CLOSE WINDOW

Gpb001.001
བོད་ཡིག

spros bral don gsal chen po'i rgyud ces bya ba bzhugs so// rgya gar saM skr-i ta'i skad du/ ti la kA pra pany+tsA nra pra ka Ta tan+d+ra ma hA nA ma/ bod skad du/ spros bral don gsal chen po'i rgyud ces bya ba/ dpal rdo rje 'chang chen po thams cad mkhyen pa'i sku gsung thugs la phyag 'tshal lo// sum cu rtsa gsum gyi gnas brtsegs pa med pa'i khang bzang chen po na/ lha yi dbang po brgya byin zhes bya ba lha rnams kyi gtso bor gyur pa/'khor lha phran mang pos bskor nas bzhugs pa des lha ma yin gyi 'khrug pa chen po byed pa'i g.yul ngor bzlog nas bde ba la 'god pa'i man ngag d+harma sarba ti la a ka haM ru bi ti ka ya tri ru ka ru sa du pa hi na ma/'di skad bdag gis thos pa'i dus gcig na/ bcom ldan 'das rang rig rtogs pa mngon gyur gyi rdo rje 'chang chen po de/ sku ye shes rtsal snang la rang bzhin med pa/sku mdog sna tshogs su bzhugs pa/ cha lugs mnyam pa'i skyil mo krung la/ phyag rgya chos 'chad pa'i tshul du mdzad pa/ ye shes kyi sku yin pa'i phyir/zhal phyogs bcu kun tu ma 'gags par thal le gsal ba/ gnas rang bzhin gyis rnam par dag pa pad ma bde gsal zhes bya ba/ ye shes kyi rtsal 'od du ma 'gags par shar ba las rgyu grub ste kha dog lnga yis rgyu byas/dbyibs gru bzhir gyur pa/ rtsigs pa rin po che kha dog lngas byas pa/ pho brang zlum po/ 'khor lo rtsibs bzhi mu khyud kyis bskor ba/gru chad dang bcas pa/ bar 'khyams lha mo dang ldan pa/ sgo bzhi rta babs dang bcas pa/ 'dod yon gyi snam bu la mkha' 'gro ma sna tshogs dang bcas pa/ mtha' rdo rje'i rwa ba pad mas bskor ba/de dag snang la rang bzhin med pa/ bar snang gi gzha' lta bu/ de lta bu'i gzhal yas khang chen po na/ ston pa bcom ldan 'das rdo rje 'chang chen po// 'khor ye shes kyi rtsal ma 'gags pa rigs lngar snang ba dang/gzhan yang ye shes kyi rtsal ma 'gags pa sems dpa' dang/ sems ma dang/ khro bo dang/ khro mo dang/ zhu ba po'i 'khor gsang ba'i bdag po phyag na rdo rje dang/ sdud pa po'i 'khor dga' rab rdo rje dang/gzhan yang mkha' 'gro ma rnam pa lnga ste/ pur+Na nye bar zhi ba dang/ rdo rje khro gdong ma dang/ gtsug gi rgyan gcig ma dang/ ro zan shAn+ti thod pa'i phreng ba can dang/ rdo rje rlung gi gshog pa can dang lnga ste/de'i rang rang nye 'khor na mkha' 'gro ma grangs med pa dang bcas pas bskor nas bzhugs so// de'i tshe gsang ba'i bdag pos sna drangs te/ 'khor rnams kyis bskor ba lan bdun byas te mdun du 'dug nas ston pa la 'di skad zhus so// kye kye bcom ldan rdo rje 'chang chen po// rang rig don rtogs rtsal la dbang thob pa// sku gsum lhun grub longs sku'i tshul du bzhugs// rig pa spros dang bral ba chos skur rdzogs// 'gyu ba'i rtsal mi 'gag pas sprul skur 'char// snang la rang bzhin ma grub longs sku'i tshul// 'khrul rtog gnyis ka bsal bas 'gro don 'byung// dus kyi snyigs ma dag la nye ba'i tshe// theg dgu bgrod pa'i lam ni grub thag ring// nyon mongs dug lnga rgyud la shin tu smin// yid smon lta ba goms kyang blo yi chos// rang rig ji ltar yin pa'i don rtogs nas// rtsal gnyis ji ltar 'char yang rang grol ba'i// yul gyis gnod mi nus pa'i gdams ngag tu// tshig gi sgron mas don chen mtshon nas ni// tshig don 'brel ba'i gtan la phebs nges pa'i// bklags pas shes nas de yis don go bas// chos sku cig char bstan pa'i gdams ngag tu// spros bral don gsal rgyud chen man ngag zhu// ma rig mun pas chos sku bsgribs lags na// rang rig sgron mas chos sku bstan par zhu// zhe sdang ma yis rang rgyud bsregs lags na// ye shes bdud rtsis me chen bsad par zhu// ma rig mun pas shes rab rmongs lags na// ye shes sgron mas gti mug bsal bar zhu// 'dod chags lan tsha'i chu yis gdung lags na// ye shes bdud rtsis gdung ba bsal bar zhu// nga rgyal ri bos rang rig mnan lags na// rang rig don rtogs ri bo bsal bar zhu// phrag dog gcong rong lta bus bsdams lags na// spros bral don rtogs gcong rong bsal bar zhu// skye rgas na 'chi'i chu bo ma brgal na// ye shes gru yis chu bo bsgral bar zhu// srid pa'i la chen dag la ma bsgral na// rang grol srid pa'i la las bsgral bar zhu// 'khor ba'i g.ye thang chen por bsgrod lags na// ye shes brtson 'grus rta yis bsgral bar zhu// gzung 'dzin lcags sgrog rang rgyud bcings pa la// ye shes lde mig lcags sgrog dbye bar zhu// bdag tu lta ba'i brtson ra dam por chud lags na// thugs rjes sgo dbye bdag 'dzin dgrol bar zhu// ma rtogs 'khrul pa'i 'dam gyis zin lags na// ye shes chu bos 'dam rdzab bkru bar zhu// log rtogs 'dzin pa'i gcong nad zin pa na// ye shes sman pas gcong nad gdon par zhu// log rtogs chad pa'i mtha' ru lhung ba la// ye shes gsal cha'i ngang gi mtha' las gdon par zhu// theg dgus phyogs rtogs yang dag don ma rtogs// yang dag don chen ma nor bstan par zhu// chos rnams ldem dgongs blo sna stor ba la// nges don car phog dag tu bstan par zhu// rang ngo ma shes lta ba spyi sar las pa las// rang rig rang la car phog bstan par zhu// log snang rig par bsres pa'i grub mtha' la// sku gsum rtsal dang bcas pa'i man ngag zhu// zhi gnas mun pas ye shes 'thibs pa la// ye shes lhag mthong sgron ma 'degs par zhu// rtag pa ther zug nad kyis zin pa las// rang bzhin stong pas rtag pa gzhig par zhu// tshig tshogs tha snyad byed snying 'dzin pa la// rtsa ba rang rig snying po bstan par zhu// tshig gi sgron mas don gyi dper mtshon nas// de rnams rtogs pa'i gdams ngag ched po ru// tshig dang don gnyis dus gcig ston pa yi// bklags pas shes shing bstan pas go ba'i chos// rin chen kun 'byung spros bral don gsal gyi// man ngag bshad pa'i rgyud chen bshad par zhu// sngar 'das shAka thub la sogs ston pa yis// rgyud drug nyon mongs kun gyi gnyen po ru// theg dgu la sogs brgyad khri bzhi stong rnams// rig pa car phog dag tu bstan pa med// rang rig car phog dag tu bstan par zhu// thugs rje mnga' bdag rdo rje 'chang chen gyis// dus kyi snyigs ma'i gdul bya'i don ched du// thos bsam sgom la rag ma las pa yis// rang rig snying po spros dang bral ba'i don// cig char car phog dag tu bstan par zhu// de skad zhus pa'i don gsan nas// gsang bdag la sogs 'dus pa'i tshogs rnams dang// ma 'ongs gdul bya rnams kyi don ched du// rang rig rang rtogs rdo rje 'chang chen ngas// 'dus pa'i tshogs dang ma 'ongs don ched du// sngar bshad gzhan gyis bstan pa med pa yi// thos bsam sgom par rag las med pa'i don// rang rig chos sku car phog bstan pa yi// tsheg chung don che go bar sla ba'i chos// bstan pa tsam gyis blo dman kun gyis rtogs// chos rnams kun gyi snying po don chen yin// 'khor 'das theg pa kun gyi rtsa ba yin// lung mdo man ngag cig char pa// rgyud kyi snying po rang rig car phog don// don 'dril mtha' gcod spros bral don chod bstan// zhes gsungs so// spros bral don gsal chen po'i rgyud las/ gleng gzhi dang gleng bslang ba'i le'u ste dang po'o//// kye gsang ba'i bdag po phyag na rdo rje/ rtse gcig gus pas nga la nyon/ bar snang gi ngo bo ma grub pa la/ gang zag la la la nam bsros/ la la la nyi ma shar/ nam bsros pa ni snang ba gsal ba med de/mun pa'i smag chen por song/ nyi ma shar ba ni mun pa'i skye mched dag nas nyi ma nub mi srid do// a dz+nyA na d+harma kA ya/ mun pa'i smag chen po de bsal ba'i thabs de gang gis bya ba dang/ mun pa'i smag chen po de bsal nas nyi ma la nub pa med pa'i dgongs pa bstan pa'o// de la gang zag gi rgyud la 'char lugs ni/ dang po gzhi dus bstan pa dang/ de nas rtogs dus bstan pa dang/ de nas 'khrul dus bstan pa dang/de rtogs dus gom pas dag lugs dang/ mtha' ru dag pa chen po bstan pa'o// zhes gsungs so// gsang ba'i bdag pos zhus pa/ kye kye bcom ldan rdo rje 'chang chen po// gang zag snod ldan phyi ma'i don ched du// bstan pas go zhing bklags pas shes pa'i rgyud// rtsa rgyud bshad rgyud gsang ba man ngag rgyud// gcig tu dril zhing zab cing rgyas pa zhu// bcom ldan rdo rje 'chang gis yang gsungs pa// lnga brgya tha ma dus kyi snyigs ma la// nyon mongs rag pas sdug bsngal drag po 'byung// sdug bsngal drag pos dad pa rags pa bskyed// dad pa rags kyang rgyu 'bras chos la spyad dbang med// de dus bstan pa tsam gyis go ba yi// bka' rgyud kun gyi rtsa ba'i man ngag 'di// gdul bya drang phyir ston pa nga yis bshad// dang po gzhi yi gnas lugs bstan pa dang// bar du bzang rtsal ngan rtsal gnyis su 'char lugs bstan pa dang// ngan rtsal dag las 'grol thabs thun mong khyad par bstan pa dang// grol nas rtsal 'char thim dus bstan pa'o// gzhi ni 'khor 'das gnyis ka'i gzhi yin te// de yi gnas lugs mtshon lugs rgyas par bshad// rtsal ni gzhi yi rtsal de rtogs 'khrul gnyis// rtogs pa longs sku'i sa zin thugs rje yis// 'gro ba'i don byas chos sku nyid du thim// ma rtogs rtsal ni 'khrul ba'i rgyu rkyen gyis// khams gsum 'khor ba'i gnas su dug lngas rang rgyud bsreg/ ngan rtsal de las bzang po'i rtsal dag gis// sgrol ba'i thabs su gnyen po theg pa'i bye brag bstan// de yang brgyad khri bzhi stong chos bstan kyang// bsdu na theg pa rim pa dgu ru 'dus// de dag kun gyi rtsa ba car phog rgyud chen 'di ru 'dus// 'di nyid khyad par grol thabs yin te shin tu zab/ grol thabs 'di la lta sgom spyod 'bras bzhi yi cha rkyen du// man ngag bye brag mang du bstan gyis legs par yid la zhog/ grol dus longs skus gdul bya gzhan gyi don byas te// mtha' ru chos skur thim dus bstan pa'o// thim lugs chos sku'i sa na gnas lugs 'di ltar yod// rang gi rig pa gsal bar mi rtog dang// thim pa la ni ma rmugs dang// yod la bdag tu 'dzin pa med// so sor ma 'dres yongs su 'byed pa med// mtha' rnams kun dang bral bas phyogs su lhung ba med// mya ngan sdug bsngal bral bas bde ba rgyun mi chad// rang byung mtha' ru 'dug pas rkyen gyis 'jig bral med// 'bras bu mngon du byas pas re dogs gnyis dang bral// ma btsal lhun gyis grub pas gzhan la rag ma las// 'khrul pa rnam par dag pas 'khor bar ldog mi srid// rig pa'i rtsal ma 'gags pas thams cad mkhyen par shar// rang gi ngo bos stong pas bag chags bsag tu med// rdo rje 'dzin pa legs par zung zhig/ dang po gzhi yi gnas lugs bstan pa nas/ 'bras bu mthar thug pa'i bar du de ltar shes par bya'o// zhes bka' stsal to// spros bral don gsal chen po'i rgyud las/spyi khog bsdus pa mdor bstan pa'i le'u ste gnyis pa'o//// a a a sarba dz+nyA na d+harma kA ya na ma/ nam mkha'i mtha' 'di spros dang bral ba la mun snang gnyis ka ma grub pa zhes bya ba ston te/ gsang ba'i bdag pos yang zhus pa/kye bcom ldan rdo rje 'chang chen po// 'khor dang myang 'das gnyis ka'i gzhir gyur pa// dngos po'i gnas lugs ji ltar gnas pa'i don// de las rtsal byung ji ltar 'byung ba'i rgyu// de dag rgyas bshad ji ltar phyi la bshad// bcom ldan rdo rje 'chang gis bshad par zhu// bcom ldan rdo rje 'chang gis gsungs pa'i don// dang po gzhi yi gnas lugs bstan pa dang// gnyis pa gzhi las rtsal gyi 'byung lugs dang// gsum pa gzhi yi bye brag bstan pa dang// bzhi pa gzhi yi mtshon dpe bstan pa dang// lnga pa gzhi yi brjod tshig bstan pa dang// drug pa gzhi yi mdor bsdus bstan pa dang// bdun pa gzhi yi ngos bzung bstan pa'o// dang po gzhi yi gnas lugs bstan pa ni// 'khor 'das rtogs 'khrul med pa'i gong rol na// rgyu rkyen gnyis las 'das pa rang byung ste// bde gshegs thugs rje dag las ma byung dang// sems can rnams kyi las kyis ma bskyed dang// phyi rol 'byung ba lnga yis ma bskyed dang// nang gi rnam rtog dag las ma grub dang// gang zag lam pa'i blo yis ma bcos pa'o// ming dang mtshan ma gang yang btags pa med// shes med rtog med ma rig 'khrul pa med// 'khrul dang bag chags rtog pa sna tshogs dang// ye shes rtsal snang 'bras bu'i chos rnams ni// rang byung gnas lugs gzhi la dbye ba med// thog ma'i dus dang snga phyi grub pa med// bzang ngan blang dor sgrub bya gang yang med// mtha' dang dbus med phyogs dang ris su med// ngo bo ma bcos ma bslad gnyug mar gnas// so ma rang lugs ma byung ma skyes so// gnyis med mnyam nyid bzang ngan gar mi 'byed// bden rdzun yod med gar yang 'dzin pa med// bsam med rtog med nam mkha' dag pa 'dra// ngo bo gzugs dang dngos po'i mtshan ma med// gnas dang mi gnas snang dang stong pa med// rtag dang chad dang gcig dang du ma med// dga' dang mi dga'i rtsis gdab dag las 'das// mdor na mtha' dang phyogs 'dzin gang yang med// rigs drug sems can 'khrul pa sna tshogs dang// rgyal ba'i sku dang ye shes snang ba dang// rim dgu la sogs theg pa'i bye brag rnams// dngos po'i gnas lugs gzhi la grub pa med// ji bzhin ma bcos kun gyi gzhi yin te// rang byung lhun grub kun gyi 'byung gnas de// ma bslad snying po kun la khyab pa'i don// rang gnas byang chub kun gyi gzhi ma yin// ma phye mi 'byed rang gnas ngo bo ste// 'gro dang 'ong zhing 'byung 'jug kun las 'das// myang dang ma myang 'jug dang mi 'jug med// stor dang ma stor med pas btsal mi dgos// dngos med kun gyi snying po kun gzhi ste// chags dang ma chags bya byed kun dang bral// skye med 'gyu med snang ba'i yul las 'das// rang lus rang gnas ma bcos byang chub sems// gdod nas lhun grub rin chen kun gyi mdzod// rtog med mnyam nyid gsal cha'i rtsal ma shar// shes pa sgo lngar ma don nyams myong med// 'gyu ba rang snang ma bcos rnal mar gnas// nang gi rig pa'i rtsal ni sngar ma 'gyus// bsam 'phel rin po che las dgos 'dod 'byung ba bzhin// man shel rnam par dag las 'od lnga lhun grub bzhin// til 'bru la sogs mar khu lhun grub bzhin// snying po'i gzhi la rtsal gnyis lhun gyis grub// rtogs na gzhi la rtsal gnyis sku ru 'char// ma rtogs gzhi la 'khor ba rang kha ma// zhes gsungs so// spros bral don gsal chen po'i rgyud las/ gzhi'i gnas lugs kyi le'u ste gsum pa'o//// a a rat+na d+harma kA ya/ nam mkha' rgya mtsho me long can gyi gnas g.yu'i maN+Dal chen po khod snyoms pa'i steng na/rin po che'i mchod rten khri 'phang lnga pa/ shel gyi za ma tog chen po'i nang na gnas pa la/ rlung gi rta phos bdag po byed pa'i man ngag gsang ba'i bdag po phyag na rdo rjes rdo rje 'chang la yang zhus pa/ gong gsungs gzhi'i gnas lugs de lags na// rtsal 'char gzhi dang gzhi snang don// 'dus pa'i 'khor la gsung du gsol// rdo rje 'chang gis bka' stsal pa// rigs kyi bu rgyud thams cad kyi don/ gzhi dang gzhi snang chen po'i 'dug tshul nga yis smra yis ma nor yid la zung zhig/ngo bo nyid kyi snang ba la/ ngo bo nyid kyi skur shar te/ chos sku thig le nyag gcig ma bcad pa'i yul can/ snying po bcud du 'dril ba/ dpe nam mkha' dang nyi ma lta bur gnas so// kye gsang ba'i bdag po nges par zung zhig/ ngo bo nyid kyi snang ba ni yul chos kyi dbyings/ sangs rgyas kyi zhing khams rnam par dag pa ste/ de la ni mtha' dang dbus med pa/steng 'og phyogs mtshams med pa/ du ma dang rten pa med pa/ de rdos pa can gyi chos min pas mnan na nem pa snyam byed pa/ btegs na 'phar ba snyam byed pa/ gar yang gsal ba zang thal ba/ kun tu rgya ma chad pa/spros bral gyi dbyings/ 'gyur med kyi klong ngo// ngo bo nyid kyi sku ni phyogs lhung med pa'i shes rab/ rgya ma chad pa'i ye shes/ lhun gyis grub pa'i sangs rgyas dngos med zang thal ba/ byed pa po'i mtha' thams cad las 'das pa/ma bcos pa sgro skur gyi mtha' thams cad las 'das pa/ ma bslad pa skyon gyi mtha' rnam par dag pa/ dang po rgyu med pa/ bar du rkyen med pa/ tha ma gnyen po med pas mi 'gyur ba/ma rig pa dang log par lta ba dang/ ma dad pa dang le lo la sogs pa dri mar ma gyur pa rtag chad kyi mtha' dang/ yod med kyi mtha' dang/ bem rig dang gzung 'dzin gyi mtha' dang bral ba'o// 'khor 'das kyi chos thams cad kyi don gyi ngo bor gyur pa'o// shar pa ni ye shes dbyings las shar/ dbyings rig pa dang ldan/ mtha' rnam par mi 'byed/ shes pas gud du mi gcod do// rig pas dbyings la khyab/ ye shes kun tu brdal/ chos nyid rig par 'dus so// rigs kyi bu de ltar ngo bo nyid kyi snang ba dang chos sku gnyis su brjod cing mtshon kyang/ don gong ma bzhin du gnyis su med pas/mtha' bla na med pa'i sbubs su 'dus shing/ sbubs bla na med pas mtha' dbus yongs la khyab ste/ don gnyis med chos kyi sku thig le nyag gcig go/ de ci'i phyir zhe na/ ma bcad pa'i yul can yin pas so// de yang ma bcad pa'i rig pa la 'dzin rtogs ma skyes te/ yul du yang ma bzung/ gzung 'dzin gnyis su med kyang/ yul rang snang chen po de dang ldan pas/ ye shes 'od du gsal nus te/ yul can zhes ldan tshig go/snying po bcud du dril ba ni/ dbyings kyi snying po rig pa'o// de'i snying po ni ye shes kyi rang gdangs lnga'o// de'i snying po ni ye shes kyi sku lnga'o// rigs kyi bu bcud dang yang de bzhin du sbyar ro// dril ba ni sgyu ma lta bus ye shes kyi snang ba yin pas so// dpe ci lta bu zhe na/ nam mkha' la nyi ma shar ba lta bu'o// rigs kyi bu ngo bo nyid kyi snang ba ni/ nam mkha' sprin dang bral ba lta bu'o// ngo bo nyid kyi sku ni nyi ma'i snying po lta bu'o// zhes don gyi snying po dgos 'brel chen po dang sbyar nas gsungs so// spros bral don gsal chen po'i rgyud las/ gzhi dang gzhi snang chen po'i 'dug tshul bstan pa'i le'u ste bzhi pa'o//// de nas yang bcom ldan 'das rdo rje 'chang chen po gzhi'i mtshan nyid kyi ting nge 'dzin la snyoms par zhugs so// de nas yang gsang ba'i dag pos zhus pa/ kye bcom ldan rdo rje 'chang chen po// gzhi yi bye brag gsung du gsol// zhes zhus pas/ gzhi'i ting nge 'dzin las bzhengs te/ bka' stsal pa/ rigs kyi bu gzhi'i ngo bo ni gnyis su med pa'o// nges tshig ni thams cad 'byung bas na gzhi'o// yang na 'khor 'das gnyis kyi rten du gyur pa'o// mtshan nyid ni ye shes lnga'o/ dbye ba ni gsum ste/ ye don gyi kun gzhi ni yang dag pa'i gzhi'o// sna tshogs bsags pa'i kun gzhi ni bag chags dang 'dres pa'i shes pa tshogs brgyad do// gnas lugs don gyi kun gzhi ni 'dug tshul brgyad kyi dpe'o// gzhan sel ni rig par 'dug pas bem po sel/ stong par 'dug pas dngos po sel/ gnyis med yin pas gnyis snang sel/rang byung yin pas rgyu rkyen sel/ lhun grub yin pas re dogs sel/ yang dag yin pas dri ma sel/ med pas yod pa'i rtag mtha' sel/ yod pas med pa'i chad mtha' sel/ kye rdo rje 'dzin pa legs par zung zhig/yang dag pa don gyi gzhi'i phyi mo ni/ rang dang rigs mthun pa las kyang log pa ste/ rig pa tsam du mthun pa tshogs brgyad las grol lo// de yang ji ltar grol zhe na/'phel 'grib med pas kun gzhi'i rnam shes las grol/ ngar 'dzin med pas nyon mongs pa'i yid las grol/ gzung 'dzin med pas yid kyi rnam shes las grol/ skye 'gag med pas sgo lnga'i rnam shes grol zhing log pa'o// gsang ba'i bdag po stong par rigs mthun las log ste/ rang bzhin dag pas nam mkha' kha dog dang bcas pa/ dbyibs dang bag rdul dang bcas pa 'di ma yin no// kye sems dpa' chen po// rigs mi mthun pa las kyang log ste/ rig pa dang rigs mi mthun pas bem po min/ stong pa dang ni rigs mi mthun pas/ phyi nang gnyis kyi 'byung ba bzhi las grub cing bskyed pa'i dngos po med do// rigs kyi bu don chen po des na/ gnyis ka las kyang ldog pa shes par bya'o// gnyis ka ma yin pa'i dngos por 'dzin pa dang bral ba'o// zhes gsungs so// spros bral don gsal chen po'i rgyud las/ gzhi'i bye brag bshad pa'i le'u ste lnga pa'o//// de nas yang mtshon pa dpe'i dgongs pa la bzhugs so// gsang ba'i bdag pos yang zhus pa/ kye kye bcom ldan rdo rje 'chang/ de bzhin mtshon dpe gsung du gsol// zhes zhus so// bcom ldan 'das kyis bka' stsal pa/ rdo rje 'dzin pa khyod nyon cig/ ngas gzhi dang gzhi snang chen po dpe dang brdas bshad par bya'o// mi g.yo ba rgya mtsho'i gting lta bu'o// stong pa khyab pa dang yangs pa nam mkha' lta bu'o// dri ma med pa man shel lta bu'o// dag cing gsal la ma reg pa me long gi gzugs brnyan lta bu'o// sna tshogs su snang yang dri mas ma gos pa pad+ma lta bu'o// 'gyur ba med pa glang po'am rdo rje lta bu'o// thams cad 'byung bas sa gzhi lta bu'o// dngos su mi snang la byin rlabs las 'byung ba yid bzhin gyi nor bu lta bu'o// rang gi ngo bo gsal la mi 'gag pa nyi ma'i snying po bzhin no// rgyun chad med pa chu bo bzhin no// brtan pa ri bo lta bu'o// gcig du mar snang ba nyi zla bzhin no// gcig kun la khyab pa chu'i lbu ba la byad kyi gzugs brnyan bzhin no// chos nyid la chos skur shar ba ni me long la nyi ma shar ba bzhin no// chos nyid la chos skus khyab pa ni 'o ma dang mar bzhin no// chos nyid kyi snying po rig par gnas pa ni nam mkha' dang nyi ma bzhin no// chos nyid mi rtog pa la chos sku'i rtsal gcod pa ni spu gri'i ltag pa dang so bzhin no// ma 'dres pa la rdzogs pa ni sa 'og gi gur khyim dang gzugs brnyan bzhin no// sna tshogs snang la gnyis su med pa ni shing gi grib ma bzhin no// gzhi las rtsal 'du 'phro ni rgya mtsho la chu bran 'du ba bzhin no// gzhi la sku gsum rdzogs pa ni/ nyi ma'i snying po la 'od zer ma 'gags pa bzhin no// ngo bo rang bzhin thugs rje gsum gyi dpe ni rma bya'i sgo nga'am nyi ma'am nam mkha'i sprin dang char bzhin no// yang na man shel bzhin no// 'khor 'das gnyis skyon yon du shar yang ngo bo gcig pa ni ga bur bzhin no// gnas lugs dang snang tshul ni mar me dang me long bzhin no// rig pa dang ye shes kyi dpe ni gser dang ser po bzhin no// sku gsum ngo bo rang nyid yin yang ngo ma shes pa rgyal bu dmangs su 'khyams pa bzhin no// rgyu rkyen gang gis ma byas pa bar snang 'dus ma byas pa lta bu'o// rang gi ngo bo dus gsum du 'gyur pa med pas gser lta bu'o// ming gang du yang ma thogs pas rgyus med kyi yul du phyin pa lta bu'o// dgos 'dod rang la yod kyang spyad par ma phan pa gyad kyi nor bu lta bu'o// gzhi snang chen po'i dpe la a zhes zer ro// dpe'i don rtags su 'byor pas/ dpe oM gyi sgra de bzhin rjes 'jug rnams kyis legs par dgongs/ 'bod skad thabs gsum don gyi khrigs sdeb la/gar byung dpe dang don du 'byor par nges/ dpe kha gcig ni kun tu rgyug par bya'o// spros bral don gsal chen po'i rgyud las/ gzhi mtshon pa'i dpe bstan pa'i le'u ste drug pa'o//// de nas yang bcom ldan 'das rdo rje 'chang chen po tshig don gsal ba'i ting nge 'dzin la snyoms par zhugs so// de nas yang gsang ba'i bdag pos zhus pa/ kye kye bcom ldan rdo rje 'chang/ de yi brjod tshig ngos bzung gsung du gsol/zhes zhus so// yang ston pas gsungs pa/ ngas bstan rgyud lung thams cad nas/ gzhi yi tshig tshogs mang gis kyang// mdor bsdus ngas bshad khyod kyis nyon// 'khor 'das kyi chos thams cad kyi ngo bor gyur pas na/ngo bo nyid kyi sku'o// de rang snang yin pas na/ ngo bo nyid kyi snang ba'o// de yang rang gdangs chen po mi 'gag pas snang ba chen po'o// 'khor 'das kyi tha snyad las grol bas chos kyi sku'o// yon tan dus phyis 'bras bu chos skur gsal bas/ 'bras bu'i ming rgyu la btags pas chos kyi sku'o// ma rig pa dang bem po las log ste/ yang dag pa'i shes pa'i ngo bor gnas pa ni rig pa'o// rgyu rkyen las 'das pas rang byung ngo// glo bur du byung ba min te/ ye nas gnas pa'i rig pa'i bdag nyid du gyur pas na ye shes so// rang snang las gzhan snang med cing ngo bo mi 'gyur bas na/ snang ba rang snang chen por gsal ba'i thig le nyag gcig go/de'i gong na gzhan med pas chen po'o// de bas snga ba gzhan med pas sngon byung ngo// thams cad de las shar cing snang bas kun byed do// 'khor 'das thams cad de las snang bas gzhi'o// ngo bo gsal la mi 'gag pas zang thal te/ sgrib pa med pas kun gzhi me long lta bu'o// ye shes yul chos nyid stong pa dang/ rig pa 'dus ma byas stong pa dang/ stong pa dbyer med gsal ba zang thal gyi ngang na sku gnyis nang gsal du bzhugs shing 'du 'bral med de/don dbyer mi phyed pa rdo rje 'chang ngo// sku lnga ngo bo nyid dang drug/ ye shes lnga mi gnas pa'i ye shes dang drug/yul lnga bdag tu med pa'i klong dang drug/ rigs lnga a'i rigs dang drug/ 'od lnga rang bzhin gyi 'od dang drug/ 'byung ba lnga rang byung gi 'byung ba dang drug/ yul lnga dbyings kyi yul dang drug/ nyon mongs pa lnga khong khro ba dang drug/'gro ba rigs drug rnams don gnyis su med par bzhugs shing phyis yon tan du mi 'gag pas drug pa rdo rje 'chang ngo// gzugs sku'i sangs rgyas grangs las 'das pas/ thams cad de'i don rtogs pa las shar cing byung bas na/sangs rgyas thams cad kyi mes po'o// rang gi ngo bo dri ma med cing ye shes kyi rang gdangs chen po mi 'gag par gsal bas/ de kun gyi gong du gyur pa dang/ rig pa rang chas su mi 'gyur bas thog ma'i sangs rgyas 'od mi 'gyur ba'o// yon tan gyi bye brag cir yang snang ba las/ rang gi ngo bo la dbyer med pas thams cad gnyis med chen por ro gcig pas kun tu bzang po'o// chos nyid gsal ba'i rang gdangs la// ye shes dag pa'i zer mdangs shar// 'gag med 'od kyi gzhal yas khang// snying po sku lnga nang na gsal bas na// gzhon nu'i sku'o// bgres pa mi mnga' bas gzhon pa'o// rig pa dang ye shes 'du 'bral med pas// thabs 'gag pa med pa'i ye shes dang/ shes rab 'gyur ba med pas ye shes so// chos nyid kyi klong du rig pa grub cing rig pa'i klong du ye shes kyi rang gdangs lnga grub ste/'od kyi sbubs na sku lnga grub pas rang bzhin lhun gyis grub pa'i sangs rgyas so// ngo bo nyid kyi sku dbyer mi phyed pa'i ngang nas/ rang bzhin 'od kyi bum pa lnga gsal ste/ thugs rje'i snying po sku lnga phyag rgya ma sres pa'i tshul du gnas pas na ngo bo rang bzhin thugs rje gsum mo// zhes rdo rje 'dzin pas legs par zung zhig/ gzhan thams cad tha snyad yin la/ yang dag pa'i don de ltar gsal bas na/ dang po'i gnas lugs so// rang byung gi ye shes yin pas na/ dang po'i sangs rgyas rgyu med pa/ sangs rgyas thog mtha' med pa'o// gzigs snang las 'das pa'i gsal ba mi 'gag pas ye shes kyi mig go/gnyis su snang bas rtag chad dang yod med che chung mtho dman dang/ yangs dog gzung 'dzin dgag bsgrub dang/ dag dang ma dag phyi nang yang dog dang/ blang dor yin min gnyis kyi chos/ de bzhin du gnyis snang med pas gnyis med do// mi mthun pa'i snang ba med pas gcig go/ sgrib pa med pas zang thal lo// 'khor 'das thams cad de las 'byung zhing thug pas na rtsa ba'o// brjod med bsam gyis mi khyab kyang/don yang dag pa de las mi 'da' bas na brjodapa zhes bya'o// ma bcos par ngang gis gnas pas gshis so// thams cad de las byung bas rgyu'o// gzhi chen po de las thams cad bskyed cing 'brel pas sa bon no// ka dag pa'i ye shes yin te/ dri ma mi gnas pas rnam par dag pa'o// 'khor 'das thams cad de las 'byung bas na rin po che'o// rigs kyi bu gzhan yang 'di lta ste/ sna tshogs su snang zhing shar yang ngo bo mi rtog pas 'byed pa med pa'i shes rab bo// rang gi ngo bo rig pa dngos med ye shes ye dag zang thal du gnas la/ de rdos pa can gyi chos min pas/ yon tan gyi sgo yangs pa ni chos thams cad kyi 'byung gnas te/ngo bo rgya ma chad pa'o// kye rdo rje 'dzin pa ngas bstan rgyud lung du/ tshig de rnams gang byung yang/ gzhi mtshon pa'i tshig tu shes par gyis shig/ ngo bo nyid kyi sku zhes pa nas rgya ma chad do// zhes pa yan chad du bstan pa'i tshig 'di rnams ngas 'dir bstan cing bshad pa bzhin du/ rgyud lung thams cad du shes par gyis shig/ gzhan yang 'bod skad thabs gsum dang sbyar la gzhi mtshon pa'i tshig tu 'gro ba la 'byung ba na de dang mthun par 'bru mnan no// zhes gsungs nas/ chos ny-id mtshon pa'i tshig bka' stsal pa/ kye gsang bdag snang ba chen po zer na/ snang ba ni yul 'gag pa med par gyis shig/chen po ni snang ba de ma byas pa dang/ de'i gong na gzhan med pa dang snang ba gzhan las 'phags par shes par bya'o// rang snang zer na gzhan mi snang ste gzung 'dzin dang bral ba'o// snang ba rnam par dag pa zer na/snang ba la du ma med par shes par bya'o// chos nyid zer na yul 'gyur ba med pa'o// dbyings zer na yul spros pa dang bral ba'o// klong zer na yangs pa chen po cha shas dang bral ba'o// stong pa 'gyur ba med par shes par bya'o// yul zer na bzhugs pa'i gnas dang de'i snang ba la shes par bya'o// stong pa zer na mtshan ma las 'das te dngos po med pa'o// yangs pa zer na gang la yang dog pa mi mnga' ste/de nyid kyi khyad par dang de las snang ba du ma mi 'gag par 'char ba'i rten du shes par bya'o// dbyings rnam par dag pa ni/ snyigs ma'i 'byung ba ma grub pas bag rdul med cing ye shes kyi gdangs 'char nus pa la bya'o// pad+ma bde gsal zer na/ dri ma med pa'i snang ba la gnod pa mi skyel ste/ rang gsal 'dzin med du shes par bya'o// spros bral gyi dbyings zer na 'byung ba bzhi'i mtshan ma dang bral ba'o// 'gyur med kyi klong zer na chos nyid la kha gting med pa'o// zhes gsungs so// spros bral don gsal chen po'i rgyud las/ gzhi dngos po'i gnas lugs dang snang tshul mtshon pa'i tshig ngos bzung ba'i le'u ste bdun pa'o//// gsang ba'i bdag pos yang zhus pa// kye kye rdo rje 'chang chen po// gzhi nyid rgyas par bshad pa de lags na/ gzhi nyid bsdus nas bshad pa dang/ de don ngos bzung bstan pa dang/de la 'khrul rtog 'char lugs dang/ yar la ji ltar grol lugs dang/ grol nas thim dus bshad par zhu// de skad ces ni zhus pa dang// rdo rje 'chang gis bka' stsal pa// dang po gzhi yibsdus don ni// gzhi nyid ma bcos ma bslad pa// rig pa gsal bas nam mkha' lta bur med// dngos por ma grub bem po med// rig pa gsal stong gnyis med zang thal yin// rig pa rlung bzhin 'gyu zhing spyod par nus// rtag chad la sogs mtha' brgyad dag dang bral/ rtogs dang ma rtogs shan ma phyed/ rig dang ma rig yengs dang ma yengs dang/ yin min gang gi 'dzin pa ma zhugs ste// gong gi ming dang brda' ru btags pa med// shes rig tsam du yod kyang der ma shes// thams cad lhun gyis grub kyang 'byung ma nus// gzhi yi ngo bo rang byung stong gsal dag tu nges pa la// nges pa'i shes pa shar dang ma shar gnyis ma phye// rtsal ni ma nges gang 'gyu nges pa med// dper na nor bu rin chen yon tan lhun grub ste// bsod nams che chung gnyis kyi rkyen gyis ni// dgos pa bzang snang ngan snang nges pa med// de lta bu yi gzhi de ni// tha mal rang rgyud da lta'i shes pa la// ngo yis tsir gyis bzung par nga yis bstan// de ltar gzhi nyid nges par shes gyur na// lta sgom spyod 'bras nges pa dus gcig 'char// kun la spel ba'i snod mi ldan// theg pa gzhan du de ltar bstan pa med// gzhi yi ngo bo ma bcos ma bslad cing// so ma rang byung dngos po'i gnas lugs las// rang rtsal mi 'gags dang po gzhi ru 'char// dang po gzhi las rtsal de g.yo tsam 'byung// g.yo mi g.yo las yid tsam g.yos// de las shes pa rtsal 'gyus pa// rang gzugs 'od du snang ba mthong// tshor bas yar chad mar chad byung// yar chad rang snang 'dzin med kyis// rdo rje 'chang chen yar la grol// mar chad 'dzin pa brtas pa yis// 'gro drug sems can mar la 'khrul// 'khrul pa rtog pa'i bye brag rnams// rgyas par 'og nas gsal bar bstan// snang ba rang snang 'dzin med ma shes pas// lhan cig skyes pa'i ma rig pa ru byung// de la brtags pas kun brtags ma rig yin// de ltar rgyu gnyis rkyen ni bzhi ru byung// phyi nang snod bcud dag tu ni// ye shes dang ni sems can gnyis su chags// chos kyi dbyings la ye shes lnga las ni// ma rig ye shes dug lngar 'khrul// chos kyi sku yi rtsal las longs sku de las lus su 'khrul// de gnyis tshogs pa'i rtsal las ni// sprul sku de las ngag tu 'khrul// phyi yi chos dbyings ma shes pas// 'gro ba rigs drug snang bar shar// de ltar 'khrul pas khams gsum sems can la// sku gsum ye shes rnam lnga lhun gyi grub// bag chags sbubs na sku gsum gnas pa la// bla ma'i gdams ngag rkyen gyis rtogs par bya// rtogs pa goms nas dag pa'i snang ba 'char// zag bcas lus dang bral na rin chen sbubs 'char te// longs sku'i 'gro don byas nas chos skur gsal// de las sku gsum lhun gyis 'grub// rgyas par 'og nas 'byung bas shes par gyis// zhes gsungs so// spros bral don gsal chen po'i rgyud las/ gzhi bsdus ste bstan pa dang dngos bzung ba'i le'u ste brgyad pa'o//// shel gyi za ma tog gis ma thub par g.yu'i maN+Dal las mchod rten gyi gdangs phyi ru phyung ba ste/ gzhi'i man ngag lha tshogs lnga shar ba'i man ngag/ a b+hi ta da ka na pany+tsa pra pa rA pra ra ka la ng+hA a ha ra/de'i tshe ston pa rdo rje 'chang chen po// ye shes gsal ba'i ting nge 'dzin la snyoms par zhugs so// yang de'i tshe gsang ba'i bdag pos zhus pa// gong gsungs gzhi snang chen po de// glo bur ma yin ye shes de// da lta ma 'ongs rjes 'jug la// ye shes don rnams gsung du gsol// zhes zhus so// ston pa ye shes gsal ba'i dgongs pa las bzhengs nas bka' stsal pa/ rigs kyi bu nyon cig/ ngas ye shes kyi don mdor bsdus la bstan no// ye shes kyi ngo bo dang// ye shes kyi nges tshig dang/ dbye ba rnam grangs dang bcas pa dang/ mtshon dpe dang sbyar la bshad de/ ye shes kyi ngo bo ni gsal la mi rtog pa'o// de yang rang bzhin rnam par dag pa gzhi gnas kyi ye shes dngos med zang thal lo// sku dang sbyar na chos sku'o// rig pa dang sbyar na ngo bo'o// rigs kyi bu 'dug tshul 'od du gnas pas/ sku dang sbyar na gzugs kyi sku'o// ye shes dang sbyar na mtshan nyid 'dzin pa'i ye shes lnga'o// snang tshul phyi nang med par snang bas sgrib med du gsal ba'i ye shes so// de yang rang bzhin rnam par dag pas rtag pa'i mtha' las 'das/'dug tshul 'od du 'dug pas chad pa'i mtha' las 'das/ snang tshul phyi nang med pas gzung 'dzin gyi mtha' rnam par dag pa ni ye shes kyi ngo bo'o// nges tshig ni ye nas yin pa'i don de ma nor bar shes pas ye shes so// dbye ba rnam grangs dang bcas pa ni rig pa dngos med ye dag zang thal chen po de las/ 'khor 'das thams cad snang bas na gzhi gnas kyi ye shes so// de stong par gnas pas na chos kyi dbyings kyi ye shes so// stong pa de rig pa 'gag pa med par 'dug pas me long ye shes so// stong pa de nyid rig pa yin la rig pa de nyid stong pa yin te/ stong rig dbyer mi phyed pas mnyam pa nyid kyi ye shes so// stong pa dang rig pa gnyis su med pa so sor mkhyen pas so sor rtogs pa'i ye shes so// rig pa dngos med kyi ye shes rdos pa can gyi chos ma yin pa yon tan gyi sgo yangs pa ste/ rtsal phyogs med du gang la'ang ma thogs par 'byung bas bya ba grub pa'i ye shes so// de ltar tshig phyogs re nas brtags kyang/ don phyogs cha dang bcas pa mi snang bas mi gnas pa'i ye shes so// kye ho rigs kyi bu de ltar shes pa ni/rang gis rang rig pas rig pa'i ye shes so// de la byed pa po med pas rang byung gi ye shes so// de'i don las mi 'da' bas na/ 'da' ka thugs kyi ye shes so// dpe bstan na gzhi gnas kyi ye shes kyi dpe ni/thams cad 'byung bas sa gzhi rin po che lta bu'o// chos kyi dbyings kyi ye shes ni nam mkha' lta bu'o// me long ye shes kyi dpe chu dngas pa'am me long g.ya' dag pa lta bu'o// mnyam pa nyid kyi ye shes kyis ni dus gsum mnyam pa nyidakyi dpe chu bo lta bu'o// gnyis su med pa'i ye shes kyi dpe ni/ gser dang ser po lta bu'o// so sor rtogs pa'i ye shes kyi dpe ni/ rgya mtshor gza' skar shar ba lta bu'o// bya ba grub pa'i yishes kyi dpe ni/ rlung dang nyi ma bzhin no// mi gnas pa'i yi shes kyi dpe ni chu zla bzhin no// rang rig pa'i yi shes kyi dpe ni man shel dang 'od bzhin no// rang byung yi shes kyi dpe ni rdo rje lta bu'o// 'da' ka thugs kyi yi shes kyi dpe ni/ rgyal po'i bka' khrims la gnas pa'i phyag rgya mo la mi yis glags mi 'tshol ba bzhin no// zhes gsungs so// spros bral don gsal gyi rgyud chen po las/ye shes yongs su ngos bzung pa bstan pa'i le'u ste dgu pa'o//// de nas yang ston pas bka' stsal pa/ ngas bstan pa yi rgyud lung dag nas// thams cad 'byung bar smra na/ gzhi gnas kyi ye shes yin/dngos med stong par brjod na chos kyi dbyings kyi ye shes yin/ 'gag pa med par brjod na/ me long lta bu'i ye shes yin/ gnyis su med par brjod na/ mnyam pa nyid kyi ye shes yin/ ma 'dres yongs su rdzogs par brjod na// so sor rtogs pa'i ye shes yin/ gang la thogs pa med par brjod na/ bya ba grub pa'i ye shes yin// mtha' dang bral bar brjod pa na// mi gnas pa yi ye shes yin// rig pa 'od gsal brjod pa dang// rang rig zhes su brjod pa na// rig pa'i ye shes chen po yin// 'gyur ba med dang 'dus ma byas// rdo rje lta bu'i tshig brjod na// rang byung ye shes chen por bshad// 'da' ru med pa dang 'da' mi srid pa dang mi 'da' ba ni 'da' ka thugs su 'bru rnams mnan/zhes gsungs so// spros bral don gsal gyi rgyud chen po las/ ye shes mtshon pa'i tshig bstan pa'i le'u ste bcu pa'o//// nyi ma'i snying po la 'od zer mi 'gag pa'i man ngag/ dz+nyA na A' sha ta rat+na/ kA la pra sa ha du/ bcom ldan 'das thugs rje rtsal gyi dgongs pa la zhugs so// yang gsang pa'i bdag pos dgongs pa mkhyen nas zhus pa/chos sku gcig la tha dad snang/ rig pa'i rtsal de shar lugs gsung du gsol/ zhes zhus so// ston pas bka' stsal pa/ rig pa dngos med zang thal la// stong pa mi 'gag dbyer mi phyed// der shes thogs pa med pa ni/ ye shes lnga ru rang shar ba'o// chos dbyings 'od kyi ye shes rang gdangs las// stong pa'i ngang nas mthing ga gsal// me long ye shes rang gdangs ni// 'gag med ngang nas dkar por gsal// mnyam nyid ye shes rang gdangs ni// dbyer med ngang nas ser por gsal// kun rtogs ye shes rang gdangs ni// de shes dang nas dmar por gsal// bya grub ye shes rang gdangs ni// thogs med klong nas ljang gur gsal// de lnga chos nyid klong du shar// ye shes 'od du shar ces bya// rtogs pas sku dang ye shes snang// ma rtogs snod bcud gnyis su shar// dper na me long dag pa la// gang 'phrad rkyen gyis snang mod kyang// snang ba'i dus nas gos pa med// gos pa med kyang de ltar snang// de bzhin rig pa chos sku la// yon tan ma 'gag sna tshogs shar// shar kyang rang rig gcig pur gsal// gcig pur gnas la du ma med// dus dang gnas skabs thams cad du// dngos med dag pa chen por gnas// sgrib med gsal ba zang thal gnas// gzugs sku gnyis kyi snang ba yang// rang la mi snang rnam par dag// ces gsungs so// spros bral don gsal gyi rgyud chen po las/ rig pa'i rtsal 'byungu ba dang/ rtsal rnam par dag pa bstan pa'i le'u ste bcu gcig pa'o//// de nas yang gsang ba'i bdag po zhus pa/des mtshon tshig rnams gsung du gsol/ zhes zhus so// ston pas bka' stsal pa/ ngas bstan rgyud lung thams cad du// rtsal zhes byung na 'di skad bshad// rig pa'i rtsal ni ye shes lnga// de yi rtsal ni 'od zer lnga// 'od lnga'i rtsal ni 'byung ba lnga// nam mkha'i rtsal ni sprin dang khu rlang gis go 'byed// rlung gi rtsal 'ur sgra dag bskyod pa'o// chu las shwa sgra dang rlan cing sdud pa'o// sa las gzugs dang snang rten byed pa'o// me las tsha ba dang bsreg pa smin pa'o// 'od dkar po las sha dang rus pa/ 'od ser po las mkhris pa dang chu ser/ 'od dmar po las khrag dang drod/ 'od ljang gu las dbugs/ 'od thing ga las lus kyi skabs 'byed pa'o// 'byung ba lnga'i rtsal ni so sor shar// phyi nang gnyis su bstan pa yin// thig le phyi nang rtsal zhes bya// de ltar snang nus stobs su bshad/ de ltar 'byung bas rang byung ngo// gzhan las ma byung rang las rang byung bas// yon tan 'byung bas rang byung yin// de ltar shar bas rang shar yin// yon tan zhes bya de la bya// thams cad 'byung dang kun 'byung dang// mang po rags pa 'byung ba rnams// rig par shar bas rang shar yin// sku lnga rang snang yul lngar snang// de bzhin sems dpa' sems mar snang// de bzhin thugs rje'i mdzad spyod snang// de mtshungs snang ba sna tshogs snang// sgyu ma lta bur gsungs pa dang// snang la rang bzhin med pa dang// gsal la rtog pa med pa'o// zhes byung na/ rtsal la rang bzhin med par bshad/ thams cad rang snang rang shar yin// zhes gsungs so// spros bral don gsal gyi rgyud chen po las/ rig pa'i rtsal 'byung ba dang/ de mtshon pa'i tshig bstan pa'i le'u ste bcu gnyis pa'o//// de nas yang gsang ba'i bdag pos zhus pa// ston pa thugs rje che mnga' ba// rtsal gyi ngo bo ji ltar lags// de'i nges tshig dbye ba ji ltar lags// de yi mtshon dpe ji ltar lags// zhes zhus so// ston pas bka' stsal pa/ ngo bo ni ma 'gags pa'o/ rtsal gyi nges tshig ni/ 'byung ba'i stobs dang ldan pas na rtsal lo// dbye ba ni rig pa 'khor 'das gnyis su snang ba'o// dper na nyi ma gcig du mar snang ba'am/ nyi ma la 'od dang 'od zer mi 'gag pa'am/ btsan dug gam/ ga pur ram glog 'gyus pa lta bu'o// zhes gsungs so// spros bral don gsal gyi rgyud chen po las/ rtsal bsdus nas bstan pa'i le'u ste bcu gsum pa'o//// gser gyi sor gdub la g.yu'i phra bcug pa'i man ngag/rda~M a tra A' na k+Sha la a ha~M/ de nas bcom ldan 'das chos nyid kyi rgyan ma 'gags par rol pa'i ting nge 'dzin la snyoms par zhugs so// yang de'i tshe/ gsang ba'i bdag pos zhus pa/ kye kye ston pa kun bzang rdo rje 'chang// sna tshogs rtsal du snang ba de// rgyan dang rol pa ji ltar lags// zhes zhus so// ston pas bka' stsal pa/ rgyan gyi ngo bo nges tshig dang// dbye ba mthun pa'i sgo nas bstan// rol pa la yang de bzhin bstan// ngo bo dbye ba'i sgo nas bstan// nges tshig mdzes pa'i rgyan zhes bya// dbye na/ chos nyid rgyan ni sku gsum yin// chos sku'i rgyan ni sku gnyis yin// mtshan nyid mtshon pa'i ye shes lnga// gnyis ka'i rgyan du de bzhin brjod// mtshon dpe gser la g.yus spras 'dra// nges tshig don gyi dbye ba ni// chos nyid dag la chos skus brgyan pa ni// stong la phyang chad gsal bas mdzes// chos kyi sku la ye shes brgyan// yon tan 'gag pa med par mdzes// ye shes gsal la thugs rjes brgyan// 'gro drug rang sar 'dren pas mdzes// de phyir mdzes pas rgyan zhes bya// de nas rol ba'i don bstan pa// ma 'gags gnyis med sbyor ba ni// rol pa'i ngo bo yin par bstan// ci phyir rol par btags she na// rang las shar zhing rang las grol// nges tshig gtan tshigs bcas pa yin// dbye na rnam pa gnyis yin te// dag pa chos nyid rol pa dang// 'khor ba rang rgyud rol pa'o// dag pa chos nyid rol pa ni// ma bcos pa yi chos nyid dang// ma g.yos pa yi ngang nyid las// rang bzhin 'gag pa med par shar// bag dang bral ba'i nam mkha' la// 'byung ba bzhi yi gdangs shar bzhin// snang la rang bzhin med par shes// ma 'gags rang gdangs chen por gsal// 'khor ba rang rgyud rol pa ni// phyi nang snod bcud bsdus pa'i chos// gzugs su snang ba sku yin te// chu zla lta bur gzung du med// sgra skad thams cad gsung yin te// brag cha bzhin du rang bzhin med// dran dang rtog pa thugs yin te// chu la ri mo bris pa bzhin// 'dzin pa rang rgyud yod ma yin// de ltar gzugs snang thams cad sku yi rol pa yin/ sgra skad thams cad gsung gi rol pa yin// dran rtog thams cad thugs kyi rol pa yin// de ltar ma shes mtshan ma rang rgyud 'dzin// de ni 'khor ba'i rol pa yin// gang zhig rnal 'byor rtogs ldan la// rgyan dang rol pa sna tshogs kun// sgyu ma'i dpe bzhin snang yang rang bzhin med// chos nyid chos sku mi snang rang bzhin yod// yod pas med par rtogs pas mtshan ma zil gyis gnon// med pas yod par rtogs pas rig pa rang sa zin// de yi ched du rgyan tika bkod pa bzhi ldan mdzes// kye kye gsang ba'i bdag po rgyan dang rol pa gar byung yang// ngas don gsal 'dir smras pa bzhin du shes par gyis/ zhes gsungs so// spros bral don gsal gyi rgyud chen po las/ rgyan dang rol pa bstan pa'i le'u ste bcu bzhi pa'o//// de nas yang gsang ba'i bdag pos zhus pa/kye kye bcom ldan rdo rje 'chang// des mtshon tshig rnams gsung du gsol// zhes zhus so// ston pas bka' stsal pa/ ngas bstan rgyud lung thams cad du// chos nyid ngang la chos sku gnas// de skad brjod pa'i tshig byung na// chos nyid la chos sku rgyas par bshad// rig pa'i mtshan nyid lngar bcad cing// de lnga ye shes lnga yi mtshan nyid dang// de yi gdangs su brjod pas na// chos kyi sku la ye shes brgyan par bshad// ye shes 'od lnga sku ru rdzogs lugs dang// rigs dang kha dog dbyibs brjod pa// ye shes dag la thugs rjes brgyan par bshad// rtsal dang rol pa rgyan dang mdzad spyod dang// rim par bkod dang du mar snang// pad+ma can dang mdzes dang sdug/ ma 'gags shar dang thugs dang stobs// snang srid rgyan du bkod pa dang// lung rnams rgyan du bkod pa dang// man ngag rgyan du bkod pa dang// 'gro drug rgyan du bkod pa dang// de rnams brjod pa'i tshig tu mang yang bsdus pa yin// zhes gsungs so// spros bral don gsal gyi rgyud chen po las/ rgyan dang rol pa'i tshig mdor bsdus nas bstan pa'i le'u ste bco lnga pa'o//// de nas yang gsang ba'i bdag pos zhus pa/ de mtshon dpe rnams ji ltar lags/ thabs la mkhas pas gsung du gsol// zhes zhus so// ston pas bka' stsal pa/nam mkha'i dkyil na nyi zla gsal bar gnas pa dang gcig/ rin chen gser la g.yu'i phra bcug pa dang gnyis// chos nyid chos sku'i brgyan pa'i dpe ru bstan/ rma bya'i sgo nga kha dog lnga ldan dang// man shes sku lnga 'od lnga mi 'gag pas// chos kyi sku la ye shes brgyan pa'i dpe// man shel rkyen 'phrad snang ba phyir 'byung dang// sgo nga'i byis phrug smin te phyir 'byung bya ba byed// nyi ma'i snying po 'od dang zer 'byung ba// ye shes dag la thugs rjes brgyan pa'i dpe// rgya mtshor chu bran 'phro zhing 'du ba dang// sgyu ma'i sbyor pas gzugs brnyan sna tshogs snang// yon tan ma 'gags rol pa cir yang 'byung// de yis dpe rnams mang yang bsdus pa yin// zhes gsungs so// spros bral don gsal gyi rgyud chen po las/ rgyan dang rol pa mtshon pa'i dpe bstan pa'i le'u ste bcu drug pa'o//// yul yangs pa chen po pad+ma bde gsal gyi grong khyer bya ba na/rgyal po nor bu 'od ldan zhes bya ba bzhugs pas/ khong la nor bu rin po che'i za ma tog chen po gcig rin po che phra mo mang pos bkang nas yod pa la khong phyi rol du zhabs 'chag cing yul gzigs su byon pa las/rgan mo ling tog can bya ba dang 'phrad nas/ rgan mos sla'o la brid/ rkun mo mi lngas bar du za ma tog brkus/ sme sha can gyi grong khyer drug tu mun pa'i mi drug la btsongs/ mun pa'i mi drug gis nor bu la mchod pa dang bkur sti chag/ nor bu la yang dgos 'dod ma byung/ khong yang yid cung the tsom zos so// phyis rgyal po la ldam po gcig byung// rgan mos sla'o la brid/ rkun ma mi lngas brkus/sme sha can gyi grong khyer drug tu mun pa'i mi drug la btsongs so byas pas/ rgyal po thugs nur te/ rgan mo bsad/ grong khyer drug bcoms mun pa'i mi drug la chab bsal/ rkun mo lnga bran du bkol/ nor bu rin po che dang phrad nas yul bzung ba'i man ngag/ badzra a haM rat+na/ dz+nyA na pany+tsa pra pa ra a haM b+hU ti/ de nas yang bcom ldan 'das snang ba rnam par bkod pa'i ting nge 'dzin la snyoms par zhugs so// de'i tshe gsang ba'i bdag pos zhus pa/kye kye bcom ldan rdo rje 'chang// gong gsungs rtsal dang rol pa de// ma rtogs gzungs 'dzin 'khrul par snang// 'khor ba rang rgyud rol par byung// de yi 'khrul lugs gsung du gsol// zhes zhus so// ston pas bka' stsal pa/ rigs kyi bu legs par nyon cig/ gzhi 'gyur ba med par ye nas sangs rgyas pa// bcom ldan 'das rdo rje 'chang chen po yin pas/ sngar yang 'khrul ma myong/ da lta yang ma 'khrul/ phyis kyang 'khrul mi srid do// dper na nyi ma'i snying po de la/ mun pa'i gzhi med pa lta bu'am/ man shel la rkyen dang gang 'phrad de la snang yang/ dag pa'i stobs kyis snang mod kyi/kho la 'byar dang gos pa med// de bzhin du phyogs su lhung ba med pa'i shes rab ni// mgon po gzhi nas rdzogs sangs rgyas// bag chags 'khrul pa ka nas dag/ ma 'khrul pa yi sangs rgyas la// 'khrul pa'i tha snyad ga la yod// 'on kyang de ltar ma rtogs te// nyi ma gcig las med bzhin du// yul khams re na nyi ma re// mthong ba'i rtobs kyis snang ba ltar// rang rig gcig las med bzhin du// 'khor 'das gnyis la du mar snang// sman dug ga bur dbyer med kyang// sman dang dug tu snang ba bzhin// gnyis med gzhi snang chen po de// gnyis med ngang las ma g.yos kyang// yon tan stobs kyis snang ba'o// du mar snang ba'i yon tan la// 'khrul par 'gyur bas yon tan skyon du 'char// gong ltar rtogs pas skyon nyid yon tan grol// 'on kyang 'khrul lugs rgyas par ngas bstan gyis// 'khrul pa'i gzhi dang rgyu dang dus// 'khrul pa'i rkyen dang 'khrul pa dngos// 'bring po rnams la ngas bstan nyon// dang po 'khrul pa'i gzhi bstan pa// de la yang ni rnam pa gsum// chos nyid yul gyi 'khrul gzhi dang// rig pa sems kyi 'khrul gzhi dang// 'od lnga lus kyi 'khrul gzhi bstan// dang po chos nyid ris med stong// bar du ye shes rnam par shar// tha mar 'dzin rtog bag chags bstas// de la snying po med bzhin snang// des ni yul gyi 'khrul gzhi bstan// da ni sems kyi 'khrul gzhi bshad// dang po rig pa 'gag med 'gyus// bar du gdangs la 'dzin pa skyes// tha mar sems kyi yid 'gyus pa// de las sems rtog du ma shar// sems kyi 'khrul gzhi der bstan to// 'dis ni lus kyi 'khrul gzhi bstan// dang po rig pa klong nas shar// bar du chos nyid klong du shar// tha ma de la bag chags pas// gzugs kyi phung po rdos bcas snang// lus kyi 'khrul gzhi des bstan to// kye kye gsang bdag nges par zung// gzhi gsum 'thad pa ngas bshad kyi// chos nyid yul gyi 'khrul gzhi 'thad// ci phyir rig med de la bem por snang// rig pa sems kyi 'khrul gzhir 'thad// ci phyir rig tsam phyogs mthun phyir// 'od lnga lus kyi 'khrul gzhir 'thad// kha dog dbyibs su phyogs mthun phyir// phra dang rag pa'i khyad par las// gzhi dang dngos kyi khyad par bstan// des mtshon tshig rnams ngas bshad nyon// 'khrul pa zhes su bshad pa dang// rig pa zhes su brjod pa dang// 'od zer zhes su brjod pa dang// bskal pa dang por brjod pa dang// thog ma zhes su brjod pa dang// 'das dang ma 'ongs gong rol nas// zhes pa dang/ nga med pa yi sngon rol na// sems can bya ba gdod nas med// sems can med pa'i sngon rol nas// 'byung ba chen po ye nas 'phags// 'byung ba med pa'i sngon rol nas// nam mkha' chen po ye nas 'phags// nam mkha' med pa'i sngon rol nas// chos nyid rnam dag ye nas 'phags// chos nyid rnam dag klong yangs nas// chen po lnga nyid ye nas rnam par dag/ chen po lnga yi snying po ru// nga nyid gcig pu sngon du byung// de phyir bskal pa 'bum khri 'bum stong sngon rol du// nga nyid gzhan pas snga bar byung ba'i phyir// zhes ngas bshad pa rnams ni/'bod skad kyis sdebs la 'khrul gzhir 'bru gnon/ rigs kyi bu zhib tu gzhi snang gi skabs su bstan pas 'dir ma brjod do// zhes gsungs so// spros bral don gsal chen pa'i rgyud las/yang dag pa'i gzhi la 'khrul pa med par bstan pa dang/ yon tan gyi snang ba 'khrul pa'i gzhi gsum bstan pa'i le'u ste bcu bdun pa'o//// de nas yang gsang ba'i bdag pos zhus pa/ kye kye ston pa rdo rje 'chang/'khrul pa'i rgyu ni gang gis byas// 'khrul pa'i dus tshod ji tsam lags// zhes zhus so// ston pas gsungs pa/ 'khrul pa'i rgyu ni ma rig pa// lhan cig skyes dang kun tu brtags/ ngo bo nges tshig dbye ba dang// mthun pa'i tshul du brjod tshigs bstan// rigs kyi bu ma rig pa'i ngo bo ni/ gti mug dang de ma yin la der 'dzin pa'o// nges tshig don la rmongs pa'i phyir na ma rig pa'o// dbye ba rnam gnyis te/ lhan cig skyes pa'i ma rig pa dang kun tu brtags pa'i ma rig pa'o// lhan cig skyes pa'i ma rig pa de gang las gang du lhan cig tu skyes nas gang gi gang ma rig ce na/ rigs kyi bu gang las zhe na/ gzhi 'dzin pa'i rig pa las so// gang dang gang zhe na/ lhan cig skyes pa'i ye shes dang ma rig pa'o// gang zhe na bcos pas ma bcos pa'i chos nyid kyi klong du ma rig pa'o// gang gi gang ma rig ce na/ rang bzhin gyi 'od byad lta bus gzugs brnyan gyi 'od byad kyi rnam pa me long la snang ba lta bu ma rig pa'o// don de lhan cig skyes pa'i ma rig pa ces bya'o// kun tu brtags pa'i ma rig pa ni/ yul la rtogs pa phra rags su skyes te/skad cig ma snga phyi'i tshul lo// dpe rgan mo long ma dang 'dra'o// kye ma rigs kyi bu/ ma rig pa de yang dag par yod pa ma yin/ 'o na ji lta bu zhe na/ tho yor ram thag pa la mi bden pa bzhin du rgyus med dam sngar sun pa'i mi la dgrar snang ba'am/snang ba ma dag pa las thag pa la sbrul du snang ba lta bu'o// de ni yang dag par med bzhin du snang/ snang bzhin du stong pa'o// rigs kyi bu dpe de bzhin du/ ma rig dngos su med la nyams su yod pa'o// de ci las byung zhen/ lus kyi tha ma rdzogs pas shes rab kyi rtsal ma rdzogs te/ shes rab kyi rtsal ma rdzogs pas mthong ba'i yul ye shes kyi rang gdangs lnga la shes pa'i dran pa ma sad do// de yang ma g.yos pa'i ngang kun tu bzang po las/ ngang gi rang bzhin ye shes kyi 'byung ba yul ma 'gags par snang ba la/ sngar mthong ma myong ba de las yid 'grogs te/ rang snang chen por rtogs pa'i mtha' ma chod do// rigs kyi bu ma rig pa'i gtan tshigs so// ma rig pa dang/ ma shes pa dang/ gti mug dang/ ma rtogs pa dang/ ma goms pa dang/ don ma mthong bas 'khrul pa dang/ phyin ci log pa la sogs pa byung yang ma rig pa gnyis su bshad/ces gsungs so// kye gsang ba'i bdag po 'khrul pa'i dus ni rang gi lus las shar ste 'dzin pa skye ba'i dus so/ zhes gsungs so// spros bral don gsal gyi rgyud chen po las/'khrul pa'i rgyu dang dus bstan pa'i le'u ste bco brgyad pa'o//// de nas yang gsang ba'i bdag pos zhus pa/ kye kye bcom ldan rdo rje 'chang/ 'khrul pa'i rkyen rnams gsung du gsol/zhes zhus so/ ston pas bka' stsal pa/ rigs kyi bu ngas bshad khyod kyis yid la zung/ rgyu dang rgyu yis rkyen du bstan// bdag po'i rkyen dang dmigs pa'i rkyen// mtshungs pa'i rkyen dang de bzhi'o// rgyu dang rgyu yis rkyen bshad pa'o// rgyu ni rig pa 'gag pa med/ rkyen ni chos nyid stong pa yin/ rig pa chos sku'i mtshan nyid ni/ rig stong dbyer med shes rab thogs pa med/ mthing ga dkar ser dmar dang ljang gu yis/so so'i mtshan nyid 'dzin cing rang rang rgyur gnas pa'i// chos nyid dag pa me long lta bur shar/ ye shes 'byung ldan nam mkha'i gzha' ltar yal/ de yi skad cig phyi ma la/ de las de bzhin byad dang gzugs brnyan bzhin// rang las byung ba'i rnam rtog bdag rkyen shar// de yi skad cig phyi ma la// dmigs pa'i rnam pa yul du snang// rkyen du 'dzin pa'i rtog pa byung// de la dmigs pa'i rkyen zhes brjod// de rnams mtshungs pas 'khrul rkyen byas// de la mtshungs pa'i rkyen zhes brjod// de dus gzung 'dzin rnam rtog gis// rang bzhin 'od lnga gsal ma nus// gzugs brnyan lnga la bag chags pas// mtsho la dar chags zho la spris chags ltar// gling bzhi ri rab gling phran snang// de yi bcud la srid pa'i sgo nga dang// rtsi shing sman dang me tog nags tshal 'khrungs// rlan dang drod las skyes pa yin// de ltar bar gyi bskal pa las// snod kyi 'jig rten logs su bskal// shes pas ma bzung rlan dang drod las skyes// mchog tu pad+ma'i sgo nga grub// u dum+Wa ra dag la brten// dri med ye shes brdzul nas skyes// 'byung ba lnga yi bdag nyid can// srid pa'i sgo nga ma dag ste// shed bu shed rigs de las skyes// chags sdang gnyis kyi bdag nyid can// de ni lus kyi rten yin no// zhes gsungs so// rigs kyi bu de la mtshon pa'i tshig bstan pa/dang po gzhi mtshon gong du byung// sangs rgyas sems can 'og nas 'byung// de gnyis bar du rtsal 'phro ba// bar gyi bskal par bshad pa yin// rang gi sa la gnas pas na// mi bskyod pa zhes de la bya// de ma yin la der 'dzin gyis// 'od lnga 'grib cing rig pa stongs// mi bskyod rdo rje yin par bshad// 'gro ma nus pas 'phye bo yin// ngo bo gsal la mi 'gog pa// dngos su gsal ma nus pa yin// mi gsal gsal ba'i bdag nyid can/ gzhi las 'phags zhing sems can sangs rgyas dngos ma yin/ bar na myu gu ji bzhin no// myu gu 'byung zhes de la bya// de bzhin ngas bstan rgyud lung du// gang byung de bzhin shes par gyis// zhes gsungs so// spros bral don gsal gyi rgyud chen po bshad pa'i rgyud bklags pas shes pa las/ 'khrul pa'i rkyen dang bar gyi bskal pa la yul gyi 'khrul pa lus kyi rkyen dang bcas pa bstan pa'i le'u ste bcu dgu pa'o//// de nas yang gsang ba'i bdag pos zhus pa/ snod kyi 'jig rten de ltar na/ bcud kyi rigs drug ji ltar chags/ zhes zhus so// ston pas bka' stsal pa/rigs kyi bu ngas bstan gyi ma nor bar zung zhig/ nam mkha' stong pa la ni rlung 'gyu bzhin// yid kyi rlung yang glang chen kun tu rgyug/ spyan gyi sbyor bas srid pa'i sgo nga mthong// thugs kyi sbyor bas srid pa'i sgo nga legs shing mdzes par mkhyen// zhal gyi sbyor bas de la chags sems skyes// rig pa yid dang bcas pa zhugs// sems kyi rtsa ba pho mo gnyis su smin// skye ba bzhi las sgo nga yin// gzhi la chen po lnga yis phung po lnga grub cing// rten las 'byung ba lnga yi cha rdzogs pas// phung po khams dang skye mched grub// shed bu shed las rab tu grags// de las mnga' las skyes pa byung// mi mjed 'jig rten rim par chags// nyon mong rags shing 'bras bu ngan// mtha' ma mnar med gnas la thug/ ces gsungs so// spros bral don gsal gyi rgyud chen po las/ nang bcud kyi grub tshul bstan pa'i le'u ste nyi shu pa'o//// de nas yang gsungs pa// kye kye rdo rje 'dzin pa khyod nyon cig/ nga yis rgyud lung thams cad du// bskal pa tha ma'i tshig brjod pa// tshogs brgyad ldan pa'i sems can yin// rgyu byed sbubs dang dbugs kyang bcas pa'i rtogs byed sems su bshad/ mang po 'dus pas phung po yin// 'dus pa'i phyir na de bzhin no// khams ni mtshan ma'i chos nyid can// mtshan ma bskyed phyir skye mched yin// so so dag gi sgo gsal zhing// rang rang yul la dbang byed dbang por bstan// gzugs ni kha dogs dbyibs su bstan// sgra ni rna ba'i yul du bstan// dri ni sna yi yul du bstan// ro ni lce yi yul du bstan// reg ni lus kyi yul du bstan// de yi phyir na de skad bshad// tshor ba du ma myong ba yin// 'du shes yul la mtshan mar 'dzin// 'du byed sems la g.yo bar byed// yid la byed pa dmigs pa ste// rig pa dag gis gang gcod pa'o// rnam shes rnam par rig pa'o// thams cad kun las byed phyir dang// rgyu rkyen las byung 'du byed yin// rlan las skyes pas glo bur yin// rdzogs par smin pas rdzus skyes yin// mnga' skyes rim par smin pa'o// sgo nga las skyes 'gyur te smin// dmyal ba gdung pa'i lam pa yin// yi dwags 'gog pa'i lam pa yin// byol song mun pa'i lam pa yin// mi yi lam ni 'dom pa yin// lha yi lam ni g.yeng ba'o// gnas pa'i phyir dang bgrod phyir lam// rkyen dang rten pa mi 'bral ba// 'khor dang mya ngan 'das pa'i lam// dmyal ba'i gnas na bzod dang ldan// yi dwags gnas na yid dang ldan// byol song gnas na myos pa dang// mi yi gnas na 'dod dang ldan// lha min gnas na rtsod dang ldan// lha yi gnas na dga' ldan no// rten pa'i don phyir gnas su bstan/ rigs kyi bu de dag gi rgyu ni nyon mongs pa ste/de yang rang rang sgra la 'jug pa'i rgyu mtshan dang/ don gyi bye brag so sor phye na las rgyu 'bras dang/ de kho na nyid kyi don ma shes pas ma rig pa'o// 'dod chags ni zhen pa'o// nga rgyal ni khengs pa'o// khong khro ba ni mnar sems pa'o// zhe sdang ni 'khrug pa'o// phrag dog ni mi bzod pa'o// de dag ni rgyu drug go/ de las ngo bo drug dang/ 'bras bu drug smin pa'o// kye gsang ba'i bdag po// de dag ni/'gro ba drug la da ltar gnas pa'i chos te/ rgyud gar byung yang bskal pa tha ma'i chos su 'dir bshad pa ltar shes par gyis shig/ ces gsungs so// spros bral don gsal chen po'i rgyud las/ 'byung ba lnga mdor bsdus nas bstan pa'i le'u ste nyer gcig pa'o//// de nas yang gsang ba'i bdag pos zhus pa/ 'khor ba rgyan dang rol par shar ba'i don de ltar lags na/ de ltar 'byung ba'i 'byung ba lnga bshad du gsol/zhes zhus so// ston pas bka' stsal pa// 'byung ba lnga yi ngo bo nges tshig dang// dbye ba dpe dang bcas pa rnams// ngas bshad khyod kyis yid la zung// ngo bo dbye ba'i sgo nas bstan/ 'byung ba'i dngas ma lnga dang snyigs ma lnga// dngas ma lnga yi ngo bo ni// mtshan nyid 'dzin pa'i ye shes lnga// snyigs ma lnga yi ngo bo ni// sa chu me rlung nam mkha' lnga// 'byu nga ba lnga yis nges tshig bstan pa ni// rig pa'i rtsal du 'char ba dang// rtsal las 'khor 'das snang ba'o// dbye na mu bzhir shes par bya// dngas ma snyigs ma rnam pa gnyis// re re la'ang de bzhin te// rigs kyi bu khyod legs par zung zhig/ 'byung ba'i dngas ma 'od lnga'o// snyigs ma sa chu me rlung ngo// dngas ma'i snyigs ma sha dang rus la sogs// snyigs ma'i dngas ma 'ja' tshon rnam pa lnga// dpe ni nyi ma'i 'od zer dang// man shel dag la 'od snang bzhin// zhes gsungs so// spros bral don gsal chen po'i rgyud las/ 'byung ba lnga mdor bsdus nas bstan pa'i le'u ste nyer gnyis pa'o//// yang gsang ba'i bdag pos zhus pa// kye kye bcom ldan rdo rje 'chang// snyigs ma dngas ma lnga las ji ltar shar// dngas ma 'byung ba'i mtshan nyid ji ltar lags// chos nyid don la sbyar na ji ltar sbyar// snyigs ma dngas mar grol na ji ltar grol// zhes zhus pas/ ston pas bka' stsal pa/rdo rje 'dzin pa nyon cig/ sa yi mtshan nyid sra ba yin// chu yi mtshan nyid gsher ba yin// me yi mtshan nyid tsha ba yin// rlung gi mtshan nyid yang zhing g.yo// nam mkha'i mtshan nyid yangs shing go 'byed pa'o// rang rang las kyang de bzhin dbye// dngas ma'i sa las 'od zer dkar po byung// de las snyigs ma sa ru snang// de bzhin dngas ma'i 'byung ba las// 'od zer rnam pa bzhi ru byung// de la snyigs ma bzhi ru snang// dngas ma'i snyigs ma'i mtshan nyid ni// sra ba med par brtan pa dang// gsher ba med par sdud pa dang// g.yo ba med par bskyod pa dang// tsha ba med par bsreg pa'o// khyab pa med pa'i gdangs can yin// chos nyid chos sku 'gyur ba med// dbyer med sra ba med par brtan pa'i sa// chos nyid chos sku gnyis med de// dag pa zang thal dri ma med// thams cad de yi ngang du 'dus// gsher pa med par sdud pa'ichu// chos nyid chos sku dbyer med de// g.yo ba med par thogs pa med// g.yo ba med par bskyod pa'i rlung// ma song gnas su phyin pa'o// chos nyid chos sku gnyis med pas// ye shes chen po rang gi gdangs la bzhugs// gzhan du snang ba'i rnam par rtog pa mi mnga' bas// tsha ba med par bsreg pa med// gzhan snang med par rang gsal ba// khyad par ye shes gdangs dang bcas// nam mkha' khyab pa med pas gdangs can yin// snyigs ma'i 'byung lnga 'od lnga'i nang du grol// 'od lnga dngas ma'i go ru thim// de bzhin rtags kyang rim par 'gyur// zhes gsungs so// spros bral don gsal chen po'i rgyud las/'byung ba'i mtshan nyid bstan pa dang/ shar lugs thim lugs don dang sbyar nas bshad pa'i le'u ste nyer gsum pa'o//// de nas gsang ba'i bdag pos zhus pa/ kye kye bcom ldan rdo rje 'chang// 'byung ba lnga la gnas pa la// bskal pa zhes su grags pa ste// de yi don bshad gsung du gsol// zhes zhus so// de nas yang ston pas gsungs pa/ kye kye rdo rje 'dzin pa nyon cig// bskal pa'i ngo bo bstan pa ni// dang po ye shes yul shar ba// shar bya shar byed ltar snang bas// dang po dus su chos nyid bskal// ngar du 'dzin pa'i rnam rtog gis// ye shes snang ba nang du nub// snod kyi 'jig rten bskal zhes bshad// mtha' ma bzung 'dzin gnyis su bskal// sangs rgyas sems can de bzhin bskal// nges tshig gtan tshigs bcas pa yin// dbye ba rnam pa gsum yin no// yun du gnas pa'i bskal pa'i sgra// zhes gsungs so// spros bral don gsal gyi rgyud chen po las// bskal pa gsum bstan pa'i le'u ste nyer bzhi pa'o//// nam mkha'i mthong nas snang gsal gyi sgron me shar bas/ mtshan mo mun pa sel ba'i man ngag/a badzra ha~M ma rat+na kA ya oM dz+nyA na ka la ba ga be ku la ya san tsa hU~M d+ha rma sa ra ke tu ha du ya A/ de'i tshe bcom ldan 'das rdo rje 'chang chen po// thugs rje 'byung ba sku gsum gyi dgongs pa la snyoms par zhugs so// de nas yang gsang ba'i bdag pos zhus pa/ kye kye bcom ldan rdo rje 'chang/ 'khor ba'i rol par shar ba de ltar na// de yi 'dul byed gnyis po ru// dag pa chos sku chen po las// sku gnyis rol pa ji ltar shar// zhes zhus so// ston pas bka' stsal pa/ thugs rje'i sku gnyis snang ba yang// nam mkha' lta bu'i chos nyid la// man shel lta bu'i rig pa gsal// nyi zer lta bu'i thugs rje byung// nad pa lta bu'i rigs drug la// mun pa lta bu'i gti mug pas// dug gsum nad rnams sel bar byed// ces gsungs so// yang gsang ba'i bdag pos zhus pa/ kye kye bcom ldan mgon po rdo rje 'od dpag med// chos sku gzhi snang chen po la// 'bras bu longs sku ji ltar rdzogs// zhes zhus so// ston pas bka' stsal pa// thugs rje sku gnyis snang ba yang// gdul bya rnams la shar bar bzad// rang las shes rab skur snang bar// mtshan mar bcas pa'i sku mi snang// ye shes rang rig chen po la// mtshan ma gzhan snang rnam rtog med// yang gsang ba'i bdag pos zhus pa/ kye kye ston pa thugs rje che mnga' bas// shes rab sku lnga gsung du gsol// zhes zhus so// ston pas bka' stsal pa/ rig pa gcig gis ngo bo las// thams cad 'char zhing snang ba'i phyir// kun snang chen po zhes kyang bya// rang rig yon tan ma 'gags pas// rang byung chen po zhes su bshad// thugs rje'i stobs dang ldan pas 'od dpag med// shes rab thogs pa med pas don yod grub// de nyid 'gyur ba med pas mi bskyod pa// stong pa rig pa gnyis med ye shes thogs pa med// shes rab sku lnga'i ngo bo yin// dbye ba yon tan sgo nas dbye// nges tshig shes rab la de ltar mkhyen pa ma 'gags pas shes rab kyi sku'o// yang na rang la shes rab ma 'gags la/gdul bya la skur snang ba'i phyir na yang de skad ces btags so// yang gsang ba'i bdag pos zhus pa/ rang la sku mi snang ba'i gtan tshigs ji ltar lags/ zhes zhus so// kye gsang ba'i bdag po legs par zung zhig/rang gi rig pa dngos med ye dag zang thal chen po yin/ de don rgyas par bstan pa ni// gzhan snang med pa'i rang bzhin gzhi// gzugs sku mtshan ma med pas rig pa dngos med yin/spyan gnyis dag nas ye shes spyan mnga' ye dag zang thal yin/ de'i gong na gzhan med pas chen por bshad/ ces gsungs so// spros bral don gsal chen po'i rgyud las/ chos sku las thugs rje gzugs sku gnyis 'byung bar bstan pa dang/chos sku nyid la rig par rang snang las sku gnyis med par bstan pa'i le'u ste nyer lnga pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// gdul bya zhes ni gang la bgyi// sku ru snang tshul ji ltar snang// zhes zhus pas/ ston pas gsungs pa/ gsang ba'i bdag po legs par zung zhig/ rnam dag stug po bkod pa yi// chos nyid chos skur dbyer med klong// ye shes rang gdangs bum pa lnga// ma 'gags pa yi myu gu snang// chos nyid dag pa'i snang cha lnga// mthings ga dkar ser dmar dang ljang// ma 'dres gsal ba'i ye shes rdzogs// de lnga'i nang nas sku lnga grub// phyogasabazhi dbus dang lngar gnas te// dbus ni kun snang ye shes la// bzhi po rnam snang kun tu zhal// mi bskyod rin 'byung chen po dang// 'od dpag med dang don grub chen por snang// phyag mtshan rang gi thugs la gnas// kha dog lnga yi bdag nyid 'dzin// gdan gsum ngang la yongs su rdzogs// gdul bya rigs bzhi'i sangs rgyas te// dag gtsang gsal ba'i me long la// byad kyi rnam pa shar ba ltar// mtshan rdzogs rdo rje 'chang gis ni// chos nyid dag pa'i snang ba la// mi bskyod rdo rje rin chen 'byung ldan dang// snang ba mtha' yas don grub shar// gdan gsum ngang la lhun gyis rdzogs// rang rang phyag mtshan thugs la gab// dbyer med rdo rje skyil krung bzhugs// ye shes lnga yi sbubs na gsal// rang rang so sor chos nyid chen po las// lnga po so so'i sbubs na gnas// re re la yang bzhi bzhis bskor// ye shes lnga rdzogs rtsal gyi mtshan nyid 'dzin// gnyis med yul lnga lus dang grib ma bzhin// thabs dang shes rab gnyis med zhal sbyor gnas// rnam snang zhal gzigs dgongs pa gzigs mkhyen yang// rnam snang rang las gzhan snang med// rang byung rang snang rang shar rang gi mkhyen// rang rtsal rtse gcig 'byed pa med// ces gsungs so// spros bral don gsal chen po'i rgyud las// shes rab kyis gdul bya la sku phyag rgyar gsal lugs dang gdul bya'i skur rdzogs shing mkhyen par shar ba bstan pa'i le'u ste nyer drug pa'o//// de nas yang gsang ba'i bdag pos zhus pa/kye kye bcom ldan rdo rje 'chang chen po// gnas dang gdan rnams gsung du gsol// zhes zhus so// ston pas bka' stsal pa/ gnas med gnas chen chos nyid rnam dag na/ ma bris dkyil 'khor 'gags med 'od du gsal// yang dag gsang ba'i dkyil 'khor mchog/ bzhugs gnas chen por der bshad do// der bzhugs gdan gyi khyad par gyis// rtags dang khyad par chos kyi gdan// rtags la rnam pa lngar bshad de// sku gsum 'du 'bral med pa'i rtags// rtsal gsum rdzogs pa seng chen gdan// sku gsum chos nyid ngang na gnas// mi 'gyur glang chen gdan du btings// dngos med brda' yin chos nyid ngang la bzhugs// sku gnyis chos nyid spyod pa'i rtags// bskyod pa'i shugs 'chang rta mchog gdan// mtshon pa'i brdar byed thugs rje'i shugs kyis bskyod// thugs rjes 'gro la mdzes pa'i don byed pas// mdzes pa rma bya'i gdan mchog bting// des mtshon dpe yis mthun par snang// rdzu 'phrul stobs kyis phrin las thogs med mdzad// de yi rtags su mkha' lding thogs med gdan// de rang ma yin chos mthun mtshon pa'i dpe// dngos su thugs rje rdzu 'phrul stobs dang ldan// thabs ma 'gags pa'i ye shes dang/ shes rab 'gyur ba med pa'i chos nyid las// gnyis med sku dang ye shes gsal// de rtags nyi zla rnam gnyis gdan// brjod mtshon sgra ste stong pa'i ye shes dngos// rang rig khong nas ye shar dri mas gos pa med// des mtshon pad+ma'i gdan te dngos med don la sbyor// zhes gsungs so// spros bral don gsal gyi rgyud chen po las/bzhugs gnas dang gdan bstan pa'i le'u ste nyer bdun pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// gdan gyi ngo bo nges tshig dang// dbye ba dpe rnams gsung du gsol// zhes zhus so// ston pas bka' stsal pa/ ngo bo chos nyid 'gyur med yin// bsdus pa de las med mod kyi// dbye ba'i sgo nas mtshon nas kyang// rtags kyi gdan la rnam pa lnga// khyad par gdan la rnam pa gnyis// chos nyid gdan la'ang de dang mtshungs// rang rang don gyi ngo las sbyor// nges tshig de la bzhugs phyir gdan zhes bya// dbye ba rnam pa gsum yin te// rtags dang khyad par chos dang gsum// de las phye bas gong ma bzhin// dpe ni rgyal blon gdan la bzhugs pa bzhin// zhes gsungs so// spros bral don gsal chen po'i rgyud las/ gdan gyi don bshad pa bstan pa'i le'u ste nyer brgyad pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// gdan la rdzogs pa'i gtso bo las// 'khor gyi snang ba ji ltar shar// tshom bu'i dkyil 'khor ji ltar lags// rjes 'jug 'khor la bshad du gsol// zhes zhus so// bcom ldan 'das kyis bka' stsal pa/ bcom ldan rdo rje mi bskyod las// sa snying byams pa g.yas dang g.yon// thugs rje thabs kyi sku ru shar// yum chen sangs rgyas spyan dag las// lA s+ya puSh+pe g.yas dang g.yon// thabs dang thabs kyi cha 'dzin las// shes rab shes rab cha 'dzin pas// re re la'ang gnyis gnyis snang// tshom bu'i dkyil 'khor gcig nang gsal// de bzhin rin chen 'byung ldan las// kun bzang nam mkha'i snying po gnyis// g.yas dang g.yon du shar cing gsal// mA ma kI las g.yas g.yon du// mA le d+hU pe gnyis su gsal// tshom bu'i dkyil 'khor chen po gcig/bcom ldan snang ba mtha' yas las// spyan ras gzigs dang 'jam dpal gnyis// ma 'gags g.yas dang g.yon na gsal// yum chen na bza' dkar mo las// gI tI ma dang A lo ke/g.yas dang g.yon du de bzhin gnas// tshom bu'i dkyil 'khor chen po gcig/ bcom ldan don yod grub pa las// phyag na rdo rje sgrib pa sel// g.yas dang g.yon du rnam par gsal// yum chen dam tshig sgrol ma las// nr-i tI gan+d+he g.yas dang g.yon// tshom bu'i dkyil 'khoram chen po gcig/ yab rnams kun tu bzang po la// yum rnams kun tu bzang mo'o// de yis kun bzang yab yum gsal// de rnams phyin ci log bzhi yi// mtha' gnyis las ni rab 'das shing// rtag chad mtha' bzhi rnam par dag/ bsnol ba'i sgo ba yab yum brgyad// yon tan rtsal rdzogs ma 'gags bzhi bcu gnyis// mtshan dang dpe byad ma lus rdzogs// thugs rje'i mdzad spyod rgyan dang rol par shar// rnam rtog mi mnga' cir yang sa ler mkhyen// ye shes lus la chos kyi spyan mnga' bas// mngon par rdzogs pa'i sangs rgyas rnam pa thams cad mkhyen// ma 'gags rang byung ye shes gsung ni 'gyur med yi ge drug/ thugs rje sprul skur bya ba'i gzhi ma 'gags// zhes gsungs so// spros bral don gsal gyi rgyud chen po las// longs sku'i 'khor bstan pa'i le'u ste nyer dgu pa'o//// de nas yang ston pas gsungs pa/ de yis mtshon pa'i tshig rnams bshad kyis legs par zung zhig/ rgyud dang lung du ngas bshad pa'i// longs sku zhes su 'byung na de skad bshad// dkyil 'khor zhes su 'byung ba dang// gtso 'khor zhes su 'byung ba dang// lnga ldan rdzogs ldan zhes su 'byung ba dang// de bzhin gshegs pa zhes pa dang// rigs lnga'i sangs rgyas zhes pa dang// sems pa sems ma zhes pa dang// 'od gsal rang snang zhes pa dang// mtshan rdzogs rdo rje 'chang gis zhes pa rnams// tshig don mang yang mdor bsdus bstan pa yin// sku la mtshan dpes rab brgyan pas// mtshan rdzogs rdo rje 'chang zhes so// 'bod skad thabs gsum don gyis khog sdebs la// longs sku'i snang ba de bzhin bshad// ces gsungs so// spros bral don gsal gyi rgyud chen po las/ longs sku mtshon pa'i tshig bstan pa'i le'u ste sum bcu pa'o//// de nas yang gsang ba'i bdag pos zhus pa/ ye shes sku ste rang byung ba// sangs rgyas sku lnga'i bdag nyid can// sum cu rtsa gnyis mtshan 'chang ba// longs spyod rdzogs sku sku yi rgyal// bzhi bcu rtsa gnyis 'od gsal ba'i// spyi yi mtshan nyid ji ltar lags// rang rang don la ji ltar sbyar// zhes zhus so// ston pa'i bka' rtsal pa/ spyi yi mtshan nyid bstan pa ni// mtshan nyid 'dzin pa'i ye shes lnga// byas pa med par rang byung bas// longs spyod chen po 'od kyi sku// grub tshul mtshon tshul bsdus pa yin// sangs rgyas sku lnga'i bdag nyid can// mtshan gyi rnam grangs gtso bor bsdus// rnam snang la sogs rigs lnga'i sku// me long nang gis gzugs brnyan bzhin// snang la rang bzhin med pa'i sku// thun mong mtshan dang ldan pa'i sku// sku re la yang yongs rdzogs pa'i// thun mong spyi yi mtshan dpe bstan// longs spyod rdzogs pa sku yi rgyal// sku yi rngams dang gzi brjid kyis// sprul sku'i mtshan ma zil gyis gnon// che ba'i yon tan mdor bsdus yin// bzhi bcu rtsa gnyis 'od gsal ba// rang rang lha yi don bshad na// sku gcig sku lngar gsal ba rnam par snang mdzad yin// de la 'gyur ba med pa mi bskyod pa// yon tan phyogs med 'byung bas rin chen 'byung ldan yin// dri mas ma gos thugs rje'i rtsal snang ni// 'od dpag med de pad+ma'i sku// gang la thogs med bdag gzhan don 'grub pas// phrin las mthar phyin don yod grub pa'i sku// yon tan chen po kun tu rgyas pa dang// shes rab rnam gnyis kun bskyod longs spyod pas// thugs kyi rang bzhin 'khor lo rtsibs brgyad pa// sku lnga ye shes lnga ldan mi 'gyur mi phyed pas// thugs kyi rang bzhin rdo rje rtse lnga gsal// ngo bo mi 'gyur rang bzhin mi 'gag par// thugs rje'i yon tan thams cad 'byung bas na// thugs kyi rang bzhin nor bu rin chen gsal// rang gis ngo bo dri med rnam dag pas// thugs kyi rang bzhin pad+ma 'dab brgyad gnas// thugs kyi dgongs pa mtha' bzhi las 'das shing// tshad med ye shes phrin las rnam pa bzhis// 'gro don ma lus rdzogs mdzad pas// thugs kyi rang bzhin rdo rje rgya gram gsal// yum ni ye shes snang ba ste// sku mdog phyag mtshan yab dang mthun// gnyis med ye shes 'od du gsal// ma bcos rang bzhin yongs la khyab pa'i dbyings// yum gyur kun tu bzang mo'i don// rang bzhin mi 'gyur ngo bo 'gag pa med// yum chen sangs rgyas spyan gyi don la sbyar// yon tan mdor bsdus rang bzhin mnyam par sbyar// yum gyur mA ma kI yi don la sbyar// yon tan smin byed rang bzhin kun dro bas// 'od kyi mdangs dang ldan pas dri mas ma gos so sor sbyor// yum gyi rang bzhin gos dkar mo dang sbyar// rang bzhin skye ba med cing mi ldog gnas su sgrol// mi 'da' 'gyur med ngang la gnas pas na// dam tshig sgrol ma zhes bgyi don la sbyor// zhes gsungs so// spros bral don gsal chen po'i rgyud las/ spyi'i mtshan nyid bstan pa dang/ rigs lnga yum lngar sbyor ba bstan pa'i le'u ste so gcig pa'o//// de nas gsang ba'i bdag pos zhus pa/ kye kye bcom ldan rdo rje 'chang// 'khor rnams don la ji ltar sbyar// zhes zhus so// ston pas bka' stsal pa/ kye kye rdo rje 'dzin pa/ 'khor gyi rnam grangs mang mod kyang// yab kyi cha 'dzin yab la sbyor// yum gyi cha 'dzin yum la sbyor// yab yum gang yang gong du sbyar ba bzhin// zhes gsungs so// de nas gsang ba'i bdag pos zhus pa/ kye kye bcom ldan rdo rje 'chang// 'khor rnams don du sbyar ba gsung bar zhu// zhes zhus so// ston pas bka' stsal pa/ mi bskyod chen po'i zhal gzigs pas// me long ye shes don rig pa// sa yi snying po don kyi mtshan// gsal ba'i rten gyur ma skyes byams pa'i don// gzigs pa'i rnam pa ma 'gags pas// de gnyis dus mtshungs lA s+ya puSh+pe'i mtshan// rin byung chen po zhal gzigs pas// mnyam nyid ye shes rig pa kun tu bzang// gsal ba'i rten gyur ma skyes nam mkha'i don// don gyi dri gsal mA le d+hU pe'i don// 'od dpag med kyi zhal gzigs pas// so sor kun rtogs ye shes don rig pa// spyan ras gzigs kyi don dang sbyar// gsal ba'i rten gyur ma skyes 'jam dpal don// skyes pa'i yum gyur gI tI ma// ye shes don rnams so sor bstan// ji ltar bskyed du mar me gsal// don grub chen po'i zhal mthong ba// bya grub ye shes lngar don yang gzigs pas// phyag na rdo rje'i don gyi mtshan// skye ba'i rten gyur ma skyes sgrib pa rnam par sel ba'i don// bskyed bya skyed byed dus des nr-i tI gan+d+he ma// brjod bya mang yang mdor bsdus pa'o// gnyis med dbyings dang ye shes kun bzang yab yum don// mtha' bzhi las grol bdud bzhi ngang gis bcom// phyin ci log las grol ba'i sgo ba bzhi// ye shes tshad med bzhi yi don mdzad sgo ma bzhi// sku lnga ngo bo nyid kyi sku dang drug/ ma 'gags thub pa drug gi don dang sbyor// zhes gsungs so// spros bral don gsal chen po'i rgyud las// longs sku'i 'khor gyi don ngo bo la sbyor ba bstan pa'i le'u ste so gnyis pa'o//// de nas yang gsang ba'i bdag pos zhus pa// kye kye bcom ldan rdo rje 'chang// longs sku shar lugs de ltar na// sprul pa sku yi zhing khams 'dir// ston pa byon lugs ji ltar lags// sbrul pa'i sku rnams ji ltar shar// zhes zhus so// kye kye rdo rje 'dzin pa nyon cig/ chos sku'i 'od gyur longs sku bzhi bcu gnyis// de yis gsung las rol pa'i sprul sku rnams// gdul bya drug la so sor 'chams par bshad pa'o// zhes gsungs so// yang gsang ba'i bdag pos zhus pa/ ston pa byon gzhi de ltar na// sku yi 'khrungs rten gang zhig gis// rtogs pa'i shes rab ji ltar skyes// zhes zhus so// ston pas bka' stsal pa// pha dang ma la ma rten par// bung ba me tog 'dzin pa ltar// u dum wa ra'i me tog la// rig pa'i ye shes las zhugs brdzus nas skyes// zhes gsungs so// yang bka' stsal pa/ rdo rje 'dzin pa nyon cig/ ngas len ma myong ba'i lus blangs pas// mthong ma myong ba'i yul gnyis mthong// shes ma myong ba'i gtam cig shes// brjod ma myong ba'i tshig cig brjod// de tshe rtogs pa'i shes rab skyes// zhes gsungs so// yang zhus pa/ rtogs pa'i shes rab ji ltar skyes// zhus so// nga yi chos sku dag pa las// thams cad mkhyen pa'i ye shes shar// longs sku ma bskyed lhun rdzogs pas// rnam pa thams cad mkhyen par shar// nga rang sprul pa'i sku yin pas// chos rnams rang byung chen por shar// nga yi gzhi la dbang bzhi rdzogs// chu bo chen po bzhi ru bcas// de'i tshe rang dbang ngang gis thob// thugs rje'i sgo lnga ma 'gags pas// gdul bya'i zhing dag thugs rjes zin// yid kyi rnam shes rang byung bas// shes rab 'byung ba'i gzhi ma 'gags// lce yi rnam shes sprul pa'i sku// tshig rnams rang rang don la sbyor// zhes gsungs so// spros bral don gsal gyi rgyud chen po las/ sprul pa'i sku ji ltar 'jig rten du byung tshul bstan pa'i le'u ste so gsum pa'o//// de nas yang gsang ba'i bdag pos zhus pa/ kye kye ston pa rdo rje 'chang// sku gsum gyi don bshad gsung du gsol// zhes zhus so// ston pas bka' stsal pa/ chos sku'i ngo bo ni phyogs lhung med pa'i shes rab dang gnyis su med pa'o// longs sku'i ngo bo ni/ mtshan nyid 'dzin ba'i ye shes gsal ba la mi rtog pa'o// sprul pa'i sku'i ngo bo ni/ thugs rje ma 'gags pa'o// chos sku'i nges tshig ni khyab pa dang rten byed pa'o// longs sku'i nges tshig ni/ zhing dag pa dang 'khor smin pa dang longs spyod pa'o// sprul sku'i nges tshig ni ma 'gags pa'i thugs rje sna tshogs par sprul pa'i phyir sprul sku'o// yun thung ba'i phyir sprul sku'o// mthun par snang ba'i phyir sprul sku'o// ma nges par snang ba'i phyir na sprul sku'o// chos sku la dbye na gsum ste/ rig pa ngos bzung bral zhing mi 'gyur bas/ chos sku'i chos sku'o// rig pa shes rab kyis sku la mkhyen pa ma 'gags pas chos sku'i longs sku'o// gdul bya la snang ba'i sku lnga ni/ chos sku'i sprul sku'o// rigs kyi bu de la ni ngo bo rang bzhin thugs rje gsum zhes kyang bya'o// gzhi la gnas pa'i sku gsum zhes kyang bya'o// 'bras bu gzhi la grub pa zhes kyang bya'o// sku gsum ja log chen po zhes kyang bya'o// 'bras bu'i ngang la gnas pa zhes kyang bya'o// longs sku'i chos sku chen po ni rnam par snang mdzad chen po'o// longs sku'i longs sku rigs bzhi'o// longs sku'i sprul sku ni sems pa dang sems ma'o// de rnams la mtshan gyi bye brag ni/ 'bras bu mngon du gsal ba zhes bya'o// sku gsum rnam par bzhag pa zhes bya'o// longs sku'i sku gsum mo// sprul sku'i sku gsum ni/rigs bzhi chos kyi sku'o// sems dpa' sems ma longs sku'o// thugs rje'i 'od zer sprul pa'i sku'o// kye sems dpa' chen po de la ni thugs rje 'byung ba'i sku gsum zhes kyang bya'o// sku gsum mtha' la bskyal ba zhes kyang bya/de rnams rdo rje sems dpa'i thugs la gnas shing/ ston pa'i don mdzad pas 'gro ba 'dul ba'i sku gsum zhes bya'o// kye gsang ba'i bdag po nges par zung zhig/ nga rdo rje'i sems pa ni sprul sku'i chos sku'o// nga yi dbu yi tho tshugs dang/ mdzod spu'i bu ga dang/ shangs kyi sgrom la sogs pa rnams nas sku 'jam dpal dri med snying po la sogs pa rnams ni sprul sku'i longs sku'o// thub pa drug dga' rab rdo rje la sogs pa rnams ni sprul sku'i sprul sku'o// zhes gsungs so// spros bral don gsal chen po'i rgyud las/ sku gsum bye brag bstan pa'i le'u ste so bzh-i pa'o//// de nas yang gsang ba'i bdag pos zhus pa/kye kye bcom ldan rdo rje 'chang// de mtshon tshig rnams gsung du gsol// zhes zhus so// ston pas bka' stsal pa// kye gsang ba'i bdag po/ ngas bstan rgyud lung thams cad du/ngo bo nges tshig dbye ba rnam grangs gang byung yang// ngas bstan gong bzhin shes par gyis shig/ yang gsang ba'i bdag pos zhus pa/ rnam grangs don rnam gsung du gsol// zhes zhus so// ston pas bka' stsal pa/ngo bo ni ma byas pa/ ma bcos pa/ ma slad pa/ mi 'gyur ba rang bzhin rnam par dag pa/ 'dus ma byas pa'i yeshes chen po// nam mkha'i lta bu'i chos nyid/ stong pa rdo rje'i chos can/ rig pa dngos med ye dag zang thal chen po'o// rang bzhin ni gzhi gnas kyi ye shes chen po la/ mtshan nyid 'dzin pa'i ye shes lnga/ ma 'gags par ngo bo nang na 'od gsal ba'o// thugs rje ni snying po sku lnga/ phyag rgya mi 'gags par gsal ba'o// rigs kyi bu ngo bo chos kyi sku/ rang bzhin longs sku/ thugs rje sprul sku ste/ thams cad kyi gzhi ma 'gags par gnas pas gzhi gnas kyi sku gsum mo// rgyu dag pa chos kyi sku la/ 'bras bu dag pa chos nyid gzugs sku gnyis nang gsal du gnas pa ni/yon tan du grub pa ste/ gzhi la grub pa'i sku gsum zhes bya'o// sku gsum ja log zhes bya ba ni/ mtshan nyid sde gsum las ja log ste/ 'dus byas kyi chos ka nas dag pa'i rang byung gi ye shes lhun gyis grub pa'o// sngags phyi pa las ja log ste/ rigs lnga gdul bya la snang bas sprul pa ste/ longs sku la sprul sku ja log go// rdzogs pa chen po la sogs pa phyi thun mong las ja log ste/bdag gis ma bsgoms mi bsgom bdag nyid chen po'i dgongs pa dang mi 'bral bar gnas so// 'dug tshul ja log ste/ chos sku gzugs sku gnyis kyi bdag med bsam 'das kyi sku yin pas/chos sku ja log go// longs sku sprul skur ja log cing/ sprul sku longs skur ja log pas na ja log go// rigs kyi bu des na longs sku man chad nas ltos pa'i brjod tshig go// de la byed pa med par rang bzhin gyis de ltar gnas pas na chen po'o// sku gnyis rang gi gzhi'i ngang la gnas shing 'bras bu'i ngang la gnas pas na/ don 'gyur ba med par gnas so// kye gsang ba'i bdag po rnam snang la longs sku'i chos skur bzhag pa ni/rnam snang la rigs bzhi 'byung zhing rnam snang gi yon tan gyis khyab pa ste/ rigs bzhi'i gzhi 'am shes byar gyur pa'o// rigs bzhi yang yang rnam snang gis thugs rnam par dag pa la longs spyod mar 'khor du smin pas sems dpa' dang sems ma la thugs rje spyod pa'o// des na rigs bzhi longs sku'o// de las thugs rje bye brag mi 'dra bar mkhyen pas sems dpa' sems mar sprul pa'o// de bzhin chos sku sku gsum gyi bzhag lugs dang sprul sku sku gsum gyi bzhag lugs kyang shes par bya'o// sku'i che ba yongs su rdzogs te gdul bya 'khor smin pa rnams la mngon par snang bas/'bras bu mngon par gsal ba'i dus shes par bya'o// thugs kyi mkhyen pas yar chos skur gsal zhing/ spyan gyi sprul pas mar sprul skur gsal te/ bar na sku mchog gsal bas na/ rnam par bzhag pa'o// chos kyi spyan gyis rnam rtog mi mnga' bas gzigs la zhal gyi bar nas yi ge drug gis 'od 'phro bas/ 'dzam bu gling bye ba phrag brgya na rdo rje sems dpar gsal zhing/ 'gro drug spyi'i snang na thub pa drug gnang bas/thugs rje 'byung ba'i sku gsum ni/ thugs rje 'byung lugs par pa nas 'byung ba'i phyir ro// des sems can gyi don dngos mdzad pas sprul pa'i sku ste/ 'gro ba 'dul ba'i sku gsum mo// ma 'gags pa sprul ba'i sku ste/rtsal lam thugs rje de ltar snang ba'o// de nas chos sku zhes pa dang/ longs sku zhes pa dang/ thugs rje zhes pa dang/ sprul pa'i sku zhes pa dang/ mgon po zhes pa dang/ dpal zhes pa dang/skyabs zhes pa dang/ ston pa zhes pa dang/ 'jig rten gyi sgron ma zhes pa mdor bsdus nas bstan pa'o// zhes gsungs so// spros bral don gsal gyi rgyud chen po las/ sku gsum mtshon pa'i tshig dang sku'i rnam grangs bstan pa'i le'u ste so lnga pa'o//// de nas yang gsang ba'i bdag pos zhus pa/ sku gsum ye nas sangs rgyas pa'i// sangs rgyas ngo bo nges tshig dang// dbye ba rnam grangs gsung du gsol// zhes zhus pas ston pas bka' stsal pa/ sangs rgyas kyi ngo bo dri ma med pa'i ye shes so// nges tshig ni nyon mongs pa'i dri ma dag cing/ mkhyen pa'i ye shes rgyas pas na'o// dbye na gnyis te gzhi lhun grub dang/rtogs pa mngon gyur zhes bya'o// de la ni gong gi gzhi de'i mtshan dang ldan pas na/ sangs rgyas zhes bya'o// chos sku las longs sku mched cing/ des sprul skur ston pa ste/ sprul skus 'gro ba la 'chad pa'i phyir na ston pa'o// rtogs pa'i shes rab kyis log par rtogs pa'i bdud bcom ste/ mkhyen pa'i stobs dang ldan zhing/ gzung 'dzin gyi mtha' las 'das pas na bcom ldan 'das so// de ltar mkhyen pas rtogs pa bdag gis dpal lo/kun gyi don byed cing 'chad pas na thugs rje gzhan gyi dpal lo// 'gro ba'i ma rig pa'i mun pa sel pa'i sgron ma'o// zhes gsungs so// spros bral don gsal chen po'i rgyud las/sangs rgyas kyi ngo bo nges tshig dbye ba dang/ mtshan mdor bsdus nas bstan pa'i le'u ste so drug pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// chos sku'i bdud 'joms ji ltar lags// longs sku'i 'dud 'joms ji ltar lags// sprul sku'i bdud 'joms ji ltar lags// zhes zhus so// ston pas bka' stsal pa/ chos sku 'gag pa med pas 'chi bdag gi bdud bcom/mtshan ma med pas phung po'i bdud bcom/ de gnyis su med pas nyon mongs pa'i bdud dang lha'i bu'i bdud bcom/ de ni ngang gis bcom pa yin/ srog med sku lngas 'chi bdag gi bdud bcom/ye shes sgyu mas phung po'i bdud bcom/ sems rtog med kyis nyon mongs pa'i bdud dang lha'i bu'i bdud bcom/ chos sku don ldan rtogs pa'i 'chi bdag gi bdud bcom/ rdo rje sems dpa' sprul pa'i sku'i don ldan rtogs pas nyon mongs bdud dang lha'i bu'i bdud kyang de bzhin bcom/longs sku'i don ldan rtogs pa'i phung po'i bdud kyang bcom/ zhes gsungs so// yang gsang ba'i bdag pos zhus pa/chos sku'i ldan lugs ji ltar lags// longs sku'i ldan lugs ji ltar lags// sprul sku'i ldan lugs ji ltar lags// zhes zhus so// ston pas bka' stsal pa/ chos sku yon tan sgo yangs pas// ye shes lnga dang sku gnyis ldan// longs sku mtshan dang dpe byad ldan// dgongs pa ye shes lnga dang ldan// mngon par shes pa'i chos drug ldan// sprul sku cho 'phrul rdzu 'phrul ldan// zur tsam bsdus nas bstan pa yin// yang gsang ba'i bdag pos zhus pa/ sku gsum 'das lugs ji ltar lags// zhes zhus so// ston pas bka' stsal pa/ chos sku mtha' rnams kun las 'das// longs sku gzung 'dzin 'khor ba'i chos las 'das// sprul sku shes rab chen po thugs rje'i thabs ldan pas// 'khor 'das gnyis ka'i mtha' la mi gnas 'das// 'das lugs mang yang bsdus nas bstan pa yin// zhes gsungs so// yang gsang ba'i bdag pos zhus pa/chos sku'i sangs rgyas ji ltar lags// longs sku'i sangs rgyas ji ltar lags// sprul sku'i sangs rgyas ji ltar lags// zhes zhus so// ston pa'i bka' stsal pa/ chos sku mtshan ma'i chos gnyis su snang ba thams cad sangs// rang gsal gnyis med ye shes rgyas// longs sku 'khor ba'i chos rnams sangs// rnam pa thams cad mkhyen nyid dang// sku yi che ba'i yon tan rgyas// sprul pa'i sku yi ma rig pa dang// logs par lta ba thams cad sangs// 'khor ba 'khrul ba'i snang ba sangs// shes rab thabs dang thugs rje rgyas// zhes gsungs so// yang gsang ba'i bdag pos zhus pa/ sku gsum dri ma ji ltar dag/ston pas bka' stsal pa// chos sku ngo bo nyid kyi dri ma dag/ longs sku shes bya'i dri ma dag/ sprul sku nyon mongs dri ma dag/ ces gsungs so// spros bral don gsal rgyud chen po'i rgyud las/ sku gsum gyi bcom ldan 'das sangs rgyas dang dri ma dag tshul bstan pa'i le'u ste so bdun pa'o//// de nas yang gsang ba'i bdag pos zhus pa// sku gsum thugs rje ma 'gags pas// 'gro don mdzad tshul ji ltar lags// ston pas bka' stsal pa/ rigs kyi bung dang po byis pa lo brgyad lon pa'i tshad du skyes so// de nas lo brgyad kyi bar du shes rab kyi srog shing la ye shes lnga'i 'khor lo bskor nas/ rtogs pas bdag bsgral te/dgongs pa nyid la nyid 'grel lo// de nas lo brgyad kyi bar du sprul pa mang du phyung nas 'gro ba'i don byas te/ lha gnas dang por 'khor rnams kyi sdug bsngal gyi gdung pa bsal te/ rin po che'i dar skud la mu tig gi phreng ba brgyus nas 'khor lo phyir bskor te/thugs rje gzhan bsgral ba'i phyir/ ldem po'i don la dgongs nas theg pa thun mong rnams bshad do// de nas yang me ri 'bar ba'i rtse mo la sangs rgyas kyi bden pa nges par mthong nas/snang ba stong pa'i chos rnams bshad do// de nas bya rgod phung po'i ri la/ rgyud chen po gsang ba rmad du byung ba rnams thugs las bkrol/ mgur gyi bum pa la 'dril/ljags kyi pad+ma la bskyon/ yon tan rnam pa lnga'i rnam par shes pas bkrams/ rig pa'i khu byug gsung dbyangs yan lag drug cu dang ldan pa gcig tu bshad de/ 'khor gyi blo'i the tshom dang spros pa bcad do// lo nyi shu rtsa bzhi na mya ngan las 'da' khar zhal chems rnam pa gsum bshad do// rjes 'jug gi don du spros bral don gsal dang gcig/ gcig shes kun grol dang gnyis/ rin chen kun 'dus dang gsum bshad do// nga'i rjes su ni 'jug la nga dang phrad pa'i skal ba med pa rnams kyi don du bzhag pa'o// nga'i sku gsum gyi gdung rten de bzhin du bzhag nas/ nga yongs su mya ngan las 'das so// zhes ma 'ongs pa'i don du de skad smros shig/ces gsungs so// spros bral don gsal chen po'i rgyud las/ sprul sku'i don 'dzad lugs bstan pa'i le'u ste so brgyad pa'o//// de nas yang ston pas mtshon pa bsam gyi mi khyab pa'i dgongs pa la bzhugs so// de'i tshe yang gsang ba'i bdag pos zhus pa/ kye kye bcom ldan thabs kyi bdag/ ldem po'i don la dgongs pa yi// theg brgyad don rnams gsung du gsol// zhes zhus so// rin po che mchod rten bang rim dgu pa'i steng nas ston pa g.yu'i bya khu byug skad lan bzhin 'don pa'i man ngag/ swA hA sarba yA na pra sa ra ya dus ya/ ston pas bka' stsal pa/ kye kye gsang ba'i bdag po legs par zung zhig/nga dang nga yi sprul pa yis/ thun mong spyi dang khyad par gyi 'khor gdul bya rnam pa gnyis la/ ldem dgongs su bstan pa'o// ldem po'i lta ba 'di ltar te// nyan thos rang rgyal sems dpa' dang// kri yog sde gsum bskyed rdzogs gnyis// bden pa phyogs re nas bzung nas// gza' gtad bcas pa'i lta ba brgyad// blo yul gnyis kyi mur 'dzin pas// rang rig ye shes la ma zlos// de bas phyin ci log pa yin// don las nyams dang gol ba'i phyir// zhe 'dod blo yi lta ba yin// kye gsang ba'i bdag po zhe 'dod chas pa'i lta ba brgyad/ gang zag bdag med rtogs kyang chos kyi bdag ma spangs// chos kyi bdag ni gzung 'dzin gnyis su snang// 'dzin pa'i rgyun rtog skad cig 'gags// rtags chad gnyis las 'das par blta// dper na chu bo gad+gA bzhin// gzung bya kun rdzob rnam par gsal// don dam rdul phran rdzas su 'dod// dper na g.yag rnga ne seng bzhin// mdo sde bye brag gnyis su 'dod// nyan thos zhe 'dod yin pas na// gnyis med bde chen don dang 'gal// gang zag bdag med gang mthun nges rtogs la// chos kyi khams la phyogs gcig bdag med lta// de gnyis mtshan mar nges 'dzin pa// rang rgyal zhe 'dod lta ba yis// gnyis med bde chen don las nyams// bdag gnyis bral bar blta zhing bden gnyis tshul du 'dod// don dam sems su blta ba dang// kun rdzob skur pa mi 'debs pa// dper na rmi lam smig rgyu bzhin// byang chub sems dpa'i lta ba yin// gnyis med ye shes don las gol// mi rtog skye 'gag med pa'i ngang las ma g.yos kyang// sems dpa' rnam gnyis rje dang bran du blta// kri yA'i lta ba zhe 'dod dang bcas pas// kun bzang bde chen don dang 'gal// mi rtog ngang las ma g.yos skye 'gag bral bzhin du// sems dpa' rnams gnyis spun dang grogs por blta// u pa yo ga'i 'dod pa yis// dbyer med ye shes bde chen don las 'gal// ma skyes 'gag pa med cing mi rtog g.yo ba med bzhin du// khams dang skye mched lha dang lha mor blta// ma hA zhe 'dod mtshan mar 'dzin// spros bral bde ba chen po'i don las gol// ma g.yos mi rtog skye 'gag med bzhin du// dbyings dang ye shes lha dang lha mor 'dzin// a nu'i zhe 'dod lta ba yin// dngos med zang thal rang snang bde chen don las gol// zhes gsungs so// spros bral don gsal chen po'i rgyud las// theg pa brgyad kyi grub mtha' bstan pa'i le'u ste so dgu pa'o//// de nas yang gsang ba'i bdag pos zhus pa/ kye kye ston pa rdo rje 'chang// theg pa brgyad du de ltar gsungs pa de// dgongs pa nyams su ji ltar len// zhes zhus so// ston pas bka' stsal pa/ rdo rje 'dzin pa legs par zung zhig/ dmigs gtad bcas pa'i bsgoms pa brgyad// rtsol ba'i blo yis yul bzung nas// nyan thos theg pas 'di ltar bsgom// rang lus rdos bcas phung po la// mi gtsang rdzas su 'du shes bskyed// rnam par sngo dang bam pa dang// rul ba myags par bsgom pa ste// gzugs phung zhen pa'i mtha' las bzlog/ zhi gnas yan lag bcu gnyis ldan// tshogs drug yul dang rtog pa spang// rang rgyal 'dod pa 'di ltar bsgom// dang po ma rig la sogs nas// mtha' ma rga shir thug par bsgom// rang gi dpral bar sems gtad de// keng rus dkar po mtheb longs tsam// de la sems zin brtan pa dang// de las mched nas keng rus blta// de nas rim par 'gag par bsgom// byang sems 'dod pa 'di ltar bsgom// de yang blo yis 'dod pa yis// sems tsam sems nyid rang gsal bsgom// dbu ma bden pa dbyer med nam mkha'i dkyil ltar bsgom// kri ya'i 'dod pa 'di ltar bsgom/ stong pa'i lha tshogs sngon song nas// rigs gsum phyag rgya ldan par bsgom// yo ga'i zhe 'dod 'di ltar bsgom// byang chub rnam lnga sngon song nas// sum cu rtsa bdun phyag rgya bzhi dang ldan par bsgom// ma hA yo ga'i bsgom pa ni// ting 'dzin rnam gsum sngon song nas// zhi khro rab 'byams bsgom par byed// phyag rgya bzhi ldan bsgom pa'i mchog// a nu yo ga'i zhe 'dod bsgom pa ni// snying po brjod pa sngon song nas// phung po lha yi phyag rgya bzhi// dper na chu las chu bur dang// tshwa tshwa brkos phor nang nas bton pa bzhin// skad cig ma la gsal bar bsgom// bsam tan yan lag sngon song nas// dngos gzhi bye brag de ltar bsgom// dgos ched mthar phyin 'bras bu thob// ces gsungs so// spros bral don gsal chen po'i rgyud las/ theg pa brgyad kyi bsgom pa bstan pa'i le'u ste bzhi bcu pa'o//// de nas yang gsang ba'i bdag pos zhus pa/ rang rang don la bsgom dus su// spyod pa'i bye brag ji ltar spyad// ces zhus so// ston pas bka' stsal pa/ gsang ba'i bdag po legs par zung zhig/ theg brgyad rang gi spyod pa bstan// sdug bsngal rtsol bsgrub bcas par spyod// spyod pa blang dor med par ma rtogs pas// thun mong ma yin blang dor spyod// nyan thos spyod pa'i khyad par ni// ma byin len dang mi tshangs spyod// srog gcod rnam par spang pa ste// lus kyi spyod pa rnam par dag/ ngag gi spyod pa dag pa ni// rdzun dang ngag 'khyal phra ma dang// zhe gcod tshig rnams med par spyod// yid kyi spyod pa dag pa ni// brnab sems gnod sems log lta bral ba yin// dge bcu rnams ni rang gi don du spyod// rang rgyal ba yi spyod pa ni// rdzu 'phrul ya ma zung 'ga' yis// 'gro don shas tsam spyod par byed// byang chub sems pa'i spyod pa ni// tshad med bzhi dang bsdu ba bzhi// gtso ru gzhan gyi don du spyod// kri ya pa yi spyod pa ni// phyi nang rdzas gsum dag par spyod// yo ga dag gi spyod pa ni// phrin las rnam pa bzhi dag dang// kho na nyid bzhi spyod par byed// ma hA yo ga'i spyod pa ni// thabs dang shes rab gnyis sgo nas// 'gro don mtha' ru phyin par spyod// a nu yo ga'i spyod pa'i gnas skabs ni// gnyis su med pa'i tshul gyis su// dbyings dang ye shes rnam pa gnyis// gnyis med gcig la yongs su spyod// ces gsungs so// spros bral don gsal gyi rgyud chen po las/ theg pa brgyad kyi spyod pa bstan pa'i le'u ste zhe gcig pa'o//// de nas yang gsang ba'i bdag pos zhus pa/ ston pa thugs rje thabs kyi bdag/de yis 'jug sgo bsrung mtshams dang// sgrub pa'i thabs rnams ji ltar lags// so so'i 'bras bu ci ltar smin// zhes zhus so// ston pas bka' stsal pa/ rdo rje 'dzin pa nges zung zhig/zhugs nas de yi don spyod pas// so so'i 'jug sgo spyod par bsdu// lta ba'i don las mi 'da' bas// so so'i dam tshig lta bar bsdu// so so'i lta ba goms pas bsgrub pa'i mchog/ de la de nyid der bsdus pa'o// theg pa so so'i 'bras bu ni// lta ba mngon du gyur pa 'bras bu'i mchog/ nyan thos dag gi 'bras bu ni// lta sgom spyod pa mthar phyin pas// 'bras bu zung bzhi ya brgyad smin// rang rgyal dag gi 'bras bu yang// lta sgom spyod pa mthar phyin pas// dgos pa 'bras bu rnam gnyis thob// dper na ne tso bse ru bzhin// byang sems dag gi 'bras bu yang// lta ba sgom pa spyod pa rnams// mngon 'gyur sa bcu rim sbyangs nas// kun du 'od la gnas par 'dod// kri ya'i 'bras bu rdzogs pas ni// rang gi lta sgom dogs chod pas// rigs gsum sku gsum ngo bor 'dod// rdo rje 'dzin pa'i sa non pa'o// yo ga dag gi 'bras bu ni// lta sgom spyod pa'i byin rlabs kyis// sum cu rtsa bdun mngon rdzogs te// sku gsum rang bzhin lhun gyis grub// ma hA yo ga'i 'bras bu ni// lta ba la sogs mngon gyur nas// phyag rgya chen por mngon rdzogs pas// bcu gcig kun tu 'od kyi sa la mngon par 'grub/ a nu dag gi 'bras bu yang// lta ba dag gi dgos pa ni// rdo rje sems dpa' mtshan yongs su rdzogs pa'i sa mnon nas/ ma chag pad+ma can gyi sa la gnas/zhes gsungs so// spros bral don gsal chen po'i rgyud las/ theg pa so so'i 'bras bu dang/ 'jug sgo bsrung mtshams sgrub thabs gsum lta sgom spyod pa'i bsdu thabs bstan pa'i le'u ste zhe gnyis pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// theg brgyad lta sgom spyod pa dang// 'bras bu mthar phyin de ltar na// a ti'i don la 'jug pa yi// man ngag rim pa ji ltar lags// 'gro ba sems can thams cad la// sku gsum ye shes rnam pa lnga// rang la rang chas yod pa la// gang zag lam du zhugs pa rnams// kun gyi mi rtogs ji ltar lags// phyi yi yul nyid chos nyid la// gzhan gyi sgrib pa med pa ste// mthong ba med pa ji ltar lags// rdo rje 'chang gis bshad du gsol// de skad ces ni zhus pa las// rdo rje 'chang gis bka' stsal pa// nyon cig gsang bdag zhu ba po// sku gsum ye shes lnga yi don// ngo bo gcig la mtshon tshul phye// de don gcig tu dril ba ni// rang rig chos kyi sku ru 'dus// rang rig rtogs par bya ba'i thabs// dus gsum sangs rgyas kun gyis kyang// brgyad khri bzhi stong chos bshad kyang// car gyis bstan pa'i gdams ngag med// de phyir lam du zhugs tshad kyis// rang gi rig pa chos kyi sku// rang la rang chas yod gyur kyang// rtogs par gyur pa ma yin no// rang rig chos skur ma rtogs pas// phyi yi 'byung ba rnam pa lnga// chos kyi dbyings nyid yin gyur kyang// 'byung ba rnam lnga rang gar bzung// de phyir chos nyid rtogs par dka'// de skad ces ni gsungs pa dang// gsang ba'i bdag pos yang zhus pa// ston pa rdo rje 'chang chen po// gang zag phyi ma'i don ched du// da lta nyid du rtogs pa yi// car gyis bstan pa'i gdams ngag ni// thugs rjes 'khor la gsung du gsol// de skad ces ni zhus pa yis// rdo rje 'chang gis yang gsungs pa// tha mal rang rgyud shes pa ni// car gyis bstan pas rtogs pa'i chos// gang zag phyi ma'i don ched du// bstan kyang snod ni shin tu dka'// dper na u dum wa ra bzhin// brgya stong khri las re re zhig/ 'ga' tsam zung tsam 'byung srid na// de yis don du nga yis bstan// de skad ston pas gsungs pa dang// gsang ba'i bdag po yang zhus pa// ston pa rdo rje 'chang chen po// sangs rgyas kun gyi dgongs pa dang// sems can kun gyi gnas lugs don// car gyi bstan pas rtogs pa'i chos// sal gyis bstan pa'i go ba'i don// 'di don ston pa'i slob dpon de// car phog man ngag mkhas pa dang// slob ma'i snod rtogs mkhas pa dang// snod ldan thugs rje 'dzin pa dang// blta bsgom don la gnas pa dang// spyod pa rkyen gyis mi tshugs pa// de lta bu yi slob dpon de// gzhan gyi skyon snang mchis gyur kyang// lus ngag yid gsum dang ba yis// yang dag skye med don chen zhu// yang ni ston pas gsungs pa ni// yang dag skye med bstan pa'i snod// dad brtson brtul zhugs shes rab che// gtong phod mos gus brnags pa che// la zlo'i chos dang slob dpon dang// 'di nyid don la mos pa che// ser sna'i mdud khrol longs spyod 'bul// longs spyod med na rang lus 'bul// man ngag zhu ba'i don ched du// bu dang chung ma la sogs te// srog la bab kyang gtong nus na// yang dag skye med car gyis bstan// de skad ston pas gsungs pa dang// gsang ba'i bdag pos yang zhus pa// slob dpon man ngag ldan pa des// slob ma gong bzhin snod ldan la// car gyis bstan pa'i man ngag 'dis// lnga brgya'i dus la nye ba'i tshe// thos pa bya ru tshe tshad thung// dgon pa bsten du 'tsho ba nyams// spyi ru bshad pa'i man ngag 'dis// shes rab can dang thos pa can// ji srid cha yis rtogs srid kyang// rang gi mtshan nyid mthong ba med// thos chung shes rab chung ba yis// rtogs pa'i don dang mi ldan pas// thos pa che chung med pa dang// shes rab che chung med pa yis// rang gis mtshan nyid ma nor bar// bstan pa tsam gyis rtogs pa'i don// rdo rje 'chang gis gsung du gsol// e ma thugs rje bdag po lags// de skad ces ni zhus pa dang// rdo rje 'chang gis bka' stsal pa// nyon gcig gsang ba'i bdag po nyon// brgyad khri bzhi stong chos bstan kyang// gang zag blo dang sbyar ba las// nges don car gyi bstan pa med// brgyad khri bzhi stong theg dgur 'dus// theg pa rim dgu gsum du 'dus// mtshan nyid sde gsum rgyu yi chos// gsung gi sprul pa shAka thub kyis// gtan la phab cing bstan pa'o// phyi rgyud sde gsum 'bras bu'i chos// sku yi sprul pa rnam snang gis// gtan la phab nas bstan pa yin// bskyed rdzogs rnam gnyis nang pa'i chos// thugs kyi sprul pa gsang bdag gis// gtan la phab nas bstan pa'o// theg brgyad rdzogs chen ming ma thob// de phyir gnas lugs ma rtogs phyir// sku gsung thugs gsum 'dus pa yi// sprul sku dga' rab rdo rje yis// rdzogs pa chen pa'i chos rnams bshad// de ni rdzogs chen ming thob ste// de la bshad thabs rnam pa bzhi// bskyed pas snang ba'i spros pa chod// lung sde rgyud sde klong sde gsum// sems sde la sogs bzhi yis bshad// yul la spros gcod bskyed pa yin// bsdus pa'i lus sems shan ma phye// de yis don la spros gcod pas// sdud pa dag tu bstan pa yin// car phog dag gi man dag ni// rig pa dag la sprod gcod pas// car ba'i man ngag dag tu bstan// de yis 'khrul pa rtsad gcod mkhas// gzhan la ltos nas zab 'gyur te// car gyi bstan pa'i man ngag med// de phyir don gyi ngo ma 'phrod// ngo ma 'phrod pas drang don yin// yang dag don gyi nges don ni// tshig don gnyis su 'brel ba yis// car gyi bstan pas yer gyis rtogs// sal gyi bstan pas wal gyis rtogs// tshig don bstan pas rang ngo shes// de lta bu yi man ngag la// brten na ngo sprod gcig gis chog/dbye na ngo sprod rnam pa bdun// spros bral don gsal gyi rgyud chen po las// a ti'i don ngo sprod pa zhus len dang bcas pa bstan pa'i le'u ste zhe gsum pa'o//// a d+harma kA ya/mun pa'i smag rum chen po ru/ nyi ma shar bas mun pa'i smag gtan nas sangs par byed pa'i man ngag ces bya ba 'di// ngo sprod bdun gyis gtan la phab dgos so// zhes gsungs so// kye kye rdo rje 'chang chen po// ngo sprod rnam pa bdun po yi// dang po 'byung ba dngas snyigs ni// phyi la rang ngo sprad pa de// phyi rabs don du gsung du gsol// de skad ces ni zhus pa dang// rdo rje 'chang gis bka' stsal pa// 'byung ba dngas snyigs dbye ba yi// ngo sprod bstan pa 'di lta ste// dang po shan dbye skyon bsal dang// bar du spyi dang bye brag ngo yis bzung// tha ma sku dang dbyings su la bzla ba// dang po shan dbye skyon bsal ba// phyi yi yul dang nang gi shes rig gnyis// phyi yi yul ni 'byung ba rnam pa lnga// nang gi shes rig rnam pa bstan pa ni// rnam par shes pa'i tshogs brgyad yin// phyi yi 'byung ba rnam lnga bstan pa ni// chos kyi dbyings nyid ma shes gol ba ste// gar byung gnas dang gar 'gro ba// de don gong 'og rnams su shes par bya// 'khrul nas rag pa'i 'byung ba rnam pa lnga// phra ba ye shes 'od kyi kha dog lnga// chos nyid stong pa'i ngang du shar ba ste// rtogs pa'i don ldan rnams la chos nyid yin// ma rtogs pa la 'khrul snang yul du shar// chos nyid ngo yis bzung na 'di lta ste// chos nyid stong pa nyid dang chos nyid ma 'gags pa// chos nyid gnyis su med dang chos nyid dri ma med// thogs pa med pa dang ni lnga ru bshad// yul gyi dngos po snang grag chos can 'di// chos nyid de la ma grub stong pa'o// chos nyid ngang du sku gsum ye shes lnga// mi 'gag pa ru 'char ba de nyid do// chos nyid dag pa gnyis snang med pa yin// phyi dang nang gnyis zhes su bstan pa yin// chos nyid don la spros pa med par dag pa'o// chos nyid ngo bos khyab pas na// chos nyid thogs pa med par bshad// chos nyid bye brag shan dbye ngos bzung bstan pa ni// chos nyid skyon gyi mtha' bsal 'di lta ste// rnam rtog dag pas dri ma rags pa ste// 'byung ba rnam pa lnga ru brtas pa yin// dbus kyi ri bo mchog rab nas// rdo bran sa bran shing bran yan chad ni// 'byung ba sa yi dngos po brtas par rags pa yin// rgya mtsho chu klung chen po man chad nas// rlan tsam gsher tsam chu yi thigs pa yan chad ni// rnam rtog chu ru brtas pas rags pa yin// bskal pa'i me chen 'bar pa man chad nas// gtsub shing me stag phra mo yan chad pa// rnam rtog me ru brtas pas rags pa yin// rdo rje rgya gram rlung chen nas bzung ste// ser bu phra mo yan chad rgyu ba rnams// rnam rtog rlung du brtas pas rags pa yin// 'byung ba rnam pa bzhi yis ni// chos nyid stong pa spros bral de la bsgribs// 'byung ba phra ba'i dri ma sel// ngan rtsal de ni chos nyid ngang du 'char ba yin// 'od dang gdangs dang ye shes rtsal la bsgribs// dri ma phra ba yul gyi rags pa ste// yul ni dngos po mtshan ma can// sna tshogs dag la spyod pa'i yul gyi rags// skye lugs rags pas yul gyi dngos po lnga// dbang po sgo lnga dngos po mtshan mar skyes pas rags// dbang po rnam lnga spyod pas rags// de yis gang la bsgrib gyur na// dbang po sgo lnga'i dbye bar bcas pa yis// 'byed pa med pa'i shes rab bsgribs// dngos po sna tshogs bdag tu 'dzin pa yis// dgongs pa 'dzin med nyag cig don la bsgribs// sgo lnga skye 'gag bcas pa des// skye 'gag med pa'i ye shes bsgribs// phra ba yid gnyis dag tu bstan pa des// yul gyis phra ste dngos po la mi spyod// skye lugs phra ste sna tshogs gzugs mi spyod// grangs kyis phra ste dbang po sgo lnga blta ru med// yid kyi rnam shes gzung 'dzin te// nyon mongs yid ni ngar 'dzin yin// sgo lnga'i rnam par shes pas yul la spyad pa ni// de yi rjes su rtog pas shes pa yid la wa le ba// de ltar shes pa de ni yid kyi rnam shes yin// de yis gzung 'dzin nyon mongs can gyi yid// de ltar tshogs bdun sa bon te// bsags pa de la kun gzhi zhes bya'o// yid gnyis dag gis rang rig spros bral de la bsgribs// yid kyi rnam shes gzung 'dzin bcas pa des// 'dzin pa med pa'i rang gsal dag la bsgribs// nyon mongs can gyi yid ni ngar 'dzin bcas pa des// 'dzin pa med pa'i rig pa de la bsgribs// tshogs bdun gzhi'am rtsa ba phyed pa'i phyir// sbyor ba don gyi kun gzhi zhes su bshad// rnam shes tshogs bdun de dag gis// dge ba spyad na gzhi la dge ba 'phel zhing sdig pa 'grib// sdig pa spyad na sdig pa 'phel zhing dge ba 'grib// lung du bstan na lung du bstan pa rnam 'phel te// ma bstan spyad na ma bstan 'phel bar 'gyur// mdor na sbyor ba don gyi kun gzhi de// tshogs bdun spyod pas las rnams 'phel bar 'gyur// tshogs bdun ma spyad las rnams 'grib// tshogs bdun gzhi rtsa byed pa yi// kun gzhi de dag gis ni gang la bsgrib 'gyur na// rig pa'i mtshan nyid lnga ldan de la bsgribs// spyi yi ngos bzung rig pa'i mtshan nyid bye brag ni// sku gsum shan dbye skyon gyi mtha' bsal dang// spyi dang bye brag gnyis su ngos bzung ba'o// chos sku ngos bzung la shan dbye ba dang// skyon gyi dri ma bsal ba dang// 'byung ba'i dri ma phra rags gsum bral ba// chos nyid dag gsal me long gi dkyil 'khor g.ya' phyis pa lta bu la/rig pa sems kyi dri ma phra rags gsum dang bral ba yi/ rang gsal 'dzin med mar me rlung gis ma bskyod pa lta bu ni/ chos nyid ngang du shar ba de// ye shes dbyings las shar ba yis// mtha' rnams rnam par mi 'byed do// 'phral du 'byung ba lta bu ma yin te// ye shar ye brdal chen po yin// chos sku mtshan nyid bdun ldan te// stong pa 'gyur ba med pa dang// yon tan 'byung zhing dri ma med// thogs pa med dang mtshan ma yi// chos dang bral bas stong pa'o// rang byung chos sku rkyen gyis mi shigs 'gyur ba med// sku dang ye shes mi 'gag pas// yon tan 'gag pa med pa'o// ngo bo skyon med pas ni dri ma med pa'o// rtsal mi 'gag pas phyogs gcig rgya chad med// mtshan ma'i chos can ma yin pas ni stong// car gyis bstan na mtshan nyid bzhi// rig pa chos sku rnam pa gnyis// ngo bo gcig par bstan pa yin// de yi mtshan nyid 'di bzhi yin// rang rig chos sku'i ngo bo stong// de ni chos nyid stong pa'o// ngo bo stong pa de nyid gsal// rang gsal dag tu gnas pa yin// gsal ba'i rtsal ni gnyis su 'byung// 'gyu ba rlung dang snang ba 'od// 'gyu ba'i dbang gis nyams su myong ba 'char// ye shes lnga shar rtsal du 'od lnga shar// de dag sku gsum rdzogs par rtog pa ste// chos sku gsal la mi rtog pa'o// de nyid car gyis ngo sprad pa// dpe skyon gnyis su shes bya ste// dpe ni mun pa'i sgron ma yis// rin chen stor ba rnyed pa 'dra// skyon gyi mtha' gsal shan dbye ba// yod pa'i mtha' dang rtag mtha' yis// chos sku stong pa spros bral bsgribs// med mtha' dang ni chad mtha' yis// 'dzin pa med pa'i rang gsal bsgribs// der 'dzin shes pa cha phra 'dis// chos sku stong pa spros bral bsgribs// phra ba'i shin du phra ba yis// nam mkha' stong pa 'di yis ni// dri med rnam dag chos kyi sku la bsgribs// dri ma phra rags de rnams kyis// chos kyi dbyings la bsgribs pas na// chos sku ngo ma shes pas lhan skyes ma rig byung// rgyu rkyen gnyis kyis rnam rtog rags pa brtas// de yi skyon gyis sku gsum don ma gsal// chos nyid don kyang ma gsal rags par brtas// phyi yi yul nyid 'khrul pa dang// ma 'khrul pa yi bye brag de ltar byung// rig pa'i mtshan nyid sku gsum ye shes lnga yis don yin te// de yang mtshon tshul so sor dbye ba ni// rig pa chos sku longs sku sprul sku dang// stong pa nyid la sogs pa'i ye shes rnam pa lnga// dang po rig pa la yang ngo yis bzung ba dang// shan dbye skyon gyi dri ma bsal ba'o// rig pa ngos bzung bstan pa 'di lta ste// mtshan nyid rnam pa lnga ru bstan pa yin// 'byed med 'dzin med rang gsal dang// rgya ma chad pa'i ye shes dang// lhun gyis grub pa'i sangs rgyas dang// rang gi ye shes de la gzhan snang gi rtog pa med pa yis/ shan dbye ngos bzung skyon bsal ba'o// skyon gyi mtha' bsal ba 'di lta ste/ rig pa'i dri ma rnam pa gsum yin te// rags dang phra dang shin tu phra ba'o// rags pa dbang po'i sgo lngar shar ba'o// phra ba'i yid gnyis phra ba kun gzhi'o// dbang po sgo lnga rags par ci'i phyir na// yul dang skye lugs grangs dang gsum gyis rags pa'o// longs sku shan dbye skyon gyi mtha' bsal dang// bar du spyi dang rang gi mtshan nyid ngos bzung dang// mtha' ma sku dang ye shes dag tu la bzla'o// longs sku'i ngo bo bstan pa dang// chos sku dri med rnam dag pa// don la ye shes rnam pa lnga ru grub pa ste// chos sku rtsal byung ye shes lnga// ye shes lnga yi gdangs shar bas// longs sku'i mtshan nyid bstan pa'o// rang rig ye shes lnga ldan de// gdangs gnyis 'od lngar shar bas rigs lnga'i sku ru byung/ 'od lnga gcig tu grub pas rnam snang chen po'i sku ru rdzogs/ yon tan rtsal lnga kha dog rnam pa lnga/ so so'i cha las rigs lngar shar ba yin// sku mdog phyag mtshan gdan khri la sogs pa// snang yang yang dag don du grub pa med// chos sku'i yon tan tsam du snang ba yin// rtsal dang mdangs su ma 'gags cha tsam shar ba yin// mkhyen pa'i shes rab tsam las gsal ba yin// longs sku'i skyon gyi mtha' bsal ba// dri ma rags pa'i phung po rnam pa lngas// longs sku rigs lnga dag la bsgribs pa yin// dril bas longs sku rnam snang de la bsgribs// phra bas rigs lnga blo la bsgom pa dag gis kyang// longs sku rigs lnga chos sku'i rtsal can de la bsgribs// dngos su zhen pa phra mo de// longs sku bsgribs byed phra mo yin// longs sku mthong du mi ster sgrib byed dri ma'o// longs sku dang ni sgrib byed phyi la shan 'byed do// bar du spyi dang bye brag ngos bzung ba// spyi ni gong du smos pa bzhin// longs sku'i bye brag ngo yis bzung ba ni// chos sku gsal stong de nyid la// gsal cha rlung 'gyus dus su 'od byung ba// de nyid longs sku kho na yin pa'o// mdor na gsal stong gnyis med chos kyi sku// lhun grub chos kyi sku zhes de la bya// ma rtogs dus na ngo bo nyid kyi sku// rtogs pa'i dus na chos sku kho na'o// chos sku'i rtsal mdangs 'char nas longs sku sprul sku'o// chos sku ngo 'phrod dus na longs sku sprul sku gnyis ka 'phrod/ bye brag ngos 'dzin longs sku ngo sprod kho na'o// sku gsum la zlo gong 'og gzhan na gsal/sprul sku shan dbye skyon gyi mtha' bsal dang/ bar du spyi dang rang gi mtshan nyid ngos bzung dang/ mtha' ma sku gsum dag tu la bzla ba'o// dang po shan dbye skyon gyi mtha' bsal ba// chos sku rang rig gsal stong la// 'od gdangs lhun grub shar ba longs sku ste// de gnyis rtsal shar gdul bya'i ngo la ni// 'od dang rig pa'i rtsal gyis skur snang ba// 'gro ba drug la mthun snang 'char ba de// thub drug la sogs sprul pa'i skur snang ngo// sgrib byed gzugs kyi phung po rags pas bsgribs// mdor na rig pa gsal stong de la ni// 'od dang rlung ma byung ba'i cha nas ni// chos sku'i ngo bo zhes ni de la bya// 'gyus te 'od byung sku dang thugs tshogs pa// de ltar rdzogs pa'i cha nas longs sku'o// sku dang thugs las byung ba'i cha nas sprul sku'o// chos sku ngo 'phrod dus na sku gsum ngo 'phrod pa'o// ci'i phyir zhe na sku gsum lhun grub phyir// sku gsum ma rtogs lus ngag yid gsum ste// rtogs pa'i dus na sku gsum dus gcig 'char// chos kyi sku la gsum ga dus gcig rdzogs// ci yi phyir na lhun gyis grub pa'i phyir// skyon bsal ngos bzung la bzla rnams// rang rang skabs nas rdzogs par 'gyur// zhes gsungs so// spros bral don gsal chen po'i rgyud las/ chos kyi dbyings dang rig pa chos kyi sku la sogs pa sku gsum ngo sprod pa'i le'u ste zhe bzhi pa'o//// de nas yang gsang ba'i bdag po zhus pa/ kye kye bcom ldan rdo rje 'chang/ ye shes lnga yi ngo spros gsung du gsol// zhes zhus pas/ rdo rje 'chang gis bka' stsal pa// sku gsum don las ma g.yos kyang// mtshon tshul ye shes lngar byung bas// ye shes lnga yi ngo sprod bstan// shan dbye skyon gyi mtha' bsal dang// rang dang spyi yi mtshan nyid ngos bzung pa// tha ma ye shes lnga rnams la bzla'o// dang po shan dbye skyon gyi mtha' bsal ba// rig pa'i ngo bo stong par 'dug pas na// stong pa nyid kyi ye shes yin// rig pa stong pa de nyid ma 'gags gsal ba yis// me long lta bu'i ye shes yin// rig pa stong gsal gnyis su med par mnyam pa yis// gnyis med mnyam pa nyid kyi ye shes so// rig pa de yi ngo bo la// stong pa'i phyogs nas bltas na stong par gsal// gsal ba'i phyogs nas bltas na gsal bar 'dug/gnyis med phyogs nas bltas na gnyis med de// de ltar so sor ma 'gags cha nas ni// so sor rtogs pa'i ye shes so// don de rtogs pa'i rtsal gyis ni// bya ba thams cad thogs pa med par 'grub// bya ba grub pa'i ye shes so// de lngar ma rtogs dug lngar shar// skyon gyi mtha' bsal 'di lta ste// ye shes lnga la sgrib byed de// rags pa nyon mongs dug lngas bsgribs// phra ba 'dzin byed phra mos bsgribs// shin du phra ba ngo ma shes pas bsgribs// sgrib pa'i phyir na dri ma'o// shan dbye ba ni 'di lta ste// ye shes lnga dang dug lnga dbye// skyon gyi mtha' ni dug lngar gsal// ngos bzung spyi ru shes par bya// rang gi mtshan nyid ngos bzung ba// rang byung ye shes rang snang de// rang byung ye shes chen po zhes pa ste// dug lnga mngon du gyur pa ni// bcos pa'i shes pa zhes pa ste// ma bcos gnyug mar gnas pa'i don// de ni rang byungaye shes te// yon tan ye shes lnga ru 'char// la zlo lta sgom spyod par zlo// ye shes lnga po de dag dang// sku gsum don la dbye ba med// chos nyid stong cha rig gsal dang// gnyis su med pa'i cha yis ni// chos kyi sku yi ngo bo yin// sku gnyis rtsal mi 'gag pa ste// so sor ma 'gags cha nas 'od 'byung ba// longs sku'i ngo bo de nyid yin// thugs rjes 'gro ba'i don mdzad pa// sprul sku bya grub ye shes yin// sku gsum ye shes lnga po de// chos sku'i ngang la lhun gyis grub// ces gsungs so// spros bral don gsal gyi rgyud chen po las/ ye shes rnam pa lnga ngo sprod pa'i le'u ste zhe lnga pa'o//// de nas yang gsang ba'i bdag pos zhus pa/ kye kye bcom ldan rdo rje 'chang/ tshogs brgyad gtan la phab ste ngo sprad pa// phyi rab don du gsung du gsol// zhes zhus pas/ rdo rje 'chang gis bka' stsal pa/tshogs brgyad gtan la phab ste ngo sprod 'di ltar shes par gyis/ tshogs brgyad grangs ni 'di lta ste/ sgo lnga'i rnam par shes pa dang/ yid kyi rnam par shes pa dang/ nyon mongs pa can gyi yid dang/ sna tshogs gsog pa'i kun gzhi dang brgyad yin te/de dag ni 'khor ba'i chos yin no// de 'khor ba 'gro ba ni/ gzhi don gyi kun gzhi ngo ma shes pas/ rig pa'i rtsal gyis yul la 'jug pa yin te/ de'i phyir tshogs brgyad 'char ba yin te/de la sgo lnga rig pa rtsal ma 'gags pa rten med de rten dbang po dang bcas pas mig gi yul du gzugs mthong/ gzugs sdug mi sdug la chags sdang skye/ de bzhin du rna ba'i yul du sgra dang/sna'i yul du dri dang/ lce'i yul du ro dang/ lus kyi yul du reg bya la sogs spyad nas/ bran lta bur byas te/ yid kyi rnam par shes pa la bskyal te/ jo bo la gtad pa lta bu'o// des nyon mongs pa can gyi yid la bskyal te/de chags sdang la sogs pa'i nyon mongs pa yis dam par bzung ste/ khyos chung ma la gtad nas gnyer byas pa lta bu'o// des bag chags su song ste/ de gsog pa'i gzhi'am snod lta bu ste/sna tshogs gsog pa'i kun gzhi'o// rig pa 'gyu ba'i rtsal de rlung gis 'gyu ba yin te/ de la yid ces bya'o// yid de nyid las byed pa'i cha nas tshogs brgyad du zhugs pas yid de gsal cha mi 'gag par des yul lnga spyod pas kha phyir bltas te sgo lnga'o// yid de sgo lngas spyad pa'i nyon mongs pa bzungs su bzung ste/ kha nang du bltas pa'i cha nas nyon mongs pa'i yid de/ mdor na yid kha phyir bltas nas yul spyod pa'i cha nas sgo lnga'o// nang du bltas nas bzung bas nyon mongs pa'i yid do// bsags pa'i gzhi'i cha nas sna tshogs gsogs pas kun gzhi'o// rig pas phyir bcad pa nang du skyel ba'i cha nas yid do// ma rtogs pa'i dbang gis de ltar byung// gzhi'i dngos po'i gnas lugs gong du smos pa te rtogs na ye shes lngar 'char te/ thams cad mkhyen pa 'byung ba yin/ rtogs pa'i thabs ni ngo sprod pa'i rtogs pa 'char te/de ngo sprod kyi gdams ngag car phog tu bstan na gong gi tshig gis shes pa yin te/ gzhi'i skabs kyi rang byung gi ye shes de nyid car phog tu bstan na/ tshig don 'brel ba yin te// ngo 'phrod pa ni dbang po rno rtul med do// thogs pa med par rang ngo rang gis shes so// de mtshan nyid lnga dang ldan te/ ngo bo stong pa rang bzhin gsal ba/ mtshan nyid gnyis su med pa/ thugs rje 'gag pa med pa/ yon tan ma btsal lhun gyis grub pa ste// de la ye shes lnga zhes kyang bya'o// de ltar ngo shes pas ngo bo stong pa mi rtog pas 'dzin pa med pa'o// rang bzhin gsal ba ma 'gags pas sgo lnga'i rnam par shes pa dang bcas pa ste/sems can gyi dus na yul rnam pa lnga la rang kha mar spyod/ rtogs ldan gyi dus na rang snang 'dzin med du grol/ sangs rgyas pa'i dus na thams cad mkhyen par 'byung ste stong pa'o// gsal ba gzhi thog tu rang gsal lo// gsal ba'i rtsal rlung gis 'gyus na/ yul la spyod bzhin du mi 'dzin pa rtogs pa'i rtsal lo// gsal ba dang stong pa ye nas gnyis su med de// gsal ba'i rtsal las gdangs 'od lnga byung/gnyis med de las rtsal phrin las thogs pa med pa byung ste// des gdul bya'i don thams cad lhun gyis grub pa'o// 'od rnam lnga 'char bas snang ba lhun gyis grub pa'o// de ltar rtogs pas ngo 'phrod pa yin no// la bzla ba ni lta ba'i skabs su bshad do// gsang ba'i bdag po de ltar shes par gyis shig/ ces gsungs so// spros bral don gsal gyi rgyud chen po las/ tshogs brgyad gtan la phab nas ngo sprod pa'i le'u ste zhe drug pa'o//// de nas yang gsang ba'i bdag pos zhus pa/ kye kye bcom ldan rdo rje 'chang/ tshogs brgyad phye ste ngo sprad de ltar na// thog mtha' bcad de ngo sprad pa// rdo rje 'chang gis gsung du gsol// zhes zhus so// rdo rje 'chang gis bka' stsal pa/ 'khor ba rgyud nas ba bdas mu nas rtsad bcad pas// snying po gzhi la thug gis thug/ gzhi nyid ngo yis tsir bzung bas// ngo sprod ces su bstan pa yin// gzhi nyid rtogs pa lta ba'i mchog/ ba bdas gyen la bdas pa ni// 'khor ba rang sar ldog pa ste// 'khor ba 'di dag ci las byung// 'khor ba rkyen dang rgyu las byung// 'khor ba'i rkyen gzhi bdas pas ni// de ma thag pa'i skad cig 'phel// de yang dmigs pa'i rkyen las byung// dmigs pa yul la dmigs pa yin// yul dmigs bdag po'i rkyen las byung// bdag po yid kyi 'dzin bcas yin// bdag po rgyu yi rkyen las byung// rlung gis yid 'gyus rgyu yi rkyen// 'khor ba'i rgyu gnyis 'di lta ste// ma rig rnam pa gnyis yin te// kun brtags ma rig 'od lnga brtags pas brtas// lhan skyes gsal cha 'od lngar snang ba la// rang snang yin par ngo ma shes pa'o// de dag 'gyu bas yid bzhi bskyed// g.yo dang 'gyu dang tshor ba dang// gcod pa yi ni yid bzhi ni// ma rig rgyu rkyen de las byung// spyod pa 'od las yul du spyod// tshor ba 'od kyi snang ba tshor// 'gyu ba rlung gis rig rtsal 'gyus// g.yo ba gzhi ni rlung gis g.yos// rlung ni rang gi rig pa'i rtsal// rlung gi mtshan nyid 'gyu ba ste// rig pa'i rtsal ni 'gyu ba'i rlung// rlung las 'byung lnga lhun gyis grub// rlung de sdud pas chu yin no// rlung du smin pas me yin no// rlung du brtas pas sa yin no// re re dag la rdzogs pa'o// rig pa ye shes lnga ldan de'i// rtsal ni gdangs lnga 'od lnga shar// de dag phyi yi yul du brtags// gzhi nyid rgyas par bshad pa ste// rgyud kyis ston nas gsal bar bshad// nges bzung 'di ru bstan pa ste// ngo sprod car gyis bstan pa ste// yid dang rgyu rkyen rtsa ba ni// 'khor 'das kun gyi gzhir gyur pa// de yi ngos 'dzin 'di ltar yin// had de sa le so le ba// de nyid las ni 'khor 'das thams cad 'byung// gzhi yi rang rtsal gnyis yin te// rlung dang 'od gdangs gnyis su byung// gzhi ni g.yo 'gul med pa la// rtsal ni ma 'gags rlung g.yos pas// g.yo ba yis ni 'gyu ba byung// 'gyus ba'i 'od kyi snang ba tshor// 'od de rang snang ma shes pas// lhan gcig skyes pa'i ma rig byung// rang snang ma shes yul du bcad// gcod pa'i yid ces de la bya// 'od la brtags pas kun brtags ma rig byung// rtsal ni yid du 'gyus pa des// rgyu yang byas te rkyen yang byas// rgyu yis rkyen zhes de la bya// 'gyu ba'i yid ni rlung can des// 'khor ba bskyed nas 'khor ba'i bdag po byed// mya ngan 'das na de yis bdag po byed// gang bskyed bdag po de yis byed// de yis rkyen byas bdag po'i rkyen// 'gyu ba 'od la dmigs pa'i rkyen// de la 'khrul pas brtags byas nas// skad cig de ma thag pa'i rkyen/ de ltar 'khor ba bskyed pas te// gong du shin tu gsal bar bshad// gzhi nyid ngos 'dzin 'phrad pa'o// gzhi las gsal pa'i chos sku yis// spangs nas mya ngan 'das lugs ni// gzhan nas bsten pa de bzhin du'o// zhes gsungs so// spros bral don gsal chen po'i rgyud las/ 'khor ba rgyu nas ba bdas mu nas rtsad bcad nas ngo sprod pa'i le'u ste zhe bdun pa'o//// gsang ba'i bdag pos yang zhus pa// kye kye bcom ldan rdo rje 'chang// dus gsum phye la ngo sprad pa// thugs rje can gyis gsung du gsol// de skad ces ni zhus pa dang// rdo rje 'chang gis bka' stsal pa// nyon cig gsang ba'i bdag po rdo rje can// dus gsum phye la ngo sprad pa// gang zag gcig gi shes rgyud la// shes pa bsam gyis mi khyab kyang// shes pa bzhi ru 'dus pa'o// dus gsum dag gi shes pa dang// dus med rtogs pa'i shes pa'o// dus gsum shes pa ngos bzung na// 'das pa rjes gcod shes pa dang// ma 'ongs sngon bsu shes pa dang// da lta nyid du 'phros pa yi// sgo lnga yul la shor ba'i shes pa'o// don dran rtog glo bur shes pa'o// 'das pa rjes gcod shes pa ni// sngar byas blo la dran pa'o// ma 'ongs sngon bsu'i shes pa ni// phyi ma blo la dran pa'o// da lta dran rtogs glo bur ba// sgo lnga yul la bskyed pa yis// de bzhin rtogs pa'i shes pa'o// de gsum 'khor ba'i chos yin te// de gsum glo bur shes pa yis// bdag med 'dzin grol dus gsum dag/ma byas ma bcos ma slad pa// rang byung ye nas gnas pa ste// de nyid shes pas ye shes yin// de nyid lhag gis ngo sprad pa// had de wa le sal le ba nyid// de las rang byung ye shes te// rgyu rkyen med pas rang byung ngo// de nyid shes pa'i ye shes yin// zhes gsungs so// spros bral don gsal gyi rgyud chen po las/ dus gsum phye nas ngo sprad pa'i le'u ste zhe brgyad pa'o//// de nas yang gsang ba'i bdag pos zhus pa/kye kye bcom ldan rdo rje 'chang// dus gsum ngo sprod de lags na// ngo sprod rnam bzhi gsung du gsol// zhes zhus pas// ston pa rdo rje 'chang gis bka' stsal pa// rdo rje 'dzin pa nges bzung zhig/rang gi byad kyi mtshan nyid ni// me long dag la rab brten nas// ji ltar gtan la 'bebs pa ltar// sku gsum 'du bral med pa'i don// ye nas rang la lhun grub pas// brda' yis gtan la dbab par bya// kye gsang ba'i bdag po khyod nyon cig/ ngo sprod bzhi ru shes par bya// ci'i phyir yul bzhir nges pas so// bzhi po gang yin ji ltar yin// sku lnga rin po che'i sbubs dang gcig/ longs sku lnga ldan de dang gnyis// sprul sku'i bar do de dang gsum// sku gsum 'du 'bral med par rdzogs ldan no// de bzhi mi rdzun nges pas the tshom dang bral ba'o// bden bzhi'i tshul gyi rnam pa can// ngo sprod bya ba'i shes pa ma 'gags pa'o// rigs kyi bu khyod legs par nyon// grangs ldan gtan tshigs bstan pa'o// bla mas gdams ngag sgrogs pa'i tshe// go rim gnyis su bstan pa ni// gzhi nyid lhun grub dag gi go rim dang// rtogs pa mngon gyur dag gi go rim mo// kye gsang ba'i bdag po legs par nyon cig/ de la gzhi nyid lhun grub ni// dang po chos sku'i ngo sprod dang// de nas longs sku'i ngo sprod dang// de nas sprul sku'i ngo sprod bstan pa dang// de nas sku gsum 'du 'bral med pa'o// sprad pa'i thabs la gnyis yin te// brda dang ngag tu bstan pa'o// mtshon pa'i brda la rnam pa bzhi// rdo rje sems dpa'i me long bstan pa dang// 'dra 'bag dag la brten pa dang// 'od khyim dag la brten pa dang// nyi ma dag la brten pa'o// brjod pa'i sgra la rnam bzhi ste// dang po chos sku mtshon pa'i tshe// kye snod ldan slob ma nga la nyon// thugs kyi me long man shel 'di// chos sku dngos ni ma yin te// 'di nyid ci 'drar shes par bya// man shel phyi nang med pa ltar// rang gi rig pa chos sku yang// phyi nang med par shes par bya// man shel mdun rgyab med pa ltar// chos sku yang ni mdun rgyab med// man shel zang thal gsal ba bzhin// chos sku dri med dag pa zang thal yin// 'di na nang med nang na rkyen med 'od lnga gsal ba ltar// chos sku zang thal nang na ni// sku gsum nang gsal du ni gnas pa ste// stong pa ye shes snying po can du shes par gyis// dpe 'di'i nang nas 'od lnga phyi ru 'char ba ltar// chos kyi sku las gzugs sku gnyis// gdul bya gnyis la snang ba'o// rigs kyi bu dag tshur nyon dang// longs sku dag la gdams pa ni// 'dra 'bag me long ngos la bstan pa'i tshe// me long dag cing gsal ba ltar// chos nyid dag cing gsal ba'o// me long nang gi gzugs brnyan snang la rang bzhin med pa ltar// chos nyid klong na sku lnga snang la rang bzhin med par gsal bar gnas// kye rigs kyi bu dag tshur nyon dang// sprul sku brda' dang ngag tu sbyar dus su// ngag gi me long dag cing gsal ba ltar// chu yi sgron ma dag gi dbyings// me long ngos la sku lnga gsal ba ltar// rtags kyi ye shes sprul sku 'od du gsal// sku gsum 'du 'bral med par brda dang ngag sbyor bas// kye ma gsang bdag nges zung zhig/ nyi ma'i snying po 'od zer bcas pa bzhin// chos kyi sku la thugs rje gzugs skur brgyan// nyi ma'i 'od zer nyid dang mi 'bral ltar// sku gsum ye nas 'du 'bral med par gnas// kye gsang bdag nges par zung zhig/ rtogs pa mngon gyur go rim ni// bar do man chad rtsi ba ste// sprul pa sku yi ngo sprod ni// chos nyid bar do'i ngo sprod yin// longs spyod rdzogs sku'i ngo sprod ni// lnga ldan dag gi ngo sprod yin// sku gsum 'du 'bral med pa ni// rdzogs ldan dag gi ngo sprod yin// chos sku dag gi ngo sprod ni// rdzogs ldan chen po'i ngo sprod yin// gdams ngag gong dang mthun pa la// dang po bar do'i ngo sprod bya// de rtogs sku ru snang bas na// de nas lnga ldan ngo sprod bya// de nas mngon shes la sogs pa'i// che ba yongs su rdzogs pas na// rdzogs ldan ngo sprod bya ba yin// thugs rje byung na mya ngan 'das// de bas rdzogs ldan chen po yin// ngo sprod gdams ngag gsal bar bstan// des ni gong gi brda' bzhi la// rtags ni byang chub sems yin te// ngo sprod bzhi yis 'gyur med bstan// don ni sku gsum 'du 'bral med// bden don rnam pa bcu gnyis yin// sprod pa'i yul bzhi gang bstan pas// de nyid rnam pa bcu drug rig/ de la dgongs pa rnam pa bzhi// lhun grub nges pa'i gdams pa bzhi// ngo sprod rtogs pas thob par 'gyur// mngon gyur yul gyi gdams pa bzhi// ngo sprod rtogs pa thob par 'gyur// de ni dgongs pa mdor bsdus yin// de yis mtshan nyid brgyad bshad na// thig le nyag gcig ngo sprod kyis// chos sku rang gsal don rtogs shing// rin chen sbubs kyi dgongs pa chod// ma hA yau ga'i ngo sprod kyis// ye shes lnga ldan dgongs pa chod// rdzogs pa chen po'i ngo sprod kyis// sprul sku rang gnas don rtogs shing// chos nyid bar do'i dgongs pa chod// a nu yo ga'i ngo sprod kyis// sku gsum 'dul 'bral med par rang gnas don rtogs shing// rdzogs ldan dgongs pa chod pa yin// ngo sprod rnam bzhi byas pa yis// yul bzhi rim par shar ba'i tshe// shes pa'i dran pa re re sad// so so'i grub mtha' rdzogs pa'o// mthong ba'i yul la shes pa'i dran pa sad// dran pa bzhi yi ting 'dzin rgyal// de tshe mngon par sangs rgyas shing// zhi ba mya ngan 'das pas na// rnam pa nyi shus byang chub pa'o// de ltar rtogs nas sangs rgyas pas// rnam pa kun rig sangs rgyas mchog/ ngo sprod bzhi yi dgongs pa yin// de rnams mi ldan ngo ma sprad pa'i skyon// rdo rje 'chang chen bdag gis bshad// ces gsungs so// spros bral don gsal gyi rgyud chen po las/ ngo sprod bzhi bstan pa'i le'u ste zhe dgu pa'o//// kye kye bcom ldan rdo rje 'chang chen po// sku gsum lhun grub ngo sprod dang// dpe don rtags kyi ngo sprod la// mdo ru bstan pa de lags na// ngo sprod rnams ni la bzla'i phyir// phyi nang gsang gsum ngo sprod gsung du gsol// de skad ces ni zhus pa dang// rdo rje 'chang gis bka' stsal pa// nyon cig rdo rje 'dzin pa sogs// phyi nang gsang gsum so so'i ngo sprod ni// ngo sprod rnams la la bzla ste// lta ba'i don dang sbyar ba'o// de la phyi yi ngo sprod ni// snang ba chos dbyings ngo sprod do// nang gi ngo sprod bstan pa ni// gzugs sku gnyis kyi ngo sprod do// gsang ba'i ngo sprod bstan pa ni// rig pa chos skur ngo sprod do// kye kye rdo rje 'chang chen po// phyi yi ngo sprod ci ltar sprod// nang gi ngo sprod ci ltar sprod// gsang ba'i ngo sprod ji ltar sprod// de dag dpe don gsung du gsol// zhes zhus pas// rdo rje 'chang gis bka' stsal pa// rig pa chos sku'i dpe bstan pa// man shel yongs su dag pa ste// gsal bar yod la ngos gzung med pa bzhin// 'od kyi gsal cha phyi ru 'byung// byung yang man shel dag pa la// rang rgyud pa ru grub pa med// gsal ba'i rtsal ni gnyis su 'byung// rig pa'i gsal cha sgo lngar shar// gzugs kyi gsal cha 'od lngar shar// rig pa'i ngo bo ma grub pa// man shel rnam par dag pa 'dra// de nyid mi 'gag gsal ba de// man shel rnam par dag pa 'dra// gsal stong gnyis su med pa la// gzugs sku gnyis su 'char ba de// man shel gsal ba sgo lnga dang// 'od lnga mi 'gag 'char ba 'dra// rig pa gsal stong gnyis su med pa la// sgo lnga ma 'gag gsal ba ni// chos sku sgo lnga tshang pa'o// rig pa'i cha nas chos kyi sku// 'od kyi cha nas longs sku'o// sgo lnga gsal ba'i cha nas sna tshogs 'gyu// de nyid sprul pa'i sku ru bstan// longs sku'i dpe bstan 'di lta ste// sprin med nyi ma shar ba la// man shel bstan cing bris sku dgram// man shel nyi ma'i ngos su phyar// bris sku 'od brdal dngos su dgram// shel dang bris sku gnyis ka la// ma yengs mig ni btsug la blta// res mos blta zhing nam mkhar blta// man shel nyi ma'i 'od phog dang// bris sku kha dog dbyibs ldan par// mig btsug la ni blta bar bya// mig bsgrim nam mkha' stong par blta// bris sku gang yin kha dog dbyibs// dbang po mig gi mngon gsum du// snang la rang bzhin med pa 'byung// de bzhin longs sku rnam pa yang// chos sku gsal stong gnyis med la// yon tan ye shes lnga ru snang// de rtsal kha dog 'od lnga shar// 'od nyid longs skur bstan pa ste// 'od lnga gcig tu 'dril ba la// rnam par snang mdzad kun tu bzang// longs sku chen por bstan pa ste// mtshan dang dpe byad rdzogs pas spras// de dag phyogs re'i cha bzung ba// rigs lnga sems dpa'i tshogs su byung// de dag snang la rang bzhin med// gsal la rtog pa med pa ste// dper na bar snang 'ja' dang 'dra// sku ni 'od kyi sku yin te// thugs ni gsal stong chos sku de// gnyis med rtog bral chen po yin// sku dang thugs gnyis 'dus pa las// rtsal ni mi 'gag bdag nyid kyi// gdul bya gang dang mos phyogs su// gang la gang 'dod 'byung ba de// sprul pa'i sku yi gnas lugs yin// dpe ni sgyu ma mkhan po yis// rdzas dang sngags kyi rten 'brel gyis// ltas mo'i mi yi mig snga ru// gang 'dod gzugs su yod pa 'dra// de bzhin dpe ni sgyu ma yi// gzugs brnyan sna tshogs snang ba 'dra// chos sku'i rtsal ma 'gags pa yis// gzugs sku gnyis su snang ba'o// rig pa'i cha nas chos kyi sku// de gsal gzugs cha mi 'gag pas// 'od snang cha nas longs sku'o// 'gyu ba dran rig cha nas ni// sgo lnga yul du sna tshogs 'gyu// de dag sprul pa'i sku yin te// sku ni longs skur bstan pa'o// gsung gi cha las sprul sku'o// thugs kyi cha nas chos sku'o// de ltar sku gsum lhun gyis grub// chos kyi sku las gzugs sku gnyis// rtsal lam shugs las byung ba'o// de'i phyir chos sku ngo sprod pas// gzugs sku gnyis po shugs la 'phrod// gong bzhin chos sku'i gnas lugs de// ye nas bdag gi rang bzhin yin// de dag rang la ngos bzung ste// ngo bo rang gis mthong ba na// de dag ngo yis tsir bzung nas// tha mal shes pa de nyid la// bya btang rtsol du bral dus su// dbang po yid ni had de ba// de dag gzhi yi ngo bo ste// ngo bo gnyis kyi sku zhes bya// lhun grub sangs rgyas zhes kyang bya// de nyid rtogs pa mngon gyur ni// phyi ltar dbye ba'i lta ba ste// de nyid rtogs pa zhi gnas yin// nang gi ye shes ma shar bas// stong pa btang snyoms cha nas ni// phyi yi nyon mongs zhi ba tsam// de la zhi gnas zhes su bstan pa yin// gong gi gzhi nyid ngos bzung ba// de la gsal cha brtan pa ste// lhag mthong rig pa chos sku yin// gsal cha gong 'og kun tu ni// shin tu zhib par bstan pa ste// stong pa'i cha dang gsal ba'i cha// gsal ba rang gsal dag dang ni// 'gyus pas sgo lnga yul la gsal// rjes su mi 'dzin rtogs pa yin// gzugs rtsal 'od gdangs dag tu 'char// rang gi snang ba shar ba ste// de la mi 'dzin mi rtog pa'o// rang gi mtshan nyid rtogs pa yin// de ltar chos sku gsal stong la// sku gsum ye shes lnga rdzogs pa// lta ba'i dam pa kho na'o// gsal rtsal gang yang mi 'gag pa// mi 'dzin mi rtog mi 'brang ba// lta ba'i dam pa kho na'o// gsal ba'i rtsal dang mi ldan na// zhi gnas brtan po zhi ba las// gsal rtsal dag gis bogs dbyung ste// 'og nas gong du 'phar bar 'gyur// rtog pa gsal dang brtan pa yis// nyon mongs sgribs pa cha yis 'bral// don la ched du spang du med// bogs dang 'phar ba dag kyang med// rtog pa gsal dang gdengs ldan pas// nyon mongs cha yis 'gags pa la// lam gyi ming du btags pa tsam// ye nas gnas pas gzhi ru bstan// 'khor 'das 'byung phyir gzhi ru bstan/ de dag rang ngo ston pa la// ngo sprod zhes su ston pa yin/ de don rtogs pa lta ba yin// rgyud la gsal ba sgom par ston// rgyun du 'khyer ba spyod pa'o// mngon gyur 'bras bu'i gzhi mar rig/ dag pa chen po'i mthar thug pa'o// lta ba mdor bsdus bstan pa ni// mtha' rnams kun dang ma spangs bral// mtha' bral chen po gyur pas na// phyogs su lhung ba gang yang med// ma bstsal lhun gyis grub pas na// rtsal rnams gang yang mi 'gag 'char// thams cad mkhyen pa de las rgyud// rtsa ba gsal stong chen po'o// rig pa chos skur ngo sprad pas// gzugs sku gnyis po shugs las 'char// gzugs sku gnyis po ngo sprad pas// sku gsum lhun gyis grub pas na// phyi yi chos dbyings bstan pa ni// stong par 'od gdangs shar ba'o// snang ba rang snang mi 'dzin pas// chos dbyings ngo ni 'phrad pa'o// ma rtogs 'khrul par rags par brtas// de la rtogs ldan gang zag gis// rang snang 'dzin med chags pa med// gang zag rtogs ldan chos dbyings yin// zhes gsungs so// spros bral don gsal gyi rgyud chen po las/ phyi nang gsang ba gsum gyi ngo sprod bstan pa'i le'u ste lnga bcu pa'o//// rdo rje 'dzin pa legs par zung zhig/ ngo sprod bdun gyis ngo sprad pas// rang gi mtshan nyid rtogs par 'gyur// zhes gsungs so// kye kye rdo rje 'chang chen po// ngo sprod rnams kyi ngo bo nges tshig dbye ba dang// brjod pa'i tshig rnams gsung du gsol// zhes zhus pas// ston pas bka' stsal pa/ gsang ba'i bdag po nyon cig/ ngo bo ni rang sems rang gi ngo bo'o// nges tshig ni rang ngo rang la bstan ste sprad pas 'phrod pa'o// dbye ba ni bdun du bstan pa ste// gong du gsal zhing rgyas par bstan pa'o// brjod pa'i tshig ni ngo sprod ces kyang bya// ngo bo mthong ba zhes kyang bya/ rang ngo shes pa zhes kyang bya/gzhi'i don shes pa zhes kyang bya/ rig pa chos skur rtogs pa zhes kyang bya/ don ma nor bar mthong ba zhes kyang bya/ rang gis mtshan nyid bstan pa'i gdams ngag ces kyang bya'o// zhes gsungs so// spros bral don gsal gyi rgyud chen po las// ngo sprod 'jug bsdu ba'i man ngag gi le'u ste nga gcig pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// ngo sprod gtan la dbab pa yis// bstan pa'i don 'di ji ltar lags// phyi rabs don du gsung du gsol// rdo rje 'chang gis bka' stsal pa// a kA ya tri dz+nyA na pany+tsa/ nyi ma'i snying po la 'od zer gsal bas/ mun pa gtan mi gnas pa zhes bya ba 'di gsungs so// bltar med lta ba'i don bstan pa// a ti'i lta ba gza' gtad bral// dngos med ye shes zang thal bas// rang rig ye shes lhun gyis grub// de las ma rtogs gzhan med pas// so sor rang rig ye shes la// cir snang ye shes chen po'i gdangs// ye nyid bcom ldan rdo rje 'chang// de bas gzhi snang rdzogs sangs rgyas// sangs rgyas yul med gzung 'dzin rnam par dag/ rang rig ye shes rang g-i gdangs la bzhugs// 'byung bzhi rang bzhin dag pa'i nam mkha' la// chos nyid don gyi nam mkhas ye nas khyab// chos nyid don gyi nam mkha' la// rang rig ye shes nyi ma shar// phyogs res med pa kun tu bzang// yid kyi rnam rtog ci 'gyu yang// ma 'gags rang bzhin med pa'i don// bltas shing gsal ba'i mthong rnyed la// phyi nang gnyis ka phyi nyid nang// zab pa'i cha shas rtogs yul bral// phyi nang snod bcud thams cad kun// byis pa'i skye bo rnams la snang mod kyi// lta ba rang rig ye shes dngos med zang thal ba// dngos po mtshan ma'i sgrib pa ye nas rnam par dag/ kun bzang zhal ni phyogs bcu kun tu gsal// yum gyi b+ha ga bde klong gcig tu 'khyil// de bas khams gsum ma lus spros bral chen por gcig/ lta ba rnam dag rang rig ye shes la// sangs rgyas med pas sangs rgyas ming yang med// sems can med pas khams dang 'byung ba med// man shel sku ltar rang gi rgyud dag pas// dri med zang thal dag pa chos kyi sku// sa chu me rlung nam mkhar snang ba yang// ma rtogs blo la tshad mar snang mod kyi// snang la rang bzhin med de ye shes gdangs su gsal// dper na mkha' la mja' tshon gsal ba yang// mkha' las logs na med kyang logs par snang// mkha' yi ngang du gnas shing mkha' dang mi phyed ltar// chos nyid chos sku dbyer med don gyi nam mkha' la// rang shar rang snang rang gsal ye shes gdangs// logs ltar snang zhing 'gags pa med par gsal// gsal la rtog med ye shes chos kyi sku// rang la rang snang snod bcud ye sangs rgyas// las dang thugs rje'i mtha' gnyis rnam par dag/ sa dang rnam thar byang chub mchog la ring// bgrod du med de chos nyid byang chub mchog/ bgrod par 'dod na ye shes mtha' la ring// ma bsags bzhin du tshogs gnyis ye nas rdzogs// ma sbyangs bzhin du sgrib gnyis ye nas byang// ma byung ma skyes 'od kyi dkyil 'khor la// bkod pa lha yi dkyil 'khor bsgom mi dgos// dkyil 'khor khro gnyer cha lugs kyis// khro bdag chen po'i skur bskyed nas// sku gsum thugs kyi bzlas pa dag/ chu yi rgyun ltar bzlas na yang// rang rig ye shes rgyab kyi phyogs// ye nas byas zin da gdod btsal ba med// ched du byar med ched du dgag tu med// mar me'i snying po rang gi 'od la gnas pa ltar// rang rig ye shes rang gi gdangs la gnas// 'das dang ma byon da lta'i sangs rgyas dang// gnyis med ro gcig chu la chu bzhag bzhin// zhes gsungs so// spros bral don gsal gyi rgyud chen po las/ blta ba spyi ru bstan pa'i le'u ste nga gnyis pa'o//// de nas yang gsang ba'i bdag pos zhus pa/kye kye bcom ldan rdo rje 'chang// de ltar lta ba bstan pa de// phyi ltar dbye bar 'dug pa na// rang gi mtshan nyid lta ba de// ma nor nges par bstan du gsol// zhes zhus pas/ rdo rje 'chang gis bka' stsal pa// phyi rabs dad ldan don ched du// rang gi mtshan nyid lta ba ni// ma nor nges par ngas bshad nyon// snang ba chos dbyings chos nyid dang// rang byung rang rig chos kyi sku// wal gyis rtogs pa'i lta ba yin// de nyid car gyis ngos bzung na// tha mal shes pa 'di+e nyid la// had de sa le so le ba// hrig ge sa le sang nge ba// de nyid rang gi mtshan nyid yin// rig pa chos sku bzhi ldan yin// rang gi ngo bo ma grub pas// chos nyid stong pa'i cha yin no// ngo bo mi rtog pa zhes bya// stong pa de nyid rang gsal yin// rig pa rang gsal zhes bya ste// gsal ba'i dus na dngos po med// dngos med de nyid gsal bar shar// gsal stong gnyis su med pa'o// gsal ba la ni rnam pa gnyis// ye shes lnga ru ma 'gags te// de la gdangs lnga 'od lnga shar// de nyid ma rtogs dug lngar 'khrul// 'od lnga ma rtogs 'byung lngar 'khrul// ye shes lnga po ma shes pas// 'gyu ba'i rlung ni dug lngar shar// de bzhin gcig la tshang lugs yin// de la sku gsum rdzogs lugs ni// rang byung gsal stong gnyis su med// de gnyis mi 'dzin mi rtog pas// rtog med chos kyi sku yin ste// chos sku de las gdangs byung bas// longs spyod rdzogs pa'i sku yin no// de gnyis rtsal ni mi 'gag pas// thugs rje sprul pa'i sku zhes bya// rang byung rig pa'i rtsal zhes pas// sku gsum yongs su de ltar rdzogs// lta ba rang byung rig pa la// ye shes lnga yi rdzogs lugs ni// rig pa'i ngo bo ma grub pas// stong pa nyid kyi ye shes rdzogs// de nyid ma 'gags gsal bas na// me long lta bu'i ye shes rdzogs// de nyid gnyis med mnyam pas na// mnyam pa nyid kyi ye shes rdzogs// ma 'gags so sor gsal bas na// so sor rtogs pa'i ye shes rdzogs// rtsal ni sgo lngar bcas pa yis// thams cad grub par gyur pas na// bya ba grub pa'i ye shes rdzogs// rgyud dang rkyen gyis ma bskyed pas// rang byung ye shes zhes bya'o// rang rig gcig gi yon tan yin// rang gi rig pa chos sku la// yon tan thams cad lhun gyis grub// gang la thogs med zang thal yin// man shel dag pa'i dpe bzhin du// gsal dngas rtogs med zang thal lo// dper na mar me gsal ba bzhin// rang gsal dag gi ngo bor yod// snang ba chos dbyings lta ba ni// mtshan mar ma grub stong pa la// rig pa dag gi rtsal shar bas// gdangs dang 'od kyi rnam pa byung// rang snang dag tu shar bas na// rig pa rang sar grol ba dang// snang ba rang sar dag pa'o// dper na nam mkha' stong pa la// nyi ma gsal zhing 'phyo ba bzhin// yul nyid stong pa'i chos nyid na// rang rig chos sku gsal stong 'phyo// gang zag rtogs ldan lam zhugs kyis// 'khrul snang 'di la de bzhin sbyar// thams cad rang nyid rtogs pas grol// rang sar bzhag pa'i lta ngos zin// zhes gsungs so// spros bral don gsal gyi rgyud chen po las/ lta ba rang gi mtshan nyid bstan pa'i le'u ste nga gsum pa'o//// kye kye bcom ldan rdo rje 'chang// ma 'ongs skal ldan don phyir du// lta ba rang gi mtshan nyid de ltar na// rgyas par bshad pa ji ltar lags// de skad ces ni zhus pa yis// rdo rje 'chang gi bka' stsal pa// phyi rabs rnal 'byor don ched du// lta ba rgyas pa nga yis bshad// lta ba'i rgyu rkyen ngo bo dang// nges tshig rang bzhin mtshan nyid dang// dbye bsdu dgos ched gol sa dang// skyon dag lhun gyis grub lugs dang// gtan tshig mtshon pa'i dpe dang ni// rtogs chad ma rtogs skyon bstan dang// gzhan sel rang ngo bzung ba dang// la bzla spros bral chen po'o// lta ba'i rgyu ni rang byung chen po yin// ci'i phyir rang byung chen po yin zhe na// rang rig chos sku rang la gnas pa de// sangs rgyas thugs rje dag las ma byung dang// sems can rnams kyi las kyis ma bskyed dang// nang gi ma rig 'khrul pas ma bskyed dang// phyi yi 'byung ba lnga las ma grub dang// gang zag lam pa'i blo yis ma bcos dang// sgra dang gtan tshigs dag gis gtan la ma phab dang// sngags dang phyag rgya'i byin rlabs dag las ma byung dang// rgyu yi ma bskyed rkyen gyis 'jig mi 'gyur// ma bcos ma bslad so ma rang byung chen po yin// de phyir rgyu med rgyu de rgyu yi mchog/ rkyen ni bla ma dam pa'i gdams ngag ste// ci'i phyir man ngag bla ma yin zhe na// bla ma dam pas gdams ngag bstan pa yis// rang byung gsal stong gnyis med don rtogs so// de phyir rkyen ni bla ma dam pa'i gdams ngag yin// ngo bo rang rig gsal stong gnyis med yin// de don rtogs pa lta ba'i ngo bo yin// lta ba'i nges tshig rang rig ye shes yin// gzhan la rag mi dgos pas rang zhes bya// bem po dag las log pas rig pa'o// dus ni glo bur ma byung ye zhes bya// de nyid don dang ngo sprod shes pa yin// lta ba'i rang bzhin gsal dngas chen po yin// rang rig gsal ba'i de rtsal 'od lngar shar// rang ni rang byung rig pa'i don yin te// gzhi las gsal rtsal 'od gdangs shar pa'o// de yi gong na gzhan med chen po yin// lta ba'i mtshan nyid ye shes lnga ldan yin// rang byung rig pa chos sku de la ni// ngo bo ma grub stong nyid ye shes yin// ma 'gags gsal bas me long lta bu'i ye shes yin// de nyid gnyis su med par mnyam pa yis// gnyis med mnyam pa nyid kyi ye shes yin// de rnams ma 'gags so sor gsal ba yis// so sor rtogs pa'i ye shes zhes bya'o// de lta bu yi ye shes de rtsal gyis// gsal ba ma 'gags gang yang grub pas na// bya ba grub pa'i ye shes zhes su bstan// de las gsal rtsal 'od lnga shar bas na// mtshan nyid 'dzin pa'i ye shes lnga zhes bya// lta ba'i dbye ba rnam pa gsum du bstan// rang gi rig pa chos skur bstan pa dang// bar gyi rig rtsal ma 'gag bstan pa dang// phyi yi snang ba chos dbyings bstan pa'o// nang gi rig pa rtogs na chos kyi sku// rtsal ni gzugs sku gnyis su snang ba'o// chos sku phye na ye shes lnga ru bstan// de yi rtsal ni kha dog 'od lngar shar// nang gi 'gyu ba sgo lngar bcas pa yin// phyi yi yul la spyod kyang rang sar grol// 'dzin rtog med pas 'gyu ba zang thal yin// phyi yi rang byung rig pa gsal gyur na// phyi yi yul ni chos dbyings stong pa la// 'od lnga shar bas 'byung ba lnga ru brtas// bar gyi gdangs ni rang rang lus su grub// ma rig las byung nyon mongs ug lnga ni// rang rig rang gsal 'dzin med ngo shes na// rang chas shar bas rang snang dag tu bstan// 'dzin pa 'gyus kyang gar 'gyus rang sar grol// phyi yi snang ba yul la ma zhen cing// nang gi rang byung rig pa gsal gyur na// rang rig chos kyi sku zhes de la bya// stong gsal mi rtog bde ldan pas/ kun gyi don shes rjes su 'dzin pa med// rig pa chos kyi sku zhes de la bya// lta ba'i bsdus don bstan pa 'di ltar yin// rig pa'i ngo bo ma grub stong pa'i cha// de nyid gsal bar 'dug pas stong gsal chen po yin// gsal ba mi 'gag rtsal du bstan pa ni// 'gyu ba rjes med thams cad mkhyen pa'i rgyu// gsal cha gzugs mi 'gag pas 'od lnga'i gdangs// yul la 'dzin pa ma zhugs chos kyi dbyings// stong cha gsal cha snang cha 'gyus cha bzhi// 'dzin med don gyi zin pas lta ba yin// lta ba'i dgos ched bstan pa na// lta ba mig dang 'dra ste thams cad gsal// lta med rgyud dag sangs rgyas thob mi srid// lta med ma rig mun pa sangs mi srid// lta med bsgom pa byas kyang don mi 'gyur// lta med spyod pa byas kyang spyod rgyu med// lta med 'khor ba'i gnas nas thar mi srid// lta med sdug sngal dag las grol mi srid// lta med bde ba chen po thob mi srid// de phyir lta ba dgos ched shin tu che// lta ba'i gol sa bcad par bstan pa ni// rang byung yin pas rgyu rkyen gol sa chod// stong par 'dug pas dngos po'i gol sa chod// gsal bar 'dug pas stong pa'i gol sa chod// rig pa zang thal shar bas gzhi gnas gol sa chod// gsal ba 'od du 'char bas rig pa stong pa'i gol sa chod// ma bcos ma bslad gnas pas bskyed rim gol sa chod// 'du 'bral med par gsal bas bsgom pa'i gol sa chod// rang nyid yin pas gzhan la re ba'i gol sa chod// phyogs med 'char bas phyogs mtshams gol sa chod// kun gyi rtsa ba yin pas theg pa'i gol sa chod// bstan pa tsam gyis rtogs pas thos bsam gol sa chod// rang ngo rang gi shes pas gzhan du gol mi srid// skyon rnams dag par bstan pa ni// gol sa chod pas skyon rnams rnam par dag/ rtag mtha' dag la chad mtha' dag/ yod mtha' dag la med mtha' dag/ snang mtha' dag la stong mtha' dag/gcig mtha' dag la du ma dag/ mtha' rnams thams cad dag pa ni// lta ba rnam dag chen po yin// chen po zhes ni ci phyir bya// rnam dag don la lhun grub pas// dag pa chen po zhes bya'o// lta ba lhun grub bstan pa ni// skyon rnams dag pas yon tan lhun gyis grub// de yang sku gsum ye shes rnam pa lnga// lhun gyis grub pas thams cad rdzogs pa yin// blta ba lhun grub chen po yin// dper na bsam 'phel nor bu la// dgos 'dod thams cad 'byung ba 'dra// skyon rnams dag pas ched du spangs pa ma yin te// rang gi ngo bo rtogs pas rkyon rnam dag/ dper na nyi ma shar bas mun pa mi gnas bzhin// yon tan thams cad lhun gyis grub pa ni// bsgrubs pas grub pa ma yin te// rang ngo rtogs pas thams cad mkhyen par 'char// dper na rin chen rnyed pas dgos 'dod 'byung ba ltar// lta ba mtshon pa'i dpe bstan pa// rgyas par bstan na bsam gyi mi khyab ste// bsdu na mtshon dpe sum cu dag tu bstan// rnam par dag pa'i man shel dri med 'dra// lhun gyis grub pas nor bu rin chen 'dra// mtha' dang bral ba'i nam mkha' chen po 'dra// thams cad 'byung bas sa gzhi chen po 'dra// nyon mongs sdig sgrib bsreg pas me dang 'dra// mi gtsang ljan ljin 'khru bas chu dang 'dra// gang la thogs pa med pas rlung dang 'dra// ngo bo ma grub bar snang stong ba 'dra// gsal la mi 'gag nyi ma'i zer dang 'dra// gsal la mi rtog me long man shel rkyen 'phrad 'dra// bde la mi rtog byang chub sems dpa' 'dra// gang gi skyon gyis ma gos me tog pad+ma 'dra// phyir mi ldog pas sems can dug zos tshe dang 'dra// rgyun mi 'chad pas chu bo'i gzhung dang 'dra// ngo bo gcig la rang rtsal mi 'gag pa// rgya mtsho chen po dag las rlabs 'char 'dra// 'od gdangs lhun grub man shel rkyen 'phrad 'dra// nyon mongs rang grol sbrul gyi mdud pa 'dra// rtog pa rang ngo rang gi shes pa ni// rgyal bu dmangs nas rgyal sar bton pa 'dra// dus gsum 'gyur ba med pas rin chen gser dang 'dra// nang du gsal bas bum nang mar me 'dra// gcig gis phyi yi yul lnga spyod pas na// rin chen gser sbrul mig dang 'dra// zhe la yod kyang kha ru mi thon pa// dig pas kha ru bu ram myong ba 'dra// rang rig rtogs pas ma rig sel ba ni// sgron me bteg pas mun pa sel ba 'dra// phar la 'joms shing tshur la mi tshugs pas// mi 'gyur mi shigs rdo rje pha lam 'dra// ngo bo 'dus ma byas pas nam mkha' 'dra// rang rig don rtogs nyon mongs dag pa ni// nyi ma shar bas thams cad gsal ba 'dra// ma bsgoms gsal rtsal byad dang me long 'dra// ma bcos ma bslad rang rig gnyug ma 'dra// mtshon dpe sum cu tham pas lta ba'i don gyi phyogs re mtshon// lta ba blo dang 'thas pa'i yul las 'das pas na// 'di yin 'di dag kho na zhes su bstan pa shin tu dka'// don gyi zur tsam phyogs tsam mtshon pa yin// gtan tshigs mang bar bstan kyang gsum yin te// lung gis gtan la phab pa'i gtan tshigs dang// man ngag dag gi gtan tshigs bstan pa dang// de gnyis 'dzom pa'i rjes su rigs pa'i gtan tshigs so// lung gi gtan tshigs rdo rje 'chang gi bka'// man ngag gtan tshigs bka' lung bcud kyi don// rig pa'i gtan tshigs rang rig mngon sum don// lung dang man ngag gnyis kyis ngo sprad pa'o// lta don rang rig mngon sum rtogs pa'i tshe// ngo sprod shes pas rang ngo shes pa ste// nyams su myong bas rang las 'byung ba'i don// nyon mongs dug lnga la sogs rang grol du// 'dod pa'i yon tan lnga la ma zhen dang// nyams rtogs thams cad rang las 'byung ba dang// dus gsum dag tu 'gyur ba med pa yis// bar du gcod pa'i bdud kyis tshugs mi 'gyur// nang gi rig pa chos kyi sku ru rtogs// gsal stong gnyis med spros dang bral ba'i gdengs// bar gyi rtsal ni 'gyu ba rang sar grol// rig pa zang thal ci spyod ye shes so// phyi yi snang ba bde sdug rang sar grol// ma bcos stong nyid chos kyi dbyings su grol// rig pa bstan pas rkyen rnams thams cad bral// de ltar shes na lta ba rtogs pa'i tshad// lta ba ma rtogs pa yi skyon bstan pa// dper na bye ma'i ri la mkhar brtsig 'dra// bye ma nyil nas mkhar spe 'jig pa ltar// yang dag ma rtogs byang chub lam zhugs pas// gnas skabs tsam las mthar thugs 'bras bu med// de phyir lta ba ma rtogs sangs mi rgya// lta ba'i ngos 'dzin ngo sprod skabs na gsal// ngo yis zin na 'phral du rtogs pa 'char// ci phyir zhe na car phog bstan pa yin// de phyir ngos 'dzin ngo sprod shin tu gces// lta ba'i dogs bcad shin tu gces// mi mthun pa yi rkyen las bzlog par 'gyur// de yang rnam pa gnyis su bstan pa ste// mi mthun phyogs dang mthun pa'i phyogs las bzlog/ mi mthun phyogs las bzlog par bstan pa ni// rig pa yin pas bem po dag las bzlog/ mthun pa'i phyogs las ldog par bstan pa ni// nang gi rnam shes tshogs brgyad ldog pa'o// shes rig tsam du mthun snang gyur na yang// 'dzin pa'i rtogs pa yod med khyad par che// de yang sgo lnga'i rnam par shes pa ni// yul de snang bas shes par skye bar 'gyur// yul mi snang na shes pa skye mi 'gyur// de yang yul la 'dzin pa bcas nas skye// de phyir sgo lnga'i rtogs pa rang kha ma// rtog pa gsal na sgo lnga'i 'dzin pa 'gags// yid kyi rnam shes mtshan nyid bstan pa ni// phyi ru yul lnga spyod pa'i bdag po byed// nang du de las bzung pa'i nyon mongs yid// gzung dang 'dzin pa gnyis kyi bdag po yin// de phyir rnam par rtog pa rnams// rang gi rig pa dag gi rtsal yin te// 'dzin med gsal ba'i rig pa de nyid ni// rig pa 'gyus kyang 'dzin pa'i rjes med de// phyi ru yul la spyad kyang ma bzung na// lta ba zang thal yin te yid las ldog/ nyon mongs yid kyi mtshan nyid ni// yul gyi rtog pa byed pa de dag ni// yid la bzung ba'i cha nas nyon mongs yid// 'dzin med rig pa gsal ba lta ba yin// don la rig pa'i rtsal ni ma 'gags pas// ma shes yul la gzung bas rtog pa'i tshogs su shar// shes nas yul la 'dzin pa med pa ni// ye shes zang thal blta ba'i mthar thug yin// sbyor ba don gyi kun gzhi'i mtshan nyid bstan pa ni// tshogs bdun rtog pa'i gzhi la bya// tshogs bdun dag la rtog pa mi gsog na// sbyor ba don gyi kun gzhi de las bzlog/ mthun phyogs tshogs brgyad dag las de ltar bzlog/ nang rig pa'i tshogs brgyad dag las bzlog pa yin// phyi yi chos dbyings dag las bzlog pa yin// 'byung ba lnga ni rags pa rdos pa can// lta ba chos kyi dbyings ni stong pa la// 'od gsal dag ni rtsal gyi snang ba 'char// de phyir chos sku chos dbyings shar tsam na// 'khrul pa'i snang ba las ni bzlog pa yin// lta ba'i la zlo spros dang bral ba yin// ci phyir spros dang bral zhe na// spros pa'i mtha' ni mtha' lhung ste// de dang bral na spros bral lo// mtha' yang 'khor ba'i mtha' yin te// 'khor ba'i mtha' yang phyi nang gnyis yin te// phyi yi 'byung lnga rdos pa'i mtha'// 'byung ba lnga ni 'dus byas te// 'dus ma byas shing 'dzin pa med pas mtha' las grol// nang ni nyon mongs dug lnga 'dzin pa'i mtha'// 'dzin pa'i phyogs su ma lhung mtha' dang bral// phyi nang snod bcud mtha' las de ltar grol// gsal la 'dzin pa med pas chad pa'i mtha' las grol// mi rtog stong pas rtag pa'i mtha' las grol// phyogs cha gang yang med pas rim dgu'i mtha' las grol// phyi nang snod bcud kun gyi mtha' las grol// sku gsum ye shes lnga ru 'dzin med pas// mya ngan 'das pa'i mtha' las grol// phyogs ris gang yang med pas mtha' rnams kun dang bral// 'dzin pa gang yang med pas phyogs su lhung ba med// blo yi yul las 'das pas brjod pa'i tshig dang bral// dogs pa med cing re gnas med pas sangs rgyas da lta nyid// re dogs kun dang bral bas 'bras bu da lta nyid// de ltar shes shing rtogs pa'i gang zag de// 'khor ba'i gnas su 'dug kyang 'bras bu sku gsum rdzogs// ye shes lnga yis don las 'gyur ba med// rang byung rig pa'i don de mngon du shar// ya nga bag tsha med pas khyung chen nam mkhar lding pa 'dra// zhes gsungs so// spros bral don gsal gyi rgyud chen po las/ lta ba rgyas par bshad pa'i le'u ste nga bzhi pa'o//// kye kye bcom ldan rdo rje 'chang// lta ba rgyas par bstan pa de lags na// phyi rabs gang zag snod ldan don ched du// lta ba rang gi mtshan nyid de dag la// gnad kyi man ngag mi 'khrul de dag gi// gcig srog gcig gis bzung ba bshad du gsol// zhes zhus pas/ de nas ston pas bka' stsal pa// rang rig chos sku gtan la dbab pa ni// rang rig yon tan brjod kyis mi langs kyang// yon tan bcu ldan rang rig chos kyi sku// rgyu dang rkyen gyis ma bskyed rang byung cha// dngos po mtshan mar ma grub stong pa'i cha// rang rig rang gsal rig pa nang gsal cha// rig rtsal sgo lngar shar ba phyi gsal cha// sgo lnga'i rjes su 'jug pa 'gyu ba zang thal cha// rig rtsal 'od du shar ba gzugs kyi cha// gsal stong gnyis med don la gcig pa'i cha// yon tan ma btsal lhun gyis grub pas lhun grub cha// skyon rnams ma spangs dag pas rnam dag cha// yul rkyen rang sar grol bas 'dzin med cha// rgyu rkyen gnyis kyis ma bskyed rang byung ni// bde gshegs thugs rje dag las ma byung rang byung dang// sems can rnams kyi las kyis ma bskyed dang// phyi yi 'byung ba lnga yis ma bskyed dang// nang gis rnam rtog dag las ma byung dang// gang zag lam pa'i blo yis ma bcos pa'o// de phyir rang byung rgyu rkyen med pa'o// dngos po mtshan mar ma grub stong pa ni// glo bur ma yin gdod ma nas kyi stong pa dang// gsal ba'i ngo bo ma grub stong pa dang// blo yis ma bcos ma bslad pa yi stong pa dang// rdzas dang mtshan mar ma grub stong pa dang// nyon mongs bag chags ma grub stong pa'o// de phyir chos nyid stong pa nyid ces bya// rig pa nang gsal ngo bo bstan pa ni// gzhan la rag ma las par gsal ba dang// glo bur ma yin gdod ma nas kyi gsal ba dang// gsal tsam nyid nas ngo bo ma grub gsal ba dang// gsal ba'i dus na bde yin gsal ba dang// yon tan lhun gyis grub pas gsal ba'o// de phyir rang rig rang gsal dag yin no// sgo lnga'i rig rtsal phyi gsal bstan pa ni// mig gi yul du gzugs rnams snang ba dang// rna ba'i yul du sgra rnams grag pa dang// sna yi yul du dri rnams snom pa dang// lce yi yul du ro rnams bro ba dang// lus kyi yul du reg bya tshor ba'o// sgo lnga de rnams rig pa dag la chang// sgo lnga'i rjes 'jug 'gyu ba zang thal yin// mig la brten nas gzugs kyi rnam par spyod// rna ba la brten sgra yi rnam par spyod// sna la brten nas dri yi rnam par spyod// lce la brten nas ro yi rnam par spyod// lus la brten nas reg bya'i rnam par spyod// spyod pa'i rjes su 'brang na 'khrul pa yin// yul la ma spyad rang sar grol bas zang thal yin// rig rtsal 'od du shar bas gzugs rtsal yin// stong nyid ye shes rtsal ni mthing gar shar// me long ye shes rtsal ni dkar por shar// mnyam nyid ye shes rtsal ni ser por shar// sor rtog ye shes rtsal ni dmar por shar// bya grub ye shes rtsal ni ljang gur shar// rtsal gnyis rang sar mi 'dzin mi rtog pa// rang snang rang sar grol ba rtogs pa'i tshad// gsal stong gnyis med don la cig car ni// tha dad gnyis su ma grub gnyis med dang// gsal stong gnyis su ma grub gnyis med dang// gdod nas 'bral ma myong ba'i gnyis med dang// rang byung rgyu rkyen med pa'i gnyis med dang// bzang ngan med pas mnyam pa nyid kyi ye shes dang// gnyis med steng du 'dzin med lta ba'i mchog/ yon tan ma btsal lhun gyis grub pa'i lhun grub ni// rtsol ba gang gis ma btsal lhun grub dang// yon tan lhun gyis grub pas lhun grub dang// 'dod pa'i yon tan char bas lhun grub dang// glo bur ma yin gdod nas rdzogs pas lhun grub bau// de phyir ma bsgrub lhun grub chen po yin// skyon rnams ma spangs dag pa'i rnam dag ni// rang gi rig pa chos sku de la ni// rnam rtog mtshan ma thams cad rnam par dag/ dngos po rtag mtha' thams cad rnam par dag/ med mtha' dang ni chad mtha' rnam par dag/ drang don theg pa'i bkri drang rnam par dag/ma rig gti mug blo ni rnam par dag/ yul rkyen rang sar grol ba'i mtshan nyid ni// don rtogs snang rkyen rang sar grol ba ste// rig pa chos sku lta ba'i don rtogs pas// yul rkyen ji shar 'dzin pa med par grol// mig gi yul du gzugs shar 'dzin med grol// rna ba'i yul du sgra byung 'dzin med grol// sna yi yul du dri byung 'dzin med grol// lce yi yul du ro myong 'dzin med grol// lus kyi yul du reg tshor 'dzin med grol// don rtsal rang shar rig pa zang thal yin// rang rig chos kyi sku yi don rtogs na// snang ba rang snang 'dzin pa rang grol lo// de phyir rang snang rang shar zhes su bshad// de ltar yon tan bcu ldan de// gcig srog gcig gis bzung bas mthar mi ltung// la zlo spros pa'i mtha' rnams kun dang bral// de phyir rang rig blo yi yul las 'das// btags tshad ming yin bsam tshad blo// snang tshad yul yin byas tshad 'jig/ dus gsum rtog pa thams cad 'jig pas na// ma byung ma skyes rang byung chen po'i sku// ma bcos ma bslad ma bsgrubs ma zhen pa// mi rtog mi 'dzin mi zhen mi ltos so// rig pa'i gnas lugs de ltar gnas pa'o// lta ba rang byung rig pa'i don rtogs pas// snang ba chos nyid stong pa'i ngang las rig rtsal 'od lngar shar// ma rtogs pa las 'byung ba lnga ru brtas// rang gi rtsal snang blang dor mtha' dang bral// rang snang rang grol zhen pa kun dang bral// rang rig don rtogs 'gyu ba rang grol na// sgo lnga'i yul lnga dag gis gnod mi nus// rang byung ye shes lta ba'i don rtogs na// ma bslad ma byung ma byas ma btsal ba// mi 'khrul mi rtog mi ltos mi zhen no// ngo bo gcig la yon tan ldan lugs so// spros bral don gsal gyi rgyud chen po las/ lta ba gcig srog gcig gis bzung nas bstan pa'i le'u ste nga lnga pa'o//// kye kye bcom ldan rdo rje 'chang// lta ba'i srog bzung de lags na// lta ba bsgom pa spyod pa gsum// gcig tu dril te bstan par zhu// rdo rje 'chang gis bka' stsal pa// lta sgom spyod pa dril ba ni/rang gi rig pa chos kyi sku spros pa dang bral ba yin te/ de la dbye na gsum/ nang rig pa chos kyi sku dang/ phyi snang ba chos kyi dbyings dang/ bar du rig pa'i rtsal mi 'gag pa dang gsum mo// nang rig pa chos kyi sku ni rig pa gsal stong gnyis su med pa yin te// de yang rang gi rig pa ma bcos par sa le ba de nyid ci'i ngo bor yang ma grub pa de chos nyid kyi stong cha yin no// ma grub pa de ka rang rig pa sa le 'dug pas rang rig gi gsal cha'o// stong pa dang gsal ba tha dad du ma gyur pas gsal stong gnyis su med pa'o// de'i phyir na gnyis med kyi bde cha zhes bya'o// gnyis med la rtsal ma 'gags par 'gyu bas/rtsal gyi 'gyu cha zhes bya'o// 'gyu cha med na zhi gnas ltengs po zhes bya ste/ thams cad mkhyen pa 'char mi srid do// rig pa'i rtsal 'gyus pas de sgo lnga la brten nas/ yul gar byung yang shes pa 'char bas gsal ba'i cha yin no// so so skye bo ni rang kha ma yin te 'dzin pa dang bcas pa'o// rtogs ldan ni yul la 'gyu yang 'dzin pa rang sar grol te bag chags kyis gnod mi nus pa yin no// rig pa gsal stong gnyis su med pa de'i rtsal gzugs su shar ba ni 'od kha dog lnga ru shar ba'o// bar gyi rtsal ma 'gags pa ni rig pa gsal stong gnyis su med pa de gsal ba'i cha'o// de ni phyi'i yul la 'gyu ba de yin te/de yang 'gyu ba'i gsal cha mi 'gag pa la 'dzin pa med de 'dzin pa'i shes pa rang rgyud pa de grol ba'o// de yang 'gyu ba rang grol du song ba ste// bar gyi rtsal mi 'gags pa de ye shes zang thal zhes bya'o// rig pa chos kyi sku gsal stong gnyis su med par spros pa'i mtha' dang bral ba de lta bu gcig rang byung du rang gsal tsam na/ phyi'i yul mi 'gag rig pa 'gyu ba sgo lnga la brten nas 'gyu yang 'dzin pa rang sar grol ba'i yul de gsal rung mi gsal rung/snang rung stong rung yul chos kyi dbyings yin par la bcad do// de ltar rtogs pa de lta ba yin te/ de nyid rgyud la gsal ba de bsgom pa'o// de kho na 'gro nyal 'dug sdod mi 'bral bar ma yengs la yengs nas rnam rtog byung yang rang sar grol ba ni spyod pa'o// rtogs pa'i don dang mi 'bral ba 'bras bu'o// zhes gsungs so// spros bral don gsal gyi rgyud chen po las/lta sgom spyod pa gcig tu dril nas bstan pa'i le'u ste nga drug pa'o//// kye kye bcom ldan rdo rje 'chang// gang zag spros pa bcad pa'i phyir// rang byung rig pa phyogs re nas// yon tan bye brag brjod pa dang// spros pa'i mtha' rnams bcad pa'i phyir// rgyas bsdus spros dang bye brag mang bstan kyang// rang byung rig pa'i ngo bo de// don gyi la zlo ci ltar zla// de skad ces ni zhus pa yis// rdo rje 'chang gis bka' stsal pa// rang rig chos sku'i ngo bo de// lta ba ma nor dam pa yin// dpe dang gtan tshigs tha snyad dang// ngo sprod lta bsgom spyod 'bras dang// 'khrul dang rtogs dang goms pa rnams// blo dman lam gyi cha rkyen las// don la ma grub btags pa tsam// ngo bo rig pa chos sku'am// rang byung ye shes bya ba de// rang rig chos sku'i ngo bo las// 'khor ba med cing myang 'das med// gzhi med lam med 'bras bu med// theg pa med cing gang zag med// chos dang chos min gang yang med// 'khor ba'i rgyu dang 'bras bu med// rgyu ni ma rig gnyis bstan dang// rkyen gzhi la sogs gang yang med// 'bras bu 'dod chags zhe sdang dang// gti mug nga rgyal phrag dog med// dug lnga la sogs nyon mongs med// rigs drug 'khor ba'i sems can med// phyi yi 'byung ba lnga yang med// sa med chu med me rlung med// nam mkha' dag kyang btags pa tsam// de ltar snod bcud gang yang med// 'khor ba 'khrul pas btags pa tsam// 'khor ba med cing myang 'das med// rtogs pas sangs rgyas btags pa las// don gyi ngo bo chos sku la// sangs med rgyas med gang yang med// bcom med ldan med 'das pa med// byang med chub med sems dpa' med// de bzhin med de gshegs pa med// dgra bcom zag pa zad pa med// spang bya spang zhing thob bya thob tu med// sangs rgyas bya ba rdul tsam ming yang med// des gsung lam dang theg pa med// lam lnga sa bcu la sogs med// theg dgu rgyu 'bras phyi nang med// thabs lam dang ni grol lam med// rim gyis dang ni gcig car med// bsgom dang mi bsgom spyod dang mi spyod med// lha dang dkyil 'khor ting 'dzin 'phro 'du med// yod dang med dang snang dang stong pa dang// gcig dang du ma rtag dang chad pa dang// dga' dang mi dga' snyan dang mi snyan dang// rnyed dang ma rnyed grub dang ma grub dang// sangs dang ma sangs rgyas dang ma rgyas dang// byed dang mi byed la sogs gang yang med// 'dod dang mi 'dod dbang gis gnyis su byung// don la gnyis med bya ba dag dang ni// blo yi yul la spang blang rdul tsam med// yod pa bkag nas med pa bsgrub tu med// med pa bkag nas yod pa bsgrub tu med// mdor na mtha' yi spros pa kun dang bral// yul la rtsal 'phros spros pa ste// phyogs su bzung bas mtha' zhes bya// yul 'phros zhen cing chags pa med// mtha' yi phyogs su ma lhung bas// spros pa'i mtha' rnams kun dang bral// blo 'das yid kyi yul las 'das// lus kyis byas shing ngag gis smras pa dang// blo yis bsams shing yid kyis mno las 'das// rang rig chos sku bya ba yang// btags pa tsam las don la 'di 'dra med// sku gsum ye shes lnga sogs kyang// mtshon pa tsam du bstan pa yin// byang chub bsgrub bya bsgrub tu med// de dag rang gi ngo bo ste// rig pa chos sku tsam du btags// lta ba la zlo de bzhin yin// gdengs chen de la yid ches gyis// brjod med bsam med mtha' bral de// ye nas gnas pa'i cha nas gzhi// de ma rtogs las 'khrul pa byung// de rtogs mtshon dpe ngo sprod yin// ji ltar gzhi mthong lta ba yin// mthong don gsal bas bsgom pa yin// de nyid dus gsum rgyun khyer ba// spyod pa tsam du btags pa yin// mngon gyur 'bras bu zhes su bstan// lta ba lam 'khyer dus su ni// ngo bo rtsal dang bcas pa gsum// phyi yi yul rkyen 'byung ba'i cha// don la grub pa med pas na// rang snang rang grol dngos med yin// yul gyis don la gnod mi nus// gdengs chen la zlo de bzhin no// zhes gsungs so// spros bral don gsal gyi rgyud chen po las/ lta ba la bzla ba'i le'u ste nga bdun pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// bsgom du yod med ji ltar lags// zhes zhus so// de nas ston pas bka' stsal pa// rdo rje 'dzin pa legs par zung zhig/ ngas bstan bde chen gnyis med la// bsgom du yod dang med pa yi// tha snyad thams cad rnam par dag/shes rab stobs chen rang rig don rtogs pas// gnyis med bde chen ngang du 'du bral med// ma btsal bzhag pas ngang las ma g.yos kyang// rgyun chad med par chu bo gad+gA bzhin// dbang po yang rab don du de bstan to// rten gyi gang zag shes rab 'bring rnams la// mi bsgom bsgom par bstan pa yin// rnal 'byor shes rab rtsal chung la// ma bsgoms sangs mi rgya bar bstan// kye gsang bdag nges par zung zhig/pad+ma 'dam na gnas kyang skyon gyis ma gos ltar// phyi nang 'khrul par shar kyang ni// rang rig ye nas gos pa med// ma 'khrul pa yi sangs rgyas yin// rigs kyi bu gzhi dag pa chos kyi sku la/ 'bras bu dag pa gzugs kyi sku gnyis kyi brgyan nas/don sku gsum 'du 'bral med pa ni// bum pa'i nang gi mar me ltar// ye shes nang na gsal ba'o// rigs kyi bu gzugs kyi phung po phyi snod 'jig rten/ gzhal yas khang 'gro ba 'dul ba'i dkyil 'khor gyi nang na/sku gsum gyi rang gdangs 'gag pa med pa'i ye shes kyi gzhal med khang du 'od gsal lo// de'i nang na sku bzhi sku gsung thugs dang ldan te// rang bzhin rnam par dag pa'i dkyil 'khor 'gag pa med par gnas pa'o// de'i thugs rje he ru ka lngar snang ba mi 'gag pas/ thugs rje rang byung gi dkyil 'khor ste/ de ltar gnas pa ni ma 'khrul ba'i bud+d+ha'o// rigs kyi bu ma 'khrul pa'i bud+d+ha la/ma byas pa'i chos nyid bstan pa ni/ thugs kyi me long yin te/ dper na zag bcas kyi phung po 'di byas pa'i me long gis gtan la pheb pa ltar/ zag pa med pa'i ye shes 'gag pa med par gsal ba/kun gzhi me long lta bu'i ye shes gsal la dag pa/ thams cad 'byung ba'i gzhi ma 'gags pa'i don/ mgar ba'i lag gi 'du byed kyis ma byas pa/ snang ba mtha' yas kyi thugs kyi klong nas/ rang byung du rang shar ba'i shel gyi mchod rten khri 'phang lnga pa/thugs kyi me long du gyur pa ste/ brdar bstan pa'i tshe zag bcas kyi sgrom bus zag med kyi ye shes mi thub par thugs kyi ye shes kyi me long la ji lta ba bzhin du snang ngo// de'i 'khrul gzhi man ngag ti ka chen po las gtan la phab pa'o// don rang byung gi ye shes chen po yin pas/ dus gsum du 'gyur ma myong ste/ mi 'gyur ba'i lta ba thod rgal chen po'o// de ni 'khrul pa log nas ye shes kyi de kho na nyid kyi ti ka chen po'o// des ni rtags kyi sgo nas mi 'gyur ba'i gzer btab pa'o// lung gi ti ka chen pos don la sbyor ro// bdag nyid chen po de kho na nyid kyi ti ka la gzhi bcas pa'o// de'i don rtogs nas bsgom du med de yon tan no// de yang rang chas su gnas pas 'du 'bral med do// yul dang yul can/ bsgom bya dang sgom byed/ dngos po dang mtshan mar dmigs su med/dper na gar spyin la sbrang ma'i 'dab ma chag pa lta bu'o// chos nyid kyi don tha mal gyis mi rtogs pas/ so so'i skye bo tha mal gyis mi go stai/ gong ltar rtogs dgos pas/ yengs su med de skyon can no// nges par rtogs tsa na/ yengs pa med de yon tan no// yengs su med pa ni// 'dug kyang chos nyid rang snang gi ngang las ma g.yos pa tsam du 'dug la/ 'gro yang ye shes kyi rang gdangs la/ rang bzhin mi 'gag pa tsam du 'gro ste/mar me'am nyi ma rang snang dang chas nas 'gro ba bzhin no// nyal yang ngang las ma g.yos pa'i klong rig pa zang thal gyi ngang nas rtsal gzhi la 'dus te/ rang bzhin gzhi la thim mo// mtshan ma rang sar grol nas don la sbyor ba chen por 'gyur ro// langs kyang ngag ma g.yos pa las langs/ rig pa rang shar te rang bzhin ma 'gags par gsal lo// kye ma rigs kyi bu legs par yid la zung zhig/spyod lam bzhi ci spyad kyang/ rang gi gdangs las mi 'da' zhing/ chos nyid ngang las ma g.yos pa/ dper na bya yis gar 'phur kyang/ mkha' las 'da' ba med/ nya yis gar 'phyos kyang chu las mi 'da' ba dang/mi yis gar phyin yang sa las mi 'da' ba bzhin/ rnal 'byor rtogs ldan ngang las g.yos pa med/ rigs kyi bu bsgom bya yang dag par rdzogs pa'i sangs rgyas so// de yi don logs na med de/rang rig chos kyi sku kho na'o// shar ba rnams thams cad ni rang shar ba ste/ rig pa chos sku stong pa dang 'gag pa med pa dang/ de nyid dbyer med pa dang/ de ltar shes pa'i shes rab mi 'gag pa dang/de la thogs pa med pa dang/ mtshan nyid lngar shar ro// de lnga ye shes lngar shar ro// ye shes lnga 'od du shar ro// 'od lnga rigs lngar shar ro// rigs lnga sku lngar shar ro// sku lnga yum lnga mi 'gags so// yab yum la sems dpa' dang sems ma mi 'gags so// sems ma rnams las yul du shar ro// sems dpa' rnams las dbang po dang rnam shes su shar ro// des na rig pa rang shar gyi dgongs pas snang pa la rgyas gdab ste/thams cad rang snang gi ye shes las gzhan snang gi rtog pa med do// 'gags pa'i dus su mtshan ma rang grol gyi dgongs pa rtsal gzhi la 'dug te/ yul lnga sgo lnga'i ngang du grol/sgo lnga sems dpa' sems ma'i ngang du grol/ sems dpa' sems ma rigs lnga yab yum gyi ngang du grol/ de yang ye shes lnga ru grol/ ye shes lnga yang rig pa'i mtshan nyid lngar grol/ mtshan nyid lnga rig pa 'dzin med rang gsal du grol ste/dbang po gnad bsdus kyi man ngag 'byung ba ma la zha/ ye shes dbyings su thim pa'o// de ltar grol nas ngang las ma g.yos pa ni/ shes bya bum par tshud pa ste/ chos nyid chos sku dbyer med zang thal gyi bum pa na/ rang rig pa'i ye shes mar me rlung gis ma bskyod pa ltar gsal ba/ shes bya bum 'jug gi man ngag/ gti mug gnyid la sogs pa shes rab kyi don de kho na nyid la 'byor pa'o// thams cad byung yang rang las byung/ snang yang rang las snang/ gsal yang rang las gsal/ dag cing grol yang rang gi ngang du grol bas na/ ye shes yang dag chen po'o// de ni ngo bo nyid kyi snang ba rang snang las gzhan snang med pa'o// sprin dang khu rlangs byung yang nam mkha' nas byung/ snang yang nam mkha'i ngang la snang/ gnas kyang nam mkha'i ngang la gnas/ dag kyang nam mkha'i ngang du dag/ grol yang nam mkha'i ngang du grol ba lta bu'o// zhes gsungs so// spros bral don gsal chen po'i rgyud las/ bsgom du yod med blo dang sbyar bar bstan pa ste/ blo 'bring la rgyun gyi ting nge 'dzin gtan tshigs dang bcas pa bstan pa ste le'u nga brgyad pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// bsgom du yod la bshad du gsol// zhes zhus pas/ ston pas bka' stsal pa/ rdo rje 'dzin pa nges zung zhig/blo gzhan rnams la bsgom pa bstan// bsgom du med par ma shes na// ma tshor yid la byed pa dang// bya rtsol bral ba mi rtogs te// rgyun gyi ting 'dzin don mi gsal// bsgom du yod par ma shes na// skye bo rnams dang khyad par med// tha mal rang rgyud gol bar 'gro// mi bsgom bsgom pa'i don shes pas// sangs rgyas nyag gcig don du 'du 'bral med// bsgom pa mi bsgom don shes pas// dmigs gtad blo yi mtha' las bzlog/ gnyis su med pa'i don rtogs pas// phyogs rer 'dzin pa'i mtha' dang bral// bsgom du yod pa'i don bstan par// bslab thabs bslab bya lobs pa'i tshad// rnam pa gsum du bstan pa yin// bslab thabs rnam pa gsum du bstan// phyi dang nang dang gsang ba'o// phyi ni lus ngag yid gsum glod// bya ba btang la sdod pa yin// nang ni rtsa yi rlung sgo bsdoms// rang byung dbyings kyi thig le las// dang por lus kyi srid pa chags// de las yas mar rtsa gnyis shar// rtsa gnyis 'dus nas rtsa mdud lte bar gyur// de las rtsa bran rnams kyi lus byings bskyed// de nas snying la sogs pa'i nang khrol rgyas// de las dbugs yod de las rnam rtog shar// de la rtsa bar btags pa mig yin pas// ci snang rang snang yin gyi rnam rtog ma byed ce re ltos// rtags ma bskul bas de nas rig pa rtsal mi 'gyur// rtsal dang ma 'grogs rlung dang ser bu bzhin// ma bsdus rang sar zhog cig 'phro mi nus// de bas rlung ces de la skyon mi blta// rlung yod rtogs pa'i shes rab yongs su rgyas// thabs kyi zin pas mi rtog rang sar gnas// skabs su ha dang phaT ces rlung ro 'bud// gsang bar bslab pa'i thabs gsum ste// rgyal po gdan la bzhag pa dang// blon po btson du bzung ba dang// dmangs rnams cham la shugs kyis phebs so// kye rdo rje 'dzin pa legs par zung zhig/ rgyal po ni rang rig dag pa chos kyi sku'o// gdan ni rang bzhin dag pa nam mkha'i yul du snang ba 'di'o// don ni dbyings kyi thig le yul snang ba 'di'o// de nyid kyi don bdag dang bral ba ni/ dbyings rnam par dag pa rig pa'i ye shes bzhugs pa'i gdan te/ da lta byang chub sems kyi sgron ma/ chu'i rang bzhin dag cing gsal ba la sbyar ro// de yang 'dug tshul gyis gnas pa dang/ snang tshul gyis 'byams pa ste/ dper na bya khra gnas ri brag gi nang na gnas bcas nas/ sdod sa tshang sgor sdod pa bzhin/ dpe de bzhin du rig pa'i ye shes tsit+ta rin po che na bzhugs pa ste/rang gi ngo bo rtags la mngon par gsal lo// gdan la bzhugs pa ye shes kyi snang ba ni/ de ni kun gzhi me long lta bu'i ye shes gsal ba zang thal lo// de bas na dbyings rnam par dag pa'i thig le ni/ chu'i sgron ma'o// nang du tsit+ta gong bzhin du ye shes kyi snang ba 'od du gsal lo// gdan la bzhugs pa ye shes kyi snang ba ni/ ye shes chen po'i thig le ma 'gags par rang gsal lo// ye shes snying po rig par gnas shing/ rig pa la ye shes gsal bas/ lhun gyis grub pa'i thig les mtshan ma dang/ rnam rtog bcom pa'o// de ltar mi 'gyur bar gnas shing/ rang snang las gzhan snang med do// de ni lhun gyis grub pa'i thig le ste/ don snang ba gsum sbyor du bstan na/ mthong bya rang bzhin dag pa'i nam mkha' ni// nam mkha' dag pa'i rang gdangs yin// de yi ngo bo dag pa dang// mthong byed chu yi sgron ma ni// chos nyid dag pa'i ye gdangs so// rig pa yul la shar ba'i snang ba ni// ye shes dag pa'i zer gdangs so// kye ma nam mkha' dag pa'i rang gdangs ni// mtsham mo'i nam mkha' lta bu'o// chos nyid dag pa'i ye gdangs ni// nam langs pa'i nam mkha' lta bu'o// ye shes chen po'i zer gdangs ni// nam mkha' la ni nyi ma shar ba lta bu'o// rgyal po gdan la bzhugs pa ni/ spros bral gyis dbyings 'gyur med kyi ngang du rig pa ye nas dag pa ste/ de las ma g.yos par bzhag go// 'chi bdag bdud kyi sgo nas ye shes kyi rlung rgyu ba'i rtsa gsum gnas pas/ de gsum gcun te/ de bzhin gshegs pa'i dgongs pa la thug pa med de/mtshan mar mi gnas pas/ spyan nam mkha'i dkyil du bltas te/ rtsa rlung gi sgo bsdams so// byang chub sems dpa'i ting nge 'dzin ni/ sangs rgyas sems can gyi bar na gnas pas/spyan bar snang du blta'o// mgrin pa cung zad gcus te/ dpung pa'i khar og ma bzhag go// rtsa gsum rlung gi 'gyu srang bcad pa'o// lha dang mi'i bsam gtan dang/ sems 'dzin ni mtshan ma shas che bas gong ma gnyis po bas dka' ste/ spyan sa la blta'o// de ni mgrin pa cung zad bkug ste/ og ma brang la reg la khad du bya'o// de n-i rgyal po gdan la bzhugs shing gdan thog tu btang ba'i thabs so// des rig pa rgyal po dang 'dra ste rang sa 'dzin pa'o// blon po ni sems te/ rig pa'i rtsal rlung thog tu ma shor bas/ rtog bcas su mi rgyu rtog med du gsal te/ dper na blon po btson du zin pas gros blo dang bya ba byed mkhan med pa lta bu'o// lus dang ma bral bar dbugs yod de/ rig pa la rta yod pas blon po lta bu'o// btson du zin pa 'dra ste/ rtog pa'i rlung yod la rgyu mi nus so// sgo lnga 'bangs dang 'dra bas las byed pa yin no// dus der gsal la rtog pa med do// de ni 'bangs cham la 'bebs pa lta bu'o// kye rigs kyi bu bslab par bya ba ni// ngang dngas rang bzhin bdag nyid chen po'o// rang bzhin dag pa'i nam mkha' dang// chos nyid dag pa'i nam mkha' gnyis// rnam rtog bral ba'i rig pa gsum// dbyer med stong zhing mi rtog pas// ma bcos pa yi ngang zhes bya// rang rig ye shes gsal ba dang// 'byung bzhi gdangs su shar ba gnyis// rang bzhin ma 'gags ye shes gdangs// gsal bar snang la rang bzhin med// stong pa med na rang bzhin yod// dbyer med bdag nyid chen po'i don// mdor na rang rig ye shes yin// lobs pa'i tshad ni/ shes pa rkyen gyi dbang du mi 'gro zhing/ rnam rtog rgyun bcad mtshan ma zil gyis gnon pa'o// drod rtags mi 'dod bzhin du 'byung// 'dus byas zhing lams chen por ldog/lung ston rim par 'byung ba yin// bla ma yi dam mkha' 'gro las// dngos dang 'byung ba'i sgra la brten// de yis nges par rgyud la skye'o// zhes gsungs so// spros bral don gsal chen po'i rgyud las/bsgom du yod par bstan pa'i dgongs pa dang/ bsgom thabs rgyas par bstan pa'i le'u ste nga dgu pa'o//// kye kye bcom ldan rdo rje 'chang// bsgom du yod med sa mtshams yang// blo dang sbyor ba de lags na// rang gi mtshan nyid bsgom pa de// ma nor legs par bstan du gsol// zhes zhus pas/ ston pas bka' stsal pa// rang gi mtshan nyid bsgom pa de// rang gi rig pa chos kyi sku// ngo sprod bdun gyis rtogs pa de// zhe la gdengs su tshud gyur pas// de don rgyud du gsal gyur na// bsgom pa rang gi mtshan nyid yin// rig pa chos skur rtogs gyur na// sku gsum lhun gyis grub pa yin// ye shes lnga yang lhun gyis grub// rang rig chos sku de las ni// rnam rtog yul gyi rkyen gyur nas// 'khrul ba'i rtog pa byung gyur na// spyod lam gdams pa bzhin du khyer// ye nas gnas pa'i cha nas gzhi// de nyid rtogs pa lta bu'o// de gsal bsgom pa tsam du btags// rgyun du khyer ba spyod pa'o// mngon gyur 'bras bur bstan pa'o// zhes gsungs so// spros bral don gsal chen po'i rgyudalas/ bsgom pa rang gi mtshan nyid bstan pa'i le'u ste drug bcu pa'o//// kye kye bcom ldan rdo rje 'chang// bsgom yod bsgom med bstan pa dang// bsgom par rang gi mtshan nyid bsgom// rgyas par bshad pa de lags na// theg pa brgyad kyi gol sa dang// spyi yi gol sa bstan pa rnams// rdo rje 'chang gis gsung du gsol// de skad ces ni zhus pa las// rdo rje 'chang gis bka' stsal pa// rim dgu bsgom pa'i gol sa dag/gong 'og skabs nas gsal bar bshad// spyi yi gol sa 'di ltar bshad// zhi gnas stong pa'i gol sa lnga// lhag mthong gsal ba'i gol sa lnga// de nyid spyi yi gol sa gnyis// gol sa bcu gnyis dag tu bshad// stong pa'i phyogs kyi gol sa lnga po ni// zhi gnas had po'i gol sa ni// rnam rtog zhi gnas yin pas na'o// btang snyoms lteng po'i gol sa ni// rtsol ba med de ngang gnas pa'o// stong pa chad po'i gol sa ni// bem rig gang yang mi 'dod pa'o// mi rtog 'thom pa'i gol sa ni// dran med gsal cha 'gags pa'o// 'dzin med had po'i gol sa ni// yul gyi rnam pa snang gyur yang// gang yang gtan la ma phebs pas// rang ngo ma shes 'dzin pa med// 'dzin pa med kyang gsal cha med// de phyir gol sar bstan pa'o// kye gsang ba'i bdag po nyon cig/ gsal ba lhag mthong gol sa ni// kun brtags lha yi gol sa d ang// mtshan ma 'od kyi gol sa dang// rtsa rlung bde ba'i gol sa dang// gzung 'dzin yul gyi gol sa dang// 'khor ba sdug bsngal gol sa rnams// gsal ba dag las gol sa'o// ched du byas pa'i gol sa ni// ma tshor yid la byed pa'o// ma bsgoms 'khrul pa'i gol sa ni// skye bo rang khar 'dzin pa ste// 'khrul pa phyi ru shor ba yin// lta ba rtogs don gsal gyur na// gol sgrib sdug bsngal 'byung mi srid// ces gsungs so// spros bral don gsal chen po'i rgyud las/ bsgom pa'i gol sa bstan pa'i le'u ste re gcig pa'o//// kye kye rdo rje 'chang chen po// bsgom pa rang gi mtshan nyid ni// ma nor bstan pa de lags na// de ltar ma shes bsgom pa'i skyon du 'gyur ba ste// de nyid mi gol gdams ngag ma nor gsung du gsol// de skad ces ni zhus pa dang// rdo rje 'chang gi bka' stsal pa// nyon cig gsang bdag rdo rje 'chang// rang gi rig pa chos sku de la ni// rgyu rkyen ma bskyed rang byung yin pas na// glo bur byas bsam dag gi gol sa chod// rang gi ngo bo stong par 'dug pas na// dngos po rtag pa la sogs gol sa chod// de nyid ngo bo gsal ba yin pas na// chad pa stong pa rnams kyi gol sa chod// gsal stong gnyis med gcig pa'i bdag nyid pas// ting 'dzin rnam gsum rig pa'i gol sa chod// yon tan thams cad lhun gyis grub pas na// 'bras bu gzhan nas re ba'i gol sa chod// thugs rje 'gag pa med par 'byung bas na// 'gro ba'i don med thugs rje rgyun chad gol sa chod// gsal ba'i rtsal gnyis mi 'gag pas// zhi gnas btang snyoms mi rtog gol sa chod// chod sku rang gnas bsgom mi dgos pa yis// lta sgom kun brtags bsgom pa'i gol sa chod// chos sku mtshan ma gang du mi gnas pas// mtshan ma 'od du bsgom pa'i gol sa chod// rig pa bde stong gsal la mi rtog pas// rtsa rlung thig le lus la brten pa'i gol sa chod// dngos po rang rgyud ma yin pas// 'jig rten dngos po rang gar 'dzin pa'i gol sa chod// ye gsal chen po chu bo'i rgyun du gnas pas na// sems 'dzin thun bsgom rtsol ba'i gol sa chod// yul gnyis sems su bsdus nas mi bsgom pas// snang ba chos skur 'dod pa rnams kyi gol sa chod// da lta'i dus su chos sku rang shar bas// 'bras bu phyi nas thob pa'i gol sa chod// rtsa ba chos kyi sku la bdag 'dzin ma grub pas// 'dzin pa zhe 'dod can gyi gol sa chod// bsgom dang mi bsgom yengs dang ma yengs mtha' dang bral ba yis// ma tshor yid la byed pa'i gol sa chod// chos sku'i ngo bo rtag pa chen po las// smon lam 'dus byas dag la re ba'i gol sa chod// da lta nyid du 'bras bu mngon du gyur pas na// sa lam rim gyis bgrod pa'i gol sa chod// spyi yi gol sa bco brgyad yin// theg pa'i rim pa'i gol sa rnams// rang gi mtshan nyid mthong na gol mi srid// ces gsungs so// spros bral don gsal chen po'i rgyud las/bsgom pa'i gol sa bcad pa'i le'u ste re gnyis pa'o//// gsang ba'i bdag pos yang zhus pa// kye kye bcom ldan rdo rje 'chang// spyod pa'i bye brag gsung du gsol// zhes zhus so// ston pas bka' stsal pa// rdo rje 'dzin pa nges zung zhig/ blang dor med pa'i spyod pa ni// spyad rgyu med pa spyod pa'i mchog/ chos nyid don gyi spyod pa ni// mtshan ma med pas nam mkha' bzhin// chos can mtshan mar mi blta bar// rnal 'byor zag med rab kyis// dngos med nam mkha' bzhin du spyad// rang rig ye shes spyod pa ni// dper na rin chen me long bzhin// ye shes rang bzhin ma 'gags pas// rang shar rang snang chags sdang bral bar spyod// lta ba don gyi spyod pa ni// khyung chen mkha' la lding ba bzhin// bya bral lhun gyis rdzogs par spyad// dgongs pa don gyi spyod pa na/ dper na chu bo gang+gA bzhin// rgyun gyi rnal 'byor chen por spyod// 'bras bu don gyi spyod pa ni// nyi ma 'od zer bcas pa bzhin/ sku gsum 'du 'bral med par spyad// dgongs pa'i ngang las ma g.yos par// shes rab chen pos don la spyad// rnal 'byor yid kyi spyod pa yin// rnal 'byor ngag gi spyod pa ni// dper na brag cha sgra sgrogs ltar// sgra rnams zhen pa med par spyad// lus ngag yid gsum spyod pa ni// 'jig rten 'khor 'das chos 'di la// dper na me l ong gzugs brnyan bzhin// snang la zhen chags med par spyad// dran pa med pa'i spyod pa ni/ rnal 'byor tshul 'chos mi bya bar// glang chen smyon pa bzhin du spyad// bungab me tog 'jib pa bzhin// gcig tu zhen med rnal 'byor gang bder spyod// thugs rje chen po'i spyod pa ni// dper na nyi ma'i snying po bzhin// lus ngag yid kyis 'gro don rdzogs par spyad// thugs rje gdung ba'i spyod pa ni// bu gcig pa yi ma bzhin du// rnal 'byor pa yis 'gro don spyad// gnyis su med pa'i spyod pa ni// ched du mi dgag ched du bsgrub pa med// ched du mi spyad ched du mi spang ngo// ma bcos ngang la rang bzhin 'gags med spyad// ces gsungs so// spros bral don gsal chen po rgyud las/ spyod pa bsdus nas bstan pa'i le'u ste re gsum pa'o//// gsang ba'i bdag pos yang zhus pa// kye kye bcom ldan rdo rje 'chang// spyi yi spyod pa de ltar na// rang gi mtshan nyid spyod pa gang// rdo rje 'chang gis gsung du gsol// zhes zhus so// rdo rje 'chang gis bka' stsal pa// spyi yi spyod pa gong bzhin te// gang zag nyams su len pa la// rang gi mtshan nyid spyod pa ni// dbang po yang rab gyur pa la// lta ba lhag gis rtogs pa yi// de yi ngang las mi 'bral bas// lta sgom spyod pa dus gcig rdzogs// 'bras bu gzhan nas mi 'tshol bas// dus de nyid du cig car rdzogs// 'bring dang tha ma'i spyod pa ni// dus bzhi dag gi spyod pa dang// dus gsum gcig pa'i spyod pa'o// dus bzhi dag gi spyod pa ni// nyal khar rtsal lnga gzhi la bsdu// dbang po rnam lnga gzhi yi rtsal// gzhi yi gsal cha ma 'gags pas// dbang po la brten phyi yul spyod// gzung 'dzin gnyis snang dug lnga bskyed// de dag gnyid du 'gro kha ru// gsal cha gzhi yi steng du 'dus// tha mal gti mug nyid du 'gro// gang zag rtogs dang ldan pa la// rmi lam med par song gyur nas// shes bya bum par tshud pa yin// ma bsgoms rmi lam 'byung gyur yang// med pa'i bar du bum 'jug go/ rmi lam dag dang sad dus su// rig pa rang gsal gdams ngag tu// rmi lam dran rtog byung ba 'am// sad pa'i dran rtog byung ba na// don dran 'dzin pa rang grol bas// snang ba rang snang rang sar dag/ 'dzin pa grol bas snang ba dag/goms pa brtas na rmi lam chad// 'dzin pa grol ba'i spyod pa ni// mar me bzhin du rang gsal lo// langs dus yul lnga rgyas btab ste// mig yul gzugs la rna yul sgra// sna yul dri la lce yul ro// lus yul reg bya la sogs pa// yul ni rnam pa lnga yang snang// rang snang zhes su bstan pa yin// bskyod par byed pas 'gyu ba rlung gi rtsal// yul dang snang ba gzugs tsam yin// rang snang yul la 'dzin zhen med gyur na// phyi yi yul la rgya yis thebs pa yin// snang ba rgya yis btab ces bya// rtog pa skyes nas don dran pas// 'dzin med skye bas 'dzin pa grol// grol 'dzin yul la rtog mi 'jug/ nyams blangs goms na rtog pa yal// dus bzhir 'gyu ba med par ni// rang rig chos sku rang gsal te// dper na nyi ma'i snying po de// gsal dang mi gsal 'grogs nas yod// rig pa chos sku de bzhin pas// dus bzhi 'gyur med gdengs kyis bzung// zhes gsungs so// spros bral don gsal chen po'i rgyud las/ spyod pa rang gi mtshan nyid dus bzhi mnyam sbyor gyi man ngag bstan pa'i le'u ste re bzhi pa'o//// de nas yang gsang ba'i bdag pos zhus pa/kye kye rdo rje 'chang chen po// dus bzhi'i spyod pa de ltar na// dus gsum spyod pa ji ltar lags// zhes zhus so// rdo rje 'chang gis bka' stsal pa// gang zag snod ldan don ched du// dus gsum spyod pa 'di ltar spyad// rang rig chos sku dus gsum du// nyi ma gsal dang mi 'bral bzhin// rang rig gsal dang mi 'bral te// ngo ma shes pa'i stobs dag gi/ bag chags ngan pas gsal sgrib 'byung// de phyir dus gsum spyod pa gces// rang rig rang gsal mnyam bzhag dus// de las yengs pa rjes thob dus// dug lnga langs pa rnam rtog dus// de gsum chos sku mi 'bral ba// spyod pa'i la zlo yin par bshad// mnyam gzhag chos sku gsal ba la// de las yengs pa byung dus su// yul ni gang byung rtsal snang de// 'dzin byed rtog pa rang grol bas// rang rig chos sku rang dran pas// ngar 'dzin pa yi rtog pa stong// de phyir snang ba rang snang la// 'dzin byed rtog par rang sar grol// rags pa dug lnga skyes pa'i tshe// zhe sdang dgrar snang rang snang la// 'dzin byed dgrar snang rang grol yin// rang rig chos sku'i don rtogs pas// 'dzin rtog phra rag rang sar grol// dug lnga gzhan la'ang de bzhin sbyor// rang rig chos sku'i rtsal las byung// zhi yang chos sku'i ngang du zhi// dper na nam mkha'i rang bzhin la// sprin dang du ba khu rlangs 'byung// byung yang nam mkha'i ngang las byung// zhi yang nam mkha'i ngang du zhi// rang byung rang snang rang bzhin nam mkha'i ngang// phyi yi yul nyid snang ba la// nang gi rig pa rtsal shar ba// 'dzin pa dag gis bzung gyur na// rnam par rtog pa zang thal yin// 'khor ba'i sems can rnams kyi las// yul la 'gyu ba'i shes pa ma 'gags te// 'dzin byed rtog pa rang grol pa// ye shes zang thal rtog pa'i las// rang gi shes pas spyad kyang ni// rang snang rang grol 'dzin pa med// yul sems cha mnyam 'phrad gyur na// 'dzin pa grol ba dus mnyam dag/ snang ba dus mnyam dag pa yin// zhes gsungs so// spros bral don gsal chen po'i rgyud las/ dus gsum mnyam sbyor gyi spyod pa'i le'u ste re lnga pa'o//// gsang ba'i bdag pos yang zhus pa/ kye kye bcom ldan rdo rje 'chang// lta sgom spyod pa'i gdeng med par// bdud kyi spyod yul ji ltar 'byung// de yi bzlog thabs ji ltar lags// de skad ces ni zhus pa yis// rdo rje 'chang gis bka' stsal pa// lta sgom spyod pa'i gdeng dang ldan gyur na// bdud kyi spyod yul mi 'byung ste// ji srid gdeng dang ma ldan na// bdud kyi spyod yul bco brgyad byung// lta ba gol zhing gdeng med na// gzung 'dzin nyon mongs dug lnga 'byung// bsgom pa gdeng med gol gyur pas// bying dang rgod pa'i bdud gnyis byung// spyod pa gdeng med gol gyur pas// spyod pa dag la bdud bdun byung// lta sgom spyod pa'i gdeng med pas// nyams kyi bdud ni bzhi 'byung ste// de ltar don dang mi ldan pas// bdud kyi spyod yul 'byung bar 'gyur// rang 'byung ye shes rang la yod gyur kyang// rgyal bu dmangs su 'khyams pa bzhin// rang ngo rang gi ma shes pas// gdams ngag med de rtogs pa ma shar bas// lta ba gdengs su ma gyur pa// dug lnga yul snang shar ba'i tshe// de la 'dzin pa'i shes pa 'jug par 'gyur// sgo lnga dag la brten nas 'jug/ zhe sdang gzung yul dgrar snang tshe// 'dzin pa yid kyi rnam rtog ni// mig gi yul du gzugs snang bar// zhe sdang bar ni skye 'gyur ro// rna bar tshig rtsub byung ba dang// yid 'dzin zhe sdang lhag gi bskyed// rang snang 'dzin med mi bden bdud// rang gar bzung na bdud kyi las// khams gsum 'khor ba'i gnas su 'khyams// de bzhin nyon mongs gzhan la yang// gzung 'dzin gnyis kyis log par spyod// bdud las bzlog phyir nyon mongs grol ba ni// dgra nyid rig pa'i rtsal snang ba// rang gi ngo bo stong gsal yang// stong gsal 'dzin pa ma grub pas// zhe sdang 'dzin pa rang sar grol// de bzhin nyon mongs gang la yang// rang snang rang grol dag yin te// rang gi yul la phar dpyad na// rang gi rtsal shar rang sar grol// yul nyid tshur la mngon shar na// de la shes pa phar 'jug pas// rang snang 'dzin med rang sar grol// yul sems dus mnyam 'phrad gyur na// rang gsal yul gsal 'dzin med grol// chos sku rang gsal chen po las// dus gsum 'gyur ba med pa'o// rnam rtog 'gyu ba glo bur yin// yul la 'dzin pa gnyis ka ni// 'khrul rtsal yin pas glo bur yin// de ltar shes pas lta bdud chom// bdud chom sangs rgyas da lta nyid// lta ba gdeng dang ldan gyur na// sgom spyod nyams kyi bdud kyang chom// sgom pa'i bdud ni gnyis yin te// bying dang rgod pa rnam gnyis so// bying rgod bdud ni gang byung yang// bying rgod rang sar rang grol lo// ji ltar bying rgod byung gyur kyang// chos sku 'gyur med gdeng gis bzung// spyod pa man ngag ji bzhin no// rang byung rang snang rang gsal te// rang rig 'gyur med rtsal snang ste// nyi ma'i 'od bzhin gsal zhing 'bral ba med// rnam par rtog pa glo bur tsam// de ltar rtogs pa'i gang zag gis// bying rgod bdud las grol bar 'gyur// spyod pa'i don las gol gyur pas// spyod pa'i bdud ni bdun du byung// 'du 'dzi longs spyod g.yeng ba'i bdud// shes bya yon tan g.yeng ba'i bdud// longs spyod bdud la rnam pa gnyis// 'dod pa'i longs spyod 'grub tu re ba dang// mi 'dod dgra ltar dgag pa'o// shes bya yon tan la yang gnyis su bstan// 'grub tu re dang ma 'grub dogs pa'o// gang la spyod pa gang la skye gyur yang// 'grub pa med de bdud du 'gyur// phyi ru tshul 'chos bdud dang ni// nang na nyon mongs rang gis spyod bdud drug/ bye brag yin te de las dbye na bsam mi 'khyab/ gang la ched du 'dzin pa de// bdud rnams kun gyi spyi yin te// ched 'dzin med na bdud mi 'byung// spyod pa'i bdud bdun gang la yang// rang las byung zhing rang las snang// de dag rang sar grol ba yis// gong gi lta sgom spyod skabs bzhin// gong gi gdeng bcas dus bzhin du// lta bar rang byung rang snang gdeng ldan pas// spyod pa'i bdud kyes mi tshugs te// mdor na bdud rnams gang byung yang// rang byung rang snang rang sar grol// de ltar rtogs na bdud dang bral// nyams kyi bdud bzhi bstan pa ni// lus ngag yid las byung ba dang// byin gyi rlob pa lung ston 'byung// dang po lus kyi bdud bstan pa// de bzhin gang yang yid la yang// mtshan ma rtags su 'byung ba ni// de la yang dag 'dzin pa yin// de bzhin ngag dang yid la yang// mtshan rtags dam par blta ba ni// de nyid ngag dang yid kyi bdud// lus la bde ba la sogs 'byung// ngag la bde thob chos smra la sogs 'byung// sems la mngon shes la sogs 'byung// phyi ru byin rlabs lung bstan 'byung// de ltar dam par dgongs spyod du// bzung na nyams kyi bdud du 'gyur// de dag bdud las 'grol ba ni// de bzhin lta sgom spyod pa la// gdeng gis zin pa ji bzhin du// nyams bdun bzhi sogs ngos zin na// nyams la bden par 'dzin pa de// rang snang rang grol dag tu 'gyur// ched 'dzin rang sar grol gyur bas// nyams kyi rim pa ci byung yang// de ltar lta sgom spyod pa'i rtags// rang byung ye shes rang chas las// mtshan rtags ched du mi bsgrub ste// shugs las 'byung ba mi dgag go/ dper na rin chen dgos 'dod 'dra// zhes gsungs so// spros bral don gsal chen po'i rgyud las/ bdud kyi spyod yul bco brgyad bstan pa'i le'u ste re drug pa'o//// kye kye bcom ldan rdo rje 'chang// bdud kyi spyod yul grol gyur nas// the tsom gegs rnams sel gyur na// nyams kyi rim pa ji ltar 'char// rdo rje 'chang gis gsung du gsol// de skad ces ni zhus pa las// rdo rje 'chang gis bka' stsal pa// nyon cig gsang ba'i bdag po khyod// gang zag phyi ma lta sgom dang// spyod pa dag la gnas pa la// nyams kyi rim pa 'byung ba ni// dbang po rab 'bring tha gsum las// rab ni rtogs pas grol ba ste// bdud dang the tsom gegs rnams sel// sgom spyod gnyis la sbyang mi dgos// rtogs grol sangs rgyas da lta nyid// nyams kyi rim pa brtsi ru med// tha mal lus dang ma bral kyang// dgongs pa sangs rgyas thugs ltar gnas// rang rig chos sku gsal stong 'phyo// thig le nyag gcig spros dang bral// ngo bo 'gyur ba med pa la// rtsal mi 'gag ste sgo lngar shar// de phyir rtsal ni zang thal 'dzin pa med// sku gsum 'gyur ba med par gnas// gang zag 'bring dang tha ma la// bdud dang the tsom gegs 'byung srid// de la gol sa gong ltar chod// gol sa chod pas nyams rtogs 'byung// bdud med nyams ni myur du 'byung// drod dang rtags dang nyams dang gsum// drod ni rang la gsal ba yin// rtags ni gzhan la gsal bar 'byung// gnyis ka la ni nyams su rtogs// de dag rnams kyi rim pa ni// lus ngag yid la 'byung bar 'gyur// 'og ma rnams dang cha bstun pa// g.yo thob goms brtan mthar phyin pa'o// de yang rtogs dang dag pa dang// dag pa chen po gsum du 'dus// dang po g.yo ba'i nyams bstan pa// ngo sprod gdams ngag zhu dus su// rang ngo 'phrod pas rtog pa g.yos// rtogs pa lhag gis skye bar 'gyur// lus kyang bde ba de la 'byung// ngag kyang 'khrul gtam shas chung ngo// de nas thob pa'i rtags bstan pa// lta ba gdeng du gyur pa de// thob pa'i nyams ni yin par bstan// de phyir lta ba gdeng zin thob// lta ba gdeng gis zin pa ni// rangarig chos sku rtogs pa ste// rang byung ye shes yin pa'i phyir// dus gsum 'gyur ba med par go// 'gyus pa rang sar grol bas na// 'gyu ba ye shes zang thal yin// 'gyu ba'i srog ni chod pa'o// yid ni ched 'dzin bral bas sems bde ste// ngag kyang 'khrul pa'i gtam rnams 'gags// goms pa'i nyams ni 'di ltar 'byung// gong gi don dang ma bral ba// dus gsum rgyun du lam 'khyer bas// goms pa'i nyams su bstan pa yin// spyod pa'i man ngag ces pa ste// dus bzhi'am dus gsum gong ltar ro// de dag shin tu goms gyur na// yengs dang ma yengs med pa yin// mnyam bzhag rjes thob gnyis dang bral// yengs dang ma yengs gnyis ka med// rang rig chos sku'i ngo bo la// sku gsum ye shes lhun grub ste// rang yin dus gsum 'bral ba med// 'khrul pa'i snang ba 'byung gyur yang// 'dzin pa'i blo dang bral bas na// yul rkyen ci byung rang sar grol// rig pa de ltar shar ba'i tshe// lus sems 'khrul pa'i dbang mi 'gyur// rig pa mngon shes phra mo 'byung// ngag kyang bden pa thob par 'gyur// lus la na tsha sdug bsngal bral// dgra bgegs phyi nang srin 'bu rnams// de yi gnod pas tshugs mi 'gyur// ngag gis ma bslabs chos rnams smra// mkha' 'gro bde gshegs lung ston 'gyur// dgra bgegs gnyis la bden pa 'jug/ goms pa brtan pa'i nyams yin no// goms pa'i gzhug la brtan pa 'byung// goms pa shin tu gsal bar 'byung ba'o// de la dag pa'i snang ba shar// phyi yi 'khrul snang 'di dag ldog/ dag pa'i snang ba 'od snang 'char// lus dag pa ni 'od kyi lus// rig pa chos sku 'gyur mi srid// rnam par rtog pa rtsad nas chod// bdag tu 'dzin pa gzhi nas grol// mngon par shes pa lnga ga 'char// tha mal lus dang bral dus su// nad gcod skye shi'i sdug bsngal med// lus dang bral nas rin chen sbubs// longs sku'i snang ba 'char bar 'gyur// de dag gong 'og gzhan na gsal// mthar phyin nyams ni longs sku'i dus// yon tan brjod kyis mi langs so// bde ba dus gsum zad mi srid// nyams lnga lam lngar sbyar ba ni// tshogs lam sbyor lam dus na g.yo nyams 'byung// mthong ba'i lam la thob pa'o// bsgom pa'i lam dang goms nyams gcig/ brtan dang mthar phyin nyams gnyis kyang// mi slob lam dang ngo bo gcig/nyams dang lam du sbyor ba'o// rtogs pa don gyi ngo bo la// rang rig chos sku 'gyur ba med// de la rtags mtshan blo snang yin// 'bring dang tha ma'i blo dag la// rnam rtog dag gis bsgribs pa ste// rtog pa gsal zhing 'khrul pa 'gags// de la nyams kyi snang ba 'byung// zhes gsungs so// spros bral don gsal chen po'i rgyud las/ nyams bstan pa'i le'u ste re bdun pa'o//// de nas gsang ba'i bdag pos zhus pa// kye kye bcom ldan rdo rje 'chang chen po// dang po gzhi yi gnas lugs nas// 'bras bu'i don la thug gi bar// the tshom gegs rnams ji ltar sel// sel ba'i yon tan ji ltar lags// rdo rje 'chang gis gsung du gsol// de skad ces ni zhus pa las// rdo rje 'chang gis bka' stsal pa// gsang ba'i bdag po nga la nyon// gzhi nas 'bras bur thug par la// gegs bdun drag gis sel 'gyur te// gzhi yi gegs dang 'khrul pa'i gegs// lta sgom spyod pa nyams kyi gegs// 'bras bu'i gegs dang bdun gyis bstan// kye kye rdo rje 'chang chen po// gegs bdun rgyas par gsung du gsol// zhus pa'i don gsan bka' stsal pa// dang po gzhi yi gegs bstan pa// sangs rgyas sems can gnyis med de// dngos po'i don gyi gnas lugs de// ka dag yin nam lhun grub yin// sangs rgyas yin nam sems can yin// sangs rgyas yin na 'khrul mi srid// ji srid sems can yin gyur na// nges pa yin nam ma nges yin// ji srid nges pa yin gyur na// spros bcas yin nam spros med yin// mtha' can yin nam mtha' bral yin// gzhi yi ngo bo lhun grub der// 'khor 'das thams cad lhun gyis grub// ngo bo nges pa chen po la// rtsal ni ma nges sna tshogs snang// mtshon tshul gang du shan ma phyed// gzhi yi the tshom de ltar chod// 'khrul ba'i gegs ni 'di ltar bsal// med la yod 'dzin 'khrul pa la// phyin ci log tu rtags pa yin// yang dag rtogs na 'khrul pa dag/ de yis 'khrul pa'i the tshom mchod// lta ba'i gegs ni gang sel na// rang byung chen po yin pas na// glo bur skyon gyis gos pa med// ngo bo 'gyur med gsal stong la// rtsal ni sna tshogs 'dzin med 'char// gang gi mtha' ru mi 'gyur bas// mtha' yi skyon gyis 'jigs med pas// lta ba'i the tshom de yis chod// gol sa gcod pa'i skabs na gsal// bsgom pa'i gegs ni gang sel na// bsgom du yod na 'og mar 'gyur// med na rtogs med sangs rgyas 'gyur// yang na so so skye bor 'gyur// rang byung ye shes rang gnas pa'i// ngo sprod rang ngo shes tsam na// rang gis rang nyid gsal ba las// blo yis bsdu zhing bsgom du med// dbang po 'bring la dran pa tsam// chos sku gsal na dran pa stong// ma bsgoms rgyun du 'bral ma myong// bsgom dang ma bsgoms don la med// bsgom pa'i the tshom de yi chod// spyod pa'i gegs rnams gang sel ba// spyad pas grol lam ma spyad grol// ma spyad grol ba'i sgra mi 'jug/ spyad na ched spyad dag tu 'gyur// rig pa dang ni snang ba gnyis// rtsal mi 'gag pa'i stobs kyis ni// de gnyis phan tshun rol pa las// ched du spyad pas spyad rgyu med// ngo bo spros dang bral ba la// rtsal ni mi 'gag sna tshogs 'char// de yang yul la brten nas 'char// rang shar rang grol spyod pa ste// yul rkyen sna tshogs shar gyur kyang// 'dzin med rang sar grol ba yis// spyad rgyu med de shugs 'byung tsam// spyad med don dang mi 'bral tsam// ma 'gags zhen med spyod pa'i mchog/ spyod pa'i the tshom de yis chod// nyams kyi gegs ni gang sel na// rang byung chos sku 'gyur med ni// nyams myong mtha' las 'das pa ste// re zhig gang zag ma goms pas// bden pa gsal ni 'debs pa la// chos sku gsal zhing rtag pa 'grib// de yi nyams myong shugs las 'char// nyams la ched 'dzin 'dod pa med// sprin dengs nyi ma gsal ba 'dra// nyams kyi the tshom de yis chod// 'bras bu'i gegs ni gang sel na// 'bras bu rang byung chos sku de// gdod nas yod na btsal ma dgos// glo bur 'dus byas 'jig par 'gyur// gdod nas rang byung chos sku de// rang ngo ma shes rtog pas bsgribs// de nyid ngo shes rtogs tsam na// dang po rang byung rang ngo 'phrod// rtogs pa grol nas mngon du 'gyur// rgyal bu dmangs 'khyams rgyal sar bton// rang sa zin pa j-i bzhin no// 'bras bu'i the tshom de yis chod// rang byung rig pa chos sku de// gang gi ngo bor ma grub pas// mtshan ma 'dus byas the tshom chod// gsal la mi 'gag 'char ba yis// stong pa zhi gnas the tshom chod// rtsal ni 'od du snang ba yis// rig pa rkyang pa'i the tshom chod// gsal ba sna tshogs 'char ba yis// mi rtog ltengs po'i the tshom chod// gang la 'dzin pa med gyur pas// ma tshor yid la byed pa bral// zhes gsungs so// spros bral don gsal chen po'i rgyud las/ the tshom dang gegs bsal ba'i le'u ste re brgyad pa'o//// de nas yang gsang ba'i bdag pos zhus pa// kye kye bcom ldan rdo rje 'chang// de yis 'bras bu ji ltar lags// zhes zhus so// ston pas bka' stsal pa// rdo rje 'dzin pa legs zung zhig/ 'bras bu lta ba mngon gyur te// de yi gnas lugs bstan pa ni// chos nyid phyi nang med par gsal// rig pa phyi nang med par khyab// gnyis med chos sku rdo rje'i lus// rang gsal 'dzin med ngang du gnas// de las mkhyen pa ma 'gags pas// rang rig ye shes longs spyod rdzogs pa'i sku// yul gyi rang bzhin ye shes spyan gyi bum pa lnga// snang la dngos med nam mkha'i 'ja' tshon bzhin// de yi ngang na sprul pa'i sku lnga gsal// gsal la mi rtog bum pa'i mar me bzhin// sku gsum nang gsal 'du 'bral med par gnas// rig pa rang snang gsal ba zang thal bas// sku gnyis yul du mi snang zhing// yon tan ma 'gags 'du 'bral med// sku gnyis ma 'gags yod pas med pa ste// chos sku mi 'gyur med pas yod pa ni// mkhar gzhong bcud dang me long gzugs brnyan bzhin// snang la rang bzhin med pas mtshan ma'i skyon dang bral// mi snang rang bzhin yod pas chad lta stong pa'i skyon las 'das// mtha' bzhi las grol 'khor ba rgya yis thebs// don la 'gyur med rig pa rang sa zin// zhes gsungs so// spros bral don gsal chen po'i rgyud las/ 'bras bu ji ltar 'byung ba bstan pa'i le'u ste re dgu pa'o//// de nas yang gsang ba'i bdag pos zhus pa/ theg pa'i ngo bo nges tshig dang// dbye ba dpe rnams gsung du gsol// zhes zhus so// ston pas bka' stsal pa/ rdo rje 'dzin pa legs zung zhig/theg pa'i ngo bo shes rab snying rje yin// de gnyis che chung theg pa che chung snang// theg pa'i nges tshig 'degs dang bskyod pa yin// dbye na mang yang bsdu na gnyis las med// rgyu rkyen lam khyer mtshan nyid theg pa dang// 'bras bu lam khyer gsang sngags theg pa gnyis// rkyal ba gru gzings mtshan nyid theg pa'i dpe// zam pa sa gzhi gsang sngags theg pa'i dpe// zhes gsungs so// spros bral don gsal chen po'i rgyud las/theg pa'i don bshad bsdus te bstan pa'i le'u ste bdun bcu pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// theg pa so so'i lta bsgom dang// spyod pa 'bras bu'i don gsungs pa// de yi ngo bo nges tshig dang// dbye ba mthun dpe gsung du gsol// zhes zhus so// ston pas bka' stsal pa/ lta ba'i ngo bo so so'i dbye ba las bshad par bya'o// nges pa'i don lta ba rang rig ye shes kyi ngo bo ni/phyogs lhung med pa'i shes rab po// nges tshig ni yang dag pa'i shes bya grub mtha'i mthar gyur pas na lta ba'o// dbye na gnyis so// yang dag pa'i lta ba dang/ yang dag pa'i lta ba ma yin pa'o// yang dag pa'i lta ba ni a ti yo ga'o// yang dag pa'i lta ba ma yin pa ni a nu man chod do// lta ba'i dpe ni gnyis te/ yang dag pa'i dpe ni man shel dang snang ba lta bu'o// yang dag pa ma yin pa'i dpe brgyad do// rigs kyi bu legs par zung zhig/ nyan thos rang rgyal chu rgyun ne seng bzhin/ byang chub sems dpa'i dpe ni nam mkha' sgyu ma skra shad dang// chu zla la sogs med bzhin snang// kri ya rje dang 'bangs lta bu'o// yo ga spun dang grogs po'i dpe// ma hA yo ga rgyal po mnga' dar bzhin// a nu yo ga pho mo snyoms 'jug bzhin// a ti yo ga khyung chen mkha' la lding ba bzhin// zhes gsungs so// yang zhus pa/ kye kye bcom ldan rdo rje 'chang// des mtshon pa'i tshig rnams gsung du gsol// zhes zhus so// ston pas bka' stsal pa// ngas bstan rgyud lung thams cad du// lta ba zhes pa'i tshig rnams dang// grub mtha' zhes pa'i tshig rnams dang// yang dag zhes pa'i tshig rnams dang// mthar thug pa dang mthar phyin dang// 'bras bu zhes pa gang byung yang// de mtshon tshig tu bsdus pa yin// so so'i gnas skabs shes par bya// kye sems pa chen po/ gzung 'dzin gnyis su 'dod pa nyan thos lta bar bshad/ 'dzin pa yod pas gzung du med do zer na rang rgyal lta bar bshad/ sems dang sems kyi rnam par smra ba dang/don dam dang kun rdzob tu smra na/ byang chub sems dpa'i lta bar bshad/ don dam thams cad mthun pa la/ rigs gsum 'dod pa kri ya'i lta bar bshad/ cha gnyis 'dod pa u pa ya yi lta bar bshad/sems dpa' rtsa bdun 'dod pa'i tshig byung na/ rnal 'byor yo ga'i lta bar bshad/ bzhi bcu rtsa gnyis lnga bcu rtsa brgyad sogs ma hA yo ga'i blta bar bshad/ ma bskyed rdzogs pa'i tshigs tshogs dang// dbyings dang ye shes tshig byung na// a nu yo ga'i lta ba yin// bya rtsol 'das pa'i tshigs tshogs dang// rang byung ye shes tshig rnams dang// lhun grub ye sangs rgyas la sogs// 'di rnams rdzogs chen lta bar bshad// zur tsam mdor bsdus bstan pa yin// zhes gsungs so// spros bral don gsal chen po'i rgyud las/ lta ba'i don bshad pa dang mtshon pa'i tshigs bstan pa'i le'u ste don gcig pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// dgongs pa bsgom pa rnam phye ba// de yi don bshad gsung du gsol// zhes zhus so// ston pas bka' stsal pa/ rdo rje 'dzin pa legs par zung zhig/ngo bo nges tshig dbye ba dang// mthun dpe brjod pa'i tshig tu bstan// ngo bo gcig tu gnas pa yin// bsgom pa'i nges tshig rnam pa bzhi// don la dmigs pa'i bsgom pa yin// ma yengs pas na bsgom pa yin// mi 'bral bas na bsgom pa yin// goms shing 'dris dang mi 'phro ba'o// dbye ba rnam pa gnyis su bstan// mtshan bcas mtshan med gnyis yin no// mtshan med la'ang gnyis yin te// rtsol bral chen po'i bsgom thabs dang// rtsol ba bral ba'i bsgom pa'o// mtshan bcas la'ang de bzhin no// mdor na bskyed rdzogs rnam gnyis te// bsgom pa mtshon pa'i dpe bzhi ste// mar khu sdong bu gnas pa dang// chu dang 'o ma 'dres pa dang// nor bu chu dngas lta bu dang// bum pa'i mar me lta bu'o// kye gsang ba'i bdag po nges par zung zhig/ dgongs pa zhes pa gang byung yang// bsgom pa bsam gtan ting 'dzin dang// ma yengs ma 'phros 'du 'bral med// gnas dang goms dang 'dris pa dang// de rnams gang byung 'bod skad sdebs la bshad// ces gsungs so// spros bral don gsal chen po'i rgyud las/bsgom pa'i don bshad pa mtshon pa'i tshig dang bcas pa'i le'u ste don gnyis pa'o//// de nas yang gsang ba'i bdag pos zhus pa// kye kye bcom ldan rdo rje 'chang// bsgom med don bshad gsung du gsol// zhes zhus so// ston pas bka' stsal pa/ lag na rdo rje nges zung zhig/ bsgom med ngo bo nges tshig dang// dbye ba mthun dpe brjod tshig bshad// ngo bo rang rig rgyun chad med pa yin// yid la mi byed de yi phyir na bsgom du med pa'i tshig/ ngang gnas mi phyed phyir dang bya mi dgos pa'o// bsgom med dbye ba rnam pa gnyis// mtshan bcas bsgom du med pa dang// mtshan med bsgom du med pa'o// re re la'ang rnam pa gnyis// gzhi la bsgom du med pa dang// rtogs pas bsgom du med pa'o// ma bsgoms rgyun chad med pa'i dpe// chu bo lta bur bstan pa yin// ma bsgoms don dang mi bral bas// sbyor sbyin sbrang ma'i 'dab ma bzhin// ma bsgoms ngang gis gsal ba ni// gsal gdangs nyi ma'i snying po 'dra// kye gsang ba'i bdag po nges zung zhig/ ngas bstan rgyud lung thams cad nas// bsgom med zhes pa'i tshig rnams dang// gnas mi dgos pa'i tshig rnams dang// bsgrub tu med pa'i tshig rnams dang// 'du 'bral med pa'i tshig rnams dang// rang dngas rang bzhin bdag nyid chen po dang// ye nas 'du 'bral med pa dang// bya rtsol rnams las 'das pa dang// lam la bgrod du med pa dang// rtogs pa mngon gyur sangs rgyas dang// rang byung ye shes chen po dang// lhun grub ye sangs rgyas pa dang// yid la bya rgyu med pa dang// dmigs pa'i yul las bral ba dang// bsgom med blo bzhag ces pa dang/ bsgom du med pa'i tshig thams cad ni/ 'bod skad kyis bsdebs langs 'dir bstan pa bzhin du shes par gyis shig/ces gsungs so// spros bral don gsal chen po'i rgyud las/ bsgom med don bshad brjod pa'i tshig dang bcas pa bstan pa'i le'u ste don gsum pa'o//// de nas yang gsang ba'i bdag pos zhus pa/kye kye bcom ldan thabs la mkhas// spyod pa'i don bshad gsung du gsol// zhes zhus so// ston pas bka' stsal pa/ gsang ba'i bdag po legs par zung zhig spyod pa'i ngo bo nges tshig dang// dbye ba mthun dpe brjod tshig dang// bsdus te brjod pa'i don bshad pa/ spyod pa'i ngo bo ni/ spyod pa ma 'gags par don la sbyor ba'o// spyod pa'i nges tshig ni don so so dang mthun par 'jug cing longs spyod pas na'o// dbye na rnam pa gnyis yin te/ blang dor yod ces spyod pa dang// blang dor med ces spyod pa'o// dpe ni sna tshogs sgyu ma'i gar mkhan lta bu dang// gang ltar yang ba de don la sbyor shes pa'i dpe// bzo bo mkhas pa'i skyes bu lag gi 'du byed mkhan lta bu'o// kye gsang ba'i bdag po/ ngas bstan rgyud lung thams cad nas// spyod pa dang ni phrin las dang// bya ba byed pa'i tshig rnams dang// rnal 'byor rab 'bring tha ma dang// gzhi lam 'bras bu'i spyod pa rnams// gang byung yang ngas bstan pa bzhin du spyod// ces gsungs so// spros bral don gsal chen po'i rgyud las/ spyod pa bsdus nas bstan pa'i le'u ste don bzhi pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// 'bras bu'i don bshad gsung du gsol/ zhes zhus so// ston pas bka' stsal pa// kye rdo rje 'dzin pa legs par zung zhig/'bras bu'i ngo bo nges tshig dang// dbye ba mthun dpe brjod tshig rnams// bsdus pa nga yis nges par bshad// 'bras bu'i ngo bo ni/ so so'i lta ba yongs su rdzogs pa'o// nges tshig ni/grol smin rdzogs mthar phyin phyir mi ldog pa'o// dbye na zag bcas zag pa med pa'o// rim bzhin gcig char rdzogs pa'i dpe// shing rtog lo rtog smin pa'am// u dum wa ra'i 'bras bu bzhin// kye gsang bdag nges par zung zhig/ngas bstan rgyud lung thams cad du// so so'i 'bras bu gar byung yang// 'di bstan bzhin du shes par bya// 'bras bu mtshon pa'i tshigs tshogs ni// mthar phyin pa dang rdzogs pa dang// smin pa dang ni grub pa dang// grol dang phyir mi ldog la sogs// dang po dgra bcom zhes pa nas// tha ma rang sa zin pa dag/ ngas bstan bzhin du shes par gyis// zhes gsungs so// spros bral don gsal chen po'i rgyud las/'bras bu'i don bshad pa'i le'u ste don lnga pa'o//// kye kye bcom ldan rdo rje 'chang// lta sgom spyod pa yongs rdzogs pa'i// theg pa dgu yi ming gi nges tshig gsung du gsol// zhes zhus so// ston pas bka' stsal pa// so so'i nges tshig ni// ngas bstan khyod kyis yid la zung// ston pas gsung pa'i don tshig rnams// rna ba'i dbang pos nyan zhing yid kyi dbang pos thos// rang rig khong nas mi 'char ba// ston pa'i gsungs la rag lus pa// de don gzhan la sgrog byed pa// nyan thos ming gi nges tshig yin// ston pa gzhan la mi ltos par// goms pa'i mthu yis bsgrubs pas rang sangs rgyas// rang rgyal ming gi nges tshig yin// spang dang ye shes thugs rje dang// phrin las phun sum tshogs ldan pas// byang chub sems dpa'i ming gi nges tshig yin// khrus dang gtsang sbra gza' dang rgyu skar gtsor bton pa// kri ya'i ming gi nges tshig yin// spyod pa mas 'dzegs lta ba yas 'bub pas// u pa ya yi ming gi nges tshig yin// rigs bzhi'i sangs rgyas don gyi rnal ma la// rang gi lus ngag yid gsum sbyor zhing gzhan don byed// yo ga'i ming gi nges tshig yin// ting 'dzin rnam gsum thabs dang shes rab gtsor bton pas// don la 'jug phyir ma hA yo ga'i ming gi nges tshig yin// ma bskyed rdzogs dang de yi don la 'jug pa'i phyir// rdzogs pa a nu'i ming gi nges tshig yin// snang zhing srid pa'i chos rnams kun// chos sku ye nas rdzogs sangs rgyas// gnyis med tshul gyi 'jug pa ni// rnal 'byor rdzogs chen ming gi nges tshig yin// zhes gsungs so// spros bral don gsal chen po'i rgyud las/ theg pa so so'i nges tshig dang/ gtan tshigs bstan pa'i le'u ste don drug pa'o//// de nas yang gsang ba'i bdag pos zhus pa/kye kye bcom ldan rdo rje 'chang// theg pa dgu yi khyad par ji ltar lags// zhes zhus so// ston pas bka' stsal pa/ rdo rje 'dzin pa legs zung zhig/ ma rtogs log rtogs gnyis las nyan thos 'phags// de yang ci ltar 'phags zhe na// gang zag bdag med rtogs pas lta ba 'phags// dge bcu rang gis don du spyod pas spyod pa 'phags// bden pa bzhi yi sgo nas bsgrub pas sgrub pa 'phags// dgra bcom la sogs zung bzhi ya brgyad thob pas 'bras bu 'phags// nyan thos dag las rang rgyal 'phags pa yang// gzugs phung chos khams phyogs gcig la// bdag med rtogs pa'i lta ba 'phags// dge bcu'i steng du rdzu 'phrul ya ma zung 'ga' yis// 'gro don mdzad shas tsam pas spyod pa 'phags// dge ba'i bshes gnyen mi bsten par// goms pa'i shugs kyis bsgrub pas sgrub pa 'phags// ne tso bse ru lta bu'i 'bras bu khyad par 'phags// rang rgyal dag las byang sems 'phags pa yang// bdag med rnam gnyis rtogs pas lta ba 'phags// tshad med bsdu ba rnam bzhis don mdzad spyod pa 'phags// pha rol phyin bcu bsgrub pas bsgrub pa 'phags// kun tu 'od kyi sa non 'bras bu 'phags// byang sems dag las kri ya 'phags pa ste// don dam skye ba med par rab rtogs te/ kun rdzob bdag dang ye shes lha// rje 'bangs lta bur blta bas lta ba 'phags// dag pa rnam gsum spyod pas spyod pa 'phags// goms dang bsgyur dang byin rlabs sgo nas bsgrub pas sgrub pa 'phags// rigs gsum 'bras bu thob pas 'bras bu 'phags// kri ya dag las u pa ya 'phags te// lha dang dpon g.yog blta bas lta ba 'phags// mtshan ma yod med bsgoms nas 'gro don mdzad pas spyod pa 'phags// de kho na nyid bzhi yi sgo nas bsgrub pas sgrub pa 'phags// rigs bzhi'i 'bras bu thob pas 'bras bu khyad par 'phags// u pa ya las yo ga 'phags pa yang// kun rdzob lha dang grogs por blta bas lta ba 'phags// phrin las rnam bzhi spyod pas spyod pa 'phags// phyag rgya rnam bzhi bsgrub pas sgrub pa 'phags// rigs lnga'i sangs rgyas nyid du bsgrub pas 'bras bu 'phags// yo ga dag las ma hA bzhis 'phags te// rang lus rgyal ba'i dkyil 'khor blta bas lta ba 'phags// sbyor sgrol gnyis kyis 'gro don mdzad pas spyod pa 'phags// thabs dang shes rab gnyis kyi sgo nas bsgrub pas sgrub pa 'phags// kun tu 'od kyi sa non 'bras bu 'phags// ma hA dag las a nu bzhis 'phags te// dbyings dang ye shes gnyis med rtogs pas lta ba 'phags// dbyings kyi longs spyod ye shes dag las spyod pa dang// ye shes longs spyod dbyings la spyod pas spyod pa 'phags// phung po lnga dang 'byung lnga rigs lnga yab yum bsgrub pas sgrub pa 'phags// ma chags pad+ma can gyi sa thob 'bras bu 'phags// a nu dag las a ti bzhis 'phags te// snang srid thams cad chos sku'i sangs rgyas blta bas lta ba 'phags// chos sku'i byin brlabs sgo nas 'gro don mdzad pas spyod pa 'phags// bya rtsol med par bsgrub pas sgrub pa 'phags// bcu gsum 'khor lo tshogs chen yan chad nas// nyi shu rtsa gcig man chad sa non 'bras bu 'phags// kye rigs kyi bu/ ngas bstan rgyud lung thams cad du// 'phags pa 'phags chen a nu dang// gong 'og shan dbye gang byung ba// 'dir bshad bzhin du shes par gyis// zhes gsungs so// sprod bral don gsal chen po'i rgyud las/ theg pa brgyad kyi 'phags lugs bsdus nas bstan pa'i le'u ste don bdun pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// 'phags pa'i don bshad gsung du gsol// zhes zhus so// ston pas bka' stsal pa/ ngas bshad khyod kyis legs par zung// 'phags pa'i ngo bo nges tshig dang// dbye ba zhes bya 'phags pa'i dpe// rnam pa bzhi ru bsdus la bshad// 'phags pa dag gi ngo bo ni// khyad par don chen mchog gyur pa'o// 'phags pa dag gi nges tshig ni// mi gnas ring por gang gyur phyir// nges tshig gtan tshigs bcas pa yin// dbye ba rnam pa gnyis yin te// gnas skabs 'gyur bas 'phags pa dang// 'gyur med mthar thug 'phags pa'o// re re la'ang bzhi bzhi ste// lta spyod sgrub dang 'bras bu'o// dpe ni mchod rten khri 'phang bzhin// a ti ma 'dres yongs su rdzogs// gnyis med chos sku dbyer med shes rab la// bzang ngan che chung mtho dman mi gnas kyang// blo dang sbyar nas drang ba'i thabs su bstan// zhes gsungs so// spros bral don gsal chen po'i rgyud las/ 'phags pa'i don bshad pa'i le'u ste don brgyad pa'o//// de nas yang gsang ba'i bdag pos zhus pa// kye kye bcom ldan rdo rje 'chang// spros bral 'phags pa che ba ste// che ba'i bye brag gsung du gsol// zhes zhus so// ston pas bka' stsal pa// rdo rje 'dzin pa nges zung zhig/gnas skabs 'gyur ba'i che ba rnams// theg pa so so'i che ba yin// mthar thug chen po rnam pa lnga// ye nas 'du 'bral med pa ni// phun sum tshogs pa rnam pa lngas// mngon par sangs rgyas che ba dang// bzhugs gnas dbyings kyi mtshan nyid lngas// chos dbyings sangs rgyas che ba dang// bdag nyid chen po rang la rdzogs pa yis// bdag nyid sangs rgyas che ba dang// gtan la 'bebs pa'i thabs chen lngas// de nyid sangs rgyas yin pas che ba dang// dri med rnam pa lnga yis 'phags pas che ba dang// thams cad sangs rgyas pas ni che ba rnam lnga yin// zhes gsungs so// yang gsang ba'i bdag pos zhus pa// kye kye bcom ldan rdo rje 'chang// mngon par sangs rgyas che ba ji ltar lags// zhus pas// ston pas bka' stsal pa// bdag med sku ni ston pa che// rang rig ye shes bstan pa che// ma bris dkyil 'khor gnas su che// srog med sku lnga 'khor du che// ye nas lhun grub dus su che// zhes gsungs so// lag na rdo rje zhus pa/ chos dbyings sangs rgyas che ba ji ltar lags// zhes zhus so// yang ston pas bka' stsal pa// chos sku'i dkyil 'khor bzhugs pa'i gdan// rnam dag dbyings kyi thig le la// gcig la mtshan nyid lnga dang ldan// 'gyur ba med pa rdo rje dbyings// yon tan sdud pa rin chen dbyings// dri ma med pa pad+ma'i dbyings// thog med bstan pas las kyi dbyings// ma bsgribs gsal khyab nam mkha'i dbyings// rang rig ye shes gdangs shar bas// ye shes dbang gi bum pa lnga// skye med klong nas 'gag pa med// de yis ngang la 'du 'bral med// sa chu me rlung nam mkha' lnga// de yi stsal du snang ba ste// chos nyid lnga ru ye sangs rgyas// ye shes lnga dang sku gsum gyi// bzhugs pa'i gnas te kun las khyad par 'phags// sa chu me rlung rnam par dag pas che// zhes gsungs so// lag na rdo rje yang zhus pa// bdag nyid sangs rgyas che ba ji ltar lags// zhes zhus so// ston pas bka' stsal pa/ sprul sku'i snod gyur 'byung ba lnga// rang las byung ba'i chos nyid pas// las la ma rmongs thabs kyis zhi// gzung 'dzin mi gnas rnam par dag/ bdag nyid ngang du mngon sangs rgyas pas che// phung po lnga rnams snang ba yang// rigs lnga'i sangs rgyas rnams kyi sku// sku lnga rin chen 'od du 'bar// ma btsal rang la ye nas lhun gyis grub// ye shes rang snang yin pas che// rnam shes brgyad du blta ba snang ba yang// sems dpa' brgyad du rang la rdzogs// gzhan ma yin par rang snang yin pas che// rnam par shes pa'i yul brgyad kyang// rang la snang ba'i sems ma brgyad// ma btsal rang la lhun gyis grub// ye shes rang snang yin pas bdag nyid che// rang las byung zhing rang las snang// rang snang yin pas yul dang bral// yul med rang snang chen po la// bgrod du med pas kun las che// rang chas yin pas btsal du med// ma btsal lhun gyis grub pas che// rang la rang chas grub pas na// ma bsgrubs rtsol bsgrub 'das pas che// rang bka' stsal pa/ de ltar gtan la 'bebs pa ni// mtshon pa'i brda bzhi kun las 'phags pa'i dpe ru che// sku gsum 'du 'bral med pas don du che// rgyang zhags chu la ye shes snang ba gsal bas rtags su che// brda bzhi dpe ru yin par nges// sku gsum 'du 'bral med pa don du nges// ye shes sgron ma rtags su nges// de bas nges pa gsum gyis che// dang po ston pa la sogs tshogs nas gtan la phab pas gtan tshigs lnga yis che// zhes gsungs so// lag na rdo rje yang zhus pa/ thams cad sangs rgyas pas ni che ba ji ltar lags// zhes zhus so// ston pas bka' stsal pa/ rang rig 'gyur med chos sku la// ngos bzung med pas bsam las 'das// bsgom du med pas khyad par 'phags// chos sku dngos med zang thal la// dmigs par bya ba'i yul med pas// gnyis su med par khyad par 'phags// rig pa dngos med zhi ba las// spros pa'i dngos med mtshan ma med// rang gdangs chen po 'phags te che// rang rig chos sku gnyis med chen po la// mtshon du med pas 'phags te che// chos sku rang byung ye shes la// rgyu rkyen med pas 'dus byas med// 'gyur ba med pas 'phags te che// rang rig dri ma lnga dang bral bas thams cad ye sangs rgyas// zhes gsungs so// spros bral don gsal chen po'i rgyud las/ theg pa brgyad las che ba lngas 'phags pa'i le'u ste don dgu pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// theg pa rim dgu'i bye brag rnams// gdul bya'i yul dang sbyar nas gsungs// de yi gol sgrib ji ltar lags// zhes zhus so// ston pas bka' stsal pa// rdo rje 'dzin pa legs par zung zhig/theg pa dgu yi gol sgrib rnams// dbye na bsam gyis mi khyab ste// bsdu na sum cu rtsa drug yod// lta sgom spyod pa 'bras bu bzhi// mtshan nyid sde gsum sgrib pa mang// sum cu rtsa drug rtsa gnyis dang// rtsa brgyad gsum la rim pa yod// gol sa bcu gnyis brgyad dang bzhi gnas so// phyi pa sde gsum gol sgrib mnyam// sgrib pa bcu gnyis mun pas chod// ltung sa gol sa bcu gnyis yod// nang pa sde gnyis gol sa mang// so gnyis rtsa brgyad rim par yod// sgrib pa bcu dang drug tu gnas// rdzogs chen thig le nyag gcig la// gol dang ma gol gnyis su med// gol sa rang bzhin rnam par dag kun bral nyag gcig spyir ma spangs// a ti'i lta sgom spyod pa dang// 'bras bu ye nas gnyis med pas// gnyis su snang ba'i gol sgrib med// lta sgom spyod pa 'bras bu bzhi// ye nas rang byung ye shes gsal// rgyu rkyen 'dus pa'i gol sgrib med// rdzogs chen lta ba sgom pa dang// spyod pa 'bras bu lhun grub pas// sgom sgrub brtsol bsgrub re dog rtsol ba yi// gol sa sgrib pa rnam par dag/ nga yi gong na gzhan med pas// sgrib med gsal ba ye shes yin// theg brgyad 'og ma snang ba yang// nga yi thugs rje'i mdzad spyod yin// 'byed med shes rab ngang la gnas// ngang las ma 'dres rdzogs pa'i ye shes pas// ltung ba'i gol sa rnam par dag/'byed pa med pa'i shes rab rang gsal la// gol sa sgrib pa gnyis su dbyer med gsal// zhes gsungs so// spros bral don gsal chen po'i rgyud las/ gol sgrib theg pa brgyad la yod par bstan pa dang/a ti la gol sgrib med par bstan pa'i le'u ste brgyad cu pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// gol sgrib don bshad gsung du gsol// zhes zhus pas// ston pas bka' stsal pa/ rdo rje 'dzin pa legs par zung zhig/ ngo bo nges tshig dbye ba dang// mtshon dpe tshig dang bcas nas bstan// gol sgr-ib ngo bo ma rig pa// gol sgrib nges tshig bstan pa ni// gong ma'i don ma mthong bas sgrib pa yin// gong mas 'og ma'i don spyod gol ba yin// de phyir gol sgrib ming gi nges tshig yin// gol sgrib dbye na rnam grangs te// bsdu na rnam pa bzhi yin no// lta sgom spyod pa 'bras bu bzhi// re re la'ang gol sgrib gnyis// gol sgrib mtshon pa'i dpe ru bstan// byang du don gnyer lho ru phyin// lhor phyin byang gi don mi 'grub// gong ma'i don 'dod 'og ma spyad// 'og mas gong ma'i don mi gnyer// ces gsungs so// kye rigs kyi bu/ ngas bstan rgyud lung thams cad du// nor zhes zer na de skad bshad// ma shes ma rtogs byung na de skad bshad// gol sa sgrib pa byung na de ltar brjod// gol sgrib med par bshad na de skad bshad// gzhan yang 'bod skad ngag gi khog sdebs la// don gsal nang 'dir bstan pa bzhin du spyad// ces gsungs so// spros bral don gsal chen po'i rgyud las/gol sa bshad pa dang mtshon tshig bsdus pa bstan pa'i le'u ste gya gcig pa'o//// dkor mdzod gsum gyi sgo phye nas// gsal zhing sgron mes/ rgyal blon dmangs dang gsum gyis nor 'byin cing mun pa sel ba'i man ngag/tan+t+ra a nu u pa arta ka la sa tA hU~M/ de'i tshe bcom ldan 'das gsang ba bla na med pa mtshon pa'i dgongs pa la bzhugs so// de nas yang gsang ba'i bdag pos zhus pa/kye kye bcom ldan don gsal mkhyen// theg pa spyi yi mtshan nyid dang// rang gi don rnams de ltar na// rang don ma lus kun bshad pa'i// rgyud lung man ngag ji ltar bshad// rgyud kyi ldang tshad ji ltar lags// de yi nang nas gsungs pa yi// sbyang ba med pa'i sa rnams dang// bgrod du med pa'i lam rnams dang// spyad mi dgos pa'i pha rol phyin pa rnams// sgra mthun don dpag ji ltar lags// sbubs zhes smros pa ji ltar lags// snang ba zhes pa ji ltar lags// cha lugs rnam bzhi ji ltar lags// sems dang ye shes ji ltar lags// bar do bzhi ni ci la bgyi// grol dang ma grol ji ltar lags// spyan zhes bya ba ji ltar lags// lus sems bral zhes bya ba ji ltar lags// lnga ldan rdzogs ldan ji ltar lags// thugs rje'i bye brag ji ltar lags// mya ngan 'da' lugs ji ltar lags// phas rgol rtsod pa ci ltar bzlog/sna tshogs 'bru rnams ji ltar gzhom// zhes gsungs so// spros bral don gsal chen po'i rgyud las// zhu tshig nges pa'i sdom dang bcas pa'i le'u ste gya gnyis pa'o//// de nas ston pas bka' stsal pa// rdo rje 'dzin pa nges zung zhig/ rgyud ni phun sum tshogs pa rnam lngas bshad// de la dbye ba rnam gsum ste// chos sku phun sum tshogs pa dang// longs sku phun sum tshogs pa dang// sprul sku phun sum tshogs pa'o// chos sku phun sum tshogs pa lnga// ston pa 'gyur med chos kyi sku// bstan pa mi nub rgyal mtshan ni// gsang ba rig pa'i rgyud chen lnga// 'dus pa'i 'khor tshogs gnyis las mi gzhan pa// rigs lnga bde gshegs 'od du 'bar ba lnga// bzhugs gnas skye med chos kyi dbyings// dus ni 'das dus ma byon sngon rol nas// rtog med ston pas byin gyi rlabs kyis bshad// nyid las mi gzhan sku lnga rang rang gis// rgyud chen byin gyi rlabs kyis go// de nas yang ston pas longs sku'i phun sum tshogs pa lnga gsungs so// ston pa rigs lnga bde bar gshegs pa lnga// bstan pa gsang ba'i rgyud chen lnga// 'dus pa'i 'khor ni sems dpa' sems ma'i tshogs// bzhugs pa'i gnas ni ye shes gzhal med 'od kyi klong// dus ni de rnams rig pa yul du shar ba'i tshe// tshig dang yi ge'i sgo nas mi 'chad par// sku yi cha byad sgo nas ston// bde gshegs rnam par snang mdzad kyis// rigs bzhi'i sangs rgyas 'dus pa la// sku yi rgyud chen rang gi ngo bos bshad// bcom ldan rdo rje mi bskyod pas// rdo rje rigs kyi 'khor rnams la// thugs kyi rgyud chen rang gi ngo bos bshad// bcom ldan rin chen 'byung ldan gyis// rin chen rigs kyi sems dpa' sems ma la// yon tan rgyud chen rang gi ngo bos bshad// bcom ldan snang ba mtha' yas kyis// pad+ma'i rigs kyi sems dpa' sems ma la// gsung gi rgyud chen rang gi ngo bos bshad// bcom ldan don yod grub pa yis// las kyi rigs kyi 'khor rnams la// phrin las rgyud chen rang gi ngo bos bshad// thugs kyi dgongs pa ye shes rnam lngar gsal// bshad pa ma yin mnyan pa med// gtso ba'i zhal gzigs thugs kyi dgongs pa gsal// rang gi ngo bos bshad ces bya// ting nge 'dzin gyi dgongs pas bshad// ston pas sprul sku'i phun sum tshogs pa lnga gsungs pa// ston pa rdo rje 'chang chen ngas// bstan pa'i snying po gsang ba'i rgyud chen lnga// de sogs phyi nang gsang bas bsdus pa rnams// thugs kyi klong du shes rab chen pos bkrol// mgur gyi bum par ye shes rlung gis dril// zhal gyi ljags la ma 'dres gsal bar bkram// tshems kyi bar nas tshig don so sor bshad// yan lag drug cu sdeb sbyor legs par bshad// khyung chen lding thabs don gyi spyi khog phub// stag mo'i mchong stabs dkyus kyi sa chen bcad// rus sbal 'gros kyis tshig gi 'bru rnams bcom// seng ge'i gdangs skad lta bus theg brgyad zil gyis mnan// glag mo gzan 'jum lta bus man ngag 'dril// 'dus pa'i 'khor tshogs sangs rgyas rabs bdun la// lha gnas gsum du bdud rtsi'i char chen phab// pad+ma brtsegs pa'i gnas mchog rnam gsum mo// zhes gsungs so// spros bral don gsal chen po'i rgyud las/ phun sum tshogs pa lnga yi le'u ste gya gsum pa'o//// de nas yang gsang ba'i bdag pos zhus pa/kye kye bcom ldan rdo rje 'chang// phun sum tshogs pa'i don bshad dang// de yi dgos pa gsung du gsol// zhes zhus pas/ ston pas bka' stsal pa// kye kye bcom ldan rdo rje 'dzin pa legs par zung zhig/phun sum tshogs pa'i ngo bo dang// phun sum tshogs pa'i nges tshig dbye ba dang// phun sum tshogs pa'i dpe rnams bstan// dang po ngo bo bstan pa ni// rgyu ni ngo bo tshogs pa yin// dgos pa rgyu rkyen tshogs par sbyor// ci phyir phun sum tshogs zer na// kun nas dgos pa tshang bas phun sum tshogs// nges tshig gtan tshigs bcas pa yin// dbye ba gong du bstan pa bzhin// dper na rgyal blon dmangs dang gsum// gang la gang tshogs bka' bgros 'byung// des mtshon phyogs gcig dper bstan pa'o// zhes gsungs so// yang gsang ba'i bdag pos zhus pa// phun sum tshogs pa rnam pa lnga// smos pa'i dgos pa ji ltar lags// ma bstan skyon tu ji ltar 'gyur// zhes zhus so// ston pas bka' stsal pa/ ston pa phun sum tshogs pa smos pa'i dgos pa ni// gang zag rig bcos ma yin par// sangs rgyas zhal nas gsungs pa yid ches te// mi bslu bden pa'i gtan tshigs dag tu 'gyur// bstan pa phun sum tshogs pa smos pa'i dgos pa ni// bab col ma yin don dang ldan par yid kyang ches// 'dus pa'i 'khor tshogs smos pa'i dgos pa ni// kun gyi thun mong ma yin pa'i// nges par ston pas gsungs par yid kyang ches// gnas kyi bye brag gsungs pa'i dgos pa ni// gzhan du bstan pa'i snying po ma gsungs par// nges pa'i gnas der gsungs par yid kyang ches// dus kyi phun sum tshogs pa smos pa'i dgos pa ni// gnas skabs snga phyi ma bskal bar// dus tshod mtshungs shing zin pas yid kyang ches// zhes gsungs so// spros bral don gsal chen po'i rgyud las/ phun sum tshogs pa lnga'i don bshad dgos pa dang bcas pa'i le'u ste gya bzhi pa'o//// de nas yang gsang ba'i bdag pos zhus pa// kye kye bcom ldan rdo rje 'chang// rgyud rnams don bshad ji ltar lags// zhes zhus pas/ ston pas bka' stsal pa// rgyud kyi ngo bo nges tshig dang// dbye ba mthun pa'i dpe ru bshad// rgyud kyi ngo bo bstan pa ni// tshig gi rgyud kyi ngo bo dang// don gyi rgyud kyi ngo bo'o// don gyi rgyud kyi ngo bo ni// rang rig ye shes chen po yin// tshig gi rgyud kyi ngo bo ni// ma bsnan ma phris ma byas dgos pa tshang// glegs bam tshig gi tshogs su bstan// rgyud kyi nges tshig rnam pa lnga// 'brel dang ma tshang med pa dang// yongs su rdzogs dang dkrugs pa dang// phun sum tshogs pa'i phyir rgyud do// dbye ba tshig dang don rgyud gnyis// gong bshad bzhin du shes par bya// 'brel ba'i dpe ni dra ba bzhin// dgos pa tshang ba'i nor bu bzhin// yongs su rdzogs pa ljon shing bzhin// dkrugs pas thags kyi spun bzhin no// ngas bstan rgyud rnams de ltar bshad// ces gsungs so// spros bral don gsal gsal chen po'i rgyud las/ rgyud kyi don bshad bstan pa'i le'u ste gya lnga pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// gong bshad rgyud kyi ldang tshad bshad du gsol// zhes zhus so// ston pas bka' stsal pa// rdo rje 'dzin pa legs par zung zhig/ rgyud kyi ldang tshad rnam pa bcu// dbang dang dam tshig gnyis su bshad// dkyil 'khor phrin las gnyis su bstan// mchod pa rnal 'byor gnyis su bshad// sngags dang phyag rgya gnyis su bshad// bsnyen pa bsgrub pa gnyis su bstan// kye rdo rje 'dzin pa// dbang la rnam pa gsum du bstan// gzhi la rdzogs tshul bstan pa dang// rim pas babs lugs bstan pa dang// dbang gi dngos po bstan pa'o// dang po gzhi la rdzogs tshul ni// mi rtog 'gyur med chos sku la// mkhyen pa'i ye shes rnam lnga gsal// rang las mi gzhan snang ba ni// rin chen 'od 'bar skur gsal ba'i// nyid las mi gzhan dbang gi chu bo bzhi// ma skur gzhi la ye nas rdzogs// sku lnga'i thugs rje ma 'gags par// khrag 'thung he ru lngar snang bas// thugs rje rang byung dbang gi chu bo bzhi// ma btsal gzhi la ye nas rdzogs// de nyid ye shes lus can rang snang la// de nyid ngang la gnas shing ngang du grol// ye shes chen po'i dbang gi chu bo bzhi// ma btsal ma bskur gzhi la ye nas rdzogs// des mtshon gsung gi ngo bo ni// rin po che yi yi ge lnga// ma btsal gzhi la ye gnas pas// dpa' bo 'bru lnga dbang gi chu bo bzhi// ma btsal ma bskur gzhi la ye nas rdzogs// de lta bas na gzhi'i ye shes gzhan la rag mi lus shing rgyu rkyen gyi dbang du 'gro mi srid pa'o// rigs kyi bu rim pas babs lugs bshad pa ni/ shes rab kyi sku bzhis de bzhin gshegs pa kun snang gi ye shes la/dbang bzhi rdzogs su gnas pa ste/ mkhyen pa'i stobs mi 'gags pas/ gzhi 'gyur ba med pa'i chos sku la/ shes rab 'gags pa med pa'i dbang thob pa'o// shes rab 'gags pa med pa'i sku bzhi las/gdul bya la snang ba'i sku bzhi shar ba'i tshe/ nyid las mi gzhan pa'i sku bzhi'o// zhal gzigs pas thugs mkhyen te/ shes rab rig pa'i sku lnga la/ rang dbang yas babs su thob pa'o// de bzhin du rigs bzhi las/ sems dpa' sems ma rang dbang yas babs su thob pa'o// nga sprul pa'i sku shar te/ thugs gyi klong nas rang chas su gnas pas/ ngas mthong zhing gsal te/ de'i tshe ngas rtogs pa'i ye shes rang dbang skad cig ma la thob bo// de bzhin du khams gsum pa thams cad rang la dbang bzhi rdzogs su gnas pas/ rim pas rig pa rtsal gyi dbang 'thob par 'gyur bar ngas lung bstan to// zhes gsungs so// kye rdo rje 'dzin pa legs par zung zhig/ dbang gi dngos gzhi ni bskur thabs gnyis te/ khyad par gyi dbang rdzas bzhi shes rab la brten nas/ gzhi rdzogs rig pa rtsal dbang du bskur ba dang/thun mong gi dbang rdzas bzhi la brten nas/ rdo rje slob dpon gyi gdams ngag dang sbrel te/ bskur zhing thob par byed pa'o// khyad par gyi dbang rdzas bzhi shes rab la brten nas gzhi rdzogs chen po rig pa rtsal dbang du bskur ba dang/rgyud 'dzin bum pa'i dbang lnga stong nyid du bskur te/ mkha' klong rnam par dag pa'i ngang na/ ye shes kyi spyan ma 'gags pa/ 'od kyi bum pa lngar gsal te/ de bzhin gshegs pa lnga bzhugs pa'i rten du gyur pas na/bum pa zhes bya ste/ ngo bo dbyings stong pa nyid du bstan pa las/ don stong pa nyid du rig ste/ dngos po'i mtha' las log go// rgyal po rang rtags phyag rgya'i dbang bskur ni/bum pa lnga'i klong na de bzhin gshegs pa lnga bzhugs lugs bshad de/ shes rab kyi bdag nyid ye shes lngar gsal zhing/ thugs rje'i bdag nyid phyag rgya lngar gsal bas/ snod bcud dngos po dang mtshan mar snang ba thams cad phyag rgya ma bskyed pa'i de bzhin gshegs pa lnga dang/phyag rgya gsal ba'i de bzhin gshegs pa lngar 'gyur bas/ de bzhin gshegs pa yin pa la yin par rig ste/ dngos po dang mtshan ma ma lus par sku dang ye shes su dag pa ste/ mtshan ma zil gyis gnon to// rgyal srid rin po che sna bdun gyi dbang ni/ 'phags pa'i nor bdun te/ dper na rgyal po la rgyal srid nor bdun yod pa 'dra bar/rang gi ngo bo gang la yang mi gnas shing/ yon tan cir yang snang bas/ sbyin pa'i pha rol tu phyin pa ste/ yid bzhin gyi nor bu rin po che lta bur rigs so// rang rig pa'i ye shes rang bzhin gyis rnam par dag pa thams cad 'byung ba'i gzhi ma 'gags pas/yon tan 'khor 'das su 'byung zhing nyon mongs pa mi mda' bas/ tshul khrims kyi pha rol tu phyin pa dang ldan te btsun mo lta bur rigs so// rig pa chos sku la 'gran pa'i zla med do// rig pa sku lngar snang yang don gnyis su med pas/ yul gyi mtshan ma ngang gis bcom ste/ nyon mongs pa med pas bzod pa'i pha rol du phyin pa dang ldan pas/ dmag dpon lta bur rigs so// rang rig pa'i ye shes bya rtsol mi mnga' bar yon tan rang la rdzogs te/ thugs rje shugs kyis 'char la/ brjed pa med pa'i gzungs thob pa'i brtson 'grus dang ldan te/ rta rin po che lta bur rigs so// rang rig pa'i ye shes de rang gi ngo bo las mi 'da' bas/ ngang las ma g.yos par gnas pas bsam gtan te/ glang po che lta bur rigs so// rig pa chos kyi sku de phyogs lhung med pas shes rab tu gnas shing/rtsal so sor rtog pa'i shes rab mi 'gag par dpyad pas shes rab kyi pha rol du phyin pa dang ldan te/ 'khor lo lta bur rigs so// rang rig pa'i ye shes de thabs ma 'gags pas dang/stobs ma 'gags pas dang/ thams cad du re smon du 'gyur pas ye shes kyi yon tan te/ de bzhin du bshad pa'i yon tan dang/ ye shes ldan te/ blon po lta bur rigs so// de ltar tshig dbang bskur bas rtogs pa rgyud la skyes te/grub pa'i mtha' la yon tan gyi sgo ma 'gags pas yon tan skyon dang bral ba'o// de ltar rtogs pa'i spros pa chod de/ spros pa gcod pa'i chos bzhis/ rgyud kyi snying po gsum gyi lta ba la zlos pas/don gyi dgongs pa bzhi la gnas pas ni/ don brgyad rdzas su bstan pa'i mthun mong gi rdzas la rag ma lus te/ thugs rjes sems can la 'od 'phro ba'o// rigs kyi bu des ni rig pa'i tshan nyid rtogs shing// rtsal ma 'gags par rtogs pas/ dbang ye shes bzhi rdzogs su thob pa'o// kye rdo rje 'dzin pa/ thun mong gi rdzas la brten nas dbang bskur ba thob pas tshig dbang rin po che ste/phyir dbang rdzas la brten te bskur/ nang du bag chags lus la bskur/ sku gsum bzhi rdzogs su ngo bstan no// rigs kyi bu dbang ni ye shes spyi blug dang// rgyal rtags phyag rgya dang/ rig pa rtsal gyi dbang gsum ste/phyir rdzas kyi bum pa lnga la brten nas dbang bskur/ nang du longs sku rang la grub lugs dang lnga ldan gyi dgongs pa rdzogs par bshad do// phyir phyag mtshan drug la brten te dbang bskur/ nang du da lta tshogs drug sprul pa shar lugs dang/rdzogs ldan gyi skabs su sprul sku byon lugs su bshad do// phyir dbang rdzas bzhi la brten la dbang bskur/ nang du chos sku'i gnas lugs dang/ rin po che'i sbubs bshad do// rin po che'i gdams ngag dang 'brel bar bshad do// de'i rim pa ni ngas bstan pa'i ye shes bla ma ru shes par bya'o// zhes gsungs so// spros bral don gsal chen po'i rgyud las/ rgyud kyi ldang tshad sdom dang/dbang bsdus nas bstan pa'i le'u ste gya drug pa'o//// da nas yang gsang ba'i bdag pos zhus pa/ kye kye bcom ldan rdo rje 'chang// dbang gi don bshad gsung du gsol// zhes zhus so// ston pas bka' stsal pa/ rdo rje 'dzin pa legs par zung zhig/ dbang gi ngo bo nges tshig dang// dbye ba mthun pa'i dpe bshad pa// dbang gi ngo bo rang byung gi ye shes gzhan dbang du ma gyur pa'o// dbang gi nges tshig ni/'khor 'das kyi chos thams cad la mnga' mdzad cing dbang bsgyur bas na'o// dbye na thun mong dang khyad par gong bzhin no// dpe ni rgyal po la glang po ches dbang bskur bas rgyal por rang dbang thob ste/rgyal sa zin pa lta bu'o// zhes gsungs so// spros bral don gsal chen po'i rgyud las/ dbang gi don bshad pa gsal bar bstan pa'i le'u ste rgya bdun pa'o//// de nas yang gsang ba'i bdag pos zhus pa/kye kye bcom ldan rdo rje 'chang// dam tshig gsang ba bshad du gsol// zhes zhus so// ston pas bka' stsal pa/ rigs kyi bu nges par zung zhig/ dam tshig dbang las skye bas na// ma bskur pa yi dbang chen la// bsrung du med pa'i dam tshig bzhi// ma nyams ye bsrungs gdengs dang ldan// nga yi dam tshig gsang ba ni// rang rig ye shes chen po la// bsrung bya srung byed gnyis med pas// nyams dang ma nyams gnyis su med// theg brgyad bcos ma'i dam tshig grangs// mi bsrung bas na med ces bya// 'og ma'i dam tshig las grol zhing// rang gi sgo gsum yangs pas na// phyal pa zhes su btags pa yin// bsrung du med pa'i dam tshig la// 'da' mi srid pa'i bsrung thabs ni// rang rig ye shes gcig pu las// gcig pu zhes su btags pa yin// rang gi ye shes gcig pu la// bya btsal med par ye bsrungs pas// lhun grub ces su btags pa yin// zhes gsungs so// spros bral don gsal chen po'i rgyud las/ dam tshig bstan pa'i le'u ste gya brgyad pa'o//// de nas yang gsang ba'i bdag pos zhus pa// kye kye bcom ldan rdo rje 'chang// dam tshig don bshad ji ltar lags// zhes zhus so// ston pas bka' stsal pa// rdo rje 'dzin pa legs par zung zhig/ dam tshig ngo bo nges tshig dang// dbye ba mthun pa'i dpe ru bstan// dang po ngo bo bshad pa ni// 'da' mi srid pa'i ngo bo de// blta ba rang rig ye shes yin// bsrung ba don gyi nges tshig yin// 'da' ru med pa'i dam tshig yin// ma nor nges pa'i dam tshig yin// de las mi 'da' bas na dam tshig go// dbye ba rnam pa gnyis yin te// bsrung mtshams bcas pa'i dam tshig dang// bsrung mtshams med pa'i dam tshig go// gong dang 'og tu shes par bya// dam tshig don la mi 'da' ba// thams cad nam mkha'i ngang las mi 'da' ltar// rang rig ye shes don las 'da' ba med// 'da' mi srid pa'i dam tshig yin// zhes gsungs so// spros bral don gsal chen po'i rgyud las/dam tshig gi don bstan pa'i le'u ste gya dgu pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// dkyil 'khor phrin las ji ltar lags// zhes zhus so// ston pas bka' stsal pa// rdo rje 'dzin pa legs par zung zhig/ dang po dkyil 'khor bshad par bya// ngo bo dang ni nges tshig dang// dbye ba mthun pa'i dpe ru bshad// dbye na rnam pa gsum du bshad// mtshon pa brda' yi dkyil 'khor dang// dam tshig ting 'dzin dkyil 'khor dang// rang bzhin lhun gyis grub pa'i dkyil 'khor ro// ngo bo rnam pa gsum yin te// mtshon pa brda' yi dkyil 'khor ngo bo ni// bris dang 'bur du btong ba yin// dam tshig ting 'dzin ngo bo ni// gang bsgom yid la gsal ba yin// rang bzhin lhun gyis grub pa'i dkyil 'khor ni// sku gsum rgyal ba'i dkyil 'khor yin// rig pa dkyil la ye shes 'khor// chos sku'i ngo bo nges tshig yin// gtso bo dkyil la sems dpa' yab yum 'khor// longs sku'i ngo bo nges tshig yin/ kun gzhi dkyil la tshogs brgyad 'khor// sprul sku'i ngo bo nges tshig yin// dpe ni nyi zla gza' skar shar ba bzhin// brjod lugs mang yang bsdus pa yin// zhes gsungs so// spros bral don gsal chen po'i rgyud las/ dkyil 'khor bstan pa'i le'u ste dgu bcu pa'o//// de nas yang ston pas bka' stsal pa// rdo rje 'dzin pa legs par zung zhig/ ma bris ma bskyed ma bsgoms par// rang bzhin gsal ba'i dkyil 'khor la// bya rtsol 'das pa'i phrin las kyis// thog ma med par don mdzad de// sku gsum rgyal ba'i dkyil 'khor du// ston pas sku gsum don mdzad de// sku yi 'od dang gsung gi 'od zer las// ston pas sku gsum rtsal du grub// byin rlabs ngang gi tshig sbyor gyis// phrin las 'gro don thogs med mdzad// byas pa med par lhun gyis grub// ces gsungs so// yang gsang ba'i bdag pos zhus pa// phrin las don bshad gsung du gsol// zhes zhus so// ston pas bka' stsal pa/ rdo rje 'dzin pa legs par zung zhig/ phrin las kyi ngo bo bya ba grub pa'i ye shes yin/ phrin las kyi nges tshig ni// rang bzhin bya rtsol las 'das pas// so so'i don mdzad phrin las yin// dbye ba rnam pa gnyis yin te// rtsol ba yod dang med pa'o// rtsol bral phrin las rnam pa bzhi// chos sku dngos med spros dang bral// rtogs pas spros pa thams cad zhi// zhi ba'i phrin las zhes su bya// yon tan nor bu bzhin du 'byung// rgyas pa'i phrin las zhes su bya// thams cad 'byung yang de las 'byung// thams cad gnas kyang de la gnas// thams cad thim yang de la thim// thams cad la yang dbang bskur pas// dbang gi phrin las zhes su bya// rig pa dngos med rdos pa'i chos med pas// phyogs med gang la'ang thogs pa med par 'char// thugs rje'i stobs kyis snang zhing bsdus pas na// drag po'i phrin las zhes su gsungs pa yin// bya rtsol med par nyi ma'i 'od zer gyis// khams gsum mtshan ma'i mun pa sel ba ltar// thogs pa med pa'i thugs rje chen po yis// bya rtsol med pa'i phrin las chen po yin// zhes gsungs so// spros bral don gsal chen po'i rgyud las/ phrin las kyi rang bzhin bya rtsol med pa'i don bstan pa'i le'u ste go gcig pa'o//// de nas gsang ba'i bdag pos zhus pa/ kye kye bcom ldan rdo rje 'chang// mchod pa'i rnal 'byor ji ltar lags// zhes zhus so// ston pas bka' stsal pa/ rdo rje 'dzin pa legs par zung zhig/ chos nyid dag pa'i pho brang du// rang rig ye shes ma 'gags shar// ye shes dbyings la shar ba yis// dbyings dang ye shes gnyis med 'gyur// ye shes gnyis med mchod pa yin// mtshan rdzogs rdo rje 'chang gi sar// yab yum bzhi bcu rtsa gnyis 'phros// ye shes lnga yi ngang la rol// ma 'gags gnyis med mchod pa yin// sprul sku'i mchod pa rnam pa lnga// mchod rdzas gzugs sgra dri ro reg/ sems dpa'i khyi'u chung lngas blangs nas// rig byed ngang du gnyis med thim// rgya mtsho chu yi 'phro 'du bzhin// mchod pa rgyun mi chad pa'o// zhes gsungs so// de nas yang rnal 'byor gsungs pa// sku gsum 'du 'bral med pa ni// don la mos byed rnal 'byor yin// rnal 'byor chen po bsgom las 'das par rtogs// rtogs pa'i don la bya rtsol mi mnga' bar// rang gdangs chen po'i ngang las gnas pa yin// rnal 'byor dbang chen bya rtsol 'das pa yin// de don rang la gnas pa ni// rnal 'byor bla na med pa yin// rnal 'byor dag gi ngo bo yang// gnyis su med pa'i dgongs pa yin// rnal 'byor dag gi nges tshig kyang// blo dngos gnyis med 'byor pa dang// sku gsum gnyis med 'byor pas 'byor zhes bya// dbye ba rnam pa gnyis yin te// ming dang don du nga yis bshad// don gyi rnal 'byor gong bstan bzhin// zhes gsungs so// spros bral don gsal chen po'i rgyud las/ mchod pa dang rnal 'byor bstan pa'i le'u ste go gnyis pa'o//// de nas yang gsang ba'i bdag pos zhus pa/ sngags dang phyag rgya ji ltar lags/ zhes zhus so// ston pas bka' stsal pa/ rdo rje 'dzin pa legs par zung zhig/dang po sngags kyi don bshad pa// mchog tu gyur pa'i sngags don no// ngo bo nges tshig dbye ba bstan// dbye ba rnam pa gsum yin te// gsang sngags rig sngags gzungs sngags gsum// gsang sngags dag gi ngo bo ni// shes rab snying rje gnyis su bstan// rig sngags dag gi ngo bo ni// shes rab dang ni ye shes yin// gzungs sngags dag gi ngo bo ni// shes rab dang ni ting 'dzin yin// sngags gsum dag gi nges tshig ni// shes skyobs phyir na des brjod pa'o// sngags gsum dag gi phrin las ni// gzhi gnas bag chags sel ba dang// ma rig log lta sel ba dang// 'phral byung bag chags sel bar byed pa yin// zhes gsungs so// ston pas bka' stsal pa// phyag rgya chen po'i ngo bo ni// 'gyur ba med pa'i rang bzhin yin// phyag rgya chen po'i nges tshig ni// mi 'da' bas na phyag rgya yin// dbye ba phye dang bsdus pa yin// phyag rgya bzhi dang rtsa lnga yod// 'di ru bsdus te bzhi bstan pa// chos nyid ma bral chos kyi sku// phyag rgya chen po yin par bshad// rang rig ye shes dbyings las shar// dbyings nyid rig pa dang ldan pas// dbyings dang ye shes gnyis su med pa ni// dam tshig phyag rgya yin par bshad// rang byung ye shes ma 'gags pa// gsal ba chos kyi phyag rgya yin// thugs rje'i sku gnyis mi 'gag pas// rtog med thugs rje'i don 'dzin pa// las kyi phyag rgyar ngas bstan pa'o// phyag rgya'i dpe ni nam mkha' dang// rgyal pos phyag rgyas btab pa la// de las 'da' bar mi nus bzhin// gsang sngags ma yin shes rab ma 'gags pa'o// phyag rgya ma yin thugs rje ma 'gags pa'o// zhes gsungs so// spros bral don gsal chen po'i rgyud las/ sngags dang phyag rgya bstan pa'i le'u ste go gsum pa'o//// de nas yang gsang ba'i bdag pos zhus pa// bsnyen pa bsgrub pa ji ltar lags// ston pas bka' stsal pa/ rdo rje 'dzin pa legs par zung zhig/ lta ba rang rig ye shes de// ngo sprod bzhi yi gtan la 'bebs// rang rig mtshan nyid nyams su myong// de ni bsnyen pa'i don du bstan// lam la gnas pa nye bsnyen yin// lam grol gyur pa bsgrub pa yin// lam gyi 'bras bu mthar phyin pas// bsgrub pa chen por gyur pa'o// gsang sngags mi bzla' don la bzhag/ phyag rgya mi bsgom ma bskyed lhun gyis rdzogs// zhes gsungs so// spros bral don gsal chen po'i rgyud las// bsnyen bsgrub rnam pa gnyis bstan pa'i le'u ste go bzhi pa'o//// de nas yang gsang ba'i bdag pos zhus pa// kye kye bcom ldan rdo rje 'chang// zhal nas gsungs pa'i lung chen rnams// bshad pa'i thabs rnams gsung du gsol// zhes zhus so// ston pas bka' stsal pa// rdo rje 'dzin pa legs par zung zhig/ lung rnams che ba ngas bshad de// ston pa'i zhal nas gsungs pa las// gzhan gyi lung la ma brten par// lung gis yid ches pa'i che ba dang/ston pa'i thugs rnam par dag pa la/ dang po rgyu med bar du rkyen med/ tha ma mi 'gyur bas/ 'gyur med nam mkha'i lung gis che ba dang/ nyes pa zad pas rdzun gyi tshig smra bar mi byed pas rdzun med pa'i zhal nas gsungs pa'i bden pa'o// ston pa mkhas pa'i bdag nyid las// tshig dang 'bru gnyis don sdebs legs// de bzhin nyid las mi 'da' bas// yid ches lung gi che ba'o// ngas 'khor kun las 'phags gyur pa'i// dga' rab rdo rje'i don ched du// ston pas zhal nas gsungs pa la// lung ma nor bar bris pa ni// rin chen gser gyi glegs bam la// baiDUr ya ni zhun ma yis// rang nan dag tu legs bris pas// tshig gi lhag chad ma zhugs ste// des ni lung gi che ba'o// bskyed dang rdzogs pa rnam pa gsum// 'du 'bral med pa'i dgongs pa ni// lo ma me tog 'bras bu'i tshul// tha mi dad du bstan pas ni// gsang sngags kun dang mthun gyur te// gsang sngags spyi lung mi 'gal bas// gsang sngags kun gyi bka' 'dus pas// lung gi yid ches che ba'o// zhes gsungs so// spros bral don gsal chen po'i rgyud las/lung gi che ba lnga bshad pa'i le'u ste go lnga pa'o//// de nas yang gsang ba'i bdag pos zhus pa// kye kye bcom ldan rdo rje 'chang// lung gi don bshad gsung du gsol// zhes zhus so// ston pas bka' stsal pa// rdo rje 'dzin pa legs par zung zhig/ lung gi ngo bo nges tshig dang// dbye ba thun mong dpe rnams bshad// rigs kyi bu lung gi ngo bo ni/ dbye ba'i sgo nas bstan par bya ste/ don gyi lung gi ngo bo ni// mi 'gyur sems kyi lung zhes bya ste/ rig pa nyid do// tshig gi lung gi ngo bo ni// ston pa'i zhal nas gsungs pa las// ma bsnan ma phris ma byas pa'i tshig go// tshig gi lung la gnyis te/ snyan khung las rgyud pa dang/mngon du phyung ba'o// de la gnyis ste/ drang don dang nges don no// lung gi nges tshig ni/ tshig gi don mtshon pas lung zhes bya/ yid ches par bya ba'i phyir lung zhes bya/ zin pas lung zhes bya/bde blag tu rtogs par bya bas lung/ bkyer bde bas kyang lung/ kun dang 'brel du btub pas kyang lung ngo// dpe ni rgyal pos bka' stsal pa lta bu/ snod spyad lung nas zin pa lta bu dang/ snod lung med bkyer mi bde ba las/lung can bkyer bde ba lta bu dang/ 'dams kyi phur pa lta bu'o// zhes gsungs so// spros bral don gsal chen po'i rgyud las/ lung gi don bshad bstan pa'i le'u ste go drug pa'o//// de nas yang gsang ba'i bdag pos zhus pa// kye kye bcom ldan rdo rje 'chang// man ngag bshad lugs ji ltar lags// zhes zhus so// ston pas bka' stsal pa/ rdo rje 'dzin pa legs par zung zhig/man ngag don gyis bshad lugs ni// spyi don rnam pa lnga yis bshad// lo rgyus don dang rtsa ba'i don du bshad pa'o// tshig gi don du bshad pa dang// yo ga'i don du bshad pa dang// dgos ched kyi don du bshad pa'o// lo rgyus kyi don la gsum ste/ gang zag dag gis 'phral la byas pa ma yin par// dus gsum sangs rgyas kun gyi dgongs pa rgyud pas bshad// sangs rgyas zhal nas gsungs pa yid ches 'gyur// nges pa don gyi 'khor yin pas// rig 'dzin brda yi brgyud pas bshad// ldem po'i don la dgongs pa ma yin par// nges pa'i don du gsungs pa'i yid ches 'gyur// de bzhin bshad pa'i dus su gang zag rna bar brgyud nas bshad// brgyud pa 'brel ma chad pas nges par yid ches 'gyur// rtsa ba'i don du bshad pa ni// rang rig ye shes chen por bshad// tshig gi don du bshad pa ni// byin rlabs ngo bo nges tshig bsdeb pa ste// sku gsum rgyal ba'i bshad lugs yin// mtshon byed tshig gis nges pa'i don bshad pas// gong du bshad pa bzhin du shes par bya// yo ga'i don du bshad pa ni// theg pa'i la shan phyi la bshad// de yang don gsal 'dir bstan bzhin// dgos ched don du bshad pa ni// 'khrul pa gsum po rab 'bring rim pas grol// rin chen sbubs su grub mtha' rdzogs par bstan// zhes gsungs so// spros bral don gsal chen po'i rgyud las/ man ngag dgos ched lngas bshad pa'i le'u ste go bdun pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// man ngag rnam gsum mdzod gyur ji ltar lags/zhes zhus pas ston pas bka' stsal pa// rdo rje 'dzin pa legs par zung zhig/ sku dang gsung dang thugs dang gsum gyi mdzod// man ngag kun gyi gzhi yi gnas lugs dang// de brjod tshig gi man ngag dang// tshig dang don sbyor man ngag gsum// bsdus pa'i man ngag tshig gsum pa// sku gsung thugs kyi mdzod nas phyung// snying po gsum du shes par bya// zhes gsungs so// yang gsungs pa/ man ngag don gyi ngo bo dang// ming gi nges tshig bstan pa dang// de yi bye brag ji ltar dpe dang bcas pa bstan// de yi dbye ba bstan pa ni// tshig dang don du shes par bya// don gyi man ngag ngo bo ni// khong nas gab sbas don 'byin pa// ston pa rdo rje thugs la gnas// gsal bar zhal du brjod pa'o// tshig gi man ngag ngo bo ni// zhal nas gsungs pa'i tshig don kun// ma nor don dang khrigs bsdebs nas// bde blag rtogs phyir dkar chag mnan// tshig don gsal bar byed pa yin// ngo bo dbye ba de bstan no// de yi nges tshig bstan pa ni// tshig chung don che'i man ngag go// nges don gdams ngag gang yin pa// brjod bral gsang phyir man ngag go// nges tshig gtan tshigs bcas pa yis// ma yis gdams pa bu la smras pa bzhin// spyir na rgyud lung man ngag gsum// rje blon 'bangs dang 'dra bar bshad// ces gsungs so// spros bral don gsal chen po'i rgyud las/ man ngag don bshad pa'i le'u ste go brgyad pa'o//// de nas yang gsang ba'i bdag pos zhus pa/ man ngag lung gi sa lam dang// pha rol phyin pa gsung du gsol// zhes zhus so// ston pas bka' stsal pa/ rdo rje 'dzin pa legs par zung zhig/ man ngag rdzogs pa chen po la// sa la sbyang du med pa yin// lam la bgrod du med pa yin// pha rol phyin bcu spyad du med// 'on kyang theg pa spyi dang sgo bstun pas// sbyang du med pa'i sa rim dang// bgrod du med pa'i lam rim dang// spyod du med pa'i pha rol phyin pa spyad// ces gsungs so// de nas yang gsang ba'i bdag pos zhus pa/ sbyang du med pa'i sa rim gsung du gsol// zhes zhus so// rdzogs chen chos nyid sa gcig pa// yon tan rtogs tshul bco lnga brtsis// rgyud lung spyi yi khog don kun bkrol nas// ngo sprod rnam bzhis tshe 'dir bden pa mthong// de la rab tu dga' ba'i sa zhes bya// man ngag don gyis blo yi the tshom bsal// rang gi rgyud la nges pa'i shes pa skyes// dri ma med pa'i sa ru btags pa yin// gsum pa 'od byed pa ni sems nyid ye shes su dbang du 'dus ste/ de nyid rtsal du shes pas don brjod rag ma lus// bzhi pa 'od 'phro de don kun tu sgrogs// lnga pa dug lnga dug gsum nang du dag/drug pa sbubs gsum skabs kyi sku gsum gsal// bdun pa thegs brgyad don las rab tu 'phags// brgyad pa rang gi don las ma g.yos mkhyen// dgu pa yon tan rang la rdzogs par mkhyen// bcu pa chos rnams gang la'ang thogs med mkhyen// bag chags sbubs su rtogs pa skye lugs yin// rtogs ldan 'khrul pa'i snang ba 'gags pa'i tshe// chos nyid klong du ye shes 'od du gsal// bcu rdzogs gcig la gnas pa kun tu 'od kyi sa// de nyid rang snang yin pas mkhyen pa khong nas shar// shes rab skyes pa'i stobs kyi skur gsal ba// tshom bu lnga pa chos kyi spyan drug shar// gsal la mi gnas pad+ma can gyi sa// gsung gi ngo bo rang byung yi ge drug/ ljags las 'od 'phros sprul pa'i skur gyur pas// bcu gsum yi ge 'khor lo tshogs chen sa// sprul pa'i sku yi 'gro don rdzogs mdzad pa// rdo rje 'dzin pa bcu bzhi'i sa ru bzhag/ye shes sbubs su rdzogs sangs rgyas pa yis// thugs rjes gnas nas sgrol zhing rang rang gzhi la sbyor// gsang ba'i don gyis sbyor sgrol zhes su btags// rang byung tshig lnga zhi ba mya ngan 'das// rin chen sbubs su sku lnga klong nas 'khyil// dper na gnam stong zla ba yongs rdzogs kyang// nyi ma'i stobs kyis zla ba mi snang ba// tshes gcig dgong nas bco lnga rdzogs gyur te// de nas zla ba skye ba med pa ltar// rin chen sbubs su 'du 'bral med kyis kyang// 'khrul pa'i stobs kyis dngos su gsal ma nus// dang po'i sa nas bco lnga yongs rdzogs te// de las yar gshegs dgu la shul mi mnga'// nyi shu rtsa gcig sum cu rtsa sogs rnams// bco lnga'i 'dug tshul yon tan zur tsam yin// brtsi ba mas brtsi shes pa thad kar chod// gzigs pa ma 'gags yas gzigs te// rnam rtog mi mnga' sa ler mkhyen pa'o// zhes gsungs so// spros bral don gsal chen po'i rgyud las// sa dang pha rol phyin pa/ lam lnga 'khrugs pa'i bsdeb dang/ sa'i rim pa dngos bstan pa'i le'u ste go dgu pa'o//// de nas yang gsang ba'i bdag pos zhus pa/kye kye bcom ldan rdo rje 'chang// sa yi don bshad gsung du gsol// zhes zhus so// ston pas bka' stsal pa/ rdo rje 'dzin pa legs par zung zhig/ ngo bo nges tshig dbye ba dang// mthun pa'i dpe ru bsdus la bshad// kye rigs kyi bu sa yi don gyi ngo bo ni/ chos nyid mi 'gyur ba'o// mtho dman gyi ngo bo ni/ shes rab dang snying rje che chung ngo// sa yi dbye ba ni/ 'jig rten pa'i sa dang 'das pa'i sa'o// 'das pa'i sa la gnyis te/ theg pa chen po'i sa dang/ theg pa 'og ma'i sa'o// theg pa chen po'i sa la thun mong dang khyad par ro// khyad par 'dir bstan pa'o// nges tshig ni mi 'gyur gnas pa'i phyir sa'o// dpe ni ma 'dres la rdzogs pa mchod rten gyi khri 'phang lta bu'o// zhes gsungs so// spros bral don gsal chen po'i rgyud las/ sa'i don bshad bstan pa'i le'u ste brgya tham pa'o//// de nas yang gsang ba'i bdag pos zhus pa// kye kye bcom ldan rdo rje 'chang// bgrod cing 'jug tu med pa yi// lam gyi rim pa gsung du gsol// zhes zhus so// ston pas bka' stsal pa// lag na rdo rje nges par zung zhig lam med lam du 'jug pa rnams lam gyi nad che ba/phyin par 'dod pa ri dgas smig rgyur bsnyegs pa 'dra/ de bas nges pa'i lam ma yin// bgrod med lam la rab gnas pa'i// 'du 'bral med pa'i dgongs pa las// ma nor nges pa'i lam chen gcig/ bgrod du med pa'i chos nyid byang chub sems// rtsol bas 'gro bas ye shes mtha' la ring// 'jug du med do rang rig ye shes lam// 'jug pa'i rtsol bas sdug bsngal mtha' ru lhung// 'on kyang ma bshad go bar mi 'gyur bas// bgrod med lam gcig rtogs pa'i thabs// sgra mthun don 'phags lam lnga bshad// bla mar bsnyen bkur yongs rdzogs nas// dam pa'i drung na gnas pa ni// tshogs kyi lam zhes de la bya// bla mas dam pa'i don bshad de// gdams ngag gnyis kyi don la sbyor// sbyor pa'i lam du nga yis bshad// ngo sprod rnam pa bzhi'i sgo nas// tshe 'dir nges pa'i bden pa mthong// mthong ba'i lam du nga yis bshad// bsgom du med pa'i bsgom pa dang// bsgom du yod pa'i med pa gnyis// 'du 'bral med par gnas pa ni// bsgom pa'i lam du nga yis bstan// sangs rgyas dgongs pa gdeng chen bzhi// mi gnas tshul gyis mthar phyin pas// mthar phyin lam du nga yis bshad// ces gsungs so// sprod brasal don gsal chen po'i rgyud las/ 'bras bu nges pa'i lam lnga bstan pa'i le'u ste brgya dang gcig pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// lam gyi don bshad gsungdu gsol// zhes zhus so// ston pas bka' stsal pa// gsang ba'i bdag po nges zung zhig/ lam gyi ngo bo nges tshig dang// dbye ba mthun pa'i dpe ru bshad// ngas bstan lam gyi ngo bo ni// 'du 'bral med pa'i rnal 'byor yin// lam gyi nges tshig bstan pa ni// gzhan du bgrod cing 'jug tu med// mi 'bral gnas pas lam zhes bya// dbye ba rnam pa gnyis yin te// rgyu yi lam dang 'bras bu nges pa'i lam// dpe ni 'jig rten lam dang 'dra// rtsol bral lam gyi mtshon dpe ni// mkha' la khyung chen lding ba 'dra// zhes gsungs so// spros bral don gsal chen po'i rgyud las/ lam gyi don bshad bstan pa'i le'u ste brgya dang gnyis pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// rtsol bsgrub dag las 'das pa yi// spyad med lhun gyis grub pa yi// 'bras bu pha rol phyin pa bcu// sgra mthun don 'phags gsung du gsol// zhes zhus so// ston pas bka' stsal pa/ rdo rje 'dzin pa legs par zung zhig/ pha rol phyin pa chen po bcu// zin pas rtsol pa'i nad spangs pa// lhun gyis gnas pas bzhag pa yin// snying po ye nas sangs rgyas pas// rtsol ba'i bsam pas dbyings mi bskyod// bsam gtan ting 'dzin sangs rgyas sku la bsgribs// sangs rgyas sku ni ma sgribs kun tu gsal// lhun grub chen por ma rtogs pa// nges pa'i pha rol phyin pa min// yang dag nges pa'i don chen de// ngo bo nam mkha' lta bu la// yon tan snang ba phyogs med shar// shar yang rang rig rnam par dag/ de nyid sbyin pa'i pha rol phyin// dri med rnam dag tshul khrims pha rol phyin// 'gran zla med pas bzod pa'i pha rol phyin// brjed pa med pas brtson 'grus pha rol phyin// g.yo ba med pas bsam gtan pha rol phyin// 'gag pa med pas shes rab pha rol phyin// gti mug ma rig med pas de bzhin no// bya rtsol mi mnga' thabs kyi pha rol phyin// skad cig spyod pas stobs kyi pha rol phyin// yon tan rang la rdzogs pas smon lam pha rol phyin// gzhi gnas ye shes yin pas ye shes pha rol phyin// zhes gsungs so// spros bral don gsal chen po'i rgyud las/ pha rol tu phyin pa bcu'i spyod pa'i lam gzhi rdzogs su bstan pa'i le'u ste brgya dang gsum pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// don gyis pha rol phyin pa bcu// de yi don bshad ji ltar lags// zhes zhus so// ston pas bka' stsal pa/ rdo rje 'dzin pa legs par zung zhig/pha rol phyin pa'i ngo bo dang// nges tshig dbye ba mthun dpe rnams// bsdus te don du gsal bar bshad// dang po ngo bo bshad bya ba// rnam grangs nges pa'i don la bzhag/dbye ba'i sgo nas shes pa yin// nges tshig gtan tshig bcas pa ni// mi gnas mthar rdzogs pha rol phyin// dbye ba rnam pa gnyis su 'dus// rgyu yi pha rol phyin pa dang// 'bras bu'i pha rol phyin pa'o// dper na don gnyer lam zhugs pas// 'dod pa'i yul du phyin pa'am// gru la brten nas mtsho las thar// skyes bu'i mtheb mos mda' bskyod bzhin// mthar phyin grub pa'i sa la gnas// zhes gsungs so// spros bral don gsal chen po'i rgyud las/ 'bras bu pha rol du phyin pa'i don bshad bstan pa'i le'u ste brgya dang bzhi pa'o//// de nas yang gsang ba'i bdag pos zhus pa// kye kye bcom ldan rdo rje 'chang// ston pas gsungs pa'i rgyud lung las// sbubs zhes gsungs pa ji ltar lags// zhes zhus so// ston pas bka' stsal pa// rdo rje 'dzin pa legs par zung zhig/ sbubs kyi ngo bo nges tshig dang// dbye ba mthun pa'i dpe yis bshad// dbye ba rnam pa gsum yin te// rin chen sbubs dang 'od kyi sbubs// bag chag sbubs dang gsum yin no// dang po mtshan nyid 'dzin pa ni// rnam dag zang thal mi rtog 'gyur ba med// 'gag med kun gsal ye shes sku// phyogs gcig mtshan ma man shel bzhin// zhib tu gong bstan gzhi snang bzhin// rin chen sbubs zhes chos sku yin// bar pa'i mtshan nyid bstan pa ni// 'gag med ye shes 'od kyi sku// sum cu rtsa gnyis mtshan 'chang ba// tshom bu'i dkyil 'khor chen po lnga// gsal mtsher lhun sdug gzi brjid 'bar// 'od kyi sbubs de longs sku yin// tha ma'i mtshan nyid bstan pa ni// bag chags rnam bzhi yongs rdzogs pa// phung po khams dang skye mched bcas// tshogs brgyad sems dang bcas pa ni// bag chags sbubs su nga yis bstan// de la sbubs gsum ngo bo ni// gong bstan sku gsum yin par bshad// sbubs zhes bya ba'i gtan tshigs ni// zhugs pa'i rten du gyur pa yin// sbubs zhes bya ba'i brjod tshig ni// so so'i nges tshig bstan pa yin// yon tan kun 'byung rin chen sbubs// snang la rang bzhin med pa 'od kyi sbubs// chu zla me long gzugs brnyan dang// 'ja' tshon lta bu'i dpe yis bstan// rnam rtog mthu brtas bag chags sbubs// zhes gsungs so// spros bral don gsal chen po'i rgyud las/sbubs bstan pa'i le'u ste brgya dang lnga pa'o//// de nas yang gsang ba'i bdag pos zhus pa// kye kye bcom ldan rdo rje 'chang// ston pas gsungs pa'i rgyud lung du// snang ba'i bye brag gsungs pa rnams// de yi don bshad gsung du gsol// zhes zhus so// ston pas bka' stsal pa// rdo rje 'dzin pa legs par zung zhig/ snang ba'i ngo bo nges tshig dang// dbye ba so so'i dpe ru bstan// dang po dbye ba rgyas bsdus gnyis// rgyas pa la yang rnam pa bzhi// 'gro drug zhen pa'i snang ba drug/ rgyu 'bras blo yi snang ba bcu// rtogs ldan don gyi snang ba gcig/ dbyer med kun tu bzang po'i snang ba bzhi// bsdus pa'i snang ba rnam pa gsum// ma dag 'khrul pa'i snang ba dang// dag pa 'jig rten pa'i snang ba dang// yang dag pa ye shes kyi snang ba'o// dang po snang ba rgyas bshad pa// 'gro drug zhen pa'i snang ba drug/shes bya'i dkyil 'khor ma 'gags pas// snang ba'i dngos po 'di nyid la// dmyal bas tsha grangs gnyis su mthong// yi dwags gsum la snang ba gsum// phyi nang spyi mthun snang ba'o// phyi yis zas la rnag khrag dang// gos la tsher ma lta bu'o// gcig la zas snang srung mas bsrung// gcig la srung med zos pa dug/ de bzhin yi dwags gsum du snang// byol song gnyis la snang ba gnyis// byings na gnas pas mun pa ste// kha 'thor gnas pas gyen thur snang// mi la mthun snang 'di nyid ste// rang rang yul mi khyim tshes sogs// lha ma yin la go mtshon snang// lha la rin chen bdud rtsir snang// blo snang zhen pa'i bag chags yin// rgyu 'bras blo yi snang ba bcu// mu stegs rtag pa'i snang ba yang// rtag pa'i dngos las gzhan mi snang// mu stegs chad pa'i snang ba yang// 'di yod phyi ma med pa ste// snang 'di glo bur byung ba dang// zhig pas 'byung lnga'i ngang du zha// chad par snang las gzhan mi snang// nyan thos g.yag rnga ne'u seng dang// gong bu cha shas med pa ltar// gzung 'dzin chos kyi bdag tu 'dzin// rang rgyal gong mthun phyogs gcig stong// phung po khams la phyogs gcig bdag med pa// mdo sde don dam stong pa nyid// kun rdzob sgyu ma tsam du snang// gsang sngags phyi nang gnyis ka yang// don dam mdo sde mthun pa la// kun rdzob snang ba so sor mthong// kri yas rigs gsum rje khol mthong// u pas lha dang dpon g.yog mthong// yo gas spun dang grogs por mthong// ma hAs phung po lhar snang mthong// a nus dbyings dang ye shes mthong// kun gyis rgyu 'bras mi spangs shing// dngos po mi bden blo la snang// rgyu 'bras blo yi snang ba yin// rtogs ldan don gyi snang ba ni// rdzogs chen rtogs pa'i snang ba yin// thams cad chos sku'i ngo bo mthong// kun tu bzang po'i snang ba yin// gong ma dang mtshungs gnyis med snang// thog ma'i gzhi snang 'dug tshul yin// bsdus pa'i snang ba rnam pa gsum// ma dag 'khrul snang gong bstan rigs drug yin// dag pa 'jig rten pa'i snang ba bcu ni byang chub sems// yang dag ye shes snang ba bzhi po gong dang mtshungs// snang ba'i dbye ba rgyas bsdus bstan pa'o// snang ba'i ngo bo bstan pa ni// dbye ba gong nas shes par gyis// 'og tu zur tsam brjod mi lang// yang dag nges pa'i ngo bo ni// chos nyid gdangs dang snang ba dag gi nges tshig ni// 'gag med yul du mthong bas snang bar btags// dpe ni dbye ba'i khog tu bstan// 'di ru nges pa'i dpe bstan pa// nyi ma dag las zer snang dang// mar me la sogs snang 'od bzhin// snang zhing rang gi gdangs la zhugs// de bzhin ye shes chen po las// ye shes rang gdangs zang thal snang// ye shes rang gi gdangs la zhugs// chos nyid dag pa'i dpe bstan pa// me long la sogs bzhin snang bzhin// gong du bshad pas 'dir ma brjod// bsdus pas gnas pa'i yul ma yin// zhes gsungs so// spros bral don gsal chen po'i rgyud las/ snang ba'i don bsdus gsal bar bstan pa'i le'u ste brgya dang drug pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// snang ba de la gnas pa yi// 'char lugs bzhi po ji ltar lags// zhes zhus so// ston pas bka' stsal pa/ lag na rdo rje legs par zung zhig/ dang po thugs rje rtsal gyi 'char lugs ni// rig pa mtshan nyid lngar snang bas// rang byung ye shes 'od du gsal// de las gzung 'dzin rtog 'gyus pas// 'od de lus kyi rten du gyur// thugs rje rtsal gyi 'char lugs la// de ni 'khrul pa'i sems can la'o// thugs rje sprul sku'i 'char lugs ni// longs sku yab yum zhal bar nas// yi ge drug pa 'od du 'phro ba'o// srid pa bzhi yi 'dzin lugs ni// dang po bag chags lus 'di la// brtags nas srid pa gzung ba'o// de nas lus byings bskyed pa'o// mig gnyis dag nas rtsa gnyis shar// de las rtsa yi mdud par gyur// de las lus bskyed rtsa yis yan lag rgyas// de yi nang du tsit+ta dang// glo ba la sogs nang khrol rnams// don snying so sor rdzogs par 'gyur// sdud byed lus kyi chags lugs yin// lus byings bskyed rdzogs g.yo bar byed// nang gi bcud kyi chags lugs ni// ma bu'i lte ba gnyis 'brel te// lte bas nang nas bskyed par byed// de yis stobs dang gzi mdangs 'phel// zhes gsungs so// spros bral don gsal chen po'i rgyud las/ chags lugs bzhi bstan pa'i le'u ste brgya dang bdun pa'o//// de nas yang gsang ba'i bdag pos zhus pa/kye kye bcom ldan rdo rje 'chang// rgyud lung kun nas gsungs pa yi// bar do rnam bzhi gsung du gsol// zhes zhus so// ston pas bka' stsal pa// rigs kyi bu legs par nyon cig/bar do rnam pa bzhi po ni// rang bzhin dag pa'i bar do dang// ting nge 'dzin gyi bar do dang// chos nyid 'od gsal gyi bar do dang// srid pa'i bar do dang rnam pa bzhi'o// de la rang bzhin bar do ni// da lta'i 'khrul snang 'di nyid yin// ting nge 'dzin gyi bar do ni// las su ma rungs bsgom dus yin// chos nyid bar do zhes bya ba// 'khrul snang 'gags nas zhag lnga'i bar// rang rig ye shes 'od du shar// 'od la gnas pa bar do yin// srid pa'i bar do zhes bya ba// chos nyid 'od gsal snang ba yang// rtogs pa'i shes rab ma skyes pas// snga nas ye shes bag la zha// sngar gyi bag chags snang ba shar// dbang po kun tshang thogs med ldan// srid pa'i sha gzugs sngon du shar// rang dang rigs mthun lha mig mthong// lus dang 'dug sa tshol bar byed// ngo bo dbye bar bcas pa'o// nges pa'i don la mi gnas pas// rang sa ma zin bar do yin// nges pa'i gtan tshigs zhes bya'o// dper na 'jig rten don gnyer ba// 'gro sar ma phyin zhag sa bzhin// rang bzhin gnas pa'i bar do la// rgyud lung kun gyi khog dgrol te// ngo sprod bdun gyis gtan la phab// rang rig lta bas thag chod pa'o// ting 'dzin bar do gsal bar bya// chos nyid bar do ye shes ngos bzung ba'o// gal te de ltar ma gyur pas// srid pa'i bar do las kyi 'phro mthud pa'o// zhes gsungs so// spros bral don gsal chen po'i rgyud las/ bar do bzhi bstan pa'i le'u ste brgya dang brgyad pa'o//// de nas yang gsang ba'i bdag pos zhus pa// kye kye bcom ldan rdo rje 'chang// chos nyid bar dor grol ba'i thabs// sems dang ye shes ji ltar dbye// zhes zhus so// ston pas bka' stsal pa/ rdo rje 'dzin pa nges par zung zhig/ sems dang ye shes rnam pa gnyis// gcig min tha dad ma yin te// dbye ba rab tu dka' ba'i chos// sems nyid ye shes rtsal yin te// sems kyi gzhi ma ye shes yin// de la sems dang ye shes gnyis// gcig pa dang ni tha dad pas// grol dang ma grol zhes bya'o// sems dang ye shes dbye ba ni// ngo bo'i sgo nas dbye ba dang// gnas kyi sgo nas dbye ba dang// lam gyi sgo nas dbye ba dang// 'byung ba'i sgo nas dbye ba dang// skyon yon so so'i sgo nas dbye ba'o// de la ye shes ngo bo ni// rang bzhin rnam par dag pa chos kyi sku// 'dug tshul 'od du 'dug pas gzugs kyi sku// snang tshul phyi nang med pas ye shes zang thal yin// sku gsum dbye med dngos po'i sgrib las 'das// zhib tu gong bshad 'dir ni ma brjod do// sems kyi ngo bo bstan pa ni// sbubs dang bcas pa'i gzung 'dzin yin// sems dang ye shes gnas bstan pa// ye shes chen po'i bzhugs gnas yin// rnam dag dbyings kyi thig le yin// de ltar rin chen sbubs na bzhugs// 'dug tshul gnas dang snang tshul rnams// gong dang 'og tu shes par bya// sems ni rlung can grong na bzhugs// lam yang rnam pa gnyis su bstan// rin chen rgya mtshor 'brel ba yin// dkar 'jam khog pa stong pa'i rtsa// thig le khrag gis ma gang bar// ye shes chen po kun tu rgyu// de ni ye shes lam du bshad// mgrin pa sems kyi lam du bshad// de ni dbugs rgyu'i 'gyu srang yin// sgo ni rnam pa gnyis su bshad// ye shes sgo dang sems kyi sgo// ye shes sgo ni gnyis yin te// khyab pa mi snang sgo dang lkog gyur sgo// rnam pa gnyis su bstan pa yin// gsal ba'i bdag nyid zang thal bas// mngon gyur sgo de spyan du bstan// sems sgo 'dod pa'i sgo gsum yin// dbugs rgyu mi rgyu'i rnam shes dbye'o// ye shes yon tan kun snang rdzogs// sems kyi skyon ni 'khor ba'i chos// de dang de las byung ba'i rtsi// kye ma rig kyi bu legs par nyon cig/ don de zab mo'i brdar bstan na/ sngon ri rab kyi rtse mo rgya mtsho'i nyi ma can na/ klu'i rgyal po nor bu 'od ldan bya ba bzhugs skad/ kho skyo nas yas mar gzigs pas/ rnam dag pad ma'i tshal bya ba na rin po che'i khang pa nyi zlas brgyan pa bya ba 'dug pa mthong/ der khong yang byon te bzhugs pa'i pho brang byas skad do// gong ma la mchod khang byas te bzhugs skad/ de nas mar gzigs pas rlung can gyi grong na/ blon po kun byed bya ba 'dug pa mthong ngo// der byon nas blon por bskos so// rgyal blon 'khrugs par gyur skad do// de nas blon pos bskyod pa shugs kyi rta la zhon nas/ kun tu rgyu'i srang du phyin te/ 'thab rtsod kyi sgo gsum du byon te/ rin po che rnam pa lnga btsal nas/ rgyal po la dpya phul bas/ rgyal po mnyes pa dang tshims par ma gyur te/ dmangs dang blon po yi mug ga chad nas/ rgyal blon 'thab pas/ rgyal pos blon po la chab bsal/ 'bangs cham la phabs nas/ rgyal blon bral bas mchod pa rgyun chad de/rgyal po pho brang du bskyod de/ 'thab zla med pas shin tu so bsod do skad/ dz+nyA na tsit+ta pra be sha ya sa du a hA kA la/ zhes gsungs so// spros bral don gsal chen po'i rgyud las/ sems dang ye shes dbye ba bstan pa'i le'u ste brgya dang dgu pa'o//// de nas yang gsang ba'i bdag pos zhus pa// kye kye bcom ldan rdo rje 'chang// gang gsungs don rnams rtogs pa yis// 'khrul ba'i snang ba ji ltar 'gags// ye shes snang ba ji ltar 'char// rang rig shes pa ji ltar 'jug/ rtags kyi shes pa ji ltar 'byung// rab 'bring grol lugs ji ltar lags// zhes zhus so// ston pas bka' stsal pa// gsang bdag nges pa'i don 'di zung// 'jig rten 'khrul pa'i snang ba 'di// dang po rang las shar ba'i phyir// mtha' mar rang gi ngang du grol// gang bstan rang shar rang grol bzhin// snang ba sems kyi dbang du 'dus// gzung bar bya ba'i yul dang bral// sems rtogs ye shes dbang 'dus pas// 'dzin par byed pa'i sems dang bral// gzung 'dzin bral ba'i rig pa la// ye shes rang dngas 'od gsal ba// mkha' la 'ja' tshon gsal ba ltar// chos nyid klong na ye shes gsal// mtha' dbus med par kun tu khyab// de tshe shes pa de la 'jug/ dngas ma'i 'byung ba rnam pa lnga// chos nyid ngo bo nyid la shar// de la snang ba'i 'byung ba lnga// rang rang ngang du dag cing thim// 'byung ba'i skabs su bstan pa yin// dang po sa la sa thim pas// lus lci shes pa 'thib pa yin// de nas chu la chu thims pas// lus po kha sna skam pa yin// de nas rlung la rlung thim pas// lus dang shes pa lji zhing byings// de tshe me la me thim pas// lus ni drod dang bral ba yin// rnam shes nam mkha'i ngang du thim// tshor ba bde sdug rnam rtog bral// khyab pa med pa'i gdangs la gnas// chos nyid rang gi ngo bo lnga// thig le lnga yi bdag nyid can// rang bzhin dag pa'i nam mkha' dang// gnyis min gcig min don gyis gnas// ci yi phyir na logs na med// bag dang ma bral kha dog dbyibs// de la de snang de yi ngo bo la// de phyir de la de skad ces brjod pa'o// ye shes gzhi la 'bros pa'i rtags// ri rab rtse nas nyi ma nub// rlung bzhi rim pas zhi gyur nas// las kyi rlung gis bskyod pa'i bdag/'chi bdag bdud kyi grong khyer nas// bdud kyi so ba mig gcig po// dus la bab dang ma bab blta// mang yang rtags kun bsdus pa yin// zhes gsungs so// spros bral don gsal chen po'i rgyud las/grol sa spyi'i mtshan nyid bsdams pa dang rtags bstan pa'i le'u ste brgya dang bcu pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// gang zag lus sems 'bral mi 'bral// rtags kyi bye brag ji ltar 'byung// de skad zhus pa'i lan gsungs pa// nyon cig gsang ba'i bdag po khyod// gang zag lus sems 'bral mi 'bral// rtags kyi bye brag ngas bstan nyon// 'chi ltas bcu gsum dag tu bstan// gangs kyi rlangs pa yal ma yal// nyi ma'i ngos la rlangs pa yal ma yal// rlangs pa yal na lus sems 'bral bar 'gyur// gzhung rtsa nyams te rlangs pa med pa yin// gsal ba shel gyi me long gi/ gdangs de nub bam ma nub blta// me long btsir bas bltas pa der// mdangs shor gzhi 'dus 'chi bas rtags// dpags bsam 'dab ma chag gam ma chag blta// skra dang ba spu log na lo 'dab bskams// rtsa bran nang du 'khums pas 'chi ba'i rtags// mkha' 'gro'i sgra sgrogs chag gam ma chag brtag/ rna ba gnyis btsir bas ni mngon pa ste// sgra chag gzhi la rtsal 'dus 'chi ba'o// gnam sa'i 'brel thag chad dam ma chad brtag/ lag ngar mig sngar phyar bas brtag/ chad na a to li ka nyams te 'chi// thabs dang shes rab bral lam ma bral ni// sna bug gnyis kyi dbugs la blta ba ste// dbugs la ring thung byung na rtsa 'gags 'chi// rta mchog khang bzang gtib bam ma gtib brtag/ sna bug zhom na khang bzang gtib ste 'chi// don snying glo rtsa nyams pas 'chi'o// khrag gi rgya mtsho bskams sam ma bskams blta// mkhur tshos bkrag la blta te nyams na 'chi// khrag rnams nang du 'dus pa yin// klog dbang bri 'am ma bri lce la brtags// lce ldibs gyur na lce rtsa 'khums pas 'chi// btsan po'i mkhar gyi sgo mo chod dam ma chod mchu// mtsher rtsa nang du bros pas mchu ni bsum mi shes// ri rab sked nas bdud nag langs ma langs// mdzub bu kha sbyar srin lag bsdom// srin lag phyed dam ma phyed blta// phyed na snying rtsa 'khums pas 'chi// gzugs brnyan cho 'phrul yal ma yal// rang grib bar snang gzugs la blta// gzugs med snang ba log pas 'chi// dus kyi chu klung mal na nyal ma nyal// bla rtsa 'khyams po med na 'chi// de ltar 'chi ltas byung na ni// tshe yi 'du byed byer bar 'gyur// zhes gsungs so// spros bral don gsal chen po'i rgyud las/ 'chi ltas rgyas par bstan pa'i le'u ste brgya dang bcu gcig pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// gang zag rtogs shing goms ldan la// bar do'i snang ba ji ltar 'char// de nyid zhus pa'i lan gsungs pa// spyi dang bye brag gnyis su bstan// bye brag dbang po rab 'bring gi/ go rim bzhin du 'char bar 'gyur// rtogs ldan spyi ru 'di ltar 'byung// lus sems bral te sku gsum 'char dus su// 'khor ba'i chu bo bzhi las brgal// skye rgas na 'chi bzhi yin no// srid pa'i lam chen lnga las brgal// nyon mongs chags sdang rnams lnga'o// sems kyi rten phur phyung ba ste// bem rig bral ba'i dus yin no// mya ngan thang chen dag las brgal// 'jig rten 'di yi sdug bsngal lo// lhan cig skyes pa'i grogs dang bral// lhan skyes ma rig sangs pa yin// rtag pa'i yul dang bral bar gyur// 'jig rten snang ba 'di nyid 'gags// yun ring 'grogs pa'i grogs dang bral// 'jig rten 'di yi sems yin no// 'gyur ldog can gyi blo dang bral// gzung 'dzin rtog pa sna tshogs so// rtag tu na ba'i nad dang bral// de ni 'khor ba'i sdug bsngal lo// dus kyi dmar thag chad pa yin// skad cig dus mtha' zad pa'i dus// dngas ma'i rang snang shar ba'i dus// rig pa rang ngo rang gi shes pa'o// 'dzin pa'i shes pa med pas na// snang ba'i rkyen gyis bslur mi tshugs// rang snang shar kyang rang sar grol// 'gyu ba mi shes zang thal yin// 'og 'gyu'i srog gcod dang ma sangs// rig pa rang sar zin pa yin// rig pa ma dang 'phrad de ldog mi srid// snang ba rang snang nyid du snang ba la// rig pa 'dzin med 'khrul mi srid// sku gsum lhun gyis grub pa la// 'bras bu gzhan nas mi 'tshol rtsol sgrub bral// longs skur byon nas gzhan don mtha' ru 'byung// gzhan don rdzogs nas chos sku nyid du thim// de nyid dus na gzhan don gzugs sku man chad nas// 'jig rten dag dang theg pa'i mtha' rnams bral// zhes gsungs so// spros bral don gsal chen po'i rgyud las/ bar do'i 'bras bus bstan pa'i le'u ste brgya dang bcu gnyis pa'o//// de nas yang gsang ba'i bdag pos zhus pa// kye kye bcom ldan rdo rje 'chang// spyi yi bye brag de ltar na// rab 'bring tha ma'i grol lugs rnams// ma nor rim pas gsung du gsol// zhes zhus so// ston pas bka' stsal pa// dbang po yang rab gyur pa la// ye nas zang thal chen po pas// bar do med cing skad cig mar// de lta nyid du gnas pa yin// rang bzhin dag pa'i nam mkha' la// chos nyid dag pa'i ngo bo gnas// de la rig pa zang thal shar// shar ba ma yin gnas pa yin// dper na nam mkha' zang thal la// khang khyim byas pas nam mkha' gud du bcad// khang pa'i nang gi nam mkha' dang// rang bzhin dag pa'i nam mkha' gnyis// sgo 'am mthong na sgrib med pas// nam mkha' gnyis po sgrib med gsal// bag chags sbubs kyi rig pa dang// mkha' la gnas pa'i rig pa gnyis// ye shes sgo yis mtshams sbyar nas// bag chags lus kyis ma bsgribs par// gnyis med zang thal chen por gnas// rtogs pa'i don chen de ltar ni// seng ge'i mchongs pas sa chod ltar// ye shes zang thal chen po yis// bar do skye 'gags mi gnas par// rin chen sbubs kyi nang du gcod// de bas ye grol chen por gnas// de la rtsis gdab mi bya'o// ji ltar don brjod mi shes pa// dbang po dman pa'i gang zag la// grol lugs rtsis gdab bya ru med// byas kyang nges pa mi rnyed pas// skye ba gcig gis thogs par bshad// de nas de nyid 'phrad par 'gyur// 'bring la rab 'bring tha ma gsum// 'bring gi rab dang 'bring gi 'bring// 'bring gi tha ma rnam pa gsum// 'bring gi rab kyi grol lugs ni// skad cig gsum la grol bar 'gyur// dang po snang ba tshul la 'jug/ sgo lnga'i rnam shes dag la'o// nang gi 'byung ba 'od la 'du// rnam shes lnga po de ltar 'jug/ rtsal snang bzhi la 'dus pa ni// tshon gyi gru gu bsdog pa bzhin// de tshe rlung bzhi rim bzhi nas// snying rje med pa'i las kyi rlung// srog pa rtsa nas ldang bar 'gyur// de tshig gnas nas lam du 'jug/ lam nas sgo ru myur du 'jug/ sgo yi snang ba chos nyid klong du 'char// thugs rje rgyun gyi theg pa zang thal la// zhon nas ye shes rang gi gdangs la 'jug/ de yi skad cig dang po la'o// de'i tshe skur snang shes rab skye// bzhi bcu rtsa gnyis mngon gsal ba// me long nang gi gzugs brnyan bzhin// ye shes lnga ldan dgongs pa yin// gong du zhib par brjod pa'i phyir// 'di ru brjod par mi bya'o// de las mngon shes chos spyan shar// sku gsum rnam par bzhag pa ste// yi ge drug po 'od zer 'phro// sprul pa'i skur 'gyur don rnams byed// de tshe rdzogs ldan dgongs pa rdzogs// de yi skad cig gnyis pa la'o// de nas mya ngan 'das gyur te// blo dang 'khor ba'i chos can las// 'das te mi gnas ngang du thim// ye shes spyan gcig 'gyur med gsal// rdzogs ldan chen po'i dgongs pa rdzogs// de yi skad cig gsum pa'o// 'bring gi 'bring gi grol tshul ni// dang po phyi nang 'khrul pa dag/ gnyis par rang gdangs 'od du gsal// gsum par de la skad cig gnas// bzhi par rang snang shes rab skye// ma rig bdud bzhi nges bcom ste// bzhi bcu rtsa gnyis mngon sangs rgyas// 'bring gi 'bring gis lnga ldan dgongs pa rdzogs// mngon shes drug ldan rjes dran drug/ nam mkha'i mthongs nas nyi shar ltar// rnam pa kun mkhyen ye shes shar// 'a sogs yi ge rnam drug 'phro// de ni sprul sku'i rgyu yin te// las dag gang zag rnam pa gnyis// 'du 'phro byed pa'i bar du 'phro// dkar dmar rnam gnyis lus kyi rgyu// yi ge drug pa'i byang chub sems// lus kyi rgyu las sems shar bas// dkar dmar klong du gnas pa ni// gnas la gnas gab lus dang sems kyi tshul// de nas lus kyi sprul pas 'gro don mdzad// 'gro ba ma lus thams cad la// rang rig ye shes ye gnas pa// snying po 'gyur med 'gag pa med// de don nges pa kun la sgrogs// thugs kyi snying po 'gro la 'char// ston pa'i dgongs pa longs 'gyur bas// yid 'dres bcud la bcud gab 'gyur// de yis nges par grol par 'gyur// 'bring gis rdzogs ldan dgongs pa rdzogs// de nas skad cig drug pa la// sangs rgyas mya ngan yongs 'da' ste// ye shes rlung gi stobs rnams kyis// dang po chos skur gzugs sku bskyed// tha ma gtso 'khor rim pas thim gyur te// ye shes rlung gis chos nyid ngang la spyod// de tshe 'byung ba'i mtshan ma rang sar thim// sprul sku'i 'byung lnga 'od lnga'i nang du thim// de yang ye shes 'byung ba'i ngo bor grol// dang po ma las shar bas ma yi ngang du zhi// dang po shar yang dbyings kyi ngang nas shar// bar du gnas kyang chos nyid ngang du gnas// tha ma thim yang chos nyid ngang du thim// spyan gsum rnam dag 'gyur med gcig tu gsal// chos nyid ngang na rig pa'i ye shes gsal// phyir mi gsal la ye shes nang du gsal// bum pa'i nang du mar me gsal ba bzhin// de tshe 'gyur med sku gsum rang sa zin// 'bring gis rdzogs ldan chen po'i dgongs pa rdzogs// 'bring gi tha ma'i grol lugs ni// phyi yi 'byung ba rnam pa lnga// phyi yi snang byed sgron ma la tshur shar te// gzung ba'i yul dang bral ba'o// sgo lnga gsal ba'i sgron ma ni// ye shes dbang du 'dus pas 'dzin rtog bral/nang gi 'byung ba rnam pa lnga/ rig pa'i sgron ma ye shes rtsal snang lnga la 'dus/ de ni rtsal gzhi la 'dus par bstan pa'o// de'i tshe thugs rin po che nyi zla kha sbyor gyi klong yangs na// 'byed pa med pa'i shes rab klong gcig du dril ba'o// de ni bag chags kyi sbubs rang sangasate// skad cig ma dang po la gnas so// de'i dus na 'byung ba bzhi bros pas/ rtags rim par 'byung ngo// snying rje med pa las kyi rlung la sogs pa rlung lnga gnas par byed pa ni 'degs par byed pa'i rlung tshigs pa la gnas te/lus yang zhing bskyod nus pa'o// de zhi bas lus mi theg ste/ de ni sa dang grogs pa'i rlung ngo// bkrag dang gzi mdangs skyed pa'i rlung lus la spyir khyab par gnas te/de ni khyab byed kyi rlung zhes bya ste/ lus kyi snum bkrag dang gzi mdangs 'byin pa'o// shin tu yang bas rkyen phra mos kyang bskyod nus te/ lus mdangs dang bkrag 'chor ba'o// de ni chu dang 'grogs pa'i rlung ste/ zhi bas mdangs nyams pa'o// me dang dus mnyam pa'i rlung pho ba na gnas te/ der zas 'ju ba dang lus byings drod skye bar byed do// zhi bas drod 'chor bas zas mi 'ju/de ni me dang 'grogs pa'i rlung ngo// dngas snyigs 'byed pa'i rlung ni steng sgo 'og sgo gnyis la khyab par gnas te/ de ni rlung gi rlung ste zas dngas snyigs 'byed pa dang/ snyigs ma gyen mthur du sel bar byed/thig le dkar dmar dang dri chu la sogs pa sel ba'o// de zhi bas pho ba brdzangs pa dang/ shes pa dang lus bying ngo// snying rje med pa las kyi rlung ni/ rlung 'khor ba srog rtsa na gnas te/ srog 'dzin pa'i rlung yin pas/ji srid gnas kyi bar du lus sems mi 'bral ba'o// de ni rnam par shes pa dang 'grogs pa'i rlung ste/ de bskyod pas snying nas lam rtsa dar dkar gyi skud pa 'dra ba der bskyod de/ rtags kyi gsang sgor phyin no// de'i tshe nyi ma shar gyi la khar phyin pas/ 'od nub ri la 'byung la/ bar na 'od zer thag pa bzhin du/ rig pa'i ye shes sgo lngar gnas la/ de'i snang ba yul chos nyid na gsal te/ye shes zang thal yin te/ bar chad med pa thugs rje rgyun gyi thag pas sbrel te/ thugs rje rgyun gyi thag pa la zhon nas rang gi gdangs la 'jug go// ye shes kyi gdangs la zhag lngar gnas te/ shar ba cig car shar ba'o// yang ye shes kyi snang ba nam mkha' la 'ja' shar ba ltar snang ba'o// de la rtogs pa'i shes rab rim pas skye ste/ zhag dang po la 'od mthing ga gsal bas/ rig pa ngos bzung dang bral bas chos kyi dbyings kyi ye shes rang snang rang shar rang gdangs rang gsal du shes pas/shes bya la gcod byed med do// zhag gnyis pa la chos dbyings ye shes gsal ba'i steng du me long ye shes shar ro// 'od dkar po yul du snang ba'i tshe/ de nyid rig pa 'gag pa med pa'i me long ye shes su thag chod do// zhag gsum pa la 'od zer ser po yul du snang ba'i tshe/ de nyid rig stong dbyer med rang snang mnyam pa nyid kyi ye shes gdangs su gsal lo// zhag bzhi pa la 'od dmar po yul du snang ba'i tshe// de nyid shes pa'i shes rab ma 'gags pa'i rang snang so sor rtogs pa'i ye shes kyi gdangs su gsal lo// zhag lnga pa la 'od ljang gu yul du snang ba'i tshe/de nyid bya ba grub pa'i ye shes kyi gdangs su gsal lo// skye ba rim pas skye bas zhag lnga la ye shes kyi snang ba re re gsal lo// chod pa thad kar chod pas/ snang ba re re la rtogs pa'i shes rab re re skye ste/sems med pa'i shes pa skyes kyang gcod byed med do// zhag lnga la lus mtha' rdzogs pas shes rab mtha' rdzogs te/ skad cig ma la chos nyid 'od gsal gyi dkyil 'khor na/ tshom bu lngar phyag rgya mi 'gag par gsal lo// des tha ma'i lnga ldan gyi dgongs pa rdzogs so// sku de rnams la mngon par shes pa drug 'char te/ spyan gsum las chos kyi spyan no// de ci ltar 'char na/ spyan gyi mngon par shes pas// yar gzigs su med pa chos sku rin po che'i sbubs [(]nas [)]gzigs/ thad ka nas longs spyod rdzogs pa'i sku bzhi bcu rtsa gnyis ma 'gags par 'od du gsal lo// mar sprul pa sku'i zhing khams bag chags sbubs na ji ltar gnas pa thams cad gzigs so// snyan gyi mngon par shes pa ni/ yar dus gsum gyi sangs rgyas thams cad thugs rje ye shes rtse gcig pa la/ nyid la nyid gleng bslangs pa yang gsan/thad kar longs spyod rdzogs sku tshom bu lnga gsal lo// mar sprul pa'i sku'i zhing khams na/ ji skad smra ba thams cad gsan no// thugs kyi mngon par shes pas/ yar chos sku rin po che'i sbubs nas 'byed pa med pa'i shes rab 'dzin pa med pa'i rang gsal/gzhan snang gi rnam rtog med par bzhugs par mkhyen no// thad kar rang gi dgongs pa ma 'gags par gsal lo// mar sems can gyi rnam rtog mngon du mkhyen no// gnas kyi mngon par shes pa ni/ sku gsum gyi zhing khams dang/ chos kyi dbyings dang 'od kyi snang ba dang// 'byung ba bzhi la brten pa bca' lugs bzhin gyi rigs drug gi gnas gzhan ma 'gags par gsal lo// las kyi mngon par shes pa ni/ sngon rang gis ji ltar spyad pa dang/ da lta 'gro ba gzhan ji ltar spyod pa mkhyen no// thugs rje byin rlabs kyi mngon par shes pa ni/mthun pa'i sems can rnams la snang bas/ rigs drug mthun pas mthun par snang bas 'dul ba gzigs te/ sprul pa'i sku sa drug shar lugs mkhyen no// rigs kyi bu de la chos kyi spyan zhes ci'i phyir gdags she na/sprul pa'i sku 'khor ba'i chos dang/ chos sku rin po che mya ngan las 'das pa'i chos gnyis/ rnam rtogs mi mnga' bar gsal bas chos kyi spyan no// don la rnam par mkhyen pa ni lkogs su gyur pa mkhyen pa'o// spyan ni gsal la mi rtog pa ste/ gzugs brnyan la sogs pa bzhin no// de tshe rang byung gi yi ge drug 'char ba yang/ 'a dang/ a dang/ ha dang/ sha dang/ sa dang/ ma dang drug ste/ rigs kyi bu yi ge drug po de gzhi chos sku la don ldan du bzhugs so// dbyings dang rig pa dang/ ye shes dang/ shes rab dang/ mi 'gyur ba dang/ mnyam pa nyid dang/ dbye ru med par gnas pa'o// bag chags lus can sprul sku la/lus kyi gnas drug la gnas te/ gsung 'gag pa med par don la sbyar ba'o// longs sku'i ljags las 'phro ba ni/ thugs rje 'byung ba'i gzhi ma 'gags pa/ yi ge drug po las rin po che'i srad bu bsgril ba 'am/snal ma'i tshon skud bsgril ma bzhin 'phros pas/ las dag pa sprul pa pho mo'i spyan nas 'jug/ sems can las kyi skye ba mngal nas 'jug pa'o// bde ba chen po'i gsang gnas nas/ 'od 'bar ba bde ba'i rta la zhon te/bde chen yongs la khyab pa'i thig le la/ snod dang bcud kyi tshul du gab/ de sprul pa'i skur gyur nas sems can gyi don byed pa'o// don yod 'gro ba'i don byed pa'o// rtogs med du 'byung ba kun gyi don ma spangs pa'o// de bzhin gshegs pa snga ma las phyi ma 'char te/ de nyid sprul pa rgyun mi chad pas/ sangs rgyas sprul pa'i rgyud 'chang ba'o// phyogs gcig tu ma nges te/ gdul bya gang na gnas pa'i don mdzad pas na/phyogs bcur sprul pa sna tshogs 'gyed pa'o// mthun pas mthun pa 'dul bar gzigs pas na/ ji bzhin 'gro ba'i don byed pa'o// dngos su thub pa drug gis 'gro ba dag gi don byed pa'o// thugs rje'i lcags kyus zhing dag pa de yang dag pa'i sa la 'dzin pa'o// rdzogs ldan gyi dgongs pa'o// de nas bdag nyid chos skur grol bas ni/ mi gnas pa'i ye shes chen pos 'byed pa med pa'i mkha' klong du 'khod snyoms so// de bas tha mas rdzogs ldan chen po'o// zhes gsungs so// gsang ba'i bdag pos zhus pa/ mngon par rdzogs par sangs rgyas pa'i dpe ji lta bu lags/ ma rtogs pa la bar do na sems dngos su med par sems phyis 'char ba'i dpe ji lta bu lags/sprul pa'i skus don byas nas rang grol ba'i dpe ji lta bu lags/ mya ngan las 'das pa'i dpe ji lta bu lags/ zhing khams gcig pa la snying po tha dad pa'i dpe ji lta bu lags/rig pa gcig la rtsal so sor rdzogs pa'i dpe ji lta bu lags/ rang sa na grol zhing rang sa nas dbyer mi phyed pa'i dpe ji lta bu lags/ mu bzhi'i dpe ji lta bu lags/ye shes rang la gnas pa'i dpe ji lta bu lags/ rtog pa med par bsgom pas mi grol ba'i dpe ji lta bu lags/ rin po che'i sbubs na dgongs pa gsal la gzhan gyis mi gzigs pa'i dpe ji lta bu lags/dang po rin po che'i sbubs las 'khrul pa'i dpe ji lta bu lags/ phyis mi 'khrul pa'i dpe ji lta bu lags/ dpe'i ngo bo gang lags/ nges tshig gang lags/ dbye ba ji ltar lags/ dgos ched ji ltar lags/zhes zhus so/ ston pas bka' stsal pa/ rigs kyi bu nges par zung zhig/ mngon par rdzog par sangs rgyas pa'i dpe ni/ nam langs pas ri klung med par gsal ba lta bu dang rgya mtsho la gza' skar shar ba lta bu dang chu zla lta bu'o// bar do la sems dang po med par phyis 'char ba'i dpe ni/ sa bon skye'u la myu gu sngon po med par phyis 'byung ba lta bu'o// sprul sku'i don byas nas rang grol ba ni/ chu bran rgya mtshor 'du ba lta bu'am nyi ma nub khar zer 'du ba bzhin no// mya ngan las 'das pa'i dpe ni 'ja' tshon nam mkhar thim pa lta bu'o// zhing khams gcig la rigs tha dad pa'i dpe ni/ mar me mang du btang ba'i 'od mi phyed par snying po so sor gsal ba lta bu'o// rig pa gcig la rtsal so sor rdzogs pa'i dpe ni/ sa bon gcig la sdong bu so sor gyes nas de la snying po so sor byung nas/ 'bras bu mang po rdzogs pa bzhin no// rang sa nas rang grol nas dbyer med du gnas pa'i dpe ni nam mkha' gud du bcad pa btang ba lta bu'o// mu bzhi'i dpe ni gcig dang tha dad las grol ba gser dang ser gyi ser po lta bu'o// ma grol ba smig sgyu chu zla lta bu'o// grol ba'i ma grol ba khams dang bum pa lta bu'o// ma grol ba'i grol ba nyi ma dang 'od lta bu'o// ye shes rang la gnas pa'i rtags kyi dpe ni chang 'thung bas ra ro ba lta bu'o// rtog pa med pa'i bsgoms pas mi gro la dpe ni/ ri mo'am lder so lta bu'o// rin po che'i sbubs nas dgongs pa gsal ba gzhan gyis mi mthong ba'i dpe ni/ gnas khang yangs par mtshan mo mgron po snga phyi tshogs nas nyal ba lta bu'o// dang po rin po che'i sbubs nas 'khrul pa'i dpe ni/ byis pas me long du shar ba'i byad ngo ma shes par gzhan du mthong ba lta bu'o// phyi mas mi 'khrul ba'i dpe ni/ byis pas rang gi na rdzogs nas rang byad la rang gi ngo shes pa lta bu'am/ lo thog nas su smin nas nang par ljang par mi 'gyur ba lta bu'o// rigs kyi bu dpe'i ngo bo ni/ so sor mtshon pa'i dpe ji bzhin pa'o// dpe'i nges tshig ni phyogs mthun 'dra ba'i sgo nas mtshon par byed pa'i phyir na'o// dbye ba ni gzhi mtshon pa'i dpe/ rtsal mtshon pa'i dpe dang/ grol ba mtshon pa'i dpe dang/ gnyis med mtshon pa'i dpe'o// dgos pa ni don rtogs pa'o// zhes gsungs so// spros bral don gsal chen po'i rgyud las/ dbang po yang rab la grol du med par bstan pa dang/ 'bring la rab 'bring tha gsum gyi dbye ba dang/ lnga ldan rdzogs ldan thad kar ngos bzung ba dang/mngon shes drug thugs rje'i 'byung lugs dang bcas pa dang/ rdzogs ldan chen po so sor phye ste bstan pa'i le'u ste brgya dang bcu gsum pa'o//// de nas yang gsang ba'i bdag pos zhus pa/kye kye bcom ldan rdo rje 'chang// de yi don bshad gsung du gsol// zhes zhus so// ston pas bka' stsal pa/ gsang ba'i bdag po nges par zung zhig/ so so ngo bo nges tshig dang// dbye ba ming dang mthun dpe bstan// 'khor ba'i chos la mi gnas par// mya ngan 'das pa'i don la gnas// grol ba spyi yi ngo bor bshad// rang rang so so'i ngo bor te// lus las grol ba'i ngo bo ni// rang gdangs chen po gsal ba yin// yul las grol ba'i ngo bo ni// rig pa dngos med rin chen sbubs// sems las grol ba'i ngo bo ni// rtog med dri dag rang gsal yin// grol ba zhes pa'i nges tshig ni// rtsol ba'i chos las rab 'das shing// 'khrul pa gsum gyis ma bcings pas// nges tshig gtan tshigs bcas pa yin// dbye ba ngo bo'i skabs su bshad// dpe ni sbrul la mdud bor dang// rnga ma dag gi mdud pa bzhin// thugs rje'i ngo bo nges tshig ni// ngo bo ma 'gags gzugs sku gnyis// ci'i phyir na thugs rje zhes bya na// ma 'gags gnod pa sel ba'i rtags// dbye na chen po chung ngu gnyis// rtog med dang ni rtog bcas so// 'dzin par byed pas lcags kyu bzhin// sgrol bar byed pa'i gru bzhin no// ma rig sel bas nyi zla bzhin// sdug bsngal nad sel sman dang sman pa bzhin// zhes gsungs so// spros bral don gsal chen po'i rgyud las/grol ba dang thugs rje'i don bstan pa'i le'u ste brgya dang bcu bzhi pa'o//// de nas yang gsang ba'i bdag pos zhus pa/ kye kye bcom ldan rdo rje 'chang// bag chags sbubs na gnas pa'i dpe ji ltar lags/sbubs 'pho ba'i dpe ji ltar lags/ 'dir rtogs pas bar dor shes pa skye ba ji ltar lags/ bag chag sbubs bor pa'i tshe ye shes dang mi 'bral ba'i dpe ji ltar lags/'khrul pa ldog pa'i dpe ji ltar lags/ rtogs pa can 'chi khar nad dang rkyen gyis dkrugs kyang/ shes pa phyis mi 'khrul pa'i dpe ji ltar lags/ chos sku lus las ma byung bar ye shes sngon du 'char ba'i dpe ji ltar lags/skad cig ma'i chos sku gsum du bsdu bar gsungs pa gang lags/ skad cig ma la grol ba'i dpe gang lags/ ye shes kyi gdangs la shes pa myur du 'jug pa'i dpe ji ltar lags/chos nyid las ye shes kyi snang ba 'char ba'i dpe ji ltar lags/ phyir mi ldog pa'i dpe ji lta bu lags/ zhes zhus pas/ ston pas bka' stsal pa/ rigs kyi bu nges par zung zhig/ bag chags sbubs na gnas pa ni// seng phrug dang khyung phrug lta bu'o// sbubs 'pho ba'i dpe bye phrug sgo nga nas 'byung ba dang/ sbrul skags pa dang bral ba bzhin no// 'di rtogs pas bar do chod pa ni/ sngar 'dris pa'i mi phyis ngo shes pa lta bu'o// sbubs 'pho khar ye shes dang mi 'bral bar 'grogs pa ni/ tshang bang nas me sgron phyir bton pas tshang bang mun par gyur te/ mi'i lag pa sgron me dang ma bral bas 'gro sar phyin pa lta bu'o// 'khrul pa ldog pa'i dpe gnyid sad pa lta bu'o// rtogs pa can 'chi khar nad dang rkyen gyis dkrugs kyang mi brjed pa'i gzungs thob ste/ snang gi yul ba'i dpe ni/ chu zla la rdo brgyab nas 'khrugs nas mi gsal kyang chu dngas pa'i 'phro la gsal ba lta bu'o// chos sku lus las ma byung bar ye shes sngon rol du 'char ba'i dpe ni/ nyi ma shar gyi la ka na 'dug kyang 'od nub ri la 'char ba lta bu'o// skad cig ma'i chos sku gsum ni/'dzin par byed pa'i lcags kyu'i 'od lngas ma bzung ba gzung bar 'gyur ba dang/ sdud par byed pa'i dngas ma chos kyi ngo bo ye shes shar ba'i ngang du thim pa dang/ mi brjed pa'i gzungs rgyun gyi thag pa dang gsum mo// skad cig ma gcig la grol ba'i dpe ni/ seng ge mchongs pa lta bu dang/ bum pa chag pas mar me gsal ba lta bu dang/ skar mda' nam mkha' la rgyug pa lta bu'o// ye shes la shes pa myur du 'jug pa ni gser gyi thur ma lta bu'o// chos nyid la ye shes kyi snang ba 'char ba'i dpe ni/ nam mkha' la 'ja' shar ba lta bu'o// phyir mi ldog pa'i dpe ni thog dang dpag chen gyi mda' bzhin no// zhes gsungs so// spros bral don gsal chen po'i rgyud las/ dpe spyir dril nas don bshad dang bcas pa'i le'u ste brgya dang bco lnga pa'o//// de nas yang gsang ba'i bdag pos zhus pa// kye kye bcom ldan rdo rje 'chang// mya ngan 'da' lugs ji ltar lags// zhes zhus so// ston pas bka' stsal pa// sangs rgyas mya ngan 'da' ba'i tshul// zur tsam gong du ngas bstan yang// khyod kyi nges par ma shes na// rgyas par ngas bshad legs par zung// shes rab mkha' la 'degs pa yi// ma bskyod shugs ni bskyod par byed// 'byung ba ma la zha ba yi// mtshan ma rang sar grol bar byed// ye shes dbyings su thim pa yis// rtsal rtog bzhi la thim par ston// shes rab mkha' la thim pa yis// sku gsum ye nas nang gsal ston// rig par rang sa zin pa yis// dgongs pa 'gyur ba med par ston// zhes gsungs so// de nas yang gsang ba'i bdag pos zhus pa// kye kye bcom ldan rdo rje 'chang// rang byung tshig lnga'i dgongs pa de ltar na// so so'i mtshan nyid rnam grangs dang// dpe dang don gyi grol lugs rnams// da ltar gnas dang rjes 'jug la// thabs la mkhas pas gsung du gsol// zhes zhus so// ston pas bka' stsal pa// lag na rdo rje nges zung zhig/ shes rab mkha' la 'degs pa la// mtshan nyid rnam grangs rnam pa bzhi// stobs ldan ma dang shugs 'chang ma// 'degs byed ma dang brtan ma bzhi// stobs ldan mas ni 'char ba dang// gnyis su med par sbyor bar byed// shugs 'chang ma zhes bya ba de// dang po rig pa'i rtsal du ni// sku dang ye shes 'char ba yang// rtsol ba med pa'i ngang gis shar// tha ma 'khor rnams gtso bo lnga la 'dus// gtso bo lnga yang rin chen sbubs su gshegs// gtso dang bcas te bskyod pa ma yin yang// ngang ngam shugs kyis grol ba'i phyir na shugs 'chang ma'o// de'i dus na chos sku rin po che lta bu la rdos pa can gyi chos med de// chos nyid nam mkha' lta bu dang/ chos sku nam mkha' lta bu gnyis// gnyis su med pa zang thal ba// ma byed seng nge gnas pas 'degs byed ma// de tsam dus na ye shes rlung gis mi g.yo bas brtan ma'o// de rnams rlung gi mtshan nyid gcig la gnas pa'o// rigs kyi bu 'byung ba ma la zha ba'i mtshan nyid la lnga ste/'khrul pa'i 'byung ba rnam pa lnga// ye shes lnga yi gdangs la 'dus// ye shes lnga'i 'od gdangs kyang/ rang byung 'byung ba lnga la 'dus/ de'i tshe na rlung gi rgya gram bkod legs te gdan du bting ba'o// de yang rlung ni ma bying ba'o// dus der rlung g.yo byed med par gnas pas kyang rgya gram lta bu'o// de ni g.yo byed min par bskyod pa lta bu'o// chu shel gyi 'khor lo brtsegs legs te/ 'byed pa med pa'i shes rab klong gcig du dril te/ gsher ba med pa'i chu'o// de bzhin rnam par dag pa'i dbyings de brtsegs legs so// de yang dbyings rnam par dag pa'i ngang na/ rig pa gsal stong dbyer med do// de'i ngang nas ye shes kyi spyan ma 'gags par shar ba 'od kyi bum pa lngar gnas la/ de'i snying po rigs lnga'i sku gsal la ma 'dres par gnas so// des na brtsegs legs so// rigs kyi bu rang gsal 'dzin pa med pa'o// de'i dus su sra ba dang bcas pa'i sa/ sra ba med pa'i ngang du grol te/ don 'gyur ba med pa'o// de yang rang gi ngo bo 'gyur ba med pa'i ngang na/ gong ma bzhin ma 'dres par yongs su rdzogs par gnas pa mchod rten lta bu'o// de la bzang ngan dang che chung dang yangs dog med par gnas pas kun tu khod snyoms pa'o// 'dug tshul sku dang ye shes la/ snang tshul sku dang ye shes lngar shar bas/rtogs tshul gnyis med chen por rtogs te/ dbye ba med pa'i tshul shes pa'o// rigs kyi bu dus der tsha ba dang bcas pa'i me tsha ba med pa'i ngang du grol te/ rang rig pa'i ye shes las gzhan snang gi rtog pa med pa'o// dri ma med pa'i rig pa la sku dang ye shes su gnas kyang/ don gnyis su med par gsal te/ sa bon 'bras bur smin la 'bras bu 'gyur ba med par gnas pa ni/ me tog pad ma 'dra bar 'od 'bar te/ma smin pa smin par byas so// rig pa'i ye shes 'byung ba las 'das pa'i rang gdangs/ 'od las 'das pa'i ye shes yid las 'das pa'i shes rab dus thams cad du skye 'gags dang nub pa med par gnas pa ni/nam mkha' khyab pa med pa'i gdangs can de/ rgyal mtshan gyi rtse mo lta bu'o// de ltar 'byung ba lnga po ma thog nas shar bas/ ma thog tu grol te/ mi gnas pas 'byung ba ma la zha'o// de yang dang po dbyings dang rig pa dbyer med kyi ngang la shar bas/ tha ma yang de'i ngang du dag cing thim pas ye shes dbyings su thim pa'i man ngag ye shes dbyings su thim pas so sor rtogs pa'i shes rab las 'das shing/gzigs/ mi gnas pas ye shes rtse gcig par gsal ba ste/ ye shes kyi spyan rnam par dag pa'o// de'i tshe shes rab kyi spyan dang chos kyi spyan las grol ba'o// rigs kyi bu ye shes kyi dbyings su thim kyang/stong pa phyang chad du ma gyur te/ dbyings kyi thig le gsher ba med pa'i chus/ nang med pa'i nang du 'dus te/ sku dang ye shes nang gsal du gnas pas/ shes rab mkha' la 'khyil ba'o// de yang rgyas par bstan na mtshan nyid bzhi ste/ sku dang ye shes dbyings su thim kyang// rig pa rang gsal dbyings na mi gnas pas/ thim pa la ma rmugs pa'o// ma rmugs kyang sems nyid rnam par dag pa ste/rang rig pa'i ye shes las gzhan snang rtog pa mi mnga' bas/ 'dzin rtog bral ba'i ye shes so// rigs kyi bu de ni gzhan ma yin te/ rang gi rig pa 'di nyid do// 'di nyid rtog pa ltar snang ba ni/rkyen phra mos snang ba'o// don shes pa gnas 'gyur ma yin te/ dper na khyim kyi nam mkha' sgrib pas bcad kyang rgya mthongs na yar zang thal te/ nam mkha' dbyer med do// de bzhin du bag chags sbubs kyis bcad kyang/don ye shes zang thal te/ brtags na ma bsgribs par zang thal lo// de bas na yin pa la bdag med pa'o// de'i ngang la dus gsum gyi sangs rgyas bzhugs kyang/ 'byed pa med pa'i shes rab rang gsal rtog pa med par bzhugs so// rig pa'i yon tan dang po klong nas shar ba/ tha mar mi 'gags pa rang gi klong na gnas te/ yum gyi bum pa ye shes kyi sku lnga so sor gnas te/ r ang snang las gzhan snang med pa'o// don de so sor ma 'dres pa la mi 'byed par bzhugs so// dus der rig pa rang sa zin te/ gnyis med chos sku mi 'gyur bas/ stong pa nyid rdo rje lta bu'i sku thob bo// gnyis su med pa chos sku'i ngang na rig pa ye shes kyi spyan 'gags pa med par gsal bas/ longs spyod rdzogs pa'i sku 'gags pa med pa'i gsung g.yung drung lta bu'i tshe'o// rigs lnga sprul pa'i sku ye shes kyi spyan gyi ngang na gsal bas de gsum dbye ba med pa'i shes rab klong gcig du 'khyil nas thun med pa'i thun chen po gcig gi ngang du grol te/rgyun gyi ting nge 'dzin rtse gcig gi ngang la gnas so// de'i tshe yul nyid las grol te/rang snang las gzhan snang med do// spyan gnyis dag nas ye shes rang gsal gyi spyan rtse gcig pa'o// lus gnyis las 'das te/ rig pa rkyang pa rin po che lta bu dri ma dang bral te/ gcer bu ru gnas pa'o// zhes gsungs so// spros bral don gsal chen po'i rgyud las/ mya ngan las 'das pa'i dgongs pa dang/ de mtshon pa'i tshig lnga'i don bshad pa'i le'u ste brgya dang bcu drug pa'o//// de nas yang gsang ba'i bdag pos zhus pa/kye kye bcom ldan rdo rje mtha' las 'das// mya ngan 'das pa'i don bshad ji ltar lags// zhes zhus so// ston pas bka' stsal pa/ rigs kyi bu nges par zung zhig/ ngo bo nges tshig dbye ba dang// mtshan nyid dbye ba bzhi yi bshad// mya ngan 'das pa'i ngo bo ni// mi gnas ye shes chen po'o// nges tshig sdug bsngal gyi mtha' las 'das pa ste/ mi rtog pa'i bde ba chen po la gnas pa'i phyir na'o// dbye ba ni zag bcas kyi mya ngan las 'das pa dang/ zag pa med pa'o// mtshan nyid ni mtha' rnam pa bzhi las 'das pa'o// zhes gsungs so// spros bral don gsal chen po'i rgyud las/ mya ngan las 'das pa'i don bshad bstan pa'i le'u ste brgya dang bcu bdun pa'o//// de nas yang gsang ba'i bdag pos zhus pa/ kye kye bcom ldan rdo rje 'chang/ rtog med gsal ba spyan gyi don rnams gsung du gsol// zhes zhus so// ston pas bka' stsal pa/ rgyud lung kun gyi nang na spyan zhes brjod pa ni/ ngas bstan 'di ltar shes par bya'o// ngo bo dbye ba bcas pa ni/ ye shes kyi spyan 'byed pa med pa ni rtse gcig tu gsal ba dang/chos kyi spyan rtog pa med par rnam par mkhyen cing gsal ba dang/ shes rab kyi spyan rnam par dpyod cing don so sor gsal ba dang/ lha'i spyan rnam par dag pa bag chags zad pa la snang ba dang/sha'i spyan rnam par dag pa ting nge 'dzin las su rung ba la gsal ba dang/ chu bur gyi mig bag chags kyi lus can rnams la thun mong du snang zhing gsal ba'o// nges tshig ni don mthong zhing ma 'gags par gsal bas na'o// mtshan nyid spyi ni sgrib pa dang bral ba'o// dpe ni nyi ma'i snying po lta bu'o// zhes gsungs so// spros bral don gsal chen po'i rgyud las/ spyan gyi don bstan pa'i le'u ste brgya dang bco brgyad pa'o//// de nas yang gsang ba'i bdag pos zhus pa/ kye kye bcom ldan rnam par mkhyen// rgyud lung man ngag las byung ba'i// mu bzhi'i don yang bshad du gsol// zhes zhus so// ston pas bka' stsal pa/ rdo rje 'dzin pa legs par zung zhig/ mu bzhi'i ngo bo nges tshig dang// dbye ba mthun pa'i dpe rnams te// dpe ni gong ltar shes par bya// ngo bo dbye ba bcas pa ni// mu bzhi rnam pa gnyis yin te// dus dang grol ba la sogs brtsi// dang po dus kyi mu dbye na// lus kyi mtha' rdzogs pa'i dus dang/ shes rab kyi rtsal rdzogs pa'i dus dang/ las kyi mtha' zad pas che ba'i ye shes mthar rdzogs pa'i dus dang/yang dag par rdzogs pa'i sangs rgyas la thugs rje'i rtsal zad pa'i dus so// grol ba'i mu bzhi ni/ gcig pa dang tha dad pa las grol ba'i thig le dang rang byung gi ye shes so// rigs kyi bu ci'i phyir na rang byung ye shes nyid thig le yin la/thig le nyid kyang rang byung gi ye shes su gsal bas/ gcig dang tha dad du brjod pa las 'das pa'o// gcig pa dang tha dad pa las grol ba ni/ chos sku dang nam mkha'o// rigs kyi bu ci'i phyir na/ de gnyis tha dad pa'i phyir de/ rang bzhin dag pa'i nam mkha' ni/ kha dog dang dbyibs kyi bdag nyid dang/ 'byung ba'i rang bzhin dag kyang/ bag dang ma bral te ngo bo rig med stong pa yin pa'i phyir ro// chos sku thig le chen po ni/ stong par mthun kyang de rnams las ldog ste/ don des gcig pa dang tha dad pa las grol ba'o// grol ba'i ma grol ba ni sems dang ye shes te// grol ba ni gzhi gcig pa'o// sems rtog bcas su gsal la/ ye shes rtog med du bzhugs pas/ don des rtsal gyi ngo bo nas ma grol ba'o// ma grol ba'i grol ba ni thig le dang yul te/thig le'i rig pa 'gags pa med pa dang/ yul med stong par gnas pas ma grol ba'o// grol ba ni chos thams cad tha dad pa lta bu ma yin pas/ stong pa dbyer med du gnas pas/ so sor brjod pa las 'das pa'i gsal ba zang thal lo// don des ma grol ba'i grol ba'o// zhes gsungs so// spros bral don gsal chen po'i rgyud las/ mu bzhi'i don bstan pa'i le'u ste brgya dang bcu dgu pa'o//// de nas yang gsang ba'i bdag pos zhus pa/kye kye bcom ldan rdo rje 'chang// sgra yi don bshad gsung du gsol// zhes zhus so// ston pas bka' stsal pa// ngas bshad rgyud lung thams cad du// sgra rnams ji ltar snang mod kyi// sgra yi dbyings dang sgrub byed dang// gzhan sel phan pa'i rkyen can no// rnam pa bzhi ru bsdus la bstan// sgra yi dbyings ni 'a dang a'o// de gnyis kun gyi 'byung gnas yin// de yang ji ltar 'byung zhe na// de gnyis su med par ma byung ba'o// de gnyis mi 'gyur bas sa'o// de gnyis kyi bar du ye shes mi 'gag par rang byung bas ha'o// de las shes rab skye bas sha 'byung ba'o// de gnyis ka phyi mo yin pa dang/ de ltar snang ba'i sku gnyis thugs rjer 'byung bas ka'o// dbyings kyi ngang las mi 'da' zhing ngang gis nang na gnas pas na kha'o// de gnyis rgya ma chad pas ga'o// de gnyis su med pa la thams cad 'char pas nga'o// de gnyis kun gyi 'byung gnas yin pas tsa'o// de nyid gnyis su med par nyams su myang bas tsha'o// de ma 'gags par thugs rjes 'dzin par byed cing de gnyis 'du 'bral med pas na dza'o// a rig pa yin pas na ta'o// gzhi gnas mthar gyur pas na ba'o// de gnyis su med par byung na shes bya ma bcos pa ste nga'o// ye shes su 'byung bas na nya'o// ma rtogs pa sems su snang bas na'o// de gnyis su med pa chos kyi sku yin pas pa'o// thabs 'gag pa med pas pha'o// rtsal skur snang bas ba'o// de gnyis kyi thugs rje sku bzhi las grub pa ya'o// thugs rje dang mi 'bral bas ra'o// de gnyis las thams cad 'phro zhing 'dus pas la'o// de gnyis las rtogs ma rtogs ltar snang bas Ta log dang Da log pa'o// de bas na 'a dang a ni sgra yi dbyings so// de gnyis sgrub par byed pa ni/ a gnyis kyis yi ge thams cad dag par bsgrub pa'o// 'as thams cad spros pa dang bral bar bsgrub pa'o// de gnyis 'brel bar gyur pas rig pa ste// rgyun chad med par bsgrub pa'o// ha dang 'brel bas na chen po ste/ ma byas pa sgrub par byed pa'o// ye shes rang brtsegs 'byung bas thug pa ste/ skye 'gag med par bsgrub pa'o// ha dang zhabs kyus kyang yi ge dang bar 'brel bas thung ba ste sdud pa'o// dza de'i phan pa'i rkyen can no// pa ra ta sa ra dang bcas pa ni spros par byed pa'i sgrub pa'o// sa dang ta ni de la phan pa'i rkyen can no// tha log thams cad thun mong ma yin pa'i bsgrub pa'o// rang ngo thams cad ni dbyings bsgrub pa'o// de bzhin du 'a dang a las shar ba thams cad don phyogs re dang ldan pas/a'i don phyogs re bsgrub pa'o// de ni sgra'i sgrub byed du bzhag pa'o// de rnams kyi 'a dang a'i ming ma mthun pa'i phyir mthun pa'i phyogs sel cing/sgo so so'i mi mthun phyogs sel bas gzhan sel lo// de rnams kyi 'phrul lugs kyis rang rang gi don sgrub pa'i grogs su 'gyur ba dang/ spyir gzhi'i yon tan bsgrubs pas don grogs su 'gyur pas na/ sgra phan pa'i rkyen can no// zhes zhus so// spros bral don gsal chen po'i rgyud las/ sgra'i don bstan pa'i le'u ste brgya dang nyi shu pa'o//// de nas yang gsang ba'i bdag pos zhus pa// kye kye bcom ldan rdo rje 'chang// rgyud lung man ngag gang gsungs pa// tshig tshogs thams cad de ltar bshad lags na// 'bru rnams ji ltar gzhom pa gsung du gsol// ston pas bka' stsal pa// rdo rje 'dzin pa legs par zung zhig/rgyud lung man ngag gi don thams cad gong ltar bshad la/ gnas skabs thams cad 'bod skad kyis bsdebs la// gong du bshad pa 'bru mnan no// rigs kyi bu le'u zhes pa ni/ so so'i sa mtshams dang chos gzhan ma 'dres te/gang mtshon pa'i don gtso bor bshad pa'o// skabs shes pa thams cad le'u don dang don 'byung ba'i gzhi ma 'gags par shes pa la bya'o// spros bral thams cad ni mi 'gyur ma 'gags par shes par bya'o// snang ba thams cad yul lo// yul thams cad bzhugs pa dang snang bar shes par bya'o// rig pa chos sku dang don mkhyen pa dang bem po las log pa dang ma rig pa las log pa'o// ma rig pa thams cad don ma shes pa'o// yon tan thams cad mthun pa'i phyogs dang/ bzhi ldan pa dang ma 'gags par bshad do// skyon thams cad mtha' dang gzung 'dzin dang/ ma rig pa dang log lta dang/don so so dang mi mthun pa dang/ spang byar bshad do// grub mtha' thams cad blta ba dang 'bras bur bshad do// 'bras bu thams cad don mthar phyin pa'o// don ni tha dad do// dgongs pa thams cad ngang dngas rang bzhin bdag nyid chen por bshad do// ngang ni ma bcos pa dang mi g.yo ba dang/ mi 'da' ba dang mi gnas pa dang/ mi 'gyur bar bshad do// rang rang ni ma 'gags pa dang/ mi mthun pa dang so so'i chos nyid du bshad do// bdag nyid chen po ni thams cad rig pa dbyer med par bshad do// rang bzhin ni gzhan la rag ma lus pa'o// 'gyu ba thams cad ni rtsal lo// sbubs med pa'i 'gyu ba rtog med kyi rtsal lo// sbubs can rtog bcas so// de ltar de bzhin de 'dra zhes pa ni gar byung yang tshig snga phyi'i dpe dang sbyar ro// de ni zhes pa thams cad ni snga ma 'og tu rgyas su bstan pa'o// da ni zhes pa ni snga ma bshad nas/de dang de las bzlog pa gcig ston pa'o// 'di ni zhes pa ni thams cad don logs su bkar ba'o// can thams cad yon tan du snang ba dang sbyar ba'o// dpal dang stug pa dang mdzes pa ni mthu stobs dang byin rlabs so// 'di yang zhes pa thams cad don dbus ma gong 'og du bstun pa'o// ci phyir gang gis phyir na de phyir ni/ gtan tshigs su bstan pa'o// rnams dang ma lus pa dang thams cad dang kun dang de dag ni/tshig gi don lhag ma ma lus par bstan pa'i tshig go// byang zhes pa rig pa chub pa ye shes so// byang ba chos sku chub pa longs sku/ sems dpa' sprul sku'o// gzhi dang rtsal du yang bshad do// chos nyid mi 'gyur ba dang rang gi mtshan nyid dang dbyings su bshad/ shes rab ces pa ni phyogs lhung med pa dang/ so sor dpyod pa dang ma 'gags par bshad/ sgron ma ni gsal byed do// mun pa ma rig pa'o// shar ba yul la shar ba dang/ rtog pa dang rtsal te/ don thad kar sbyar ro// rang byung ni 'dus ma byas pa dang rtsal lo// gnas skabs shes pa gces so// 'od snang la rang bzhin med pa dang/ gsal la ma bsgribs pa'o// mtshon bya gzhir bshad do// mtshon byed thabs su bshad/ mu gnas pas ni mtha' dang bral bar bshad do// rnam par dag pa ni phyogs thams cad nas dag pa'o// mtshan ma'i chos las grol ba'o// bdag med pa ni bdag gnyis dang bral ba sems las grol ba'o// gzhi ni chos nyid dang chos sku dang// ye shes te skabs dang sbyar zhes pa'o// rtsal 'od dang 'khor 'das so// rol pa ni yul dang rnam par bshad/mdzad spyod ni mthun par snang ba'o// rdzogs pa ni lhag ma ma lus pa'o// chen po ni ma byas pa dang/ gong na med pa'o// ye shes nyid ni dang po'i shes pa'o// de nyid ni gzhi'o// de ltar rtogs pas grol ba'o// mkha' 'gro ma ni rdo rje dang ye shes dang las dang sha zar bshad do// 'gro ba ni rtogs pas mkha' la 'gro ba dang// thugs rje dang las dang shugs kyis 'gro ba'o// 'bar ba ni ma 'gags par gsal ba'o// mdzod ni zhugs gnas su gyur pa'o// sgo ni 'byung zhing 'jug pa'o// lde mig ni 'byed cing grol ba'o// dam tshig ni dbyer mi phyed pa'o// dpal ni bdag gzhan gnyis kyi'o// thugs rje ni thun mong dang byin rlabs las byung ba'o// skyes bu ni don mchog tu gyur pas 'gro ba'i kha lo gyen du bsgyur ba'o// ma ni skye ba'i gzhi 'byung ba'i gnas so// mo ni shes rab kyi bdag nyid do// thabs ni don bsgrub pa'i rkyen no// yan lag ni gang yin pa las 'phro ba'i chos can no// med pa ni 'gyur ba'i don spyod med pa'o// gser ni mi 'gyur ba'o// gzhung ni gzhan dang ma 'dres pa'i lugs so// rang lugs ni ma 'dres pa'i don no// 'khor lo ni gcod pa dang cir yang snang ba'o// srid pa ni mi khegs pa dang med pa las yod par snang nus pa'o// 'chang ba ni 'du 'bral med pa'o// rgyun ni skad cig mas 'dab sbyor ro// tha snyad ni phyogs re nas spros pa'i chos so// ming ni mtshon pa'i sgra tshig go/ gdangs ni rang snang ba/ chos ni mtshan ma phra rags/ rtog tshogs gzung 'dzin chos las 'das pa'i sangs rgyas so// gzung 'dzin dang bral ba'i rig pa 'byung ba la 'das pa'i gdangs ni/rig pa rang snang rang gsal zang thal/ sku las 'das pa'i ye shes chos sku mkhyen par shar ba/ tshig las 'das pa'i rang snang/ brjod bral gzhan snang med pa'o// lam ni gnas pa dang 'jug pa'o// sems can ni ma shes pa'i rtog bcas so// 'khor ba ni gcig tu mi gnas par 'khrul pa'o// sems ni dran pa nges pa'o// bskyod pa ni gshegs pa'o// bskyod du med pa ni mi bgrod pa'o// sdug bsngal las grol ba'i bde ba chen po yin pas byang chub pa'o// shes pa ni mkhas pas de don la ma rmongs pa'o// gnas pa ni rtsol bas ma song bar phyin pa'o// gru ni sgrol ba ste thabs so// ting nge 'dzin ni gsal ba ste rtse gcig pa'o// rab ni 'gran zla med de chen por gyur pa'o// mchog ni ngo mtshar ba ste 'phags pa'o// phul du phyin pa ni khyad par 'phags pa'o// bla na med pa ni de'i gong dang logs na med pa ste/ dbang byed pa med pa'o// rdo rje sems dpa' ni stong pa nyid dran pa nges pa ni mtshan ma sna tshogs pa'o// zab pa ni gting ring zhing dpag par dka' ba'o// gting dpag dka' ba ni phra bas na'o// chos ni mtshan nyid 'dzin pa dang/ rnam par dkar ba dang gzhan la rten pa dang/ kun 'byung bas na'o// byang chub sems dpa' ni/ bdag gzhan la sems dpa' dang sa non pa'o// phung po gsum ni/ sangs rgyas dang byang chub sems dpa' dang sems can no// byang chub sems dpa' ni/ yar sangs rgyas dang snang ba mi mthun la/ mar sems can dang mi mthun te/ gnyis ka ma yin pa'o// de yis phung po gsum du bzhag pa'o// bag chags ni gzhi gnas dang 'phral 'byung ngo// dag lugs ni rang dengs su 'gro ba dang/ phra ba'i gdams pa la rag lus pa'o// dpe gangs la kha ba babs pa dang/mtsho la dar chags pa dang/ ras la dri mas gos pa bzhin no// gzhi gnas kyi dbye ba ni chu dang 'o ma lta bu'o// 'phral 'byung gi dpe chu dang zla ba'o// sel ba'i dpe ni ral gri lta bu dang lcags kyu lta bu'o// gsang ba ni gab pa'o// sangs rgyas ni mthar phyin pa'o// ma rig pa ni 'khrul pa'o// skyob pas na lha'o// mdzes pas na lha mo'o// byams pas na mgon no// mdzad pa sna tshogs pas na phrin las so// bdag po ni dbang chen po'o// yon tan ma 'gags pa'o// dri ma med pa dang/ mi 'gyur ba dang/ thams cad mkhyen pa'i thugs so// sna tshogs ston pas gsung ngo// gzi brjid ldan pas na sku'o// thabs dang shes rab 'dzin pas na yab yum mo// byang chub chen po dang ldan zhing bskyed pas sras so// de ltar ngas bstan pa'i rgyud lung thams cad du shes par gyis shig/ ngas bstan pa'i don de rnams la rtsod par gyur na gang rtsod pa dang/rje blon dmangs gsum dpang du bzhag la/ 'dri lugs dang dam bca' ma nor bar byas la/ sgrub byed kyis gang yin pa sgrub cing/ gzhan sel gyis mi mthun pa'i phyogs thams cad spangs la/phan pa'i rkyen kyis bstangs btab ste/ don mi 'gyur pa'i dbyings la bskyal lo// log lta can gyi sgrub byed la/ skyon gyis sgrub byed mi mthun pa'i phyogs btang ngo// khong gis gzhan sel ni/mi mthun pa'i sgrub byed btang ngo// phan pa'i rkyen la gnod pa'i 'gal rkyen btang ngo// rang rig pa'i ye shes dgag sgrub dang bral ba ni/ dbyings su bzhag ste btsan pa'i yul mkhar lta bu'o// de'i phyogs nas bsgrub pa'o// gtan tshigs gsum dang bzhis phan pa'i rkyen byas pa'o// gnod pa'i rkyen du yang de rnams bstan no// gzhi snang la sogs pa gang rtsod kyang/ grogs de rnams kyis byas la/ ngas bshad pa bzhin don gyi gnad dri ba dang lan gdab par bya'o// mthun na sgrub byed kyi dbyings la sbyar/ mi mthun na gzhan sel gyis brgal lo// don nges par byed pa dang/ the tshom dang bral bar byed pa dang/shes bya gtan la 'bebs pas na gtan tshigs zhes bya ste/ de dang rjes su mthun par bshad do// des yid gnyis za ba dang bral bar 'gyur ro// zhes gsungs so// spros bral don gsal chen po'i rgyud las/'bru 'thor ba sdud pa dang/ the tshom dang bral bar byed pa dang/ skyon gyi mtha' bsal ba'i le'u ste brgya dang nyer gcig pa'o//// de nas yang ston pas rgyud kyi mtshan yongs su bstan pa'i le'u 'di gsungs so// gsang ba'i bdag po rdo rje 'dzin pa nyon cig/ don gyi man ngag rtsa ba car phog gi// de nyid spros bral don gsal bstan pa yi// man ngag rgyud kyi spyi 'grel chen po 'di// gsang bdag zhu ba'i 'khor dang dga' rab sdud pa'i 'khor// gzhan yang 'dir mos 'dir 'dus tshogs pa'i 'khor// nga yi spros bral don gsal rgyud chen 'dis// chos rnams kun gyi rtsa ba car gyis ston pas na// rtsa ba car phog rgyud chen zhes su zung// gcig shes kun tu grol bar ston pas na// yang tig lde mig chen po'i rgyud du zung// da lta bud+d+ha nyid dang mnyam sbyor bas// sangs rgyas mnyam sbyor chen po'i rgyud du zung// la zlo spros dang bral bar ston pas na// spros bral don gsal rgyud chen zhes su zung// rang ngo rang la ngo sprod ston pas na// gsang ba'i ngo sprod chen po'i rgyud du zung// gnas lugs ji ltar yin pa rdzogs par ston pas na// rdzogs chen nang nas yongs rdzogs chen po'i rgyud du zung// lta bsgom dri med dag pa chen po ston pas na// dri med ka dag chen po'i rgyud du zung// skyon rnams yon tan dag tu lhun gyis grub par ston pas na// lhun grub chen po'i rgyud chen zhes su zung// rang byung ye shes rang la 'char bar ston pas na// ye shes rang shar chen po'i rgyud du zung// ma rig mun pa rtsad nas smag rnams sel bas na// ma rig mun sel chen po'i rgyud du zung// 'khor ba thams cad dong nas sprugs pas na// dong sprug chen po'i rgyud chen bya bar zung// 'khrul pa thams cad rtsad nas gcod pas na// 'khrul pa rtsad gcod rgyud chen bya bar zung// 'khor ba'i chu bo gru yis sgrol bas na// gru sgrol chen po'i rgyud chen bya bar zung// nyon mongs gcong nad gting nas 'don pas na// sman pa che mchog rgyud ces bya bar zung// bdud bzhi rtsad nas 'joms par 'don pas na// bdud 'joms chen po'i rgyud chen zhes su zung// don chen lhag med sprugs nas ston pas na// rtsal chen sprugs pa'i rgyud ces bya bar zung// kye ma kye ma ma rig 'khrul pas snying re rje// 'khrul pa'i chos la bden par ma 'dzin par// 'di la skur ba ma 'debs don gsal rjes su 'brangs// rang byung ye shes 'gyur med ma shes nas// dngos po rdzas grub bden par ma 'dzin par// spros bral don gsal 'di yi rjes su 'brangs// 'on kyang mi 'gyur rtag pa rtogs par 'gyur// dngos med zhi pa chos sku ma rtogs par// stong pa cang med mtha' la ma 'dzin kwa// don gsal 'di yi rjes su 'brengs pa na// 'on kyang stong nyid zhi ba rtogs te 'ong// gnas lugs snang lugs rnam gnyis ma rtogs pas// gnyis kyi mtha' la bden par ma 'dzin kwa// skur pa ma 'debs don gsal rjes phyir 'brangs// 'on kyang gnyis med rang snang rtogs te 'ong// sku gsum 'du 'bral med par ma rtogs pas// blos btags bskyed rdzogs rnam gnyis bden par ma 'dzin kwa// sgro skur ma 'debs don gsal rjes su 'brangs// 'on kyang ye nas lhun rdzogs rtogs te 'ong// don gyi spros bral don gsal ma rtogs par// tshig dang yi ge'i sgra la ma zhen kwa// don gyi spros bral don gsal nyams su longs// 'on kyang ye shes don gsal rgyud la 'char// zhes gsungs so// de nas yang gsang ba'i bdag po la sogs te 'dus pa'i tshogs rnams kyis thal mo sbyar te bskor ba lan mang du byas nas// kye kye bcom ldan rdo rje 'chang// bdag cag 'dus pa'i tshogs rnams la// spros bral don gsal rgyud bshad pas// ma rig mun pa rgyud 'dis bsal// 'khor ba rtsad nas rgyud 'dis bcad// nyon mongs g.yul las rgyud 'dis bzlog/chu bo bzhi las rgyud 'dis bsgral// ngan song dong nas rgyud 'dis sprugs// bag chags ljan ljin rgyud 'dis bsal// 'khrul pa thams cad rgyud 'dis bcad// rang ngo rang la rgyud 'dis sprad// gcig shes kun las rgyud 'dis grol// gnas lugs don chen rgyud 'dis go// log lta tshar chen rgyud 'dis bcad// theg dman shan thang rgyud 'dis phye// 'byung ba dngas snyigs rgyud 'dis phye// nyon mongs dug lnga rgyud 'dis bsal// lam la rtsol med rgyud 'dis byas// rang byung ye shes rgyud 'dis shar// 'khor ba dngas snyigs rgyud 'dis phye// log pa'i lam zhugs rgyud 'dis bzlog/ chos 'dis rtsa ba rgyud 'dis bcad// man ngag rgyud sgrog chen po rgyud 'dis khrol// sku gsum yongs rdzogs rgyud 'dis thob// ye shes rnam lnga rgyud 'dis shar// ma mthong yul chen rgyud 'dis mthong// ma mjal zhal chen rgyud 'dis mjal// ma thos gtam chen rgyud 'dis thos// 'byung ba ma la rgyud 'dis zha// grol zhing thim pa rgyud 'dis byas// 'khor ba'i la las rgyud 'dis bzlas// rtsol med 'bras bu rgyud 'dis thob/ !/ kye kye bcom ldan rdo rje 'chang chen po// dgos 'dod re skong nor bu rin chen lta bu khyod la bstod// ma rig mun pa sel mdzad nyi ma lta bu khyod la bstod// 'khor ba'i bag chags bsreg mdzad me dpung lta bu khyod la bstod// nyon mongs dri ma 'khrud mdzad chu bo lta bu khyod la bstod// rang gsal don nyid gsal mdzad me long lta bu khyod la bstod// rnam dag don chen ston mdzad man shel lta bu khyod la bstod// skyon gyis ma gos ston mdzad pad ma lta bu khyod la bstod// tshegs chung don chen don mdzad man ngag lta bu khyod la bstod// 'khor ba'i g.yul ngo bzlog mdzad dpa' bo lta bu khyod la bstod// 'khor ba'i gcong rnying 'don mdzad sman pa lta bu khyod la bstod// 'gro drug bde bar sgrol mdzad thugs rje'i bdag po khyod la bstod// ces gsang ba'i bdag pos bstod do// spros bral don gsal chen po'i rgyud las// rgyud kyi mtshan yongs su bstan pa dang/bstod pa phul ba'i le'u ste brgya dang nyi shu rtsa gnyis pa'o//// de nas yang rdo rje 'chang gis gsungs pa// nga yi spros bral don gsal rgyud chen 'di// bstan pas shes shing bklags pas go ba ste// da lta rang ngo rang gi shes te dus gsum 'gyur ba med// rig pa chos sku shes shing snang ba chos kyi dbyings su shes// gnyis med don chen rgyud la gsal ba yis// snying po'i gzhi rtsa chod pas 'khor ba'i g.yang sar lhung mi srid// dgos 'dod re ba bskang mdzad nor bu rin chen lta bu yi// rtsa rgyud bshad rgyud man ngag rgyud du bstan pa 'dis// snod ngan dam tshig med pa rnams la shor srid do// slob dpon gsang nas rang che 'byin pa rnams la shor srid do// rang gis nor ma shor bar gdams ngag 'dod pa rnams la shor srid do// 'jur bu rang 'dod can gyi mi la shor srid do// kha gsags g.yo sgyu can gyi mi la shor srid do// zog po rdzun po che yi mi la shor srid do// mthar thug la zlo'i chos la mos pa mi byed dang// rdo rje slob dpon gnyan par mi sems dang// lus kyi sgo nas dam tshig mi bsrung bar// bkur sti rim grol zhabs tog mi byad dang// ngag gi sgo nas dam tshig mi bsrung bar// snyan par mi smra slob dpon ming nas 'bod// yid kyi sgo nas dam tshig mi bsrung bar// mos gus chung zhing gdung ba'i sems dang bral// ji srid de 'dra'i gang zag byung gyur na/ khong du sbrul zhugs snying la me 'bar zhing// ske la gri gtub mgo la thog 'bebs kyang// dam med snod ngan rnams la shor srid do// gces pa'i lus srog 'bral ba'i rkyen byung yang// dam med snod ngan rnams la shor srid do// chos skyong srung ma dam can rgya mtsho dang// e ka dza TI gu h+ya ral gcig mas// 'jig rten 'di ru tshe thung nad mang mi bde sna tshogs 'ong// dam tshig nyams pas phyi ma rdo rje dmyal bar skye// gzhan gyi rnam smin bde gshegs thugs rjes 'byangs// dam tshig nyams pas sangs rgyas bkas mi skyobs// de bas dam tshig gnyan po snying bas lhag par bsrung// lus ngag yid gsum dam tshig ldan pa yis// rgyud 'di rang gis snying bas lhag par chongs// snod ldan 'ga' tsam zung tsam ma gtogs par// snod med rnams la shor ba srid do kwa// dam med rnams la shor ba 'ong ngo kwa// dad med rnams la shor ba srid do kwa// zhes gsungs so// zhu ba po'i 'khor gsang ba'i bdag po dang/ sdud pa po'i 'khor dga' rab rdo rje la sogs pa rnams rjes su yi rang ngo// spros bral don gsal chen po'i rgyud las/ rgyud gtad pa'i le'u ste brgya dang nyi shu rtsa gsum pa'o//// tan+t+ra rA dza ma hA/ sangs rgyas mnyam sbyor don gsal chen po'i rgyud mthong bas grol ba 'di yongs su rdzogs so//// guh+ya/ gtad rgya rgya rgya/ i thi/ yang gsang ba man ngag gi rgyud chen po 'di sdud pa'i 'khor dga' rab rdo rjes bsdus nas tshig dang yi ger bkod nas gu ru 'jam dpal bshes gnyen la bshad/des gu ru shrI seng ha la bshad/ des o rgyan gu ru pad ma la bshad do// gu ru pad ma 'byung gnas ngas// lnga brgya dus kyi snyigs ma la// ldan gsum skyes bu'i don ched du// chos rnams kun gyi ma chen mo// kun bskyed rang gzhung tshugs shing rdzogs// spros bral don gsal rgyud chen sbas// sems can sangs rgyas mnyam sbyor don// thos bsam bsgom la mi ltos shing// bstan pas rtogs shing dran pas gsal// 'phrad pas dbang thob mthong bas grol// 'bras bu da lta thob pa'i chos// yid bzhin nor bu lta bu yin// thugs gter yang gter gsang mdzod 'dis// ma tshangs kha bskang shul tsho sdud// 'phral thog nyams su blang chog ma// snying nor yin no mig 'bras yin// bdag kyang thos chung ma yin te// rdo rje 'chang dang mkhyen pa mnyam// de phyir thugs kyi gsang gter 'di// gnam sa'i bar na gter gcig ma'o// las 'phro can dang 'phrad nas kyang// bco lnga lo bar yid la brnag/ gsang dam dam bsrung dus thal tshe// 'khor ba blos thong nges don 'tshol// bla ma la gus srog 'dor phod// gsum la dpe gtod kun la min// dus la bab na 'gro don yong// snyan rgyud du thob la skal ldan skyongs// rgyud mchog bla med nub dogs nas// rgyud 'di gter kha gsum du sbas// gcig ni byang gter pra dun rtser// rnam snang thugs kar sbas te bzhag/ stag gi lo la 'byin par 'gyur// gcig ni yang gter 'dir sbas so// sbrul gyi lo la 'byin par 'gyur// gcig ni mkha' ri dge ri'i phug/ spre 'u'i lo la 'byin par 'gyur// de yang 'dir ni ma bu tshang// yang gter rgyud gsum bu yi tshul// ci'i phyir ma yi bcud bsdus pa'o// don gsal rgyud mchog ma yi tshul// ci 'dod kun bskyed rang gzhung tshugs// de ltar zab phyir thugs gter yang// yang gter thims su 'di ma bstan// da lta sangs rgyas mnyam sbyor don// 'dis ston phyir na rgyud sor bzhag/ 'grel pa'i mun pas g.yog ta re// TI ka'i sbar mos bsdam ta re// lung drangs lto tshil bskus ta re// de phyir bka' rgyud rang sor zhog/ don 'grol dka' na snga ma bsten// tshogs brgya rtsa dang maN+Dal dbul// zhib tu dpe ltar don la dpyad// bltas pas grol ba kho na'o// shes rab blo ldan snying rje can dang 'phrad par shog/ ci'i phyir gsang sngags ngo bo shes rab yin// a+thi+-i/ gu h+ye/ rgya rgya rgya/ e ma ho// bdag 'dra gter ston chos dbang la// dus gsum sangs rgyas bka' 'babs te// snying po'i rgyud mchog 'di 'dra bdog/ che na ngo mtshar de che mod// sprul sku chos kyi dbang phyug la// gzhu snye'i snang don dad seng gis// lho brag lha bro dgon pa ru// sbrul gyi lo la zhus nas bris/

CLOSE WINDOW