བོད་ཡིག

e-texts based on the Esukhia Input

'phags pa dkon mchog brtsegs pa chen po'i chos kyi rnam grangs le'u stong phrag brgya pa las le'u sum cu rtsa drug pa ste/ 'phags pa lha'i bu blo gros rab gnas kyis zhus pa lung bstan pa/ bam po dang po/ /rgya gar skad du/ Ar+ya su s+thi ta ma ti de ba pu tra pa ri pr-i ts+tshA nA ma ma hA yA na sU tra/ bod skad du/ 'phags pa lha'i bu blo gros rab gnas kyis zhus pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na bcom ldan 'das rgyal po'i khab na bya rgod kyi phung po'i ri la dge slong drug khri nyis stong gi dge slong gi dge 'dun chen po mngon par shes pa mngon par shes pa dgra bcom pa sha stag dang / 'jam dpal dang / seng ge'i tog la sogs pa byang chub sems dpa' bzhi khri nyis stong la byang chub sems dpa' sems dpa' chen po byams pa dang / spyan ras gzigs dbang phyug dang / mthu chen thob dang / spobs pa brtsegs dang / gzungs kyi dbang phyug rgyal po dang / lhun po brtsegs pa dang / lhun po'i rgyal mtshan dang / rab tu mi sgul dang / don rab sems dang / legs par bsam pa sems dang / sems dpa' ba dang / sems kyi blo gros dang / sems bzang po dang / nor bu brtsegs dang / ri 'joms rgyal po dang / lag na rin po che dang / sems pa rin po che dang / lag na rin chen phyag rgya dang / rtag tu lag bteg dang / rtag tu lag brkyang dang / rtag tu brtson dang / sems can sgrol dang / brtson 'grus mos pa dang / ji skad smras pa de bzhin byed pa la gnas pa dang / smon lam 'phags dang / lag na sgron ma dang / sems mnyam dang / ngan song spong ba dang / mya ngan gyi mun pa thams cad 'joms pa dang / brtson pa mi gtong dang / nyi ma'i snying po dang / rdo rjes rnam par gnon dang / mtha' yas rnam par gnon dang / dpag med rnam par gnon dang / mi g.yo gnas kyis rnam par gnon dang / nam mkha' mdzod dang / blo gros dam pa dang / khyad par blo gros dang / blo gros 'phel dang / 'gro grub dang / sa 'dzin dang / zla 'od dang / zla ba'i tog dang / 'od kyi tog dang / 'od dpal dang / snang ba thob pas rnam par gnon dang / seng ge ltar rnam par gnon pas mngon par bsgrags pa'i nga ro dang / spobs pa thogs med dang / spobs pa bzhad pa dang / spobs pa dpa' ba dang / rnam par gnon dang / nyi zla'i 'od zer mog mog por byed pa'i 'od dang / dmigs med dang / blo gros dpe med dang / rtag tu bzhad dgyes dbang po dang / nor bu dang / sgrib pa thams cad rnam par sel ba dang / bud med rnam sgyur go cha dang / rab tu snang ba dang / rnam par snang byed dang / mes byin dang / tshogs can rab mchog rgyal po dang / byang chub sems dpa' sems dpa' chen po dbyangs zab mo dang / de dag la sogs pa byang chub sems dpa' sems dpa' chen po bzhi khri nyis stong dang thabs cig tu bzhugs so/ /rgyal po chen po bzhi dang / lha'i dbang po brgya byin dang / mi mjed kyi bdag po tshangs pa dang / de dag dang gzhan yang lha'i bu drug khri tsam dang yang thabs cig go /lha'i bu blo gros rab gnas dang / lha'i bu mtshams dang / lha'i bu dbang phyug chen po dang / lha'i bu blo gros bzang po dang / de dag la sogs pa thams cad kyang byang chub sems dpa'i theg pa la yang dag par zhugs pa'i lha'i bu bdun khri sum stong dang yang thabs cig go /lha ma yin gyi dbang po sgra gcan dang / lha ma yin gyi dbang po lhun po dang / de dag la sogs pa thams cad kyang byang chub sems dpa'i theg pa la yang dag par zhugs pa'i lha ma yin gyi dbang po nyi khri dang yang thabs cig go /klu'i rgyal po ma dros pa dang / klu'i rgyal po zla ba dang / klu'i rgyal po 'jog po dang / de dag la sogs pa thams cad kyang byang chub sems dpa'i theg pa la yang dag par zhugs pa'i klu'i rgyal po drug khri dang yang thabs cig go / de dag dang gzhan yang lha dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po 'bum phrag du ma dang / dge slong dang / dge slong ma dang / dge bsnyen dang / dge bsnyen ma dag dang yang thabs cig ste/ de nas bcom ldan 'das 'khor 'bum phrag du mas yongs su bskor cing mdun gyis bltas te chos ston to/ /de'i tshe na 'jam dpal gzhon nur gyur pa rang gi gnas na 'dug pa/ gcig pu dben par gyur cing nang du yang dag 'jog la zhugs pa/ nyon mongs pa med pa/ sems med cing sems dang bral ba zhes bya ba'i ting nge 'dzin la snyoms par zhugs so/ /de nas 'jam dpal gzhon nur gyur pa dran zhing shes bzhin du ting nge 'dzin de las langs so/ /'jam dpal gzhon nur gyur pa langs ma thag tu phyogs bcu'i sangs rgyas kyi zhing dpag tu med pa dag rnam pa drug tu rab tu g.yos so/ /de nas 'jam dpal gzhon nur gyur pa ting nge 'dzin de las langs nas 'du shes kyi rnam par rtog pa yid la byed pa 'di lta bu 'di skyes te/ de bzhin gshegs pa dgra bcom pa yang dag par rdzogs pa'i sangs rgyas rnams 'jig rten du 'byung ba ni brgya la brgya lam na ste/ 'di lta ste/ dper na u dum ba ra'i me tog brgya la brgya lam na 'jig rten du 'byung ba de bzhin du gang dag skye ba'i sdug bsngal zad par bya ba'i phyir zhi ba gsal ba/ brtag tu med pa/ rtog ge ba dang bral ba/ zab pa/ shes par dka' ba'i chos ston pa'i de bzhin gshegs pa dgra bcom pa yang dag par rdzogs pa'i sangs rgyas rnams kyang brgya la brgya lam na 'jig rten du 'byung ngo / /sangs rgyas 'byung ba med na ni chos mnyan pa yang med do/ /chos mnyan pa med na ni sems can rnams kyi sdug bsngal zad pa yang med pas bdag de bzhin gshegs pa dgra bcom pa yang dag par rdzogs pa'i sangs rgyas kyi spyan sngar song ste/ zhu ba zhus pa ji lta bus sems can rnams kyi dge ba'i rtsa ba yongs su 'grub par 'gyur ba dang / byang chub sems dpa'i theg pa pa'i gang zag rnams sangs rgyas kyi chos bsam gyis mi khyab pa dag la nem nur med cing the tshom med par 'gyur ba dang / sangs rgyas kyi byang chub yongs su rdzogs par 'gyur ba dang / 'jig rten gyi khams mi mjed 'di'i sems can 'di dag ni 'dod chags che ba/ zhe sdang che ba/ gti mug che ba/ dkar po'i chos dang bral ba/ mi dge ba'i chos dang ldan pa/ glen pa/ blun pa/ mi gus pa/ sangs rgyas dang bral ba/ chos dang bral ba/ dge 'dun dang bral ba sha stag yin pas ci nas kyang sems can 'di dag gis chos thos nas shes rab kyi mig rnam par dag par 'gyur ba de lta bu'i zhu ba zhu'o snyam mo/ / de nas yang 'jam dpal gzhon nur gyur pa 'di snyam du sems te/ bdag gis phyogs bcu'i byang chub sems dpa' gang dag de bzhin gshegs pa la chos nyan par 'gyur ba dang / gang dag zab mo'i bzod pa 'di la lus kyis mngon du byed par 'gyur ba 'bum phrag mang po dag kyang bsdu bar bya'o snyam mo/ /de nas de'i tshe 'jam dpal gzhon nur gyur pa kun tu snang ba dri med bkod pa zhes bya ba'i ting nge 'dzin la snyoms par zhugs so/ /'jam dpal gzhon nur gyur pa kun du snang ba dri med bkod pa'i ting nge 'dzin la snyoms par zhugs ma thag tu de nas de'i mod la shar phyogs dang / phyogs bcu'i sangs rgyas kyi zhing gang gA'i klung gi bye ma snyed dag mnyan pa/ 'jam pa/ rnam par dag pa/ 'od gsal ba/ dri ma med pa/ yongs su dag pa'i 'od chen po dang / snang ba chen pos khyab par gyur to/ /'od de dang / snang ba des phyogs bcu'i 'jig rten na 'jig rten gyi bar gyi mun pa mun gnag dang / ri'i rtse mo dang / shing ljon pa dang / ri dang / khor yug dang / btang bzung dang / btang bzung chen po dang / gangs dang / ri rab dang / lhun po chen po gang dag yod pa de dag thams cad snang ba chen pos gsal bar gyur to/ /de nas phyogs bcu'i 'jig rten na sangs rgyas bcom ldan 'das gang gA'i klung gi bye ma snyed gang dag bzhugs te/ 'tsho zhing gzhes pa de dag la rang rang gi bsnyen bkur ba dag gis zhus pa/ bcom ldan 'das sngon ma mthong ma thos pa'i 'od 'di ltar yid du mchi ba/ 'di ltar 'od gsal ba'i snang ba chen po 'di lta bu 'jig rten du 'byung ba 'di bcom ldan 'das rgyu ni gang lags/ rkyen ni gang lags/ bcom ldan 'das 'od 'dis bdag cag sems dang ba dang / lus sim pa chen po dang ldan zhing sems can rnams kyi 'dod chags dang / zhe sdang dang / gti mug dag kyang kun du mi 'byung lags na/ bcom ldan 'das gang gis 'od 'di lta bu bkye ba 'di su'i mthu lags/ 'di su'i byin gyis brlabs lags/ de skad ces gsol pa dang / sangs rgyas bcom ldan 'das de dag bsnyen bkur ba de dag la cang mi gsung bar gyur to/ /sangs rgyas kyi mthus phyogs bcu'i 'jig rten na lha'i sgra dang / klu'i sgra dang / gnod sbyin gyi sgra dang / lha ma yin gyi sgra dang / nam mkha' lding gi sgra dang / dri za'i sgra dang / mi 'am ci'i sgra dang / lto 'phye chen po'i sgra dang / mi'i sgra dang / mi ma yin pa'i sgra dang / bya'i sgra dang / kyi sgra gang dag yod pa de dag thams cad kyang mi grag par gyur to/ /rlung gi sgra dang / chu'i phung po'i sgra dang / rgya mtsho chen po'i shugs kyi sgra dang / rol mo'i sgra dang / glu dbyangs kyi sgra gang dag yod pa de dag thams cad kyang mi grag par gyur te/ 'ga' yang sgra mi 'byin cing thams cad zhi ba dang / rab tu zhi bar gyur to/ /yang sangs rgyas bcom ldan 'das de dag la bsnyen bkur ba de dag gis lan gnyis lan gsum du 'di skad ces gsol to/ /skye bo mang po la sman pa dang / skye bo mang po la bde ba dang / lha dang / mi rnams kyi skye bo phal po che'i don dang / sman pa dang / bde ba'i slad du bcom ldan 'das kyis gang gis 'od 'di lta bu bkye zhing des sangs rgyas kyi zhing 'di dag thams cad snang bar gyur pa 'di su'i mthu lags pa bshad du gsol/ de nas phyogs bcu'i sangs rgyas kyi zhing gang gA'i klung gi bye ma snyed dag gi sangs rgyas bcom ldan 'das de dag thams cad kyis sangs rgyas thams cad kyi gsung gi sgra dbyangs gcig tu bsdus nas gsung gi phrin las brjod de/ de bzhin gshegs pa gcig ji lta ba bzhin du gzhan yang de bzhin du gsung zhing de dag gis gsung gi phrin las sgra dbyangs gcig tu bsdus pa de lta bu des bsnyen bkur ba de dag la bka' stsal to/ /sangs rgyas bcom ldan 'das de dag gis gsung brjod pa des sangs rgyas kyi zhing thams cad kun du gang bar gyur te/ lha dang mir bcas pa'i sil snyan 'bum phrag mang po dag kyang sgra mngon par 'byin cing rol mo'i sgra dag kyang ma dkrol bar sgra grag par gyur to/ /rol mo'i sgra de dag las mi rtag pa dang / sdug bsngal ba dang / bdag med pa dang ldan pa'i sgra 'byung zhing stong pa nyid kyi sgra dang / mtshan ma med pa'i sgra dang / smon pa med pa'i sgra dang / 'dod chags dang bral ba'i sgra dang / rnam par grol ba'i sgra dang / chos kyi dbyings kyi sgra dang / de bzhin nyid kyi sgra dang / yang dag pa'i mtha'i sgra dang / sbyin pa'i sgra dang / tshul khrims kyi sgra dang / bzod pa'i sgra dang / brtson 'grus kyi sgra dang / bsam gtan gyi sgra dang / shes rab kyi sgra dang / des pa'i sgra dang / phan pa'i dngos po'i sgra dang / byams pa dang / snying rje dang / dga' ba dang / btang snyoms kyi sgra dag dang / de lta bu dang 'thun pa'i chos kyi sgo 'bum phrag du ma dag gi sgra byung bar gyur to/ /sgra byung ba de dag gis sems can bye ba khrag khrig 'bum phrag dpag tu med grangs med pa dag bla na med pa yang dag par rdzogs pa'i byang chub dang / nyan thos nyid dang / rang sangs rgyas nyid dang / brgya byin nyid dang / tshangs pa nyid dang / 'khor los sgyur ba'i rgyal srid yongs su 'grub pa las phyir mi ldog par gyur to/ /de nas sangs rgyas bcom ldan 'das de dag gis bsnyen bkur ba de dag la 'di skad ces bka' stsal to/ /rigs kyi bu dag 'di lta bu'i gtam dris pas khyed la ci zhig byas thong shig /'od 'di ni ji tsam du bsam gyis mi khyab pa'i dge ba'i rtsa ba dang / ji tsam du bsam gyis mi khyab pa'i sbyin pa'i tshogs dang / tshul khrims dang / bzod pa dang / brtson 'grus dang / bsam gtan dang / shes rab kyi tshogs kyis yongs su sbyang ba byas pa yin te/ 'di ni nyan thos dang / rang sangs rgyas thams cad kyis ma yin no/ /gal te de bzhin gshegs pas 'od 'di'i bsngags pa brjod par gyur na lha dang bcas pa'i 'jig rten thams cad 'di la rmongs par 'gyur ro/ /'od 'di ni byams pa dang / snying rje dang / dga' ba dang / btang snyoms thams cad kyis yongs su bsgos pas yongs su tshim par byed pa ste/ 'od 'di'i bsngags pa brjod par gyur na bskal pa 'am/ bskal pa las lhag par yang bsngags pa brjod pa'i mthar phyin par sla ba ma yin no/ /rigs kyi bu dag de lta mod kyi 'on kyang legs par nyon la rab tu yid la zung shig dang / khyed la bshad par bya'o/ /sangs rgyas bcom ldan 'das de dag la bsnyen bkur ba de dag gis lan gnyis lan gsum du 'di skad ces gsol to/ /skye bo mang po la sman pa dang / skye bo mang po la bde ba dang / byang chub sems dpa' rnams kyi dge ba'i rtsa ba yongs su 'grub par bgyi ba'i slad du/ bcom ldan 'das kyis bshad du gsol/ de skad ces gsol pa dang / sangs rgyas bcom ldan 'das de dag gis rang rang gi bsnyen bkur ba de dag la 'di skad ces bka' stsal to/ /rigs kyi bu dag 'jig rten gyi khams mi mjed ces bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas shAkya thub pa zhes bya ba/ rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das bzhugs te/ 'tsho zhing gzhes pa de snyigs ma lnga dang ldan pa'i 'jig rten gnas par 'dod chags dang / zhe sdang dang / gti mug gis gzir ba'i sems can mi gus pa/ dbang po rtul ba/ ngo tsha shes pa dang / khrel yod pa dang bral ba/ nyon mongs pa can gyi las la spyod pa de lta bu'i sems can rnams kyi sangs rgyas kyi zhing du bla na med pa yang dag par rdzogs pa'i byang chub mngon par rdzogs par sangs rgyas te chos ston to/ /rigs kyi bu dag bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa'i sangs rgyas kyi zhing 'jig rten gyi khams mi mjed de na byang chub sems dpa' 'jam dpal gzhon nur gyur pa zhes bya ba mthu che ba/ shes pa che ba/ brtson 'grus che ba/ byang chub sems dpa' rnams yang dag par ston par byed pa/ byang chub sems dpa' rnams yang dag par 'dzin du 'jug pa/ byang chub sems dpa' rnams yang dag par gzengs stod pa/ byang chub sems dpa' rnams yang dag par rab tu dga' bar byed pa/ byang chub sems dpa' rnams kyi pha'i go 'byed pa/ byang chub sems dpa' rnams kyi ma'i go 'byed pa/ chos thams cad kyi gzhi rab tu 'byed pa'i shes pa la mkhas pa/ chags pa med pa'i shes rab kyi pha rol tu phyin pa thob pa/ thogs pa med pa'i spobs pa dang ldan pa/ gzungs thob pa/ byang chub sems dpa'i yon tan bsam gyis mi khyab pa dang ldan pa zhig 'dug pa de 'di lta ste/ sems can rnams kyi dge ba'i rtsa ba yongs su 'grub par bya ba dang / byang chub sems dpa'i theg pa pa'i gang zag rnams kyi sangs rgyas kyi chos bsam gyis mi khyab pa yongs su rdzogs par bya ba'i phyir de bzhin gshegs pa dgra bcom pa yang dag par rdzogs pa'i sangs rgyas shAkya thub pa de la chos kyi zhu ba zhus par gyur te/ rigs kyi bu dag byang chub sems dpa' 'jam dpal gzhon nur gyur pa des byang chub sems dpa' gang dag chos bstan pa de nyan cing 'du bar 'gyur ba'i byang chub sems dpa' dpag tu med pa dag phyogs bcu nas bsdu ba'i phyir 'od 'di bkye ste/ rigs kyi bu dag snang ba chen po 'jig rten du byung ba 'di'i rgyu ni de yin/ rkyen ni de yin no/ /de skad ces bka' stsal pa dang / sangs rgyas bcom ldan 'das de dag la bsnyen bkur ba de dag gis 'di skad ces gsol to/ /bcom ldan 'das byang chub sems dpa' 'jam dpal gzhon nur gyur pa de ting nge 'dzin gang la gnas nas 'od 'di lta bu 'di 'gyed pa lags/ bka' stsal pa/ ting nge 'dzin kun du snang ba dri med bkod pa ste/ byang chub sems dpa' 'jam dpal gzhon nur gyur pa de ting nge 'dzin de la gnas nas 'od 'di lta bu 'di 'gyed do/ /gsol pa/ bcom ldan 'das sangs rgyas bcom ldan 'das rnams ni 'di ltar gsal ba/ 'di ltar rnam par dag pa/ 'di ltar lus dang sems dga' ba dang / mchog tu dga' bar bgyid pa'i 'od 'di lta bu 'gyed par mi mdzad lags so/ /bka' stsal pa/ rigs kyi bu dag byang chub sems dpa' bsdu ba dang / byang chub sems dpa' bskul ba'i chos kyi rnam grangs rtag tu mi 'chad pa'i phyir ro/ /de nas phyogs bcu'i sangs rgyas kyi zhing dpag tu med/ grangs med/ bsam gyis mi khyab pa gang gA'i klung bye ba'i bye ma snyed dag na sangs rgyas kyi zhing re re nas kyang byang chub sems dpa' dkrigs phrag bye ba khrag khrig 'bum phrag dpag tu med/ grangs med/ bsam gyis mi khyab pa dag sangs rgyas bcom ldan 'das de dag ga la ba der dong ste/ lhags nas sangs rgyas bcom ldan 'das de dag gi zhabs la mgo bos phyag 'tshal te/ sangs rgyas bcom ldan 'das de dag la 'di skad ces gsol to/ /bcom ldan 'das sngon ma mthong ma thos pa yon tan du ma dang ldan pa'i 'od 'di lta bu dang / snang ba 'di lta bu dang / 'bar ba 'di lta bu 'di ga las mchis su'i 'od lags/ de skad ces gsol pa dang / sangs rgyas bcom ldan 'das de dag gis byang chub sems dpa' de dag la 'di skad ces bka' stsal to/ /rigs kyi bu dag 'jig rten gyi khams mi mjed ces bya ba yod de/ de na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa zhes bya ba bzhugs te 'tsho zhing gzhes la chos kyang ston to/ /de na byang chub sems dpa' 'jam dpal gzhon nur gyur pa zhes bya ba zhig 'dug pa des 'di lta ste/ phyogs bcu'i byang chub sems dpa' rnams bsdu ba'i phyir 'od 'bar ba 'di lta bu 'di bkye'o/ /de skad ces bka' stsal pa dang / sangs rgyas bcom ldan 'das de dag la byang chub sems dpa' de dag gis 'di skad ces gsol to/ /bcom ldan 'das bdag cag bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa de la blta ba dang / phyag bya ba dang / bsnyen bkur bgyi ba dang / zhu ba dang / zhu blag bgyi ba dang / byang chub sems dpa' 'jam dpal gzhon nur gyur pa de dang / de las gzhan pa'i byang chub sems dpa' de dag kyang blta ba'i slad du 'jig rten gyi khams mi mjed der mchi'o/ /bka' stsal pa/ rigs kyi bu dag de'i dus la dbab par shes na deng shig / de nas de'i mod la phyogs bcu'i byang chub sems dpa' dkrigs phrag bye ba khrag khrig 'bum phrag dpag tu med/ grangs med/ bsam gyis mi khyab pa dag skad cig thang cig yud tsam de nyid la 'di lta ste/ dper na mi stobs po che'i lag pa bskum pa las brkyang ba 'am/ brkyang ba las bskum pa tsam la rang rang gi sangs rgyas kyi zhing dag nas mi snang bar gyur nas 'jig rten gyi khams mi mjed 'dir lhags par gyur to/ /de na byang chub sems dpa' la la dag ni me tog gi char dag mngon par rab tu 'bebs shing / bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa ga la ba der lhags so/ /la la dag ni phye ma dang / byug pa dang / me tog phreng dang / spos kyi char dag dang / me tog ud pa la dang / pad ma dang / ku mu da dang / pad ma dkar po dang / tsam pa ka dang / a ti mug ta ka dang / skya snar dang / d+ha nu ska ri dang / sna ma'i me tog dang / bAr shi ka dang / bAr shi ka chen po dang / man dA ra ba dang / man dA ra ba chen po dang / pA ru Sha ka dang / pA ru Sha ka chen po dang / zla mdog dang / zla mdog chen po dang / zla mdog rab mdzes la sogs pa me tog gi rigs rnam pa sna tshogs kyi char dag dang / spos kyi char dag dang / phreng ba'i char dag dang / phye ma'i char dag mngon par rab tu 'bebs shing / bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa ga la ba der lhags so/ /byang chub sems dpa' la la dag ni sil snyan 'bum phrag du ma dag rab tu gsil zhing bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa ga la ba der lhags so/ /byang chub sems dpa' la la dag ni de bzhin gshegs pa la bstod pa'i sgra dbyangs re res kyang stong gsum gyi stong chen po'i 'jig rten gyi khams rnams su sgra dbyangs kyis go bar byed cing lhags te/ de lta bu'i bkod pa rnam pa sna tshogs dag gis bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa ga la ba der lhags so/ /byang chub sems dpa' de dag 'jig rten gyi khams mi mjed 'dir lhags ma thag tu de nas de'i mod la 'di lta ste/ byang chub sems dpa' de dag gi mthus stong gsum gyi stong chen po'i 'jig rten gyi khams 'di na sems can dmyal ba dang / dud 'gro'i skye gnas dang / gshin rje'i 'jig rten gyi sems can gang ji snyed yod pa de dag thams cad nye bar zhi bar gyur to/ /sems can gang la yang 'dod chags kyis gnod pa med/ zhe sdang gis ma yin/ gti mug gis ma yin/ nga rgyal gyis ma yin/ phrag dog gis ma yin/ ser snas ma yin/ 'chab pas ma yin/ khro bas ma yin/ yongs su gdung bas ma yin te/ sems can thams cad byams pa'i sems dang / mchog tu dga' ba'i sems dang ldan par gyur to/ /de nas byang chub sems dpa' dkrigs phrag bye ba khrag khrig 'bum phrag dpag tu med/ grangs med/ bsam gyis mi khyab pa de dag bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa ga la ba der dong ste lhags nas bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa'i zhabs la mgo bos phyag 'tshal te/ bcom ldan 'das la lan gsum bskor ba byas nas steng gi bar snang la lus mi snang bar byas te/ lus thams cad rnam par 'jig pa zhes bya ba'i ting nge 'dzin la snyoms par zhugs nas rang rang gi smon lam las byung ba'i pad ma kha dog sna tshogs 'dab ma 'bum phrag du ma dang ldan pa'i pad ma'i snying po dag la skyil mo krung bcas te 'dug par gyur to/ /de nas gnas brtan 'od srung chen po'i chos kyi cho 'phrul chen po ngo mtshar rmad du byung ba de dang / me tog gi char dang / spos kyi char dang / phye ma'i char de dag dang / sil snyan 'bum phrag mang po sgra 'byin pa de dag dang / snang ba chen po de yang mthong / gling chen po bzhi pa'i 'jig rten gyi khams 'di me tog dag gis pus mo nub tsam du khebs par gyur pa yang mthong / 'khor phal po che lha dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / mi dang mi ma yin pa dang / dge slong dang / dge slong ma dang / dge bsnyen dang / dge bsnyen ma de dag thams cad kyi lus gser gyi kha dog lta bur snang ba dag kyang mthong ngo / /de nas gnas brtan 'od srung chen po stan las langs te/ chos gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas bcom ldan 'das la tshigs su bcad pa 'di dag gis mngon par bstod do/ /rab dga' bde ba stsol ba shin tu dri ma med pa'i zhal/ /mi yi dam pa stobs bcu yon tan brgya dag nges bsags pa/ /bsam yas gzhal du ma mchis yid gnyis mun pa sel ba bo/ /sa bla lha yul rnam par rgyu ba khyod dang mtshungs ma mchis/ /bskal pa khrag khrig phrag brgyar sbyin dang dul ba legs par spyad/ /bde gshegs khyod kyi tshul khrims mtshungs pa ma mchis gnas ma mchis/ /bzod stobs shin du stobs dang ldan pa stobs bcu'i stobs ldan pa/ /yon tan mnga' ba 'dzum mdzad bdag gi the tshom bsal du gsol/ / sems can sdug bsngal gzigs nas bskal pa brgya dag rnam spyad kyang / /skyo zhing spong ba mi mnga' dgyes pa gzhal du ma mchis brnyes/ /sras dang sras mo btsun mo rgyal srid spyan dang sna tshogs btang / /spyan dgyes thams cad gtong ba bdag gi the tshom bsal du gsol/ /khyod kyis sngon chad chibs dang glang po shing rta dpung chung stsal/ /gtong la dgyes pas dbu dang na bza' khrag khrig brgya yang btang / /thub pas zhal zas stsang nan de bzhin pho brang dkor yang stsal/ /sbyin dang gtong la rtag tu dgyes pa bde gshegs khyod la zhu/ /stong pa'i chos rnams nges par brten cing thugs la legs dgongs pas/ /rdul bral sku lus gtubs kyang sdug bsngal 'khrug pa mi mnga' zhing / /gsungs zhes zhus na bzod pa gsung ba'i stobs la brtson pa yi/ /yon tan mnga' ba rdul dang bral ba khyod la zhu ba 'tshal/ /'dod chags zhe sdang dag gis rab dkrugs rmongs shing kun dkris la/ /bdag tu 'du shes brtson pa'i sems can sdug bsngal gzigs nas ni/ /thugs rje bskyed nas bskal pa brgya dag srid pa 'dir spyad pa/ /dpa' bo lam rab ston par mdzad pa bdag gi skyabs gyur cig / bde gshegs legs pa mdzad pa khyod ni 'gro la thogs mi mnga'/ /spyad pa legs par spyad pas rdzu 'phrul zhabs dang ye shes brnyes/ /bdag dang sems can rnam par gshig cing stong pa'i chos la brtson/ /shin tu dri ma ma mchis bsam bsgom bdag gi the tshom khum/ / khyod kyis sngon ni sbyin dang tshul khrims bzod pa brtson 'grus dang / /bsam gtan shes rab snying rje byams pa mtshungs pa ma mchis bsten/ /khyod kyi yon tan bsam gyis mi khyab chu 'dzin rgya mtsho bzhin/ /'byung gnas bzang po shin tu gnas pa bdag gi skyabs gyur cig / rdul bral khyod kyis sku lus dum bu dum bur bcad cing ni/ /srang la gcal ba mdzad cing dam dum lhag rol ma lus par/ /sku kun ril gyis btang ste phug ron phru gu gcig ma btang / /rdul bral 'od mdzad thugs rje mnga' ba the tshom gcad du gsol/ /lha tshogs gnas pa'i ri bo g.yos shing dgung ni rdib gyur la/ /lha ma yin gyi tshogs kyi gnas mal rgya mtsho bas gyur cing / /mkha' la gnas shing rgyu ba'i dgung zla dog sar lhung gyur kyang / /rgyal ba drang po mdzad pa khyod ni log pa'i tshig mi gsung / /de nas gnas brtan 'od srung chen pos bcom ldan 'das la tshigs su bcad pa de dag gis mngon par bstod nas bcom ldan 'das la 'di skad ces gsol to/ /bcom ldan 'das snang ba chen po 'jig rten du byung zhing ngo mtshar rmad du byung ba'i mtshan ma rgya chen po 'di lta bu gda' ba 'di'i rgyu ni gang lags rkyen ni gang lags/ de skad ces gsol pa dang / bcom ldan 'das kyis tshe dang ldan pa 'od srung chen po la 'di skad ces bka' stsal to/ /'od srung 'di lta bu'i gtam dris pas khyod la ci zhig bya thong shig /'di ni nyan thos dang / rang sangs rgyas thams cad kyis ma yin no/ /gal te de bzhin gshegs pas gnas 'di bstan par gyur na lha dang bcas pa'i 'jig rten 'di la rmongs shing bslang par 'gyur ro/ /gsol pa/ bcom ldan 'das de bzhin gshegs pas skye bo mang po la sman pa dang / skye bo mang po la bde ba'i slad du bshad du gsol/ de skad ces gsol pa dang / bcom ldan 'das kyis tshe dang ldan pa 'od srung chen po la 'di skad ces bka' stsal to/ /'od srung de'i phyir legs par nyon la rab tu yid la zung shig dang bshad par bya'o/ /gnas brtan 'od srung chen pos bcom ldan 'das legs so zhes bcom ldan 'das kyi ltar nyan pa dang / bcom ldan 'das kyis 'di skad ces bka' stsal to/ /'od srung 'di na 'jam dpal gzhon nur gyur pa kun du snang ba dri med bkod pa zhes bya ba'i ting nge 'dzin la snyoms par zhugs te/ de'i mthus phyogs bcu'i sangs rgyas kyi zhing gang gA'i klung bye ba'i bye ma snyed dag 'od kyis snang bar byas nas 'od des phyogs bcu'i byang chub sems dpa' dkrigs phrag bye ba khrag khrig 'bum phrag dpag tu med/ grangs med/ bsam gyis mi khyab pa dag yang dag par bskul te/ 'jig rten gyi khams mi mjed 'dir lhags nas de dag gis da gzod nga'i rkang pa la mgo bos phyag byas te/ nga la lan gsum bskor ba byas nas steng gi bar snang la ta la bdun srid tsam na pad ma dag la 'khod do/ /de nas bcom ldan 'das la tshe dang ldan pa 'od srung chen pos 'di skad ces gsol to/ /bcom ldan 'das byang chub sems dpa' de dag gi mthus me tog gi char 'di lta bu 'di dag rab tu bab cing spos kyi char dag dang / phye ma'i char 'di dag kyang rab tu bab la/ sil snyan 'bum phrag mang po dag kyang ma dkrol bar sgra 'byin lags sam/ bcom ldan 'das kyis bka' stsal pa/ 'od srung de de bzhin te/ byang chub sems dpa' de dag gi mthus me tog gi char 'di lta bu 'di dag rab tu bab cing spos kyi char dag dang / phye ma'i char 'di dag kyang rab tu bab la/ sil snyan 'bum phrag mang po dag kyang ma dkrol bar sgra 'byin to/ /gsol pa/ bcom ldan 'das 'di na byang chub sems dpa' 'ga' yang mi gda'o/ bcom ldan 'das kyis bka' stsal pa/ 'od srung de dag ni nyan thos rnams dang / rang sangs rgyas dag gis blta bar mi nus so/ /de ci'i phyir zhe na/ 'od srung 'di ltar nyan thos dang / rang sangs rgyas rnams ni byang chub sems dpa' rnams snying rje chen po gang dang / byams pa chen po gang dang / phan par 'dod pa gang dang / spyod pa gang la gnas pa dang / byang chub sems dpa' rnams sbyin pa dang / tshul khrims dang / bzod pa dang / brtson 'grus dang / bsam gtan dang / shes rab gang la gnas pa de la mi gnas shing byang chub sems dpa' rnams gang la spyod pa'i lhag pa'i bsam pa de la yang mi spyod pa'i phyir ro/ /'od srung byang chub sems dpa' de dag ni lus thams cad rnam par 'jig pa zhes bya ba'i ting nge 'dzin la snyoms par zhugs pas de dag ni nyan thos rnams dang / rang sangs rgyas dag gis blta bar mi nus te/ de bzhin gshegs pa rnams kyis gzigs pa kho nar zad do/ /'od srung rigs kyi bu de dag ni 'di ltar sa la gnas pa'i byang chub sems dpa' rnams dang / theg pa la gsar du zhugs pa'i byang chub sems dpa' rnams kyis kyang re shig mi mthong na nyan thos dang / rang sangs rgyas rnams kyis mthong bar 'gyur ba lta ci smos te de ni gnas med do/ /de skad ces bka' stsal pa dang / bcom ldan 'das la tshe dang ldan pa 'od srung chen pos 'di skad ces gsol to/ /bcom ldan 'das byang chub sems dpa' chos du dag dang / spyod pa ci 'dra ba dang / dge ba'i rtsa ba ji lta bu dag dang ldan na byang chub sems dpa'i ting nge 'dzin lus thams cad rnam par 'jig pa 'thob par 'gyur lags/ bcom ldan 'das kyis bka' stsal pa/ 'od srung byang chub sems dpa' chos bcu dang ldan na/ byang chub sems dpa'i ting nge 'dzin lus thams cad rnam par 'jig pa 'thob par 'gyur te/ bcu gang zhe na/ lhag pa'i bsam pa la yang dag par 'jug pa dang / sems can thams cad yongs su mi gtong ba dang / snying rje chen po yongs su rdzogs par byed pa dang / mtshan ma thams cad rnam par 'jig pa dang / sangs rgyas kyi chos thams cad la lhag par dmigs shing de la rlom sems med pa dang / nyan thos dang / rang sangs rgyas kyi sa la lhag par dmigs pa med cing de las ye shes yongs su tshol ba dang / lus dang srog kyang yongs su gtong na dngos po gzhan dag lta ci smos te/ bdog pa thams cad yongs su gtong ba dang / tshogs dpag tu med pa yongs su 'dzin cing tshogs des rlom sems med pa dang / sbyin pa dang / tshul khrims dang / bzod pa dang / brtson 'grus dang / bsam gtan dang / shes rab dpag tu med pa yongs su rdzogs par byed cing pha rol du phyin pa de dag la rtog pa med pa dang / bdag gis sems can thams cad sangs rgyas kyi chos rnams la bkod nas phyis byang chub kyi shing drung du 'gro bar bya'o snyam yang sems can rnams dang byang chub mi dmigs pa ste/ 'od srung byang chub sems dpa' chos bcu po de dag dang ldan na byang chub sems dpa'i ting nge 'dzin lus thams cad rnam par 'jig pa thob par 'gyur ro/ /de skad ces bka' stsal pa dang / bcom ldan 'das la gnas brtan 'od srung chen pos 'di skad ces gsol to/ /bcom ldan 'das ji tsam du bcom ldan 'das de bzhin gshegs pa nyan thos kyi theg pa pa dang / rang sangs rgyas kyi theg pa pas nam yang sems 'ga' yang ma bskyed pa'i legs par gsungs pa gsung ba ni bcom ldan 'das ngo mtshar lags te/ bdag gis sems can thams cad dgra bcom pa nyid kyi chos rnams la yang dgong par bgyi na sangs rgyas kyi chos rnams la lta smos kyang ci 'tshal lags/ bcom ldan 'das kyis bka' stsal pa/ 'od srung de lta bas na nyan thos dang / rang sangs rgyas rnams kyis ni lus thams cad rnam par 'jig pa'i ting nge 'dzin la snyoms par 'jug par mi nus te/ ting nge 'dzin de'i ming yang ma shes na snyoms par 'jug par 'gyur ba lta ci smos te de ni gnas med do/ /de skad ces bka' stsal pa dang / bcom ldan 'das la gnas brtan 'od srung chen pos 'di skad ces gsol to/ /bcom ldan 'das bdag gis byang chub sems dpa' de dag blta bar bgyi'o/ /de ci'i slad du zhe na/ bcom ldan 'das skyes bu dam pa de lta bu de dag mthong bar dka' ba'i slad du'o/ /bcom ldan 'das kyis bka' stsal pa/ 'od srung 'jam dpal gzhon nur gyur pa 'das kyi bar du khyod re shig sdod cig dang / de nas byang chub sems dpa' de dag ting nge 'dzin de las ldang zhing de'i 'og tu mthong bar 'gyur ro/ /'od srung de lta mod kyi khyod nyid ting nge 'dzin rnams kyi gnas thob pa yin gyis byang chub sems dpa' de dag spyod lam ji lta bus gnas pa rtogs shig /de nas gnas brtan 'od srung chen pos bcom ldan 'das kyi ltar mnyan nas byang chub sems dpa' de dag spyod lam ji lta bus gnas pa blta ba'i phyir de'i tshe sangs rgyas kyi mthu dang / rang gi stobs bskyed pas ting nge 'dzin nyi khri la snyoms par zhugs shing rnam par langs kyang de dag ma mthong ste/ byang chub sems dpa' de dag gi 'ong ba dang / 'gro ba yang ma shes/ de dag gi gnas dang rab tu gnas pa yang ma shes/ ci byed pa dang / ci ston pa dag kyang thams cad kyi thams cad du ma shes ma mthong ngo / /de nas bcom ldan 'das la gnas brtan 'od srung chen pos 'di skad ces gsol to/ /bcom ldan 'das 'di ltar bdag ting nge 'dzin nyi khri la snyoms par zhugs kyang byang chub sems dpa' de dag ma mthong ba ni bcom ldan 'das ngo mtshar lags so/ /bde bar gshegs pa shin tu ngo mtshar lags so/ /bcom ldan 'das byang chub sems dpa' de dag da dung thams cad mkhyen pa nyid ma thob par de ltar zhi ba'i ting nge 'dzin bsgrubs pas kyang de lta lags na byang chub sems dpa' gang dag thams cad mkhyen pa'i ye shes thob pa dag lta smos kyang ci 'tshal te/ bcom ldan 'das rigs kyi bu dang / rigs kyi bu mo su zhig bla na med pa yang dag par rdzogs pa'i byang chub tu sems bskyed par mi bgyid/ bcom ldan 'das gal te byang chub sems dpa' lus thams cad rnam par 'jig pa'i ting nge 'dzin 'di nyid kyi slad du go cha 'tshal bar bgyid pa ni go cha legs par 'tshal ba lags pas ting nge 'dzin 'di ni slad kyis kyang yongs su gtang bar mi bgyi'o/ /bcom ldan 'das kyis bka' stsal pa/ 'od srung de de bzhin no/ /ji skad smras pa de bzhin te/ 'di ni nyan thos dang / rang sangs rgyas thams cad kyis yang ma yin na sems can gzhan dag gi lta smos kyang ci dgos/ de nas gnas brtan shA ri'i bu 'di snyam du sems te/ bdag ni de bzhin gshegs pas shes rab can rnams kyi mchog tu bstan pa yin gyis/ byang chub sems dpa' de dag spyod lam ji lta bus gnas pa bdag gis brtag par bya'o snyam mo/ /de nas gnas brtan shA ri'i bu byang chub sems dpa' de dag blta ba'i phyir ting nge 'dzin sum khri la snyoms par zhugs shing rnam par langs kyang de dag gi mtshan ma yang shes par ma nus so/ /de nas gnas brtan rab 'byor 'di snyam du sems te/ bdag gis byang chub sems dpa' de dag blta bar bya'o snyam mo/ /de nas gnas brtan rab 'byor byang chub sems dpa' de dag blta ba'i phyir sangs rgyas kyi mthu dang / rang gi stobs bskyed pas ting nge 'dzin bzhi khri la snyoms par zhugs shing rnam par langs kyang de dag gis 'ong ba dang / 'gro ba yang ma shes/ 'greng ba yang ma mthong / 'chag pa yang ma mthong / 'dug pa yang ma mthong / nyal bar yang ma mthong ste/ de dag blta bar ma nus so/ /de nas gnas brtan rab 'byor gyis bcom ldan 'das kyi zhabs gnyis la gtugs nas bcom ldan 'das la 'di skad ces gsol to/ /bcom ldan 'das bdag ni de bzhin gshegs pas nyon mongs pa ma mchis pa la gnas pa rnams kyi mchog tu bstan te/ bdag zhi ba'i ting nge 'dzin rnams thob pa lags pas bcom ldan 'das bdag gal te gling chen po bzhi pa'i 'jig rten gyi khams 'di rnga bo che'i sbubs gcig tu gyur cing gling chen po bzhi pa'i 'jig rten gyi khams cig shos kyang rnga bo che'i sbubs gcig tu gyur la/ der mi la la zhig skyes nas der ri rab tsam gyi rnga shing thogs te/ bdag ting nge 'dzin la snyoms par z hugs pa'i mdun du mchis nas sug las gzhan mi bgyid par bskal pa'i bar du rgyun mi 'chad par rnga bo che de gnyis brdungs par gyur kyang bcom ldan 'das bdag nyon mongs pa ma mchis par gnas pa'i slad du de ltar bsgrubs te zhi ba'i ting nge 'dzin rnams thob pa la re shig bskal pa 'das par gnas pa'i rnga bo che de gnyis kyi sgra de dag bdag gi rna ba'i rnam par rig pa tsam du yang grags par mi 'gyur na des ting nge 'dzin de las slongs pa lta smos kyang ci 'tshal te/ de ni gnas ma mchis lags na bcom ldan 'das bdag nyon mongs pa ma mchis par gnas pa de lta bu dang ldan zhing ye shes de lta bu dang ldan pas byang chub sems dpa' de dag blta ba'i slad du ting nge 'dzin bzhi khri la snyoms par zhugs shing rnam par langs kyang de dag ma mthong ste/ de dag gi gnas kyang ma 'tshal lags so/ /bcom ldan 'das gal te byang chub sems dpa' rnams kyis ye shes de lta bu yongs su tshol ba na sems can re re'i slad du bskal pa gang gA'i klung gi bye ma snyed du sems can dmyal ba chen por sreg par gyur kyang spro bar bgyi zhing bcom ldan 'das byang chub sems dpa' rnams kyis ye shes bsam gyis mi khyab pa de lta bu yongs su gtang bar mi bgyi'o/ / bcom ldan 'das gal te bdag len pa ma mchis par zag pa rnams las sems rnam par grol bar ma gyur na ni bdag slad ma'i mtha'i mur thug par 'khor bar spyod cing de lta bu'i theg pa chen po yang yongs su spong bar mi bgyid do/ /de nas bcom ldan 'das kyis gnas brtan rab 'byor la legs so zhes bya ba byin te/ rab 'byor khyod kyis lhag pa'i bsam pa de lta bus tshig de skad smras pa legs so legs so/ /rab 'byor khyod gal te phung po 'di dag nyid kyis yongs su mya ngan las 'da' bar ma gyur du zin na khyod dge ba'i rtsa ba 'dis 'khor los sgyur ba'i rgyal srid gang gA'i klung gi bye ma snyed du 'jug cing bla na med pa yang dag par rdzogs pa'i byang chub tu mngon par rdzogs par 'tshang rgya bar yang 'gyur ro/ /rab 'byor stong gsum gyi stong chen po'i 'jig rten gyi khams kyi sems can ji snyed pa de dag mang ba yin nam/ gsol pa/ bcom ldan 'das mang lags so/ /bde bar gshegs pa mang lags so/ /bka' stsal pa/ rab 'byor yongs su brtag pa'i phyir gal te sems can de dag thams cad dge slong rab 'byor dang / shA ri'i bu dang / 'od srung chen po ci 'dra ba de lta bu'i shes pa dang ldan par gyur la/ rab 'byor nyan thos chen po de lta bu de dag gis byang chub sems dpa' de dag blta ba'i phyir bskal pa bye ba khrag khrig 'bum phrag du mar brtags kyang mthong bar mi nus so/ /de ci'i phyir zhe na/ rab 'byor nyan thos dang / rang sangs rgyas rnams ni byang chub sems dpa' rnams chos gang dag la spyod pa de dag la mi spyod pa'i phyir te/ rab 'byor de ni nyan thos dang / rang sangs rgyas thams cad kyi gnas ma yin no/ /bstan pa 'di bshad pa na lha dang mi'i skye dgu rnams las srog chags brgyad khri bzhi stong bla na med pa yang dag par rdzogs pa'i byang chub tu sems skyes so/ /de nas 'jam dpal gzhon nur gyur pa gnas de nyid na 'dug pa 'di snyam du sems te/ byang chub sems dpa' bye ba khrag khrig 'bum phrag mang po 'di dag 'dus kyis/ bdag gis lha 'bum phrag mang po dag kyang bsdu bar bya'o snyam mo/ /de nas 'jam dpal gzhon nur gyur pas de'i tshe ji lta bu'i rdzu 'phrul mngon par 'du bya ba mngon par 'dus byas na 'di lta bur 'gyur ba'i rdzu 'phrul mngon par 'du bya ba mngon par 'dus byas pas pad ma'i shing rta'i phang lo tsam 'dab ma ni gser/ sdong bu ni dngul/ snying po ni rin po che dpal gyi snying po/ ze ba ni bai DUr+ya las byas pa bye ba khrag khrig 'bum phrag brgyad cu rtsa bzhi mngon par sprul cing pad ma de dag la byang chub sems dpa'i lus gser gyi kha dog lta bu skyes bu chen po'i mtshan sum cu rtsa gnyis dang ldan pa dpal dang ldan pa/ kha dog dang ldan pa/ gzi brjid dang ldan pa/ 'od gsal ba dag pad ma'i snying po dag gi dbus na skyil mo krung gis 'dug pa'i lus gzugs dag kyang mngon par sprul to/ /de nas pad ma de dag rgyal chen bzhi'i lha'i ris nas bzung ste/ sum cu rtsa gsum dang / 'thab bral dang / dga' ldan dang / 'phrul dga' dang / gzhan 'phrul dbang byed dang / tshangs ris dang / tshangs pa kun 'khor dang / tshangs pa'i mdun na 'don dang / tshangs chen dang / 'od chung dang / tshad med 'od dang / 'od gsal dang / dge chung dang / tshad med dge dang / dge rgyas dang / sprin med dang / bsod nams skyes dang / 'bras bu che dang / mi che ba dang / mi gdung ba dang / gya nom snang ba dang / shin tu mthong ba dang / 'og min gyi lha'i ris kyi bar dang / de bzhin du stong gsum gyi stong chen po'i 'jig rten gyi khams 'di'i rgyal chen bzhi'i lha'i ris ther 'bum nas 'og min gyi lha'i ris kyi bar gyi 'dod pa na spyod pa dang / gzugs na spyod pa'i lha rnams kyi gnas ji snyed pa thams cad du 'dong zhing sgra sgrogs par byed/ dbyangs rjod par byed/ yang dag par skul bar byed de/ byang chub sems dpa'i lus gzugs de dag stong gsum gyi stong chen po'i 'jig rten gyi khams 'di na rnam par rgyu ba'i tshe tshigs su bcad pa 'di dag smras so/ sangs rgyas nyi ma'i rtsa lag rnams/ /'jig rten du ni lan 'ga' 'byung / /u dum ba ra'i me tog ltar/ /sangs rgyas de bzhin shin tu dkon/ /shAkya seng ge mi yi mchog /de ni 'jig rten 'dir byung ste/ /sdug bsngal thams cad zad byed pa'i/ /chos ni yang dag de ston mdzad/ /lha yi 'dod pa yid dga' la/ /ji snyed yun ring spyad byas na/ /gang du tshor ba myong 'gyur ba'i/ /ngan song rnams su 'gro bar 'gyur/ /ji srid 'dod pa rnams bsten pa/ /srid pa phyir zhing rab tu 'phel/ /khams gsum 'khor ba'i srog chags la/ /bde ba yod pa ma yin no/ /sangs rgyas 'byung ba rab dkon dang / /khom pa dam pa rnyed nas ni/ /gang dag bag med mi rtogs pa/ /de dag sdug bsngal zad mi 'gyur/ /sangs rgyas blta phyir deng la ni/ /chos kyi dam pa nyan par gyis/ /'jig rten 'dren pa 'das 'og tu/ /phyi dus 'gyod par ma byed cig /mi rnams gang dag rtag myos shing / /'jigs chen bdud kyi zhags pa yi/ /bag med spyod par byed rnams la/ /thar pa yod par ga la 'gyur/ /da ni 'di skad smra bar bya/ /bsod nams byas pa'i sems can gang / / sum cu rtsa gnyis mtshan mnga' ba'i/ /rdzogs sangs rgyas dang myur phrad byos/ /gang dag byams pa bsam yas pa'i/ /'jig rten mgon rnams ma gtogs par/ /sems can rnams kyi skyabs gzhan med/ /dpung gnyen gzhan yang yod ma yin/ /skyob pa shAkya seng ge yis/ /tshad med bsam gyis mi khyab pa'i/ /bskal pa bye bar spyad mdzad nas/ /ye shes dam pa brnyes nas ni/ /gang la sems can mi dmigs shing / /srog dang gang zag yod min pa'i/ /chos mchog zhi ba zab mo dang / /mthong bar dka' bar rab tu ston/ /rtag pa dang ni de bzhin du/ /chad pa 'ang rab tu spangs gyur cing / /mtshan ma thams cad spangs pa'i chos/ /srog chags rnams la ston par mdzad/ /gang la 'jig rten mi gnas pa'i/ /stong nyid mtshan ma med pa dang / /smon par byed pa ma yin pa'i/ /yang dag mtha' ni rab tu ston/ /rtags med mtshan ma yod min zhing / /skye med 'byung ba med pa dang / /'ong ba med cing 'gro med pa'i/ /chos ni mkhas pa ston par mdzad/ /zad med 'byung ba yod min zhing / /rang bzhin gyis ni dngos med dang / /bltar med mtshan ma yod min pa/ /ston kyang rlom pa'i sems mi mnga'/ /sems can gang yang skye med cing / /'ga' yang 'chi ba yod ma yin/ /mya ngan 'das pa'ang gang yang med/ /sems can 'byung ba'ang yod ma yin/ /skad kyis chos rnams bstan byas kyang / /skad la rten pa yod min zhing / /yi ge rnams dang bral ba'i chos/ /mi yi 'dren pa ston par mdzad/ /gang la rlung ni mi gnas shing / /chu dang me yang mi dmigs la/ /sar yang rtog pa med pa'i chos/ /spyan dang ldan pa ston par mdzad/ /gzugs dang tshor ba 'du shes dang / /'du byed rnams dang rnam shes ni/ /stong zhing phung po lnga po dag / dngos po med pa ston par mdzad/ /mig dang rna ba sna dang ni/ /lce dang lus dang de bzhin yid/ /rang bzhin stong par ston mdzad kyang / /stong pa de yang dmigs su med/ /gzugs dang sgra dang dri rnams dang / /ro dang reg bya yid 'ong ba/ /de dag rnam par rtog pas bskyed/ /rtog pa'ang rang bzhin stong pa yin/ /de ltar sangs rgyas skyob pa ni/ /srog chags rnams la chos ston gyis/ /gang dag sdug bsngal thar 'dod pa/ /de dag rnam 'dren drung du shog /de nas byang chub sems dpa' sprul pa de dag gis stong gsum gyi stong chen po'i 'jig rten gyi khams 'dir tshigs su bcad pa de dag gis chos bstan pas 'dod pa na spyod pa dang / gzugs na spyod pa'i lha'i bu rnams las lha bye ba phrag dgu bcu rtsa drug ni chos rnams la chos kyi mig rdul med cing dri ma dang bral ba rnam par dag go / lha'i bu khri nyis stong gis ni 'dod chags dang bral ba rjes su thob po/ /lha'i bu sa ya phrag gsum dang nyis 'bum ni byang chub tu sems skyes so/ /byang chub sems dpa'i theg pa la yang dag par zhugs pa'i lha'i bu khris ni mi skye ba'i chos la bzod pa thob par gyur to/ / de'i tshe byang chub sems dpa'i lus gzugs de dag gis lha'i bu gang dag yang dag par bskul ba de dag las lha'i bu 'bum phrag dpag tu med grangs med pa dag skad cig thang cig yud tsam cig gis bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa ga la ba der dong ste lhags nas bcom ldan 'das kyi zhabs la mgo bos phyag 'tshal te/ bcom ldan 'das la lan gsum bskor ba byas nas phyogs gcig tu 'khod do/ /lha'i me tog ud pa la dang / ku mu da dang / pad ma dkar po dang / man dA ra ba dang / man dA ra ba chen po dag dang / phye ma dang / spos dang / byug pa dag gis de bzhin gshegs pa la mngon par gtor to/ /steng gi bar snang la yang lha'i glu dbyangs mang po dag rab tu len par gyur to/ /de'i tshe na gling chen po bzhi pa'i 'jig rten gyi khams 'dir gang du lha'i bu gzi brjid che ba/ gzi brjid che ba dag gis khyab par ma gyur pa'i sa'i phyogs tha na 'khar ba gzugs pa'i gtos tsam yang med pa de snyed kyi lha'i bu dag 'dus par gyur cing gling chen po bzhi pa'i 'jig rten gyi khams 'di yang me tog dag gis pus mo nub tsam du khebs par gyur to/ /de nas lha'i bu blo gros rab gnas dang / lha'i bu mtshams dang / lha'i bu dri med dang / lha'i bu ngo tsha shes pa'i nor can zhes bya ba lha bye ba phrag dgu bcu rtsa drug po thams cad kyang byang chub sems dpa'i theg pa la yang dag par zhugs pa sha stag gis yongs su bskor cing mdun du bdar nas 'jam dpal gzhon nur gyur pa'i gnas ga la ba der dong ste lhags nas 'jam dpal gzhon nur gyur pa'i gnas kyi phyi rol nas lan bdun bskor ba byas te/ me tog man dA ra ba'i char dag mngon par rab tu phab bo/ /me tog man dA ra ba'i char de dag gis 'jam dpal gzhon nur gyur pa'i gnas su me tog gi phung po 'phang du dpag tshad bcu pa kun nas gnas par gyur to/ /de nas 'jam dpal gzhon nur gyur pas byin gyi rlabs ji lta bus byin gyis brlabs na 'di lta bur 'gyur ba'i byin gyi rlabs kyis brlabs pas stong gsum gyi stong chen po'i 'jig rten gyi khams 'di'i steng gi bar snang la me tog gi dra ba kun nas bkram par gyur to/ /me tog gi 'od des stong gsum gyi stong chen po'i 'jig rten gyi khams 'di kun du khyab par gyur to/ /de nas 'jam dpal gzhon nur gyur pa rang gi gnas nas byung ste/ smon lam las byung ba'i stan la 'dug go /de nas lha'i bu blo gros rab gnas kyis 'jam dpal gzhon nur gyur pa'i rkang pa gnyis la gtugs so/ /lha'i bu de dag thams cad kyis kyang 'jam dpal gzhon nur gyur pa'i rkang pa gnyis la gtugs so/ / //bam po gnyis pa/ de nas 'jam dpal gzhon nur gyur pa 'di snyam du sems te/ bcom ldan 'das kyi spyan sngar bdag su dang lhan cig tu dri ba bstan pa bshad par bya/ bsam gyis mi khyab pa'i gzhi rnams dang / shes par dka' ba'i gzhi rnams dang / gnas med pa'i gzhi rnams dang / spros pa med pa'i gzhi rnams dang / spros pa dang bral ba'i gzhi rnams dang / brjod du med pa'i gzhi rnams dang / bstan du med pa'i gzhi rnams dang / zab mo'i gzhi rnams dang / bden pa'i gzhi rnams dang / chags pa med pa'i gzhi rnams dang / mi phyed pa'i gzhi rnams dang / stong pa nyid kyi gzhi rnams dang / mtshan ma med pa'i gzhi rnams dang / smon pa med pa'i gzhi rnams dang / de bzhin nyid bstan pa'i gzhi rnams dang / yang dag pa'i mtha'i gzhi rnams dang / chos kyi dbyings kyi gzhi rnams dang / mtshungs pa med pa'i gzhi rnams dang / blang ba med pa'i gzhi rnams dang / dor ba med pa'i gzhi rnams dang / sangs rgyas kyi gzhi rnams dang / chos kyi gzhi rnams dang / dge 'dun gyi gzhi rnams dang / ye shes yongs su rdzogs pa 'thob pa'i gzhi rnams dang / khams gsum mnyam pa nyid kyi gzhi rnams dang / chos thams cad mi dmigs pa'i gzhi rnams dang / chos thams cad skye ba med par bstan pa'i gzhi rnams dang / seng ge'i gzhi rnams dang / dpa' bo'i gzhi rnams dang / gzhi med pa'i gzhi de dag bstan pa na snod du 'gyur ba ni su yod snyam mo/ /de nas yang 'jam dpal gzhon nur gyur pa 'di snyam du sems te/ lha'i bu blo gros rab gnas 'di ni sngon gyi rgyal ba la lhag par bya ba byas pa/ zab mo la bzod pa/ thogs pa med pa'i spobs pa dang ldan pa yin gyis bcom ldan 'das kyi spyan sngar bdag 'di dang lhan cig tu dri ba bstan pa bshad par bya'o snyam mo/ /de nas 'jam dpal gzhon nur gyur pas lha'i bu blo gros rab gnas la 'di skad ces smras so/ /lha'i bu khyod ni zab mo la bzod pa/ thogs pa med pa'i spobs pa dang ldan pa yin na/ bcom ldan 'das kyi spyan sngar kho bo dang lhan cig tu dri ba bstan pa bshad par nus sam/ de skad ces smras pa dang / lha'i bu blo gros rab gnas kyis 'jam dpal gzhon nur gyur pa la 'di skad ces smras so/ /'jam dpal gal te khyod gsung bar mi mdzad/ rjod par mi mdzad/ 'don par mi mdzad cing yi ge yang mi rjod/ sgra yang mi gsan pa lta na bdag gis de bzhin bstan par bgyi'o/ /'jam dpal gyis smras pa/ lha'i bu gal te khyod nyan par mi byed/ 'dzin par mi byed/ 'chang bar mi byed/ kun chub par mi byed/ sems par mi byed/ rig par mi byed/ rnam par shes par mi byed/ len par mi byed/ gtong bar mi byed cing thos nas kyang gzhan dag la ston par mi byed pa lta na kho bos kyang de bzhin bstan par bya'o/ /de ci'i phyir zhe na/ lha'i bu sangs rgyas kyi byang chub ni yi ge med pa/ sems med pa/ sems dang bral ba ste/ ming gis brjod cing ming de yang g.yo ba med pa'i phyir ro/ /lha'i bus smras pa/ 'jam dpal lha'i bu 'di dag ni khyod las chos bstan pa nyan par 'tshal gyis sa phyogs 'di nyid du khyod kyis lha'i bu 'di dag la chos kyi bka' mchid gsungs shig /'jam dpal gyis smras pa/ lha'i bu kho bo ni nyan par 'dod pa rnams la chos ston par mi byed de/ 'dzin par 'dod pa rnams la yang ma yin no/ /de ci'i phyir zhe na/ lha'i bu bdag tu 'dzin na nyan 'dod par 'gyur la/ sems can du 'dzin pa dang / srog tu 'dzin pa dang / gang zag tu 'dzin na nyan 'dod par 'gyur ba'i phyir ro/ /lha'i bu gang la ngar 'dzin pa dang / nga yir 'dzin pa yod pa de ni 'di snyam du 'di ni ston par byed pa'o/ /bdag ni nyan pa'o/ /'di ni bshad par bya ba'o snyam du sems pas de ni chags pa gsum gyis chags pa yin te/ gsum gang zhe na/ bdag tu dmigs pa dang / sems can du dmigs pa dang / chos su dmigs pa'o/ /lha'i bu gang la ngar 'dzin pa dang / nga yir 'dzin pa med pa de ni 'khor gsum yongs su dag pas chos ston par byed de/ rnam par rtog par mi byed/ sems par mi byed de/ rlom sems su mi byed do/ /de la 'khor gsum yongs su dag pa gang zhe na/ bdag tu dmigs pa med cing rnam par rtogs par mi byed/ rlom sems su mi byed/ sems par mi byed pa de dang / chos smra bar dmigs pa med cing rnam par rtog par mi byed/ rlom sems su mi byed/ sems par mi byed pa dang / chos su dmigs pa med cing rnam par rtog par mi byed/ rlom sems su mi byed/ sems par mi byed pa ste/ lha'i bu gang dag de ltar nyan pa de dag ni mnyam par nyan pa yin te/ mi mnyam par nyan pa ma yin no/ /lha'i bu blo gros rab gnas kyis smras pa/ 'jam dpal ci nas kyang mi ldog pa nyid kyi slad du bstan pa bshad pa legs so legs so/ /'jam dpal gyis smras pa/ lha'i bu ci rung rnam par ma rtog shig /byang chub sems dpa' gang ldog pa de ni/ byang chub mngon par rdzogs par 'tshang rgya ste/ byang chub kyang dmigs su med do/ /lha'i bus smras pa/ 'jam dpal gang las ldog /'jam dpal gyis smras pa/ lha'i bu 'dod chags las ldog go /zhe sdang las ldog go /gti mug las ldog go /sred pa las ldog go /ma rig pa las ldog go /'khor bar skye ba'i yan lag bcu gnyis kyi bar las ldog go / rgyu las ldog go /lta ba las ldog go /ming las ldog go /gzugs las ldog go /'dod pa'i khams las ldog go /gzugs kyi khams las ldog go /gzugs med pa'i khams las ldog go /nyan thos kyi spyod pa las ldog go / rang sangs rgyas kyi spyod pa las ldog go /rtog pa las ldog go /'dzin pa las ldog go /mtshan ma las ldog go /dngos por 'dzin pa las ldog go /chad par lta ba las ldog go /rtag par lta ba las ldog go /blang ba las ldog go /dor ba las ldog go / bdag tu 'du shes pa las ldog go /sems can du 'du shes pa las ldog go /srog tu 'du shes pa las ldog go /gang zag tu 'du shes pa las ldog go /yid la byed pa dag las ldog go /chags pa dag las ldog go /phyin ci log dag las ldog go / 'jig tshogs las ldog go /'jig tshogs la lta ba las ldog go /'jig tshogs kyi rtsa ba las byung ba'i lta ba'i rnam pa drug cu rtsa gnyis las ldog go /sgrib pa dag las ldog go /phung po lngar 'dzin pa las ldog go /phyi dang nang gi skye mched thams cad las ldog go / khams rnams las ldog go /sangs rgyas su 'du shes pa las ldog go /chos su 'du shes pa las ldog go /dge 'dun du 'du shes pa las ldog go /bdag sangs rgyas su 'gyur ro/ /bdag chos ston par 'gyur ro/ /bdag sems can grol bar byed par 'gyur ro/ /bdag bdud 'dul bar 'gyur ro/ /bdag ye shes thob par 'gyur ro snyam pa'i 'du shes de dag las ldog go /de bzhin gshegs pa'i stobs bcu la rtog par mi byed do/ /sangs rgyas kyi chos ma 'dres pa bco brgyad la rtog par mi byed do/ /dbang po rnams dang / stobs rnams dang / mi 'jigs pa rnams la rtog par mi byed do/ /mtshan rnams la rtogs par mi byed do/ /sangs rgyas kyi zhing bkod pa rnams la rtog par mi byed do/ /nyan thos kyi dge 'dun phun sum tshogs pa la rtog par mi byed cing rtog pa thams cad las ldog ste/ lha'i bu de ltar byang chub sems dpa' gang de las ldog pa de ni mi ldog pa yin no/ /lha'i bus smras pa/ 'jam dpal gang las mi ldog /'jam dpal gyis smras pa/ lha'i bu sangs rgyas kyi ye shes las mi ldog go /stong pa nyid las mi ldog go /mtshan ma med pa las mi ldog go / smon pa med pa las mi ldog go /de bzhin nyid las mi ldog go /chos kyi dbyings las mi ldog go /yang dag pa'i mtha' las mi ldog go /mnyam pa nyid las mi ldog go /lha'i bus smras pa/ 'jam dpal de skad ces byang chub sems dpa' gang rtog pa dang / rnam par rtog pa dang / yongs su rtog pa'i chos de dag las ldog pa de ni des na ldog pa zhes bya'o zhes gsungs pa de ci gang dag las ldog pa'i chos de dag mchis pa zhig gam/ 'on te ma mchis pa zhig gam/ 'on te mchis pa dang ma mchis pa zhig gam/ 'on te mchis pa yang ma lags ma mchis pa yang ma lags pa zhig lags/ 'jam dpal gyis smras pa/ lha'i bu gang dag las ldog pa'i chos de dag ni yod pa yang ma yin/ med pa yang ma yin/ yod pa dang med pa yang ma yin/ yod pa yang ma yin/ med pa yang ma yin pa yang ma yin no/ /lha'i bus smras pa/ 'jam dpal 'o na gang las ldog /'jam dpal gyis smras pa/ lha'i bu yang dag pa ma yin par 'dzin pa dang / legs pa ma yin par 'dzin pa dang / log par 'dzin pa gang yin pa de 'dzin par mi byed/ yongs su gtong bar mi byed/ mtshan mar mi byed pa de'i phyir ldog pa zhes bya ste/ de ni yod par yang bstan par mi bya/ med par yang bstan par mi bya'o/ /de ci'i phyir zhe na/ gal te yod pa dang med pa las ldog par gyur na de ni skyon du 'gyur ba'i phyir ro/ /de ci'i phyir zhe na/ gal te yod pa las ldog par gyur na rtag par 'gyur la med pa las ldog par gyur na chad par 'gyur ba'i phyir ro/ /de bzhin gshegs pa ni rtag pa dang chad pa'i phyir chos ston par mi mdzad de/ sangs rgyas bcom ldan 'das rnams kyi chos bstan pa ni rtag pa'i phyir yang ma yin/ chad pa'i phyir yang ma yin no/ /lha'i bu de bzhin nyid gang yin pa de ni sngon ma byung bar gyur pa'o zhes 'du shes kyis yod pa ma yin par yongs su shes par zad kyi/ de la ni chad pa yang med/ rtag pa yang med de/ lha'i bu de ltar na byang chub sems dpa' ldog pa yin no/ /bstan pa 'di bshad pa na lha'i bu khris mi skye ba'i chos la bzod pa thob par gyur to/ /de nas lha'i bu blo gros rab gnas kyis 'jam dpal gzhon nur gyur pa la 'di skad ces smras so/ /'jam dpal de bzhin gshegs pa la blta ba dang / phyag bgyi ba dang / bsnyen bkur bgyi ba dang / zhu ba dang / zhu blag bgyi ba'i slad du de bzhin gshegs pa'i spyan sngar bzhud kyis gshegs so/ /'jam dpal gyis smras pa/ lha'i bu rnam par rtog pa la ma spyod cig /de bzhin gshegs pa de ni kho bos blangs zin to/ /lha'i bus smras pa/ 'jam dpal de bzhin gshegs pa de gang na bzhugs/ 'jam dpal gyis smras pa/ lha'i bu de ni kho bo'i mdun na bzhugs so/ /lha'i bus smras pa/ 'jam dpal de mi gda'o/ /'jam dpal gyis smras pa/ lha'i bu gal te khyod kyis thams cad mthong na des de bzhin gshegs pa mthong bar mi 'gyur ro/ /lha'i bus smras pa/ 'jam dpal ci'i slad du de skad ces de bzhin gshegs pa de ni kho bos blangs zin te/ de ni kho bo'i mdun na bzhugs so zhes gsung / 'jam dpal gyis smras pa/ lha'i bu 'di ji snyam du sems/ kho bo'i mdun zhes bya ba ci zhig yin snyam/ lha'i bus smras pa/ 'jam dpal nam mkha'i khams lags so/ /'jam dpal gyis smras pa/ lha'i bu de bzhin gshegs pa de yang 'di lta ste/ nam mkha'i khams yin no/ /de ci'i phyir zhe na/ chos thams cad nam mkha' dang mnyam pa'i phyir nam mkha' ji lta bu yin pa de bzhin gshegs pa yang de lta bu yin pas nam mkha' dang de bzhin gshegs pa de ni gnyis su med de gnyis su byar med pa'i phyir ro/ /lha'i bu de lta bas na/ khyod de bzhin gshegs pa lta bar 'dod na mtha' 'di khong du chud par bya zhing cung zad kyang rnam par brtag par mi bya'o/ /de nas yang 'jam dpal gzhon nur gyur pas de'i tshe khang pa brtsegs pa gru bzhi lham pa/ ka ba bzhi pa/ cha mnyam pa/ shin tu mdzes pa/ blta na sdug pa/ sum khri nyis stong mngon par sprul to/ /khang pa brtsegs pa de dag tu rin po che'i khri stan lha'i dpag bsam gyi shing las byung ba'i gos kyis bshams pa dag kyang sprul cing khri stan re re la yang byang chub sems dpa'i lus gzugs skyes bu chen po'i mtshan sum cu rtsa gnyis dang ldan pa dag sprul to/ / de nas 'jam dpal gzhon nur gyur pas ji lta bus byin gyi rlabs kyi byin gyis brlabs nas 'di lta bur gyur pa'i byin gyi rlabs kyi byin gyis brlabs pas/ stong gsum gyi stong chen po'i 'jig rten gyi khams 'di ni rnam par spyod pa'i pad ma gang dag yin pa de dag dang / khang pa brtsegs pa de dag de bzhin gshegs pa ga la ba der dong ste lhags nas bcom ldan 'das dge slong gi dge 'dun dang bcas pa la lan gsum bskor ba byas te/ steng gi bar snang la bcom ldan 'das kyi 'khor gyi dkyil 'khor la snang bar byed cing phyogs bzhi kun nas 'khor bar 'khod do/ /de nas pad ma de dag la 'khod pa'i byang chub sems dpa' sprul pa gang dag yin pa de dag dang / khang pa brtsegs pa dag na 'khod pa'i byang chub sems dpa' gang dag yin pa de dag thams cad kyis bcom ldan 'das la sgra dbyangs 'thun par tshigs su bcad pa 'di dag gis mngon par bstod do/ /gang gA'i bye snyed bsam gyis mi khyab pa'i/ /sangs rgyas bye ba phrag mang khyod kyis mchod/ /byang chub mchog gi spyad pa btsal mdzad pas/ /de slad mi mchog khyod ni mdzes pa lags/ /thub pa mtshan gyis yongs su spras gyur pa/ /sku mchog srid pa gsum na lhang nge ste/ /'dren pa gang la mi dang srog dang ni/ /gang zag ma mchis chos ni 'gro la ston/ /rnam par 'dren pas sbyin dang tshul khrims spyad/ /bzod pa brtson 'grus de bzhin bsam gtan bsten/ /khyod kyi shes rab srid gsum thogs mi mnga'/ /ye shes mthar byon khyod la phyag 'tshal lo/ /gang zhig chos rje lha dang mis mchod pa'i/ /'jig rten 'dren pa la ni 'dud 'gyur zhing / /stong pa nyid la mos par bgyid pa yi/ /mi de 'jig rten dag gi 'dren par 'gyur/ / gang dag sngon byung de bzhin gshegs pa dang / /gang dag phyogs rnams bzhugs pa'i 'dren pa dag /de dag gis ni mtshan med ston pa'i chos/ /rang bzhin mtshan nyid ma mchis rtag tu bsgoms/ /'di la rang bzhin sems can gang yang ni/ / skye dang 'chi ba dmigs su ma mchis shing / /'ong ba ma mchis 'gro ba ma mchis te/ /chos rnams thams cad nam mkha' ji bzhin no/ /ji ltar mi yis sgyu ma bstan gyur pa/ /snang yang de bzhin nyid du ma mchis ltar/ /de bzhin chos rnams sgyu ma 'dra ba dang / /rmi lam lta bur bde bar gshegs pas bstan/ /gang zag la las gang gA'i bye snyed kyi/ /'jig rten khams rnams 'dir ni sbyin byas dang / /'dus byas stong par bzod pa gang lags pa/ /bzod pa de ni sbyin las khyad par 'phags/ /byang chub 'dod pa'i byang chub sems dpa' yis/ /bskal pa bye ba gang gA'i bye snyed du/ /me tog spos dang de bzhin zas skom dag /phul nas mi mchog sangs rgyas mchod pa bas/ /gang gis gang la mi dang srog dang ni/ /gang zag ma mchis de 'dra'i chos 'di dag /thos nas de la 'od gsal bzod thob pa/ /de yis mi rnams dam pa mchod pa lags/ /gang la mi dang gang zag 'du shes mchis/ /bskal pa bye ba mang por zas skom dang / /shing rta dpung chung khri stan sbyin bgyis kyang / /des ni 'di la grol ba mi 'thob po/ /mi mchog gang dag mya ngan 'das pa dang / /de dag gis kyang sems can mang bkrol ba/ /mkhas rnams rang bzhin 'od gsal stong pa yi/ /chos rnams de ltar mkhyen pas rnam par grol/ /sangs rgyas 'byung dang yul du gnas pa dang / /de bzhin bstan la dad pa thob par dka'/ /mi yi srid pa'ang snyed par dka' bas na/ /rgyal ba rnams kyi bstan la legs brtson gyis/ /mi khom brgyad po thams cad rnam spangs shing / /khom pa phun sum rnyed dka' thob gyur la/ /bde gshegs bstan la dad pa rnyed gyur pa'i/ /mkhas pa rnams kyis rigs pa'i rnal 'byor spyod/ /sgra la 'chel cing 'dug par ma byed par/ /chos thos gyur nas rtag tu nan tan gyis/ /khyed kyis rtag tu dgon pa'i gnas bsten la/ /des ni mi rnams dam par 'gyur bar byos/ /chos smra'i dge bshes gang yin bsten gyis la/ /sdig pa'i grogs la lan 'ga'ang ma bsten cig / sems can kun la sems ni mnyam gyis la/ /sems can de la nam yang ma rlom shig /tshul khrims ldan dang mang du thos gyis la/ /rtag tu phyag dar khrod dang bsod snyoms spyod/ /g.yel ba med par shing drung sten gyis la/ /bkus te bor ba mchog la ma smod cig / 'dus byas 'di dag thams cad 'dus byas min/ /mtshan nyid gcig cing smig rgyu 'dra ba yin/ /dam pa'i don gyi mu gcig shes gyis la/ /myur du gzhal yas byang chub reg par gyis/ /phung po lnga rnams sgyu ma bzhin du ltos/ /nang gi skye mched drug dang phyi yi drug / de dag grong stong 'dra bar gsungs pas na/ /de la nam yang bsten par ma byed cig /'dod chags zhe sdang rang bzhin stong pa nyid/ /gti mug nga rgyal yongs su rtog pas bskyed/ /rtog pa de yang ma byung 'byung med par/ /de ltar shes na 'dren pa rnams su 'gyur/ /de nas sprul pa de dag gis tshigs su bcad pa de dag smras pa na 'khor de la srog chags nyi khri nyis stong bla na med pa yang dag par rdzogs pa'i byang chub tu sems skyes so/ /dge slong lnga brgya ni len pa med par zag pa rnams las sems rnam par grol lo/ /dge slong sum brgya ni chos rnams la chos kyi mig rdul med cing dri ma dang bral ba rnam par dag go / dge slong ma sum stong yang chos rnams la chos kyi mig rdul med cing dri ma dang bral ba rnam par dag go /dge bsnyen bdun stong dang / dge bsnyen ma stong dang / lha'i bu nyi khri bdun stong yang chos rnams la chos kyi mig rdul med cing dri ma dang bral ba rnam par dag go / byang chub sems dpa' sum brgyas ni mi skye ba'i chos la bzod pa thob po/ /stong gsum gyi stong chen po'i 'jig rten gyi khams 'di yang rnam pa drug tu g.yos te/ g.yos/ rab tu g.yos/ kun tu rab tu g.yos/ 'gul/ rab tu 'gul/ kun tu rab tu 'gul/ ldeg /rab tu ldeg /kun tu rab tu ldeg go /de nas bcom ldan 'das la gnas brtan shA ri'i bus 'di skad ces gsol to/ /bcom ldan 'das gang gis stong gsum gyi stong chen po'i 'jig rten gyi khams 'di rnam pa drug tu rab tu g.yos pa dang / byang chub sems dpa'i lus gzugs pad ma dag dang / khang pa brtsegs pa 'di dag na mchis pa 'di rnams chos zab mo 'di lta bu ston par bgyid pa dang / 'khor 'di yang snang ba chen pos khyab par gyur pa dang / lha'i bu bye ba phrag 'di snyed 'dus pa dang / byang chub sems dpa' bye ba phrag mang po 'dus pa 'di dag su'i mthu lags/ de skad ces gsol pa dang / bcom ldan 'das kyis gnas brtan shA ri'i bu la 'di skad ces bka' stsal to/ /shA ri'i bu 'di ni 'jam dpal gzhon nur gyur pa'i mthu yin te/ des bkod pa 'di lta bu 'di dag kun du snang ngo / /de ci'i phyir zhe na/ shA ri'i bu 'di ltar deng de bzhin gshegs pa la 'jam dpal gzhon nur gyur pa lha'i bu blo gros rab gnas dang lhan cig tu sangs rgyas kyi chos bsam gyis mi khyab pa yongs su bsgrub pa'i phyir bdud kyi dkyil 'khor thams cad rnam par 'jig par byed pa zhes bya ba'i chos kyi rnam grangs zhu zhing zhu blag byed par 'gyur ba'i phyir ro/ /de skad ces bka' stsal pa dang / bcom ldan 'das la tshe dang ldan pa shA ri'i bus 'di skad ces gsol to/ /bcom ldan 'das 'jam dpal gzhon nur gyur pa de 'khor 'dus pa 'di na mi gda'o/ /bcom ldan 'das kyis bka' stsal pa/ shA ri'i bu khyod re shig sdod cig dang / 'jam dpal gzhon nur gyur pa de de'u re bdud kyi dkyil 'khor thams cad dang / bdud kyi gnas thams cad dang / bdud thams cad zil gyis gnon cing bkod pa chen pos de bzhin gshegs pa ga la ba der 'ong bar 'gyur ro/ /de nas 'jam dpal gzhon nur gyur pa bdud kyi dkyil 'khor thams cad rnam par 'jig par byed pa zhes bya ba'i ting nge 'dzin la snyoms par zhugs so/ /'jam dpal gzhon nur gyur pa bdud kyi dkyil 'khor thams cad rnam par 'jig par byed pa'i ting nge 'dzin la snyoms par zhugs ma thag tu de nas de'i mod la stong gsum gyi stong chen po'i 'jig rten gyi khams 'di na bdud kyi gnas bye ba brgya phrag ji snyed pa de dag thams cad mog mog por gyur to/ /bdud sdig can de dag kyang rang rang gi lus rgas shing gtugs la 'khogs par gyur nas lag pa 'khar ba la rten cing 'gro bar gyur to/ /de dag gis lha'i bu mo rnams kyang rgas shing gtugs la 'khogs par gyur pa dang / rang rang gi gzhal med khang dag kyang rnyings shing rab tu 'jig la mun pa mun gnag tu gyur par mthong ngo / /de nas bdud sdig can de dag skrag cing dngangs la yi chad cing sgyid lug ste/ spu'i khung bu zing zhes byed par gyur nas 'di snyam du rnam par rtog ste/ gang gis bdag cag bdud kyi gnas rnams 'di lta bu'i gnas skabs su gyur pa 'di'i rgyu ni gang yin/ rkyen ni gang yin/ bdag cag 'di nas 'chi 'pho zhing med pa 'am gcig tu mi 'gyur grang snyam mo/ /bdud de dag gi rnam par rtog pa de lta bu de skyes ma thag tu de nas 'jam dpal gzhon nur gyur pas lha'i bu sprul pa ther 'bum sprul te/ bdud de dag gi mdun du bkod do/ /de nas lha'i bu sprul pa de dag gis bdud sdig can de dag la 'di skad ces smras so/ /grogs po dag 'di ni byang chub sems dpa' phyir mi ldog pa 'jam dpal gzhon nur gyur pa zhes bya ba de da ltar bdud kyi dkyil 'khor thams cad rnam par 'jig par byed pa zhes bya ba'i ting nge 'dzin la snyoms par zhugs pa de'i mthu yin te/ khyed la 'tshe ba 'ga' yang 'byung bar mi 'gyur gyis ma skrag shig / lha'i bu sprul pa de dag gis tshig de skad ces smras ma thag tu/ de nas bdud sdig can de dag gis sgra de yang thos/ 'jam dpal gzhon nur gyur pa'i ming yang thos nas yang rgya cher dngangs shing skrag ste/ bdud kyi gnas de dag thams cad kyang rab tu g.yos so/ /de nas bdud sdig can de dag gis lha'i bu sprul pa de dag la 'di skad ces smras so/ /grogs po dag yongs su skyobs shig /grogs po dag yongs su skyobs shig /de nas lha'i bu sprul pa de dag gis bdud sdig can de dag la 'di skad ces smras so/ /grogs po dag ma 'jigs shig /grogs po dag ma 'jigs shig /khyed cag deng la bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa ga la ba der song shig dang / de bzhin gshegs pa thugs rje dang ldan pa de ni sems can 'jigs par gyur pa rnams la mi 'jigs pa stsol bar mdzad do/ /de nas lha'i bu sprul pa de dag gis tshig de skad ces smras nas de nyid du mi snang bar gyur to/ /de nas bdud sdig c an 'khor bdud sdig can 'bum phrag ther 'bum du ma dang bcas pa de dag thams cad rgas shing 'khogs nas gzer cing lag pa 'khor ba la rten bzhin du 'dong zhing skad cig thang cig yud tsam cig la bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa ga la ba der dong ste lhags nas bcom ldan 'das la thams cad kyis sgra skad gcig tu 'di skad ces gsol to/ /bcom ldan 'das bdag cag mi sdug pa'i rnam pa 'di lta bu 'di dag las yongs su bskyab tu gsol/ bde bar gshegs pa bdag cag yongs su bskyab tu gsol/ bcom ldan 'das sangs rgyas bye ba phrag 'bum gyi mtshan yongs su bsgrags pa ni mi mngon lags kyi/ 'jam dpal gzhon nur gyur pa gcig pu'i ming ni de lta ma lags so/ /de ci'i slad du zhe na/ 'jam dpal gzhon nur gyur pa'i ming thos na bdag cag 'jigs shing dngang la skrag par 'gyur te/ 'chi 'pho ba snyam du 'tshal cing ma mchis par 'gyur ba snyam du 'tshal ba'i slad du'o/ /de nas bcom ldan 'das kyis bdud sdig can de dag la 'di skad ces bka' stsal to/ /sdig can dag de de bzhin no/ /ji skad smras pa de bzhin te/ ji ltar 'jam dpal gzhon nur gyur pas yongs su smin pa dang / rnam par dbye ba med par sems can rnams kyi don byas pa dang / byed par 'gyur ba de ltar sangs rgyas bye ba phrag 'bum gyis kyang sems can rnams kyi don ma mdzad mi mdzad pas de'i phyir ji ltar 'jam dpal gzhon nur gyur pa gcig pu'i ming yongs su bsgrags pa de ltar sangs rgyas bye ba phrag 'bum gyi mtshan yongs su bsgrags pas ni khyed cag sdug bsngal zhing rnam par 'jig par mi 'gyur ro/ /de nas bcom ldan 'das la bdud sdig can de dag gis 'di skad ces gsol to/ /bcom ldan 'das bdag cag 'di ltar lus 'khogs pa 'dis nyam thag cing ngo tsha lags pas bcom ldan 'das bdag cag sngon bdag cag gi kha dog rgyas par gyur pa gang lags pa de lta bu 'tshal lags so/ /bcom ldan 'das kyis bka' stsal pa/ khyed cag 'jam dpal gzhon nur gyur pa 'ongs kyi bar du re shig 'di nyid du sdong cig dang / des khyed cag mi sdug pa'i rnam pa 'di las yongs su thar bar byed par 'gyur ro/ /de nas 'jam dpal gzhon nur gyur pa ting nge 'dzin de las langs te/ stan las langs nas byang chub sems dpa' 'bum phrag du mas kyang yongs su bskor cing mdun du bdar/ lha'i bu 'bum phrag du ma dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po 'bum phrag du ma sil snyan 'bum phrag mang po dag rab tu gsil zhing me tog ud pa la dang / pad ma dang / ku mu da dang / pad ma dkar po'i char dag rab tu 'bebs pa sha stag gis yongs su bskor cing mdun du bdar te/ bkod pa chen po dang / rnam par rtse ba chen pos bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal te/ bcom ldan 'das la lan gsum bskor ba byas nas phyogs gcig tu 'dug go /de nas bcom ldan 'das kyis 'jam dpal gzhon nur gyur pa la 'di skad ces bka' stsal to/ /'jam dpal khyod bdud kyi dkyil 'khor thams cad rnam par 'jig par byed pa zhes bya ba'i ting nge 'dzin la snyoms par 'jug gam/ 'jam dpal gyis gsol pa/ bcom ldan 'das snyoms par 'jug lags so/ /bcom ldan 'das kyis bka' stsal pa/ 'jam dpal khyod kyis ting nge 'dzin bsgrubs pa de de bzhin gshegs pa gang las thos/ khyod kyis ting nge 'dzin de bsgrubs nas ji srid cig lon/ 'jam dpal gyis gsol pa/ bcom ldan 'das gang gi tshe bdag gis ting nge 'dzin bsgrubs pa de thos shing bdag gis ting nge 'dzin de bsgrubs pa de'i tshe na bcom ldan 'das kyis byang chub tu thugs bskyed par yang ma gyur lags so/ /bcom ldan 'das kyis bka' stsal pa/ 'jam dpal khyod kyis gang la ting nge 'dzin bsgrubs pa de thos pa'i de bzhin gshegs pa de'i mtshan ci/ 'jam dpal gyis gsol pa/ bcom ldan 'das sngon byung ba 'das pa'i dus bskal pa bsam gyis mi khyab pa'i yang ches bsam gyis mi khyab pa/ grangs ma mchis pa'i yang ches grangs ma mchis pa 'das pa de'i tshe de'i dus na de bzhin gshegs pa me tog man dA ra ba'i dri zhes bgyi ba rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das byung ste/ de ting nge 'dzin bsgrubs pa de gsung bar gyur nas de bzhin gshegs pa de las bdag gis bdud kyi dkyil 'khor thams cad rnam par 'jig par bgyid pa'i ting nge 'dzin bsgrubs pa de thos lags so/ /bcom ldan 'das kyis bka' stsal pa/ 'jam dpal bsgrubs pa de dag gang yin/ 'jam dpal gyis gsol pa/ bcom ldan 'das byang chub sems dpa' rnam pa nyi shu dang ldan na bdud kyi dkyil 'khor thams cad rnam par 'jig par bgyid pa'i ting nge 'dzin de 'thob ste/ nyi shu gang lags she na/ bcom ldan 'das 'di la byang chub sems dpa' 'dod chags rnam par 'jig cing 'dod chags kyi sems rnam par 'jig par bgyid pa dang / zhe sdang rnam par 'jig cing zhe sdang gi sems rnam par 'jig par bgyid pa dang / gti mug rnam par 'jig cing gti mug gi sems rnam par 'jig par bgyid pa dang / phrag dog rnam par 'jig cing phrag dog gi sems rnam par 'jig par bgyid pa dang / nga rgyal rnam par 'jig cing nga rgyal gyi sems rnam par 'jig par bgyid pa dang / 'chab pa rnam par 'jig cing 'chab pa'i sems rnam par 'jig par bgyid pa dang / khro ba rnam par 'jig cing khro ba'i sems rnam par 'jig par bgyid pa dang / yongs su gdung ba rnam par 'jig cing yongs su gdung ba'i sems rnam par 'jig par bgyid pa dang / 'du shes rnam par 'jig cing 'du shes kyi sems rnam par 'jig par bgyid pa dang / lta ba rnam par 'jig cing lta ba'i sems rnam par 'jig par bgyid pa dang / rtog pa rnam par 'jig cing rtog pa'i sems rnam par 'jig par bgyid pa dang / len pa rnam par 'jig cing len pa'i sems rnam par 'jig par bgyid pa dang / 'dzin pa rnam par 'jig cing 'dzin pa'i sems rnam par 'jig par bgyid pa dang / mtshan ma rnam par 'jig cing mtshan ma'i sems rnam par 'jig par bgyid pa dang / srid pa rnam par 'jig cing srid pa'i sems rnam par 'jig par bgyid pa dang / rtag pa rnam par 'jig cing rtag pa'i sems rnam par 'jig par bgyid pa dang / chad pa rnam par 'jig cing chad pa'i sems rnam par 'jig par bgyid pa dang / phung po rnam par 'jig cing phung po'i sems rnam par 'jig par bgyid pa dang / khams rnam par 'jig cing khams kyi sems rnam par 'jig par bgyid pa dang / skye mched rnam par 'jig cing skye mched kyi sems rnam par 'jig par bgyid pa dang / khams gsum pa rnam par 'jig cing khams gsum pa la dmigs pa'i sems rnam par 'jig par bgyid pa ste/ bcom ldan 'das byang chub sems dpa' rnam pa nyi shu po de dag dang ldan na ting nge 'dzin de 'thob bo/ /bcom ldan 'das gzhan yang byang chub sems dpa' chos bzhi dang ldan na ting nge 'dzin de 'thob ste/ bzhi gang lags she na/ lhag pa'i bsam pa la yang dag par 'jug pa dang / g.yo ba ma mchis pa dang / zab pa dang / bdog pa thams cad yongs su gtong ba ste/ bcom ldan 'das byang chub sems dpa' chos bzhi po de dag dang ldan na ting nge 'dzin de 'thob bo/ /bcom ldan 'das gzhan yang byang chub sems dpa' chos bzhi dang ldan na ting nge 'dzin de 'thob ste/ bzhi gang lags she na/ slu ba ma mchis pa dang / bden pa'i tshig gis dam 'cha' ba dang / 'du shes kyi dbang gi spyod yul ma lags pa dang / chos thams cad mi 'dzin pa ste/ bcom ldan 'das byang chub sems dpa' chos bzhi po de dag dang ldan na ting nge 'dzin de 'thob bo/ /bcom ldan 'das gzhan yang byang chub sems dpa' chos bzhi dang ldan na ting nge 'dzin de 'thob ste/ bzhi gang lags she na/ dge ba'i bshes gnyen la bsten pa dang / sdig pa'i grogs po spong ba dang / sbyangs pa dang / tshul khrims dang / yo byad bsnyungs pa dang ldan pa dang / 'du 'dzi ma mchis par spyod pa ste/ bcom ldan 'das byang chub sems dpa' chos bzhi po de dag dang ldan na ting nge 'dzin de thob bo/ /bcom ldan 'das gzhan yang byang chub sems dpa' chos bzhi dang ldan na ting nge 'dzin de 'thob ste/ bzhi gang lags she na/ tshul khrims ma nyams pa dang / tshul khrims ma dral ba dang / tshul khrims mi rten pa dang / tshul khrims nag nog ma mchis pa ste/ bcom ldan 'das byang chub sems dpa' chos bzhi po de dag dang ldan na ting nge 'dzin de 'thob bo/ /bcom ldan 'das gzhan yang byang chub sems dpa' chos bzhi dang ldan na ting nge 'dzin de 'thob ste/ bzhi gang lags she na/ nyan thos kyi sems yongs su spong ba dang / rang sangs rgyas kyi sems la lhag par mi dmigs pa dang / bzod pa la gnas pa dang / sems can la rlom sems ma mchis pa ste/ bcom ldan 'das byang chub sems dpa' chos bzhi po de dag dang ldan na ting nge 'dzin de 'thob bo/ /bcom ldan 'das gzhan yang byang chub sems dpa' chos bzhi dang ldan na ting nge 'dzin de 'thob ste/ bzhi gang lags she na/ stong pa nyid kyi chos sgom zhing gang zag la rlom sems ma mchis pa dang / mtshan ma ma mchis pa sgom zhing mtshan ma yongs su spong ba dang / smon pa ma mchis pa sgom zhing smon pa'i sems yongs su spong ba dang / cho ga 'tshal cing dngos po thams cad yongs su gtong ba dang bzhi ste/ bcom ldan 'das byang chub sems dpa' rnam pa de dag dang chos de dag dang ldan na bdud kyi dkyil 'khor thams cad rnam par 'jig par bgyid pa'i ting nge 'dzin de 'thob bo/ /bcom ldan 'das de ltar de bzhin gshegs pa me tog man dA ra'i dris ting nge 'dzin bsgrub pa de rab tu bstan te/ bcom ldan 'das bdag gis de bzhin gshegs pa de las ting nge 'dzin bsgrub pa de thos shing bcom ldan 'das de bzhin gshegs pa me tog man dA ra'i dri de'i 'og tu de bzhin gshegs pa dgra bcom pa yang dag par rdzogs pa'i sangs rgyas nor bu dang / rin po che dang / glog dang / nyi zla thams cad zil gyis gnon pa'i 'od ces bgyi ba byung bar gyur te/ bcom ldan 'das bdag gis de bzhin gshegs pa de'i spyan sngar ting nge 'dzin de bsgrubs so/ / bstan pa 'di bshad pa na 'khor de las byang chub sems dpa' khris ting nge 'dzin de bsgrubs so/ /de nas bcom ldan 'das la gnas brtan shA ri'i bus 'di skad ces gsol to/ /bcom ldan 'das 'jam dpal gzhon nur gyur pas ji tsam du ting nge 'dzin de legs par bsgrubs shing ting nge 'dzin de bsgrubs pas bdud sdig can 'di dag mi sdug pa'i rnam pa 'di lta bur bgyis pa de ni ngo mtshar lags so/ /de skad ces gsol pa dang / bcom ldan 'das kyis tshe dang ldan pa shA ri'i bu la 'di skad ces bka' stsal to/ /shA ri'i bu 'di snyam du sems/ stong gsum gyi stong chen po'i 'jig rten gyi khams 'di 'ba' zhig gi bdud sdig can 'di dag 'di ltar mi sdug pa'i rnam par byas so snyam na shA ri'i bu khyod kyis de ltar mi blta'o/ /de ci'i phyir zhe na/ shA ri'i bu 'di lta ste/ 'jam dpal gzhon nur gyur pa'i byin gyi brlabs kyis phyogs bcu kun gyi sangs rgyas kyi zhing gang gA'i klung gi bye ma snyed dag na bdud sdig can gang dag 'khod pa de dag thams cad kyang 'di lta bu'i gnas skabs su gyur pa'i phyir ro/ /de nas bcom ldan 'das kyis 'jam dpal gzhon nur gyur pa la bka' stsal pa/ 'jam dpal khyod kyis byin gyis brlabs 'di thong la/ ci nas kyang bdud sdig can 'di dag sngon gyi kha dog rgyas pa dang ldan par 'gyur bar gyis shig /de nas 'jam dpal gzhon nur gyur pas byin gyis brlabs de btang ngo / /byin gyis brlabs de btang ma thag tu de nas bdud sdig can de dag sngon gyi kha dog rgyas pa dang ldan par gyur to/ /de nas 'jam dpal gzhon nur gyur pas bdud sdig can de dag dang / bdud kyi 'khor de dag la smras pa/ sdig can dag gang la mig dang / gang la mig gi 'du shes dang / gang la mig tu lhag par 'dzin pa dang / gang la mig gi mtshan ma dang / gang la mig tu lhag par dmigs pa dang / gang la mig tu mngon par chags pa dang / gang la mig gi rlom sems dang / gang la mig bdag gir 'dzin pa dang / gang la mig gi rten dang / gang la mig la mngon par zhen pa dang / gang la mig gi spros pa dang / gang la mig nga'i ba nyid dang / gang la mig kun du srung ba dang / gang la mig sgom pa dang / gang la mig blang ba dang / gang la mig dor ba dang / gang la mig tu rtog pa dang / gang la mig tu sems pa dang / gang la mig yongs su 'grub pa dang / gang la mig 'gog pa dang / gang la mig skye ba dang / gang la mig tu 'dzin pa dang / gang la mig 'ong ba yod pa de la ni khyed bdud kyi las bar chad byed pa'i yul yod do/ /sdig can dag de bzhin du gang la rna ba dang / sna dang / lce dang / lus dang / yid dang / gzugs dang / sgra dang / dri dang / ro dang / reg bya dang / chos dang / gang la chos kyi 'du shes dang / gang la chos su lhag par 'dzin pa dang / gang la chos kyi mtshan ma dang / gang la chos su lhag par dmigs pa dang / gang la chos su mngon par chags pa dang / gang la chos kyi rlom sems dang / gang la chos bdag gir 'dzin pa dang / gang la chos kyi rten dang / gang la chos la mngon par zhen pa dang / gang la chos kyi spros pa dang / gang la chos nga'i ba nyid dang / gang la chos kun du srung ba dang / gang la chos sgom pa dang / gang la chos blang ba dang / gang la chos dor ba dang / gang la chos su rtog pa dang / gang la chos su sems pa dang / gang la chos yongs su 'grub pa dang / gang la chos 'gog pa dang / gang la chos skye ba dang / gang la chos su 'dzin pa dang / gang la chos 'ong ba yod pa de la ni khyed bdud kyi las bar chad byed pa'i yul yod do/ /sdig can dag gang la mig med pa dang / gang la mig gi 'du shes med pa dang / gang la mig tu lhag par 'dzin pa med pa dang / gang la mig gi mtshan ma med pa dang / gang la mig tu lhag par dmigs pa med pa dang / gang la mig tu mngon par chags pa med pa dang / gang la mig gi rlom sems med pa dang / gang la mig bdag gir 'dzin pa med pa dang / gang la mig gi rten med pa dang / gang la mig la mngon par zhen pa med pa dang / gang la mig gi spros pa med pa dang / gang la mig nga'i ba nyid med pa dang / gang la mig kun tu srung ba med pa dang / gang la mig sgom pa med pa dang / gang la mig blang ba med pa dang / gang la mig dor ba med pa dang / gang la mig tu rtog pa med pa dang / gang la mig tu sems pa med pa dang / gang la mig yongs su 'grub pa med pa dang / gang la mig 'gog pa med pa dang / gang la mig skye ba med pa dang / gang la mig tu 'dzin pa med pa dang / gang la mig 'ong ba med pa de la ni khyed kyi gnas med do/ /yul med do/ /bdag po med do/ /stobs med do/ /dbang phyug med do/ /mthus gzung ba med do/ /sdig can dag de bzhin du gang la rna ba dang / sna dang / lce dang / lus dang / yid dang / gzugs dang / sgra dang / dri dang / ro dang / reg bya dang / chos med pa dang / gang la chos kyi 'du shes med pa dang / gang la chos su lhag par 'dzin pa med pa dang / gang la chos kyi mtshan ma med pa dang / gang la chos su lhag par dmigs pa med pa dang / gang la chos su mngon par chags pa med pa dang / gang la chos kyi rlom sems med pa dang / gang la chos bdag gir 'dzin pa med pa dang / gang la chos kyi rten med pa dang / gang la chos la mngon par zhen pa med pa dang / gang la chos kyi spros pa med pa dang / gang la chos nga'i ba nyid med pa dang / gang la chos kun tu srung ba med pa dang / gang la chos sgom pa med pa dang / gang la chos blang ba med pa dang / gang la chos dor ba med pa dang / gang la chos su rtog pa med pa dang / gang la chos su sems pa med pa dang / gang la chos yongs su 'grub pa med pa dang / gang la chos 'gog pa med pa dang / gang la chos skye ba med pa dang / gang la chos su 'dzin pa med pa dang / gang la chos 'ong ba med pa de la ni khyed kyi gnas med do/ /yul med do/ /bdag po med do/ /stobs med do/ /dbang phyug med do/ /mthus gzung ba med do/ /de nas 'jam dpal gzhon nur gyur pas de lta de ltar chos bstan pa des bdud kyi 'khor de las bdud khri bla na med pa yang dag par rdzogs pa'i byang chub tu sems skyes so/ /bdud kyi 'khor de las bdud brgyad khri bzhi stong ni chos rnams la chos kyi mig rdul med cing dri ma dang bral ba rnam par dag go / de nas bcom ldan 'das la gnas brtan 'od srung chen pos 'di skad ces gsol to/ /bcom ldan 'das 'jam dpal gzhon nur gyur pa 'di mchis lags kyi/ bcom ldan 'das bdag cag gis byang chub sems dpa' de dag blta bar bgyi'o/ /de ci'i slad du zhe na/ bcom ldan 'das skyes bu dam pa de lta bu de dag mthong bar dka' ba'i slad du'o/ /de nas bcom ldan 'das kyis 'jam dpal gzhon nur gyur pa la bka' stsal pa/ 'jam dpal 'khor 'di phyogs bcu nas 'dus pa'i byang chub sems dpa' de dag blta bar 'dod kyis khyod kyis ston cig /de nas 'jam dpal gzhon nur gyur pas byang chub sems dpa' chos dang / chos 'phags dang / chos kyi blo gros dang / nyi ma dang / bdud kyi mtshon cha dang / 'jam dbyangs dang / sdig pa zhi dang / zhi ba srung dang / rnam rgyal srung dang / chos rgyal rnam bsgrags dang / de dag dang byang chub sems dpa' gzhan dag la smras pa/ rigs kyi bu dag khyed cag gi rang rang gi sangs rgyas kyi zhing dag na byang chub sems dpa' de dag gi lus ci 'dra ba de lta bur khyed cag rang rang gi lus ston cig / 'jam dpal gzhon nur gyur pas tshig de skad ces smras ma thag tu de nas de'i mod la byang chub sems dpa' de dag ting nge 'dzin de las langs te/ langs nas kyang rang rang gi lus dag bstan to/ /de nas byang chub sems dpa' kha cig gi lus ni ri rab tsam mo/ /kha cig gi lus ni dpag tshad brgyad khri tsam mo/ /kha cig gi lus ni dpag tshad bdun khri dang / drug khri dang / lnga khri dang / bzhi khri dang / sum khri dang / nyi khri dang / khri tsam mo/ /kha cig gi lus ni dpag tshad lnga stong dang / bzhi stong dang / sum stong dang / nyis stong dang / stong tsam mo/ /kha cig gi lus ni dpag tshad lnga brgya dang / bzhi brgya dang / sum brgya dang / nyis brgya dang / brgya tsam mo/ /kha cig gi lus ni dpag tshad lnga bcu dang / bzhi bcu dang / sum cu dang / nyi shu dang / bcu tsam mo/ /kha cig gi lus ni dpag tshad lnga dang / bzhi dang / gsum dang / gnyis dang / gcig tsam mo/ /byang chub sems dpa' kha cig gi lus ni 'jig rten gyi khams mi mjed 'di'i sems can rnams kyi lus ji tsam par khru phyed dang bzhi tsam ste/ de dag gi lus de lta bu dag kun du snang ngo / /de'i tshe na stong gsum gyi stong chen po'i 'jig rten gyi khams 'dir gang du byang chub sems dpa' gzi brjid che ba gzi brjid che ba sha stag gis khyab par ma gyur pa'i sa phyogs ni tha na 'khar ba gzugs pa'i gtos tsam yang med do/ /byang chub sems dpa' de dag gi 'od kyis kyang phyogs bcu'i sangs rgyas kyi zhing bye ba phrag 'bum dag snang bar gyur to/ /de nas 'jam dpal gzhon nur gyur pa stan las langs te/ bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /gal te zhus nas zhu ba lung bstan pa'i slad du/ bcom ldan 'das kyis bdag la skabs dbye bar gnang na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas la bdag phyogs 'ga' zhig zhu lags so/ /de skad ces gsol pa dang / bcom ldan 'das kyis 'jam dpal gzhon nur gyur pa la 'di skad ces bka' stsal to/ /'jam dpal khyod ci dang ci 'dod pa de bzhin gshegs pa la zhus shig dang / ngas zhus pa de dang / de nyid kyi lan btab pas khyod kyi sems rangs par bya'o/ /de skad ces bka' stsal pa dang / 'jam dpal gzhon nur gyur pa dang / thams cad dang ldan pa'i 'khor des bcom ldan 'das kyi ltar mnyan nas bcom ldan 'das la 'di skad ces gsol to/ /bcom ldan 'das byang chub sems dpa' byang chub sems dpa' zhes bgyi na/ bcom ldan 'das ci'i slad du byang chub sems dpa' zhes bgyi/ de skad ces gsol pa dang / bcom ldan 'das kyis 'jam dpal gzhon nur gyur pa la 'di skad ces bka' stsal to/ /'jam dpal chos thams cad rtogs pa'i phyir byang chub sems dpa' zhes bya'o/ /'jam dpal gang dag rtogs pa'i phyir byang chub sems dpa' byang chub sems dpa' zhes bya ba'i chos thams cad po de dag gang zhe na/ 'jam dpal 'di la byang chub sems dpas mig rtogs par byed do/ /rna ba rtogs par byed do/ /sna rtogs par byed do/ /lce rtogs par byed do/ /lus rtogs par byed do/ /yid rtogs par byed do/ /'jam dpal ji ltar byang chub sems dpa' mig rtogs par byed/ ji ltar rna ba dang / sna dang / lce dang / lus dang / yid rtogs par byed ce na/ 'jam dpal 'di la byang chub sems dpas mig rang bzhin gyis stong zhes bya bar rtogs par byed kyang rtogs so snyam du rnam par mi rtog go / rna ba dang / sna dang / lce dang / lus dang / yid rang bzhin gyis stong zhes bya bar rtogs par byed kyang rtogs so snyam du rnam par mi rtog go /gzugs rnams dang / sgra rnams dang / dri rnams dang / ro rnams dang / reg bya rnams dang / chos rnams rang bzhin gyis stong zhes bya bar rtogs par byed kyang rtogs so snyam du rnam par mi rtog go /'jam dpal gzhan yang byang chub sems dpa' nye bar len pa'i phung po lnga dag rtogs par byed do/ / ji ltar rtogs par byed ce na/ stong pa nyid dag tu rtogs par byed do/ /mtshan ma med pa dag tu rtogs par byed do/ /smon pa med pa dag tu rtogs par byed do/ /'dod chags dang bral ba dag tu rtogs par byed do/ /zhi ba dag tu rtogs par byed do/ /dben pa dag tu rtogs par byed do/ /dngos po med pa dag tu rtogs par byed do/ /g.yo ba med pa dag tu rtogs par byed do/ /skye ba med pa dag tu rtogs par byed do/ /'ong ba med pa dag tu rtogs par byed do/ /'gro ba med pa dag tu rtogs par byed do/ /ngo bo nyid med pa dag tu rtogs par byed do/ /bdag po med pa dag tu rtogs par byed do/ /rnam par rig pa med pa dag tu rtogs par byed do/ /shes pa med pa dag tu rtogs par byed do/ /mthong ba med pa dag tu rtogs par byed do/ /ma skyes pa dag tu rtogs par byed do/ / spros pa med pa dag tu rtogs par byed do/ /bdag gi med pa dag tu rtogs par byed do/ /rtog pas kun nas bslang ba dag tu rtogs par byed do/ /rnam par rtogs pas kun nas bslang ba dag tu rtogs par byed do/ /rten cing 'brel bar 'byung ba dag tu rtogs par byed do/ /sgyu ma lta bu dag tu rtogs par byed do/ /rmi lam lta bu dag tu rtogs par byed do/ /mig yor lta bu dag tu rtogs par byed do/ /brag ca lta bu dag tu rtogs par byed do/ /chu shing gi snying po lta bu dag tu rtogs par byed do/ /ring du mi gnas pa dag dang / snying po med pa dag dang / gsog dag dang / gsob dag tu rtogs par byed do/ /'jam dpal gzhan yang byang chub sems dpas 'dod chags rtogs par byed do/ /zhe sdang rtogs par byed do/ /gti mug rtogs par byed do/ /ji ltar rtogs par byed ce na/ 'dod chags dang / zhe sdang dang / gti mug dag ni yongs su rtog pas kun nas bslang ba yin par rtogs par byed de/ yongs su rtog pa de dag kyang stong pa dag dang / med pa dag dang / dngos po med pa dag dang / spros pa med pa dag dang / rnam par rig pa med pa dag tu rtogs par byed do/ /'jam dpal gzhan yang byang chub sems dpas 'dod pa'i khams rtogs par byed do/ /gzugs kyi khams dang / gzugs med pa'i khams rtogs par byed do/ /ji ltar rtogs par byed ce na/ bdag med pa dang / stong pa dang / dben par rnam par rtogs par byed do/ /'jam dpal gzhan yang byang chub sems dpas sems can gyi spyod pa rtogs par byed do/ /ji ltar rtogs par byed ce na/ sems can 'di dag ni 'dod chags spyad pa'o/ /'di dag ni zhe sdang spyad pa'o/ /'di dag ni gti mug spyad pa'o/ /'di dag ni cha mnyam pa spyad pa'o zhes bya bar rtogs nas spyod pa la mkhas pa rtogs par byed de/ gang gi shes pa'i rnam par rig pa bstan pa gang yin pa de yang rtogs par byed cing rtogs nas kyang ji lta ji ltar de dag rnam par grol ba de lta de ltar chos ston to/ /'jam dpal gzhan yang byang chub sems dpas sems can thams cad rtogs par byed do/ /ji ltar rtogs par byed ce na/ sems can thams cad ni ming tsam ste/ ming de yang g.yo ba med pa dang / sems can 'di dag thams cad ni sems can gcig pa ste/ sems can de yang sems can med pa dang / de ltar yang rnam par mi rtog pa ste/ de'i phyir byang chub sems dpa' zhes bya'o/ /gang gi tshe byang chub sems dpas chos thams cad rtogs par byed pa de'i tshe byang chub rtogs par byed pa yin no/ /de la 'di skad ces bya ste/ mig dang rna ba de dag ni/ /rang bzhin stong par rtogs byed kyang / /rtogs snyam rtog par mi byed pa/ /byang chub sems dpa' zhes kyang bya/ /sna dang lce yang rang bzhin gyis/ /dngos po med par rtogs byed kyang / /rtogs snyam rtog par mi byed pa/ /byang chub sems dpa' zhes kyang bya/ /shes rab can gyis lus dang ni/ /yid ni stong par rtogs byed cing / /rtogs nas yang dag ston byed pa/ /byang chub sems dpa' zhes kyang bya/ /gzugs dang sgra dang dri dag dang / /ro dang reg bya yid 'ong rnams/ /thams cad stong par rtogs byed pa/ /byang chub sems dpa' zhes kyang bya/ /gzugs dang tshor ba rtogs byed cing / /'du shes kyang ni de bzhin te/ /'du byed rnams dang rnam shes ni/ /sgyu ma lta bur rtogs par byed/ /lnga phung rmi lam lta bu dang / /mtshan nyid med par mtshan gcig par/ /rtogs kyang rtogs snyam mi rtog pa/ /byang chub sems dpa' zhes kyang bya/ /nang ni byung ba ma yin te/ /spros pa med cing 'dus ma byas/ /de dag ming gis bstan pa ste/ /ming de dngos po yod ma yin/ /'dod chags zhe sdang kun rtog gis/ /kun nas bslang bar rtogs par byed/ /rtogs pa de yang 'byung min te/ /gtan du dngos po med pa yin/ /gti mug rnam par rtog las byung / /rnam par rtog pa rgyu las skye/ /rgyu yang lta bas bskyed pa ste/ /lta ba de yang dmigs su med/ /khams gsum thams cad stong pa ste/ /de ni med par rtogs par byed/ /'di na 'pho ba 'ga' med pa/ /byang chub sems dpa' zhes kyang bya/ /'dod khams grub pa ma yin te/ /rnam par rtog pas kun nas bslang / /gzugs dang gzugs med de bzhin te/ / de dag thams cad yod ma yin/ /'dod chags spyod dang zhe sdang spyod/ /de bzhin gti mug spyod pa dang / /sems can spyod pa gang yin pa/ /thams cad mkhas pas rtogs par byed/ /sems can thams cad sems can gcig /sems can de yang yod min par/ / shes rab can gyis de rtogs kyang / /sems can de la rlom sems med/ /chos rnams kun gyi 'byung ba ni/ /phyin ci log las skye ba ste/ /gang dag phyin ci log rtog pa/ /de ni logs pa'i mtshan nyid do/ /shes pa kun la mkhas pa ni/ /gang gi sgra la'ang chags pa med/ / chags pa med par rtogs gyur pa/ /byang chub sems dpa' zhes kyang bya/ /rang gi sha rnams gtong byed kyang / /de la gnas pa yod min zhing / /ji bzhin rjes su rtogs gyur pa/ /byang chub sems dpa' zhes kyang bya/ /tshul khrims pha rol phyin gyur kyang / /tshul khrims la ni rlom sems med/ /sangs rgyas tshul don gang yin pa/ /skye med 'byung ba med pa yin/ /byams pas sems can khyab byed kyang / /sems can dmigs su yod ma yin/ /sems can don ni rjes rtogs pa/ /de ni ming gis bstan pa yin/ /'dus byas kun la rnam sems pa'i/ /brtson 'grus rtsom la gnas gyur cing / /'jig rten stong par rig nas ni/ /byang chub dam pa rtogs par byed/ /de ni bsam gtan sgom byed kyang / /de la rten pa yod min zhing / /gnas med dmigs pa yod min pa/ /de ltar mkhas pa sgom par byed/ /bag chags lta ba'i nyon mongs rnams/ /shes rab mtshon gyis gcod byed kyang / /chos kyi dbyings la dbye ba dang / /gcod pa'i rlom sems yod ma yin/ /

CLOSE WINDOW