CLOSE WINDOW

Gpb003.007
བོད་ཡིག

/// rgya gar skad du// ma hA san d+hi dz+nyA na tsakra gu h+ya tset+ta tan+t+ra nA ma/ bod skad du/ rdzogs pa chen po ye shes 'khor lo gsang ba thugs kyi rgyud ces bya ba/dpal rang byung rig pa'i chos sku de kho na nyid la phyag 'tshal lo// 'di skad gsungs pa'i dus gcig na// rang byung ngo bo ston pa de// ye shes klong gi gnas mchog na// nyid las mi gzhan rtogs pa'i 'khor// don gcig bstan pa mngon gyur to// de tshe chos kun snying po 'di// dpal gyi dpal gyur kun bzang gis// rgyu dag rdo rje sems dpa' la// bka' rtagasalnga yi don bsdus nas// nges don gdams ngag bka' stsal pa// sangs rgyas kun gyi nges pa'i don// don gyi khyab dang rtogs pa yi// byin rlabs brda dang tshig gi don// snod ldan blo dang ldan pa la// ma nor nges pa ngas bshad kyis// brjod med dad pa'i yid kyis nyon// de skad ces ni gsungs pa dang// khab len la ni lcags 'du bzhin// byin gyi rlabs kyi snang ba yis// 'khor rnams dga' mgu mos pas nyan// rdzogs pa chen po ye shes 'khor lo gsang ba thugs kyi rgyud las/gsung bar zhal gyis bzhes te/ gleng gzhi bstan pa'i le'u ste dang po'o//// de nas kun rig ston pa des// sngon gyi thugs dam zhal bzhes pas// 'gro don thugs rje rdzogs mdzad phyir// ched du dgongs nas bka' stsal pa// bder gshegs snying po chos kyi sku// 'gro drug sems can thams cad la// kun la khyab pas nam mkha' bzhin// rang byung ngo bo ye nas yod// de yang 'khor gyi snying po nyon// 'khor 'das med pa'i gong rol du// ye nas gnas pa'i chos nyid la// ma 'khrul phyir na ngang gis rtogs// yon tan lnga ldan shes pa dang// sangs rgyas dus mnyam kun bzang byung// nyid las mi gzhan 'khor rnams bcas// 'og min gnas su kun bzang gis// rgyud dag rdo rje sems dpa' la// tshig tu ma gsungs don rnams go// rang gis rig cing dgongs pas brgyud// de phyir byin gyis brlabs zhes bya// sprul skus brda' yis brgyud pa yang// tshig don lus dang rtags kyi brda// shAka thub sprul pa gzhan rtsal gyis// lha gnas mi yis yul du phyungs// rig 'dzin 'phrul gyi theg pa ni// yang zhun gser gyi yi ger bris// lag na rdo rje'i sprul pa la// nges don dgongs don mngon phyung nas// sdeb sbyor tshig gis bkrol nas bshad// de yang rdo rje sems dpa' nyon// rigs btsun khyad 'phags snod ldan ni// gang zag rjes su mi 'brang bar// lung rigs gnyis la rtogs pa mkhas// man ngag chos phyir shin tu mos// bla ma la gus phyi thag ring// phangs med dbul nus snod ldan la// 'bral med ye shes rang shar don// rgyud drug yang snying yin pa'i phyir// bstan ma thag tu shes pa'i chos// snod ldan gsang thub 'ga' la bstan// rdzogs pa chen po ye shes 'khor lo gsang ba thugs kyi rgyud las/tshul du gsungs pa mdor bstan pa'i le'u ste gnyis pa'o//// de nas rdo rje sems dpa' yis// ched du gsungs pa'i don go nas// 'khor rnams la ni rtser dgongs nas// rdzogs sangs rgyas la 'di skad gsol// gzhi nyid dpe don gang gis mtshon// dang po sangs rgyas ji ltar byung// de yis byin rlabs ji ltar rtogs// brda dang tshig gis bshad du gsol// de skad zhus pa'i don gsan nas// 'dus pa'i 'khor la nges pa'i don// ma nor nges pa'i sangs rgyas bka'// nga yis bshad kyis nges par nyon// rang bzhin gzhi yi mtshon dpe ni// 'dus ma byas kyi nam mkha' ni// gang nas ma 'ong ye nas yod// gang yang mi 'gro dus gsum gcig/ de ltar kun khyab ngos gzung med// thog mtha' med pa'i nam mkha' 'dra// rig med stong pa yin pa'i phyir// dpe ru zab ste don du med// de yang rdo rje sems dpa' nyon// de bzhin ngo bo'i gnas lugs ni// 'khor 'das ma rig rang bzhin lus// sangs rgyas sems can gnyis med pa'i// 'khor 'das gnyis kyi gzhir gyur pa// ma yengs par ni yod gyur kyang// don gyis ma zin rang snang ba// ngos ma zin cing shan ma phyed// 'gro 'ong med par rgyun du gnas// thog mtha' med phyir ngo ma shes// da lta kun gzhi'i sems la gnas// 'dus ma byas phyir skye 'jigs med// sems can kun gyi rten gnas gzhi// mos gus med phyir rtogs par dka'// rdzogs pa chen po ye shes 'khor lo gsang ba thugs kyi rgyud las/ gzhi'i dpe bstan pa'i le'u ste gsum pa'o//// de nas kun rig ston pa yis// dang po sangs rgyas rtogs tshul ni// dad ldan 'dus pa'i 'khor rnams la// nga yi rtogs nyams bka' stsal pa// 'khor 'das med pa'i gong rol du// sa chu me rlung gang yang med// srid pa ma chags stong pa nyid// de tshe rang bzhin lus de ni// ye nas yod pa'i chos nyid de// don de ma 'khrul rig pa yis// da lta ma 'khrul nges bstan phyir// gzhi dang rig pa gcig tu shes// rtogs dang sangs rgyas dus mnyam byung// nam langs nyi ma shar dus mnyam// ri bo ta la'i dpe bzhin du// 'khor 'das thog mtha' dus gcig chod// de yang rdo rje sems dpa' nyon// kun bzang rgyal ba'i rtogs pa de// rang byung ngo bo nyid kyi sku// rgyu rkyen ma byas 'dus ma byas// kun la khyab pas chos kyi sku// rang gi rig pa ye shes thugs// de nyid yin par ngo shes pas// lhag mthong ye shes rang shar phyir// yod med gnyis kyi sgro skur bral// dus gsum mi 'gyur brtan nges par// thig le nyag gcig chos kyi sku// de las sangs rgyas chos rnams byung// de phyir kun tu bzang po bya// rdzogs pa chen po ye shes 'khor lo gsang ba thugs kyi rgyud las/kun tu bzang po'i rtogs pa bstan pa'i le'u ste bzhi pa'o//// de nas kun rig ston pa yis// 'og min chos dbyings gnas de ru// ji bzhin rdo rje sems dpa' yis// ma 'khrul rig pa gsal ba ni// rang la ye nas yod min yang// gzhi ni mi 'gyur nges pa ni// 'di nyid kho na yin nam min// yid la the tshom cha phra yod// de rtogs gsal phyir mos gus byed// de phyir kun bzang de ched du// mnyam bzhag dgongs pa thugs brtan pas// the tshom med par chos nyid rtogs// de phyir ye shes rgyud dag pa'i// rdo rje sems dpas mngon gyur go// tshig tu ma bstan don du shar// de yang 'dus pa'i snying po nyon// de phyir byin gyi brlabs lugs ni// kun bzang thugs kyi nges don de// chos drug ming dang don dpe gnyis// drug gsum gcig phyir rim gyis kyang// gang la ma brten yid kyis ni// lhag mthong chos sku de ltar shes// de phyir dgongs pas brgyud pa'i phyir// rtogs pa mngon gyur sangs rgyas pa'i// phyis mi len pa'i rig pas go/ nyid las mi gzhan sangs rgyas 'byung// de phyir byin gyis brlabs zhes bya// da yang 'dus pa'i snying po nyon// ston pa kun bzang byin rlabs kyis// sku gsung thugs kyi sprul pa gsum// gza' skar rgya mtsho ji bzhin du// nges don nyid kyi rtsal du byung// rdzogs pa chen po ye shes 'khor lo gsang ba thugs kyi rgyud las/ rdo rje sems dpas byin gyis brlabs bshad pa'i le'u ste lnga pa'o//// de nas 'dus pa'i tshogs rnams la// kun rig ston pas bka' stsal pa// sprul sku'i brda' yis bstan pa yang// tshig gi brda yi sgron me yis// ma rig mun pa bsal ba'i phyir// lung dang ldan pa'i gdams ngag gis// bstan pa rna ba'i rgyud ces bya// de yang 'dus pa'i snying po nyon// don gyi brda yis gdams ngag gis// ye shes rig pa khong nas shar// de tsam nyid na skye 'gag med// da lta nyid na mngon gyur rtogs// lus kyi brda' yis sprul pa 'gyed// stong gsum ma lus thams cad kun// sprul pa grangs med kun tu khyab// lnga bcu rtsa bdun brda' yis ni// skyon gyis ma gos 'gro don 'grub// de yang 'dus pa'i snying po nyon// rtags kyi brda yis bstan pa'i phyir// sku mdog phyag mtshan sna tshogs la// gang 'dul phrin las rdzogs mdzad pa// byin rlabs sangs rgyas dngos grub thob// rdzogs pa chen po ye shes 'khor lo gsang ba thugs kyi rgyud las/ tshig dang brda' bstan pa'i le'u ste drug pa'o//// de nas rdo rje sems dpa' yis// ye shes mngon du rtogs bya'i phyir// kun rig chos kyi rgyal po la// bden pa'i yid kyis 'di skad gsol// chos rnams kun gyi rtsa ba yi// gzhi gsum 'brel pa yod dam med// kun gzhi sems kyi mun gseb nas// chos sku ngos ni ji ltar bzung// da lta'i lus dang ma bral bar// gzugs sku mi 'byung gang gis bsgribs// mnyam pa'i rgyal pos bshad du gsol// de skad gsungs pa'i don gsan nas// 'dus pa'i 'khor la bka' stsal pa// de don rtsa ba mdor bsdu na// gzhi gsum ma nor nges pa yis// 'brel pa yod med ngas bshad kyis// de gsum yod med gcig tu rtogs// 'khor 'das gzhi yi rang bzhin lus// 'khor gzhi shes pa lung ma bstan// gnas skabs 'brel yod mthar thug med// gnas skabs 'brel pa yod pa ni// lung ma bstan pa rnam gsum la// rang bzhin lus kyis khyab pa'i phyir// de yang 'dus pa'i snying po nyon// mthar thug 'brel pa med pa ni// shes gzhi lung ma bstan pa la// yid sgrib yod phyir mos gus med// byin rlabs rtogs dang lung ldan gyis// bstan thabs med phyir 'khor ba'i rgyu// des bskyed 'khor ba 'ba' zhig yin// de phyir mthar thug 'brel pa med// mun dang nyi ma dus mi mtshungs// ma rig ye shes de bzhin no// da yang 'dus pa'i snying po nyon// 'khor 'das gzhi yi rang bzhin lus// myang 'das kun bzang gzhi dang ni// mthar thug 'brel yod gnas skabs med// mthar thug 'brel pa yod pa ni// lan cig skye shi bar do la// lung bstan gdams ngag phrad srid na// mos gus dang bas rtogs 'gyur tshe// lung ma bstan pa dag cing stong// mthar thug ye shes 'brel pa yod// nam langs nyi ma shar ba 'dra// de yang 'dus pa'i snying po nyon// myang 'das kun bzang gzhi dang ni// 'khor gzhi lung ma bstan pa gnyis// lhan cig mi gnas 'gal ba'i phyir// gnas skabs mthar thug 'brel pa med// nyi ma'i dkyil 'khor mun med bzhin// de phyir ye shes zang thal nyid// de yang 'dus pa'i 'khor rnams nyon// 'khrul gzhi lung ma bstan la sogs// shan phye'i skabs su ngas bshad kyis// la zlo'i dus su ngas ma gsungs// phyi rabs rnal 'byor de bzhin no// rdzogs pa chen po ye shes 'khor lo gsang ba thugs kyi rgyud las/ gzhi gsum 'brel pa yod med bstan pa'i le'u ste bdun pa'o//// de nas kun rig ston pa yis// kun gzhi sems kyi mun gseb nas// 'khrul dang ma 'khrul bka' stsal pa// 'khrul pa rnam bzhi dbye ba'i phyir// gsum 'brel bzhi ldan gol ba med// de phyir chos sku gzhi dang gcig/de yang 'dus pa'i snying po nyon// 'khrul dang ma 'khrul shan phyed pas// thog ma nyid nas bsags pa yi// sngar gyi bag chags bzang ngan ni// dus dang gnas skabs 'gyur ba'i phyir// shes pa ma 'khrul dngos po 'khrul// zhen pa brtas phyir bag chags te// mi shi kha dog dran pa 'dra// de yang 'dus pa'i snying po nyon// chags sdang 'byung ba'i rgyur gyur pa'i// phyis kyi nyon mongs skye ba yang// dga' dang mi dga' la sogs pa'i// glo bur rkyen gyis 'byung ba'i phyir// dngos po ma 'khrul shes pa 'khrul// thag pa sbrul du 'dzin pa 'dra// de yang 'khor gyi sems dpa' nyon// snang ba gzhi la med pa la// spang sdud zhen pa byed pa ni// blo dngos gnyis ka 'khrul pa'i phyir// med pa la ni yod brtag pa// ri bong rwa la rtog dpyod 'dra// de yang 'khor gyi snying po nyon// skye bo tha mal shes pa yang// bya ba ma 'khrul gang byed kyang// blo dngos ma 'khrul chos nyid med// lung ldan gdams ngag med pa'i phyir// gzhi nyid ma shes ma rig yod// zla ba dkar kyang mun yod 'dra// da yang 'dus pa'i snying po nyon// de dag rtsa ba mdor bsdu na// 'khrul pa zung bzhi ya bdun dag/ snang ba med par ma shes phyir// sgro skur zhen pas rang bslus te// gdams ngag med phyir chos sku min// de phyir grub mthas blo ma bsgyur// rdzogs pa chen po ye shes 'khor lo gsang ba thugs kyi rgyud las/snga phyi'i rtog pa 'khrul pa bstan pa'i le'u ste brgyad pa'o//// de nas 'dus pa'i tshogs rnams la// chos sku ngo sprod don gsungs pa// snga phyi'i rtogs gsum bral ba yis// rang rig chos sku'i ye shes ni// 'khrul med da lta'i shes pa la// tha mal lus la rten bcas pa'i// shes pa ma bsgribs gsal ba 'di// rang byung chos sku dag pa'o// de la ma rig mun pa med// da yang 'dus pa'i snying po nyon// de la yon tan bzhi ldan pas// dam tshig 'dzin pa'i ye shes kyis// skye bo mu stegs yul 'di la// nga dang bdag tu rang rgyud byed// zhen pa'i gnyis 'dzin med pa'i phyir// snang ba med pa'i ye shes ni// gol med chos dbyings nam mkha' 'dra// ngang gis gsal ba'i ye shes kyis// tshogs drug bkag pa'i 'gog pa dang// lus med med pa'i lta rgyu ni// gol sa ka nas med pa'i phyir// rin chen 'od 'dra 'char nub med// de yang rdo rje sems dpa' nyon// ye shes gnyug mar gnas pa yis// dbu ma sems tsam thun bsgom dang// thabs kyi rtsa dang thig le sogs// 'byung 'jug can gyi gol sa med// bskyed rim kun gzhi la sogs pa// zhi khro'i lha ru bsgom pa dang// 'phel 'grib can gyi gol sa med// de phyir rgyun du 'bral med yin// de yang 'dus pa'i snying po nyon// gtan la 'bebs pa'i yid kyis ni// lhag mthong rig pa rtogs tsam na// dmigs 'dzin med par ngang gis gsal// gnyug mar gnas dang 'phel 'grib med// da lta'i shes pa 'di nyid la// rang rig chos sku gcig tu 'dus// rdzogs pa chen po ye shes 'khor lo gsang ba thugs kyi rgyud las/ chos kyi sku'i bsgom pa ngos bzung ba'i le'u ste dgu pa'o//// de nas 'dus pa'i tshogs rnams la// kun rig ston pa chos rje yis// rnam smin lus dang bcas 'dus 'dir// gzugs sku mi 'byung bka' stsal pa// lha min mngal gyi sgrib pa 'dra// gzugs sku ngo sprod mi 'dod do// che ba'i yon tan mi 'byung phyir// nam sros nyi ma mi 'char 'dra// de yang 'dus pa'i snying po nyon// lan cig dus kyi deng sang ni// lung med rmongs pa'i nga rgyal can// dpyad bzo rig pa byed pa kun// gzugs sku da lta ngo sprod yod// kha tshab rdzun tshig smra ba la// rmongs pa bden par 'dzin pa 'byung// da yang 'dus pa'i snying po nyon// ma rig rdzun de sun 'don phyir// da lta mngal gyis bsgribs g.yogs pas// longs sku dang ni sprul pa'i sku// bzhugs tshul sgron ma'i dpe mtshon kyang// da lta rang la 'byung mi srid// khyung sgong ma chag 'phur mi nus// de phyir gzugs sku'i gzugs brnyan de// ris su bris dang lugs su blugs// 'bur du brkos pa la sogs pa'i// gzugs sku'i lha ru byung ba yang// dngos su sprad du mi 'dod pas// de phyir drang don ldem dgongs su// khro bo bsgom pa'i lha tshogs bstan// da yang 'dus pa'i snying po nyon// sngon byung gzugs sku byung ba yang// rang rgyud lus can ma yin te// rgyud dag sprul pa gzhi gcig las// sangs rgyas byang chub sems dpa' yin// chags sdang lnga dang bcas pa'i yid// tha mal rang lus sems 'di la// gzugs sku da ltar 'byung mi srid// nam ma langs par nyi mi 'char// da yang rdo rje sems dpa' nyon// da lta gzugs sku sprad 'dod na// mtshan dang dpe byad ma lus kun// rang gi lus la tshang dgos na// zhing khams yon tan kun mthong dgos// dus gsum sangs rgyas thams cad dang// sku gsung thugs ni mnyam dgos na// de med yid smon ngo sprod med// de yang 'dus pa'i snying po nyon// mngal gyis sgrib g.yogs ma bral bar// lung ldan rkyen dang phrad srid na// rang sems chos skur rtogs pa las// gzugs sku mi 'byung lus kyis bsgribs// nyi ma sprin gyis bsgribs pa 'dra// da yang 'khor gyi snying po nyon// sprul sku ngo sprod yod zer na// da lta tha mal lus 'di yis// 'dzam gling bye ba phrag brgya ru// sprul pa bye ba phrag brgya dgos// sangs rgyas dmyal ba yan chad du// lus kyi mig gis mthong ba dgos// rnam smin lus dang bcas dus 'dir// ji ltar gzugs sku ngo sprad kyang// mtha' 'khob chu dang brag la yang// mi thar sdug bsngal 'byung ba'i phyir// sprul sku ngo sprod yod zer rdzun// lha mi kun gyi smad bsad rigs// de yang rdo rje sems dpa' nyon// yid smon tsam du sprod zer nas// zhi khro la sogs bsgom pa yang// rgyud lung chos su ldam dgongs bstan// de phyir gzugs sku gnas 'gyur las// dngos su 'byung bar ngas ma bshad// de yang 'dus pa'i snying po nyon// gzugs sku ngo ni sprad 'dod na// de la rtags chen 'di 'byung ste// seng ge khyung dang u dum war// rin chen la sogs dus 'dir 'byung// 'jig rten sangs rgyas 'byung ba'i rtags// de med gzugs sku 'jig rten du// sems can lus dang ma bral bar// gzugs sku'i yon tan 'byung 'dod pa// mu stegs ka ta ri ba zer// ma rig rmongs pa snying re rje// mnar med dmyal ba chen por 'gyur// rdzogs pa chen po ye shes 'khor lo gsang ba thugs kyi rgyud las/ lus dang ma bral bar gzugs sku mi 'byung bar bstan pa'i le'u ste bcu pa'o//// de nas rdo rje sems dpa' yis// rang rig chos sku la bzla'i phyir// kun rig chos kyi rgyal po la// bden pa'i don gyis 'di skad gsol// ma bsgoms don dang mi 'bral ba'i// ye shes rang shar man ngag gang// tha mal rnam rtog mi gos pa'i// rang shar spyod pa ji ltar spyod// mnyam pa'i rgyal pos bshad du gsol// de skad gsol pa'i don gsan nas// ma bsgoms 'bral ba med pa yis// ye shes rang shar nges pa'i don// kun rig ston pas bka' stsal pa// dngos po ma 'khrul rig pa la// tshor ba bde sdug ci byung yang// lung ldan rin chen rkyen gyis kyang// de nyid chos skur nyams su myong// da yang rdo rje sems dpa' nyon// yul gyi rnam pa gang byung yang// dngos po ma 'khrul rig pa yis// don gyis zin pa'i ye shes te// chos nyid yang dag gnas lugs yin// de nyid lung ldan sgron ma yis// ma rig mun pa med pa'i phyir// sgro skur bral ba'i shes pa la// chos kyi sku zhes de la bya// de yang rdo rje sems dpa' nyon// dang po ba yis dad ldan la// dngos po'i yul la brten te bstan// snang ba mi 'gog thabs yin te// de rten yul dang 'brel med shes// de tshor bde ba 'jam dang zhim// dga' ba nyams su myong ba'i phyir// yul med nyams su myong tshad ni// man ngag lung ni chos skur shes// de phyir ye shes rang shar yin// de yang 'dus pa'i snying po nyon// tshor ba mi bde sdug bsngal yang// na tsha mi zhim rtsub pa dang// mi dga' la sogs ci byung tshe// lung ldan rin chen rkyen gyis ni// chos skur nyams su myong ba'i phyir// yul dang gnas skabs mthar thug gi// 'brel pa med shes nyams kyi tshad// de yang 'dus pa'i snying po nyon// yul 'di rig med 'khrul par shes// 'dus byas yin phyir chos sku med// sdug bsngal tshor ba gang byung yang// de dus rtag chad mthar ma ltung// bying rgod gnyis kyi rkyen ma gos// de phyir chos sku bsgom mi dgos// de yang rdo rje sems dpa' nyon// yul gyi dran rtog ci byung yang// gang phyir chos sku nyams su myong// yang drug nyams dang 'brel med shes// rtogs thabs rnam pa dgur ni brten// rkyen thub gang drag lhag mthong la// rkyen thub drug tu dbye mi dgos// de yang 'dus pa'i snying po nyon// mtha' ru mi 'dzin lta ba la// rig pa rgya yan chos skur gsal// yid ches gdeng gis zin pa la// nyams dang ldan pa'i tshad ces gsungs// rdzogs pa chen po ye shes 'khor lo gsang ba thugs kyi rgyud las/ ye shes rang shar bstan pa'i le'u ste bcu gcig pa'o//// de nas kun rig chos rje yis// tha mal rnam rtog mi gos pa'i// la bzlo'i spyod pa bka' stsal pa// gzhi shes blo dngos gcig pa dang// brtul zhugs mchog dang gegs med pa'i// la bzlo'i spyod pa bka' stsal pa// gzhi shes rang shar spyod pa'i dus// lung ldan nges pa'i gdams ngag gis// yul med chos skur ngos zin pas// lus ngag byar med brjed pa yi// gzhan du 'dzin med rang rig sku// snga phyis ma bslad ma bcos shing// 'du 'bral med pa'i ye shes ni// sus kyang ma byas rang byung ste// gzhi nyid shes pas nam mkha' 'dra// da yang 'dus pa'i snying po nyon// chos sku'i rig pa 'gro 'ong med// rtag chad mtha' yi sgro skur bral// rang gi spyod pa gang spyod kyang// chos kyi sku las ma rtogs pa// rdul tsam gzhan na yod mi srid// de phyir shes pa rang yan la// lhag mthong dran pa'i gdeng gis zin// yengs dang ma yengs med par ni// blta ba'i gdeng 'bral med pa'i phyir// chos sku gzhi zhes spyod pa yin// rdzogs pa chen po ye shes 'khor lo gsang ba thugs kyi rgyud las/gzhi shes pa'i spyod pa bstan pa'i le'u ste bcu gnyis pa'o//// de nas kun rig rgyal po yis// 'dus pa'i 'khor la bka' stsal pa// blo dngos spyod pa bstan pa'i phyir// gzhi nyid de ltar rtogs pa la// snang ba nges med sems la rgyu// de rgyu tsam na chos sku yin// de ltar thag chod nges pa yis// bsgom dang ma bsgoms rang sar grol// gang yang chos sku gyur pa las// blo dang dngos po'i dbyer med phyir// nam mkha'i gzha' tshon ma nges rdzogs// blo dang snang ba dngos po chos// sems kyi dran pa ci snang yang// dngos med rig pa chos skur gsal// bsgom dang mi bsgom tha snyad bral// de phyir blo dngos ye shes shar// rdzogs pa chen po ye shes 'khor lo gsang ba thugs kyi rgyud las/ blo dngos ye shes rang shar gyi spyod pa bstan pa'i le'u ste bcu gsum pa'o//// de nas 'dus pa'i tshogs rnams la// brtul zhugs mchog spyod bka' stsal pa// lta ba la ni bzla ba'i phyir// spyod pa rtsing mo ched du dgos// nges mi 'ching ba'i gdams ngag yod// de phyir rang grol rtogs pa gces// de yang 'dus pa'i snying po nyon// nges lung bstan pa'i rnal 'byor pas// ma dang sring mo kun kyang spyad// gzhan gyis bud med smos ci dgos// sems can mnar cing bsad gyur kyang// dge 'dun mchod rten dkor 'phrog na'ang// rkyen sgrib med par ye shes shar// dmyal dpon ltung ba med pa bzhin// brtul zhugs mchog gi spyod pa la// bsrung ba'i dam tshig mi 'gal te// lung rig mthun pa'i chos 'di dgos// de yang rdo rje sems dpa' nyon// deng sang dus kyi chos byed rnams// zhi 'jam rgyud 'bol 'dod pa de// gdams ngag med phyir byol song rgyu// de phyir rmongs pa snying re rje// zhi 'bol 'bras bu thob pa med// lha rnams 'jig rten du ltung zhing// lta ba ma rtogs thams cad ltung// rdzogs pa chen po ye shes 'khor lo gsang ba thugs kyi rgyud las/ brtul zhugs mchog gis ye shes rang shar bstan pa'i le'u ste bcu bzhi pa'o//// de nas 'dus pa'i tshogs rnams la// gzhi la 'dre med bstan pa'i phyir// ston pa kun rig chos rje yis// 'dre sun 'don pa bka' stsal pa// gzhi la lha 'dre med pa la// mu stegs skye bo bden 'dzin pa// 'dre yod sun 'don la bzla'i don// nga yis bshad kyis sems la zhog/ da yang rdo rje sems dpa' nyon// yul gyis rtog pa ma zad par// gnod pa'i bgegs la zad pa med// bgegs rigs stong phrag brgyad bcu dang// ye 'drog sum brgya drug cu rnams// gzhi la gang yang med pa la// btsun pa khrims 'chal u li yis// mu stegs log lta'i lha bsgrubs nas// kha che'i bye brag smra ba yis// thol thol smra zhing lam lam bor// bdud kyi byin rlabs glo bur 'byung// lha med lhar 'dzin 'dre rnams gnod// 'du ba rnam bzhi'i nad dang ni// ye 'drog sum brgya 'dre yis byas// lha mchod 'dre brdung nad la phan// de skad rdzun du smra ba la// rmongs pa'i skye bo bden snyam nas// bon mchog byas pas phan pa snyam// 'dre mchod bdud du phyi mang che// 'byung ba lnga la 'dre yod zer// srid pa'i spyi bgegs mi la gnod// mi shi 'dre ru gnod zer te// rgyab mchod 'dre ni btags byas pas// na tsha god kha slar la 'ong// de yang 'dus pa'i snying po nyon// srid pa'i spyi bgegs chen po 'di// skye bo rgyang 'phen pa la yod// sangs rgyas chos la 'dre med phyir// chos dang gang zag bdag dang bral// de phyir snang ba med pa'i phyir// srid pa'i spyi 'dre gzhi la med// 'dre yod zer ba blta ba log/ rdzogs pa chen po ye shes 'khor lo gsang ba thugs kyi rgyud las/gzhi la 'dre med par bstan pa'i le'u ste bco lnga pa'o//// de nas 'dus pa'i tshogs rnams la// kun rig chos kyi rgyal po yis// 'dre sun 'don pa bka' stsal pa// 'jig rten zhig na 'dre yang med// kun brtags ma rig yul du brtags// ma rig med na 'dre yang med// 'dre ni glo bur btags tsam pa// mi las gyur pas 'dre gnod na// lus can gnod na ma shir rigs// lus med stong pas gnod mi nus// de phyir 'dre gnod rdzun po che// lhab ka'i mos ma kun gyis bslus// tha mal las kyi dus zad na// mo chog byas dang ma byas med// rkyen mi bzlog ste kun ka 'chi// da yang 'dus pa'i snying po nyon// de phyir lha 'dre kun med de// 'khrul pa'i blo yis btags pa las// rtog pas 'dre med la zlo na// 'khor 'das ma rig chos 'di la// lha 'dre bya ba'i ming med shes// thams cad thig le nyag gcig la// dug nyid sman du sbyor shes ltar// 'dre nyid ye shes klong du shes// dgag bsgrub med phyir 'dre rnams stong// rkyen gyis mi tshugs nam mkha' 'dra// da yang 'dus pa'i snying po nyon// sngags dang don gyi ngo bo la// lha 'dre mi shes ye shes sku// gang la rtog med rang byung la// nges don gdams ngag gsal thebs phyir// bslu brid chos kyi gol sgrib med// 'dre med ye shes la bzla'o// rdzogs pa chen po ye shes 'khor lo gsang ba thugs kyi rgyud las/ 'dre sun 'byin par bstan pa'i le'u ste bcu drug pa'o//// de nas rdo rje sems dpa' yis// rtogs ldan 'khor gyi don ched du// kun rig ston pa chos rje la// bden pa'i dgongs don 'di skad gsol// ye shes la ni ji ltar bzla// de yi 'bras bu ji ltar 'byung// nges don rgyud 'di gang la gtad// mnyam pa'i ston pas bshad du gsol// de skad zhus pas don gsan nas// 'dus pa'i 'khor la bka' stsal pa// rgyu dang 'bras bu ro gcig phyir// rim par dbyer med ngo bo gcig/ sangs rgyas ma tshol rang la gnas// de phyir rgyu 'bras dbye ru med// de yang 'dus pa'i snying po nyon// 'khor 'das rtsa ba gcig pa'i phyir// rang bzhin lus de ngo shes pas// thar pa thob ces bstan pa'i phyir// 'khor 'das med pa'i chos sku rtogs// phyi nang snod bcud ma lus kun// ma byung ma skyes chos dbyings la// dus gsum sangs rgyas 'gyur med phyir// phyi nang ma btsal ye nas yin// de yang rdo rje sems dpa' nyon// ma rig las skyes sems can dang// ye shes las byung sangs rgyas gnyis// ngas lung bstan pas chos skur gcig/ ma btsal la zlo chen po yin// bde dang sdug bsngal 'khor 'das chos// rtogs dang ma rtogs gnyis med phyir// yul du 'dzin pas blo med pas// ma btsal rang gnas ye shes yin// de yang 'dus pa'i snying po nyon// gtsang sme gzhi la med pa'i phyir// blo yis byas pa thams cad 'khrul// ma byas ma bcos rang byung thugs// la bzla bzang ngan med par gyis// de yang 'dus pa'i snying po nyon// mtho dman che chung ma lus kun// man ngag can la che chung med// ye shes rang la gnas pa la// mtho dman med par rtogs par gyis// rang byung skye shi med pa'i phyir// dus gsum gcig pas ye shes sku// grangs dang tshe tshad bgrang du med// de phyir mi 'gyur ye shes yin// de yang 'dus pa'i snying po nyon// ye shes rang shar la zlo la// gang ltar snang dran chos nyid la// ma btsal ye shes rang gnas phyir// bsgom mi dgos par la bzla'o// rdzogs pa chen po ye shes 'khor lo gsang ba thugs kyi rgyud las/ ye shes rang shar du la bzla ba'i le'u ste bcu bdun pa'o//// de nas kun rig rgyal po yis// dad ldan 'dus pa'i 'khor rnams la// rtogs pa'i 'bras bu bka' stsal pa// rtogs pa'i yon tan dus 'dir ni// lus med sgo lnga'i rig pa 'di// sngar ma mthong ba'i zhing khams gsum// ye shes mig gis dus gcig mthong// 'char nub med pa'i nyi zla shar// da yang rdo rje sems dpa' nyon// ma bsam pa yis lhag mthong la// mi brjed pa yis gzungs kyis gzung// ma zos bdud rtsi'i ro mchog myang// ma bsgrubs pa yis 'bras bu thob// ma bsams pa yis don gcig 'grub// de yang rdo rje sems dpa' nyon// de phyir nges don 'dir bcangs na// dus 'dir chos nyid bden pa mthong// thun mongs dngos grub ci bsams grub// rjes dran yon tan bar dor 'ong// dus 'dir sangs rgyas smos ci dgos// rdzogs pa chen po ye shes 'khor lo gsang ba thugs kyi rgyud las/'bras bu mngon du 'byung bar bstan pa'i le'u ste bco brgyad pa'o//// de nas kun rig chos rje yis// 'dus pa'i 'khor ni dad ldan la// nges don gsang ba'i rgyud gtad pa// rgyud 'di thos pa'i phan yon ni// don mthong sangs rgyas lag tu thob// chos sku'i ye shes dus 'dir rtogs// chos rnams rtsa ba dus gcig shes// rgyud 'di 'dzin pas dngos grub thob// kun tu bzang po da lta yin// gang zhig sangs rgyas dngos 'dod pa// rgyud chen 'di la blta bar gyis// sangs rgyas bstan pa nub ka ru// nga yi chos 'di dus de ru// man ngag snying po 'byung nges kyi// phyi rabs rnal 'byor sems la chongs// de yang rdo rje sems dpa' nyon// lan gcig dus kyi deng sang na// 'dra min bslu chos dar ba'i tshe// 'phyar 'jig tshod la 'di bstan na// 'dir sdug phyi mar dmyal bar ltung// 'dus pa'i 'khor rnams yang nyon cig/rang byung chos sku nyag gcig gi// man ngag 'di med lha mi kun// phyi nang snod bcud bka' rgyud chos// mkhas kyang rmongs pa'i nga rgyal gyis// nges don rgyud chen don 'di la// sgro skur 'debs shing 'ching bar 'gyur// de tshe dus kyi deng sang na// 'dra min bslu chos dar ba'i tshe// kha bsags can gyis kun bslus te// man ngag gsang bshad yod zer nas// gzhi 'bol chags chung tshul 'chos te// snod dang ldan la bstan zer nas// rang la nges lung ldan pa'i blo med par// gzhan gyis mkhas btsun dag la khungs phyung ste// rin chen gser ni dpag med ngas phul zhes// rdzun gyi dpe chung ra ri mdun bkram nas// khyod kyis 'byor tshad phul ni zer nas slar// mkhas pa shes rab can ni bslur mi tshugs// dad ldan blun po kun ni rab bslus te// kha tshab rdzun tshig chen po smras nas kyang// bstan rgyu med par phyi nas bstan zer nas// rang la gdam ngag med par gzhan la 'tshol du 'gro// gzhan nas ma rnyed phyir mi 'ong zhing 'phyar ka 'ong// brgya la rnyed na gtan gyi nor phul zer// dad ldan kun bslus sus bstan chos dang bral// dad ldan gcig bslus sems can brgya bsad pas// sdig pa shin tu che bar rgyal bas gsungs// de phyir rang 'dod bslu ba'i chos mi bshad// rdzogs pa chen po ye shes 'khor lo gsang ba thugs kyi rgyu las/rgyud gtad cing gzung ba'i le'u ste bcu dgu pa'o//// rdzogs pa chen po ye shes 'khor lo gsang ba thugs kyi rgyud ces bya ba rdzogs so////

CLOSE WINDOW