296a4 /// rgya gar skad du/ sarba bud+d+hau0f85shA ya su ra saM gra ha gi ri ku Ta tan+t+ra/ bod skad du/ sangs rgyas kun gyi dgongs pa'i bcud bsdus ri bo brtsegs pa'i rgyud/ dam pa dang po'i
296a5 sangs rgyas ka dag rnam par snang ba'i sku la phyag 'tshal lo// 'di skad bdag gis rtogs shing bshad pa'i dus gcig na/ kun gzhi mkha' klong rnam par dag pa'i gnas/ rin po che 'od sna tshogs 'phro ba'i
296a6 gdangs/dbyings rnam par dag pa'i klong kun gzhi'i pho brang/ rtsal zer yan lag 'od gsal kun 'byung gi mkha'/ sems nyid khyab gdal chen po'i dkyil 'khor/ rang bzhin gyis 'od gsal ba/ de nyid du
296b1 rnam par dag pa/rgyu rkyen 'pho 'gyur med pa/ skye 'gag gnyis su med par rang grol ba/ rang byung 'od gsal rnam dag bsam mi khyab kyi lha khang ni 'phro 'du dang 'phel 'grib med pa'i gnas so// gnas de na
296b2 ye thog ma'i sangs rgyas/ka dag dngos med zang ka mi snang gsal ba'i rang bzhin du bzhugs so// ston pa de nyid las mi gzhan rang byung rang dngas kyi 'khor la/ chos kyi dbyings kyi bstan pa/ ye med mtshon
296b3 med blo 'das tha snyad ming las 'das pa'i theg pa/ngag tu mi gsung byin gyis rlabs kyis gsungs so// ye thog gzhi'i ston 'khor ro// byin gyis rlabs kyi ston pa ni/ dam pa dang po'i sangs rgyas kun gyi spyi
296b4 phud bya ba bzhugs so// des 'od gsal rnam dag dkyil 'khor la/ bya btsal rtsol bsgrub med pa'i bstan pa gsungs so// ye shes mthu'i ston pa ni/ rang bzhin kun tu bzang pos/ rdo rje sems dpa'
296b5 la thugs kyi bstan pa byin gyis rlabs kyis bshad/sngon byung phun sum tshogs pa lnga'o// de'i rjes 'jug phun sum tshogs pa lnga ni/ ston pa rdo rje sems dpa' yis// sems lhag can sogs 'khor rnams
296b6 la// gsang sngags yang ti spyi theg bshad// 'od gsal gnas bshad ngo bo dus// rjes 'jug phun sum tshogs pa lnga'o// de'i gdung gsob phun sum tshogs pa lnga ni/ u rgyan gnas su dga' rab rdo rje
297a1 yis// 'jam dpal bshes gnyen la sogs 'khor rnams la// rgyud sde spyi bshad rig 'dzin rig pas brgyud// gdung gsob phun sum tshogs pa lnga'o// ye thog ston pa'i rjes 'jug gdung 'tshob
297a2 pa'o// dam pa dang po'i rjes 'jug gdung 'tshob ni// de yi rjes 'jug 'od gsal snang mdzad kyis// 'og min gnas su sa bcu'i 'khor la bshad// gsang sngags bstan pa rang gi ngo bo yis// de yi gdung
297a3 'tshob phun sum tshogs lnga ni// gsang ba'i gnas su ston pa he ru kas// gsang sngags bskyed rim zhi khro'i 'khor la bshad// dus ni mtshan ma sna tshogs dus// dam pa dang po'i gdung gsob bo// rdo rje sems
297a4 dpa'i gdung 'tshob rjes 'jug ni// khang bzang gnas su sprul sku'i ston pa yis// mos tshang kun dga' bo la sde snod rnam gsum bshad// sprul skus tshig tu bsdebs te bshad pa'i dus// de yi gdung 'tshob phun
297a5 sum tshogs lnga ni// kun dga' bo yis 'dzam gling phug pa ru// dge slong lnga brgya'i 'khor la mdo sde 'dul ba bshad// dus ni tshig bsdebs bshad pa'i dus// rdo rje sems dpa'i rjes 'jug gdung 'tshob
297a6 bo// mdor bsdus phun sum tshogs lnga ni// rang bzhin ngo bo thugs rje gsum// chos sku skye ba med pa'i ston pa dang/ longs sku ye shes mthu yi ston pa dang/ sprul sku byin gyis rlabs kyi ston pa ni// skye med ye
297b1 shes byin rlabs ston pa yis// ston pa phun sum tshogs pas bshad// chos sku gsung du med pa'i bstan pa dang/ longs sku rang gi ngo bos bstan pa dang// sprul sku gsung du brjod pa'i bstan pa dang/ med dang
297b2 ngo bo brjod pa ni// bstan pa phun sum tshogs par bshad// longs sku sprul sku sems dpa' chos sku'i 'khor// sa bcu rigs lnga yab yum longs spyod rdzogs pa'i 'khor// rigs drug sde brgyad 'dod 'dus
297b3 sprul sku'i 'khor// rang rgyud 'brel dang don gyis gcig/ 'dod pas bsdus pa'i 'khor rnams ni// 'khor ni phun sum tshogs par bshad// chos dbyings rnam par dag pa chos sku'i gnas// khyad par 'og min
297b4 longs spyod rdzogs pa'i gnas// khang bzang sprul pa sku yi gnas// thams cad sdud dang khyad par 'phags// khang bzang sprul pa bzhugs gnas ni// gnas ni phun sum tshogs par bshad// chos skus byin gyi
297b5 rlabs kyis bshad pa'i dus// longs skus rang gi ngo bos bshad pa'i dus// sprul skus tshig tu bsdebs te bshad pa'i dus// 'das dang ma 'ongs da lta gsum// dus ni phun sum tshogs par bshad// sngon byung
297b6 rjes 'jug gdung gsob de bzhin no// gcig dang 'brel dang gtan la 'bebs// ma tshad med dang dgos pa tshang// rgyud kyi phun sum tshogs pa'o// zhes gsungs so// sangs rgyas kun gyi dgongs pa'i bcud
298a1 'dus ri bo brtsegs pa'i rgyud las/phun sum tshogs pa gsal bar bstan pa'i le'u ste dang po'o//// de nas ye thog ka dag sangs rgyas la// rang byung ngang dngas khye'u chung gis// phyag
298a2 btsal pus btsugs thal mo sbyar te gus pas 'di skad zhus/a tha tiSh+Tha ma hA su kha ho/ phun sum tshogs pa'i don ni de ltar na// gang yang med pa'i sngon rol na// sngon thog dus na ji ltar gnas// sangs rgyas
298a3 sems can gzhi ni ji ltar gnas// yar rgyas mar 'khrul skyon ni gang nas byung// de gnyis skyon dang yon tan ji ltar lags// snying po ka dag gang gis rtogs// byar med blo 'das ji ltar lags// dngos med
298a4 rnal ma gang gis thob// sangs rgyas kun gyi thugs kyi bcud// dgongs pa'i bcud 'dir ji ltar 'dus// ri bo brtsegs pa dpe yes ji ltar bstan// gsang sngags brda' yis ji ltar bshad// ma bsgrubs
298a5 'bras bu ji ltar 'thob// theg dgu'i blta bsgom ji ltar lags// de las spyi ti gang gis spags// spyi ti yo ga'i don rtogs nas// gol sgrib 'khrul pa yod dam med// shas med blo 'das la chen gang du
298a6 bzla// 'khor gyis don dris bco brgyad po// ston pas 'khor la gnang bar zhu// shin tu zab par bka' stsol cig/ ces zhu ba phul lo// ri bo brtsegs pa'i rgyud las/ gleng slong ba'i le'u ste gnyis
298b1 pa'o//// de nas ngang dngas khye'u chung gis// ye thog ka dag sangs rgyas la// gang yang med pa'i sngon rol na/ sngon thog dus na ji ltar gnas// zhes zhus pas/ ye thog ka dag sangs rgyas kyis// 'od dang
298b2 rtsal dang shes rig dran sems dang// 'gyu ba yid dang yan lag 'gag med 'khor// rang byung ngang gsal 'gag med 'khor// rang byung ngang dag 'od gsal 'khor// sa chu me rlung nam mkha' dang// 'dod
298b3 chags zhe sdang gti mug nga rgyal phrag dog lnga/de sogs dug lnga rtog tshogs nyon mongs 'khor rnams dang// 'dzam gling mi rnams lha srin sde brgyad dang// snang srid skye 'gul yod med rtag chad dang// sa bcu'i
298b4 byang chub sems dpa' rgyal ba rigs lnga dang// rnal 'byor rnam bzhi skal ldan mos tshogs dang// ngang dngas gsal dag 'khor tshogs la// thog ma'i kun bzang ka dag rnal ma yi// sku dang gsung thugs yon
298b5 tan phrin las lngas// 'od zer rnam lnga phyogs bcu kun tu 'phros// sems can rnams kyi ngan song gsum// sbyong bar byed pa'i 'od 'phros pas// nyon mongs pas ni sems 'khrugs pas// mi shes 'dam du bying
298b6 ba yi// sems can kun la sman pa dang// khyab bdag bdag la sman pa dang// bdag don bdag la thugs brtse'i phyir// nyon mongs ma lus bsal ba dang// mi shes ma lus shes bya'i phyir// dbang ngo bsam pa
299a1 mkhyen mchog gis// bsam pa'i khyad par ji bzhin du// blo dang gang mthun theg pa yis// bla med 'bras bu thob bya'i phyir// sems can rnams dang mos tshogs 'khor// byang chub rang chas sangs
299a2 rgyas gcer mthong bshad// 'khor rnams ma yengs gus pas nyon// a a tiSh+tha b+ho ye d+harma d+hA tu hr-i da ya ma hA su kha ho/ b+ha ta d+harma sarba d+ha tu thu la hri da ya a/ sngon thog sngon med ming dang bral na yang// mi 'bral
299a3 shes phyir ngang dngas 'khor la bshad// gang yang med pa'i sngon rol na// tha snyad ming gis mi phebs te// rnam pa kun ldan rnam pa med// dngos med zang ka rnal ma de// ka dag gzhi med kun gyi gzhi// cang med
299a4 cir snang ye med de// shes med ngang dngas stong sang nge// de nyid rnam shes yul las 'das// dang po'i sangs rgyas rgyu med pas// thog ma med pas spros med pa'o// sangs rgyas thog ma tha ma med// yang dag
299a5 mtha' la rnam par gnas// yang dag bdag med de bzhin nyid// ye shes gnyis med tshul 'chang ba// ye shes ldan pa yod med shes// ye shes mig gcig gdod nas dag/ rnam par rtog med lhun gyis
299a6 grub// thug pa med pa dpe med pa// mi mngon mi snang gsal byed min// mi 'gyur kun 'gro khyab pa de// dper bya kun las 'das pa'o// ming tsam 'di zhes bstan par ni// ka dag sangs rgyas mtshon du
299b1 med// dngos med blo 'das tha snyad med// ces gsungs so// sangs rgyas kun gyi dgongs pa'i bcud 'dus ri bo brtsegs pa'i rgyud las/ gang yang med pa'i sngon rol na/ dngos med shes med mtshon med ka
299b2 dag tha snyad dang dpe dang tshig dang yi ge las 'das par bstan pa'i le'u stai gsum pa'o//// de nas ngang dngas 'od 'bar gyis/ ye thog ka dag sangs rgyas la// sangs rgyas sems can gzhi ni ji
299b3 ltar lags// zhes zhus pa dang/ ston pas 'khor la bka' stsal pa// ka dag ngang la bye brag med na yang// rtsal gyi rig pa bshad kyis nyon// sangs rgyas sems can 'khor 'das gzhi// khyab gzhi g.yo gzhi
299b4 'byung gzhi ni// kun gzhi mkha' klong brdal khyab n-i// sangs rgyas sems can 'khor 'das gzhi// dngos med mnyam pa'i klong na kun 'byung mdzod po che// rtsal zer sna tshogs 'byung ba'i bang mdzod yin// rgya
299b5 mtsho sa gser bang mdzod bzhin// mnyam pas skye 'byung zad med 'gyur ba med// ces gsungs so// ri bo brtsegs pa'i rgyud las/ sangs rgyas sems can gyi gzhi bstan pa'i le'u ste bzhi pa'o//// de
299b6 nas ngang dngas gsal dag gis// ye thog ka dag sangs rgyas la// gnyis ka'i gzhi ru mnyam pa na// yar rgyas mar 'khrul skyon ni gang nas byung// zhus pa dang/ ston pas 'khor la bkal stsal ba// snying pos
300a1 khyab par mnyam pa la// rig dang ma rig rnam gnyis las// yar rgyas mar 'khrul gnyis su byung// 'gyu dang mi 'gyu rnam gnyis las// sku gsum dug gsum gnyis su byung// 'gyur dang mi
300a2 'gyur rnam gnyis las// thog ma'i sangs rgyas 'khrul pa byung/ zin dang ma zin rnam gnyis las// shes mi shes ni gnyis su byung// 'phrad dang ma 'phrad rnam gnyis las// 'char sgo 'khrul sgo gnyis su
300a3 byung// rtogs dang ma rtogs rnam gnyis las// sku gsum khams gsum gnyis su byung// ngo bo gcig la snang tshul gnyis// rtogs dang ma rtogs gnyis su byung// gcig min gnyis ni yin ma yin// phug ron
300a4 ska dang ga pur 'dra// ngo bo gcig la snang tshul gnyis// rkyen dang gang 'phrad sman dug gnyis// dngos med kun byed gzhi gcig la// rtogs dang ma rtogs rnam gnyis las// sangs rgyas sems can gnyis su
300a5 byung// gzhi gcig shugs la ldog bcas gnyis// sngon la gar skyes ldog bcas so// don rtogs ka dag chos kyi sku// ma rtogs 'gro drug 'khor bar 'khyams// zhes gsungs so// ri bo brtsegs pa'i rgyud
300a6 las/yar rgyas mar 'khrul bstan pa'i le'u ste lnga pa'o//// de nas ngang dngas gsal dag gis// ye thog ka dag sangs rgyas la// de nyid skyon dang yon tan ji ltar lags// zhes zhus pa las/ ston
300b1 pas 'khor la bka' stsal pa// rtogs na skyon yon gnyis med de// ma rtogs blo la skyon yon byung// skyon gyi rtsa ba rlung g.yos yin// ye shes rlung gyur yid rtog skye ma nus// rig pa snying por thim pas 'gyu ma
300b2 nus// snying po rig par thim pas thog mar ye sangs rgyas// snying po ma dang 'phrad pas ye shes rang sa zin// rig yid ma rig rtsad chod 'khrul pa ka nas dag/ snying po'i klong du yon tan bsam mi khyab// rtogs
300b3 tshad mkhyen tshad yon tan brjod mi langs// nam mkha'i khams dang nyi zla nor bu'i tshul// zhes gsungs so// ri bo brtsegs pa'i rgyud las/ ka dag sangs rgyas kyi yon tan bstan pa'i le'u ste drug
300b4 pa'o//// de nas ngang dngas gsal dag gis// thog ma'i sangs rgyas kun bzang la// ma rig 'khrul pa'i skyon ni gang nas byung// zhes zhus pa dang/ ston pas 'khor la bka' stsal pa// skyon ni rlung dang
300b5 ma rig pa// mnyam pa'i rang bzhin mi shes ma rig rlung// rlung gis rkyen byas rig pas sa ma zin// rig pas sa ma zin pas yid rtog skyes// yin nam min nam ming gi rnam grangs skyes// ming la brtags pas
300b6 sems su 'dod pa skyes// skyon gyi rtsa ba rlung rig ngar 'dzin gyis// ldog thabs mi shes yid kyi 'dod zhen skyes// de rnams stobs kyis 'od gzugs kha mig can// de yi skyon gyis nyon mongs drug tu skyes//
301a1 bdag 'dzin dug lnga 'gong po nga bdag gis// rigs drug sems can 'khrul pas 'khor bar 'khyams// gzung 'dzin yul sems phyogs ris dgag bsgrub skyon// snang brtags chags sdang skyon
301a2 la brjod mi langs// rtsa ba yid gnyis nga bdag zhe 'dod dug gsum skyon gyi rtsa ba yin// zhes sungs so// ri bo brtsegs pa'i rgyud las/ skyon gyi rtsa ba bstan pa'i le'u ste bdun pa'o//// de nas ngang
301a3 dngas gsal dag gis/ye thog ka dag sangs rgyas la// snying po ka dag gang gis rtogs// zhes zhus pas// ston pas 'khor la bka' stsal pa// snying po bcud spungs gnad chen bshad// 'od gsal ngang
301a4 dngas thugs la chongs// snying po ka dag rtogs thabs la// zhe 'dod bya rtsal rtsol bsgrub bzhag/ mi blta mi bsgom mi spyod blo las 'das// dngos med ka dag zang ma de// bya btsal bsam 'das mtshon du
301a5 med// blo 'das bsam bral dgongs pa rtogs// rtogs pa'i dus na shes brjod mtha' dang bral// dngos med kun dngos cang med cir snang de// ye med min te sna tshogs snang/ sna tshogs snang la dngos gzhi
301a6 med// cang med ma yin gnyis su snang/ gnyis su ma grub gcig tu 'dug/ gcig tu mi 'dug dngos po med// dngos med mtshan nyid blo las 'das// re zhig mtshon na gsal stong dbyer med de// rang byung
301b1 'od gsal ngang dngas rnam par dag/gsal dngas sang nge dngas la go skabs med// de yis snying po ka dag rtogs// ci yang ma yin byang chub sems// dngos med rtsis gdab blo las 'das pa'o// snying po
301b2 bcud spungs gdams ngag gnad// ces gsungs so// ri bo brtsegs pa'i rgyud las/ snying po ka dag rtogs pa'i le'u ste brgyad pa'o//// de nas ngang dngas gsal dag gis/ ye thog ka dag sangs rgyas
301b3 la// byar med blo 'das ji ltar lags// zhes zhus pas/ ston pas 'khor la bka' stsal pa/ byar med blo 'das ngas bshad kyis// 'khor rnams ma yengs gus pas nyon// dgu rtse spyi ti yo ga ni// bya btsal
301b4 rtsol ba mi byed de// ma bcos ngang la bzhag pas chog/ byas pa'i chos rnams 'jig pa'i phyir// ma byas rang byung chos shig bshad// rtsol bsgrub chos rnams yid smon yin// rtsol med bsgrub med chos shig
301b5 bshad// zhe 'dod bsam dpyad blo yi chos// zhe 'dod bsam bral blo 'das chos shig bshad// ces gsungs so// ri bo brtsegs pa'i rgyud las/ byar med blo 'das bshad pa'i le'u ste dgu
301b6 pa'o//// de nas ngang dngas gsal dag gis// ye thog ka dag sangs rgyas la// dngos med rnal ma gang gis thob// ces zhus pas/ ston pas 'khor la bka' stsal ba// dngos med rnal ma thob thabs
302a1 ni// lus ngag yid gsum rtsol bzhag la// mi blta mi bsgom spyod thob med// dngos med ye shes blo las 'das// gsal stong ngang la mi 'bral ba// sang nge sal le dngos mtshan med// gang yang
302a2 mi rtog bsam las 'das// dngos med rnal ma zang ka la// gang la sems med rtog 'dzin med// yid rig dran bsam blo las 'das// zhe 'dod rtsis gdab med pas thob// thob pa'i dus na dngos med blo
302a3 las 'das// snang srid chos la dbye bsal 'das// zhes gsungs so// ri bo brtsegs pa'i rgyud las/ dngos med thob pa'i le'u ste bcu pa'o//// de nas ngang dngas gsal dag gis// ye thog ka dag
302a4 sangs rgyas la// sangs rgyas kun gyi thugs kyi bcud// dgongs pa'i yang snying ji ltar 'dus// zhes zhus pa dang/ ston pas 'khor la bka' stsal pa// dgongs pa'i yang snying bcud 'dus ngas bshad
302a5 kyis// 'khor rnams ma yengs thugs la zhog/ a tha tiSh+Tha/ badzra satwa b+ho/ a sid+d+hi a a/ bud+d+ha sarba ma la tiSh+Tha thu la du na a a/ de nas ye thog sangs rgyas kyis// de bzhin gshegs pa thams cad kyi// thugs kyi
302a6 yang snying dgongs pa'i bcud// sangs rgyas kun gyi dgongs 'dus bshad// 'od gsal ngang dngas yid la chongs// dngos med ka dag brjod 'das kyang// blo dman rtogs pa skye phyir bshad// chos nyid rnam
302b1 par dag pas na// chos kun rang bzhin rnam dag pa// de bzhin gshegs pa thams cad kyi// thugs kyi yang snying bcud 'dus 'di// dgongs pa'i mdo rnams gcig bsdus pa// ye med ka dag dngos med kun
302b2 byed ni// spyod pa thams cad dang bral ba// mtha' dang dbus ni mi dmigs pa// sgro skur med pa blang dor med// rgyu 'bras las 'das pa/ ye nas dag pa/ ye nas zin pa/ bya ba med pa/ btsal pa med pa/
302b3 bsgrub pa med pa/ btsal du med pa/ gzhan nas mi 'byung ba/ gnyen po med pa/ byed pa po med pa/ ma byas pa/ ma brtags pa/ bdag med pa/ ma bcos pa/ de yin pa/ nges pa/ ma nor ba/ ji bzhin pa/ ma
302b4 'gags pa/ma skyes pa/ mi nub pa/ ma lhags pa/ mi snang ba/ ma byung ba// mi 'gro ba/ ye nas gnas pa/ kun la khyab pa/ ming med pa/ gzugs med pa/ mtshan ma med pa/ tha snyad med pa/ bltar med pa/
302b5 gzung du med pa/ mtshon du med pa/ dpe med pa/ tshad med pa/ brtag tu med pa/ rtog ge las 'das pa/ dpag tu med pa/ bsam du med pa/ bsam gyis mi khyab pa/ kun gyi 'byung gnas/ thams cad
302b6 nas thams cad du btang snyoms chen po'o// stong pa nyid las rig par shar// rang byung ngang dngas byung sar thim// skye med ka dag blo las 'das// dngos med ka dag zang ka ye dag rnal ma shes// snying po
303a1 yang snying bcud 'dus de kho na'o// ye thog ka dag gi sangs rgyas kyi thugs kyi yang snying dgongs pa'i bcud bsdus pa'i dpe ni/ shel gong/ gser dang/ nam mkha'/ nyi zla/ nor bu/ chu shing/ rgya
303a2 mtsho'i tshul/ka dag 'gyur med phyogs dang bral// 'od gsal kun khyab dngos med g.yo rtsol med// ces gsungs so// ri bo brtsegs pa'i rgyud las/ ye thog ka dag sangs rgyas kyi dgongs pa'i bcud bsdus
303a3 bstan pa'i le'u ste bcu gcig pa'o//// de nas 'od gsal ngang dngas kyis// ye thog ka dag sangs rgyas la// dus gsum sangs rgyas thams cad kyi// thugs kyi yang snying gsal ba'i bcud 'dus
303a4 gsung du gsol// zhes zhus pa dang/ ston pas 'khor la bka' stsal pa// dam pa dang po'i sangs rgyas 'od mi 'gyur bas gsungs pa/ chos kun rang bzhin med pa nyid// mya ngan 'das shes de la bya// stong nyid
303a5 rang bzhin rnam par dag/de nyid mi gnas blo las 'das// zhes gsungs so// de nas rang byung ngang dngas kyis// 'di skad gsungs so// sems can gyis sangs rgyas rnams kyi gsal ba'i yang snying bcud
303a6 'dus/ye med gdod nas ka dag zang ka rnal ma blo 'das de mthong na// ye ji bzhin pa'i ngo bo ka dag zang ka mthong ba yin no// mthong med dngos bral dmigs med de ni mthong ba yin no// de la ni chos rdul
303b1 tsam yang mi dmigs so// de ni nam mkha'i mtshan nyid de/ de la ni byang chub par bya ba yang med la grub par bya ba yang med/ de la sems can du gdags pa yang med do// chos can yang med la/ chos can du
303b2 gdags pa yang med do// de ci'i phyir zhe na/ chos thams cad ka nas dag pa'i byang chub sems te/ nam mkha' ni mtshan nyid thams cad dang bral ba'o// de'i phyir na byang chub ni/ ye med ka dag blo 'das las
303b3 btsal bar bya'o// ka dag dngos med zang ka de// rang bzhin gyis yongs su dag pa'i phyir// dngos po med cing blo'i byed pa po las 'das pas/ nang na yang med/ phyi rol na yang med/ gnyis ka med par
303b4 yang mi dmigs so// de la sangs rgyas kyis ma gzigs mi gzigs gzigs par mi 'gyur ro// ji ltar ma gzigs na/ kha dog dbyibs dang mun par ma gzigs so// pho mo ma ning khams gsum ji lta bur
303b5 yang ma gzigs so// ka dag dngos med blo 'das ni// ming du btags pa yang med do// ming du btags pa thams cad ni bla dgas su rig par bya'o// de'i phyir na sangs rgyas ni bla
303b6 dgas so// chos ni bla dgas so// dge 'dun yang bla dgas so// de bzhin du dbyings dang ye shes dang/ chos kyi sku dang/ sku tha dad pa dang/ sems can du 'jig rten la sogs pa thams cad du btags shing chags pa ji snyed pa bla
304a1 dgas 'ba' zhig tu rig par bya'o// bla dgas gang yin pa de ni glo bur du ming du btags pa ste/ ye nas ldan pa ma yin no// gal te ye nas ldan pa zhig yin na ni/ gang glo bur ba thams cad
304a2 phyis mi 'byung bar 'gyur ro// gang la m-ing btags gzhi med/ rgyu btags chags pa grub pa yin/ de ni byar med byas so yin// mi snang ba la kun snang ba// thams cad thams cad glo bur snang// snang nyid med
304a3 pa'i snying po de// yod med gnyis su dmigs pa med// sangs rgyas med la sangs rgyas dang// byang chub nyid la sogs pa yi// tha snyad ming gi bla dgas rnams// mi shes blo la bstan phyir btags// de la
304a4 dngos gzhi ga la yod// thams cad nas thams cad du bla dgas kyi mtshan ma med do// rnam pa med do// yul med do// 'jug pa med do// sangs pa med do// lung bstan pa med do// nges par rnyed pa med
304a5 do// ye med ka dag ye gsal rnal ma blo 'das te// thams cad nas thams cad du byang chub pa nyid do// stong pa nyid do// de kho na nyid do// nges pa dam pa nyid do// gzhan ma yin pa nyid
304a6 do// skye ba med pa nyid do// 'gag pa med pa nyid do// de bzhin nyid do// ma nor ba de bzhin nyid do// chos nyid do// chos kyi dbyings nyid do// bsam gyis mi khyab pa bsam du med pa nyid do// de dag thams cad kyang dngos po ka
304b1 dag blo 'das nyid do// ka nas dag pa zang ka de la/ gcig dang/ mang po dang/ gcig mang por snang ba dang/ mang po gcig tu 'gyur ba de la ni/ gcig ces bya ba blo las 'das pa'o// tha dad zhes pa gnyis
304b2 snang las grol ba'o// zhes gsungs so// de nas sangs rgyas kun tu bzang pos/ thugs kyi yang snying bka' stsal pa/ rang bzhin gcig pa dang/ ma gos pa dang/ go 'byed pa dang/ skye ba med pa dang/ 'jig pa
304b3 med pa dang/dbyibs med pa dang/ kha dog med pa dang/ 'dus ma byas pa dang/ gzung ba med pa dang/ 'dzin pa med pa dang/ mtha' dang dbus med pa dang/ 'phel ba dang 'grib pa med pa dang/ 'gro ba
304b4 dang 'ong ba med pa dang/g.yo ba dang 'gul ba med pa dang/ chags pa dang gnas pa med pa dang/ 'jig pa dang stongs pa med pa dang/ 'gyur ba dang ma khyab pa med pa dang/ mi 'byung ba dang ma chub pa med pa
304b5 dang/skyo ba dang dub pa med pa dang/ mtshan nyid dang rgyu rkyen med pa dang/ 'bras bu dang rtsol ba med pa dang/ mngon par 'du byed pa ma yin no// dper na nam mkha' dang 'dra'o// nam mkha' de ni yod pa
304b6 las med par 'gyur ba ma yin/med pa las yod par 'gyur ba ma yin// de bzhin du gsal ba las mi gsal bar 'gyur ba'am/ mi gsal ba las gsal bar 'gyur ba'am/ tha dad pa las gcig tu 'gyur
305a1 ba dang/yin pa las min par 'gyur ba dang/ min pa las yin par 'gyur ba dang/ nye ba dang ring ba dang/ de bzhin du che chung bzang ngan bde sdug dang/ khyab dang ma khyab dang/ byung dang ma byung
305a2 dang/dag dang ma dag dang/ grub dang ma grub dang/ mthong dang ma mthong dang/ yangs dang dog dang/ dbyibs dang kha dog dang/ phyi dang nang dang/ skye ba dang 'gags pa dang/ 'pho dang mi 'pho dang/ 'gyur
305a3 dang mi 'gyur dang/mun pa dang snang ba dang/ sngon dang phyi ma dang/ mtha' dang dbus dang/ gong ma de dag thams cad kyang/ bdag dang gzhan du gyur pa dang/ de bzhin du blangs nas dor bar gyur pa dang/
305a4 dor ba las blang bar gyur ba med pa'i phyir/ nam mkha' ni thams cad du ma bcos pa'o// de bzhin du dngos med ka dag rnal ma la/ dus thams cad du ma bcos ma bslad pa'o// mi rtsol mi sems/ blo bcos
305a5 zhe 'dod dang rtsis gdab med par gnas so// rgyal ba kun tu bzang pos de bzhin gshegs pa dus gsum gyi sangs rgyas thams cad kyi yang snying dgongs pa'i bcud bsdus nas gsungs so// de nas dpal rdo
305a6 rje sems dpas thugs dgongs ky-i bcud bsdus nas gsungs pa/bsam gyis mi khyab chos 'di rnams/ de bzhin nyid du gcig pas na// gang gis de bzhin de shes na// kun la dbang bskur thob pa yin// rdo
305b1 rje sems dpas gsungs so// sangs rgyas kun gyi dgongs pa'i bcud// sems lhag can gyis bka' stsal pa/ ka dag rnal ma rang dngas pas// 'di zhes tshig tu ma gsungs pa/ khyab pas gcig pa'i byin
305b2 rlabs kyis// ji ltar 'dod pas so sor 'jal// zhes gsungs so// de nas sems dpa' rdo rje yis// dus gsum bde gshegs thugs kyi bcud// dgongs pa'i bcud 'dus bka' stsal pa// bsam gyis mi
305b3 khyab kun shes na// bsam du med par de bzhag la// dpag tu med pa'i yon tan 'byung// rnam pa thams cad mkhyen pa yin// zhes gsungs so// de nas 'od gsal rnam dag gis// sangs rgyas kun gyi thugs
305b4 kyi bcud/kun gyi rtsa ba 'dir bcad pas// 'di don gang rig thos pa'i mchog/ thams cad 'di las 'byung bas na// 'di shes kun shes shes rab mchog/ ces gsungs so// de nas gsal dag ngang dngas
305b5 khye'u chung gis// sangs rgyas kun gyi thugs dgongs pa// gsang ba'i nang nas gsang chen 'di// nyid kyis nyid kyang mi mthong bar// gzhan gyis ka dag ga la mthong// zhes gsungs so// de nas ngang dngas khye'u
305b6 chung gis// sangs rgyas kun gyi bcud gsungs pa// chos rnams kun gyi snying po 'di// gser dang mkha' bzhinami 'gyur bas// mi nub stor bral med pa'i phyir// chos kyi dam pa chen po mchog/ ces gsungs
306a1 so// de nas ngang dngas rin chen gyis// sangs rgyas thugs kyi bcud phyung ba// mi 'gyur nam mkha'i rang bzhin te// dag pa dag la dag pa nyid// rtogs pa rtogs pas rtogs par snang// spyi lus
306a2 der snang ci yang med// ces gsungs so// dri med rnam dag dgongs gsungs pa// rang bzhin ka dag ma bcos pas// yongs kyi 'od la de bzhin nyid// kun gyi snying po de nyid pas// cis kyang ma bsgribs nam
306a3 mkha' che// zhes gsungs so// zhen med ngang dngas bcud gsungs pa// stong pa nyid kyi snying po la// sna tshogs snang ba'i 'khor gyis bskor// sus kyang ma byas rang byung la// ka dag ji bzhin dkyil 'khor
306a4 nyid// ces gsungs so// de nas rig pa'i khye'u chung gis// sangs rgyas gsang ba'i yang snying gsungs// dngos med ka dag mngon gyur na// med pa mi zad 'byung ba yi// che ba'i yon tan rgyun mi 'chad// cir
306a5 snang kun 'byung rin chen gter// zhes gsungs so// ngang dngas kun grol dgongs gsungs pa// sangs rgyas kun gyi dgongs pa 'di/ shes nas de la gang gnas pa// ka dag nyid la dbang thob pa'o// de
306a6 bzhin dgongs pa'i rigs 'dzin nyid// ces gsungs so// de nas kun rig 'phrul rje yis// sangs rgyas dgongs pa'i bcud gsungs pa// ka dag dngos med zang ka ma// gzhi rtsa med pa'i skad cig ma// de
306b1 nyid rig na bde chen thob// ces gsungs so// yang rig pa'i rgyal pos gsungs pa// ka dag rnal ma de nyid ni// dpag cing gzhal bar mtha' yas pas// dpag med rgyal po'i pho brang yin// des na kun
306b2 bkod kun kyang der gcig gnas// zhes gsungs so// yang dngos med kun byed dgongs pa'i bcud gsungs pa// ye nas ka dag ma bcos ji bzhin pa// chos so cog gi snying po ste// med pa las byung sna
306b3 tshogs snang// snang med de bzhin dkyil 'khor rdzogs// zhes gsungs so// de nas cang med cir snang gcod kyis dgongs 'dus gsungs pa/ de bzhin nyid du don bstan du// de bzhin nyid du kun gcig
306b4 pas// gang gis gang la gang gis bstan// nyid la nyid gleng kho nar zad do// zhes gsungs so/ sems nyid kun byed rgyal pos dgongs pa'i bcud gsungs pa/ ji snyed bsam gyis mi khyab pa'i// chos kun ka
306b5 dag stong rig na// sangs rgyas kun dang mnyam sbyor bas// rnal 'byor chen po'i bsam gtan yin/ zhes gsungs so// gsal dngas spros gcod kyis gsungs pa// ka dag smra brjod med pa las// de mtshon
306b6 phyir na tha snyad brjod// gang brjod pa nyid dngos med nyid// de nyid spros med blo 'das don// zhes gsungs so// de nas rang byung rang rig gis gsungs pa// dngos med kun snang kun gyi gzhi// sems can
307a1 sangs rgyas gnyis kyi dbyings// rig dang ma rig gnyis kho na// dag dang ma dag gnyis su snang// zhes gsungs so// de nas rang dngas rin chen gyis gsungs pa// bsam gyis mi khyab mi shes
307a2 par// bsam med ngang du gang 'jog pa// byis pa de ni blun pa yin// mun pa'i skye mched nyid du 'gyur// zhes gol bar gsungs so// de nas 'dzin med kun gsal gyis gsungs pa// bsam med bsam gyis
307a3 mi khyab chos// lhag par mthong na gzhi gnas pa// rnam rtog spang len gang byed pa// de dag sgrib pa mu mtha' yas// zhes gsungs so// dngos med zang thal gyis dgongs pa'i bcud gsungs pa/ dngos med
307a4 kun gyi rang bzhin ni// ma skyes pa las thams cad skyes// skyes pa nyid na skye ba med// ces gsungs so// blo 'das ye med kyis gsungs pa// gdod dag kun snang ye shes 'di// sus kyang ma byas rang byung
307a5 ste/thams cad 'byung ba'i rtsa ba ni// rang las byung ba'i dkyil 'khor rdzogs// zhes gsungs so/ gnyis snang spros gcod kyis gsungs pa// 'khor ba dang ni mya ngan 'das// so sor snang ba ma yin te// glo bur
307a6 rnam rtog mtha' yas pa'i// ji bzhin nyid de rab des na// de la 'khor ba'i rang bzhin med// ces gsungs so// de nas gsang ba'i bdag po yis// sangs rgyas dgongs pa'i bcud gsungs pa// ka dag de
307b1 nyid cir yang mi snang na// glo bur rnam rtog tha dad pa'i// rnam rtog de ni zad par snang// snang ba nyid na snang ba med// ces gsungs so// mngon rdzogs rgyal pos thugs kyi bcud gsungs pa// dngos med ka
307b2 dag ye med ye shes dngos grub pas// zad pa med cing 'phel ba med// da gdod bsgrub tu ga la yod// ces gsungs so// rang byung rgyal pos dgongs pa'i bcud gsungs pa// thog ma med nas bsags pa
307b3 yi// rnam rtog sprin phung dpag med pa// stong nyid skad cig rig pa yis// de bzhin nyid du rnam par gsal// zhes gsungs so// pad+ma dri med dgongs pa'i bcud gsungs pa// yod mthong snang grag chos so
307b4 cog/tha dad sna tshogs mtha' yas kyang// dngos med ka dag de bzhin nyid// ma bsgribs 'od gsal rnam dag go/ zhes gsungs so// de nas sna tshogs 'ub chub dgongs pa'i bcud gsungs pa// dpag tu
307b5 med pa'i 'jig rten du// sgron ma bsam gyis mi khyab pas// ji snyed pa yi chos bstan pa// mtha' yas don ni gcig tu zad// dngos med zang ka ka dag dgongs bcud do// de bzhin gshegs pa thams cad
307b6 kyi// sangs rgyas kun gyi thugs dgongs bcud// snying po yang snying bcud bsdus pas// thams cad thams cad ji snyed pa// tshig gi tha snyad tsam dag las// 'di las bya ba ci yang med// dngos med ka dag ye
308a1 sangs rgyas// e ho a a sid+d+hi sid+d+hi a d+ha thim/ dus gsum bde gshegs sangs rgyas kyang// dngos med ka dag tha snyad blo 'das te// ka dag lhun grub thugs dgongs bcud// ma lus dgongs
308a2 'dus ri rab lhun grub brtsegs// zhes gsungs so// sangs rgyas kun gyi dgongs pa'i bcud 'dus ri bo brtsegs pa'i rgyud las/ sangs rgyas thams cad kyi thugs kyi yang snying dgongs pa'i bcud 'dus
308a3 par bstan pa'i le'u ste bcu gnyis pa'o//// de nas ngang dngas khye'u chung gis// ye thog ka dag sangs rgyas la// ri bo brtsegs pa dpe yis ji ltar bstan// zhes zhus pa dang/ ston pas 'khor la
308a4 bka' stsal pa// dngos med ka dag dpe las 'das na yang// don gsal 'od gsal dpe yis mtshon nas bshad// dper na ri bo brtsegs pa yang// lhun po'i ngang la 'gyur med brtsegs// g.yo rtsol 'pho
308a5 'gyur med par grub// ye med gdod dag ka dag brtsegs// dngos med blo 'das byar med brtsegs// stong gsal gdangs la dngas sangs brtsegs// snying po'i ngang du ye shes brtsegs// chos nyid klong du
308a6 rtsal zer brtsegs// chos sku'i klong du sku gsum brtsegs// snying po skye 'gag gnyis med brtsegs// ka dag bstan pa mi 'gyur te// dngos med ma bcos gsal la dngas pa'o// ka dag blo 'das byar med
308b1 brtsegs// ye nas rgyun chad med pa ste// de phyir ri bo brtsegs pa'i rgyud// ces gsungs so// ri bo brtsegs pa'i rgyud las// ri bo dper bstan pa'i le'u ste bcu gsum pa'o//// de nas ngang dngas khye'u chung
308b2 gis// ye thog ka dag sangs rgyas la// gsang sngags brda' yis ji ltar bshad// ces zhus pa dang/ ston pas 'khor la bka' stsal pa// gsang sngags lta sgom brda' yis bstan// ngang dngas khye'u chung thugs
308b3 la chongs// khyung chen nam mkhar lding ba dang// rus sbal 'khar gzhong bcug pa dang// smyon pa glang po chur zhugs dang// ri rgyal lhun po 'gyur med dang// shel gong nor bu rin chen gser// brda' don
308b4 gnad 'grol man ngag 'dis// shes rab can gyi brda' gnad bkrol// zhes gsungs so// seng ge nam mkha'i 'brug thos dang// rus sbal mkha' la bsnyeg pa dang// ral gri snum gyis ngar btags
308b5 dang// glang pos dmag gi tshogs bsgyur dang// bkres pa g.yos legs zas za dang// btso ma g.ya' dang bral ba dang// me long dri ma bral ba dang// nyi ma mun pa med pa dang/ rgya mtsho g.yo 'gul med pa
308b6 dang// dung nyid ye dag dkar ba dang// sgron mes mun pa sel ba dang// chu bo rgyun chad med pa'o// zhes gsungs so// ri bo brtsegs pa'i rgyud las/ gsang sngags brdas bstan pa'i le'u ste bcu bzhi
309a1 pa'o//// de nas ngang dngas khye'u chung gis// ye thog ka dag sangs rgyas la// ma bsgrubs 'bras bu ji ltar 'thob// ces zhus pa dang/ ston pas 'khor la bka' stsal pa// theg gzhan zhe
309a2 'dod ngas ma bshad// rtsol med ye nas 'bras bu bstan// ngang dngas khye'u chung thugs la chongs// ye nas dag pa dngos med de// rang la gdod ma nyid nas gnas// ka dag blo 'das rtogs pa'i thabs// de la
309a3 'bras bu thob ces bshad// ces gsungs so// ri bo brtsegs pa'i rgyud las/ 'bras bu bstan pa'i le'u ste bco lnga pa'o//// de nas ngang dngas khye'u chung gis// ye thog ka dag sangs rgyas la// theg
309a4 dgu'i lta sgom ji ltar lags// zhes zhus pa dang/ ye thog ston pas bka' stsal pa// snying po ka dag bltar med kyang// blo khyad theg pa'i lta sgom bshad// ngang dngas khye'u chung thugs la chongs/ nyan thos pa yi
309a5 lta sgom ni// yul rdul gang zag bdag med blta// 'gog pa'i snyoms 'jug tshogs drug yul bkag bsgom// rang rgyal pa yi lta sgom ni// rten 'brel bcu gnyis rnam par rig byed blta// byang chub sems
309a6 dpa'i lta sgom ni// bden pa gnyis su blta la stong par bsgom// gsang sngags phyi rgyud lta sgom ni// dag pa chos nyid kri ya'i lha drug bsgom// u pa ya yi lta sgom ni// dpon g.yog tshul ltar sum cu rtsa bdun
309b1 bsgom// yo ga pa yi lta ba ni// skye 'gag gnyis med byang chub rnam lnga bsgom// ma hA yo ga'i lta sgom ni// snang stong gnyis med ting 'dzin rnam gsum bsgom// a nu yo ga'i lta sgom ni// dbyings dang ye shes ma
309b2 bskyed rdzogs tshul bsgom// a ti yo ga'i lta bsgom ni// snang srid chos sku stong pa had por bsgom// zhes gsungs so// ri bo brtsegs pa'i rgyud las/ theg pa'i lta sgom bstan pa'i le'u ste bcu drug
309b3 pa'o//// de nas ngang dngas khye'u chung gis// ye thog ka dag sangs rgyas la// dgu las spyi ti gang gis spags// zhes zhus pa dang// ston pas 'khor la bka' stsal pa// dngos med ka dag spags dang
309b4 ma spags med// blo khyad dgu rtse'i spyi rje'i spags tshul ni// ka dag blo 'das zhe 'dod rten med kyi// phyogs bral lta ba dgu las spags// yid sems g.yo 'gul gang la'ang bsam bsgom med// dran sems
309b5 gang la mi skye bsgom pa'i rgyal po spags// gang yang ma chags yid smon blo las 'das// zhes gsungs so// ri bo brtsegs pa'i rgyud las/ dgu las spyi ti 'phags pa'i le'u ste bcu bdun pa'o//// de
309b6 nas ngang dngas khye'u chung gis// ye thog ka dag sangs rgyas la// dgu rtse rtogs na gol sgrib yod dam med// ces zhus pas/ ston pas 'khor la bka' stsal pa// spyi rje blo 'das 'di rtogs na// gol sgrib
310a1 'khrul pa gang yang med// stong gsal ka dag gsal dag stong// ye med gdod nas dngos gzhi med// gol sgrib 'khrul gsum ka nas dag/ ces gsungs so// ston pas 'khor la yang gsungs
310a2 pa// de ma rtogs kyi gang zag la// gol sgrib 'khrul pa bsam mi khyab// theg pa re la bcu tshan bcu// gol sgrib sum brgya drug cu yod// mdor bsdus rnam pa gsum du bsdus// gnas don ma rtogs sgrib pa
310a3 yin// ka dag ma rtogs 'khrul pa yin// 'og ma 'og ma'i lta sgom gyis// gong ma gong ma bsgribs pa yin// zhes gsungs so// ri bo brtsegs pa'i rgyud las/ gol sgrib 'khrul pa bstan pa'i le'u ste bco brgyad
310a4 pa'o//// de nas ngang dngas khye'u chung gis// ye thog ka dag sangs rgyas la// shes med blo 'das gol sgrib la ni gang du bzla// zhes zhus pa dang/ ston pas 'khor la bka' stsal pa// shes med blo
310a5 'das rtogs pa yis// snying po ma bu ngo 'phrad 'khrul du med// dngos med 'od gsal mun sangs sgrib pa med// 'gro sgo ma nor gol du med// gol sgrib 'khrul gsum la bzla'o// zhes gsungs so// ri bo
310a6 brtsegs pa'i rgyud las/gol sgrib 'khrul pa la bzla ba'i le'u ste bcu dgu pa'o//// de nas ngang dngas khye'u chung gis// ye thog ka dag sangs rgyas la// lta sgom la bzla ji ltar lags// zhes zhus pas/
310b1 ston pas 'khor la bka' stsal pa// lta sgom spyod 'bras la bzla ni// yin rgyu ye med tshig med bltar med zhe 'dod med// lta ba'i rgyal po rten med phyal pas lta ba'i la chen bzla// min rgyu ye med g.yo rtsol dran
310b2 rtog bsam dmigs med// g.yo 'gul rtog med bsgom pa'i la chen bzla// byar med gang yang ma chags spyod pa'i la chen bzla// dngos med gdod grub ka dag blo 'das 'bras bu'i la chen bzla// lta sgom spyod
310b3 'bras la chen bzla// rten med mi 'gyur rtog dpyod blo las 'das// gzhir bsdus dbyer med gcig tu bzla// gcig ni dngos med ka dag go/ zhes gsungs so// ri bo brtsegs pa'i rgyud las/ lta sgom la
310b4 bzla ba'i le'u ste nyi shu pa'o//// de nas ngang dngas khye'u chung gis// ye thog ka dag sangs rgyas la// mtshan dang gtad rgya ji ltar gzung// zhes zhus pa dang/ ston pas 'khor la bka' stsal pa// dus
310b5 gsum de bzhin gshegs pas gcig tu bsdus// sangs rgyas kun gyi thugs dgongs yang snying bcud// bcud 'dus ri bo brtsegs pa sku gsum lhun grub brtsegs// de phyir sangs rgyas kun gyi dgongs 'dus
310b6 ri bo brtsegs par zung// theg pa dgu las khyad par 'phags pa'i phyir// dgu rtse spyi ti yo ga bya bar zung// lta sgom spyod 'bras kun gyi la bzla'i phyir// la zlo spyi rgyal kun gyi rgyud du zung// zhes gsungs
311a1 so// ston pas yang gsungs pa// rgyud 'di gtad pa'i slob ma snod ldan ni// ri bo'i blo la nyi zla'i sems// ral gri'i shes rab dar dkar rgyud// shel gong dam tshig bu chung spyod// de ldan 'jig
311a2 rten 'di na dkon// bla ma gtsug khur dam tshig bsrung// shes rab che la gtong phod che// ngang ring dge sems man ngag 'chang// de lta bu la rgyud 'di gtad// snod med rnams la ma gtad cig/ ces gsungs
311a3 so// sangs rgyas kun gyi dgongs pa'i bcud bsdus ri bo brtsegs pa'i rgyud las/ mtshan dang gtad rgya bstan pa'i le'u ste nyer gcig pa'o//// sangs rgyas kun gyi dgongs pa'i bcud bsdus ri bo
brtsegs pa'i rgyud rdzogs so/

CLOSE WINDOW