CLOSE WINDOW

Gpb003.009
བོད་ཡིག

rgya gar skad du/ Ar+yA ba lo ki te shwa ra sa mA d+h+ye ka tan+t+ra nA ma/ bod skad du/ 'phags pa spyan ras gzigs ting 'dzin rtse gcig gi rgyud ces bya ba/ dpal kun tu bzang po la phyag 'tshal lo// 'di skad bdag gis thos pa dus gcig na/bcom ldan 'das dpal kun tu bzang po/ spyan ras gzigs seng ge rnam par rtse ba dang mkha' 'gro rnams kyis rab tu bskor/ rang byung byin rlabs ston pa'i dus byin gyis rlabs kyi ye shes shar ba'i tshe bstan pa rang snang shugs chod la// ting 'dzin rtse gcig rgyud pa'o// de nas mkha' 'gro nyi ma'i phreng ba yis// chos nyid brdal ba'i pho brang du// bcom ldan kun tu bzang po la// blta ba rkyen thabs ji ltar lags// bsam gtan rkyen thub ji ltar lags// spyod pa rkyen thub ji ltar lags// gnyid log rkyen thub ji ltar lags// rmi lam rkyen thub ji ltar lags// bar do rkyen thub ji ltar lags// ye shes rkyen thub ji ltar lags// 'bras bu rkyen thub ji ltar lags// bag chags rkyen thub ji ltar lags// 'khrul pa rkyen thub ji ltar lags// zhes zhus pas/ ston pas bka' stsal pa/ nyon cig mkha' 'gro nyi ma'i phreng// nga yis khyod la bstan par bya// zhes gsungs so// ting nge 'dzin rtse gcig gi rgyud las/ zhus pa dang lan gnang ba'i le'u ste dang po'o//// kun tu bzang pos bka' stsal pa// nyon cig rdo rje mkha' 'gro ma// lta ba rkyen thub mi thub gnyis// rkyen thub 'di ltar shes par gyis// rang snang thig le'i klong chen la// rgyu med pa la rkyen med pas// phyi nang med par lta ba'i gdeng// zang thal shar bas gnyen po med// skye med rdo rje rang snang ba// gnyen pos choms pa'i skabs med pas// lta ba klong chen rtsol bsgrub grol// ye grol thig le rang la shar// ma byas rang sgo lta bas mchog/rkyen med rnam dag 'ub chub klong// phyi nang med pas man shel 'dra// dpe zla med pas nam mkha' 'dra// rgyu rkyen med pas nyi ma 'dra// thams cad rdzogs pas nor bu 'dra// lta ba lkog 'gyur stong nyid mkhan// da lta sbyangs nas phyi dus 'debs// sangs rgyas phyi dus mkhan po de// lta ba rkyen khar shor ba yin// rkyen thub rkyen nyid las grol ba// gnyis med lta ba rang la snang// de ni lta ba rkyen thub yin// zhes gsungs so// ting nge 'dzin rtse gcig gi rgyud las/ lta ba rkyen med ngo sprod kyi le'u ste gnyis pa'o//// bcom ldan kun tu bzang po yis// rdo rje mkha' 'gro'i tshogs rnams la// bsam gtan rkyen thub bstan pa ni// bsam gtan chen po thun gcig po// bsam gtan rang sgo bying rmugs sel// rang byung nyams las grol ba yin// rtse gcig ye shes nyams las grol// nyams myong bag chags phrag dog chung// phra mo'i rtog pa rang sar dag/ yengs pa med pa rig pa'i gnad// bying rmugs rgod dang 'phro ba rnams// dgug pa sel bar bya mi dgos// ye shes rang shar bying rgod kyang// rang grol 'ub chub rtse mor phyin// thun tshad gzung du gcig por 'dus// nyag gcig rtogs bsgom nyams las 'das// ye shes bsgom pa ma yin te// ye shes bsgom du blo snang med// blo snang bsgom pas rkyen mi thub// ngo bo blo snang rang sgo de// ye shes rang shar ting 'dzin rkyen thub yin// zhes gsungs so// ting nge 'dzin rtse gcig gi rgyud las/ rtse gcig rang sgo'i le'u mtha' grol rkyen thub kyi le'u ste gsum pa'o//// bcom ldan kun tu bzang po yis// rdo rje mkha' 'gro 'khor bcas la// spyod pa rkyen thub bstan pa ni// rang byung shugs byung spyod pa ni// snang srid thug phrad shes pa ni// shes rab thabs kyi spyod pa ste// byas spyod ma yin rang shar la// bzang rtogs ngan rtogs tshogs su spyod// spyod med rang shar 'ub chub dang// mnyam par shes pas yul med de// spyod pa spang len rkyen mi thub// dug lnga rang shar bde bar spyod// rang byung grogs su shar ba'i rkyen rnams thub// snang ba 'od gsal phyi yi rkyen thub yin// tshogs drug rang dag nang gi rkyen thub yin// 'gyu ba dngas sangs gsang ba'i rkyen thub yin// rol pa rang grol ngo bo'i rkyen thub yin// zhes gsungs so// ting nge 'dzin rtse gcig gi rgyud las/ spyod pa rkyen thub kyi le'u ste bzhi pa'o//// bcom ldan kun tu bzang po yis// gnyid log rkyen thub bstan pa ni// nyon cig rdo rje mkha' 'gro ma// lung ma bstan gyi gnyid dang ni// de nyid gnyid kyi rtsa ba'o// rtsa ba'i gnyid ni 'di lta ste// thog mar rang lus grub tsa na// mdzod spu'i sgo ru bag chags gnyid// ma yis shes rab de yis rtsar// 'gyu ba'i shes pa bying bar byed// gnyid kyis gdams pa de ltar shes// gnyid log rtog pa med pa yi// lhun gyis grub pa'i spyan yin pas// gnyid de thig le'i klong du grol// thig le stong par ngo sprad na// gnyid log rkyen thub zhes bya'o// lung ma bstan gyi gnyid dag ni// gti mug ma rtogs shes pa bag la zha// ye shes ma shar 'khrul par mi snang bas// lung du ma bstan rang grol ma shes pas// gnyid log lam byung rmis pa gsum// rmi ba 'khrul ba bag chags yin// 'khrul pa'i ngo bo 'gyu ba rang shar yin// gnyid kyi gzhi ma mdzod spur log/ rtsa yi rgyal po shel gyi sbu gu can// khrag gi drod dang thig le'i rlung// de gsum 'dus pa gnyid kyi rgyu// rtsa de snying la zug pas na// ngo bo rang bzhin thugs rje yi// 'khrul pa'i ngo bo 'gyu ba rang shar yin// 'gyu ba'i gsang lam 'gyus nas ni// mdzod spur gnyid ni phebs pa ni// snying smad khrag gi rtsa dang ni// snying stod thig le'i rtsa dang ni// dbus na rlung gi rtsa gsum gnas// khrag gi rtsa yis rlung rtsa mnan// thig le'i steng du 'gyu ba log/bsam gtan rang sa rtsa rlung mnan// shes rab ye shes rlung du ngo sprad pas// gnyis med thig le rang grol nas// gnyid log rkyen thub zhes bya'o// zhes gsungs so// bsam gtan rtse gcig gi rgyud las/gnyid thig le rang snang gi le'u ste lnga pa'o//// bcom ldan kun tu bzang po yis// rmi lam rmis pa rkyen thub bstan pa ni// nyon cig rdo rje mkha' 'gro ma// lam ni mdzod spu gsang sgo yin// shes rab ye shes rlung gi lam mi snang// rmi ba rnam pa bzhi yin te// bag chags gnyid ni mthun pa'i rmi lam yin// 'khrul pa'i gnyid ni dang po'i dus nas ldang// mtshams sbyor tshe snga'i gnyid rmi'o// ye shes gnyid kyi ngo sprad rkyen thub pa// 'khrul pa'i gnyid ni ye shes rlung gis grol// mtshams sbyor tshe snga'i rmi bas grol// bag ni rmis pa rang byung ye shes kyi// bag ni thig le dkar dmar ro// chags pa rang byung chen por sprod// ye shes rmis pa rang byung rlung dang sprod// shes rab rlung ste ye shes zang thal rlung// chags pa 'gyu ba'i thig le la// de nas rang byung rkyen las grol// zhes gsungs so// bsam gtan rtse gcig gi rgyud las// rmi lam rmis pa rkyen thub pa'i le'u ste drug pa'o//// bcom ldan kun tu bzang po yis// bar do rkyen thub bstan pa ni// nyon cig rdo rje mkha' 'gro ma// dran pa bzhi po rkyen thub la// mngon shes drug ldan rjes dran drug/bar ma do yis 'od snang de// rang 'od rang snang rkyen thub yin// 'gyu ba ye shes rlung yin pas// ye shes rkyen thub zhes kyang bya// yid 'jug shes rab ngo sprad pas/ ngo sprod rkyen thub zhes kyang bya// bar do yin pa dran pa dang// tshe 'phos pa ni dran pa dang// 'gro drug rang snang dran pa dang// kun bzang rang sa dran pa'o// mngon shes drug ni 'di lta ste// 'gyu ba'i spyan gyis snga phyi mthong// bar do 'od kyi snang ba mthong// dge sdig las kyi 'bras bu mthong// ngo sprod sangs rgyas sa yang mthong// rigs mthun dag pa'i lha mi mthong// 'byung po mi min 'jig rten mthong// spyir ni 'gro drug longs skur mthong// rjes dran drug ni 'di lta ste// rnam par shes pa 'gag par dran// 'byung ba lnga po nub par dran// rang gi srog dbugs sdud chad dran// bar do lus po med pa dran// 'gyu ba srog rten med pa dran// bla ma'i ngo sprod gdams pa dran// dran pa drug po rang snang bas// sangs rgyas sa las mi 'da' bas// bar do rkyen thub ces bstan no// zhes gsungs so// rtse gcig zang thal gyi rgyud las/ rmi lam rmis pa rkyen thub dang bar do sbyar ba rkyen thub kyi le'u ste bdun pa'o//// bcom ldan kun tu bzang po yis// rdo rje mkha' 'gro 'khor bcas la// ye shes rkyen thub bstan pa ni// ye shes ye shes khyad par che// ye shes zang thal rkyen med de// 'byung ba lnga po ye shes lnga// chags sdang med pas ye shes 'jig/ gnas dang stong pa'i rkyen thub yin// phung po sgo lnga ye shes lnga// rang byung ye shes kho na la// skye rga na 'chi bzhi po la// rkyen thub bar dor gdod nas dag/ dug lnga ye shes lnga ru snang// rang snang ye shes 'phel 'grib med// chags sdang rkyen thub rang snang gsal// rang byung rtsa lnga ye shes lnga// kha dog lnga las grub pa'i rtsa// dbus mthing g.yas dkar g.yon dmar ba// mdun dang rgyab ni ser dang ljang// skud pa lnga yang ye shes lnga// gsal byed spyan lngas rab tu mdzes// shel gyi sbu gu zhes kyang bya// longs sku 'od gsal zhes kyang bya// tshangs pa'i skud pa zhes kyang bya// ye shes rgyu srang zhes kyang bya// gsang ba'i lam chen 'di yin no// de yi nang na 'das pa lnga// mu tig dkar po dri ma med// rA ga dmar po shin tu dngas// gser 'dra ser po yon tan rgyas// baiDUr mthing ga 'gyur med ston// nI la ljang gu rab tu 'phro// tshangs pa'i skud pa'i nang na gsal// rin chen sna lnga las grub pa'i// ye shes kho na chos min te// gsang ba'i ye shes rkyen thub yin// bar chad med pas rgyun mi chad// byed pas ma byas 'dus byas min// ye shes chad med rkyen thub po// rkyen med ye shes rang snang gces// zhes gsungs so// ting nge 'dzin rtse gcig gi rgyud las/ ye shes rkyen thub kyi le'u ste brgyad pa'o//// bcom ldan kun tu bzang po yis// mkha' 'gro ma yi tshogs rnams la// nges shes rkyen thub bstan pa ni// gzhi nges sangs rgyas gzhi ru shes// lam nges gzhi shes chos kyi mchog/ 'bras bu gzhi 'das ngo shes phyir mi ldog/ rgyu med rang shar nges shes rang byung ba// lta ba rang blta snang srid nges shes brtas// bsgom pa rang shar nges shes phyogs ris med// spyod pa nges shes rang byung rgyu rkyen med// 'bras bu nges shes mi ldog rang sa non// skyed med nges shes snang srid rang byung bas// rang byung ye shes rang la shar// ma rig rang byung gzung 'dzin kho nar 'char// gzhi rus nges shes gnyis med zang thal yin// lam du nges shes gzung 'dzin lam du slongs// 'bras bu nges shes gzung 'dzin ye shes grol// ye shes rkyen thub gzung 'dzin ka nas dag/ces gsungs so// ting nge 'dzin rtse gcig gi rgyud las/ nges shes rkyen thub kyi le'u ste dgu pa'o//// bcom ldan kun tu bzang po yis// rdo rje mkha' 'gro 'khor bcas la// 'bras bu rkyen thub bstan pa ni// phyi dang nang dang gsang ba gsum// de la phyi yi rkyen thub bstan pa ni// phyi yi 'bras bu 'byung ba lnga// rang snang longs sku rgyun chad med// lha mo lnga la skye shi med// phyi yi 'bras bu rkyen thub yin// nang gi 'bras bu phung po lnga// dbyer med chos sku rgyun chad med// ye shes lnga la skye shi med// nang gi 'bras bu rkyen thub yin// gsang ba'i 'bras bu chags sdang lnga// rang byung ye shes rang rig ngang// lhag mthong nyid dang thams cad mkhyen// ye shes lnga la rgyun chad med// de ni gsang ba'i 'bras bu yin// yang gsang 'bras bu rtsa lnga la// rlung dang thig le rtsa dang ni// lhan cig skyes pa'i ye shes dang// thig le chos nyid 'du 'bral med// 'du 'bral 'bras bu'i rkyen thub yin// 'du 'bral med pa 'bras bu'i mchog/ rgyun chad med pas rkyen thub yin// bar chad med na 'bras bu'i rgyal po yin// phyir mi ldog na 'bras bu'i nges shes yin// zhes gsungs so// ting nge 'dzin rtse gcig gi rgyud las/ 'bras bu rkyen thub kyi le'u ste bcu pa'o//// de nas kun tu bzang po yis// bag chags rkyen thub bstan pa ni// bag chags rnam pa gsum yin te// thog ma'i 'od kyi bag chags dang// bar du lus kyi bag chags dang// tha ma 'khrul pa'i gnas skabs bag chags gsum// thog ma 'od kyi bag chags de la ni// rang byung rang la shar bas rkyen thub bo// 'gyu ba ye shes gsal ba bag rkyen thub// bar du lus kyi bag dang chags// rang lus chos sku bag rkyen thub// chags pa rang byung shes pas chags rkyen thub// tha ma 'khrul pa gnas skabs chos// chos nyid ye shes 'bar bas bag rkyen thub// rang rkyen rang la shar bas chags pa med// gnyis med rang la shar bas bag rkyen thub// bag chags rkyen khar mi snang rang byung ye shes gsal// bag chags rkyen thub srid pa rang byung gsal// zhes gsungs so// ting nge 'dzin rtse gcig gi rgyud las/ 'bras bu rkyen thub kyi le'u ste bcu gcig pa'o//// bcom ldan kun tu bzang po yis// 'khrul pa rkyen thub bstan pa ni// thog ma 'khrul pa rlung gis 'khrul// bar du 'khrul pa chags sdang 'khrul// tha ma rang snang 'od la 'khrul// lhun grub ma ning 'khrul pa'i rlung// rlung gis thams cad grub pa yin// 'bras bu 'khrul pa sna tshogs smin// rlung de'i ye shes shes pa de// mi 'gag pa la rlung zhes bya// rang lus rlung gi dkyil 'khor na// rtsa lnga tshangs pa'i skud pa la// rlung rgyu rlung la drod yod pas// tshangs pa'i skar khung rlangs pa de// nyin zhag gcig la brgyad khri bzhi stong rgyu// chos nyid me long gsal ba na// rlung ni 'gag med gsal bar rgyu// stod ni mya ngan 'das pa'i rlung// shes rab dag la rgyu ba'o// smad ni 'khor ba dag gi rlung// thig le dkar dmar gnyis la rgyu// lte ba rlung gi 'khor lo na// ngan 'gro gsum gyi sgo yang yod// snying ga chos kyi 'khor lo na// mtho ris gsum gyi sgo yang yod// theg dgu sgo dgu stod na gsum// theg gsum spyan gsum dag la snang// theg gcig mi gcig dri ma med// mdzod spu rang gsal sgron me yang// de la ngo sprod 'khrul pa rkyen thub yin// ngan 'gro'i sgo gsum dkar dmar dang// dri chen sgo ru byung ba yin// dkar po dmyal ba dmar po yi dwags sgo// bshang kha byol song sgo yin no// pho dang mo la gsum ka tshang// dus tshod 'byung bas rang byung yin// zhes gsungs so// spyan ras gzigs ting nge 'dzin rtse gcig gi rgyud las 'khrul pa rkyen thub kyi le'u ste bcu gnyis pa'o//// ston pa chos sku kun tu bzang po'o// sdud pa po spyan ras gzigs seng ge rnam par brtse ba'o// zhu ba po mkha' 'gro ma nyi ma'i phreng ba'o// spyan ras gzigs ting nge 'dzin rtse gcig gi rgyud chen po zhes bya ba 'khor mkha' 'gro ma la rab tu gtad pa'i le'u ste bcu gsum pa'o//// rtse gcig gi rgyud chen po zhes bya ba rdzogs so////

CLOSE WINDOW