CLOSE WINDOW

Gpb006.016
བོད་ཡིག

rgya gar skad du/ de ba tan+t+ra rat+na ku Ta nA ma/ bod skad du/ lha rgyud rin po che spungs pa zhes bya ba/ dpal kun tu bzang po la phyag 'tshal lo// 'di skad bdag gis thos pa'i dus gcig na/ bcom ldan kun tu bzang po yis// ye grol ye shes rang la shar// phyi nang med pa'i zang thal gnas// chen po lnga yi bstan pa la// rang snang chen po rnam dag yin// de yang thog ma med pa'i dus// gzhi gsum dbyer med lhun gyis grub// yang dag ye shes snang ba dang// dag pa 'jig rten snang ba dang// ma dag 'khrul pa'i snang ba gsum// dbyer med lhun gyis grub pa yin// yang dag ye shes snang ba ni// sku gsum rang snang lhun gyis grub// de yang phyogs su ma lhung rgya ma chad// dag pa 'jig rten snang ba yin// 'od lnga la sogs lhun gyis grub// de yang phyogs su ma lhung rgya ma chad// ma dag 'khrul pa'i snang ba yang// 'gro drug la sogs lhun gyis grub// de yang phyogs lhung med pa yin// chos nyid gdal ba'i pho brang na// kun gzhi spyi sa mi zad gter// gter gyi 'byung gnas rin chen gling// ga bur lta bu'i gzhi ma yin// phyogs med chen po'i snang ba yin// zhes gsungs so// de nas gsang ba'i bdag po des// bcom ldan 'das la phyag 'tshal nas/ spyi sa de ltar yin pa la/ de las 'khrul pa ji ltar lags// kun bzang sangs rgyas ji ltar lags// byin rlabs 'byung ba ji ltar lags// 'khrul par snang ba ji lta bu// ldog bcas chos de gang la gsungs// zhes zhus so// lha rgyud rin po che spungs pa las/ gleng gzhi'i le'u ste dang po'o//// de nas bcom ldan kun bzang gis// de las 'khrul pa bstan pa ni// kun gzhi gter gyi 'byung gnas la// lhun grub yon tan phyogs med klong// dper na rgya mtshor chos mthun pa// rang byung rlung gi rta phos bskyod// ma ning rnam gsum yid 'gyus pas// 'gyu ba rlung gi mig can de// rang snang 'od lnga'i lam du zhugs// nga nyid mkhyen pa'i shes rab yin// rnam gsum shes pas shes rab mchog/mchog gi sku gsum rang la shar// 'das pa lnga yi klong du grol// gsum sel sgrib pa kun las grol// sangs rgyas lnga bdag cod pan can// ye shes 'ba' zhig las byung ba// mgon po kun gyi yab mes yin// kun tu bzang po blo gros bzang// thog ma'i sangs rgyas 'od dpag med// sangs rgyas kun gyi gtso bo yin// nga med pa y-i sngon rol na// sangs rgyas bya ba'i ming yang med// ye shes bya ba'i ming yang med// chos sku bya ba'i ming yang med// chos las grol ba'i sangs rgyas yin// thig le chos min ye shes klong// bya btsal med pas rang grol y-in// rang byung rang gi 'od snang sangs// 'das pa lnga ru rgyas pas mchog/don gyi ye shes khong nas shar// ye shes khong shar mig phyed pas// ye shes mig can dri ma med// ma rig sgo nga'i sbubs 'byed pa// rang byung yid kyi shes rab kyi// 'gyu ba'i ling tog gser gyi thur mas phyed// mig gi dbang po so sor ma 'gag pa// so sor rtog pa'i ye shes yin// rang bzhin med pa'i zang thal de// chos kyi dbyings kyi ye shes yin// de nyid rang gsal chen por shar/ me long lta bu'i ye shes yin// phyi nang med par mnyam pas na// mnyam pa nyid kyi ye shes yin// thams cad ma lus lhun grub pas// bya ba grub pa'i ye shes yin// ye shes yin pas rtsol bsgrub med// yon tan ye shes lnga dang ldan// 'bras bu sku gsum khong nas shar// mchog gi dang po sku gsum 'chang// sku gsum rang grol lam gyi mchog/ ye shes rang shar rig pa'i mchog/ 'das pa lnga po 'bras bu'i mchog/ ye shes zang thal gdams pa'i mchog sangs rgyas kun gyi dgongs pa yin// zhes gsungs so// lha rgyud rin po che spungs pa las/ kun tu bzang po rang snang gi le'u ste gnyis pa'o//// de nas gsang ba'i bdag po yis// 'gro drug ma dag 'khrul pa ji ltar lags// zhes zhus pas/ kun tu bzang pos bka' stsal pa// thog ma med pa'i gzhi ma de// de yod pas na 'gro drug kyang// mi 'khrul pa yi rang dbang med// de yang ji ltar 'khrul zhe na// kun gzhi'i rlung chen ma 'gags pas// ma ni rlung gi 'khrul pa yin// de yang kun gzhi spyan yin te// gzhi gsum dbyer med spyan chen po// gyen dang thad ka thur du gzigs// gzigs pa'i spyan gsum khong nas shar// thur du gzigs pa 'gro drug spyan/ 'gyu ba'i spyan gyis kun tu blta// 'od lnga lam gyi rta pho la// chags sdang lnga yis 'khrul pa yin// las ni lung ma bstan gyi las// rgyu rkyen dus mtshungs rgyu ltar 'khor// ma rig 'dam du bying ba yin// dmyal ba la sogs 'gro drug 'khrul// las kyi 'bras bu lung ma bstan// tshe tshad la sogs dus la nges pa med// de ni thur du gzigs pa'i spyan// zhes gsungs so// lha rgyud rin po che'i spungs pa las/ 'gro drug rang snang gi le'u gsum pa'o//// de nas gsang ba'i bdag po yis// 'gro drug 'khrul pa ji ltar bzlog/ ces zhus pas/kun tu bzang pos bka' stsal pa// 'gro drug 'khrul pa bzlog pa ni/ ngo bo nyid kyi byin rlabs ni/ chos kyi sku yi byin rlabs so// de yi byin rlabs rdo rje sems dpa' khyod// de yi byin rlabs snang ba thub pa drug/thun mong ldog pa'i ston pa yin/ khyad par bka' brgyud byin brgyud dang// thugs su brgyud pa'i ston pa gsum// thugs rje chos kyi 'khor lo ni// byin gyis brlabs kyi bskor ba yin/ mchog gi sku gsum rang snang bas/ye shes rang snang 'khor lo bskor// rtog pa ye shes 'khor lo yin// chos kyi 'khor lo phyi nang gsang ba gsum// de don rtogs pa'i byin rlabs brgyud pa yin// nyi ma'i snying po zer dang 'od// zla ba lteng ka'i gzugs snang ba// tha dad du mar mthong ba ltar// sku gcig yongs la snang bas sprul sku yin// ye shes phyogs med shar bas thugs rje 'od po che// kun la snyoms pas thugs rje phyogs med shar// zhes gsungs so// lha rgyud rin po che spungs pa las/ byin rlabs 'byung ba bstan pa'i le'u ste bzhi pa'o//// de nas gsang ba'i bdag po yis// rgyud lung 'byung ba ji ltar lags// de yi ngo sprod ji ltar bgyi// zhes zhus pas// bcom ldan 'das kyis bka' stsal pa// rang bzhin byin rlabs ngo bo'i rgyud/ rang bzhin rgyud la rnam pa gnyis// nges pa'i rgyud dang don gyi rgyud// nges rgyud sangs rgyas dgongs pa yin// rgyun du mi 'gyur rgyud kyi mchog/ de don thugs la gang gnas pa// don rgyud chen po yin par bshad// byin rlabs rgyud la rnam pa gsum// ngo bo nyid kyi byin rlabs dang// rtsol dang bcas dang rtsol med dang// rang bzhin byin rlabs rnam pa gsum// ngo bo byin rlabs rang snang yin// rtsol med byin rlabs thugs rje'o// rtsol bcas byin rlabs gdams pa'o// rang bzhin byin rlabs kun la 'jug/ de don gtan la gang 'bebs pa// man ngag kun gyi mchog tu bshad// de don thugs la gang gnas pa// lung rnams ma lus thugs la gnas// rgyud lung man ngag dbyer med pas// thig le ye shes brtsegs pa yin// zhes gsungs so// lha rgyud rin po che spungs pa las/ byin rlabs kyi rgyud bstan pa'i le'u ste lnga pa'o//// de nas gsang ba'i bdag po yis// bcom ldan kun tu bzang po la// rtsol med byin rlabs ji ltar lags// zhes zhus pas/ bka' stsal pa/ byin rlabs dbang las 'jug pas na// dbang gi gdams pa bshad par bya// dbang la phyi nang gsang ba gsum// lha dbang ye shes sku yi dbang// chos dbang rig pa sems kyi dbang// rtsol med ye shes thig le'i dbang// de 'dod pa yi gang zag gis// lus srog bu smad 'khor rdzas kun// byin rlabs zhu ba'i yon du dbul// sbyin pa bsam gyis mi khyab pas// dbang bskur nus pa'i bla ma la// yon phul yon tan bsam mi khyab// slob dpon gdams pas ma brgyan pa// de 'dra'i slob dpon bsten min te// de bsten byin rlabs 'byung mi 'gyur// slob ma shes rab ma brgyan cing// gdams pa gzung mi thub pa ni// de ni slob ma snod min te// de la byin rlabs 'jug mi 'gyur// ja log pas ni don kun 'grub// lha dbang ye shes dbang bskur bas// mig gi gzugs snang ma 'gags pas// rnam par snang mdzad gzugs kyi dbang// chos kyi dbyings kyi ye shes yin// de yis don la bskyod med pas// rdo rje sems dpa' mi bskyod pa// me long lta bu'i ye shes yin// de yi yon tan rtsal snang ba// snang ba mtha' yas 'od dpag med// so sor kun tu rtogs pa yin// yon tan phyogs ris mi mnga' bas// rin chen 'byung ldan 'od 'phro bas// mnyam pa nyid kyi ye shes yin// thams cad rang byung grub pas na// don yod grub pa rdo rje'i snying po yin// bya ba grub pa'i ye shes zhes kyang brjod// rna ba mi bskyod lce ni 'od dpag med// sna ni rin 'byung 'og sgo don grub sku// lnga ldan ye shes rang la snang bas na// lha dbang ye shes sku yi dbang bskur yin// 'byung ba lnga yi gzugs stong pas// nam mkha' dbyings phyug chos kyi dbyings// de yi ngo bo sangs rgyas spyan// 'od gsal ye shes me long lnga// yon tan rtsal smin gos dkar mo// so sor rtogs pa'i ye shes rdzogs// yon tan thams cad 'dus pa mA ma kI// kun la yangs dog med pas mnyam pa nyid// de yi don la 'da' med pas// dam tshig sgrol ma zhes bya'o// thams cad gcig tu grub pas bya ba grub// ye shes thams cad rdzogs pas 'khor lo yin// 'gyur ba med pas rdo rje yin// skyon gyis ma gos pad+ma yin// thams cad 'byung bas rin po che// kun la khyab pas rgya gram me// thams cad rdzogs pas seng ge yin// ma lus theg pas glang po che// dug lnga sku ru shar bas rma bya yin// thams cad shugs las grol bas rta mchog yin// thog med spyan chen mnga' bas mkha' lding yin// de yi don rtogs rtsol med dbang bskur yin// mi 'da' ba yi rgya zhig thob la zhog/ chos sku dri ma med cing gzugs sku med// 'gyur med gser mdog 'jam dpal sku// de don lag tu gtad pas 'gyur med rtogs// phrin las thams cad rdzogs shing dbang thob pas// mi shigs bcom ldan rdo rje'i sku// ye shes spyan chen rang la shar bas na// spyan ras gzigs dbang seng ge rnam par brtsegs// 'khor ba ma bcos rang grol 'od gsal ba// rdo rje mi g.yo'i sku ste rang byung yin// thugs rje kun la 'phro bas 'od zer can// sangs rgyas byin rlabs phog pas sgrol ma yin// snang ba lhug par snang bas phag gdong ma// shes rab khong shar ral gri yin// ye shes zang thal rdo rje dang// sku gsum byin rlabs snang ba phreng ba dang// yon tan sna tshogs gcod pa'i ral gri dang// chos sku yon tan rgyas pas ut+pal// yon tan gter 'chang bum pa dang/ sku gsum rang la gnas pas kha T+wAM ga/ thams cad rang la rdzogs pas dbang chen thob// ces gsungs so// lha rgyud rin po che spungs pa las/lha dbang lus la bskur ba dang/ rtsol med rang snang du bstan pa'i le'u ste drug pa'o//// de nas yang bka' stsal pa/ rtsol bcas lha dbang bstan pa ni// dang po bum pa'i dbang yin te// bum pa lha yi grangs dang mthun// de la dbang lnga rdzogs pa ni// bum pa gzhal yas khang yin pas// b+h+ruM las gzhal yas khang du bskyed// de yi nang du bum rdzas blugs// gdan dang bskyed dang spyan 'dren bstim// 'dzab dang bsnyen bsgrub byas nas ni/ de nas 'od du zhu nas ni// spyi bo dag nas dbang bskur ba// bum pa'i dbang zhes brjod pa yin// lus kyi sgrib pa dag par byed// bum pa bum rdzas bskyed bya thabs kyi dbang// lha rnams bkug bstim sbyor ba mdzad// shes rab dbang du bstan pa ni// sbyor ba byang chub sems kyi chu// ye shes dbang du bstan pa yin// rdo rje lce steng bzhag pa yis// ngag gi sgrib pa dag par byed// lha la ye shes rgyas btab nas// skye ba med par bstan pa ni// tshig gi dbang du brjod pa yin// sems kyi sgrib pa dag par byed// ces gsungs so// lha rgyud rin po che spungs pa las/ bum pa'i dbang gi le'u ste bdun pa'o//// de nas yang bka' stsal pa/ thabs dang shes rab dbang la rnam lnga ste// pha ni thabs kyi rang bzhin te// lus kyi bum pa snang ba yin// skra dang lus rgyan lus po ni// sku gsum dag pa'i snang ba'o// sgo lnga 'bru lnga ye shes lnga// phung po lnga ni rin chen sna lnga yin/ rang byung bdud rtsi sman lnga'i ngo bo la// rnam shes lnga ni dri lnga yin par bshad// byang chub sems ni bdud rtsi 'o ma chu// dbugs ni gzungs thag thugs rjais 'brel// de ni bum pa'i dbang yin no// rang la snang ba thabs kyi dbang// de ltar shes pas shes rab dbang// ye nas grub pa ye shes dbang// de mtshon pa ni tshig dbang ngo// shes rab dbang la rnam pa lnga// b+ha ga bum pa'i rang bzhin no// rak+ta bum rdzas rang bzhin no// rtsa gsum nyed pa thabs kyi dbang// zung 'jug stong pa shes rab dbang// bde ba'i ye shes gsang ba'i dbang// ngag gis brgyan pa tshig dbang ngo// zhes gsungs so// lha rgyud rin po che spungs pa'i rgyud las/ thabs dang shes rab kyi dbang bstan pa'i le'u ste brgyad pa'o// de nas yang bka' stsal pa// gsang ba'i dbang la rnam lnga ste// rdo rje bum pa chos kyi sku// rtsa gsum brgyan pa longs sku yin// thig le sprul pa'i sku ru bshad// bde ba chen po bum rdzas yin// de ni bum pa'i dbang yin no// yig 'bru bkod pa thabs kyi dbang// lha rnams sbyor ba mdzad pa ni// b+ha ga stong pa shes rab dbang// byang chub sems 'phros gsang ba'i dbang// rgyas gdab pa ni tshig dbang yin// ye shes sa bon dgug pa dang// dam tshig sa bon bskyed pa dang// sbyor ba gnyis med bstim pa dang// bde ba'i mchod pa 'bul ba dang// mchod pa phyogs bcur spro ba dang// de rnams rgyas su gdab pa ni// rtsol ba dang bcas dbang zhes brjod// ces gsungs so/ lha rgyud rin po che spungs pa las/ gsang ba'i dbang gi le'u ste dgu pa'o//// de nas yang bka' stsal pa// nyon cig gsang ba'i bdag po khyod// tshig gi dbang la rnam lnga ste// snang srid tshig tu ston pa ni// dngos po sna tshogs gzugs snang ba/ 'byung ba lnga ni bum par bshad/ kha dog sna tshogs bum pa'i rgyan// dbyings su snang ba mgul chings yin// 'du 'bral med pa gzungs thag yin/'gro drug longs skur cir snang ba// bum pa'i rdzas su bstan pa ni// de ni bum pa'i dbang yin no// snang srid bsdus nas lam du bslang// snang ba rang byung ye shes shar// bla ma'i gdams pas phyogs med grol// rang snang ye shes 'phel 'grib med// phyi nang med pa ye shes sku// ye shes sku ste rang byung ba// de ni thabs kyi dbang mchog yin// da ni shes rab dbang bstan pa// thugs rje 'gag pa med pa de// yid 'gyus snang srid sems su shar// gzung 'dzin rtsa ba ma rig can// gnyis med rig pa phyi nang med// ye shes shes rab zang thal bas// ye shes shes rab zang thal de// tshad ma khong nas shar bas na// mi bslu ba yi gtan tshigs yin// yid ches nges pa'i dbang du bshad// da ni ye shes dbang bshad de// ye ni kun gzhi spyi sa yin// shes pa gzhi las grol ba'o// grol ba gzhan rkyen ma yin te// rang rkyen shes pas grol bar bstan// me long byad kyi dpe bzhin no// thig le ye shes khong nas shar// phar bltas pas ni tshur la gsal// ye shes zang thal kho na yin// ma bcos pa yi zang thal la// ma byas pa yi rang byung shar// rang grol sbrul gyi mdud pa ltar// rang grol dug lnga khong du grol// rtse gcig zang thal chen por slebs// da ni tshig dbang don bshad de// nor bu rin chen gling dag na// sa rdo la sogs ming yang med// gdams pa'i tshig dbang thob pas na// 'khor ba bya ba'i ming yang med// 'khor ba thig ler dbang bskur bas// rma byas ha la bza' ba 'dra// spu kha sna tshogs mdangs dang ldan// de bzhin dug gi dbang bskur na// 'dre dang nad kyis mi tshugs so// de bzhin dug lnga'i dbang bskur na// 'khor ba'i dgra yis mi tshugs so// thig le ye shes ngo bo rtsal// las dang de bzhin gnas pa ni// lam dang sgo dang yon tan dang// 'bras bu rnam brgyad dbyer med pas// dpe yi ngo sprod shel gyis mtshon// rtags kyi ngo sprod tsit+ta yin// rin chen zur brgyad 'bar ba yin// don ni thig le ye shes te// rtsa chen brgyad la gnas pa yin// rtags kyi rtsa dang yon tan rtsa// rnam pa brgyad du shes par bya// de ni rten gyi gsang lam yin// ma rig pa yi gdar bcad pas// rig pa'i ye shes khong nas rdol// thig le brtsegs pa'i dbang mchog thob// tshig dbang zhes ni de la bya// 'khor ba rtsad gcod ces kyang bya// ma rig mig 'byed ces kyang bya// rig pa'i ye shes zhes kyang bya// ye shes rang shar zhes kyang bya// shes rab rang byung zhes kyang bya// ye shes thig le khong nas shar// zhes gsungs so// lha rgyud rin po che spungs pa las/ tshig dbang rin po che'i le'u ste bcu pa'o//// de nas yang bka' stsal pa// nyon cig gsang ba'i bdag po khyod// dbang bskur yon tan bstan pa ni// bum pa'i dbang bskur nyon mongs sgrib pa dag/ thabs kyi dbang bskur las kyi sgrib pa dag/ shes rab dbang bskur shes bya'i sgrib pa dag/gsang ba'i dbang bskur ngo bo'i sgrib pa dag/ tshig gi dbang bskur rnam smin sgrib pa dag/ bum dbang bskur bas sprul sku 'thob// thabs kyi dbang bskur longs sku 'thob// shes rab dbang bskur chos sku 'thob// gsang ba'i dbang bskur ye shes sku// tshig gi dbang bskur rang grol 'thob// dbang ma bskur bar chos 'chad pa// long bas long ba khrid pa 'dra// slob dpon tshad mar ma gyur pas// gdams pa med par dbang bskur byed// sngags med dug la rngub pa 'dra// slob ma tshad dang mi ldan pas// dbang bskur nod pa byed pa de// sbrang ma me la mchongs pa 'dra// slob dpon tshad ldan dbang bskur na// bdud rtsi'i longs spyod spel ba 'dra// slob ma tshad ldan dbang nod pa// bya rgod gnam 'phang gcod pa 'dra// zhes gsungs so// lha rgyud rin po che spungs pa las/ dbang bskur ba'i yon tan dang skyon bstan pa'i le'u ste bcu gcig pa'o//// de nas yang bka' stsal pa// gsang ba'i bdag po khyod nyon cig/ lta ba rig pa rang rtsal bstan pa ni// lta ba skye med rnam par dag/ rang bzhin chos sku brjod las 'das// gnyis med rang snang ma bcos pa// chos nyid skye med shes bya'i gshis// sems nyid ma bcos blo las 'das// sems nyid stong pa chos kyi sku// nam mkha' lta bu'i chos nyid las// nyi zla skar tshogs ma 'dres rdzogs// tshogs rdzogs rang byung lta ba'i mchog/ dngos po med pa rang sar grol// rang grol 'ub chub lta ba'i klong// lta ba klong chen mtha' grol yin// lta ba rig pa'i dbang thob na// skye ba med pa'i dgongs pa thob// bsgom pa rig pa rang rtsal dbang// mtshan bcas bsgom dang mtshan med bsgom// dang po ma shar shar bar byed pa la// nam mkha' stong pa'i mkha' dkyil bsgom// de las hU~M zhu rdo rjer bsgom// rdo rje 'od zhu rdo rje sems dpar bsgom// sku mdog dkar po gangs rir nyi shar 'dra// g.yas na rdo rje rtse lnga bsnams// g.yon pas dril bu dku ru brten// rgyan rnams kun gyis brgyan par bsgom// oM badzra sa twa hU~M/ dbang po 'bru lnga thugs kyi yang snying bzla/ badzra A har hU~M/ d+hU pe hUM/ puSh+pe hUM/ A lo ke hUM/ gan+d+he hUM/ ne bi te hUM/ shab+ta rat+na hUM/ zhes mchod pas/ 'gro drug zhu nas bdag zhu ste// spyi gtsug rdo rje sems dpar thim// rdo rje sems dpa' 'od du zhu// rdo rje dkar po rtse lngar gyur// rdo rje 'od zhu hUM la thim// hUM gi zhabs bskyed zhu nas ni// 'a yang 'od du ltems kyis zhu// de nas ha yang 'od du zhu ba yis// de yang zla ba dag la thim// zla ba 'od zhu thig le la// thig le 'od zhu ye shes zang thal bsgom// de ni thig le khong shar yin// mtshan bcas sku yi bsgom pa'o// thugs kyi phyag mtshan bsgom pa ni// dang po rang gi sems nyid stong par bsgom// de yi ngang las rdo rjer bsgom// rdo rje'i nang du rang nyid ni// rang gsal 'phro ba med par bsgom// de yis thugs kyi bsgom pa rdzogs// da ni gsung gi bsgom pa bstan// dang po rang byung sems nyid stong// mtshon pa'i hUM yang sngon du bri// de la shes pa gtad la bsgom// de nas shes pa hU~M du bsgom// hU~M la shes pa tshud pa ni// sems zin pa yi tshad yin no// de nas snang ba sna tshogs kun// hU~M du mi 'gyur rang dbang med// hU~M de zhu nas rang gsal zang thal bsgom// des ni gsung gi dgongs pa rdzogs// A+oM dang AHdang hU~M dang ni// 'khor lo rdo rje pad+ma dang// yig 'bru gang yang rung ba la/ spro dang bsdu ba byas gyur na// mtshan bcas bsgom pa rdzogs pa yin// zhes gsungs so// lha rgyud rin po che spungs pa las/ lta bsgom rig pa rang rtsal gyi le'u ste bcu gnyis pa'o//// de nas mtshan med bsgom pa bstan pa ni// nyon cig rdo rje sems dpa' khyod// rang gi byang chub sems nyid ni// stong gsal khyab pa'i don de ni// rang gi snying gi dkyil du bsgom// gzung 'dzin rnam pa skyes pa'i tshe// de nyid stong pa nyid du bsgom// de nas shes pa gsal gdab la// mar me lta bur bsgom par bya// gzings thog bya 'phur slar la ldog/ 'phro ba stong par bsgoms pas gzung 'dzin ldog/dper na chu la 'khyags zhu bzhin// dug lnga bsgoms pas gzung 'dzin 'jig/ dper na nam mkha' sprin dngas bzhin// rtog pa skye med bsgoms pas grol bar 'gyur// bya ba btang pa'i skyes bu bzhin// lhang nge ma bcos ngang la bzhag/ stong nyid 'od gsal bsgom par bya// dang po snga dro nas brtsams nas// tshogs drug 'od gsal bsgom par bya// shes pa 'khyog pa bsrangs nas ni// lus kyis ngal dub sha chang spang// dkar gsum dag la brten pa ni// thun dgur bcad la bsgom par bya/ khams dang sbyar zhing bsgom pa ni// srod nas brtsams te bsgom pa la/ 'gyu ba 'od gsal bsgom par bya// thun dang khams rnams gong dang mthun// spyod pa 'od gsal kho nar bya// gung la 'gyu ba rjes med bsgom/ 'od gsal thun tshad khams dang sbyar// rmi lam 'byongs na lam chen yin// 'od gsal sgyu lus mkhas pas bsgom// sgyu lus bsgoms pas shes gyur na// de nas rig pa 'od gsal bsgom// rig pa 'od gsal shes nas ni// de nas ye shes 'od gsal bsgom// ye shes 'od gsal shes nas ni// thig le 'od gsal mthar thug bsgom// ma shar ba la shar ba bya// shar ba bogs dbyung brtan pa'i 'bras bu bstan// tho rangs rang snang 'od gsal bsgom par bya// rmis pa'i cho 'phrul rang snang 'od gsal yin// btsun mo bde skyong rmis nas ni// bu btsas lo gsum lon pa rmi// bu yang shi ste bsregs pa rmi// mya ngan chen po skyes kyang rmi// de rmis sad par gyur pa na// sdug bsngal shes pa tsam gyis grol// de bzhin rmis pa ci byung yang// 'khrul pa'i snang bar rtogs gyur na// de nyid gnyid pas bsgom pa yin// dus bzhi mnyam sbyor dgongs pa'i mchog/ bsam gtan rang grol gdams pa'i mchog/ zang zing shes pa gnad kyi mchog/ces gsungs so// lha rgyud rin po che spungs pa las/ sgom pa bstan pa'i le'u ste bcu gsum pa'o//// de nas yang bka' stsal pa// gsang ba'i bdag po khyod nyon cig/ spyod pa'i khyad par bstan pa ni// dang po lta sgom dang bcas nas// nags khrod dgon par gcig pur gnas// dur khrod wa skya grogs su btsal// lta ba gdeng chud bag tsha med// gdon pa'i smra bcad shin tu gces// bsgom pa gdeng chud nyam nga med// gang yang spyod pa'i grogs su 'gyur// sems kyi smra bcad ces bya'o// 'khu 'phrig med pa'i rang sgra sgrogs// thams cad gsung gi 'khor lor shes// gsung gi smra bcad ces bya'o// gcer bu'i spyod pas ci dgar gnas// tshogs drug lhug pa'i spyod pa yin// lus kyi smra bcad ces bya'o// 'khor ba'i rig ma mtshan ldan la// bag tsha nyam nga med par ni// ci spyod bde ba'i rlan gyis 'tsho// 'khor ba'i smra bcad ces bya'o// gdams pa gsang gnas rang don bsgrub// byin rlabs phyogs med 'char ba ni// rig pa'i spyod pa zhes bya ste/ gdams pa'i smra bcad ces bya'o// yul khyims spangs nas phyogs med 'gro// sgro dang skur ba nyam nga med// dman pa'i spyod pas 'khyams pa ni// gsang ba'i spyod pa zhes bya ste// yul gyi smra bcad rjes su brjod// phyogs bcur 'khyams shing bdud rtsi bsten// rtog pa thams cad rang sar dag/ rnam par rgyal ba'i spyod pa yin// brtul shugs spyod pa zhes kyang bya// zas kyi smra bcad ces bya'o// thams cad rang snang rang byung bas/ rtogs pas rtsi la ma rtogs bdud// bdud ni 'dre ru shar ba yin// rtsi ni lha ru shar ba yin// bdud rtsi 'byung ba'i rgyu ni rang byung yin// bsgrub pa'i bdud rtsi ma yin rang byung bdud rtsi yin// zhes gsungs so// lha rgyud rin po che spungs pa las/spyod pa'i le'u ste bcu bzhi pa'o//// de nas yang bka' stsal pa// gsang ba'i bdag po khyod nyon cig/ de ltar byas pa'i 'bras bu bstan pa ni// thig le mi 'da' ye shes klong slebs nas// mi 'gyur rdo rje lta bu'i sku thob 'gyur// lus kun las ni rab grol te// lus kyi mtha' rtogs ye shes lus// gnas kyi mtha' grol thig ler brdal// skad cig gcig gis don dang mjal// 'khor ba ma spangs gnas su dag/mya ngan 'das pa rang la shar// ye shes thig le'i rtse mor sleb// phyi nang med par dbyings dang mjal/ bgrod pa med par rang sar sleb// sbyang pa med par gnas su dag/ bsgrub pa med par 'bras bu thob// ma byas pa ru las rnams zin// ma bkrus pa ru dri ma dag/ sgron ma ma bteg mun pa sangs/ khams gsum rtsa ba de ru chod// srid gsum lo ma de ru chod// snga ma phyi ma'i bar mtshams chod// srid pa rgyas thebs chos skur shar// 'jig rten gsum gyi zam pa brgal// dbang phyug chen po'i ma mar thob// tshangs pa chen po'i me long rnyed// dga' bo 'jog po'i rin chen thob// dkar po spyan gcig shel mkhar thob// ha nu bag shu'i ral gri thob// nag po bkrag med khram bam thob// gnod sbyin kun la sgrib kyi shel sgong thob// gshin rje'i rgyal po'i lcags mkhar thob// srid pa'i rgyal mo'i gter mdzod thob// gsung mchog dmar po'i zhags pa thob// lha srin sde brgyad srog rtsa chod// chos 'khor skyong ba'i rgyal blon 'bangs dang gsum// ma lus lus pa med pa'i srog rtsa chod// lha khang zhig pas sgo lcags stor// lde mig tshig pas dbye ru med// pha spun gnyis kyis dme byas pas/ khams gsum 'khor ba'i skye rgyud bcad// rnam par snang mdzad zhing khams mthong// rdo rje sems dpa'i me long mthong// snang ba mtha' yas zhing khams mthong// rin chen 'byung ldan yon tan mthong// don yod grub pa'i zhing khams mthong// zhes gsungs so// lha rgyud rin po che spungs pa las/ 'bras bu rang sa'i le'u ste bco lnga pa'o//// de nas yang bka' stsal pa// gsang ba'i bdag po khyod nyon cig/ de rnams yon tan bstan pa ni// lta ba bstan pas chos sku thob// sgom pa bstan pas longs sku thob// spyod pa bstan pas sprul sku thob// 'bras bu bstan pas rang grol thob// lta bas dug lnga zhi bar byed// sgom pas nyon mongs zhi bar byed// spyod pas 'dre gdon zhi bar byed// 'bras bus 'dod khams zhi bar byed// lta ba rtogs pas ye shes shar// sgom pa rtogs pas nyams myong shar// spyod pa rtogs pas thug phrad shar// 'bras bu rtogs pas thig le shar// lta ba rang grol rig pa'i gnad// ye shes zang thal dbang po yin// bsgom pa rang grol gdams pa'i gnad// nyams myong 'od gsal dbang po yin// spyod pa rang grol thabs kyi gnad// gnyis med rang shar dbang po yin// 'bras bu rang grol ye shes gnad// rig pa yul med dbang po yin/nyams myong ye shes 'char ba la// gzung 'dzin gnyis kyi lam sna la// gnyis med ngo sprod dbang po gces// ma rig 'khor bar 'khyams pa la// rig pa'i ye shes ngo sprod dgos// 'gyu ba sna tshogs 'khrul pa la// ye shes ngo sprod phyogs med dgos// 'khor ba'i rtsa ba nyon mongs yid// rang grol shes rab ngo sprod dgos// de ni ngo sprod rnam pa bzhi// 'gyu ba ngang sangs shar grol ba'i/ kha mig 'khyar dang gzer thebs pas// sgo dang dbang dang gzer lta bu// de ni dbang bskur 'dus pa yin// zhes gsungs so// lha rgyud rin po che spungs pa las/ yon tan dang 'bras bu dmar khrid kyi le'u ste bcu drug pa'o//// da ni rig pa ye shes rtsol med dbang bstan gyis// nyon cig gsang ba'i bdag po khyod// thig ler rang byung dbang bskur bas// brda' dang rtags dang don du bstan// spyi ni brda yi dbang bstan pa// rin chen man shel zang thal de// byas pas ma byas rang byung yin// man shel zang thal yin pa ni// thig le zang thal yin pa'i brda'// shel gyi ngo bo 'od gsal ba// thig le 'od gsal yin pa'i brda'// shel la zur drug shar ba ni// 'gro drug rang sar grol ba'i brda'// shel la thel drug byung ba ni// thig le zur grwa med pa'i brda'// man shel mthing gar shar ba ni// thig le 'gyur ba med pa'i brda'// man shel gzhi la 'od gnas pas// thig le'i yon tan ma 'gags brda'// shel ni dri med rang byung bas// chos sku dri ma med pa'i brda'// shel gyi snang ba ma 'gags pas// longs sku gzhi la gnas pa'i brda'// man shel de la 'od shar bas// sprul skus 'gro don byed pa'i brda'// spyan gsum ye shes rnam pa gsum// ston pa gsum gyi brda' yin no// da ni rtags kyi brda' bstan te// tsit+ta khong stong zang thal de// thig le ye shes rang byung rtags// snying la rtsa bzhi zang thal ba// thig le zang thal yod pa'i rtags// snying stong dkar por 'dug pa ste// thig le 'od gsal yod pa'i rtags// tsit+ta zur drug 'bar ba ni// 'gro drug g.yang sa gcod pa'i rtags// snying la thel drug byung ba ni// thig le chos min yod pa'i rtags// snying mtshams chos nyid rtsas mtshon pa// thig le 'gyur med yod pa'i rtags// tsit+ta zur brgyad 'bar ba ni// thig le'i yon tan ma 'gags rtags// snying ni zur gsum dbyibs su shar// sku gsum rang la grub pa'i rtags// snying la stod smad dbus dang gsum// spyan gsum rang la yod pa'i rtags// thig le ye gnas rang la grub// de ltar shes na dbang gi rgyal po yin// de ltar shes na dbang bskur bla ma yin// btsal mi dgos pa mchog gi dbang// thig le ye nas yod pa dbang gi rgyal po yin// rig pa rang gnas dbang gi rdzas su bshad// rig pa rang gnas dbang gi bskur thabs yin// thig le rang shar dbang gi 'bras bu yin// tsit+ta bum pa'i dbang zhes brjod// mig la spyan gyi ngo sprod pas// de ni thabs kyi dbang zhes brjod// yid la shes rab ngo sprad pas// de ni shes rab dbang zhes brjod// 'gyu ba ye shes ngo sprad pas// gsang ba'i dbang zhes de la bya// ma rig ye shes zang thal la// gzung 'dzin thig le khong nas shar// tshig dbang rin po che zhes brjod// ces gsungs so// lha rgyud rin po che spungs pa las/ thig le dang ye shes kyi dbang gi le'u ste bcu bdun pa'o//// de nas yang bka' stsal pa// gsang ba'i bdag po khyod nyon cig/ spyan gyi dbang bskur bstan pa ni// thog ma gter gyi 'byung gnas na// lhun gyis grub pa'i spyan gnas te// gsal ba gzhan dbang ma gyur rang gsal spyan// de ni thabs kyi spyan yin no// 'gag med gzhan dbang ma gyur pa// de ni shes rab spyan yin no// zang thal gzhan dbang ma gyur pa// de ni ye shes spyan gyi gzhi// de gsum dbyer med dbang yin pas// lhun grub yongs su rdzogs pa'i spyan// de ni gzhi yi spyan gyi dbang// de nas lam gyi dbang bstan pa// dpe don rtags kyi dbang bstan no// dper na rin chen man shel te// spyan gsum dbang gi dpe yin no// rtags ni mig la shar ba'o// spyi yi rtags dang don du 'brel// nang gi dbang rtags snying yin no// don gyi rtags dang sbyar ba gces// phyi yi dbang rtags mig yin no// ngo sprod byas te rtags su bstan// mig g.yas chos kyi spyan gyi rtags// g.yon pa shes rab spyan gyi rtags// mdzod spu ye shes spyan gyi rtags// don gyi spyan gsum 'gyu ba'i mig/ 'gyu ba'i spyan la ngo sprad na// spyan gyi dngos grub thob par 'gyur// rna ba g.yas pa chos kyi spyan// g.yon pa shes rab chen po'i spyan// mig ni ye shes spyan yin no// rna ba chos nyid rtsa gnas pa// sgro 'dogs gcod pa'i ngo sprod bya// mig la ye shes rtsa gnas pas// zang thal rtogs pa'i ngo sprod bya// snying la shes rab rtse gnas pas// ye shes ngo sprod shin tu gces// glo sgang gnyis la rtsa gnyis gnas// gzung 'dzin gnyis snang blo yi rtsa// mid bar dbus kyi rtsa gnas pa// sems kyi rta pho byed pa'i rtsa// snying mtshams thugs kar 'brel pa'i rtsa// dbugs chen dbugs med so mtshams yin// snying la rtsa chen brgyad gnas pa// thig le ye shes brgyad kyi rtsa// mgrin pa rtsa lnga 'od gsal ba// bar do 'od du 'char ba'i rtsa// thig le btsan thabs rtags su bshad// mdzod spu thig le zang thal rtsa// 'das pa lnga yi rtsa yin no// zhes gsungs so// lha rgyud rin po che spungs pa las/ spyan dang rtsa'i le'u ste bco brgyad pa'o//// de nas yang bka' stsal pa// gsang ba'i bdag po khyod nyon cig/ sku gsum dbang bskur bstan pa ni// snying ga 'od dpag med pa'i dbang// dpag med ye shes yon tan dbang// ye nas yod pa'i dbang yin no// ma bskur spyad par mi nus te// bskur bas thob pa'i dbang yin no// chos gsum 'dus pa 'od dpag med// kun tu bzang po'i dgongs pa yin// de la glo mtshams 'od srungs ni// rdo rje sems dpa' khong shar yin// glo ba'i mthil du mar me mdzad// dga' rab rdo rje rig pa rang grol yin// ston pa sku gsum rang la gnas// ye nas gzhi la grub pas na// sku gsum dbang bskur zhes kyang bya// mgrin pa 'od srungs dbang bskur thob// mig la mar me mdzad kyi dbang// ma bskur mun pa 'thibs pa yin// bskur bas mun pa yul na med// mar me mdzad kyi dbang bskur rdzogs// bskal pa stong gi mun pa la// mar me mtheb mo tsam gyis sel// ma rig mun pa 'thibs pa la// mar me mdzad kyi dbang bskur bas// ma rig mun pa skad cig sangs// de ltar bskur ba'i dbang mchog ni// bsgrubs pas 'grub par mi 'gyur la// dpyad pas gtan la mi phebs so// brjod pas blo thog mi phebs so// thos mang tshig chogs mang pos kyang// de ni gtan la mi phebs so// ma bstan shes par mi 'gyur ro// bstan na mi 'char mi srid do// de bas 'dod pa 'byung mi 'gyur// dbang gi rgyal po sku gsum dag/ rtags kyi rgyal po bstan du yod// dpe yi rgyal po mtshon du yod// thig le'i rgyal po sprad du yod// ngo sprod rgyal po thig le rang snang yin// nyams kyi rgyal po ye shes rang snang yin// gzhi yi rgyal po lhun grub yongs rdzogs yin// 'bras bu'i rgyal po chos la grol ba yin// thugs rje'i rgyal po sku gsum rang 'khrungs yin// zhes gsungs so// lha rgyud rin po che spungs pa las// sku gsum dbang bskur gyi le'u ste bcu dgu pa'o//// de nas yang bka' stsal pa// gsang ba'i bdag po khyod nyon cig/gzhi yi skor lugs ma shes na// nor bu rin chen stor ba 'dra/ kun gzhi zhing sa lta bu la// chos kyi sgo mo zug pa rtsa ba 'dra// theg gsum gcig tu 'dril bas sdong po 'dra// theg dgu rang la shar bas gyes pa'i yal ga 'dra// chos kyi sgo mo brgyad khrir shar bas rgyas pa lo 'dab 'dra// me tog sna tshogs gsal bas longs sku 'dra// dri mchog sna tshogs 'byung bas sprul sku 'dra// 'bras bu rang sar smin pas chos sku 'dra// de ni yar gyi 'dril lugs yin// mar gyi 'dril lugs bshad pa ni// kun gzhi ma 'gags yangs pa la// nyon mongs sgo mo zug pas rtsa ba 'dra// dug gsum gcig tu 'dril bas sdong po 'dra// nyon mongs lnga ru gyes pas yal ga 'dra// nyon mongs brgyad khrir shar bas rgyas pa lo 'dab 'dra// me tog gsal la mdzes pas 'byung lnga 'dra// 'bras bu rang sar smin pas 'gro drug go/phyogs med rtogs na rdzogs chen yin// phyogs char 'dzin pa 'khrul pa yin// phyogs rtogs yang dag nyid ma rtogs// ma rtogs pa dang log par rtog/ de yis 'bras bu 'thob mi 'gyur// 'bras bu'i rdzogs lugs ma shes na// lo tog sad kyis khyer ba 'dra// mthong stong tha dad ma shes na// gol sgrib gdar sha mi chod pas// la mi zlos pa'i skyon du 'gyur// nor bu rin chen bzhag nas mching bu 'tshol ba 'dra// zhes gsungs so// lha rgyud rin po che spungs pa las/ theg pa dang 'gro drug bsdu ba'i le'u ste nyi shu pa'o//// de nas yang bka' stsal pa// gsang ba'i bdag po khyod nyon cig/ snang ba lnga la ngo sprad pa// me long nang gi byad ltar shar// snang bas gnod pa mi nus pas// snang ba dbang du 'dus pa yin// rgyud drug dag la ngo sprad pas// rig pa 'od gsal lhag mthong shar// zhi gnas dgongs pa rang sar grol// 'gro drug dbang du 'dus pa ni// dug sbrul 'gro ba'i mdud pa 'dra// ye shes 'od gsal ngo sprad pas// thig le ye shes rang la shar// 'gro drug g.yang sa dbang du 'dus// ri rab rtse mor phyin pa 'dra// lnga gsum bco lngas mig 'byed pa// dbang po'i rim pas shes par bya// phyi 'gyu 'gro drug rang snang yin// nang 'gyu lha yi rnal 'byor yin/ gsang 'gyu thig le snang thog shar// dngos gzhi gnyis po ma shes na// long bas long ba khrid pa 'dra// 'khrul gzhi 'khrul pa dngos po gsum// de yi sa mtshams ma shes na// rgyal bu rkang nas 'khyams pa 'dra// 'khor ba 'khrul pa ldog pa gsum// de yi gdams pa ma shes na// dmus long byang thang lus pa 'dra// gzhi dang tshig dang dpe thog shor// de gsum ngo yis ma zin na// jo bos ma 'chun khol po 'dra// snang rgya rig rgya gdams pa'i rgya// rgya gsum rang shar ma shes na// khyi mo nad zan byed pa 'dra// da lta 'chi ka bar do gsum// gdams pa'i rtsi yis ma thebs na// shing gi rang thag bskor ba 'dra// go ba rtogs pa chod pa gsum// de gsum tshad du ma skyol na// ma 'dzad med par gser nyo 'dra// brgyud pa gdams pa nyams dang gsum/ de gsum med par slob ma bstan// chu shing snying po bton pa 'dra// dbang dang lag len nyams myong gsum// de gsum med par dbang bskur ba// nong bus rgyal sa bzung pa 'dra// zhes gsungs so// lha rgyud rin po che spungs pa las/ ngo sprod gnad kyi le'u ste nyer gcig pa'o//// de nas yang bka' stsal pa// gsang ba'i bdag po khyod nyon cig/ngo sprod bzhi dang dus bzhi mnyam sbyor dang// sems dang ye shes dbye ba dang// rig pa'i ye shes ngo sprod pa// 'bring gi gdams pa yin par bshad// gsang lam bzhi yi ngo sprod dang// 'od gsal 'khor lo'i gzer gdab pa// snang ba 'od gsal 'khor lo bskor// gnad dang log gnon shes par bya// tshogs drug 'od gsal 'khor lo bskor// tshogs drug rang grol dbang po yin// 'gyu ba 'od gsal 'khor lo bskor/gzung 'dzin dngas pa dbang po yin// shes rab rig pa'i ngo sprod bstan// 'khor 'das ru gcod dbang po yin// ye shes dngos 'dzin dbang po ni// ye shes spyan gyis byed pa yin// spyan gsum dbang bskur byed pa la// gnas tshal bzhugs tshul rtogs tshul dang// bskur tshul 'char tshul grol tshul gyis// spyan gyi dbang bskur thob pa yin// drug gsum bco brgyad dag gis mig phye nas// chos dang shes rab spyan gyi dbang// rang dbang rang gis thob pas rgyal po yin/ ye shes gsal 'grib med pa de/ zab dang 'gags med 'gag pa med// ye shes dbang gi bskur thabs yin// shes rab thogs pa med pa de// myur dang drag dang skad cig la// bzung ste dbab dang phyir ldog pa// shes rab dbang gi bskur thabs yin// chos nyid rang grol myur ba de// myur dang gsal de skad cig la// chos kyi dbang gi bskur thabs yin// ye shes spyan gyi gnas tshul dmigs// bzhugs tshul zang thal// rab dang 'bring dang tha ma gsum// snang ba rgya yan rig pa rang grol dang// chos nyid 'od gsal chen po gsum// dbye dus phyed dus byed pa'i tshad// ma phyed skyon yon 'bras bu rnams// gdeng ldan bla ma slob ma yin// 'di 'dra rgya mtsho'i pha bong bzhin// bskal pa 'khrugs kyang khar 'byung min// rus sbal gre bar nor bu chud pa bzhin du sdoms// zhes gsungs so// lha rgyud rin po che spungs pa las// dmar khrid dmar byang dang/ don skor sangs rgyas ngo sprod kyi le'u ste nyer gnyis pa'o//// de nas yang bka' stsal pa// gsang ba'i bdag po khyod nyon cig/ 'chi ba 'chi ltas 'chi rtsis su// rlung dang thig le rtsa dang gsum// nad dang gdon dang rnam smin gsum// 'byung ba 'khrugs pa'i nad yin te// dkar na grang ba chu yi dug/dmar na tsha ba me yi dug/ mthing na bad kan nam mkha'i dug// ser na mkhris pa sa yi dug/ ljang nag 'du ba rlung gi dug/ dkar na chu yi rlung la rgyal po'i gdon// mthing nag nam mkha'i rlung la bdud kyi gdon// dmar nag me yi rlung la btsan khams gdon// ser nag sa yi rlung la dmu tshogs gdon// ljang nag rlung gi rlung la sna tshogs 'dre kun gdon// rkang mthil du dkar nag yin nam drod stor na// dmyal bar 'gro ba'i snga ltas yin// gsang bar pre dmar drod stor na// yi dwags 'gro ba'i snga ltas yin// lte bar su mthing drod stor na// byol song 'gro ba'i snga ltas yin// snying gar nr-i ser drod stor na// mi ru 'gro ba'i snga ltas yin// mgrin pa a ljang drod stor na// lha ma yin du skye ba'i lnga ltas yin// spyi bor a ljang dkar yin nam drod stor nas// lha ru skye ba'i snga ltas yin// de yang dmyal ba la sogs snang ba bsgyur// mi lus thob pa'i snang ba thams cad bshad// dbang po rgyu ltar 'khor bar byed// rlung ni lnga gsum bco lnga brtags// thig le mig gi ba thag yal// bla rtsa stor na 'chi bar bshad// gnam gyis re thag chad pa dang// chos kyi dbyings kyi rnga sgra chad// shes rab spyan gyis shes par 'gyur// ye shes spyan gyi thig le nub// rta mchog sngon po'i ga phur stor// ti tshe gangs kyi rlangs pa yal// glog lcam dmar po'i sbrang rtsi yal// rgya mtshor chu bran thams cad 'dus// dbus kyi ka ba btsan chen 'chus/ khol po bzhi po ka bzhin rengs// dpag bsam shing gi me tog yal// zhes gsungs so// lha rgyud rin po che spungs pa las// 'chi ba 'chi ltas 'chi rtsis dang rtags kyi le'u ste nyer gsum pa'o//// de nas yang bka' stsal pa// gsang ba'i bdag po khyod nyon cig/ 'chi ga'i gdams pa bstan pa ni// mthun pa'i dpe dang 'gal ba'i rkyen// rkyen gnyis dag gis 'chi ba yin// mthun rkyen 'du dus 'char ba'i dus// grol ba'i dus dang rnam pa bzhi// dbang po rab 'bring tha ma gsum// bar do yod dang bar do med// rgyal thabs spyi blug tshul du bstan// bar do yod dang 'bring dang tha ma gsum// chos nyid bar do 'khrul pa lnga// rang rkyen mthun pa'i grogs su 'char// chos nyid rang snang don gyi me long yin// mthun rkyen rang snang ngo sprod bla ma'i gdams par 'char// de ni rang snang rkyen du 'char zhes bya// 'gal rkyen 'od la chags sdang skye// de yi 'bras bu gzhan rkyen 'gro drug 'khrul// 'khor ba rnam bzhir 'khyams pa 'gal rkyen yin// rgyu ltar 'khor ba ma rig dug lnga yin// nag po ltar 'khor las kyi rnam smin yin// dkar po ltar 'khor las kyi 'bras bu yin// 'bras bu ltar 'khor grags chen sangs rgyas yin// 'khor ba rnam bzhi srog gcod snang chen sangs rgyas yin// snang ba gzhan dbang ma gyur dbang bskur rgyal po yin// zhes gsungs so// de nas yang bka' stsal pa// 'khor ba rnam bzhi'i 'bras bu bstan pa ni// rgyu ltar 'khor ba dang po'i las dang ni// rgyu dang rkyen gyis 'gro ba drug skyes so// las dang 'phro dang mthun pa'i 'bras bu ni// las ni dge dang mi dge lung ma bstan gyi las// dge ba'i las la mtshan bcas mtshan med do// mtshan bcas rnam pa gnyis yin te// 'og ma'i dge ba bcu po dang// sngags dang yi dam bsgom bzlas bya// de ni las kyi rnam grangs yin/ bsdu pa dge dang mi dge gnyis su 'dus// de yang chos dang spyod pa yin par bshad// las med lus mi len pas 'phro med pa// de ni thig le chos min yin// 'od lus yid lus sha khrag lus dang gsum// 'khor ba'i lus la bsam mi khyab// bsdus pas lus gsum dag par 'dus pa yin// las ni da lta 'phro ni bar dor mthud// mthud pa'i 'bras bu gnas skabs rang sor sbyar// zhes gsungs so// lha rgyud rin po che spungs pa las/ bar do bstan pa'i le'u ste nyer bzhi pa'o//// de nas yang bka' stsal pa/ gsang ba'i bdag po nyon cig/ mi lus chags lugs bstan pa ni// skye ba rgas pa na ba dang// 'chi ba dang ni rnam pa bzhi// skye ba rnam pa lnga yin te// mngal dang sgo nga las skye dang// drod las skye dang gsher las skyes// rdzus te skye ba rnam pa lnga// mngal nas skye ba sha khrag lus// yid lus 'od lus rdzus nas skye// drod gsher skye ba sha khrag lus// skye ba 'byung bas 'chi ba 'byung// de yang lus kyi chags lugs pa// pho dang mo dang ma ning dang// pho mo rgod dang ma ning tshan po che// de yang ji ltar chags zhe na// rten gyi gnad ni rtsa yin te// de ltar rlung na rlung yin no// de la rten gyi rtsa bstan pa// dang po gzhi la lhun gyis grub// phra ba'i rtsa dang rlung dang ni// rags pa'i rtsa dang rlung dang gsum// de nas dngos po'i rtsar 'khrul te// dngos po pha ma'i thig le dkar dmar te// rags pa'i rtsa ru mthong ba las// rags pa rtsar gyur dngos por smin// thig le rtsa yi rgyal po de// de las spu tsam tsar gyis byung// rkyang ma zhes bya'i rtsa ru grags// de nas yang cig zla ru byung// ro ma zhes bya gnyis su byung// de yi dbus su gsum du byung// de gsum 'dus pas snying du byung// a wa d+hu ti zhes kyang bya// de nas sprul gnas lte bar byung// ma yi srog rtsa yal ga bu yi lte bar 'brel nas gnas// lte ba'i rtsa nas thams cad skyed// mas zos bu yi lte bar 'khor// de nas lus la 'khor bas na// lte ba sprul pa'i 'khor lo yin// de nas thur du byung ba la// ma yis zos pa bu la thim// bu yis zos pa gsang sgor 'khor// gsang ba'i 'khor lo zhes kyang brjod// snying gar pha yi thig le'i rtsal// dmar mo ma ye shes rab rtsal// mthing ga rig pa sems kyi rtsal// de yis thams cad tshang bas na// chos kyi 'khor lo zhes kyang bya// snying la chos nyid rtsa yis bskor// zhi ba la sogs chos sku'i rten// chos kyi 'khor lo zhes kyang brjod// 'gyu ba mdzod spur 'khyil ba'i lam// mgrin pa'i rtsa la longs spyod byed// longs spyod 'khor lo zhes kyang bya// gsang ba'i rtsa la thams cad 'dus// bde ba gsal ba mi rtog pas// chos kyi 'khor lo zhes kyang bya// mdzod spur ye shes rtsa gnas pa// rten gyi 'byung gnas zhes bya'o// ro ma rkyang ma gnyis po'i kha// sna la zug pas pho yi rten// gsang bar zug pas mo yi rten// yar mar snol mar 'byung ba ni// ma ning zhes su bshad pa yin/ kha la gang 'grib 'phel ba ni// pho mo rgod ces 'gyur pa yin/ kha gnyis zum nas ma phyed pas// ma ning tshan po che zhes brjod// de ltar spyod pa rlung yin no// pho rlung drag la mo rlung dal// dal bar rgyu bas thur du byung// drag par rgyu bas gyen du byung// lung du ma bstan rlung dag las// pho mo rgod dang ma ning tshan po che// de ltar grub par shes par bya'o// de nas rus pa'i gnad bstan pa// mdzod spu'i rten du smin rus chags// de las gyes pas dpral rus byung// de las mur gong rus pa byung// de las za ba'i za 'gram byung// de nas ya thod ma thod byung// de gnyis 'brel pas rus srub byung// snying dang 'brel bas srog rus chags// de rnams 'tshogs pas sog pa chags// de rnams tshigs su bcad pas tshigs pa chags// rus pa thams cad khyab pas rtsib ma chags// rus pas lus kyi stobs skyed brla rus chags// de rnams ma 'gags pa skyod pas rkang lag yin// de nas mjug rus 'phong rus chags// de nas gzhug gu chung du chags// de ni rus pa'i chags lugs rdzogs// de ni sha yi chags lugs ston// smin ma pags pa'i sha yang smin// dang po de la smin pas smin ma yin// de bzhin rim gyis cha mnyam mo// de la rtsa yi mtshan nyid kyang// rtsa ba gcig tu 'dus pa yin// gcig po rang 'byung gnas pa'i rtsa// de las gyes pa'i pho rtsa dang/ mo rtsa dang ni ye shes rtsa// ma ning pho mo rgod dang ni// ma ning tshan po che yi rtsa dang gsum// de las gyes pas 'khor lo lnga// de la brgya dang rtsa bzhi yod// de las gyes pa'i rtsa rnams ni// stod na brgyad khri bzhi stong yod// smad nas brgyad khri bzhi stong yod// de las gyes pas bsam mi khyab// dper na kha sho ba yi lo ma 'dra// dper na sha mo'i sul bzhin no// rlung dang thig le yang ni de dang 'dra// rtsa dang khrag dang drod dang rlung// sha dang sa rnams brten pas na// brten pa rtsa zhes brjod pa yin// de la 'byung ba brten pas na// 'byung ba'i nad rnams 'khrugs nas ni// de las bgegs rten gdon du che// de la dbugs rten chad pas 'chi// 'byung ba cha ma snyoms pas 'phel 'grib 'byung// de las rgas shing 'khogs pa 'byung bar 'gyur// zhes gsungs so// lha rgyud rin po che spungs pa las// lus kyi man ngag bstan pa'i le'u ste nyer lnga pa'o//// de nas yang bka' stsal pa// gsang ba'i bdag po khyod nyon cig/ phyi rtsa lus la gnas pa ni/ kha sho'i lo ma 'dra ste spel bar gnas// de la bshad na bsam mi khyab// nang rtsa rus pa dag la gnas// de ni gser gyi me tog 'dra ste yon tan rgyas// gsang rtsa snying la gnas te 'khor lo 'dra// de 'dra skyon yon 'byed pa'i rtsa// gdams pa'i rtsa ni rna ba mig la gnas// gnad kyi man ngag rab tu gces// tshad mas 'jal ba'i srang dang grub mtha' skyong ba'i srang// lag phrad byed pa'i srang dang gsum du 'dus// tshad mas 'jal ba'i srang ni brgyud pa yin// grub mtha' skyong ba'i srang ni 'bras bu yin// lag phrad byed pa'i srang ni gdams pa yin// snang ba dbang du 'dus pas rig pa gcer bur thon// rig pa dbang du 'dus pas sangs rgyas yul med mthong// rang grol dbang du 'dus pas chos min tshad las grol// brgyud pa tshad dang mi ldan na// gnad med phyi ba rko ba 'dra// gdams pa tshad dang mi ldan na// rgyus med tshon skyong med pa 'dra// bka' rgyud tshad dang mi ldan na// be'u thag sbrel nas lhung ba 'dra// byin rgyud tshad dang mi ldan na// grog po skam por nya bsgug 'dra// snyan brgyud tshad dang mi ldan na// sgo nga rul pa gnod pa 'dra// thugs rgyud tshad dang mi ldan na// rmig pa'i tshang nas chu 'tshol 'dra// nyams myong tshad dang mi ldan na// smyon pa'i lag tu mdung bskur 'dra// de rnams tshad dang ldan pa ni// nor bu rin chen 'chang ba 'dra// zhes gsungs so// lha rgyud rin po che spungs pa las/ rtsa dang tshad ma'i le'u ste nyer drug pa'o//// de nas yang bka' stsal pa// gsang ba'i bdag po khyod nyon cig/ byin rgyud tshad dang ldan pa ni// mkha' 'gro ma ni rab gnas te// rang bzhin ngo bo sprul pa gsum// rang bzhin mkha' 'gro rnam pa lnga// rdo rje mkha' 'gro rin chen dang// pad+ma'i mkha' 'gro las 'gro dang// de bzhin rigs kyi mkha' 'gro dang// rnam pa lnga ru shes par bya// ngo bo'i mkha' 'gro rnam pa gsum// 'byung ba rnam lnga'i mkha' 'gro lnga// dbyings kyi mkha' 'gro rnam lnga yin// 'byung ba lus kyi mkha' 'gro lnga// dam tshig dri snom mkha' 'gro yin// rnam shes sgo lnga mkha' 'gro lnga// lus kyi mkha' 'gro rnam lnga yin// sprul pa'i mkha' 'gro rnam pa gsum// kun gzhi ye shes mkha' 'gro yin// yid ni rdo rje'i mkha' 'gro yin// rnam shes sha za mkha' 'gro yin// rna ba mkha' 'gro glog phreng ma// mig g.yon nyi ma'i 'od zer can// mig g.yas zla ba'i 'od zer can// lce ni mkha' 'gro mtsho skyes ma// sna ni mkha' 'gro dri ma med// lus ni mkha' 'gro dung skyong ma// de ni mkha' 'gro'i brgyud pa yin// mkha' 'gro'i byin rgyud bstan pa ni// mkha' ni rig pa'i snang ba'o// 'gro ba 'gyu ba thogs med do// de gnyis 'dus pa'i dbang bskur bas// byin rlabs phyogs ris med par 'char// byin rlabs nang nas shar tsam na// nyams myong tshad ldan skye ba yin// nyams myong ye shes rang shar bas// ye shes tshad dang ldan pas na// sangs la mi rgya'i rang dbang med// sangs rgyas sa la grol tsam na// thugs rje mi 'byung rang dbang med// thugs rje phyogs med shar tsam na// byin rlabs mi 'jug rang dbang med// ces gsungs so// lha rgyud rin po che spungs pa las/ mkha' 'gro ma dbang bskur ba'i le'u ste nyer bdun pa'o//// de nas yang bka' stsal pa// gsang ba'i bdag po khyod nyon cig/ theg pa'i khyad par bstan pa ni// nyan thos 'bras bu dgra bcom pa// bskal pa grangs med bdun na 'dod// dug lnga dgra bzhin spang ba yin// theg chen dbu ma stong par 'dod// gcig dang du bral la sogs pa// gtan tshigs gzhig nas stong par 'dod// de yang dug dang sbyor ba yin// shes rab pha rol phyin la sogs// mdo rgyud sngags kyi khyad par gang// mdo rgyud dbang gi gdams pa med// sngags la rnam pa gnyis yin te// phyi pa dang ni nang pa'o// phyi pa'i dbang las nang pa'i dbang// phan pa'i dbang bcu khyad par 'phags// nang gi rgyud ni dbang lnga dang// bdud rtsi lnga yis khyad par 'phags// de bas rdzogs chen khyad par che// sngags ni bsgrub bsgyur 'bras bur 'dod// rdzogs chen rtogs pas sangs rgyas pa// tshig dbang gcig gis rtogs par 'dod// dbang bskur rdzogs pa dbang lnga yin// de ni 'og ma rnams la med// mchod pa rnam lnga lta sgom pa// de ni kri ya yin par 'dod// mchod pa rnam lnga sku lnga bsgom// de ni yo ga yin par 'dod// bdud rtsi lnga mchod rigs lnga bsgrub// de ni ma hA a nur 'dod// gsang sngags dbang gis khyad par 'phags// rdzogs chen thams cad chos skur rtogs// rig pa rtsal gyi dbang chen thob// des na khyad par rab tu che// snyan brgyud rin chen sbyangs pa 'di// thams cad ngo sprod pa la 'god// dus bzhi mnyam sbyor khyad par che// gzhi las grol bas khyad par 'phags// zhes gsungs so// lha rgyud rin po che spungs pa las// theg pa'i khyad par mtshon pa'i le'u ste nyer brgyad pa'o//// de nas yang bka' stsal pa// gsang ba'i bdag po khyod nyon cig/ rdzogs pa'i rdzogs lugs bstan pa ni// nyon mongs dug lnga'i dgra bcom nas// 'das pa lnga ru grol bas na// nyan thos grub mtha'i 'bras bu rdzogs// ngo bo gsal bas sems tsam rdzogs// rang bzhin stong pas dbu ma rdzogs// 'das pa gsum gyis kri ya rdzogs// sku lnga rigs lnga dbyings dang ye shes kyis// yo ga ma hA a nu'i theg pa rdzogasapa// 'das pa lnga yis thams cad khyab// rdzogs pa chen po'i lta ba rdzogs// phyogs su ma lhung rgya ma chad// mtshan ma rang sar grol ba ni// snyan brgyud byin rgyud grub mtha' rdzogs// lta sgom spyod pa 'bras bu rdzogs// ye shes lnga dang sku lnga rdzogs// 'gro ba rigs drug mu stegs rtag chad rdzogs// 'gag pa med pa'i shes rab rang byung bas// mtshan ma sna tshogs dag pa'i zhing du sangs// chos min 'byed pa med pa'i klong du rgyas// ma bsgribs yongs la gsal bas na// cir yang mi 'gag phyogs ris mi mnga' bas// thams cad ma lus lus med rang snang yin// shes rab yongs gcod ma 'gags pas// nges pa'i tshig ni mkhyen pa'i ye shes yin// dbye ba phyi nang gsang ba yang gsang yin// shes rab ldang tshad chos kun rang grol yin// 'ub chub ye shes shes pas shes rab yin// rang snang rang 'byung shes pas sbyin pa rdzogs// rig pa rang grol shes pas tshul khrims rdzogs// gnyis med zang thal shar bas bzod pa rdzogs/ chos min zang thal shar bas brtson 'grus rdzogs// thams cad thig ler shar bas bsam gtan rdzogs// snang srid lhag mthong shar bas shes rab rdzogs// chos sku rang la shar bas thabs chen rdzogs// mtshan ma rang grol stobs kyang rdzogs// snang ba rgya yan smon lam rdzogs// 'du 'bral med pas ye shes rdzogs// 'od lnga 'byung bas rin chen sna lnga rdzogs// rdzogs pa'i gdams ngag ma shes na// bong bus seng lpags gon pa 'dra/ zhes gsungs so// lha rgyud rin po che spungs pa las/rdzogs lugs kyi ngo sprod dbang bskur chen po'i le'u ste nyer dgu pa'o//// de nas yang bka' stsal pa// gsang ba'i bdag po khyod nyon cig/ de ni spyi yi mtshan nyid yin// rang gi mtshan nyid 'di lta ste// mig ni yul las 'das par rdzogs// rna ba sku las 'das par rdzaugs// lce ni gnyis med 'das par rdzogs// sna ni ye shes zang thal rdzogs// 'og sgo gzhi las 'das par rdzogs// tshogs brgyad thig le ye shes brgyad du rdzogs// phung po lnga ni 'das pa lnga ru rdzogs// dug lnga khong khro 'das pa lnga ru rdzogs// 'byung lnga sha khrag drod sems dbugs// 'das pa lnga ru rdzogs pas dbang chen thob// snying stod sku las 'das par rdzogs// dbus ni yul las 'das par rdzogs// smad ni gnyis med 'das par rdzogs// bub ril chos las 'das par rdzogs// rtsa rnams thams cad mkhyen par rdzogs// zur brgyad ye shes brgyad du rdzogs// thel brgyad thig le brgyad du rdzogs// shel gyi sbu gu thugs rje'i rol par rdzogs// ngo bo sku las 'das par rdzogs// rang bzhin yul las 'das par rdzogs// thugs rje gnyis med 'das par rdzogs// yon tan ye shes zang thal rdzogs// phrin las thams cad mkhyen par rdzogs// sa rnams ma lus bgrod med rdzogs// snang ba 'od gsal phyi yi tshogs lam rdzogs// tshogs drug rang grol nang gi tshogs lam rdzogs// 'gyu ba lam khyer gsang ba'i tshogs lam rdzogs// snang rig dbyer med shar bas sbyor lam rdzogs// ye shes zang thal shar bas mthong lam rdzogs// gnyis med zang thal shar bas bsgom lam rdzogs// thams cad mtshan ma rang sar grol// mthar phyin lam ni rdzogs pa'o// zhes gsungs so// lha rgyud rin po che spungs pa las/ dbang rdzogs rang chas su bstan pa'i le'u ste sum cu pa'o//// de nas yang bka' stsal pa// gsang ba'i bdag po khyod nyon cig/ gzhi dang lam dang 'bras bu rnams// de yi ngo sprod bstan par bya// nyan thos dug lnga spangs lam yin// byang chub sems dpa' spyod lam yin// sngags kyi theg pa bsgyur lam yin// rdzogs chen gzhi lam dbyer med yin// bka' rgyud gzhi lam rang grol yin// thugs rje bkrag mdangs nyi ma 'bum gyi gzi// bdag blo 'khrul pa'i blo yi mun pa bsal/ thugs rje spyan can ye shes khong nas shar// 'khor ba rnam bzhi'i srog bcad pas// th-ig le ye shes zang thal thob// gzhi dang rgyud dang lam dang 'bras bu chod// sad pa bzhi dang bdud bzhi choms pa yin// ye shes nyi ma thugs kyi klong las shar// sku bzhi rang sar grol bas bdud bzhi'i sgrib pa dag/ 'od lnga lam du shar bas 'khor ba'i rtsa ba smin/ khams gsum rtsa ba chod pas srid gsum rtse nas 'gyel// gzhi dang 'od snang bar na gnyis med shar bas yon tan ye shes lnga// yid dang 'gyu ba 'od dang gsum// rang byung rang la shar bas sku gsum lam du bslang// 'byung lnga rang byung 'od las grol ba na// lnga ldan ye shes mig gcig dri ma med// thugs rje byin rlabs mkha' la nyi shar 'dra// bskal pa bar pa'i sangs rgyas 'od srungs dang// thog ma'i sangs rgyas 'od dpag med pa dang// tha ma'i sangs rgyas mar me mdzad dang gsum// bka' bgros rgyud du byin brlabs nas// sangs rgyas bka' bgros rgyud ces bya// gzhi yi chos lnga lhun grub yin// de ma shes pas 'khrul pa yin// lam gyi 'od lnga rang snang yin// de ma shes pas 'khor ba yin// 'bras bu 'khor ba rnam bzhi yin// de ma shes pas dngos po yin// gzhi shes pas ni grol pa de// thams cad mkhyen pa thob pa yin// lam shes pas ni rang byung ba// 'khor ba'i g.yang sa chod pa yin// 'bras bu 'das pa sngar grol bas// 'khor ba'i 'bras bu chod pa yin// ye shes spyan gsum gcig tu dril/ sangs rgyas spyan zhes rab tu brjod// sangs rgyas kun gyi dgongs pa ni// gos dkar mo zhes brjod pa yin// dgongs pa phyogs med khyab pa yin// nam mkha'i dbyings phyug ma zhes brjod// thugs rje'i rlan dang mi 'bral bas// mA ma ki zhes rab tu brjod// thugs rje kun la snyoms par 'char// dam tshig sgrol ma zhes bya'o// thig le'i rang bzhin shes rab snying rje ste// phyi yi khyad par theg pa che chung bstan// 'og ma rnams ni rang don spyod pa yin// sngags kyi theg pa gnyis ka spyod pa yin// rdzogs pa chen po dbye ba med pa yin// bka' rgyud 'di ni bdag don gzhan don gnyis// rang grol dbang po'i khyad par ston pa yin// thabs dang shes rab nyan thos nyid du ltung// snying rje dang ni shes rab kyis// 'gro don ma lus byed pa po// snying rje chen po cir mi mdzad// che ba'i ye shes rnyed dka' ba// shes rab thabs kyis 'gro don byed// grol nas grol ba'i lam yang staun// lam rnams kun gyi mchog tu bshad// thun mong khyad par mchog dang gsum// log lta ma dad le lo dang// ma rig pa de lam du slong// ngo sprod sangs rgyas sa la 'god// lam gyi mchog ces bya ba'o// zhes gsungs so// lha rgyud rin po che spungs pa las/ ngo sprod kyi lta bsgom las grol ba'i le'u ste so gcig pa'o//// de nas yang bka' stsal pa// gsang ba'i bdag po khyod nyon cig/rtsa dang rlung dang thig le dang// ye shes rnam pa bzhi ru 'dus// thun mong khyad par mchog dang gsum// thun mong 'khor lo lnga la gnas// brgya dang nyi shu rtsa bzhi yod// de yang bsdus pas gsum du 'dus// de yang a ba d+hU tir 'dus// a ni tshig dbang rin po che// wa ni gsang ba'i ye shes dbang// 'a ni shes rab dbang yin no// d+hU ni thabs kyi dbang yin no// ti ni bum pa'i dbang zhes bya// thams cad 'dus pas bum pa'i dbang// tshig tu mtshon pas ming gi dbang// brgyud pa ma chad chu yi dbang// rang chos ston pas dbu rgyan dbang// zung du 'brel bas rdo rje dril bu'i dbang// rig pa'i dbang lnga zhes kyang de la bya// de ni khyad par dbang zhes bya// da ni mchog gi rtsa bstan pa// zag pa med pa'i dbang bskur te// gzhi la rtsa rlung lhun gyis grub// phra ba'i rtsa dang rig pa'i rtsa// dngos po 'khrul pa'i rtsa dang gsum// dang po'i rtsa ni zag bcas yin// de la sbyangs na bde ba skye// bde ba skyes nas lam du 'jug/ zag med rtsa ni bka' brgyud yin// gzhi yi rtsa dang rlung dang ni// thig le lhan skyes ye shes dang// lam du da lta bar do la// zag pa med pa'i ngo sprod yin// 'bras bu rang sar grol ba'o// ngo sprod shin tu gces pa yin// de yang bka' brgyud byin brgyud dang// thugs su brgyud pa'i rtsa yin pas// bskal pa 'khrugs kyang khar ma 'byin// sems can las 'phro med pa dang// 'og ma'i grub mtha'i sgor zhugs pas// dngangs shing skrag nas skur ba 'debs// de yi rnam smin 'bras bu yin// rdo rje'i dmyal bar ltung bar 'gyur// des na bskal par khar ma 'byin// dus ngan tha ma byung ba'i tshe// mar me 'chi kar gsal ba yin// bstan pa nub kar dam chos dar// gsal ba rang gis 'chi ba yin// dar ba rang gis nub pa yin// zhes gsungs so// lha rgyud rin po che spungs pa las// rtsa rlung thig le ye shes rlung gi le'u ste so gnyis pa'o//// de nas yang bka' stsal pa// gsang ba'i bdag po khyod nyon cig/ lha rgyud rin po che spungs pa 'di// ngo sprod dbang bskur rgyud yin te// byin gyis brlabs kyis bshad pa yin// 'khor ba dong sprug rgyud du zung// ye shes spyan gsum rgyud du zung// dbang bskur rgyal po'i rgyud du zung// ye shes rten rdzogs rgyud du zung// ye shes 'khor lo'i rgyud du zung// ngo sprod chen po'i rgyud du zung// zhes gsungs so// rdo rje sems dpas gsol ba// legs so rdzogs sangs rgyas pa'i mchog/ de ltar gsungs par rjes yi rang// 'khor rnams rab tu dgyes pa'o// byang chub sems dpa' thugs rje che// zhes gsungs so// lha rgyud rin po che spungs pa las/ rjes su yi rang ba'i le'u ste so gsum pa'o//// lha rgyud rin po che spungs pa'i rgyan zhes bya ba rdzogs so// bi ma la'i gdams pa/ bod rgyal khams yongs la btsad po che na khrims kyis che// bod 'bangs yongs la dkon mchog mnyan na bde// sngags pa kun gyis ngan sngags thub na btsun// rnal 'byor rnams kyis tshul 'chos spangs na bzang// bla ma'i gdams pa bsgrubs na grub// gtso bo rnams kyis chad las mi 'gal bzang// mo btsun rnams kyis lus khrims dam na btsun// chos skyong srung mas bstan pa bsrungs na btsun// gdams ngag srog las gces pa byas na phyi phyir btsun// slob dpon bi ma las de skad gsungs so////

CLOSE WINDOW