CLOSE WINDOW

D1067
བོད་ཡིག

@#/ /sangs rgyas kyi chos gsal zhing yangs pa snang brgyad ces bya ba'i mdo/ bam po gcig go/ /sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/rin po che khang pa brtsegs pa'i nang na bcom ldan 'das shAkya thub pa bzhugs te/ phyogs bcu'i byang chub sems dpa' dang / lha ma srin sde brgyad la sogs pas bcom ldan 'das la mchod cing bstod nas/ tshogs mang po'i nang nas byang chub sems dpa' thogs pa med pas thal mo sbyar te/bcom ldan 'das la 'di skad ces gsol to/ /bcom ldan 'das 'dzam bu'i gling gi sems can rnams skye shi 'khor ba thog ma med pa nas 'khor na/ sems can shes pa dang ldan pa ni nyung / mi shes pa ni mang / tshul khrims srung ba ni nyung / tshul khrims mi srung ba ni mang / brtson 'grus can ni nyung / yangs shing g.yeng ba ni mang / tshe ring ba ni nyung / tshe thung ba ni mang / longs spyod dang ldan pa ni nyung / longs spyod chung ba ni mang / bde skyid pa ni nyung /sdug bsngal ba ni mang / bla ma'i bcas bka' dang nan tur ni phyir zhing phyung / 'og ma ni sdug bsngal brgyad las thar mi myong / chos ma yin pa la ni yin zhes zer te/ log par lta ba'i slad du sems can mang po tshe thung zhing ye 'drog gis 'gum pa dang /sdug bsngal mang po las thar bar bgyi zhing phongs pa rnams bzlog par ci gnang zhes gsol pa dang / bcom ldan 'das kyis bka' stsal pa/ thogs pa med pa dge'o dge'o/ /byang chub sems dpa' khyod kyis sems can mang po la phan pa dang / snying rje'i phyir zhus pa ngas bshad kyis nyon cig /sngon gyi sangs rgyas mang pos kyang bshad pa yin no/ /da ltar ngas kyang bshad kyis nyon cig /ma 'ongs pa'i sangs rgyas rnams kyis kyang bshad pa'i rigs so/ /yang sems can gyi nang na mi las btsun pa med de/mi'i lus thob na yang legs pa'i dpal ni spyod mi nus/ yang dag pa'i lta ba las ni 'gal/ sgyu dang lha ma yin la sogs pa ni sdig pa'i rnam pa mang pos byas pas snang brgyad 'di yi dam du byas te bton na/ de'i sdig pa dang mi dge ba'i las thams cad las thar bar 'gyur ro//tshe 'phel zhing ye 'drog gis mi tshugs par 'gyur te/ yon tan dang ldan par 'gyur ro/ /tshe zad na yang dgra bcom pa'i 'bras bu thob par 'gyur ro/ /mi la la zhig legs pa'i chos mi spyod pas nad mang po dang / ltas ngan sna tshogs 'byung ste/ shin tu sdug bsngal che ba las dge ba'i bshes gnyen dang phrad de/ snang brgyad 'di lan gsum bklags na nad mang po yang sos/ ltas ngan sna tshogs kyis kyang mi sdig go/ /mtshams med pa lnga'i sdig pa yang 'byung par 'gyur ro/ /byams pa dang / snying rje dang / dga' ba dang / btang snyoms dang / sangs rgyas kyi chos ma 'dres pa brgyad kyang thob par 'gyur ro/ /gang la la zhig pho smos mtshungs te/ mkhar lan zhig g.yo bar sems na snang brgyad kyi yi ge 'di lan gsum bklags na rtsig pa slong ba dang / sgo gdod pa dang / khron pa rko ba dang / thab 'dzugs pa dang / gtun dang / rang thag 'cha' ba dang / rang thag 'cha' ba yang rung / bang mdzod dang phyugs kyi ra ba brtsig kyang rung / shar nub lho byang gi phyogs mtshams kyi lha dang / gza' dang / rgyu skar ngan pa dang / dgra dang /zhing g.yang dang / ser po gzig gi mjug ma 'dra ba dang / sa gnyan rnams dang / sa sna lnga'i lha dang / 'brug sngon po dang / stag skya bo dang / bya dmar mo dang / ru sbal nag po dang / gab rtse drug gis bkab cing brjod du mi rung ba'i las thams cad byed pa yang thams cad gcod pa dang /drag po dang / legs nyes byed pa dang / gang ba dang / mnyam pa dang / rtag pa dang / gcig tu 'dzin pa dang / gyes pa dang / mnyan pa dang / grub pa dang / sdud pa dang / sa'i bdag po dang / nag po dang /nye nag po dang / lha dang / klu dang / 'dre gdon thams cad 'byol zhing 'bros so/ /so nam bya'o cog dang / lam nye zhing gar 'gro yang rung / snang brgyad lan gsum bklags na yul byes gnyis su nyes pa med cing myur du 'khor te/ bu tsha pha ma la sri zhu che ba dang /phyug btsan pa dang / bde legs su 'gyur ro/ /dgon pa'am gcan gzan gyi nang du song na yang klu dang gcan gzan rnams 'byol zhing rang 'bros so/ /kha mchu dang btson du bzung na yang myur du rang thar ro/ /me'i nang du song na yang mes mi tshugs/ chu'i nang du song na yang chus mi tshugs so//mtshon dang dgras mi tshugs so/ /dug rnams kyang kha zas bdud rtsi bzhin du 'gyur te/ dug gis mi tshugs so/ /snang brgyad kyi yi ge 'di bu pho mo gang gis pha ma la sdig tu dogs pa'i phyir lan gsum bklags na pha ma mnar med pa las thar te mtho ris su skye'o//snang brgyad kyi yi ge 'di gang na gnas pa na byang chub sems dpa' brgyad dang / tshangs pa dang / brgya byin dang / rgyal po chen po bzhi dang / lha dang / klu dang / gnod sbyin la sogs pas mchod pa sna tshogs kyis brgyan te mchod do/ / chos kyi mdo 'di bklags shing rgyas par bshad na de bzhin gshegs pa'i sku yin par blta'o/ /mig gis gzugs sna tshogs 'byed pa'o/ /gzugs nyid stong pa'o/ /stong pa nyid gzugs so/ /rna bas sgra sna tshogs thos pa'o/ /sgra nyid stong pa'o/ /stong ba nyid sgra'o//snas dri sna tshogs tshor ba'o/ /dri nyid stong ba'o/ /stong ba nyid dri'o/ /lces ro sna tshogs 'byed pa'o/ /ro nyid stong pa'o/ /stong pa nyid ro'o/ /lus kyis reg bya sna tshogs 'byed pa'o/ /reg bya nyid stong pa'o/ /stong pa nyid reg bya'o/ /ye shes ni stong pa'o//stong ba nyid kyang ye shes so/ /de nas bcom ldan 'das la thogs pa med pa'i byang chub sems dpas 'di skad ces gsol to/ /mi tshe gcig la skye zhing 'chi ba las dka' ba ma mchis na/ skye ba'i tshe yang nyi ma ma bdams par skye/ 'chi ba'i tshe yang nyi ma ma bdams par 'chi na shi ba'i 'og tu shing gtor bgyid pa'i tshe dus bzang ngan ma bdams nas shing bgyis na nyes pa mang po 'byung ste/rabs chad pa dang / dbul phongs pa dang / kha mchu mang po 'byung na 'di ci'i slad du 'byung zhes gsol pa dang / bcom ldan 'das kyis bka' stsal pa/ sems can shing gtor byed pa'i phyir dris pa shin tu dge'o//yang gnam sa gnyis ni shis/ nyi zla gnyis ni dge zhing snang / mi'i rgyal po byang chub sems dpa' ni shin tu byams shing snying rje che ste/ sems can kun la bu gcig pa bzhin du mnyam par bltas shing / yul chos bzang po bstan na mi dge ba'i lha ma srin dang /kun pos shing mchod pas/ 'dre gdon gyi rnam pa rnams mi zas bzang po zhim po bdar bas chags te/ mi la ni sdug bsngal sna tshogs 'byung / dam pa'i chos la ni yid ma ches/ 'dre gdon gyi chos la ni srog gis mchod nas/ dmar gsum dbral du za ba la ni yid ches te log par bltas shing spyad pas rabs chad pa dang /dbul phongs pa dang / nyes pa sna tshogs 'byung ngo / /bu pho mo 'byung ba'i tshe snang brgyad lan gsum bklags na bu btsa' sla/ yid gzhungs mtshan dang ldan/ mi'am ci la sogs pas mdangs mi 'phrog cing /ye 'drog gis 'chi bar mi byed do/ /dus la bab ste shi bar gyur na yang snang brgyad lan gsum bklags na phyi ma la gnod pa sna gcig kyang mi 'byung ngo / /nyi ma thams cad dge ba yin/ /rgyu skar thams cad bzang po yin/ /dgra bcom thams cad zag pa zad/ /sangs rgyas thams cad rdzu 'phrul che//shid byed pa yang yo byad ci 'byor pa dang / nam nus pa na snang brgyad lan gsum bklags nas shid byas na shi ba yang mtho ris su skye'o/ /bu tsha dang gnyen rnams kyang phyug btsan par 'ong ngo / /ma chad pa yang shar lho nub byang 'dri zhing brtag mi dgos kyis/ sa gar bde ba dang / mi gar dga' bar lha btsun yang der dga' yis/ d+harma lan gsum bklags te ma chad pa der brtsigs na nam du yang nyes pa med de/ sgo ni phyug mi ni dar zhing bkra shis so/ /de'i tshe bcom ldan 'das kyis tshigs su bcad pa 'di dag gsungs so/ /btsal ba'i nyi ma shin tu dge//bdur ba'i nyi ma yongs su bzang / /gson gshin ched du 'di bklags na/ /bsod nams chen po thob par 'gyur/ /yi ge 'di bklags shing shid byas na lo stong gi bar du phyug btsan par 'ong ngo / /de'i tshe sems can phal mang bo bdun khri bdun stong snyed sems ni grol yid ni bde ste/chos kyi mig rdul med ces pa thob cing spyad cing / yang bcom ldan 'das mi gnyen bgyid pa sngar 'phrod 'phrod mi 'dra la phyis nyi ma bdams te gdod gnyen bgyid na/ gnyen bgyis pa'i 'og tu phyug cing btsan pa ni nyung / dbul zhing phongs pa ni mang /log par lta bar ni mtshungs pa/ ci'i phyir na tha dad par mchis/ bcom ldan 'das phal mang po la bshad du gsol/ de nas bcom ldan 'das kyis bka' stsal pa/ gnam ni stangs/ sa ni 'byal/ zla ba ni pho/ nyi ma ni mo/ gnam sa gnyis ni 'byor na rtsi shing thams cad skye'o//nyi zla gnyis nyin res kyis 'khor na dus bzhi tshigs brgyad mngon par snang ngo / /me chu gnyis tshogs na skye ba thams cad dus bzhin du 'byung ngo / /pho mo gnyis 'dum zhing 'byor na bu tsha mdzangs su skye'o/ /dge ba spyod cing mi lus thob pa ni sen mo'i steng du rdul chags pa dang 'dra'o//mi dge ba spyod cing dang byol song dang / sems can dmyal ba mang por skye bar 'gyur ba ni sa gzhi dang 'dra bar mang por 'gyur ro/ /gnyen byed pa'i tshe dang / bu btsa' ba'i tshe snang brgyad lan gsum bklags na de'i dge ba'i rtsa ba gcig gis gcig bskyed nas srid kyi sgo ni mtho/mi ni btsan/ bu tsha ni 'phan zhing mdzangs la sri zhu che/ legs pa'i dpal dang ldan par 'gyur ro/ /de nas byang chub sems dpa' 'di rnams bzhengs pa'i mtshan la byang chub sems dpa' bla na med pa dang /byang chub sems dpa' dge ba'i bshes gnyen dang / byang chub sems dpa' spyan rnam par dag pa dang / byang chub sems dpa' ri bo'i dpal dang / byang chub sems dpa' skyabs chen dang / byang chub sems dpa' 'khor lo'i rgyal po dang / byang chub sems dpa' dri ma dag pa dang /byang chub sems dpa' mthun sbyor dang brgyad kyis bcom ldan 'das la gsol pa/ bdag cag gi snga ma 'das pa'i sangs rgyas bcom ldan 'das rnams las thos pa'i sngags kyi snying po brjod cing gsol na/ byin gyis brlab tu gsol/ oM A ka ni/ ni ka ni/ A pI la/ man d+ha le/ man d+ha le swA hA/ bcom ldan 'das kyi bka' dang gsang sngags 'di las log pa dang / 'da' ba zhig mchis na mgo tshal pa bdun du 'gas shing lus kyi yan lag tshig par 'gyur ro/ /yang thogs pa med pa'i byang chub sems dpas bcom ldan 'das la 'di skad ces gsol to//yi ge 'di ji ltar snang brgyad ces bgyi/ bcom ldan 'das kyis bka' stsal pa/ snang zhes bya ba ni mngon par shes pa la/ brgyad ces bya ba ni bye brag 'byed pa'o/ /theg pa chen po'i mdo bya ba byed pa'i gzhung snang zhing shes te rnam par shes pa'i rgyu rkyen gcig gis gcig stong pas yi ge dang chos su yod de/ming snang brgyad kyi yi ge zhes bya'o/ /mig gzugs rnam par shes pa yin/ rna ba sgra rnam par shes pa yin/ sna dri rnam par shes pa yin/ lce ro rnam par shes pa yin/lus reg bya rnam par shes pa yin/ yid bye brag 'byed pa'i rnam par shes pa yin/ snga ma drug shes shing 'brel par shes pa ni tha mi dad de kun gzhi rnam par shes pa dang brgyad do/ /rnam par shes pa brgyad kyi rtsa ba dang / dngos po stong zhing zhi ba yin te/ der dmigs na mig gi rnam par shes pa ni snang ba'i byang chub sems dpa'o//rna ba'i rnam par shes pa ni sgra grag pa'i byang chub sems dpa'o/ /sna ni dri sna tshogs 'byed pa'i byang chub sems dpa'o/ /lce ni ro rtog pa'i byang chub sems dpa'o/ /lus ni 'jam rtsub 'byed pa'i rnam par snang mdzad do//rnam par snang mdzad ni mchog /gtsang rnam par snang mdzad dang / me long lta bu'i rnam par snang mdzad dang / 'od rnam par snang mdzad dang / yid mi g.yo bar yang dag par shes pa'o/ /sems ni rnam par dmigs pa'i dbyings so/ / kun gzhi rnam par shes pa shes rab kyi thar pa chen po ste/ sangs rgyas kyi chos so/ /mtshan ni stong pa'i mdzod ces bya'o/ /mi la la zhig khyim sar ba brtsig gam/ khyim sar par zhugs te bkra shis par 'dod na snang brgyad lan gsum bklags na bkra shis par 'gyur ro/ / snang brgyad yi ger bris* sam/ bklags sam/ kha ton du bton na/ bsod nams kyi phung po dpag tu med pa dang ldan par 'gyur ro/ /chos kyi mdo 'di bshad pa'i tshe dge slong pha dang / dge slong ma dang / dge bsnyen pha dang / dge bsnyen ma dang / mi drug khri drug stong gis chos zag pa med pa'i gzungs thob bo//sa yang rnam pa drug tu g.yos so/ /grangs med pa'i lha dang / klu dang / lha ma yin dang / nam mkha' lding dang / mi'am ci dang / lto 'phye chen po dang / gnod sbyin dang / mi dang mi ma yin pa la sogs te/ chos kyi mig gtsang ma thob bo//byang chub sems dpa'i chos byed do/ /sems can phal ba brgyad khri chig stong gis dgra bcom pa'i 'bras bu thob bo/ /bcom ldan 'das kyis de skad ces bka' stsal pa dang / byang chub sems dpa' bla na med pa la sogs pa thams cad kyis bcom ldan 'das kyis gsungs pa la rjes su yi rangs te mngon par bstod do/ /'phags pa snang brgyad ces bya ba theg pa chen po'i mdo rdzogs /

CLOSE WINDOW