CLOSE WINDOW

Gpb003.019
བོད་ཡིག

/// rgya gar skad du/ hr-i da ya su ra rA shi ga ga nAu0f85 bar+t+ta bistA ra tan+t+ra/ bod skad du/ snying po bcud spungs nam mkha' klong yangs kyi rgyud/ sngon gnas ye thog ma'i sangs rgyas la phyag 'tshal lo// 'di skad bdag gis rtogs pa'i dus gcig na/ 'og min gyi gnas/ sems nyid brdal ba chen po'i zhing khams/ kun gzhi chos dbyings kyi pho brang na/ bcom ldan 'das dpal gsang ba'i bdag po bzhugs so// yan lag rtsal gyi 'khor 'di lta ste/ 'od dang zer yan lag shes rig yid sems dran rtog blo yi 'khor ro// rang byung gi 'khor yang 'di lta ste/ gti mug dang/ zhe sdang dang/ 'dod chags dang/nga rgyal dang/ phrag dog go// rang bzhin gyi 'khor dang/ rang bzhin rtog pa'i 'khor ro// ye nas gnas pa'i 'khor yang 'di lta ste/ sa dang/ chu dang/ me dang/ rlung dang/ nam mkha'o// sems dpa' rdo rje la sogs pa/stong gsum gyi stong chen po 'jig rten gyi khams kyi sems can thams cad dang/ lha dang/ klu dang/ gnod sbyin dang/ dri za dang/ nam mkha' lding dang/ grul bum la sogs pa lha ma srin sde brgyad dang/rigs lnga'i sangs rgyas dang/ sangs rgyas bye ba sa ya dang/ byang chub sems dpa' bye ba khrag khrig rnams dang lhan cig tu bzhugs so// de'i tshe 'khor rnams kyi nang nas zhu ba po rdo rje sems dpa' stan las langs nas/bcom ldan 'das gsang ba'i bdag po la phyag 'tshal te// pus btsug thal sbyar 'di skad zhus// spyi ti spyi rgyal byar med ji ltar gsungs// ka dag dngos med bstan du btub lags sam// snying po skye med gnas lugs ji ltar gnas// yan lag rtsal gyi 'char lugs ji ltar 'char// yan lag rtsal zer snying por ji ltar thim// dug gsum rtsad nas ji ltar gcad par bgyi// 'khor ba'i ru ni gang gis bzlog par bya// 'gro ba drug gi g.yang sa ji ltar gcod// snying po skye med ka dag gang gis rtogs// gsang sngags brda' yis ji ltar bshad par bya// rnal ma rtogs nas blta bsgom mi 'tshal lam// chos rnams go rtogs ji ltar rtogs par bya// nyon mongs dug lnga snga log ji ltar bsgyur// chos rnams thams cad la ni gang du bzla// mdo don thams cad gcig tu ji ltar bsdu// snying po'i bcud ni gang du spungs pa lags// nam mkha' klong yangs dpe yis ji ltar bstan// theg chen chos ni brgyad khri bzhi stong gang du 'dus// kye// khyab bdag bdag la sman pa dang// bdag don bdag la sman pa dang// bdag don bdag la thugs brtse bas// sems can kun la sman pa dag/ bla med 'bras bu thob bya'i phyir// sems kyi khyad par ji bzhin du// dbang po bsam pa mkhyen mchog gis// bdag gi zhus tshig bco brgyad po// bdag cag mos tshogs 'khor bcas la// ka dag lag 'chang thob bya'i phyir// shin tu zab par bka' stsol cig/ ces zhus so// 'das dang ma byon da lta gsum// tha snyad ming la mi gnas te// dus gsum gcig ste khyad par med// sngon med phyis med gdod nas dag/ zhes gsungs so// snying po bcud spungs nam mkha' klong yangs kyi rgyud las/ phun sum tshogs pa lnga dang/'khor gyis gleng slong ba'i le'u ste dang po'o//// de nas bcom ldan 'das gsang ba'i bdag pos chos thams cad 'byed pa med pa'i ting nge 'dzin la snyoms par zhugs so// de nas rdo rje sems dpa' yis// gsang ba'i bdag la yang zhus pa// spyi rje byar med ji ltar bshad// ces zhus pa dang/ gsang ba'i bdag po ting nge 'dzin de las bzhengs nas/ sku gsung thugs yon tan phrin las kyi 'od zer ma lus mi lus lus pa med par bsam gyis mi khyab pa spros nas/ma rig nyon mongs dbang gis ni// ma shes 'khor bar 'khyams pa rnams// ston pa gsang ba'i bdag po yis// 'khor ba rtsad gcod ral gri thogs// ma rig mun sel nyi zla ston// rings shing yangs par ljags brkyangs nas// dug lnga rtsad gcod 'gro drug gi// g.yang sa gcod pa'i spyi ti bshad// 'khor rnams ma yengs gus pas nyon// A di hr-i da ya hri badzra ma hA su kha ho// byar med blo 'das theg pa 'di// rang gi mthu yis rtogs pa las// chos ni gzhan nas 'byung mi 'gyur// gleng bral byar med la gnas na// dngos med ka dag rnal ma rtogs// rnal 'byor ya rab skal pa bzang// dgu rtse byar med blo 'das la// ming tsam 'di zhes bstan pa ni// gsang ba'i bdag po mtshon du med// byar med blos btags la dor cig/ rtsol bsgrub bden gnyis sun phyung zhig/bshad du med par bstan pa ni// blo dman drangs phyir bstan pa las// ka dag dngos med mtshon du med// ces gsungs so// nam mkha' klong yangs kyi rgyud las/ byar med bstan pa'i le'u ste gnyis pa'o//// de nas rdo rje sems dpa' yis// ston pa gsang ba'i bdag po la// ka dag bstan du btub lags sam// zhes zhus pa dang/ ston pas 'khor la bka' stsal pa// blo dman brod pa bskyed phyir las// ka dag dngos med bstan du med// 'on tang 'khrul rmongs mi shes la// mun khungs gsal sgron lta bur bshad// mi mngon mi snang 'od khang na/ shes med ka dag blo 'das dngos po med// cang med cir snang kun 'byung ngang// dngos med sna tshogs gnyis ma grub// stong gsal ngang la gang gi tha snyad med// yod dang med dang cir yang grub pa med// mnyam dang mi mnyam dbye bsal rtsis gdab med// dngos med rang byung ngang dngas dngas sang nge// phyang nge bun ne mer re lhang nge ba// tha snyad tsam yin cir yang grub pa med// phra zhing shes dka' mi rtog rtog las 'das// mchog tu gsang ba'i dngos med zang ka 'di// rna bas thos med lce yis brjod du med// yid la dran med sems la gzhag du med// rig pas brtag med blo yi yul las 'das// tshogs brgyad yul du ma gyur rnam shes rtsis gdab med// sgo lnga'i yul du ma gyur dmigs las 'das// dpe byad kun las 'das pas bstan du med// ces gsungs so// nam mkha' klong yangs kyi rgyud las/ dngos med mtshon du mi btub par bstan pa'i le'u ste gsum pa'o//// de nas rdo rje sems dpa' yis// bcom ldan gsang ba'i bdag po la// snying po'i gnas lugs ji ltar gnas// zhes zhus pa dang/ ston pas 'khor la bka' stsal pa// snying po'i gnas lugs mtshon du med// re zhig gsung gi sgron ma yis// mos tshogs 'dus pa'i 'khor la bshad// snying po'i gnas lugs 'di ltar gnas// ka dag zang kar gnas pa yin// dngos med rnal mar gnas pa yin// skye ba med par gnas pa yin// 'gag pa med par gnas pa yin// gnyis su med par gnas pa yin// rang grol chen por gnas pa yin// rgyu rkyen gnyen po med par gnas// dngos med blo las 'das pa yin// bya rtsol med par gnas pa yin// g.yo ba med par gnas pa yin// dbye bsal rtsis gdab med par gnas pa yin// kun ldan gang gi'ang rnam pa med// ci yang ma yin dngos med dang// mtshon med dpe las 'das pa yin// stong nyid gsal dang 'dzin rtog med// gting gsal mi mngon kha gsal gdangs// sang nge phyad de hang nge dngas sang nge// dngos po ci ltar shar yang grub pa med// ces gsungs so// nam mkha' klong yangs kyi rgyud las/ snying po'i gnas lugs bstan pa'i le'u ste bzhi pa'o//// de nas rdo rje sems dpa' yis// bcom ldan gsang ba'i bdag po la// rtsal zer yan lag ji ltar lags// zhes zhus pas/ ston pas 'khor la bka' stsal pa// 'gag med yan lag rtsal zer rnams// shar lugs sna tshogs bsam mi khyab// mdo tsam 'khor la bshad kyis nyon// rgyu rkyen 'pho 'gyur med pa yi// mkha' klong gzhi nas ma 'gags pas// rtsal zer shes rig 'od rlung shar// cang med ngang la cir yang shar// dngos med ngang las dngos kun shar// ye med ngang las sna tshogs shar// skye med ngang las yid rig shar// 'gag med ngang las sgo gnyis shar// sa ma zin pas 'khor gsum shar// brda' ma 'phrod pas 'khor gsum shar// rtsad ma chod pas gzugs lngar 'khrul// klong du ma gyur 'gro drug 'khor// ye ma shar ma rig shar// gsal gdangs ma shar mun par snang// bde ba ma myong sdug bsngal myong// yul sems dgag bsgrub gzung 'dzin dang// snang brtags chags sdang phyogs ris rnams// bsam las 'das pa brjod mi rdzogs// rtsa ba ma rig nga bdag dang// gzung 'dzin zhe 'dod bya btsal yin// yan lag 'gag med bsam mi khyab// ces gsungs so// yan lag shar lugs bstan pa'i le'u ste lnga pa'o//// de nas rdo rje sems dpa' yis// bcom ldan gsang ba'i bdag po la// yan lag rtsal zer snying po ji ltar thim// zhes zhus pas/ ston pas 'khor la bka' stsal pa// snying po chos dbyings mkha' klong rnam dag tu// 'gag med rtsal zer rig yid sems blo rnams// rang byung ngang dngas snying po'i klong du thim// snying po'i yan lag 'phrang rtsal rang sa zin// 'khrul chod rgyas thebs snying po'i klong du gyur// yid sems dran rig thams cad 'khrul rtsad bcad// gsal dag la bzla rgyu rkyen rtsol med par// 'khrul chod mun pa sangs nas sangs rgyas so// zhes gsungs so// yan lag rtsal zer shes rig dran rtog ji snyed ma lus pa snying po'i klong du 'ub chub yongs bsdus su thim par bstan pa'i le'u ste drug pa'o//// de nas rdo rje sems dpa' yis// bcom ldan gsang ba'i bdag po la// dug gsum rtsad nas ji ltar gcad// ces zhus pa dang/ ston pas 'khor la bka' stsal pa// dug gsum ngo shes rtsad nas bcad// spang sbyang bsgyur ba ma yin no// gti mug 'byed med chos kyi sku// zhe sdang 'od gsal longs spyod sku// 'dod chags gsal dag sprul pa'i sku// ngo shes rtsad gcod gdeng ldan na// dus gsum rgyal ba'i sku gsum rdzogs// zhes gsungs so// nam mkha' klong yangs kyi rgyud las/ dug gsum rtsad nas gcad pa'i le'u ste bdun pa'o//// de nas rdo rje sems dpa' yis/ ston pas gsang ba'i bdag po la// 'khor ba ru ni ji ltar bzlog/ces zhus pa dang// ston pas 'khor la bka' stsal pa// ka dag ye med gdod dag pa// de nyid ma rtogs 'khor bar 'khyams// ka dag don rtogs mya ngan 'das// dngos med ka dag sangs rgyas nyid// nga bdag gzung 'dzin sems can no// dngos med gcig la 'khor 'das gnyis// rtogs dang ma rtogs gnyis las med// rtogs pa myang 'das ma rtogs 'khor// ka dag klong la gnyis ka med// 'khor bar ltung ba'i ngo bo ni// me yi khyo la mun pa'i chung// phag pa'i yab la khyi yi yum// bya spu'i khra dang spre'i bu// mtsho khol me 'bar rwa chen skyes// zhes gsungs so// skye med ka dag dpa' bo yis// 'khor ba'i ru bzlog dmag dpung 'joms// don gcig dngos med ka dag gis// shes rab ral gri mda' gzhu thogs// nyon mongs mi shes g.yul ngo bzlog/ thub pa chen po thub chen gyis// mi shes 'khor ba'i dgra dpung 'joms// nyi zla 'bar ba'i sgron me yis// mun pa'i chung ma brlag par byed// g.yo rtsol med pa'i rba rlabs kyis// me yi khyo bo rtsad nas bcad// shes rab ral gris khyi phag bsad// rdo rje chen po'i mda' gzhu yis// bya sbrul khra dang spre'u bsad// theg pa chen pos sdug bsngal gcod// rang bzhin ngo bo thugs rje gsum// yon tan phrin las thogs med lngas// 'khor ba ru bzlog sku lngar bsgyur// zhes gsungs so// nam mkha' klong yangs kyi rgyud las/ 'khor ba ru bzlog pa'i le'u ste brgyad pa'o//// de nas sems dpa' rdo rje yis// bcom ldan gsang ba'i bdag po la// 'gro drug g.yang sa ji ltar bcad// ces zhus pa dang/ ston pas 'khor la bka' stsal pa// ka dag dngos med cang med las// de ma rtogs pas 'gro drug 'khrul// dngos med ma rtogs zhe sdang skyes// dmyal bar skyes nas btso sreg byed// brgyad gnyis sdug bsngal zad med myong// dngos med ma rtogs ser sna skyes// yi dwags gnas skyes bkres skom sdug/ sgrib gsum sdug bsngal zad med myong// ka dag ma rtogs gti mug skyes// byol song gnas skyes glen lkugs myong// rkang mangs rkang gnyis rkang bzhi dang// rkang med la sogs bsam las 'das// dngos po med las phrag dog skyes// mi yi gnas skyes phrag dog spyod// brgyad dang bcu drug sdug bsngal myong// dngos po med las 'dod chags skyes// lha yi gnas 'khrul le lo spyod// longs spyod g.yeng ba'i sdug bsngal myong// dngos po med las nga rgyal skyes// lha min gnas su 'khrug pa spyod// 'thab rtsod mtshon cha'i sdug bsngal myong// de ltar 'gro drug 'khrul skyes kyang// dngos med ka dag cho 'phrul yin// dngos med cho 'phrul rtsad bcad pas// 'gro drug g.yang sa chod par bstan// ka dag don rtogs zhe sdang med// dmyal ba'i gnas 'khrul rtsad nas bcad// btso bsreg ming med longs spyod rdzogs// dmyal bar skye ba'i g.yang sa bcad// ka dag don rtogs ser sna med// yi dwags rtsad bcad 'od gsal sku// bkres skom skye ba'i g.yang sa gcad// gsal dag 'od gsal gti mug med// byol song gnas 'khrul rtsad nas chod// blun lkugs sdug bsngal ming yang med// ming med gti mug chos kyi sku// rang byung ngang dngas phrag dog med// mi yi gnas 'khrul skye rtsad bcad// chung bzhi che bzhi'i sdug bsngal med// phrag dog chen po bde chen sku// ka dag don rtogs nga rgyal med// lha min 'khrul gcad thabs rtsod med// nga rgyal dbyer med ngo bo'i sku// dngos med 'od gsal 'dod chags med// lha yi 'khrul gcad le lo med// 'dod chags zhen 'khrul sprul pa'i sku// de ltar 'gro drug g.yang sa gcad// sku lnga dbyer med dngos med rdzogs// zhes gsungs so/ nam mkha' klong yangs kyi rgyud las/ 'gro drug g.yang sa gcod pa'i le'u ste dgu pa'o//// de nas rdo rje sems dpa' yis/bcom ldan gsang ba'i bdag po la// snying po ka dag gang gis rtogs// zhes zhus pa dang/[ ]/ ston pas 'khor la bka' stsal pa/[ ]/ snying po ka dag rtogs thabs ni// byar med zhe 'dod med pa las// rtsol bsgrub bden gnyis blos mi rtog/ rang byung sar thim dbyer med rtogs// ngang dngas rtsol bsgrub dngas sang nge// rang byung rang rlag rig med rtogs// gsal dngas rang sangs go skabs med// stong gsal rig med tha snyad med// dngos med ka dag rtogs pa yin// yengs med phyad de bun ne ba// sang nge sal le mer khyil le// de rnams ming yin blo las 'das/ ka dag dngos med zang ka de// rang gi mthu yis rig pa las// chos ni gzhan nas 'byung mi 'gyur// byar med rtsol med bsam du med// dngos med rnal ma blo 'das kyis// snying po ka dag rtogs pa yin// zhes gsungs so// nam mkha' klong yangs kyi rgyud las// ka dag rtogs thabs kyi le'u ste bcu pa'o//// de nas rdo rje sems dpa' yis// bcom ldan gsang ba'i bdag po la// gsang sngags brda' yis ji ltar bshad// ces zhus pa dang/ston pas 'khor la bka' stsal pa// a a b+ho ya/ hri tha ra sa/ d+harma sarba/ d+hA tu a a/ nga yis gsang sngags brda' yis bshad// 'khor rnams ma yengs brda' la nyon// a pa ra si ti a/ stong gsal phyang chad kyi lha khang na// rlung smyo kun byed kyi mis bltas pas/ ci yang ma 'dug gang ma mthong/ der kho'i bsam pa sdug/ dran pa brlags blo stor ro// rig pas mtha' gang du yang mtshon brjod kyi tshig ci yang smra mi shes so// sngon rol ming ma thogs kyi brda'o// kha dog lnga gsal rin po che'i lha khang na/ smig rgyu'i rta la 'ja' tshon gyi mis gzhon nas bltas pas/ lha khang de na gsal dag 'od kyi lha dang/ g.yo tsam mi g.yo tsam gyi lha 'dug go// sems can sangs rgyas kyi gzhi mtshon pa'i brda'o// 'gyu ba rlung gi rta pho la/ shes rig yid sems kyi mis zhon nas/ 'od gsal rtsal byung gi lha khang du phyin nas bltas pas/lha 'ga' zhig g.yo 'gul med par bzhugs/ lha 'ga' zhig 'gul bskyod dang bcas nas 'dug go// spyi sa'i so mtshams mtshon pa'i brda'o// na bun kha rlang gi rta pho la/ 'gyur ba spre'i mis zhon nas/yar 'gro mar 'gro'i so mtshams na lha khang gnyis yod pa la/ sgo gang phye nas 'dug bltas pas/ 'od gsal ngang dngas byung nas rin po che gsal dag rnam dag lha khang sgo phye/ ngar 'dzin mun nag grong rgyug mkhan byung nas mun pa lha khang gi sgo phye'o// zhes gsungs so// 'char sgo dang 'khrul sgo'i brda'o// 'gyu ba yid kyi rta pho la/ rig sems dran rtog blo'i mis zhon nas/ 'phrang gsum sbubs gsum du phyin pas/long ma dug gsum gyi 'khar ba can dang 'phrad nas/ khyod nga'i mun pa'i g.yung drung la mi blta ba ci nyes/ mun pa'i lha khang ltos la/ khyod med pa la yod par zung zhig/ mi bden pa la bden par zung zhig/mi rtag pa la rtag par zung zhig/ don dam la kun rdzob tu zung zhig/ ka dag la ma dag par zung zhig/ bde ba la sdug bsngal du zung zhig/ gnyis med la gnyis su zung zhig/ dngos med la sna tshogs su zung zhig/rtogs pa la ma rtogs par zung zhig/ ka dag la sgrib bcas su zung zhig/ sangs rgyas la sems can du zung zhig/ mya ngan las 'das pa la 'khor bar zung zhig/ sku gsum la dug gsum du zung zhig/zhing khams rnam gsum la dmyal ba yi dwags ngan song gsum du zung zhig/ tho dang thag pa dang/ smig rgyu la mi sbrul chu dang gsum du zung zhig/ ces 'khrul pa dang 'khrul snang 'khor ba brdas bstan pa'o// de nas yang ye shes brdar gsungs pa/ 'ja' tshon 'od glog gi rta pho la/ dngas gsal ngang dngas kyi mis zhon nas/ g.yas su nyi ma thogs/ g.yon du zla ba thogs/ ral gri glad la bskor/ spu gris rlung dang chu gnyer spre'u bsad nas/ chos dbyings snying po 'dus ma byas kyi lha khang du phy-in pas/ ka dag ye gdangs kyi lha dang phrad pas/ dngos med rnal ma ka dag zang kar gyur/ yid rig sems blo dran rtog ngang dngas snying po ma dang 'phrad/'khrul pa rtsad nas chod/ ye shes rang sa zin/ snang ba rang sar grol/ snying po klong nas shar/ ye shes dbyings su thim/ 'gyur med rgya yis thebs/ dug gsum sdong po chod/'gro drug g.yang sa gcad/ 'khor ba dong nas sprugs/ srid pa ru nas bzlog/ nor bu rin chen rnyed/ mun rum nang du nyi zla shar/ dug la sngags thebs/ gser 'gyur rtsi dang ldan/ zas kyi bcud 'thung/ bde chen klong du nyal/ nor gyi dbyig rnyed zad med gter la spyod/ ka dag don rtogs 'gro drug g.yang sa gcad/ dngos med gdeng rnyed sangs rgyas 'khor ba med/ rang sar rang grol chags sdang ming yang med/yul sems gzung 'dzin dgag bsgrub dbye bsal med// dgra gnyen phyogs ris spang len rtsis gdab med// dug lnga rtsad gcad 'khor ba'i ming yang med// zhe 'dod bya btsal rtsad gcad 'bad rtsol med// ces gsungs so// ye shes 'char sgo brdar bstan pa'o// nam mkha' klong yangs kyi rgyud las/ gsang sngags brdas bstan pa'i le'u ste bcu gcig pa'o//// de nas rdo rje sems dpa' yis// gsang ba'i bdag po la zhus pa// dngos med rnam rtog lta sgom mi 'tshal lam// zhes zhus pa dang/ ston pas 'khor la bka' stsal pa// dngos med ka dag rtogs pa na// lta sgom spyod 'bras blo yi yul// zhe 'dod bsam dpyad yid smon med// ka dag dngos med rnal ma sgrub med blo las 'das// ka dag tshig med rten med la// zhe 'dod phyogs cha'i blta ba med// dngos med 'gyur med rtog med la// 'gyu ba bsam dmigs bsgom pa med// zang ka so ma rang lugs la// ched byas rtsol bsgrub bya btsal med// gdod nas ye gnas bsgrub med la// re dogs yid smon 'bras bu med// dngos med ka dag gcig rtogs na// lta sgom spyod 'bras ming yang med// ces gsungs so// nam mkha' klong yangs kyi rgyud las/ dngos med rtogs na blta bsgom spyod 'bras mi dgos par bstan pa'i le'u ste bcu gcig pa'o//// de nas rdo rje sems dpa' yis// bcom ldan gsang ba'i bdag po la// chos rnams go ldog ji ltar zlog/ ces zhus pa dang/ ston pas 'khor la bka' stsal pa// chos rnams go ldog ma bshad na// ka dag sangs rgyas ga la 'thob// des na chos rnams go ldog bshad// 'khor rnams ma yengs gus par nyon// snying po bcud spungs klong yangs su// rtsal zer ma 'gags go ldog la// snang srid 'khor 'das 'ub chub bo// ngo 'phrad dbyer med ka dag grol// dgu rtse spyi ti'i go ldog ni// theg pa'i chos rnams go ldog la// chos las 'das pas ka dag rtogs// gzhan dag 'khrul gzhi kun gzhir 'dod// kun gzhi go ldog klung yin no// 'khrul rgyu ma rig yin par 'dod// ma rig go ldog rig pa yin// dug gsum go ldog sku gsum yin// mun pa go ldog gsal dag rtogs// 'khrul pa go ldog 'char sgo rtogs// ma rig go ldog ka dag rtogs// 'khrul snang go ldog 'od snang rtogs// rtsad gcod rang grol rang sangs rtogs// sems can go ldog sangs rgyas rtogs// 'khor ba go ldog myang 'das rtogs// go ldog gdams pa gsum du bshad// chos rnams bor bas ka dag rtogs// sems can las 'das dngos med rtogs// sna tshogs ming med blo 'das rtogs// zhes gsungs so// nam mkha' klong yangs kyi rgyud las// go ldog rtogs par bstan pa'i le'u ste bcu gsum pa'o//// de nas rdo rje sems dpa' yis// bcom ldan gsang ba'i bdag po la// dug lnga snga log ji ltar 'gyur// zhes zhus pas/ ston pas 'khor la bka' stsal pa// dug lnga snga log sku lngar 'gyur// gti mug snga log chos skur 'gyur// zhe sdang snga log longs skur 'gyur// 'dod chags snga log sprul skur 'gyur// nga rgyal snga log dbyer med sku// phrag dog snga log brjod med sku// dug lnga snga log sku lngar 'gyur// zhes gsungs so// nam mkha' klongs yangs kyi rgyud las/ dug lnga snga log bstan pa'i le'u ste bcu bzhi pa'o//// de nas rdo rje sems dpa' yis// bcom ldan gsang ba'i bdag po la// thams cad la ni gang du bzla// zhes zhus pas/ ston pas 'khor la bka' stsal pa// snying po chos dbyings klong yangs su// ma 'gags rtsal zer ji snyed pa// ma lus 'ub chub snying por bzla// ka dag zang ka dngos med du// snang srid 'khor 'das rtag chad rnams// thams cad thams cad ji snyed la// gang la mi 'gyur rtsis gdab med// yid sems blo yi 'dzin rtog med// ma lus ril po blo las 'das// sangs rgyas ka dag dngos med pas// gzhan rnams med par la bzla'o// sangs rgyas sku dang ye shes med// sems can lus dang bag chags med// sku lnga rigs lnga dug lnga med// 'khor ba myang 'das byang chub med// 'khor ba'i chos la lta ci smos// blta bsgom spyod pa 'bras bu dang// 'dul sdom bslab pa dam tshig med// phar phyin lam lnga sa bcu med// thams cad dngos med zang kar bzla// zhes gsungs so// nam mkha' klong yangs kyi rgyud las/ thams cad la bzla ba'i le'u ste bco lnga pa'o//// de nas rdo rje sems dpa' yis// ston pa gsang bdag chen po la// mdo don gcig tu ji ltar bsdu// zhes zhus pas/ ston pas 'khor la bka' stsal pa// ma phye ma bkol snying po'i klong// snang brtag bzung zhen ji snyed kun// snying po chos nyid klong du 'dus// dngos po thams cad dngos med klong du 'dus// snang srid 'khor 'das gnyis med klong du 'dus// mtshon brjod btag chags mtshon med klong du 'dus// blta bsgom grub mtha' blo 'das ngang du 'dus// tshig tshogs rgya mtsho brjod med gcig tu 'dus// 'bras bu thams cad ka dag gcig tu 'dus// dgongs pa brgyad khri bsam 'das ngang du 'dus// zhes gsungs so// nam mkha' klong yangs kyi rgyud las/mdo don gcig tu 'dus par bstan pa'i le'u ste bcu drug pa'o//// de nas rdo rje sems dpa' yis// ston pa gsang bdag chen po la// snying po bcud ni gang du spungs// zhes zhus pa dang/ston pas 'khor la bka' stsal pa// mkha' dbyings rnam dag 'od gsal klong chen du// rang byung rtsal zer yan lag ma lus spungs// ka dag dngos med zang ka chen po ru// snang srid 'khor 'das yod med rtag chad spungs// ye gdangs gsal la dngas pa'i klong chen du// rang byung ngang dngas chen por bcud spungs so// snying po chos nyid kun gzhi'i klong yangs su// rtsal zer sna tshogs ma 'gags bcud spungs so// rang byung rang sar brlag pas bcud spungs so// rang dngas rang sangs chen por bcud spungs so// yid sems gang la 'dzin med bcud spungs so// ka dag zang ka chen por bcud spungs so// shes rig gang la'ang mi 'jug bcud spungs so// yid gnyis rtsad chod gzung 'dzin gnyis med bcud spungs so// zhes gsungs so// nam mkha' klong yangs kyi rgyud las/ snying po'i bcud spungs bstan pa'-i le'u stebacu bdun pa'o//// de nas rdo rje sems dpa' yis// ston pa gsang bdag chen po la// nam mkha' klong yangs dpe yis ji ltar bstan// zhes zhus pa dang/ ston pas 'khor la bka' stsal pa// snying po ka dag dpe med kyang// 'khor gyi rtog pa bsal phyir dpe yis bstan// 'khor rnams ma yengs gus par nyon// sems kyi dpe ni nam mkha' bstan// nam mkha' mtshon pa kun dang bral// nam ni skye ba med pa yin// mkha' ni 'gag pa med pa yin// skye 'gag gnyis su med pa de// snying po chos nyid klong du 'dus// nam mkha' phyogs ris kun dang bral// nam mkha' zhes ni mtshon pa yang// ma rtogs blo la mtshon pa yin// nam mkha' tha snyad kun dang bral// skye ma myong la 'gag ma myong// gnyis su ma chad gcig ma myong// mtshon du med pas mtshon las 'das// snang med mi snang pa las 'das// ming 'dogs med pas btags chags 'das// ming med tshig tu brjod las 'das// nam mkha' de ni bskal pa nas// bskal pa'i bar du yod ma myong// med ma myong la stong ma myong// snang ma myong la gsal ma myong// bzang ngan bde dang sdug ma myong// 'khrul dang 'khor dang rgyas ma myong// mi rgyas ma myong nam mkha' ni// kha dog phyogs mtshams brjod las 'das// de bzhin sems nyid ka dag ste// tha snyad mtshon tshig blo las 'das// klongs yangs zhes bya'i dpe yis ni// zhe 'dod rten med blta ba'i klong yangs so// yid rig gang la'ang mi rtog bsgom pa'i klong yangs so// sna tshogs yul la ma chags spyod pa'i klong yangs so// ka dag blo las 'das pas 'bras bu'i klong yangs so// g.yo 'gul dran rtog mi 'gyu dgongs pa'i klong yangs so// dbye bsal med pa shes rab klong yangs so// bsrung ba med pas dam tshig klong yangs so// bya rtsol med pa phrin las klong yangs so// spyad du med pa sa yi klong yangs so// bgrod du med pa lam gyi klong yangs so// chos rnams dbyer med snying po'i klong yangs so// thog ma med nas tha ma da lta'i bar// dngos med rnal mar rgyun du gnas pa'i phyir// ka dag 'gyur ba med pa'i rgyud// rang bzhin ngang du gnas pa'i phyir// ye shes rgyun chad med pa'i rgyud// ka dag 'gyur ba med pa'i phyir// dus gsum kun tu 'pho 'gyur med pa'i rgyud// de phyir snying po bcud spungs nam mkha' klong yangs so// zhes gsungs so// nam mkha' klong yangs kyi rgyud las/ rgyud kyi mtshan bstan pa'i le'u ste bco brgyad pa'o//// de nas rdo rje sems dpa' yis// ston pa gsang ba'i bdag po la// theg pa brgyad khri bzhi stong gang du 'dus// zhes zhus pa dang/ ston pas 'khor la bka' stsal pa// spyi ti yo ga'i theg pa ru// theg chos brgyad khri bzhi stong 'dus// mi 'geg mi spyod ma bsgyur bar// chos sde brgyad khri bzhi stong 'dus// gzung 'dzin rten 'brel yul sems dang// bden gnyis med pas mtshan nyid 'dus// dag gsum skye 'gag rtse gnyis med// phyi rgyud sde gsum theg pa 'dus// snang stong dbyings dang ye shes med// rang byung ye shes snang ba 'di// chos skur 'dod pa med pa yis// bskyed rdzogs rnam gsum theg pa 'dus// rim dgu spyi ti yo gar 'dus// snang srid chos rnams yod med rtag chad rdzogs// zhes gsungs so// nam mkha' klong yangs kyi rgyud las/ spyi ti yo ga'i theg par brgyad khri bzhi stong rdzogs par 'dus par bstan pa'i le'u ste bcu dgu pa'o//// de nas rdo rje sems dpa' yis// ston pa gsang ba'i bdag po la// rgyud 'di'i mtshan ni ji ltar gzung// zhes zhus pa dang/ ston pas 'khor la bka' stsal pa// snying po'i klong du gdams pa'i bcud// spungs pa'i snying po bcud spungs rgyud// skye 'gag med pa'i nam mkha' la// 'pho 'gyur g.yo rtsol blo las 'das// nam mkha' klong yangs rgyud du zung// theg pa'i bcud rnams 'dus pa'i phyir// bcud 'dus spyi ti yo gar zung// zhes gsungs so// nam mkha' klong yangs kyi rgyud las/ rgyud kyi mtshan bstan pa'i le'u ste bcu dgu pa'o//// de nas rdo rje sems dpa' yis// ston pa gsang ba'i bdag po la// rgyud 'di gtad pa'i gnas ni gang// zhes zhus pas/ ston pas 'khor la bka' stsal pa// rgyud 'di gtad pa'i skal ldan ni// nam mkha'i blo la nyi zla'i sems// dar dkar rgyud la ri bo'i blo// ral gri'i shes rab rgya mtsho'i thugs// bla ma la gus snying rje che// dam tshig gzhung bsrung rnam smin 'dzem// chags pa chung la gtong phod che// man ngag gsang thub spyod lam yangs// de lta bu la rgyud 'di gtad// rgyud ngan nga rgyal dam tshig med// che ngag dge smod grogs mched bslu// kha gsags g.yo sgyu thabs kyis brid// mi 'chang zong 'tshong log lta skyen// khrel med g.yo sgyu'i 'brel ba la// yul mnga' ster yang ma sbyin cig/ de lta bu la phyin gyur na/ gnyis ka dmyal bar skye bar 'gyur/ zhes snod kyi khyad par gyi rim pa bstan pa ste le'u nyi shu pa'o//// snying po bcud spungs nam mkha' klong yangs kyi rgyud rdzogs so//// u rgyan gu ru pad+mas bshad/ lots+tsha ba ska ba dpal brtsegs kyis bsgyur zhing zhus nas gtan la phab pa khri srong lde'u btsan la gtad/spel ba'i gnas med gter du sbas// gter rgya/ zab rgya// sbas rgya//// rgya gar skad du/

CLOSE WINDOW