CLOSE WINDOW

Gpb001.013
བོད་ཡིག

/ 'od gsal nyid du stongs kyis 'byung// zhes gsungs so// thig le mthong brdol gyi rgyud/ rig pa cur 'byin gyi brda'/ srog gi tshan pa/ yang ti nag po'i rgyud rdzogs so// // rgya gar skad du// tan+t+ra gra rA dza sUr+Ya tsan+d+ra pra d+hA tswa la A ka shA bar+t+ta bi shud+d+ha sa mu drA bar+t+ta pra ka Ta tan+t+ra nA ma/bod skad du/ rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud ces bya ba/ sngon thog ma'i sangs rgyas skye med ka dag la phyag 'tshal lo// 'di skad bdag gis ci yang ma thos pa gang du yang mtshon brjod las 'das pa'i dus med pa na/ bkol med gnas su ka dag ston pa des// 'od gsal 'khor la skye med bstan pa bshad// dus ni dus gsum gcig ste snga phyi med pa'i dus// sdud pa po ni gsal dag rin po che'o// de nas gsal dag rin chen gyis// skye med ka dag ston pa la// phun sum tshogs pa'i don ni de ltar na// dngos po gshis kyi gnas lugs ji ltar gnas// 'od gsal rtsal gyi yan lag ji ltar shar// snying po'i klong du 'od gsal ji ltar grol// de gnyis dbyer med gdams ngag ji ltar lags// thod rgal theg pa ji ltar bshad// nyi zla'i snying po spyi ti yo ga la// grub mtha'i blos btags yod dam med// rtsis gdab blo u0f84bral bstan pa la// bya btsal blo chos mi 'tshal lam// rtsol sgrub 'das pa'i theg pa la// lta sgom spyod 'bras dgos mi dgos// theg dgu spang ngam ji lta bgyi// dkyil 'khor dbang dang dngos grub la// re bar bya ba'am ye nas rdzogs// tshogs dang gtor ma ma btang bar// tshogs bsags smon lam ji ltar rdzogs// nyi zla'i snying po spyi ti yo ga la// gol sgrib 'khrul pa yod dam med// ma rig ye shes yod dam med// 'char sgo 'khrul pa ci la zer// rtogs dang ma rtogs yod dam med// sangs rgyas sems can ci la zer// dge sdig las 'phro yod dam med// mtho ris ngan song ci la zer// rdzogs chen spyi ti yo ga yis// ma bsgrubs 'bras bu ji ltar thob// zhus tshig nyi shu rtsa gcig de// ston pas 'khor la bka' stsol cig/ shin tu zab par gsung du gsol// zhes zhus so// rgyud kyi rtse rgyal ny-i zla 'od 'bar mkha' klong rnam dag rgya mtsho klong gsal gyi rgyud las/ phun sum tshogs pa dang zhus tshig nyi shu rtsa gcig gi gleng slong bstan pa'i le'u ste dang po'o//// de nas gsal dag rin chen gyis// skye med ka dag ston pa la// dngos po gshis kyi gnas lugs ji ltar gnas// zhus pas/ ston pa'i rgyal po skye med ka dag gis// 'khor gyi dam pa gsal dag rin chen la// rdzogs chen rgyal po nyi zla'i snying po bshad// 'khor rnams ma yengs gus pas nyon// don dam mtshon dang brjod las 'das mod kyang// rtsal gyi rig pa blo dang sbyar nas bstan// dper na mun nag rdzas stor la// lag nom rtsal ba'i rnyed par dka'// snang gsal sgron me la brten nas// btsal bas rnyed par the tshom med// de bzhin ma rig mun nag tu// chos nyid nor bu stor ba de// tha snyad tshig gi rnyed par dka'// ma nor bla ma'i zhal dran gyis// rin chen brda yis rnyed par 'gyur// a la la ho ngo mtshar che ba'i bka'// dngos po gshis kyi gnas lugs ni// gti mug chos skur ye nas gnas// zhe sdang longs skur ye nas gnas// 'dod chags sprul pa'i sku ru gnas// nga rgyal sku gsum dbyer med yin// phrag dog don dam bde ba'i sku// sdug bsngal ma spangs sku lngar grol// dug gsum ma spangs sku gsung thugs su grol// ma rig ma spangs ye shes chen por grol// sgrib g.yogs ma spangs 'od gsal chen por grol// rnam rtog ma spangs chos nyid chen por grol// sems can ma spangs sangs rgyas bsgrub med chen por grol// 'khor ba ma spangs myang 'das chen por grol// snang ba ma spangs zhing khams chen por grol// sdug bsngal ma spangs bde ba chen por grol// phyi nang ma spangs yul sems gnyis med grol// bzang ngan ma spangs dgag sgrub med par grol// gzung 'dzin ma spangs dbye bsal med par grol// dngos po gshis kyi gnas lugs ni// ye nas skye med chen por gnas// dus gsum skye bar ma gsungs so// ka dag chen por ye nas gnas// blo bur sgrib g.yogs ma gsungs so// gnyis med chen por ye nas gnas// gnyis 'dzin rtog par ma gsungs so// rgyu rkyen med par ye nas gnas// thog mtha' yod par ma gsungs so// gnyen pos bcos bsgyur med par gnas// rtsol bas 'grub par ma gsungs so// dngos med chen por ye nas grol// zang thal chen por ye nas grol// spyi phud thod rgal chen por gnas// zhes gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal kyi rgyud las/ dngos po gshis kyi gnas lugs bstan pa'i le'u ste gnyis pa'o//// de nas gsal dag rin chen gyis// skye med ka dag ston pa la// 'od gsal rtsal gyi yan lag ji ltar shar// zhus pas/ ston pas 'khor la bka' stsal pa// dngos po gshis kyi rtsa zer gnyis med kyang// 'khor gyi rtog pa bsal phyir shar tshul bshad// mkha' klong rnam dag gnas lugs klong dkyil nas// ma 'gags 'od gsal rtsal rnam shar// gzhi rlung nga yi rtsal du shar// 'od gsal nga yi rol pa'i rtsal// shes rig ma 'gags rol pa'i rtsal// ngo bo rang bzhin nga yi rtsal// dus gsum yid 'khor nga yi rtsal// ma rig ye shes yan lag rtsal// 'char sgo 'khrul sgo nga yi rtsal// kun gzhi rig yid nga yi rtsal// 'khrul lugs rnam gsum nga yi rtsal// 'khrul smin phung lnga nga yi rtsal// btang bzung zhen pa nga yi rtsal// phyi nang snod bcud nga yi rtsal// yul sems gnyis ka nga yi 'phrul// dgag bsgrub gnyis 'dzin rol pa'i rtsal// spang len dbye bsal yan lag rtsal// bzang ngan rtsis gdab yan lag rtsal// 'khor ba myang 'das yan lag rtsal// bde dang sdug pa nga yi rtsal// dgra gnyen phyogs ris nga yi rtsal// phyogs mtshams kha dog yan lag rtsal// kun btags rim dgu yan lag rtsal// 'gro ba rigs drug nga yi rol par shar// rtag chad rnam gnyis rol par shar// grub mtha' rnam gnyis rol pa'i rtsal// grub mtha'i lta sgom rol pa'i rtsal// zhe 'dod bya rtsal yan lag rtsal// 'gyus tshad rig tshad yan lag rtsal// rtags tshad ma lus rol pa'i rtsal// 'chad tshad brjod tshad thams cad nga yi rtsal du shar// zhes gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/ 'od gsal rtsal dang yan lag bstan pa'i le'u ste gsum pa'o//// de nas gsal dag rin chen gyis// skye med ka dag ston pa la// snying po'i klong du 'od gsal ji ltar grol// zhus pas/ ston pas 'khor la bka' stsal pa// mkha' klong rnam dag chos dbyings snying po ru// gzhi rlung 'od lnga snying po'i klong du thim// rtsal lnga zer lnga snying po'i klong du grol// stong gsal 'od 'bar snying po'i klong du grol// shes rig dran pa snying po'i klong du grol// rang bzhin ngo bo snying po'i klong du grol// ma rig ye shes snying po'i klong du grol// 'char sgo 'khrul sgo snying po'i klong du grol// gti mug ma spangs mi gnas klong du grol// ma rig ma spangs mi gnas klong du grol// sgrib g.yogs ma spangs mi gnas klong du grol// 'gro drug ma spangs mi gnas klong du grol// snang srid snod bcud snying po'i klong du grol// 'khor dang mya 'das snying po'i klong du grol// bde dang sdug bsngal snying po'i klong du grol// bzang ngan spang len snying po'i klong du grol// yin min dbye bsal snying po'i klong du grol// dgra gnyen phyogs ris snying po'i klong du grol// rtag chad gzung 'dzin snying po'i klong du grol// rig tshad 'gyu tshad snying po'i klong du grol// dran tshad bsam tshad snying po'i klong du grol// dug lnga sku lnga snying po'i klong du grol// rnam rtog bag chags snying po'i klong du grol/ kun btags rim dgu snying po'i klong du grol// grub mtha'i lta sgom thams cad snying po'i klong du grol// mtshon tshad btags tshad snying po'i klong du grol// bya btsal rtsol bsgrub ma byas par// rang bzhin shugs kyis de ltar grol// klong nas rtsal zer klong du grol// stong las kun 'byung stong par grol// med las sna tshogs med par grol// thol byung yid rig byung tshad grol// wal byung dran rtog snying por grol// gzugs su snang tshad bde gshegs sku ru grol// sgra skad thams cad grags stong gsung du grol// dran rtog thams cad sangs rgyas thugs su grol// khams gsum sems can lus ngag yid gsum de// dus gsum sangs rgyas kun gyi sku gsung thugs su grol// snang srid 'jig rten 'khor 'das thams cad kun// sangs rgyas zhing khams 'od gsal chen por grol// zhe 'dod rtsol sgrub byas nas grol ba ma yin te// thog ma nyid nas ma spangs mi gnas grol// nyon mongs brgyad khri bzhi stong grol// blos btags chos sde brgyad khri bzhi stong grol// dper na sbrul gyi mdud pa bzhin// 'ching mkhan grol mkhan med par grol// de bzhin rtag chad chos rnams ma lus kun// ma bcings ma grol snying po'i klong du grol// dper na rnga ma'i mdud pa bzhin// mtshan ma sna tshogs rang grol nyid// ces gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/snying po'i klong du 'od gsal grol bar bstan pa'i le'u ste bzhi pa'o//// de nas gsal dag rin chen gyis// skye med ka dag ston pa la// snying po'i yan lag gnyis med ji ltar lags// zhes zhus pas/ ston pas 'khor la bka' stsal pa// chos nyid mkha' klong snying po'i klong dkyil du// 'od gsal rtsal zer yan lag ma lus thim// snying po rtsal zer gnyis med thog mar ye sangs rgyas// bya btsal rtsol bas ma bsgrubs par// mkha' la 'ja' tshon thim pa 'dra// nam mkhar cho 'phrul thim pa dang// 'o ma chu dang 'dres pa dbyer mi phyed// de bzhin gzhi rlung gnyis su 'dres pa dbyer mi phyed// rlung lnga 'byung lnga gnyis med dbyer mi phyed// 'od lnga zer lnga gnyis med dbyer mi phyed// shes pa snang tshul 'gyu med dbyer mi phyed// rang bzhin ngo bo thugs rje dbyer mi phyed// dus gsum sku gsum gnyis med dbyer mi phyed// yid 'khor 'khrul 'khor gnyis med dbyer mi phyed// ma rig ye shes gnyis med dbyer mi phyed// 'khrul dang ma 'khrul gnyis med dbyer mi phyed// rtogs dang ma rtogs gnyis med dbyer mi phyed// sangs rgyas sems can gnyis med dbyer mi phyed// 'khor ba myang 'das gnyis med dbyer mi phyed// sangs rgyas 'gro drug gnyis med dbyer mi phyed// snang srid snod bcud gnyis med dbyer mi phyed// dug lnga sku lnga gnyis med dbyer mi phyed// dug gsum sku gsum gnyis med dbyer mi phyed// rnam rtog chos nyid gnyis med dbyer mi phyed// nyon mongs brgyad khri bzhi stong dang// chos sde brgyad khri bzhi stong gnyis su med// phyi nang yul sems dbye ba gnyis su med// gzugs lnga sku lnga gnyis med dbye ru med// dbang lnga yul lnga dbyer med gnyis su med// sgo lnga gzugs lnga dbyer med gnyis su med// yid lnga gsal dbang dmigs 'dzin gnyis su med// rig sems ming 'dogs nyon mongs gnyis su med// 'gyu dran glo rtog 'dzin zhen gnyis su med// ci la spyod kyang ma zhen ma chags gnyis su med// sdug bsngal bde ba gnyis su dbye ru med// bzang ngan spang len dbyer med gnyis su med// yin min dbye bsal dbyer med gnyis su med// dgra gnyen phyogs ris gnyis med dbye ru med// phyi nang yul sems dgag sgrub gnyis su med// dper na rgya mtsho chen po ru// chu bran 'di yin 'di min dbyer mi phyed// de bzhin sems kyis brtags pa'i chos rnams kun// snying po'i klong du thim nas blo las grol tsam na// chos rnams 'di yin 'di min dbyer mi phyed// ci'i phyir zhe na chos dang chos nyid 'phrad nas blo dngos 'dres tsam na// yin rgyu gang yin min rgyu gang blo zad// theg pa grub mtha' stongs tsam na// yin min dbye bsal med de ka dag chen por grol// sangs rgyas gzhan nas mi re blos btags chos rnams zad// skye med ka dag dngos med dang// rnal ma blo 'das ngo bo nyid// ces gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/ snying po dang rtsal zer dbyer med bstan pa'i le'u ste lnga pa'o//// de nas gsal dag rin chen gyis// skye med ka dag ston pa la// blo 'das theg pa ji ltar bshad// zhus pas/ ston pas 'khor la bka' stsal pa// blo 'das rang la brjod med kyang// 'khor gyi rtog pa bsal phyir bshad// yang ti nyi zla'i snying po theg pa'i spyi phud 'di// theg pa'i gong brgal rdzogs chen gnya' gcog yin// nyi zla'i snying po theg dgu thod rgal 'di// 'di go kun go'i chos su bshad// 'di rtogs kun rtogs chos su bshad// 'di shes kun shes chos su bshad// 'di gsal kun gsal chos su bshad// 'di bcangs kun yod chos su bshad// 'dir zhugs kun gyi sgor bzhugs yin// 'di bris chos kun bris par bshad// ci'i phyir zhe na chos rnams kun gyi rtsa ba'i rgyud sde yin// theg pa kun gyi spyi phud rtse rgyal yin// brgyad khri bzhi stong gsal bar ston pa'i nyi zla yin// theg pa kun gyi gter mdzod lde mig yin// btags chag kun gyi zhing sa yin// thams cad bskyed pa'i yab yum mkha' klong b+ha ga yin/ kun gyi sa bon gzhi ma rtsa ba yin// kun gyi rtsa ba gcig rtogs pas// kun la dbang bsgyur thob pa yin// yang ti 'di yis chos rnams gtan la phebs pa'i phyir// bstan pa'i yang snying 'di thos pas// 'di thos gang zhig thos pa'i mchog/ dper na mchog rab rtse nas ri bran thams cad gsal// 'byung chen nam mkhar 'byung ba thams cad gsal// gnam sa gnyis su skye 'gro thams cad gsal// za 'og snam bur dang sna sna tshogs gsal// bsam 'phel nor bur rin chen sna tshogs gsal// dkyil 'khor chen por sa tshon rnam lnga gsal// phyi yi rgya mtshor chu bran sna tshogs gsal// de bzhin chos kun rtsa rgyud nyi zla'i snying por gnas// sems kyi btags pa'i chos rnams ril por gsal// a ho nga yi bka' chen 'di lta bu// gzhan nas mi 'byung a la la// rang byung ngo mtshar khyad par can// dug gsum sku gsum yin par bshad// dug lnga sku lnga yin par bshad// ma rig 'od gsal chen por bshad// gti mug ka dag chen por bshad// rnam rtog chos nyid chen por bshad// mtshan ma'i chos rnams gzigs mor bshad// bya btsal med pa'i chos su bshad// rtsol sgrub med pa'i chos su bshad// zhe 'dod med pa'i chos su bshad// lta sgom spyod 'bras med pa'i chos su bshad// dngos grub yid smon med pa'i chos su bshad// sku dang ye shes rang la tshang ba'i chos su bshad// blo zad grub mtha' stongs pa'i chos su bshad// mtshon brjod dmigs las 'das pa'i chos su bshad// ces gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/ blo 'das bshad thabs bstan pa'i le'u ste drug pa'o//// de nas gsal dag rin chen gyis// skye med ka dag ston pa la// nyi zla'i snying po yang ti yo ga la// grub mtha'i blos btags yod dam med// ces zhus pas/ston pas 'khor la bka' stsal pa// grub mtha'i blos btags blo yi yul// blo yi yul la nges pa med// blo yul ma zad sangs mi rgya// de phyir yang ti nyi zla'i snying po'i rtogs pa la// theg pa dgu yi chos mi dgos// 'on kyang yang ti ma rtogs gang zag la// theg pa dgu yi lta bsgom bstan// mu stegs nyan thos rang rgyal dang// sems tsam dbu ma byang sems dang// kri yA yo ga u pa ya// ma hA a nu a ti dgu// de yi grub mtha' blos btags ni// rang rang dkyus na gsal phyir ro// blos btags tha snyad 'dir ma bstan// nyi zla'i snying po rtogs pa la// de rnams blo yin dgos pa med// 'on kyang 'khrul rmongs mi shes blo can la// re zhig tshig gi sgron mes don gyi dper mtshon pa// dngos po'i chos can gcig la ni// mu stegs rtag lta bas ni shes shing rig pa'i ngo bor btags// de yang rdzas su grub par 'dod// rtag 'dod kha dog dbyibs kyi tshad// rang rang lus dang sbyar nas ni// snying dkyil nyung 'bru sran tsam pa// kha dog dkar tsher snum la 'dril// zhes gsungs so// mu stegs chad pa'i lta ba ni// rgyu med 'bras bu med par 'dod// mi shi thal ba rlung khyer bzhin// slar 'tsho ba dag ga la yod// ces gsungs so// nang pa sangs rgyas theg pa ni// chos can gang rung gcig la ni// nyan thos phra rags rdzas su grub par 'dod// bye brag pa ni bskor ba bar dang bcas par 'dod// de yang gzhung las phyi yi yul// yul ni phra rab rdul du snang// zhes gsungs so// rang sangs rgyas kyi 'dod pa ni// rdul min yul gyi rnam pa stong// rnam par rig byed ma yin 'dod// ces gsungs so// sems tsam pa yi 'dod pa ni// rnam bden rnam rdzun rnam gnyis te// sems tsam rnam bden lta ba ni// dkar dmar sna tshogs sems kyi snang bar 'dod// 'jig rten khams ni sems tsam mo// zhes gsungs so// sems tsam rnam rdzun lta ba ni// yul gyi rnam pa med pa ru// rang rig rgyun gyi rtag par 'dod// snga ma snga mas rgyu byas nas// phyi ma phyi ma 'bras bur 'dod// de yang gzhung las kyang// shes pa bden te rnam pa rdzun// mi rnams la ni phyi rol snang// 'jig rten pa la sems tsam mo// sems ni yang dag dngos ma yin// sems tsam du ni ngas bshad do// zhes gsungs so// dbu ma pa yi lta ba ni// sems tsam spyod pa'i dbu ma dang// rnal 'byor spyod pa'i dbu ma'o// de yang rnam par snang ba 'di dag ni// sgyu mar 'dod dang rab tu mi gnas pa// sgyu ma lta bu'i lta ba ni// yul gyi rnam pa mi rtag mi bden sgyu ma'i tshul// chos rnams rmi lam lta bu la sogs pa// sgyu ma'i dpe brgyad bzhin du'o// rnal 'byor spyod pa'i lta ba ni// yul gyi rnam pa gang snang yang// phyogs char bshigs pas gcig ma grub// gcig ma grub pa'i gtan tshigs kyis// mtha' bzhi bral lo stong par gnas// stong pa bco brgyad spros pa'i mtha' brgyad 'das// zhes gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/mtshan nyid sde gsum gyi grub mtha' bstan pa'i le'u ste bdun pa'o//// de nas gsal dag rin chen gyis// skye med ka dag ston pa la// phyi rgyud sde gsum theg pa ji ltar lags// ston pas 'khor la bka' stsal pa// kri yA pa yi lta ba ni// yul gyi rnam pa snang ba ni// rigs gsum lha yi sku ru 'dod// mtho dman 'jam rtsub rigs gsum mgon// u pa ya yi theg pa ni// kri yar spyod la yo gar blta// gnyis ka'i rgyud las gzhung tshugs med// yo ga pa yi theg pa ni// phyi yi yul du snang ba de// rigs lnga lha yi snang bar 'dod// skye 'gag gnyis su snang ba la// de yang spun dang grogs po'i tshul// zhes gsungs so// nang rgyud sde gsum theg pa la// ma hA yo ga'i theg pa ni// snang ba thams cad lha dang lha mo'i dkyil 'khor du// phung po lnga ni rigs lnga'i lha ru bsgom// rnam shes tshogs brgyad sems dpa' brgyad// 'byung lnga rigs kyi yum lngar bsgom// gzugs sgra dri ro mchod pa'i lha mo bzhi// yan lag rnam bzhi sgo ma bzhi// sgal tshigs rtsa brgyad dbang phyug ma// phung po khams dang skye mched lha dang lha mo'o// thabs kyi rang bzhin skye rim tshul// shes rab rang bzhin rdzogs rim 'dod// de yang gzhung las// snang ba mi 'gag thabs yin te// rang bzhin med pa shes rab yin// zhes gsungs so// rdzogs pa a nu'i lta ba ni// yul gyi rnam pa chos dbyings gzhal yas khang// snying po dran tsam ma bskyed rdzogs pa'i lha// sa chu me rlung snod bcud bcas// kun kyang ma bskyed yongs rdzogs lha// zhes gsungs so// rdzogs chen a ti'i lta ba ni// chags zhen la sogs yul gyi rnam pa rnams// chos nyid rol pa'i snang bar 'dod// stong gsum 'jig rten de rnams ni// sku gsung thugs kyi rol par shar ba'o// zhes gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/ gsang sngags theg pa'i grub mtha' phyi rgyud dang nang rgyud bskyed rdzogs gsum bstan pa'i le'u ste brgyad pa'o//// de nas gsal dag rin chen gyis// skye med ka dag ston pa la// gong brgal spyi ti ji ltar lags// zhes zhus pas/ ston pas 'khor la bka' stsal pa/ e ma ho ngo mtshar khyad par 'phags// theg pa dgu rtse spyi ti yo ga 'di// gzhan nas mi rnyed rang las rnyed// theg mchog ngo mtshar khyad par can// rdzogs chen spyi ti'i lta ba ni// snang srid 'khor 'das ma lus pa// ka dag rten med chen por grol// yin min rtsis gdab med pa'i dgongs pa shar// bya btsal rtsol sgrub med pa ru// zang ka rnal mar gnas pa'o// skye med dngos med 'bras bu blo las 'das// e ma ngo mtshar rmad byung chos// gzhan las mi 'byung a las byung// a la la ho/ ma lus ril por ka dag chen por grol// zhes gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/spyi ti'i theg pa bstan pa'i le'u ste dgu pa'o//// de nas gsal dag rin chen gyis// skye med ka dag ston pa la// de las yang ti gang gis 'phags// zhes zhus pas/ ston pas 'khor la bka' stsal pa/a ti tra b+h+yo ya thu la d+har+m+ma d+hA tu/ a a tha thi/ yang ti nyi zla'i snying po 'di// lta sgom spyod 'bras bsgrub tu med// gtad med dmigs med so ma blo las grol// snang ba thams cad ming med chen por grol// ka dag skye med dngos po'i chos rnams med// spyi ti nyid la gang gis 'phags zhe na// snang ba'i rnam pa gang la yang// ming 'dogs med par thig le spyi brtol yin// dag dang ma dag med par gti mug chen por grol// khams gsum sdug bsngal med par 'di ka lta bur grol// sangs rgyas sems can 'gro drug gnas med par// blos btags ming 'dogs med par grol// chos zad blo stor mtshon brjod bsam las 'das par grol// sarba d+harmA b+h+yo ha thu la mu la a// cang med cir snang ming med chen por grol// zhes gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/rdzogs chen gnya' gcog spyi ti gong brgal yang ti bstan pa'i le'u ste bcu pa'o//// de nas gsal dag rin chen gyis// skye med ka dag ston pa la// spyi 'das blo bral bstan pa la// bya btsal blo chos mi 'tshal lam// zhes zhus pas/ ston pas 'khor la bka' stsal pa// yang ti nyi zla'i snying po la// bya btsal rtsol sgrub mi dgos te// ma bcos rang sar grol bas mchog/ chos rnams thams cad spros bcad la// lus ngag yid gsum dal bar sdod// spyod lam rnam bzhi cir spyod kyang// spyod bzhin ma chags bde ba'i mchog/ blta mi blta yi lta ba med// lta ba rtsol bas sgrub tu med// bsgom mi bsgom gyi sgom pa med// bsgom pa rtsol bas bsgrub tu med// spyod mi spyod kyi spyod pa med// spyod pa rtsol bas bsgrub tu med// bsgrub mi bsgrub kyi bsgrub tu med// 'bras bu rtsol bas bsgrub tu med// phrin las rtsol bas bsgrub tu med// dam tshig rtsol bas bsrung du med// sa lam rtsol bas bgrod du med// cir snang cir srid lta ba la// lta dang mi lta'i rtsol sgrub med// rig tshad 'gyus tshad grol ba las// thun du bcad pas bsgom du med// gang gang snang snang spyod pa las// rtsol bas ched du spyad du med// ka dag 'od gsal dam tshig las// ched du bsrung zhing bsdam du med// sbyang bgrod ye med grol ba las// sa lam sbyangs shing bgrod du med// 'bras bu ye klong mtha' stongs pas// yid smon re dogs rtsol ba med// yang ti nyi zla'i snying po la// zhe 'dod bya rtsol mi byed de// byar med lhug par bzhag pas chog/ ma bcos rnal ma rang sar zhog/ched du rtsol bsgrub gang yang med// 'gro yin 'gro yin rang sar grol// sdod kyin sdod kyin rang sar grol// nyal kyin nyal kyin rang sar grol// za yin za yin rang sar grol// sdug gin sdug gin rang sar grol// skyed kyin skyed kyin rang sar grol// gang na gnas kyang ma chags rang sar grol// ci la spyod kyang ma zhen rang sar grol// ji skad smras kyang grag stong grol// ci thos gang yang ma nyan grol// gang la reg kyang ma btang ma bzung grol// sgo lnga gsal ba'i shes pa la// yid lnga ma bsgrubs zang thal grol// yid rig 'gyus kyang ma bzung grol// skye med 'gag med sna tshogs kyang// sna tshogs skye med klong du grol// dngos med dngos po ji snyed kyang// ngang dngas dngos med klong du grol// cang med cir snang de kar grol// stong pa'i klong nas kun 'byung stong pa ngang du grol// rtsa zer rig sems 'od gsal chen por grol// 'gyu ba dran pa blo dang rtog pa yang// ngang dngas rang sangs snying po'i klong du grol// blos btags chos rnams thams cad kyang// ched du dgag bsgrub rtsol bas ma spangs par// ka dag dngos med skye med byar med blo las 'das// gnas lugs snying po chig chod pa// chos nyid yang dag nges pa ma nor ba// chig chod chos sku lhun grub zang thal ye nas grol// ye dag ye gsal ye grub ye gnas so// yang ti nyi zla'i snying po la// da gdod bya btsal rtsol sgrub ga la yod// ces gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/ spyi 'das yang ti la bya btsal blo chos mi dgos par bstan pa'i le'u ste bcu gcig pa'o//// de nas gsal dag rin chen gyis// skye med ka dag ston pa la// rtsol bsgrub 'das pa'i theg pa la// lta sgom spyod 'bras dgos mi dgos// zhes zhus pas/ ston pas 'khor la bka' stsal pa// yang ti rtsol bsgrub 'das pa las// lta sgom spyod 'bras blo yi yul// blo yi yul las nges pa med// blo yul ma zad sangs rgyas chos mi zad// des na yang ti nyi zla'i snying po la// zhe 'dod lta ba'i sems dang bral// dmigs pa sgom pa'i sems dang bral// bya rtsol spyod pa'i sems dang bral// re dogs 'bras bu'i sems dang bral// thig le mthong brtol sems dang bral// zhe 'dod gza' gtad lta ba med// ka dag 'od gsal bsgom pa la// dmigs gtad yid gzungs bsgom pa med// dngos med byar med rnal ma la// bya btsal med pas spyod pa med// gsang ba'i yang snying blo 'das la// gzhan nas rnyed pa'i sangs rgyas med// ye nas sku gsum lhun grub la// re dogs 'bras bu yongs kyis med// ming med phyogs bral rtogs pas lta ba med// ka dag skye med rtogs pas sgom pa med// dngos med rnal ma rtogs pas bsam du med// so ma lhug pa bag yangs rtogs pas spyod pa med// ye nas rang 'khrungs rtogs pas 'bras bu med// rtag chad blo las grol bas lta sgom med// blo zad nyon mongs ye brlag yid smon sangs rgyas med// yang ti yo ga rtogs pas na// rig med sems med chos rnams med// ces gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/yang ti rtsol sgrub 'das pa la lta sgom spyod 'bras mi dgos par bstan pa'i le'u ste bcu gnyis pa'o//// de nas gsal dag rin chen gyis// skye med ka dag ston pa la// theg dgu spang ngam ji ltar bgyi// zhes zhus pas/ ston pas 'khor la bka' stsal pa// yang ti nyi zla'i snying po la// theg dgu spangs pas rdzogs mi 'gyur// theg dgu spangs len med par rdzogs// yul sems gnyis su ma bzung bas// nyan thos lta ba ngang gis rdzogs// rten 'brel rnam par rig med pas// rang rgyal lta ba ngang gis rdzogs// yul sems gnyis med ma bzung bas// sems tsam lta ba ngang gis rdzogs// don dam kun rdzob gnyis med pas// dbu ma'i lta ba ngang gis rdzogs// dag pa rigs gsum mgon med pas// kri ya'i lta ba ngang gis rdzogs// mar spyod yar lta'i sems med pas// u pa'i lta ba ngang gis rdzogs// rigs lnga skye 'gag gnyis med pas// yo ga'i lta ba ngang gi rdzogs// nang rgyud ma hA'i theg pa ni// thabs dang shes rab gnyis med pas// ma hA'i lta ba ngang gis rdzogs// dbyings dang ye shes gnyis med pas// a nu'i lta ba ngang gis rdzogs// rig pa 'gyu ba'i shes pa la// rang rgyud med pas zhen med pa// a ti'i lta ba ngang gis rdzogs// chos nyid ka dag chen po la// dag dang ma dag gnyis med pas// spyi ti'i lta ba ngang gis rdzogs// mkha' klong rnam dag chos nyid snying po la// blos btags chos rnams ma lus yongs su rdzogs// rdzogs chen yang ti yo ga la// spang na dug lnga spang kyang spang len yin// bsgrub na sku gsum bsgrub kyang rtsol bsgrub yin// spang len med pa nyi zla'i snying po yin// zhes gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/yang t-i nyi zla'i snying por theg pa dgu ma spangs ngang gis rdzogs pa'i le'u ste bcu gsum pa'o//// de nas gsal dag rin chen gyis// skye med ka dag ston pa la// dkyil 'khor dbang dang dngos grub la// re bar bya ba'am ye nas rdzogs// zhes zhus pa dang/ ston pas 'khor la bka' stsal pa// yang ti nyi zla'i snying po la// 'jug pa'i dkyil 'khor re ba'i dngos grub med// chos nyid byang chub sems kyi dkyil 'khor ni// gdod nas gsal bas 'drir mi re// mkha' klong rnam dag chos dbyings dkyil 'khor na// rang byung snying po'i lha tshogs ngang gis gsal// da gdod mi bskyed ye nas rdzogs pa'i lha// spyan 'dren mchod bstod mi byed ye nas rang la rdzogs// dngos grub gzhan nas mi re rang gi sems la grub// dkyil 'khor gzhan nas mi bri sems la rdzogs// sa tshon dkyil 'khor 'dus byas yin// 'dus byas dkyil 'khor thams cad 'jig/ de phyir rang byung sems kyi dkyil 'khor ni// rang bzhin ngo bo thugs rje gsum// thog ma dang po'i dkyil 'khor yin// 'dod chags zhe sdang gti mug gsum// bde gshegs gsum gyi dkyil 'khor yin// sems can lus ngag yid gsum kyang// sku gsung thugs kyi dkyil 'khor yin// snang srid snod bcud 'jig rten rnams// ma bris 'od gsal dkyil 'khor yin// skye 'gro snang srid sems can rnams// ma skyes yongs rdzogs lha tshogs yin// snang ba sku yi dkyil 'khor yin// sgra grag gsung gi dkyil 'khor yin// dran rtog thugs kyi dkyil 'khor yin// stong gsum 'jig rten ma lus kun// ye gdod ma nyid nas ka dag yin// rang byung 'od gsal chen po de// gsal dag sgrib med dkyil 'khor yin// dkyil 'khor de ltar rdzogs pas bskyed mi dgos// snying po chos dbyings dkyil 'khor la// rang byung skye med gtso bo bzhugs// 'od gsal shar phyogs dkyil 'khor la// ka dag sgrib med lha tshogs gnas// lho phyogs rang bzhin dkyil 'khor la// rang byung sangs rgyas lha yang bzhugs// nyon mongs rnam rtog nub pa'i nub phyogs na// ngang gsal khye'u chung ye nas ma bskyed bzhugs// blos brtags brgyad khri bzhi stong byang ba'i byang phyogs na// blos brtags mtshan ma grol ba'i lha yang bzhugs// ma bskyed yongs su rdzogs par bzhugs// rigs lnga cha mthun khyad par 'phags// rtsol bsgrub byas nas bzhugs pa ma yin te// ye thog ma nyid nas bzhugs pa yin// ye nas bzhugs pas spyan mi 'dren// gdod nas dag pas sgrib mi sbyang// ka nas dag pas da mi mchod// ye nas bzang bas bstod mi dgos// rang la rang gnas gshegs bzhud med// gong du bshad pa'i don rtogs na// de las mi 'da' dam tshig yin// ka dag skye med don rtogs na// de las mi mda' dam tshig yin// ming med brjod 'das don rtogs na// de las mi 'da' dam tshig yin// dngos med zang thal don rtogs na// de las mi 'da' dam tshig yin// byar med blo 'das don rtogs na// de las mi 'da' dam tshig yin// yang ti nyi zla'i don rtogs na// 'og mar mi spyod dam tshig yin// dam tshig dam tshig ces bya ba// skye med ka dag dam tshig yin// dper na chu dang shel sgong 'dra// phyi nang skyon med ka nas dag/ de la ched du bsrung zhing bsdam du med// dngos grub gzhan nas re ba med// rang gi sems la ye nas grub// dngos grub dngos grub zhes bya ba// dngos ni skye med snying po ste// grub pa ka dag 'od gsal lo// dngos ni dngos med zang thal te// grub ni blo 'das byar med grub// des na dngos grub ces su bshad// gong gi dkyil 'khor nges tshig kyang// dper na ri bo mchog rab dkyil// gling bzhi gling phran 'khor yin no// 'byung ba rim brtsegs dkyil yin la// gling phran bcu gnyis 'khor yin no// de la lcags ri mu khyud bskor// kha dog lnga yi sa tshon ye nas bkod// phyogs bzhi mtshams bzhi sgo bzhi ye nas gnas// snod kyi 'jig rten dkyil 'khor na// bcud kyi sems can lha tshogs yin// rang bzhin lhun grub bud+d+ha'i lha tshogs so// bya btsal rtsol bsgrub med par ye nas rdzogs// dkyil 'khor dkyil 'khor zhes bya na// dkyil ni snying po'i klong yin no// 'khor ni ka dag skye med yin// dkyil ni ye nas gzhi yin te// 'khor ni snang srid 'khor 'das yin// dkyil ni chos kyi dbyings yin te// 'khor ni gsal dag 'od gsal yin// zhes gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/yang ti gnas lugs kyi dkyil 'khor bstan pa'i le'u ste bcu bzhi pa'o//// de nas gsal dag rin chen gyis// skye med ka dag ston pa la// dkyil 'khor chen po de ltar na// dbang bskur byin brlab 'tshal mi 'tshal// zhes zhus pas/ ston pas 'khor la bka' stsal pa// rdzogs chen yang ti rtogs pa la// byin brlab dbang skur mi dgos te// rang sems gdod dag skye med nam mkha' la// thig le mthong brtol ka dag nyi zla shar// ma rig las dang nyon mongs ye nas brlag/ de dag 'od gsal chen po'i dbang rdzogs so// snying po 'dus ma byas pa'i dkyil 'khor du// rig gsal ngang dngas khye'u chung la// thig le khong gsal bcud bsdus dbang bskur bas// rang grol zang thal dbang thob bo// mkha' klong rnam dag chos dbyings dkyil 'khor du// sems rig ngang dngas khye'u chung la// thol byung ngang dngas dbang skur bas// rang byung ngang dngas dbang thob bo// rin chen gsal dag 'od kyi dkyil 'khor du// rig pa ngang dngas kun byed khye'u chung la// bya med rtsol bsgrub 'das pa'i dbang bskur bas// blo zad chos med gting rdzogs mtha' yas dbang thob bo// dbang bskur dbang bskur byar med de// rang sems ka dag ngang la rdzogs pa la// rdzas dang bum pa'i rten med kyang// byar med blo 'das dbang bskur bas// rtsol bral ming med dbang thob bo// dbang ni rang sems skye ba med// bskur ba ka dag chen por bskur// thob ni 'pho 'gyur med par thob// dbang ni ngang dngas gsal dag ste// bskur ni dngos med rnal mar bskur// thob ni zang thal rang byung thob// dbang ni stong pa kun tu 'byung// bskur ni 'dzin pa rang dag bskur// thob ni rnam dag ye shes thob// gzhan gyis bskur ba'i mkhan po med// rang gi sems la ye nas rdzogs// zhes gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/ rdzogs chen yang ti rtogs pa la dbang dang byin brlab gzhan nas re mi dgos par bstan pa'i le'u ste bco lnga pa'o//// de nas gsal dag rin chen gyis// skye med ka dag ston pa la// tshogs dang gtor ma ma btang bar// tshogs bsags smon lam ji ltar rdzogs// zhes zhus so/ ston pas 'khor la bka' stsal pa// rdzogs chen yang ti yo ga la// tshogs dang gtor ma mi dgos te// tshogs gsog gtor ma dgos na yang ti min// ci phyir rtsol sgrub yid smon yin// yid smon chos kyis sangs mi rgya// de bas yang ti yo ga la// tshogs dang gtor ma ye nas rdzogs// ye nas rang la rdzogs lugs ni// tshogs ni snang srid 'khor 'das te// phul ni ka dag chen por phul// dgyes ni rang byung skye med dgyes// tshogs ni dug lnga dug gsum ste// phul ni sku lnga sku gsum phul// dgyes pa don dam 'gyur med dgyes// tshogs ni mtshan ma'i rnam rtog ste// phul ni rtsis gdab med par phul// dgyes ni chos dbyings klong chen gyis// gtor ni blos btags chos rnams gtor// ma ni chos nyid rnal ma yin// gtor ba grub mtha'i lta sgom gtor// ma ni lta spyod bsgrub pa med// tshogs gnyis ma bsags ye nas rdzogs// sgrib gnyis ma sbyangs ye nas dag/ tshogs dang gtor ma ma btang bar// ka dag snying po'i klong du gyur// tshogs gsog byas pas der mi sleb// smon lam zhes pa'i rang bzhin kyang// 'dir btab phyi mar mi re'o// smon lam gang yin yid smon te// smon lam zhes pa'i tha tshig yin// smon pa'i sangs rgyas rang la rnyed// de nyid thar lam 'gro ba'i lam// de na smon lam zhes su bshad// ka dag skye med klong gyur pas// smon lam ma btab ye nas rdzogs// zhes gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/yang ti nyi zla'i snying po la tshogs gtor smon lam mi dgos par bstan pa'i le'u ste bcu drug pa'o//// de nas gsal dag rin chen gyis// skye med ka dag ston pa la/ yang ti nyi zla'i snying po la// gol sgrib 'khrul pa yod dam med// zhes zhus pas/ ston pas 'khor la bka' stsal pa// yang ti nyi zla'i snying po rtogs pa na// gol sgrib 'khrul pa gang yang med// ye nas thog ma'i don rtogs gol du med// skye med ka dag rtogs pas sgrib pa med// bya med blo 'das rtogs pas 'khrul du med// ye shes spyi blugs rtogs pas theg pa'i gol sgrib med// yang ti yo ga rtogs pas na// gol sgrib nyis stong lnga brgya yang// tshig gi gong 'og theg pas gcig tu chod// gol sgrib chod pas 'khrul pa gang yang med// ces gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/yang ti nyi zla'i snying po rtogs pa la gol sgrib 'khrul pa med par bstan pa'i le'u ste bcu bdun pa'o//// de nas gsal dag rin chen gyis// skye med ka dag ston pa la// ma rig ye shes yod dam med// 'char sgo 'khrul sgo ci la zer// zhus pas/ ston pas 'khor la bka' stsal pa// yang ti nyi zla'i snying po la// ma rig ye shes gang yang med// dper na nyi zla'i snying po la// mun pa yod par ma gsungs so// de bzhin ka dag ston pa yi// 'od gsal de la ma rig med// bag chags sgrib med 'khrul sgo med// ye dag rang gsal ye shes la// snying po klong du gyur pas 'char sgo med// thig le mthong brtol gsal med la// ma rig yod par ma mthong ngo// ma rig ye shes rnam gnyis kyang// rnam rtog blo la gnyis snang te// yang ti'i don rtogs gnyis ka med// ma rig ye shes tha dad med// ma rtogs rtogs pas lam du gcig/'char sgo 'khrul sgo gang yang med// thig le spyi brtol rtogs pas na// 'char sgo med la 'khrul sgo med// dper na mtshan mo'i mun nag la// sUr+Ya gsal ba'i nyi shar bas// mun pa ma spangs 'od du gsal// 'od dang mun pa nam mkhar gcig/ de bzhin ma rig sgrib g.yogs la// thig le gsal dag nyi shar bas// ma rig ma spangs ka dag chen por gsal// bag chags sgrib g.yogs 'od gsal chen por gsal// gti mug chos sku rang bzhin gcig/ rgyu rkyen 'pho 'gyur med pa'i don rtogs nas// snying po yang dag ma nor nges pa'i lam// skye med ka dag bya med blo 'das yin// dngos med zang thal ming med don rtogs pas// 'char sgo 'khrul sgo gnyis ka med// de phyir thog mar ye sangs rgyas// zhes gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/yang ti nyi zla'i snying po rtogs pas ma rig ye shes 'char sgo 'khrul sgo med par bstan pa'i le'u ste bco brgyad pa'o//// de nas gsal dag rin chen gyis// skye med ka dag ston pa la// rtogs dang ma rtogs yod dam med// sangs rgyas sems can ci la zer// zhes zhus pas/ ston pas 'khor la bka' stsal pa// yang ti nyi zla'i snying po la// rtogs dang ma rtogs tha snyad blo// blo yul ma zad grol mi thob// rtogs dang ma rtogs snying po gcig/ ye yin glo bur mngon sangs rgyas// ka dag mi 'bral rtogs pa la// blo yul med kyis ma rtog cig/ rtog mkhan med kyis ma rtog cig/ shes rtogs med kyis ma shes shig/shes yul med kyis ma shes shig/ shes rgyu med kyis ma shes shig/ shes mkhan med kyis ma shes shig/ gang gi gang rtogs ci zhig rtogs// rtogs na sems de ji ltar 'dug/ shes na gang shes cis ci shes// shes pa'i rgyu ni ci zhig 'dug/ ston pas 'khor la bka' stsal pa// thams cad rtogs pas rtogs rgyu med// cang med ngang dngas chen po yin// tha snyad tsam ste mtshon rgyu med// rtogs pa po ni dngos med grol// shes med kun shes shes rgyu'i dngos po grol// skye med ka dag dngos po'i blo las 'das// tshig gis shes rtogs gang yang yod ma yin/ kun shes kun rtogs gang yang ma btags bzhag/ rten med ka dag 'od gsal blo 'das so// zhes gsungs so// rang grol rang gsal klong gyur pas// sangs rgyas sems can gnyis ka med// stong pa kun 'byung stong par sangs// rang byung rang grol rang sangs rgyas// gti mug mun pa ka dag rgyas// sangs rgyas gzhan na med kyis ma re zhig/ ye yin klong gyur ngo shes pas// sems can 'khor ba med kyis ma dogs shig/ gnyis med gnyis su dbyer med pas// sems can sangs rgyas gnyis med gnyis ka med// ces gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/ rtogs ma rtogs sangs rgyas sems can gzhi la dbyer med par bstan pa'i le'u ste bcu dgu pa'o//// de nas gsal dag rin chen gyis// skye med ka dag ston pa la// dge sdig las 'phro yod dam med// mtho ris ngan song ci la zer// zhus pas/ ston pas 'khor la bka' stsal pa// rdzogs chen yang ti yo ga la// dge ba mi bsgrub sdig mi 'gegs// rang sar grol zhing skye med rtogs// dge ba ched du mi byed mtho ris skye ru med// sdig pa ched du mi byed ngan song skye ru med// dge sdig gnyis po ched du ma byas pas// mtho ris ngan song re dogs g.yang sa med// las 'phro mi len 'di ka lta bur grol// ci ste las kyi dbang gyur na// rang byung ye shes ga la yod// mtho ris ngan song bla dgas yin// yang dag don la mtho ris ngan song med// skye med ka dag rtogs pa la// ngan song ltung ba'i rgyu yang med// thig le khong gsal don rtogs pas// mtho ris ngan song rgyu yang med// ye yin rang sar grol gyur pas// las 'phro mi len mu mtha' yas// ka dag ming med don rtogs pas// mtho ris ngan song skye ltung med// dge sdig las 'phro'i khar mi 'ong// rgyu rkyen chos la blo mi gtod// dge sdig gnyis la rten mi 'cha'// rgyu 'bras gnyis la rag ma lus// bya rtsol zhe 'dod re dogs med// ces gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/yang t-i nyi zla'i snying po la dge sdig mtho ris ngan song med par bstan pa'i le'u ste nyi shu pa'o//// de nas gsal dag rin chen gyis// skye med ka dag ston pa la// sangs rgyas bya ba yod dam med// dmyal ba bya ba ci la zer// zhus pas/ ston pas 'khor la bka' stsal pa// thig le mthong brtol don rtogs pas// sangs rgyas med pas sangs rgyas ming yang med// rnyed par 'dod pas bskal pa brgyar mi rnyed// sangs rgyas gang yin bla dgas yin// bla dag tshig la sangs rgyas med// sangs rgyas gang yin zhe 'dod yin// zhe 'dod sangs rgyas dgos pa med// sangs rgyas yod 'dod yid smon yin// yid smon sangs rgyas dgos pa med// sangs rgyas med pas sangs la rgyas rgyu med// 'dod pas mi myong re dogs yin// sangs rgyas med kyis ma re cig/ dmyal ba med kyis ma dogs shig/ re dogs gnyis med mtha' chod cig/ye shes gting rdzogs mthong brtol bas// dmyal bar skye ba'i rgyu med do// dmyal ba'i gnas med ka dag klong// dngos la dmyal ba'i rgyu med pas// dmyal ba me lce'i phreng ba yang// byang chub sems kyi zhing khams yin// 'dod chags sprul pa'i sku ru rdzogs// lha ru skye ba'i g.yang sa bcad// zhe sdang longs spyod rdzogs skur rdzogs// dmyal bar skye ba'i g.yang sa bcad// gti mug chos skur chen por rdzogs// byol song skye ba'i g.yang sa bcad// nga rgyal ngo bo gnyis kyi sku// lha min skye ba'i g.yang sa bcad// phrag dog don dam bde ba'i sku// mi ru skye ba'i g.yang sa bcad// ser sna dbyer med sku ru rdzogs// yi dags skye ba'i g.yang sa bcad// ka dag ming med blo 'das rtogs// dmyal ba la sogs 'gro drug med// ces gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/yang ti nyi zla'i snying po rtogs pa la sangs rgyas dmyal ba med par bstan pa'i le'u ste nyer gcig pa'o//// de nas gsal dag rin chen gyis// skye med ka dag ston pa la// rdzogs chen yang ti yo ga yis// ma bsgrubs 'bras bu ji ltar thob// zhes zhus pa dang/ ston pas 'khor la bka' stsal pa// nyi zla'i snying po yang ti la// 'bras bu thob dang ma thob gnyis med kyang// rtsol bas 'bras bu mi 'grub ste// re zhig 'khor la brod pa bskyed phyir bshad// re dogs 'bras bu ngas ma bshad// yid smon 'bras bu ngas ma bshad// zhe 'dod 'bras bu ngas ma bshad// bya btsal 'bras bu ngas ma bshad// tshogs bsags 'bras bu ngas ma bshad// gzhan nas 'bras bu re ba ngas ma bshad// gzhan nas 'bras bu thob pa ngas ma bshad// sngon thog ye nas rang la rang chas ldan// gnyis med klong du ka dag rang grol la// thig le spyi brtol gsang ba'i yang snying bsgrub// stong gsal 'od 'bar klong dkyil du// thig le yang gsang bcud bsdus pas// thig le khong gsal 'bras bu'o// chos nyid gsang ba'i pho brang du// ye shes gting rdzogs ka dag pas// gting mtha' yas pa'i 'bras bu'o// mkha' klong rnam dag dkyil 'khor du// skye med ka dag blo 'das pas// mu mtha' yas pa'i 'bras bu'o// bya btsal rtsol bas ma bsgrubs ma byas pas// yod med dbye bsal med pa ste// ming med chen por rang grol lo// ka dag skye med dngos po med// byar med 'bras bu blo las 'das// bya btsal zhe 'dod ma bsgrubs pas// gsang spyod 'phrul gyi snying po yang snying 'di// rang byung rang grol rang sangs nyid du grol// bde gshegs gsang ba'i snying po'i bcud 'di rtogs// re dogs blo yis ma bsgrubs pas// ye med gting med yod rgyu ci yang med// thig le khong gsal ye shes zang thal lo// stong pa'i klong nas kun 'byung bas// ngang dngas rang sangs rang grol lo// bya btsal rtsol bas ma bsgrubs par// 'di ka rang du grol ba thob// bsgrubs nas gzhan nas thob pa'i 'bras bu min// re zhig 'bras bu'i ming btags gong ltar ro// zhes gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/yang ti nyi zla rtogs pas ma bsgrubs 'bras bu thob par bstan pa'i le'u ste nyer gnyis pa'o//// de nas gsal dag rin chen gyis// skye med ka dag ston pa la// rgyud kyi mtshan bshad ji ltar bshad// ces zhus pas/ ston pas 'khor la bka' stsal pa// rgyud gsum rtse rgyal nyi zla'i rgyud du 'dus// rgyud rnams kun gyi rtse mo byung rgyal bas// rgyud sde kun gyi spyi phud rtse rgyal yin// de phyir rgyud kyi rtse rgyal rgyud// nyi zla 'od 'bar rgyud chen dang// mkha' klong rnam dag rgyud chen dang// rgya mtsho klong gsal rgyud chen dang// de gsum rgyud kyi rtse rgyal spyi phud yin// de nas 'khor gyis zhus pa la// nyi zla 'od 'bar rgyud kyis don ni gang zhig bstan// mkha' klong rnam dag rgyud kyis don ni gang zhig bstan// rgya mtsho klong gsal rgyud kyis don ni gang zhig bstan// zhes zhus pas/ ston pas 'khor la bka' stsal pa// nyi zla 'od 'bar rgyud kyis ni// nyi mas gsal ba'i go yang 'byed// snang gsal go 'byed 'od gsal rgyud// snying po ka dag ston pa ste// ye shes gsal dag mtshon pa'i rgyud// 'od chen rab tu 'bar bas ni// gti mug ma rig mun pa sel// bag chags sgrib g.yogs ka dag rgyud// mun pa'i smag rum sangs te rang sar grol// gsal ba'i go 'byed nyi ma'i rgyud// tsan+d+ra zla ba'i rgyud kyis ni// mtha' yi mun sel 'od 'bar rgyud// ma rig mun pa sel ba yin// ma rig ka dag ye shes gsal// rmongs pa'i mun pa sel ba'i rgyud// zla ba'i 'od 'bar ma rig gti mug sangs// nyi ma'i 'od 'bar snang gsal ye shes rgyas// de phyir nyi zla 'od 'bar rgyud// zla ba'i 'od 'bar thabs kyi rgyud// nyi ma'i 'od 'bar shes rab rgyud// de phyir thabs dang shes rab gnyis med rgyud// mkha' klong rnam dag rgyud kyis ni// mkha' ni rig pa'i 'od gsal mkha'// klong ni snying po chos nyid klong// rnam dag 'khrul pa rnam par dag/ de phyir mkha' klong rnam dag rgyud// mkha' ni rtsal zer 'od gsal la// klong ni snying po ka dag klong// rnam dag blo sabatags chos rnams 'gags// de phyir mkha' klong rnam dag rgyud// mkha' ni snang gsal nam mkha' la// klong ni chos nyid dbyings kyi klong// rnam dag chos can cho 'phrul dag/ sprin dang khu rlangs char ser kun// nam mkha'i klong du ye nas dag/ de bzhin snying po mkha' klong du// yan lag rtsal zer ma lus dag/ de phyir mkha' klong rnam dag rgyud chen yin// rgya mtsho klong gsal rgyud kyis ni// blta ba rgya mtsho klong na gsal// bsgom pa rgya mtsho klong na gsal// spyod pa rgya mtsho klong na gsal// 'bras bu rgya mtsho klong na gsal// dam tshig rgya mtsho klong na gsal// sa lam rgya mtsho klong na gsal// man ngag rgya mtsho klong na gsal// rgyud lung rgya mtsho klong na gsal// ye shes rgya mtsho klong na gsal// rgya ni snying po 'gyur ba med// mtsho ni chos nyid yangs pa'i mtsho// klong ni mtshon med brjod las 'das// gsal ni skye med ka nas gsal// de phyir rgya mtsho klong gsal rgyud// rgya mtsho klong gsal bya ba ni// rgya mtsho snying po skye med yin// klong ni chos nyid thig pa'i klong// gsal ni ka dag 'od 'bar gsal// de phyir rgya mtsho klong gsal rgyud// rgya ni gtad med rten med bstan// mtshos ni dmigs med g.yo med bstan// klong ni byar med spros bral bstan// gsal bas ye dag sgrib med bstan// des na rgya mtsho klong gsal rgyud// rgya mtsho skye med ka dag lta ba bstan// klong gis g.yo med rnal ma'i sgom pa bstan// gsal gyis lhug pa bag yangs go bde ba// byar med spros bral spyod pa bstan// rgyud kyi thog ma bar mtha' ru// ye shes rgyun du gnas pa'i phyir// snying po rgyun chad med pa'i rgyud// sngon thog dus nas tha ma ru// skye med rgyun du gnas pa'i phyir// skye med ka dag snying po'i rgyud// gzhi rlung dus nas da lta'i bar// 'od gsal rgyun du gnas pa yis// snang gsal 'od 'bar gsal dag rgyud// ces gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/ rgyud kyi mtshan bshad bstan pa'i le'u ste nyer gsum pa'o//// de nas gsal dag rin chen gyis// skye med ka dag ston pa la// rgyud 'di bstan pa'i skal ldan ji lta bu// zhes zhus pas/ ston pas 'khor la bka' stsal pa// dper na seng ge'i 'o ma yang// rin chen gser zor blugs pa las// snod ngan phal du bzhos gyur na// bcud kyang 'bo la snod kyang chag/ de bzhin nyi zla yang ti yang// snod ldan 'ga' la bstan pa las// snod med dag la bstan gyur na// chos kyang shor la rang yang brlag/ des na snod kyi khyad par gces// rgyud 'di bstan pa'i skal ldan ni// smras pa mi 'gyur ri rab lta bu'i blo// snying rje phan sems che zhing dkon mchog mchod// bla ma gtsug khur gdams ngag snying la 'chang// dam tshig gzhung bsrung rnam smin las la 'dzem// rgyud 'jam ngang ring skyo dub med la gtad// nga rgyal ser sna chung la chos phyogs gtong// rin chen la sogs zang zing nor// chags med ser sna med par gtong// de la yang ti'i rgyud 'di gtad// rang rgyud ngan la grogs mched bslu// dam tshig med la brtse gdung chung// che dga' sdig spyod chags sems can// g.yo sgyu khrel med thabs kyis bslu// logs lta byed cing sgro skur 'debs// slob dpon gsang nas rang che 'byin// g.yo dang thabs kyis man ngag 'brid// lag tu thob nas zong du 'tshong// de lta bu yi snod ngan la// yul mkhar ster kyang mi sbyin no// de lta bu la byin gyur na// gnyis bsdong g.yang la lhung ba bzhin// gnyis ka rdo rje dmyal bar 'gro// zhes gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud las/rgyud gtad pa dang snod kyi khyad par bstan pa'i le'u ste nyer bzhi pa'o//// gu ru la bstan pa 'byung ba'i dus ji tsam na lags/zhus pas/ nga yi yang snying nyi zla 'di/ sku dang gsung gi bstan pa nub// gsang sngags thugs kyi bstan pa dar// lnga brgya dus kyi tha ma la// dus ngan zer zhing spyod ngan byed// rgya bod bye zhing rgyal khrims 'jig/chos su rdzogs chen dar/ ban+de rnal 'byor dar/ gos su re thul khyi thul dar la lag cha dbyug pa mi mgo dar// da lta sangs rgyas yin zer nyon mongs kha ma bri// zongs su chos 'tshong nyams myong glu ru len// spyod pa bab chol gling kun tho cos 'gengs// man ngag grong bskor rna ba rdzun gyis 'gengs// rnal 'byor zas nor 'dod phyir srang khar sprang ste rgyu// ri khrod 'grims pa'i lad mo grong rgyu'i rnal 'byor byed// brtul zhugs gsang sngags med par spyod pa tho cos sgra skad 'gengs// de ltar byas pas tshe thung nad kyang mang// mi thub drug po 'byung ba'i dus// bde gshegs byin rlabs mi thub dus// 'byung ba sa yis gser mi thub// mkha' 'gros bcol ba'i gter mi thub// skye 'gros gtad pa'i blau mi thub// nyan thos 'dul ba'i khrims mi thub// btsun mas rang gi lus mi thub// btsun pas mda' rgyag byed pa'i dus// pha spun nang rgyas byed pa'i dus// phyi yi so kha nang du zug/ lan gcig de lta bu yi dus gcig mchi// zhes gsungs so// rgyud kyi rtse rgyal nyi zla 'od 'bar mkha' klong rnam dag rgya mtsho klong gsal gyi rgyud chen/rdzogs pa chen po yang ti/ u rgyan gu ru pad+ma dang// lots+tsha ba ska ba dpal brtsegs kyis bsgyur cing zhus te gtan la phab pa'o//// pad+ma gsal ba'i brag phug nang du sbas/ mnga' bdag nyang ral pa can dang snye mo zhu yas gnod sbyin 'bar gyis bton/

CLOSE WINDOW