CLOSE WINDOW

Gpb001.014
བོད་ཡིག

gter rgya/ gsang rgya/ gtad rgya/ zab rgya/ rgya rgya rgya/ gsang ngo/ zab bo// // rgya gar skad du// badzra sa twa sha ta a k+Sha ra ka a b+hi She kot+ta ma rA dza tan+t+ra nA ma/bod skad du// rdo rje sems dpa' yi ge brgya pa dbang mchog rgyal po'i rgyud ces bya ba bcom ldan 'das dpal rdo rje 'chang chen po la phyag tshal lo// 'di skad bdag gis thos pa'i dus gcig na/de bzhin gshegs pa thams cad 'og min rdo rje'i gnas kyi dang po na bzhugs te/ thugs rdo rje byams pas 'gro ba rnams la gzigs pa dang/ byang chub kyi myu gu bskams pa'i sems can rnams gzigs te/ de'i tshe de'i dus na/ phyogs bcu kun nas rgyal ba 'dus// bka' bgros thugs rje'i don bsgo ba// rdo rje sems dpa' rdo rje 'dzin// 'jig rten 'dod khams dam tshig skyon// nyes byas rnam smin rgyu las bzlog/de'i gnyen po khyod nyid yin// ces bsgo'o// rdo rje 'chang ba rdo rje 'dzin// nyid dang sprul pas 'di skad gsungs// dus la bab bam de bzhin bgyi// nyes byas rnam smin spyad pa ni// ngan song na rag gnas nas drangs// de nas ston pa kun bzang dang// kun rig rnam par snang mdzad rnams// mi g.yo mnyam pa'i ngang la bzhugs// phyogs bcu'i zhing khams de bzhin no// de nas ston pa rdo rje sems// gnas kyi dang po 'og min du// lag na rdo rje rgyal sras 'khor// 'khor ba thugs rje bzung ba'i dus// 'khor ba dong sprug 'gyod tshangs gsungs// rgyud mchog rdo rje brgya ba dang// dbang mchog rgyal po'i rgyud 'di gsungs// slob dpon slob mas nyes byas pa'i// gcer bu lus srul na ra ka/ pre ta ka dang tir+ya ka/ rim pa bzhin du don byed de// nr-i dang de ba a su ra// drug gi gnas nas don byed pa'i// dbang mchog rgyal po'i bstan pa 'byung// zhes gsungs so// rdo rje sems dpa' dbang mchog rgyal po'i rgyud las/ gleng gzhi phun sum tshogs pa'i le'u ste dang po'o//// de nas rdo rje sems dpa' dang// sprul pa lag na rdo rje yis// 'jig rten rgyal ba rab 'byams dang// rgyal sras sprul pa 'dus pa rnams// dam tshig rtsa ba nyams pa yi// slob mas slob dpon nyes byas de// 'dul dang 'dren pa'i dus bab bam// 'gro 'dul thugs rjes gzigs lags na// nyes skyon sngon byung ci yi rgyu// zhes mkhyen bzhin du smras pa dang// kun bzang rdo rje rnam snang gis// sprul pa gnyis la bka' stsal pa// rgyal sras 'khor 'dus sngon byung ni// 'jig rten mi mjed zhings khams 'dir// bram ze dung gi phreng ba can// rgyal ba rnams la snyen bkur ba'i// rig pa'i gnas la mkhas pa yi// byang chub sems dpa'i rigs can gcig/ bas mtha'i dur khrod gnas na bsgrub// mkhas pa kun gyi seng ger gyur// yul khams skyong ba'i rgyal po'i bus// bslabs sbyangs rig pa rdzogs byas pas// rgyal bu'i gong na bram ze gnas// rgyal bu phrag dog sems ngan skyes// bla ma bram ze sgrub pa la// mkha' 'gro'i tshogs kyis brda' bstan pa// rnal 'byor gser snod dug g.yos pa// dug can snod la 'bros par 'os// nyes skyon lus sems 'bral bar nges// zhes bya'i dam tshig brda' gtong byas// rnal 'byor pa ni bsgom la bzhugs// de nas rgyal bus bram ze bos// myos chang blud nas rngan byas pa// dbang po'i dngas ma mig la yang// lcags kyi thur ma phra mos gtsag/tshig sgo gsal byed lce yang ni// lcags kyus drangs te spu gris bcad// lus ni rus sbal khrag gis byugs// btsog la sme ba'i bud med kyis// lus la brdzi bcag mnye bar byas// rkang pa'i sgyid pa mtshon gyis bcad// lag pa'i sran tsho de bzhin breg/ de lta rngan byas bzhag pa na// bram ze dran pa sangs pa las// mig med smra ru lce yang med// 'gro ba'i rkang med lus stobs bral// 'gul ba'i stobs med bud med brdzis// rus sbal khrag byugs chu bur dang// rkang pa la sogs nad rnams byung// dran pa rang yang rab rib 'dug/ rtabs te bram ze bsam pa la// 'di ltar bdag la 'di byung ba// snga ma'i las kyi rnam smin nam// 'on te gzhan gyi phrag dog gam// mnyam par bzhag ste bltas pa las// rang gi rgyal bus rngan byas mthong// de nas bram ze dmod pa bor// kye ma kye hud rgyal bu khyod// lo dang zla bar bslabs sbyangs nas// rig pa'i gnas la mkhas byas pa'i// lan du 'di 'dra mngan byed pa// khyod ka skye ba gcig 'dir yang// tshe thung nad kyis lus gzir la// sems can srul po gcig tu skyes// dmus long lkugs pa mdze lhog dang// shab kra bal ldag chu bur dang// rkang lag zha 'khums dbul po dang// lus la sha za'i tshang 'char shog/ tshe 'phos nas kyang na rag gnas// kha 'khor sdug bsngal thar med shog/de las thar nas pre ta ka/ tir+ya ka yi kha 'khor shog/ dus dang tshe rabs thams cad du// 'phags pa'i zhal ni mi mthong zhing// byang chub myu gu sngo bskam shog/ ces dmod pa bor ro// nyes byas dam nyams rgyal po de// de nas tshe ni myur du yang// lus la nad sna mang pos 'phos// rang gi nyes byas rnam smin dang// bram ze'i dmod pa smin lam gyis// sems can lus srul gcer bur skyes// lus la nad sna sna tshogs byung// sha za stong gis tshang yang bcas// byang chub myu gu sngo bskams nas// na rag gnas na sdug bsngal spyod// tsha grang brdung btsog gsheg gtubs las// de bzhin pre ta tir+ya 'khor// rnam smin sdug bsngal de spyod pas// rdo rje sems dpa' rdo rje 'dzin// thugs rje chen po de las drongs// zhes gsungs so// rdo rje sems dpa' yi ge brgya pa dbang mchog rgyal po'i rgyud las/ sngon byung gi rgyu rkyen gtam rgyud kyi le'u ste gnyis pa'o//// de nas rdo rje sems dpa' dang// lag na rdo rje stobs chen gyis// skad mthun tshig sgo gcig pa yis// rgyal ba'i tshogs la 'di skad brjod// de ltar 'dul ba'i dus yin na// thabs mchog gang gis drang bar bya// slar gsol pa de bstan du gsol// zhes zhus pa las/ kun bzang rdo rje rnam snang gis// sprul pa nyid la bka' stsal pa// legs so sems dpa' rdo rje 'dzin// mkhyen par gyur kyang zhus pa legs// rig pa 'dzin pa rigs kyi bu// gsang sngags dam tshig nyams pa la// na rag dong nas sprug pa yi// 'gyod tshangs bshags pa'i rgyal po sgrogs// chos nyid don gyi sgron ma theg/lus ngag yid kyi brtson 'grus phyung// sku gsung thugs kyi tshangs pa thob// ngan song dong sprug sku gsum mthong// phyi nang gsang ba'i dbang bskur gyis// rgyud drug gnas nas nges par drongs// ye shes lnga ldan chos sku thob// yul med ming gi sgro 'dogs chod// gsang sngags bla med rdo rje la// thabs mchog bla na med pa bzhugs// nyan thos rang rgyal lta bu min// dper na nyan thos 'dul khrims ni// rdza gsar so ma btang pa 'dra// chag par gyur na gso thabs med// gsang sngags rdo rje theg pa 'di// rin chen gser 'dra rgyu mchog bzang// gser dngul snod 'dra zhoms yang bcos// sngon ma bzhin du legs par sos// de bzhin gsang sngags dam tshig gi// nyams chag byung yang gso thabs yod// sbyang thabs yangs so thabs sgo mang// rnal 'byor spyi khrus ngan song dong sprug brjod// dbang mchog rgyud drug skye sgo chod// yul med sgro 'dogs gnyis med chod// ces lung bstan no// rdo rje sems dpa' yi ge brgya pa dbang mchog rgyal po'i rgyud las/ nyams pa gso thabs lung bstan pa'i le'u ste gsum pa'o//// de nas rdo rje sems dpa' dang// lag na rdo rje 'dzin pa yis// sangs rgyas stong la 'di skad gsol// kye kye rgyal ba rgya mtsho'i tshogs// gsang sngags bla med rdo rje la// dam tshig bsdus rgyas ji ltar lags// bsrung sdom nyams pa ji ltar bskang// zhes mkhyen bzhin du zhus so// rgyal ba 'dus pas bka' stsal pa/ rdo rje sems dpa' rdo rje 'dzin// gsang sngags 'bras bu'i theg pa la// dam tshig rtsa ba rnam pa gsum// sku dang gsung dang thugs gsum mo// yan lag dam tshig nyi shu lnga// mi spang lnga dang blang ba lnga// shes par bya ba lnga dang ni// spyad bya lnga dang bsgrub bya lnga// gzhan yang nying lag bsam las 'das// 'bum sde la sogs dam tshig kyang// rtsa ba yan lag shes par bya// bsnyen bsgrub rnam bzhi'i sgor zhugs pas// dam tshig de dag bsrung bar bya// slob dpon yi dam slob ma mched// legs par bsrung dang bsrung du med// yan lag nyi shu rtsa lnga yang// rtsa ba'i dam tshig gsum du 'dus// lus ngag yid gsum bag yod bya// chag nyams thams cad gsum las byung// sku gsung thugs kyi lus ngag yid// byin brlab bshags sbyang spang bsgrub dang// rang 'khrungs rdo rje gser nyid do// yid kyi sgo nas chag nyams byung// thugs kyi lta bas bshags par bya// lta ba log pa nyams pa che// yin pa med pa lta ba'i mchog/yid kyi bshags thabs chen po yin// lus kyi sgo nas chag nyams na// phyag rgya sku yi bsgoms pas bshags// phyogs su 'dzin pa nyams pa che// yengs pa med pa sgom pa'i mchog/ de ni lus kyi bshags thabs yin// ngag gi sgo nas chag nyams na// sngags dang 'don brjod spyod pas bshags// tshul 'chos spang blang nyams pa che// yin min med pa spyod pa'i mchog/ mdzad spyod dag gi bshags thabs yin// de ltar dam tshig gsum bshags na// nyi shu rtsa lnga ma byung ma skyes te// yan lag dam tshig bshags su med// ci ste bsrung bya srung byed med// skye med dam tshig shes par gyis// zhes gsungs so// dbang mchog rgyal po'i rgyud las/ dam tshig mtshon pa'i le'u ste bzhi pa'o//// de nas rdo rje sems dpa' dang lag na rdo rje srul po de'i gam du byon nas mnar med nyam thag de la 'di skad ces bsgrags so// na ra ka b+hu ta tsak+Shu pra be sha ya a a zhes bsgrags pas/ de nas las ngan sems can des// sngon gyi las ngan dran gyur te// sdug bsngal gnong nas 'gyod pa skyes// rdo rje gnyis la ngo smad de// kye ma kye hud kyi hud nongs// 'gro mgon thugs rjes bdag skyobs shig/ thabs mchog rgyal po bsgrag tu gsol// slad nas mi 'chab mi bgyid do// zhes smre sngags phyung ba las/ de nas sangs rgyas rdo rje sems dpas sems can las ngan de'i rna lam du 'gyod tshangs kyi rgyal po na rag dong sprug 'di bka' stsal pa/nyon cig las ngan sems can khyod// 'gyod sems phyung la yid gtod cig/ ngag sgo gsal brjod brkyang phyag 'tshol// zhes gsungs nas 'di brjod do// dus gsum 'jig rten rab 'byams kyi// rgyal ba rgya mtsho rnams la phyag 'tshal lo// chos rnams rnam dag ye nas lhun grub cing// bya ba byed dang yid chos rnam par dag/kun bzang yab yum gnyis la phyag 'tshal lo// chos sku nam mkha' bzhin du dbyer med kyang// gzugs sku 'ja' tshon bzhin du so sor gsal// thabs dang shes rab mchog la mnga' brnyes pa// rigs lnga bde bar gshegs la phyag 'tshal lo// ngo mtshar pho brang bde bar gshegs pa'i yum// dus gsum rgyal ba thams cad bskyed mdzad ma// rigs lnga'i yum gyur rnams la phyag 'tshal lo// rnam shes dbang po dag pa'i thugs dang gsung// bde bar gshegs pa kun gyi sras mchog ste// sems dpa' chen po brgyad la phyag 'tshal lo// sgeg mo phreng thogs rin chen glu gar can// mkha' mnyam mchod pas rgyal ba rgya mtsho mchod// byang chub lha mo'i tshogs la phyag tshal lo// me tog bdug pa mar me dri chab kyis// rgyal ba rgya mtsho rnams la 'chod 'bul ma// mchod pa'i lha mo rnams la phyag 'tshal lo// drag shul thabs kyis 'gro ba 'dul mdzad pa// tshad med bzhi ldan sgo bzhi thub par srung// ta kr-ita sgo ba bzhi la phyag 'tshal lo// rtag chad mthar phyin gsang ba yum gyi ngang// lcags kyu zhags pa lcags sgrog dril bu ma// rdo rje sgo ma bzhi la phyag 'tshal lo// steng 'og phyogs bzhi'i 'jig rten 'dul ba'i gtso// nyon mongs drug 'joms rgyud drug dag par sbyong// bcom ldan thub pa drug la phyag 'tshal lo// gsal 'tsher lhun sdug gzi brjid 'od zer 'phro// mnyen lcugs 'khrim ldem gzhon tshul zhi ba'i tshogs// rgyal ba bzhi bcu gnyis la phyag 'tshal lo// de ltar gus pas phyag 'tshol zhig/ rang bzhin sgyu 'phrul lha tshogs la// gang zhig gus pas phyag btsal na// nyams chag kun kyang byang bar 'gyur// zhes gsungs so// dbang mchog rgyal po'i rgyud las/ zhi ba'i le'u ste lnga pa'o//// yang bka' stsal pa/ brtson 'grus phyungs shig las ngan sems can khyod// 'di rnams dpang du gsol la phyag/ tshig gsal lus gus mos pas 'tshol// sgyu 'phrul chen po'i dkyil 'khor ni// zhi ba chos nyid ngang las ma g.yos kyang// phrin las mthar phyin thabs mchog khro bo'i tshul// 'bar ba khro bo'i tshogs la phyag 'tshal lo// ho rang rig thabs kyi rgyal po mchog/ sangs rgyas spyi dpal khro bo'i rje// che mchog he ru ka la phyag 'tshal lo// 'jig rten 'das pa'i dus na mngon 'byung ba// gdug pa 'dul phyir dus las mi mda' ba'i// dpa' chen he ru ka la phyag 'tshal lo// rang bzhin dag pa'i dbyings nyid las// dpal 'bar rngam pa'i cha lugs can// khro mo gnam zhal ma la phyag 'tshal lo// khro mo dbang phyug sku la 'khril mdzad cing// mkha' 'gro mi bzad 'bar ba'i sprin 'phro ma// gdug pa 'dul mdzad khro mo rnams la phyag 'tshal lo// bskal pa me ltar 'bar ba'i dkyil 'khor na// ye shes sku mchog 'jigs byed rgyan gyis bzhugs// khro mo chen mo brgyad la phyag 'tshal lo// nam mkha'i lus can gar yang thogs med cing// 'dod dgur bsgyur ba'i gzugs can 'phrul pa mo// phra men chen mo brgyad la phyag 'tshal lo// rdo rje gdong mo pho nya mgyog ma bzhi// shar lho nub byang sgo bzhi thub par srung// sgo skyong khro mo bzhi la phyag 'tshal lo// dpal gyi 'khor tshogs badzra a ral+li// mkha' la shugs 'gro ma tshogs dbang phyug ma// rnal 'byor nyi shu brgyad la phyag 'tshal lo// phyogs bcu'i dreg pa bsnol ba'i gdan steng na// ye shes bskal pa me dpung 'bar ba'i klong// bdud 'dul khro bo'i sku la phyag 'tshal lo// khro rgyal sku la gnyis med tshul 'khril ma// pha rol phyin bcu sa lam dge rdzogs ma// 'jigs byed rngam pa'i khro mo bcu la phyag 'tshal lo// dmigs med thabs kyi khro bo'i sku gzugs ston// sku mdog phyag mtshan cing yang sprul zhing bsgyur// rol pa khrag 'thung rnams la phyag 'tshal lo// zhes gsungs so// dbang mchog rgyal po'i rgyud las/thabs mchog khro bo'i le'u ste drug pa'o//// yang bka' stsal pa/ las ngan sems can khyod/ lus ngag yid gsum brtson 'grus phyung// dkyil 'khor lha rnams dpang gsol la// gus pas dkyil 'khor lha la mthol// dmigs med chos kyi sku la phyag 'tshal lo// longs spyod rdzogs pa'i sku la phyag 'tshal lo// cir yang sprul pa'i sku la phyag 'tshal lo// mi 'gyur rdo rje'i sku la phyag 'tshal lo// mngon par byang chub sku la phyag 'tshal lo// thabs mchog 'jam dpal dmar nag sku la phyag 'tshal lo// skyon med sgra sgrog pad+ma'i gsung la phyag 'tshal lo// nyes pa'i nad sel bdud rtsi sman la phyag 'tshal lo// dus gsum rgyal ba kun gyis bsgrubs pa yi// tshogs gnyis rdzogs nas yon tan mthar phyin pa'i// sku dang ye shes tshogs la phyag 'tshal lo// 'byung ba lnga la mnga' brnyes pa// rtag pa'i rgyal mo lnga la phyag 'tshal lo// rang bzhin dbyings nas grub pa mo// dbyings phyug lnga la phyag 'tshal lo// rgyu 'bras byang chub sems dpa'i sprul pa ste// mkha' 'gro sum cu gnyis la phyag 'tshal lo// ga Na pa ti'i sprul pa ste// ging pho rnams la phyag 'tshal lo// lha mo dpal mo'i sprul pa ste// ging mo rnams la phyag 'tshal lo// 'jig rten khams la mnga' mdzad ma// 'jigs byed dpal 'bar ral pa can// 'dod pa'i ro la chags pa mo// ma mo'i tshogs la phyag 'tshal lo// legs nyes ltang 'dzin dam tshig rjes gcod cing// bka' bzhin sgrub pa'i grogs mdzad pa// dam can rgya mtsho'i tshogs la phyag 'tshal lo// zhes gsungs so// dbang mchog rgyal po'i rgyud las/nongs pa dpang gsol phyag gi skabs las/ dkyil 'khor 'dus pa'i le'u ste bdun pa'o//// bka' stsal pa/ gang gis sgyu'aphrul khro bo yi// dkyil 'khor lha la phyag 'tshal na// nyams chag kun kyang byang 'gyur te// mtshams med lnga yi sdig kyang byang// na rag gnas kyang dong sprugs te// rig 'dzin rgyal ba'i zhing du grags// de skad ces bsgrags pa dang// dmyal ba'i gnas kyi sems can de// dran pa slar ni rnyed par gyur// sdug bsngal skabs de zhi ba las// rdo rje sems dpas 'di skad gsungs// zhing khams rgyal ba rgya mtsho dgongs// dus gsum sangs rgyas thams cad kyi// mtshams med nyes byas rnam smin byang// gsang sngags dam tshig so ru chud// mi dge phal pa smos ci dgos// gang zhig gnad kyis nyen gyur kyang// sdug bsngal de las nges par grol// 'go ba'i nad rims byung ba'i tshe// bdag nyid yi dam gsal ba yis// snying po 'di brjod des mi tshugs// gang zhig ngan sngags mtshon brdeg kyang// snying po 'di brjod rang la ldog/ don gnyer lam 'gro 'di brjod na// 'jigs pa'i dgra las nges par grol// gdon 'jigs bgegs kyis 'tshe ba'i phyir// rig pa 'di brjod gdon de 'jil// sems can gang zhig bu 'dod kyang// rig pa 'di las rabs de zin// nyon mongs dbul zhing phongs pas kyang// snying po 'di brjod rin chen rnyed// gang zhig 'khor sdud 'di brjod na// srid pa gsum yang 'khor du 'du// phrin las rnam bzhi nges par bgrub// nyams sgrib thams cad 'dag byed pa'i// yi ge brgya pa bdag gis brjod// chag nyams thams cad 'di yis bskangs// zhes smras te// ngan song dong nas sprugs pa 'di brjod do// oM AHhUM swA hA/ oM badzra satwa sa ma ya/ ma nu pA la ya/ badzra satwa/ twe no pa tiSh+Tha/ dr-i D+ho me b+ha ba/ su toSh+yo me b+ha ba/ a nu rak+to me b+ha ba/ su poSh+yo me b+ha ba/ sarba sid+d+hi m+me pra yats+tsha/ sarba karma su tsa me/ tsit+taM shre yaHku ru hUM/ ha ha ha ha ho/ b+ha ga bAn/ sarba ta thA ga ta badzra mA me muny+tsa badzrI b+ha ba/ma hA sa ma ya sa twa a/ 'di ni dus la bab pa'i tshe// gsum mam bdun nam bcu bzhi'am// nyi shu rtsa gcig brgya rtsa brgyad// lha bsgom gsal bas brjod byas na// chag nyams thams cad bskang bar byed// ngan song gsum las thar bar 'gyur// yid dam dag tu 'di brjod na// dus gsum rgyal ba'i sras su 'gyur// zhes gsungs pas/ las ngan sems can dmyal ba rnams kyis// mgon po sems dpa' a la la ho/zhes smras so// de nas dus gsum gyi sangs rgyas rnams kyis/ rdo rje sems dpa' la/ thugs kyi yang snying brjod pa khyod/ shin tu legs so// bshags pa'i rgyal po brjod pa legs so legs so// zhes gnang ba byin no// dbang mchog rgyal po'i rgyud las/ yang snying gsang sngags bshags pa'i le'u ste brgyad pa'o//// de nas phyag na rdo rje yis// las ngan sems can de la ni// sngags kyi snod du rung bya'i phyir// dang po sems bskyed dad byas nas// bum pa'i lha yi dbang bskur dang// na raka gnas nas drang ba yi// gsang ba sngags kyi dbang bskur ro// bum pa rdzas dang ldan thogs nas// las ngan de yi gtsug tu bzhag/ rig pa'i tshigs bcad 'di brjod do// hUM/ kun bzang yab yum bum pa na// rgyal ba zhi khro'i lha tshogs bzhugs// sems can khyod la dbang bskur bas// na raka sdug bsngal bral bar shog/ du da ha da ha sarba na ra ka ga te he hU~M hUM phaTaH hUM badzra satwa sa ma ya/ ma nu pA la ya/ badzra satwa twe no pa tiSh+Tha dr-i D+ho me b+ha ba/ su toSh+yo me b+ha ba/ a nu rak+to me b+ha ba/ su poSh+yo me b+ha ba/sarba sid+d+hi m+me pra yats+tsha/ sarba karma su tsa me/ tsit+taM shre yaM ku ru hUM/ ha ha ha ha ho/ b+ha ga bAn/ sarba ta thA ga ta// badzra mA me muny+tsa/ badzrI b+ha ba ma hA sa ma ya/ badzra satwa a/ hUM badzra a b+hi Shiny+tsa hUM zhes dbang bskur bas/dus der na raka gi gnas de sprugs par 'gyur ro// dbang mchog rgyal po'i rgyud las/ na raka dong sprugs kyi le'u ste dgu pa'o//// de nas sems can las ngan de// yi dags gnas su yang skyes te// phyi nang gnyis ka'i sdug bsngal myong// rnam smin yi dags chen por gnas// de nas lag na rdo rje yis// yi dags de yi rtsar phyin nas// las ngan de la 'di skad bsgrags// pre ta ka tsak+Shu pra be sha ya a/de skad rna bar bsgrags pa yis// sngon gyi las ngan yongs su dran// kye ma kye hud mgon po yis// thugs rjes zungs la bdag skyobs shig/ bdag lus sgrol la bde la 'khod// mgon pos myur du mgon skyabs mdzod// ces gsol ba btab bo// de nas lag na rdo rje yis// rin chen sgrom bu phyag thogs nas// las ngan de yi gtsug tu bzhag/ rig pa'i tshigs bcad 'di brjod do// oM rin chen sgrom bu'i bum pa na// sangs rgyas zhi khro'i lha tshogs bzhugs// sems can khyod la dbang bskur bas// pre ta'i sdug bsngal bral bar shog/ pre pa tsa pa tsa sarba pre ta ka ga te he hU~M hUM phaT/ AHpad+ma satwa sa ma ya/ma nu pA la ya/ bAk+satwa twe no pa tiSh+Tha/ dr-i D+ho me b+ha ba/ su toSh+yo me b+ha ba/ a nu rak+to me b+ha ba/ su poSh+yo me b+ha ba/ sarba sid+d+hi m+me pra yats+tsha/ sarba karma su tsa me/ pad+ma shre yaM ku ru hUM hUM/ aM aM/ a a/ hUM ho he/ b+ha ga bAn/ sarba ta thA ga ta/pAd+mA me muny+tsa/ bAg+b+ha ba/ ma hA' sa ma ya bA ga satwa a/ AM a b+hi Shiny+tsa A/ zhes dbang bskur bas/ dus der yang yi dags rigs gsum las// rgyu ba gnas pa rnam par smin// phyi nang gnyis ka'i sgrib pa can// yi dags gnas de nyid las thar// mthong log sdug bsngal las grol lo// dbang mchog rgyal po'i rgyud las/ pre ta dong sprugs kyi le'u ste bcu pa'o//// de nas las ngan sems can de// byol song gnas su yang skyes so// byol song rigs bzhir yod pa las// gor ma rdo yi 'bu ru skyes// sngon gyi yan lag bcad la sogs// de yi rnam par smin las byung// rigs bzhi'i ming la dpag tu med// bsdus pas sum 'bum nyi khri yod// shin tu bsdus pa rigs bzhi yin// de dag kun tu skye ba na// de nas lag na rdo rje yis// sems can de yi gam du byon// las ngan de la 'di skad bsgrags// tir+ya ka tsak+Shu pra be sha ya A/de skad sems can des thos pas// sngon gyi las ngan de dran nas// kye ma kye hud bdag 'dra zhig/ las kyi rnam smin rang la smin// mgon po thugs rjes bdag sgrol cig/ zhes gsol ba btab pa dang// de nas lag na rdo rje yis// las ngan sems can byol song la// shes rab po ti lag thogs te// las ngan de yi gtsug tu bzhag/ rig pa'i bden tshig 'di brjod do// oM shes rab rigs pa'i po ti 'di// dus gsum sangs rgyas zhi khro'i gsung// sems can khyod la dbang bskur bas// tir+ya'i sdug bsngal grol bar shog/ su ma tha ma tha sarba tir+Ya ka ga te he tuM hUM phaTaH oM bud+d+ha satwa sa ma ya/ma nu pA la ya/ bud+d+ha satwa twe no pa tiSh+Tha/ dr-i D+ho me b+ha ba/ su toSh+yo me b+ha ba/ a nu rak+to me b+ha ba/ su poSh+yo me b+ha ba/ sarba sid+d+hi m+me pra yats+tsha/ sarba karma su tsa me/ karma shre yaM ku ru hUM/ ha ha ha ha ho/ b+ha ga bAn/ sarba ta thA ga ta/ b+hud+d+ha mA me muny+tsa/bud+d+ha b+ha ba/ ma hA sa ma ya/ bud+d+ha satwa a/ oM a b+hi Shiny+tsa a/ zhes dbang bskur ba dang/ yang de'i dus su byol song gi glen lkugs bsad bcad dang/ nying sha nying gis za ba las thar te/ 'khor byol song khri sum stong gis bde ba rnyed do// las ngan sems can de yang/ rdo rang zhig ste byol song gi mun pa las thar ro// dbang mchog rgyal po'i rgyud las/ tir+ya ka ngan song dong sprugs kyi le'u ste bcu gcig pa'o//// de nas las ngan sems can de// lha min gnas su skyes te yang// 'gro la gnod sems mtho ris 'khrug/ 'thab rtsod las la dga' zhing nad rims gtong// mi dge'i las ngan bar gcod gtong/sgra gcan nag po bya bar skyes// lha la khong khro 'khrug pa byed// dpung gi stobs kyis thams cad bred// lha yul dmag 'dren bsam gtan 'khrugs// de nas lag na rdo rje yis// las ngan de la 'di skad bsgrags// a su ra tsak+Shu pra be sha ya a// sgra gcan nag pos de thos nas// sngon gyi las ngan dus der dran// mgon po nyid la ngo dma' zhing// gdung ba'i smre sngags 'di smras so// e ma bdag 'dra'i sems can zhig/sngon gyi las ngan dus 'dir byung// kye ma kye hud mgon po yis// bdag lus ngan pa bsgral du gsol// sngar byas 'gyod do mthol bshags bsdam// thugs rjes zung la dbang bskur sbyongs// slad nas byang chub mchog thob mdzod// ces gsol ba yang btab bo// de nas phyag na rdo rje yis// phyag na go mtshon thogs nas ni// las ngan de la dbang bskur bsgral// rig pa'i bden tshig 'di brjod do// hA shes rab don mtshon ral gri dang// bdud kyi mtshon rdug go cha ni// dus gsum sangs rgyas rnams kyi sbyor sgrol te// zhi khro rgyal ba rnams kyi phyag mtshan 'dis// sems can khyod la dbang bskur bsgral// a su ra yi sdug bsngal bral bar bya// tri sarba du ga sarba karma pra be sha hUM phaTaH hA karma satwa sa ma ya/ ma nu pA la ya/ karma satwa/ twe no pa tiSh+Tha/ dr-i D+ho me b+ha ba/su toSh+yo me b+ha ba/ a nu rak+to me b+ha ba/ su poSh+yo me b+ha ba/ sarba sid+d+hi m+me pra yats+tsha/ sarba karma su tsa me/ karma shre yaMku ru hUM/ ha ha ha ha ho/ b+ha ga wAn/ sarba ta thA ga ta/ karma mA me muny+tsa/ karma b+ha ba/ ma hA sa ma ya karma satwa a/ hA karma a b+hi Shiny+tsa a/ zhes dbang bskur bas lha ma yin gzhan rnams kyang byams pa'i sems rang skyes/snying rje tshad med pa la gnas so/ 'thab rtsod thams cad dus der zhi'o// sgra gcan nag po dus der lag na rdo rjes bsgral lo// lha ma yin gzhan rnams kyang dga' ba'i sems la gnas te/skye ba gnyis pa dang gcig pa sha stag tu gyur to// dbang mchog rgyal po'i rgyud las/ sgra gcan nag po'i le'u ste bcu gnyis pa'o//// de nas sngar gyi sems can de// lha yi gnas su skye ba blangs// lha gnas rnam pa gsum las ni// 'dod khams sum cu rtsa gsum gyi// dge ba'i ngang tshul bya bar skyes// lha mo bdun dang lhan cig 'grogs// 'dod yon chags pa can de la// lag na rdo rjes 'di skad bsgrags// de ba tsak+Shu pra be sha ya a/ dge ba'i ngang tshul de thos nas// sngon gyi las ngan skye ba dran// rang gi rgyan bkrol lag na thogs// 'gro mgon nyid la ngo dma' zhing// kye ma kye hud thugs rje che// bdag 'dra rmongs pa'i 'du 'dzi can// dam tshig rtsa ba nyams pa'i skyon// ngan song mtho ris gnas na 'khor// mi 'chab 'thol bshags me tog bzhes// dbang bskur lha yi gnas las sgrol// zhes rang gi rgyan phul lo// de nas lag na rdo rje yis// nga rgyal phrag dog 'joms byed pa'i// pi wang lag tu thogs nas ni// dge ba'i ngang la dbang bskur nas// rig pa'i bden tshig 'di brjod do// a longs spyod 'du 'dzi g.yeng 'joms pa'i// pi wang snyan pa'i don byed 'dis// de ba khyod la dbang bskur bas// skye ba gcig gi las rdzogs shog/ a sarba ta thA ga ta bing+hAn+sa na khaD+ga ts+tshin d+ha ts+tshin+d+ha hUM phaTaH swA rat+na sa twa sa ma ya/ma nu pA la ya/ rat+na satwa twe no pa tiSh+Tha/ dr-i D+ho me b+ha ba/ su toSh+yo me b+ha ba/ a nu rak+to me b+ha ba/ su poSh+yo me b+ha ba/ sarba sid+d+hi m+me pra yats+tsha/ sarba karma su tsa me/ rat+na shre yaM ku ru hUM/ ha ha ha ha ho/b+ha ga bAn/ sarba ta thA ga ta/ rat+na mA me muny+tsa/ rat+na b+ha ba ma hA sa ma ya/ rat+na satwa a/ A a b+hi Shiny+tsa a/ zhes dbang bskur bas/ lha rnams gzhan yang dge ba la brtson 'grus dang ldan par gyur te/ skye ba gcig pa sha stag byung bar gyur to// dge ba'i ngang tshul lha'i 'pho ltung las dus der grol bar gyur to// dbang mchog rgyal po'i rgyud las/ lha'i bu'i le'u ste bcu gsum pa'o//// de nas las ngan sems can de// gling mchog 'dzam gling mi ru skyes// skye ba gcig pa'i byang chub sems// rig 'dzin gsang spyod rnal 'byor te// sngar byas las kun dran pa can// rig pa'i blo can sngon sbyangs stobs// 'gyod sems drag pos dka' thub spyod// 'phags pa bla ma mnyes par byed// gsang bdag lag na rdo rjes kyang// ngan song sbyong ba'i rgyud dbang bskur// bum pa thabs shes gsang tshig gis// dbang mchog bsgrub pa de la bskur// 'gro drug skye sgo gcad pa'i phyir// rang rgyud sbyong ba'i sngags brjod pa// hUM ni bi sha mu tsa la ts+tshin+da ts+tshin+da hUM phaTaH de nas dam tshig nyams pa gso bya'i phyir// bshags pa'i rgyal po yi ge brgya pa bshad// yi dam lha ni gsal byas la// 'phro 'dus 'gyod sbyang tshar bcad bya// rgyal ba zhi khro dpang gsol nas// phyag 'tshal mos gus bshags byas la// gsang sngags 'bru brgya'i bshags pa bshad do// hUM badzra satwa sa ma ya/ ma nu pA la ya/ badzra satwa/ twe no pa tiSh+Tha/ dr-i D+ho me b+ha ba/ su toSh+yo me b+ha ba/ a nu rak+to me b+ha ba/ su poSh+yo me b+ha ba/ sarba sid+d+hi m+me pra yats+tsha/ sarba karma su tsa me/ tsit+taM shre yaM ku ru hUM hUM/ ha ha ha ha ho/ b+ha ga bAn/ sarba ta thA ga ta/ badzra mA me muny+tsa/ badzrI b+ha ba/ ma hA sa ma ya/ badzra satwa a/ hUM badzra a b+hi Shiny+tsa a/ oM bud+d+ha a b+hi Shiny+tsa a/ swA rat+na a b+hi Shiny+tsa a/ AM pad+ma a b+hi Shiny+tsa a/ hA karma a b+hi Shiny+tsa a/zhes phyag mtshan du rin chen par bu dang/ gseg shang dang/ rdo rje dang/ 'khor lo dang/ rin po che dang/ pad+ma dang/ rgya gram dang/ ral gri la sogs pas dbang bskur ro// bden pa'i tshigs bcad 'di'o// hU~M rin chen par bu'i bum pa na// rgyal ba zhi khro'i lha tshogs bzhugs// rigs kyi bu la dbang bskur bas// lha dbang lus la thob par shog/ hUM gseg shang sil khrol sgra sgrog 'di// thugs rtags zhi khro'i lha'i brda'// rigs kyi bu la dbang bskur bas// a ba d+hU tI'i dbang thob shog/ rdo rje 'khor lo rin chen dang// pad+ma rgya gram thugs kyi rtags// rigs kyi bu la dbang bskur bas// 'khor lo lnga yi lha rdzogs shog/ces sngags dang ting 'dzin tshigs bcad kyis// rig 'dzin de la dbang bskur bas// lha dbang lus la thob par gyur// rang lus rgyal ba'i skur rdzogs kyang// mya ngan 'das pa'i don ma rtogs// rtog bcas lha yi dbang zhes bya// zhes gsungs so// dbang mchog rgyal po'i rgyud las/ lha dbang lus la bskur ba'i le'u ste bcu bzhi pa'o//// de nas rdo rje 'dzin pa yis// snod ldan slob bu de la ni// thabs kyi dbang bskur brda' ru bstan// shes rab dbang bskur shes sam bltas// gsang ba'i dbang bskur rang nyams bstan// tshig gi dbang bskur med par bstan// thabs kyi dbang bskur bstan pa ni// phyi nang snod bcud thams cad kyi// snang ba yod med brda' ru bstan// gcig las sna tshogs bsgyur byas pa// snang ba yod med bstan pa yin// shes rab dbang bskur bstan pa ni// sna tshogs bsgyur ba'i ming gis mtshon// ri rab gling bzhi'i dkyil 'khor dang// bum pa sku dang ye shes dang// 'khor lo rin chen pad+ma dang// rgya gram ral gri rtse gsum dang// phur pa mda' dang gzhu dang ni// me long dbyibs dang kha dog tu// bla mas ming du btags pa ni// slob ma'i shes rab lta ba min// dpe yi don de shes na shes rab yin// gsang ba'i dbang bskur bstan pa ni// rang la rang gsang smras pa yin// rang ngo shes na gsang ba thos// gcig ngo shes na thams cad de// mnyam pa nyid ni ngo mtshar che// yod na yod par ye nas mnyam// med na med par ye nas mnyam// bde na bde bar ye nas mnyam// rdzun na rdzun par ye nas mnyam// stongs na stong par ye nas mnyam// dngos na dngos por ye nas mnyam// mnyam pa nyid du shes pa ni// gsang ba'i dbang bskur thob pa yin// tshig gi dbang bskur rang med bstan// nga bdag 'dug na nams kyang 'khor// rang med ro dang bral ba ni// tshig gcig tshig med dbang gi mchog/ nga med bdag med snang ba med// ces gsungs pas/ rig 'dzin dge mthong dang/ 'khor du 'dus pa'i las dang po pa rnams dang/ theg pa brgyad pa rnams brgyal nas/ sa la 'gyel bar gyur te/ la la ni ngu zhing smre ngag 'don/ la la ni skrag ste sngangs par gyur nas skur pa 'debs/ la la dag mos pa log ste kha na ma tho ba smra/la la yi chad de byas pa don med pa/ kye ma kye hud gsang bdag rdo rje ma gsungs zhes gleng ngo// yid gnyis pa rnams ni de bas na mu stegs pa bden no zhes smra'o// de nas lag na rdo rjes 'khor de dag yang dag la yid ches par bya ba'i phyir/bos shing bsdus te 'di skad ces gsungs so// 'dus pa rnams the tshom bcad par bya'o// rdo rje sems dpa'i zhal dang phrad kyis longs shig/chos sku dang mjal du 'ong ngo zhes gsungs so// 'khor rnams slar 'dus te/ rdo rje sems dpa'i drung du bskor ba dang mchod pa'i tshogs kyis mchod de 'khod do// dbang mchog rgyal po'i rgyud las/ gsang ba chos nyid la yid ma ches pa'i le'u ste bco lnga pa'o//// de nas lag na rdo rje yis// rdo rje 'chang la 'di skad gsol// kye kye rdo rje sems dpa' mchog/ gsang sngags gsang ba mnyam mi mnyam// nga bdag rang dbang yod dam med// chos sku dngos med bden nam rdzun// bag chags ro dang 'bral mi 'bral// zhes zhus pas/ rdo rje sems dpas bka' stsal pa// stobs chen rdo rje'i 'khor kun nyon// chos nyid chos sku'i dgongs mtshan ni// mnyam pa nyid du mkhyen pa min// mnyam pa nyid la gnyis med de// dper na chos can dngos po gcig/ phyi rol ka ba bum pa dang// dper na rdo rje lta bu 'di// ming gis yin nam gzugs kyis yin// mtshon pas yin nam las kyis yin// 'dus pas yin nam 'bral bas yin// mdog gis yin nam dbyibs kyis yin// bsam pas yin nam gang gi yin// rdo rje 'dzin pa'i 'khor tshogs kun// rdo rje'i ming gis yin pas na// ming du gang grags rdo rje'am// gzugs kyis rdo rje yin pa na// gzugs su gang snang rdo rje'am// 'dus pas rdo rje yin pa na// sems can thams cad rdo rje'am// mdog gis rdo rje yin pa na// dkar dmar la sogs rdo rje'am// dbyibs kyis rdo rje yin pa na// zlum po la sogs rdo rje'am// bsam pas rdo rje yin pa na// yid smon thams cad rdo rje'am// de ltar rgyu yis yin pa min// rdo rje bya ba gang la zer// nyon cig blo rtog skyes pa rnams// dper na chos can rdo rje 'di// ming gis yin no nges par 'jug/ gzugs kyis yin no sgo nga ral// mtshon pas yin no chos can 'di// las kyis yin no chos bdun ldan// 'dus pas yin no 'bral ba yis// mdog gis yin no zhi rgyas kyis// dbyibs kyis yin no de bzhin no// bsam pas yin no chos can dngos// de ltar dgu yis yin pa ste// snang srid thams cad rdo rje yin// rdo rjer ma gyur gang yang med// de ltar rdo rje mtshon pa 'di// yin na yin par ye nas mnyam// min na min par ye nas mnyam// chos can yod na yod par ye nas mnyam// med na med par ye nas mnyam// bden na bden par ye nas mnyam// rdzun na rdzun par ye nas mnyam// stong na stong par ye nas mnyam// dngos na dngos por ye nas mnyam// snang na snang mnyam mnyam pa nyid// mnyam nyid nam mkha' 'dra'o gud na med// dper na gser gzugs chu yi ro// dug mchog ha la 'bar ba dang// sman mchog ga pur dkar po gnyis// sman dang dug tu gnyis ka mnyam// zhes gsungs so// dbang mchog rgyal po'i rgyud las/ chos nyid mnyam pa chos sku'i le'u ste bcu drug pa'o//// de nas lag na rdo rjes 'di skad gsol// kye kye rdo rje sems dpa' che// nga bdag snang ba la sogs yod dam med// chos can snang ba bden nam rdzun// mi dge spang du yod dam med// zhes zhus pas/ rdo rje sems dpas bka' stsal pa// nyon cig rdo rje 'dzin pa sogs// rang med ro dang phrol cig 'khor tshogs khyed// nga dang snang ba gnyis pa med// nga med nga gcig su la 'dug/ snang med snang ba su la bden// chos can dngos po gang la 'dus// dge dang mi dge mnyam pa nyid// nga med bdag med nga bdag gang// su la nga bdag yod la 'khor// gang zhig the tshom sus za ba// nga bdag tshol cig nga la ltos// btsal kyang 'du na da rung tshol// tshol mkhan tshol cig tshol mkhan med// bltas kyang ma mthong lta mkhan ltos// lta mkhan ltos shig lta mkhan med// dper na chos can rdo rje de// rdo rje dngos po gang gis byed// bum pas byed dam pad+mas byed// steng rwas byed dam 'og rwas byed// 'dus pas byed dam rdo rje gang// de bzhin nga bdag dngos po yang// lus kyis byed dam sems kyis byed// lus kyis byed na lus po gang// mgo dang rkang lag dbang po dang// don snying nang khrol sha lpags rus// rtsa dang ba spu skra sen gang// des na lus kyi dngos po med// sems kyis byed na gsal stong dang// 'gyus dran 'dzin chags dag gis byed// lus sems dngos po 'di zhes pa// rdo rje sems dpa' ngas ma rnyed// mtshon pa tsam du nga zhes bya// ming tsam 'di zhes bstan pa ni/ kun tu bzang pos bstan du med// rdo rje sems dpa' mtshon du med// snang ba med do snang ba gang// snang ba yul gcig su la bden// yul du bden rdzun gcig la ltos// dper na 'byung ba chu lta bur// 'gro drug mu stegs rtag chad dang// rim dgu mthong snang tha dad pa// ming du bden pa gcig kyang med// dper na rgya bod zhang zhung 'dra// ming du bden pa gcig kyang med// ming tsam 'di zhes bstan pa ni// rdo rje sems dpas mtshon du med// snang ba yod med 'khrul ma 'khrul// 'khrul na 'khrul pa bden nam rdzun// bden na 'khrul pa su la bden// 'khrul pa rdzun na de kas med// ma 'khrul pa la snang zer su// zer na zer mkhan 'khrul pa yin// des na chos can dngos po med// yod na dngos po gtan la phob// gtan la phabs nas dngos po gang// dngos por 'dod pa blo phugs can// blo phugs gang ltar byas kyang 'khrul// blo phugs gtib cig skal ldan bu// dge dang sdig pa ye nas mnyam// ci phyir blo phugs grol phyir ro// blo bzang dge bas gtong du med// sdig pas gnod pa skyel pa med// ci ste mtshan ma med pas smon pa med// stong pa nyid la phan gnod med// bag chags bzang rtog ngan rtog yin// rtog pas nams kyang 'khor bar byed// 'khor ba'i nang nas khyad par che// dge ba spyod cig rigs kyi bu// bag chags ro dang bral bar gyis// bag chags ro dang ma bral na// 'khor ba'i gzungs thag mi chod do// skye ba'i rten phur phyung re kan// zhes gsungs so// dbang mchog rgyal po'i rgyud las/ rtog pa the tshom gyi gegs bsal bas chos sku'i zhal mthong ba'i le'u ste bcu bdun pa'o//// de nas yang bka' stsal pa// nyon cig rdo rje 'dzin pa'i 'khor// dper na snang ba sna tshogs kyang// sgyu ma'i cho 'phrul ji bzhin no// sgyu ma'i dngos po gang gis byed// sgyu ma rten 'brel skye ba med// dper na skyes bu gnyid log na// rmi lam dge sdig cho 'phrul ni// dngos por snang ba ji bzhin rmi// nyin par bag chags mtshan byung ba// de la dngos po yod dam med// dper na gong gi rmi lam na// skyes bu mtshon thogs mang po yis// bdag gsod 'thab mkhon ri la ded// bred sngangs ngal chad shi nyer bros// sad par gyur na de cir snang// de phyir snang ba'i dngos po 'di// ri rab gling bzhi 'byung ba kun// dgra gnyen chags sdang sdugs bsngal kun// sgyu ma'am rmi lam ji bzhin no// yod nas mi snang med nas snang// mthong ba'i chos kun yod pa med// med pas yod bzung 'khrul pa yin// 'khrul ba'i dus na yod pa med// kun rdzob tsam du yod zer na/ kun rdzob tsam du su la bden// bden nam bden na 'gro ba kun// thams cad snang ba mthun par rigs// de bas phyogs mthun tsam yang med// dper na dngos po chu lta bur// rigs drug rtag chad theg pa rnams// phyogs mthun tsam yang mi snang phyir// des na med pa snang ba yin// zhes gsungs so// dbang mchog rgyal po'i rgyud las/ snang ba'i gnad bsal ba'i le'u ste bco brgyad pa'o//// de nas lag na rdo rje yis// ston pa la 'di skad ces gsol to// kye kye ston pa rdo rje 'chang// med nas snang ba'i dpe don gsungs// 'khor rnams tshig chen des skrag gnas// yang dag gnas la log lta 'byung// zhes zhus pas// ston pa rdo rje chos sku yis// rdo rje 'dzin la bka' stsal pa// nyon cig 'dus pa'i 'khor tshogs khyod// 'khrul pa'i snang ba sna tshogs 'di// yod nas mi snang med nas snang// dper na sgyu ma'i dpe brgyad 'dra// skyes bu gnyid log rmi lam na// bu dang chung ma nor phyugs kun// shin tu longs spyod skyid ldan la// go mtshon dmag mang dgra dag gis// bu bsad nor bcom sdug bsngal rmi// skyes bu de yi rmi lam de// yod nas snang ngam med nas snang// sad par gyur nas ji snyam sems// 'khrul pa'i chos de bden nam brdzun// bden na bden par kri le mnyam// brdzun na brdzun par kri le mnyam// de bzhin sgyu ma'i mkhan po yi// sgyu ma'i skyes pa bud med dang// khang khyim rol mo gcan gzan kun// yod nas mi snang med nas snang// sgyu ma shes pas sgyu ma med// sgyu ma bden rdzun sgyu mas shes// de bzhin 'khrul pa'i dngos po 'di// 'khrul pa bden rdzun 'khrul pas shes// sgyu ma'i chos dang kri le mnyam// dngos po 'khrul pas bden pa med// de bzhin sprul pas sprul pa rnams// yod nas mi sprul med nas sprul// sprul pa yin pas yod pa med// de bzhin 'khrul pa'i las rnams kyang// sprul pa nyid dang kri le mnyam// de phyir 'khrul pa zer bas chog/ de bzhin gzugs brnyan chu zla 'dra// krong nge 'dug kyang zla ba med// de bzhin dngos por snang ba 'di// krong nge 'dug ste snang ba med// yod na snang ba mthun nam ci// snang ba gcig la mthun pa med// gzugs brnyan nyid dang kri le mnyam// de bzhin sgra brnyan lta bu ste// yod nas ma btags med nas btags// yod na ming btags gcig par rigs// gcig la ming btags don mthun med// sgra brnyan nyid dang kri le mnyam// des na brag cha nyid dang khyad par med// yod pas mi snang med pas snang// dper na dri za'i grong khyer 'dra// krong nge 'dug pa'i dus na med// snang ba rang gis med pa yin// med na sems kyi cho 'phrul ltos// sgyu ma'i chos nyid mthong na lta ba yin// mthong med mthong na yin pa med// lta ba yin pa med pa yin// ces gsungs so// dbang mchog rgyal po'i rgyud las/ sgyu ma'i chos bdun gyi snang ba med par thag bcad pas blta ba rtogs pa'i le'u ste bcu dgu pa'o//// de nas yang bka' stsal pa// rdo rje 'dzin pa'i 'khor 'dus nyon// mthong ngam mthong ngam mthong bar ltos// ma mthong ba ni ci zhig bsgom// dper na dmus long 'ga' dag gis// glang chen rtsal ldan lag noms nas// sna dang mjug ma rkang lag rgyab// dang por gang reg bsgom pa 'dra// de bas mkhas pas legs par ltos// rmi lam ltos shig mthong ba na// rmi lam bsgom pas bsgom pa yin// rmi lam shes nas rmi lam bsgom// sgyu ma mthong nas sgyu ma bsgom// sgyu ma'i gzugs dang sgyu ma'i sgra// sgyu ma'i dri dang sgyu ma'i ro// sgyu ma'i reg dang sgyu ma'i chos// sgyu ma legs par mthong ba na// sgyu ma 'dris pa bsgom pa yin// goms p ar gyis shig sgyu ma las// sgyu mar spyod shes sgyu ma yin// sgyu ma 'bras med 'bras bu yin// de bzhin rmi lam smig rgyu rnams// de ltar mkhas pas legs par ltos// mthong med mthong na lta ba yin// de dag goms na bsgom pa'o// gnyis med spyod pas spyod pa yin// 'du 'bral med na 'bras bu'o// zhes gsungs so// de nas rig 'dzin rgyal po dge mthong des// sangs rgyas rdo rje sems dpa' dang// mgon po rdo rje 'dzin pa la// 'dzum pa'i mdangs phyung gus btud nas// rgyal ba'i tshogs la 'di skad gsol// drug gi dkyil 'khor gnyis 'dus lhar// bdag dra ma rig dregs pa yis// yang dag nyid la log bltas nas// rtsa ba'i dam tshig nyams pa sogs// mi 'chab mi sbed mthol lo bshags// slan chad bsdam mo dpang mdzod cig/ snga rabs gong du ci bgyis pa// lus ngag yid gsum 'bad rtsol gyis// pha rol phyin drug nyams blangs la// 'gyod tshangs dpang gsol zhi khro'i lhar// lus ngag yid gsum mos nas bshags// byin rlabs sngags mchog brgya pa ni// bdun gsum nyi shu rtsa gcig gam// brgya rtsa brgyad du bshags par bya// smre 'gyod mthol lo gdung ba'i tshig/ brkyang phyag gus byas tshig gis bshags// sems bskyed las brtson 'gro ba'i don// smon lam bkra shis dge ba bshags// thams cad yul med ming bral mthong// rtogs pa mnyam nyid lta bas bshags// e ma bdag gi phung po'i khams dang skye mched rnams// 'dod pa'i yon tan lngar gyur te// phyi nang gsang ba'i mchod par bzhes// ba spu rdul phran re res kyang// 'gro ba'i don rnams byed par shog/ ces phyi nang gsang ba gsum gyi mchod pa phul lo// dbang mchog rgyal po'i rgyud las/ sgyu ma bshags mchod smon lam gyi le'u ste nyi shu pa'o//// de nas 'khor 'dus pa de dag gis// rdo rje sems dpa' dpal mgon lags// rgyud chen 'di yi dpe mtshon ci// gang gi dus su dar bar bgyi// zhes zhus pas/ rdo rje sems dpas bka' stsal pa// nyon cig lag na rdo rje sogs// nga yis rgyud chen rgyal po 'di// dper na nyi mas mun pa 'dra// mun khung sgron me'i rgyud du zung// dper na nad dang sman lta bu// sman mchog rgyal po'i rgyud du zung// dper na rtsi shing me lta bu// bskal pa'i me chen rgyud du zung// dam pa rigs brgya'i lha gsal bas// gsang chen rigs brgya'i rgyud du zung// de nyid rigs lnga'i lhar bsdus nas// yi ge brgya pa'i sngags brjod pas// yi ge brgya pa'i rgyud du zung// nyams chag thams cad 'dis skong pas// bshags pa chen po'i rgyud du zung// 'gro drug gnas nas 'dis drangs pas// 'khor ba dong sprugs rgyud du zung// thams cad sgyu mar la zlos pas// sgyu ma mnyam nyid rgyud du zung// snang srid lha dang dkyil 'khor du// bsnyen bsgrub bskyed rdzogs dam tshig sngags// phyag rgya dbang dang rgyud lung dang// 'khor 'das thams cad bltas pas mthong// lta ba dbang mchog rgyud du zung// mthong nas bsgom du med pas na// sgom pa dbang mchog rgyud du zung// spyod nas spyad du med spyod pas// spyod pa rgyal po'i rgyud du zung// mthong bas 'du 'bral med mthong bas// 'bras bu dbang mchog rgyud du zung// nyams sgrib thams cad 'dis 'dag pas// dam tshig khrus lung rgyud du zung// 'khor tshogs 'dus pa khyed rnams kyis// dbang mchog rgyal po'i rgyud 'di ni// dus ngan tha ma'i dus dag tu// sngags pas dam tshig mi bsrung bas// las kyi 'bras bu ngan song 'khor// zang zing nor gyis mig brid nas// na rag gnas su 'khor byed pas// de dus nga yis rgyud 'di 'byung// dper na nor bu rin chen 'dra// dbul dang nad dang 'jigs pa med// thar pa'i lam skas byed par nges// dper na mkha' la nyi shar 'dra// mun pa'i smag la gsal ba'i rkyen// nyi zla lta bu rtogs byed nges// dper na me dang shing lta bu// shing nyid me yi grogs su nges// kye ho nam mkha'i mthong na 'byung ba gnas// sa chu me rlung gang yang snang// thams cad nam mkha'i ngang du thim// zhes gsungs nas mi snang bar gyur to// rig 'dzin rgyal po dge mthong la sogs pa'i 'khor rnams kyis mngon par bstod de rjes su yi rang ngo// sprul pa rnams ni mngon par bsdus te/ rdo rje'i sprul sku la gtad do/

CLOSE WINDOW