le'u ste bdun pa'o//// de nas bcom ldan 'das kyis bka' stsal pa// gsang ba'i bdag po da nyon cig/ rigs dang ye shes go rim ni// rigs drug la ni gzigs skabs su// thog mar las kyi rigs bstan pa// theg chen gzhan don gtso cher byed// sngags drug bstan pa'i skabs dag tu// thog mar pad+ma'i rigs smos la// chos kyi sbyin pa mchog yin no// gsung gis 'gro ba 'dren phyir ro// ye shes drug gi le'u'i skabs// rigs lnga ye shes lnga rnams kyi// bzhi pa'i rtsa bar gyur ba'i phyir// thog ma nyid du bstan pa yin// 'dud kyis bstod pa'i skabs dag tu// de bzhin gshegs pa'i rigs bdag nyid// chos dbyings ye shes bstan pa yin// rtog par bya ba'i yul dang phyir// thog mar chos dbyings ye shes bshad// rdo rje rnams ni rten 'brel sbyar// de las gzhan pa'i ye shes lnga// rtogs bya rtogs byed dag tu sbyar// bsdus dang rgyas pa'i rim pa dag/rnam pa bzhi ru shes bya ste// dbu zhabs rdzogs pa rgyas pa yin// 'dud kyis bstod pa 'bring yin te// sngags rigs dag ni bsdus pa'i don// a zhes pa ni shin tu bsdus// bsgom mam ston yang mchog yin no// 'phags pa 'jam dpal gyi bshad rgyud rin po che'i phreng ba las// rigs dang ye shes kyi go rim gyi le'u ste brgyad pa'o//// bcom ldan 'das kyis bka' stsal pa// gsang bdag rdo rje 'chang ba nyon// 'di la dkyil 'khor rnam grangs ni// bsdus dang 'bring dang shin tu rgyas// rnam pa gsum du shes par bya// bsdus pa ye shes sems dpa'o// 'jam dpal ye shes sems dpa' yi// ming ni yang dag brjod pa'i mchog/ 'bring ni rigs lnga 'khor dang bcas// phyag rgya bzhi bcu tham pa'o// sangs rgyas sku lnga'i bdag nyid can// rgyal ba rigs lnga yab yum dang// sems dpa' sems ma sgo ba dang// nyan thos 'jig rten gtso bo kun// dkyil 'khor rgyal po 'di ru 'dus// 'phags pa 'jam dpal gyi bshad rgyud rin po che'i phreng ba las// dkyil 'khor lha'i bye brag bstan pa'i le'u ste dgu pa'o//// bcom ldan 'das kyis bka' stsal pa// gsang bdag rdo rje 'chang ba nyon// zab mo'i gdams ngag bshad bya ba// rnam pa dgu ru shes bya ste// rten gyi gang zag rtogs pa'i rkyen// rtogs thabs rtogs pa'i lta ba dang// bsgom dang sa mtshams rgyu mtshan dang// 'bras bu thugs rje'i mdzad pa'o// 'di la 'jug par byed pa yi// gang zag mtshan nyid bcu gcig ste// dad brtson shes rab snying rje dang// the tshom med dgus 'chi ba dran// gtong phod sgyu med dang tshul bzang// byang chub mchog gi rigs yin pas// dad cing gus la man ngag sbyin// lung rigs man ngag rtogs pa'i rkyen// thabs ni thos bsam rnam pa gnyis// lta ba bshad sgom sngar bshad mtshungs// de yang chos sku'i rang bzhin te// skye 'gag med pa'i mtshan nyid can// kun tu bzang po'i ngo bo nyid// dge mi dge las grub pa min// mi 'gyur kun 'gro khyab pa'o// mtshan nyid yongs su dag pa'i rgyu// gsal bar snang ste brtags na stong// rang ga rang rig 'dus ma byas// skyon bral bde ba chen po'i ngang// rang bzhin dngos med stong pa'i dbyings// yon tan ma 'gags cir yang yin// chos nyid nam mkha' chen po ste// thogs pa'i reg bya kun dang bral// thog ma med pa spros med bdag/ de bzhin nyid bdag dag pa'i bdag/ cho 'phrul sna tshogs cir yang snang// thabs kyi thugs rje 'gag pa med// sangs rgyas kun gyi rang bzhin 'chang// snang tshad thams cad 'jam dpal sku// grag tshad thams cad 'jam dpal gsung// dran rtog thams cad 'jam dpal thugs// sangs rgyas kun gyi thugs che ba// sangs rgyas kun gyi thugs la gnas// sangs rgyas kun gyi sku che ba// sangs rgyas kun gyi gsung yang yin// bsgom pa'i thabs la rnam lnga ste// gnas lugs shes bya la brten nas// skye med don la bsgom pa dang// snang ba yul la brten nas ni// rang grol nyams su blang ba dang// brtol skyes yid la brten nas ni/ thug phrad lam du bya ba dang// dkyil 'khor dag la brten nas ni// lha snang lam du khyer ba dang// rtsa rlung dag la brten nas ni// bde ba lam du bya ba'o// mngon sangs rgyas pa'i sa mchis kyang// phal cher srid pa bar ma dor// dbang po rab la bar do med// 'bring ni srid pa'i bar dor grol// tha ma la ni las 'phro 'thud// de yang rgyu mtshan drug yin te// snying po kun la khyab phyir dang// ma nor rtogs nyid bya phyir dang// rnal 'byor goms par bya phyir dang// 'da' kar nyon mongs ma dkrugs phyir// lus gnyis sgrib g.yogs bral phyir dang// khyad par dran pas gsal phyir ro// mthar thug 'bras bu bshad bya ba// sku gsum dang ni ye shes lnga// thugs rje mdzad pa'i khyad par ni// rgyun chad med par chu bo ltar// byed pa sems can kun don byed// ngag don bkod pa'i tshogs dag kyang// dang po gzhal bya dgod pa dang// bar du zhi ba tshogs rnam par bshad pa dang// tha ma rjes bzlas bdag don rig/ 'phags pa 'jam dpal gyi bshad rgyud rin po che'i phreng ba las// zab mo gdams ngag gi gnad bstan pa dang bka' tshoms bshad pa'i thabs kyis mjug bsdu bar bstan pa'i le'u ste dgu pa'o//// le'u dgu yis bstan pa'o// mtshan yang dag pa'i bshad rgyud rin po che'i phreng ba zhes bya ba rdzogs so//// 'phags pa 'jam dpal gyi mtshan yang dag par brjod pa'i bshad rgyud rin po che'i phreng ba zhes khog don bka' tshoms rnam par bshad pa// rgya gar gyi mkhan po bi ma la mi tra dang// bod kyi lots+tsha ba gnyags dz+nyA na ku mA ras bsgyur cing zhus te gtan la phab nas bod kyi yon bdag rje rgyal po la gtad pa'o/

CLOSE WINDOW