CLOSE WINDOW

Gpb006.010
བོད་ཡིག

/// rgya gar skad du/ ma hA san+ti bo d+hi sa twa d+h+wa dzA gra tan+t+ra nA ma/ bod skad du/ rdzogs pa chen po byang chub gyi sems rgyal mtshan rtse mo'i rgyud ces bya ba/ sangs rgyas mar me mdzad stong gi gtsug phud rin po che la phyag 'tshal lo// 'di skad bdag gis thos pa'i dus gcig na/ sangs rgyas mi g.yo ba'i bskal pa dang po la/ yangs pa chen po'i grong khyer ma bkod par snang ba zhes bya ba na/ de bzhin gshegs pa 'od kyi phung po zhes bya ba mngon par 'dus ma byas pa/chos nyid rang snang gi nam mkha' dang mnyam par bzhugs pa/ snying po byang chub la mngon par byang chub la/ chos thams cad spros pa med par rang gi rgyan du bkod pa/shes bya la ma rmongs pa/ mngon par 'dus ma byas pa/ kun tu bzang po thams cad rgya mtsho dang chu bran gyi tshul du 'byung zhing 'du ba/ las thams cad ma btsal bar grub pa/ byed pa po med par klong gcig tu 'khyil ba/sku'i ring bsrel chen po snang ba 'od kyi phung por bzhugs pa/ gsung gi ring bsrel chen po rgyal mtshan gyi rtse mo ltar nub pa med par sgrogs pa/ thugs kyi ring bsrel chen po rdo rje lta bu 'gyur ba med pa'o// zhes byang chub kyi sems rgyal mtshan gyi rtse mo'i rgyud las/ dang po'i byung tshul bstan pa dang/ rang gi 'dug tshul bstan pa'i lai'u ste dang po'o//// de nas byang chub sems dpa' sems dpa' chen pos chos thams cad mi mnyam pa dang mnyam par bstan pa'i ting nge 'dzin las bzhengs te/kye gsang ba'i bdag po lag na rdo rje/ chos chen po gsang ba rmad du byung ba 'di ni stobs mi mnyam mo// rdzu 'phrul mi mnyam mo// thugs rje'i bye brag mi mnyam mo// bzhugs pa'i klong mi mnyam mo// lag na rdo rje legs par yid la zung zhig/ de ltar yin te de ltar ma yin no// chos thams cad kyi de bzhin nyid mnyam mo// ci ste gzhi rang gi ngo bo gcig pa'i phy-ir ro// rtsal mnyam mo// ci ste byed pa tha dad med pa'i phyir ro// thugs rje mnyam mo// ci ste ye shes lnga mi 'gag pa'i phyir ro// bzhugs pa'i klong mnyam mo// ci ste chos nyid tha dad med pa'i phyir ro// de'i phyir nga'i shes rab zab mo ni/ rgyal mtshan gyi rtse mo dang 'dra ste nub pa med do// nor bu rin po che dang 'dra ste zad mi shes so// nam mkha' dang 'dra ste mthar thug pa med do// ri bo dang 'dra ste 'gyur ba med do// pad+ma dang 'dra ste skyon med do// sa gzhi dang 'dra ste thams cad 'byung ngo// shing gi rgyal po yangs 'dus brtol dang 'dra ste/srid pa gsum du nub pa med cing dar zhing rgyas pa de bzhin du byang chub sems dpa' mi nub pa'i rgyal mtshan/ mi 'gyur ba'i g.yung drung/ ma bslad pa'i ye shes/ rgyun gyis rtag pa'i shes rab/ mtshon pa med pa mya ngan las 'das so// rigs kyi bu chos nyid rdo rje rgya gram ni bkod legs/ chos sku rdo rje rtse mo ni brtsegs legs/ thig le mi 'gyur ba'i rgyal mtshan ni dpangs mtho/ thugs rje spr-in gyi char khebs ni khod snyaums/ting nge 'dzin mi g.yo ba'i dar 'phyang ni mnyen 'khyil/ ye shes chen po bzhi'i me long ni 'od gsal/ tshangs pa'i sgra skad phun sum tshogs pa'i dril bu ni dbyangs snyan/ zag pa med pa'i chos kyi 'khor lo ni bskor mkhas/byang chub kyi srog shing ni 'gyur ba med/ zhi gnas lhag mthong gi bre phul ni brtsegs legs/ sangs rgyas kyi mdzad spyod ni tshul shes/ sangs rgyas kyis che ba'i yon tan ni dpag tu med pa'i rab gnas kyi mda' phul te/dam pa'i chos mtha' nas rgyas pa ni rang byung lhun rdzogs kyi dgongs pa'o// zhes byang chub kyi sems rgyal mtshan gyi rtse mo'i rgyud las/ chos thams cad mi mnyam pa dang mnyam par bstan pa'i le'u ste gnyis pa'o//// de nas bcom ldan rdo rje 'chang// thugs rje mgon po 'od dpag med// nga la dang po rgyu med pas// tha ma rkyen gyis bshig tu med// nga la bsgrub pa'i chos med pas// dngos grub gzhan la re ba med// nga la bstan pa'i tshig med pas// smra bsam yul las 'das pa yin// nga la bla ma rje med pas// ye shes khyad par 'phags pa yin// nga la gdul bya gzhan med pas// snying rje chen po cir mi mdzad// nga nyid 'od kyi rang bzhin pas// thabs kyi ye shes dbying na gsal// nyi ma'i snying por rang shar bas// 'byung ba lnga bas gtso chen yin// nam mkha' dag/ ri rab lta bur gzugs che bas// gom pa gcig gis pha rol phyin// kun gzhi kha dang zhabs med pas// snang srid lto ru zos kyang nga mi 'grangs// nam mkha' gos su gon kyang nga mi yogs// sa gzhi gdan du bting yang nga ma 'dus// nyi zla pang du blangs kyang nga ma dros// kye kye gsang ba'i bdag po lags// ye shes rgyal po tshig las 'das pa la// lung dang rigs pa nga la ci phyir yin// chos nyid ye nas ngos gzung bral ba la// btags pa'i tha snyad nga yi chos ma yin// rang byung ye shes 'gag pa med pa la// bcos pa'i skyon gyis ye nas gos pa med// gol dang ma gol tshig gi tha snyad yin// rig pa'i rgyal po gzhi gnas dag pa la// bsgribs dang mi bsgrib nga la dogs pa med// snying po gdod nas rdzogs sangs rgyas pa la// bsam gtan ngang la gnas pa dben pa'i tshig dang bral// lung du ma bstan pa'i sgrib pa'o// rigs kyi bu sangs rgyas kyi bar du bla ma dam pa la dri bar bya'o// bden pa ma mthong ba'i bar du bsgoms pas mthong bar mi 'gyur ro// zhes byang chub kyi sems rgyal mtshan rtse mo'i rgyud las/ che ba'i yon tan bstan pa'i le'u ste gsum pa'o//// de nas byang chub sems dpa' sems dpa' chen pos/ spyi don lnga bkrol ba'i gdams ngag bstan pa/ dbang po gzhi bsdu/ chos nyid ngo sprad/ rig pa gos gon/ ye shes ma bu sprad/nor bu rgyal sa bzung ngo// dbang po gzhi bsdu ba la lnga ste/ bdag srid pa'i rtsai mo brgal nas/ dbang po tshogs drug 'gags pa'i dus su/ byang chub sems dpa'i khye'u snga ma la bzhi ste/ khye'u sa'i snying po/ rigs rdo rje'i rigs/ 'byung ba sa'i rang bzhin/ sku mi bskyod pa'i sprul pa/ rang bzhin sangs rgyas pa'i rgyun gyi rtag pas/ de'i phy-ir ni stong pa ye shes kyi snying po can zhes bya ste/ nga'i rang bzhin ni mdzes pa'i lha mo 'od zer can zhes bya ba yin te/sems can rnams la tshad med pa bzhi 'gag pa med par skyob pa'i phyir/ lha mo yon tan la rang bzhin dag pa'i phy-ir nas 'od zer 'byung bas nga'i sprul pa'i sku 'od zer du snang ngo// de'i phyir stong gsum gyi stong chen po la 'jig rten gyi khams 'od zer gyis snang bar nus pa'o// de'i rtsal snang ba nam mkha' la sprin gyi kha dog dkar dmar du snang ba dang/ sa gzhi la rin po che dang/ sa'i kha dog dang/ rtsi shing dang me tog gi kha dog dkar dmar lngar snang ba thams cad kyang/ nga'i sku'i rol pa las byung ba yin no// zhes dri ba dang po'o// de nas yang bcom ldan 'das kyis bka' stsal pa/byang chub sems dpa' chos kyi sku ni rang bzhin gyis rnam par dag nas brjod pa'i mtha' las kyang 'das/ tshig dang dbang po'i spyod yul med kyang/ nga'i rang bzhin chen po lngar ye nas sangs rgyas pas/gzugs kyi sku'i 'od zer lngar snang ba yin te/ de ci'i phyir zhe na/ nga'i sku ye shes sgyu ma'i lus su ma bstan na ngo bo dang rang bzhin de bzhin gshegs pas mi gzigs mi mkhyen no// nga'i thugs rje sprul pa'i sku 'od du bstan pas/sems can rnams kyi shes par bya ba'i ched du/ dbu'i thor tshugs dang/ mdzod spu'i bu ga dang/ shangs kyi rlung sgrom dang/ ljags kyi pad mo dang/ thugs kyi dpal be'u dang/ ba spu'i bu ga yan chad nas 'od zer lnga bye ba drug tu 'gyed pa'o// 'od zer de yang dpag tu med pa bgrang du med pa'o// zhes dri ba gnyis pa'o// de nas yang bka' stsal pa/ byang chub sems dpa' sems dpa' chen po khyod kyis dris pa de legs so// yang dag par rdzogs pa'i sangs rgyas la thugs rje dang rdzu 'phrul bsam gyis mi khyab cing brjod kyis mi langs pa de dag kyang khyod las 'byung bar 'gyur ro// ci ste sangs rgyas nyid kyi sprul pa'i sku yin pa'i phyir/de'i phyir khyod kyis chen po lnga sangs rgyas pas/ sangs rgyas ye shes kyi lus can zhes bya ste/ khyod kyi ngo bo rang bzhin ni bsam pa'i mtha' las 'das so/ khyod kyi thugs rje ni sprul pa'i skur bstan kyang/don lha mo lngar snang ste// lha mo lngar snang gzhal yas na/ mi bskyaud rdo rje 'chang ba'i sku// snying po byang chub nyid la gnas// sems can kun gyi don gyi phyir// gsal ba'i lha mo chen mo me long 'dzin// rtags kyi phyag rgya dkar la 'tsher// mnyam pa'i lha mo mi bskyod sku// rtags kyi phyag rgya ser la 'tsher// pad+ma'i lha mo dril bu 'dzin// rtags kyi phyag rgya dmar la 'tsher// las kyi lha mo shugs 'chang ma// rtags kyi phyag rgya sngo la 'tsher// dbyings kyi lha mo rnam dag sku// rtags kyi phyag rgya mthing la 'tsher// 'od zer sna tshogs phyogs bcur 'phro// chos kyi dbyings kyi pho brang du// sgrib med gsal ba'i ngo bor shar// dkar dmar 'od zer sna lnga yang// ma 'dres yongs rdzogs gsal ba'i phyir// gsal ba dang/ dro ba dang/ bsil ba dang/ yang ba dang/ yangs shing khyab pa sangs rgyas kyi spyan mthar phyin pa me long gi ye shes/mchod pa gzugs kyi mchod pa la spyod do// de rnams so sor thim mo kun la des 'dre/ khye'u phyag na rdo rjai las kyi rigs/ rlung gi rang bzhin sku sangs rgyas don grub kyi sprul pa/ rang bzhin las kyi sgrol ma/ mthar phyin pa bya ba grub pa'i ye shes/ mchod pa sgra'i mchod pa'o/ khye'u nam mkha'i snying po de bzhin gshegs pa'i rigs/ nam mkha'i rang bzhin/ sku snang mdzad kyi sprul pa/rang bzhin skye med/ mthar phyin pa rnam par dag pa'i ye shes/ mchod pa dri'i mchod pa'o/ khye'u spyan ras gzigs rin po che'i rigs/ chu'i rang bzhin/ sku sangs rgyas rin chen 'byung gnas kyi sprul pa/ rang bzhin kun khyab/ mthar phyin pa mnyam pa nyid 'byed pa med pa'i ye shes/ mchod pa ro'i mchod pa'o/ khye'u sgrib pa rnam par sel pad+ma'i rigs/ me'i rang bzhin/ sku snang ba mtha' yas kyi sprul pa/ rang bzhin na bza' dkar mo/mthar phyin pa so sor smin pa'i ye shes/ mchod pa reg bya'i mchod pa'o// byang chub sems dpa'i khye'u lnga po de khye'u snang ba'i rig byed la so so go gon gnas su thim nas gnas so// de nas khye'u snang ba rig byed/ rigs med pa'i rigs a'i rang bzhin/ sku 'od dpag tu med pa'i rang bzhin ma bcos pas/ mthar phyin pa mi gnas pa'i ye shes/ mchod pa bya ba med pa'i mchod pa'o// chos nyid ngo sprod pa la gnyis te/ dbyings dang ye shes kha sbyor ro// rig pa gos gon la gnyis te/ rig pa 'od kyis lus la 'jug pa dang/ 'od rig pa la 'jug pa'o// ye shes ma bu sprad pa la gnyis te/sngon byung gi sangs rgyas la rjes 'jug gi sangs rgyas 'jug pa'o// nong bus rgyal sa zin pa ni/ sems can sangs rgyas pa'o// dbang po gzhi bsdus pas 'gro drug ma dang 'phrad/ chos nyid ngo 'phrod pas dag pa'i ye shes rang snang/rig pa'i gos gon pas/ rdo rje lta bu'i ting nge 'dzin thob/ ye shes ma bu sprad pas/ thugs rje 'byung ba'i sgo ma 'gags// nong bus rgyal sa zin pas sangs rgyas mya ngan las bzla'o// zhes byang chub sems dpa' rgyal mtshan rtse mo'i rgyud las/ ngo sprad bzhi la spyi mdud lnga bkrol ba'i le'u ste bzhi pa'o//// kye byang chub sems dpa' sems dpa' chen po/ nga mya ngan las 'das pa'i 'og tu/'khor gyi mi pho bzhi la/ gang 'dul ba'i chos bzhis ston pa mngon par mthong ba bzhi ston cig/ gsang ba bla na med pa'i 'dul ba'i 'khor la/ bya btsal med pa nam mkha' lta bu'i chos bstan/ mtshan yongs su rdzogs par byed pa'i 'khor la/ chu zla'i dkyil 'khor lta bu'i chos bstan/ mos pas spyod pa'i 'khor la/ gdung sha rI ram rin po che'i chos bstan/ tshad med pa bzhi dang ldan pa'i 'khor la/ sman gyi bla bai DUr+Ya 'od kyi rgyal po'i chos bstan no// rigs kyi bu ngas 'jig rten gyi khams su rang lo nyi shu rtsa bzhi lon no// sems can gyi lo stong brgyad brgya nyi shu rtsa bzhi sprul pa'i skur bzhugs so// zhes byang chub kyi sems rgyal mtshan rtse mo'i rgyud las/sangs rgyas kyi ring bsrel gang zag la gdams par bstan pa'i le'u ste lnga pa'o// rdzogs so// rgya rim pa brgya yis btab bo/

CLOSE WINDOW