CLOSE WINDOW

Gpb003.022
བོད་ཡིག

/// rgya gar skad du/ a ma la shud+d+ha tan+t+ra rat+na mahA pra ka Ta nA ma/ bod skad du/ dri med ka dag gi rgyud/ rin po che gsal ba chen po zhes bya ba/ bcom ldan 'das ye ji bzhin pa'i rdo rje 'chang chen po/skyon ka dag yon tan lhun gyis grub pa'i ston pa/ dri ma med pa'i dgongs pa mnga' ba/ rin po che 'od 'bar ba'i dpal la phyag 'tshal lo// bud+d+ha sarbA ma la/ sa ma d+hI a ho/'di skad bdag gis thos pa'i dus gcig na// bcom ldan 'das ston pa 'od mi 'gyur ba rin po che dri med 'od gsal ba/ ye ji bzhin pa chen po gzhon nu bum pa'i sku ru bzhugs pa/ gzhon nu'i mtshan rab tu dngas pa/shes rab kyi skur bzhengs pa ste/ chos nyid dri med ka dag gi klong/ mi 'gyur ba'i gzhal med khang/ phyi nang med par zang thal ba/ rgya yongs su ma chad pa'i klong du rin po che 'od gsal bas/sprul sku'i gnas su shar ba ni/ lho phyogs bde ldan yid 'dres pa'i tshal/ pad+ma brtsegs pa'i pho brang/ gsang chen rol pa'i dur khrod/ me ri 'bar ba'i rtse la bzhugs te/ dpal 'jigs byed kyi rgyal po la/mngon par 'khod pa'i mkha' 'gro rnam pa lnga dang/ byang chub sems dpa' sprin gyi shugs can bdun dang/ gsang ba'i bdag po rnams byin gyis rlabs kyis 'dus so// de'i tshe gsang ba'i bdag pos sna drangs te/'dus pa'i tshogs kyis mar me mdzad la brkyang phyag 'tshal te/ bskor ba lan dgu mdzad de/ 'di skad ces gsol to// e ma ho/ dpal gyi dpal mchog he ru ka/ gsang ba yang gsang dri med ka dag don// rin chen 'od gsal chen po'i rgyud// ma rig mun pa bsal ba'i phyir// shes rab chen po sbar ba'i thabs// 'dus pa'i tshogs la gsung du gsol// zhes zhus so// ston pas bka' stsal pa/ e ma ho/ gsang ba'i mdzod chen rin chen thugs kyi gter// 'gyur med chos nyid gsang ba'i rgyas btab pa// shes rab ka dag chen po'i rgya dral nas// ka dag 'od gsal rgyud chen gter phyung ba// dbugs med 'gyur ba ye shes rlung gi rta// rang byung ye shes mi bo chen pos chibs// yid las 'das pa'i shes rab ka dag mtshon// phyag tu bsnams te zla gam pad+ma can/ gsung gi sgo mo chen por lam phyung nas// chos sku dri med ka dag la sogs pa// rin chen 'od gsal chen po ngas bshad kyi// 'dus pa'i 'khor tshogs rna ba nges lhogs dang// tshig gi bdud rtsis blo yi the tshom nad// gting nas phyung la gzhi dgongs chen po'i don// dri med ka dag rin chen 'od gsal 'di// skal ldan thugs la sgron ma gsal bar bstan// zhes gsungs so// dri med ka dag gi rgyud rin po che 'od gsal ba las/ gleng gzhi'i le'u ste dang po'o//// de nas yang gsang ba'i bdag pos zhus pa/ kye kye bcom ldan dpal gyi dpal// chos nyid ka nas ji ltar dag/ dag pa'i ngo bo ji ltar gnas// dri ma phra rags ci yis snang// dag pa'i ngang du skyol thabs gang/'dus pa'i tshogs la gsung du gsol/ zhes zhus so// ka dag gzhi nas dag la rang snang tshul// 'byung gsum phra rags rnam pa gsum// dngas ma'i chu la sa btab rnyog dang mtshungs// ngo bo dri med ka dag gong ma bzhin// de ltar rtogs pa'i shes rab mig yod pas// rnam gsum ma thub ngo bo 'dug tshul yang// gsum nyid byung tshul gnas tshul ngo la gsal// dbugs dang bral bas phra rags rang dag 'gyur// shes rab can la da lta nyid la dag/ de ltar ma mthong rtsol bas dag 'gyur med// ces gsungs so// dri med ka dag gi rgyud rin po che 'od gsal chen po las/ chos nyid ka dag/rin po che 'od gsal bar bstan pa'i le'u ste gnyis pa'o//// de nas yang rdo rje 'chang la zhus pa/ kye kye bcom ldan dri ma med// rtog med ye shes rang gsal mnga'// rig pa ka nas ji ltar dag/dag pa'i ngo bo ji ltar gnas// dri ma phra rags ci yis snang// dri ma dag par gang gis byed// 'dus pa'i tshogs la gsung du gsol// rdo rje 'chang gis bka' stsal pa// skye 'gag med pa'i ye shes las// phyogs lhung med pa'i shes rab gsal// de nyid rig pa nyag gcig gsal// gdod nas dag pa'i rig pa la// sgo lnga'i chos can ka nas dag/ rig pa zang thal spros med la// yid kyi rnam shes ka nas dag/rang gsal 'dzin med ye gnas la// ngar 'dzin nyon mongs can gyi yid// ma sbyangs ka nas dag pa yin// rig pa spros dang bral ba nyid// nyag gcig ka nas dag pa la// 'phel 'grib gang stongs med pas na// kun gzhi ka nas dag pa yin// de dag yon tan phyogs snang ste// ngo bo 'dug tshul 'di ltar gnas// mi rtog ye shes rang gsal la// sems med rang rig ye gnas don// lha yi lha mchog bka' stsal ba// rdo rje 'dzin sogs nges zung zhig/ phyi nang med pa'i zang thal ni// chos nyid gzung 'dzin bral ba la// 'byung bzhi'i sgrib pa ka nas dag/ chos nyid mtshan med spros bral la// 'byung bzhi'i mtshan ma ka nas dag/chos nyid 'byung ba med pa la// sa yi mtshan ma ka nas dag/ chos nyid gdod nas dag pa la// chu yi mtshan ma ka nas dag/ chos nyid rang gsal chen po la// me yi mtshan ma ka nas dag/chos nyid mi g.yo thogs med la// rlung gi mtshan ma ka nas dag/ 'byung zad chos nyid ye gdangs la// nam mkha'i mtshan ma ka nas dag/ chos nyid gdod nas dag pa'i rgya mtsho chen po la// 'byung lnga'i rdul gyi mtshan ma ka nas dag/chos nyid kha dog med pa'i rang gsal la// 'byung ba bzhi yi bag gi kha dog ka nas dag/ ka dag ngang gi chos nyid 'dug tshul ni// yon tan mtshan nyid grangs las 'das mod kyang// chos nyid don gyi 'dug tshul 'di ltar gnas// dngos med spros bral dag gsal zang thal de// mtshan ma'i rdzas med thams cad 'char ba'i rten// dag pa'i chu dang dag pa'i me long bzhin// dri ma phra rags rnam gsum snang ba yang// chos nyid mtshan nyid ye nyid 'byung ba lnga// rig pa'i mtshan nyid ye nas 'byung ba lnga// de nyid mtshungs pas rin chen 'od gsal ba// de lnga'i nang du de las de ltar gsal// de gsum mtshungs pas mthu brtas rags par snang// gcig la gcig 'thab dri ma phra bar snang// dag pa'i klong du gong ma'i gdangs shar bas// chos nyid ngang la sgrib pa'i bag tu snang// yon tan mtshungs pas 'od gsal phra rags snang// blos btags phyi nas blta ba'i don bsgribs kyang// gzhan la ltos 'gyur chos ma yin// rim gsal stong nyid snying por gnas// bum pa'i nang gi mar me bzhin// gsal la g.yo sems med pa'o// tshogs brgyad chos can snang ba yang// rang rig 'byung lnga'i mtshan nyid kyis// phyogs re'i klong nas ye shes rlung// dbugs med 'byung ba lngas bskyod pas// shes rab rlung 'byung snang ba lnga// 'od lnga zer gyi tshul du shar// chos nyid ngang la 'od gsal ba// de ni rang byung ye shes la// bag chags ma lus yongs su smin// 'byung ba yum lngas bskyed pa'o// de tshe sgo lnga snang ba de// ye shes rin chen 'od gsal yin// tshogs brgyad dri ma phra rags kyang// bsal cing spangs pas mi 'dag ste// shes rab skye thabs rnam gnyis kyis// ma rig ling tog bsal ba yis// shes rab gsal ba'i spyan phye bas// dri med ka dag ngo la snang// de dag snang tshul 'od gsal ba// de yi rim bstan gong ltar snang// skad cig cha las 'dzin pa dag/ de yis dri ma rang dag 'gyur// zhes gsungs so// dri med ka dag chen po 'od gsal pa las/rig pa ka dag rin po che 'od gsal du bstan pa'i le'u ste gsum pa'o//// de nas yang gsang ba'i bdag pos zhus pa/ kye kye bcom ldan mtha' las 'das// chos sku ka nas ji ltar dag dri ma phra rags ci yis snang// dag pa'i thabs su gang rnams bstan// 'dus pa'i tshogs la gsung du gsol// zhes zhus so// ji bzhin rdzogs pa dpal gyi dpal// khrag 'thung rgyal pos bka' stsal pa// nyon cig rdo rje 'dzin sogs kun// chos sku ka nas 'di ltar dag/ chos sku dri med dag gsal la// gzung ba phra rags ka nas dag/ rig pa dri med rang gsal la// 'dzin pa phra rags ka nas dag/ de phyir gnyis med zang thal la// gnyis snang der 'dzin ka nas dag/ chos nyid dri med snying po ru// rig pa dri med rang gsal bas// chad pa'i dri ma ka nas dag/ rig pa dri med stong gsal la// chos nyid dri med stong gsal gyis// gnyis su med pas rgyas btab pas// rtag pa'i dri ma ka nas dag/ de dang mtshungs ba'i dri ma kun// ma bsal ka dag ye yin mod// 'dug tshul ngo bo gnas lugs ni// dri med nam mkha'i snying po la// rtog med rig pa'i snying po shar// stong gsal dbyer med rang gsal la// rang gdangs mi 'gag mtshan ma med// thugs rje'i sgo nas ma 'gags pas// mi 'gyur ba ni sa yi bdag nyid che// dri med kun 'dus chu yi bdag nyid che// gzung 'dzin rtog med me yi bdag nyid che// dbyings la yin nam/ gnyis la thogs med rlung gi bdag nyid che// rang gsal mi 'gag nam mkha'i bdag nyid che// 'byung ba nga yi bdag nyid chos kyi sku// rig pa nyag gcig 'gyur med lhun gyis grub// spros med mkha' la nyi ma shar ba bzhin// chos nyid klong na rig pa 'gyur med gnas// dri ma phra rags snang ba yang// 'gyur med 'od gsal rags par snang// dngos med spros bral 'od lnga 'phro// de stobs nyid kyis shin tu phra// yon tan snang char ngo ma shes// dri ma gzung 'dzin de yis byas// de phyir dri med 'od gsal yin// dag pa'i thabs su brda' dang ngag/ brdas mtshon sgras ni brjod pa yin// ngo bo snang tshul gnyis rtogs pas// dri med ka dag chos kyi sku// dri med dag pa'i nam mkha' la// dri med ka dag rang bzhin shar// zang thal gsang ba'i sgo bzhi nas// ma bsgribs ye shes spyan la gsum// rin chen 'od la phra rags gsum// mi gnas ka dag ngo la snang// gsal ba bkru ba ma byas par// dbugs dang bral bas rang dag 'gyur// zhes gsungs so// dri med ka dag gi rgyud rin po che 'od gsal chen po las/ chos sku ka nas dag pa rin po che 'od gsal 'bar ba bstan pa'i le'i ste bzhi pa'o//// de nas rdo rje 'dzin pas zhus pa/ kye kye bcom ldan mkhyen gsal rig/ shes rab sku lnga ka nas ji ltar dag/ shes rab sku lnga'i bzhugs tshul ji ltar gsal// dri ma phra rags rtsal snang ji ltar gsal// dag pa'i ngang du grol thabs ji ltar lags// 'dus pa'i tshogs la nges par bka' stsol cig/ rdo rje 'chang gis bka' stsal pa// rdo rje 'dzin pa nges zung zhig/ chos sku snying po 'byung lngar ldan// rang gi rig pa mi 'gag par// bum pa'i nang gi mar me bzhin// 'byung lnga'i go nas rig pa 'gyur// dbugs med 'gyu ba ye shes rlung// shes rab gsal ba lngar ldan pas// 'od kyi mtshan ma ka nas dag/gsal pa'i me tog shes rab sku lnga la// ma rig las byung yul gyi rjes 'brangs pas// dngos mtshan gzugs med rnam rtog chas// gsal 'grib skye dang 'gags par bcas// yid gnyis mtshan mar zhen snang ka nas dag/de med de 'dzin pa yi zhen pa ka nas dag/ shes rab sku lnga'i 'dug tshul ni// chos sku 'byung lnga'i rang bzhin can// mi g.yo gsal la mi rtog pa// phyogs lhung med pa'i shes rab la// chos sku dran rtog med pa'i thugs// snying po bcud 'dril mtshan ma med pa'i sku// sku yi rang bzhin snying po 'byung ba lnga// dngos med 'gyur med yon tan dri ma med// thog ma gnyis med 'byung ba lnga yi bdag/de ltar ma 'gags rig pa'i ye shes rlung// dbugs med 'gyu ba shes rab ngor snang ba// sa rlung dal gsal sku lnga 'char ba'i rgyu// chu yi rlung 'gyus sku lnga'i ngo bor 'gril// me yi rlung 'gyus sku lnga phyag rgyar rdzogs// rlung gi rlung 'gyus chos nyid klong du bskyod// sku mdog phyag rgya ma 'dres so sor gsal// rang bzhin ma 'gags brjod du med pa'i gsung// shes rab don la mtshan ma'i phyag rgya med// shes rab rang bzhin ye nas gsal ba la// sprul ba'i sku lnga wal le khyug ge gsal// dngos mtshan med pas gdul byas mthong ba med// shes rab yin pas rang gsal 'gag pa med// yid 'das kun tu rgyu bas gzung 'dzin med// 'dus byas tsam la sgyu ma tsam snang ngang// yid kyi yul 'gyur phyogs mthun mtshan ma yang// shes rab sku lnga rin chen 'od gsal te// rlung gi stobs las yid kyi rnam pa byung// rlung lnga 'thabs pas 'byung lnga rdzogs par byas// chos nyid klong na ye shes sgyu ma tsam// me long gzugs snang chu zla 'ja' tshon tsam// ma 'gags dngos med ma 'dres so sor snang// phyi nang blos btags shes rab sku bsgribs kyang// shes rab ngo la dngos mtshan ka nas dag/ de tsam snang ba shes rab sku yi gdangs// de ltar rtogs pa ka dag shes rab dang// so sor rtog pa'i shes rab ngo la gsal// dbugs dang bral bas dri ma rang dag 'gyur// chu lbu'i nang du byad kyi gdangs shar bzhin// stong gsal ma 'gags shin tu phra ba'i bdag/ man shel klong na ma 'dres gsal ba ltar// chos sku dri med zang thal ngang na gsal// zhes gsungs so// dri me ka dag gi rgyud rin po che 'od gsal chen po las/ shes rab ka dag gi rin po che 'od gsal bar bstan pa'i le'u ste lnga pa'o//// de nas rdo rje 'dzin pas zhus pa/ kye kye bcom ldan thugs rje can// sprul sku ka nas ji ltar dag sprul sku'i gnas lugs ji ltar bzhugs// dri ma phra rags ci las byung// dri ma gnyis po dag pa'i dag lugs gang/ zhes zhus so// rang byung thugs rjes bka' stsal ba// chos nyid ka nas dag pa yi// me long g.ya' dag lta bu la// rang byung ye shes zer shar ba// mi 'gyu ba yi 'gyu ba ste// ye shes rlung gis zer lnga bskyed// thugs rje rgyun gyi thag par shar// chos nyid dag pa'i klong du 'khyil// 'byung ba lnga yi rlung chen gyis// bskyed bsdus smin bskyed lnga byas pas// chos sku'i 'bras bu gzugs skur smin// mi bskyod rin 'byung mtha' yas grub// snang mdzad kun tu zhal du shar// de ni chos sku sprul pa'i sku// shes rab sku yi rtsal stobs yin// phyis ni gdul bya rang snang la// 'dul byed rig pa rang snang gsal// shes bya'i dkyil 'khor 'od du gsal// rang byung sku lnga 'od kyi sbubs nas 'thon// che ba'i ye shes ma btsal lhun gyis grub/ thugs rje'i rgyud las thun mong gdul bya sgrol// dri med sku gsung thugs las g.yos pa med// bag chags spubs su gzugs phung zhi ba'i sku// phra rags sgrib pa rtog ge'i ngang la snang// sku lnga'i yon tan rin chen 'bar ba'i 'od// ngo bo ka dag phra rags gdod nas med// de ltar rtogs pas theg pa brgyad po ltar// rtsol bsgrub ma byas dri ma ka nas dag/ma btsal lhun grub sku dag ye shes gsal// so sor rtog pa'i shes rab spyan ngo la// dbugs dang bcas nas snying po gzhi la rdzogs// sgrib med ye shes 'gro ba kun la khyab// dbugs dang bral ba'i ka dag klong na gsal// ye shes 'od kyi bum pa'i gsang rum nas// phyag rgya'i snang ba gang bstan ngang du gnas// sku dang ye shes rgyu yin klong du thim// shes rab sku la mtshan ma'i gzugs med pas// mtshan ma'i sku la rtog pa mi mnga' bar// ye shes klong na tha dad med par bzhugs// zhes gsungs so// dri med ka dag rin po che 'od gsal chen po'i rgyud las/ sprul sku ka dag rin po che 'od gsal bar bstan pa'i le'u ste drug pa'o//// rdo rje 'dzin pas yang zhus pa// kye kye bcom ldan ye shes thugs// ye shes ka dag ji ltar dag/ rang gi ngo bo ji ltar gnas// dri gsum snang ba ci yis snang/ dri ma dag par gang gis byed// 'dus pa'i tshogs la gsung du gsol// zhes zhus so// bcom ldan 'das kyis bka' stsal pa/ e ma ho// rdo rje 'dzin pa la sogs nyon// dang por rgyu med rang byung ye shes ngang// bar du rkyen med bde ba chen po'i ngang/ ma bcos 'bras bu ye shes rnam lngar snang// 'dus byas 'phral byung ka nas dag pa'i don// phyogs lhung med pa'i shes rab las// 'byed pa med pa'i shes rab shar// ma rig gti mug ka nas dag/ dri ma phra ba'i phra ba dag/ 'byed pa med pa'i shes rab dang// mnyam nyid bde bar khod bsnyams pas// nga rgyal phrag dog dri ma phra pa med// shes rab rang gsal rang snang la// chags sdang skye ba'i yul med pas// rags pa'i dri ma ka nas dag/ ye shes rang gi 'dug tshul ni// rnam grangs brtsi lugs grangs med kyang// blo nyams phyogs tsam cha mthun yin// nges pa'i 'dug tshul ye shes lnga// lnga po gsum 'dus de nyid nyag gcig dang/ chos rnams 'byung gnas ka nas dag/ ka dag dbyings nyid chos sku ye shes nyid// snying po 'bru lnga phud che// de dang bral ba de nyid rang dag 'gyur// zhes gsungs so// dri med ka dag gi rgyud rin po che 'od gsal ba las/ shes rab ka dag rin po che 'od du bstan pa'i le'u ste brgyad pa'o//// de nas yang gsang ba'i bdag pos zhus pa// kye kye bcom ldan mi g.yo mgon// dgongs pa ka dag ji ltar dag/ dgongs pa'i 'dug tshul gang dang gang// phra rags snang ba gang las byung// bsal zhing bri ba'i thabs rnams gang/ 'dus pa'i tshogs la bshad du gsol// zhes zhus so// mi g.yo mgon gyis bka' stsal pa// e ma rdo rje 'dzin la sogs// ma bcos ngang las g.yos med rtog pa med// rgya mtsho 'dra ste mi g.yo yul med pas// rags pa'i dri ma snang ba ka nas dag/rang byung sku dang ye shes mi 'gag pas// don gyi ngo la gsal 'grib gdod nas med// de phyir rang bzhin me stag lta bu la// bying rmugs myos 'thibs ka nas dag/ ka dag rang gi dgongs pa la// rang gi 'dug tshul bag chags kyi// zhen pa ye nas rnam par dag/ de phyir phra ba'i phra ba dag/ rang gi 'dug tshul gcig las med mod kyang// blo dang sbyar nas rnam pa gnyis su bstan// bsgom du yod dang med dang rnam pa gnyis// bsgom du med pa'i don bstan pa// bsgom bya sku dang ye shes gnyis// rang gi rig par ye gnas pas// rig pa rgyun chad med pa la// ma rmugs gsal pa'i rtogs mtha' bral// ngang bzhag bsam bral nyid du bde// bsgoms na dgongs pa'i dgra gnyis gzhom// mi rtog pa yi dgra rgod pas// gsal ba'i dgra yang bying bas bsal// bya ba btang la dal bar bsdad// dbang po lnga yi sgo mi bcad// blo 'phang bstod pa rgod pa na// mig yang mi bsgul gzhag par bya// dbugs kyang cung zad tsam bzung ste// 'og sgo lhod la blo 'phang smad// grang sar mi bsdad chang bzang po// mi bzi tsam btung thun bzung ngo// rkun ma gnyis po mel tshes bsrung/ ma tshor yid la byed pa ye// dgongs pa rang sar bskul ba ni// yid rtog rkun bus mi rtog brku// 'on tang dgongs pa dngos po'i gshis// de ni bsgom pa'i bslab thabs so// ma bcos ngang gis de la gnas// bying rgod ma shor rang bzhin no// gsal la mi rtog de nyid mi 'byed pas// bdag nyid chen po rang rig rgyal por bzhag/ sku gsum rang bzhin rin chen 'od gsal ba// de yis mngon du gyur ba yin// nyams stobs mthong snang rang bzhin shugs kyis 'char// nyin gyi rigs la ji bzhin brda' la blta// snang ba phyung la yun du dmigs la gtad// mtshan gyi rigs la sgron ma'i snang ba blta// nyal ba'i dus su ma bcos ngang la bzhag/ rlung gi rta la rig pa'i sku rgyu ba// kha dang thugs su rang snang snang ba shar// bag la nyal ba mngon du dbyung ba'i thabs// gong bstan bzhin du bzhag nas dbyung// dri ma phra rags tsam du snang ba yang// rang gi dri ma 'od du dbyung// rang bzhin yon tan rin chen 'od gsal du// 'phro rgod rtog dpyod rang gi rtsal yin pas// blo dman dag gi blo yi dri ma yang// rtogs ldan ngo la rin chen 'od du gsal// de ltar rtogs pas rtsol ba ma byas par// shes pa'i ngo la da lta nyid nas dag/ dbugs dang bral nas ka dag ngang la gnas// zhes gsungs so// dri med ka dag rin po che 'od gsal ba'i rgyud las/ dgongs pa ka dag 'od gsal du bstan pa'i le'u ste dgu pa'o//// de nas ston pas gdams pa/ e ma ho rdo rje lag na 'chang// gsang ba'i don ni ngas bshad rgyud// kun la ma bstan rin chen gter du sbos// skal ldan can gyi bdud rtsi sman// skal med dug tu gyur ta re// zhes gsungs so// e ma ho rdo rje 'chang chen pos// dri med ka dag rin chen 'od gsal 'di// dri med dgongs pa 'dis rtogs pas// blo yi rnam rtog kun dang bral// mgon po nyid la rjes yi rang// zhes gsungs so// dri med ka dag 'od gsal chen po'i rgyud las/rgyud gtad pa dang/ rjes su yi rang ba'i le'u ste bcu pa'o//// rdzogs pa chen po dri med ka dag gi rgyud rdzogs so//// rgya gar skad du/

CLOSE WINDOW