CLOSE WINDOW

Gpb002.001
བོད་ཡིག

rdzogs pa chen po lta ba'i yang snying sangs rgyas thams cad kyi dgongs pa nam mkha' klong yangs kyi rgyud bzhugs so// rgya gar skad du/ mahA san+ti dr-iSh+tA tI gar+b+ha/ sarba bud+d+ha sha ya/ ga ga nor+m+mi bi pu la tan+t+ra nA ma/ bod skad du/ rdzogs pa chen po lta ba'i yang snying/ sangs rgyas thams cad kyi dgongs pa/nam mkha' klong yangs kyi rgyud ces bya ba/ bcom ldan 'das rang byung ngo bo nyid kyi sku/ dpal kun tu bzang po la phyag 'tshal lo// 'di skad gsungs pa'i dus gcig na// bcom ldan kun rig rgyal po de// 'og min chos dbyings pho brang du// snying po byang chub sku bzhugs pas// rigs lnga'i 'khor la thugs gzigs te// ye shes 'khor lo'i dgongs pa las// g.yos pa med par lhun gyis grub// de tshe 'dus pa rnam bzhi yang// rnam gzigs gtsug tor thams cad skyob// 'khor 'jig bsod skyabs rin chen mang// mar me log par dad sel dang// 'od srungs rin chen snying po dang// dbang po zhi dang pad+ma brtsegs// gser thub dang ni shAkya thub// mai tri+e mthu chen thob dang ni// spyan ras gzigs dang 'jam pa'i dpal// dri med phyag na dga' ba'i dbang// dus gsum sangs rgyas rnams kyang bzhugs// sems dpa' rdo rje snang ba dang// ye shes dpal dang yon tan snying// skyon med grags pa grub pa rtsal// ye shes spyan ma rdo rje dbyings// dpal 'bar ma dang dpal ldan bde// las kyi sems ma chen mo rnams// rang rang gtso la 'khyud nas 'khod// gzhan yang chos srung sprul pa'i tshogs// 'jig rten mkha' 'gro pho mo dang// dregs can dam btags zhal 'ches pa// rang dbang med par dad 'dus rnams// rang sems rtogs par 'dod pa'i phyir// lus ngag sems kyis zol med par// thabs cig rim par 'khod gyur te// de tshe rdo rje sems dpa' yis// dus gsum bde bar gshegs pa yi// thams cad sku gsung thugs dang ni// rdo rje las byung phun sum tshogs// kun rig rgyal po'i dgongs pa des// mngon par gzigs pa'i don go nas// rdo rje yid kyi don bskul ba// 'khor 'das ma rig rnal 'byor thugs// nam mkha' bzhin du ye gnas pas// ye shes rnam par grol ba'i thugs// ngo bo nyid kyi sku bskyod nas// thugs dam dbang gis bzhengs su gsol// de skad bskul ba mkhyen gyur nas// ngo bo nyid las gzugs skur bzhengs// gzugs sku rol pa'i mdzad spyod kyis// 'od zer spros pas nam mkha' khyab// thams cad kun tu snang mdzad pas// 'khor rnams ngo mtshar du gyur nas// rtse gcig lus ngag yid kyis kyang// rnal 'byor tshogs kyis phyag 'tshal nas// bden pa'i yid kyis yang bskul ba// 'khor 'das rtsa ba thugs kyi dbyings// shes rab chen por mnga' brnyes pas// sprul pa grangs med 'byung ba'i gnas// chos sku bde bas 'gro don gyis// de don bskul ba thugs chud nas// 'khor 'das ma reg don chen la// 'bral med dgongs par snyoms zhugs te// cang mi gsung bar lhun gyis bzhugs// de nas blo gros dam pa de// cang mi gsung bar ngo mtshar te// dpa' bo mgon por yang zhus pa// e ma nam mkha' lta bu yi// sku mchog khyab pa'i byin rlabs kyis// thogs med rol pa'i cho 'phrul gyis// bdud dpung gzi brjid zil gyis gnon// yid bzhin gsung mchog sgra snyan gyis// tshig gcig don go thams cad 'dus// gzung sla yan lag tshang ba'i gsung// seng ge'i sgra yis gsang sngags gsung// ye shes snying po rdo rje'i thugs// nyi zla lta bur rang gsal ba// 'khor 'das spros bral thig le'i thugs// ye shes rig par byin gyis brlabs// thugs rje kun gyi bdag po khyod// sangs rgyas rnams kyi yang mes po// rnal 'byor kun gyi dam pa'i lam// bdud rnams kun gyi bdud chen po// yon tan thams cad 'byung ba'i gnas// byang chub sems kyi mdzod chen po// ma rig mun pa bsal du gsol// de skad gsol ba'i don go nas// bcom ldan ngo bo nyid sku des// 'khor rnams la ni thugs gzigs nas// phyogs bcur zhal ni 'dzum mdzad de// dper na nyi ma'i snying po las// 'od zer kun tu bkye ba ltar// khyab par mdzad cing bka' stsal pa// 'khor 'das med pa'i gong rol du// nga rtogs kun tu bzang po byung// gzhan pa'i zhi gnas blos bsgoms pas// sangs rgyas nyid kyang gdeng med gol// phra mo'i rnal 'byor smos ci dgos// de skad bka' stsal gsungs ma thag/ 'khor rnams ma dga' yid 'drogs te// don la the tshom za gyur te// mya ngan yid kyis zin gyur nas// 'jig rten kun 'gul rab tu g.yos// lha mi mi ma yin la sogs// kun kyang skrag cing ya ngar gyur// de nas rdo rje sems dpa' yi// thugs kyis gzigs nas don rig pa// 'khor rnams zhi gnas bsam gtan la// zhen pa gsal bar yid gzigs nas// ting nge 'dzin gyis don gsol pa// 'jig rten mkhas pa rdzogs sangs rgyas// ye shes thugs rje chen po yis// chos nyid gnas lugs ji lta ba// ma nor ma bcos snying po'i thugs// 'khrul pa'i blo yis rtogs pa'i thabs// 'khor 'das ma rig lhag mthong don// dus 'dir bdag la bshad du gsol// rang byung ngo bo nyid sku des// don rig thugs kyis bka' stsal pa// sangs rgyas chos nyid ji lta ba// 'khor 'das ma rig snying po'i don// yang mes nga yis don bshad du// rdzogs chen skye med don zab kyang// ma rtogs pa la sdig mor che// nor bu rin chen rnyed dka' bzhin// phyi ma'i dus kyi mi ngan rnams// dar drag ngang thung tshor rkyen la// bka' yi don la yid mi ches// gzhung mang sgrin tshig rtog pa za// byang chub pas ni khe grags bsgrub// le lo che bas grub rtags rings// 'jug la brtson nas 'dor ba skyen// nges pa'i don la gal chen 'dzug/ bden pa'i tshig la sgro skur 'debs// tshig tu zhib la don tu rtsing// thos bsam pas ni ngom par rings// shes nas mi bsgrub yal bar 'dor// gong 'og gzhung ni bsres te bslad// bka' min mi chos don du byed// man ngag zab mo zong du 'tshong// tshig nyung zab mo gting phyin la// sha thang mi phyed spom zhes smra// gdams ngag blos chud mi gson par// don nyid rtogs par byed pa la// yid mi ches pa'i rigs pa 'dzug/ mang por bshad kyang don med la// mkhas pa yin zhes yon tan brjod// bla ma smod pa'i gang zag la// kho bden zer zhing rjes su 'jug/gsang ba'i man ngag ma go bar// slob bus ma byas slob dpon 'khangs// khungs nas brgyud pa'i man ngag la// ma nor yin par mi brtsi bar// rang bzo kha tshabs bsres pa la// yid ches byed cing dam par 'dzin// lta dman rnams kyi ngo srung byed// de lta bu yi dus byung tshe// don bstan skad cig de nyid la// rgyud lung sangs rgyas skrag cing dngangs// nyan thos mdo sde brgyal cing 'bog/ lha dang lha min srin po'i tshogs// sgro skur 'dogs pa'i gang zag rnams// gtan du dmyal ba chen por ltung// 'di la tshe yi bar chad dang// 'jigs pa sna tshogs de la 'ong// mgo lus tshal pa stong du 'gas// rig 'dzin rnam kyis spongs par 'gyur// de phyir shin tu gsang ba'i don// snod ldan slob bu mi rnyed dkon// de skad bka' stsal don go nas// 'khor rnams mgrin gcig thal sbyar nas// yid kyis gdung ba'i don gsol pa// 'khor ba'i g.yang sar ltung ba la// thugs rje chen pos mi 'dzin nam// ri dwags 'dzin pa'i rgyar chud na// rnam rtog dra ba mi gcod dam// sems can las la thugs tshad kyang// 'gro don snying rje mi mdzad dam// ma rig mun pa'i smag rum du// dmus long bzhin du rang sems 'thibs// ye shes nyi ma mi 'char ram// zhe sdang me chen 'bar ba ni// las kyi rlung dmar chen pos bus// chos nyid rlan kyis mi 'jil lam// 'dod chags chu ltar brub pa yis// bse rtsi bzhin du zhen pa la// ye shes me yis ming bsreg gam// don stor lus kyi nang du stor// lam stor bdag la sa mkhan mdzod// dus 'dir 'dus pa rnams kyis kyang// 'gal sems rdul tsam med par ni// dad pas byang chub don la mos// nges shing dad pas yid bsdus so// de nas ngo bo nyid sku des// ye shes 'khor lo'i dgongs pa las// thugs ni mngon par bzhengs nas kyang// kun bzang chos sku'i rtogs don de// 'dus pa'i 'khor lo bka' stsal pa// legs so dad ldan 'khor rnams nyon// lhag mthong gsal bar ngas bshad kyi// legs par nyon la yid kyis zung// gol sa chod pa'i lta ba yi// gdeng du go 'gyur rnal 'byor pas// ched du mi bsgom rang yin te// sangs rgyas bcom ldan 'das rnams kyis// dbang po rang yan btang las byung// ma bsgoms ye shes shugs la 'char// gol med ye shes chos nyid klong// thugs kyi 'od zer stong gi cha// phyogs bcu kun tu rab spros pas// 'khor rnams sems la don shar nas// zhi gnas la ni lhag mthong du// rdul tsam du yang ma bsgoms par// phra mo cha tsam rtogs gyur nas// dga' ba'i yid kyis don bstod pa// 'khor ba'i nad 'byin sman pa'i mchog/ rab med sgrol ba chos kyi gru// 'jigs sar rten pa'i ye shes mkhar// drin med byams pa'i pha dang ma// 'dren mdzad khyod la phyag 'tshal bstod// ded dpon kun bzang chos kyi sku// 'khor ba'i lam med lam ston pa// rang rig ye shes byang chub klong// ye shes sku la yid kyis bstod// nam mkha' lta bur dngas ba yi// khyab gsal rab brjid skur ston cing// mkhas la rgya che shin tu gsal// e ma sangs rgyas bcom ldan gsung// shes rab gting phyin g.yos pa med// rgyun mi gcad la phyag 'tshal lo// ma rtsol bdud rnams 'dul mdzad pa// stobs ldan dpa' bo chen po ste// yon tan phrin las rdzogs mdzad pa// ci bsam 'grub la phyag 'tshal bstod// da ni khyod kyi 'bangs su mchi// dpa' bo chen po bdag la dgongs// bka' las mi 'das yid kyis bzung// lta ba'i yang snying bshad du gsol// de skad gsol ba'i don gsan nas// bcom ldan ngo bo nyid chen des// gdod nas 'bral med ting 'dzin la// bde bar zhugs nas bka' stsal pa// yang snying lta ba'i rgyud chen 'di// yid kyis bshad pas rtogs pa'i don// ngas shes ye shes dam par gyis// bdud dang bar gcod thams cad kyang// nga nyid rol pa las gzhan med// nga ma shes par ci spyad kyang// 'bras bu brlag cing 'tshig par 'gyur// de skad gsungs nas sku gsung thugs// skye 'gag med pa'i ye shes kyis// rgyun mi chad kyi dgongs pa la// thugs ni shin tu thim gyur to// de nas rdo rje sems dpa' yis// 'dus pa'i tshogs la phan btags phyir// yid kyis nges don 'di skad gsol// dad pas bsgom dang rtogs pa yis// snod ldan snod ngan bye brag gi/ 'bras bu bstan pa bshad du gsol// kun rig rgyal pos bka' stsal pa// khyod kyi zhus pa ngas bshad nyon// nga yi ye shes lhun grub la// re zhig mos pa drang ba'i phyir// spyi yi mtshan nyid rtogs pa'i thabs// brda' tsam mtshon nas zhen grol ba'i// rang don sems kyi mos pa yis// theg pa kun la thos bsam gnas// dben pa'i dgon par gang bsgom pa// rang sems dmu rgod stong khams yin// mngal gyi sgrib g.yogs khang stong bsrung// bcos ma'i spyod pa sus bsgom pa// 'bras bu sangs rgyas thob 'dod pa// zhe 'dod yod phyir 'khor ba'i rgyu// snang ba sems su byas pa'i phyir// 'bras bu ye shes 'byung mi+e srid// da yang 'dus pa'i snying po nyon// 'khor 'das tshig tu brjod dka' ba// chos sku nam mkha' lta bu de// kun la gnas kyang rtogs par dka'// u dum wa ra'i me tog bzhin// brgya lam na yang re 'ga' zhig/ 'byung srid kun gyi thun mong min// don 'di kun la bshad kyis nyon// bla ma rdo rje slob dpon las// nyan bshad sgrub pa'i dbang mnos nas// mched la sring ltar gdung byed cing// thos bsam bsgom par 'dod pa'i phyir// byang chub srog dang bsdo ba yi// snod ldan ma nor phrad gyur na// 'tsho ba rang gi sbyar la yang// lta ba'i dgongs don 'di bstan te// ma mtshon go dang ma dpyad rtogs// don ldan man ngag rig pa'i blos// ma bsgoms rtogs pas nges par chog/ de yi 'bras bu da lta nyid// sangs rgyas rgyal po ye shes sku// thams cad mkhyen pa'i ye shes te// 'bras bu kun gyi mchog tu bshad// rdo rje sems dpa' da yang nyon// ngo bo nyid kyi chos sku la// 'das dang ma 'das mi mnga' yang// nga nyid dngos su mi bzhugs tshe// 'dzam gling dbus kyi shar phyogs su// skal ldan rigs kyi sprul pa gcig/ pha med bram ze'i rigs skyes nas// nga yi nges don lta ba 'di// gdams ngag mi 'chad ston pa 'byung// phyis kyi rnal 'byor 'jug 'dod pas// nga yi rgyud 'di rtogs par gyis// 'di shes bla ma dam par bzung// de bzung yon tan brjod mi langs// nges don 'di la gang mos rnams// bka' dang mthun par don go nas// rdul tsam du yang ma bsgoms kyang// sangs rgyas sa la smos ci dgos// de tshe dad ldan 'di la 'jug/ 'khor 'das ma rig chos sku'i don// las can kun gyi rtogs don chos// man ngag rdzogs chen bstan pa 'byung// de tshe nga yi 'khor rnams kyis// nges don lta ba 'chad pa la// lta dman tshul 'chos sde pa ni// sngags par khas 'che'i mu stegs dang// drang don theg pa la zhen rnams// zhe sdang byed pa'i dus byung tshe// kha zer 'phyar kha gtong ba dang// dug dang rdo dang mtshon sogs kyis// de la gsod par sems 'gyur zhing// sa phyogs mnga' ris 'gegs pa'i tshe// kun bzang lta ba nges don 'di// ngo bsrung tshul 'chos ma yin par// zhum med dam chos 'di 'chad pa// tsham tshom med pa dpa' bo'i mchog/ 'jigs med ma nor ston pa'i lam// bde gshegs rnams kyi byin gyis rlobs// mkha' 'gro chos skyong smos ci dgos// gnod pas mi tshugs bsod nams 'phel// de tshe mu stegs nyan thos sogs// rang rang brkam chags rtsod 'gyur nas// g.yul 'gyed byed cing ru tra 'dra// rims nad sna tshogs bkra mi shis// yon bdag rnams ni dad pa ldog/'og ma'i bstan pa 'jig pa'i rtags// phyi ma ngan song smos ci dgos// de yang 'dus pa'i snying po nyon// de lta bu yi dus byung tshe// gal te tshogs la chos 'chad na// nyams dang lkugs pa zhe 'khon rnams// yod med gsher la bshags su bzhugs// de mi nus par chos mi 'chad// dper na ldum rar dug skyes na// bdag pos dug tu shes ma thag/ rtsad nas phyung ste med par byed// de bzhin dam nyams mi mthong na// gang yin tshogs las bkar la btang// lta bshags ched du yid la bya// de ltar ma yin phyal bzhag na// rten med ma thug srog gcod bzhin// nyams grib skyon gyis na tsha 'byung// mkha' 'gros chad pa rims gyis gcod// de yang 'dus pa'i snying po nyon// gal te dad pas gdung sems kyis// dam tshig nyams pa'i skyon 'gyod nas// bskang bshags g.yo sgyu mi byed pa// gser dngul chag bcos phyir legs bzhin// don la brtson 'grus shin tu che// de ni snod kyi dam pa'i mchog/ man ngag yang snying rdzogs par bstan// de don shin tu btsal dka'i phyir// snod la brtag pa shin tu gces// bka' dang mthun pa'i don 'grub phyir// ma brtags rang 'dod chos mi 'chad// rdzogs pa chen po lta ba thams cad kyi yang snying/ sangs rgyas thams cad kyi dgongs pa/ nam mkha' klong yangs kyi rgyud las/ bstan pa 'byung ba'i rgyu gleng gzhi bstan pa'i le'u ste dang po'o//// de nas 'dus pa'i 'khor rnams la// zhal gyis bzhes te bka' stsal pa// rgyud lung man ngag yul la blta// de phyir ma nor chos sku min// sems yin zer zhing snang bar 'chel// sems dang 'brel med brjod byas kyang// glang po phag dang 'dra ba bzhin// 'brel med don ni rtogs bya'i phyir// de phyir yul 'di sems 'dra yang// snang ba chos skur 'brel med pas// gzhi nyid rang sems rtogs par bya// da yang rdo rje sems dpa' nyon// yul gyi snang ba 'di nyid la// mtha' yas ming du btags pa yin// yod mthong snang grags chos rnams kun// bla dgas tsam du btags par zad// de la dngos gzhi ga la yod// med pa nyid na yod rtog pa// 'khrul pa rnams kyi shes pa la// sangs rgyas rnams kyis mi mkhyen phyir// phyi rol yul la don mi bzhag/ de phyir 'khor 'das 'byung ba kun// glo bur yin phyir gnas lugs min// de phyir 'dus pa'i snying po nyon// nga yi gsung gi 'od zer gyis// ma rig sems kyi mun khung du// sgron ma'i snang ba nyi bzhin 'char// yul dang ma 'brel chos kyi sku// rang la rang chas ye gnas pas// lung ldan rkyen gyis rtogs pa byung// rgyu 'bras rkyen rnams ngas bshad nyon// ngo bo gnas lugs chos sku dang// de las 'khrul pas 'khor bar 'khyams// ldog thabs snod bcud ldan pa yis// nges pa'i don mthun gdams ngag gis// the tshom gegs chen bsal ba dang// 'bras bu lhun rdzogs gdul bya 'byung// de skad gsungs pa'i don thos te// 'khor rnams dga' zhing yi rangs te// gus pa'i sems kyi chos nyan to// rdzogs pa chen po lta ba'i yang snying// nam mkha' klong yangs kyi rgyud las/ gsung bar zhal gyis bzhes pa'i le'u ste gnyis pa'o// // de nas kun rig rgyal po yis// dad ldan 'dus pa'i 'khor rnams la// sems kyi rtog pa bsal ba'i phyir// ched du brjod pa'i don gsungs pa// 'khor 'das gnyis kyi gzhir gyur pa// ngo bo nyid kyi sku mchog ni// rang byung yin phyir thog mtha' med// 'dus ma byas kyi nam mkha' 'dra// de yang 'dus pa'i snying po nyon// ma mtshon go dang ma dpyad par// de nyid rtogs pa'i kun bzang la// mya ngan thog mtha' dus gcig gcod// ri bo ta la'i nyi shar 'dra// lung ldan rkyen gyi gdams ngag gis// thog ma'i gzhi shes rnal 'byor pas// 'khor ba'i mtha' ma shugs la chod// mun pa nam langs nyi shar 'dra// sems can rang sems 'khrul pa'i phyir// mtshon dpyad rtog pa 'khor ba'i chos// 'khrul pa yod phyir thog mtha' yod// phyi nang 'byung ba chags 'jig 'dra// da yang rdo rje sems dpa' nyon// 'khor ba'i gzhi ni zhen rtog yin// gzung 'dzin zhen pas 'khor bar snang// ras dkar la ni snum zhen 'dra// bag chags brtas phyir kun gzhi yin// da yang 'dus pa'i snying po nyon// ye shes mya ngan 'das pa'i rgyu// shes rab lhag mthong las byung ba// lung ldan rkyen gyis rtogs pa de// thig le chos sku de la bya// gnyis ka'i rgyu yi rgyu ru ni// rang byung ngo bo nyid kyi sku// chos rnams kun gyi gzhi yin phyir// ye shes rgyu zhes de la bya// rtogs ma rtogs la tha dad kyang// lung ldan rkyen gyi ye shes de// thams cad mkhyen pa'i rgyu yin phyir// rgyu yi ye shes de la bya// bya byed lam gyi 'bad rtsol gyis// rang byung byang chub gegs yin pas// shes pa rtsol med ye shes 'di// lam gyi ye shes dam par gsungs// rtogs pa'i ngang las ma g.yos par// theg brgyad lam gyi spong len dang// pha rol mdzad spyod 'di yis 'grub// yon tan stobs rnams ma lus 'byung// ye shes 'bras bu 'di shes pas// dbul po rin chen rnyed pa bzhin// phyi ma ma yin dus 'di rang// rtsol med rig pa mngon sangs rgyas// da yang 'dus pa'i snying po nyon// mi gnas chos sku'i don rtogs pa// 'ching grol dge sdig gnyis kyi chos// gzhi la gnyis ka gdod nas med// de phyir thig le nyag gcig go// de yang 'dus pa'i snying po nyon// nyi ma'i dkyil na mun med ltar// de bzhin don rtogs ma bsgoms kyang// skye med byang chub chos sku'i klong// gol sgrib dag la ya mi nga// dper na seng ge'i sgra grags pas// ri dwags phra mo 'byer ba bzhin// don 'di rnal 'byor gang yod la// lta dman sgro skur zil gyis gnon// dper na pad+ma 'dam gnas kyang// dri mas mi gos shin tu gsal// de bzhin rnal 'byor lus yod kyang// sgrib pas mi gos ye shes gsal// dper na 'khor los sgyur rgyal nyid// gling bzhi gling phran dbang du bsdus// de bzhin don 'di rtogs pa yis// pha rol phyin bcu'i dbang rnams kyang// rang bzhin ma btsal lhun grub rdzogs// rnal 'byor gdengs su de 'chang na// de la bsgrub pa ma byas kyang// gcig shes pas ni kun shes pas// 'bras bu sangs rgyas smos ci dgos// de las gzhan pa'i don med phyir// lhun gyis rdzogs pa'i chos sku la// skye shi'i sdug bsngal mi 'byung bas// gzhi las mi 'gyur gser bzhin no// de skad gsungs pa'i don go nas// rang sems rtogs par bya ba'i phyir/ rtse gcig dad pas gus gyur nas// la bzla ba la don gyis mos// rdzogs pa chen po lta ba'i yang snying// nam mkha' klong yangs kyi rgyud las// ched du brjod pas go bar bstan pa'i le'u ste gsum pa'o//// de nas kun rig rgyal po la// 'dus pa'i 'khor gyis don zhus pa// chos nyid rang byung gnas lugs kyi// dpe don khyad par gang gis dbye// yid ches pa yi gtan tshigs gang// kun bzang thugs ni ji ltar rtogs// zhus pa'i don gsan bka' stsal pa// dpe don khyad par ngas bshad kyis// nam mkhas gar khyab sems can gyis// nam mkha' dag la rig pa med// sems nyid ma bsgribs rig par gsal// de phyir nam mkha' byang chub dpe// 'degs byed rlung gi 'byung ba la// ye shes rlung gis byang chub khyab// dran rig dngos med byang chub dpe// chos nyid klong du mngon sangs rgyas// sdud pa'i chu la sems kyis khyab// chu nyid byang chub dngos ma yin// de bas rig pa sems kyi chu// byang chub skur ni mngon sangs rgyas// sra byed 'degs pa'i sa nyid la// rang sems snying po dngos med kyang// thams cad bskyed phyir byang chub dpe// 'gyur med sra phyir mngon sangs rgyas// drod snyoms tsha ba me 'di la// rang sems me yi gzhi med kyang// nyon mongs sreg byed dpe bstan pa// byang chub mer ni mngon sangs rgyas// 'byung ba lnga po 'di nyid kyang// don gyi sangs rgyas ma yin kyang// btags pa'i sangs rgyas yin pa'i phyir// 'di la dgag sgrub ci yang med// da yang 'dus pa'i snying po nyon// ma dros mtsho dkyil me 'bar ba// mthong nas gsal ba chu yis ni// bskal par de la gnod mi nus// de bzhin ma rig ye shes kyis// thog mtha' rtsa ba ma chod na// myang 'das yon tan mi 'byung phyir// 'khor ba zil gyis ci la non// bya khyung rgyal po rlabs chen gyis// rin chen nam mkhar thon pa'i tshe// rgya mtsho nyid kyang bdud rtsir 'gyur// de bzhin bla ma'i gdams ngag gis/ rang byung snying po rtogs tsam gyis// sdug bsngal nyid kyang bde chen 'char// tshig dang yi ges mtshon pa rnams// ming du btags pa'i chos kun nor// 'khrul rkyen dpe yis bstan pa'i phyir// dpe don dbye ba shin tu gces// rdzogs pa chen po lta ba'i yang snying/ nam mkha' klong yangs kyi rgyud las/ mtshon pa'i dpe don ma yin par bstan pa'i le'u ste bzhi pa'o//// de nas 'dus pa'i tshogs rnams la// kun rig sems kyi rgyal po yis// don gyi dbye ba bka' stsal pa// sangs rgyas pas kyang sems can gnyan// sems can dus nas ma rtogs na// dug lnga rang grol ci la 'ong// mnyam bzhag pas kyang rjes thob gces// rjes thob lta bar ma shes na// thun mtshams bsgom pas sangs mi rgya// lus la brten nas rtogs pa yi// dus bzhi'i gdams ngag ma shes na// ye shes 'bral med ci la 'char// da yang sems dpa' chen po nyon// skye shi gnyis kyi bar dor ni// lung bstan rkyen gyi gdams ngag zhu// 'khor 'das gnyis kyi bar dor ni// chos nyid gnas lugs rtogs par bya// yul sems gnyis kyi bar dor ni// phyi yi gol sgrib bcad par bya// mnyam bzhag rjes thob bar 'dor ni// rnam rtog ye shes blang bar bya// srid pa dag gi bar dor ni// sangs rgyas rgyal po ye shes sku// byang chub sems dpa' thams cad la// nges don 'di rtogs khyad par 'phags// da yang 'dus pa'i snying po nyon// don rtogs pas ni 'dzin rtog nub// nyi ma shar nas mun pa med// lung 'di rtogs pas rtog pa bros// 'khor 'das 'byung ba rnam rtog bcom// spong sdud gnyis po 'chor med bzung// rtag chad gnyis po rdul du brlag/ zhen len gnyis po phyer mar btag/ bzang ngan 'dzin pa sprin ltar dengs// sangs rgyas sems can gcig tu byas// mtho ris ngan song rdzun du song// 'khor ba chos nyid ngang du brlag/ chags sdang skyes shing ting 'dzin gsal// g.yeng ba che na bde chen rgyas// skye shi med pa'i g.yul ngo rgyal// rig 'dzin rnams kyi thugs ngan sangs// rdzogs pa chen po blta ba'i yang snying/ nam mkha' klong yangs kyi rgyud las/ don gyi dbye ba bstan pa'i le'u ste lnga pa'o//// de nas kun rig rgyal po yis// 'dus pa'i 'khor la bka' stsal pa// 'gro drug sems can thams cad la// rang sems snying po ye shes ni// rtogs dang ma rtogs med par gnas// de yi chos nyid mtshon pa'i dpe// bar snang rkyen gyis mi tshugs ltar// rang sems stong pa'i ye shes ni// snga phyi med pa'i chos sku la// 'khor ba'i rnam rtog gzung 'dzin med// khyung phrug sgo ngar gshog rgyas ltar// rnal 'byor rang sems rtogs pa'i mi// mngal gyi sgrib g.yogs ma bral kyang// rang byung ye shes thugs la gnas// khu byug bya bran zil gnon ltar// chos sku sems la ngos zin pas// theg brgyad gol sgrib zil gyis gnon// de phyir 'khor ba ming yang med// seng phrug mngal du rtsal rdzogs ltar// lung ldan gdams ngag bstan ma thag/ sgrib gnyis ma spangs shugs la dag/ rtog pa mngon gyur sangs rgyas yin// pad+ma 'dam gyis ma gos ltar// dug lnga'i nang nas rang byung gsal// nyon mongs nyid kyang rang sar grol// ye shes don la 'du 'bral med// dngul rdos rang chos mi 'gyur ltar// dang po shes bzhin lung ma bstan// bar du nges pa'i don rtogs pas// da lta'i shes pa 'di nyid la// nges don chos skur rang gsal nyid// dus gsum mi 'gyur ye nas gsal// da yang 'dus pa'i snying po nyon// rang bzhin gzhi nyid spros bral bas// brjod du med par yid ches pas// yul la mi ltos don go'i phyir// dgos don gzhi nyid ye nas bden// ngo bo nyid kyi lta ba de// rtogs ma rtogs kyi khyad par las// 'khor 'das gnyis su shar ba yi// gang yang gnyis med yid ches pas// rig pa lta bar bzhag pa yin// chos nyid rang gi mtshan nyid ni// mi g.yo gsal ba'i ting 'dzin gyi// 'khor 'das gnyis la rtsa ba gcig/ de phyir ma yengs bsgom pa'i mchog/ye nas rang sems 'gyur med pas// de dang mthun par rtogs pa yis// 'khor 'das ma rig 'bras bu la// re dogs med par lhun gyis grub// de yang 'khor gyi snying po nyon// chu nyid rkyen gyis 'chang 'gyur ltar// bla ma'i man ngag don stobs kyis// ci spyod rang byung shar ba las// thog ma ma yin tha ma min// da lta'i shes pa 'di nyid las// bzang por song ba gang yang med// rdzogs pa chen po lta ba'i yang snying/nam mkha' klong yangs kyi rgyud las/ yid ches pa'i gtan tshigs kyi le'u ste drug pa'o//// de nas 'dus pa'i tshogs rnams la/ kun rig sems kyi rgyal po yis// don gyi gnas lugs bka' stsal pa// chos sku gzhan dang ma 'brel phyir// phyi nang snod bcud kun gyi gong// sangs rgyas sems can gnyis pas snga// bltar med ngo bo kun gyi gzhi// rang byung snying po chos sku dang// sangs rgyas rnams kyis nga ma mdzad// sems can rnams kyis nga ma bcos// 'byung ba lnga la rag ma lus// da yang 'dus pa'i snying po nyon// thig le chos sku'i gzhi nyid nas// rgyu rkyen gnyis las 'das pa dang// gnyen po cis kyang mi tshugs shing// dus gsum mi 'gyur yang dag yod// da yang 'dus pa'i snying po nyon// nam mkha' mtha' dbus med pa ltar// rang sems phyogs bcur dmigs dang bral// dmigs med chos skur shes shing rig/ de tsam nyid nas zhen med bde// nyi ma ma bsgribs gsal ba ltar// sgo lnga gsal la rtog pa med// rtog med snying po ye shes thugs// 'khor ba'i 'dzin pa kun dang bral// rin chen yon tan 'byung ba bzhin// don rtogs 'bras bu chos sku la// sangs rgyas che ba'i yon tan kun// ma btsal lhun gyis rdzogs pa 'byung// sa gzhi spyad pa'i gzhi yin ltar// rang byung ngo bo nyid kyi sku// 'khor 'das kun gyi gzhir gyur pa// rig dang ma rig khyad par las// rgyu 'bras rnams ni de las byung// rgya mtsho g.yo ba med pa ltar// snying po rtogs pa'i ye shes kyi// ting nge 'dzin la g.yo ba med// de nyid ye shes chos nyid sku// ri bo 'gyur ba med pa ltar// yul med rig pa nges pa'i gzhi// rkyen gyis mi 'gyur byang chub sems// ma bsams 'du 'bral med par gnas// da yang 'dus pa'i snying po nyon// dus gsum sangs rgyas kun gyi ni// rtog pa nga dang 'bral ba med// ma bral chos skur rtogs pa la// 'khor med yon tan bsam mi khyab// rnal 'byor dam pa las can gyis// yid kyi don rtogs ngo shes pas// kun bzang chos sku da lta nga// dman pa'i lus la sangs rgyas yin// rdzogs pa chen po lta ba'i yang snying/ nam mkha' klong yangs kyi rgyud las/ kun tu bzang po'i thugs brtol ba'i le'u ste bdun pa'o//// de nas rdo rje sems dpa' yis// ngo bo nyid kyi kun bzang la// bden pa'i tshig gis 'di skad gsol// chos nyid ngo bo gnas lugs dang// thog mar 'khor ba gang nas byung// tshogs brgyad chos sku ji ltar min// theg brgyad 'khrul gzhi ci las byung// ma rtogs bsgoms na ji ltar gol// lta spyod nyams pa'i nyes pa gang// rnam smin lus kyis ji ltar bsgribs// 'khor ba'i bag chags gang na gnas/kun rig rgyal pos bshad du gsol// de skad gsol ba'i don gsan nas// sems can 'khrul tshul thugs rje yis// 'dus pa'i 'khor la bka' stsal pa// gzhi la 'khrul pa byung ba ni// thog ma'i dus kyi mtha' drug ni/kun gzhi rnam shes tshogs brgyad kyang// rang sems yin te chos sku min// yar ldan mar 'khrul 'khor 'das byung// da yang 'dus pa'i snying po nyon// nyi ma 'char ka'i mdangs bzhin du// dang po shes bzhin lung ma bstan// chos nyid dag pa'i rtsal yin kyang// lung ma bstan pas rkyen dbang gyur// ma rig rgyu la log rtog rkyen// rkyen bzhi dag gis bskyed gyur pas// ma rig rnam pa gnyis su tshang// zung du 'dzom nas kun gzhir grub// da yang 'dus pa'i snying po nyon// yod med la sogs ma rig pas// thog ma med nas bden 'dzin pas// 'khor ba lugs 'jug phyir 'byung rtags// thag sbrul tho yor mi bzhin du// dbang po yul la rtag tu yengs// thar lam mi thob skye zhing 'chi// 'khor ba'i rgyu ni rtog pa ste// lta bas ma bsgyur yul la zhen// chos brgyad gzung 'dzin dam par blta// skye shi sdug bsngal mi 'jig phyir// bag chags mtshan mas rkyen byas nas// khams gsum 'khor ba'i 'khor lor 'khyams// thar med 'khor bar kun gzhis byas// de phyir 'khor ba 'ba' zhig yin// rdzogs pa chen po lta ba'i yang snying/ nam mkha' klong yangs kyi rgyud las/ 'khor ba dang po gang nas byung bar bstan pa'i le'u ste brgyad pa'o//// de nas 'dus pa'i 'khor rnams la// kun rig rgyal pos bka' stsal pa// 'khor ba rnams kyi rtsa ba ni// yul dang sems ni gnyis su 'dus// yul kyang rang sems 'khrul pa ste// sems ni rnam shes tshogs brgyad la// sems las 'byung ba lnga bcu gcig/rtsa ba kun gzhi nyid du 'dus// sems can kun la gnas lugs ni// phyi blta ba dang nang blta ba// gnyis kar bltas pa'i shes pa dang// bcos dgos pa dang mi dgos su// rtag chad bral don ngo bor gnas// yang dag yod dang byin rlabs su// lan du phye nas bstan pa'i don// tshogs brgyad sems su bstan pa yang// 'khor ba'i bag chags brtas pa'i phyir// nges don snying po ma yin no// de yang sems dpa'i snying po nyon// sgo lnga'i rnam shes ngo bo ni// yul snang tsam nas shes pa skye// yul mi snang tsam shes pa 'gag/ yid kyi rnam shes ngo bo ni// yul la sna tshogs sems pa'i phyir// chags sdang log rtog dag tu 'dzin// rnam rtogs sna tshogs ngo bor gnas// nyon mongs yid kyi ngo bo ni// nang du zhen pa dam par ni// rtag tu 'dun pa ngar 'dzin pa'o/ kun gzhi'i rnam shes ngo bo ni// ma rtogs tha mal dus tsam na// rtog pa rgyas shing rig pa bsgrib// rtogs pa mngon du gyur tsa na// ma rig bsgribs shing ye shes rgyas// gzhan du de dang mtshungs par ni// tshogs bdun skyes nas 'phel bar snang// tshogs bdun 'gags na bsgrib par snang// des na shes pa'i tshogs brgyad kyang// yang dag ma yin 'khor ba'i chos// de yang 'khor gyi sems dpa' nyon// sems can mos pa tha dad pas// gang zag blo yi rim pa la// gnas 'gyur chos su bstan pa yang// bkri drang ldem dgongs tsam du bstan// de yi skyon yon khyad par ni// 'byung ba me chu'i dpe bzhin du// ye shes log rtog khyad par gyis// shes pa kun gzhi'i mtshan nyid ni// rgyu rkyen gnyen pos 'jig pa dang// dus gsum mi rtag 'gyur ba dang// bag chags mtshan ma'i rten byas pas// yang dag ma yin 'khor ba'i gzhi// rdzogs pa chen po lta ba'i yang snying/ nam mkha' klong yangs kyi rgyud las/tshogs brgyad chos sku min par bstan pa'i le'u ste dgu pa'o//// de nas kun rig rgyal pos yang gsungs pa// log lta mu stegs rnam gnyis dang// phyi rol yang dag gsang sngags dang// gsang chen 'khrul tshul ngas bshad nyon// ngo bo chos sku gnyis med des// gzhi byas pha rol rgyu 'bras med// 'byung ba lnga byung rang zhi ste// chad par 'dod pa 'khrul pa yin// dngos med ngo bo mi 'gyur des// gzhi byas rang sems dngos po dag/ kha dog dbyibs su grub pa la// rtag pa ther zug 'dod pa 'khrul// da yang 'dus pa'i snying po nyon// snang ba chos kyi dbyings nyid kyis// gzhi byas sems la tha dad pas// phra rags 'dod yon rnam lnga'i yul// don dam bdag med 'dod pa 'khrul// drang don sgor zhugs skye bo dang// tshig la khyad yod don la med// de phyir nyan thos theg pa bas// rang sems ma rtogs shin tu gol// de yang 'dus pa'i snying po nyon// ngo bo dngos med rig pa des// gzhi byas snang ba rang sems su// blos byas rig pa skad cig de// gong 'og mtha' bral shes dag 'khrul// rang sems rgyun gyi rtag par 'dod// bdag tu khas len mu stegs dang// tshig la khyad yod don la med// snang ba sems su 'dod pa'i phyir// sgro 'dogs sems tsam don la gol// da yang 'dus pa'i snying po nyon// rig pa ngo bo gnyis med des// gzhi byas yul sems chos gzhig nas// skad cig ma de ma grub 'dod// stong par btags de don la 'khrul// mu stegs chad par lta ba dang// tshig la khyad yod don la med// yul sems gnyis la skur btab phyir// dbu mar 'dzin pa don las gol// de yang sems dpa' chen po nyon// 'gro drug sems can thams cad dang// nyan thos rang rgyal mdo sde bcas// nga nyid 'grogs pas ngo ma shes// de phyir blun po'i sbyor yul min// rdzogs pa chen po lta ba'i yang snying/ nam mkha' klong yangs kyi rgyud las/ rgyu mtshan nyid kyi 'khrul tshul bstan pa'i le'u ste bcu pa'o//// de nas 'dus pa'i tshogs rnams la// kun rig sems kyi rgyal po yis// gsang sngags 'khrul tshul bka' stsal pa// dag dang ma dag gzhi gcig pa// yul med rang sems dag par 'dod// chos nyid ngang las bzang ngan 'byung// dngos grub gzhan la re phyir 'khrul// de yang 'khor gyi snying po nyon// rje 'bangs tshul du spyod pa'i phyir// gtsang sbra spyod pa'i bram ze dang// tshig la khyad yod don la med// de phyir dag byed kri ya gol// gzhi la gnyis med ngo bo la// lta spyod gong 'og gnyis 'dod pas// lta spyod ya cha bdud kyi las// lta bas khyad par 'phags 'dod 'khrul// de yang rdo rje sems dpa' nyon// yul dang ma 'brel ngo bo las// dbyer med chos dbyings 'dod pa de// spun grogs tshul du mnyam zer nas// ting 'dzin gtsor byed tha dad 'khrul// de yang 'dus pa'i snying po nyon/ kun rdzob yig 'bru lhar bskyed 'dod// don dam ma grub zer ba de// kri yog rnam gsum lta ba ste// mtshan nyid lta ba rnam pa gnyis// tshig la khyad yod don la med// de phyir kri yog don la gol// yo ga man chad nga yi gtam// ji snyed brjod pas nga mi rnyed// snang ba lha ru 'dod pa'i phyir// mtshan ma rags phyir nga mi rtogs// rdzogs pa chen po lta ba'i yang snying/ nam mkha' klongs yangs kyi rgyud las/ phyi rgyud rnam gsum gyi 'khrul tshul bstan pa'i le'u ste bcu gcig pa'o//// de nas 'dus pa'i 'khor rnams la// kun rig rgyal pos bka' stsal pa// 'khor 'das ma rig chos sku la// yul sems snang stong dbyer med 'dod// rtog tshogs bzang ngan lhar gyur bsgom// bzang ngan 'byung phyir ma hA 'khrul// de yang blo gros dam pas nyon// rang byung ngo bo nyid kyi sku// skye med mkha' klong stong pa las// snang ba kun bzang rol par 'dod// gnyis med bde chen sras su bsgom// rtsol bas bsgom phyir a nu 'khrul// don dam kun rdzob gnyis ka'i chos// mtha' dbus med pa'i dbu ma dang// khyad med rgyud lung don ma rig/ de phyir rgyud lung lta ba gol// de yang 'dus pa'i snying po nyon// rgyud lung rnal 'byor chen po las// nga tshol pas 'khor nga mi rnyed// nga ma rnyed pas snang ba 'chol// de phyir nga nyid rtogs mi 'gyur// rdzogs pa chen po lta ba'i yang snying/ nam mkha' klong yangs kyi rgyud las/bskyed rdzogs rnam gnyis kyi 'khrul tshul bstan pa'i le'u ste bcu gnyis pa'o//// de nas 'dus pa'i tshogs rnams la/ kun rig rgyal pos bka' stsal pa// don gyi gnas lugs ngo bo ni// 'khor 'das bar dor ma shes par// gang bsgoms ma rig rmongs pas gol// rang sems ma rtogs rtsol ba ste// yul gyi 'byung bar sems bsdus nas// gsal stong mnyam bzhag don tshol ba// dug lnga bsgoms pa'i gang zag de// bying rgod phrag dog bya ra mkhan// lta bar ma shes gti mug ste// gsal la mi rtogs 'dod chags bsgoms// de la zhen pa'i nga rgyal can// nyon mongs spong ba'i zhe sdang gis// rtsa dang thig le'i thabs sgo nas// yul la dmigs pa'i bsgom pa po// rtog pa bzang ngan sems su byas// bsgoms kyang yul la 'gyur med phyir// ji bzhin ma nor don dang bral// da yang rdo rje sems dpa' nyon// dpyid dus so nam ma byas par// ston dus rtsa ru 'gro ba bzhin// rang sems don nyid ma rtogs par// bsgom du 'gro ba snying re rje// rkyal ma sbyangs pa chur 'jug 'dra// de bzhin ma rtogs su bsgom pa// 'bras bu mi 'byung bdud kyi las// rgyu mthun bag chags blor brtas pas// ljon shing bzhin du sdug bsngal rgyas// rang sems snying po ma rtogs pas// bsgom chen yin zhes phug la 'dug/ma rtogs bsgom pa'i tshul ni ston// dmus long chung ma mdzes ma bzhin// ngo bo nyid ni ma rtogs par// 'khor 'das chos la ci bsam kyang// bsgom pas grol bar mi 'gyur ro// da yang rdo rje sems dpa' nyon// phra rab rdul ni gnyen pos spang// ris su 'dzin pa dbye ba spong// yod med 'chel bas rgyu 'bras spong// ched du spong pa'i rtog pa yis// blo yis gzhi nyid 'chos pa'i phyir// 'khor ba'i mtha' las thar pa med// rdzogs pa chen po blta ba'i yang snying/ nam mkha' klong yangs kyi rgyud las/ bsgoms pa gol bar bstan pa'i le'u ste bcu gsum pa'o//// de nas 'dus pa'i 'khor rnams la// lta ba'i dam tshig nyams pa'i skyon// kun rig rgyal pos bka' stsal pa// chos rnams kun gyi rtsa ba ni// bla ma dag la ma brten par// gsang sngags gsang ba'i sgor zhugs nas// rang dbang ma thob gzhan dbang bskur// mkhas la smod cing gzhan la 'gran// rang la don gyi gdeng med par// dregs shing nga rgyal mkhas 'dod nas// tshig tsam lung las khungs phyungs nas// rtsal bshad tho chos gzhung nyams byed// dmyal bar nges 'gro gtan du 'khyams// de yang rdo rje sems dpa' nyon// nong pos blon gral mi 'dzin bzhin// nyan pa'i dbang ni ma nos par// gsang sngags rgyud chen mnyan pa rnams// srog gi bar chad tshe thung 'gyur// sdar mas dpa' bo mi nus bzhin// 'chad pa'i dbang ni ma bskur par// rgyud dang sgrub thabs gang 'chad pa// lce la zhing rmod dmyal bar skye// gdol pas rgyal sa mi zin bzhin// bsgom bsgrub dag gi dbang med na// dam rdzas 'dre bkren nyod par 'gyur// rang nyid gling bar mun par skye// da yang 'dus pa'i snying po nyon// dper na rgyus med dug 'thung bzhin// sku yi dam tshig nyams pa ni// sum ldan rdo rje slob dpon la// brnyas shing ngan sems bskyed byas na// rdo rje dmyal ba chen por ltung// ngo ma shes nas gnyen gsod bzhin// gsung gi dam tshig nyams pa ni// snod med chos bshad lha mi dga'// 'bras bu mi thob smyo 'bog 'byung// don ma rig par mna' za zhing// thugs kyi dam tshig nyams gyur na// gsang mi thub cing 'dzag pa yis// lkugs pa'i dmyal ba chen por skye// da yang 'dus pa'i snying po nyon// nar ma phyin na shed mi rdzogs// gong 'og la shan ma phyed cing// lta ba'i snying po don med na// gol sa mi chod rgyud mi grol// dbang med gros thag mi chod bzhin// don gyi gdeng med rkyen mi thub// gdams ngag med pas sems mi rtogs// lus ngag chos spyod sangs mi rgya// gshog ma rgyas par 'phur mi nus// nyams su ma blangs kha tshig gis// chags sdang zil gyis mi non te// skye bo rang rgyud pa ru gol// da yang 'dus pa'i snying po nyon// dper na spun ngan rang sdug bzhin// gang yang goms par ma byas par// zhi gnas las su mi rung phyir// snang ba'i zhen pa ci la zlog/ mun sros lam ni stor ba bzhin// lhag mthong gsal bar ma rtogs par// gzugs sku rnam gnyis mi 'byung bas// sems can 'gro don byed mi nus// 'bras bu lo nyes lto bkres bzhin// lta bsgom gcig tu ma shes na// res 'jog thun mtshams bsgom pa de// 'bral med rgyun gyi rnal 'byor min// rdo rje sems dpa' da yang nyon// gos gon mi shes dral ba bzhin// lus kyi spyod pa ma bsrungs nas// tho cho spyod pa'i las byas na// 'bras bu sdug bsngal rgyu ru 'gyur// za mi shes pas brnangs pa bzhin// ngag gi spyod pa ma bsrung nas// gzhan gyi chos la skur pa 'debs// phyi ma tsha ba'i dmyal bar skye// 'thung ma shes nas 'bo ba bzhin// yid kyi spyod pa ma bsrung na// bdag du rtog pas gzung 'dzin skyes// phyi ma mun pa'i dmyal bar skye// da yang 'dus pa'i snying po nyon// rgyus med ngo mi shes pa bzhin// las kyi go rim ma shes na// gsang sngags mdzad spyod nyams pa yin// mthu dang byin rlabs med par 'gyur// mig med lam mi mthong ba bzhin// phyag rgya ye shes ma gsal na// ye shes lha yi don rtags med// mchog gi dngos grub thob mi 'gyur// gru med chu ni mi sgrol bzhin// bdag dang gzhan gyi don gyi phyir// ting 'dzin gsal bar ma gyur na// gnas ma 'byongs shing bgegs su skye// de yang 'dus pa'i snying po nyon// dbang dang dam tshig la sogs pa// nyams par byed pa'i gang zag de// skyes bu'i lag par brkyang bskum tsam// skad cig gcig la dmyal bar ltung// de yi sdug bsngal brjod mi langs// de las 'jigs shing thar 'dod kyang// rang sems snying po ma rtogs par// ma hA yo ga man chad kyis// bskang bshags gzhung du byas gyur kyang// lta ba nyams pa bskang ba med// rdzogs pa chen po lta ba'i yang snying/ nam mkha' klong yangs kyi rgyud las/lta spyod nyams pa'i skyon bstan pa'i le'u ste bcu bzhi pa'o//// de nas 'dus pa'i 'khor rnams la/ kun rig rgyal pos bka' stsal pa// rnam smin lus dang ma bral bar// sangs rgyas yon tan 'byung mi srid// mtshan dang dpe byad stobs dang ni// mi 'jigs chos ni bco brgyad kyang// da ltar mi 'byung lus kyis bsgribs// khyung chen sgo ngar shog rgyas kyang// ma bcag bar du 'phur mi shes// de bzhin sems rtogs rnal 'byor pas// lus 'dis che ba'i yon tan bsgribs// de yang 'dus pa'i snying po nyon// rgyud lung slob dpon spre'u 'dra bas// nga yi drang don rtsed mo la// tshe yi dngos grub thob 'dod pas// thun mong sman gyi sbyor ba yi// bcud len ri lu rgyun ldog dang// 'o mas lus gsos bkrag rgyas tshe// dug mtshon la sogs tshugs mi 'gyur// bya bzhin 'phur ba byung nas kyang// rmi lam mngon shes phra mo 'ong// lha dang bgegs la dam par 'dzin// rang sems ma rtogs 'khor ba'i phyir// lus 'di phyi rol yul yin pas// gnas skabs 'bral med yod mod kyang// thabs sbyor mi grol shin tu 'ching// de bas blo gros dam pa nyon// sems can lus dang ma bral bar// sangs rgyas yon tan ci la 'byung// lus bcas 'bras bu thob 'dod pa// shin tu gti mug smad pa'i gnas// de yang 'khor gyi snying po nyon// bcom ldan 'das kyang rtsa mchog tu// rang lus bor nas bar do la// 'og min gnas su mngon sangs rgyas// sems can kun la smos ci dgos// rdzogs pa chen po lta ba'i yang snying/ nam mkha' klong yangs kyi rgyud las/lus dang ma bral bar sangs mi rgya bar bstan pa'i le'u ste bco lnga pa'o//// de nas 'dus pa'i 'khor rnams la// kun rig rgyal pos bka' stsal pa// ma rtogs bar dor 'khyams pa ni// thog mar 'khrul pa'i gzhi gnas kyis// 'dod chags gnyid dang 'jig tshogs rnams// sngar gyi skye ba blangs pa'i rtags// de phyir gzhi gnas bag chags yin// de yang blo gros dam pa nyon// ma rtogs tshe 'phos bar do ni// sprin dang ling tog mun pa yis// chu bur mig ni sgrib pa bzhin// ma rig ngo bo nyid sku bsgribs// mig phyung long ba'i bag chags bzhin// de tshe sngon gyi gnas dran ste// gos dang gnyen 'dun dran pa 'byung// lus kyi mig bral 'thoms nas sdug/ dper na 'dab chags mkhar 'gro yang// 'dod pa'i dbang gi rnyis 'dzin bzhin// dbang po kun tshang grol ba'i phyir// ma rig dbang gis rkyen 'gyur 'jug/lta ba'i shes rab mig med phyir// lus ngag dge ba ci spyad kyang// rdul tsam mi phan don med 'khyam// bar do'i gnas su don dran med// gcig gam tha dad gang len pa// char sogs sdug bsngal nyen gyur pa// bu ga spyil bu khyim sogs su// dbang med shugs kyis mngal du 'jug/ lta ba'i shes rab mig med phyir// de yang 'dus pa'i snying po nyon// ma rig bag chags rnam gnyis kyis// mi shes bzhin du skye ba'i gnas// rnam bzhi gang rung las kyi skye// mtho dman gnas la gdam dbang med// rdzogs pa chen po lta ba'i yang snying/ nam mkha' klong yangs kyi rgyud las/srid pa bar do'i bag chags bstan pa'i le'u ste bcu drug pa'o//// de nas 'dus pa'i tshogs rnams la// kun rig sems kyi rgyal po yis// 'khor ba'i sa mtshams bka' stsal pa// dper na mun pa'i smag rum du// rang gi mgo bo thug pa ltar// phyis 'byung ma rig rkyen gyis bslang// nyon mongs rang rgyud rim gyis skye// lang tsho bab pa'i skyes bu ni// 'gro ba bzang mos bslus pa bzhin// 'jig rten kha brid nyon mongs pa// zhen pa'i dbang gis sems la 'chang// dper na rgya mtshor nor len pas// nga rgyal gyis ni sa 'khor bzhin// brtsam pa'i rjes su nyon mongs pas// skye rga na 'chir thar pa med// da yang 'dus pa'i snying po nyon// dang po sems kyi kun gzhi de// rgyu rkyen ngan pas bskyed pas na// min pa'i chos la yid 'dzin pas// nyon mongs thams cad bskyed par byed// khams gsum 'khor ba'i sa bon yin// bar ma bag chags kun gzhi de// snga ma'i rjes su 'brang byed cing// rang byung mi nus rkyen la ltos// skyed pa'i rkyen ni rnam bzhi'o// tha ma lus kyi kun gzhi de// chags sdang lnga la dngos su spyod// de yi sdug bsngal 'bras bu ni// skye rga na 'chi bsam mi khyab// sems can kun la gnas pa yis// kun gzhi 'khor ba'i gzhi yin pas// chos kyi sku yi gzhi nyid min// de phyir kun gzhi 'dus byas la// rkyen gyi dbang gis 'khor ba ste// chu bo bzhi yi mtha' la chud// ma bsgral bar du thar mi srid// rdzogs pa chen po lta ba'i yang snying/ nam mkha' klong yangs kyi rgyud las/ 'khor ba da lta gang na gnas pa bstan pa'i le'u ste bcu bdun pa'o//// de nas rdo rje sems dpa' yis// kun bzang nyid la 'di skad gsol// 'khrul ba bzlog pa'i thabs chen gyis// snod bcud dag pa'i rtogs thabs gang// rang byung ye shes ci ltar dbye// tha ma 'khor ba ji ltar brlag kun rig rgyal pos bshad du gsol// de skad zhus pa'i don gsan nas// 'dus pa'i 'khor la bka' stsal pa// 'khrul pa bzlog pa'i thabs chen de// dad pa brtson 'grus dam tshig gsum// rtogs pa'i thabs su shes par bya// de yang 'khor gyi snying po nyon// bram ze zla dpal ji bzhin du// bla ma dam pa don ldan la// lus dang srog la mi blta bar// gus ldan man ngag gnang bar gyur// dper na drang srong rlung nad can// sman pa'i ngag ni nyan pa bzhin// 'khor 'das gcig tu bstan pa la// skrag cing ya nga med par zhu// gzhan gyis ma bslad bud med la// dus tshod zin pa'i bu bzhin du// the tshom med par dad pa yis// rang sems don gnyis rtogs par gyis// da yang 'dus pa'i snying po nyon// 'khor 'das rtsa ba gcig pa'i phyir// seng ge lta bu'i brtson 'grus kyis// sngags dang mtshan nyid ma rig pa'i// 'khor 'das rtsa ba'i gdams ngag zhu// glang chen mi ldog dgra 'joms bzhin// bla ma'i spyod pa mi rtogs par// chos nyid gdams ngag don la brtag/brtson 'grus mi ldog the tshom gcad// sa ku tse yi rkang lag bzhin// bdag nyid spyod lam thams cad du// don la yengs pa med par ni// yid la rgyun du dran par bya// da yang 'khor gyi snying po nyon// brtse gdung dam tshig chen po ni// ma med bu ni mi 'byung bzhin// rang sems ma rtogs sangs rgyas ni// dus gsum btsal yang mi rnyed pas// tha mal 'di las btsal mi bya// gzugs spangs grib ma mi rnyed bzhin// dug lnga spangs pa'i pha rol na// sangs rgyas bya ba'i ming yang med// de nyid rtogs na chos sku yin// dper na zangs lcags la sogs la// gser 'gyur rtsi yis thebs pa bzhin// rang gi sems kyi dug lnga la// man ngag rtsi yis thebs pas rtogs// dug la sngags btab dpe bzhin du// dug ma bsal bar sman 'gyur bzhin// dgag bsgrub med pa'i don gyis na// dug lnga ye shes ngo bor shar// nor bu rin chen rnyed pa'i mis// 'jig rten so nam mi dgos bzhin// ma bsgoms sems kyi don rtogs nas// de las mi 'da' dam tshig yin// rdzogs pa chen po lta ba'i yang snying/ nam mkha' klong yangs kyi rgyud las/'khrul pa bzlog pa'i dus thabs bstan pa'i le'u ste bco brgyad pa'o//// de nas 'dus pa'i 'khor rnams la// rang byung ye shes chen po yis// yin min dbye ba ngas bshad kyi// yid kyis nyon la legs par zung// ye shes ma yin rang byung de// sems can kun la yod mod kyang// ma rtogs phyir na ye shes min// long ba mig mkhan ma rnyed 'dra// rang byung med pa'i ye shes de// gnas 'gyur ye shes lngar 'dod pa// rkyen gyis 'gyur phyir rang byung min// ra gan gser du 'dzin pa 'dra// ye shes rang byung ma yin pa// yid gnyis kun gzhi glo bur rkyen// yid 'khrul phyir na gnyis ka min// ri bong ra yi kha dog 'dra// rang byung ye shes yin lugs ni// shes rab lhag mthong las byung ba// ye nas gnas pa'i rang byung de// lung ldan rkyen gyis rtogs pa'i phyir// rang byung ye shes 'dzom pa ni// mar gyi yang zhun lta bur gsungs// rdzogs pa chen po lta ba'i yang snying/ nam mkha' klong yangs kyi rgyud las/ rang byung gi ye shes kyi dbye ba bstan pa'i le'u ste bcu dgu pa'o// // de nas 'dus pa'i 'khor rnams la// kun rig rgyal pos bka' stsal pa// lung ldan bla ma'i gdams ngag gis// rang sems snying po chos sku ni// bstan na de ma thag tu shes// ma bstan bar du shes mi srid// da yang 'dus pa'i snying po nyon// rang rig ye shes 'od po che// 'gro 'ong med par 'khor ba brlag/ ma rig log pas ye shes skyed// 'khor ba ru bzlog mya ngan 'das// ye shes ma bsgoms lhun gyis grub// don dang mthun par nyams myong skye// bsgoms kyang de nyid ye shes skye// de phyir rtog pa rab tu gces// rdzogs pa chen po lta ba'i yang snying/ nam mkha' klong yangs kyi rgyud las/ tha ma 'khor ba rang brlag tu bstan pa'i le'u ste nyi shu pa'o//// de nas rdo rje sems dpa' yis// kun rig sems kyi rgyal po la// yid kyi dran pa 'di skad gsol// nges pa'i don mthun gdams ngag gis// ngo bo nyid kyi sku mchog gang// snang ba chos dbyings ji ltar lags// rang sems chos sku ji ltar sprad// 'bral med mthun 'jug ji ltar spyad// gsang ba rnam bzhi'i gnang bkag gang// bsgom med la ni ji ltar bzla// mnyam pa'i rgyal pos bshad du gsol// zhus pa'i don gsan bka' stsal pa// nga yi chos nyid gnas lugs ni// sems can med pa'i gong rol du// bag chags ma bsags lus ma blangs// sangs rgyas med pa'i sngon rol du// rtogs pa ma bzhag byang ma chub// 'khor 'das ma rig kun gyi gzhi// de yang rdo rje sems dpa' nyon// dngos med sems kyi snying po ni// 'dus ma byas pa'i gnyug ma la// bzang ngan rnam rtog gting nas med// rgyu rkyen med pa'i snying po yin// ma rig med pa'i rang 'byung ni// mi srid phung po ga la skye// lus med chos sku 'gyur med de// rang 'byung sangs rgyas yang dag yod// tha snyad ming bas nga snga'i phyir// yod cing rtag par sgro ma 'dogs// stong pa nyid pas nga snga'i phyir// nga la med par skur ma 'debs// 'byung bzhi ma 'brel rig pa la// sgrib byed med par rang gsal 'di// dus gsum gcig pa shes pa'i rgyun// ma byung ma skyes da lta nyid// de yang 'khor gyi snying po nyon// rang byung sku la skye 'chi med// de phyir 'khor ba ltung ma myong// don ma rtogs pa'i sangs rgyas med// de phyir mya ngan 'das ma myong// rang gsal nga nyid kun gyi mes// da yang 'dus pa'i snying po nyon// dngos po med pas nam mkha' 'dra// mi 'gyur sra bas rdo rje 'dra// skye ba med pas a dang 'dra// don ma yin phyir dpe 'di bstan// ngo bo nyid kyi sku mchog ni// dngos po mtha' bral nyon mongs ldog/ stong pa'i mtha' bral ngo bo nyid// gnyis ka las bzlog chos kyi sku// de yang 'khor gyi snying po nyon// mtshan nyid phyir bltas 'dra ba med// rgyal po gdung chang bu bzhin du// kha dog 'di 'dra mtshon mi nus// gdod nas dpe med chos kyi sku// nang du bsam pa'i yid med de// nam mkha' lcags kyis byug pa bzhin// rig tshor rnam pa cir yang snang// dran pa nyid ni ye shes klong// yul gyi snang grag 'di nyid la// nyi ma shar nas mun med ltar// da lta'i rang sems chos kyi sku// de la 'khor ba'i rang bzhin med// 'gro drug sems can thams cad la// til la mar gyis khyab pa bzhin// rang sems ye shes byang chub sems// bder gshegs snying po chos skus khyab// ye nas don dang mi bral ba'i// lung ldan rkyen gyis rang sems rtogs// nor bu rin chen 'od bzhin du// ye shes dag pa 'char nub med// 'khor ba dag gi mtshan nyid kyang// min pa tsam gyi mi spangs par// yang dag don du mi bya'i phyir// dgag bsgrub med pa tsam du bzhag/ mya ngan 'das pa'i chos kun kyang// yin pa tsam gyis mi blang bar// sems can gdul phyir ma gtogs par// ched du mi bsgrub btang snyoms bzhag/ rdzogs pa chen po lta ba'i yang snying/ nam mkha' klong yangs kyi rgyud las/ rig pa ma bslad ngo bo nyid kyi sku bstan pa'i le'u ste nyi shu rtsa gcig pa'o//// de nas kun rig rgyal po yis// snang ba'i mtshan nyid bka' stsal pa// rnam bzhi'i phyi la bar snang nang// gsum bral snang ba chos kyi dbyings// gcig las tha dad dngos 'dzin pas// nyi ma'i zer dang 'char dogs bzhin// dgag bsgrub med phyir chos kyi dbyings// de yang 'dus pa'i snying po nyon// dred mo gdos thag ma chod par// brid bsdig gnyis kyis mi phan bzhin// yul dang gol sa ma chod par// ci bsgom don med 'khor bar 'khyams// 'khrul pa las ni yul med kyang// 'byung ba chen po lnga nyid la// rang sems rig pa'i don med bar// rang byung yin phyir ye shes min// de yang 'dus pa'i snying po nyon// gser dang ser po'i tshul bzhin du// byis pa tha dad zhen zlog phyir// bdag nyid gcig pa'i 'brel ba yod// de phyir yul 'di spang mi dgos// phyi yi 'byung bar sems sdud pas// zer mthong snying po ma mthong bzhin// gnyis med snang stong khas mi len// yul la rtsod phyir don mi rtogs// bden pa mthong ba'i dge slong ni// 'khor 'das longs spyod mi sdud bzhin// gzhi la snang ba med pa'i phyir// yul 'di sems su blos mi sdud// me dang du ba'i tshul bzhin du// snang ba 'di la rang rgyud du// rang sems yul du 'khrul pa yis// bdag tu rtog pa'i zhen pa zlog/kun du rgyu ba'i skye lam bzhin// mthar thug 'brel pa med pa yis// tha dad gcig tu mi bsam pas// snang ba 'di la don mi bzhag/ da yang 'dus pa'i snying po nyon// dper na khyung chen mkha' lding la// chu klung gyen thur nyams mi nga// bar snang khams kun lam du bde// dmigs pa'i sa phyogs yud kyis phyin// de bzhin snang ba ma bcos pas// sna tshogs mdun na snang bzhin du// snang tsam nyid nas spang sdud med// zhen med rnal 'byor spyod yul la// 'khrul pa'i rtog pas gzhi mi 'gyur// btsal ba'i bsam pas dbyings mi bskyed// da yang 'dus pa'i snying po nyon// nyi ma lta bu'i chos kyi sku// thig le'i rtsal ni ma 'gags pas// sgo lnga gsal ba nyi zer 'dra// ngo bo gcig phyir dgag bsgrub med// de phyir chos kyi dbyings zhes bya// rdzogs pa chen po lta ba'i yang snying/ nam mkha' klong yangs kyi rgyud las/snang ba ma bcos chos kyi dbyings bstan pa'i le'u ste nyi shu rtsa gnyis pa'o//// de nas 'dus pa'i 'khor rnams la// kun rig sems kyi rgyal po yis// chos sku ngo sprod bka' stsal pa// rnam smin lus dang bcas pa yis// tha mal kun gzhi gzhi cha la// snga phyi rang bral chos sku gsal// chu dngas rnyog med dpe bzhin no// de yang 'dus pa'i snying po nyon// yang dag zab mo chos sku ni// skye ba med cing 'gag pa med// rnam rtog mtshan ma gzhi nas med// nyon mongs ngar 'dzin rnams dang bral// 'phel 'grib skyon rnams ngang gis med// de yi ngang la gnas thabs ni// snga phyi gzhi la med shes pas// sems can dus na chos kyi sku// yid kyi yul du ma bsgoms kyang// rang byung rig pa'i ting 'dzin gsal// de yang rdo rje sems dpa' nyon// rang gi thig le'i don lta na// rab 'bring tha ma'i blo tshad du// rim gyis bsgoms par ngas bshad kyis// gzhan du ma yengs yid la zung// tha ma rnal 'byor sgom pa pos// snga phyi med pa'i gnyug ma la// ma 'phros ma bying rang lugs tsam// de la rgyun du ma yengs bsgom// chags sdang dbang gis 'phro gyur na// don dam dgag bsgrub med pa'i phyir// rang byung snying po rang shar bas// ba mor nyi shar ji bzhin no// gti mug dbang gis bying ba ni// rang sems shes pa gzengs bstod la// phyi rol yul la mi spyad par// dbang po sgo dbye yan du gzhug/ 'bring gi rnal 'byor sgom pa pos// chos sku nam mkha' lta bu la// ji bzhin pa yi ye shes de// brjod med rgyun mi chad par lta// gal te byung tshor rtag chad rnams// rnam rtog ye shes bskul mar shes// me la shing bsnan ji bzhin du// de tsam nyid nas bsgom pa gsal// sgo lnga shes pa rmugs gyur na// nyams gsum bsres pa'i don dran pas// chos nyid ye shes klong du bying// bum nang rin chen gter dang 'dra// dbang po rab kyi bsgom pa la// nyams dang mi nyams med pa'i phyir// 'bral med don la bcos mi dgos// sprin med nam mkha' ji bzhin no// de yang blo gros dam pa nyon// nyi zla gzas zin dpe bzhin du// dbyings dang chos sku dus mnyam phyir// chos nyid rang gsal rang gnas pas// ye shes mi 'bral rdzogs pa yin// rdzogs pa chen po lta ba'i yang snying/ nam mkha' klong yangs kyi rgyud las/ rang sems chos skur ngo sprod pa'i le'u ste nyi shu rtsa gsum pa'o//// de nas 'dus pa'i 'khor rnams la// 'bral med spyod pa bka' stsal pa// rang sems lta ba rtogs pa yis// mnyam rjes dug lnga gcig tu shes// de tshe nyon mongs ci spyad kyang// ngo bo nyid la 'phel 'grib med// de yang 'dus pa'i snying po nyon// de tsam nyid na ngo bo nyid// de don mi brjed rtogs pa'i phyir// ched du byas la bsgom mi bya// ma gi ta la gang reg 'dra// yul nyid sems su mi bsgom pas// dran rig chos nyid byang chub sems// de nyid spyod pa'i yul las 'das// de phyir don la nyams pa med// de yang 'khor gyi sems dpa' nyon// gnyid nyid bsgom par gsal thebs nas// ldog ka sad ka'i dus dag tu// de tshe chos sku'i don dran na// rin chen ga 'ur bcug pa 'dra// gshog rno rdul med tsha grang snyoms// mi 'tshub chu yi nya bzhin du// rmi lam 'brel thabs med par 'byung// tshogs drug 'gags kyang chos skur gnas// de yang 'khor gyi sems dpa' nyon// 'chi ka bar do'i don dran na// gnad gcod sdug bsngal ci byung yang// 'jigs pa brgal 'dod mi bzhin du// ched du dran pa shin du gces// na ba ta yi mig gnyis 'dra// rtsa drod yod la srog dang bral// rtsa med drod bcas bkrag ma nyams// chos kyi sku ni dran pa'i rtags// na tsha byung na smos ci dgos// da yang 'dus pa'i snying po nyon// dbang po 'bring gi rnal 'byor pas// gzhi shes mngon du ma gyur pas// lus su zhugs kyang don dran te// rtogs pa yin phyir mngal na bsgom// tshe 'phos nas ni mngon sangs rgyas// tha ma phyi rol brtags pas brjed// dran tshe rkyen dang phrad pa'i phyir// skad cig zur tsam brda' yis ni// the tshom med par don go nas// skye ba gcig gis sangs rgyas 'grub// de yang 'dus pa'i snying po nyon// de ltar ma rtogs rnal 'byor pas// ji ltar bsgoms kyang don med 'khyams// 'khor ba lugs kyi nad du 'jug/de tshe lus kyi bza' bgo ni// mi dgos gnyid mi 'ong zhing bde// gsal la yul gyi rtog pa med// dus la ma bab bar du ni// mkhas kyang lta sgom bstan thabs med// bum pa nang gi mar me 'dra// de yang 'dus pa'i snying po nyon// sangs rgyas sems can rnal 'byor pas// so sor snang ba ma yin te// ma 'khrul ma rtogs gong rol gyi// ngo bo nyid kyi sku dang ni// ma 'khrul rtogs pa'i kun bzang thugs// 'khrul nas ma rtogs sems can sems// 'khrul kyang rtogs pa'i rnal 'byor thugs// ngo bo gcig phyir gol sa med// de tshe chos sku zad ka ma// mi 'gyur brtan pas gser bzhin no// rdzogs pa chen po lta ba'i yang snying/nam mkha' klongs yangs kyi rgyud las/ dus bzhi rigs spyod bstan pa'i le'u ste nyi shu rtsa bzhi pa'o//// de nas 'dus pa'i 'khor rnams la// kun rig rgyal pos bka' stsal pa// mthun 'jug thabs kyi spyod pa yi// tshogs chen ma lus rdzogs pa yis// 'gro don thugs rje mthar dbyung phyir// rdzogs chen shin tu rnal 'byor pas// bla med go 'phang mchog brnyes par// sems can gnas phyir bla ma bkur// bla ma bsgom na chos sku bsgom// lha sku'i 'bum phrag stong bsgoms pa'i// bsod nams de yi char mi phod// de phyir dkar po'i chos spyod kyi// nyan bshad bsgom dang 'dzin pa dang// mchod gtor la sogs gang byed kyang// sngon du 'gro ba'i las byed phyir// bla ma dus gsum sangs rgyas dpal// dkyil 'khor sgor zhugs thams cad kyi// 'bral med yi dam lha tshogs dang// man ngag rgyud don rang rig lha// rtsol med 'bras bu'i chos dang ni// don ldan rnal 'byor mkha' 'gro la// lus ngag yid kyis phyag 'tshal nas// bla med mchod gtor gtong ba'i tshe// phyi yi 'jig rten snod nang du// bdud rtsi'i rgya mtsho gting zab gyur// de steng 'bru yi phye btab pas// gser gyi sa gzhi chen por gyur// me tog sna tshogs gtor bas na// 'dzam gling bye ba phrag brgyar bsam// rin chen sna lnga brdar bas ni// rin chen ri bdun ma bskyed rdzogs// snying po rnam lnga blugs pa yis// mi brjed dran pa'i gzungs thob 'gyur// sman lnga 'bru lnga blugs pa yis// nad dang mu ge'i bskal pa thar// lta bas byin gyis brlabs pa'i phyir// mgron bzhir rim pas bsngo mi dgos// de yang 'dus pa'i snying po nyon// bsngo ba med pa'i bsngo ba ni// bla med mya ngan 'das pas na// 'jig tshogs dmyal ba yan chad du// bla med mchod sbyin 'di bsngos pas// sems can bsam pa 'grub gyur nas// lhun grub sa la gnas par shog/ rdzogs pa chen po lta ba'i yang snying/ nam mkha' klong yangs kyi rgyud las/ phyi'i mchod gtor btang ba'i le'u ste nyi shu rtsa lnga pa'o//// de nas 'dus pa'i 'khor rnams la// kun rig rgyal pos yang gsungs pa// nang gi mdzad spyod tshogs chen ni// phrin las rnam pa bzhi yi chos// don ldan dbang bskur byed la sogs// tshogs mchod rim pa gang byed kyang// yid mthad pa yi gnas dag tu// dam tshig sel med 'khor tshogs bcas// dkyil 'khor maN+Dal gzhung bzhin du// ye shes tshogs chen bsags pa'i phyir// dga' ldan lha yi longs spyod dang// 'byor ldan mi yi longs spyod dang// dgongs ldan 'phrul gyi longs spyod rnams// yid dang dngos su bsags bsams la// sngon du 'gro ba'i las byas te// gnas khang byin gyis brlabs pa dang// ting 'dzin zhal zas spro bskyed nas// dam can 'du bar bsgo ba dang// thugs dam bskul dang tshar bcad nas// gsang ba'i lha mos mtshams bcad de// rnal 'byor nongs bshags byas nas ni// dkyil 'khor bskyed dang dbang bskur dang// don rtogs byin gyis brlabs mi dgos// ma rtogs sngags dang yig 'brus brlab// da yang 'dus pa'i snying po nyon// yid kyi mdun gyi nam mkha' la// dus gsum bzhugs pa'i sangs rgyas dang// bla med khrag mthung rigs lnga'i tshogs// rig 'dzin rje btsun bla ma rnams// mkha' 'gro 'khor bcas spyan drangs nas// ci 'byor pa yi tshogs drangs nas// de nas rnal 'byor dad ldan gyis// snang ba gzugs kyi mchod pa dang// sgrogs pa sgra yi mchod pa dang// thabs dang shes rab bde ba yis// ye shes lha la rdzogs par mchod// lhag ma rol la lha bshags dang// skye shi dus kyi smon lam btab// de yang rdo rje sems dpa' nyon// de ltar tshogs chen gnyis rdzogs mi'i// stong gsum sangs rgyas sar shes kyang// grong yul gnas la chags mi bya// ci spyod rgyal ba'i mdzad spyod kyang// 'du 'dzi g.yeng phyogs dbang med gtang// rnam smin lus dang ma bral kyang// sems la chos sku shin tu gsal// nyin dang mtshan mo dbye ru med// ci spyod rang byung ye shes la// ma chags dang du blang ba med// rtog pa skyon du 'bor ba med// dka' thub tshul gyis bsdam pa med// gang yang blo yi rten med kyang// 'on kyang ma go drang ba'i phyir// re zhig tsam du dkar chos spyod// rdzogs pa chen po lta ba'i yang snying/ nam mkha' klong yangs kyi rgyud las/ gsang sngags kyi tshogs 'bul ba'i le'u ste nyi shu rtsa drug pa'o//// de nas 'dus pa'i 'khor rnams la// kun rig rgyal pos bka' stsal pa// chos rnams kun gyi rtsa ba ni// srog ni rnam pa gnyis su 'dus// ma rig thar pa gang spyod pa// de yi bye brag ngas bshad nyon// thar pa mya ngan 'das pa'i chos// sems gsang lta nyams rang srog gcod// nyon mongs dbang du gyur pas na// 'dus byas chos kyis mi skyob ltung// de yang rdo rje sems dpa' nyon// dug lnga 'khor ba'i rtsa ba ni// ma rig kun gzhi yin pa'i phyir// lus can srog ni bcad mi 'gyur// kun bzang shes rab mtshon rnon gyis// thog mtha'i bar du ma rig bsad// de yang sems can srog 'di la// lus 'di gnas skabs 'brel yod kyi// lus can srog ni bcad mi bya// gal te zhe sdang srog gcod na// rang sems ma rtogs tha mal te// skyabs 'gro nyams phyir dmyal bar ltung// skye bo bdun 'gyur sdig pa che// de yang blo gros dam pa nyon// nam mkha' me yis mi tshig bzhin// de bzhin don rtogs rnal 'byor pas// slob dpon sku dgra la sogs pa// bsgral ba'i zhing bcu bsgral 'gyur kyang// sgrib par mi 'gyur tshogs su 'gyur// ngo bo nyid kyi skur dran na// ma rig srog ni bcad pa'i phyir// srog gi nang na dam pa'i mchog/ de dang mi 'bral mngon sangs rgyas// de yang 'dus pa'i snying po nyon// gzhan gyi mi dang mi ma yin// rgyud bzung nor ni dngos po'i rdzas// gsang sngags sgor zhugs rnal 'byor pas// rku ba'i sems kyis blang mi bya// de phyir bdag nyid rdzas la yang// ma byin blang sems dran na ni// yi dwags gnas su skye 'gyur gsungs// gzhan gyi rdzas la smos ci dgos// de yang blo gros dam pa nyon// rgya mtsho skyogs kyis mi 'grib ltar// don rtogs rnal 'byor gdeng ldan pas// ser snas bcings pa'i rdzas rnams ni// g.yo sgyu'i thabs kyi nor blangs la// bla ma dkon mchog tshogs su 'bul// bla ma nges pa'i lung ldan gyis// de la gsang ba'i sku lnga byin// de phyir ma byin blangs na grol// da yang 'khor gyi snying po nyon// gnas skabs 'brel ba'i lus yod pas// 'tsho ba'i bza' bgo dgos pa'i phyir// log 'tsho'i g.yo sgyu ma yin par// chos kyis 'tsho ba'i rdzas rnams btsal// de yang lam gyi rnal 'byor pas// bung ba bcud len zhen med ltar// khyim pa sun ni ma phyung bar// 'tsho ba'i yo byad tshod zin bya// de yang rdo rje sems dpa' nyon// lus la pho mo yod pa'i phyir// sems can las kyi chags spyod tshe// 'khor ba'i 'bras bu ma smin na// don zin bde ba grogs su che// de phyir snga phyi ma song pa'i// ye shes chos sku rang yin pas// de la skyon gyis mi gos phyir// thabs dang lta bas zin par bya// da yang blo gros dam pa nyon// bdag nyid ma yin gzhan dag la// chags sems tsam yang mi bya la// dam tshig sdom pa srung ba dang// rgyal rigs mo dang bslab srung dang// bdag po can gyi bud med ni// rtsa ba yan lag dam tshig gi// nyams par byed pa'i bzhi yin phyir// ro myags ngu 'bod dmyal bar ltung// bag chags zhen pa'i rgyu yin pas// blta bas ma zin rtag tu spang// zhen med chos sku'i spyod par bshad// de phyir 'khor spangs rab tu gces// de yang 'dus pa'i snying po nyon// 'jig rten 'khor ba rdzun gyi chos// yod med skyon la dam par blta// ma rig 'khrul par the tshom med// mi bden rdzun par shin tu smra// de yang blo gros dam pa nyon// 'du shes bsgyur nas rang 'dod kyis// mi chos bla ma'i rdzun sogs blos// rang sems bcos phyir don dang 'gal// de bzhin lce rmod dmyal bar ltung// de yang rang sems rtogs pa'i don// 'khor ba mya ngan 'das pa'i chos// gnyis kas 'bras bu mi 'byin na// dug lnga rang grol rgyal ba'i thugs// rtogs la drang po ma bcos pa// sangs rgyas mdzad spyod de go bas// g.yo sgyu med pa dam pa'i don// de ltar rnal 'byor dam pa'i lam// rdzogs pa chen po lta ba'i yang snying/ nam mkha' klong yangs kyi rgyud las/gsang ba'i spyod pa bstan pa'i le'u ste nyi shu rtsa bdun pa'o//// de nas kun rig rgyal po yis// ma bsgoms 'brel med bka' stsal pa// sems nyid bsgom du med pa'i dpe// nam mkha' bsgom du sems dang bral// de bzhin sems kyi sems bsgom du// chos nyid spyad pa'i yul las 'das// sems kyi gzhi shes bsgom mi dgos// don gnyis tshig tu 'byung ba'i phyir// tshig la don med zer ba 'khrul// de yang rdo rje sems dpa' nyon// rgyun du 'bral med chos kyi sku// nyams myong med pa nyams kyi mchog/ ci yang yid la mi byed na// gol dang sgrib par ga la 'gyur// bsgom pa'i mchog tu de gsungs so// rnal 'byor spyod lam thams cad du// lta ba'i dam tshig chen po ni// ma nor ma bcos dam tshig gis// de rtogs de las mi 'da' bas// rgyal ba rnams kyi thugs dam yin// skye med don la sems zhugs pa'i// nam mkha' lta bu'i rnal 'byor de// de las mi 'da' dam tshig ni// rang rig chos sku dam pa'i mchog/ brjod pa med pa'i dam tshig yin// bsrung du med pa'i ngang du bsdam// de nyid dran pa'i rnal 'byor pas// spyod lam rnam bzhi gang byed kyang// 'ching bar mi 'gyur grol bar nges// de yang 'dus pa'i snying po nyon// snying po chos sku rang gsal don// ma bsgoms 'bral med ye shes klong// rang sems shes pa sna tshogs pa// ye shes las ni gzhan med pa// tha mal rang sems chos nyid ni// de yang mi 'gyur ngo bo ston// dag dang ma dag gzhi gcig phyir// dus dang spyod lam thams cad du// gnyid dang bar dor bsgom pa ni// da ltar wal le snang ba rnams// ma rtogs bar du 'khrul pa ste// rtogs na de nyid chos sku yin// de yang 'dus pa'i snying po nyon// thig le ma btsal lhun gyis grub// ye nas rang byung chos sku ni// yul nyid sems su mi bsgoms phyir// sgom pa po yang med par 'gyur// gang gis gang la bsams shing bsgom// de phyir gnas lugs bsgom du med// ma rtogs thabs kyis ci zhig bya// dbang po rab kyis btsal du med// tha mal mi rtog gdams ngag med// rdzogs pa chen po lta ba'i yang snying/ nam mkha' klong yangs kyi rgyud las/ bsgom du med par la bzla ba'i le'u ste nyi shu rtsa brgyad pa'o//// de nas rdo rje sems dpa' yis// dad ldan 'khor la phan don du// kun rig ston pa chos rje la// bden pa'i yid kyis 'di skad gsol// 'bral med rkyen thub ting 'dzin gyis// ye shes bde ba rkyen thub dang// sdug bsngal zhi byed rkyen thub dang// btang snyoms lhag mthong rkyen thub dang// rmi lam klong thim rkyen thub dang// dug lnga rang grol rkyen thub dang// skye phyis mi len rkyen thub rnams/kun rig ston pas bshad du gsol// de skad zhus pa'i don gsan nas// 'dus pa'i 'khor la bka' stsal pa// bde ba nang nas phyir bstan pa// nang gi zhi gnas bde ba ste// gang zag bdag med bde ba dang// chos la bdag med bde ba dang// 'jig rten mi g.yo'i bde ba yin// de yang 'dus pa'i snying po nyon// pho mo lus kyi bde ba dang// rang sems rtogs pa'i bde ba dang// thabs zin 'phrang gi bde ba dang// thabs med 'dod chags bde ba'o// de yang 'dus pa'i snying po nyon// phyi 'dzin longs spyod bde ba yang// zas nor 'khor gyi longs spyod dang// 'dod yon lnga la ci bder spyod// zhen pa'i dbang gis chog shes med// de yang rdo rje sems dpa' nyon// nang gi zhi gnas bde ba ni// gang zag bdag med 'gags pa ru// mi gol rkyen gyi gdams ngag gis// sgo lnga mi 'gag rang gsal la// yid la lhag mthong dran pas bzung// rkyen thub 'bral med ye shes yin// de yang 'dus pa'i snying po nyon// chos la bdag med bde ba ni// dbu ma sems tsam bsgom pa ste// der mi gol ba'i gdams ngag ni// bden gnyis sems su blo mi bsdu// rig pas mi gzhig rang sa la// yul med shes pa rang byung shes// yengs pa mi 'byung rkyen thub rnams// de phyir 'bral med ye shes yin// de yang 'dus pa'i snying po nyon// 'jig rten mi g.yo'i bde ba ni// bsam gtan gsum sogs bde ba de// zhen pa yod phyir 'khor ba'i rgyu// der mi gol ba'i gdams ngag ni// lung ldan rkyen gyi gdams ngag rgyun// shan phyed ngos zin la zlos phyir// bde ba zhen med rkyen thub pa'i// yid ches gdeng gis zin pa'i phyir// 'gal rkyen mi 'byung chos skur gsal// de yang rdo rje sems dpa' nyon// phyi 'dzin longs spyod yul la zhen// der mi gol ba'i gdams ngag ni// yul rig bar du bdag gzhan gyi// ngar 'dzin bden 'dzin dam par ni// snang bar zhen pa med pa'i phyir// phyi yi yengs pa'i rkyen rnams thub// de phyir snang ba chos kyi dbyings// rdzogs pa chen po lta ba'i yang snying/nam mkha' klong yangs kyi rgyud las/ bde la zhen med ye shes su rkyen thub par bstan pa'i le'u ste nyi shu rtsa dgu pa'o//// de nas 'dus pa'i tshogs rnams la// kun rig ston pa chos rje yis// sdug bsngal zhi byed bka' stsal pa// sems can kun la gnas pa yi// phyi yi sdug bsngal zhi gyur pa'i// lus kyi sdug bsngal nad yin te// bzhi brgya rtsa gcig 'du ba bzhi// mi bde sna tshogs bskyed par byed// de yang 'dus pa'i snying po nyon// nang gi sdug bsngal bdag gzhan la// byams bral sdang 'phrad dogs pa dang// yod skyong med tshol zhen pa kun// phyi yi sdug bsngal yin par gsungs// de yang 'khor gyi snying po nyon// rang lus na tsha bzod dka' ste// rkyen dbang mi gol gdams ngag ni// gang na blo yis ma bzung bar// bzod dka' rang r-ig chos skur shes// snga phyi ma btang da lta yi// bde sdug bdag kyang chos skur gsal// sdug bsngal rang zhi ye shes 'char// yi chad kha bzhi'i rkyen rnams thub// de yang rdo rje sems dpa' nyon// phyi yi sdug bsngal rnams bzhi la// zhen pa rang rgyud mi gol ba// yul sems bar do'i gdams ngag ni// nges don dran pas rkyen mi tshugs// sdug bsngal ye shes dang du shar// rnam rtog mi byed chos kyi sku// de yang 'dus pa'i snying po nyon// de dag sdug bsngal phyi nang gnyis// rtsa ba ma rig blos byas te// lung ldan rkyen gyis ma rig 'bral// ye shes rang rig chos skur shes// sdug bsngal bya ba'i ming yang med// rang 'byung rtogs pas mngon sangs rgya// rdzogs pa chen po lta ba'i yang snying/nam mkha' klong yangs kyi rgyud las/ sdug bsngal zhi byed chos sku rkyen thub par bstan pa'i le'u ste sum bcu pa'o//// de nas 'dus pa'i tshogs rnams la// kun rig chos kyi rgyal po yis// ma rig las byung btang snyoms la// lhag mthong rig pas bka' stsal pa// bde sdug ma dran btang snyoms ni// zhi gnas ma rig gti mug ste// gang la blo yang ma zhugs pas// dge sdig gnyis su lung ma bstan// de las bag tsam cha phra las// lung ma bstan pa rnam gsum byung// bde sdug skyed pa'i rgyur ni gsungs// de yang 'dus pa'i snying po nyon// shes bzhin lung ma bstan du ni// mi gol ba yi gdams ngag ni// thog mar rang byung ngo shes nas// ma rig med phyir nges lung bstan// de phyir rang rig chos sku rtogs// btang snyoms lhag mthong rig par shar// kun gzh-i dag phyir rkyen thub pas// 'gyur med ye shes chos kyi sku// da yang 'dus pa'i snying po nyon// btang snyoms lhag mthong rang byung de// shes pa gsal la mi rtog pa// chos sku mi g.yo don gyis zin// de phyir lung ldan chos skur gsal// gsal tsam nyid na rkyen thub phyir// rang byung thugs la 'gyur ba med// da yang 'dus pa'i snying po nyon// nges pa'i lung bstan gdams ngag gis// dge sdig ma dran chos skur dran// de phyir lhag mthong rig pa la// thig le nyag gcig de la bya// rang byung snying po yul las 'das// sems kyi spyod yul ma yin phyir// rtogs pa'i chog la bsgom mi dgos// nor bu rin chen rnyed dang 'dra// de yang 'khor gyi snying po nyon// tha ma shes pa btang snyoms 'di// kun bzang rgyal po'i dgongs par shes// de tshe yul sems gnyis las 'das// rang byung chos skur ji ltar gsal// de la 'gal ba'i skyon mi 'byung// 'dus ma byas ni nam mkha' 'dra// rdzogs pa chen po lta ba'i yang snying/ nam mkha' klong yangs kyi rgyud las/ btang snyoms lhag mthong rig pas rkyen thub par bstan pa'i le'u ste so gcig pa'o//// de nas 'dus pa'i tshogs rnams la// kun rig ston pa chos rje yis// rmi lam klong thim bka' stsal pa// rnal 'byor dam pa gnyid byung tshe// rmi lam dge sdig lung ma bstan// bag chags mtshams sbyor ltas bstan pa'i// rmi lam sna tshogs byung dus su// ye shes klong thim shes par bya// da yang 'dus pa'i snying po nyon// tshe stod sngar byas gang rmis pa// bag chags rmi lam yin shes pas// de rjes mi gcod don dran phyir// bag chags rmi lam rang stong nas// ye shes klong thim rkyen thub tshe// 'di la ma mthong med ma myong// gang rmis pa yi mtshams sbyor bas// bag la nyal du shes pa'i phyir// kun brtags med pa'i lhag mthong gis// mtshams sbyor rang zhi rkyen rnams thug/ da yang rdo rje sem dpa' nyon// 'jig rten lhas byas lung bstan pa'i// rmi lam bzang ngan gang byung yang// bslu ba'i bdud du shes pa'i phyir// dam par gtad med gang bzhag pa// bslu med rkyen thub chos skur gsal// da yang 'dus pa'i snying po nyon// rnal 'byor dam pa gnyid log tshe// dge sdig lung ma bstan pa'i tshe// gang dmigs gang yang ma bsam par// chos nyid ngang la gnas par bya// gang yang rtog pa ma zhugs na// bzang ngan zhen pa rang zhi ste// ye shes klong thim rkyen rnams thub// de phyir nges don gdams ngag che// rdzogs pa chen po lta ba'i yang snying/nam mkha' klong yangs kyi rgyud las/ gnyid ye shes klong thim du rkyen thub par bstan pa'i le'u ste so gnyis pa'o//// de nas 'dus pa'i dad ldan la/ kun rig ston pa chos rje yis// dug lnga rang grol bka' stsal pa// nyi shar mun sgrib med pa bzhin// lung ldan ma rig rtsad gcod nas// ngo bo rig pa chos skur gsal// ma rig med pas gti mug sangs// da yang 'dus pa'i snying po nyon// ldum bu sad kyi bsad pa ltar// zhe sdang yul med don shes pas// log gnon dran pa bsal ba'i phyir// zhe sdang rang grol rkyen rnams thub// rmi lam 'dod chags 'chal med bzhin// snga phyir ma song dus de ru// pho mo 'dod chags ci spyod kyang// de tsam nyid na skyon mi gos// da yang rdo rje sems dpa' nyon// ri bo chen po'i khar phyin ltar// nga rgyal chen po'i rtog pa 'chang// lhag mthong rig pa'i ye shes kyis// nga rgyal rang sar rkyen thub grol// lta ba ma nor gdeng gi 'phrang// gol sgrib med pa'i chos sku la// phrag dog rang sar rkyen thub phyir// ba mo la ni nyi shar 'dra// da yang 'dus pa'i snying po nyon// nges don shes pas gti mug 'joms// rang rig dran pas zhe sdang brlag/ bde ba zhen med 'dod chags bral// yid ches 'dzin med nga rgyal grol// chos sku dran pas phrag dog dag/ da yang rdo rje sems dpa' nyon// don gyi ngo bo gnas lugs la// sgro skur gnyis kyi skyon med pas// dug lnga kun brtags rang sar grol// de phyir chos sku snying por gsungs// rdzogs pa chen po lta ba'i yang snying nam mkha' klong yangs kyi rgyud las/dug lnga rang grol rkyen thub bstan pa'i le'u ste so gsum pa'o//// de nas 'dus pa'i tshogs rnams la// kun rig ston pa chos rje yis// bar dor rkyen thub bka' stsal pa// nges don rtogs pa'i rnal 'byor pas// dus kyi tha ma byung ba'i tshe// snang ba skye dang mched pa dang// snang ba 'gyur zhing thob pa'i dus// lung ldan nges pa'i gdams ngag gis// bar dor skye ba mi len pa'o// rkyen thub 'bras bu sangs rgyas 'byung// de yang 'dus pa'i snying po nyon// snang ba 'gyur zhing spang pa'i dus// bar dor lus gsum mi len pa'o// nges don gdams ngag don dran pas// gzhi gnas ma rig med pa'i phyir// rkyen bzhis ma bskyed lus mi len// shes pa chos sku 'gyur med brtan// mngon shes drug dang rjes dran drug/ sangs rgyas sa yi yon tan kun// thogs pa med par dus gcig rdzogs// de phyir rkyen thub sa zin pas// ma rig sangs la ye shes rgyas// thams cad mkhyen pa'i ye shes dang// sangs rgyas yon tan kun rdzogs phyir// 'gro don gzugs sku dus gcig 'byung// da yang 'dus pa'i snying po nyon// de tshe ye shes snang ba las// bag chags bral bas chags sdang med// snang ba med pas zhen pa grol// rig pa gsal ba chos skur shes// lus can gang yang med pa'i phyir// pho mo ma mthong mngal mi 'jug/ de phyir skye ba mi len nges// da yang 'dus pa'i snying po nyon// nges pa'i 'bras bu sangs rgyas ni// rnam dag chos sku gcig gcig la// nges don 'bras bu logs na med// drang don sangs rgyas grangs mang yang// mthar thug chos sku yin pa'i phyir// bsgrub pa bas kyang rtogs pa gces// rdzogs pa chen po lta ba'i yang snying/ nam mkha' klong yangs kyi rgyud las/ srid pa bar ma do la skye ba phyi ma mi len par bstan pa'i le'u ste so bzhi pa'o//// de nas kun rig rgyal po la// 'dus pa'i 'khor gyis yang gsol pa// the tshom gegs rnams bsal ba'i phyir// gdams ngag rnam dbye ji ltar dbye// 'khrul pa log pa'i rtags chen gang// thig le'i la shan ji ltar dbye// nges par the tshom ji ltar bsal// de skad zhus pa'i don gsan nas// kun rig rgyal pos bka' stsal pa// lta sgom spyod pa 'bras bu yi// dbye ba rnam pa drug drug gi// dbye ba bstan gyis legs par nyon// lta ba'i ngo bo shes rab ste// mos pa'i blo yis gang bzung ba// dbye ba rang gnas ngo bo ni// stong par khyab pas nam mkha' 'dra// nges tshig chos skur lta ba yin// gol sa ma rig rtag chad gnyis// skyon ni yul sems bsre byed pa// da yang 'dus pa'i snying po nyon// sgom pa'i ngo bo mi rtogs pa// dbye ba mthun pa 'bral med de// til gyi mar me dud med 'dra// nges tshig dbang po ma yengs pa// gol sa bying dang rgod pa'o// skyon ni nan gyis glen bsgom byed// da yang 'khor gyi snying po nyon// spyod pa'i tshul ni ma bcos pa// dbye ba rig gsang mthun pa'i thabs// tshom med glang chen chur 'jug 'dra// nges tshig shugs 'byung blang dor med// gol sa rang rgyud nyon mongs spyod// skyon ni chos brgyad yul la zhen// da yang 'dus pa'i snying po nyon// 'bras bu nges pa'i gdeng zin pas// dbye na gnas skabs mthar thug 'grub// rin chen rgyan gyi yon tan 'dra// nges tshig bslu med rang yid ches// gol sa 'bad pa don med 'khyams// skyon ni phyis 'byung re dogs blo// de yang rdo rje sems dpa' nyon// de dag dbye ba tha dad kyang// ma rig rmongs pa bstan pa la// ngo bo rang byung nyid 'di las// gzhan du g.yos pa rdul tsam med// rdzogs pa chen po blta ba'i yang snying/ nam mkha' klong yangs kyi rgyud las/gdams ngag gi dbye ba bstan pa'i le'u ste so lnga pa'o//// de nas 'dus pa'i 'khor rnams la// kun rig rgyal pos bka' stsal pa// 'khrul ldog rtags bdun ngas bshad kyis// legs par zung la yid kyi nyon// chos rnams kun gyi gzhi shes pas// 'khor 'das glo bur 'khrul par shes// re dogs med pa gzhi shes rtags// mtha' drug rkyen bzhi 'dzin med pas// yid ches gdeng gi don zin nas// lhan cig ma rig log pa'i rtags// thog ma'i rang byung ngo shes pas// dus gsum gcig tu shes pa'i phyir// 'khrul pa'i dus las log pa'i rtags// yul ni ma nges sna tshogs kyang// chos brgyad zhen pa med pa'i phyir// kun brtags ma rig log pa'i rtags// thag pa rang du shes tsam na// sbrul du 'dzin pa rang sar grol// dpe las don du log pa'i rtags// rdzun la bden par mi 'dzin pas// bsgom du med pa rang sar grol// 'khrul pa'i ngo bo log pa'i rtags// ma rig med phyir bag chags bral// blang dor gnyis sogs don dran pas// lugs su 'jug pa log pa'i rtags// rang gi sems la dbang thob pas// shes bzhin skye ba drang don phyir// skye shi'i sdug bsngal log pa'i rtags// shes rig rang sems snying po ste// glo bur ma yin ye gnas pas// shes rig dus gsum mi 'gyur phyir// chad pa'i 'khrul pa log pa'i rtags// rang byung ngo bo nyid kyi sku// dngos po yul las 'das pa de// shes rig rang sems snying po ste// kha dog dbyibs med gnyug mar rtogs// rtag par 'dzin pa'i 'khrul log rtags// de yang 'khor gyi snying po nyon// 'jig rten 'khrul pa de dag dang// ma rig dbang gi log lta ba// nam langs mun pa med pa bzhin// de nyid rtogs pas 'khrul pa sangs// rdzogs pa chen po lta ba'i yang snying/nam mkha' klong yangs kyi rgyud las/ 'khor bar 'khrul pa log pa'i rtags bstan pa'i le'u ste so drug pa'o//// de nas 'dus pa'i 'khor rnams la// kun rig rgyal pos bka' stsal pa// myang 'das 'khrul pa log pa dang// yul sems tha dad mi 'dod cing// ye nas gnyug ma'i gzhi shes pas// 'gro don snying rje mi 'bral na// nyan thos 'khrul pa log pa'i rtags// snang ba sems su mi sdud cing// don dam skad cig mi 'dod pas// 'phel 'grib med pa'i don rtogs na// sems tsam 'khrul pa log pa'i rtags// bden pa gnyis su mi rtog cing// yang dag stong par mi 'dod pas// rang byung ye shes 'gyur med de// dbu ma'i 'khrul pa log pa'i rtags// yul med sems su mi 'dod cing// sngags dang yig 'bru lhar mi skyed// re dogs dngos grub mi 'tshol bas// kri yog 'khrul pa log pa'i rtags// bden pa dbyer med mi 'dod cing// ting 'dzin rim gyis mi bsgom pas// rtsol ba med pa'i don rtogs pas// ma hAr 'khrul pa log pa'i rtags// mkha' klong rol par mi 'dod cing// snying po dran tsam lhar mi bsgom// ngang 'jog mi dgos don rtogs pas// a nur 'khrul pa log pa'i rtags// de rtags brgyad ldan skyes bu ni// mi yi lus la sangs rgyas sras// rig 'dzin gdung 'tshob sprul pa'i sku// de yi yon tan brjod mi langs// rdzogs pa chen po lta ba'i yang snying/ nam mkha' klong yangs kyi rgyud las/ theg pa 'og ma pa'i 'khrul pa log pa'i rtags bstan pa'i le'u ste so bdun pa'o//// de nas 'dus pa'i 'khor rnams la/ kun rig ston pas bka' stsal pa// phyi nang ma bcos mya ngan 'das// myang 'das don ni chos kyi sku// chos kyi dbyings na chos sku'i 'od// snying po 'bras bu ye shes sku// snying po kun la khyab cing 'dus// thugs kyi nying khu yin pa'i phyir// thig le 'gyur ba med pa'i phyir// kun bzang rdo rje'i byin gyis brlabs// tshig tu ma bkod thugs la brgyud// don gyi gting phyin bstan pa'i phyir// tshig nyung don la rdzogs pa yis// thig le la shan dbye ba ni// mtshan nyid btags pa'i thig le dang// gsang sngags gzhi yi thig le dang// rdzogs chen spyi yi thig le dang// yang ti thig le nyag gcig dang// re re la'ang bzhi bzhi ste// ngo bo dpe dang gtan tshigs kyis// 'gro sa la shan dbye ba yang// rtsal gyi sgo nas gsum bstan pa// snang ba chos kyi dbyings las rdzogs// de yang 'dus pa'i snying po nyon// btags pa ming gi thig le ni// mtshan nyid theg pa rnam gsum stai// ngo bo rnam shes tshogs brgyad la// dpe ni dmus long g.yu rdo 'dra// gtan tshigs nges pa gang yin pa// thig ni tshogs brgyad sems su gcig/ le ni khams gsum yongs la khyab// 'gro sa srid pa'i yang rtse yin// gol sa skye mched mu bzhi lags// gzhi yi thig le bstan pa ni// gsang sngags phyi rgyud rnam pa gsum// ngo bo kun gzhi'i rnam shes la// dpe ni sa dang chu 'dres 'dra// gtan tshigs nges pa gang yin pa// thig ni kun gzhi sems kyi gzhi// le ni 'gro drug yongs la khyab// 'gro sa 'das dang ma 'das pa// don gyi thig le bstan pa ni// rdzogs chen a ti spyi yi gzhung// ngo bo kun gzhi lung ma bstan// dpe ni zho dang 'o ma 'dra// gtan tshigs nges pa gang yin pa// thig ni kun gzhi gnyug ma la// le ni thams cad sems su snang// 'gro sa gar 'gro nges pa med// de yang 'dus pa'i snying po nyon// de ltar thig le bzhi bstan pa// theg pa kun gyi sgo bstan phyir// shan gyi sgo nas bstan pa yin// don la dbyer med ngo bor gcig/rdzogs pa chen po lta ba'i yang snying/ nam mkha' klong yangs kyi rgyud las/ thig le shan dbye ba'i le'u ste so brgyad pa'o//// de nas 'dus pa'i 'khor rnams la// kun rig sems kyi rgyal po yis// la bzla pa yi thig le gsungs// nang ni rig pa chos sku la// sgra mthun don dpag gtan tshigs kyis// don gyi ngo bo gnyis su 'dus// la bzla gcig gis ngang du rdzogs// de yang rdo rje sems dpa' nyon// rtag pa'i thig le la bzla na// ngo bo snang la rang bzhin med// dpe ni nyi ma'i 'od brdal la// gtan tshigs nges pa gang yin pa// thig ni dngos po yul dang bral// le ni thams cad rgyal ba'i zhing// 'gro sa thig le phyi ma'i rtsal// gzhi yi thig le la bzla na// ngo bo rang gi mthu dang bral// dpe ni dug nyid sman gyi ngang// gtan tshigs nges pa gang yin pa// thig ni thams cad mkhyen pa'i rgyu// le ni 'gro drug yongs la khyab// ye shes kun gyi rtsal du 'gro// spyi yi rdzogs chen la bzla na// ngo bo sku gsung thugs kyi rgyu// dper na nor bu rin chen 'dra// gtan tshigs nges pa gang yin pa// thig ni ma nor drang po'i lam// le ni brdal ba chen po'i ngang// 'gro sa thig le phyi ma'i rtsal// yang ti rdzogs chen la bzla na// 'khor 'das ma rig rang byung zhing// ngo bo thig le nyag gcig nyid// dpe ni nyi ma'i snying po 'dra// gtan tshigs nges pa gang yin pa// thig ni bag chags skyon dang bral// le ni nyon mongs rnam par dag/ 'gro sa kun bzang sangs rgyas nyid// de yang 'dus pa'i snying po nyon// phyi nang med par thig le la// 'khor 'das med par nyag gcig ma// snang stong med par phra la zab// thams cad thig ler sangs rgyas pas// steng 'og mtha' dbus med pa dang// phyi nang 'khor 'das med pa kun// thams cad thig le chen po las// gzhan gyi chos ni rdul tsam med// de yang 'dus pa'i snying po nyon// nga yi sku gsung thugs la tshang// ye sangs rgyas pa'i rang bzhin las// yon tan nam mkha'i mtha' las 'das// gzhan yang chos kyi dbyings kyi klong// rdzogs ni lhag ma med par rdzogs// 'khor ni dus gsum rgyal bar ldan// thams cad kun tu bzang po'i sa// skad cig rtogs pas mngon sangs rgyas// rtogs thabs bzhi ni bstan par zad// de las mang du 'byed pa ni// thig le ma yin 'chal tshig yin// rdzogs pa chen po lta ba'i yang snying/ nam mkha' klong yangs kyi rgyud las/ thig le nyag gcig la la bzla ba'i le'u ste so dgu pa'o//// de nas kun rig rgyal po yis// 'dus pa'i 'khor la bka' stsal pa// zung lnga ya bcu bdud gyi gegs// rim par bshad kyi yid kyis nyon// 'khor 'das gnyis kyi gzhir gyur pas// rtag chad ma yin chos skur nges// snang ba nges med yin pa'i phyir// yul dang gol sa bcad pa gces// de yang 'dus pa'i snying po nyon// rang sems yul dang yul nyid sems// gnyis ka ma yin gnyis med min// tha dad ma yin mi bsdu bar// zhen med rang sar grol ba'i phyir// snang ba ma bcos chos kyi dbyings// rtogs dang ma rtogs khyad par gyis// sangs rgyas sems can rnam pa gnyis// so sor ma yin gcig pa ste// gnas skabs 'bral med mthar thug yod// las dang thugs rje tha dad phyir// gdams ngag med la phan mi nus// da yang 'khor gyi snying po nyon// 'khor 'das 'byung ba rtog pa yin// log rtogs ye shes tha dad kyang// ngo bo nyid kyi gzhi la med// snang lugs zhen ngor ci yang 'char// rnal 'byor nyams su blang thabs kyis// bsgom du yod med gnyis ka 'gal// yod par sgro btags rtag par 'gyur// med par skur btab chad par 'gyur// de phyir nges don snying po ni// ma bsgoms 'bral med dgongs pa gces// zung lnga ya bcu de la bya// da yang 'dus pa'i snying po nyon// ma nor nges pa'i lung chen ni// sangs rgyas sems can gnyis kyi gzhi// ngo bo nyid kyi kun bzang gis// tshig med don gyi rtogs shar bas// don nyid tshig tu 'byung ba'i phyir// nges pa yi ni lung du bshad// kun bzang nga yi byin rlabs kyis// thugs nas snyan du gsung brgyud pa// tshig med don chen rtogs pa'i phyir// tshig la brten nas don go bas// bla ma slob dpon khyad par che// da yang 'dus pa'i snying po nyon// nyams myong yod med gnyis ka skyon// gang yang mi 'gal gdams ngag gi// don gsal yul la ma yengs pa// nyams myong dam par nga yi bshad// rnam rtog tha mal glo bur pa// bcos na thul ba'i zhi gnas yin// ma bcos bka' la dgos med phyir// bcos med dran pa chos skur gsal// mdo rgyud nges don gang yang rung// drang ba'i don la khyad che yang// gzhi rtogs byed pa'i thabs la 'dra// nges pa'i don la khyad par med// de yang 'khor gyi snying po nyon// nges don chos skur nga nyid la// yod med 'gal ba med na yang// yod kyang ma rtogs sems can la// lung ldan rkyen gyi gdams ngag ston// de phyir mthar thug 'brel pa yod// gzhi nyid 'khrul lugs blos bcos pas// ma rig 'khrul ngor bden 'dzin kyang// yar ldan mar 'khrul gzhi la med// de phyir 'khrul med don 'di gces// bdud kyi gegs ni de la bya// da yang rdo rje sems dpa' nyon// de dag 'gal bgegs rnam mang yang// blo yis byas pa thams cad min// ngo bo nyid sku ngos zin na// the tshom thams cad shugs la chod// rdzogs pa chen po lta ba'i yang snying/ nam mkha' klong yangs kyi rgyud las/the tshom gyi gegs bsal ba'i le'u ste bzhi bcu pa'o//// de nas 'dus pa'i rgyal po la// 'dus pa'i 'khor gyi 'di skad gsol// thig le gcig tu 'dus pa yis// phyi nang chos rnams ji ltar rdzogs// gol sa sgrib pa ji ltar med// nyams rtogs don ldan ji ltar 'byung// mnyam pa'i rgyal pos bshad du gsol// de skad zhus pa'i don gsan nas// 'dus pa'i 'khor la bka' stsal pa// thig le gcig du rdzogs pa yi// rang sems snying po byang chub des// snying rje bya med don zin pas// sems bskyed gong 'og de la rdzogs// dad pa sngon du dran byas pas// mi dmigs don la ma bltas kyang// bying rgod gnyis kyi rkyen bral bas// zhi gnas bsam gtan de la rdzogs// phyi nang chos rnams thams cad kun// so sor rtog pa'i ye shes kyis// sgyu ma lta bur rab shes pas// rang bzhin med pa'i lhag mthong rdzogs// 'jig rten gol bar don rtogs pas// ser sna 'dzin pa'i don med phyir// re ba med pa'i bsam pa yis// sbyin pa'i pha rol phyin pa rdzogs// ma nor khrims las mi 'da'i phyir// lus ngag yid kyi las rnams kun// mi dge nyes byas mi 'byung bas// tshul khrims pha rol phyin pa rdzogs// zab la rgya che'i lta ba yis// yin dang min pa'i chos rnams kun// chos kyi dbyings su kun shong bas// bzod pa'i pha rol phyin pa rdzogs// ngo bo nyid las 'bral med phyir// ched du mi bsgom da lta nyid// lta ba'i don la yengs med pas// brtson 'grus pha rol phyin pa rdzogs// gzhi gsum dus gsum 'bral med pas// ye shes kun tu rgyun mi chad// snying po'i don las ma g.yos pas// bsam gtan pha rol phyin pa rdzogs// dang po 'khor ba rtsad gcod pa// ye shes rig pa'i ngos zin phyir// yid ches gdeng gis thag chod pas// shes rab pha rol phyin pa rdzogs// da yang 'dus pa'i snying po nyon// de phyir yul gyi rnam pa la// spong sdud zhen pa med pa'i phyir// snang ba gang yang mi 'gog pas// thabs kyi pha rol phyin pa rdzogs// tshe rabs sngon nas sbyangs pa'i phyir// mi gnas bla med don rtogs pas// da lta'i nyid du rang yid ches// smon lam pha rol phyin pa rdzogs// rang sems snying po rtogs pa'i phyir// ma rig sgrib pa zil gnon par// lus ngag rtsol ba mi dgos pas// stobs kyi pha rol phyin pa rdzogs// 'khor 'das gnyis med gong rol du// skye shi med par thag chod de// byang chub sems la 'gyur med pas// ye shes pha rol phyin pa rdzogs// lta ba rtogs pa'i rnal 'byor pas// lus ngag don las ma nyams pas// phyi nang spyod pa'i don zin phyir// tshogs chen ma lus de la rdzogs// rdzogs pa chen po lta ba'i yang snying/ nam mkha' klong yangs kyi rgyud las/pha rol tu phyin pa'i chos rnams rdzogs par bstan pa'i le'u ste zhe gcig pa'o//// de nas 'dus pa'i tshogs rnams la// kun rig rgyal pos yang gsungs pa// las can rnal 'byor don ldan gyis// ye dbang snying po sems nyid don// chos nyid rig pa'i dbang thob pas// phyi nang dbang rnams de la rdzogs// lta ba nges pa'i gdeng zin pas// mi rtog ye shes gegs bsal bas// rnam par rtog pa'i bgegs med phyir// phyi nang mtshams bcad de la rdzogs// ye nas ngo bo nyid sku las// bsgrub tu med pa'i chos nyid la// ma rig rnam rtog sgrib pa med// don gyi bshags pa de la rdzogs// sangs rgyas sems can gnyis med phyir// yul dang dbang po mi 'byed pa// gnyis med don gyi klong khyab pas// byin chen dbab pa de la rdzogs// rang byung ye shes kun khyab phyir// dug lngar rang grol don rtogs pas// nyon mongs bdud rtsi chen po la// ye shes byin rlabs de la rdzogs// dbang po yul gyi rnam pa la// dngos po 'byung ba'i rtsa ba de// sa chu me rlung kun khyab pas// dbang chen rim pa de la rdzogs// gdan dang yig 'bru la sogs pa// rang gi sems kyi cho 'phrul te// phyogs bcur rang bzhin lhun grub pas// zhal yas khang chen de la rdzogs// 'khor 'das bzang ngan mi 'byed par// rig tshor don gyi lha yin pas// ma btsal lhun gyis grub pa las// ye shes lha rnams de la rdzogs// ngo bo nyid kyi snying po la// sangs rgyas sems can rgyu gcig pas// ched du byar med rang rig phyir// spyan drangs bstim pa de la rdzogs// gzhi la snang ba med pa'i phyir// rang gi dran rtog cir snang yang// skye med chos las mi 'da' bas// zil gyi gnon pa de la rdzogs// thams cad 'dres pa chen po la// rnam par grol ba mtshon pa'i phyir// rig pa'i don 'di gsal thebs pas// nan tan phyag rgya de la rdzogs// lus ngag las kyi rnam pa la// drang ba'i don gyis zin pa'i phyir// bsgul bskyod thams cad ye shes la// phyag rgya'i mchod pa de la rdzogs// ye shes snying po byang chub la// blo dang dngos po gcig pa'i phyir// sems dang chos sku'i don 'byor pas// sbyor sgrol mchod pa de la rdzogs// ye nas gnas pa'i don go bas// skye shi med par thag bcad phyir// yon tan thams cad lhun grub pas// mthar phyin smon lam de la rdzogs// sangs rgyas che ba'i yon tan rnams// da lta nyid du rtogs pa'i phyir// sku gsung thugs kyi don tshang bas// bzlas brjod 'phro 'du de la rdzogs// dga' ldan lha dang 'byor ldan tshogs// nges pa'i lta bas gdeng zin pas// snod bcud ye nas tshogs yin phyir// tshogs kyi mchod pa de la rdzogs// gtso 'khor bzang ngan mi 'byed pas// phud dang lhag ma ngo bo gcig/ bde chen gnyis med rang sems la// lhag ma'i mchod pa de la rdzogs// bya ba med pa'i ting 'dzin gyis// mi bzung ye shes chen po la// rang gi rig pa gsal thebs pas// gtor ma'i mchod pa de la rdzogs// 'khor ba mya ngan 'das pa'i chos// thig le gcig tu 'dus pa'i phyir// ci spyod rang gi lus ngag la// dkyil 'khor bsdu ba de la rdzogs// de rtogs rnal 'byor chen po la// ye shes chen po rdzong gi lus// ye shes lhun grub go ldan pas// bka' nan lus bsrung de la rdzogs// ye nas sangs rgyas yin pa'i don// rang gi sems kyis shes pa'i phyir// gnyis med don du sangs rgyas pas// dge ba bsngo ba de la rdzogs// chos kyi sku la mnga' brnyes pas// yon tan thams cad rang las sprul// gzhan don bya ba smos ci dgos// ye nas lhun grub de la rdzogs// rdzogs pa chen po lta ba'i yang snying/nam mkha' klong yangs kyi rgyud las/ phrin las mdzad spyod rdzogs pa'i le'u ste zhe gnyis pa'o//// de nas 'dus pa'i 'khor rnams la// kun rig rgyal pos bka' stsal pa// 'khor 'das ma rig rdzogs chen la// gol sgrib med par bstan pa yang// bcu gnyis dgu yis don bstan pa// yid la ma brgyus gol sa med// de yang rdo rje sems dpa' nyon// phyi rol yul gyi tha snyad la// dam par zhen pa'i rtog pa yis// byung tshor rjes su ma 'brangs pas// 'jig rten phal pa'i sar mi gol// rang gi sems kyi snying po 'di// dran rtog blo yi rnam pa yis// yod med yul du ma bsgoms pas// rtag chad mthar ni de mi gol// lung rig man ngag la brten nas// thos bsam lta bas yid ches pas// shes rab bzang mo'i don zin pas// lung du ma bstan der mi gol// mi dmigs pa la blo gtod cing// bying rgod rnam gnyis bsal ba yis// zhi gnas ro la ma zhen pas// sems 'dzin bsam gtan sar mi gol// phyi rol yul gyi snang ba la// rang gi sems dang ma 'brel phyir// sgo lnga'i rnam shes mi dgag pas// 'du shes med par de mi gol// rang byung rang snang 'di nyid la// sems kyi rtsol ba'i gnyen po yis// rnam rtog ma spangs rang zhi bas// nyan thos 'gog par de mi gol// phyi rol rten 'brel bcu gnyis la// brten nas sems kyi rgyu ba yis// rtog dgag stong par mi bsgom pas// rang rgyal sems su de mi gol// yul med sems su blos bsdus pas// don dam rang gi shes pa'i don// rang rig skad cig mi bsgom pas// sems tsam lta bar de mi gol// yul 'di kun rdzob blos byas te// gtan tshigs dag gis gzhig byas nas// mtshan ma stong par mi bsgom pas// dbu ma gnyis su de mi gol// re dogs las kyi rtsol ba yis// dge ba bcu yi snying po la// rgyu 'bras rkyen la mi ltos par// 'dus byas chos su de mi gol// rang sems snying po ngo bo nyid// rtog pa'i rkyen gyis mi 'gyur phyir// 'khor 'das gnyis la mi dpyod pas// las kyi dbang du de mi gol// spong sdud sems kyi rtog pa la// skyon yon gnyis su mi blta zhing// mi rtog dben pa'i yul med pas// phra ba'i lam du de mi gol// smon 'jug gnyis la mi brten cing// tshogs gsogs dam par mi lta bas// lam lnga rim gyis ma sbyangs phyir// sa bcu 'grod par de mi gol// rdzogs pa chen po lta ba'i yang snying/ nam mkha' klong yangs kyi rgyud las/ bsam gtan gyi gol sa med par bstan pa'i le'u ste zhe gsum pa'o//// de nas kun rig rgyal po des// 'dus pa'i 'khor la yang gsungs pa// chos nyid dag pa'i ngang las ni// rigs gsum dkyil 'khor lhar ma bskyed// dag gzhi'i ting 'dzin mi bsgom pas// kri ya'i theg par de mi gol// lta ba yo gar blta ba dang// spyod pa kri yar spyod pa dang// rnam gnyis 'dzin par mi bsgom pas// u pa yar ni de mi gol// chos nyid dbyings kyi ye shes kyi// cho 'phrul lha yi nga rgyal gyis// byang chub rnam lnga mi bsgoms pas// yo ga'i sems dpar de mi gol// phung po khams dang skye mched kyi// rtog tshogs dgra rnams mang po yis// rnam rtog lhar ni ma bsgyur bas// ma hA yo gar de mi gol// las kyi phyag rgya gzhir bzhag nas// rtsa dang thig le bde ba yi// thabs kyis 'dzin pa ma bsgoms pas// chags pa'i lam du de mi gol// kun gzhi dag pa'i mkha' klong du// bde chen gnyis med rig pa'i rtsal// 'du 'bral med 'jog yid med pas// a nu yo gar de mi gol// 'khor 'das gnyis kyi rnam pa la// yin dang min pa'i chos rnams kun// sems kyis mtshon du med rtogs pas// mtshan ma'i rkyen du de mi gol// rnal 'byor spyod pa rnam gsum gyis// zhum pa med pa'i sems nyid kyis// brtul zhugs phyi nang mi dgos pas// re dogs spyod par de mi gol// snang ba rang gi blos byas pa'i// yul sems bsre ba'i lta ba yi// gnyis med don la mi gtod pas// phyogs can lta bar de mi gol// rang sems snying po chos kyi sku// lta ba rtogs pa'i don nyid las// de las gzhan du mi rtsol bas// gol sgrib bya ba'i ming med do// rdzogs pa chen po lta ba'i yang snying/ nam mkha' klong yangs kyi rgyud las/ gsang sngags gol sa med par bstan pa'i le'u ste zhe bzhi pa'o//// de nas 'dus pa'i tshogs rnams la// kun rig rgyal pos bka' stsal pa// sgrib pa dag pa'i mtshan nyid ni// bla ma dam pa'i gdams ngag gis// ye shes chen por ngos 'dzin pas// skabs 'byed sgrib pa de la med// kun gzhi gzhi cha rang gsal la// snga phyir rjes su ma 'brengs pas// rang sems chos sku ngos zin pas// bslad pa'i sgrib pa de la med// kun brtags ma rig rkyen byas pas// 'khrul pa dag gi yul rnams ni// snga phyi glo bur dngos med pas// phyogs lhung sgrib pa de la med/ kun bzang nyid kyi bka' nyid las// bla ma'i gdams ngag ma chad cing// lta ba nges pa'i gdeng zin pas// tshogs kyi sgrib pa de la med// zhi rgyas dbang dang drag po dang// sa ma ti yi dgongs pa yis// bla na med pa'i don rtogs pas// las bzhi'i sgrib pa de la med// 'khor 'das ma rig ngos zin pas// ma bsgoms don dang mi 'bral phyir// ma chags mi g.yo stobs ldan pas// mchod pa'i sgrib pa de la med// rang rig rtogs pa'i nyams dang ni// sangs rgyas bka' dang mthun pa'i phyir// nges pa'i don la yid ches pas// the tshom sgrib pa de la med// de la sogs pa'i gol sgrib rnams// brgya dang brgyad cu grangs mang yang// spong sdud zhen pa gsum du 'dus// de las gzhan pa'i gol sgrib med// rdzogs pa chen po lta ba'i yang snying/ nam mkha' klong yangs kyi rgyud las/ ma rig rtsol ba'i sgrib pa med par bstan pa'i le'u ste zhe lnga pa'o//// de nas 'dus pa'i tshogs rnams la// kun rig rgyal pos yang gsungs pa// yang dag sems kyi nying khu'i don// ye nas chos sku 'bral med phyir// nyams kyi rim pa lnga gsungs pa// dang po mkha' la nyi shar bzhin// ma rig sgrib pa med rtogs pas// rang rig chos skur yid ches don// tshig mthas ma reg rang gsal nyams// gser 'gyur rtsi yis thebs pa bzhin// rtogs dang mi rtogs thams cad du// lta ba sems kyi sems nyid gsal// rang rgyud zil gyis gnon pa'i nyams// skyes bu bya ba btang ba bzhin// snang ba'i gzugs sogs gang la yang// brtag dpyad ma byas sgo lnga gsal// snang ba chos nyid gdeng ldan nyams// 'byung ba nam mkha' mi 'gyur ltar// yul gyi bde sdug sgra skad kyis// gnod med chos sku mi 'gyur phyir// yengs pa rang sar grol ba'i nyams// rin chen gling du phyin pa bzhin// dus dang rnam pa thams cad du// ci dran lhag mthong rig par 'gyur// 'byung 'jug med phyir 'bral med nyams// de dag lnga ldan sangs rgyas nyid// de yang rdo rje sems dpa' nyon// sprin las char rgyun 'bab pa bzhin// rang rgyud zhen med chags pa chung// gcig pur dga' la 'du 'dzi spong// g.yo ba las su rung ba'i rtags// 'bab chu dal drag snyoms pa bzhin// ngang ngam shugs kyis ye shes gsal// 'khor ba'i chos la shin tu skyo// goms pa'i rtags chen yin par bshad// rgya mtsho'i gting ni mi g.yo ltar// 'khor 'das dngos po cir ma mthong// de phyir nyon mongs yul med pas// brtan pa thob pa'i rtags su bstan// drang srong bzod ldan dpe bzhin du// lus kyis bzod pa thob pa dang// gnyid kyi rtog pa choms pa'i phyir// phyi nang dbugs kyi cha snyoms pas// 'jig rten chos brgyad bral ba rnams// bar dor mngon sangs rgya ba'i rtags// rdzogs pa chen po lta ba'i yang snying/ nam mkha' klong yangs kyi rgyud las/nyams dang rtags bstan pa'i le'u ste zhe drug pa'o//// de nas rdo rje sems dpa' yis// 'dus pa'i tshogs kyi don gyi phyir// yid la dran pas 'di skad gsol// 'bras bu yon tan gdul bya yi// lta ba'i dam tshig nyams pa gang gis bskang// rtsa ba gcig pa'i bden pa gang// snang med rig pa'i rtogs dus nam// rtogs pa'i mdzad spyod ji ltar spyod// kun rig rgyal pos lung bstan gsol// de skad zhus pa'i don gsan nas// 'dus pa'i 'khor la bka' stsal pa// lta ba nyams pa skong thabs ni// nyes 'gyod yid la byas nas su// bla ma mkhas pa don ldan la// dbang rnams rim par nos nas ni// rang sems dpang btsug don zhus nas// rgyun du mi gtong gus pa'i chos// lta bas sems rtogs ma brjed pas// rgyun du mi 'bral sgom pa'i mchog/ rtags ni shin tu gsal ba'i nyams// brtson 'grus ma yengs gus pa'i thabs// shes rab go ba dad pa'i thabs// rang sems gdeng ni 'gyur ba med// yul ni ma 'gags chos kyi dbyings// spyod pa ma 'gags khong khrel med// g.yo sgyu med pa'i dam tshig gis// brtse gdung chos byed mi 'gyod pa// rig pa so thub dgon pa'i mchog/ bag chags rjes med shes rab ste// rgyun du gsal 'debs chos spyod yin// the tshom mi za bskangs pa'i tshad// des bskang gdeng chen ngas bshad nyon// rang bzhin dag pa'i ngo bo la// ming gi tha snyad 'dzin med pas// yul la mi zhen rang sar grol// bsam gtan btsal med nyams kyi gdeng// phan gnod byed pa gang 'phrad kyang// byams sdang gnyis ni skyes pa'i tshe// mnyam nyid rig pas gsal thebs na// blo dngos gnyis med nyams kyi gdeng// kun bzang gshin rje gang 'ongs kyang// gzhi la med cing 'khrul par rtogs// gnyis ka spang len med rtogs na// lta ba gdeng ldan nyams kyi gdeng// theg pa'i bye brag ci gsungs kyang// bzang ngan sgro skur med rtogs na// yid ches don la blo gnas pas// chos la bzod pa thob pa'i gdeng// lus kyi bde sdug ci byung yang// skyon yon med pa'i don dran na// snga phyi ma bslangs don ldan pas// chos nyid rang gsal nyams kyi gdeng// gnod par byed pa nad dang bgegs// rtog pas btags pa yin shes nas// mi gtong don ldan rnal 'byor pas// dngos grub btsal med nyams kyi gdeng// sems la skye shi med pa'i phyir// 'jig rten gnas ni gar 'dug kyang// skye 'gag med pa'i don la gnas// 'bral med dgongs pa nyams kyi gdeng// rtags chen gdeng ldan rnal 'byor pas// ci spyad sangs rgyas ye shes thugs// mi lus rin chen 'di nyid la// lha mis phyag 'tshal mchod par 'gyur// rdzogs pa chen po lta ba'i yang snying/ nam mkha' klong yangs kyi rgyud las/ lta ba nyams pa bskangs pa'i tshad bstan pa'i le'u ste zhe bdun pa'o//// de nas 'dus pa'i 'khor rnams la// bcom ldan 'das kyi bka' stsal pa// 'khor 'das 'byung ba'i rtsa ba ni// pha ma med pa'i bu bzhi yod// de yang gdod nas gcig las gnyis// gsum la 'brail yod gcig la med// bden mthong snang med rtogs dus yin// de yang 'dus pa'i 'khor rnams nyon// gcig ni nam mkha'i mthongs su tshar// ming ni 'byung ba rnam pa lnga// snang srid kun gyi mes por snang// phyi nang snod bcud de las bskyed// gcig ni chos kyi dbyings su tshar// ming ni chos sku kun tu bzang// sangs rgyas kun gyi mes por grags// theg pa'i chos rnams de las byung// gcig ni ma rig mun par tshar// ming ni 'gro drug sems can te// chags sdang lnga la longs spyod pas// 'khor ba'i sdug bsngal de la smin// gcig ni 'khor 'das gong du tshar// ming ni ngo bo nyid kyi sku// 'khor 'das rabs chad yang mes po// de rtogs gdod nas skye shi med// da yang rdo rje sems dpa' nyon// skal ldan rnams kyi rang rig pa// tshig tu mtshon par mi nus kyang// sems la rtogs pa yod pa'i phyir// don chen yi ge dam pa'i mchog/ lta ba rang sems ngo bo nyid// 'khor 'das gnyis las 'das pa'o// sgom du med pa yid las dran// rang sems snying po rtogs pa'i thabs// de phyir sems kyis sems rtogs nas// de yang dngos por cang ma mthong// rig pa ye shes chos nyid ni// dus gsum dag tu skye 'gag med// sngar ma mthong ba'i don mthong ba// blo la rgyus pa kho nar zad// de ltar rig pa'i don mthong na// mtshan mar mthong ba ci yang med// rin chen ngan khung stor gyur kyang// de yi yon tan mkha' la 'byung// de bzhin rang sems ngo bo nyid// mngal du rang sems bying 'gyur kyang// rang gsal ye shes rgyun mi 'chad// rdzogs pa chen po lta ba'i yang snying/nam mkha' klong yangs kyi rgyud las/ nges pa'i bden pa mthong bar bstan pa'i le'u ste zhe brgyad pa'o//// de nas 'dus pa'i tshogs rnams la// kun rig sems kyi rgyal po yis// snang med rig pa bka' stsal pa// bum pa'i nang gi mar me bzhin// lus kyi nang na chos sku gsal// nang nas sgo lnga'i 'od shar bas// snang ba grogs su 'ong ba snyam// de tshe tha mal lus 'di la// brten pa'i rnal 'byor las can kun// snang med rig pa rgyun mi 'chad// de nyid sangs rgyas de las 'byung// de sems ma bcos ngang gis gsal// gsal yang yul la zhen med grol// lus kyi nang na sangs rgyas gnas// de phyir lus la smad mi bya// dper na cang shes rta pho yis// yid kyis bsam sar lus kyis phyin// de bzhin gang dran chos skur gsal// sgrib pa nub pa bya ba med// de phyir ci spyod ye shes la// 'phel 'grib med par rang sems rtogs// de don rtogs pa'i mchog yin pas// sangs rgyas kun dang dgongs pa gcig/ de yang 'dus pa'i 'khor rnams nyon// dper na reg 'jam spu yis ni// gang reg 'jam zhing spus mi gos// de bzhin rnal 'byor yul phrad kyang// de la skyon gyis gos pa med// de phyir dus rnams kun tu ni// 'bral med ye shes thugs la gsal// de tshe rang nyid rtogs pa'i thabs// dus 'di nyid du rtogs par gsungs// de yang 'dus pa'i snying po nyon// dper na nam mkha' ldings chen ni// bdag gzhan kun la mdzes pa bzhin// rnal 'byor so thub bag zon can// gol sa med cing sgro skur spang// dper na chu gting rgya mtsho'i gser// bskal par bzhag kyang g.yas mi gos// de bzhin don rtogs rnal 'byor pas// 'khor bar gnas kyang gos pa med// de yang 'dus pa'i snying po nyon// dper na dbus kyi mchog rab ni// 'gyur ba med par brtan pa ste// de phyir rang byung ma bltas gsal// de phyir chos nyid mi 'gyur brtan// de la rtog pas mi gos te// da lta nyid du rtogs pa'i thabs// des na tshegs med don po che// bsam pa tsam gyis 'grub pa'i mchog/ de yang 'dus pa'i snying po nyon// rang sems rtogs pa'i 'bras bu la// bstun te cig car 'jug nus na// bsgom pa'i thun la ring thung med// nam 'grub snyam pa'i khar ma lus// mnyam pa'i don la ye gnas pas// 'bras bu rig pa da lta nyid// de nyid mi brjod don ldan pas// myang 'das zhes ni de la bya// rdzogs pa chen po lta ba'i yang snying/ nam mkha' klong yangs kyi rgyud las/snang med kyi rig pa'i rtogs dus bstan pa'i le'u ste zhe dgu pa'o//// de nas 'dus pa'i 'khor rnams la// kun rig rgyal pos bka' stsal pa// nga yi mdzad spyod chen po ni// sku med gzugs skur byung bas ni// thams cad zil gyis gnon par byed// tshig med rig pa'i gsung gis ni// sangs rgyas bstan pa rgyas par sgrogs// rnam par rtog med ye shes thugs// cir yang sa le thams cad mkhyen// stong gsum 'jig rten thams cad ni// nga yi bzhugs gnas gzigs mo'i sa// de yang 'dus pa'i snying po nyon// spros kyang nga la bsdus kyang nga// nga yi sku gsung thugs las ni// 'khor ba bya ba gdod nas med// de yang rdo rje sems dpa' nyon// ye nas gnas pa'i gzhi nyid ni// chos kyi sku yi thugs su bstan// de nyid rtogs pa'i ye shes de// chos kyi sku yi longs spyod thugs// dran rtog don du shes pa de// chos kyi sku yi sprul pa'i thugs// don ldan gzugs kyi phung po 'di// longs spyod rdzogs pa'i chos kyi sku// dbang po ma 'gags gsal ba de// longs spyod rdzogs pa'i longs spyod sku// bsgul bskyod yan lag gang yang ni// longs spyod rdzogs pa'i sprul pa'i sku// don ldan tshig tu brjod pa de// sprul pa'i sku yi chos sku'i gsung// dngos med tshig tu gsal ba de// sprul pa'i sku yi longs spyod gsung// tshig la brten nas don go bas// sprul pa'i sku yi gsung yin phyir// da lta'i chos sku kha mig can// de yang 'dus pa'i snying po nyon// lus bral skad cig de nyid la// bar dor mngon sangs rgya ba nyid// mngal gyi sgrib bskyod yan lag gang yang ni// longs spyod rdzogs pa'i sprul pa'i sku// don ldan tshig tu brjod pa de// sprul pa'i sku yi chos sku'i gsung// dngos med tshig tu gsal ba de// sprul pa'i sku yi longs spyod gsung// tshig la brten nas don go bas// sprul pa'i sku yi gsung yin phyir// da lta'i chos sku kha mig can// de yang 'dus pa'i snying po nyon// lus bral skad cig de nyid la// bar dor mngon sangs rgya ba nyid// mngal gyi sgrib g.yogs med pa'i phyir/ kun tu bzang po gud na med// gzugs med rig pa'i ye shes de// dus gsum dag tu 'gyur med pas// rgyal ba sangs rgyas chos kyi sku// lus ni ye shes chen po'i lus// thugs ni ye shes thams cad mkhyen// gzhan don ci bsam 'grub pa yis// gzugs sku rnam gnyis shugs las 'byung// de yang rang rang 'khor rnams las// gang gis gang la ci rigs su// sems can bsam pa'i khyad par las// yid bzhin dbang po gang 'dod ston// rdzogs pa chen po lta ba'i yang snying/ nam mkha' klong yangs kyi rgyud las/ yon tan gyi gdul bya bstan pa'i le'u ste lnga bcu tham pa'o//// de nas 'dus pa'i 'khor rnams la// kun rig rgyal pos bka' stsal pa// sangs rgyas rnams dang rig 'dzin tshogs// mkha' 'gro chos skyong dad ldan rnams// nga yi byin gyis brlabs pa yis// rang rang rtogs pa 'dir smros shig/ de skad ces ni gsungs pa dang// rnam gzigs gtsug tor thams cad skyob// bsod skyob 'khor 'jig rin chen mang// sangs rgyas mar me mdzad rnams kyis// rang rang dgongs pa las langs nas// go rim bzhin du rtogs pa brjod// skye med rig pa 'di nyid la// 'gag med rig pa rang shar bas// gsal la rig pa byang chub rgyun// ma bsgoms gol med chos kyi sku// nges pa'i lung dang mthun pa yi// rtog pa'i ye shes ma 'gags gsal// brjed med rig pa 'di nyid la// ngos gzung med pas rang yid ches// ma btsal rig pa byang chub sku// kun gzhi gzhi cha de nyid las// rang gsal ngo bo bde chen klong// yid ches don la 'gyur ba med// gsal dran stong pa chen po la// bying rgod zhen 'dzin skyon bral bas// ngang du bzhag pas ci yang med// de tsam nyid na lta sgom gcig/snang ba med pa'i ye shes 'di// rgyu rkyen ma byas rang sems don// yin la rang sems chos skur gsal// ma rig rtog pa gdod nas sangs// shes pa rang lugs 'di nyid la// ci yang mi bsgom da lta nyid// 'du shes ma bzung don gsal ba// ye shes zang thal nyams med rtags// dngos med lta ba shes shing rig/ rig tsam nyid nas ngang gis stong// rig stong gsal ba mtha' dbus med// gang dran ngo bo ye shes thugs// ye shes sku ni yang ston cig/ log dad sel dang 'od srung dang// rin chen snying po dbang po zhi// pad+ma brtsegs dang gser thub dang// shAkya thub rnams go rim bzhin// rang rang rtogs pa 'di brjod pa// nam mkha' lta bur khyab pa yis// rang byung ye shes chos kyi sku// snang srid gsal la spong sdud med// rig pa gsal ba ye shes yin// phyi rol yul gyi snang ba yis// 'khor 'das mi rtog sa le ba// gnyen pos mi bsgom da lta nyid// rang byung de nyid chos sku yin// rang la gnas pa'i don rtogs pas// ma bsgoms rig pa 'di nyid la// nang gsal phyi la ma yengs pas// rkyen bzhis mi shigs rdo rje 'dra// dngos med sems kyi ye shes 'di// gsal la 'dzin pa rdul tsam med// 'dzin med rig pa 'di nyid la// de la ched du bsgom mi dgos// chos nyid gnas lugs zhes bya ba// skye bo rang sems yin rtogs na// gzhan du mi bsgom da lta'i sems// de nyid las ni bogs mi 'don// dang po'i ngo bo nyid kyi sku// de rtogs chos sku 'gyur med la// ma bcos rang gsal 'dzin med pas// de las gzhan pa bsgom du med// rgyun gyi gdams ngag don rnyed pas// tha mal lus dang bcas pa yis// rang sems snying po rtogs pa'i phyir// da lta'i chos sku kha mig can// lus kyi nang na ye shes bzhugs// da yang kun bzang nges par gson// mai tri mthu chen thob dang ni// thugs rje can dang 'jam pa'i dpal// dri ma med dang phyag na rdor// dga' ba'i dbang po rnams kyis ni// rang rang rtogs pa'i don brjod pa// da lta'i shes pa 'di nyid las// gzung 'dzin med pa'i byang chub sems// de la yid ches rig pa'i rgyun// lhun gyis grub ces de la bya// 'khrul pa'i rtog pa cir snang yang// don gyi dgag bsgrub ma zhugs na// zab cing cha phra rtogs don de// rgyal ba rnams kyi dgongs pa yin// snga phyi zhen pa'i yul rnams la// rtog pa ma zhugs yengs med don// bsgom du med par ye nas shes// de tsam nyid na rgyun mi 'chad// dus dang gnas skabs thams cad du// rang sems rnal du rig pa la// rgyun mi 'chad du ye shes gsal// de nyid don la 'gyur ba med// skye shi med par rang gi sems// de rtogs bsgom du rdul tsam med// de nyid rig pa byang chub sku// ma bsgoms 'bral med bde ba'i mchog/ brjod du med pa'i shes rab las// dmigs pa med pa'i ting 'dzin gsal// ma bsgoms ye shes da lta nyid// 'byung 'jug med pa rgyun du gnas// rang sems snying po 'di nyid ni// ci yang ma bcos rang rig gsal// de nyid rang rig byang chub sems// de la mi btsal don la bzhag/ dus gsum sangs rgyas de dag gis// rang rang rtogs pa brjod pa'i phyir// de don sangs rgyas thams cad kyi// dgongs pa gcig phyir ye shes mthun// rdzogs pa chen po lta ba'i yang snying/ nam mkha' klong yangs kyi rgyud las/ dus gsum sangs rgyas rnams kyi rtogs pa brjod pa'i le'u ste nga gcig pa'o//// de nas rig 'dzin sems dpa' ni// rdo rje snang ba ye shes spyan// ye shes dpal dang rdo rje dbyings// yon tan snying po dpal 'bar ba// skyon med grags dang dpal ldan bde// grub pa rtsal dang las kyi sems// go rim bzhin du rtogs brjod pa// thog ma'i ye shes 'di nyid ni// dmigs 'dzin med par ngang gis gsal// 'gag pa med la rig pa stong// de las mi 'da' sangs rgyas thugs// rin chen 'od kyis mun sel ltar// rang sems rtogs pa'i don 'di la// dran pa ma yin ma rig med// gang yang ma bsam 'gyur med don// spros bral gnyug ma'i sems 'di la// gol sa lta bar shes pa'i phyir// btsal du med de yul las 'das// bsgom du med phyir yengs pa med// 'dus ma byas pa'i ye shes ni// skye shi med pa rang gi sems// zhe sdang skyon gyis mi gos te// don ldan phyir na rang sar grol// da lta'i rang sems 'di nyid la// 'gag pa med pas rig pa stong// ci spyad don las mi 'da' bar// snying po'i don la 'gyur ba med// ji bzhin pa la ma skyes phyir// nga rgyal skye med ngo bo nyid// de phyir mi dmigs chos kyi sku// btsal bas mi 'gyur bde chen klong// dus gsum med de rang sems las// dngos med ye shes gsal ba'i phyir// gzung du med par zhe ma gcod// ci spyod chos nyid longs spyod rgyan// lnga phyi ma song don gsal don// pho mo chags pa ci spyad kyang// gol med ye shes rgyun mi chad// bde chen longs spyod chen por shar// re dogs med pa'i lta ba la// rtsol med pa yi ting 'dzin gsal// rang yid ches la khar mi thon// de nyid byang chub bde ba'i klong// nor bu chu dngas dpe bzhin du// snang srid gsal la zhen med do// dran pa tsam gyis ye shes gsal// de phyir nyams kyi dam pa yin// de yang 'dus pa'i snying po nyon// rgyal sras sprul pa dad ldan gyis// rang rang rtogs pa'i don brjod pa// zhal mthong sprul pa bdag gis ni// dus gsum rang sems 'gyur med de// mtha' dbus med par rig pa gsal// gang yang ma spangs gnas su dag/ de nyid rtogs pa chos kyi sku// dad ldan rnal 'byor bdag cag gis// chos sku rang chas don rtogs pas// nges pa'i lta ba'i gdeng ldan pas// rtsol zhing sgrub pa'i nad dang bral// re dogs med par lam du rtogs// de skad brjod cing gsal ba'i don// thugs kyi dgongs pa bka' stsal pa// legs so don ldan 'khor rnams nyon// shes rab blo yis khyad par 'phags// tshig tu mtshon pa sna tshogs kyang// don la dbyer med ngo bo gcig/ gcig la rtogs tshul kun gyi ngang// don la 'gyur ba rdul tsam med// rdzogs pa chen po lta ba'i yang snying/nam mkha' klong yangs kyi rgyud las/ 'khor gyis rtogs pa brjod pa'i le'u ste nga gnyis pa'o//// de nas dus gsum sangs rgyas dang// rig pa 'dus pa'i rgyal sras 'khor// dad ldan la sogs 'khor rnams kyis// rang sems rtogs pa mngon 'gyur nas// dga' ba'i sems kyis yid rangs te// kun tu bzang la 'di skad gsol// 'bras bu'i sangs rgyas da lta nyid// rang sems ma dang tug gis phrad// de phyir chos sku da lta nyid// sems dpa' rdo rje dge ba che// 'dren mdzad khyod la phyag 'tshal lo// de skad gsol pa'i don go nas// rdo rje sems dpas yang gsungs pa// sangs rgyas thugs kyis byin brlabs pas// dgongs pa ma lus bcud bsdus pa'i// man ngag tshegs med nying khu 'di// gal te phyi rabs rnal 'byor pas// don 'di 'chad cing ston srid na// dad pa rab ldan brtson 'grus che// dul zhing gus par bla ma 'khur// dam tshig gzhung ldan dbang rnams rdzogs// blo rno chags med bzod pa che// gtad pa dang len chud mi gsan// gdung ba'i sems dang mi 'bral zhing// phyi ma byang chub don du gnyer// dka' dgu bsdos nas zhus pa'i tshe// dus gsum sangs rgyas dpang btsug la// ging chen dam med shan par bsgo// rgyal chen bzhi ni mtshams par bcugs// gzhan la mi spel mna' bor te// chos kyi gter gyi 'byung gnas 'di// man ngag snying po tshang bar bstan// tshogs kyi mchod pa ci nus bya// de ltar mi nus snod ngan na// dper na don med g.yengs pa wa// gzhan la khro zhing gtum pa dom// rtag tu dran myos glang chen smyon// med pa za 'dod lce spyang kha// kha 'jam don 'khri reg 'jam spu// bslab pa mi nyan dud 'gro phyugs// byi la mnog chung 'tshang rdzogs la// snying sgor phyung yang mi bstan no// srog chad pa yi kha bzhin sdoms// de lta bu yi snod ngan la// man ngag zab mo ci bstan kyang// dad chung man ngag kun la spel// bla ma smod cing rang che 'byin// de lta bu yi mi ngan la// 'di spel tshe thung nad mang dang// yid du mi 'ong rkyen rnams 'byung// dam sri langs pa ma yin te// sangs rgya sa rnams kyi bka' chad 'byung// de phyir shin tu rgyud 'di sbos// chos skyong yod pa'i gtsug lag khang// lha 'dre yod pa'i brag dkyil du// smon lam btab nas sbas la bzhag/ rdzogs pa chen po lta ba'i yang snying/ nam mkha' klong yangs kyi rgyud las/ rgyud gtad pa'i le'u ste nga gsum pa'o//// rdzogs pa chen po lta ba'i yang snying rdzogs so//// rdzogs pa chen po lta ba'i yang snying/ sangs rgyas thams cad kyi dgongs pa nam mkha' klong yangs kyi rgyud ces bya ba/ gser gyi dril shing can 'di/ dang po ngo bo nyid kyi skus/rgyal ba kun tu bzang po la bshad/ des rdo rje sems dpa' la bshad/ des dga' rab rdo rje la bshad/ des bram ze bde mchog snying po/ des shrI sing ha la bshad/ des bi ma mi tra la bshad/ des myang ting 'dzin bzang po la bshad/des gter du sbas pa/ 'brom ye shes bla ma'i bu/ 'brom ye shes snying pos bton nas/ des myang shes rab mchog gi sras/ des shangs kyi ston pa lce chung ba ye shes rgyal mtshan la bshad/des bla ma gnyan chung la gnang ba'o//// rgya gar gyi mkhan po bi ma la mi tra dang bod kyi lots+tsha ba dran pa ye shes kyi bsgyur cing gtan la phab nas/ myang ting 'dzin bzang pos/ bram ze'i rgyud drug gdams pa dang bcas pa/ma hA san+ti ni yA mAr+tha sarba sa mu dA ya/ dz+nyA na ga ga na sa mA na tan+ta/ dr-iSh+ti b+hA ba na sarba gar+b+ha/ rat+na byU ha nA ma/ bod skad du/ rdzogs pa chen po nges don thams cad 'dus pa/ye shes nam mkha' dang mnyam pa'i rgyud/ lta bsgom thams cad kyi snying po/ rin po che rnam par bkod pa zhes bya ba/ bcom ldan 'das mnyam pa nyid kyi rgyal po rang byung rig pa'i ye shes/rtogs pa'i don dang ldan pa/ dpal gyi dpal gyur kun tu bzang po la phyag 'tshal lo// 'di skad gsungs pa'i dus gcig na/ kun rigs sems kyi rgyal po de// 'og min chos kyi dbyings gnas na// nges pa'i don la rab bzhugs te// rdo rje sems dpa' la sogs pa'i// 'khor rnams 'dus nas rab tu 'khod// de tshe rdo rje sems dpa' yis// 'dus pa'i tshogs la phan don du// kun rig chos kyi rgyal po la// rang gi rig pas 'di skad gsol// nges don gnas lugs snying po yi// de 'khor sprul pa gang gis bskul// sangs rgyas bka' rnams ji ltar bgros// ma rig mun pa gang gis sel// de don chos rnams ji ltar gsungs// de skad ces ni zhus ma thag/ khab len la ni lcags 'du bzhin// dad pas rang dbang med par ni// 'khor rnams 'dud cing bskor zhing bskor// de tshe 'dus pa rnam bzhi yang// rdo rje gsang ba rin chen snying// dri med grags pa las rab grub// rgyal ba'i dbang po bsod nams snying// zhi ba bde dang nyi ma'i 'od// nam mkha'i snying po 'bum gzigs dang// phyogs bcu'i sangs rgyas rnams kyang bzhugs// rig 'dzin sems dpa' chen po yang// blo gros gtso dang rnam dag snying// dam pa'i yon tan 'od rlabs can// shes rab bla ma rgyal mtshan 'dzin// rnam par grol ba ting 'dzin dbang// chos dbang dang ni spobs pa brtsegs// bdud 'joms dang ni seng ge'i sgra// rin chen mthong dang brtse ba can// dbang phyug gtso dang brtsegs dge dang/ mthong na dga' dang bde mos dang// gsung brtsegs la sogs 'khor rnams kun// rang rang gtso la bskor nas ni// mi brjed pa yi gzungs kyis 'khod// rgyal sras sprul pa'i 'khor rnams dang// tshangs pa brgya byin rgyal chen bzhi// thags bzang ris dang gang ba bzang// chos kyi rgyal po rta mgo can// zur phud lnga pa nor srung dang// mgrin bcu dang ni klu rgyal dang// de 'khor la sogs kun kyang gnas// mkha' 'gro sde lnga srin mo'i tshogs// ye shes mkha' 'gro rig pa 'dzin// rdo rje mkha' 'gro rigs kyi yum// rin chen mkha' 'gro 'dod dgu bsgyur// pad+ma mkha' 'gro bde chen rgyas// las kyi mkha' 'gro lus sgrib sbyangs// 'jig rten mkha' 'gro dam btags pa'i// 'khor gyi gtor zan pho mo kun// snying rje med par gsod la dga'// skyon mthong tsa na chad pa gcod// kun kyang srin po'i cha byad can// rngams pa'i nga ro 'jigs pa'i tshul// bstan pa bsrung phyir dus der 'dus// sprul sku snang ba'i 'khor rnams ni// dad ldan lha mi las can kun// mos shing dad pas 'dus pa yi// las dang thugs rje 'dzoms nas 'khod// de tshe zhus pa'i don gsan nas// kun rig chos kyi rgyal po yis// mnyam pa'i don la thugs zhugs nas// 'dus pa'i tshogs la bka' stsal pa// legs so dad ldan 'khor rnams kun// de don gsal bar ngas bshad kyi// yid ni gzhan du ma g.yengs par// nges par nyon la yid kyis zung// de skad ces ni gsungs ma thag/ 'khor rnams dga' mgu yi rang te// dad pas rtse gcig yid bsdus nas// gus pa'i rig pas chos nyan to// de tshe 'khor gyi don ched du// mnyam pa'i don las rab bzhengs te// ye shes chos sku'i dgongs pa yis// kun rig ston pas bka' stsal pa// nges don gnas lugs snying po de// 'khor 'das 'byung bas ma rig phyir// ma skyes ma bcos rgyus ma mdzad// de nyid ma yengs rig par shes// de la 'gro dang 'ong ba med// de phyir rang byung ngo bo'i sku// da yang rdo rje sems dpa' nyon// de 'khor sprul pa bskul ba ni// sems dag lha dbang rig 'dzin des// rmi lam rnam gsum brda shes pas// mngon dga' phug nas 'di skad bskul// dus gsum sangs rgyas ma lus kun// gsung gi mnga' bdag khyed yin pas// rtsol bcas theg pa mthar bton nas// rtsol med theg pa mi gsung nas// thugs rje chen po yal lam ci// skal ldan 'dul bya ma mchis sam// lhun grub theg pa bshad du gsol// de skad ces ni gsungs pa dang// dus gsum sangs rgyas kun bsdus te// don gyi 'gro ba mdzad pa'i phyir// bka' yi mdo 'di ma bkrol na// kun bzang thugs kyi nges pa'i don// rdo rje sems dpa' khyod yin pas// tshig gcig don kun rtogs pa'i chos// btsal med don dang 'phrad par zhus// de skad bskul ba'i don de ni// rdo rje sems dpa' yis rig nas// ngo bo nyid kyi kun bzang la// nges pa'i yid kyis 'di skad zhus// chos nyid gnas lugs ji lta ba// sems nyid blo yis rtogs pa'i don// nges don kun tu bzang po yis// dus 'dir bdag la bshad du gsol// de skad ces ni bskul ba dang// kun bzang thugs kyis gsan nas ni// ting 'dzin rig pa'i gsung gis ni// dad ldan 'khor la bka' stsal pa// yang dag nges don rgyud chen 'di// snod ldan rnams la ngas bshad de// rdzogs chen skye med don zab kyang// ma rtogs pa la sdig mor che// de skad ces ni gsungs ma thag/'khor rnams dad pas 'dus pa rnams// snod dang ldan par dam bcas nas// sems kyi 'dung ba 'di skad bton// 'khor ba'i g.yang sar ltung ba la// thugs rje chen pos mi 'dzin nas// re dogs 'dzin pa'i rgyar chud na// rnam rtog dra ba mi gcod dam// sems can las la thugs chad na// 'gro don snying rje mi mdzad dam// ma rig mun pa'i smag rum du// dmus long bzhin du rang sems 'thib// ye shes nyi ma mi 'char ram// zhe sdang me chen 'bar ba la// las kyis rlung dmar chen pos bus// chos nyid rlan gyis mi 'jil lam// 'dod chags chu ltar 'brub nas kyang// bse rtsi lta bur zhen pa la// ye shes me yis mi bsreg gam// don stor lus kyi nang du stor// lam stor bdag la sa mkhan mdzod// de skad gdung bas bskul ba dang// kun bzang ston pa'i thugs rje yis// snod dang ldan par thugs gzigs nas// 'dus pa'i 'khor la bka' yis gnang// 'dus pa'i don du bka' bgros te// dang po rtogs thabs chos drug gi// sangs rgyas kun tu bzang po byung// de phyir rang byung snying po la// nga yis nga nyid 'grol ba las// gzhan gyis bka' 'di 'grol du med// rdo rje sems dpa' khyod nyon cig/ nges don tshig gi don 'grol na// kun bzang nga yi byin rlabs kyis// sku gsung thugs kyi byin rlabs las// sprul pa rnam gsum byung nas ni// nges dang ldem dgongs drang don du// 'khor gyi blo yi khyad par las// ci rigs pa ni bshad par bgro// da yang 'dus pa'i snying po nyon// ma rig mun pa sel ba ni// gzhan gyis sel bar nus min phyir// nges don bka' yi sgron ma 'di// ma rig mun sel nyi zla che// ma rig mun pa rtsad nas 'joms// 'khor 'das 'byung ba'i rtsa ba ni// ye shes ma rig yin pa'i phyir// thog ma'i byung tshul sus shes pa// ma rig mun pa sel ba'i mchog/ da yang rdo rje sems dpa' nyon// ma rig mun sel nyi zla che// 'char nub yod phyir nyi zla che// de bzhin theg brgyad chos kun spang// gzhi nyid ma shes 'joms mi nus// yang ti theg chen snying po 'di// nges shes don ldan lung rtogs na// ma rig mun pa sel zhes bya// rin chen 'od la 'char nub med// gzhi yi ye shes ngos zin na// chos sku'i don dang bral ba med// de phyir ma rig mun pa brlag/ ma rig rnam gsum 'joms pa'i phyir// lung ldan ston pa'i bka' 'di bgros// de phyir nges don rgyud 'di la// shes rab rnam gsum mtha' ru gtug/ da yang 'dus pa'i snying po nyon// don dang mthun pa'i gzhi shes phyir// ma rig sangs pas ye shes rgyas// de phyir rtogs dang sangs rgyas pa// lus dang ma bral dus 'dir byung// ma rig mun sel ye shes sku// chos rnams kun gyi rtsa ba ste// sangs rgyas dgongs pa da lta nyid// phyi ma ma yin dus 'dir yin// de phyir mun sel rig pa 'di// chos rnams kun gyi snying po la// rang byung ye shes sus shes pa// ma rig med pas chos skur shar// da yang rdo rje sems dpa' nyon// de don chos rnams gsungs pa ni// dus gsum sangs rgyas thams cad kyang// rtsa ba chos sku rtogs pa'i phyir// gzi ldan nor bu rin chen bzhin// chos rje ston pa kun bzang gis// thams cad ye shes chen por mkhyen// da yang 'dus pa'i snying po nyon// de don rang rig chos kyi sku// tshig dang rang gis brjod las 'das// rang byung ye shes thugs la gsal// drang srong mngon shes dpe bzhin du// dus gsum sangs rgyas 'khor bcas kyi// mnyam bzhag pas ni yid kyi go// nges don rtogs phyir yang sangs rgyas// rang rig chos sku'i byin rlabs bshad// de nas longs spyod rdzogs pa'i sku// rgyud dag mngon du gyur pa yis// ston pa rdo rje sems dpa' des// byin gyis brlabs pa'i don rig nas// gtsang ma ris kyi lha gnas kyang// yangs dog med pa'i gzhal yas khang// phyi nang med par 'od gsal ba'i// grangs kyi 'og min gnas de ru// longs sku thugs kyis 'dul ba'i dus// rig 'dzin 'khor la brtser dgongs te// snga phyi min pa'i rig pa 'di// da lta'i dus 'di yin par gsungs// rig 'dzin kun dga' lha dbang la// thun mong ma yin dbang bskur nas// dbu rgyan bka' rtags rgyag shing byin// gsang mtshan btags nas rgyud smin byas// gsang sngags yang ti nges don chos// 'khor 'das ma reg chos kyi sku// rang rig ye shes rig pa de// ldem dgongs rang rig ngo bos bshad// de nas rig 'dzin sems dag gis// phyogs bcu 'dus pa'i sangs rgyas la// zhu ba the tshom bcad pa'i phyir// lus ngag gus pa'i dad pa yis// shar phyogs mngon dga'i zhing khams na// sangs rgyas rdo rje gsang ba ni// rdo rje rab 'bar gdan la bzhugs// 'khor la btsal med chos rnams ston// de la bskor ba byas nas ni// kun nas dang pa'i dad pa yis// nges don zhu ba'i rten du yang// bdud rtsi za ma tog gang phul// de la nges pa'i don zhus pa// yang dag dgongs pa'i chos nyid kyi// sems nyid mi 'gyur rdo rje la// skye 'chi 'byung ba ji ltar lags// nges don zhus pa'i don gsan nas// sangs rgyas rdo rje gsang ba des// lha yi bdud rtsis thugs mnyes te// zhus pa'i lan du bka' stsal pa// gzhi nyid mi 'gyur rdo rje la// skye mchi yod pa ma yin te// rang gi rnam rtog gzung 'dzin gyis// tha mal lus la skye 'chi byung// de skad ces ni gsungs pa yis// rang gis sems kyi the tshom chod// zhu ba zhus nas nges pa rnyed// de phyir rtogs pa mngon du gyur// da yang 'khor gyi snying po nyon// lho phyogs 'dul bral med pa yi// rin chen brtsegs pa'i zhing khams na// rin chen snying po rin chen ldan// 'khor la rgya cher btsal med ston/de la bskor ba byas nas kyang// kun nas 'dod pa'i dad pa yis// nges don zhu ba'i rten du yang// ma gi za ma tog gang phul nas ni// de la nges pa'i don zhus pa// sangs rgyas nges pa'i chos sku la// de don rtsol bas ma bsgrubs par// yon tan 'bras bu ji ltar 'char// de don zhus pa'i don gsan nas// sangs rgyas rin chen snying po de// ma gi ta yis thugs mnyes nas// zhus pa'i lan de bka' stsal pa// tak+Sha ka yis rgyan bzhin du// ye nas gnas pa'i chos nyid la// rgyu 'bras mthar phyin gzhi nas rdzogs// nyi ma'i 'od ltar 'bras bu 'byung// de skad ces ni gsungs pa dang// rang bzhin gzhi yi the tshom chod// zhu ba zhus phyir nges pa rnyed// de phyir lhag mthong mngon du gyur// da yang 'dus pa'i snying po nyon// nub phyogs sgrib pa med pa yi// pad+ma can gyi zhing khams na// sangs rgyas dri med grags pa de/ pad+ma'i gdan la 'bras bu ston// de la bskor ba byas nas kyang// kun nas yid ches dad pa yis// nges don zhu ba'i rten du yang// pany+tsA li ka'i na bza' phul// de la nges pa'i don zhus pa// sems nyid pad ltar dag pa la// gzung 'dzin dri mas ji ltar gos// de skad zhus pas don gsan nas// sangs rgyas dri med grags pa de// pany+tsA li kas thugs mnyes nas// zhus pa'i lan de bka' stsal pa// pad+ma 'dam gyis ma gos ltar// byang chub sems kyi ngo bo la// gzung 'dzin dri ma gzhi la med// 'khrul pa'i blo la dri ma byung// de skad ces ni gsungs pa yis// rang gi blo yi the tshom chod// zhu ba zhus phyir nges pa rnyed// nges pa'i ye shes mngon du gyur// da yang 'khor gyi snying po nyon// byang phyogs rnam dag zhing khams na// sangs rgyas las rab grub pa de// in+d+ra nI la'i gdan bzhugs te// nges don btsal med 'bras bu ston// de la bskor ba byas nas ni// kun nas nyams myong dad pa yis// nges don zhu ba'i rten du yang// ta pa la yi 'bras bu phul// de la nges pa'i don zhus pa// chos sku gcig las med pa'i phyir// btsal med sems kyi rang bzhin la// 'gro don mdzad pa ci ltar lags// de skad zhus pas don gsan nas// sangs rgyas las rab grub pa de// me tog ta bas thugs dgyes te// zhus pa'i lan de bka' stsal pa// rang byung chos sku rtogs gyur na// bya ba'i las rnams mi dgos te// nor bu rin chen rnyed pa 'dra// mdzad pa 'phrin las rang las 'byung// de skad ces ni gsungs pa yis// rang gi 'khrul pa'i the tshom chod// zhu ba zhus phyir nges pa rnyed// de phyir 'bras bu mngon du gyur// da yang 'dus pa'i snying po nyon// shar lho 'tshe med zhing khams na// sangs rgyas rgyal ba'i dbang po des// dad ldan nyid kyi 'khor rnams la// btsal med 'bras bu'i chos rnams ston// de la bskor ba byas nas ni// kun nas rang rig dad pa yis// nges don zhu ba'i rten du yang// dpag bsam shing gi 'bras bu phul// de don yang dag don zhus pa// ye nas rang byung snying po de// chos nyid ye nas rang chas la// thos bsam dgos pa ji ltar lags// de skad zhus pa'i don gsan nas// sangs rgyas rgyal ba'i dbang po de// dpag bsam 'bras bus thugs mnyes te// zhus pa'i lan de bka' stsal pa// ye nas chos nyid rang chas la// thos bsam dgos pa ma yin te// ma rig mun pa bsal ba'i phyir// lung ldan rkyen gyis yid ches bskyed// de skad ces ni gsungs pa dang// thos bsam dgos par the tshom chod// zhu ba zhus phyir nges pa rnyed// de phyir ye shes mngon du gyur// da yang 'dus ba'i snying po nyon// lho nub rnam dag zhing khams na// sangs rgyas bsod nams snying po des/ dad ldan rang gi 'khor rnams la// btsal med 'bras bu'i chos rnams ston// de la bskor ba byas nas ni// kun nas shes rab dad pa yis// nges don zhu ba'i rten du ni// shing tog ba men rwa gang phul// de la dgos pa'i don zhus pa// ye nas rgyun kyi ting 'dzin gyis// chos nyid ye nas 'od gsal la// bying rgod 'byung ba ji ltar lags// de skad zhus pas don gsan nas// sangs rgyas bsod nams snying po de// shing tog la ni thugs mnyes de// zhus pa'i lan de bka' stsal pa// chos nyid ye nas 'od gsal la// rnam smin lus dang ma bral phyir// log non gdams ngag med pa la// tshogs brgyad rkyen gyis bying rgod 'byung// de skad ces ni gsungs pa yis// rang gis bsgom pas the tshom chod// zhu ba zhu phyir nges pa rnyed// de phyir ting 'dzin mngon du gyur// da yang 'dus pa'i snying po nyon// nub byang 'khor med zhing khams na// sangs rgyas zhi ba'i dbang po de// dad ldan nyid kyi 'khor rnams la// btsal med 'bras bu rgya cher ston// de la bskor ba byas nas ni// yid ches pa yis dad pa yis// nges don zhu ba'i rten du yang// sbrang rtsi phru ba gang phul nas// de la nges pa'i don zhus pa// rang rig kun gzhi gzhi cha ni// ye nas rang byung rgyu med la// 'phel 'grib 'byung ba ji ltar lags// de skad zhus pas don gsan nas// sangs rgyas zhi ba'i dbang po de// sbrang rtsi phul bas thugs mnyes nas// zhus pa'i lan de bka' stsal pa// rang byung ye shes snying po la// 'phel 'grib yod pa ma yin te// ma rig mun pa ma sel phyir// kun gzhi'i rkyen gyis 'phel 'grib byung// de skad ces ni gsungs pa yis// 'phel 'grib med par the tshom chod// zhu ba zhus nas nges pa rnyed// de phyir ye shes mngon du gyur// da yang 'dus pa'i snying po nyon// byang shar las dag zhing khams na// sangs rgyas zhi ba'i snying po de// dad ldan rang gi 'khor rnams la// sems kyi 'bras bu'i chos rnams ston// de la bskor ba byas nas kyang// kun nas dad pa'i gdengs kyis ni// nges don zhu ba'i rten du yang// rin chen ke ta'i 'bras bu phul// de la nges pa'i don zhus pa// rang gi sems nyid gnyug ma la// gzhi la thog mtha' med pa la// 'khor 'das thog mtha' 'ong ba ci// de skad zhus pa'i don gsan nas// sangs rgyas nyi ma'i 'od zer de// rin chen ke tas thugs mnyes te// zhus pa'i lan ni bka' bstsal pa// gzhi nyid dus gsum 'gyur med la// blo yis bcos su mi 'dod phyir// ye shes ma rig khyad par las// 'khor 'das gnyis la thog mtha' byung// de skad ces ni gsungs pa yis// thog mtha' yod med the tshom chod// zhu ba zhus phyir nges pa rnyed// de phyir 'bras bu mngon du gyur// da yang 'dus pa'i snying po nyon// mtha' dbus med pa'i zhing khams na// sangs rgyas nam mkha'i snying po de// dad nyan rnams kyi 'khor rnams la// btsal med 'bras bu'i chos rnams ston// de la bskor ba byas nas ni// kun nas mthar thug dad pa yis// nges don zhu ba'i rten du yang// ut+pal yi me tog phul// de la nges pa'i don zhus pa// rang bzhin dag pa'i ngo bo la// gzhi la snang ba med pa la// glo bur 'khrul snang ji ltar byung// de skad ces ni zhus ma thag/ sangs rgyas nam mkha'i snying po de// ut+pa la yis thugs dgyes te// zhus pa'i lan de bka' stsal pa// gzhi la snang med nam mkha' 'dra// ma rig rkyen byas gzung 'dzin gyis// rang gi gzhan snang 'khrul pa'i phyir// bag chags snang ba sprin ltar byung// de skad ces ni gsungs pa yis// snang ba yod med the tshom chod// zhu ba zhus phyir nges pa rnyed// de phyir 'bras bu mngon du gyur// da yang 'dus pa'i snying po nyon// yon tan rgyas pa'i zhing khams na// sangs rgyas 'bum gzigs bya ba de// nyid kyis dad nyan 'khor rnams la// btsal med 'bras bu'i chos rnams ston// de la bskor ba byas nas ni// kun nas yid ches dad pa yis// nges don zhu ba'i rten du yang// pad+ma gser gyi mdog can phul// de la nges pa'i don zhus pa// 'bral med rgyun gyi ting 'dzin gyis// rig pa phyi nang med pa la// mnyam bzhag rjes thob 'ong ba ci// de skad zhus pa'i don gsan nas// sangs rgyas 'bum gzigs bzhugs pa de// gser gyi pad+mos thugs dgyes nas// zhus pa'i lan de bka' stsal pa// ye shes rig pa 'di nyid la// mnyam bzhag rjes thob gdod nas med// nges don 'di med sgom chen la// sgo lnga'i yul la rjes thob byung// de skad ces ni gsungs pa yis// mnyam bzhag rjes thob the tshom chod// zhu ba zhus phyir nges pa rnyed// de phyir ye shes mngon du gyur// de nas rig 'dzin sems dag de// sngon gyi gnas ni rjes dran nas// sum cu rtsa gsum shar phyogs kyi// rin chen mngon dga' phug tu phyin// nang du 'bral med mnyam bzhag pas// sems can kun gyi don ched du// lha dbang brgya byin drung byon nas// lha yi bu la 'di skad bskul// khyod ni shAka thub sprul pa ste// 'jig rten gsum na 'gran zla med// sangs rgyas chos kun thugs la rdzogs// 'dod khams 'dzam gling snod ldan la// bstan pa tsam gyis rtogs pa'i chos// sdeb sbyor legs pa'i tshig tu gsungs// de skad ces ni bskul ba dang// lha dbang la ni lan gsol pa// nges don gsang ba'i rgyud chen 'di// rang gi sems la gsal ba las// tshig gi thog tu mi phebs pas// bdag gis bgro ba shin tu dka'// de skad ces ni smras pa dang// de yis dgongs pa'i don go nas// lha dbang gis ni don zhus pa// phyi rabs dad ldan don ched du// yang dag nges don dgongs pa de// ma rtogs pa la tshig sgo nas// mtshon nas rtogs par bya ba'i phyir// ci rigs pa ni khyod kyis bgros// de skad ces ni zhus pa dang// rig 'dzin kun gyi don ched du// rig 'dzin kun dgas thugs gsan nas// sku drin che bar lan btab pa// lha dbang bka' gnyan drin che bas// mi yul 'dzam gling dad ldan gyi// ma rig mun pa bdag gis bsal// bde gshegs rnams kyis byin gyis brlabs// de skad ces ni gsungs pa dang// rig 'dzin chen po lha dbang de// shin tu thugs ni dgyes gyur te// lha dbang gis ni zhal bzhes pa// nges pa'i don ldan slob ma la// nges don gsang ba'i rgyud chen 'di// ma bcos ma bslad 'chad nus na// bde gshegs 'khor gyis byin gyis brlabs// de skad zhal bzhes dam bcas nas// de yang 'dus pa'i snying po nyon// de nas lha yi bu yis bsams pa la// mi la mngon shes rdzu 'phrul med// de phyir nges pa'i snod ldan la// 'dzam gling mi la bshad dgongs nas// sprul pa skye ba'i rten btsal ba// rigs bzang rigs ngan bud med de// gnod sbyin kun gsos byang chub ma// de yi bur skyes thugs dgongs nas// bya ni ngang pa gser lus can// dngul gyi gshog pa lcags sder can// g.yu yi smin ma rdo rje'i mchu// rin chen mig can gcig tu sprul// nam langs nyi ma shar mtshams su// nyi zer la ni bya byung nas// byang chub snying gar mchu gtugs nas// snying gar thim nas zhag gsum nas// khye'u chung rgyag shing rdo rje can// tsar gyis skyes nas 'di skad smras// chos kun byang chub ye shes yin// 'khor ba ma rig ye nas min// rgyu rkyen ma bskyed ngo bo nyid// rang gi rig pa chos sku yin// de ltar sgrogs pa zhig byung bas// 'jig rten 'di na ya mtshan can// mtshan yang dga' rab rdo rjer btags// yon tan rig pa lnga ldan la// mngon shes drug gis dus gcig mkhyen// mi rnams kun gyis bkur bar mthong// yon tan lags kyis spyan drangs nas// bde ldan gnas su bzhugs su gsol// de tshe sprul pa dga' rab de// nang du ting 'dzin dgongs pa la// 'bral med rgyun du thugs zhugs pas// gnod sbyin bdud kyis mtho btsams te// bar chod bya phyir phung phyed bzhis// bsdigs dang brid pa'i las rnams byas// lha yi bdud du shes pa yis// mya zhing smyo la dran pa rlag/ snying rje'i don du ting 'dzin glod// brid bsdigs gnyis kyis ma bslus nas// bdud ni yid mug zil gnon nas// gdung ba bton cing skyabs zhus pa// snying rje chen pos bdag la gzigs// ma rig las kyi srin por skyes// sems can lus srog zas su zos// las ngan 'gyod pa'i yid kyis bshags// nyid kyi bstan pa bdag gis bsrung// dam nyams lus srog zas su len// bdag gi srog gi snying po 'di// 'bul gyis thugs rjes ma chung zhig/de skad ces ni skyabs gsol nas// rig 'dzin chen po dga' rab la// rang srog snying po phul nas ni// bstan pa bsrung bar zhal bzhes nas// dam la btags te bran du byas// gsang ba'i man ngag rnam bzhi mdzad// da nas shAka thub sprul pa des// bkra shis bde ldan gnas dag tu// de lta dus kyi deng sang na// gsang bdag sprul pa dang nyan la// sdeb sbyor legs pa'i tshig tu gsung// da yang rdo rje sems dpa' nyon// shes rab blo yi khyad par las// sku gsum chos rnams gcig gsungs pa'i// bshad lugs rnam pa de dag kun// 'dul bya'i 'khor la tha dad kyang// dus gsum gcig phyir khyad med pas// don la dbyer med ngo bo gcig/ rdzogs pa chen po nges don thams cad 'dus pa'i snying po/ ye shes nam mkha' dang mnyam pa'i rgyud las/ nges don 'byung ba'i rgyu gleng gzhi bstan pa'i le'u ste dang po'o//// de nas rdo rje sems dpa' yis// 'dus pa'i tshogs la phan gdags phyir// gus pa'i sems kyis rab sbyar te// bden pa'i tshig ni 'di skad gsol// chos nyid gnas lugs nges pa 'di// snod kyi rim pa gang la bstan// chos rnams gtan la ci ltar dbab// mnyam pa'i rgyal pos bshad du gsol// de skad zhus pas don gsan nas// kun rig ston pas 'khor rnams la// chos nyid gnas lugs bka' stsal pa// 'khor ba mya ngan 'das pa'i chos// gzhi la gang yang med pa'i phyir// rang rig rtogs pa'i chos sku la// 'khor 'das bzhi la med shes phyir// chos nyid nges pa'i gnas lugs yin// da yang 'dus ba'i snying po nyon// don bstan snod bcud rim pa ni// yang dag sangs rgyas nges pa'i don// gsang sngags kun gyi rtsa ba yin// dbang rnams rim par rdzogs byas nas// chos kyi gzhung dang mi 'gal ba// thos bsam bsgom la rag ma lus// nges don bka' rgyud gsang ba yi// dam pa mdzod kyi gnyer ldan zhing// srid par zhus kyang zad med pa'i// bla ma rdo rje slob dpon de// tshul 'chos med par gdeng dang ldan// dper na gangs kyi seng ge bzhin// gcig pur gnas kyang don ldan pa// sangs rgyas dgongs pa thugs la 'chang// da yang rdo rje sems dpa' nyon// skal ldan slob ma'i mtshan nyid ni// bla ma la gus dad pa ldan// ser sna chung la brtson 'grus che// brtse dang dam tshig mi 'gal bsrung// don gsal thub pa'i shes rab zab// tshul shes ngang bzang rnams kyi don// yon tan zag med rnams kyi gter// thams cad 'byung ba'i gzhi ru bstan// da yang 'dus pa'i snying po nyon// dang po dad pa sngon song ba'i// lus srog mi blta gtong phod can// 'khor 'das gcig tu bstan pa la// skrag cing 'jigs pa med pa yi// the tshom med par dus tshod zin// rtogs par bya ba'i thabs su bstan// dpa' gtum seng ge'i brtson 'grus kyis// sngags dang mtshan nyid ma 'dres pa'i// khyad par 'phags pa'i gdams ngag gi/ nges pa don gyi gdams ngag zhu// glang chen mi ldog dgra 'joms ltar// bla ma rdo rje slob dpon gyis// spyod pa mi brtags chos la brtags// mtshams med lnga yang chos skur shes// sa ku rtsi yi rkang lag bzhin// nges don rang rig chos sku la// rgyun du mi 'bral gdams ngag ni// mi brjed gzungs kyis zin par bya// da yang rdo rje sems dpa' nyon// nges don gsang thub zhe la 'chang// spyod pa 'jam pa'i tshul dang ldan// khram med spro ring ngang bzang la// nges don bstan pa'i snod du rung// da yang 'dus pa'i snying po nyon// de dang mi ldan 'di bstan na// sangs rgyas rnams kyi bka' bcag ste// mtshams med sdig pa'i char mi phod// dmyal ba'i 'og gzhi byed par gsungs// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/ snod bcud bstan pa'i le'u gnyis pa'o//// de nas 'dus pa'i tshogs rnams la// kun rig chos kyi rgyal po yis/ chos rnams gtan la dbab pa'i phyir// don gyi dbye ba 'di gsungs pa// yang dag nges don rtogs pa'i thabs// kun gzhi rnam gsum las 'khrul phyir// theg gzhan lnga yi khyad par dbye// sems kyi skyon drug ngos bzung la// sun gdon bdun gyis shan dbye ba'o// da yang 'dus pa'i snying po nyon// khyad 'phags dbang lngas rang rgyud smin// yon tan bzhi yi don shes phyir// dam tshig lnga yi gzhi bzung la// skabs dbye lnga yi go phye nas// dpe don khyad par rnam pa bzhis// 'dus pa lnga yis don brtson phyir// bar do lnga yis gtan la dbab// da yang 'dus pa'i snying po nyon// rtsa ba bzhi yis mdor bsdus te// bsgom yod bzhi yis nyams su blangs// ched spyod gsum ni don du spyod// chos 'phrul bzhi byung zil gyis mnan// snying po lnga yis ngos bzung la// gol sa lnga yis skyon bstan te// nyams pa drug ni ltung ba'i phyir// ye shes bzhi yis shan phye nas// bka' rtags bzhi yis nges mtshon nas// gdams ngag drug gis thag bcad de// nges don gsum gyi don go nas// the tshom gsang bzhi nges bsal nas// rang shar drug gis bsgoms mi dgos// thig le brgyad kyis khyad par bstan// sa lam rim pa dus gcig rdzogs// da yang 'dus pa'i snying po nyon// nges don bdun gyis nyams su blangs// nyams myong bzhi yis gting du go// rig dpyod bzhi yis la bzla la// klong chen drug gis nges pa rnyed// rkyen thob drug gis 'bral med shes// da yang rdo rje sems dpa' nyon// sku gsum thams cad mkhyen pa'i tshad// yon tan lnga yis 'bras bu 'byung// nges pa bzhi yis khyad par 'phags// zil gnon rtags bzhi 'bras bur ldan// che ba lnga yis dngos 'dzin dag/ rang gnas drug gis gzhan don bya// da yang rdo rje sems dpa' nyon// gnyis med gsum gyis la bzla la// gtan tshigs bzhi yis yid ches bya// 'bras bu rgyu yis mtha' ru gtug/ rtogs pa bzhi yi gdeng ldan bya// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/ chos rnams gtan la dbab pa sdom du bsdus te bstan pa'i le'u ste gsum pa'o//// de nas rdo rje sems dpa' yis// kun rig chos kyi rgyal po la// nges pa'i dgos don 'di skad gsol// sems kyi kun gzhi ji ltar byung// bag chags kun gzhi ji ltar bgos// lus kyi kun gzhi ji ltar smin// mnyam pa'i rgyal pos bshad du gsol// 'di skad zhus pas don gsan nas// kun rig ston pa chos rje yis// kun gzhi rnam gsum dbye ba'i don// sems kyi kun gzhi bka' stsal pa// thog ma tha ma da lta dang// ngo bo nges tshig che chung shes// mtshan nyid mnyen po las dang rtsal// yul dpe rtags kyi sgo nas bstan// da yang rdo rje sems dpa' nyon// sems kyi kun gzhi thog mar kyang// gang la mi rtog sa ma zin// ma shes lhan cig ma rig pa// rtog zhugs sems kyi kun gzhi byung// da lta gang na gnas pa'i rten// 'gro drug sems can ma lus kyang// nyan thos rang rgyal sems dpa' la// thun mong dang ni ma yin tshul// da yang 'dus pa'i snying po nyon// tha mar gar 'gro nges pa ni// gnyen po lung ldan rang shar nas// rim gyis gcig char nges par nges// don ma phrad na nges pa med// ngo bo gzhi nyid ma shes phyir// bag chags gnyid log kun gzhi ste// ma rig rtog pa'i ngo bor gnas// da yang 'khor gyi snying po nyon// nges tshig yul gyi snang ba la// sna tshogs yul la sems pa'i phyir// min pa'i chos la bden par 'dzin// thag pa sprul du 'khrul dang 'dra// sems can shas ni che chung yod// nyon mongs sems dpa' mnyen pos ni// bag nyal phra dang shin tu phra// mngon rgyu med pas nyon mongs chung// rgyu med mtshan med 'jig pa'i phyir// tha ma dngos po med par dengs// da lta kun gzhi yod kyi bar// rgyun gyis dus gsum 'gags te med// da yang 'dus pa'i snying po nyon// thun mong snying po dbyings sogs kyi// nyon mongs bag chags rang bzhin te// shes rab ma rig log lta 'joms// thun mong ma yin cig char dengs// las kyi rgyud mthun gang rung ste// rnam smin rim gyis ma yin te// bar ma chod par 'bras bu smin// lung du ma bstan nges pa med// da yang rdo rje snying po nyon// bag chags rtsal ni rigs drug ste// bde sdug bye brag so sor snang// cha phra rtsal ni nyan sems la// me long lta bur rang snang nas// mtshon pa dpe yis ris dang ldan// nam mkha' chu dang me long sogs// gzhi la rgyu rkyen ma rig pa// med par byung pa ya mtshan che// da yang 'dus pa'i snying po nyon// de dag dbye ba blo dman la// yid ches bya phyir bstan pa yin// ma rig pa la sems su btags// 'khor ba bskyed phyir kun gzhi yin// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/ gzhi gnas sems kyi kun gzhi bstan pa'i le'u bzhi pa'o//// de nas 'dus pa'i 'khor rnams la// kun rig ston pa chos rje yis// bag chags kun gzhi bka' stsal pa// dang po da lta tha ma dang// ngo bo mtshan nyid nges tshig dang// dpe brtags gnyen po dbye ba rtsal// rnam grangs de dag bsdus te gsungs// da yang rdo rje sems dpa' nyon// thog mar mtha' drug rtog las byung// gang la mi rtog don ma zin// yengs pa'i tshul las rtog pa byung// rang snang sgrib pa bag chags brtas// bag chags snga phyi'i rgyu la brten// 'gag pa ma rig sdug bsngal 'byung// chos sku mi 'gyur 'khor bar brten// de phyir lus sems bag chags yod// da yang 'dus pa'i snying po nyon// gang 'gro dus la nges med rkyen// ye shes 'phrad na bag chags brlag/ de med dag pas thabs med do// nyi med mun par mi 'gro 'dra// ngo bo brdzun la bden 'dzin pa// rtog pa zhen rgyud brtas pa na// da lta bag chags rgyun mi chad// de phyir 'khor bar yang yang bskyed// mtshan nyid gcig gis bskyed gyur pas// 'bras bu rigs dang so sor smin// rgyu rkyen tshogs dang mnyen pos 'joms// che chung ji 'dra brten par snang// da yang 'dus pa'i snying po nyon// bag chags kun gzhi rtog pa ste// nges tshig rtog rgyu cha phra de// bag tsam brten rtog brtas pa las// bag chags kun gzhi yul du byas// 'bras bu las kyis smin par byed// thog mar bcas dang thog ma med// gar smin zil gnon bag chags chung// lung du ma bstan smin mi nus// nam mkha' sprin dang sa gzhi bzhin// g.ya' rdul lbu ba bag chags dpe// 'dra yang don min mtshon par zad// glo bur yul byung gzhi la med// da yang rdo rje sems dpa' nyon// bag chags kun 'dus phung po la// rgyu mthun rnam par smin pa ste// phung lnga dus gsum mi bral 'byung// 'khrul brtas brtag tu brtan pa yin// gnyis po thun mong thun min gnyis// thun mong dad pa brtson 'grus dang// mos dran ting 'dzin sogs rnams so// thun mong ma yin ye shes dag/ bag nyal sngon du rgyu gcig gis// bskyed dang bsgrub dang gzhan du 'gyur// gzhan ltos ngo bo grub par 'dod// dbye ba ma nor brtags pa yin// da yang 'dus pa'i snying po nyon// rtsal dang shas ni che chung ste// sdug bsngal skye rgas na 'chi ste// byams bral dgra 'phrad med tshol rnyed// 'khor ba'i bag chags rtsal du byung// grangs la mang du yod mod kyang// bag nyon rtog pa skyon dang g.yog/ sgrib ltung gol sa 'khrul pa ste// yul yod bar du grangs thug med// da yang rdo rje sems dpa' nyon// de dag 'khrul pa yul las byung// yul sems bar dor gol sa chod// bag chags gzhi la gos pa med// rdzogs pa chen po nges don thams cad la 'dus pa ye shes nam mkha' dang mnyam pa'i rgyud las/phral byung gi bag chags kyi kun gzhi bstan pa'i le'u ste lnga pa'o//// de nas kun rig ston pa des// skal ldan dad ldan 'khor rnams la// lus kyi kun gzhi bka' stsal pa// dbye ba ngo bo mtshan nyid dang// las dang dpe ldan rtogs par gsungs// da yang 'dus pa'i snying po nyon// rang bzhin bag chags yid kyi lus// thog ma tha ma da lta'i khyad// nges par gtan la dbab pa'i phyir// tha dad lus kyi gzhi las byung// ngo bo rtsal shugs tha dad pa'i// snang dang thig le'i rtsal med kyang// gong gi lus nyid de la brten// lus dang bag chags dbang gis snang// de yis mtshan nyid chos sku dang// bag lus rang bzhin lus la brten// gcig dang tha dad gnyis ka min// 'khor 'das brten yang de ltar gnas// da yang 'dus pa'i snying po nyon// nyan thos sems dpa' sangs rgyasala'ang// rdzu 'phrul mtshan nyid dpe byad kun gyi gzhi// sems can sgo gsum de la brten// lus kyi kun gzhi rten pa'i las// de yis mtshon pa'i dpe gsungs pa// lus kyi kun gzhi khyim dang 'dra// nyi ma 'jug pa'i bde brdal 'dra// gza' skar 'char ba'i nam mkha' 'dra// da yang 'dus pa'i snying po nyon// de dag kun gzhi rnam gsum yang// kun brtags bag chags kun gzhi byung// zung du 'dzom pas kun gzhi grub// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/ nyon mongs lus kyi kun gzhi bstan pa'i le'u ste drug pa'o//// sdom du bsdus te bstan pa gnyis pa'o// de nas rdo rje sems dpa' yis// 'dus pa'i 'khor gyi don ched du// kun rig chos kyi rgyal po la// bden pa'i yid kyis 'di skad gsol// rtsa ba gcig pa'i chos nyid la// 'khor ba'i gzhi ni gang gis byas// 'gro drug sdug bsngal ci las byung// mu stegs rtag chad ji ltar 'khrul// theg pa'i rim pa gang las byung// mnyam pa'i rgyal pos bshad du gsol// de skad zhus pas don gsan nas// 'dus pa'i 'khor la bka' stsal pa// 'khor gzhi shes pa lung ma bstan// rang bzhin lus kyi rtsal snang ba// gang la mi rtog don ma zin// shes pa rang snang don ma bcos// ma rig rgyu yis nges med phyir/shes bzhin lung ma bstan zhes bya// da yang 'dus pa'i snying po nyon// rang bzhin ngo bo'i lus de ni// yengs dang ma yengs cha med pas// had de bun ne tsam du gnas// rang byung rnam shes rkyen dbang 'gyur// de phyir lung ma bstan zhes bya// gzhi ni dran dang ma dran gyi// blo ni 'jug cing don mi shes// ma rig gzhi ni lung ma bstan// de phyir 'khor ba'i gzhi zhes bya// yid byung rim 'grib log pa'i rgyus// gya gyu tsam du dran yod kyang// don du ma shes de kho na// ma rig bskor ba'i gzhi med phyir// dang po 'khor ba de las byung// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/'khor ba'i gzhi bstan pa'i le'u ste bdun pa'o//// de nas 'dus pa'i tshogs rnams la// kun rig rgyal pos bka' stsal pa// 'gro drug sdug bsngal byung ba ni// dang po 'khor 'das bar do la// med la yod dran yid tsam byung// lung ma bstan phyir rim gyis 'grib// shes pa mun po thib kyis 'thib// dpyad kyang ngo mi shes pa dang// gang yang mi shes gti mug la// bag nyal zhen pa phra mo byung// de ma thag tu 'dzin pa yis// ma rig lhan cig rnam gsum la// kun brtags gsum gyis rkyen byas pas// thag pa sbrul du 'dzin pa bzhin// dpa' bo yul yan gzung 'dzin gyis// 'jig rten lha mi shes pa rtsings// thar lam mi thob skye 'chir brtags// da yang 'dus pa'i snying po nyon// ma rig gzhon pa nges pa ni// le lo snyoms las dman la sbyar// chags sdang lnga la longs spyod pas// de yis rnam smin 'bras bu 'byung// dmyal bas rang bzhin me sogs mthong// yi dwags mi gtsang mthong yul snang// byol song ngam grog gyen mthur mthong// mi yis mthong yul bzhi ru snang// lha ma yin gyi go mtshon mthong// lha yis rin chen sna bdun mthong// de dag 'gro drug sdug bsngal yin// da yang rdo rje sems dpa' nyon// ma rig pa las byung ba yi// 'gro drug sdug bsngal de dag kyang// 'khrul ngor bden kyang don la med// de phyir ma rig skyon du che// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/ 'gro drug sdug bsngal byung tshul bstan pa'i le'u ste brgyad pa'o//// de nas 'dus pa'i 'khor rnams la// mu stegs 'khrul lugs bka' stsal pa// 'khrul sman chen po dang 'dra ste// gzhi dang 'khrul pa'i nyes pa de// sun bton la zlos grangs bstan pa'i// 'khrul gzhi med pa'i 'khrul pa de// ri bong rwa bzhin yod mi srid// 'khrul gzhi las ni 'khrul pa byung// da yang 'khor gyi snying po nyon// ngo bo mi 'gyur gzhi par rigs par min// gangs kyi zhun chu khol ma dag// mkhas pas btung bar bya ba min// pad+ma ze 'bru kha mi dbye// zla tsher ma yin kha mi dbye// ma rtags bug rdol can gyi snod// kha mi dbye zhing bcud mi blug// don dang mi ldan bcos mi dgos // bsril zhing spyad par bya ba min // shel gyi mchod rten 'od 'bar ba // mgul nas gdags par bya ba min // khyung chen nam dpangs spyod pa yang // gshog pa g.yas g.yon gcod mi bya // bai DUr+ya yi rdo rje dag / ra bcag sdig pa bsam mi khyab // rin chen 'bar ba za ma tog / dug sbyor ba yi sems tsam bya mi rung // rin po che yi lcug phran rnams // cung zad snang bar spong mi bya // rdo rje 'phreng ba rgyun thag ni // 'dres shing spyan par bya ba min // spu gris gtams pa'i tshig pa dag / sus kyang dral bar bya ba min // dgos pa 'byung ba rin po che // bsreg pa'i dras gros bya mi rung // dung dang bcas pa'i me tog dag /nam yang dbul bar bya ba min // gser gyi lcags kyus ma bzung ba'i // nya sha nam yang bza' mi bya // nags khros stong pa'i phyogs dag tu // rnal 'byor mig ltar mi rung ngo // ma yis sbyar ba'i rtsi sman dag /the tshom med par rgyun mi gcad // 'phrul gyi me long snang ba'i g.ya' // rtag tu phyi zhing blta bar bya // dug sbrang 'thung dang tshong bsam gyis // 'gro nyal mi bya mar me gtang // sdom la 'khrul pa yis// rgyu 'bras log pa'i brtul zhugs kyis// thar lam mi thob 'khor bar ltung// mar 'dod bye ma btser ba bzhin// da yang 'dus pa'i snying po nyon// ye med chad par 'dod pa ni// kha dog dbyibs med chad gzhi byas// snga phyi rgyu 'bras med par 'khrul// skur btab dmyal ba chen por ltung// chad du ma ster rig par yod// de phyir gzhi la gol med pas// rang byung ye shes klong na gnas// da yang 'khor gyi snying po nyon// phung pos bsdus pa'i chos rnams kun// dang po ye med stong pa las// glo bur zil tsam phra rags skyed// de las yid sems cha phra byung// rgyu rkyen dag las byung ba ste// byung yang 'byung ba bzhi las byung// las kyi rgyu 'bras med par ni// 'byung ba lnga zhig rang thim nas// me shi thal ba rlung khyer 'dra// da yang 'khor gyi snying po nyon// gnyis ka'i gzhi 'dod mu stegs ni// rig byed smra ba'i lta ba ste// rang sems shes pa lung ma bstan// gzhi ni nges pa med pa las// snang ba gang yang mi 'gog 'dod// gdon gyis zin pa'i smyon pa 'dra// de yi 'bras bu nges par ni// sems kyi rtsa ba ma shes pas// 'byung chen gtos kyi mun pa bzhin// thugs rje'i nyi zer zhags thag chad// dmyal ba'i 'bras bur the tshom med// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/ mu stegs kyis 'khrul tshul bstan pa'i le'u ste dgu pa'o//// de nas 'dus pa'i tshogs rnams la// theg pa'i rim pa bka' stsal pa// gzhi ni ngo bo nyid sku de// mthun dpe me long lta bu la// gzugs brnyan theg pa rim dgu byung// da yang rdo rje sems dpa' nyon// de don rnam par phye ba ni// dang po nyan thos lta ba yang// mdo sde pa dang bye brag pa// gang zag bdag med chos bdag yod// yul la dngos por 'dzin phyir gol// da yang 'khor gyi sems dpa' nyon// snang ba phra rags yul gyi gzhi// chos la bdag tu 'dzin pa yod// zhi ba phyogs gcig thar mi thob// lhag mthong med phyir skye bo rang// don rtogs yul 'di chos kyi dbyings// da yang 'khor gyi snying po nyon// bden pa bzhi yis sgor zhugs nas// dbugs la sems zhugs 'gog par bsgom// sngon gyis bstan pa la zhugs nas// da lta'i stan la mnyam par bzhag/da lta'i bstan pa la bzhugs nas// mkhan slob bsdom pa'i khyad par gyis// re dogs spyod pa ched byed pa'i// dka' thub lus gdung bzod pa yi// sems kyis lus ngag btson du bzung// ma 'ongs smon lam rjes 'debs kyang// rdul dang shes pa gnyis 'dod pas// glang chen 'dam du bying ba ltar// lus ngag las kyi rtsol ba yis// 'bras bu mi thob snying rje'i gnas// da yang 'dus pa'i snying po nyon// bla ma dag la mi bsten par// rang sems don la blo sbyangs phyir// rten 'brel phyi nang rtsad bcad nas// yul rnams phyogs cha bcad gzhig nas// bse ru khyu lding dpe bzhin du// sgo lnga mi 'geg rgyu ba 'geg/rjes 'brang med pa tsam du bsgom// nan bsgom yin phyir don dang 'gal// stong pa nyid la rten 'cha' bas// spang sdud zhen pa yod phyir gol// btsan par mi 'gyur nyams pa yis// nong bus rgyal srid bsgom pa 'dra// da yang rdo rje sems dpa' nyon// chos rnams sems su bsdus nas ni// sems tsam kun gzhi rtog pa yi// gong 'og shes dag skad gcig 'dod// rig pa rang rgyal grangs can gol// rtag dang khyad med sgro 'dogs nor// chos sku rang rig 'gyur ba med// dbu ma pa yis 'dod gzhung de// ngo bo dngos med gzhig byas te// yul sems bzhi pa stong par 'khrul// ci yang med pa'i skye mched ltung// chad dang khyad med stong par 'khrul// stong zhing rang byung chos sku yin// da yang 'dus pa'i snying po nyon// sems tsam dbu ma'i mtshan nyid de// kun rdzob dang ni don dam du// so sor rtogs pa'i shes rab kyis// bden pa gnyis gnyis don dag tu// kun rdzob sgyu ma tsam du shes// don dam spros dang bral ba la// mi dmigs zhi gnas lhag mthong du// rtse gcig sems kyis ting 'dzin bsgom// spyod pa snying rjes gzhi bzung nas// pha rol phyin bcu lam lnga la// sems bskyed gzhan don ched du byed// bdag gzhan sgyu ma tsam du 'dzin// 'bras bu nges par 'dod pa ni// kun rdzob sgrib sbyangs don dam gyis// bden pa mthong ba ched du byed// gcig por nas ni gcig 'tshol ba// chu bzhag zla ba ngos 'dzin 'dra// da yang 'dus pa'i snying po nyon// thams cad rtsa ba gcig pa'i phyir// rang rig sems kyi snying po'i don// zab la rgya che mi shes par// bsam med dag tu gang 'jog pa'i// byis pa de ni blun pa ste// mun pa'i skye mched nyid du ltung// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/ rgyu mtshan nyid kyi lta ba bstan pa'i le'u ste bcu pa'o//// de nas 'dus pa'i 'khor rnams la// kun rig ston pas bka' stsal pa// phyi pa kri yog rnam gsum ni// nam mkha' smig rgyu'i dpe bzhin du// dag pa chos nyid kri ya'i gzhi// bzang ngan gtsang sbras dngos grub re// grub pa mi thob byol song rgyu// gtsang sbras mi grol rtog pa nyid// spyod pa ma yengs gzhi dag sku// da yang rdo rje sems dpa' nyon// yul med rig pa rang gsal gyis// chos nyid stong pa'i ngang las ni// dag pa bzhi yi sgor zhugs nas// ma nyams ma sme gtsang sbra bcas// yo byad phyi la gtsor mdzad cing// bdag dang ye shes rje 'bangs tshul// kun rdzob lha yi dkyil 'khor du// rgyud dag pa yi ting 'dzin gyi// sku yi gzugs brnyan phyag rgya yang// bzlas brjod gtsang sbra dus tshod kyi// rgyu rkyen tshogs pa'i nus mthu yis// 'bras bu gzhan la re ba'i phyir// rigs gsum dkyil 'khor lhar gsal kyang// dngos grub gzhan la re ba'i phyir// khyi rgan 'dab chags bsnyegs pa 'dra// da yang 'dus pa'i snying po nyon// rang sems dbye ba med pa la// u pa ya yi theg pa ni// gong 'og lta spyod gnyis 'dzin pas// ne tsho mi ltar 'dod pa 'dra// da yang 'dus pa'i snying po nyon// yo ga rnal 'byor sems dpa' des// dbyer med sangs rgyas gzhi byas te// byang chub rnam lngar mnyam par 'dod// bsgoms kyang mi grol 'dod khams lta// sems tsam pa dang khyad med gol// la bzla rig pa chos skur shes// da yang 'dus pa'i snying po nyon// lta ba chos nyid rnam dag la// rnam par snang mdzad chen po ru// don rtogs ngang la dbyer med phyir// phyag rgya bzhi yi sgor zhugs nas// yo byad gtso ru mi 'dzin pa// don dam skye 'gag med pa yis// lha yis dkyil 'khor 'phags pa'i sku// chos dbyings dag gi byin rlabs las// spun dang grogs po'i tshul du ni// lha dang bdag tu mnyam pa yis// dam tshig ye shes lhar gsal kyang// rgyal srid med pa'i blon po 'dra// da yang 'dus pa'i snying po nyon// bla ma'i don med nan brtags kyis// dmigs pa can la sems brtags kyang// rnam par grol bar mi nus te// nam mkha' dag la 'dzin pa 'dra// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/phyi pa rgyud kyi lta ba bstan pa'i le'u ste bcu gcig pa'o//// de nas 'dus pa'i tshogs rnams la// kun rig ston pas bka' stsal pa// rnal 'byor ma hA yo ga yis// nam mkha'i sprin dang khu rlangs bzhin// bden pa dbyed med 'dod pa'i gzhi// rtog tshogs lhar bsgyur bsgom pas 'khrul// de phyir bgegs dang ru drar ltung// dbu ma dang 'dra 'bras bu gol// lam la mi brten rtog pas chod// da yang 'dus pa'i snying po nyon// 'khor 'das ye nas sangs rgyas la// sems kyi rnam rtog ci skyes kyang// mtshan ma dngos po ma grub cing// dper na nam mkha'i bser bu bzhin// da yang 'dus pa'i snying po nyon// yod med dbus la mi gnas pas// sku gsum ye shes lhun grub kyi// yul sems dbye ba med par 'dod// de phyir bden pa gnyis med gzhi// da yang 'dus pa'i snying po nyon// de don lam gyi rim pa ni// thabs dang shes rab sgor zhugs nas// ting 'dzin gsum gyis lhar bsgom pa// grib ma gzugs su bsgyur pa 'dra// da yang 'dus pa'i snying po nyon// yang dag nges pa'i 'bras bu ni// bsnyen bsgrub tshad du byas pa yis// sku gsum ye shes lhun grub 'dod// de phyir ye shes bsres pas nor// rtsol bsgrub yod phyir don dang 'gal// da yang rdo rje sems dpa' nyon// a nu yo ga'i 'dod pa de// kun gzhi mkha' klong gzhi byas te// snang ba kun bzang rol bar 'khrul// yod min med min skye mched dang// mkha' klong dbu ma chad dang 'dra// la bzla chos kyi dbyings nyid yin// da yang 'dus pa'i snying po nyon// phyi nang chos rnams ma lus kun// yid dang kun gzhi gnyis 'dus pas// yang dag bde chen thugs kyi sras// phyi nang chos kun mnyam pa nyid// dran pa tsam gyis lhar gsal gyis// ngang 'jog ched bya rtsol ba yod// de phyir kun tu bzang po yi// kun gzhi mkha' klong rnam dag tu// rnam rtog mtshan ma gang spyod kyang// nam mkha' gza' skar btsal med bzhin// kun bzang bde chen thabs kyi gtso// kun tu bzang mo gnyis med mkhar// 'du 'bral med pa chos kyi sku// bde chen gnyis med rig pa'i rtsal// nges pa'i gsang sgo ma shes pas// kun bzang spyod pa'i don mi rtogs// nyi ma sprin gyis sgrib pa 'dra// da yang 'dus pa'i snying po nyon// sems nyid rtsol ba med pa la// bsam pa'i dbang gis bsgyur byas pas// 'khor ba rgya mtshor g.yeng gyur te// mi shes pa la de ltar snang// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/bskyed rdzogs gnyis bstan pa'i le'u ste bcu gnyis pa'o//// de nas 'dus pa'i tshogs rnams la// kun rig chos kyi rgyal po yis// rdzogs chen spyi yis 'khrul tshul ni// 'khor la ched du bka' stsal pa// spyi dang kha 'byams kun brtags dang// tshig zin lung gis 'khrul tshul ni// nga yis khyod la don bshad kyis// legs par nyon la yid kyis zung// rdzogs chen spyi yis 'khrul tshul ni// rin chen gser sbrul mthong stong bzhin// spyi dang kha 'byams kun brtags dang// lung tshig tsam la khungs nges pa// de dag gol bar ngas bshad nyon// ming ni tshig tsam shes pa'i gzhi// mkhas su re nas tha snyad 'dogs// don med nam mkha'i mtha' 'tshol 'dra// tshig tu shes pas don mi rtogs// tshig nyid don yin zer ba 'khrul// da yang rdo rje sems dpa' nyon// kha 'byams dpal bo'i 'khrul pa de// snang bas sems sdud gzhi ru byed// 'khrul pa'i dbye ba lhun grub bcu// 'bras bu mi 'byung log par gol// gzhi dang ma mthun lung rig 'gal// gzhi nyid mi shes skye bo rang// da yang 'dus pa'i snying po nyon// kun brtags lhar ni 'khrul pa yi// phyi nang gsang sngags snang ba bzhin// bskyed dang rdzogs 'dod rim par 'khrul// don ma zin pas 'bras bu med// gzhi la lha med bskyed mi dgos// ma skyes chos sku ye nas yin// da yang 'dus pa'i snying po nyon// tshig zin lung gi 'khrul tshul de// tshig tsam lung la khungs med bzhis// dgongs pa rnam gsum ma shes 'khrul// tshig tsam lung gis don ma rtogs// don med tshig ni 'di dag gis// lung med don go ye sangs rgyas// da yang 'dus pa'i snying po nyon// de dag 'khrul pa rnam bzhi yang// spyi yi mtshan nyid yin pa'i phyir// gzhi dang 'gal phyir don las gol// de phyir lung bstan gdams ngag dgos// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/ rdzogs chen spyi'i 'khrul tshul bstan pa'i le'u ste bcu gsum pa'o//// sdom du bsdus te bstan pa las gsum pa'o//// de nas rdo rje sems dpa' yis// 'dus pa'i 'khor gyi don ched du// kun rig rang byung ston pa la// dad pa'i yid kyis 'di skad gsol// phyi yi rdzogs pa chen po a ti yi// chos rnam sems su ji ltar 'dus// mun pa'i sems kyis ji ltar bsgribs// sems 'dod lta ba ji ltar gol// rang sems nges don ji ltar min// sems ngan dpe yis dbye ba gang// tshogs brgyad skyon du ji ltar che// kun rig ston pas bshad du gsol// de skad zhus pas don gsan nas// 'dus pa'i 'khor la bka' stsal pa// sems su chos rnams gcig pa ni// 'khor ba mya ngan 'das pa'i chos// sgyu ma rnam gnyis spyod yul te// log rtog ye shes tha dad kyang// sems kyi chos nyid ngang du gcig/ da yang rdo rje sems dpa' nyon// de yang de nyid mtshon pa'i dpe// sprin dang gzha' tshon khu rlangs dang// 'byung ba'i cho 'phrul sna tshogs pa// nam mkha'i ngang du ro gcig bzhin// yul gyi tha snyad mtshan ma rnams// rang gi sems kyis rtog pa'i phyir// phyi nang chos kun sems su gcig/de phyir chos rnams ma lus kun// rigs rgyud med phyir sems su gcig/ da yang rdo rje sems dpa' nyon// ma rigs 'khrul pa'i sems 'di yis// byang chub thob 'dod snying re rje// nyid la nyid 'khrul yin pa'i phyir// smyon pas grib ma bsnyegs pa 'dra// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/ chos thams cad sems su 'dus par bstan pa'i le'u ste bcu bzhi pa'o//// de nas 'dus pa'i 'khor rnams la// kun rig rgyal pos bka' stsal pa// ma rig sems kyi mun pa 'di// spang sdud zhen pa'i rtog pa dang// bag chags nyon mongs 'khor ba ste// de bral chos sku'i thig le yin// da yang rdo rje sems dpa' nyon// spang ba'i rtog la skyes pa'i che// 'du byed lnga bcu skar phran 'dra// tshogs brgyad skye 'gag zla ba 'dra// kun gzhi nam mkha'i sprin dang 'dra// de klong thig le nyag gcig yod// dper na nyi ma'i 'od sgrib 'dra// rang la skyes pa'i sgrib pa rnams// spang bas mi spong grib ma 'dra// de phyir spang ba'i rtog pa gol// da yang 'dus pa'i snying po nyon// sdud pa'i rtog pa skyes pa'i tshe// 'du byed mtsho kha'i ngang ngur 'dra// tshogs brgyad nya la sram ldang 'dra// kun gzhi rgya mtsho chen po 'dra// nang na thig le nyag gcig bzhugs// dpe ni u dum wa ra 'dra// kha na mi mngon gting na gnas// de bzhin yul dang 'bral med phyir// de bsad sha la zos pa med// sems yin chos kyis sangs mi rgya// de phyir sdud pa'i rtog pa gol// da yang 'dus pa'i snying po nyon// zhen pa'i rtog pa skyes pa'i tshe// 'du byed lnga bcu nags tshal 'dra// rnam shes tshogs brgyad ri dwags 'dra// kun gzhi'i bag chags rtsa grangs 'dra// de yi gseb na chos sku bzhugs// dpe ni seng ge dkar mo 'dra// gzhan gyis mthong ba med pa bzhin// dngos po'i yul la byang chub med// de phyir zhen pa'i rtog pa gol// da yang 'dus pa'i snying po nyon// sngar gyi bag chags dran pa'i tshe// 'du byed lnga bcu chu ltar 'brub// rnam shes tshogs brgyad me ltar 'bar// kun gzhi'i bag chags gzing ltar 'dzings// de gseb thig le nyag gcig bzhugs// dper ni rin chen gser dang 'dra// de don rnyed pa dka' ba'i phyir// bag chags dge sdig bsags pa'i las// sems la 'dzin pa yod phyir gol// da yang 'khor gyi snying po nyon// phyis kyi nyon mongs skyes pa'i tshe// 'du byed lnga bcu rlung ltar 'tshubs// rnam shes tshogs brgyad rbab ltar rgod// kun gzhi'i nyon mongs mun ltar gtibs// de nang thig le chos sku yod// dper na rin chen 'dam bying 'dra// kha nas mi mthong gting na gnas// ma rig nyon mongs gting na gnas// ma rig nyon mongs skyes pa'i tshe// 'khor ba'i mtha' la zad pa med// de phyir phyi ma'i rgyur byung gol// da yang 'khor gyi snying po nyon// snga phyi'i rtog pa skyes pa yi// sems dang sems byung la sogs pa// ma rig 'khrul pas rtag tu myos// de phyir kun gzhi 'khor ba'i chos// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/ sems kyi mun pas thig le nyag gcig sgrib par bstan pa'i le'u ste bco lnga pa'o//// de nas 'dus pa'i 'khor rnams la// sems 'dod gol bar bka' stsal pa// sems kyis chos sku bsgribs pa'i phyir// 'khor 'das gnyis kyi bar do ni// thog mtha' gcod ni ma shes na// skye rga na 'chi las mi thar// sa mkhan med pa'i tshong pa 'dra// skye 'chi gnyis kyi bar dor ni// chos sku'i ngo sprod ma shes na// ma rig mun pa sangs dus med// sgron ma med pa'i mun khungs 'dra// da yang rdo rje sems dpa' nyon// lus sems gnyis kyi bar do na// gol sa gcod ni ma shes na// nyon mongs zhen pa ldog mi srid// dred mong gdos kyis zin pa 'dra// mnyam bzhag rjes thob bar do na// rgyun du 'bral med ma shes na// blta bsgom gnyis kyis rkyen mi thub// chu bran than pas bskam pa 'dra// srid pa dag gi bar do ni// sangs rgyas dus ni ma shes na// gzugs sku rnam gnyis 'byung mi srid// rin chen gdam du stor ba 'dra// bdag gzhan rtsod pa'i bar do ni// gal mdo tshig gi 'phrang med na// theg pa gzhan las bogs mi thob// g.yul ngo pham pa'i blon po 'dra// da yang 'dus pa'i snying po nyon// de dag gdams ngag med pa'i skyon// sems kyi rtsa ba ma rig pas// 'khrul pa sna tshogs 'byung ba'i phyir// 'khor ba'i rtsa ba chags sdang lngas// ngan song gsum du rtag tu 'khor// de phyir ma rig sems kyis 'khrul// da yang rdo rje sems dpa' nyon// sems kyi 'dod lugs rnam pa bcu// nan brtags lta ba log par bstan// de phyir snang ba sems su byas// nges don shes pa blo yis bcos// yang dag sems med chos ma shes// de phyir lung med rigs pas dpyad// yul sems gcig par blo yis bsres// da yang 'dus pa'i snying po nyon// bde gshegs snying po ma mthong bar// lung ldan nges pa'i don chen ni// ma rnyed bar du sangs mi rgya// de phyir chos kun rtsa ba ni// chos sku rang gi sems kyis bsgribs// da yang 'dus pa'i snying po nyon// sems ni don med 'khrul pa'i phyir// chos sku'i gol sa sems yin pas// rang byung chos nyid sems dang bral// sems med rang byung chos kyi sku// da yang rdo rje sems dpa' nyon// gang yang rung bas ci la yang// yid ni sgo lnga'i rjes 'brang pas// blta bsgom ma yin ma rig sems// rigs drug bskyed pa'i sems yin phyir// ma rig 'khrul pa sems las byung// de phyir sems ni gol bar gsungs// da yang 'dus pa'i snying po nyon// rang byung snying po chos sku la// tshogs brgyad med phyir sems dang bral// sna tshogs yul la zhen gyi bar// rang gi sems zhes de la bya// skyon gyi rtsa ba sems yin pas// de phyir sems kyis sangs mi rgya// sems ni rgyu rkyen bskyed pa'i phyir// nges don ma yin 'khrul pa'i blo// da yang 'dus pa'i snying po nyon// theg dgu sems su 'dod pa'i phyir// nges don a ti'i gol sar gsungs// de phyir sems ni 'khor ba'i chos// dmus long rin chen mi mthong 'dra// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/ rang sems gol bar bstan pa'i le'u ste bcu drug pa'o//// de nas 'dus pa'i 'khor rnams la// kun rig ston pas bka' stsal pa// sems ni 'khor ba'i rtsa ba ste// yul ni sna tshogs snang ba la// sems kyis rtog pa sna tshogs zhen// de phyir sems ni 'khor ba'i rgyu// rtag chad 'dzin pa'i sems yin pas// lta ba log pa sems las byung// gang dran rang sems 'khrul pa ste// sems las byung ba'i 'khrul rtog gis// chags sdang thams cad bskyed par byed// de phyir 'khor ba sems kyis byas// de nas 'khor ba'i sdug sems gol// da yang 'dus pa'i snying po nyon// sems kyis byas pa'i rtog pa yis// skye ba rgyud pa grangs med pa// sems kyis byas phyir rang byung med// de phyir sems 'di glo bur 'khrul// de brtas chos brgyad dam par zhen// da yang rdo rje sems dpa' nyon// nges don ma mthong glen pa kun// sems las ma gtogs chos med zer// de phyir rmongs pa'i blo re nor// glen bsgom mun pa bsgoms pas phung// gang dran sems kyi chos 'di log/ yid la byed pa'i las ngan kun// blang dor sems 'di shin tu 'chol// drang don sems su bstan pas phung// dpyad bzo byas pas sems 'di dkrugs// mkhyen du re ba'i sgrin tshig gis// nges don ma nor bka' 'di bslad// da yang 'dus pa'i snying po nyon// ma rig rmongs pa'i gang zag kun// chos sku rang yan sems yin zer// de phyir tshig las don ma go// ming las nges don shes pa kun// de phyir sems kyis byang mi chub// de nyid btsal ba'i mthun dpe ni// rjes nas btsal pas glang po rnyed// sems kyi phyogs nas don btsal na// rang rig rgyal po ye shes rnyed// de rnyed sems su 'dzin pa bral// 'dzin bral sems med rang rig sku// de don 'bral med byang chub klong// sems bral ting 'dzin rgyun du gnas// da yang 'dus pa'i snying po nyon// sems las sangs rgyas 'dod pa ni// mo gsham bu dang gnyen byed bzhin// snang ba sems yin zer ba de// ra gan gser du 'dzin dang 'dra// de bas lung ldan don rnyed na// rang byung snying po'i don rtogs pas// ma rig sangs nas rang sems brlag/de phyir chos sku 'gyur ba med// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/ rang sems nges don med par bstan pa'i le'u ste bcu bdun pa'o//// de nas kun rig rgyal po yi// sems kyi rnam grangs mtshon pa'i dpe// 'dus pa'i 'khor la brtser dgongs nas// ched du dbye ba bka' stsal pa// seng ge lta bu'i sems dang/ gzig lta bu'i sems dang/ dom lta bu'i sems dang/ dred mo lta bu'i sems dang/ spyang ki lta bu'i sems dang/ g.yi spyang lta bu'i sems dang/ 'phar ba lta bu'i sems dang/ khyi rgod lta bu'i sems dang/ gsa' lta bu'i sems dang/dug sbrul lta bu'i sems la stsogs pa dug pa can bzhin no// bya khyung lta bu'i sems dang/ glag lta bu'i sems dang/ bya rgod lta bu'i sems dang/ ngang pa lta bu'i sems dang/ rma bya lta bu'i sems dang/ khra lta bu'i sems dang/ bya rog lta bu'i sems dang/ bya kang ka lta bu'i sems dang/ ne tso lta bu'i sems dang/ pha wang lta bu'i sems dang/ srin bya lta bu'i sems dang/ 'ug pa lta bu'i sems dang/khyim bya lta bu'i sems la stsogs pa sred pa can bzhin no// da yang 'dus pa'i snying po nyon/ glang po che lta bu'i sems dang/ ma he lta bu'i sems dang/ ba lang lta bu'i sems dang/ phag rgod lta bu'i sems dang/rta lta bu'i sems dang/ rnga mo lta bu'i sems dang/ bong bu lta bu'i sems dang/ khur bu lta bu'i sems dang/ gzhan gyis dbang byas pa la sogs pa bkol spyad can gyi sems bzhin no// da yang 'dus pa'i snying po nyon// srin po lta bu'i sems dang/ nya chen lta bu'i sems dang/ sdom lta bu'i sems dang/ sre mong lta bu'i sems dang/ byi la lta bu'i sems dang/ grog ma lta bu'i sems dang/ srin bu lta bu'i sems dang/sbrang bu tre la ta la sogs pa'i gnod 'tshe can gyi sems bzhin no// da yang 'dus pa'i snying po nyon/ snyan dngags pa'i sems dang/ spre'u lta bu'i sems dang/ byi la lta bu'i sems dang/ sprang po lta bu'i sems dang/smad 'tshong ma lta bu'i sems dang/ tshong pa lta bu'i sems dang/ smyon pa lta bu'i sems dang/ tsher ma lta bu'i sems dang/ rdo zlum lta bu'i sems dang/ shing lta bu'i sems dang/ lug lta bu'i sems dang/byi ba lta bu'i sems dang/ mgron khyi lta bu'i sems dang/ wa lta bu'i sems la stsogs pa dman par zhen pa'i sems dang ldan pa'o// de yang rnam grangs mdo tsam las/ bgrang gis mi langs brjod las 'das// sems ngan skyon gyi phung po la// dpe yis dbye ba bstan pa yin// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/ sems kyi dpe dbye bstan pa'i le'u ste bco brgyad pa'o//// de nas 'dus pa'i tshogs rnams la// kun rig ston pa chos rje yis// tshogs brgyad 'khrul pa yin par ni// dad nyan 'khor la bka' stsal pa// 'khor ba rnams kyi rtsa ba ni// yul dang sems ni gnyis su 'dus// yul kyang rang sems 'khrul pa ste// sems ni rnam shes tshogs brgyad la// sems las byung ba lnga bcu gcig/ rtsa ba kun gzhi nyid du 'dus// da yang rdo rje sems dpa' nyon// sems can kun la yod lugs ni// phyi bltas pa dang nang bltas dang// gnyis kar bltas pa'i shes pa dang// bcos dgos pa dang mi dgos dang// rtag chad bral dang ngo bor gnas// yang dag yod dang byin brlab tu// len du phye nas bstan pa'i don// tshogs brgyad sems su snang ba dang// 'khor ba'i bag chags brtags pa'i phyir// nges don snying po ma yin pas// da yang 'dus pa'i snying po nyon// sgo lnga'i rnam shes ngo bo ni// yul snang tsam na shes pa skye// yul mi snang na shes pa 'gags// yid kyi rnam shes ngo bo ni// yul snang sna tshogs sems pa'i phyir// chags sdang log rtog dag tu 'dzin// rnam rtog sna tshogs ngo bor snang// nyon mongs yid kyi ngo bo ni// nang du zhen pa dam par 'dzin// rtag tu 'dzin pa ngar 'dzin byed// kun gzhi'i rnam shes ngo bo ni// ma rtogs tha mal dus tsam na// rnam rtog rgyas shing rig pa bsgrib// rtogs pa mngon du gyur tsam na// ma rig bsgribs shing ye shes rgyas// gzhan du de dang mtshungs par ni// tshogs bdun skyes na 'phel bar snang// tshogs drug 'gags na bsgribs par snang// des na shes pa'i tshogs brgyad kyang// yang dag ma yin 'khor ba'i chos// da yang 'dus pa'i snying po nyon// sems can mos pa tha dad pas// gang zag blo yi rim pa la// gnas 'gyur chos su bstan pa yang// bkri drang ldem dgongs tsam du bstan// de'i skyon yon khyad par ni// 'byung ba me chu'i dpe bzhin du// ye shes log rtog khyad par kyis// shes pa kun gzhi mtshan nyid ni// rgyu rkyen gnyen pos 'jig pa dang// dus gsum mi rtag 'gyur ba dang// bag chags mtshan ma'i rten byed pas// yang dag ma yin 'khor ba'i rgyu// da yang 'khor gyi snying po nyon// de dag rnam shes tshogs brgyad kun// ma rig rkyen las bskyed pa'i phyir// sdug bsngal 'ba' zhig bde ba med// de phyir chos sku'i gol sar gsungs// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/ tshogs brgyad gol sar bstan pa'i le'u ste bcu dgu'o// sdom du bsdus te bstan pa bzhi pa'o//// de nas rdo rje sems dpa' yis// 'dus pa'i 'khor la phan gdags phyir// kun rig chos kyi rgyal po la// yid kyi dran pas 'di skad gsol// mtshan nyid theg pa ji ltar 'khrul// phyi nang gsang sngags sgrib pa gang// thabs med yon tan ji ltar rdzogs// theg chen kun dang mi 'gal gang// rdzogs chen rang byung dbye ba gang// lam dang 'bras bu'i khyad par ci// theg gzhan sun ni ji ltar 'don// kun rig ston pas bshad du gsol// de skad zhus pas don gsan nas// 'dus pa'i 'khaur la bka' stsal pa// 'gro drug sems can thams cad la// phung po lnga yis kun khyab ste// spyi dang rang gi mtshan nyid kyis// so sor dbye ba ngas bshad do// dang po spyi yi mtshan nyid ni// phung po lnga ru 'dod pa'i gzhung// sems tsam theg chen pa na re// phung po lnga las ma gtogs pa'i// chos nyid gzhan na yod min phyir// phung po lnga ni gang dag yod// de yang 'dus pa'i snying po nyon// rgyu ni phung po rnam lnga yang// lhar ni ma shes dang po yis// sa dang pha rol phyin pa yi// lam lnga rim gyis bgrod byas nas// bsod nams kyi ni tshogs bsags te// rnam par mi rtog ting 'dzin la// sgrib pa rnam pa gnyis sbyangs nas// thabs dang shes rab gnyis ldan nas// rang rig don dam nges pa yis// 'bras bu thob pa'i dus na ni// sku gsum ye shes bzhi ru 'dod// da yang rdo rje sems dpa' nyon// phung po lnga ru 'dod pa de// yang dag don dam ma yin te// du mar snang dang rkyen gyis bskyed// gnyen pos 'jig cing bsgyur yod phyir// kun rdzob sgyu ma tsam yin pas// yang dag nyid du 'dod pa 'khrul// mi dang tho yor thag sbrul bzhin// 'khrul pa yin par the tshom med// da yang rdo rje sems dpa' nyon// phung po lnga yi dbye ba dang// mtshan nyid so so'i tha dad pa// sems tsam gzhung du zhib bstan phyir// nges don skabs su ngas ma bshad// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/sems tsam gyi gzhung sun 'don pa'i le'u ste nyi shu pa'o//// de nas 'dus pa'i 'khor rnams la// kun rig ston pas bka' stsal pa// gsang sngags phyi nang 'dod pa'i gzhung// phung po khams dang skye mched sbyangs// sangs rgyas yin par blos bsgyur nas// ye shes sems dpa' mchod la sogs// tshogs kyi bsod nams bskyed nas ni// chos nyid sgrib pa bral dus ni// 'bras bu 'byung ba'i nges pa ni// sku gsum ye shes lngar 'dod pas// rang rig chos sku nges don bsgribs// da yang rdo rje sems dpa' nyon// a nu yo ga'i 'dod pa yis// phung po lnga sogs rtogs tshogs kun// ma bskyed rdzogs par 'dod pa des// 'bras bu ye shes lnga dang ni// sku lnga lhun grub 'dod pas bsgribs// da yang 'dus pa'i snying po nyon// rang bzhin lhun grub sangs rgyas ni// dus gsum dag tu mi 'gyur zhing// gnyen po cis kyang bsgyur du med// thabs ni gang la mi brten cing// rang byung kun tu bzang pos byas// da yang 'khor gyi snying po nyon// phung po rnam pa lnga las ni// sku lnga ye shes lnga ru 'dod// phung po gcig las med pa la// 'bras bu tha dad 'byung ba yi// gnas 'gyur du ni sangs rgyas nas// rigs lnga ye shes rdzogs 'dod pa// shin tu mi 'thad 'gal ba'i phyir// ma rig rmongs pas rang la bsgribs// de don 'gal zhing bsgribs pa ni// rgyud gzhan du ni zhib par bstan// nges don skabs su ngas ma bshad// da yang rdo rje sems dpa' nyon// ming gi rnam grangs lnga bstan kyang// don gyi ngo bo gcig tu 'dus// rtsal shugs tshul du gnyis su snang// don la dgos med tshig dang 'brel// de phyir byis pa'i sgrin tshig 'dra// phung po khams dang skye mched kun// sems su byas shing blo yis bcos// de phyir yang dag phung po min// don dam chos la smos ci dgos// de phyir ma rig rmongs pa kun// gnas 'gyur sangs rgyas 'dod pas phung// gtan du 'khyams pa snying re rje// rdzogs pa chen po nges don thams cad 'dus pa ye shes nam mkha' dang mnyam pa'i rgyud las/sngags phyi nang gi 'dod gzhung sun bton pa bstan pa'i le'u ste nyer gcig pa'o//// de nas 'dus pa'i 'khor kun nyon// kun rig ston pas bka' stsal pa// mu stegs chad la skur btab kyang// nges don snying po ma mthong phyir// nan tshig sgro skur skyon bkal kyang// don dang mthun par mi 'gyur ro// da yang rdo rje sems dpa' nyon// theg pa 'og ma'i chos kun bzhin// shes rab thabs la brten dgos na// byas pa yin phyir gnas lugs min// sku dang ye shes 'byung mi srid// de phyir thabs la rag lus med// rang byung snying po chos sku ni// nyi ma dang ni 'od bzhin du// shes rab chos sku gcig pu la// sku dang ye shes kun la rdzogs// da yang rdo rje sems dpa' nyon// nges don bka' yis drang don kun// sun bton 'dod thob chen po yin// nges 'don bka' la sun bton med// dngos su snang yang byung ba min// don dam rang bzhin ngo bor gnas// don du bya ba mi dmigs kyang// rang byung yon tan shugs la rdzogs// dngos su med kyang don du snang// chu zla'i dkyil 'khor lta bu la// rang bzhin lhun gyis grub pa yis// rang byung rang la shugs kyis byung// da yang rdo rje sems dpa' nyon// phung po dbye ba 'dus lugs kyang// thun mong theg par sgo bstun phyir// kun dang mi 'gal bstan pa yang// drang don yin gyi yang dag min// yang dag nges don yang tig ni// dper na shing tog smin pa la// 'bras bu shugs kyis 'byung ba ltar// chos sku sgrib pa med pa la/ sku gsum ye shes lnga rnams kyang// ma btsal ye nas rang bzhin rdzogs// rigs lnga'i sangs rgyas don gyis tshang// thams cad mkhyen pa'i ye shes kun// ma lus thog pa med par mkhyen// rdzogs pa chen po nges don thams cad 'dus pa/ye shes nam mkha' dang mnyam pa'i rgyud las/ thabs la brten mi dgos par yon tan thams cad rdzogs par bstan pa'i le'u nyer gnyis pa'o//// de nas 'dus pa'i 'khor rnams kyis// kun rig chos kyi rgyal po la// theg pa gzhan dang sgo bstun phyir// phung po rgyu 'bras don zhus pa// phung po rnam pa lnga po yang// yang dag yod dang byin brlabs su// rtag chad bral dang ngo bor gnas// kun rig ston pas bshad du gsol// de skad zhus pa'i don gsan nas// 'dus pa'i 'khor la bka' stsal pa// rnam shes phung po yang dag yod// phung po bzhi ni byin rlabs 'byung// rtag chad bral ba rnam shes kyi// kun gzhi rang gi ngo bo yin// rtag chad ngo bo gnas pa ni// phung po gzhan dang tshogs bdun yin// da yang 'dus pa'i snying po nyon// de yang 'bras bu sku lnga dang// ye shes lnga rnams yod tshul ni// 'dus ma byas kyi nam mkha' bzhin// dus gsum 'du 'bral med par ni// chos sku ye shes yang dag yod// sku dang ye shes gzhan dag ni// byin gyis brlabs las byung ba ste// gza' skar rgya mtshor ji bzhin du// btsal du med pa'i shugs las byung// chos sku me long lta bu ni// rtag chad gnyis dang bral bar gnas// theg pa gzhan du zhib bstan phyir// nges don skabs su ngas ma bshad// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las theg pa spyi dang mi 'gal bar bstan pa'i le'u nyer gsum pa'o//// de nas 'dus pa'i 'khor rnams la// yang ti rang gzhung bka' stsal pa// rang byung ye shes chos sku la// me long lta bu'i ye shes kyang// yang dag don du mi 'dod phyir// ye shes gzhan la smos ci dgos// da yang rdo rje sems dpa' nyon/ rang byung ye shes chen po ni// dus gsum dag tu mi 'gyur la// me long lta bu'i ye shes kyang// thog ma med kyang tha ma yod// de phyir rkyen las byung ba yin// khams gsum 'khor ba'i dus tsam na// kun gzhi'i rnam par shes pa la// gnyen pos bskyed pas gnas 'gyur gyis// ye shes bya ba'i ming yang med// nges don yang ti'i ming gis ni// khams gsum 'khor ba'i dus na yang// rang byung ngo bo nyid kyi sku// chos sku khyad par ye gnas phyir// sangs rgyas 'bras bu thob dus na// ye shes chos kyi sku ni gnas// dang po rgyal ba'i bka' 'di yang// thog ma'i byung tshul ma shes na// da lta bsgrub pa'i thabs mi shes// lam gyi the tshom mi chod bzhin// tshi chad pa yi sems su 'gyur// da yang rdo rje sems dpa' nyon// kun bzang thugs kyi nying khu 'di// sprul pa bzhi yi thugs brgyud nas// gdams ngag ma chad gsang ba'i bka'// u rgyan yul nas rim brgyud nas// 'bras bu sangs rgyas nges pa gcig/ dus kyi tha ma deng sang nas// bod kyi mtha' 'khob yul du 'byung// de phyir don dam chos sku las// chos ni gzhan na yod mi srid// da yang 'dus pa'i snying po nyon// 'o na khyed kyi 'dod pa de// sems can las ni sangs rgyas pa// de nyid 'gyur ba ma yin nam// nges don 'gyur ba ma yin te// ma rtogs bag chags bcas pa dang// rtogs pa bag chags bral ba yang// khyad par tha dad snang gyur kyang// don la rgyu 'bras rim gyis med// ngo bo gzhi yis chos sku dang// rtogs pa'i ye shes chos sku gnyis// ngo bo gzhi la tha dad med// nyi ma rang gi ngo bo la// mun sgrib grang ba gang yang med// glo bur sprin gyis bsgribs tsam na// nyi 'od med pa ma yin te// ngo bo 'phel 'grib med pa ltar// rtogs ma rtogs kyi khyad par las// sangs rgyas sems can gcig pa'i phyir// gzhi la dus gsum 'gyur med yin// da yang rdo rje sems dpa' nyon// lung ldan bstan pas thams cad mkhyen// de dus 'bras bu sangs rgyas phyir// ngo bo dag la 'phel 'grib med// skye 'gag med par rgyun du gnas// sems can dus kyi chos sku la// de las 'phel ba rdul tsam med// de phyir yang dag yod par bshad// da yang 'dus pa'i snying po nyon// 'o na dus gsum mi 'gyur yang// thams cad chos skur 'dod pa de// lung rigs gnyis dang 'gal ba dang// sdud pa'i rtog par 'gyur ba'i phyir// yod na rtag chad khyad ci yod// de yang don dang mi 'gal te// thams cad chos skur 'dus pa de// bsdus nas 'dus pa ma yin te// nyi 'od bu ram mngar ba bzhin// dus gcig rdzogs pas chos kyi sku// rang bzhin ngang gis gnas pa bzhin// rgyu rkyen tshogs 'dus ma yin pas// lung dang rigs pa ci la 'gal// kha dog dbyibs su med pa la// rtag pa'i skyon gyis ci la gos// mi 'gyur ye nas gnas pa la// rtag ces zer na rtag dka' bas// chos sku 'gyur med 'dod thog yin// chos sku rgyun du ye yod phyir// chad pa'i skyon gyis ye ma gos// dngos po mtshan ma med pa'i phyir// rtag pa ther zug nga la med// de phyir skyon med gnyis kar gnas// da yang rdo rje sems dpa' nyon// chos 'di mchog tu gsang ba yis// sgo lnga dag gis spyod yul min// de phyir chos sku brjod las 'das// brtags pa'i tha snyad kun dang bral// de phyir sems kyi yul las 'das// rang byung rig pa'i ye shes la// tshig gis mtshon pa thams cad nor// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ yang ti shan dbye ba bstan pa'i le'u ste nyer bzhi pa'o//// de nas kun rig ston pa yis// 'dus pa'i 'khor la bka' stsal pa// nyan thos lam dang 'bras bu'i gzhung// tshe ni snga ma yang snga la// dge sdig las ni gang byas pa// da lta lus ni blangs pa la// bde sdug gnyis ni dus 'dir 'byung// phyi ma 'khor bar ltung dogs nas// sdig spang dge ba spyad byas nas// 'bras bu lha mi'i go 'phang thob// da yang 'dus pa'i snying po nyon// rgyu rkyen 'tshogs pa'i dge spyad na// las des 'bras bu thob dus ni// gzhan don mthar phyin 'grub pa yi// 'bras bu sangs rgyas thob par du// mtho ris gnas la rten bcas te// lha dang mi yi them skas la// rim par 'dzeg nas sangs rgyas 'byung// da yang 'dus pa'i snying po nyon// khyed ni yang ti rdzogs chen pa// gang la yang ni mi brten par// rtogs pa gcig pus chog zer ba// rgya rkyen ma tshang 'bras bu 'dod// stong pa nyid kyi mtha' ru lhung// lung rigs gnyis dang shin tu 'gal// des na dge ba tshogs par spyad// 'bras bu lha dang mi yi ni// 'bras bu thob par bya ba la// rang sems rtogs pas mi chog ste// bsod nams tshogs ni bsags nas kyang// mya ngan 'das pa'i mtha' brten te// ting 'dzin rtse gcig bsgom gyur na// 'bras bu thams cad mkhyen pa yi// ye shes thob par 'gyur ba la// khyed ni yang ti rdzogs chen pa// sems nyid rtogs pas chog zer ba// 'khor ba las ni thar gyur kyang// mya ngan 'das pa'i mtha' ru lhung// lam de'i 'bras bus sangs mi rgya// de phyir 'bras bu bla med pa'i// byang chub thob par bya ba la// rgyu ni sa dang pha rol phyin// lam la rim gyis bgrod nus na// gzhan don 'bras bu phun sum tshogs// gzugs sku rnam gnyis thob par 'gyur// shes rab mi rtog rtse gcig tu// ma yengs don la bsgoms gyur kyang// bdag don chos sku 'grub par 'gyur// da yang rdo rje sems dpa' nyon// 'bras bu bdag dang gzhan don du// phun sum tshogs pa thob pa ni// 'di las thabs chen nye ba'i lam// chos nyid gzhan na med do zer// de dag dbye ba tshogs bsags thabs// snying rje chen pos gzhi bzung ba// theg pa gzhan du zhib bstan phyir// nges don skabs su ngas ma bshad// da yang rdo rje sems dpa' nyon// gsang sngags phyi nang 'dod pa'i gzhung// lam dang 'bras bu'i khyad par ni// thabs dang shes rab zung 'brel na// che ba'i yon tan 'bras bu rnyed// 'bras bu thams cad mkhyen pa yi// ye shes thob par bya ba la// thabs dang shes rab 'dzom par dgos// de phyir thabs ni gang zhe na// lan gcig dus kyi deng sang na// nges don zab mo khyad bsad nas// ma rig glen pas kun bslus phyir// byi bshugs pho mo kun bsogs nas// smin par byed pa'i lam yin la// phyi nang gsang ba'i dbang dgos zer// 'dod chags lam du khrid byas nas// phung po khams dang skye mched kun// lha dang lha mor gnas 'gyur phyir// rim gyi bskyed dang ma bskyed rdzogs// cho ga gsum mam bdun gyis ni// bskyed cing bsgyur byas ye shes sems// spyan 'dren bstim dang mchod pa sogs// gzhung dang ldan par byas gyur kyang// mthar phyin 'bras bu thob dus na// gzugs sku rnam gnyis 'byung nas kyang// byang chub sems dpa' man chad nas// sems can dmyal ba yan chad du// rang don mthar phyir grub pa la// stong nyid ting 'dzin bag chags sbyang// chos sku thams cad mkhyen pa yi// ye shes don ldan sku gsum rdzogs// da yang rdo rje sems dpa' nyon// 'di las lhag pa'i nges don chos// rdzogs pa chen po khyod la med// de phyir thabs la brten nas ni// shes rab lta bas thag bcad ste// 'bras bu nges par 'byung bar 'dod// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ sngags mtshan nyid kyi lam dang 'bras bu'i dbye ba bstan pa'i le'u ste nyer lnga pa'o//// de nas 'dus pa'i tshogs rnams la// kun rig ston pas bka' stsal pa// theg brgyad lam gyi gol sa ni// khyed cag blo dman ma rig pas// thabs dang shes rab 'brel dgos zer// 'khrul pa brtas pa'i rtog pa yin// da yang 'dus pa'i snying po nyon// dper na mar ni 'dod pa la// chu bsrubs pas ni mar med ltar// thabs kyi mtshan ma dngos su spyad// zhen pa'i sems kyis byang mi chub// rang sems chos skur ma rtogs na// phyi nang gsang ba'i dbang bskur kyang// 'bras bu sangs rgyas 'byung mi srid// shin tu rnal 'byor rdzogs chen la// pho mo lus rten dbang mi dgos// de phyir khyad 'phags rig pa'i dbang// bstan ma thag tu gdams ngag thob// cig car nges don dbang bskur bas// dbang dang mnyam bshad gdams ngag phog/ rang rig chos sku dus 'dir rtogs// de ltar yin par ma shes phyir// dper na nyi ma'i snying po la// sprin ni dkar nag gnyis kas bsgribs// de bzhin thabs la brten pa yis// gang zag kun gyis dngos por bzung// de phyir lam gyi gegs su gsungs/ de yang rdo rje sems dpa' nyon// dper na skyes bu mi rnams kyis// sngags med pa yis dug zos na// a shu ka yi rkyen yin phyir// che chung gang zos gnyis kas 'chi// nges pa'i lung ldan don med phyir// thabs ni che chung gnyis kas bsgrib// rtsol ba byas pa thams cad gol// de phyir rang rig chos sku ni// sems kyi gseb nas ngos zin na// thabs ni gang la brten pa med// de phyir man ngag snying po'i chos// da yang 'dus pa'i snying po nyon// khyed cag theg pa 'og ma pas// mtshan ma dngos su spyod sgo nas// 'bras bu thams cad mkhyen pa yi// ye shes thob par 'dod pa ni// shin tu gti mug rmongs pa'i gnas// kun brtags bsgom pa'i chos pa kun// lam gyi gegs ni thabs yin phyir// gol sa yin par kun nas bshad// de phyir thabs la brten mi dgos// da yang 'dus pa'i snying po nyon// sangs rgyas nyid du 'gro ba yi// nges pa'i lam ni gang yin pa// thog mar lta ba'i gdeng dang ni// ting 'dzin spyod pa dus gcig tu// rang byung mnyam pa'i don rtogs phyir// brjod pa'i tha snyad kun bral ba'i// thig le nyag gcig chos kyi sku// shes dang sangs rgyas dus mnyam phyir// de las lhag pa'i chos gzhan med// da yang rdo rje sems dpa' nyon// khyed theg pa 'og ma pa// bye ma las ni mar btsir 'dra// bem po 'byung ba rnam pa lnga// sangs rgyas 'dod pa'i snying rul kun// bskal par bsgrubs kyang 'grub mi srid/ bem po rang yang sems yin na// lus la 'pho 'gyur yod pa bzhin// sems la skye shi yod par 'gyur// de phyir rang byung ye shes min// da yang 'dus pa'i snying po nyon// rdzogs chen lam ni ji ltar 'dod// yang ti don lam chen po ni// khyung chen nam mkhar lding ba bzhin// dran pa tsam gyis chos skur gsal// de tsam nyid na ye shes thugs// de phyir ma bgrod dam pa'i lam// dper na nor bu rin chen bzhin// rtogs pa tsam gyis chog pa'i chos// bdag gzhan don ni lhun gyis grub// de phyir nges don ya mtshan che// da yang rdo rje sems dpa' nyon// khyed cag theg pa 'og ma pa// dper na til gyi mar yod kyang// ma btsir bar du mar mi 'byung// de bzhin rang la yod mod kyang// ma bstan bar du shes mi srid// bskal pa 'bum phrag brgya yis bar// 'dus byas chos spyod byas gyur kyang// 'bras bu sangs rgyas 'byung ba min// da yang 'dus pa'i snying po nyon// de dag gzhan gyis lam mang yang// rang la yod par ma shes nas// gzhan nas tshol ba rmongs pa'i chos// de phyir rtsol med chos 'di gces// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ theg pa gzhan sun 'don par bstan pa'i le'u ste nyer drug pa'o//// sdom du bsdus te bstan pa lnga pa'o//// de nas rdo rje sems dpa' yis// 'khor gyi rgyud smin bya ba'i phyir// nges don chos la 'jug don du// bden pa'i yid kyis 'di skad gsol// thun mong khyad 'phags dbang lnga ni// yang dag chos kyi rtsa ba'i dbang// gong 'og rim pa ji ltar bskur// kun rig ston pas bshad du gsol// de skad zhus pas don gsan nas// dad ldan 'dus pa'i 'khor rnams la// thun mong khyad 'phags dbang lnga ni// kun bzang nga yis bshad kyis nyon// thun mong sngon 'gro sta gon dang// 'jug sgo dbang gi rim pa yang// ngo bo dbye ba dpe dang gnas// rdzas dang nges tshig las 'da' dka'// rtags dang mthar thug kun la sbyar// da yang 'dus pa'i snying po nyon// sngon 'gro las kyi bya ba ni// yid 'thad bar chad mi 'byung 'gro// bkra shis bde ldan 'dod dgu rnyed// nyams dga' dben pa'i gnas de ru// tshad ldan pa yi dkyil 'khor bca'// thig gdabs dkyil 'khor bri la sogs// gzhung dang mthun par bskyed bris la// mdzes ldan yid 'jug rgyan dgod de// de rjes dbang rdzas thun mong ni// bum pa lha grangs bstun byas te// gtor ma la sogs tshogs kyi rdzas// ci 'byor nus tshad tshogs par bya// da yang rdo rje sems dpa' nyon// ye shes lha yi don bstan phyir// khyad par 'phags pa'i rdzas lnga dang// 'jug sgo lnga yi rdzas rnams dang// ras sam shing shun gro ga la// bris te lung ldan byin gyis brlabs// mtshams kyi dkyil du bzhugs par bya// de nas dad ldan 'khor sogs te// dam tshig sems med brtson 'grus can// byang chub don du gnyer ba des// mos gus dad pas lus btud nas// bla ma rje btsun spyan snga ru// theg pa kun dang sgo bstun phyir// sgo gsum smin pa'i tshul gyis ni// sdom bzung sems ni bskyed par bya// da yang 'dus pa'i snying po nyon// de rjes don la 'jug ched du// dang po sta gon la gnas phyir// sgo lnga mi g.yengs brda' bcings pa// brkyang phyag lha dang dal du gzhug/ las ni don dang ldan pa'i phyir// gang mthong ci dran dris pa dang// lan dang sbyar la dngos grub bstan// de phyir dad pas gnas par bya// da yang 'dus pa'i snying po nyon// shes rab sta gon gnas bya'i phyir// dkyil 'khor la ni kha bltas te// phyogs bzhi dbus dang lnga ru ni// phung po la ni stong rgyas gdab// sngon 'gro las dang sta gon gnyis// skal ldan kun gyi lam yin phyir// chos rnams kun gyi rtsa ba ste// 'jug sgo lam la gces par gsungs// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ dbang gi sngon du 'gro ba'i las bstan pa'i le'u ste nyer bdun pa'o//// de nas 'dus pa'i tshogs rnams la// rgyud ni smin par bya ba'i phyir// thun mong dbang gi rim pa yang// kun rig ston pas bka' stsal pa// lta ba lam du khyer ba'i dbang// dkyil 'khor bcug la dam chu blud// 'phreng ba dor zhing nas 'bru gdags// dbu rgyan thod pa brtul zhugs dang// rdo rje dril bu ming gi dbang// lus ngag yid gsum phyir mi ldog/ nges pa'i bla mar lung bstan pa// go rim bzhin du ngas bshad nyon// ma rig mun pa gsal ba'i phyir// phyi rol nas ni mig bsgribs te// rdo rje lam nas 'khrid 'ongs la// lung bstan dkyil 'khor ltar bcug ste// dkyil 'khor bzang po 'di la ltos// da ni dad pa rab tu skyes// bu khyod kyis ni ji ltar mthong// gang mthong khyod kyi dngos grub yin// da yang 'dus pa'i snying po nyon// 'thung zhig dam tshig chu 'di 'thung// bla na med kyang rdo rje dmyal// dam tshig 'das nas bsreg par bya// dam tshig thub na dngos grub thob// skye bo dang ni theg pa dman// snod dang mi ldan 'di bzlas na// mgo lus tshal pa brgya ru 'gas// phyi ma rdo rje dmyal bar ltung// de phyir rab tu gsang bar gyis// rin chen phreng ba 'di dor bas// ye shes lha yi dngos grub ni// gang la phog pa yi dam lha// dus 'dir khyod la dbang zhig bskur// rig pa'i don rtogs me tog rgyus// chos nyid rtags kyis rgyan btags pas// ye shes chen po mchog gi dbang// che ba'i yon tan rdzogs par shog/ chos sku'i snang ba mtshon pa'i phyir// rigs lnga dbu la rgyan bcings pas// ye shes rigs lnga dbyer med pas// dbu rgyan dbang mchog thob par shog/ da yang rdo rje sems dpa' nyon// rab byung thod pa chos kyi dbyings// ye shes lnga yis rang bzhin las// nyi khri chig stong chos rnams 'byung// rang byung gzhal yas dbang thob shog/ rin chen thod pa'i snod 'di ru// dam rdzas sna tshogs sbyar ba 'di// skal ldan khyod kyis 'di 'thungs pas// dpa' brtul mchog gi dbang thob shog/ rdo rje dril bu rig pa 'dzin// thabs dang shes rab dbang chen te// 'khor 'das chos la rang dbang yod// ye shes chen po'i dbang thob shog/ khyod ni rjes su rnal 'byor te// dus 'di nyid du sangs rgyas pa// 'gro la phan phyir sems bskyed la// yi dam lha ni rtag tu bsgoms// da yang 'dus pa'i snying po nyon// oM ni ye shes chos kyi sku// bde chen mchog tu longs spyod pa'i// mkha' dbyings klong yangs b+ha ga la// rab brjid sku yi dbang thob shog/ dam tshig can gyi lce stengs su// yi ge can gyi oM bsgoms pas// skye med tshangs pa'i gsung snyan che// rig pa gsung gi dbang thob shog/ rab byung chen po ye shes thugs// rgyal ba'i dpal gyi be'u thugs brgyud nas// chos nyid rig pa'i 'od 'phros pas// skal ldan dus kyi dbang thob shog/ da yang 'dus pa'i snying po nyon// yang dag nges don dbang bskur bas// 'khor ba'i mtha' ni mi ltung zhing// mya ngan las 'das 'bras bu mchog/ phyir mi ldog pa'i dbang thob shog/sangs rgyas bka' yi dbang gnas pa// lung ldan nges pa'i dam pa'i chos// rna ba'i dbang por don gsal ba// nyan pa'i dbang ni thob par shog/ bde gshegs thugs kyi sras po mchog/ sngon gyi thugs dam mi 'da' bar// sems can kun la chos ston pa'i// bla ma'i lung ldan dbang thob shog/ sangs rgyas dgongs pa'i dbang bskur bas// bsnyen bsgrub rnam bzhi las bsgrub pa'i// phyi mar mi sdod dus 'di/ ru// rig 'dzin grub pa'i dbang thob shog/ de dag thun mong dbang rnams kyi// rim pa bzhin du dbang thob na// dus 'dir thun mong dngos grub thob// de phyir dad pas yang dag zungs// rdzogs pa chen po nges don thams cad 'dus pa/ye shes nam mkha' dang mnyam pa'i rgyud las/ thun mong dbang bskur ba'i rim pa bstan pa'i le'u ste nyer brgyad pa'o//// de nas 'dus pa'i tshogs rnams la// kun rig chos kyi rgyal po yis// thun mong ma yin khyad 'phags pa'i// rgyal thabs spyi blugs bka' stsal pa// lung ldan bla ma nges pa la// zhu ba 'bul dang spro ba dri// phyir mi ldog par dam bca' dang// gnang ba sbyin dang sku gsung thugs// yon tan phrin las dbang bskur zhu// de skad gsol gdab brtul zhugs phul// rim pa bzhin du bskor zhing nod// da yang rdo rje sems dpa' nyon// kun bzang rje btsun bdag la dgongs// ma rig dbang gis don ma rtogs// de phyir bzlog don rgyal ba'i bka'// ye shes rgyud smin rig pa'i dbang// thugs rje chen pos bdag la bskur// dad ldan nges pa'i shes rab can// rdzogs chen chos la 'jug spro'am// 'khor 'das ma rig nges don gyi// zab mo'i chos la mi skrag gam// yang dag nga yis bstan pa yi// lung ldan dam tshig gzung thub bam// thugs nas snyan du brgyud pa yi// nges don man ngag gsang thub bam// da yang 'dus pa'i snying po nyon// bla ma kun bzang spyan lam du// bka' las mi 'da' phyir mi ldog/ sangs rgyas chos sku rtogs bar du// rkyen dbang mi btang dam bca'o// skal ldan rigs kyi bu khyod nyon// rang gi dam bca' ji bzhin du// nges don sangs rgyas gsang sngags dbang// yang dag ma nor khyod nos shig/ nges don sangs rgyas chos kyi sku// thig le rang byung 'od gsal ba// rig pa'i ye shes mngon du 'gyur// ye shes sku mchog bdag la skur// ngas don ye shes tshangs pa'i gsung// tshig gi don mtshon yid kyi go// nges don gsal bar rig pa'i gsung// brda 'jal nges pa'i dbang thob shog/ma rig sems kyi mun gseb tu// lung ldan thugs kyi sgron ma yi// ma rig rtog med da lta nyid// 'gyur med thugs kyi dbang thob shog/ dngos med rig pa'i ye shes 'di// nang gsal yengs med chos kyi sku// rgyal ba rnams kyi yon tan dbang// ye shes 'gyur med bdag la skur// rang byung mdzad spyod ye shes la// rgyun du mi 'bral nges pa'i lung// dus 'dir mi brjed rang gsal gyi// mdzad spyod dbang zhig bdag la skur// da yang 'dus pa'i snying po nyon// nam mkha' lta bur dwangs pa yi// khyab gsal rab brjid skur ston pa'i// mkhas pa rgya che shin tu gsal// e ma bcom ldan sangs rgyas gsung// shes rab gting phyin g.yos pa med// rgyun mi 'chad la phyag 'tshal bstod// ma rtsol bdud rnams 'joms mdzad pa// stobs ldan dpa' bo chen po ste// yon tan phrin las rdzogs mdzad pa// ci bsam 'grub la phyag 'tshal bstod// da ni khyed kyi 'bangs su mchi// dpa' bo chen pos bdag la dgongs// bka' las mi 'da' yid kyis bzung// nges don gdams ngag bstan du gsol// rgyal thabs spyi blugs ye shes dbang// rang byung rig pa'i chu rgyun gyis// ma rig bag chags dag pa'i dbang// skal ldan khyod kyis thob par shog/ de ltar dbang gis rim pa yang// ma nor nges par bskur thob na// sangs rgyas gdams ngag dus 'di ru// nges don mchog ni thob par 'gyur// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ rgyal thabs spyi blugs kyi rim pa bstan pa'i le'u ste nyer dgu pa'o//// de nas 'dus pa'i tshogs rnams la// kun rig chos kyi rgyal po yis// nges don rig pa rang gsal gyi// dbang gi rim pa bka' stsal pa// ye shes rig pa'i dbang chen ni// blta bsgom spyod pa 'bras bu dang// 'od gsal ye shes dbang bskur dang// brda yig byin la dam tshig dbog/ da yang 'dus pa'i snying po nyon// rang rig chos sku'i lta ba ni// yid ches thag chod gdeng du ldan// de rtogs kun bzang byin rlabs kyis// chos sku rig pa'i dbang thob shog/ 'bral med rang gsal yengs ba med// nyams myong zhen med rgyun du gnas// ting 'dzin lhag mthong ye shes dbang// rkyen dbang mi 'gyur dbang thob shog/ blang dor dgag bsgrub med pa yis// nyam nga med pa'i brtul zhugs mchog/ de la rtag tu skyon mi gos// spyod pa la spyod dbang thob shog/ 'bras bu chos nyid byang chub klong// ma bgrod sangs rgyas sar phyin pa'i// chos sku'i gzugs brnyan gzugs sku 'byung// 'gro don dbang byin dbang thob shog/ da yang 'dus pa'i snying po nyon// ma rig kun gzhi gzhi cha la// rang byung rig pa'i dbang bskur bas// sangs rgyas kun gyi chos kyi sku// ye shes 'od gsal dbang thob shog/ bla ma rje btsun kun bzang ni// sangs rgyas kun gyi sangs rgyas te// lung ldan dam tshig rjes su srungs// yon phul gdams ngag rjes su longs// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ ye shes rig pa gsal dbang gi rim pa bstan pa'i le'u ste sum cu pa'o//// de nas kun rig chos rje yis// ye shes spyi blugs dbang chen ni// dad ldan 'khor la bka' stsal pa// dang po skye shi'i bar do la// rang sems chos sku ngo sprad pas// rgyun du 'bral med gdams ngag gis// rkyen dbang mi 'gyur dbang bskur ro// da yang 'dus pa'i snying po nyon// ye shes rang shar dbang bskur bas// dngos po ma 'khrul rig pa la// tshor ba bde sdug dug lnga ni// gang phrad rkyen thub chos kyi sku// nyams myang bral med dbang thob shog/ dus 'dir sangs rgyas thob bar du// bde ba phyi nang gsang ba gsum// gol med rkyen thub la zlos pa'i// zhen med ye shes dbang thob shog/sdug bsngal rnam gsum gang byung yang// de dus chos sku dran nas ni// mi bde sdug bsngal rang zhi nas// ye shes rang shar dbang thob shog/ gti mug las byung btang snyoms gsum// shan dbye ngos bzung la zlos pa'i// gol med rkyen thub lhag mthong du// mi brjed gzungs kyi dbang thob shog/ da yang rdo rje sems dpa' nyon// dge sdig rmi lam rnam gsum du// gol med rkyen thub klong thim pa'i// ye shes nyid kyi ting 'dzin du// gsal theb rig pa'i dbang thob shog/ nyon mongs dug lnga skyes pa'i tshe// gol med log non gsal theb pas// ye shes rkyen thub gdeng gis zin// dug lnga rang grol dbang thob shog/'di nas tshe 'phos bar do la// ma rig sgrib med gdeng gis ni// mngon shes rjes dran yon tan ldan// skye ba mi len dbang thob shog/ skal ldan rigs kyi bu khyod nyon// 'bral med rkyen thub dbang bskur bas// mi yi lus la sangs rgyas thugs// dus 'dir mngon 'gyur ye shes te// 'bral med sangs rgyas dus 'dir thob// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ye shes spyi blugs kyi dbang gi rim pa bstan pa'i le'u ste so gcig pa'o//// sdom du bsdus te bstan pa drug pa'o//// de nas 'dus pa'i 'khor rnams la// dbang bzhi'i yon tan bka' stsal pa// dang po thun mong yon tan ni// dkyil 'khor 'jug sgo'i dbang bskur bas// phrin las rnam bzhi'i dngos grub thob// phyi ma ma yin dus 'dir 'byung// de phyir dkyil 'khor 'jug pa gces// dam chu lce thog bzhag pa gces// bla na med dang rdo rje'i dmyal// phyi ma dang ni dus 'dir smin// de phyir dam tshig shin tu mnyan// rin chen 'phreng ba 'di dor bas// sngon nas bsgrubs shing bsten pa'i lha// gang phog rang gi yi dam lha// dus 'dir zhal mthong dngos grub thob// da yang 'dus pa'i snying po nyon// rig pa'i don rtogs 'bru brgyad pa// rang la btags pas ye shes mchog/ thun mong mchog gi las rdzogs nas// mtshan dang dpe byad dngos grub thob// rin chen dbu rgyan dbang bskur bas// rig lnga ye shes dbang thob nas// longs sku'i ye shes dus 'dir ni// sku lnga lhun gyis grub par 'gyur// rang byung thod pa'i dbang bskur bas// ye shes lnga rdzogs thams cad mkhyen// brgyad khri bzhi stong chos rnams ni// mi brjed pa yis gzungs rnams thob// brtul zhugs mchog gi dbang bskur bas// thabs dang shes rab don ldan phyir// blang dor med pa'i ye shes kyis// nyam nga med pa'i brtul zhugs byung// de phyir rtog bcom bgegs rnams 'dul// rdo rje dril bu'i dbang bskur bas// thabs dang shes rab don ldan phyir// 'khor 'das chos la rang dbang thob// de phyir rig 'dzin sa la gnas// da yang 'dus pa'i snying po nyon// yang dag ming gi dbang bskur bas// yi dam lha yis lung bstan nas// 'gro don mthar phyin sems bskyed pas// 'khor ba'i ming med mngon sangs rgyas// lus la sku yi dbang bskur bas// chos sku bde chen rig pa yi// gzugs sku rnam gnyis dus 'dir ni// rab brjid sku yi dngos grub thob// dam tshig gsung gi dbang bskur bas// skye med rig pa'i ye shes kyi// tshangs pa'i gsung gi dngos grub kyi// dus 'dir skye 'gag med pa thob// rang byung bum pa'i dbang bskur bas/ rang rig mi 'gyur thugs kyi gdeng// dus 'dir sangs rgyas chos kyi sku// skye 'chi med pa'i dngos grub thob// da yang rdo rje sems dpa' nyon// phyir mi ldog pa'i dbang bskur bas// 'khor ba'i mtha' las rnam thar nas// sangs rgyas chos kyi yon tan rdzogs// skye rga na 'chi'i sdug bsngal thar// lung bstan nyan pa'i dbang bskur bas// sangs rgyas mdo rgyud nges pa'i chos// skad cig la ni nges shes phyir// gti mug med pa'i dngos grub thob// bshad pa'i dbang mchog 'di bskur bas// rdo rje'i lce dang ldan gyur nas// ngag gsal lung bstan dam par 'dzin// bla mar 'dzin pa'i dbang thob 'gyur// bsgom bsgrub mchog gi dbang bskur bas// phyi mar mi sdod dus 'dir 'byung// las bzhi'i dngos grub thob nas ni// rang bzhin grub pa'i sa la gnas// da yang 'dus pa'i snying po nyon// de dag dbang gi yon tan yin// dgos don ma nor nges pa'i lung// mchog dang thun mong ngo bo'i lung// sangs rgyas rgyud smin de las 'byung// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ thun mong dbang gi yon tan bstan pa'i le'u ste so gnyis pa'o//// de nas kun rig ston pa chos rje yis// rgyal thabs spyi blugs dbang gi ni// yon tan 'khor la bka' stsal pa// dang po lung bstan zhu phul bas// rjes su gnang bas dad mi ldog/ de phyir bka' gsang don la 'jug/ ma rig sel zhing rang rgyud smin// spro ba dri ba'i tshig brjod pas// mnyan zhing gus pa'i blo byung ste// dam tshig gsang ba nges par 'dzin// lung ldan gong mas byin gyis rlobs// slob mas mi ldog dam bcas pas// chos skyong dam btags kun gyis bsrung// tshe ring ci bsam 'grub par byed// de mi nus na bar chad 'byung// gnang ba byin pa'i yon tan ni// dad ldan yid ches blo bde nas// tshogs kyi lam gyi ye shes te// 'bras bu brtson 'grus myur du bya// da yang 'dus pa'i snying po nyon// chos kyi sku yis dbang bskur bas// rang rig thig le'i don shar phyir// rtogs pa mngon 'gyur ye shes mchog/ chod nyid btsal med dus 'dir 'thob// nges don gsung gi dbang bskur bas// tshig gis mtshon pa yid kyis go// don gsal yid ches tshangs pa'i dbyangs// skye 'gag med pa'i dngos grub 'thob// rig pa thugs kyi dbang thob pas// ma rig sel zhing rig pa rtogs// ye shes 'gyur med chos sku thob// da lta nyid du dngos grub thob// yon tan rig pa'i dbang bskur bas// gzugs sku'i zhing khams sna tshogs la// mnga' mdzad sangs rgyas 'gro don byed// gzung 'dzin zhen pa'i skyon mi gol// phrin las rig pa'i dbang bskur bas// 'dzam gling bye ba phrag rgya ru// sprul pa bye ba sna tshogs 'gyed// 'gro don mthar phyin dngos grub thob// da yang rdo rje sems dpa' nyon// sku gsung thugs dang yon tan las// dad pa'i yid kyis bstod byas pas// stobs dang mi 'jigs yon tan 'byung// gsol btab rgyal thabs dbang bskur bas// ye shes chu rgyun nges pa'i brda'// bag chags nyon mongs dus 'dir dag/ chos sku ngo sprod dngos grub thob// rdzogs pa chen po nges don thams cad 'dus pa/ye shes nam mkha' dang mnyam pa'i rgyud las/ rgyal thabs spyi blugs dbang gi yon tan bstan pa'i le'u so gsum pa'o//// de nas 'dus pa'i 'khor rnams la// kun rig chos kyi rgyal po yis// rig pa rang gsal dbang yon tan// 'dus pa'i 'khor la bka' stsal pa// lta ba nges pa'i dbang bskur bas// sangs rgyas sems can ma lus kun// chos kyi sku las gzhan med pas// 'khor ba'i skyon ni ka nas med// ma bsgrubs 'bral med dbang bskur bas// zhi gnas lhag mthong zung du 'brel// nyams myong zhen med rgyun mi chad// ting 'dzin rang gsal dngos grub thob// spyod pa mchog gi dbang bskur bas// nyon mongs mi 'byung ye shes 'byung// skyon gyis mi gos blang dor med// brtul zhugs mchog gi dngos grub thob// 'bras bu mchog gi dbang bskur bas// sa dang lam la ma bgrod par// nyon mongs dug lnga rang grol nas// dus 'dir sku gsum sangs rgyas 'byung// de yi yon tan brjod mi langs// 'od gsal chen pos dbang bskur bas// ye shes rig pa'i 'od shar bas// 'jig rten gsum gyi byang chub sems// kun kyang sangs rgyas sa ru shes// da yang rdo rje sems dpa' nyon// de dag rang gsal yon tan gyi// brda yig byin la dbang yon phul// de yi bsod nams bsam mi khyab// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ rig pa rang gsal gyi dbang gi yon tan bstan pa'i le'u ste so bzhi pa'o//// de nas 'dus pa'i tshogs rnams la// kun rig ston pa chos rje yis// ye shes spyi blugs dbang gi ni// yon tan nges par bka' stsal pa// bde ba ye shes dbang bskur bas// phyi nang gsang ba'i bde ba ni// bde ba rkyen thub chos skur shar// longs spyod rdzogs pa'i 'bras bu 'byung// sdug bsngal zhi byed dbang bskur bas// sdug bsngal sna tshogs gang byung yang// rang zhi byang chub sems su rtogs// khang gzhi gsum 'bras bde bar gnas// btang snyoms lhag mthong dbang bskur bas// gti mug rang bral rkyen rnams thub// le lo mi 'byung chos kyi sku// de tsam nyid na chos sku gsal// dug lnga rang grol dbang bskur bas// nyon mongs zhen pa gang skyes kyang// de nyid gsal theb chos sku nyid// rkyen dbang mi 'gyur gdeng gis zin// skye ba mi len dbang bskur bas// lus bor srid pa bar do la// rjes dran drug gi don shes nas// skye ba mi len ye shes su// bag chags mi 'byung rkyen rnams thub// da yang rdo rje sems dpa' nyon// de dag dbang gi rim pa yang// don la dbyer med ngo bo gcig/ yon tan grangs rnams ci gsungs kyang// sgrib pas mi gos sangs rgyas nyid// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ ye shes spyi blugs kyi dbang gi yon tan bstan pa'i le'u so lnga pa'o//// sdom du bsdus te bstan pa bdun pa'o//// de nas rdo rje sems dpa' yis// kun rig chos kyi rgyal po la// bden pa'i yid kyis 'di skad gsol// rtogs par bya ba'i dam tshig gang// ched du bya ba'i dam tshig gang// bsrung bar bya ba'i dam tshig gang// spang bar bya ba'i dam tshig gang// spyad par bya ba'i dam tshig gang// kun rig ston pas bshad du gsol// de skad zhus pas don gsan nas// 'dus pa'i 'khor la bka' stsal pa// dam tshig lnga yis gzhi bzung ba// nga yis bshad kyis legs par nyon// dam tshig bcu gnyis gzhi bstan pa// lus ngag yid gsum las spyod pa'i// yon tan skyon gyi rtsa ba ste// gnang dang bkag pa shes par gces// de yang 'dus pa'i snying po nyon// rtogs par bya ba'i dam tshig ni// ma med bu ni mi 'byung bzhin// kun gzhi nang gi chos sku las// sangs rgyas mi btsal dam tshig ste// de nyid ngos zin rtogs pa'i chog/gzugs spangs grib ma mi rnyed bzhin// dug lnga spangs pa'i pha rol na// sangs rgyas gzhan na med pa yin// dug lnga mi spangs dam tshig mchog/ gser 'gyur rtse yis theb pa bzhin// dug lnga chos nyid don shes na// spang blang med pa'i chos skur gsal// de las mi 'gyur 'khor mi srid// sngags kyis dug bsad dpe bzhin du// dug lnga rang grol don shes na// ched du mi bsgom dam tshig ste// yid kyi bsam pas bsgom mi dgos// rin chen rnyed pas las mi dgos// de bzhin don rtogs dam tshig mchog/ bsgom mi dgos pa'i chos yin phyir// ma sgoms stor bral gol sa med// da yang rdo rje sems dpa' nyon// de dag rtogs thabs dam tshig kyang// rtsa ba rang sems 'di nyid las// gzhan na yod pa ma yin te// rang rig rtogs na dam tshig mchog/ rdzogs pa chen po nges don thams cad 'dus pa/ye shes nam mkha' dang mnyam pa'i rgyud las/ rtogs par bya ba'i dam tshig bstan pa'i le'u ste so drug pa'o//// de nas 'dus pa'i 'khor rnams la// kun rig ston pa chos rje yis// chad bya'i dam tshig bka' stsal pa// dper na mig gi 'bras bu bzhin// lung ldan rdo rje slob dpon la// brtse gdung dam tshig rgyun du bkur// nges don mchog gi dngos grub thob// da yang 'dus pa'i snying po nyon// dper na rang gi lus bsrung bzhin// nges don gcig pa'i grogs dag la// gdung sems mi 'bral gus byas na// dngos grub tshe ring longs spyod 'phel// dper na rang gi snying bzhin du// dam tshig gdams ngag ma nor ba// snod med gzhan la mi spel bar// ched du dam byas ci bsam 'grub// ka la ping ka'i dbyangs snyan bzhin// rang gi blta bsgom nges pa'i don// rgyun du mi 'bral ched du ni// rig pa so thub dam tshig srung// bden mthong rkyen khar mi btang zhing// lung ldan nges pa'i gdams ngag la// bdud kyi cho 'phrul gang byung yang// zil mnon gdams ngag dran pa gces// bu la mi chags ni ti bzhin// dam ldan dam tshig gdeng ldan nas// chos brgyad spang blang med shes phyir// ched du mi zhen gnyen po dgos// de yang rdo rje sems dpa' nyon// de dag ched bya'i dam tshig kyang// rtsa ba sku gsung thugs su 'dus// de phyir rtsa dgu dam tshig ste// chos rnams kun gyi gzhi ma yin// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ ched du byed pa'i dam tshig bstan pa'i le'u ste so bdun pa'o//// de nas 'dus pa'i tshogs rnams la// kun rig ston pa chos rje yis// bsrung ba'i dam tshig bka' stsal pa// spre dang stag thabs ji bzhin du// rdo rje slob dpon sku dgra dang// bshes 'dris mi bya bsrung gyur na// rin chen sku yi dngos grub thob// mthong ba'i dug can dpe bzhin du// nag mor 'dzings dang dam nyams kyis// 'thab brdungs shugs ma spangs 'gyur na// bgegs kyis mi tshugs byin rlabs 'byung// dug tu ngo shes mi za bzhin// rmig dum sha ni ma zos na// bram ze gtsang ma'i rigs 'dzin skyob// mkha' 'gros thun mong dngos grub ster// gser dang bye ma mi brje bzhin// nges don rgyud drug chos dang ni// bka' rkun chos bzhin ma brjes na// thugs kyis dngos grub sangs rgyas thob// dar dkar la ni snum zhen bzhin// nal bu bsad dang ngos nal la// 'khrig pa'i 'dod chags spyod spangs na// gtsang ris chos skyong kun gyis skyob// da yang rdo rje sems dpa' nyon// de dag bsrung ba'i dam tshig kyang// rtsa ba 'dod chung nyid du 'dus// de phyir zhen pa mi shes na// bar chad mi 'byung dngos grub thob// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ bsrung bar bya ba'i dam tshig bstan pa'i le'u ste so brgyad pa'o//// de nas yang kun rig ston pa yis// spang bar bya ba'i dam tshig ni// 'dus pa'i tshogs la bka' stsal pa// rnal 'byor nges lung ldan pa yis// dam bzung mi shigs bsrungs dgos ni// sems can tha mal 'gro ba yi// srog gcad dam tshig can gyis spangs// til gyi phub ma tsam yang ni// ma byin blang bar mi bya ste// mi dang mi ma yin pa'i rdzas// rnal 'byor pa yis rku sems spangs// reg pa dug can dpe bzhin du// srung ma lnga ldan gzhan gyi la// chags sems tsam yang mi bya ste// rnal 'byor dam tshig ldan pas spangs// kha rlangs dug chen dpe bzhin du// mi chos bla ma'i rdzun la sogs// rang 'dod 'du shes bsgyur smra spang// de dag rtsa ba bzhi po ni// 'khor bar 'khrul pa'i rten gzhi ste// de ma spang bar grol mi srid// de phyir rnal 'byor kun gyi spangs// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/spang bar bya ba'i dam tshig bstan pa'i le'u ste so dgu pa'o//// de nas kun rig rgyal po yis// gnang ba'i dam tshig rnam pa bzhi// 'dus pa'i 'khor la bka' stsal pa// dug sbrul nyes byed gsod pa bzhin// sku dgra nyes byed zhing bcu dang// sngags la skur pa la sogs pa'i// sdig can bsgral pas dngos grub thob// dper na sbrang bu bcud len bzhin// rnal 'byor thabs rnams sna tshogs kyis// ser sna can gyi zas nor ni// ma byin blangs la tshogs su 'bul// shing tog smin pa'i bcud 'jibs bzhin// snga phyi ma song gdeng ldan pas// pho mo chags pa ci spyod kyang// don las ma 'das bde ba'i grogs// byis pa lag gtong 'drid pa bzhin// nges don bka' la zhugs ched du// drang don chos kun rdzun du smra// gol sgrib phyir ni nyes byed dge// da yang 'dus pa'i snying po nyon// gnang ba'i dam tshig de dag kyang// lta bas gdeng ldan bya ba las// tha mal kun gyis byar mi rung// de phyir gdeng ldan blo yis bya// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/gnang bar bya ba'i dam tshig bstan pa'i le'u ste bzhi bcu pa'o// sdom du bsdus te bstan pa brgyad pa'o//// de nas rdo rje sems dpa' yis// 'dus pa'i tshogs la phan gdags phyir// kun rig sems kyi rgyal po la// bden pa'i tshig gis 'di skad gsol// ma rig ye shes dbye ba gang// yul sems gzhi ma gcig mi gcig/ rgyu 'bras don gyi dbye ba gang// bsgom du yod med ji ltar yin// rtogs ma rtogs kyi khyad par gang// kun rig rgyal pos bshad du gsol// de skad zhus pas don gsan nas// 'dus pa'i 'khor la bka' stsal pa// sems can kun la gnas pa yi// ma rig ye shes khyad par ni// nga yis bshad kyis da nyon cig/ dang po 'khor 'das bar do la// shes bzhin lung ma bstan du g.yos// de nyid rang du ngo ma shes// de phyir gang gi blo mi 'jug/ de ni gti mug 'khor ba'i gzhi// de la dpyad kyang ma shes pas// zhi gnas ma rig pa zhes bya// da yang 'dus pa'i snying po nyon// de las yul med 'dzin pa ni// bag la nyal ba cha phra byung// de phyir rang la rang gis bsgribs/ lhan cig skyes pa'i ma rig pa// rgyu yis rkyen zhes de la bya// rgyu de shin tu myur bar ni// de ma thag tu 'dzin pas brtags// bag nyal langs la nyes pas 'dzin// de ma thag pa'i rkyen zhes bya// rgyu dang de ma thag pa yis// rkyen gnyis zung du 'jug pa yi// lhan cig skyes pa'i ma rig pa// de bskyed shes pa mngal du 'jug/ des 'dzin chags sdang phra mo skyes// nang gi bzung bas kun du brtags// de phyir dmigs pa'i rkyen zhes bya// chags sdang de bas rags skyes pas// khong nas byung nas phyi rol gyi// bag chags yul gyi snang ba yang// rang gi yid kyis don rtog zhugs// yul dang chos brgyad rnam par brtags// nga bdag nan tan gzung 'dzin brtas// mngon 'gyur chags sdang kha tshang phyir// dmigs pa bdag po'i rkyen gnyis tshang// kun brtags ma rig pa zhes bya// da yang 'dus pa'i snying po nyon// lhan cig kun brtags gnyis 'dzom pas// kun gzhi'i rnam par shes pa yin// de bskyed tshogs brgyad kha tshang bas// 'khor bar 'khyams zhes de la bya// da yang rdo rje sems dpa' nyon// sangs rgyas kun gyi ye shes ni// rang sems ngo bo rtogs las byung// ye ni rang byung kun gyi gzhi// shes ni lung ldan nges pa'i don// zung du 'dzom phyir ye shes yin// sman dang sman pa 'dzom pa 'dra// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ma rig ye shes dbye ba bstan pa'i le'u ste zhe gcig pa'o//// de nas kun rig rgyal po yis// yul sems dbye ba bka' stsal pa// snang zhing srid pa'i chos rnams kun// 'khrul sems bag chags yin pa'i phyir// snang ba'i zhen pa sna tshogs kyang// ngo bo yul du grub pa med// de phyir snang ba log 'khrul yin// da yang 'dus pa'i snying po nyon// rang gi sems ni 'khrul ba'i dpe// thag sbrul tho yor mi bzhin du// med la yod 'dzin kun tu brtags// sa chu me rlung 'byung ba bzhi// 'khrul pa'i bag chags brtas pa yis// dngos su snang yang don du med// de phyir yul 'di rten med par// rmongs pa kun ni dam par 'dzin// log pa'i rjes su 'brangs pas phung// spre 'dra'i lung gis bslad pas phung// da yang rdo rje sems dpa' nyon// rang rig chos sku ye shes la// 'khrul pa'i rkyen bzhis ma bskyed pas// kun gzhi med phyir sems kyang med// yul sems gnyis ka gzhi med de// de phyir gzhi med chos sku la// rang rig ye shes klong ldan pas// snang ba med phyir 'dzin pa bral// gsal la 'dzin med mi g.yo ba// sangs rgyas kun gyi dgongs par bshad// da yang rdo rje sems dpa' nyon// rang sems yul du 'dzin pa'i rgyu// 'khor ba'i sa bon ma rig pas// rgyu rkyen byas nas sdug bsngal byung// de phyir rang 'khrul rmongs pa'i sems// gzung 'dzin bying rgod zhen pa'i rgyu// yul la brten nas chags sdang skye// 'khor ba'i rgyu rkyen 'khrul sems gnyis// gcig dang mi gcig rtsol ba'i phyir// 'khor ba'i mtha' la zad med phyir// de phyir rang rig don rtogs na// sems med yul 'di ci la srid// de bas rang sems snying po 'di// sems kyi yul las 'das pa'i phyir// gcig dang mi gcig brjod kyi bar// ma rig blo la yul sems yod// log lta can rnams dam par 'dzin// de phyir sgra dang tshad ma'i chos// spre'u 'dra'i blo yis nan brtags nas// yul sems rtsod pas chos kun byung// da yang 'dus pa'i snying po nyon// nges lung gdams ngag ldan pa yi// yang dag nges pa'i sangs rgyas la// rang rig chos sku sems dang bral// de phyir yul med rig pa 'phyo// nges lung go bas yul sems brlag/ da yang 'dus pa'i snying po nyon// de yang rtsa ba mdor bsdus na// nyi shar mun 'grib med pa bzhin// rang byung chos sku'i don rtogs pas// gol sgrib yul sems gzhi nas dag/ de phyir rang byung ye shes sku// dus gsum 'pho 'gyur med pa'i phyir// 'khrul med yang dag mngon sangs rgyas// de phyir nges don rtogs pas chog/ rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ yul sems gzhi la skabs dbye ba bstan pa'i le'u ste zhe gnyis pa'o//// de nas 'dus pa'i tshogs rnams la// kun rig sems kyi rgyal po yis// rgyu 'bras skabs dbye bka' stsal pa// yang dag nges don snying po la// mdzad spyod 'byang bas ma bslad phyir// rgyu dang 'bras bu ngo bo gcig/ rang byung rig pa'i ngo bo de// dper na nor bu rin chen la// dgos 'dod 'bras bu dus gcig rdzogs// de bzhin chos sku nges don la// rtogs pa tsam gyis nges don rdzogs// de yang 'dus pa'i snying po nyon// theg pa gzhan dang sgo bstun na// re zhig rgyu rkyen brjod pa ni// rgyu ni rang byung ngo bo nyid// rkyen ni lung ldan bla mas tshol// 'bras bu ye shes rtogs pa'i tshe// tha dad med phyir rgyu 'bras gcig/ da yang rdo rje sems dpa' nyon// theg gzhan chos kun rgyu 'bras de// dus gcig ma yin rim gyis tshol// rtsol sgrub yin phyir 'khor ba'i rgyu// gnas skabs bde thob mthar thug med// rgyu 'bras rim bskyed gol sar gsungs// dper na byas pa'i rdzas rnams ni// mi rtag myur du 'jig pa bzhin// rgyu rkyen byas pa'i chos kun nor// 'bras bu mi 'byung chu shing 'dra// da yang 'khor gyi snying po nyon// de don rtsa ba mdor bsdus na// tak+Sha ka yi rgyan bzhin du// rgyu 'bras mthar phyir gzhi nas rdzogs// de bzhin chos kun snying po la// che ba'i yon tan ngang la 'char// rgyu 'bras gcig phyir lhun gyis grub// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ rgyu 'bras don gyi skabs dbye ba bstan pa'i le'u ste zhe gsum pa'o//// de nas 'dus pa'i tshogs rnams la// kun rig sems kyi rgyal po yis// bsgom du yod med skabs dbye ba// ched du dgongs te bka' stsal pa// nges don ma nor don phrad na// ma bsgoms sangs rgyas da lta 'byung// rang byung chos sku ye gnas pa// byang chub snying po bsgom du med// da yang 'dus pa'i snying po nyon// de phyir chos nyid gdod nas dag/ kun bzang nga yis dgongs pa'i don// ma nor gdams ngag rnam pa lnga// tshegs med rang sems snying po'i don// skal ldan rnams kyis rtogs par bshad// da yang rdo rje sems dpa' nyon// sangs rgyas dgongs pa ji lta ba// sems can blo yis rtogs pa'i thabs// dpe mi mtshon cing ma bskyed par// gdams ngag bstan pa tsam gyis kyang// ma bsgoms da lta nyid du yang// nges don rtogs phyir bsgom med don// ma bsgoms 'bral med sangs rgyas thugs// kun bzang thugs dang mnyam par ni// bral med rkyen thub gdams ngag ni// bsgom mi dgos par gdams ngag gis// dad ldan phyi rabs rtogs par gyis// da yang rdo rje sems dpa' nyon// nges don gdams ngag skal med la// zhi gnas blo ni ma nges pa// bsgom du yod pa gnas pa'i lam// 'khor la bstan gyis yid la nyon// bsgom du med la su skrag pa// mtshan nyid dbang gsum rim gyis bskur// nges don nyams su myong ba dang// yid ches gdeng dang ldan par 'gyur// de phyir rang sems dgongs pa ste// der gnas shes rab shin tu che// nyams ni phyi nas rim gyis 'byung// de byung dga' brod sems mi bya// da yang rdo rje sems dpa' nyon// rnam grangs mtshon pa'i don rnams las// log ste brjod med ngang la bzhag/ tham la rjes su ma 'brangs par// bsgom du yod pa'i chos bshad pas// de phyir ma g.yengs bsgom pa ni// nyid las mi gzhan 'khor rnams la// don gyi sgo nas shes par gnas// rig 'dzin sems dpa' rnams kyang ni// ting 'dzin goms pas brtan pa thob// 'khor na gnas pa'i dad nyan kyang// mos pa'i lta ba goms par byed// shes rab dman pa'i rnal 'byor gyis// gnas dang mi g.yo lhun grub 'dod// de phyir rang sems rtogs par dka'// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/bsgom du yod med skabs dbye ba bstan pa'i le'u ste zhe bzhi pa'o//// de nas 'dus pa'i tshogs rnams la// kun rig sems kyi rgyal po yis// 'dus pa'i 'khor la bka' stsal pa// ye nas yod pa'i chos kyi sku// rtogs ma rtogs kyi khyad par las// legs par nyon la yid la zung// rang sems ma rtogs sems can ni// 'khor ba gang nas gang du 'khrul// cis 'khrul ldog thabs ma shes pas// yod med gzung 'dzin bla dgas la// 'khrul pa rnams ni dam par 'dzin// 'khor lan chos la brtags pas lan// de yang 'dus pa'i snying po nyon// gang la rtogs med ma shes phyir// log lta gang zhig nor ba'i lam// gnyis med don la ma rig 'khrul// de phyir gnyis med ma rtogs na// lus ngag rtsol bas sdug bsngal non// de phyir nges don lung med na// theg dgu'i shes pas grol mi srid// da yang rdo rje sems dpa' nyon// ye nas yod pa'i chos nyid la// lung ldan nges pa'i don phrad na// rtogs dus da lta'i tshe 'di la// rang sems snying po rtogs par gyis// kun bzang nga la thog mtha' yod// dus cig mchod phyir mngon sangs rgyas// 'das pa'i sangs rgyas kun gyis kyang// nga yod phyir na thog mtha' yod// skye ba mi len tha ma 'byung// da lta ma byon sems dpa' yis// thog mtha' ma chod rtsol ba med// de phyir rang sems rtogs par dka'// sems can kun la smos ci dgos// da yang 'dus pa'i snying po nyon// de phyir 'dus pa'i lung ldan gyis// 'khrul pa ldog thabs shes pa des// nges pa tshig gi gdams ngag 'di// bstan pas don rtogs skad cig la// sangs rgyas kun dang dgongs pa mnyam// thog mtha' chod phyir thams cad mkhyen// da yang nges pa'i rgyud chen 'di// rtogs pas chog phyir ya mtshan can// des na tshegs med don po che// chos rnams kun gyi mchog tu bshad// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ rtogs ma rtogs kyi khyad par gyi skabs dbye ba bstan pa'i le'u ste zhe lnga pa'o//// sdom du bsdus te bstan pa dgu ba'o//// de nas rdo rje sems dpa' yis// 'dus pa'i 'khor gyi don ched du// kun rig chos kyi rgyal po la// nges pa'i dgos don 'di skad gsol// nam mkha' chos nyid ji ltar 'dra// de las chos sku ji ltar 'phags// 'jig rten dpe ni gang dang 'dra// de las don ni ji ltar 'phags// kun rig ston pas bshad du gsol// de skad zhus pas don gsan nas// 'dus pa'i 'khor la bka' stsal pa// zhus pa legs so ngas bshad kyis// yid la zung la don la gnyer// de don rtogs thabs mthun dpe ni// nam mkha'i mtshan nyid dngos po med// de dang 'du phyir spros med pas// chos nyid ngo bo de bzhin no// da yang rdo rje sems dpa' nyon// nam mkha'i mtshan nyid gzung du med// chos nyid ngo bo de bzhin no// nam mkha'i mtshan nyid 'gro 'ong med// chos nyid ngo bo de bzhin no// nam mkha'i mtshan nyid 'du 'bral med// chos nyid ngo bo de bzhin no// nam mkha'i mtshan nyid bya btsal med// chos nyid ngo bo de bzhin no// nam mkha'i mtshan nyid mtha' dbus med// chos nyid ngo bo de bzhin no// nam mkha'i mtshan nyid steng 'og med// chos nyid ngo bo de bzhin no// nam mkha'i mtshan nyid snang stong med// chos nyid ngo bo de bzhin no// nam mkha'i mtshan nyid bzang ngan med// chos nyid ngo bo de bzhin no// da yang rdo rje sems dpa' nyon// nam mkha'i mtshan nyid bya rtsol med// chos nyid ngo bo de bzhin no// nam mkha'i mtshan nyid skye shi med// chos nyid ngo bo de bzhin no// nam mkha'i mtshan nyid 'phel 'grib med// chos nyid ngo bo de bzhin no// nam mkha' 'byung ba kun gyi gzhi// chos nyid ngo bo de bzhin no// nam mkha' ma lus kun gyi gzhi// chos nyid ngo bo de bzhin no// da yang 'dus pa'i snying po nyon// de ltar 'dra ba'i dpe mtshon kyang// don gyis khyad par bsam yas pas// de las bzlog ste bstan dgos phyir// dpe don khyad par shin tu che// rdzogs pa chen po nges don thams cad 'dus pa/ye shes nam mkha' dang mnyam pa'i rgyud las/ dpe nam mkha' dang 'dra bar bstan pa'i le'u ste zhe drug pa'o//// de nas 'dus pa'i tshogs rnams la// kun rig ston pa chos rje yis// dpe don khyad par bka' stsal pa// nam mkha' skye ba med pa tsam// chos nyid yon tan cir yang skye// nam mkha' snang ba med pa tsam// chos nyid ye shes yul du skye// nam mkha' snang ba med pa tsam// chos nyid ye shes yul du snang// nam mkha' brtag tu med pa tsam// chos nyid brtags pas yon tan gter// nam mkha' song ba med pa ste// chos nyid mya ngan 'das par song// nam mkha' 'gag pa med pa ste// chos nyid ngang du log rtogs 'gags// nam mkha' cir yang ma grub ste// chos nyid bde ba chen por grub// nam mkha' med pa'i med pa ste// chos nyid yod pa'i yod pa'o// nam mkha' chad pa'i chad pa ste// chos nyid mi 'gyur rtag pa yin// nam mkha' stong pa phyal ba ste// chos nyid sangs rgyas kun gyi bcud// nam mkha' stong pa stong pa ste// chos nyid ye shes 'ong ba'i bcud// da yang rdo rje sems dpa' nyon// de ltar bzlog nas don bstan pa// phyogs 'ga' pa yi dper mtshon te// don ma yin phyir de las bzlog/ chos nyid brdal ba chen po la// dpe mtshon pa yi yul las 'das// rdzogs pa chen po nges don thams cad 'dus pa/ ye shes nam mkha' dang mnyam pa'i rgyud las/ dpe don khyad par 'phags pa bstan pa'i le'u ste zhe bdun pa'o//// de nas 'dus pa'i tshogs rnams la// kun rig ston pa chos rje yis// dpe yis mtshon te don 'dra ba// ched du 'khor la bka' stsal pa// nam mkha' nyi zla skar ma dang// rgya mtsho ri bo u dum war// sa gzhi chu bo dus kyi 'brug/ chos rgyal gyad dang ded dpon dang// chu shel baiDUr+ya pad+ma dang// til 'bru me long sgron ma dang// rin chen ma gi gser la sogs// thun mong dpe yis mtshon byas nas// nga yis bstan gyis khyed kyis legs par nyon// nam mkha' yangs mtho mtha' dbus med// dngos med kun khyab 'byung bzhi'i snod// 'gro 'ong med pas 'dus ma byas// chos nyid ngo bo de bzhin no// nyi ma rang gsal kun la dro// nyin zhag gcig gis gling bzhi khyab// mun pa sel ba'i sgron mar grags// chos nyid ngo bo de bzhin no// zla ba bsil la dkar ba ste// rgyu skar tshes grangs dus tshod 'dzin// lo dang zla ba 'phel 'grib can// rgyu 'bras chos kyang de bzhin no// skar ma ma 'dres yongs rdzogs pas// bar snang lam la shugs kyis 'gro// rnyog med chu la gzugs brnyan 'byung// chos nyid ngo bo de bzhin no// da yang rdo rje sems dpa' nyon// rgya mtsho gting zab 'phel 'grib med// srog chags byings mang bsam mi khyab// rin chen la sogs 'dod dgu yod// chos nyid ngo bo de bzhin no// ri bo mi 'gyur brtan pa ste// gling bzhi gling phran kun gyi rten// nyi zla gza' skar kun gyi rten// chos nyid ngo bo de bzhin no// u dum wa ra mtsho gting nas// sa steng rnyed na dgos pa ni// nad sel bsam pa 'grub pa yin// lung ldan gdams ngag de bzhin no// da yang 'dus pa'i snying po nyon// sa gzhir sman dug kun skye zhing// 'gro ba yongs kyi rten nam gzhi// 'byung ba bzhi yi gnyen po yin// chos nyid ngo bo de bzhin no// chu bo chen po rtag tu ni/ rgyun mi chad par 'bab pa la// ngal dub med par 'khor zhing 'gro// chos nyid ngo bo de bzhin no// 'brug gi sgra sgrogs dus tshod ni/ dbyar dgun gnyis kyi shan phyes nas/ / sems can nyal langs byed pa bzhin// 'khor ba'i chos kyang de bzhin no// chos kyi rgyal po chen po ni// dad pa skyo sun med par ni// rtag tu tshogs gnyis rgyun du gsog/ chos nyid ngo bo de bzhin no// gyad chen dpa' bo chen po ni// rang la gzhan gyis mi tshugs pa// dgra 'joms dmag dpung zil gyis gnon// chos nyid ngo bo de bzhin no// ded dpon bzang po sa mkhan des// rgya mtshor nor len 'jigs pa med// sa mkhan dmag dang tshong dpon bzhin// 'dus byas dge ba de bzhin no// da yang 'dus pa'i snying po nyon// chu shel phyi nang med pa ni// gzugs brnyan gsal kyang don la med// kha dog nges med rkyen las 'byung// chos nyid ngo bo de bzhin no// baiDUr+ya 'od sngo las gyur//

CLOSE WINDOW